رواية سجينة الروح الفصل الأربعون 40 - بقلم ريام هادي

سجينة الروح
للكاتبة Reem
البارت التاسع والثلاثون
(بارت طويل لعيونكم )

عشت اسنين احبك وانت ماموجود
غفى حبك بكلبي وفاض حبك
تعال وشوف كلبي البيك مجنون
ساعة يكول احبك ساعة اكرهك
تعال وشوفني اشلون ارجف عليك
عشكك صيف متنة نريد حرك
يفر بينا هواك اندوخ كل يوم
وعفية انت الهوى مايوم فرك
ماعرفك جنت واتمنى احاجيك
هويتك هسة انة وماريد اعرفك
طعم حبك عجيب منين مصنوع
حلو كلش والاحلى النوب مرك
اشتريك انة الية وابد مابيع
بيك انة ربحت ماريد اخسرك

أيه : جنت واكفه بين البنات ونسمع عياط وصوت منير وابراهيم حجي ابراهيم هزني هز الكل يسمع وساكت مااحس غير بابا حامد يسحبني من ايدي مشيت وياه ومااعرف شراح يسوي كل درجه اصعدها احس سنه من عمري كلها كم متر تفصلني عن مصيري دخلنا الغرفه والكل سكت ترك ايدي بابا وصاح بصوت قوي واعصاب
حامد : ياحيف الربى بيكم انه انتظر يوم يوم تكبرون وتحملون المسؤوليه واكولن ربيت زلم ينشد بيهم الظهر واكولن انه وليداتي مازن وابراهيم ومنير يجي يوم واوكف بنص الوادم وبلدواوين وبين الشيوخ واكولن ذوله ولدي حزام ظهري
مازن : يابه
حامد : بسگ
گلگم مابيكم خير واحدكم شوي كبر وصار بظفره طحين تعلى عليه وحسكم مسمع الديره گلها وتهاوشون وتضاربون وانه موجود ماحسبتم حسبت ابوكم واكف انه ياما هذا الجتف شالكم وانتم صغار ومن كبرتو دفرتو الجتف لا عبالكم كبرت وبالكم هذا كبر ونكدر عليه وحسنا يعلى ومانحترم چلمته وحگ هو علي وحگ الربى والتعب ادوسكم بهاي (يأشر على رجله)گلياتكم وانسى انتم وليداتي والي يعصى چلمتي ماله عندي غير الطرد من العشيره گلها
واذا تجاوز اكثر انسى شيصير مني وچيله بنص گلبه كافي تماديتو هواي مو انه شيوخ وزلم مشوربه وعشاير بكاملها تهابني والچلمه الكولنها عدهم حد السيف ووليداتي مايحترمون وجودي گل واحد بيكم يلزم حده لهنا وبس

انتم اسمعوني عدل ابراهيم ومنير مالكم مره عندي
أيه : هنا حسيت ايدي ثلجت وگلبي يدك بسرعه يعني شنوو مالكم مره عندي يعني حتى ابراهيم مااتزوجه
ابراهيم : شنهي يابه
حامد : حسگ ماهيسه
اثنينكم مالكم مره عندي وانت منير تطلگ ايه وهسه ترمي اليمين وچدامي
منير : يابه هاي زوجتي وانه مااريد اطلك
أيه : وجان يتقدم بابا ويضرب منير راشدي وگله طلگها بعده مفاتح حلكه منير ضربه الراشدي الثاني بس كل راشدي عبالك طلقه من القوه والاعصاب مال بابا حامد اني بس ارجف وضغطي هبط من الخوف
حامد : چلمه زايده اشمرنك منا واچسر عظامك تچسر يله طلگ

منير : ليش تضربني يابه لان احچي الحق
حامد : انت بذات حسابگ ثگل عندي ولاتشوف رويحتك صرت زلمه بچلمه مني اخليك تجدي بشوارع ادمرك ادمر واكف وبگل عين صلفه وترادد وحسگ عالي ولك انت شنهي (لزمه من قميصه بقوه) نسيت انه منو ونسيت شنهي اكدر اسوي تالي عمري واحد مثلك يوكف يهددني
منير : العفو يابه موقصدي
حامد : حتى لو قصدگ اذ انه ماعرفت اربيك ارد اربيك من جديد وكل تصرف منك غلط جدامه عقاب عسير اله اخليك تمشي وتلفت اوصلك مرحله تترجى الموت مني
انه لأخر لحظه اكولن ولدي واحبنه واتحمل طيشه بس خلص لهنا ورصيدك عندي وشل ومن اليوم النفس احسبنه عليك وحتى وظيفتك ادمرك بيها لااطلع شر حامد عليك تعرفني انه اذا احطن بالي ادمر واحد ادمره اتقي شري واحترم نفسك ولاتنسى انه منو
منير : حاظر يابه والمطلوب شنو

حامد : طلكها بساع
منير : والمن تتزوج
حامد : مالك شغل ايه لا ليك ولا لبراهيم البت للزلمه الي يستاهلها وانتم اثنينكم أيه مو الگم يله طلگ ومااريدن اسمع حسگ
أيه : بقى صافن منير بحدود دقيقتين وساكت ويباوع عليه وابراهيم نار والكل ساكت وجان يكول
منير : انتي طالق
أيه : رغم كلام بابا أذاني ومااعرف ليش هيج تصرف بس طلاگي من منير هو فرحه العمر حالياً
منير : طلكتها يابه وبعدين راح تزوجها لبراهيم
حامد : انه گلت لا انت ولا ابراهيم الكم مره عندي

ابراهيم : ولا اني اريد اتزوج
أيه : هنا طفت الفرحه بگلبي شنو قصده
منير : صارلك ساعه تحجي وتتفاخر بحبك الها وهسه متريد تتزوج
ابراهيم : انت اتهمتني انه طاعنك وانه ردت اوضحلك شنو جان شعوري من خطبتها وماگلت اتزوجها اذا طلگتها
أيه : الدموع اجمعت بعيني هذا شديكول

حامد : تريدها ماتريدها مايهمني البت لا الك ولا اله ومن اليوم الگل يحترم نفسه واي تصرف منكم ماموزون وماارضى عليه حسابه عندي عسير احترمو نفسگم ومن اليوم مالكم دخل ببنيات عادل انه مسؤول عليهن واي واحد منكم والچلمه للكل يندك بيهن كولو اجانه ملچ الموت انه مافارغ ليكم منا طلايب الوادم ومنا انتم انه مو احلن مصايب كلها دم للرچاب ومااعرفن احل تمردكم الگل يجر عدل والماعاجبه لا يراويني وجهه ليوم الدين وينسى العشيره كلها وماله يمه لا اهل ولا عزوه ولو يموت واشوفن دمه بطوله مايرف گلبي عليه احترمو نفسكم كافي وگل واحد منگم يرد لحياته انت منير ترد لبغداد وتثگل وشكوه وحده مااريدن عليك اذ سمعت غلطان اسحلك بغداد گلها واندمك على الساعه الي نولدت بيها وانت مازن ترد لعيادتك ودوامك وبيتك لااچسر البيت على راسگ وابراهيم تصير زين ونشوفلك طبيب زين يعالجك ونشوف شغله دوامك وتبطل منها
ابراهيم : اكيد بعد ميردوني
حامد : يردوك لا انت مچانك هنا ونشوف حل لحالتك اريدن تردون زلم مو جهال واركض احل طلايبكم

أيه : الكل سكت ومحد فتح حلكه
حامد : يله بويه ننزل
أيه : باوعت على ابراهيم وهو حتى مباوع على وجهي قهرني تصرفه حيل نزلنا والكل واكف واكيد الكل سمع الكلام
الحجية جميله: يمه حميد تهدى بلرحمن ذوله وليداتك چا طلكت البت من منير وماتنطيها لبراهيم المن تظل چا هم مثل خيتها تبور
حامد : يمه رحمه لأبوي بسچ ومااريدن هذا الموضوع ينذكر والگل يركد والي يعصاني ويحيد عن چلمتي وروح ابوي اطگه وماارحمه وهذا الشى على الگل نسوان وزلم وانتن كل وحده لحجرتها مااريدن اشوف احد ويمامه اخذي بنياتج وللبيت بسرعه
يمامه : حاظر يله بنات علاوي ماما تعال
همسه : اني اريد ابقى يم ماما احلام
احلام : خيه عيفيها ليه
يمامه : ماشي ابقي هنا يله بنات
واخذتهم وطلعنا دخلنا للبيت

ودق : هسه اني كولشي مفهمت
يمامه : أيه اطلكت من منير بس ميقبل عمج يزوجها لبراهيم
ودق : زين ليش هو مو يدري ابراهيم يحب ايه
يمامه : مااعرف بشنو يفكر حامد شبيك ايوته شو صافنه
أيه : ماكو شى ماما اريد انام
يمامه : شتنامين بعد وكت
أيه : لا تعبانه واريد انام
صعدت والدمعه بعيني قهرني ابراهيم حيل شنو معنى تصرفه

يمامه : رجع حامد بليل حاولت افتهم ليش هيج سوه گلي هذا الشى بصالح الكل

يمامه : حضرت ملابسه بدل ورحت سويت نومي حامض وماعون فاكهه واجيت يمه
حامد : انتي ماتوبين انه مودوم اگلچ اريدن چاي
يمامه : واني بليل مااسويلك وخاصه من تكون تعبان
حامد : ليش تعاندين
يمامه : مااعاند بس احبك واخاف عليك
حامد : لا ادگين ناعم مايفيدچ
يمامه : هههههه ماادگ ناعم اني بس ردت افتهم ليش هيج سويت همزين طلكتها من منير بس ليش متقبل يتزوجها ابراهيم
حامد : انه اعرف بمصلحتهم
يمامه : حاسه وراك شى
حامد : چا اذا حاسه ليش تلوبين
يمامه : مااصبر احب اعرف كولشي
حامد : انطيني النومي اشربنه وانام
يمامه : تفضل وشرب واباوع عليه
حامد : لاتنظرين هيج چا انه هاي نظراتچ ترجفني
يمامه : حبيبي گلبي ابو علاوي الورد شنو الي بالك
حامد : شنهي هاي ابو علاوي الورد هاي جديده انه گلت گلشي وسمعتي لا ادوخين رويحتج الحلووه وهاج اخذي مااكمله اريدن انام
يمامه : انطاني ظهره ونام حضنته من وره وهمست بأذنه وين تروح مني اذا مو اليوم باجر اعرف
حامد : نامي طيرتي نامي
يمامه : طيرتك شينومها وهي تريد تعرف شنو الي بعقلك
اندار عليه وحيل سحبني بحضنه وحضني قوي
حامد : انتي بعقلي وبگلبي وبرويحتي واسگتي اريدن انام
يمامه : سكتنا بس عوفني شون انام وانت حيل حاضني
حامد : اششش اريدن اليوم اقفص عليچ وانامن وانتي هيچ كون ادخلنچ بضلوعي
يمامه : هههههههه حبيبي
حامد : اسگتي يمامه وغمضي عيونج ونامي والموضوع لا تفتحي
يمامه : يابه من تقفل تقفل
حامد : چا شون متشوفين اخذتچ قفلت عليچ وخذيتج لو لا وخليتچ تحبيني لو لا
يمامه : عمي كدها ومو بس احبك اموتن عليك
حامد : العمارچي بحلكچ ينكط عسل من هاي الشفايف
يمامه : والله انت عسل حبيبي بس لو تحجيلي وجان يكفخي براحه ايده على راسي
حامد : نامي واسگتي وهذا فضولچ اكرصي شويه
يمامه : يجي يوم وانت تجي تحجيلي جان يحضني حيل ومجاوبني ونام بس لو افتهم ليش ميقبل ايه لأبراهيم وشغير رأيه

أيه : بقيت اسبوع افكر بوضعي وشنو الي راح يصير منير رجع لبغداد والخطار بدا يقل ورجعنا لوضعنا الطبيعي بس گلبي ميهدأ الوب على ابراهيم اجتي جنه
جنه : هاا خيه شنهي كل مااجيج صافنه
أيه : شونه طمنيني عليه
جنه : خيه سوده عليه يون الليل گله امه وبشرى كاعدين كعود وحتى خطيه بشرى حامل وتعبانه وبشهرها وماترضى تروح لبيتها
أيه : اوف گلبي وجعني حيل متأذي
جنه : چا شنهي غير طلع من الموت رجل مكطوعه والثانيه مكسره والايد كلها رضوض زين وعايش
أيه : اريد اشوفه حيل مشتاقه اله
جنه : اركدي خيه الوليد نار وبس يعيط أمه مايتحملها اليوم گلب البيت اله يطلع اختنك وكوه عمو حسان ومازن شالوه وحطوه بلكرسي ونزلوه وخذاه سعد ابن عمو حسان يتمشى بيه
أيه : اروح اشوفه
جنه : من صخام الصخمني اكعدي لاتسودنين
أيه : ولج گلبي نار عليه اريد افتهم ليش هيج سوه ليش ميريدني
جنه : اصبري خيه ان الله مع الصابرين خلي يطيب وربج كريم
أيه : بس اشوفه دقايق
جنه : عيفي اليوم وغير يوم اذا طلع اجيج اكلج وروحي شوفي
أيه : الله عليج جنه انطيني خبر من يطلع
جنه : تامرين اروحن انه

أيه : شخبارج ويه مازن
جنه : اووووف يالوعه جبدي
أيه : احجي شبيج
جنه : خيه ساعه وياي وكل اليوم مو وياي يوم اتقرب ليه يبعد ومن ابعد يقترب حرت شون اتعامل وياه
أيه : وراح تبقين هيج عايشه
جنه : تعرفين من ينام جاري ينطيني ظهره احسه بغير مچان مرات اسوي نفسي نايمه اريدن اشوف شيعمل يضل صافن للسكف ويفكر بلساعه ومره كامش كتاب يقرا وانه نمت مدري شون فزيت عليه واشوفنه يكتب اسم ودق على الكتاب ويشطبه ويرد يكتبه ويشطبه يمكن ١٠ مرات وكل مره احس وياها حصره تحرك صدره حرك
أيه : وشجابرج تتحملين هيج
جنه : انه غبيه
أيه : لا حشاج
جنه : شنهي حشاي انه اگلچ غبيه عبن مااسيطر على گليبي انه احبنه وحبه عامي رويحتي گل مااكولن اولي واعوفنه ارد ارجف عليه واكولن اخاف اعوفنه ويرد عليها وظاله لا انه طلت السما ولا انه وكعت بلكاع
أيه :والله ياجنه يعينج الله وينطيج القوه
جنه : انه جبل اتحمل زلمتي يحب غيري وساكته انه الردتها وانه اتحمل گلشي ومتانيه رحمه ربج يهدي عليه ويرزقني ولو وحيد اربطه بيه

أيه : ليش هو الرجال يربط بالاطفال وربج لو ١٠ جهال اذا راد يعوف المره يعوفها واكو ماعدهم خلفه ويموت عليها وميكدر لحظه بدونها الجهال مو قياس ولا طريقة صحيحه حتى يربط بيها
جنه : انه العليه اسوي واشوفن وين اوصل
أيه : الله يرزقج گلبي
جنه : اروحن للبيت
أيه : الله وياج وجان تركض همسه تعالو الحكو بيبي تعيط مسعده ماكو
ودق ودق
ودق : شكوو
همسه : مسعده ماكو وبيبي گالبه الدنيا بلعياط
ودق : واني شكوو اني المربيه مال مسعده وضيعتها
أيه : امشي نشوف شكوو
ودق : خوو انتي راكضه مو علمود مسعده علمود الي بالج
أيه : اهووً تجين لو لا
ودق : اجي اريد اشوف حبيبة گلب بيبيتج وين راحت بلكت انهزمت ونخلص منها حتى ابقى اعير بيبيتج واكولها شفتي اخلاق مسعده زباله انهزمت ويه عشيقها هههههه
جنه : هههههه خرب ببليسج يله نروح نشوف شنهي الصار

نزلنا نركض اربعتنا ونشوف البيت مگلوب
الحجية جميله: يبووو خذوها مني اليوم احرك ابهاتهم
فضيلة : يمه شنهي صگد جذب هي صخيله وعدنا منها جثير اجيبلج وحيده احسن منها
الحجية جميله: ايا صخيله عبن تغارين منها چا هسه اذا اخذ بتج وانطيج غيرها ترضين
فضيلة : يمه هاي بتي هاي صخله شنهي جرالچ شجاب شجاب

الحجية جميله: اسمعوني اذا ما شفت مسعده جدامي احرگم كلياتكم
ودق : بيبي هاي تلكيها انهزمت ويه عشيقها شوفيها وين داحت ههههه
الحجية جميله: ايا دايحه ترحين فدوه ليها انه اعرفنج تكرهيها عبن احسن منچ ولج تعالي ليه اخافن انتي شردتيها
ودق : لا والله بيبي ولا وصلت يمها
الحجية جميله: يلمعگربه اذا عرفت انتي كضيتي شعرها منها وروح ابوي اربطچ على البغل واخلي يمشي بلديره گلها والجهال توكعلچ دك بالحجار ويكولون تهبلت البت

ودق : يمه عزه والله مشفتها ولا الي علاقه بيها
مازن : خير حجيه شنو السالفه اجوني الجهال ركض للمستوصف ويكولون الحجيه تريدك بيج شى
الحجية جميله: يمه مويزن يبعد حبوبتك مسعده ماهي وانه گلبي نار عليها
مازن : صدوك جده جايبتني مناك والمراجعين كومه عندي وعفتهم علمود الصخله
الحجية جميله: چا شنهي هيه مو روح چاانه كضيت سنين وياها اكثر ماكضيته وياكم
مازن : وين راحت
الحجية جميله: چا انه لو اعرفن وين ولت انشد عليك

أيه : بيبي خاف راحت بره البستان لو باكوها
الحجية جميله: يمه باكوها چا شنهي احنا هنا طناطل مابينه خير يدخلون دارنا ويبوكونا انه امك يحامد چا غير الحرامي اكضه وانعل شيب الخلفه وانتم ليش واكفين چنكم ذبان مهلس من صخونه الصخنتگم اركضو دور عليها لا اطيح بيگم كلياتكم انه اريدن مسعده
ودق: يله كل واحد يدور من جهه على السفيره صاحبه المقام الرفيع مسعده خانم
الحجية جميله: انتي بالذات گضي لسانچ انه اعرفنج فرحانه عبن ضايعه يلسوده التفيسه ولي للمراح (بيت الحيوان) وعدي الحلال گله واريدن مسعده منچ انتي

ودق : اني شكوو قابل اني الي ضيعتها
الحجية جميله: يبت البومه ميلي مني
وجان تشمر عليه طاسه مال مي كدامها وكعدت على راسي لو احمد راضي مينيشن مثلها همزين مي مو غير شى مسحت وجهي وگتلها كون يجيبولج خبر مسعده ميته حتى نخلص ومااشوفها خير تنزع الي برجلها وتشمره مبقت شى كدامي مشمرته عليه واني ركض اذا ابقى يمكن اطلع رشاشه وتكتلني طلعنا بره وكل واحد بجهه يدور مشيت وصار بصفي مازن

مازن : هسه انتي تعرفين بيها تحب هاي الحيوانه اله تندكين بيها
ودق : هههههههههه احب اشوفي بيبي تتعصب علمود مسعده احب سوالفها
شبيك صفنت حجيت شى اني
مازن : اشتاقيت لضحكتج صار فتره مشايفها
ودق : من رخصتك جان يجرني من ايدي شبيك مازن وسحبتها حيل
مازن : ليش تتهزمين مني
ودق : يعني احنا نعيد ونزيد بلحجي
مازن : زعلانه مني
ودق : زعلانه ليش قابل انت شسويت بس ردت تنهي عليه حتى يطيح حظي قابل سويت شى لا سامح الله
مازن : مااكدر اشوفج زوجه غيري
ودق : هذا الشى فقدت صلاحيتك بيه من يوم متزوجت تره الي كعد تسوي محلوو لا بحقي ولا بحقك ولا بحق الجنه مرتك الي كل ذنبها حبتك لتأذيها تره كافي وشوف حياتك
مازن : تتوقعين بيوم انساج واكدر اعيش حياتي
ودق : هاي مشكلتك مو مشكلتي اني اليه حياتي ورجاءاً لتحاول تتقرب مني
مازن : عيشي حياتج ومااتقرب منج بس زواج ماكو
ودق : رجعنا لهذا الموضوع
مازن : ليش قابل احنا نسينا حطيها ترجيه بأذنج روحي عيشي وادرسي وسوي المستقبل الي تحبه بس لتفكرين بيوم تصيرين لغيري
ودق : زين نفرض وافقت عليك شسوي
مازن : وروح ابوي باجر اتزوجج
ودق : وجنه
مازن : باقيه بيتها وانتي اذا تحبين اسويلج بيت وحدج اني متمكن والحمدلله
ودق : زين اني شنو مجبوريتي انزل على ضره ليش اتزوج رجال متزوج شناقصتي
مازن : واني مااكدر اطلك جنه
ودق : ليش مطلكها
مازن : يعني بت عمي وحبابه وممأذيتني
ودق : هو هذا الي ردت اوصله حبابه وممأذيتك ليش انت لعد تريد تأذيها يعني هي اداريك مثل المي بلصينيه وانت اتجازيها تتزوج عليها
مازن : هذا حقي

ودق : انت انسان دارس ومثقف لتخليني اغير نظرتي بيك حقك شنوو اتزوجت وحده محد جبرك عليها وانت اختاريتها والبنيه بنت عمك وحلوه ومعدله وتموت عليك ومراعيه الله بيك شنو الحق الي تملكه حتى تتزوج عليها بشنو قصرت لو الشرع انطاكم الحق بلزواج من اكثر من وحده وكمتو كل متحبون تتزوجون كلتو حقي زين هي حقها وين شنو هاي الانانيه

مازن : صوتج نصي اني مگلت شى غلط حتى تتعصبين
ودق : اصلاً تفكيرك كله غلط شوف النعمه الي بيدك قبل متضيع منك اني مااناسبك ولا اني جنه الي راح تكعد من الصبح تركض حتى تحضرلك لبسك واكلك وتوكف استعداد بلباب حتى تودعك ومن ترجع تاخذ الي بيدك وتنزعك ملابسك وتصبلك الاكل وتوكف تباوع على حلكك اخاف تطلب وتحتاج شى منها وتركض تسوي وبكل حب ولا اني الي راح اخلص يومي اباوع على طولك واتمنى الكلمه منك ولا اني الي ماانام اله تنام وانت مرتاح ويوم متفكر تحجي اليه حجايه حلوه اطير من الفرح اني غير جنه مازن واني مااناسبك افتهم هذا الشى ومدااعيب بيها بلعكس الي عنده مره مثلها يحطها على راسه مو يتزوج عليها وماطول هذا اختيارك لازم تصير كده خاف الله بيها تره هي متستاهل البرود الي معيشه بيها مالها ذنب تعيش ويه رجال ميحس بوجودها

مازن : روحي ودق كافي
ودق : اعرف ماعندك جواب لكلامي لان تعرفه حق وراح اكولك شى اني مو الك انساني
مازن : انتي مو الي بس متصيرين لغيري
ودق : عناد عناد مااشي عفته ومشيت شكد شايف نفسه رحت ادور بين الزرع على الست مسعده خرب هاي وينها

أيه : عفت الكل وركضت بحجه ادور على مسعده دورت على ابراهيم
اكيد قريب الشط قابل وين يروح وصدوك لكيته هناك يغني اوف ربي شكد مشتاقه لصوته يغني بحزن وبعبره وكله حنيه

يكولون غني بفرح واني الهموم غناي
بهيمه زرعوني ومشواوعزوا عليه الماي
نوبه انطفي ونوبه اشب
تايه بنص الدرب
تايه وخذني الهوى لا رايح ولا جاي
يكولون غني بفرح
,,,,,,,,,,,,,,,,,,
دولاب فرني الوكت وخميت الولايات
الغربه صاروا هلي وخلاني الشمات
ومابين شوق وصبر خلصن سنين العمر
يكولون غني بفرح

أيه : شكد اشتاقيت لصوتك من تغني
ابراهيم : شسوين هنا روحي
أيه : تقربت منه وهو وحده اتوقع سعد عايفه يم الشط وراح كعدت يم رجله شبيك ابراهيم ليش هيج تسوي ويايه
ابراهيم : روحي ايه مااريد اشوفج
أيه : بس اني اريد اشوفك ومشتاقتلك
ابراهيم : وتالي وياج انه گلت وانتي سمعتيني انه مااتزوجج روحي شوفي حياتج بعيد عني
أيه : ليش هي اكو حياة بدونك
ابراهيم : لتعصبيني تره انه الله اعلم بحالي
أيه : واعلم بحالي هم ابراهيم اني احبك وانت تحبني ليش تأذيني وتأذني نفسك مكافي
ابراهيم : اي كافي تعب كافي الم وروحي عيشي حياتج متعبتي اني ماانفع لا الج ولا لغيرج
أيه : ليش نفس وروح ابراهيم تتقبل غير أيه
ابراهيم : دخيل ربج ارحميني
أيه : انت ارحمني وارجع اليه اني وياك جنا ننتظر يوم يوم حتى ننجمع وصار الي متوقع احد يصير بس مو صعب على رب العالمين واطلكت من منير شنو الي يمنع ننجمع اذا على بابا حامد اني اتوسل بيه حتى يوافق

ابراهيم : اني مااريدج وكولشي قسمه وانتي مو قسمتي
أيه : لا قسمتك وغصب عنك وجان يعيط بقوه وجر الغطى الى مغطي رجله بيه ويحجي بأعصاب ونار يريد يطگ
هاج شوفي شون ترضين تعيشين ويه واحد بتك رجل والثانيه سگط شون ترضين تمشين بعرسج وبدلتج البيضه وطالعه جنچ حوريه ورجلج على كرسي والعالم تأشر وتكول خطيه هاي البنيه شون زوجوها لمقعد شون تتزوجين واحد ميكدر يعين نفسه شون راح يعينج ويعين جهالج واذا مشيتي بسوك لو عزموج صديقاتج تستحين تمشين ويايه لان اكيد راح يكولون خطيه شون بنيه حلوه متزوجه واحد سكط تدرين شكد راح تسمعين كلمه خطيه تدرين شكد راح تشوفين نظرات شفقه بعيون الناس على حالتج والله شون متزوجه هيج واحد شنو ذنبها حلوه والف واحد يريدها تخبلت هاي ورضت تتزوج بهيج واحد لج شوفي زين متعي نظرج بلي اتحبيه شون اسگط شوفي لحمه شون متملخ لج اني مو بس رجلي اسكطت حياتي كلها اني ميت ايه ممجبوره تعيشين ويه واحد ميت اذا تحبيني ابتعدي عني اني مااريدج هااج شوفي هااج

أيه : يحجي وبأعصاب واني ابجي وكام يريد يجر الباندج الي شاد بيه رجله المكطوعه حتى يراويني منظرها عسى ولعل تلعب نفسي منه وابتعد ويجر بكل قوه من اعصابه حتى بدا يصير دم على الباندج لزمت ايده وجريته منه وكاعده اني يم رجله ورجعت الفها على كيفي وابجي هو سكت بس يتنفس سريع
ابراهيم : ارحمي بحالي كافي الي اني بيه كل ليله اباوع على رب العالمين واكوله ليش رجعتني مو متت شنو حكمتك ورجعتني سگط ليش اعيش هيج ليش

أيه : رفعت عيوني عليه وشفت دمع بعيونه كملت لفت رجله جان ادنج وابوسها هو فتح عينه كمت وتحرك شويه وجبت الغطا الي شمره وغطيته وكتله بهدوء
رجعك اليه لان اني طلبت منه ترجع وحاشاه ماغيب ظني ورحم بحالي لان يعرف بدونك مااعيش جان يدنج واحس گلبي يبجي مو عيونه حبيبي مكسور وعرفت سبب رفضه اليه حجه بهدوء وهو مدنج

ابراهيم : ايه انتهى كولشي بينا روحي شوفي حياتج والله يوفقج ورجاءاً لتتقربين بعد مني حبج بگلبي انتهى ولو اخر بنيه بلدنيا مااتزوجها
أيه : عفته ومشيت ومجاوبته مردته يجرحني واعرف كل گلمه تطلع منه مو من گلبه رجعت امشي شافتني ودق واجتني تركض

ودق : وين جنتي گلبي وكع دورت عليج ماكو وليش عيونج هيج حمره احجي
أيه : ماكو شى
ودق : شفتي ابراهيم موو
أيه : يله نرجع للبيت
ودق : اووف ياگلبج شيحمل بعد
امشي اندور على صخله بيبيتج يمعوده هاي مستعده تبيتنا بره البيت اذا ملكيناها

وجان تعيط همسه هي وعلاوي لكوها لست مسعده والطريق كله اندك ونهلهل وجنه هم ويانه اجتي تركض من شافت همسه شايلتها ونغني ونصفك جبناها واجت ويانه جبناها واجت ويانه كلللوش دخلنا على بيبي وجان تعيط
الحجية جميله: انه عرفت انتم ضميتوها علي حتى احترك عليها
ودق : هو هذا حظنا وياج جديده صار ساعه اندور وتالي من نلكاها تهمينا بيها
الحجية جميله: چا وين ولت وشطلعها
ودق : انتي مكعد تقتنعين بأن ست مسعده وحده فاسده تفتر وره الصخول
الحجية جميله: موزين
مازن : نعم جده
الحجية جميله: هاي البت اذا ما ميلت من وجهي اربطنها وابيتها بلمراح (بيت الحيوانات) والصبح اسحلها واخليها تنظف المراح كله وتسوي المطال واحركنه على شعفتها
ودق : ايييع بيبي اروح والعفو ست مسعده الشريفه العفيفه والحمدلله على سلامتج
الحجية جميله: اي هيچ جري عدل تره انه واصلها حدها گلش وياچ
ودق : يابه اشوفكم بخير كلها كم يوم وارجع لبغداد واودع ست مسعده وحبايبها
الحجية جميله: درب الصد مارد
ودق : والله مو من گلبج منو الي يتغزل بيج يابيبي

الحجية جميله: ولي گلشي مااريد منچ تحرگين اعصابي
ودق : شمرت نفسي عليها وابوس بيها وهي تضحك
بربج ام حامد لو مسعده مجايه وهو بستج تضحكين هيج
الحجية جميله: لا وحگ علي چا جسرت مفاصلچ گلها موش انه رويحتي ماترتاح اله اشوفنها بخير وانتي هم احبنچ بس موش كثرها
ودق : يله نعمه المهم تحبيني
أيه : اني رايحه للبيت
الحجية جميله: يبعد حبوبتج ليش مكدره
أيه : لا بيبي مابيه شى بست ايدها وراسها وجان تشاورني
الحجية جميله: الي الچ ربچ يوصله لحضنج والي موش الچ لو تسعين العمر گله مايصير
دوم كومي واگعدي ورددي الحمدلله والشكر لله
دوم الحمد والشكر يدفع البلا ويلين الگلب والمايصير يصير بقدرته فوضي امرچ لربج يحبوبه هو الطف منا بعباده
أيه : الله كريم بيبي ليضل بالج وبست ايدها وراسها

احلام : اكلچ فضيله انتي مو گلتي نروح نزور
فضيلة : اي والله خيه ناذره لوجه الله واهل البيت ذبيحه وغدا لسلامه وليدي تروحون گلكم ناخذ كوستر ونروح
ودق : اني اسبوع الجاي رايحه لبغداد
أيه : وين نروح
احلام : لكربلا
يمامه : هاا خير شبيكم
احلام : خيه ترحين زياره لكربلا
يمامه : اي والله صار سنين مرايحه واريد ازور البنات وعلاوي بس اشوف حامد يقبل
الحجية جميله: يقبل چا يگلج لاترحين
يمامه : لا بس خاف يكول ليش مكتيلي
الحجية جميله: گليله ويقبل انه اعرفنه عبن زياره مايكول شى
ودق : بس اني ورايه دوام ماما
يمامه : هو يوم واحد ونرجع وثاني يوم خالج يجي ياخذج
ودق : يله نروح وانتي أيوته
أيه : اي اريد اروح اتشكر منهم
احلام : على شنهي
أيه : دنجت ومحجيت باوعت فضيله عليه وكأن عرفت على شنو
فضيلة : يله نروح اسبوع الچاي گلنا

مرت الايام وبعد مشفت ابراهيم ولا وصلت هناك اجتي نتيجتي ونجحت بمعدل بسيط مو مهم المهم نجحت طلعت ٦٥ موزين نجحت ماما فرحت واتفقنا اقدم تربيه وجامعه المستنصريه حتى قريبه على بيت جدو رغم راح اروح لبغداد وابتعد عنه بس اتوقع البعد حالياً انسب اليه واله
كعدنا الصبح وحضرنا كولشي اخذت العبايه وياي السبحه الي مفاركت ايدي من يوم اختفاء ابراهيم وجنت اسبح بيها ومن رجع كمت كل صلاه اسبح بيها ردت ازورها تمنيت يجي ويانه كعدنا من الصبح ساعه ٤ كالو ورانا طريق ولازم نطلع من وكت الكل صعد حتى تفاجأنا بابا حامد ويانا وقبل لنتحرك وين صار مازن وحسان ومااشوف غير الباب تنفتح ويصعدون ابراهيم من الفرحه حسيت گلبي وكف كعدوه ليكدام واني ليوره بنهايه الكوستر على كوله جنه خانه الشواذي كعدنا هناك ونسولف ونضحك بس عيني منشالت منه صح اشوف ظهره بس المهم اشوفه وصلنا وكفو السياره بلكراج وبدينا ننزل وهو نزلوه بلعربانه وميباوع بوجهه اي احد مااعرف شون قنعوه يجي
اول موصلنا بين الامامين نزلت دموعي المنظر يجنن وبيه خشوع اتذكرت حلمي واحنا نمشي شفت رجال يبيع علك (قطعه قماش للمراد) ردت واحد احمر دورت وكله اخضر

يمامه : شسوين بيه ماما احمر
أيه : اريده يوم
حامد : تعاي بويه هذا احمر
اشتريناه ودخلنا انفصلنا الرياجيل وحد واحنا البنات وحد زرنا الامام الحسين وقريت دعاء الزياره والصلاه ومحسيت بروحي غير استأذن من الامام واطلع لزمتني ماما
يمامه : وين
أيه : اريد اروحله يوم
يمامه : منو ولج
أيه : الامام العباس ودموعي تنزل
يمامه : سلام الله عليه ولج البنات كلهن بعدهن ممكملات الصلاه شون
أيه : اروح وحدي
يمامه : تخبلتي غير تيهين
أيه : البنات يطولون وحده اجر طول وحده عرض وبيبي تصلي للدنيا كلها لا تبقي عايش وميت متصلي اله يعني زين بعد ساعتين اذا طلعنا

يمامه : ياامي اكعدي هنا اقري قران وصلي شجاج
أيه : صليت والله وقريت دعاء الزياره فدوه خلي اروح
يمامه : اوكفي خلي اطلع وياج اشوف منو من الولد خلص زياره حتى ياخذج ويااه
ماما ودق انتبهي على اختج الزميها زين
ودق : مااشي يوم
طلعنا وجان اشوف ابراهيم وحسان مخلصين وكاعدين بلصيوان الخارجي ينتظرون الباقين
يمامه : همزين رحمه لوالديك ابو سعد اخذ أيه للامام العباس موتتني ترجف اله تروح
ابراهيم : خلي تنتظر البنات شبيها تخبلت
أيه : مباوعت عليه وعفته يحجي
حسان : خويه اخافن الولد يطلعون ومايلكونا
يمامه : اني هسه باقيه هنا يم ابراهيم واي واحد يطلع انبلغه
حسان : تامرين يله بويه ايه
ابراهيم : اجي وياكم
أيه : دنجت ومحجيت شى اخذه عمو حسان ويدفع بيه واني امشي بصفه بس عيوني على الگبه وارجف اريد اوصله
ابراهيم : شبيهن عيونج طايرات نزليهن
أيه : هاااا ويايه
ابراهيم : ويه امي نزلي عيونج
أيه : والله دااباوع على الامام والعلم مو على شى ثاني
ابراهيم : دخيله بس نزلي عيوونج
أيه : حاظر وكملت مشي ومدنجه بس دخلنا الباب لو عيون تصب احس الدموع مااعرف منين تطلع

حسان : بويه ننتظرج هنا احنه ندخل نزور ونرجع لهذا المچان لا تتأخرين
أيه : لا مااتأخر وركضت موو مشي لا ركض وكلي لهفه وخشوع وابجي اول مدخلت عطت بصوت عالي اني طبيعتي خجوله واستحي بس منين اجتني الجرأه واعلي صوتي بنص الحرم مااعرف عبالك مو أني
وبصوت عالي دخيلك ياقمر بني هاشم ماقصرت وانطيتني شارتي بأيدي الحمدلله والشكر ماقصرتو ويايه وهاي رايتك الدزيتها اليه دخيل اسمك وشمرت العلك الاحمر على الحضره وابجي ياالله وياحبيب الله محمد ويااحباء محمد (اهل البيت) حياتي بيدكم وابراهيم برعايتكم يارب برد نار گلبه بجاه الامام العباس اني طمعانه بكرمكم ومتردون السائل اسألكم العافيه وحسن الخاتمه وصفاء القلب من الهموم واسألكم وبجاهكم عند ربگم ابراهيم يكون اليه ويرجع مثل قبل يـِْ♡̨ـِْا رَبّ

بقيت ادعي وابجي وكملت دعاء الزياره والصلاه وطلعت مرتاحه حيل ومبتسمه
لكيتهم واكفين وابراهيم نار صاير
ابراهيم : بعد جان بتي جوه شنو هذا التأخير
باوعت على عمو حسان الي وخر على صفحه من شاف ابراهيم يعيط عليه بحجه يشوفهم وينها دنجت يم رجله وهو كال بصوت عصبي كومي
أيه : باوعت عليه واني مكنبصه يم رجله شايف الامام واشرت عليه طلبتك منه ورب العالمين مردني اجاني بلحلم وانطاني علم وغطيتك بيه وانت مجروح
وحق الي رجعك اليه ياابراهيم واني بحضت الامام مااصير لغيرك لو اموت واليوم واكفه بحضرته واكولك وحق العباس ابو فاضل وحق قطيع الكفين مااصير لغيرك لو اعرف انتظرك العمر كله

ابراهيم : نزلت دمعتي متحملت كلامها وحرگتها من تحلف اني خايف عليها ومااريد تنظلم ويايه وكتلها بصوت ناصي طلبتج مره منه واجيت ابجي وانشغ
أيه : ورجعني الك ادخل زوره مره ثانيه واتشكر منه لان اني رجعتلك ومااروح منك لو ابقى انتظرك العمر كله
تعالو عموو
حسان : هااا بويه خيركم
أيه : دخل ابراهيم يزور مره ثانيه مطلوب زياره
ابراهيم : وانتي
أيه : لتخاف عليه اني هنا كاعده وانتظرك

ودخل وعيونه عليه ماكو ثواني والجماعه كلهم اجوي همزين بابا حامد مشافنا وحدنا
ورجعت هم دخلت ازور ولا اشبع من الزياره
من طلع ابراهيم ابتسم وعيونه كلها حزن عفته خلي يرتاح والايام الجايه لازم ابتعد حتى يشتاق ويرجع يلملم وضعه وره مكملنا الزياره كعدنا بستان صديق بابا وخطيه قامو بالواجب واحنا هم اشكال جايبين اكل جانت الكعده تخبل والاحلى الطيور الاثنين ماما وبابا حامد الي كل شويه يكولها نصي عيونج امشي منا وتعاي منا ضحكت واني اكول ابراهيم عليمن طالع ثاري نسخه من خاله
وبقينا ناكل ونضحك جانت الكعده تخبل واكيد متخلى من ودق وبيبي الي كل شويه يتكافشن وراها بدقايق حبايب كارثه يموتن ضحك واني وابراهيم عيونه تسولف وكل ساعه نبوك نضره نهدأ دگات گلبنا المسموعه من كثر الاشتياق

ورجعنا والطريق كله اني نايمه حيل ارتاحيت وثاني يوم راحت ودق لبغداد

ودق : رجعت لبغداد بعد سفره الزياره الي ابتعدت كل البعد عن مازن حتى ميتقرب ويحجي ويايه ويخرب الطلعه عليه وعلى جنه الي عيونها مفاركتنا طول السفره وصلت لبغداد والتعب ماخذ حيلي وراها بيومين امتحنت الدور الثاني وحدي لان نور نجحت اني اجلت ٣ مواد لان بذاك الوقت مكدرت امتحن بسبب الوضع التعبان الي جنا بيه اخر امتحان اليه جنت امشي وحدي
وجان يوكفني شاب
ممكن احجي وياج
ودق : لا ماممكن
دقايق ماأخرج
تفضل رايد شى منها احجي ويايه
ودق : واندار واشوف طارق ورايه وعيونه تريد تذبحني
انت منو حضرتك
طارق : خطيبها
ودق : فتحت عيووني عزه خطيبي شنو بس سكتت خفت اكو لا وتصير مشكله
بس اني اعرف هي ممخطوبه
طارق : وهسه عرفت هي مخطوبه محتاج شى
هاا لا من رخصتكم
طارق : هله
ودق : بس مشه الولد شويه انداريت على طارق انت بأي حق تكول انت خطيبي
طارق : صوتج منا الطلاب تعالي نكعد هناك ونحجي
ودق : تره اتجاوزت هوايه لتشوفني اسولف واضحك وياك اعتبرتك صديق او اخ لان انت اخو نوره بس مااسمحلك تتجاوز خصوصياتي
طارق : خلي نكعد وشتريدين تحجين احجي
ودق : مااكعد ورايحه جان يصيح بصوتي عصبي بس مو عالي صاك على سنونه وگلي امشي كدامي اكعدي عندي حجي وياج
ودق : اوووف ومشيت ردت افتهم لوين يريد يوصل كعدنا بلحديقه وجان الطلاب عددهم كلش قليل لان دور ثاني ومو الكل متواجد تفضل احجي
طارق : اول شى ماله داعي لعصبيتج وتوترج
ودق : شون ماله داعي وتكول للولد خطيبتي
طارق: انتي اصلاً ممهتمه اله واني اعرف بيه جاي يصارحج وراح ترفضي

ودق : بس مو تكله خطيبتي
طارق : اني مكذبت
ودق : استغفر الله شون مكذبت
طارق : شوفي يابنت الناس اني من يوم مشفتج وحالي كله انگلب حياتي جنت مكضيها بلطول والعرض مااسوي روحي ملاك وبس اني وبس لا اني حالي حال كل الشباب اصادق واطب واطلع واشكال البنات عرفت بس عمري مجذبت على وحده وعدتها بشى اتحدى وحده منهن تكول طارق وعدني بشى ومنفذه سواء بالزواج او غير شى من البدايه اكول اني مااتزوج جانت نور تحجيلي عنج وعن قوه شخصيتج بدا الفضول عندي وجنت اشوف صورج عدها واول مره صعدتي بيها بلسياره تقصدت استفزج ردت اشوف شنو راح تسوين صحيح جانت ردت فعلج صادمه اليه وصلتيني مرحله ردت اضربج لان اول مره اشوف وحده متخاف وتحجي وتدخل بنص العين هاي عيونج الي دمرتني بيهم قوه عجيبه حتى وانتي متوتره قويات ومينهزن وكل موقف وياج وصلني لقناعه انتي الانسانه الي اريدها واجيت وخطبتج واجاني الرد مثل كل مره تصدميني بتصرف احسب نتائجه شى يطلع وياج شى ثاني وانگلب الاعجاب الى حب ودق اني صدوك احبج ومو حب عادي اني اعشقج وكمت اغار عليج من الهوا الي يلامس ملابسج

ودق : بس اني مااحبك ولا اريد احب انت اختاريت الانسانه الغلط الي تكمل حياتك وياها الزواج والحب اخر اهتماماتي بلحياه
طارق : هو هذا الشى الي حببني بيج اكثر وخلاني اتمسك بيج اكثر اني مااريدج هسه تحبيني اريد شى ثاني منج
ودق : شنو
طارق : تنطيني فرصه ادخل گلبج وازرع اول نوايه حب بيه
ودق : نوايه
طارق : اي لان الي مثل گلبج صعب شخص يمتلكه بسهوله لازم يتعب ويحرث ويزرع ويزگي ويسهر الليل حتى يحمي هاي البذره وهي شويه شويه تكبر بگلبج
ودق : وشنو الي موازيك الف وحده تتمناك نسيت هاي مو حجايتك
طارق : وبعدني مصر عليها الف وحده تتمناني بس اني مااتمنى بس انتي
ودق : راح تتعب وتالي تحصد بس التعب والقهر گلبي التربه مالته حجر غير صالحه للزراعه
طارق : صحراء زرعوها وربج الي زرع بلجبال وانبت الزرع والورد بنص الحجر يگدر يساعدني وازرع بگلبج حبي
ودق : تدري بسبب خطوبتك اليه ابن عمي جان نهى عليه
طارق : شنو ينهي عليج على اي اساس
ودق : اساس هو ابن عمي
طارق : هذا واحد متخلف تلكي حتى حجي ميعرف يحجي وشافج احسن منه وراد يكسرج
ودق : لا بلعكس يعرف يحجي ولمعلوماتك هو دكتور اسنان وناجح جداً بشغله وحياته
طارق: دكتور وهيج يفكر معناها يحبج مو
ودق : اوووووف
طارق : يحبج احجي
ودق : تتوقع التصرف من دكتور هيج يكون شنو معناه
طارق : وانتي شنو شعورج تجاهه
ودق : اني كتلك اني لا اصلح للحب ولا للزواج وتقدملي قبلك ورفضت لهذا ياطارق اذا تقربت مني راح اتأذه

طارق : واني ممستعد اخسرج لو اعرف انقل شيوخ العراق كلها للعماره حتى يخطبوج اليه اني متمسك بيج لأخر عمري
ودق : شنو هذا التمسك وليش
طارق : لان حبيت ودق واول مره احب كل الي مريت بيه بحياتي من صداقات وعلاقات عمري معرفت شنو الحب وياج عرفته ومااتنازل عنج بس اسمحيلي ادخل لگلبج وعوفي الباقيه عليه
ودق : صعب اثق بأي انسان
طارق : واني مطالبت بثقتج لان الثقه متطلب تكتسب واني اعرف بمرور الايام شون اكسب ثقتج
ودق : بس انت هم تصرفاتك غريبه

طارق: لج بابا احبج تعرفين شنو احبج اعيط بنص الكليه والم الطلاب علينا گتلج احبج خبلتيني اني الي جنت امشي الهوا ميطخ خشمي رجعتيني مراهق اجي اركض عليج واحير شسوي حتى بس اشوف عيونج لو اشوف ابتسامتج الي تخليني اتحمل مرار الدوام وتعبه

ودق : خلي اروح تأخرت
طارق : هاج
ودق : شنو هاي
طارق : افتحي
ودق : اخذته منه فتحت العلبه دنبوس ذهب مكتوب عليه بالانكليزي دكتوره ودق
طارق : حتى تحطي على الصدريه مالتج مكان ممكتوب عليها
ودق : اسفه مااخذه
طارق : اترجاج اخذي
ودق : مستحيل هذا ذهب وغالي واني مااخذ هديه من احد
طارق : بغض النظر عن كلمه احد الي محبيتها منج بس تره متغلى عليج والله شى بسيط
ودق : مااخذه اعذرني وعلى اي اساس وشنو المناسبه حتى اخذها
طارق : بدون مناسبه بس اني حبيت يبقى شى مني عندج وملكيت احلى من هيج شى وفوكاها ينحط قريب گلبج اووف ربي احس من ينبض گلبج وهيه عليه وكأنه ينبض اليه
ودق : خجلت من كلامه وكتله مااخذه والله لتحاول وبقينا كل شويه اخذي ومااخذ حاول عالج استقتل حتى اخذه وماخذته لان فعلاً غالي وثگيل

طارق : جيبي
ودق : اخذه من ايدي
هاااج
ودق : هاي شنو هلمره فتحت العلبه نفس الدنبوس والاسم بس فضه
طارق : والله هذا رخيص ب٧٠ الف بداعت امج اخذي
ودق : ههههههههه والله انت فد واحد مسوي اثنين
طارق : كلت اخاف تعاندين واعرفج راح تشلعين گلبي للاحتياط سويت واحد فضه وهمزين سويت وماعندج حجه هذا رخيص ولو انتي مي العين ميغلى عليج وتمنيت الذهب تلبسي لان الذهب ميلبسه بس الذهب بس شنسوي لأم راس اليابس
ودق : هههههه اذا تعرف راسي يابس ليش تعاند
طارق : اعشق راسج وعنادج ومن تحبيني وتصيرين بيتي هذا عنادج كله يتحول الحب شايفه العنوديه والعصبيه من تحب شون يصير حبها يصير جنون وتستقتل على حبيبها ويجي يوم اذكرج واكولج هااا شفتي شون هسه انتي مجنونه بحبي
ودق : والله ثقه
طارق : اذكرج يحلووه يله اخذي وهذا الذهب اضمه ويه نيشانج وبذاك الوقت غصب عنج تلبسي
ودق : شكراً حبيت الفضه
طارق : واني حبيتج الج كولج ليش الله ماخلقني هذا الدنبوس وتتلمسيني مثل متتلمسي
ودق : هههههههه اروح يااستاذ دنبوس تأخرت
طارق : اوصلج للبيت
ودق : لا عفيه مااريد احد يشوفنا
طارق : اني عكب باجر ملتحق اخاف مااكدر أسـأل عليج كم يوم ليضل بالج
ودق : ومنو كال يضل بالي
طارق : يضل ياروح طارق وكل متشوفين الدنبوس راح تبتسمين وتتذكريني وتكولين ياترى شونه هسه
ودق : تروح وترجع بلسلامه
طارق : اول مره احب دوامي انتبهي على نفسج ياروح طارق

ودق : رجعت للبيت واني مستغربه على وضعي ويااه ليش هذا الانسان يكدر يحتوي عصبيتي لمست الدنبوس وفعلاً ابتسمت واتذكرته
مرت الايام ومرجعت للعماره لان مبقى شى للدوام ونجحت ورحت للرابع هسه احنا بشهر العاشر ٢٠١٢ اول يوم دوام سحبت الصدريه من الكنتور فتحتها واخذت الدنبوس مال طارق وعلكته عليها ابتسمت واتذكرته طول هاي الفتره مشفته بس من تتصل نور تكول اول شى يسأل عليج قبل حتى امي وابويه وتسولفلي شون لازم الغرفه مالته من نزل من الالتحاق وشكوو شغله جايبتها بنيه اله هدايا على صور كلهن لامهن وطالب من نور تتلفهن وامه ونور فاكين حلكهم من الصدمه ويمشون ويكولون اله هذا منو

مشت الايام وخابرت أيه طلع القبول مالتها تربيه جامعه المستنصريه وراح تجي تعيش هنا ويايه بيت جدو اني الي استغربت اله خالو وزوجته ابد معترضو بلعكس مكيفين جنت دوم استحي لان احس روحي ثقيله ومرات حتى اكل بره في سبيل مااثقل عليهم رغم بيت جدي هو بس اكو عيب وزحمه وخلف الله عليهم متحمليني بطريق الصدفه سمعت بيبي ومرت خالي يسولفون والي اكتشفته عمو حامد متفق ويه خالو يأجرون المشتمل مالتنا والايجار الهم حتى ميقصرون ويايه اني ادري المشتمل متأجر بس توقعت الفلوس لماما ومأجري ٧٥٠ الف وحتى ماما متدري لان عمو كل شهر يشيل ٧٥٠ من جيبه وينطي لماما عود هذا الايجار بيومها مااعرف انقهر من خالو شصار لو ما بنت اخته وامي الها حصه بيت ابوها وعمرها مقصرت وياهم واني ممأذيتهم لو انقهر من نفسي لان جنت اكره عمو حامد
صعدت للغرفه وخابرته
حامد : الووو ها بويه شون كيفج
ودق : الْحٍمَدٍ للـّہ عمو انت شونك
حامد : بخير اذا انتي بخير
ودق : اسفه عمو
حامد : على شنهي
ودق : على كل لحظه كرهتك بيها
حامد : بويه بيج شى صاير شى
ودق : لا والله بس اني جنت ظالمتك وانت احسن عم بالدنيا ولتزعل مني
حامد : انتي بنيتي وماكو ابو يزعل من بنيته
ودق : تمنيتك ابويه صدوك ياريتك تزوجت ماما قبل ومخليتها تتزوج اخوك
حامد : گلشي مكتوب بويه الْحٍمَدٍ للـّہ بس گليلي شذكرج بهذا گله
ودق : اني اعرف بسالفه الفلوس والايجار الي تنطيهم لبيت خالو
حامد : بويه ودق اياج تسولفين لأمج مااريدنها تكدر
ودق : وليش هيج تسوي شنو ذنبك كل شهر تدفع ٧٥٠ من جيبك
حامد : انه وامج واحد وانتي بنيتي ومااريدن احد يصير صاحب فضل عليج حتى لو اهل امج اريدنج دوم مرفوع راسج والفضل گله لله ولشطارتج
ودق : والك هم عمو الله يحفظك النا
حامد : يله بويه اروحن للوادم تنشد علي واريدنچ ذيبه تنجحين وترفعين راسنا واول سن تعالجي هنه سنوني
ودق : ههههههه تدلل
حامد : مودع بالله
ودق : إٱللـِْﷻـِْﮭﮧ وياك دمعت عيني لان جنت ظالمته بس هاي الحياه منكدر نتعلم منها اذا متجوينا

بعد اسبوع من الدوام جنت كاعده اضحك اني ونور واجه طارق من بعيد كالمعتاد كاشخ على اخر حبه والعيون عليه
ودق : بس لو افهم شون تدخل بدون ميحاسبوك تروح وتجي شنو تايهه
طارق : هله بمرتي خوش استقبال تستقبليني وره منزلت من الالتحاق گلت راح تاخذني بالاحضان من الشوووق
ودق : هلووو احضان وانت متجوز لتكول مرتي
طارق : مرتي وغصب عنج وام جهالي هم يله
ودق : ههههههه مبين هلمره الواجب مأثر
نور : وداعتج اول منزل سلم علينا وكلي اكويلي ملابسي باجر رايح اشوف مرتي
وامي سمعته جان تكول يمه تزوجت ولطمت على صدرها هههههههه
ودق : ياالله شكد عيب وتالي
نور : تالي كلها عليج وكلتله مو مقبلو ذيج المره جان يكول لا مو هلمره البنيه قبلت عيني وطارت ماما من الفرح
ودق : والله انتم بكيفكم منو كال اقبل
طارق : متقبلين ابوكج والله
ودق : هههههههه هسه كولي شون تدخل هيج بكيفك
طارق : غير مدير الامن صديقي وحاطه بجيبي ولعيونج حتى العميد احطه بجيبي ورئيس الجامعه هم بس إشري
ودق : هههههه والله تسويها واني اضحك ومااسمع غير صوت مازن ورايه يصيح ودق وبعصبيه وكفت على حيلي متت خوف هذا شجابه

يتبع

لاتنسون تصويتكم الحلووو وشكراً لتعليقاتكم الراقيه مثلكم
انتظروني الاربعاء واحداث مشوقه من سجينة الروح
احـٍُــبٌــ💘ـٍَــْگُم