رواية سجينة الروح الفصل الخامس 5 - بقلم ريام هادي

سجينة الروح
للكاتبة Reem
البارت الخامس

انة معوز فــــرح دليني وين الگاك
صار سنين ساكت ماضحك سني
الشفايف من رحت عزلن باب الصوت
تــعـــال اليوم بلكت تكدر تغني
اليسألوني عليك احجيلهم سكتات
جــوابك بيش لمن تنسأل عني
... احط بيدي الصور واحجيلهن ماصار
كبالي دموع يبجن شوفهن ذني
جرح حبك جبير ودوخ الشمات
يظل صافن علي كلمن سمع وني
اگدرلة وسهل جرح الشماتة يهون
بس جــــــروح هجرانك يـــأذني

يمامه : تفاجأت بضربة جميله ردت اكولها شون تمدين ايدج عليه ودارجف بس موقف ودق وكفني شفتها تريد تهد على بيبيتها
ودق : انتي شون تضربين ماما بأي حق
يمامه : لزمتها من ايدها مالج علاقه اسكتي
ودق : شنو مالي علاقه بأي حق تمد ايدها هي منو وتضربج
يمامه : اسكتي وروحي اخذي اختج وطبي جوه ولازمتها حيل من ايدها بس اتركها يمكن اتكطع بيبيتها

ودق : مااطب على اي اساس تضربج شايفه نفسها هي منو

الحجية جميله: چا خوش  ماضلت عليه غير فصمه التمره وتريد تهد عليه هاي الجانت عايزه ولچ انه زلم مشوربه تقدرني وتحسبلي الف حساب تجين انتي البكد مداسي تتعدين عليه

ودق : احترمي نفسج حتى الواحد يحترمج انتي مره ورجلج بالكبر ومتخافين الله مكافي متعبتي

احلام مرت حامد : چا خوش خل يجي الشيخ ويشوف بت اخوه شون عاف بنياته يتربن بيد الغربه وصارن يكرهن جدتهن ولسانها شطوله طايحت الحظ گضي لسانج لايجي الشيخ ويكصه الچ

ودق : وانتي شدخلج مكافي اربعه وعشرين ساعه تحجين على امي شنو هاي القابليه
احد حجه وياج
الحجية جميله: ولج أسگتي تره اجي اكسر ظهرج  طايحه الحظ  عديمه الربى
ودق :مو تايهه الج وتمدين ايدج

ومااحس غير ماما تضربني
يمامه : شفت بنتي اتجاوزت حدودها اني بحياتي مماده ايدي عليها بس محبيت عصبيتها تحجي وصوتها عالي وتتجاوز
ودق : جفلت وبقت واكفه ارجف اول مره ماما تمد ايدها
يمامه : صوتج مااسمعه واعتذري لبيبيتج
ودق : مااعتذرلها لو اموت
يمامه : ودق لتخليني أذيج كافي عيب كولي العفو
الحجية جميله: عوفيها ليه اليوم اخلي الولد يربونها هاي الماعدها تربيه
يمامه : ودق اعتذري يله
ودق : شفت امي ترجف واعصاب بس انقهرت  شون تضربني كدام ميساء الساحره واحلام مرت حامد وجنه بتها حيل انقهرت من ماما شون اتمد ايدها عليه اني جنت ادافع الها لان ضربتها ولو عايفتني وملازمتني جان ضربتها بالعوجيه مالتها
سحبت ايه من ايدها وطبيت وحتى معتذرت لو اموت

يمامه : بهاي الاثناء بدا يعلى صوت الحجيه وتعيط حيل گلبت الدنيا واجه مازن وحامد وحسان يركضون
الحجية جميله: اليوم احرگ شيب الخلفچ ولج انه هيج تحجين وياي انه جميله الكل تحسبلها حساب انه امك ياحامد تعال ليه
حامد : خير يمه شنهي حسج واصل ليغاد شصاير

الحجية جميله:تعال ليه يمه تعال شوف بنيات عادل
حامد : شبيهن
الحجية جميله: الجبيره تهد على امك وتريد تطكهه
حامد : شنهي
يمامه : عمه كولي الحق ماانكر بنتي مغلطت بس من شافت امها انضربت
الحجية جميله: طبچ حريشي واكسر راسج ماشبعتي اخذتي بنياتنا ليغاد يم  الغربه وهنه حديثات ماخفتي عليهن بس انتي عبالچ كل الوادم مثلج على حل شعرها وتريدين البنيات يديحن مثلج

يمامه : عيب عمه شنو هذا الحجي شفتيني تره مااقبلها ولان انتي مره جبيره تره ساكته على اهاناتج
حامد : بسچ ام ودق اسكتي
يمامه : شسكت مكاعد تسمع امك يعني لو ادري هيج يصير لو اموت مااجي هنا لو على كص رگبتي
الحجية جميله: چا هي بكيفج تهي بهي تجين وتجيبيهن ورجلج فوك راسج احمدي ربج بعدهن يمج لاجان خليتج تحلمين تكضيهنن (تلزميهن)
حامد : كافي يمه
الحجية جميله: چا اسكت امك
حامد : يمه بسچ كافي
يمامه : هذا الي إٱللـِْﷻـِْﮭﮧ قدرك عليه انضرب اول مااوصل وانهان وانت تكولها كافي 
حامد : شنهي
الحجية جميله: يا من صخام الصخمج چا شتريدين اخذج امحاضن والله ماخذه بنياتنا ليم الغربه لازم اكطعج تكطع واخليج تصيحين التوبه مااسويها بعد
يمامه : انداريت على حامد
شوف شيخ اني دخلت واول مسلمت ضربتي راشدي الحجيه
حامد : انداريت على الحجيه صدگ يمه
يمامه : تره مدااكذب
الحجية جميله: واكسر راسج وماتفجين حلكچ
يمامه : ليش وعلى اي اساس مالكم حكم عليه
حامد : ام ودق فوتي هسه لدارچ وبعدين نحجي

يمامه : يعني انهان وانضرب وانت تكولي ادخلي ماادخل وراح اخذ البنات واطلع
الحجية جميله: چا هي لعبه وبكيفج انتي مره وطلعي اله احش رجولج حش

يمامه : دااحجي واعيط وجميله تعيط جان نسمع حامد عاط بقوه
سكتو بسكم مااسمع حس بيكم
الحجية جميله: چا تسكت امك ياحميد
حامد : يمه واليرحم والديج اسكتي
وانتي وام ودق روحي لدارچ
يمامه : مااروح
شون تمد ايدها عليه
احلام : چا ماتحاسبين بنيتج شون هدت على جدتها
يمامه : رجاءاً لتدخلين
احلام : چا شون ماادخل وانه اشوف عمتي يحجون عليها وبكد بزر بطني تهد عليها چا موزين ماكضيت بتج وحرگتها
يمامه : دلزمي شعره من بنتي اله احرك البيت كله

حامد : (بصوت عالي) اكلج  فوتي الدراچ

يمامه : باوعت عليه واني ميته منه لو بيدي اكطعه وعفتهم والنار تاكل بگلبي ودخلت للغرفه
شفت ايه حاضنه اختها وتبجي ودق هم تبجي
ماما خطيه ودق ليش ضربتيها
يمامه : حتى تبطل تدخل بشى ميخصها موعيب تفشلني خلت المتسوه تحجي عليه وعلى تربيتي لبناتي ليش هيج هاي تاليها
ودق : ابجي واحجي والله ماما انقهرت لان ضربتج

يمامه : مالج علاقه عسى لو تحرگني نسوان كبار وبيناتنا شنو طفله وتدخلين بنصنا
ودق : ليش جبتينا هنا موتعرفين بيه اكرهم من اول يوم رجعنا صارت مشكله مااطيقهم رجعينا لبيتنا لو نروح يم بيت جدو
يمامه : اخذتها بحضني شوفي بنتي الي سويتيه غلط ميصير تتجاوزين على الاكبر منج

ودق : بس هي ضربتج وتجاوزت
يمامه : اني اعرف اخذ حقي تدرين بسبب تصرفج خليتي الحق الهم مو الي مكان ماادافع عن حقي واخذها من عين بيبيتج اضطريت مااشد وياهم حتى لتتأذين لو مركز عمج حامد بموضوع تجاوزج على الحجيه الله اعلم شيسوي بيج ميصير يابنتي يعني وصلتيلهم فكرت معرفت اربي

ودق : اكرهم مااحبهم اموت منهم ماما فدوه اذا تحبينا امشي نروح منا فدوه
يمامه : حضنتها وبستها حبيبتي فتره ونرجع لتخافين بس اوعديني مالج علاقه بجدتج ولا بأي احد بالبيت واي شى تشوفي اسكتي ولتتجاوزين
ودق : مااتحمل بس يحجون عليج
يمامه : بنتي الله ياخذ حقي من كل واحد يحجي شى موزين بحقي لهذا مااريد انطي لزمه عليه مااريد يلكون حچه وياخذوكم مني
اريد الكل يكولون ربت يمامه والنعم ماربت
ودق : حضنت امي وبستها اسفه ماما احاول ماادخل
أيه : صدوك ماما ماكو اكل شو جعت
يمامه : احنا وين وايوته حاير بالاكل صدوك اختكم همسه وين

حسان : خويه انه اروحن وانته حل الطلابه كواك الله
حامد : يكويك خويه الله وياك وانداريت عليهن

: شنهي الي حصل سولفيلي
الحجية جميله:چا شسولف وامك يحميد يسبون بيها
احلام : عمه عوفيني عليهن واني اكطعن الج وحك علي اسويهن وصل
حامد : احلام وحگ علي الي حلفتي بيه اذا سمعت حسك لا الوصل انتي تصيرين
احلا : شيخ چا اشوف عمتي يحجن عليها واسگت
حامد : تسكتين ومالج غرض
احلام : شيخ مايصير ذني حيايه اذا مانكطع روسهن يكرصنا

حامد : كضيتهه (لزمتها) من ايدها حيل اسمعيني زين اذا تكربتي من وحده منهن راسج انه اكصه وبيدي
احلام : ااخ دخيلك يبن عمي ايدي راح تنكسر  
حامد : موبس ايدچ اكسرها حتى راسچ ديري بالج تحطين راسج ابراسهن
احلام : شنهي چا ريشه فوك راسهن
حامد : وتالي وياج انتي ماتوبين
ااااخ دخيلك شيخ مو انكسرت ايدي
الحجية جميله: هدها ياحامد فوك ماتحاميلي البت وانت لاوي ايدهه

حامد : حچايتي مااعيدنها اذا تكربتي يمهن ماتلومين نفسج
احلام : تأمر شيخ بس هدني (عوفني)
هديت ايدها ودفعتها طبي دارچ لا بارك إٱللـِْﷻـِْﮭﮧ بيج واخذي بتج وياچ
الحجية جميله: چا هيج صارت شيخ تطبك  وياهن عليه وعلى مريتك
حامد : يمه شلون اتمدين ايدج على البت
الحجية جميله: چا زين وماحرگتها

حامد : على يا اساس يمه تحركيها البت مو من حگنا نحاسبها النحكها بيه بس البنيات هيه غلطانه من خذتهن وشردت الكركوك بس من خابرتها جابتهن واجت مارضيت بسوايتج
الحجية جميله: گله منك  ومن عمايلك وشرطك چا هسه يمنه وكاسرين خشمها
حامد : السويتيه حجيه غلط ومامقبول منج
الحجية جميله: چا تركبني الغلط من وره هاي ام وجه البوم

حامد : تهدي يمه وعلى كيفچ ويه نفسج انه ماارضه بالظلم والسويتيه يمه الظلم بعينه
الحجية جميله: اسگت لا اغضب عليك ومااحاجيك ابد

حامد : چا فوكاها انه مااكسر چلمتج وانتي على راسي بس بالظلم لهنا وكافي ياحجيه ماكدر اسگت واكولن امين
الحجية جميله: چا گلي روحي حبي على راسها واكلها حبيبه حگج عليه مو تريد  هيج
حامد : الأريده اتعوفين  البت خلي تعدي هلجم يوم على خير ويصير خير
واني احجايها واتعذر منها

الحجية جميله:چاخوش روح انته حب على راسها وتوسل بيها مثل الجاهل
حامد : يمه وليرحم والديج اسكتي لاتخليني ازعل منج
الحجية جميله: هاي وجه الططوه ذبت فلك بعدها اول يوم وخلت الشيخ وياها ويغضب امه
حامد : چا فوكاها فوك ماطاكه المره يمه بعد مااعيد الحجي بسچ (كافي) من المره ومو كل مره اكدر اسكت ومااطي بيج سويتيها بله ملح
الحجية جميله: وديني لابو هاشم
(العباس عليه السلام)
حامد : سلام الله عليه خير 
الحجية جميله: اروحن ادعي عليها كون الله ياخذها وافتك منها ومن طركاعتها
حامد : هههههههه خليها لبنياتها لاادعين يمه
الحجية جميله: وانت شمالك شبيك رجفت هااا شيخ چا هيج
حامد : انه اروحن يمه ورحمه لأخوتي فكج منها

الحجية جميله: اگلك يمه لاترحلها عوفها هيج اريدن تبقى مكدره (مغثوثه)
حامد : لا اله الا الله وعفتها ومشيت وشوف تطلع يمامه تركض
يمامه : فدوه ابو جنه بنتي همسه ماكو
حامد : انه اخوك شنهي ماكو
يمامه : عبالي ويه خواتها وهسه ملكيتها بالغرفه
حامد : طبي جوه وانه رايح ادور عليها
يمامه : مااعوفك اجي وياك
حامد : چا شنهي تجين وياي ضلي هنا وانه اجيبها واجي
يمامه : كتلك اجي وياك بنتي ضايعه
حامد : اكلج ضلي هنا كافي تعاندين تريديني اخذج وافتر بيج بين الوادم
چا خوش هاي العايزه
يمامه : ومنشوف غير مازن يطب شايل همسه
مازن : هاي الحلوه الكم
يمامه : بنتي ولج وين جنتي ردت اموت قلق عليج

همسه : ماما جنت اركض بالحديقة والعب وره الفلاشات (الفراشات)
أيه : هاا ماما لكيتيها
يمامه : اي اخذيها وادخلي
مازن : عمه محتاجين شى
يمامه : لا تسلم
ايه : اي اني اريد
يمامه : أيه اسكتي
حامد : بعد عمج تامرين عوفيها ام ودق
أيه : اريد اريد
حامد : احجي مالج دخل بأمج
أيه : اريد موطا ام الجيس ازبري
حامد : ههههه چا انه گلت تريد اذبحلها عجل حتى تاكل وانتي تريدين موطا
يمامه : ولج ايه خزيتينا
حامد : لا ياام ودق لاتحجين هيج وياها هاي حبيبة عمها تامرني اجيبلها الدكان كله (المحل)
مازن : تدللين وبعد شتريدين
أيه : كولشي كدامك جيبه
يمامه : ولج صخمان اني الج
أيه : حباب مازن مو تتأخر
مازن : هههههه لا مااتأخر
يمامه : ادخلي جوه يله واخذي همسه وياج
أيه : انتظرك مازن اهم الشى الازبري
مازن : هههههه تدللين بسرعه اجي
ادخلي لخواتج
أيه : حاظر ماما
حامد : ام ودق صيحي ودق
يمامه : ليش
حامد : خل تجي تحب على راس جدتها
يمامه : اني ضربتها وبعد متعيدها
حامد :  اكلج صيحيلها
يمامه : دخلت للغرفه تعالي ماما يريدج عمج
ودق : شيريد
يمامه : كومي بنتي بوسي راس بيبيتج واعتذري منها
ودق : وكفت على حيلي شنو لو اموت ليش ماما هيج تذليني شون تقبليها اعتذر الها وهي اصلاً الي تجاوزت
يمامه : دااكولج هاي الشغلات متخصج كم مره اعيد الحجي ليش تأذيني ليش تخلين الكل يحجي عليه وينتقد تربيتي الكم
ودق : يعني اعتذاري هو الي راح يريحج شون تقبلين اعتذر وهي حتى معتذرتلج
يمامه : يابنتي ارحميني تره البيه كافي الله شاهد نار وتاكل بيه لتزيدين النار كلها ايام ونولي (نروح) بس فضيها وروحي اعتذري
ودق : ماشي رايحه

طلعت من الغرفه وجان يصير عمي حامد ومازن بوجهي
حامد : شوفي ودق السويتيه بجدتج وحسج العالي عليها مامقبول ولوما جيتج اليوم وصار سنين ماجايه جا كفيلج العباس (ع) اكص لسانج كله ولا الحجيه هاي جبيره البيت وغصبن  عنج تحترميها
ودق : بس عمو هي ضربت ماما
حامد : ماعسى تذبحها ما أتدخلين شى مايخصج تحترمين الجبير وماتدخلين امج عدها السان وترد وتعرف تاخذ حگها انتي ماتدخلين ترحين هسه تحبين على راسها وماتعيدينها

يمامه : اباوع على ودق صارت طماطه ونار وتلوب ومعاجبها حجي عمها
ودق : اعتذر الها بس ابوسها لا
حامد : ( بعيطه قويه ) ولج لاتخليني اتعامل وياج بغير طريقة گلت صغيره وشافت امها انطكت وانهضمت عليها بس مال تكسرين چلمتي اكسر راسج بعدج هلكدادتج (صغيره) وحسج عالي وتعاندين وماتحترمين من تكبرين شسوين
يمامه : ودق ماما شحجيت اني

ودق : نزلت راسي بتذمر وضوجه حاظر ماما
يمامه : يله بنتي كدامي امشي اعتذري لبيبيتج
حامد : سمعي عدل يابت عادل هاي المره صارت وراح اعديها بله عقاب مره ثانيه لو صارت وكدام امج احجيها ماتلومين اله نفسج وانسى انتي ياهيه
وبت منو
احترمي تره أأذيج وماتعرفين حامد من يأذي شون

يمامه : متعيدها شيخ
حامد : اسمعها منها حسج وين احجي
ودق : مااعيدها
يله جدامي روحي حبي على راس جدتج
يمامه : اخذت ودق من ايدها وصلت يم الحجيه كاعده والسبحه بأيد والعوجيه بالايد الثانيه
ودق : العفو بيبي بعد مااعيدها ودفعتني ماما عليها بست راسها
الحجية جميله: چا سويها بعد اكسر العوجيه على راسج
يمامه : ركضت ودق وطلعت بره وكوه لازمه روحها لتبجي
من رخصتكم

حامد : ام ودق تعاي عدي چلمه وياج
الحجية جميله: چا ماتحجي هنا جدامي
حامد : تعاي وراي ام ودق
الحجية جميله: يصير خير ياشيخ
يمامه : باوعت عليها هاي المره راح تجلطني ومشيت وره الشيخ

تفضل شيخ
اخذتها للدوانيه (غرفة الضيوف) اكعدي
شوفي يابت الناس انه اعرف امي غلطت بحكج /حگج عليه
يمامه : وليش مو هيه الي تعتذر ليش انت
حامد : اعتبريها هي العتذرت لو انه موبعينج
يمامه : لا العفو بس انت متجاوزت وهي الي ضربتني
حامد : مره جبيره اعتبريها امج وضربتج
يمامه : ماما متمد ايدها عليه والحجيه اصلاً متحبني من زمان ومااعرف السبب وشكد حاولت افهمها مكدرت
حامد : ياام ودق الاريدنه منج تتحملينها واي شى يصير لاتجادليها تعاي الي وانه اخذلج حكج
يمامه : مثل هسه جاي انت تعتذر مو هيه اريد هسه حقي اخذه اليه لو اعرف بيك مدبرها وجان يوكف على حيله والنار تطلع من عيونه يريد يكطعني ويحجي ويرجف
حامد : انه اعرف شتقصدين قصدج انه موكد جلمتي ومااكدر اوكف بوجه امي

يمامه : لا قصدي
حامد : حسج مااهيسه انه راح ارد على كلامج انه مو اخاف انه احترم واكو فرق مهما جرى تبقى امي واحترامها واجب وامي بت شيخ وزوجه شيخ وام الشيوخ صح هي صعبه بس تبقى امي والمابي خير باهله وبأمه مابيه خير لأحد وانه من اجيت اعتذرلج بمچانها ماحسيت انه بالذل والاهانه انه ردت اطيب خاطرج جي اعرف امي ماتعتذر وماردت خاطرج يبقى مكدر بس جني غلطت  والمفروض ماادخل واسمع چلمه امي لان انه ماعندي چلمه وجاهل وامشي وره امي

يمامه : العفو مو قصدي هيج بس
حامد : چا شنهي قصدج هلمره راح اعتبره كلام منچ مامكيول المره الثانيه واتكربت منها (تقربت عليها ) راح أذيج يايمامه
يمامه : باوعت بوجهه واني مرتبكه من اوكف كباله مرات احس بالخوف
حامد : تكدرين ترحين لدارچ خلصت حجيي وياج
يمامه : من رخصتك
حامد : كعدت وحاط ايدي على راسي شون طلابه هاي وشراح يخلصها

ودق : طلعت اركض بره والدموع بعيني احس روحي مخنوكه كعدت على المصطبه الي احبها بالحديقة ردت ابجي بدون وجود احد وبقت حاطه ايدي على وجهي وابجي
مازن : تره مصار شى هو اعتذار شبيج تريدين تموتين من البجي
ودق : انداريت واشوف مازن الغثيث شكد اكرهه ومسحت دموعي بأيدي
انت شتريد روح منا شعندك واكف يمي
مازن : احد كلج هاي حديقتج
ودق : بهاي صح موحديقتي بس اريد ابقى وحدي ممكن

مازن : شصار تبجين ومنهاره تكول كصو راسج تره انتي العايله (الغلطانه) وزين من ابويه حامد سكتلج انه كلت راح يكسر ظهرج
ودق : بيبيتك تكسر ظهرك وعمك يكسر شنو تايهه الكم ياهو اليجي يريد يكسرلي ظهري
مازن : انتي ليش حسج عالي وماتحترمين
ودق : وانت ليش اصلاً واكف يمي روح مني ومراح تسمع صوتي ودرت وجهي منه
مازن : تعالي گليلي ليش شعرج طالع حطي شيله على شعرج يله كومي

ودق : انداريت عليه شنو احط شيله وانت منو وتحكمني والله ياالله عمك يكول لماما حطي شيله وانت هسه تكولي انتم شايفين نفسكم

مازن : مع الاسف ماعندي حكم عليج واله جان شوفتج احنا منو ابويه حامد واكف بعيني ومااكدر اكسرله كلمه والا جان الي تصرف ثاني وياج
ودق : من ساعه الي اجينا بيها وياهو الي يجي يهدد ويتحلف
مازن : انتي عليمن طالعه هيج وكحه
ودق : على بيبيتك
مازن : شنو عيدي شگلتي
ودق : ماكلت شي ادخل جوه احسن
مازن : ادخلي وحطي شيله بعد ماكو طلعه بدونها
ودق : هزيت بأيدي ودخلت

مازن : احب اعرفكم بنفسي اني مازن فاضل راضي الحفيد الجبير لعائله الحجي راضي مواليد ١٩٨٣ ابن فاضل الابن الثاني للعائله الي مات وهو ماله اي ذنب كل ذنبه اخوه الصغير ابو نسوان ولعب بعرض العالم اني بحكم اول ولد الهم جنت قريب من كل الاحداث الي تصير عمي حامد كلش احبه واصيحله يابه لان هو جبيرنا وهو يعتبرني ابنه ورغم ماابويه موجود بس جنت احس حامد هو ابويه وين ميروح ياخذني وياه وبعد احداث عمي ومقتل ابويه كرهت الدنيا حسيت ظلم ابويه يموت بذنب اخوه وحتى بناته كرهتهم جنت صغير وحاقد وتمنيت أذي كل واحد حرمني من ابويه وطشر عائلتي والي زاد الطين بله امي عافتنا وراحت ردتها تتمسك بينا مثل مرت عمي وتكتل روحها ومتعوفنا بس هي راحت وعافتنا وره سنه تزوجت

ظلمت الدنيا بعيني بس ابويه حامد افتهم وضعي وكدر يخليني اتحمل كل الي صار  وبديت اتعلم من عمي كولشي لحد مخلصت الثالث متوسط وعمي دزني لبغداد اكمل تعليمي اني ومنير رغم جدتي شكدحاولت تمنعه اله هو اصر نتعلم هناك وناخذ شهايدنا جانت دوم تكول شحصل عويدل (عادل) من بغداد غير البومه وطلايبها بس هو بقى على موقفه ودزنه بيت عم ابويه اسمه علي هناك بغداد بمنطقه بغداد الجديده جان خوش انسان وماعدهم بنات بس ولد اثنين حيدر وجعفر  وامهم خاله اسراء كاعدين ايجار بيت ١٠٠ متر كام عمي اجرلهم بيت اكبر ٢٠٠ متر وهو يدفع الايجار كل شهر ويدز مصرف الهم كله في سبيل نبقى يمهم لان يخاف علينا بعدنا صغار ميكدر يعوفنا وحدنا جنا نرجع للعماره بأيام العطل وتعلمت اللهجه البغداديه وقليل احجي عمارجي بس من اكون بالمضيف ويه عمي ومنير اخويه زين مكضيها دفعات كوه ينجح بس المهم ميرسب ينجح بالدفرات ويكمز هنا وهنا

جان ابويه حامد دوم يكولي اياك بيوم تحب بغداديه عشكهن نار لاتكرب اله (لاتتقرب) وانه اسمع واكوله تآمر

وركزت على دروسي وسنه بعدسنه لخاطر ابويه حامد انجح وبتفوق لحد موصلت سادس ماانسى تعبه وروحته وجيته لبغداد كله علمود نجاحي ومدرسين خصوصين ذب كومه فلوس علمودي والحمدلله تعبي وتعبه مراح وكدرت انجح ودخلت كليه طب اسنان الجامعه المستنصريه ردت اصير دكتور طب عام حتى اساعد الفقره وافتح عياده بالعماره بس المعدل والانسيابيه  قبلت طب اسنان وصرت الدكتور مازن حالياً مرحله ثانيه  شكلي تغير صرت شاب وشكلي مرتب طويل على عمامي طولي ١٨٥ سم وجسمي وسط لا ضعيف ولا سمين معاني رجوليه اسمر البشره عيوني جوزي فاتح شكلي حالي حال الشباب حلو ومرتب

اني بحياتي جدي بالتعامل قليل الضحك احب الاستقامه بكولشي حتى اصدقائي قليلين همه اثنين حيدر ابن عمي علي الي عايش يمهم والثاني ويايه بالكليه زيدون طبعي عمارجي مأصل مااقبل بالغلط ولااسويه ويه الكل حدود عندي مااقبل احد يكسرهم وعصبي الحجايه المتعجبني اردها ب١٠ اكثرهم يصيحولي المعقد المتزمت وحتى المغرور بس انه موهيج انه احب الي يسمع كلامي ومايكسره ويكولي تم مااحب اللسان الطويل والجدال عقليتي بعد وطبعي ومااغيره تربيه حامد

شفت بنت عمي عادل الجبيره ودق رغم صغر عمرها لسانها متبري منها ابد مااحب اسلوبها ولو عندي سلطه عليها اله اكسر راسها واخليها تجر عدل بس عمي يكول صغيره ويتيمه ولازم نتحملها چا نتحمل اللسان الزفر والاسلوب الطايح حظه حسها عالي وتحجي بنتره واحنا بنياتنا ميكدرن يرفعن عيونهن بعيونه وهاي صغيره كل عمرها ١٢ سنه ولسانها اطول منها جان دوم يكول عمي عوفها الها خيالها ويجي يوم والخيال يروضها مااعرف شيقصد بس اكيد اكو حسبه (شغله) براس ابويه ومنتظر اشوف شيصير

يمامه : مرت الايام والكل هدوء رجعت حبست نفسي بالغرفه واتذكر الايام التعبانه الي عشتها يمهم حاولت مااختلط بأحد بس فضيله وكريمه وخاصه فضيله رجعت تعيش بيت اهلها بعد وفاة زوجها وجنت اكعد وياها يومياً ساعه او ساعتين نسولف جانت طيبه حيل وتحبني اما العجيز ولا اوصل يمها مابيه حيلها وحامد مشفته من يوم العركه

صار شهر ونص واحنا هنا وبيوم اختنكت محبوسه بهلسجن كلت اطلع اتمشى شويه عفت البنات نايمات ولبست ربطه وعبايه اسلاميه وكلت اشوف الصبح هنا شلونه جانت ساعه ٦ الصبح والجو يجنن بيه نسمه بروده وريحه الزرع ترد الروح طلعت اتمشى واباوع على الجو اوف الهوا وصافنه ورافعه راسي اباوع العصافير وتغريداتهم والهوا يلعب بالوجه كمت اجر نفس قوي اريد احس مثل الطيور بالحريه بعد متقيدت بكولشي حتى لبسي كمت امشي ومنطلقه وماحسيت غير واكفه گبال نهر بنهايه البستان واشوف حامد گبالي جفلت

حامد : هاي ياهي هنا
يمامه : اني شيخ ام ودق
حامد : شطلعج من صباح الله شسوين هنا
يمامه : اختنكت وحبيت اتمشى واغير جو صار شهر ونص واني حابسه روحي بالغرفه

تقرب عليه وهو يصك سنونه وعيونه الي دوم محيرتني عفيه رجال شافني وشفته اعصاب شوكت اشوفه يضحك ماادري
حامد : چا احد گلج هنا الكورنيش وتتمشين على گيفج انه مو كايل ماكو طلعه وحدجن واذا تردن شى تنشدن (تصيحون)  واحد من الولد

يمامه : ابو جنه اني مردت شى ردت بس اغير جو يعني مكفرت تره
حامد : بس احنا هنا ماعدنا نسوان تفتر وحدها وفوكاها من الصبح جا صحتي واحد من الولد يتمشى وراج
يمامه : هاي شنو قابل محتاجه حراسه الكاع كاعكم وماكو احد مكعد تشوف احنا وحدنا
حامد : چا اله يصيرون حواليج الزلم يله تكولين موجودين اهنا كاعنا متروسه فلح وناس تروح وتجي لا تطلعين بعد
يمامه : حتى هاي هم حرام وممنوع
حامد : كتلج لا تطلعين اله احد وياج
يمامه : ضجت وكلت خلي ارجع لعبها لروحي واني دااندار وزلكت رجلي اويلي الله حسيتها اتكطعت شاغت روحي وكعت
حامد : اسم الله بيج شى يمامه

يمامه : دموع بعيني هم من الفشله لان وكعت كدامه وهم من الالم ردت اكوم وجان اعيط مااكدر حسيت رجلي مكسوره وحجيت وصوتي مبحوح وبيه غصه بجي
ااي مااكدر اكوم رجلي عفيه
حامد : چا هسه احسن الج ماتاخذين الكلام شطلعج بهلساعه الكشره عفيه مره شكد عنوديه
يمامه : عطت عليه هسه اني بيا حال وهذا يحاسبني على الطلعه
هسه وكتها دااكولك رجلي توجعني يمكن انكسرت
حامد : اصبري بس اصيحن البنات يشيلنج (يساعدوها)

يمامه : وين عايفني وحدي وبهذا حالي
كاعده بالكاع وكلي طين ورجلي تملخني
حامد : چا من عرفتي اطلعين وحدج ماكلتي خاف يصير بيه شى وهسه بس اريدن اصيحن النسوان تحجين شون تعوفني وحدي
يمامه : الله مطولج ياروح زين بس ساعدني اكوم واني امشي
حامد : مااكدر
يمامه : هنا الثول اشتغل عندي الرجال ميكدر يلزمني لان محرمه عليه ولازم يلزمني من جسمي ويكومني وهمه بابه عرب وماعدهم هيج شى لازم الي يلمسها اله تكون زوجته حلاله اني الثوله نسيت
ليش ومديت ايدي بس كومني كولشي مااريد منك

حامد : لا اله اله الله شگل الها هاي يابت الناس مااكدر اطخج (المسج)
يمامه : بس كومني مرايده شى منك
حامد : انتي محرمه عليه شلون اطخ جسمج
يمامه : يبوو ياكاع انشكي وبلعيني من الفشله دنجت مستحيه وكتله العفو
حامد : چا هسه شون دليني
يمامه : روح صيح البنات
حامد : مشيت شويه  ورجعت شون اعوفنها وحدها والفلح (الفلاحين )تفتر  اخافن يشوفها واحد ويتحارش بيها وهي مبينه غريبه مو من بنياتنا رجعت ليها ماكدرت اتركها لوحدها
يمامه : هاااا شو رجعت
حامد : مااكدر اعوفج لوحيدج
يمامه : الطم شون هسه لاتكدر تكومني ولاتكدر تعوفني وتروح معناها راح نضل لليل بهذا الوضع

حامد : خلي اتاني احد يمر وودي  لدارنا
يمامه : وبقينا بالربع ساعه نريد طير ماكو تكول تبخروا وماشوف غير حامد يمد العبايه مالته
حامد : كضيها ( لزميها)
يمامه : وبعدين
حامد : چا غير اريد اكومج كضيها زين

يمامه : لزمت عبايته حيل وهو سحبني بهدوء وبقوه وردت وكعت اااااخ
حامد : بيج شى واحس جسمي يرجف
يمامه : رجلي مدااتحمل وكمت ابجي
حامد : لاتبجين يابت الناس مااكدر اكومج طركاعه وطاحت على راسي لو كاعد بفصل وصاير الدم للرچاب (للركبه) هم  اسهل عليه من شوفتج هيج ومااكدر اساعدنج
يمامه : ابتسمت والدموع بعيني التشبيه يضحك يعني عندك الفصل اسهل ناس ميته ومتصخمه وتكول اسهل واني بس واكعه بالطين صعب عليك تكومني
حامد : خذيت تنهيده هزت صدري الله يعلم بحالي

يمامه : صفنت عليه ودااحجي وسمعنا صوت ابراهيم
حامد : ولك ابراهيم تعال ليه
اجه يركض ومرعوب آمر شيخ
حامد : اركض صيح امك وكريمه وجيبهن يساعدن مرت خالك طاحت وماتكدر تكوم
آمر شيخ
وركض ابراهيم واجتي كريمه وفضيله وخطيه كوموني وهاي الفطيره فضيله بس تضحك واني اتوجع
خيه شكلج اشحلاته وانتي مطينه كون اتشوفج امي اله تهلهل
يمامه : هههههههه خلف الله عليج ادري بيها تموت عليه
فضيله : گلش هذا شكلج (منضرج) يردها ١٠ سنين ليوره ترجع ابنيه

يمامه : ههههههههه لعد ولا اشوفها شكلي حتى تبقى عجوز
حامد : حسج عالي لاتضحكين
يمامه : (بگلبي احجي )اهووو حجه حتى الضحكه بحساب وصلنا للبيت ورجلي توجعني اخذوني البنات خطيه غسلولي وبدلو ملابسي وجابو مضمده عدهم هناك تفتهم وفحصتني كالت تمزق وشدتها اليه وحطت مواد عجيبه غريبه تطحن وتحط حارت شسوت بالبدايه حركتني رجلي وكمت اكمز ابجي
حامد : ولج فضيله فضيله
فضيلة : آمر خويه

حامد : شجرالها ام ودق ليش تصارخ وتبجي
فضيلة : مابيها شى الدوى شويه وجعها وهي بت بغداد ماتحمل مثلنا
حامد : على كيفها وياها لايصير برجلها شى
الحجية جميله: شنهي هذا الصوت شمالكم
فضيلة : ماكو شى يمه يمامه وكعت وام عباس يمها اداويها
الحجية جميله: ماانكسر راسها
فضيلة : يمه شويه رجلها للمره مابيها شى
الحجية جميله: گليلي من ينكسر راسها حتى اوزعن خبز العباس مو حاطه نذر ولازم اووفي

حامد : حجيه واليرحم والديج فكچ من المره صار شهر ونص سامعين حسها
الحجية جميله: حجه محامي الدفاع سكتت اروحن اصلي صلاة الشكر بلجن الطيحه الجايه اوزعن خبز العباس
حامد : استغفر الله
روحي فضيله وانتبهي عليها ولاتركيها
فضيلة : لا خويه مااتركها يمها

يمامه : بقيت ايام اتوجع وخطيه فضيله حارت بالبنات اكلهن ولبسهن جانت حيل حنونه وياهن وصارت رجلي احسن وكدرت ادوس عليها
ودق : ماما شوكت نرجع موكافي حتى الامتحانات راحت عليه
يمامه : يابنتي مواتفقنا هاي السنه ماكو علمود الظروف
ودق : بس سمعت يصير امتحن الدور الثاني كله الدروس فدوه ماما لتخلين السنه تروح عليه فدوه
يمامه : لازم اسأل عمج يقبل لو لا
ودق : اهووو هم عمي هو شعليه
يمامه : بنتي غير احنا يمهم شون نروح والاوضاع بعدها تعبانه
ودق : المهم اريد امتحن كوليله فدووه
يمامه : لبست دشداشه عريضه وحجاب وطلعت امشي على كيف وجان تصير بوجهي احلام
احلام : چا واخيراً بينتي
يمامه : شونج ام جنه
احلام : بخير بس كون مااشوفن ناس اكرها
يمامه : من رخصتج مشيت وعفتها
وجان اسمعها تكول لبنتها جنه
شوكت الله يخلصنا من هلشكول ونفتك منهم حيايه ويفترن بالبيت
يمامه : ( بداخلي احجي ) والله ماكو غيرج الحيه واهز براسي من الضوجه

دكيت الباب لكيت حمود وحامد كاعدين بالصاله
وكفوا من شافوني ممكن احجي وياك شيخ
حامد : تفضلي ام ودق اكعدي
وكعدت اكوله على الدوام والمدرسه
حامد : بس الوضع موزين وانه اخافن على البنيات
يمامه : بس يمتحنون ونرجع مااريد السنه تروح عليهن اترجاك
حامد : خليني اشوف مازن يكدر يروح وياكم ويبقى يمكم لحد ماتكملون الامتحانات وتردون
يمامه : ياريت

حامد : بس تردين هنا ماتبقين الوضع بعده موزين
يمامه : اي ارجع ماابقى بس خلي البنات يكملون امتحانات
حمود : والله ياام ودق روحتج مالها داعي
يمامه : شسوي خطيه هذا مستقبلهم ومااريد السنه تروح عليهن
حامد :چا سلامتهن اهم لو شهادتهن
يمامه : صح سلامتهم اهم بس لازم يدرسون وهي بس الامتحانات يكملوها ونرجع
حامد : الله كريم يصير خير

وفعلاً مازن وافق يجي ويانه للبيت هي كم يوم البنات يمتحنون ونرجع
حضرنا غراضنا وجان اسعد وحده هي ودق طايره بس تريد ترجع

وطلعت والجنط بيدي جان يسلمون البنات عليه والحجيه ولا طلعت لان جانت مقابله على روحتنا وتعاركت ويه حامد وتوقعت يسمع كلامها مثل كل مره بس فاجأني بأن وافق على روحتنا لهذا مطلعت اصلاً ولا سلمت واني هم مدخلت عليها مردت تصير عركه وتلغي الروحه اعرف هي ادور الزله عليه كلي حامد بصوت خشن وبصيغه امر
حامد : امانتج البنيات عينج عليهن
يمامه : اكيد غير بناتي وقطعه من روحي
حامد : وانتبهي على نفسج الوضع موزين وشتحتاجين مازن يمج انخي ومايقصر

يمامه : شكراً شيخ ماقصرت
وطلعنا والطريق كله ايدي على گلبي لان نسمع بالاخبار الوضع موزين
وصلنا لبغداد وشفت الشوارع كلها سيام ومقطعه والامريكان يفترون وتفتيش جان الوضع تعبان وخوف وترقب بلحظه تندمت رجعت مهما كان الوضع هناك اقلها مأمنه بناتي بنص عمامهم ومحد يكدر يتقرب منهن ودخلنا قريب منطقتنا وجان توكفنا سيطره مال امريكان
اني من خوفي حضنت بناتي وجان يحجي مازن وياهم بالانكليزي وطلبو هويته وانطاهم اله ومانحس غير يسحبون السلاح عليه وينزلوه بقوه وكعدوه بالكاع وقطعوا الطريق وهو يعيط عليهم بالانكليزي وهمه گلبو الدنيا وضربوه براسه
وعاطوا البنات من الخوف والمنظر وجان تنفتح البيبان علينا وجهوا السلاح على البنات أيه من الخوف اغمى عليها
يتبع ....