رواية سجينة الروح الفصل التاسع وثلاثون 39 - بقلم ريام هادي

سجينة الروح
للكاتبة Reem
البارت الثامن والثلاثون

(بارت طويل لعيونكم )

وحگ كل مغربيه وانته ماموجود
وحگ كل فزه أفزها بدگة الباب
وحگ ركضة عيوني عله الشبابيچ
ومفرع دمعهن بين الاجناب ..
وحگ كل شهگة بچي ..
وكل رجفه ....
كل آآآآه
تشگ صفنة الليل بلهفة عتاب
بس ترجع اليه وكلشي ما اريد
تراب اني بغيابك فوك التراب

أيه : ماما اني رايحه للبيت انتظر ابراهيم
يمامه : لطمت على وجهي بتي راح تتخبل اجر بيها متباوع بوجهي وطلعت ومثل الفاصله عن العالم وطبت للبيت وطبيت وراها وزاد العياط هناك مدري شصار مكدرت اروح خايفه تسوي شى بنفسها
طبت للحمام اباوع عليها تتوضى
يمامه : شكعد تسوين
أيه : اريد احاجيه
يمامه : المن
أيه : لله يرجعه اليه هو يعرف بيه من اتعب ومن اتأذه احاجيه وينقهر عليه ويساعدني وادري هلمره الله مراح يعوفني

يمامه : حبيبتي ايوته ونعم بالله بس
أيه : لتكملين ماما اني گلبي ميكذب عليه واني احب الله وهو هم يحبني ومايوم ضاقت بيه اذا مافرجها عليه هو دوم يحطني بأختبار حتى يذكرني ويكولي ارجعيلي ربج مرات يبتلي عبده بمصيبه لان يحبة يريده يرجعله ويدعي ويتوسل رحمته واني راح اكون بين عظمته وهو ارحم بحالي فدوه بس سدي الباب وراج مااريد اشوف احد

مديت السجاده وحطيت القران بجانبي والسبحه وبديت اتوجه للكريم
يمامه : ركضت على التلفون لازم اخابر ودق بنتي راح تروح مني اذا جابو جثه ابراهيم يمكن تموت فوكاه
ودق : هلو ماما شبيج اسم الله لتبجين خلي افتهم شنوو ابراهيم دخيلك ربي وايه وين
يمامه : خلي خالج يجيبج اليوم لازم تجين اختج راح تموت خايفه يجيبون الولد وهاي متتحمل ويوكف گلبها لازم انتي يمها تعالي

ودق : جايه يوم نزلت ركض لخالو وحجيتله وخطيه ركض حضر السياره ولبست عبايه فوك ملابسي كلشي مااخذت بس الموبايل بيدي الطريق كله ابجي ساعه ابجي على ابراهيم لان كولش اعزه واعتبره اخويه وانقهر عليه لان بقى بحصره ايوته وساعه ابجي على اختي المشافت يوم حلو ودكت نور احجي وابجي
نور : ياعيني الله يرحمه ويساعدكم محتاجه شى
ودق : لا بس باجر اخذيلي اجازه لحد مااشوف الوضع
نور : طارق باله يمج ويسلم عليج
ودق : الله يسلمكم مكدرت احجي لان خالي بصفي وسديته
الطريق طويل واني رجلي موكفت من الهز والتوتر الله يساعد گلبها شون حالها

فضيلة : لج يمه ضاع وليدي راح ضوه عيوني شاب والله مشاف شى من عمره بعدني مالحكت اشوفه عريس من صخام الصخمج فضيله لك يوم رد ليه وازوجها الك يومه ابوس رجلك وايدك ردلي وانه بيدي ازفها
الحجية جميله:
انه ردتك نعشي على متونك تشيله
والله تشيله وتراب اللحد بيدك تهيله
جنه : فدوه بيبي كافي نعي راح تموتين
الحجية جميله:لك يمه ابراهيم احرگت گلبي يمه ليش حبوبه عبن فقير ومن اهل الله عوفني هذا العزيز

انه مچابله وليدي وانوحن
والله وانوحن ساعه اكعد واثگل وساعه اكومن
وعليك مدوهنه يبني وأحومن
انه الربيت تعبي وياك وينه
فضيلة : وينه يبعد رويحتي وينه
والله وينه وانه على چيتك رافگت يبني الضعينه
كل أم لولد سلوت عمرها
ولچله تشوفه يكبر وي صبرها
الدنيا بعيني من غمضت ظلمه
وياهو گل صـباح يگلي يمه
ليش الگلب من عندك تحرمه
يبني على الفراك شون أكدر
مو هذا ينور العين يومك
والله يومك حسافه تغيرت يبني رسومك

فضيلة : يمه من انشلع گلبي من اسمع چلمه يمه من حلگك تدخل علي جن دخلت العيد منهي يشيل جنازتي يمه ابراهيم يلحنين يبو ملكه الحلوو ولسان الطيب
احلام : يساعد گلبچ خيه مااكولن ينطيج من صبر زينب (سلام الله عليها)
فضيلة : احلام وليدي راح الزامط بيه وارفع راسي واكولن حزام ظهري ومن اموتن يشيل أجنازتي راح
جنه : ومنحس غير عمه فضيله وكعت لا ايد ولا رجل وعطنا گلنا ماتت والنسوان تراكض عليها ويذبن عليها مي ويفركن بيها بس نريدها تصحى وظلت بربع ساعه فاقده وصحت وردت تعيط وتنعي

ودق : وصلت للعماره وره اربع ساعات ونص الطريق هد حيلي لكيت الدنيا مگلوبه وصايره ليل والناس تنتظر ركض لبيتنا اني بالي يم أيه دخلت لكيت ماما كاعده بلكاع يم الباب مال غرفه ايه وحالها يكسر الگلب وتخاف تعوفها ركضت وحضنتها
يمامه : ودق اختج راح تروح مني الحكيلي ماما وين اوديها
ودق : لتخافين ماما وينها فتحنا الباب لكيناها تقرا قران
يمامه : هذا حالها من سمعت خبر ابراهيم تقرا قران وراها تكوم تصلي وين اوديها
ودق : خليها يوم ماطول كاعد تصلي مستحيل تسوي شى حرام يعني تنتحر او شى
يمامه : اعرف متسويها بس خايفه من يجيبون جنازته يصير بيها شى
ودق : كعدت بلكاع يم ماما وفاتحين شويه الباب ونباوع عليها وحال الضيم حالنا منعرف شون نتصرف ولا نكدر نخابر ونطلب من احد يساعدنا همه بيا حال فاجعه جبيره وكعت علينا حتى خالي الي اجه ويايه التهه ويه الرياجيل بره ومكدر يرجع لبغداد

أيه : يـِْ♡̨ـِْا رَبّ انت اعلم بحالي وانت رب العرش العظيم يارب اني مابيوم اعترضت على حكمك دوم اكول الك بيها اراده مات بابا وبقيت يتيمه وكلها اتأشر عليه هاي ابوها مات والكل تباوع عليه بشفقه والي يكولي انتي ماعندج اب والي يكول امكم راح تتزوج واتذبكم والي يكول انتم بنات وبدون اب مراح تتربن زين وتحملت وگلت اكيد راح تعوضني وبقيت صابره وراضيه وعوضتني بابا حامد طيب ويحبني رجعت وكعت مصيبه عليه وگلت هاي هيه انتهت حياتي وبلحظه ضعف مني وبقله ايمان ونسيت فضلك وكرمك ومستحيل تنساني بس الشيطان لعب بعقلي وشمرت نفسي ونقذتني بدون اي اعاقه بس بقت اعاقه النفس والروح المجروحه واجت رساله منك اتذكرني بقدرتك وغيرت قدري الي جان من سابع المستحيلات يتغير بس بعظمتك تغير وطلعت بنيه وممتأذايه حيل ورديتني الك خجلانه من الي سويته وراها اجاني الي مراح يرحمني وبدعاء وبلحظه ضعف انقلب گولشي ومنير شبه انتهى من حياتي مريت بكل مصيبه واكف بجانبي واعرف هلمره مراح تعوفني يارب احلفك بكل اسم من اسمائك الحسنى رجعلي ابراهيم انت تحي العظام وهي رميم احلفك بحق حبيبك ونبيك وبحق اهل بيت نبيك ترجعه سالم مره گلي ابراهيم اذا حلفت حبيبك النبي بحباب گلبه راح يشفعلي عندك
اريد ابراهيم مترد اليتيم اعرف واكيد راح ترحم بحالي وهاي اني باقيه بين رحمتك لو ترحمني وترجعلياه لو ترحمني وتاخذني ويااه

ودق : ايه تسمعيني كومي حبيبتي كافي صار ٨ ساعات على هاي كعدتج
وباقيه اشوفها رافعه ايدها للسما ولابسه ازار الصلاه وبس شفتها تتحرك منسمع شتحجي ولا اندارت اصلاً ولا كأن اكو بشر وياها

يمامه : شون بينا تبقى هيج
ودق : والله ماما ماادري زين خابرتي على عمو شفتيهم اجوي بلطريق لا
يمامه : اخابر يدك وميشيله وحتى على مازن هم نفس الشى
ودق : شون منين نعرف الخبر
يمامه : والعياط والنعي بذاك البيت مخلص
ودق : روحي ماما هناك عيب من العالم البيت مگلوب هسه يكولون ليش مأجتي تعرفين بيهن الناس متصخمه وهنه ماعدهن شغل وعمل بس يركزن منو اجه ومنو راح حتى خشوع للموت مبقى
يمامه : واختج شون
ودق : اني يمها ليضل بالج راح ابقى كاعده قريب الباب مااعوفها بس همسه وعلي وين
يمامه : هناك يمهم عفتهم يم احلام وجنه اروح هناك واي شى يصير تعالي اركضي
ودق : مااشي

بقينا لثاني يوم واي خبر ماكو من تعب الطريق غمضت عيني واني كاعده بلكاع وراسي على الحايط وفاتحه باب غرفه ايه اباوع عليها حسيت خطفت من يمي فتحت عيني مفزوعه تالي طلعت رايحه للحمام وراجعه متوضايه وهم نفس الشى اما تصلي او تقرا قران ايه مجعتي اسويلج اكل تاكلين متجاوب ولا حتى تباوع ياربي شون خابرت على ماما
يمامه : بيها شى ايه
ودق : اسم الله يوم على كيفج لا مابيها شى بس كوليلي محصلتو خبر
يمامه : كولشي ماكو على حطت ايدج گلبنا نار والولد محد يشيل التلفون
ودق : سديته من ماما مااعرف ليش دكيت على مازن كلت بلكت يجاوبني دكيت مشاله رجعت وره ٥ دقايق كلت اذا مجاوب مااتصل وجان يجاوبني
مازن : هاا ودق
ودق : ليش متجاوبون مو گلبنا نار والبيت محترك حرك
مازن : احجي بسرعه شتريدين لا ن مخبوصين
ودق : شصار وشوكت تجون
مازن : منعرف شوكت
ودق : استلمتو ابراهيم
مازن : ممنوع تجول بديالى والوضع كولش تعبان واحنا هسه بخان بني سعد ومحصورين هناك ومكعد نكدر نوصل لا للوحده مالته ولا للمستشفى

ودق : وشون لعد
مازن : والله ماادري وابويه ضغطه صاعد وضعه تعبان وحتى اخذت التلفونات منه حتى من يدكون ميجاوب لان تلفونه احترك بالاتصالات
ودق : بس ماما ميته  قلق عليه
مازن : طمني عمه وكوليلها زين ومازن ويااه ومراقب ضغطه وصحته
ودق : الله يقويكم عفيه انطيني خبر من توصلون
مازن : اذا كدرت اتصل واذا مكدرت بعد هذا ظرف
ودق : الله يساعدكم مع السلامه
مازن الله وياج

مر اليوم الثاني وحاله البيت الثاني مأساه اني موصلت بس كميه العياط واللطم كفيله تخلي الواحد يتخيل الصار اجيت يم ايه كعدت بصفها وهيه على السجاده
أيوو گلبي ميصير هيج لازم تاكلين اتشربين مي حتى تكدرين تكملين متعبتي
متجاوب وگانها بغير عالم
دك تلفوني ركضت مازن وضعي كله تخربط
الوو ها مازن بشر
مازن : شبشر الوضع كولش تعبان ومدنكدر نوصل وخابرنا من ناس لناس والي عرفناه مواجهات قويه بين الارهابيين والجيش وميعرفون شوكت تفض وحتى الميت والمصوب هناك ميكدرون يوصلون اله
ودق : دخيلك ربي شون لعد
بلغيهم منعرف شوكت نجي اني دااحاول اقنع ابويه يرجع اقلها بس يشوف الشيوخ الي انگلبو علينا بلعماره لان ولا واحد من عدنا هناك يستقبلهم بس اقلها يفهمهم واني وعمو حسان ولد عم ابويه باقيين بس هو مديسمع الكلام يكول لو اعرف اني ادخل بنص النار واطلعه
ودق : بجيت الله يساعده زين تكدر تنطي التلفون احجي ويااه
مازن : ليش
ودق : شغله فدوه ثواني
مازن : ماشي
اجاني وصوته حيل تعبان
خير بويه
ودق : ابجي بهدوء واحجي ويه عمو اترجاك عمو ارجع للعماره
حامد : بويه ماارد اله وياي العزيز
ودق : عمو اذا مرجعت احتمال مكان ميصير عزيز واحد يروح النا يصيرون اثنين
حامد : شنهي شصار لاترجفيني
ودق : أيه عمو منتهيه وفاقده لا تحجي ولا تاكل وحتى مي متحط بحلكها وبس كاعده على السجاده اختي كعد تموت بين متوصلون وتجيبون ابراهيم يجوز متقاوم وتنتهي اذا هي مي مكعد تحط بحلكها وشغلتكم مبينه مطوله
حامد : وامج وين
ودق : ماما حارت شسوت وميفيد حتى حجي متحجي ويانه ولا تباوع بوجهنه دخيلك عمو اعرف الظرف الي انت بيه صعب بس والله وضع ايه ميقل خطوره عن وضع ابراهيم اذا هو مات هاي راح تلحكه
حامد : ااااااخ رحمتك ياالله اتلكاها من لچمه گلبي وليدي ابراهيم لو من أيه
ودق : فدوه تعال عمو فدوه
حامد :راد بويه الصبح انه يمكم
مازن : خير شصار شبيهه ايه
ودق : مااكدر احجي بعد لازم اروح
مازن : الله وياج
رجعت ركض اخاف بيها شى لكيتها نايمه على القران صار يومين هذا حالها

يمامه : هاا بشري
ودق : على حطت ايدج يوم ماكو شى
يمامه :گلبي راح يطگ مدري على حال ايه لو الولد الي راح بيها لو حامد الماخذ حيلي وخايفه عليه
ودق : لتخافين على عمو زين
يمامه : جاوبج
ودق : خابرت على مازن وجاوبني وطلبت منه ينطيني عمو وحجيت ويااه
يمامه : وليش مخابرني
ودق : مازن ماخذ التلفون منه يخاف عليه لان كلها تخابر بس هو راجع احتمال الصبح هنا
يمامه : وليش مگتيلي
ودق : والله هسه سديته منه
يمامه : شون راح تمر هاي الايام يعني منصفه ناخذ شهر مرتاحين وراها ننكفخ بمصيبه
ودق : والله ماما اني كل خوفي من يجيبون ابراهيم
يمامه : ربي دفع بلاك اني اروح هناك لان بيبيتج هم متخربطه الكل وضعه تعبان وفضيله هاي مبقى شى وتموت وره ابنها
ودق : الله يساعدهم روحي يوم ليضل بالج
كانت من اصعب الايام الي نمر بيها ترقب وخوف وبجي وعياط البيت انگلب وناس طابه وناس طالعه وحتى جنه اجتي گلنا بلكت تحجي وياها وكعدت يمها حاولت تحاجيها ماكو

اليوم ثالث يوم وايه عدا الحمام تروح وتدخل ترجع تتوضى وتصلي وتقرا قرأن لا مي ولا اكل وبدت تترنح بمشيتها وحتى كوه توكف اصلي ساعه ٢ الظهر سمعنا صوت سياره كالو حامد اجه واشتغل العياط مديت راسي عبالي جنازه ابراهيم طلع منير وحامد راجعين تفاجأت بجيه منير اكيد بهيج ظرف ميعوفهم
سمعت عياط عمه فضيله وهيه تكله رديت خالي ولدي مو بيدك اريدن وليدي منك يحامد وهو حضنها وباس راسها ودخلها لان الرياجيل كلها واكفه وهي خطيه مثل المخبله طلعت بلشارع بلا وعي
وره ربع ساعه انفتح الباب عمو حامد ركضت عليه الحمدلله على سلامتك عمو
حامد : الله يسلمچ بويه وين ايه
ودق : بغرفتها ونفس وضعها
حامد : اخذ حمام سريع واروحن ليها
يمامه : اجيت اركض وره حامد وينه ودق
دخل للحمام يسبح

يمامه : دخلت للغرفه حضرت ملابسه وانتظرته يطلع وگلبي طاك عليه اول مدخل حضنته حيل
حامد : هَــْـِْـْْـِلاّ بويه
يمامه : اباوع على وجهه مبلوع منتهي وجوه عينه سوده والوجهه اصفر فدوه حامد على كيفك
حامد : تعرفين شنهي حاس هسه
يمامه : اعرف والله
حامد : حاس ضلع من ضلوعي تگسر وانحنى ظهري وليدي مات وبيدي لزم ادفنه
يمامه : كمت ابجي شفت حامد دمعته وهاي اول مره اشوفها نزلت على خده
حامد : يمامه انه بأبوي من مات ماحسيت هيچ اخوتي اثنين ادفنتهم واعزاز علي ماتأذيت هيچ هذا احسه نار وتاكل بلحمي سجينه عميه وتكص بعظامي
يمامه : اسم الله عليك گلبي ليصير بيك شى منو النا
حامد : بيدي هاي ادفن وليدي عساها تنكطع ولا تذب اتراب عليه هذا ابراهيم دوم من اشوفنه احسه مثلي گلبه ورويحته تشبهني دوم اكولن اذا طحت بيوم يتلكاني هو عبن الطيبه والشهامه تنكط منه من اشوفنه اكولن الدنيا بعدها بخير چا الخير راح ويه روحته
يمامه : اويلي على گلبك يحامد مشاف بس الضيم والقهر
حامد : الحمدلله على كل حال انه بالي وحگ هو علي يم امانته أيه مأمنها عندي وچلمه ودق خوفتني ورديت اشوفنها خايف تلچم روحي بيها
يمامه : روح الها بلكت انت تحجي وياها مكعد تنطق گلمه وحتى بجي متبجي احس مبقى شى وگلبها يوكف
حامد : رايح ليها

ودق : اجه عمو وشافها شون كاعده ولازم القران وعبالك صنم بس الشفه تتحرك كعد بصفها بلكاع
حامد : ها بويه ايه (باس راسها ) شون گيفچ
ليش ماتردين علي انه اعرفن وحاس بيچ ارحمي حالي بنيتي تره لجمه العزيز وناره تشعل شعل بيه وانتي بنيتي وامانت الغالي
ودق : نفس الحاله كولشي منطقت ومستمره تقرا
حامد : تعرفين شى انه دوم اكولن ابراهيم ربه يحبه عبن فقير وماله أذيه وانتي مثله ترضين يتأذه انه اعرفنج تحبيه ومو هينه علي اكولن هاي الچلمه لبت اخوي بس هذا واقع والبخت والقسمه مانصفتكم
أيه : صدق الله العظيم راح يرجع بابا اني متأكده
حامد : لا اله الا الله بتي گلشي امر الله والوليد
أيه : لتكمل فدوه اعرف بيه عايش گلبي ميجذبني
حامد : لا الوليد مات وكلها چم ساعه ويردوه بتابوت
يمامه : على كيفك حامد وياها شوف حالها
حامد : لزم تصحه اخافن يجيبوه وتأذه لازم تبجي تصارخ يطلع الي بگلبها يمامه البت فاصله مو ويانه
ودق جيبي ماي وتمر لزم تاكل
ركضت جبت تمر ومي واخذته من ايد عمو شكد توسلنا بيها حتى تاكل مأكلت من ايد عمو اخذته واكلت تمرايه وشربت كلاص كامل مي جان تكول بثواب الامام الحسين والعباس
يمامه : دخيل اسمهم بنتي شبيج راح اموت من وراج
حامد : عوفي البت  أيه نامي انه اريدن تنامين وترتاحين
مثل المنومه مغناطيسياً نامت على السجاده
يمامه : ليش نومتها
حامد : بتچ عدها شاره من الامام وانه اعرفنها زين عبن صار بيه وانه مريض ودق راقبيها وانتي يمامه حضريلي غريضات لزم اردن من الصبح انه ماتحمل اضل هنا ومااعرف شى عن الولد
يمامه : انت مريض وتعبان شون ترجع
حامد : لاتخافين ربج يقويني وعينكم عليها لاتركوها ابد
ودق : يمها مااعوفها ليضل بالك

أيه : اني وين امشي مكان مثل الغابه گلها شوك وحافيه وأتأذه بس الشوك يدخل بجسمي من كل جهه بس يكطع لحمي وميطلع دم اختنكت اريد ابجي واعيط واكول الحكوني بس ميطلع صوتي بقيت اركض اركض بين الاشجار والشوك يأذيني ركضت حيل لحد مشفت ضوه قوي من قوته العين مكدرت افتحها

بقيت امشي اختفت الغابه ولكيت گبه خضره اباوع ماكو احد يمها وبيها شباك فضه وجبير حيل قريت ليفوك مكتوب لااله الا الله محمد رسول الله نزلت دمعتي گلت شجابني يم قبر الرسول وكعدت بلكاع ابجي كتله يارسول الله اني اسمي ايه واجيتك اشكيلك حالي ومالي معين غير الله وانت تأذيت والشوك دخل كل جسمي ومحد يمي يداويني اباوع الكاع اليمي كلها مي بس دستها على كيفي طلع مي صافي اخذت من المي ومسحت جسمي بس كل قطره توكع على الجرح تريحني وتبرده وشربت منه جنت عطشانه باوعت داخل الشباك مااعرف شنو جوه قبر الرؤيه مو واضحه عندي لزمت الشباك كعد اكوم انعصرت ايدي فتحت جف ايدي لكيته مكتوب عليها عبالك محفوره بلحم ايدي اسماء اصحاب الكساء الخمسه كمت وبست الشباك وتشكرت من الرسول لان داواني وتمشيت حسيت الجروح الي بجسمي اختفن واني امشي شفت ابراهيم مدد بالكاع ركضت عليه وصلت ليمه مدد على بطنه وشكله يخوف بس مخفت منه رغم مجرح بكل مكان صحت عليه ميجاوب ردت اكومه مكدرت نزلت دموعي واني احس روحي عاجزه مااكدر اساعده باوعت بصفه رايه حمره جبيره حيل لزمتها وفتحتها وغطيته بيها خفت عليه من الشمس لتأذي وسمعت الونه مالته كعدت يم راسه وكتله لتخاف اني يمك وفزيت فتحت عيني باوعت ودق نايمه بصفي

كمت على كيفي كوه امشي طول هاي الايام اني مااسمع اي كلمه من اي احد وكأني جنت بغير عالم لحد جيه بابا حامد والحلم كعدت هادئه ومرتاحه بشكل عجيب

ودق : طفرت من النوم وشفت ايه تتوضى فدوه اروحلج مو انتهينا عليج بس اكلي شويه حتى عمو حامد راح منين انجيبه حتى يوكلچ
أيه : اريد مي وتمرايه
ودق : اي ياالله بعيني وركضت وجبتلها شربت المي واكلت التمرايه ورجعت تقرا قران وتصلي

اليوم سادس يوم النعي قل من التعب والكل منتظر الولد الي مبين اي خبر منهم الكل مضايك طعم النوم ولا الراحه وايه عٌاًشُت الكم يوم على المي والتمر هم احسن مما كولشي ماكو
واني كاعده بلكاع يم باب غرفه ايه الي صار مكاني الدائم طول هاي ٦ أيام سمعنا عياط وهلاهل منعرف شكوو ومااشوف غير ماما تركض وتعيط وتصيح ابراهيم عايش عايش
ودق : اني الي مااعرف اهلهل ولا سويتها بعمري هلهلت اندارت ايه علينا وبأبتسامه هادئه كولش وكالت
مو كتلكم عايش گلبي ميكذب عليه
ودق : نزلت دموع بسيطه وبقت ساجده لله ومنحس غير وهي ساجده بجت بقوه رهيبه وكأن الدموع الي حصرتهم طول هاي الايام طلعو تبجي بقوه وتكول شكراً ياالله شكراً يارسول الله شكراً يااهل البيت مقصرتو ويايه

اني وماما كمنا نبجي على بجيتها وعلى كلامها وجسمنا كزبر خشوع من كلامها جانت تحجي بحرگه گلب وساجده ومرفعت راسها يمكن بلربع ساعه تبجي وتحجي وتحمد وتشكرلله وجان تخرب وهي ساجده
يمامه : يمه بنتي
شلناها واتوقع هاي هيه اعلنت ايه استسلامها والتعب سيطر عليها الي سوته اختي شى عجيب على عمرها يمكن غير وحده او اني بمكانها اعيط وابجي واملخ روحي وهذا الطبيعي الي ماشي عند الكل من تفقد احباب گلبك بس أيه غير وكفت بين الي ارحم منا كلنا وبقت لاخر لحظه على يقين بأن رب العالمين راح يرجعه الها
ورب العالمين حاشاه ماخيب ظنها

كعدناها وغسلنا وجهه صحت وبصوت هادئ كالت اخذوني للحمام اريد اسبح اخذناها وسبحناها بقيت اني وياها لان حيل مابيها توكف ومثل الطفله جانت بيدي هادئه ومتحرك ساكن طلعتها ونشفت شعرها ومشطته وهي بس تردد الحمدلله والشكر لله
أيه : اريد انام
ودق : نامي گلبي نامي مباشره غمضت عينها وغفت مثل الطفله نايمه ومتعمقه بلنوم اجت جنه تهلهل وتهوس ركضت عليها اشششش اسكتي

جنه : خيه مامصدكين وين ايوو خلي تفرح
ودق : نايمه
جنه : چا هسه وكت نوم
ودق : تعبت حيل ولازم ترتاح تعالي احجيلي شصار كولشي مفهمت من ماما لان راحت ومسألتها بس عرفت ابراهيم عايش

جنه : والله ياخيه مافهمت شى دك تلفون امي وسمعنا هلهولتها ركضنا عبن شون تهلهل وعدنا كدر (حزن) وتعيط وتكمز وحگ ابو فاضل چا گلبها وگف من التكمز وتكول ابراهيم عايش وانگلب النعي لهلاهل
رجعت عمتي يمامه تخابر على ابويه طلع ابراهيم متصوب مو واكع البيت خطيه جماعته گلها مستشهده همه ١٦ واحد بس هو وثلاثه ويااه عايشين بس يگولون حالته مخطره بس نتأمل بالله يصير زين
ودق : إٱللـِْﷻـِْﮭﮧ يستر يارب يكوم بلسلامه زين همه ليش كالو الكل مات

جنه : خيه المنطقه گلها مگلوبه جنها حرب ناس تضرب على ناس وشافو البيت طاح توقعو الكل مات والي بلغنا صديچ ابراهيم ابوي مگلفه يحط عينه عليه من شاف البيت طاح عليهم وماطلع احد توقعو مات بس ربج كاتبله عمر ادعي يكوم بلسلامه ويرد النا
ودق : ياارب
يمامه : هاا بنات بشرو ايه شونها
ودق : نايمه يوم وغاطه بلنوم
يمامه : هلمره حالته خطره شون ضيم معودنا انطونا امل شويه وهسه هبطونا
ودق : لا ان شاءالله يكوم بلسلامه

بقت ايه نايمه يوم كامل جره وحده رغم كل الهوسه البره بس هيه ولا يمها كعدت ثاني يوم
أيه : شونه ابراهيم
ودق : بعد ننتظر الخبر
أيه : هو متأذي اعرف اني شفته بس ميخالف المهم عايش
يمامه : تعالي ماما اگلي 
أيه : اي ماما جوعانه
ودق : نباوع اني وماما عليها هادئه بعدنا بقلق عليها ليروح يصير بيه شى وترجع لحالتها بقينا مراقبيها بكل خطوه هي مبطلت الصلاه والقران بس اقل تبقى ساعه تصلي وتقرا قران وساعه متمدده بالجربايه ومتحچي كولشي

هذا حالنا طول ايام حادثه ابراهيم بقينا بعدها ٣ ايام ننتظر الفرج لحد مأجه وكالو صحه وعدت مرحله الخطر بيومها الذبايح والطلقات والهلاهل متعرفها منين المنطقه كلها طايره لان اصلاً ابراهيم الكل يحبه وعمره مأذه احد ودوم يساعد الصغير والجبير لهذا خبر وفاته جانت مو بس فاجعه النا للكل وخبر رجوعه بلسلامه هم فرحه للكل بعد ٣ ايام احنا موصلنا لذاك البيت منريد نسمع شى يغثنا بس ماما شبه سكنت هناك تكول عيب من الناس التجي شيكولون بس تجي كل كم ساعه تشوفنا زينات وتروح وكاعده ايه كالمعتاد تقرا قران واني ردت اتصل بنور حتى اشوف اخبار الكليه الي اصلاً نسيتها وشكد ادك عليه مااجاوب اني بياحال وسمعنا دكت باب قويه لغيت الاتصال ونزلت اركض اي جايه شبيكم راح تكسرون الباب وفتحته واشوف منير بوجهي بس شنوو وجهه ينكط سم ونار
خير ياطير شجابك علينا

منير : وين اختج
ودق : شتريد منها
منير : وخري مني
وكام ودفعني وصعد فوك ركضت وراه دخل حتى بدون ميستأذن مبين ناويله على نيه كشره مثله
أيه : صدقت واني اقرا قران باوعت عليه خير منير اكو واحد يدخل هيج
منير : كومي
ودق : لتعيط شبيك
منير : گتلج كومي لا اسحلج من شعرج
أيه : كمت وكفت بوجه خير
منير : شنو بينج وبين ابراهيم
ودق : لزمت گلبي يمه هذا شسامع
أيه : ابن عمتي غير
منير : اسمعي لج اني مو زوج ولا اثول اني الي لاعب على نص بنات بغداد متجي وحده غبيه مثلج تلعب عليه لتخليني امد ايدي عليج بعدني لازم اعصابي
ودق : وكفت كبال ايه خفت عليها ليضربها
منير : وخري ودق تره الشياطين تكمز گبالي هسه الزمجن وراس براس وروح ابويه واشمرجن من الدرج وخري خلي افتهم من اختج
أيه : دفعت ودق على كيفي وكتله شتريد تعرف
منير : اني سمعته يون عليج بلبنج اخر الايام كلت يجوز من البنج وبعدها الغيبوبه حلم بيج او اي شى المهم قشمرت روحي وسكتت بس مال اول ميفتح عينه ويصحى وقبل حتى ميسأل عن امه يسأل عنج هاي عقلي ميشيلها اني سمعته شون يسال ابويه حامد عنج هو حجه بصوت ممسموع حتى لحد يسمعه بس اني واكف قريب كولش وسمعته يجوز مشافني واكف لان مجان فاتح عينه زين اول وحده سأل عنها كال أيه شونها
أيه : (تروحلك فدوه ايه اوووف كون يمك ) احجي بگلبي

منير : لزمت ايدها حيل انتي تحبي
ودق : اني كمت ابلع ريك من القلق والتوتر هاي جبانه وهسه تخلصها بجي وهذا مبين اليوم ميعوفها اله يطيح حظها
أيه : جريت ايدي منه وكتله اي احبه وجان يلزمني حيل من شعري واني لابسه ايزار الصلاه ايد لازم شعري وايد يضرب بيها راشديات استلمني استلام تريد ودق توخره ماكو وتعيط وتبجي وهو مستمر راشديات ويغلط
منير : لج گلبه ساقطه منحطه هيج بوجهي تحجين نسيتي اني زوجج هيج انتي ماعندج شرف وبوجهي تكوليها اليوم اله اربيج انتي ناقصه واني الغلط مني مسحلتج واخذتج واخليج خدامه جوه رجلي
ودق : لك عوفها الله لاينطيك راح تموت بيدك
وجان يعوفها ويجر الحزام من البنطرون مالته ودك عليها من حلات روحي عليها شمرت نفسي على ايه وضربه تجي بيه وضربه بيها كطعنا تكطع المشكله نعيط ونبجي ومحد يسمعنا لان اصلاً ذاك البيت مليان ناس ومخبوصين
منير : تحبي اليوم اله اخليج تكرهين اسمه
أيه : ملخني من الضرب وابجي والدم ينكط من خشمي وشفتي ومنا ودق خطيه هم تأذت كمت اعيط واحجي كافي سكتت هوايه
اي احبه وكله من وراك وره عمتك خربتو علينا جان المفروض يطلع من السجن يخطبني ولوما الي صار جان هسه اني مرته
منير : والج عين وتجاوبين لج شنو انتي ولزمتها من شعرها وركعت راسها بلكاع مرتين فقدت عليها اليوم ماابقيها عايشه

ودق : يوم الحكينا لك عموو تعال شوف منير شسوه بينا الله لايوفقك گلب سافل عوفها راح تموت بيدك
منير : احجي لج لمسج نام وياج احجي اني بغداد وهو يلعب لعب هنا
أيه : احترم نفسك ابراهيم اشرف من الشرف وهو حافظ عليه من الرياجيل وضحه بروحه حتى بس اعيش مرفوعه الراس انت شسويت هاا بس تعرف تتفق ويه النسوان وتخطط حتى تاخذني هذا ابراهيم مقبل طول هاي الفتره يخابرني يكول مااكدر اخاف تدنى نفسي عليج وانتي زوجه غيري وحرام عليه وانت تعرفه شون يخاف الله قابل مثلك حتى شرب تشرب
منير : اني مااشرب
أيه : عبالك مااعرف واني ادري انت ماخذني بس حتى اصير خدامه الك ولجهالك
منير : وهذا الي راح يصير منا اليومين راح اخذج وغصب عن الكل وياايه اذا ماازوعج العافيه واخليج تتمنين الموت ومتحصلي
ودق : شحدك والله اخلي عمو يطيح حظك
منير : وهذا عمج مسوي روحه مرسال الغرام مستحه على شيباته يعرف ابن اخته يعشك ويتمعشك بت اخوه وهيه على ذمتي اله احركم كلكم ولكم ناقصين تلعبون عليه اني بعيني وانتي لج كلها يومين وتجين وانتي الممنونه ولو اعرف اخلي طلقه براسج واكتلج ولا اخلي ابراهيم ياخذج وهااا حطي بالج ابراهيم الي ميته عليه صار واحد سگط رجله بتروها معوق وهذا المعوق موته على ايدي اله ادمركم
ودق : امشي اطلع بره حقير
منير : اني الكم
عافنه وطلع وحالتنا تعيسه الجسم مكطع من الضرب وأيه كل الضرب والدم الي ترس ملابسه صدمه ابراهيم خلتها حتى تسكت متبجي ونست الضرب
أيه : سمعتي شگال
ودق : اي خطيه بس يجوز يكذب
أيه : ابراهيم تعوق ودق شون راح يتحمل هسه يتخبل
ودق : معرفنا اثنين رجله وحده
أيه : اني متهمني عسى ايده ورجله المهم هو عايش بس هو مراح يتحمل
و يتخبل
ودق : على كيفج يمعوده والله كرهت عيشتي من وره الي كعد نشوفه كومي غسلي باعي حالج لتروح تجي ماما وتشوفنا هيج وهذا منير اله اخلي عمو يطيح حظه وين التلفون
أيه : شون تخابرين همه بيا حال
ودق : بله اسكتي هم نضم هاي الشغله حتى ينفذ تهديده ابد والله اله افضحه

خابرت وجاوبني عمو وحجيتله كولشي وهو تخبل وكال انه اله انتم سدو الباب عليكم ومخابر ماما مبلغها متعوفنا ومن اجتي تركض وشافت حالنا شون مكتولات تخبلت
يمامه : شون يمد ايده عليكم والله اله اخلي حامد يطيح حظه هذا انجلب ومحد يوكف بعينه
ودق : حجيت كولشي لعمو وهو راح يتصرف ويااه لتضوجين
يمامه : سوده عليه انكسرت ايده السافل شون يمدها عليجن
أيه : ماما ابراهيم كصو رجليه صحيح هذا الحجي
يمامه : منو گلج
أيه : هو منير كال
يمامه : اي حبيبتي اليمنى انبترت المهم الولد عايش
أيه : والله ميهمني بس هو شون
يمامه : من عرف وحس رجله ماكو يكول حامد عيط عياط گلب المستشفى كلها وفوكاها ايده مكسره يعني الولد ميت والله حيااه وصار يومين على المسكنات كل ميصحى ويتلمس رجله ماكو يبجي ويعيط
ودق : حقه ماما الله يعينه
شبيج ايوته صافنه
أيه : ماما اريد اطلك ابوس ايدج طلكوني من منير مااكدر ابقى بعد ابراهيم محتاجني هسه
يمامه : ليش هو انتي اذا اطلكتي راح مباشره يزوجوج لأبراهيم مستحيل ماما ويجوز اصلاً متتزوجي هنا عدهم ابن العم اولى بت العم وهذا منير يجوز يطلكج وينهي. عليج يعني ورانه ايام سوده وفوكاها بأمتحاناتج الي كلها يومين وتبدي وانتي طول هاي الايام كولشي مقريتي

أيه : راضيه بأي شى المهم اخلص من منير بالاول
ودق : والله هاي سالفه النهوه اكبر جريمه شنو ابن العم ينهي ويتحكم بمصير انسانه واله حق يتزوج ويخلف ويعيش حياته وهي تبقى معلكه والله اجرام وناس متخاف الله وفوكاها وكت الصلاه كلها تفرش السجادات وتتوجه لرب العالمين المن يقشمرون نفسهم لو الله لو الصلاه هم صارت رياء

يمامه : هذا حظنا ياامي ادعي الايام التجي تتسهل وميصير كل هذا منا مازن وخبالاته ومنا منير مكتوب على بنات يمامه بس العذاب وشلعان الگلب

اليوم رجوع ابراهيم والولد ٢٥ يوم عشناها بأصعب مايكون حتى ايه تروح تمتحن على كد القاريته لان ماما مقبلت تأجل اني رحت لبغداد امتحنت كم ماده واجلت الباقي مشفت طارق لان جان ملتحق بس من يتصل على نور يسلم وياكلني اكل بلسلام
ومن عرفت موعد رجوع ابراهيم رجعت للعماره قبل بيوم حتى وصلنا بليل كولش تأخرنا وتعبنا بس مردت اعوف ايه وحدها اكيد سكوت منير هاي الايام وراه شى

صبحنا والكل على اهب الاستعداد وصلو والمزايق ادك شفت ايه تركض للسطح صعدت وياها نزلوه على كرسي متحرك وهيه ايه شافته لو طكت بجي جان ضعفان واللحيه عاليه وايده مشدوده ولابس دشداشه منزليها ممبينه رجله مبتوره بس الثانيه مجبسه ودخلوه للبيت

فضيلة : يمه وليدي رجعلي سالم كللللوش فدوه لعطيتك ربي كلللوش يبعد رويحتي يبعد بيتي
ابراهيم : هله يمه
الحجية جميله: ماقصرو اهل البيت ردوك ليه وليدي الله لايحرك گلوبنا عليك
ابراهيم : شونج جده
الحجية جميله: فدوه اغديلك حبوبه
ابراهيم : يابه اريد ارتاح
حامد : اخذه مازن لحجرته وانتم فضونا كافي كلمن لداره الوليد تعبان عوفوه
فضيلة : خويه چا خير وليدي راد من حلچ الموت واريدن افرح بيه
حامد : تفرحين بيه بس هسه تعبان لاتزيدوها عليه
الحجية جميله: بسچن وكلمن تولي لدارها وعساچن سالمات وماتكدرن
يمامه : الحمدلله على سلامتك حبيبي
حامد : الله يسلمج شون كيفج
يمامه : شوني تايهه بلياك
حامد : تعالي نرد لبيتنا تعبان واريدن ارتاح
يمامه : يله ياريت ورجعنا للبيت ونزلو البنات يسلمون
حامد : شنهي وجهج أيه
أيه : هذا منير هسه زين بدا يطيب
حامد : انه اعلمنه هذا شاف نفسه گبر ومايوكف بعينه عبن الچيله ماكرصته
يمامه : يله بنات روحو فوك وخلي عمكم يرتاح

يمامه : شراح تسوي حامد
حامد : انه حرت منا ابراهيم واعصابه عبن رجله أذته ومنا منير متسودن شكثر تحجيت وياه وانه توقعت عگل اثاري ناوي نيه سوده مثل وجهه چدامي ساكت وراي يهذري ويهدد
يمامه : كله يهون المهم ابراهيم رجع ليش احسك مفرحان
حامد : انه الفرح محسوب علي دوم بعد الفرح الكدر يصيبني فرحت لان عايش تكدرت وانه اشوفنه يبجي مثل الجهال عبن رجله تسكطت الوليد عايش بس رويحته ميته وماضن يرد ابراهيم القديم
يمامه : يرجع والله ايام ويبدي يتقبل وضعه بس لازم الكل ينتبهون على تصرفاتهم وكلامهم
حامد : تعاي بحضني مشتاق لريحتج
يمامه : اووف والله اني مشتاقه الك اكثر
حامد : يمامه
يمامه : عيونها
حامد : لو انه تصوبت وتعوقت تضلين وياي
يمامه : ياستار شنو هذا الحجي
حامد : جاوبيني
يمامه : طبعاً ابقى واشيلك على راسي انت متعرف شنو بگلبي الك اني احبك من گل گلبي حامد والي يحب لو شميصير بمحبوبه يرضى بيه ولتخاف وياك للموت
حامد : انه ماغلطت يوم ماعشگتچ وادعي الله يجعل يومي گبل يومج
يمامه : اسم الله بربك هذا الحجي مال واحد مشايف حبيبه ٢٥ يوم مبين كبرت وكمت متعرف تتغزل زين
حامد : ههههه انه ابو الغزل گله تعالي وانه اعرفنچ اصول العشك والغزل
يمامه : اوويلي اروح فدووه لحبيبي

أيه : ودق ودق
ودق : هاا شبيج تلوبين
أيه : اريد اروح اشوف ابراهيم
ودق : خوش حتى تصير طلقات اكعدي واسكتي
أيه : اموت اذا مااشوفه
ودق : ولج امي استري علينا منا منير ومنا عمج ومازن وكلها موجوده لتعلكيها
أيه : يعني ابقى هيج مااشوفه
ودق : خلي تعدي كم يوم ونروح
أيه : مااتحمل
ودق : لا تتحملين صيري عاقله
أيه : اووف شون هسه
ودق : فدشويه تجيج قناة رويترز للاخبار تنقلج الاحداث وعبالك كاعده يمهم
أيه : تأخرت حيل ماكو
ودق : اكيد ملتهيه اصبري وتشوفيها طابه وادوخنا ست جنه
وصدوك بساعه اجت انطت موجز اخبار الساعه وراحت
بقينا يومين ننتظر وهاي ايه تحير شسوي كله حتى بس تشوفه وتالي ماما صاحتنا كالت روحو سلمو عيب ومااشوف غير ايه طلقه البسي واوكفي اول وحده بلباب

دخلنا والكل موجود بس ابراهيم ماكو وعيون ايه مفضوحه
الحجية جميله: هله بلجاينه چايلزريگات نسيتن حبوبتجن
ودق : هههههه شونج بيبي اكو واحد ينسى جميله خانم
الحجية جميله: شنهي خنه هاي شني يلمعكربه تحجين علي
ودق : هههههه بيبي خانم يعني سيده شى زين بيبي
الحجية جميله: چا اله تعوچين حلكچ يم حلگ المزورك يلمعصعصه
ودق : حرام عليج بيبي حلكي ازرك غير يخبل وفوكاها تعيبين على رشاقتي ولو انتي منو يعجبج اصلاً بس مسعده ام ريحه الجايفه
الحجية جميله: چا ريحتها اطيب من ريحتچ تغارين منها هاهاهاها ترجفين منها رجيف عبن نظيفه وجنها ورد وتسمع الچلمه تگلها هوش يمنه تروح يمنه تگليلها يسره تركض وانه من اكللها تعاي ليه تركض ركض چا انتي ثوله اگلچ يسره ترحين يمنه ترحين فدوه لمسعده العاگله (العاقله)

ودق : امده حظي اي والله مسعده احسن مني
الحجية جميله: چا مو مره مرتين امداه تعالي ابوسنچ
ودق : وره هاي الغسله گلها وتريدين تبوسيني
مازن : على كيفج وياها جده هاي الدكتوره ودق
ودق : باوعت عليه ودرت وجهي شفت جنه واكفه بعيد مردت يصير كلام بينا وتنجرح
الحجية جميله: دغتوره على نفسها  انه حبوبتها ولج انه سنوني تون عليه شوفيهن
ودق : مو يمج مازن
الحجية جميله: چا وانتي شنهي دغتوره لو عربنچي
مازن : بعدها جده ممتخرجه
الحجية جميله: والغسل ماتفتهم گلشي انه اعرفنها لهاي البت ماتنفع لشي
ودق : ههههههه حتى لو اتخرج ابد مااتقرب منج شيخلصني اذا وكع سنج
الحجية جميله: چا اذا طاح وحگ علي اطيح شعرج گله وسنونج هاي جنها ليلو اطيحن سن سن
ودق : واكوم احجي واكولج اريد بثبوثه بيبي بيبي اني مو دكتوره بطلت بعد مااداوم
الحجية جميله: ابرك اكعدي والفليسات حطيهن على گلبج انتي اصلاً لانفع ولا دفع
مازن : جده مبينه حيل متحمله منج
ودق : غير جميله خانم بعد
الحجية جميله: دهر طرج ماتجوزين
ودق : سكتت والله
الحجية جميله: تعالي ليه يمه ايه هذا الوجه السمح جنها العافيه
ودق : اي والله فدوه بيبي اني وجهي يجلب الفكر بطلي مني وجلبي بأيه
مازن : ليش وجهج يفتح النفس والروح
ودق : اكوم اني يله ايوته نروح نسلم على ابراهيم
أيه : بست ايد بيبي وطفرت اني وين وذوله وين اني اريد اشوفه

دكينا الباب وجان تفتحه فضيله
فضيلة : هله بنياتي ادخلن
أيه : امشي وكوه حابسه دموعي ماابجي هو شافني ارتبك كاعد على الجربايه متمدد وحاطين وره ظهره مخاديد هوايه ومغطيه
ودق : الحمدلله على سلامتك
ابراهيم : الله يسلمج
ودق : والله وكعت گلبنا الف  الْحٍمَدٍ للـّہ والشكر شفناك زين 
أيه : اريد صوتي يطلع ماكو هو يباوع عليه وعيونه تلمع حسيت بيهم دمعه تسرح بعيونه بس متقبل تنزل
أيه :  الْحٍمَدٍ للـّہ على سلامتك
ابراهيم : الله يسلمج
فضيلة : يمه بشرى ازهبي الاكل لأخيج
بشرى : تامرين يمه
فضيله سوت نفسها تعدل بلفراش واطب وتطلع ودق وكفت على صفحه تقربت منه المسافه الي بينا شبر واحد وهمست بصوت بس هو يسمعه
عرفت راح ترجعلي ومراح تعوف رويحتك
ابراهيم : دنجت
أيه : احجي ابراهيم ليش ساكت ليش احس بعيونك حجي ومكعد تحجي
ابراهيم : ايه روحي شكراً لان اجيتي وسألتي مااريد اشوفج
أيه : شنوو متريد تشوفني
ابراهيم : انتي مره متزوجه لتنسين نفسج
أيه : دنجت عليه وكتله تتذكر من گتلي وحق من خضر الكاع ويبسها ومن رفع السما بلا عمدان اني اليوم احلف نفس حلفانك مااعوفك لو اموت
ابراهيم : انه ماانفعج يبت الناس
أيه : واني اريدك اني بأسمك مو بكيفك بكيفه هو
ابراهيم : منو هو
أيه : إٱللـِْﷻـِْﮭﮧ الي رجعك اليه ماطول رجعك اليه يعني انت قسمتي
ابراهيم : روحي ايه
أيه : رايحه بس باقيه الك لو اعرف احارب الدنيا كلها واصير الك اذا انت تنازلت عني اني مااتنازل
ابراهيم : انت تعرفين شنهي حالتي
أيه : اعرف وراضيه وعلى گلبي عسل لتفكر بكولشي اني الك لو بعد ١٠٠ سنه لو الك لو الكبر ياخذني منك وهذا الشى اثنينا اتفقنا عليه
ابراهيم : اااااااااه يانار گلبي لاتصعبيها عليه
أيه : احبك ابراهيم
وعفته وطلعت نزلت جوه ومرتاحه شفته لو مكطمه ايده ورجله راضيه المهم عايش
اتغدينا كلنا وبابا حامد ومازن وحسان ولد حسان كلهم كاعدين واحنا بلمطبخ وبيبي مستلمه النسوان وحده وحده للعصر والكل مرتاح بعد الايام السوده الي شفناها
طب منير علينا اني گلبي لزمني صوتهم عالي وكعد نسمع الحجي كله

منير : يابه انه اريدن مرتي
حامد : مالك مره عندي
منير : يابه اني سكتت هاي الايام كلها كلت الظرف ميسمح بس بعد كافي
مازن : منير نصي صوتك ولتنسى نفسك وتتجاوز
منير : شنو الي يطالب بحقه يتجاوز
حامد : انه گلت مالك مره يمي
منير : تريدني اطلكها حتى تزوجها لأبراهيم موو
حامد : بسگ منير واستر على رويحتك صوابك ماطاب تريد اصوبك برجولك واسكطك
منير : حتى يصير اثنين سكط عندي الفوك واني موو
حامد : انجب انت حيل لسانك طولان لاتشوفني ساكت ليك انه خلص صبري وياك
اطلك البت وچلمه زايده ادفنك جار ابوك
منشوف غير منير يصعد لأبراهيم وركض مازن وحسان وراه
منسمع غير عياط
لك ليش تطعني بظهري مو اني احبك واعتبرك اخويه تحط عينك على مرتي هيج انت قذر الناس كلها مخدوعه بيك تقشمر عليها لان صغيره كولي شسويت وياها
مازن : تخبلت اطلع بره
ابراهيم : عوفه مازن
مازن : خلي يولي ولك اطلع
منير : مااطلع اله افتهم ليش هيج طعني

ابراهيم : انه ماطعنتك انت خذيتها مني انه الربيت وخلصت عمري اباوع على طولها وانتظرها تطول شبر شبر اني الي يوم موكعت سترتها بلحمي وخفت عليها من الهوا اني الي ضحيت بدراستي ومستقبلي بس حتى اجمع مهرها بلوقت الي انت بيه تتملعب بغداد ويه الرايحه والجايه اني الي انطيت سنين من عمري محبوس بسجن الحيوان ميرضى يعيش بيه وتحملت اشكال الاهانات والضرب وجنت مستعد اخلص ٢٠ سنه كلها لأجل عينها وماكو بشر يجيب طاريها بنص كلمه اني الي شمرت نفسي بالموت حتى بس ابتعد ومااشوفها تنزف الك اني الي نوخذ روحه كدام عينه ومكدرت اسوي شى اني الي انطعنت من امي وهي تحط ايدها بأيدك وتسلمك بنيتي لا تحجي عن الطعن اني المطعون من كل جهه ومحد رحم حالي
ودق : ومااشوف غير عموحامد يسحب ايه  من ايدها كدام الكل وهي ساكته وتمشي ويااه وصعدو فوك الهم

يتبع ....