رواية سجينة الروح الفصل الثاني 2 - بقلم ريام هادي

سجينة الروح
للكاتبه Reem
البارت الثاني

عفيه دنيا الما شفت بيه الحنان
وعفيه دهري اليطحن بكلبي طحن
وعفيه وكتي هواي شوفني الهموم
وردت اضوك الفرح ضوكني الحزن
ادري يا ربي امتحانك صعب حيل
ردت فرحة ارتاح ونوب امتحن

يمامه : حسيت صوت بأذني وغواش بعيوني وحراره لزمت اذني كلها دم بس منهزيت من منظر الدم لان الي سمعته كافي يخلي گلبي يوكف وعيوني مترمش وبعدني اسمع النسوان شون يحجن على خيانه زوجي زين اني وين جنت شون محسيت بيه يخوني ومنو هاي البنيه

كريمه .. خيه روحي شوفي ام ودق اخاف صار بيها شى محتاجه شى
فضيلة : رايحه
وصلت يمها وصعدت للكوستر جانت فارغه الكل نازل يم الگبر وشفت منظرها كاعده وايدها كلها دم وصافنه متت خوف
حبيبه شبيج هاي منين الدم

ام ودق حاجيني ردي خيه هذا الدم منين من جوه نزفتي احجي وماكو مشفت نفسي غير ضاربتها راشدي حتى تصحى وتجاوب
وعاطت وتبجي
ليش شسويتله ويخوني ليش مو عاندت الدنيا وعاندت اهلي وعشت وياه على المره قبل الحلوه هاي جزاتي يخوني بشنو قصرت والله جنت مدللته مثل المي بالصينيه ومراعيه الله بيه وممقصره وياه
فضيلة : شنهي سالفتج خيه على كيفج ويه نفسج صوتج ليسمعوج الوادم ونصير علچ بحلوكهم

يمامه : احنا علج فضيله سمعت النسوان تحجي بزنا رجلي وهمه يم كبره لعد لو بعيدين منه شيحجون وكمت ادك على راسي والطم
فضيلة : حضنتها وميته قهر انمرد گلبي عليها حقها ماالومها چا هي غير طركاعه وكعت على روسنا
خيه احلفج بالشده الي انتي بيها عليج امير المؤمنين الي انتي هسه بكاعه اسكتي وتحملي لحد مانرجع منريد تصير هسه سالوفه خلي الاربعين يمشي وتفض الوادم والي تريديه يجرالج

يمامه : كمت ابجي بصوت ناصي شبيدي اصلاً اسوي شو الي خاني يم ربه وجوه التراب واني غريبه وبنصهم اخاف احجي ويسمعوني وهلمره اطلع اني الي موخوش ادميه مره بالعده وطلع صوتها والكل تصير شريفة براسي محد يحس بالنار الي بگلبي ولا اكو اي احد يحس الي بيه صدمه العمر وكسره الروح رجال خسرتي صحتج وشبابج وعمرج لأجل عينه ونايم يمج بفراش واحد ويخونج ومحسيت بيه وكدر يلعب عليه وفوكاها قبل ميموت شمرني يم ناس وحوش مااعرف شنو الي ضاميه اليه

الكل صعد جان العدد جبير اكثر من ٥ سيارت كوستر حتى السيارات الخصوصي وكلها دك ولطم ونعي وراها هاي الهوسه كلها راحوا للمطعم والكل كاعد ياكل ولا عبالك جانو بمكبره ولو هي كلها هيج اني منزلت اصلاً اكل سم هو اني مال اكل حال الضيم حالي وبناتي عفتن بالبيت يم مرت حمود بقت الجهال وبقيتهم يمها كلت مااكدر ادخل بنات صغار للمقبره رغم همه كتلو نفسهم اخذهم بس مقبلت

رجعنا وصلنا حدود الساعه ٧ بليل وگبل نمت من التعب والقهر اعرف اذا بقيت كاعده مراح انام اخذت بناتي بحضني ونمت كعدت ثاني يوم ساعه ٦ الصبح والكل كاعد هنا نظامهم وره صلاة الصبح كلها كاعده حضرت ملابسي وملابس البنات ورتبت الجنط فتحت صندوق بيه كم قطعه ذهب ومبلغ بسيط يسد احسن مما كولشي ماكو خلي اخذ بناتي وغراضي وارجع لأهلي شعندي باقيه هنا فوك مخاني وكسرني على شنو باقيه ومناك اهلي اكيد ماتو خوف عليه وخطيه حتى الرقم ميعرفوه

طلعت اسحل بالجنط والكل فتح عينه واني مغطيه وجهي لان اعرف بهيج وقت حتى الولد موجودين
صباح الخير
جاوبوني بس بعيون كلها حيره اله حامد والحجيه مجاوبوني جان تندار عليه وتلزم العوجيه مالتها وجهتها عليه

الحجية جميله: شصابچ وين موليه (وين رايحه)
يمامه : مالي مكان هنا لازم ارجع لأهلي الي جابني يمكم ورابطني بيكم هسه يم ربه وهو يحاسبه على الي سواه بقائي ماله معنى

الحجية جميله: شسوه المرحوم
يمامه : كولي شنو الي مسواه اني كولشي عرفت وبعد لحظة ماابقى
الحجية جميله:  تولين مانريد نشوف جهرتج
ولي بس بنياتنا تبقى هنا
ودق : ماما لتعوفينا
يمامه : حسيت ودق وايه لزموني حيل
وين اعوف بناتي مستحيل وين مااروح هنه ويايه اباوع على حامد كاعد وبيده السبحه ويحرك برجله من التوتر

حامد : احنا ماجينا صوبج انتي الي تريدين ترحين وهذا قرارج ومالنا حك التدخل بس ذنه بنات المرحوم دمنا شون تردين تاخذيهن لحمنا ميروح بره ويبات يم الغربه
يمامه : ياغربه ذوله اهلي واني امهم

الحجية جميله: سمعي وهذا الحچي حطي بعقلج وفكري بيه زين اطلعين منا بطرك روحج وهدماتج بنياتنا يتربن بالبيت الي تربى ابوهن بيه وحتى الي بطنج تولدين حدج للاربعين ونجي ناخذه

يمامه : انتم شكعد تحجون هو بكيفكم والله راح اطلع واشوف منو ياخذ بناتي مني وطلعت وسحبت البنات جان يعيط حامد ويوكف على حيله
وهاي اول مره اسمعه يصيح بأسمي

يمامه رجلج اذا خطت عتبت الدار وحق علي بن ابي طالب ماتشوفين بناتج ليوم الدين

يمامه : كمت ابجي حرام والله مااكدر اعيش بدون بناتي
حامد : محد طاردج ولا كربلچ اكعدي هنا معززه مكرمه وبناتج يمج والي يكربلج حسابه يمي
يمامه : مااكدر ابقى هنا اذا حتى اهلي ميدرون شصار بيه ولا عدهم عنوانكم ولا رقمكم وكتلهم كم يوم وارجع وصار اكثر من ٥٠ يوم هنا
حامد : شنهي قابل يرادلها روحه للقاضي خابريهم وبلغيهم
يمامه : عفيه اترجاكم خلوني اروح واخذ بناتي والله مااريد شى منكم

الحجية جميله: انتي ياالمعجعجه ( الخبيثة ) هاي سوالف ودونيه النسوان كلهن عندي ترحين تاخذين بنياتنا وراها تشوفيلج زلمه ويعيشيهن يم الغريب
يمامه : والله مااتزوج بس عوفوني بحالي وكولشي مااريد منكم

حامد : الي عندي حچيته ويله كلمن لشغله وانتي عندج اما تبقين هنا وتعيشين يم بناتج لو تولين بطولج وانسي عندج بنيات يمنا

يمامه : اباوع عليهم عبالك اسود والكل واكف ينتظر سراه ينهش بلحمي اني اذا طلعت اعرف هذا الظالم ميخليني اشوف بناتي وصدوك يحرمهن عليه شكد جان يحجيلي عادل على ظلم حامد وقساوته بس هسه من اشوفه عيونه تجدح نار ويريد ياكلني ومرحم بحالي وبدموعي وتوسلي عرفت اني هسه بغابه ولازم اقوي نفسي لأجل بناتي لحد مااولد واوكف على حيلي واكدر اخذ بناتي واروح وغصب عن الكل هسه وضعي وصحتي حتى متسمح اتعارك واتجادل من التعب

درت وجهي وسحبت الجنط وطبيت بهدوء للغرفه ويايه فضيله ادخل بالغراض
طبي حبيبه واستهدي بالرحمن ولا تعاندين

يمامه : كمت ابجي والله ظلم
فضيلة : گلوبهم محروكه مصابنا جبير ياخيتي وانتي تردين ترحين وتاخذين بنات المرحوم چا هي هينه
يمامه : بناتي ذني ياناس عبالك دابوكهن
فضيلة : حقج بس لاتعاندين وخلي النار تبرد لتروح تحرك الگل

يمامه : عافتني وطلعت اكيد اهلها وادافع عنهم بقيت حاضنه بناتي ودق تمسح دموعي
ودق : لتبجين ماما خلي يولون مااحبهم بعد وخاصه عمو حامد بس يخوف ويعيط اما هاي ميساءالساحره
يمامه : منو ميساء الساحره
ودق : بيبي جميله
يمامه : ابتسمت على الاسم ميصير حبيبتي هاي بيبيتج وتحبكم
يمامه : بس متقبل نرجع لبيتنا وتحجي عليج ومتحبج
يمامه : ميخالف ماما هاي سوالف مال كبار لتدخلين انتي بيها هاي جدتج واجب عليج احترامها ومحبتها لتدخلين بينا انتي بنت ابنها وكولش تحبكم صيري عاقله ماما ولتسوين مشاكل
مااريد يحجون عليه ويكولون بنات يمامه وكحات ومعرفت تربيهن

واني احجي سمعت حامد يعيط على الموجودين والصوت مو واضح كمت وكفت وره الباب مال الغرفه وخليت اذني واسمعه يرزل بلبنات جانت خواته فضيله وكريمه ومرته احلام ومرت حمود نجاه ومرت فاضل خيريه

اني مو كتلجن متحجن شى كدامها جايات وساردات الطركاعه براسجن كلها كدامها ليش
فضيلة : والله ياخوي موش احنا سمعت ام ودق نسوان بالاربعين يسولفن
حامد : وانتن مسودنات وين جنتن عنها
فضيلة : چا احنا شنسوي تعبت وخليتها ترتاح بالكوستر وذني گريبات منها وماانتبهن وكعدن يسولفن وسمعتهن ودك لطم وبجي

حامد : ماعتمدت عليچن بشى اذا ماصخمتنه يله ولن لشغلجن
الحجية جميله: فلك صابچن مو نسوان طرگاعه يمه لا تعب روحك وعوف هاي سوالف النسوان وروح لشغلك كلها تنتظرك
حامد : يمه لحد يوصل يمها عوفوها ولتحاولون تضغطون عليها

الحجية جميله: عوجت حلكي معاجبني الحجي خوش خوش روح يمه لشغلك واني احلها

حامد : الله ليستر
الحجية جميله: شنهي
حامد : رايح يمه وبستها من راسها وايدها
الحجية جميله: الله يرضى عليك يمه

يمامه : بقيت ايام معتكفه ومااطلع وحتى اكل مااكل وياهم حتى كل مااريد اخابر اهلي اكول الهم يكولون كولي للشيخ اله يقبل هو يله تخابرين وهو منا يركض هنا وهنا وميرجع اله بليل واستحي احجي سكتت وسلمت امري

وراها بكم يوم كاعده البس بودق وجان عدهم عزيمه وثواب للمرحوم والكل مجتمع طبخوا وزعوا والبيت هوسه ولا طلعت حتى كريمه حاولت ويايه كتلها خليني بالغرفه احسن ما اريد انغث اعرف بس اروح يمهن اسمع كلام يفور دمي على شنو اكعد واسكت احسن دخلت ابدل للجهال
وسمعنا طلق قوي وعياط اخذ الدنيا من خوفي على بناتي نزلت للكاع ونزلتهن وحضنتهن حيل حتى نسيت اني حامل وبطني توجعني وبقى بال ١٠ دقايق واني اقرا ايات وادعيه ياربي دخيلك تكول حرب
وهدأ الطلق واشتغل العياط انعاد عليه نفس يوم وفاة عادل گلبي وجعني وطلعت اركض
ماما ودق ابقي هنا يم اختج لتتحركين

وفتحت الباب واشوف البنات ملخات رواحن الخدود والشعر وشك الملابس دخيلك ربي شصار والدمايه بالباب
ومحسيت بروحي غير رجلي تاخذني لعتبة الباب والباب مفتوح كله واشوف رياجيل مجطله وكلها دم المنظر عبالك مجزره رجلي وكفت اريد ادخل مااكدر وارجف من الخوف وبس دموعي تنزل منظر مرعب مشفت غير حامد اجه بسرعه وبكل قوته لزمني من زندي ودفعني ليجوه
حامد : ادخلي لدارچ ولطلعين لحد مايهدا الوضع
يمامه : طبيت ركض وحضنت بناتي وسديت اذنهم لان الصريخ والعياط كولش قوي وذني بس يبجن وخافت حقهن بنات صغار
الصدمه الي صارت بيه خلتني اتذكر منظر حامد هو هم جان كله دم باوعت على ايدي لزمته لزندي جانت حيل قويه اذتني ورغم لابسه دشداشه سودا شميت مكان لزمته عرفت بيها دم دخيلك ربي منو مات

حامد : بعد ثار اخوي مثل ماامرت الحجيه بدم الًـغالي راحوا ١٠ وبعد الفاتحه دكونا وطلبنا عطوه وبعد الاربعين كعدت الزلم وماتفقوا واشتغل المصايح والعياط وثاني يوم اجتمعنا كلنا الزلم كلنا لازم نسوي حل ذوله يردون حگهم حك ٩ من زلمهم والعاشر هو الكاتل مطالبو لان هو الي تعدى وبعد الغدا دنطلع من الباب ومانشوف غير سيارات تمر وكلها محمله زلم وتفك (سلاح ) واشتغل الرمي تولونا غدر جان المفروض بعد يومين نكعد مره ثانيه ونحلها بس ذوله

فضالة الزلم وماعدهم كلمه جان حالي صعب اختاضيت (انقهرت )
واني اشوف اخوتي وعزوتي يموتون كدامي وبيد ناس زباله غداره بس الغلط الاكبر من اخوي المرحوم الي دنت نفسه على بنيه وخذاها وكسر وجهه وجهنا وهو متزوج وماحسب لسمعتنا ولا لمريته وبناته
اوف ياخوي دومك متعبني وكاسر ظهري وماشفت منك بس الاذيه

صار الرمي وركضت عليهم الي شايل سلاح ضرب بس همه اكثر ومتانينه (متحضرين) اتصوبت بأيدي وهمه راحو كمت واشوف اخوي فاضل مدد ركضت كله ولا فاضل هذا العزيز ودومه بظهري
ركضت عليه كوم فضيل خوي حاچيني فاضل لاتموت وتتركني شلون بيه مكتوب عليه اشوف اخوتي مدمايين وادفنهم بيدي
لكيت اخوي الغالي ميت ومابي اي نفس الطلقه بگلبه وزرفوا گلبي وياه
ركضت واشوف ابن عمي حسين رجل فضيله مدد وهم ميت جسمه كله طلقات
وين مااندار الاكي واحد من ولد عمي ماتو ٥ منهم ركضت لخليصي وكاتم اسراري وعمري ابن عمي حسان هذا اعز من نفسي
ولك حسان اكعد لاتموتني عليك
حسان : خوي متصوب لاتخاف ماميت شصار

حامد : كول شنهي الي ماصار لك اخوي واخوك ولد عمك جبار ماتوا
حسان : كمت كوه طلقتين وحده برجلي وحده بأيدي وركضت على اخوي حسين
حامد : كمت اعيط واضرب طلق بالجو
ولكم اليوم اشعل ابهاتكم اليوم احرك ديرتكم عليكم مابقي جريدي بيكم لكم اليوم ارجعكم بطنك امهاتكم ياعارات
ومااشوف من اعصابي لو اذبحهم بيدي ميبرد ناري وصارت عيني على عياط النسوان وعلى الباب وجان اشوف يمامه واكفه وتصك بسنونها وترجف وتبجي احنا ماعدنا حرمه تطلع حتى لو الدنيا تحترك ماتطلع اله بأمر وهاي واكفه وحتى مامبوشه وجهه مكشوف ركضت دفعتها ودخلتها ليصير بيها شى او يرجعون والناس اجتي تتراكض وهي واكفه ماريد حد يشوف خيالها

يمامه : انعادت ايام الحزن بس هلمره المصيبه اكبر وازدات المشاكل لان الي ماتو ٥ والله متت قهر وخاصه على فضيله اترملت وهي بعز شبابها صح اني هم ترملت بس الغلط من زوجي هو تعدى على عرض العالم بس زوج فضيله شنو ذنبه حسب الي سمعته زوجها خوش رجال ومسالم وماله بالمشاكل وحتى ابن عمهم ودوم يعوف فضيله يمهم وعمره مردطلب الها جان يحبها كولش رملها وهي بعمر ٢٧ سنه وبرگبتها اثنين ولد واسمه ابراهيم والبنيه بشرى
ابراهيم بعمر منير وبشرى بعمر ودق بنتي

جان وضعها يكطع الگلب انقهرت عليها اكثر من زوجة فاضل (خيريه)
طلعت من الغرفه الي صارت سجن الي من يوم مدخلت بهذا البيت  ردت اروح اعزيهم عيب ميصير بس اكدت على ودق وايه ميطلعن ابد من الغرفه

ومشيت للصاله وماكو بس النسوان وكلهن كرايب ماكو غريب الكل كاعد بالكاع فارشين زوالي وكاعدين اله الحجيه كاعده على كرسي تكول رئيسه جمهوريه بس راسها منحني على العوچيه وتبجي والنسوان تنعي
اني كلت السلام عليكم الكل سكت وباوع عليه اكو ردوا واكو لا بس الحجيه رفعت راسها وجان تكولي وكدام كل النسوان

الحجية جميله: شنهي جابج هنا
يمامه : البقيه بحياتج عمه
الحجية جميله: ماعدنه عزه لحد ماينوخذ بثار وليداتي
يمامه .. مكافي عمه ردتي مكان عادل ١٠ رياجيل ونفذوا كلامج وهاي نتيجتها
الحجيه جميله : حسج مااسمعه
وجه الفگر وجه البومه من يوم مطبيتي البيتي وهجمتي
واحد بعد واحد ويلادي دفنتهم ابأديه والسبه انتي وجه الكرطه كرطتيهم ميلوهه غادي

يمامه : انتي صدوك تحجين اني شعليه
الحجية جميله: كريمه كريمه
كريمه .. تامرين يمه
الحجية جميله: هاي وجه البوم خلها ميلوها مني (ابعدوها عني )  لااسوي الي ماساويته
يمامه : هاي شبيها احجي بگلبي الكل تفاجأ بيها وصار صوت جان تعيط
الحجية جميله: بسجن مااسمعلچن نفس اسوي بيكم عمل والماتسد حلكهه اطردهه و انعل الجابوهه

يمامه : انقهرت كولش اني ردت بس اخذ بخاطرهم وهاي فشلتني
كريمه : يله خيتي روحي لدارچ
يمامه : ابقي كريمه لتجين ويايه اني اروح
اشكرج عمه
وعفتهم ورحت والدمعه بعيوني اوف شوكت اخلص من الجحيم الي اني بيه

بعدها بكم اليوم شفت الكل يركض مديت راسي على كيفي من الشباك هوسه بره واشوف اشكال الرياجيل كلها مسلحه يمكن نص سلاح الجيش العراقي عدهم ذوله شنو ويطلعون بالسلاح ويرجعون ليوره متت رعب كلت علكت بناتي نايمات كمت فرشت بالكاع بمكان ختله وشلت ودق كوه كبرانه حبيبتي مااكدر اشيلها واني وبطني ونومتها والجهه الثانيه ايه ونمت بنصهن وحضنتهن وكمت اقرا ايات وادعيه وحاضنتهن حيل ياربي شجابني مو جنت بيتي وبين اهلي  يعني انت هسه نايم ومرتاح بالگبر واني اكلتها ادعي عليك بشنو ادعي وانت دمرتني
وكسرتني وكسرت بناتك بشنو قصرت هاي تاليها ياعادل گلبي مراضي عليك ولا احاللك ولا اواهبك بلي سويته بيه هم خيانه وهم شمرتني يم اهلك اعاني المر من القهر ومن الدعاء  والايات نمت محسيت غير الجو احترك كلت لو بفلم اكشن هم جان خلص صار ايام البيت لو بجي وعياط ونعي لو طلقات حتى بناتي كامن مينامن من الخوف اله احضنهن
واشتغل الرمي جبهه ياربي شنو من بشر ذوله البنات كعدن
ودق : ماما خايفه شديصير
يمامه : نامي امي لتخافين اني يمج

أيه : اني دوعانه ماما
ودق : كفختها على راسها هو وكت اكل هسه متسمعين الهوسه والطلقات هسه حتى الاكل تزرف
يمامه : هسه بنتي بس يهدا الجو اطلع اصبلج واوكلج
ودق : لعد ابشرج ايوته مراح تاكلين للصبح
أيه : لا عفيه دوعانه حيييل
يمامه : اسكتي ودق لتبجين ماما هسه شويه واسويلج اختج تتشاقه وياج
ودق : احسبي حسابي فدوه ماما اني هم جعت
يمامه : مو كلتي الاكل تزرف
ودق : عادي حتى لو مزروف ناكله بس اهم شى لاكدام جنة بنت عمو حامد اموت منها تضوج حتى من اكل تغزرني
يمامه : بنتي لتحطين روحج وياهن فدوه عوفيهن
هدأ الوضع دااطلع وجلبن بيه
ماما وين عايفتنا
غير جوعانات اجيبلكم اكل
اخذينا وياج

يمامه : وين رايحه قابل مسافره كعدوا هنا وانتظروني يله حبابات
لبست البوشيه وطلعت للمطبخ شفت كريمه ومرت حمود يسون جاي
السلام عليكم
وعليكم السلام
محتاجين مساعده
كريمه : لا خيتي متقصرين
يمامه : فتحت الجدوره صبيت شويه تمن وباميه للبنات
كريمه : هسه راح يصير العشا
يمامه : موالي للبنات جاعوا خطيه
كريمه : انتظري شوي ويصير لان عدنا كعده والاكل طبخناه وره بالحوش حتى يكفي
يمامه : ممكن سؤال
كريمه : تامرين
يمامه : شكو شنو هذا الطلق والهوسه
كريمه : اليوم توليناهم واخذنا بثار ولدنا
يمامه : هم كتلتوا منهم

كريمه : چا شنهي تريدنا نسكت ودم اخوتي يروح لا وحك الحسين مايبرد نارنا اله ناخذ بحگهم
يمامه : والناس الي ماتت شنو ذنبها
كريمه : طبهم حريشي ليش منو الي اندك بينا
يمامه : شفت النقاش وياها ماكو نتيجه ترخصت وطلعت وكلت البنات وثاني يوم من الصبح انصبت الجوادر وهلمره الفاتحه اضخم لان اكثر من واحد والدنيا انگلبت طول الفاتحه مطلعت خفت اطلع وهم تفشلني امهم

خلصت الفاتحه وناس طابه وطالعه والوضع مهدأ ابد لحد ماصارت عطوه ثانيه والي عرفته هدأ الثار وفضت وادخلت عشاير كبار لان الوضع كبر وذولاك يردون يهجمون وتصيح مذابح اكبر لحد مافضت
مسألت على التفاصيل المهم هدأ كولشي بس البيت والحزن خيم عليه واني أيست من حالي ومرت الايام وهذا وضعي بعد مشفت احد مااطلع حدي للحمام والاكل يوصلي للغرفه اني وبناتي والبنات عمهن حمود نقلهن لمدرسه يمهم ويوميه جايه ودق لو كاتله وحده لو مكتلوله نفسيتي ادمرت احس روحي كبرت ١٠ سنين فوك عمري ٢٥ سنه والي يشوفني يكول ٣٥ او ٤٠ من القهر وحركان الاعصاب وقلة الحيله واشتياقي لأهلي الي لحد الان مكدرت اوصل الهم ولا حتى احد فكر يتصل بيهم رغم اكثر من مره توسلت بس اخابر ودوم نفس الجمله كولي للشيخ
إٱللـِْﷻـِْﮭﮧ يشيله شوكت اخلص منه ومن اهله وسجنهم

فزيت على دكه الباب وباوعت على الساعه حيل هذا الوكت كله مغمضه واراجع ذكرياتي رجعت للواقع وليوم كتلت ودق من عمها وتعديها عليهم بنتي صارت شرسه بسببهم لان تلاحظ التفرقه بالتعامل وهي تتخبل شكد احجي وياها وميفيد

تفضل
كريمه : خيتي متاكلين
يمامه : اي والله جعت كولش
كريمه : عساچ على اكل ثواني ويمچ
يمامه : والله كعد اتعبج ويايه وشايله همنا
فضيلة : والله ياخيتي الله يشهد شكد احبنج وحتى خيتي فضيله تسألني عنج بس تعرفيها بالعده وماتكدر تجيج
يمامه : واني هم حيل بالي يمها ومكدرت حتى اخذ من خاطرها من وره وسكتت
كريمه : خيتي لاتفكرين جثير بمي هذا بعد طبعها وتحملي
يمامه : الله كريم
اكلت وطبيت سبحت وكعدوا البنات وكلتهم وسبحتهم وبدلت الهم
ودق : ماما اريد اطلع العب
يمامه : اش ماكو طلعه قبل كم ساعه سويتيلج هوسه
ودق : والله اختنكت بس بالغرفه شنو سجن
يمامه : ودق لتعاندين نسيتي قبل شويه شصار خلي يفوت يوم يومين واطلعي

ودق : اهووووو هم راح انحبس
ايه : تعالي العبي ويايه
ودق : مااريد اريد اطلع بره العب
يمامه : صوتج نصي وطلعه ماكو
كعدت زعلانه عفتها مابيه حيل عركه وحجي اعرف بس اخليها تطلع راح تصير حجايه

وراها بكم ساعه سمعت بجي وصياح يبووو عفيه بيت ميفوت يوم اله بيه مصيبه والله طك گلبي

فتحت الباب على كيف واشوف منير مجلب بأمه ويعيط ماما لتعوفينا ومازن واكف بعيد ويباوع على امه بحقد وخيريه تبجي وحاضنه منير والغراب الحجيه كاعده ويمها المساعد الشخصي مال المصايب حامد باشا
والكل واكف حمود وزوجته وكريمه وابن عمهم حارث واثنين ولد مااعرف منو بس بالحجي عرفت اخوة خيريه جاييين ياخذوها

وجان اسمع الحجيه تحجي وكالمعتاد كالجبل ولا هدها موت ولدها شنو من مره ولج خلال كم شهر اثنين ولد راحولج وبنتج ترملت وانتي بعدج ظالمه وقاسيه

خيريه : فدوه عمه خلي بس اخذ منير على الاقل ويايه
الحجية جميله: لا تلغين هواي كتلج اطلعين من البيت مالج رجعه اله وليداتج تنسيهم

خيريه : چا غير وليداتي شون اعوفهم
الحجية جميله: چا موش يكول اخوج نريد خيتنا خلي ياخذوج وفروخج (ولدج )تنسيهم
خيريه : دخيلك شيخ حامد لتحرمني منهم
حامد :مصختيها الحچي مايصير اثنين لو تبقين بدارچ لو اطلعين لا تردين هنا ابد وكدام اخوتج
يمامه : مثلي نفس الموقف لان اهل خيريه رادوا يرجعون بتهم بس الفرق خيريه قررت تتركهم وتروح

بالمناسبه بالبدايه توقعت منير ومازن ولد حامد بس الي عرفته همه ولد فاضل عبالي ولد حامد لان يصيحوله بويه بس شفت كل الجهال تصيحله بويه حتى جهال فضيله وحمود ومن سألت فضيله بوقتها كالت لان جبيرنا كلها تصيحله بويه ومرات حتى احنا خواته نصيحله بويه لو شيخنا خوي

بس حامد ماعنده بس بنت وحده واسمها جنه ومرته احلام بنت عمهم مخلفت بعد وشكد حاولت الحجيه تزوجه حتى يخلف ولد يورثه هو رافض ولان هو الوحيد من ولدها الي متكدر تأمره صح يسمع كلامها بس مو امر لهذا مكدرت اتزوجه غصب اما الباقين صغار كبار اطفال يمشي بكلامه وكلام امه وهو حيل يحب مازن ومنير بس مازن نسخه مصغره من حامد حتى عكدت الحاجب والخشم اليابس ودوم وياه حتى بالمشاكل الفصول تلكه مازن بصف عمه وعبالك ابنه وروحه معلكه بيه

طلعت خيريه وتركت ولدها مازن طلع بره بس منير خطيه صغير عمره ١٠ سنوات ضل يبجي وكعد بالزاويه جوه الدرج ومحد انتبه ولا راعه مشاعر الصغير واني هم مكدرت ادخل بس شفت وحده دفعتني وطلعت من جوايه ومشت باتجاه منير هاي ايه ولج ايه ضخمانه اندارت عليه ومهتمت ومشت باتجاه منير مااكدر اطلع وراها والكل كاعد وهي زقجه ومدبدبه والشعر اشكر ملفلف عبالك لعابه ولابسه نفنوف وردي وتمشي تنكرط جان ادنج جوه الدرج وصارت كبال منير مااسمعها شتحجي وياه بس شفتها انطته نستله وباسته من خده ورجعت
ولج شجنتي تسوين

ختيه ماما يبجي يمكن جوعان
اوف ياايوته ياريتني بعمرج وماافكر بكل الي ديصير بيه وحايره بطني وبس
دخلي ماما ادخلي
بقيت افكر شون اعوف بناتي لازم اكو طريقة اطلع بيها
بقيت افكر ونفس الوضع وبيوم اجتني ودق ترجف شبيج امي
ماما فدوه ضميني
شبيج شسويتي يامعزايه
ودق : والله ماسويت شى ماما جنت اتمشى اني وايه طلعنا نشتري من ابو المحل وضاعت فلوسنا ايه كامت تبجي

واني ادور اجانه ابراهيم ابن عمه فضيله يركض
خير شصابكم
والله ياابراهيم ضاعت فلوسنه وهاي ايه موتتني بس تبجي حتى مجال متنطيني ادور بلكت تاخذها للبيت واني ادور على الفلوس بلكت الكاهم
ايه : ماالوح والله اله تشتريلي تبس (جبس) ونتله ام التمل (نستله ام التمر)

ودق : يمعوده اشتريلج والله بس اوكفي
راح ابراهيم ولزم شعرها ودنج عليها لتبجين بطه راح اني اشتريلج
ودق : لا تسلم بس الكه الفلوس هي غبيه كتلها انطينياهم اله هي تلزمهن وضيعتهن
ايه : لدولين (لتكولين) لماما تحجي عليه

ابراهيم : كافي دموع بطتي اني اشتريلج
ودق : عافنه وشويه واجه وياه اثنين جبس واربع نساتل ام التمر انطاني واحد جبس وحده نستله والباقي لبنتج الجوعيه وهي كيفت شالها ويمشي بيها ومن وصلنا ديروح ومنشوف غير ابو المحل جيت عليه وكله  خنيث(جبان ) شون تمد ايدك وتبوكني
ابراهيم : انه مو خنيث ولوما زلمه جبير جان
وريتك منو الخنيث
ولك عين وترادد
ابرهيم : چا غير يفك  ياخه مني لاتخليني اسحلك وانت زلمه جبير فك ياخه واجيبلك الفلوس
ومنشوف غير عمي حامد فوكانه وحجاله الرجال واني طفرت عفت ايه وابراهيم
اكيد راح تنذب براسي والله ماما ماادري هو باكهن
يمامه : من عزه الي عزاني حصره اطلعج بره تسويلج كارثه وترجعين
ودق : اني شعليه هاي بنتج ام بطن ضيعت الفلوس روحي الها رزليها
وسمعنا عيطت ايه كلت راح يذبحها

طلعت اركض من حلات روحي حتى البوشيه وربطه محطيتها طلعت سافره بس شاده شعري
بنتي دخيلك
شفت ايه تصرخ وتباوع على حامد كاعد يجوي ايد ابراهيم بسجينه لزمت بنتي حضنتها
ماما راح يحركه
اني شفت الولد يفرفح بيد حامد وهذا الثاني لازمه ويجوي  بأيده بسجينه حمره من الحراره تكول حيوان جواه ونسى هو ابن اخته ويتيم مهما الي سواه غلط يبقى طفل ميصير يجوي وفوكاها الغراب كاعده ولا هامها تكول ديسوي انجاز من شفت وضع ابراهيم نسيت نفسي ومشيت وسحبت ابراهيم حيل من ايد حامد
انت شكعد تسوي مو حرام عليك

حامد : اتفاجأت من شفتها صار اشهر مشايفها اخر مره شفتها بيوم كتلت اخوي فاضل وحتى صوتها مسامعه
وفوكاها طالعه بدون لا غطا على راسها ولا بوشيه درت وجهي منها

ليش طالعه هيج لبسي شيله وغطي نفسج
يمامه : هو هذا الي يهمك شعرج لبسج لطلعين عبالك سجينه عدكم
حامد : كريمه وينج
كريمه : امرني شيخ
حامد : غطي مرت اخوج وحاجيها بعد مااريد اشوفها ممستره
يمامه : بله احنا وين وانت وين تعال ماما خلي اشوف ايدك
جان يندار عليه وصاير نار
مالج دخل ابن أختي واني داربي
يمامه : تحرك ايده مهما الي سواه مينطيك الحق تحركه نسيت هو يتيم واما اليتيم فلا تقهر شنو من گلب انت شكد ظالم
جان يتقرب عليه وعيونه اطك شرار منها وهو طويل وضخم وهيبه يخلي الميخاف يخاف
حامد : هاي ثاني مره
تحطين نفسچ بشي مايخصج
اول مره وعديتها گلت بتها وحكها
بس هلمره مااسمحلج واذا سمعت حسج مره ثانيه ماتلومين اله نفسچ

يمامه : شنو وين كاعدين بغابه طفل وغلط يتعلم بس مو تحركه
حامد : لاتلغين هواي انه الي اشوفه صح اسوي مامنتظر منج تحاسبيني وتعلميني الصح من الخطأ
يمامه : شكد جان يحجيلي عنك عادل بان انت قاسي وظالم بس الي حجاه نقطه بحر عن الي كاعد اشوفه

عكد حاجبه وصك سنونه وحجه بصوت ناصي وتقرب مني وعينه بعيني يريد يذبحني شفت بعينه نظره معرفت افسرها كميه حقد على غل على كرهه شمسويتله وهيج ميطيقني
حامد : يامرت الغالي وحك التراب النام بيه لوما شوي من حليب امي بعيني تجاه اخوي المرحوم جان راويتج  الظلم شون

يمامه : بقيت ساكته وصفنت بعيونه اني من جنت مراهقه احب اقره لغة العيون صفه بيه واحبها نوعاً ما اكدر اميز الشخص المقابيلي من عيونه صح مو ميه بالميه بس نسبه جبيره اقراه صح ومن تزوجت نسيت العيون والخشوم حرت بالعيشه والبنات ورجلي الي مقدر تعبي بس من جان يحجي حامد بدون قصد مني صفنت على عيونه لان خفت منهم قاسسين وهو انتبه على صفنتي وبلحظه مجرد لحظه وحده حسيت تغيرت نظرته وصار بيهم  كلام ردت بس افهم شنو نوع الانسان الي كدامي بس هو مباشره دار وجهه وعاط

يله ولي لدارچ ومااسمع حسچ بعد واياج ياام ودق تدخلين بعد لو يحتركون بالبيت كلهم مالچ دخل بس ببنياتج
اني هم عناد بيه سحبت ابراهيم من ايده واخذته ويايه بس ابراهيم هد ايدي وكلي
عمه لاتخافين عليه بويه حامد حگه اني غلطت ولازم اتعاقب

يمامه : حبيبي شكعد تكول كاعد يجويك شوف ايدك انتهت تعال اعالجها الك
ابراهيم : شكراً عمه ماقصرتي
وعافني ورجع يم خاله واني سحبت ايه وهي تعيط راح يجوي لابراهيم ماما وتبجي بقت الليل كله تعيط وتبجي لحد مندك الباب ودخل ابراهيم وركضت عليه وحضنها وشالها
شنهي بطتي شبيها صوت بچيها واصل ليغاد (لمكان بعيد )
ايه : توجع ايدك حركك عمو
ابراهيم : نزلتها ونزلت كدامها شوفي يابطتي الي يسوي الغلط لابد يتعاقب واني مديت ايدي واخذت شغلات مو مالي استاهل حتى مااعيدها وانتي لاتسوين مثل سوايتي حتى لاتنجوين
لا مااسوي اخاف من عمو
ابراهيم : بستها من خدها يله ياام خدود روحي نامي وكافي بچي
يمامه : اوف مكدرت كولشي احجي مرات انعجب بتصرفاتهم حتى جهالهم عبالك رياجيل ومرات احسهم متخلفين احتاريت شون احكم عليهم

ودق : ماما شويه واجي
يمامه : تعالي تعالي ماكو طلعه
ودق : والله دقايق واجي بس احجي ويه ابراهيم مااتأخر
يمامه : مو جان هنا مجان حجيتي
ودق : والله دقايق ماما حبابه
يمامه : لتتأخرين بسرعه
ودق : بستها وطلعت اركض لكيت ابراهيم كاعد على صبه قريبه من البيت احبها جوه شجره جبيره ودوم احب اكعد بيها بس اكثر الاوقات مازن يقره عليها ومن يدخل اروح اكعد حلوه واطل على كل البستان
اكدر اكعد
ابراهيم : هَــْـِْـْْـِلاّ بنت خالي اكعدي
ودق : اشكرك على موقفك ويانه واعتذر لان من ورانا انجويت
ابراهيم : لاتعتذرين الغلط مني ماجان امد ايدي يله لازم اتعلم
ودق : انت شون تتحمل قسوه وظلم خالك وفوكاها تصيحله يابه لو منك حتى وجهه مااباوع عليه وخاصه بعد الي سواه

ابراهيم : بويه حامد طيب ويخاف علينا وديعلمنا نصير زلم حوك مثله ومثل اهلنا وجب علينا نحترمه ونكوله تامر
ودق : والله اني مااحبه ولا بيوم ارتاحيت اله اصلاً اموت منه
ابراهيم : لا يبنت خالي هاي مامرجيه منج هذا بوي حامد النظر يرخص اله
ودق : يافدوه النظر وعلى شنو
ابراهيم : لانحچين هيج كدامي تره انه احبنه اكثر من بوي الله يرحمه مااگبلها منج يبنت خالي
ودق : سكتت يله شكراً اكوم ارجع لماما تلعب بيه طوبه اذا اتأخر اكثر وحضنته لأبراهيم وشكرته وهو خطيه تفاجأه من حركتي بس اني طفله شمعرفني ومااسمع غير عيطه من ورايه اندار واشوفه مازن
مازن : شنهي هاي
ودق : شكو ابن عمتي وكاعده وياه انت شكو
مازن : وحلك هو علي اذا شفتج هيج تسوين مرة ثانيه اله احش رجولج حش

ودق : هي انت شنو تحش
مازن : اكصها والي خلقج اكصهن
ودق : اي مو تايهتلك واني شسويت ابن عمتي وكاعده وياه
مازن : چلمه (كلمه) سمعيها زين طلعه وحدچ ماكو گطنه وشيليها من اذنچ واسمعي الكلام ترى تصير مو زينه

ودق : مو هي بكيفك وهذا مو غريب
مازن : لزمتها من شعرها لاعبالج اني منير وتركعي جلاق وتجاوزين واسكت اني مازن اياچ اسمع حسج يعلى علي واله حسابج عسير ويايه
ودق : دفعته وطبيت اركض لماما ابجي بس سمعت عيطه من عمو حامد ناقصني هبطات بس طلعت العيطه على ميساء الساحره كيفت ومسحت دموعي ومشيت على كيف ردت اسمع شيحجون وحطيت اذني على باب غرفه ميساء وسمعت

حامد : يمه والي يرحم والديج فكيني مااتزوجها تحرم علي
الحجية جميله: چا تريدها تاخذ بنياتنا وتروح لا تشوفها خانسه هاي وجه الططوه وراها طلابه وكول گالت جميله
حامد : من الاخر يايمه يمامه مااتزوجها لو يصبوها ذهب
ودق : حطيت ايدي على حلكي شنو يتزوجها عمو
الحجية جميله: لساني طاح من الحچي وياك اذا ماتتزوجها يتزوجها حمود
حامد : هي شنهي حمود متزوج
الحجية جميله: حميد وحك هو علي اذا ماتزوجتها ازوجها بس يعدي نفاسها لحمود

ودق : ركضت مخروعه وطبيت ماما ماما
يمامه : اسم الله شبيج كل شويه مهبطتني
وحجيت كولشي وابجي
يمامه : انهزيت هز بس مبينت كدام ودق هاي طفله بس ذكيه واذا بينت انهياري كدامها راح تتأذه
يمامه : اشش ماما مو بكيفهم مااتزوج لا عمج ولا غيره وباقيه وياكم كافي اسكتي
ودق : بس بيبي حلفت واعرف عمو ميكدر يكولها لا
يمامه : كافي يابنتي كتلج مااتزوج تعالي بحضني وحاولت اهديها لحد منامت والدمعه بعينها وراها بس عرفت نامت كمت ابجي واروح واجي شسوي ياربي صدوك حجي ودق هذا يسمع كلام امه بس لازم اوكفهم عند حدهم حطيت حجاب على راسي وبوشت وجهي وفتحت الباب وكفت ورجعت سديته وبقيت افكر
هسه اذا واجهتهم بالحجي احتمال يسوها عناد وينفذون او يحطون حرس عليه من البيت جهال او نسوان يراقبوني يعرفون بيه مااقبل ماطول هسه مأمنين بيه ومحد مراقبني لازم اطلع منا وبأسرع وقت

بقيت للصبح افكر واحسبها وثاني يوم مثل اي يوم عادي عند الكل اله اني نار وشابه بيه وميته رعب وخوف الخطوه الي راح اسويها لو تنهيني للابد لو توديني لبر الامان

بليل ثاني يوم حضرت جنطه صغيره مأخذت الغراض كلهم مااكدر اشيلهم اصلاً جنطه صغيره كم قطعه طبهن مرض الملابس وحطيت الذهب والفلوس وكم قطعه للبنات وملابس الي والمستمسكات
هنا همه ساعه ٩ بليل كلها تنام اله حامد وحمود لل ١٠ بقيت اراقب بهدوء لحد محسيت الكل دخلو بس مشفت حامد اكيد دخل صارت ساعه ١١ مااتوقع باقي احد
كعدت البنات يله كومن
ودق : افرك بعيوني وين ماما
يمامه : اشش صوتج حبيبتي راح نرجع لبيتنا
ايه : اني نعسانه ماادر (مااكدر )امشي
كومي ماما ودق الزمي اختج لازم نطلع قبل ميكعدون اذا تريدون نرجع لبيبي صبيحه ولجدو كومو وساعدوني
ومشيت بخطوات هادئه يمكن صوت گلبي من الخوف والرهبه اسمعه عبالك يدك بيه طبول الخطر والحرب خايفة موت وبمنطقه غريبه بس همه خلوني هيج اسوي ظلمهم وجبرهم الي على عيشتهم ولزمهم الي من ايدي التوجعني هي الي خلتني اطلع بنص الليل وبمحافظه مااندل متر منها وبنص ناس غربه شراح يصير مفكرت بس فكرت انهزم واخذ بناتي واحتمي يم اهلي الي اكيد هسه متخبلين من ورايه

بدينا نمشي على كيف وبطني زاد الوجع بيها ربي دخيلك سهلها اذا مو لخاطري لخاطر ذني اليتيمات اذا بقينا هنا راح يدمرونا
ماما تعبت حبابه خلي نوكف
هسه ماما مبقى شى ونوصل للشارع العام وناخذ سياره ونرجع لبيتنا
واني امشي حسيت حراره نزلت دخيلك ربي مو وقتها الالام زادت وعين على بناتي واشوفهم شون يسحلن بروحهن سحل نعسانات وكوه يمشن وعين على الطريق بس خضار وين الشارع العاام نمشي وبعد هلكنا والالام زادت

واني امشي وبديت افقد قوتي والدنيا تفتر بيهً
جان يلزمني وين رايحه
يتبع .....