رواية ﮼صفقة ﮼عشك الفصل السادس عشر 16 - بقلم ﮼الاميره،الموسويه 👑

بقلمي(هدى الموسوي ) الاميره الموسويه 👑

ما احلل لاي شخص ياخذ كتاباتي وينشرهم (ذمه)

سدن .. شنوو!!

بسام .. سمعتيني كلش زين لتغشمين روحج لج .. هسه تكليلي منو هذا الي طالعه ويا ؟!
اليوم ادفنج والله واغسل عارج.

سدن .. اااااه بسام الله يخليك بس عوف شعري واني افهمك اااخخ شعريي والله دتأذيني بساااااام.

بسام .. لج احجيييييي منو هذا منووو خلي اروح اشرب من دمه ودمج اليوم.
هسه عرفت ليش رفضتي نورالدين !!
عاشكتلج واحد مووو؟!!
اليوم انهيج والله انهييييج اذا متحجين.

سدن .. سحبت نفسي من بين اديه بكل قوتي بحيث خصله من شعري راحت بأيده من دفعته.
بصوت حاد وعيوني حمر من الالم الي احسه بشعري...

_انت شدتحجييييي شدتحجي .. لك بابا انت مخبل والله مخبل روح عالج نفسك.

بسام .. هااااا وتطولين السانج فوكاها؟!
ولج الج عين وتحجين ساقطه عار اليوم اذا ما ذبحتج ما اتسمى بسام.

سدن .. اييييي اكتلني يلا .. اكتلني وخلصني من عقلك المريض .. والله يا بسام اذا اكو عار فهو انت !
وين كان اللسانج وغيرتك لما كنت واكف يمي والباشا مالتك واخو يتغزلون بيه؟!!
وين كانت رجولتك لما الحارس مال الباشا مالتك مسح بيه الارض ومد ايده عليه؟!
وين كان ضميرك لما ضحكتو عليه انت وابوك بعيد ميلادي ؟!

هسه حاي تبيع براسي شرف وبطولات؟!!
اسمعني زين اذا مديت ايدك عليه لو اتقربت خطوه وحده مني اني اكتل نفسي واسويلكم فضيحه لا صارت ولا تصير سمعتنييييي لووووو لاااااا وروح ماما يا بسام لا اخليك فرجه للعالم .

بسام .. هلا هلاااااا .. ولج شنو هذا اللسانج؟!
هاي الصلافه والوكاحه منيييين متعلمتها؟!
لج فوك طيحان حظج وسفالتج يا ادبسز اتلاسنين وتهددين؟!!

سدن .. هذا مو تهديد دااحجي صدوك .. كافي سكتتلك هواااي اني مو لعبه ولا جاريه عندك كل يوم جايبلك مصيبه ومخليها براسي!
اذا شفتني بعينك طالعهويا واحد هسه اني بنفسي اكتل روحي لتعب نفسك .. يلا كولي شنو دليلك؟!!!
لو بس لغوه زايده وتتمرجل عليه كل ما صحلك.

بسام .. لغوه زايده مو يا ادبسز؟!!
ماشي هاج شوفي هاي الرساله .. من منووو؟!!

سدن .. اخذت الموبايل من ايده .. شفت رقم دازله مسج اني صابرين عندي شغله ضروريه وياك بخصوص اختك سدن اذا حاب تعرفها تعالي لهذا العنوان.

سدن .. صابرين؟!!!!!!!!!!!!!

بسام .. صديقتج بعيونها شايفتج صاعده ويا واحد من يم باب البيت!
وعدها صور لسيارته هم .

سدن .. جذابه.

بسام .. لج انتي شنوو شايفتني غبي كدامج!!!!
رحتلها وبلسانها كالتلي كلشي .. شنو جذابه؟!
وشنوو مصلحتها حتى اتجذب عليه وتسوي مشكله ؟!

سدن .. شوفتك صور الي صاعده بالسياره؟!!

بسام .. لا بس شفت السياره واكفه ببابنا.

سدن .. شفتني صعدت ويا هذا الي دتكولك عليه؟!!

بسام .. لج انتي شنو تحققين وياي؟!
السياره موجوده بالصور والبنيه شافتج صعدتي ويا .. شنو تردين اكثر من هذا الدليل؟!

سدن .. اخاف انكر ويطلع شايفني من صاعده وديختبرني؟!
واخاف اكوله الحقيقه ويقتلني خلاص!!
شسوووووي هسه؟!!
الله لا ينطيج يا صابرين .. بس اصبريلي خلي اخلص من هذي المصيبه الا اسود عيشتج يا عار.

_هاي دتكذب عليك ..
سوت كل هذي المشكله حتى تنتقم مني اشون طردتها هذيج المره.
وانت بنفسك كلتلي لتحجين وياها بعد .. وهي اصلاً معروفه بكل المدرسه وحده حقيره وصاحبة مشاكل .. لانها معجبه بيك وتريد توصلك بأي طريقه لذلك اخترعت هذي القصه حتى تحجي وياك وتتقرب منك .. ولو كان كلامها صحيح كان صورتني واني صاعده بالسياره!
او حتى كان صورتني واني وهذا الي دتكول اني رايحه ويا.

بسام .. ملحكت اتصور لان هي بالصدفه ماره من يم بيتنا بالخط وشايفتج لذلك ممصوره غير السياره.

سدن .. لج صابرين شدعي عليج؟!
اخاف ادعي الله ياخذج  ويرجع عليه الدعاء لان ادري العار ميموت.

_كلتلك هذيييي كذابه وعندي استعداد اثبتلك كلامي .

بسام .. اشلون تثبتين؟!

سدن .. باجر روح وياي للمدرسه وكدامك اواجهه واسمع كذبها بنفسك.

بسام .. لج انتي شنو شايفتني زعطوط؟!

سدن .. والله انت لو العكس كان ما صدكت بوحده مثل هذي الحيه .. بس ما استغرب لانو شبيه الشئ منجذب اليه .
الي عندي كلته عجبك اهلا وسهلاً معجبك هسه اتصل ببابا وخلي يجي يشوف حل لنوبات خبالك هذي لانووو بعد مااتحمل.

بسام .. جرها من شعرها وضربها بكل قوته ... اسمعي لج السانج هذا متطولي عليه لا انهيج
راح اسكت وما اقتلج هسه مو حباً بيج لا .. بس لان الخطط الي ابالي تخرب اذا غسلت عارج .. بس والخلقج يا سدن اذا طلع الي كالته صديقتج صدك .. حتى ابوج ميخلصج مني  .. الا ادفنج بأيدي وروح امي.

سدن .. لو ما عيون بسام كانت تغلي من الغضب .. كان كلت ديمثل .
بس نبرة صوته كانت كفيله انو تخلي كل ذره بروحي ترجف .. مع ذلك بقيت هادئه رغم كل الخوف والرعب الي ديعصف بداخلي.
استغربت من نفسي اشون عندي قابليه ودااكذب بكل جرأه ولا كأنو مسويه شي!
كرهت نفسي ومشاعري حتى نورالدين كرهته .. لان خلاني احس هذا الاحساس الحقير!
عافني بسام وطلع !
طلع بس الشياطين الي بملامحه متنحزر .. الالم الي بوجهي وجسمي من ضربة بسام كان كارثي .. بقيت صافنه اريد بس افكر بحل ما اكدر
فكرة انو بابا وبسام يعرفون اني طالعه ويا واحد بدون علمهم متخليني اكدر اتنفس مو افكر!
بهذي اللحظه سمعت صوت بسام ورايه ...

بسام .. موبايلج وين جيبي.

سدن .. محاجيته بس فجأه بديت احس نفسي خاويه من الالم ومذنبه بنفس الوقت .. وكعت بالكاع بلا وعي !
اول مره بحياتي ينغمي عليه!
والاكيد انو السبب هو الظلام الي بعقلي والخوف مو بسبب ضربة بسام الي كسرت جسمي  '
فتحت عيني نايمة بالصاله .. اول شي خطر ببالي الموبايل !!
جريت نفسي وكمت اتوكى ع اي شي كدامي بالكوه وصلت لغرفتي ... بديت ادور ع الموبايل مااتذكر وين خليته .. بقيت ادور ادور نفسي انكطع من الحركه اسحل بروحي ارتكيت ع السرير بتعب سمعت صوت شي ديهتز جوه السرير!!
دنكت لكيته واكع بالكاع وديرن!!!!!!!!
باوعت رقم نورالدين !!
فتحت خط وبنفس مكطوع جاوبته ..

_ بسام .. بسام عرف طالعه وياك .. لتتصل بعد.

نورالدين .. بقلق وصوت جامد شبي صوتج .. ليش هيج مخنوك؟!!

سدن .. مبيه شي عفيه بس لتتصل لان حياخذ التلفون مني.

نورالدين .. بغضب ونبره حاده .. مد ايده عليج الحقير؟!!!

سدن .. معليك بي دااكولك لتتصل تفهمني لو لا؟!!

نورالدين .. الا ادفنه بأرضه اليوم .. اني اعلمه اشلون يمد ايده على مره العار هذا.

سدن .. بصوت مرعوب ... لاا .. لا لا لا ... الله يخليك لتسوي اي شي .. اذا حاجيته حيعرف انو اني دااكذب عليه .. اني نكرت الموضوع وكولتله مطالعه لتروح اتزيد الطين بله .. وتأذيني.

نورالدين .. تمام بس اهدي .. وفهميني اشلون عرف بالموضوع اني متأكد هو مسافر ومراقبه مستحيل يكون شافنه.

سدن .. بنيه صديقتي شايفتني و كايلتله .. واني كلتله كذب بس المشكله باجر حيروح وياي للدوام ويسألها كدامي مااكدر أنكر كدامها وهي شايفتني بعينها.

نورالدين .. تمام اني احل الموضوع .. وانتي ابقي ع كلامج.

سدن .. شحتسوي؟!!
لترووح اتسويلي مصيبه ويا صابرين هذي حقيره تفضحني.

نورالدين .. لتخافين من شي لا مسوين شي غلط ولا حرام واني ماعندي شي اخاف منه لا اخوج ولا عشره مثله هسه اروح اكله اني اخذتج وطلعنا بس خوفي الوحيد انتي ليأذيج
ولو ما رفضج وعنادج كان هسه انتي مرتي .. لان اني رايدج على سنة الله ورسوله.

سدن .. بعصبيه  .. اني بيا حااااال وانت شدتحجيييي .. شنو تواجهه شنو اتكوله طلعنا اتريد اتموتني انت؟!

نورالدين .. تمام اهدي  مراح اسوي شي يأذيج .. بس هذا اخوج اذا طلع ماد ايده عليج قسم بالله لا اكسرها اله.

سدن .. لتكوله اي شيييي ولا تسويله شي .. حروح ليجي وانت لتتصل بعد ولا ترسل لانو حياخذه للموبايل .. باي.

نورالدين .. من صوتها مبين انو مسويلها شي .. بس هي نكرت عنادها هذا مرض مأذيها ومأذيني .. اني اعلمك بسام خلي احل موضوع صديقتها واتفرغلك .
اتصلت بزيد كلتله اكو وحده بمدرسة الفلاني طالبه بالصف الفلاني اسمها صابرين باجر اريدك اتجيبها بسيارتك لفلان مكان واني انتظرك.
طبعاً زيد هو الي جابلي معلومات عن سدن اول مره لذلك يعرف صديقتها هذي وشايفها حتى اني شفت صورتها بالفايل الي سوا زيد لمعلومات سدن.
المهم ..
الصبح طلعت بسياره مظلله  لمدرسة سدن .. انتظرتها اتداوم واشوفها .. بقيت انتظر الطالبات كلهم دخلو وهي ماكو!
كلت يمكن دخلت ومشفتها .. بقيت انتظر لحد ما طلعو الطالبات للبيت .. هم دورت بينهم ملكيتها ..!
الظاهر اليوم ممداومه .. حتى اخوها الي ع اساس يجي اليوم يسأل ع الموضوع هم ما شفته!

بهالاثناء شفت زيد اجه بسيارته ويمشي ورا هذي الي اسمها صابرين وهي تتمضحك وتسوي حركات غريبه بمشيتها ..!
بعد كم دقيقه .. فتحت السياره وصعدت ويا.

اخذها وراح للمكان الي اتفقنا عليه .. اني وصلت قبله وكفت انتظر اشويه واجه زيد ركن سيارته بصف سيارتي .. كان كاعد بسيارته وهي كاعده بصفه بالصدر وتتمضحك !!
من تصرفاتها وصوتها العالي وضحكتها مبينه مو راحه مااعرف ليش سدن مصادقه هيج وحده!
هذا الموضوع هم بعدين انهاها عنه ..
اتصلت بزيد كلتله ينطيها الموبايل ... فعلا زيد انطاها الموبايل وكاللها هذا شخص يريد يحجي وياج ونزل من السياره .. بصوت جامد وهادئ حاجيتها ..

_اسمعي زين من اول ما طلعتي من المدرسه لحد هذي اللحظه انتي متصوره ، عندي صور الج وفيديو هم .

صابرين .. ملامحها انخطفت والخوف انرسم على وجها ... بصوت قلق انت منو وشرايد؟!!

نورالدين .. اني منو ميخصج اما الي رايده اذا ما نفذتي صورج تلكيهن قبلج واصلات للبيت.

صابرين .. شنوو .. لا ابوس ايدك عفيه امي مريضه بس اتشوفهن اتموت والله اسوي الي اتريده بس كول والله اسوي.

نورالدين .. تمام ..
الكلام الي كلتي لبسام عن سدن كله تنكري .. وتنسين الي شفتي نهائياً حتى بينج وبين نفسج متحجي.

صابرين .. سدن!!!!!!

نورالدين .. لتذكرين اسمها ع اللسانج .. وديري بالج اتفكرين مجرد تفكير تحجين وياها او حتى تتقربين منها او تحاولين اتسويلها مشكله مره ثانيه .. لان وقتها ما راح ادز صور الاهلج .. لا ادزلهم راسج.

صابرين .. انت منو حتى تهددني بالموت .. هسه اخذ رقمك واروح اشتكي عليك اكلهم هذا يريد يقتلني !

نورالدين .. ههه .. تمام اخذ الرقم وروحي اشتكي .. بس قبلها شوفي انتي وين كاعده و ويا منو؟!
وبعدها نتفاهم .. يلا سلام.

صابرين .. بصوت مرتبك وخايف .. انتظر اسفه اسفه.. مو قصدي والله الي تريده اسوي ومراح احجي اي شي ولا اقترب منها بعد ولا اجيب سيرتها وداعت امي بس .. بس اخوها اني كلتله اشلون اذا سألني؟!!

نورالدين .. مشكلتج هذي مثل ما سويتيها تنهيها .. وخلي ابالج كل خطوه تخطيها اعرفها لذلك لتحاولين تتذاكين ... طووط .. طوووط ... طوووط

اشرت لزيد يروحلها للسياره .. ودزيتله مسج كلتله تجيني للمكتب!

بعد تقريباً ساعه اجه زيد .. كال البنيه لكيتها ترجف بالسياره وطول الطريق بس اتردد يكتلني .. امي .. يكتلني .. امي .. يمكنها اتخبلت حرام عليك باشا.

نورالدين .. هذي جرة اذن مو اكثر حتى تتأدب ومتتدخل بشي ميخصها.

زيد .. ماشي باشا رايد مني شي بعد؟!!

نورالدين .. اي بس مو هسه اكو شغله خلي اتأكد منها وبعدها تعرف الي اريده شنو .. بس هسه ركزلي ع هذي الي اسمها صابرين خليها تحت مراقبتك اخاف تلعب بذيلها .

زيد .. تأمر امر باشا.

نورالدين .. راح زيد واني بقيت محتار ليش سدن اليوم ممداومه!
مو على اساس اتروح هي واخوها حتى يتأكد من كلام صديقتها .. زين ليش مراحت؟!
اكيد اكو أنه بالموضوع .. بس لا مسوي بيها شي هذا الكلب؟؟؟
بعد تفكير طويل .. خلصت كل الاحتمالات الي خليتها بعقلي .. وقررت اروح بنفسي وأتأكد ما بيها شي حتى اتطمن.
اخذت السويج وطلعت من الشركه بوجهي لبيت بسام .. وصلتلهم المغرب تقريباً .. لكيت سيارة اخوها واكفه بالباب!
نزلت بهدوء رنيت الجرس .. ..
بعد كم دقيقه طلعلي بسام بس شكله مخربط الظاهر كان نايم!
من شافني اتفاجأ.

بسام .. باشا؟؟؟؟؟؟!

نورالدين .. بحده .. مرحبا.

بسام .. اهلا .. اهلا باشا .. خير صاير شي؟!

نورالدين .. لا ماكو شي .. اشبيك لونك انخطف شنو شفت شبح؟!

بسام .. هااا .. لا لا .. هههه .. بس بصراحه اتفاجأت مو من عادتك تجي وخصوصاً بهيج وقت فكرت صاير شي!

نورالدين .. راح ابقى واكف بالباب لو شنو؟!!

بسام .. لا العفو باشا  .. بس المفاجأه نستني اتفضل اتفضل باشا البيت بيتك ...

نورالدين .. دخلت للبيت بسرعه اتذكرت من بقت لحالها بالبيت يوم اخوها اتصوب .. وبقيت يمها .. بس هالمره البيت بارد مو مثل ذاك اليوم كان دافي ومضوي!!
دخل هو كدامي واني ورا دخلت ، بقيت اتلفت بلكي اشوفها ... بس ماكو!
كعدني وراح للمطبخ جابلي كلاص مي وعصير !

بسام .. يا اهلاً واسهلاً باشا زارتنا البركه.

نورالدين .. شكراً .. الوالد وين ؟!

بسام .. ابويه مسافر مو تدري بي.

نورالدين .. اي بس ع بالي رجع .

بسام .. لا والله بعده ، خير باشا اذا رايد شي تمدر اتكولي واني اوصله للوالد.

نورالدين .. لا ماكو داعي من يجي سيد كريم عود نحجي.

بسام .. اي براحتك باشا.

نورالدين .. شنو وحدك بالبيت؟!!

بسام .. هاا .. لا اني واختي سدن الي عرفتك عليها من اجيت هذيج المره.

نورالدين .. اي اتذكر لعد وينها؟!!

بسام .. اهااا هسه عرفت شنو الموضوع الي تريد تحجي ابويه بخصوصه .. اكيد اتريد تخطب سدن.
سدن مريضه اشويه فصعدت نامت.

نورالدين .. تمام مشافاة ان شاء الله .. ان صار لازم اروح.

بسام .. بعد وكت باشا خليني اضيفك .. حتى عصيرك ما شربته.

نورالدين .. غير مره اوعدك راح اشرب اني وياك عصير قريباً .

بسام .. ابتسم ع باله يقصد عصير خطوبة اخته وبسام.

نورالدين .. مثل ما كنت حاس هذا العار اكيد مسويلها شي .. بس اشلون اتأكد حتى ع الموبايل ما اكدر اتصل ماخذه منها الحقير؟!!
اووووف لو تخليني اني اتصرف واخذ روحه.
شغلت السياره وطلعت للبيت كبل لكيت يمان كاعد يلعب بلي هو وأصدقائه والبيت صاير هوسه!
سلمت عليهم وصعدت الغرفتي سبحت ، بدلت ملابسي واخذت سيارتي الرياضيه .. وطلعت
ممرتاح احس نفسي قلق .. لازم اعرف اشبيها .. بلا تفكير رحت البيتهم وصلت تقريباً الساعه 11 بالليل ركنت السياره بعيد عنهم ونزلت البيتهم مشي .. الجو كان بارد ومحد بالشارع!
بقيت واكف كدام بيتهم وصافن ع غرفتها .. الغرفه الي لما كالت اكو خرامي بالبيت صعدت وشفتها ..!
لأول مره احس نفسي محتار مااعرف اتصرف .. من عرفتها بدت تواجهني اشياء ما اكدر احلها.
صفنت ع شباك غرفتها واتمنيت بس تطلع .. بس ينفتح .. بس اشوفها حتى هذا الشعور الي دااحسه يختفي وارتاح!
بس ماكو.
بلحظه حسمت قراري وسويت الي اجه ابالي .. خليت رجلي ع السياج وصعدت ع الحايط .. ع الشباك .. ع البلكونه !
اخذت هذي الخطوه والقرار بلا اي تفكير .. هذا الشخص مو اني واحد غبي ومستهتر .
لان نور الدين الي اعرفه ميطلع هيج طلعات.. شنو الي خلاني اتغابى لدرجة اصعد بيوت الناس بلا علمهم!

وصلت البلكونه .. الغرفه ظلمه .. وباب البلكونه مقفول .. بهدوء دكيت ع الباب ..!
دكه دكتين .. ماكو رد !
كان كل خوفي لا تفكرني حرامي  وتنزل الاخوها .. هنا سمعة نورالدين راح تنتهي!
يا ترى هي تستحق هذي التضحيه ؟!
خلص نور هسه مو وقت افكارك .. ولا راح تلكى اجوبه الاسئلتك .
رجعت دكيت ع الباب مره ثانيه .. بهدوء ... واذا بالضوه انفتح!

يارب واخيراً ... بس يا ترى منو هذا الي فتح الضوه هي لو ؟!

بقيت واكف بمكاني وعيوني مركزها بحده ع الباب .. اخوها ميهمني سواء  شافني او لا.
بس الي يهمني لا هي تتأذه بسببي!
ليفكرها متفقه وياي وهذي مو اول مره اجيها؟!
هذا الي كان مخوفني .
بعد عدة ثواني .. انرفعت البرده الي ع الباب ... وشفتها................!

نظره وحده منها كانت الجواب ع كل أسئلتي .. شنو سمعه .. شنو اسم .. شنو املاك .. شنو جسد .. شنو روح ... شنو نورالدين.
كل هذولي لا شئ مقابلها.
من شافتني انصدمت .. حسيت عيونها ممصدكه الي دتشوفه !
ابتسمت بوجها هي بسرعه نزلت البرده.

سدن .. بعد ما حجيت ويا نورالدين بالموبايل .. حذفت رقمه وكولشي يخصه وقفلت باب الغرفه عليه.
رجعت نمت بفراشي مثل الجثه الخامده .. احس روحي مفارگتني .. وما الي خلك اي شي.
والسبب مو ضرب بسام الي ... لا.
كنت كارهه نفسي لان اني الي وصلت روحي لهذي الحاله.
اني الي خنت ثقة اهلي .. وشوهت سمعتي يم صابرين الي حتفضحني كدام العالم .. وخليت بسام يمد ايده عليه ويضربني .. وفوك كل هذا كذبت بكل صلافه.
كل هذا الي سويته بنفسي على شنووووو؟!
شحصلت؟!
طلعه خلصتها بخوف وقلق .. طلعه من البدايه كنت اعرف نهايتها شنو!

هذي الافكار هي الي خلتني اوصل لهذي الحاله .. حتى بابا مااكدر اتصل بي واستنجد من بسام .. لانو كنت احس نفسي مذنبه وغلطانه بحقه.
يمكن البعض حيكول اني مكبره الموضوع وممسويه جريمه او شي عادي ويصير عند اغلب البنات.
لا مو عادي ومو طبيعي وفعلاً جريمه الي خلص حياته كولها ماشي عدل وممسوي شي غلط عنده هذا الشي كولش كبير و مو سهل ولا يكدر يتقبله.
كعدت بفراشي وبقيت ابجي .. ابجي .. ابجييييييي ...
ع حياتي الي دتمشي واني مشفت منها شي.
ع عمري الي ديروح واني لا ام مثل الناس .. لا اب .. لا اخ.
امي راحت وعافتني .. ابويه راح عاش حياته وشمرني بيد بسام .. واخويه الي ميفكر غير بمصلحته.
قررت انهي حياتي .. اني شكو عايشه اصلاً شنتظر من هالحياة .. بعد كل الي عشته هسه بالاخر بسام وبابا حيزوجوني غصب عني واكل باقي حياتي بعذاب وتعاسه!
شكوو منتظرتهم يقررون مصيري وينهون حياتي هم .. اني انهي حياتي بأيدي واخلص احسن.

هذا كان ثاني اسوء قرار اتخذته بحياتي بعد قرار الطلعه الي طلعتها ويا نورالدين .. بس هذاك كان بأرادتي اما هذا كان شيطان يوسوس بعقلي ..

بلحظة ضعف مني .. اخذت الكلاص وجرحت ايدي !
بقت ايدي تنزف قوي الدم احسه ديطلع من گلبي مو من اديه .. وجع فضييييع اخذ روحي .. صفنت ع الدم برعب ... لحظات وعيوني بدت تنسد لحالها .. بديت احس بتعب قوي بكل جسمي.
مدريت بشي بعد .... فتحت عيوني بغرفه مو غرفتي ولا ببيتنا اصلاً!!
عرفت اني بالمستشفى .. درت وجهي لكيت بسام واكف كدامي!
من شافني ملامحه عصبت بسرعه وخزرني .. بس محجه شي.
باوعت ع ايدي مضمديها .. بقيت كم ساعه بهذي الغرفه بعدها طلعنا .. حسب كلام الدكتور انو بسام ملحك عليه ببداية النزيف والا كان متت.

حتى موت متخليني اخلص منك وارتاح .. حتى بيني وبين الموت واكف يا بسام.
كعدت ع كرسي متحرك ، اخذتني الممرضه لحد السياره وساعدتني اصعد السياره .. اجه بسام ورانا صعد بصفي وتحركنا .

بسام .. هاي فوك عملتج وطيحان حظج الي سويتي تنتحرين؟!
تردين تجيبين العار الابوج وتنزلين راسه كدام الناس؟!

سدن .. درت وجهي عنه ومحجيت ويا ولا كلمه .. لا عندي حيل ولا خلك احجي اصلاً.
بقى يلغي ويهدد ويتوعد .. بس يتأكد من صابرين ويطلع كلامها صدوك يذبحني ... وووووووووو .
علوا تذبحني واخلص من خلقتك وجشعك وغرورك .
وصلنا للبيت حتى مساعدني انزل من السياره ولا دخلني البيت عافني ونزل.
بقيت اني اسند بنفسي والزم اي شي كدامي الى ان دخلت البيت كعدت بالصاله ارتاحيت وبعدها صعدت الغرفتي .
شمرت نفسي ع السرير ودموعي صبت لحالها ... شهالدموع سدن صايره رقيقه انتي الي كل سنه تنزل منج دمعه هسه من كلمه تبجين!!
دقايق والباب اندفع ودخل عليه بسام مثل الثور الهايج ...

بسام .. وين موبايلج؟!

سدن .. أشرتله بأيدي ع الميز .. اخذه وطلع.

من التعب النفسي والجسدي خليت راسي ع المخده وغفيييييييييييت!
فزيت الساعه ب2 الظهر!
بسام مو كال ياخذني للمدرسه حتى يحجي ويا صابرين؟!
معقوله دك الباب ومسمعته؟!
بس هذا مثل الحيوان يدفش .. ليش ما كعدني؟
كنت تعبانه كولش ونعسانه .. فرجعت نمت كعدت العصر حيل شربت مي من الثلاجه مالتي وكعدت بفراشي!
سمعت بسام اجه للبيت .. كمت قفلت الباب هو مأجه ولا حجه وياي حتى مكالتي شأكلتي ششربتي .
المغرب سمعت صوت واحد يحجي ويا بالبيت مااعرفه منو كنت خاويه كولش ما اكدر اتحرك من مكاني.
خلصت هالفتره بس نوم ... لحد الليل سمعت صوت بالبلكونه!!!!
يا ربي بس لا حرامي؟!
اتغطيت ونمت كلت هذا صوت الهوا لو الدنيا دتمطر .. رجع الصوت مره ثانيه بس هالمره اتأكدت هذا صوت واحد ديدك الباب..... !
ما اعرف اشكومني من مكاني اني الي مااكدر احرك اصبع .. كمت ع حيلي فتحت الضوه ورفعت البرده......
وهنا الي شفته صدمنيييييي .. لدرجه حسيت انفاسي شبه انقطعت.
معقوووووووووله .. نور الدين!!!!!!!!!!!
ردة فعل لا اراديه نزلت البرده.
مااعرف شسوي .. وبسام .. بسام اشون لا يشوفه يا ربي هذا اكيد اتخبل شجابه بنص الليل وصاعد لغرفتي!!
رجعت بسرعه فتحت الباب ودخلته .. بصوت غاضب ومرتبك ..

_انت اتخبلت ... شدتسووووووي هنااا .. شجابك.

نورالدين .. بقيت صافن بملامحها التعبانه .. خدها ازرك وعينها حمره .. گلبي دينعصر لوضعها .. بدون وعي مديت ايدي لزمت خدها ... ضربج مو؟!!

سدن .. بعدت ايده عني بسرعه ورجعت ليوره ... شكو اجيت اكولك لتتصل تجيني للبيت؟!
انت اتريد اتموتني لوووو شنو؟!!

نورالدين .. بحده وغضب .. سألتج جاوبيني لا وحق الله هسه انزل ادفنه بالشارع .. كليلي هو الي سوه بوجهج هيج مووو؟!

سدن .. ملامحه كانت اتخوف وعيونه عباره عن ظلام .. كان يحجي بغضب لدرجه اني خفت منه ..
محد ضربني اني دااصعد لغرفتي و وكعت من الدرج.

نورالدين .. انتي شنو ع بالج اني طفل اتضحكين عليه لو ع بالج اخوج وتكذبين عليه مثل ما كذبتي عليه؟!

سدن .. اشكد كنت متأذيه وموجوعه .. بس كلامه هذا طعن گلبي .. معرفت ارد عليه بس ادموعي نزلت .

نورالدين .. اسف اسف اسف .. مووو قصدي اسف .. بس متعرفين واني دااشوفج بهذا الوضع ومااكدر اسوي شي شيسوي بيه.
ليش متخليني اشرب دمه.

سدن .. روح منا.

نور الدين .. انتي ليش اتصديني ليش اتبعديني عنج بس فهميني لييييش؟

سدن .. لان اني كذابه .. ولان اني اضحك عليك .

نورالدين .. حالتج هذي اتخليني اريد ارتكب جريمه مو بس اعصب .. حاولي تتفهمين لان والله بالموت لازم نفسي.

سدن .. ماشي متفهمتك بس روح ليجي بسام.

نورالدين .. تمام رايح وموضوع صابرين انحل اذا اخذج للمدرسه روحي وواجهيها مراح تحجي حرف واحد.

سدن .. شكراً.

نورالدين .. هه راح اتخبليني انتي .. صرت حرامي بيوت من وراج وتكليلي شكراً.

سدن .. بداخلي كنت اضحك ع كلامه .. صح بالاول جرحني بس الي ماله بعدين خلا گلبي مثل حمامه يرفرف.
طلع من البلكونه وسديت الباب ورا بسرعه .. رجعت لفراشي گلبي يرجف مثل العلم الي بنص ريح .. حتى جسمي يرجف.

بقيت اعيد كلامه مرات ومرات بعقلي .. عقلي الي مدايستوعب نورالدين الباشا بنفسه يجي نص الليل ويصعد للبلكونه حتى يشوفني؟!!

ع هالمنوال غفيت ... كعدت الصبح ع صوت بسام ..

بسام .. كومي بدلي اخذج للمدرسه اريد اشوف صديقتج واتأكد من كلامها .

سدن .. كمت بدلت وشربت كلاص حليب لان دايخه مااكدر اوكف ع رجلي ، بعدين اخذني بسام و رحنا للمدرسه .. من طلعت شفت سياره غريبه اول مره اشوفها ومو سيارة نورالدين!
وصلنا للمدرسه شفت صابرين دتمشي اتريد تدخل من شافتنا ارتبكت ومشت سريع .. اني صحتلها موكفت .. راحلها بسام .. بقى يحجي وياها وهي تصيح
سمعتها اتكوله اني كنت غلطانه موسدن الي شفتها وحده ثانيه واني ع بالي اختك.
بقى بسام يصيح عليها ويغلط شافه الحارس يصيح .. اجه حجه ويا واخذنا للاداره
رحنا للاداره حجه بسام ويا المديره كاللها هاي البنيه تحجي ع اختي وتريد اتشوه سمعتها .. اتكول شفتها صعدت ويا ولد بالسياره واني بسببها حتى مديت ايدي ع اختي وصارلها يومين بالفراش .. واليوم من واجهتها ويا اختي نكرت وتكول غير وحده!

المديره .. لااا مستحيل سدن طالبه مجتهده وملتزمه ومؤدبه ماعدها هذي السوالف اكيد زميلتها مشتبها .

صابرين .. اي ست اني غلطت ع بالي سدن بس هي غير بنيه واعنذرت من اخوها بس هو بقى يصيح.

بسام .. اصيح واكسر راسج هم شنو تتهمين اختي وتشوهين سمعتها .. احنا ناس محترمين تجي وحده مثلج تفضحنا شنو يفيدني اعتذارج لو ميته اختي البارحه؟!

المديره .. احسبها علينا استادء بسام انتو معروفين و والوالدك السيد كريم غني عن التعريف .. بس الخطأ وارد بكل مكان واني راح اتخذ الاجراء اللازم بحق الطالبه الي ساءت الاخت حضرتك.

بسام .. غير الفصل ميقنعني والا راح اشتكي عليها واسويها كبيره.

سدن .. لااا ماكو داعي صابرين صديقتي واني مسامحتها .. ورجاءاً ست لتفصليها اني مسامحتها .

بسام .. انتي شدتحجين؟!!
لج هذي شوهت سمعتج وشوفي شصار بيج بسببها.

سدن .. بسام رجاءاً سد الموضوع البنيه غلطت ع بالها اني ماكو داعي اتكبرها.
عفتهم وطلعت لان نفسي لعبت من كلام بسام الي يمجد بأخته وعائلته .. حسيت نفسي قذره ومو اهل اشيل اسم عائلتي.

اخذلي بسام اجازه ورجعت للبيت .. بالطريق حاول يعتذر مني ويتأسف بس اني معبرته اصلاً ولا نطقت ويا حرف واحد.
وصلنا للبيت صعدت الغرفتي كنت تعبانه حيل ماادري شنو هالتعب الي مسيطر عليه.
بدلت ملابسي ونزلت اسويلي عصير لان حيل معدتي أذتني ودايخه الظاهر من الجوع!
دخلت المطبخ سويتلي كلاص عصير برتقال شربته وطلعت للصاله لكيت موبايلي عايفه بسام ع الطاوله!

فتحته مبي شي مثل ما عفته البارحه فارغ .. دكيت رقم نورالدين ردت اتصل بي واكوله الموضوع انحل !
بس بعدين اتراجعت .. بعد الي صار لازم اقطع كل علاقتي بي كافي الي صارلي بسببه وهذا الشي اصلاً غلط.
حذفت الرقم وشمرت الموبايل .. خلصت اليوم نوم ..كعدت ع صوت الباب ديندك قويي!!!!

بسرعه كمت فتحت الباب واذا محمود ساند بسام .. وبسام ايده و رجله مجبسين
و وجه كوله دم!!!!!!!!!!!!!!!

للحكايه بقيه 🤗

السلام عليكم.
اني صح كلت بين يوم يوم وملتزمه بموعدي بس نزلت تنويه ع الانستا انو بعد الاربعينيه مالت الامام انزل بارت واليوم هم نزلت ستوري كلت بالليل ينزل البارت
يعني ماله داعي الكلام الزايد والمذمه من البعض

بس من ورايح راح استخدم اسلوب جديد حالي حال باقي الكاتبات
اي وحده تحجي كلام زايد او تجاوز او اسلوبها مستفز (بلوك) 🙂
عندج انتقاد محترم وبأسلوب مؤدب ع راسي من فوك لا والله تتفلسفين وتتأمرين ع بالك اشتغل عندج يجيج بلوك وفضت راحت.

واخر شي هذا البارت كولش طويل لحد تكتب قصير 😒
وبي كوووومه احداث لتكولن ماكو احداث ، خلني اكتبها بالتسلسل حتى تصير حلوه لتستعجلني وتصير حشك وفاشله.

رأيكم بالاحداث وتوقعاتكم للبارت القادم
لتنسووووووون التصويييييييييييت 🤗 حتى ينزل البارت التالي 🙋🏻‍♀️🚶🏻‍♀️