رواية ﮼صفقة ﮼عشك الفصل الرابع والعشرون 24 - بقلم ﮼الاميره،الموسويه 👑

بقلمي الاميره الموسويه 👑

ما احلل لاي شخص ياخذ كتاباتي وينشرهم (ذمه)

أيظن أني لعبة بيديه ؟

أنا لا أفكر في الرجوع إليه

اليوم عاد كأن شيئا لم يكن

وبراءة الأطفال في عينيه

ليقول لي : إني رفيقة دربه

وبأنني الحب الوحيد لديه

حمل الزهور إليّ .. كيف أرده

وصباي مرسوم على شفتيه

ما عدت أذكر .. والحرائق في دمي

كيف التجأت أنا إلى زنديه

خبأت رأسي عنده .. وكأنني

طفل أعادوه إلى أبويه

حتى فساتيني التي أهملتها

فرحت به .. رقصت على قدميه

سامحته .. وسألت عن أخباره

وبكيت ساعات على كتفيه

وبدون أن أدري تركت له يدي

لتنام كالعصفور بين يديه ..

ونسيت حقدي كله في لحظة

من قال إني قد حقدت عليه؟

كم قلت إني غير عائدة له

ورجعت .. ما أحلى الرجوع إليه

سدن .. گلبي انقبض من شفت المسج .. وبلا اي تفكير عرفت منو سبب كلام لؤي هذا!!
هو ماكو غيره بلوة عمري اكيد عرف بموضوع الخطوبه وراح كال اللؤي عندي علاقه بي وشوه سمعتي الي ميخاف الله .. بعد بيا وجه اروح للكليه هسه لؤي ينتقم مني ويفضحني!

لبست التراك ونزلت لبسام بس غضب بليس كوله براسي .. بدون ماادك الباب فتحته ودخلت لكيته نايم !!!
سحبت الغطى منه و بصوووت عالي وغضب ...  بساااااااااام اكعد .. بساااااام..!

بسام .. فز من مكانه مرعوب .. شصار شكووو اشبيييج شصاييييير؟!!

سدن .. متعرف اشصاير حضرتك؟!!
شمرت الجهاز كدامه ع السرير بقوه ... هاك اقرا وانت تعرف شصاير؟؟

بسام .. اخذ الموبايل وقرا المسج!!
رجع شمر الجهاز عليها .. الله ياخذج ع بالي واحد مات .. ع بالي الشركه احتركت .. مخبله انتي ؟

سدن .. يعني تعرف بالموضوع مستغربت !!

بسام .. اي اعرف واني الي كلتله الخطبه انلغت.

سدن .. لويش تسوي هشكل؟!
بأي حق تنهي خطوبتي بدون حتى متاخذ رأيي ، مفكرت بسمعتي اشون الي وجه بعد اروح للدوام .. اشون اواجه الناس وكلامهم .. مفكرت بأختك شنو من بشر انت؟!

بسام .. احمدي ربج انلغت الخطبه وبس ، زين ما موته لخطيبج المحترم .

سدن .. وشنو يموته هي تايهه لو تايهه .. منو شايف نفسه هذا الحقير حتى يتحكم بحياتي .. بس والله لو يموت مااصير له ولا اقبل بي.

بسام .. تقبلين ورجلج فوك راسج فهمتي لو لا.

سدن .. هه من حقه الباشا يسوي هشكل يفصخ خطوبتي ويحدد مصيري حتى حياتي هم ينهيها اذا يشوف اخويه هشكل مضحي بيه شكو الومه بعد.

بسام .. امشي ولي من خلقتي اريد انام لا اكوم السانج هذا الزفر اكصه .. اطلعي بره يلا.

سدن .. ماشي بسام راح اطلع بس هسه اتصل ببابا واخلي يعلمك ع الي سويته انت وباشتك المعفن.

بسام .. بصوت عالييي ... ولييييييييييي.

سدن .. حرگة كلبي وصلت لسابع سما .. مثل متوقعت هو السبب !
شسوي هسه اشون اتخلص من هالفضيحه .. لؤي اكيد هسه شهرني شهيره بالجامعه
سمعتي واسمي الي اتمرغلو بالزباله شسوي وين مااخليها سوده مصخمه ، عود رضيت بلؤي حتى اخلص منه ورطت روحي بمصيبتين لا خلصت منه ولا حفظت كرامتي.

اتصلت ببابا وحجيتله ع الي سوا بسام .. كالي انو هو راح يتصل بي ويحجي ويا .. وان شاء الله خير!!!!!!

يا خير الي يجي من ورا بسام العار وباشتا الحقير ..!

بدلت ملابسي بسرعه وطلعت للدوام .. حتى الوقت متأخر اول محاضرتين طارو الحمدلله ... بس المهم اروح اشوف حجم الورطه الي ورطت روحي بيها انتشرت بالجامعه لو بعدها؟!
اخذني محمود ذبني وراح اتصلت بصديقتي براء مترد !!
رسلتلي مسج اني بالمحاضره انتي وينج ليش ماكو ليهسه؟!

كلتلها بعدين افهمج اني بالحديقه الاماميه انتظرج تعاليلي بسرعه!!

براء .. هسه ح تخلص المحاضره واجيج انتظري.

سدن .. كعدت انتظر براء واني خاتله بالحديقه مثل الي بايكله بوكه .. اشويه واجتي براء !!

براء .. لج اشبيج خوفتيني شصاير؟!

سدن .. اسكتي شحجيلج مصيبه ووكعت ع راسي .

براء .. يا ستار شكو لج سدن احجي قلقتيني بكلامج.

سدن .. حجيتلها الي صار كوله و شوفتها المسج الي دزه الي لؤي!!

براء .. يااااااااااا هسه عرفت لويش لؤي اليوم من الصبح مدخل للمحاضره ويم ادارة القسم ، وج بس لا ديشتكي عليج!

سدن .. يمعوده شنو يشتكي عليه انتي الثانيه قابل هو مركز شرطه ؟!
وبعدين شنو مسويه جريمه ويشتكي عليه ، وج حتى ماادري بالموضوع اليوم الصبح انصدمت بالمسج مالته.

براء .. لعد اكيد ديريد ينتقل والا شكو عنده يم رئيس القسم ؟!

سدن .. هسه عوفيني من لؤي ورئيس القسم .. احجيلي اكو واحد قسمنا سمعتي يحجي بهيج شي او اني هم احد جابني بالطاري؟!!

براء .. لا ماكو هيج شي اصلاً اني هسه استغربت من سمعت الموضوع منج.

سدن .. اااااااف .. وج براء حموت والله ، مااعرف شسوي .. واشون اواجه لؤي واحجي ويا حتى افهمه بالموضوع بلكي يقتنع.

براء .. لا سدن لا .... بعد هذا المسج الي رسله الج ما انصحج تشوفي اصلاً!
اني اكول انتي هسه اتصلي بالسايق مالتكم وارجعي للبيت واني حشوف الاوضاع واحاول افهم شي من لؤي واكولج بالاخبار.

سدن .. وج عيني اشون ارجع للبيت واني كل بالي هنا؟!
مراح ارتاح حبقى افكر بالفضيحه الي حيسويها لؤي.

براء .. لج بنتي ماكو اي داعي تكبرين الموضوع شنو قابل انتي اول وحده تنخطب وتفسخها؟!
اصلاً انتو كل الي بينكم قراءة فاتحه يعني مجرد كلام مو خطوبه رسميه شنو يعني قابل انكلبت الدنيا؟!

سدن .. اعرف ومخايفه لان انفسخت الخطوبه ، بس خايفه من الكلام الي كايله اله نورالدين اكيد مكذب عليه وكايله بيني وبينا غراميات وعلاقه انتي متعرفي هذا نور ميهمه شي .

براء .. هاا ... واللله مااعرف شنو اكولج بعد انتي اعرف بي ، بس صدكيني احسن حل ترحين للبيت احسن ميشوفج لؤي ويتعصب وتكبر السالفه.

سدن .. اي كلامج صحيح .. خلي اروح للبيت احسن.
اتصلت بمحمود وكلتله يجي ياخذني للبيت .. اجه اخذني ورجعت لكيت البيت فارغ وبساموو ماكو!!

خلصت اليوم كالعاده وحدي نوم .. دراسه .. اكل .. وتفكير .. المغرب تقريباً اتصل عليه محمود!!!!!!
استغربت محمود شعنده يتصل عليه هسه؟!!
اكيد ديريد يتعذر السياره بيها عطل وميجيني باجر .. جاوبته ...... بس الصدمه كانت ...................!

نورالدين .. بعد ما راح اخوها بقيت اني مثل البركان الي صارله سنين خامد وفجأه بدا يثور !!
حمم الغضب بدت تغلي بداخلي .. معقوله مكفاها الي سوتيه بيه ويا يمان هسه تتجرأ وتنخطب لواحد ثاني!!
لاااااااا سدن خانم الظاهر اني كنت غلطان بتقيييمج .. طلعتي مو قليله .. كل الي سويتي بيه والاذلال مكفاج بنتقامج!؟

غلطت بحقج اي .. اعترفت وانطيتج هواي فرص .. وعذرتج هواي ... محاسبتج لا ع لعبتج بموضوع يمان .. ولا ع كلامج والسانج الطويل .. بس خلص منا ورايح راح تشوفين نورالدين ع حقيقته .......!

اتصلت بأخوها كلتله اتدزلي عنوان ورقم الكلب الي خطبها واسمه الكامل هسه .. بقى يلغي ويتوسل انه الولد فقير وميدري بأي شي عن حياة سدن وموضوع خطوبتي الها .. كلتله اتدز العنوان وسديت الخط.

قبل ليطفون الشموع طلعت من الحفله .. يمان ميدري ولا شافني اصلاً لان صايره هوسه صعدت بالسياره و وصلني مسج بالعنوان!
شغلت السياره وبوجهي لبيته .... وصلت اتصلت عليه .. رنه والثانيه جاوبني .. الو منو حضرتك؟!
كلتله اني حبيب خطيبتك وانتظرك بالباب تطلعلي.
ماكوو ثواني والباب انفتح وطلع من عنده ولد بعده شاب ، ضعيف وطويل الظاهر كلامي صدمه لانه طلعلي بالفانيله الداخليه وبجامه .. هلا بيك.
نزلت من السياره وانتظرته يوصلي ...

لؤي .. بصوت غاضب وحاد .. انت الي اتصلت بيه؟!!

نورالدين .. بشحمه ولحمه.

لؤي .. شنو هذا الكلام الي كلته؟!

نورالدين .. مسمعته لو مفهمته؟!

لؤي .. اتقرب من نورالدين بغضب وعصبيه .. انت منو ومنين تعرف سدن احجي لا ادفنك هنا هسه.

نورالدين .. بهدوء وابتسامه استخفاف مرسومه ع وجهه .. اسمها لتجيبه ع اللسانك مره ثانيه .. لا اني الي انهي حياتك وغلاتها.

لؤي .. هنا انفجر بعد ما تحمل واحد يحلف بغلاة خطيبته كدامه .. لا ويمنعه يذكر اسمها .. مهما يكن هي بنظره خطيبته .. ثار بوجه نورالدين ومد ايده حتى يضربه .. بصوت غاضب لك انت متستحي اليوم الا اربيك...

نورالدين .. بكل سهوله لزم ايده وضربه بوكس ع وجهه وكعه بالكاع ... بصوت حاد مثل الاسد الغاضب .. سدن تنساها خلاص واذا سمعت حاجي وياها لو مفكر مجرد تفكير رافع عينك عليها ورب السماء انهيك .

لؤي .. كام بغضب يريد يهجم ع نورالدين .. وبصوت عالي وغضب .. اليوم اني الي انهيك يا حقير منو انت وتمنعني من خطيبتي والله لا اموتك وانقض ع نورالدين ..

نورالدين .. من كال خطيبتي البركان خلص انفجر .. هالكلمه هذي طلعت كل الشر الي بيه ضربته ع وجهه مره ثانيه براسي خليت خشمه ينزف .. وكع بالكاع وانهاليت عليه ضرب ع بطنه ركلات لحد ما نزف الدم من حلكه .. اشكد جبان بسرعه استسلم حتى ما رفع ايده ودافع عن نفسه كدامي .. كنت راح اقتله خلاص .. بس مااعرف اشلون لزمت اعصابي وتركته .. نزلت لمستوى وتقربت منه بصوت حاد ..

_ الي صار بينا هسه اعتبره مجرد تهديد .. بس الموت الحقيقي راح اتشوفه بالحقيقه اذا مسويت الي كلتلك عليه .. باجر راح يجيك امر من كليتك تنقل لغير جامعه واذا فكرت تتذاكى وتلتقي بيها لو تحاجيها .. ميحتاج اذكرك شنو الي راح يصير .. ثق مو بس حياتك ادمرها لاااا كل شي يخصك حتى عائلتك تنتهي .. واذا تحب تتأكد من كلامي روح اسأل عن نورالدين الباشا وانت تعرف لأي حد اني صادق بكلامي .
لتجبرني أسوي شي ما اريده و أأذي ناس ما الهم ذنب بغبائك .. اختفي من حياتها احسنلك.
......... درت وجهي ورحت ... وصلت للسياره التفتت عليه ..شي اخير بعد مااروح ترسللها مسج اتكللها مااريد اشوفج بعد وحاول تجرحها بالكلام وتنصحها مترد عليك .

مااعرف اذا كلامي راح يطبقه هذا الكلب لو لا .. بس الاكيد انه اجبن من ان يتمسك بيها .. لان نظرات الخوف الي بعينه شرحت لاي حد هو جبان

صعدت السياره ورجعت للبيت بالطريق اتصلت بزيد انطيته الاسم الي دزه الي اخوها وبلغته يروح باجر من الصبح للكليه ويدبر موضوع نقله من الكليه نهائياً .. يتلفه الاي مكان المهم متشوفه بعد ولا يلتقي بيها..!

وصلت البيت لكيت الحفله شبه منتهية والعالم ديروحون .. يمان شفته ونظراته الي كلها انزعاج وزعل .. مو وكتك هسه يمان.
صعدت بوجهي لغرفتي بدلت وداانام اندكت الباب ... منو؟!!

يمان .. اني .

نورالدين .. ادخل يمان.

يمان .. فتح الباب ودخل بغضب .. صارلي اشهر اخطط اشلون اجيبك من امريكا ومخليت حيله مجربتها حتى تحضر ميلاد ادم .. وتاليها تعوفنا وتطلع؟!!
مع الاسف عليك نورالدين عود كلتلك انت عائلتي وعم ابني الوحيد تالي متالي تخذلني كدام مرتي وابني؟!!
مشكور ومقصرت.

نورالدين .. لحظه يمان انت متعرف شي .. ادري انت سويت المستحيل حتى احضر ميلاد ابنك بس صدكني صار شي وجبرني اطلع .

يمان .. شنو الي صار بلا اكدر اعرف ع الاقل.

نورالدين .. سدن انخطبت.

يمان .. شنوووووو؟!!

نورالدين .. مثل مدااتسمع.

يمان .. معقوله؟!
مو كلتلك انييييي مسمعت كلامي .. كلتلك اخذها قبل لتضيع من ايدك اتكلي اخسرها .. هسه بعد شنو عذرك؟!!

نورالدين .. يمان لخاطر ربك الي بيه مكفيني .. لتزيدها عليه.

يمان .. ما ازيدها عليك بس انت متسمع الكلام ابد شوف النتيجه ضيعتها من ايدك للابد.

نورالدين .. ماكوو شي ضاع .. اني حليت الموضوع .. وهي اني اعرف اشلون اتصرف وياها.

يمان .. حليت الموضوع؟!!!
اشلون حليته شسويت نورالدين .. لتخبلني يمعود فهمني سويت شي للولد؟!!

نورالدين .. لتخاف بعده عايش .. بس جريت اذنه .

يمان .. اكيد بعده عايش؟!!

نورالدين .. اشبيك يمان مو لهدرجه عاد .. صح هو يستحق الحرك مو بس الموت .. بس ميسوى الوث اديه بيه.

يمان .. الحمدلله والشكر .. وهي شراح تسوي وياها؟!
اذا عرفت بالموضوع والي مسوي بالولد راح تكرهك اكثر وتعاند بالزايد .. مو بعيد حتى اهلها يرفضوك اذا عرفو الي مسوي .. بعد ميفيد تغصبها ع الزواج.

نورالدين .. لا ما راح اغصبها ... راح اخليها تدفع ثمن الي سوته غالي هالمره .

يمان .. ما فهمت اشلون يعني؟!

نورالدين .. يمان اني تعبان حيل واريد انام .. عود باجر نحجي .

يمان .. تمام .. يلا اني رايح لارين تنتظرني حتى نفتح الهدايا ع بالي تنزل وياي بس بعد الي سمعته لا خليك ترتاح احسن.

نورالدين .. تصبح ع خير.

يمان .. وانت بخير حبيبي.....

نورالدين .. راح يمان واني بقيت ويا افكاري .. احس الكون كله اظلم بعيني .. الدنيا خانكتني .. ممتوقعها تسوي هيج ابد .. اتكرر عقابها وتتمادى لهدرجه!!
للصبح بقيت اتكلب منمت .. اول ما طلعت الشمس بدلت ورحت للشركه .. حجيت ويا زيد واتأكدت منه تم الي كلتله عليه .. كالي انو هو سوا عده اتصالات البارحه وان شاء الله اليوم يصير الي تريده!

ب11 تقريبا اجه اخوها بسام .. يتفاهم وياي بخصوص الصفقه .....

(نرجع هسه الاول بارت ... حديث نورالدين وبسام ..... تعرفو ميحتاج اعيده)

عفت اخوها بالمكتب وطلعت .. بعد ما شرطت عليه انو زواجي منها واح يكون مقابل صفقة عمره!

طلعت عندي كم اجتماع كملته بس اني بالي كان مشغول بخطه ثانيه ... غير الشرط الي فرضته ع اخوها .. لان اعرفها مراح توافق ولا ترضى خصوصاً بعد ما ضيعت عليها خطوبتها هي والحيوان خطيبها ... خلص الاجتماع واتصلت بأخوها ... كلتله تجيني هسه .
انتظرته بالمكتب .. دقايق واجاني .. كلتله ها شنو النتيجه موافق ع الشرط لو الغي الصفقه؟!!

بقى يمتمت ويتحجج انو هي متقبل .. وهددته تنهي حياتها اذا جبروها..!!
اهااااااا لهدرجه؟!

بسام .. والله باشا حاولت بكل الطرق وياها بس مدا تقبل .. واني مااكدر اخاطر واجبرها اكثر اخاف تسوي بروحها شي .. مهما يكن هي اختي.

نورالدين .. تمام .. اني عندي حل ثاني.

بسام .. شنو هو ؟!

نورالدين .. حجيت ويا وفهمته كلشي .. واخذت موافقته ع الي راح يصير .. واكدتله انو مراح امسها غير بالحلال لان اني رايدها ع سنة الله ورسوله ومستحيل أمس شعره منها غير بما يرضي الله.

بالبدايه رفض الفكره رفض تام .. بس لما خليت الصفقه بأيده ..... وافق على مضض مثل ميكولون.
هو طلع واني اتصلت بمحمود كلتله تجيني لفلان مكان واني انتظرك .. سبقته اني للمكان .. واجه هو ورايه سلم عليه وسألني بستغراب

محمود .. خير باشا أأمرني؟!!

نورالدين .. انطيني موبايلك.

محمود .. موبايلي .. ليش باشا اكو شي؟!

نورالدين .. لا اريد اسوي اتصال منه.

محمود .. اي باشا تدلل .. اتفضل هذا الموبايل.

نورالدين .. طلعت رقمها واتصلت عليها .. رنه والثانيه ردت ..

سدن .. هلاو محمود ..

نورالدين .. اشلونها العروسه؟!

سدن .. نورالدين؟!!!!!!!!!!!

نورالدين .. زين بعدج تميزين صوتي ع بالي خطيبج نساج.

سدن .. انت شرايد .. شكو دتتصل بيه ممكفيك الي سويته؟!

نورالدين .. انزلي وتعرفين شرايد.

سدن .. شنوووو انزل .. لويش انت وين؟!

نورالدين .. باعي من باب شرفتج وتعرفين وين اني.

سدن .. رفعت البرده وجان اشوفه واكف بباب البيت ،مرتكي ع سيارته ويباوعلي وابتسامته السخيفه شاكه حلكه !!!!

نورالدين .. دقيقه وحده والكاج كدامي .. ثانيه وحده اذا اتأخرتي راح تصير فضيحه بالمنطقه الكل تحجي بيها.

سدن .. انت اكيد اتخبلت ..

نورالدين .. باقيلج 48 ثانيه ..

سدن .. نور الله يخليك روح منا ..

نورالدين .. 45 ..

سدن .. هذا الظاهر مداايشاقه .. ويحجي من كل عقله .. سديت الخط ونزلت ركض .. فتحت الباب وطلعتله ... بصوت غاضب وحاد .. شتريد مني انت بس فهمني.

نورالدين .. اصعدي للسياره .

سدن .. بأستغراب شنو؟!

نورالدين .. فتحت باب السياره .. وبصوت حاد .. اصعدي.

سدن .. مااصعد واتفضل روح منا قبل ليشوفك واحد لو يجي بسام .

نورالدين .. اتصعدين لو اصعدج بطريقتي؟!!

سدن .. يا ربيييييييي صبرني هذا اتخبل ع الاخير .. صعدت للسياره ع بالي يريد يحجي وياي ليشوفنه احد ... واذا بي يشغل السيارت ويطلع كبل!!!!
انت اتخبلت ..وين ماخذني .. وين رايح ؟!!

نورالدين .. رايحين حتى نتزوج!!!!!!!!!!

للحكايه بقيه🤗

هذا البارت تعويض مثل ما وعدتكم ولو متأخر اشويه بس اعذروني هسه يلا كملته
رأيكم بالاحداث وتوقعاتكم للبارت القادم 💜
لتنسوووووووووووووون التصوييييييييييييت 🙋🏻‍♀️😘