رواية سجينة الروح الفصل الاول 1 - بقلم ريام هادي

سجينة الروح
للكاتبه Reem
البارت الاول

عتبنه ع الوكت والدنيا والناس.
الخانو شوكنه وخنكو هوانــــــــا.
فتحنا كلوبنا بلا مستحه وخوف.
واجو كدامنا الجانو ورانـــــــا.
جنه نشوف كلشي وكلشي نقراه .
عدنه عيون بس مدري شعمانــــــــــه.
غدر بينا الوكت بس ماصحنا ياحيف.
انحنه ﻇﻬﺮ الوكت بس ماحنانـــــــــــــه.
اذا صاحبك خانك سهله وتهون.
بس شلون بالخــانه زمانــــــــــه

واكفه قريب الشباك بالغرفه وصافنه على بنتي الي كعد تلعب بالمطر وتكمز بنص المطر والطين مااكدر اطلع واصيحها لان لازمه عده وبطني واصله لخشمي شلون بيها ودق بنتي اول فرحتي عمرها هسه سبع سنوات ولسانها بنت ٢٠ سنه شكد وكحه ياربي هاي البنيه راح تموتني ابد متسمع الكلام ودومها متمرده ولسانها اطول منها بس مرات افكر اكول خليها الفقير بهذا الوكت مينراد وينداس بس هاي بنيه ولازم تصير اهدأ بس على منو تطلع هادئه اذا اني اعصاب وماشاء الله عمها وبيبيتها  نار شرار على منو تطلع هادئه

واني صافنه جان تنجر الدشداشه نزلت نظري شفت بنتي الثاني
ماما عفيه جوعانه
هسه حبيبتي يكملون الغده وتاكلين
بث اني دوعانه

اوف ياايه دمومج جوعانه وشلتها وبستها وفتحت المجر وانطيتها عصير وبسكت وصفنت عليها ايه بنتي الثانيه عمرها خمس سنوات فقيره طينه عكس ودق تماماً همها الاكل وتحب الهدوء
واني صافنه سمعت عيطت ودق

ودق : لك انت شعليك احد كلك انت ولي امري
منير : شنهي بنص السيان (الطين) شوفي حالج توصختي طبي جوه بدلي وغسلي
ودق : ليش انت الي راح تغسلي ملابسي يمه بكيفي مااطب
مازن : شكو شبيكم تصارخون 
ودق : هاي هيه اجه الثاني كملت
مازن : خير منير شبيك
منير : محجيت شى كتلها توصختي وكعد تمطر شوف حالها
مازن : ودق طبي جوه وكافي تكمزين بالمطر الجو بارد وراح تتمرضين موزين عليج
ودق : والله حلو انتم شعليكم اتمرض اتوصخ عناد بيكم مااطب وهاا وكمت اكمز اكثر بالطين وطفر الطين على وجهه منير وصار نار جان يجر شعري حيل
اليوم اله اكطع شعرج

هو جره لشعري وضربني على راسي واني تخبلت لزمته ضربته جلاق ودفعته حيل وكع بالطين وجيتت عليه وجان يلزمني مازن

مازن : تخبلتي شجاج
ودق : عوفني اليوم اموته شون يضربني
كوه لازمها وتهد عليه وتغلط وتتفل لج شنو هاي اخلاقج
ودق : عفت الاخلاق الك
يمامه : اباوع على بنتي وشون تتجاوز على ولد عمها منير اكبر منها بثلاث سنوات ومازن اكبر منها بثمن سنوات وهي تغلط ولا تخاف واني ادك على خدودي خزتني هاي البنيه شلون بيها ولازمها مازن كوه وهي تهد على منير
ودق : عوفني اليوم انعل اهله ونزعت النعال داريد اضرب منير ومازن لازمني بكل قوه وجان اسمع عيطه هزتني هز الصوت الوحيد الي من اسمعه انفض واخاف

حامد : لج هاي على منو تنعلين اهله
ودق : هااا
حامد : وجعا تعالي
وجان يلزمني من اذني حيل وسحل ليجوه وشمرني بنص الصاله والكل كاعد وخاصه ميساء الساحره هذا اللقب الي طلقته على بيبيتي الحجيه جميله مرات اشوف ميساء الساحره افقر منها من كثر الشر والقوه الي تملكها

الحجية جميله: شبيها الطرگاعه
حامد : تعال منير شنهي الي صار احجي
منير : والله بويه مسويت شى بس ردت منها تدخل لان مطر وتوصخت وهي استلمتني وحتى ضربتني وكعتني بالسيان
ودق : وانت شعليك ليش تدخل طبك مرض
حامد : كافي حسج(صوتج) ماهيسه (اسمعه)

يمامه : كاعد اسمع عياط حامد على ودق وهي كلمه بكلمه ويه عمها ياربي بس لا يضربها كله ولا بناتي

ايه : ماما عفيه خايفه عمو راح يضرب ودق
يمامه : اشش لتبجين ماما اسكتي مو وكتج
شون اطلع واوكف بوجهه اني لازمه عده ولازم محد يشوفني يعني هاي البنيه يوميه موكعتني بكارثه صوجي سمحت الها تطلع تلعب لو جنت حابستها بالغرفه يمي بس هي بس تشوف المطر تكوم ترجف مثلي اثنينا نعشق المطر ومنكدر نقاومه

حامد : كلمه ومااثنيها تعتذرين لأبن عمج هسه
ودق : هلوووو لو اموت
ومااحس غير راشدي فر وجهي فر مباشره نزلت دموعي
حامد : مره ثانيه من اكلچ شى تنفذي وصوتج العالي تنصي
الحجية جميله: بكد فصمه التمر ولسانها اطول منها چيبها ليه اني اعرفها شنهي الاحترام
حامد : يله فضيها وكولي العفو
ودق : لازمه خدي وابجي واشري براسي ما
حامد : مبين حابه تنكتلين كتله زينه جيبولي الخيزرانه بسرعه
مازن : يابه خطيه عوفها مكعد تشوفها شون تبجي
حامد : انت اسكت مازن هاي ممتربايه ولازم تتربى حتى تتعلم متعلي حسها
ودق : اني متربايه احسن تربايه
الحجية جميله: دهر الصابج  بنت ام الدكايك  شترجى منج ومن تربيتج
ودق : هسه منو حاجي وياج انتي
حامد : ودق كافي شنهي انتي مالج رداد ولزمتها من شعرها
ااااخ شعري شعري

يمامه : متحملت لبست البوشيه وطلعت اركض ودخلت وهاي صار اكثر من شهرين محد سامع حسي من الولد عوفها
حامد : درت وجهي رغم اعرف بيها مغطيه وجهه عفت شعر ودق وشمرتها بالكاع
اخذي بنتج وطبي جوه
يمامه : تره هي طفله صغيره ميحتاج كل هذا الضرب والحساب

حامد : المفروض تعلمين بنتج تحترم الاكبر منها مو تشجعيها
الحجية جميله: تهي بهي ويه منو تحجي يمه ويه هاي خلي بالاول تعرف شنهي الاصول والاحترام وبعدين تعلمه لبنياتها

يمامه : اشكرج عمه تعالي ودق ولزمت بنتي ودخلت للغرفه والدمعه بعيني اعرف مااخذ لاحق ولا باطل منهم وهلمره اصلاً بنتي متجاوزه يعني حتى مااكدر ادافع عنها
تعالي ماما اكعدي يمي ليش هيج يابنتي تخليني اليسوه والميسوه يحجي عليه وعلى تربيتي

ودق : ماما مااحبهم ليش مبقيتنا هنا عفيه خلي نرجع لبيتنا والله تعبت اشتاقيت لصديقاتي ولمدرستي حتى هاي المدرسه الي رحت عليها مااحبها وماعندي صديقات بيها اريد ارجع يم جدو سلمان وبيبي صبيحه مااريد ابقى هنا
أيه : اني هم ماما حبابه خلي نرجع
يمامه : اوف كعدت اسكت بيهم بعد ماصدرهن وكف من البجي والمناشغ كوه نومتهن حتى مأكلن وتمددت اليوم ظهري حيل يوجعني احس روحي راح اجيب من القهر وحركان الاعصاب

تمددت وغمضت عيني ورجعت بذاكرتي لقبل ٩ سنوات من جان  عـُـّــٓمُْري ١٦ سنه

اني يمامه سلمان محمد من سكنه بغداد الكرخ منطقه الغزاليه عائلتي متكونه من ابويه حجي سلمان رجال محترم على كد حاله صاحب اسواق غذائيه والدتي ربه بيت خريجه تجاره وعندي اخ واحد واخت وحده اخويه نصار وهو اكبر مني بخمس سنوات واختي ورد اكبر مني بسنتين واني اخر العنقود
شكلي بيضه طويله مو رشيقه مربربه وعيوني لونهم خضر ومرات يصيرون عسليات متلونات ويه الملابس معاني جميله ومرتبه شى على شى حلوه طلعت على ماما وخاصه لون العيون

رغم بساطه حالنا وعددنا القليل بس عايشين احسن عيشه وبيتنا ملك والحمدلله والدي رجال قنوع ومسالم ربانه على الادب والاخلاق واحترام الصغير والكبير بس بنفس الوقت جان دوم يكول اذا عدكم حق عند احد لازم تاخذوه لتركون حقكم جنت احب حجايات والدي من يلمنا كلنا وره ميرجع من المحل ونكعد على صوبه علاء الدين وفوكاها الجاي المهيل واللاله الضواها خافت لان صوت الضرب والمدافع يرجنا رج بس والدي يضل يضحك ويقصنا القصص حتى ننسى صوت الضرب والحرب
ونتعب وانام

حياتي بسيطه واني جنت شاطره بدراستي واروح واجي بدربي ويه صديقة الطفوله كوثر والدنيا زاهدتلي لحد مطلع كدامي ومن ذاك اليوم تغيرت حياتي
جان شاب حلو مرتب مبين طالب جامعي
ممكن كلمه
مدرت بال اله ومشيت
يمامه مااخرج والله
انداريت عليه انت منين تعرف اسمي
عادل : الي يشوف طيره مثلج مستحيل ميحاول يعرف هي منو وبنت منو
تعجبت على جرأته وبنفس الوقت مبين من لهجته مو من بغداد
تفضل اخي شرايد
عادل : هاج تفضلي
يمامه : هاي شنو
عادل : اترجاج اخذيها واقريها وباجر انتظر جوابج
يمامه : شو هذا حط ورقه بيدي وركض اريد احجي واكوله اخذها مااريد اقراها طفر وكوثر غاصه من الضحك هذا شبيه
يمامه : والله ماادري شو تعالي خلي نوصل لبيتكم ونقراها مااتحمل اريد اشوف هذا شكاتب
فتحنا الرساله جان الخط الي بيها تكول خط كوفي خط يجنن ومكتوب بمهاره عبالك خطاط جذبني الخط وحتى كوثر كالت
والله خط يموت خرب حظي كون يجي يشوف خطي تكول واحد سكران ودايسته تريله
يمامه : اوكفي خلي اقره
اول مبادي الرساله بيت شعر

أنتي حـرّكتي البحرْ منْ بـَعَد سـكته،،

وإنتي حـَلـٌيتي السؤال الماعرفـته،،

وإنتي خـَلـٌيتي النجم  بعيوني يلتم
والنجم مو هينـَـه لمتـَـه!!

إنتي رجـٌعتي النِفـَسْ
لِسنيــنْ ميتــَـه،،

وإنتي خـَلٌيتي الغصنْ
بالروح يثمرْ گـبلْ وكتــــه،،

وإنتي رجـٌعتي الحنينْ
ال بالصغر عند أمي شفتــه!

إنتي ربحي وعَوٌضتْ كلما خسرتـه،،

ياجميـله
بكل غصن وجهج رِسمتـــــه
وجه ورده
والنـِده إيغازلها جبتـــه،،

جـِيتْ أشوفج والكَمـر
ويــاي جبتـــــــه،

ويوم شافج أحله منــٌه
گَـالي خـَلـيها سكتــــه !!
ابتسمت رغم ماافهم بالشعر بس حبيته وكان كاتب هو معجب بيه بس ميكدر يواجهني وياريت اسمح اله بأن يكلمني ولو مره واهم سؤال بگلبج اكو ساكن لو تسمحين ادخله واسكن بيه
شنو معناها كوثر
حياتي معناها مصادقه تحبين احد
يمامه : هذا اشايفني تخبل
كوثر : هو ديسأل مبين ولد مؤدب شراح تردين عليه

يمامه : شرد اشك الرساله وانتهى ومن اشوفه ادير وجهي عنه بس شو هو مكاتب اسمه على الورقه بس موقع

كوثر : يجوز هذا موديل جديد بس توقيع
يمامه : يله اروح اني وبقيت الطريق كله افكر بكلام هذا الولد حبيت كلامه وطريقة تقربه وبس مشكيت الرساله احتفظت بيها ويوم بعد يوم هذا الولد يمشي ورايه ويراقب الصبح يوصلني للمدرسه والظهر من ارجع الكاه باب المدرسه ويمشي ورايه لحد ماادخل وبقى اشهر على هذا المنوال بس يمشي ورايه لحد مابيوم اختفى فوك لشهر بوقتها عرفت بنفسي تعلقت بيه وحبيته كمت الوب بس اريد احد يوصلني اخباره اني كولشي مااعرف عنه رغم اكثر من مره حاول يتقرب واصده بس هو بقى متمسك وبعد الشهر مره دااطلع الصبح وضايجه وجان اشوفه كدامه حسيت گلبي طار واخيراً شفته هو ابتسم بس ابتسامته حزينه اني طبعي مااخاف الي اريده اسوي تمشيت بتجاهه

صباح الخير
عادل : هلا بحلو الصباح  گله ممصدك يمامه بنفسها جاي تصبح علي
يمامه : ليش ماكو هاي المده بيك شى
عادل : والله على عيني عفتج هاي الايام ابوي انطاچ عمره
يمامه : شون يعني
مات ابوي مات
يمامه : هاا العفو البقيه بحياتك
عادل : وحياتج الباقيه انتي شونج
يمامه : الحمدلله وانت مبين حيل تعبان
عادل : فوك متتصورين بس بصباحج هذا وسؤالج صرت زين وبخير
يمامه : اروح تأخرت على المدرسه
عادل : يمامه
نعم
عادل : اني احبچ
يمامه : ابتسمت وخجلت حيل وعفته ومشيت وبقينا ايام على هذا المنوال بس السلام لحد مابيوم وكفني
عادل : شوفي يابنت الناس اني لازم اروح لهلي اكثر من شهر واريد كلمه منج انتي تريديني لو لا هذا الوضع تعبني صار اشهر اعوف كلييتي واجيج
يمامه : ليش صاير عصبي
عادل : موعصبي بس الوضع تعبني لاانتي حبيبتي على وجهه ولا اني الي عايفج وشايف حياتي
يمامه : عادل اني كولشي مااعرف عنك وتعرف اهلي رغم بساطتهم بس ناس محافظين شتريد مني وتتوقع اجي اكولك احبك يله تعال نطلع

عادل : شوفي يابنت الناس اني اسمي عادل من سكنه العماره رجال عمارچي  من عشيره جبيره ابوي ريس العشيره وبعد مامات استلمها اخوي الجبير حامد واني هنا لان داارس بكليه الزراعه ومأجر شقه وره شارعكم بشارعين اني ولد اثنين اصدقائي هم محافظات ندرس وكل راس شهر ننزل لأهلنا شفتج بيوم وعجبتيني وسألت عنج وعن اهلج وعرفت بيج بنت اصول ورايدج على سنه الله ونبيه

يمامه : اوكف اوكف شو انت خرطت الحجي خرط واحنا واكفين بالشارع
عادل : هاي مجرد شغلات بسيطه عن حياتي اذا ردتي تبقين وياي يابنت الناس راح تعرفين كولشي عني ومااضم شى عنج واني ابن اصول وبابه عشاير والي سويته طول هاي المده مردت اضغط عليج بس هسه بعد مابيها مجال لازم نشوف حل لاتصيرين الي وادز هلي يخطبوج يا كل واحد يروح لحاله

يمامه : هاي شنو عادل على كيفك
عادل : هذا الي عندي رايدتني لو لا
يمامه : شفته يحجي بجديه ومبين يريد مني قرار نهائي وكتله أي اريدك بس اهلي ميزوجوني هسه لان صغيره
عادل : الي بعمرج عدنا هسه متزوجه ومخلفه ثلاثه
يمامه : عدكم مو عدنا لهذا اصبر روح كمل شغلاتك واني باقيه
عادل : تعاهديني يابنت الناس انتي الي
يمامه : اعاهدك الك وبس

وبعدها اختفى عادل شهرين ورجع وتوقفت الحرب ( الحرب العراقيه الايرانيه ) وعم الفرح بالعراق طلبت من عادل يأجل موضوع الخطوبه لحد مااكمل الاعداديه وهو هم بوقتها جان ابوه متوفي يعني ظرفنا اثنينا منكدر نرتبط اتقوت علاقتنا وبديت كولش احبه وهو هم يحبني ويغار عليه
وبقينا سنتين على علاقه وبيوم استلام النتيجه تفاجأت بجيه اهله

بابا واخويه ضلو صافنين جان المشيه مالتهم رهيبه سدت شارعنا سد وكلها ناس معكله وهيبه يعني حتى لو بابا رافض بسبب الناس الهيبه والشيوخ استحه حتى يكولهم ماازوجها بس الي خوفني جانت امه مره قويه صارمه هيبه هيبتها مخيفه وتحجي من طرف خشمها عرفت اسمها جميله الحجيه جميله جان الصغير والجبير يحسب حسابها تكول رجال وبنصهم حتى الشيوخ تامرهم الي عرفته هي جبيره العشيره وبنت شيخ وزوجه شيخ والها اسمها وكلمتها صح خفت منها بس الي طمني عادل كال طيبه وحبابه وتحبه حيل لان اصغر واحد بالولد

والدي طلب انعيش بغداد وعادل اصر على اهله بان يوافقون والحمدلله وافقو بس بيوم المشيه مشفت اخوه حامد شفت فاضل الاخ الثاني ومجيد واخوهم حمود  وابن عمهم حسان جنت حافظه اسمائهم هلكد مايحجي بيهم الي عرفته اخوه حامد الجبير جان عنده فصل عشائري ومكدر يحضر وبعدها بيوم تم عقد المحكمه جان عادل حيل مستعجل وبيوم المحكمه شفت حامد جان رجال طول بعرض هيبه وشاب حلو يجذب النظر رغم توقعت اشوفه لابس عكال ودشداشه لان شيخ عشيره واتوقعت هم اكبر بس تفاجأت بيه لابس رسمي بنطرون وقميص وهو اسمراني وضخم وصاحب لحيه خفيفه جان شكله رجولي اي بنت تشوفه مستحيل متنعجب بيه بس من شافني انگلب وجهه وتغيرت ملامحه مهتميت اليوم اسعد يوم عندي يوم عقدي على حبيبي بعد حب سنتين من سألته شبيه اخوك كال مابيه شى تعبان من الطريق
توقعت يجي لابس دشداشه وعگال
عادل : اخويه هم دارس مخلص سادس صناعه وعاش بغداد ويايه اكثر من ٣ سنوات لهذا هنا يلبس مثل بغداد وبالعماره دشداشه وعگال
يمامه :سكتت وبقى الفضول عندي ليش اخوه ضايج مقتنعت تعبان من السفر

وبعد العقد بأسبوع اجه عادل وجهه مكلوب وكال لأبويه اتعارك ويه اهله بسبب الورث ميقبلون ينطوه والدي بوقتها مقبل نتزوج اله بحظور اهله واذا محضروا يطلكني بس هو كال هاي زوجتي اخذها واطلع ومالكم حق يمي واشتد النقاش وخيرني والدي اتزوج واتحمل كولشي لو اطلك منه واختاريت حبيبي وهو اشتره مشتمل قريب على اهلي بنفس الفرع واتزوجنا بحظور كم صديق اله ولا واحد من اهله واهلي وصديقاتي

اول سنه عشت وياه بالعسل طلعات وسفرات حياتي هادئه وحلوه
وحبلت من ليلتها وبعد ٩ اشهر شرفت ست الحسن ودق سميتها ودق من حبي للمطر لان من احد اسماء المطر هو ودق المطر الشديد

وبعدها بسنتين شرفت ست ايه وطول هاي السنوات كولشي منعرف عن اهله بقت علاقتي بأهلي وبس رغم حرب الخليج والازمات وهو ابد ولا وصل لأهله حاولت اقنعه اكمل دراستي مقبل بس دخلت معهد تمريض سنتين كملتهم وكعدت اهتميت بيتي جانت حياتي نوعاً ما كامله وبناتي ماخذات كل وقتي

وهو كمل الكليه واتخرج  واشتغل  بالادوات الاحتياطيه محل وشغله زين وامورنا ماشيه لحد مابيوم اجاني يتوسل يريد طفل كتله عدنه اثنين بنات كال اريد ولد انقهرت عليه وكلت ليش لا هم سند لبناتي
وحبلت واول كم شهر بعد انقطاع عن الحمل خمس سنوات حسيت بتعب بس كدرت اجتازها بس كثرت سهرات عادل بره بحجه الشغل واخذ اشهر عود يجيب مواد بين كركوك بغداد او بين بغداد البصره وحتى تغير تعامله ويايه بارد وميهتم كلت خطيه يجوز شغل عنده واقدر ظرفه

وصلت للشهر الخامس  وبيوم اجاني وجهه اصفر ويلهث شكوو شبيك
عادل : لمي ملابسج وملابس الجهال راح نروح للعماره
يمامه : شنو ياعماره يمعود وبطني واني وابهذل بناتي
عادل : مثل مااكولج استعجلي
يمامه : انت اتصالحت ويه اهلك
عادل : مو وكتها فضيني
وصدوك لميت الشغلات الضروريه ودعت اهلي وانطيتهم المفتاح كتلهم كم يوم وارجع
وطول الطريق وهو يسوق ويتلفت
يمامه : يمعود شبيك لتخبلني صار شى
عادل : من نوصل لأهلي بوسي ايد امي
يمامه : وليش
عادل : هاي عاداتنا
يمامه : ماشي وبعد ساعات من الطريق تمرمرنا وصلنا وجانت هاي اول طبتي الهم
باوعت بستان كولش جبير تمشي السياره وبعده مخلصان وبنص البستان مو بيت قصر حتى اكبر من القصر وجان مرتب كولش وصلنا ساعه ١٠ بليل الكل نايم الي فتح النا الباب اخوه حامد وهاي ثاني مره اشوفه كلت السلام عليكم بس كال وعليكم السلام تفضلو حتى بوجهي مباوع يا طبك مرض ولا اهتميت دخلنا لغرفه جبيره ومرتبه ونومت البنات ومن التعب نمت

كعدت ثاني يوم الصبح وصوت العصافير وتنور مبين ديخبزون لبست دشداشه عريضه وطلعت وصارت بوجهي بنيه اكبر مني
فضيلة : هله خيه نورتي ديرتنا
يمامه : اهلاً بيج
فضيلة : اني فضيله اخت عادل
يمامه : واخيراً شفتج دوم عادل يحجي بيج
فضيلة : كون بالخير يذكرنا
يمامه : اكيد بكل خير
فضيلة : تفضلي حبيبة الحمام منا

يمامه : أي والله اريد اغسل وغسلت وكل شويه وحده طافره مسلمه مو بيت عبالك مدرسه جهال ونسوان وين ماادير وجهي الكه مجموعه وجان تنفتح باب والكل سكت وهدوء وجان تطلع الحجيه جميله وذوله شون الفار كلها تركض هاي شبيهم هيج يخافون منها اباوع عليها مره طويله لابسه دشداشه سودا وعصابه سودا وعليها فوطه بيه مثل الدنبوس من ذهب بعدين عرفت اسمه چلاب
والحنج مدكوك ولازمه عوجيه خشب وهي طويله ضخمه صدوك هيبه اني الفطيره رحت امشي عليه وجان اكولها شونج خاله

الحجية جميله: وخلخاله شني هاي خاله
يمامه : العفو بس مو لازم اصيحلج خاله

الحجية جميله: هنا ماكو خاله مال بغداد هنا تصيحيلي عمه 
يمامه : حاظر
صدوك خفت منها هاي شبيها عفتهم وادور على عادل ودااطلع وجان يصير بوجهي حامد
وين كاصده
يمامه : شنو
حامد : وين رايحه
يمامه : نعم ويايه
حامد : اعتقد ماكو غيرج گريب مني
يمامه : داطلع اشوف عادل وين

حامد : اسمعي ياام ودق هنا مو بغداد هنا الطبه والطلعه بحساب يعني الي عشتي هناك هنا ميصرفنا
يمامه : احد كلك هناك جنت دايحه بحيث ميصرفلك تصرفي هنا
حامد : لا العفو اني قصدي
يمامه : لا قصدك ولا قصدي اني عندي رجال وهو الي يحكمني
حامد : باوعت صفح الها لبسي لكچه ولا طلعين هيج

يمامه : شنو
حامد : ( بقلة صبر ) حطي غطه على شعرج وعود من يجي رجلج كوليله اخوك  حامد يحاسبني
يمامه : عافني وراح هذا من كل عقله يريدني احط شى على شعري اني ممحجبه ياربي هذا عادل وين جابني وين راح

حطو الريوك فرشو السفره انتبهت الرياجيل وحد والنسوان والجهال وحد بقيت بحيره عيوني تطلع النجده من أي احد يفهمني وين عادل
فضيلة : يله حبيبة تعالي اكلي
يمامه : فدوه فضيله وين عادل
هاااا عادل عنده شغل كلها چم  ساعه وتلكيه يمج
يمامه : وين راح وعافني
فضيلة : خيه مايتأخر  لتخافين

يمامه : حسيت الوضع موطبيعي والكل مرتبك حاولت اكل مكدرت اكلهم دسم كله زبد وكيمر وحليب جاموس احس معدتي انگلبت واني منا حامل ونفسي تلعب كوه حطيت قطعه خبز صغيره بحلكي وشربت كلاص جاي وريكت البنات
شو ذني بس خلصن الريوك هاي تركض تعجن وهاي تمسح وهاي تطبخ تكول مكاين مونسوان زين موهسه خبزوا المن هذا العجين
فضيلة : خيه احنا ماناكل الخبز اله حار وكت بوكته شحلاته من يطلع من التنور
يمامه : شنو هذا العذاب واحد يخبز كميه ويضمها
فضيلة : الولد ماياكلون اله حار توه طالع من التنور
يمامه : الله يقويجن
بقيت افتر بالبيت ناس بسطاء حبيت كعدتهم وسوالفهم اله وحده بيهم احلام مرت حامد تباوعلي من طرف خشمها تريد تاكلني اكل اني مهتميت الها بقدر مهتميت وعيوني على حجيه جميله شون تأمر والكل يكولها تامرين

بقيت الوب هذا وين صار وراها بساعه اجه
وينك يمعود هي هاي سوايه تسويها
عادل : شبيج خبصتي الدنيا
يمامه : شون مااخبصها وانت ساحلني من بيتي وبنص الليالي وجايبني هنا وبدون لا تفسير  ولا أي شى وادور من كعدت من النوم عليك وانت ماكو فهمني شنو الي صار

عادل : ماكو شى راح نبقى هنا كم يوم وراها نرجع لبغداد
يمامه : شوكت تصالحت ويه اهلك
عادل : قبل كم يوم احد حجه وياج شى
يمامه : لا بس هذا اخوك ضوجني يردني البس ربطه او احط شى على راسي ويتأمر ولا طلعين ومفردات عجيبه
عادل : لتحسسيني جايبج للمريخ قابل يحجون انكليزي
يمامه : لا موقصدي بس اكو مفردات مااعرفهم

عادل : تتعلمين لتسويها قصه واسمعي كلام حامد هذا جبيرنا ومحد يكدر يكسر كلمته حاولي تتجنبي وامي دير بالج تزعليها
يمامه : ليش مبين الشغله مطوله
عادل : ان شاء الله متطول
يمامه : بقيت اليوم كله بغرفتي مطلعت ولا اريد اشوف احد وحتى غدا متغديت بس دزيت البنات ليم ابوهن

عادل : شيخ اريد احجي وياك عندي شغيله وياك
حامد : شنهي كول
عادل : خويه فكك من مرتي
حامد : شنهي مرتك

عادل : شيخ اني مسؤول عنها تلبس تطلع والحجايه حجايتي وكلها كم يوم ونروح
حامد : شوف عادل اني محرم عليك دخول هذا البيت ولوما مصيبتك وخوف على سمعة ابونا جان بحياتك تحلم تدخل
وزوجتك محرمه عليه حرمت رضيعتي (اختي)
بس انت تعرف عاداتنا ماعدنه حرمه تفتر ومامغطيه راسها احترم عاداتنا ولا تنسى نفسك ومن تروح لبيتك لبغداد شسوي سوي
عادل : خلي تفض وبعد متشوف وجهي بيوم
حامد : تسوي فضل

الحجية جميله: چا شمالكم ولد راضي هاي تاليها هيج النسوان تضيع خوتكم
حامد : يمه واليرحم والديج فكينا من هاي السالفه هذا وليدج ويمج وخلي نفك طلابته ويولي لبغداد انتي حلفتيني بتراب ابوي ولخاطره ولخاطرج رضيت ادخل نفسي وافضها غيرها ماعندج شى يمي
الحجية جميله: يحميد لتنسى هذا اخيك
حامد : هو النسى يمه هو اني رايح للمضيف عندي طلابه افضها لاتنتظروني
عادل : وشغلتي

حامد : انداريت عليه انت لاتطلع هلكم يوم لحد ماتفض ويه الوادم وهاي كدام الحجيه اذا كسرت كلمتي اشيل ايدي منك
عفتهم وطلعت
عادل : شفتي يمه كل شوي مهددني
الحجية جميله:خلي يايمه تره اخيك گلبه دم منك چنك نسيت سويت

عادل : رجعنا يعني شون ماينسى
الحجية جميله: اسگت عادل لاتخليني اطلعهن كلهن وهاي مريتك ضبها شوي لاتفتر هي وشعرهاجنها بزونه مهلوسه وتفتر علينا
عادل : هو انتم كل الي هامكم مرتي وهي كولشي مامسويه
الحجية جميله: كوم يمه وتعوذ من الشيطان وخلي تفض شغيلتك وراها روح ارجع لبيتك انت مقرب البانزين يم النار

حامد : بقيت افور والنار تاكل بيه الوادم اجت والطلابه فضت واني عقلي مو براسي عقلي رجع لقبل سنين والي سواه اخوي وطعنة الظهر الي كسرت ظهري كل هاي السنين
وراها بساعه اجه زلمه يركض
الحك شيخ الحك
خيرك

اخوك عادل طكوه
حامد : انه خوك ياعادل وركضت والزلم كلها ورايه ولكيت عادل مدمه بطوله وبأنفاسه الاخيره
عادل : خويه سامحني
حامد : لاتحجي ياخوي هسه اخذك للمستشفى وتصير زين

عادل : وصيتك يمامه والبنات
حامد : كتلك لاتحجي انت مابيك شى اخوي مايموت هيج غدر كوم وذبيت العبايه وشلت اخويه على ظهري والوادم تريد تساعدني لاتلزموه هذا اخويه واني اشيله
حطيه على ظهري وامشي ودموعي احاول اسيطر عليهن رغم كل الي سواه يبقى ابن امي وابوي وبعدني بنص الطريق وامشي وحسيت نفسه اختفى نزلته

عادل خويه عادل حاجيني خويه افتح عينك خويه ردتك حزام للظهر خويه رتك عون الي تالي تعوفني وتروح

يمامه : كاعده بالغرفه امشط بشعر ايه وروحي طاكه بس يجي عادل اليوم اگلبها للدنيا لازم ارجع لبغداد مااتحمل ابقى وجان اسمع عياط والدنيا گلبت
دفعت ايه وركضت وفتحت الباب واشوف الحجيه بالكاع وتلطم على راسها وخواته ونسوان اخوته كلها تلطم شكوو
فضيلة : راح العزيز راح خويه
يمامه : منو مات

وجان اسمع طلق وعياط زاد وعاط اخوهم فاضل لك متت غدر  ياخويه هاي تاليها سنين بعيد ويوم ماترجع تموت هنا وكدام عينا ومانكدر نحاميك
يمامه : لكم منو الي مات
فضيلة : عادل مات خيه رملج ويتم جهالج وراح
يمامه : هنا وكعت ومحسيت بعدها بكولشي فقدت الحياه من كعدت بس ابجي اني مو مثلهم مااعرف الطم واشك هدومي جان صريخي ودموعي تعبر عن حزني بس بالحقيقه الي بداخلي من حزن اعظم حب عمري مات وشون مااعرف وحتى مكدرت  أســــأل لان احس روحي ماتت والف سؤال وسؤال ليش جابنا هنا ومنو كتله وشسوه حتى ينكتل بقيت ايام الفاتحه كلها بالغرفه
رغم الهوسه والطلايب توقعتها الفاتحه بس طلع بالاصل ذوله بس الاهل متواجدين لان مقبلو يسون فاتحه اله ياخذون بدمه جنت مثل الاطرش بالزفه حياتي بيوم وليله انگلبت  حتى اهلي ميدرون زوجي مات ولاكدرت اطلع اطلب منهم اتصل بأهلي لان بوقتها جان تلفون الارضي ولازم اطلب من حامد اخابر لان التلفون يمه والبيت والوضع ابد مو مال اطلب منهم هيج
محد جان يدخل علينا غير فضيله جانت حبابه وحايره بالبنات لان وضعي ادهور واكل مااكل حالتي النفسيه صفر اريد امي اريدحضن ابويه اريد اغمض واكعد الكه كل هذا كابوس وانتهى

بعد ٤ ايام تجرأت طلعت وتمشيت لغرفه ام عادل وجان الباب مفتوح
وجانت كاعده على الجربايه مالتها ومتربعه والعوجيه بصفها ولدها واكفين كدامها مثل القصاص عدا حامد كاعد بصفها واسمعها تحجي بقوه وحزم
شوفو يولد راضي اخيكم مات غدر ومو احنا الي يموت النا غدر ونسكت اريد بدم وليدي ١٠ زلم ومايبرد ناري
فاضل : يمه نكتل الي كتله ودم بدم چانسويها ١٠ راح تكبر

الحجية جميله: اسكت تريد ترخص دم اخيك بدم النكس الي كتله لا وحك العباس ابو فاضل ماتصيرون وليداتي واغضب عليكم ليوم الدين اذا ماطكون ١٠ منهم كدام دم الغالي
يمامه : عشره شنو
وجان الكل يندار عليه
الحجية جميله: شنهي الجابج هنا روحي
لحجرتج (غرفتج)  ولا طلعين منه
يمامه : اني زوجي مات اريد افتهم شنو الي كاعد يصير وليش انقتل لازم افتهم
الحجية جميله: اركدي واسكتي ولاتحشرين نفسج
يمامه : هذا زوجي شنو احشر نفسي
احجي واعيط فقدت عليها
حامد : بعياط وصوت هز البيت هز
حسج ماهيسه (اسمعه) ومثل مكالت الحجيه اركدي واسكتي انتي هسه عزبه (ارمله) روحي لحجرتك ومن تخلص الطلابه اشوف شنهي سالفتج
يمامه : خفت منه وركضت للغرفه وحضنت بناتي ودموعي على خدي

وبسابع يوم انصب الجادر كالو اخذنا بثار اخونا وكالمعتاد مفهمت شى وبديت اسأل فضيله تكولي تعرفين خيه خلي تفض الوادم وتكعد الحجيه وتفهمج

وفضت ومرت الايام والحال كما هو حتى اهلي مكدرت اتصل بيهم وبديت افقد اعصابي والكل محد يتقرب تعليمات الحجيه

غريبه وبمكان مو مكاني وناس مو اهلي وعادات وتقاليد بعيدات كل البعد عني واريد اروح لأهلي كافي صارت الاربعين واني على اعصابي ورحنا للنجف وكفت كدام گبر حبيبي واول حب بحياتي وابجي ومنهاره
وين عفتني وين عفت بناتك هاي تاليها ياعادل هذا وعدك الي متعوفني والي بطني يتمته وبعده مشايفة ليش يانظر عيني تعال شوف حال حبيبتك وقهرها هنا انهاريت ادك والطم فقدت ابجي على حب عمري الي راح وابجي على الضيم الي جاي لان حاسه راح اعيش بضيم وقهر وبقيت الطم لحد محسيت راح اجيب من الالم حسن عليه فضيله وكريمه خوات عادل وكومني وكعدوني بالكوستر كالو صحتج متتحمل اخاف يصير شى للطفل يجوز ولد لتحرمينا من ذريه اخونا اخاف يصير بيه شى سمعت كلامهم وصعدت وبقيت اباوع من بعيد على كبره واشوف الكل يبجي ومنهار
وجان اسمع اثنين نسوان واكفات وظهرهن على الكوستر ويحجن

شفتي مرت المرحوم جنها العافيه شحلاتها
الثانيه : اي والله خيه شجاه شصابه واخذ بت عليها هي عزبه الي خذاها
يمامه : اريد افهم شنو اخذ بت ذني شيحجن
خيه الي فهمته من ام عباس المرحوم متورط وماخذها بت بيت والبت حبلانه منه بالحرام واهلها لكفوه وهدروا دمه وراح الشيخ حامد يسدها وماكدر وابن عم البت گتله
يمامه : لا مستحيل
يتبع ..

مساء الـ🌹ـورد متابعيني بسبب كثره الطلبات بأن القصه تكون بلهجتها الاصليه راح احاول اضبط لهجة اهلنا بالعماره وخاصه لهجة البطل اما البطله هي اصلاً من بغداد لهذا راح تكون القصه بلهجتين بغداد وعماره (كلنا العراق 😁) وتكون القصه مثل متحبون لهذا اتمنى تعذروني اذا اكو مفردات تحسوها بغدادي
احاول بالبارتات القادمه تكون اللهجه اضبط
تحياتي لًلًـّــ💎ــجٌٓمٍَُٓيِّعَْٓ
Reem