رواية ﮼صفقة ﮼عشك الفصل الخامس والعشرون 25 - بقلم ﮼الاميره،الموسويه 👑

بقلمي الاميره الموسويه 👑

ما احلل لاي شخص ياخذ كتاباتي وينشرهم (ذمه)

هلاو بنات مثل ما وعدتكم القصه كتبت كل بارتاتها وكملت بس اعرف اذا نزلتهم كلهم دفعه وحده محد حيصوت واني اريد القصه تصعد
لذلك حنزل كل يوم بارت بلا انقطاع (ابد) بس اليوم كـ تعويض حنزل بارتين وهي مبققالها شي ع النهايه 💔

سدن .. انت شدتحجي ..!!
شنو ماخذني نص الليل .. شنو نتزوج!!

نورالدين .. ساكت ماكو رد.

سدن .. احجي ويا هو ولا كأنه يسمعني يسوق بالسياره بكل هدوء وميرد عليه ... التفتت عليه وبصوت عالي

_دااااحجيييييي وياك ... نزلني يلا نزلني.

نورالدين ....!

سدن .. نزلنييييي دااكوووووولك .. مديت ايدي اريد افتح الباب واشمر نفسي بالشارع .. ماكوو الباب مقفول من يمه!!
بقيت اصيح بكل صوتي نزلنييي .. نزلني .. هو ديسوق بسرعه بالشارع جان يوكف السياره فجأه وانهزيت بكل قوتي بحيث لو ما الزم الكشن جان انلطشت بالجامه الكدام !!!

نورالدين .. صياحها فقدني اعصابي .. وكفت السياره بغضب والتفتت الها .... سدي حلكج .. صوتج ما اريد اسمعه.

سدن ..  الرعب الي بكلبي من الطريقه الي وكف بيها السياره مخلاني انطق .. خليت ايدي ع راسي احسه حينفجر هو وگلبي من الخوف .. وسكتت.
شغل هو السياره وطلع گبل ماادري وين .. اني ساكته مااحجي شي بس گلبي احسه حيوكف من الخوف .. وصوته المرعب يرن بأذني !!

ماكو دقايق وجان نوصل لمكان مااعرفه شنوو بس البنايه كبيره .. فتح الباب ونزل بلا اي كلمه .. اشويه واجه ..... و ويا اثنين يمشون واحد شايفته مااعرف وين والثاني شكله شيخ مااعرف سيد .. بس واضح من مظهره انه رجل دين!!!!
يا ربي بس لا حيصير الي داافكر بي ... بس لا يسويها صدك هذا ويتزوجني!!!!!!
مجرد ما الفكره مرت ببالي حسيت بنار اشتعلت بگلبي .. غضب وحقد .. لووووو يموت ... لو يمووووووووت مااتسمى مرته لوووو يمووووووت.

بقيت محافظه ع هدوئي وكاعده ... صعد هو بالسياره قبلهم وسد الباب.

نورالدين .. بصوت حاد ونبره خاليه من اي مشاعر .. الرجال راح يجي يعقدلنا وراح يسألج كم سؤال جاوبي عليهم وكولي موافقه ع الزواج.

سدن .. انت اكييييد مو بوعيك!!
شنووو زواج نورالدين انت ع بالك الموضوع لعبه؟!!

نورالدين .. منو كال لعبه؟!
دااتزوجج على سنة الله ورسوله وين اللعب بالموضوع.

سدن .. شنو من زواج هذا الي بنصاص الليالي وبسياره بالشارع؟!!!
شنو من زواج هذا الي ميحضره لا اهلي ولا اهلك؟!
شنوو من زواج هذا الي تاخذني من بيت اهلي غصباً عني وتجبرني اوافق عليه؟!!

نورالدين .. انتي الي جبرتيني اسوي هيج لو نسيتي؟!
حجيت وياج وفهمتج انو عقابي عسير ، اتقي شري اذا غضبت وانطيتج فرص بكد شعر راسج واتحملت منج هواي .. بس مفتد بيج وبقيتي معانده وركبتي راسج .. خلص  انتي الي طبختي الطبخه ... اكليها.

سدن .. يا طبخه يا اكل ... اني مااريدك تفهمممم شنو يعني مااريدك؟!
جبر هي لو غصب ؟؟
رجعني البيتنا وعوفني بحالي ولتتخيل مجرد خيال اتزوجك لو ارتبط بيك لو تموت .. لو تجيبلي مرجع ديني بنفسه مو شيخ مااتزوجك فاهم لو لا .. مااتزوجك.

نورالدين .. اخذت نفس بهدوووء .. التفتت عليها لزمتها من فكها بقوه ودرت وجهها عليه بحيث عيونها صارت بعيني .. وبنبره حاده مليانه غضب .... وفري كل كلامج هذا لان مراح اغير رأيي لو يحترك الكون كله.
واذا انتي بنت ابوج ارفضي كدام الشيخ وكولي مااريده!
ثقي بالله راح اخليج تتمنين الموت ومتطولي .. صدكيني اتزوجج غصباً عنج واخليج تترجيني حتى انهي حياتج.
جربي اترفضين وشوفي منو هو نورالدين .

سدن .. كان يحجي وياي وعيونه عباره عن ظلام دامس .. ملامح وجهه كانت هادئه بس مخيفه .. مو بشر عادي كأنه شيطان متلبس بي يحجي وياي بنبره مميته رغم الابتسامه الي مفتعلها ع وجهه بس الغضب والشر كان يلهب من عيونه
كلماته دبت الخوف بكل ذره من روحي .. جسمي بديت احسه ديبرد والرجفه  غزتني......!
سحب ايده مني ونزل من السياره .. لحظتها حسيت روحي ضايعه .. مثل الي واكف بنص محييييييط والموج يلطم بي من كله جهه .. كل جزء مني يجرني بصفحه .. عقلي يكولي ارفضيييييي .. وگلبي يذكرني بعيونه وكلامه القاتل.
مشتته ضايعه خايفه .. مااعرف اشون اتصرف وشسوي ... اااااااااه وينك بسام تجي تخلصني من هذا المتوحش.
رغم كل قسوتك وكلامك ومعاملتك الجارحه وياي بس انت وخوفك ارحم بهواي من الرعب الي دااحسه هسه.
يا ربي هيج وتجيبلي بسام ياخذني للبيت واخلص من هاي المصيبه .. بابا وينك بابا تعال وشوف حالي .. شوف بنتك وين صفى بيها الدهر تتزوج وانت متدري بيها .. بابا ... بااااااابااااااااا....

نورالدين .. اتفقت ويا الشيخ انو يعقدلنا وانطيته هويتها الي اخذتها من اخوها ، فهمته انو هي عمرها 20 سنه يعني تعتبر راشده ومتحتاج ولي امر واذا يحتاج فأني مااخذ هوية اخوها للاحتياط .. الشيخ بالبدايه شك بالموضوع بس زيد حجه ويا وانطى كم فلس خلا يبلع اللسانه .. بالفلوس حتى الشريعه والدين  يحرفوهم الملاعين ..  زيد كان هو الشاهد و الشاهد الثاني هو جابه ويا الشيخ
صعد الشيخ للسياره وعقدلنا .. كنت متخوف منها لان اعرفها راسها يابس وتعاند .. بس بقدرة قادر ما سوتلها مصيبه وكالت مثل ما وصيتها .. الظاهر التهديد جاب نتيجه وياها.

سدن .. اجه الشيخ عقدلنا بالسياره!!!!!!!!
هه هم ساميعن بحياتكم وحده تتزوج بسياره .. اني عقدلي الشيخ بالسياره وصرت زوجه لشخص في يوم من الايام كان حلم حياتي بس صار كابوس بالنسبه الي.
محجيت شي كدام الشيخ سويت مثل ما طلب مني بالضبط لان اعرف اني لا حول ولا قوه ، وحتى اذا صيحت واعترضت مراح اغير شي لانو الشيخ الي قبل يزوجنا بسياره وبدون حظور ولي امري اكيد هذا شخص بايعها ومخلص .. يعني دموعي وكلامي ميشفعولي عنده ابداً.
سلمت امري للاقوى منه .. لله سبحانه وتعالى وكلتله يا ربي انت اعرف من الكل بحالي واني مااريد غير اتدبرلي الصالح وتخلصني من الي جاي....!
نزلو هو والشيخ بعد ما اتباركلنا وراح .. اني ساكته مبجيت ولا حجيت بس احس اكو فد شي بصدري كاتم ع انفاسي .. والعبره خانكتني بحيث احس روحي حتطلع من عيوني مو دموعي ... صعد هو بالسياره ومشينا مسافه طويله بلا اي كلام .....!
اشويه شويه بديت احس نفسي دااختنك .. مااكدر اتحمل بعد .. كتمت عبرتي هواااااي مااريد ابجي كدامه ويشوفني.
مااريده يحس بشفقه عليه ابد .. بقيت اردد بيني وبين نفسي .. اني قويه .. اني قويه .. اني ... قويه .... قويه ........ بس الكلام ميفيد انفاسي دتضيع مني .. شي كاتم ع صدري .. بلا اي تفكير كلتله اوكف ..... مااكدر بعد دااختنك.

نورالدين .. خلص العقد واخذتها للبيت طول الطريق كانت ساكته منطقت ولا حرف .. اشو فجأه كالتلي اوكف!!!!!
اتوقعتها رجعت لسالفة نزلني .. وتريد ترجع لبيتهم معرتلها اهتمام .. بس حركاتها وصوتها المخنوك خوفني ... الظاهر صدك بيها شي .. وكفت السياره وفتحت القفل من يمي لان كنت قافلها خاف تشمر روحها الخبله .. اول ما وكفت السياره نزلت هي اتجر بنفسها ... ارتكت ع السياره وشهكت شهكه حسيتها طلعت روحها وياها ... عجيب؟!!!

سدن .. بلحظه وحده انهاريت ضليت اشهك وابجيييييي!!
بجيت بحركة گلب ووجع روح ... الجو كان بارد نهاية الشتا والدنيا ماطره استوها وبيها نسيم باااارد مع هذا احس النار دتحرك بيه ماادري شصارلي فجأه اشتعلت .
گلبي احسه ديحترك روحي اتريد تطلع والهوا ضاع عليه .. هذي الغصه الي حاشره بحنجرتي مداتطلع وتخلصني حموووت .. كعدت بنص الشارع ع ركبتي و صييييييييححححححححتتتتتت صيحت صيحت لحد ما حنجرتي حسيتها اتشككت ... ودموعي تصب ابجي بطريقة كأني عمري وحياتي مباجيه من قبل .. بجيت لحد ما صفى راسي ... هو واكف بعيد عني ويباوعلي ما حرك ساكن الظاهر عاجبه يشوفني مكسوره هشكل .. لحد ما مل ونطق.

نورالدين .. كانت تصيح وتبجي بطريقه هستيريه مثل الي ميت له واحد عزيز عليه !
گلبي كان يريد يخترق صدري من كد ما موجوع عليها .. بس بنفس الوقت عقلي يريد ينفجر غضب .. معقوله لهدرجه كارهتني وارتباطها بيه وصلها لهذي الحاله؟؟؟
شعور متناقض بداخلي جزء يريد يحتظنها ويحتويها والثاني يريد يموتها وينتقم منها..
جبرت نفسي اتركها لحد ما تهدأ واخذها .. بس كعدتها طولت وصبري بدا ينفذ .. بصوت حاد كلتلها كومي كافي.

سدن .. محجيت ويا صوته بالنسبه الي طلقات تصوب روحي.

نورالدين .. بصوت اكثر حده .. دااكول كومي .

سدن .. ماكو رد.

نورالدين .. لاااا عاد مصختها  .. مشيت بتجاها دنكت اريد ارفعها من الكاع وامشي جان تدفعني .....!

سدن .. بصوت غاضب ودموعها تجري .... لتلمسني ايدك اذا مديتها عليه اكسرها ... فهمت لوووو لا .... اكسرها .

نورالدين .. بنبره ساخره .. هه انتي تكسريها؟!!

سدن .. ولتحجي وياي صوتك الكريه مااريد اسمعه.

نورالدين .. بهدوء .. لا راح تسمعي وتسمعي هواي هم حاولي تعتادين عليه.

سدن .. اعتاد عليك شنو ؟!
ليكون ع بالك اتزوجتني وحبقى وياك .. اصحى من احلامك اصحى.

نورالدين .. اكيد تبقين وياي المره ما الها غير بيت زوجها.

سدن .. ههه انت الظاهر اتخبلت ع تالي عمرك .. يا زواج هذا ليكون مصدك المسرحيه الي صارت قبل اشويه!!
ترى اني سكتت لان اعرف حتغصبني بكل الاحوال ومااكدر اسوي شي .. بس خلي بابا وبسام يعرفون بألي سويته والله ليدفنوك وانت عدل.

نورالدين .. ومنو كلج هم ميعرفون؟!

سدن .. شقصدك؟!!!!!!!!!!!!!

نورالدين .. اقصد الي اقصده مو مهم .. كومي خلي انروح البيت اتأخر الوقت.

سدن .. شنو تقصد بكلامك احجييييي.

نورالدين .. شوفي يا بنت الناس اني انسان جداً ملول وصبري ينفذ بسرعه .. لتخليني اعيد الكلام اكثر من مره كلتلج اصعدي السياره خلي انروح .

سدن .. خطوه وحده مااتحرك منا .. اذا متحجيلي شتقصد بكلامك.

نورالدين .. اللهم طولج يا روح .. تردين اتعرفين شقصد؟!!
تمام اسمعي الحقيقه الي ساده اذانج عنها وتحاولين بكل الطرقين تتجاهليها .. اني صح اريد زوجه الي بس مستحيل اسوي شي من ورا اهلج اياً كانت الظروف .. اجبرهم اوكي بس اخطفج بلا علمهم هذا مو ثوبي .. انتي بالنهايه راح تصيرين ام جهالي ميهون عليه تتشوه صورتج كدام اهلج .. بس......... عنادج وتكبرج هو الي جبرني اتفق ويا اخوج ع هذا الشي .. يعني اخوج عنده علم بالموضوع وهو بنفسه انطاني هويتج وهويته حتى اعقد عليج.
وبما انو اخوج موافق ع زواجنا فأكيد ابوج ايضاً عنده علم بالموضوع لان بسام اني اعرفه جبان ميخطي خطوه بلا علم ابوج وتوجيهة لذلك والدج هم يعرف بالموضوع ....... اعتقد وضحت الصوره هسه.

سدن .. اخاف كان باقي عندي ذرة امل ..... اتبخرت نهائياً بعد الكلام الي سمعته.
حتى ما الي وجه احجي ويا بعد ..... اهلي بايعيني بعد شكو ازامط واهدد اني؟!!
اكثر من هذا ذل ورخص ماكووو بعد .. ابويه واخويه يوافقون انخطف واتزوج غصباً عني بس حتى يحمون مصالحهم .... لهدرجه اني بلا قيمه عندك بابا ؟!!
بلا بسام عار من يوم يوم ومينعتب عليه .. بس انت الي المفروض اتكون سندي بهذي الحياة والحايط الي انتجي عليه لما يميل بيه الزمن ... تاليها تبيعني بهالطريقه القذرع هذي!!!!
حياتي بالنسبه الك مجرد صفقه ...........!

كمت من الكاع ودموعي جمدت بعيوني من الصدمه .. مرفعت راسي ولا نطقت كلمه وحده .. صعدت بالسياره وهو صعد ورايه .... حركها ومشينا ........ ماادري الزمن شنو ظاملي بعد....!!!

بعد مده مو طويله وصلنا لبيته .... بيته القديم الي كان عايش بي هو واخو يمان!!
معقوله يمان موجود هنا وحشوفه؟!
اشون الي عين واباوع بوجه بعد .. وهو اشون يجيبني اعيش ويا الشخص الي كان يريد يتزوجني ؟!
معقوله لهدرجه ماعنده غيره ولا ضمير .. يجمعني يا يمان؟!
زين اذا سألوووا اشون اتزوجنا شنو راح يكوللهم؟!!
خطفتها برضاة اهلها .. شنو موقفي كدام اخو وزوجته لما يسمعون اهلي باعوني؟!!!!
يا ربيييييييي شنو مسويه عندك حتى تذلني بهالطريقه القاسيه هاي؟!

نزل هو من السياره واني بقيت بمكاني والحسبات تفتر ببالي .. اشون انزل واشون اشوفهم!!

نورالدين .. وصلنا البيت اني نزلت وهي بقت ع صفنتها كاعده بالسياره .. فتحت الباب .. وبصوت حاد ..

_وصلنا انزلي؟!!

سدن .. مرفعت راسي حاجيته واني مدنكه .. ماانزل رجعني لبيتنا.

نورالدين .. بصوت جامد وهدوء .. منا ورايح هذا بيتج ماكو شي اسمه رجعني ع بيتنا .. بيت اهلج انسييييي نهائياً.

سدن .. من كال بيت اهلج تنسي گلبي انقبض .. ودموعي نزلت .. البيت الي عشت كل عمري بي انولد وكبرت وتربيت بي بلحظه وحده صار محرم عليه واني صرت غريبه عنه!!!!!

نورالدين .. هم بجت .. اعرف اني دااقسي وياها وهذا الشي يجرحني الي قبل لا يجرحها بس لازم تتأدب ع الي سوته .. موافقتها ع الخطوبه من شخص ثاني لازم تدفع ثمنها .. لازم تعرف انو هي الي اني وبس وغير هذا ماكو كدامها غير الموت .

بصوت حاد .. بلا بجي مااريد زوجة اخويه تشوفج تبجين .. امسحي دموعج وانزلي بلا اي كلام.

سدن .. نزلت من السياره بس اني روحي احسها ملزمه بالسياره مترضى تهدها ، مترضى تخطي خطوه لهذا السجن .... والي عليهم كلهم يمان اشون اواجهه!!!
مشىهو كدامي واني مشيت ورا وصلنا للباب الداخلي مالت البيت بعد مكدرت اسكت حجيت الي بگلبي ...

_ لحظه.

نورالدين .. التفتت عليها بهدوء .. !!

سدن .. اني مااكدر ادخل وياك .. مااكدر اشوف اخوك انت تعرف الي صار بينا قبـ.....

نورالدين .. اااااشششششششش ... مااريد اسمع هذا الموضوع .. يمان اتزوج وعنده طفل الي صار قبل تنسيييييي نهائياً وديري بالج تحجين بهذا الموضوع كدام مرته ترى متلومين غير حالج.

سدن .. ما كنت اعرف انت لهدرجه حقير .. تعرف اخوك كان رايدني وعينه عليه ومع ذلك اتكعدني ويا بنفس البيت.

نورالدين .. كلامها فزز جروحي النايمه .. من كالت اخوك مخلي عينه عليه فقدت اعصابي ... الغضب سيطر عليه ردت اقتلها خلاص خطوه خطيتها بتجاها ... واذا صوت يمان ورايه ......!

يمان ... نورالدين؟!!!!!!!!!!!!!!!!!!

للحكايه بقيه 💔
رأيكم بالاحداث وتوقعاتكم للبارت القادم 💜
لتنسوووووووووون التصويت