رواية ﮼صفقة ﮼عشك الفصل السادس والعشرون 26 - بقلم ﮼الاميره،الموسويه 👑

بقلمي الاميره الموسويه 👑

مااحلل لاي شخص ياخذ كتاباتي وينشرهم (ذمه)

وما كنت ممن يدخل العشق قلبه
و لكن من يبصر جفونك يعشق
....
ولولا الهوى ما ذلّ في الأرض عاشـق
ولـكـن عـزيـز الـعـاشـقـيـن ذلـيـل

يمان .. بأستغراب .. نورالدين ؟!!

نورالدين .. كتمت غضبي منها لان يمان اجه ..التفتت عليه بهدوء سلمت عليه ودخلنا  لكيت مرته كاعده بالصاله شافتنا هم اجت سلمت علينا هي متحجي شي مدنكه راسها ومترد ع احد .. يمان ومرته بقو متفاجأيين وملامح الصدمه مبينه ع وجهم

يمان .. سلم ع نورالدين بس باله كله كان يفكر بسبب وجود سدن ببيتهم بهالليل!!

نورالدين .. أشرلي يمان براسه بما معنى ليش سدن وياك؟!!
التفتت عليها لزمتها من ايدها و وكفت بصفها .. بصوت حاد وابتسامه هادئه .. اقدملكم زوجتي سدن .

يمان .. باوع لمرته والصدمه تقرا مليون ع وجهه ... شنووو؟!!!

نورالدين .. اشبيكم مصدومين دااقدملكم زوجتي يعني اتزوجت ، المفروض اتباركولي مو تصفنون بوجهي .

لارين .. بأرتباك .. الف مبروك اعذرونا ع ردة فعلنها بس الخير فاجأنه اشًويه .. الف الف مبروك وربي يسعدكم.

يمان .. نورالدين تعال وياي للمكتب اذا ممكن اريد احجي وياك.

نورالدين ..  تمام امشي.

سدن .. اخذ اخو وراح اني بقيت بمكاني متحركت .. بس احس روحي دتنزف كل ذره قوه بيها .. اجتي زوجة اخو كالتي اكعدي و كعدت بصفي الظاهر شافت حالتي والمزريه!

لارين .. واخيراً شفتج .. متعرفين نورالدين اشكد حجالي عنج لما كنا بأمريكا .. من كد ما حجه بيج ويوصف بشكلج وجمالج صارت عندي امنيه اشوفج.

سدن .. اني بيا حال وهاي شتحجي .. أومأتلها براسي وبس.

لارين .. انتي اكيد تعبانه امشي اخذج لغرفة نورالدين ارتاحي على ما اخليهم يحضرولج العشه.

سدن .. لغرفته!!!!

لارين .. بأبتسامه ونبره ماكره ايييي غير انتي مرته  بعد هاي صارت غرفتج انتي هم منا ورايح .

سدن .. شحجي شكووول .. حتى اذا اعترضت غصباً عني حيجبرني الوحش الي اسمه زوجي.
كمت وياها واخذتني لغرفته .. دخلت هي طلعت وسدت الباب ....!
غرفته كانت فخمه بشكل الاثاث الي بيها كوله ملكي من السرير الى اصغر شي بالغرفه .. اصلاً كلمة غرفه متوصفها لانها عباره عن سويت كامل .. غرفة نوم مفتوحه ع صاله شكبرها وحمام وحتى مكان استراحه صغيره تشبه المطبخ للاكل!!
صح اني كنت عايشه بعز ومناقصني شي بس الفخامه الي دااشوفها فاقت العز الي شايفته بحياتي .. كل هذا الخير والابهه والغرفه الملكيه ما كان يساوي ذره عندي من غرفتي وبيتنا الدافي وراحة البال الي عايشتها.

باوعت ع وجهي بالمرايه عيوني مورمه وحمرا من البجي .. ملامحي ذبلانه وجهي شاحب .. انتبهت ع نفسي لابسه التراك مالت البيت مالتي !!
من كثر الصدمات والي عشته اليوم حتى نسيت اني شلابسه !!
حالتي كانت من صدوك يرثى لها .. اني شوصلني لهذي المأساة شسويت بروحي!
سحبت الغطى من السرير مالته واخذت مخده خليتهم ع التخم بالصاله الي مقابيل غرفة النوم ، لفيت نفسي بالغطى ونمت .. النوم هو العلاج الوحيد بالنسبه الي .. هو الي يحل كل مشاكلي وينسيني اني وين .
نمت استوها عيني اخذت نوم سمعت باب الغرفه انفتح وانسد !!
يا ربي اكييييد هذا هو اجه .. يا الهي ارجوك عديها ع خير ولتخلي يتقربلي .. يا ربي يا ربي ..
جوه الغطى ادعي واردد .. مرت دقايق وهو متقربلي ولا كعدني .. اسمعه يتحرك بالغرفه ، فتح الكنتور ودخل للحمام طلع مااعرف شسوه بعدها فتح باب الغرفه وعم السكوت دقايق .. بعدين رجع مره ثانيه .. كل هذا واني كاتمه صوتي بس عيوني تستدير واذاني تتصنط جوه الغطى!
اشويه وانطفى الضوه الظاهر نام.
بقيت اني بمكاني مااحرك ساكن الى ان اخذتني النومه .. ما كعدت غير الصبح ع صوت المنبه مالته يرن!!
فزيت من مكاني مرعوبه كل ظني راح عليه الوكت واتأخرت ع الدوام .. كمت من مكاني بسرعه .. جان اشوفه ديطلع من الحمام !!
متلفلف بالمنشفه ع خصره والثانيه ينشف بيها شعره .. مشافني غير لما بعد المنشفه عن وجهه .. لحظتها رجعت للواقع واتذكرت الي صار البارحا واني وين هسه!!

نورالدين .. بصوت جامد المفروض الزوجه من تشوف زوجها الصبح اتكله صباح الخير هاي واحنا البارحه متزوجين بعد سنه شتسوين ؟!!

سدن .. بصوت خافت همس .. ابقى عايش بأحلامك ، مصدك نفسه متزوجين.

نورالدين .. كلتي شي؟!

سدن .. رجعت نمت مجاوبته .

نورالدين .. اني رايح للدوام اخاف اتفكرين تطلعين من البيت .. اتشردين لو ترحين الاهلج !
راح اجيبج بأقل من دقيقه بس وقتها اخليج تندمين ع الساعه الي فكرتي بيها تتغابين وتكسرين كلامي.

سدن .. كلامه عباره عن تهديد استفزني الابعد حد .. مو كافي غصبني اتزوجه انوب يريد يحبسني !!
وكفت بغضب وبصوت حاد .. ترى التهديد مو مرجله .

نورالدين .. التفتت الها بنبره غاضبه بس بقيت ملامحي هادئه .. قصدج اتكولين اني مو رجال!!

سدن .. الرجال ميهدد بنيه .

نورالدين .. اقتربت منها هي رجعت للخلف لحد ما اصطدمت بالعمود مالت السرير وكفت كدامها ميفصلنه غير مسافه سانتيمات .. بصوت هادئ وابتسامه ساخره تردين اشوفج الرجوله ع اصولها؟!!

سدن .. اقترب مني مسافه كولش خطيره!!
يا ربي هذا اشبي .. وشديقصد بكلامه؟!
شكله ابد مو مريح وملامحه فجأه اظلمت بنظرة غريبه .. مشيت من مكاني بسرعه ودخلت للحمام .

مطلعت غير لما اتأكدت انه راح  .. اني متعلمه كل يوم الصبح اسبح وابدل زين هسه اذا سبحت من وينلي ملابس؟!!
بطنني اتصوصي من الجوع لا اكدر انزل جوه واني بهالحال ولا اكدر ابقى كاعده هنا حموت من الجوع !
وهذي زوجة يمان مبين عليها عوبه من البارحا كالتلي حسويلج عشه وماكو لليوم ما وصل عشاها .. اااااااف وج سدن هسه انتي وينج وين الاكل حيري بروحج اشون تخلصين من هالبلوه .. كاعدتلي تفكرين بكرشج.
ااااااي لعد شسوي غير اريد اكل .. اذا مااكل واترس معدتي مااعرف افكر ولا يشتغل عقلي .
طااح حظج وحظ كرشج .. !
انتبهت ع روحي دااحجي ويا نفسي واجاوبها مثل المخابيل .. هذا اول يوم وهيج صار بيه اتسودنت لعد اذا بقيت ويا شنو حيصير بيه!!
بنص تفكيري وحيرتي بهالوضع اندكت الباب!!!!
_منو؟!!

لارين .. هذي اني لارين.

سدن .. كمت بسرعه عدلت شعري المنكوش وعدلت تراكي .. فتحت الباب لكيتها واكفه وبأيدها صينية اكل!!

لارين .. صباح الخير حبيبتي .. جبتلج الريوك لهنا اخاف تستحين تاكلين جوه.

سدن .. بهدوء .. تسلمين لويش تعبتي نفسج اني مااشتهي (صدقتج 😏)

لارين .. لا ماكو اي تعب حبيبتي اني من البارحه سويت العشه ودااصعده الج بس نورالدين كالي نايمه.

سدن .. الله لينطي الحقير ميته فوك حرمني من حريتي يريد يحرمني من الاكل .. بأبتسامه مصطنعه ايي البارحه كنت تعبانه ونمت .

لارين .. نوم العوافي .. هذا الاكل حعوفه الج هنا واكلي ع راحتج واذا احتاجيتي شي صيحيني .

سدن .. اشكرج .

نزلت لارين واني هجمت ع الصينيه مثل المخبله اكل .. الناس من تنقهر تنسد شهيتها اني انجلب ع الاكل ماادري شنو مشكلتي لويش شهيتي تنفتح ع الاكل لما انقهر!
اكلت لحد ما شبعت .. اشكد عيب حتى مبقيت شي بالصينيه هسه شنو يكولون عليه مشايفه!!
طبهم مرض احد كللهم يجيبوني هنا ويحبسوني؟!
بس هم شعليهم غير هذا الظالم هو الي جابني .. ودمر حياتي ويا.
شلت الصينيه وغسلت بقيت افتر بالغرفه حالتي صارت يرثى لها يومين مسابحه اشون بيه ملابسي لازم ابدلهم .. شسوي شسوي .. اتذكرت يمان!!
ااااااووووووف يا يمان .. معقوله لهدرجه اني عندك ولا شي حتى مكلفت نفسك واجيت شفتني عدله ميته بعد ما شمرتني للباشا مالتك حالي حال الحيوانات.
وبابا .. بابا ما حس گلبك بيه واتذكرت بنتك .. مفكرت بحالي اشون من كسرت رگبتي بهالطريقه .. اوووووووف شنو سويت الهم حتى يسوون بيه هشكل؟!
فجأه حسيت نفسي بلا أي ثمن ارخص من الرخيص .. ادموعي جرت لحالها ع روحي الرخيصه .. ع حياتي الي ما الها قيمه عدهم بجيييييت بحركه بجييييييت بألم
خلص النهار واني بس كاعده وابجي ماادري شصارلي فجأه الحزن خيم ع گلبي !
اتذكرت ماما .. ماما الي مشايفتها ولا واعيه ع وجودها بحياتي ولا اعرف شنو حنان الام .. بس حسيت نفسي محتاجاها محتاجه احظنها اكيد هي لو عايشه مكانت راح تسمح لبابا وبسام يبيعوني بهالطريقه!
دادا حليمه كانت دائما تحجيلي عنها وعن طيبتها واشكد كانت متحمسه اجي للدنيا وتشوفني!
يا ربي لويش اخذت روحها وعفتني اني .. لويش ما موتتني وبقيتها الها ياربي شنو حياتي بدونها .. المن اجيت لهذي الدنيا الظالمه ... اشكي لربي وابجي .....!
من يندك الباب اسكت اسوي نفسي نايمه ومن يرحون ارجع للبجي .. بين دموعي اخذتني النومه وغفييييييييت!!
بين الغافيه وبين الصاحيه .. حسيت الباب انفتح .. رفعت راسي واذا الغرفه عباره عن ظلااااام كولشي مااشوف !!
بس من انفتح الباب ضوه ملا كل المكاااان بحيث ع بالك شمس ودخلت للغرفه مو ضوه عادي!!
كمت من مكاني بصدمه اريد اشوف شنو هذا الضوه لان مدااميز الشخص الي كدامي من شدة النور .. مشيت كم خطوه بتجاه الضوه واذا بيها مريه لابسه ابيض و وجها يشع نووووور!!
صفنت بوجهاا بأستغراب .. هذي الملامح وهذا الشكل اني شايفته من قبل بس ويييين؟!!
منووو هذي منوووو منووووو .. لاااا مستحيل!!

هذي الانسانه شكلها يشبه صور ماما الي كانت تشوفنياها دادا حليمه!!!!!!!!!
معقوله اتكووووون هذيييييييي .........مـ ....... ما...... مـا ....!

باوعتلي بنظره لحد الان ما نسيتها .. نظره مليانه عطف وعيونها كانت عباره عن هدووووء اتقربت مني بأبتسامه هااااادئه ع ملامحها .. مدت ايدها ومسحت ع راسي!!
حاولت احجي حاولت انطق .. أسألها .. اتأكد منها .. أكوللها اخذيني وياج .. ماما شوفي حالي .. ماما اشتاقيتلج .... بس شي كان يمنعني صوتي ميطلع رغم انو كنت اصيح بكل صوتي بس كلماتي ماكوووو انكتمت !
محجت وياي غير جمله وحده وبعدها اختفت ... كالتلي بصوت حنين وبنبره اشبه بالهمس .... (لتخافين هذا امانج)!!!!!!!!!!!!
هي راحت واني فزييييت .. فزيت بتعب جسمي احسه نحلان وانفاسي شبه مقطوعه .. دگات كلبي متسارعه .. يمكن من الصياح الي كنت اصيحه ... ماما طول عمري ولا مره شفتج لا بحلم ولا بخيال لويش هسه اجيتيني .. معقوله حسيتي بيه وعرفتي الي دااعيشه!!
اخاف اني عايزه هم وقهر ..  رجعت للبجي والنوح مره ثانيه بس هالمره شوفة ماما دمرتني بحيث حسيت عيوني حتنعمي خلص!
باوعت للساعه ب4 العصر .. شبسرعه؟!
كمت للحمام بعد مااطيق نفسي خلص دااحس روحي مقرفه .. دخلت للحمام سبحت وغسلت الملابس الي كنت لابستهم .. لفيت المشفه عليه وطلعت بداخل غرفة النوم كان اكو غرفه داخليه بس للملابس والاحذيه مالته كل شي يخصه من ربطات عنق احزمه ساعات ملابس اشكال واللوان واشياء كثيره كولها ماركات !
فتحت الغرفه ودخلت بلكي الكالي شي البسه اخاف يجي ويشوفني بهالوضع عاد علما تجف ملابسي .
دورت بملابسه بلكي الكالي شي نسائي .. شي طويل البسه .. ماكوو اخذت قميص اسود من قمصانه لبسته وصل لركبتي .. اني بالنسبه اله قزمه وطلعت مشطت شعري واتعطرت ما شاء الله العطور عنده انواااع وكولها اتجنن .. ياااا الله اشتاقيت لغرفتي يا ربي.....!
عصرت الملابس حيل وشريتهم ع الشباك بالبلكونه ورجعت كعدت مليت من الكعده من الصبح ليهسه لو نايمه لو كاعده حتكسر .. حتى مفاصلي اتشنجت!
كمت للصاله بيها تلفيزون بس اني ما الي خلك اتفرج ع اي شي احس روحي مغموته .. بنفس الصاله اكو مكتبه صغيره بيها كم كتاب .. بقيت اگلب بيهم لكيت روايه عنوانها جذبني اسمها (انت لي) !!
جريت الكتاب وكعدت اقرا .. الروايه كانت عباره عن قصة طفله يموتون اهلها وتعيش يم بيت عمها .. تتربى ويا اولاد عمها ومن تكبر تتطور الاحدااااث ... بحياتي مراح انساها من كد ما عشقتها .. من صدوك الكاتبه كانت رائعه بتوظيف الاحداث بحيث اتحسسك دتعيش تفاصيل القصه .. وبسبب هذي الروايه اتغيرت هواااي امور بعلاقتي ويا غلطة عمري!!!

شدتني احداث الروايه واخذني الوقت .. نسيت اني وين وشلابسه .. الى ان انفتحت الباب ودخل جبل الجليد عليه!
يمشي بكل ثقه خطواته اتكول فهد ويتحرك بثبات ، طول فارع .. صدر عريض .. عضلات مشدوده .. وملامح حاده .. البدله ضايفتله هيبه بحيث اتحس الرجوله عباره عن هاله وتحيط بي تجذبك من بعيد!!
غويب هالكائن وهدوئه ولا كأنه مسوي شي ولا كأنه حابس انسانه ولا كأنه مدمر حياة شخص ورابطه بي غصباً عنه!

دخل بهدوء وابتسامته السخيفه ع وجهه .. بس من شافني شي بملامحه اتغير عيونه البنيه بلون الشمس فجأه اتحولت الى ظلام !
مااعرف لويش هالظلام الي فجأه يجتاح عيونه .. اباوع ع شرايين ايديه برزت و ملامحه اتشنجت!
شنوو السبب الي يقلب كيانه فجأه بهالطريقه المرعبه مااعرف .. معقوله لان شاف بأيدي الكتاب!!
معقوله ميقبل احد يلمس اشيائه او يقترب لممتلكاته .. بس اني مسويت شي هو مجرد كتاب وحرجعه!
اتجاهلت نظراته الظلمه بتحاهي وكمت من مكاني بسرعه رجعت الكتاب لمكانه .. اتوقعت يهدأ او يرجع طبيعي بعد مرجعت الكتاب .. بس بقى ع حاله لا وأسوء نظراته الي صارت مخيفه بشكل غريب .. وابتسامته اختفت .. هذا اشبي ليكون حيتحول الى وحش مثل ميصير بالافلام!!
درت وجهي رحت دااريد اكعد وانتبهت ع نفسي شلابسه...............!
هسه فهمت سبب هالنظرات .. اكيد الي ديشوفه كدامه هو السبب .. الله ياخذج سدن اشون نسيت البس ملابسي!
كمت بسرعه دااريد افتح باب البلكونه واذا بصوته يهز كل ذره بيه ...

نورالدين .. خلصت اليوم بالشركه .. كان عندي شغل كثير واجتماعات كومه اخر ايام كنت مهمل حيل بشغلي لذلك اتكدس عليه خلصت الي كدرت عليه والباقي اجلته لغير يوم لان هلكت من الصبح لليل بالمكتب .. وفوك هذا كله تفكيري بيها شل عقلي !
كنت حاس بالندم لان غصبتها ع الزواج .. اعرف هذا الشي راح يكرها بيه اكثر ويمكن متتقبلني كزوج الها نهائياً .. بس بنفس الوقت فكرة انو اخسرها لشخص ثاني تخليني اشيط غضب!
كنت محتار بين الندم والغضب .. مااعرف اذا الي سويته زين لو دمرت كلشي بينه!
طلعت من الشغل بوجهي للبيت دخلت ملكيت احد الشغاله كالت يمان والعائله طلعو يتعشون بره!
سألتها ع سدن كالت انو مشافتها من البارحه بالليل من اجت كانت اخر مره .
كلتلها اتحظر العشه وصعدت فوك اشوفها .. فتحت الباب واذا المنظر الي شفته شل كل حركتي .. لابسه قميصي وكاعده ع التخم تقرا .. مخليه رجل ع رجل ومدده متدري بالدنيا شكووو .. انتبهت ع الكتاب الي بأيدها (انت لي) روايتي المفضله .
شافتني ملامحها اتغيرت الهدوء والسلام الي كانو ع وجهها اختفوا ، عم بمكانهم نظرة حقد ممزوجه بخوف .. كامت بخطوات سريعه رجعت الكتاب المكانه .. الظاهر ع بالها سبب جمودي واعصابي الي دتحترك هو اخذها للكتاب!
متدري اني كل ذره بيه اتريدها .. كل جزء من روحي ديحترك بس حتى المسها .. اتحسس نعومتها .. ادفن وجهي بشعرها ،استنشق عطرها الي اشبه بحقل الياسمين!
رجعت الكتاب ورجعت كعدت بمكانها .. بس فجأه كانت بخطوات بطيئه كأنها تخفي طولها عني .. وراحت للبلكونه اتريد تفتحها ..... هذي اكيد انجنت.
بصوت حاد ونبره متسائله ... وين؟!!

سدن .. بدون ما التفتت اله .. ملابسي بره اريد اجيبهم.

نورالدين .. وملابسج شنو تسوي بالبلكونه؟!!!!!

سدن .. شريتهم بره حتي ينشفون.

نورالدين .. بنبرة غضب .. اشلون طلعتي للبلكونه وانتي ملابسج اصلاً غاسلتهم ؟!

سدن .. طلعت بالقميص شريتهم ودخلت.

نورالدين .. باوعيلي .

سدن .. اتجاهلته بس صوته خلا الرعب يدب بگلبي .

نورالدين .. بصوت غاضب وعالي .. باوعيلي دااكول.

سدن .. عاط بيه عيطه كل عظامي كامت ترجف منها .. التفتت عليه بهدوء بس اني اتظاهرت بعدم الاهتمام .. باوعت عليه ويا ريتني مرافعه عيني بعينه .. كان عباره عن كتلة غضب .. وجهه غاضب عيونه تجدح غضب .. عضلات اديه متشنجه وعصب برگبته حينفجر ....

نورالدين .. اشلون تطلعين للبلكونه بهاللبس؟!

سدن .. خوفي من شكله الغاضب خورسني .

نورالدين .. عطت بيها .. داأسألج حاجيني .

سدن .. ملابسي وصخات واني متعلمه كل يوم اسبح .. وانت جريتني من بيتنا جر مجبت وياي ولا هدمه .. انتظرتك تجي واكولك اريد ملابسي انت تأخرت وحتى ماعندي موبايل اتصل عليك شسوي غسلت الملابس وشريتهم كلت بس ينشفون البسهم .. وين الجريمه الي سويتها؟!

نورالدين .. مشيت ناحيتها بغضب .. حاولت امسك اعصابي بس مكدرت فكرة انو شخص غيري يشوفها بهذا المنظر نار وحرگت عقلي وگلبي .. بلا اي وعي مني دفعتها ع الحايط ردت الزمها من شعرها واضربها لحد متحس بالنار الي مشتعله بيه .. بس ما اكدر ايدي عمرها منمدت على مره غير من ضربتها راشدي بالمستشفى بعد ما فقدتني اعصابي .. وبوقتها الندم نخر گلبي لدرجه ردت اگطع ايدي الي أذاتها .. بدل مااضربها ضربت الحايط الي بصف راسها ضربه يمكن هشمت اصابعي ... بنبره مميته من بين اسناني الكلمات احسها تجرح روحي من تطلع  ...

_ منو شافج ؟!
احجيلي من شافج وديري بالج تكذبين عليه انهيج والخلقج.

سدن .. دافعني ع الحايط وايده محاوطتني مااكدر حتى اتحرك .. كنت واكفه كدامي بس رجليه بالموت ثابته من الخوف .. كل يوم دااكتشف جانب مظلم منه مكنت متوقعته اصلاً .
كلامه كان اشبه بالرصاص الي يريد يخترق روحي حسيته ديصارع نفسه حتى ميأذيني وهنا اجه دوري اجاوبه بلا اي استفزاز لانو كلمه وحده غلط ممكن تنهي حياتي بالنظر لحالته الي دااشوفها ...
بلعت الخوفه الي بحنجرتي وجاوبتيه بنبره مرعوبه .. محد .. والله محد شافني الدنيا كانت ظلمه من شريتهم ومحد بالشارع الله شاهد .. والله مدااكذب عليك والله.

نورالدين .. رغم كنت شاك بكلامها بس جزء كبير مني ارتاح من كالت محد شافها .. بعدت اديه عنها ، درت وجهي ورحت للحمام !
غسلت وجهي بمي بارد اريد الحراره الي دااحسه بعيوني تنطفي .. النار الي دتطلع من جسمي تهفت ماكووو .
شفت وجهي وطلعت لكيتها كاعده ع التخم ولافه الغطه عليها .. طلعت للبلكونه لكيت ملابسها بعدها تنكط مي!
باوعت ع القياس مالت اتراكها ، اخذت السويج وطلعت .. اتصلت بـ يسرى السكرتيره مالت المكتب كلتلها اريد تجين لفلان مكان!
ماكو دقايق واجتي يسرى سلمت عليه وسألتني بأستغراب عن سبب طلبي الها بهالوقت خصوصاً وهي خارج وقت الدوام.
طبعاً يسرى جداً انيقه ولبسها راقي وفخم وهذا سبب توظيفها بالشركه لانها تعتبر واجه للمكتب بالاضافه الى خبرتها اكيد .. بس السبب الرئيسي الي خلت زيد يصر انو تشغل هذي الوظيفه هو اعجابه بمظهرها واناقتها ، فما اعتقد ذوقها مراح يعجب البلوه الي عندي.
المهم ...
انطيتها القياس وكلتلها اريدج تشترين ملابس نسائيه من كل الانواع .. للبيت للطلعه للدوام واي شي ثاني نسائي كل الي تشوفي كدامج اشتري واني ادفع!
اتفاجأت من طلبي الغريب بالنسبه الها لكونها تعرفني مو من النوع الي يصادق ويصرف ع النسوان وهالسوالف .. بس نبرة الحده الي بصوتي كانت كفيلها بأنها تنفذ الي طلبته بلا اي كلام.

انتظرتها بالسياره وبعد ساعات وساعات طلعت محمله بأكياس وجنط وعلاليك اشكال انواع !
واثنين وراها هم نفس الحاله محملين .. ما شاء الله هذي كلها اتلبسنها النسوان .. شنو من كائنات انتن .
خلت الملابس بالسياره ، شكرتها .. سلمت عليه وراحت .
رجعت للبيت لكيت الشغاله كالت باشا الاكل جاهز من زمان اتحب انصب العشه؟!!
كلتلها اي صبي وهسه نازلين.
صعدت للغرفه بلا ماادك الباب فتحته ودخلت وجان اشووووف منظر خطف انفاسيييي........!

للحكايه بقيه 🙋🏻‍♀️

مستمره بتنزيل البارتات
رأيكم بالاحداث وتوقعاتكم للبارت القادم  لتنسوووووووووون التصويت 🥰