رواية سجينة الروح الفصل الرابع 4 - بقلم ريام هادي

سجينة الروح
للكاتبه Reem
البارت الرابع

ترس روحي الضباب وبينت وياك
كلي بروحك امشي وجرحي ما شفته
انه بالنسمة أعثر وانت قيس الحال
مو جدمي وراك خيالي ما شلته
وأجي بواهس عذر وحروفي مني تطيح
واتبده اعلى وجهك مستحى وسكته
وأنخل غير وجهك واليطيح تراب
وانكتهم واهزهم بس تظل انته
رمح فركاك إجاني مسابك ويا الريح
ماقصرت تسلم بالنفس جبته
بس المحترك يفهم حجي الدخان
ويعرف حرورته ويفهم سبب علته
مثل عاشك بغربة ومره وكت غروب
يفرفح من يمر طاري الهوا يموته

يمامه : بقيت مصدومه بشرط حامد ومنطاني مجال حتى افكر او احسبها صح الموقف كله يطير العقل من الراس وقررت اوافق
ماشي موافقه بس اني هم عندي شرط
حامد : شنهي شرطج
الحجية جميله: چا شنهي مابگت بس تتآمر علينا
حامد : حجيه من رخصتج
تحچي شنهي شرطج
يمامه : انت موتكول حديثات واذا سون شى ارجع الكم واني افهمت شتقصد بس اذا عبرن ١٨ سنه وبلغن السن القانوني يسقط شرطك وبناتي واني حرات بحياتنا بذاك الوقت اي سلطه الكم علينا ماكو وشرطك يسقط
حامد : بذاك الوكت ياام ودق سويتي العليچ وماكصرتي ويسقط الشرط
يمامه : هذا هو انتهى الموضوع

والكل كام وطلعت وقريب ميطلعون صاحني نصار اخويه وكال شيخ حامد يريدج غطيت راسي وطبيت اعرف العده انتهت من جبت بس اخاف اطلع وجهي ويحجون مابيه حيلهم لكيت الكل طالع بس حامد بالصاله منتظريه بره دخلت جان يأشرلي اكعدي كبالي

أسمعيني السوايه السويتيهه مامرجيه منج وراح احاول انساه طلعتج من بيتنا بنصاص الليالي وبياتج ٣ ليال بمجان الحد هسه مانعرفه وبهذلتج لبنياتنا
يمامه : انتم جبرتوني هيج اسوي
حامد : خليني اكمل كلامي وسدي حلكج حسج مااهيسه
وفوك عملتج تجين وطبين بنص الزلم وتريدين تحركين روحج وكسرتي چلمتي كدام العالم الكاعده كل السويتيه لو مسويته وحده غيرج اله ااكسر راسها ودقيقه مااخليها عايشه وتتنفس الهوى مو انه التكسر چلمتي مره بس راح اعديها يايمامه بس وحگ علي ابنابي طالب اذا سويتيلج مكسوره لو طلعت عليج او على بنياتج چلمه وحده لااراويج العمرج ماشفتي من حامد لا تمتحنين صبري
يمامه : رفعت البوشيه عني وباوعت عليه بحقد انت ليش هيج تكرهني اني شمسويتلك

حامد : انه لو اكرهنج جا هسه انتي محروكه لو مكصوص راسج بيدي على سوايتج انه احذرج اديري بالج تكسرين ابحجيي  مره ثانيه واكعدي واسكتي بيتج شغل ماكو مصرفج ومصرف بناتج كل شهر اودي الجن بيد الولد
يمامه : مااريد اي شى منكم بس ابتعدو عني
حامد : هايه مو مني هاي فلوس عادل حك نصيبه بكاع ابوه شكثر يطلع منها اودي الجن
يمامه : انتم مو اخذتو ورثه ومقبلتو تنطوه اله
حامد : وكفت على حيلي ياورث انه عمري مااكل ورث واحد 
يمامه : سكتت خفت احجي وتعلك من جديد وياهذ البنات ويطلع واخرب كولشي شيخ مااريد افتح اي شى فدوه
حامد : تكربت عليها وعاينت بعيونها اسمعي هاي الچلمه ديري بالج  تغلطين ماارحمنج وحك نار گلبي
يمامه : صفنت عليه شنو قصده عيونه اخاف منهم كلهم تهديد وبنفس الوقت حايرات انت شتريد هسه
حامد : كل شهر تصرفين على بناتنا من فلوس ابوهن وديري بالج عليهن وشتريدون ودي  خبر ثاني يوم يمكم
يمامه : شكراً
حامد : عاينت عليها ومشيت
واول ماصعدت بالسياره
الحجية جميله: هاي المرجيه منك شيخ تسكتني وتمشي چلمه البومه انه جميله تنكسر چلمتي وتمشي چلمه المعجعجه (الخبيثه)
حامد : ماعاش اليكسر چلمتج يمه بس رادت تحرك روحها ونتحمل ذنبها برگبتنا
الحجية جميله: عساها  ان شاء الله  واكثر  لجن  انه اعرفنك ياشيخ ومامرجيه من عدك ومن السويته جان فكري  تاخذ البنيات من عيونها تالي تطيها البنيات وتلعب  أبكيفها
حسان : عمه السواه حامد عين العكل وتبقى امهم رحمه لروح عمي على كيفج وي روحج
الحجية جميله: انت صك حلكك وانت ياحامد غضبانه عليك وماارضى عليك اله ترجع بنيات المرحوم لحضني
حامد : يردن يمه يردن وامهن تجيبهن بيديها

حسان : شيخنا واليرحم والديك انزل هنانه
حامد : ها خويه چاليش ماتجي ويايه للمضيف
حسان : خلص ويه الحجيه كافي عليك طركاعتك يعينك الله وبليل امرلك
حامد : ههههههه تخاف منها
حسان : چا هو منهو المايخاف من جميله
الحجية جميله: جميله بعينك ابن سليمه شنهي هاز كاروكي
حسان : ههههههه حجيه انتي الخير والبركه ولاتذبين نارج بيه هذا وليدج حميد والشغلها گلها يمه
حامد : انزل خويه والهرب نص المرجله
حسان : ههههههه وي جميله الهزيمه كلها مرجله
الحجية جميله: كوم انزل لابارك الله بيك ولا بمك
حسان : ارضاهه منج شيختنا هي اختچ مو غريبه

حامد : ههههههه والله ياحسان انزل انزل
وصلنا للبيت واول مادخلنا عاطت
هاي تاليها شيخنا هاي يابن بطني
حامد : يمه سدي السالفه ولاتفتحينهه بعد
الحجية جميله: چا تريدني اسكت على سوايتك وكسرتك النه

حامد : كتلچ يمه يردن لاتلحين
الحجية جميله: وچلمتنا لنكسرت وهاي الطركاعه الي لفت علينا واخذت البنيات تاليها هاي الي ماتسوه الي لابسته برجولي تكعد ويمشي رايها
حامد : يمه البت لو عايفها چان حركت روحها
الحجية جميله: وحركتهم بكاز وصخ

يمه سكتي صارت السالفه ومشت وحجيتلج يردن وروح ابوي يردن

اطيني كلمه يردون
حامد : يردن داكلج فديوم گتلج چلمه مصارت ياام حميد

جميله : راح اصدكك واتاني
يمامه : بس طلعو وكعت من طولي من التعب والبجي وحركان الاعصاب وبيومها نمت بالفراش وطولت بالاربع ايام نايمه من التعب بعدها كدرت ارجع اوكف على حيلي وصارت صحتي احسن مرت الايام وبدا وضعي يستقر
وكدرت اوكف على رجلي واخويه خطيه نصار رجع نقل ودق والله تبهذلت سوده عليه بس  الْحٍمَدٍ للـّہ من خلصت الشغله
ومرت الايام واجه اول شهر بعد الكعده واندكت الباب وجان يصيحوني
ام يمامه : تعالي بنتي ذوله ناس من طرف عم بناتج
لبست عبايتي الاسلاميه وحطيت شال على راسي اني ممحجبه بس شسوي من يجي احد من طرفهم البسه امري لله
ونزلت لكيت ابن عمهم حسان وابراهيم
السلام عليكم
حسان : هله خويه ام ودق
يمامه : شونك حسان ان شاء الله بخير
حسان : نحمده ونشكره
وانت ابراهيم تعال عمه اشتاقيتلك
ابراهيم : هله عمه شون كيفج
الحمدلله ها عيونك وين ادور
ابراهيم : بطه وين
هههههه صارت اسمها بطه صدوك من الاكل بطه روح جوه ودق وايه
ابراهيم : سويلي درب عمه
ههههههه لك ادخل ماعدنا احد بس بنات خالك
حسان : هاچ خويه
شنو هاي
الشهريه مال البنيات دزها الشيخ
اني موكتله مااريدهم
حسان :  احاجيج خويه هذا العناد كفي عنه وراسج لااطخ براس شيخ حامد واسلم الج ولبنياتج
يمامه : بس اني ممحتاجه فلوس منه ولا من اي احد
حسان : اخذيهن حركيهن انطيهن بس لا تردين ايد الشيخ تره تصير السالفه جبيره ولاتحجين جدام اي احد عليه وتردين ايده

يمامه : اخذت الفلوس منه صدوك مابيه حيل مشاكل خلي اخذهم قابل من جيبه مكافي ماخذ حق بناتي ورث عادل واني ابويه كوه هو وامي موفرين عيشتهم وبناتي ٣ واني يرادلنه كومه مصاريف خلي اخذهم واعيش بناتي حتى مااصير حمل ثقيل على اهلي
وبديت اعدل بيتي وارجع بيه هو اصلاً بيني وبين اهلي ٣ بيوت كولش قريب ويوم بابا يبات يمي ويوم ماما ومرات نصار وعلى هذا الحال كامت تمشي الايام بينا وكل شهر تجينا الشهريه بوقتها وجان المبلغ كلش زين كافي وزايد اصلاً جنت اضم منه للزمن اكول كولشي يصير هاي دنيا واني  الْحٍمَدٍ للـّہ المشتمل ملك ويه العامل الي يجيب وارد المحل مال عادل لان كعد والدي ولد بيه يشتغل ليش نسده وينطينا هلقاسمه الله ويه الشهريه عيشتي صارت ممتازه
صار سنه واني مشايفه بس حسان وابراهيم ومره وحده منير اجه ويه حسان ومرات فضيله ادز شغلات للبنات بيد ابراهيم اما الباقين ماسمعت الهم صوت ولا اريد اسمع

اليوم اول يوم لأيوته بالمدرسه سجلتها ومكيفه تروح للمدسه (المدرسه ) نص احرفها مال النطق غلط وهاي ودق بس تعيب عليها كعدت الصبح وبدلت لودق
اووو ماما مااريد هاي التسريحه شعري يكوم يأذيني

لعد شتريديني افتح شعرج واحطلج طاك واكولج يله يروحي تكول رايحه حفله
ودق : اله صفيره والله مااحبها ماما والله
يمامه : لتعاندين شلعتي گلبي
أيه : ماما يله جعت اليد الوح للمدسه حتى اكل (اريد اروح للمدرسه )
ودق : شكد تاكلين لخاطر الله مو هستوج تريكتي
أيه : اي بس اجوع وماما ثوتلي (سوتلي) لفه تيبه(طيبه)  وبيها عسل
ودق : ام بطن بعد كم يوم يصير كرشج اكبر من كرش ابوعباس ابو اللبلبي
أيه : انتي گلشج مثل عمو ابو البلبلي (اللبلبي) ومسل خثمه (ومثل خشمه )

يمامه : كافي يمعودات من الصبح تتعاركون وانتي ست ودق فضيها يله مويوميه الصبح تسويلج شغله ويه اختج بعدها صغيره ومتعرف انتبهي عليها زين وكل شويه روحيلها للصف وشوفيها
ودق : اهووو احد كلج الحارس مالتها اني ياماما
يمامه : اسمعي الكلام
أيه : طلعت لساني حيل ماما لزلتج (رزلتج)
ونزلت البنات بيدي واستقبلهم بابا جان بايت يمي  وانطاهم فلوس حلاوه اول يوم دوام ولبست بنطرون وقميص طويل وشايله شعري بس بعدني لابسه اسود بس حجاب ماكو وكل وحده من البنات بأيد طلعت من الباب وجان تطبك سياره بصفي رفعت راسي واشوف حامد گبالي
هذا شجابه

حامد : بعد ليله رجعتي  من بغداد وقنعت الحجيه وسكتتها رحت وحدي اتمشى والليله كمره وكعدت على الشط وصافن وماشوفن ال حسان وراي
حسان : عرفت راح تجي اهنانه ماعدك بكان من تتضايك تروحله ها خويه ردينا على التعب والقهر والتفكير  
حامد : موش بيدي ياحسان
حسان : وتالي وي لجمة كلبك خويه وتالي أشون عفت البنيات الها بله ماصار من كل التريده وماردن البنيات ولا امهن أشون بحالك شيصبرك
حامد : اليصبر هاي السنين مايصبر چم سنه ياخويه

حسان : والله هنيال  صبرك وطولت خلكك
حامد : چا هيه بيدي لو هذا (وأشر على الگلب) هذا لوعدي حگم عليه جا طكيته چيله (طلقه) ورتاحيت منه
حسان : انت متأكد  ترد
حامد : الي عدها بنيه مثل ودق ترد وعن گريب
حسان :  وليش ودق

حامد : ودق نسخه مني ومن امها ماخذه طباعنا تعاند  وگويه  والمثلها لابد تكسر الچلمه وتعاند وناطرها تكسرها ودق هي الراح تردهن لديرتنا وكول كال حامد
حسان : الله يساعد  گلبك ياخويه
حامد : يعينه الله لاتخاف يعينه

مرت الليالي واني اودي كل شهر مصروفهم ودايمآ  اسأل عليهم وعرفت سجلت الزغيره بالمدرسه كلت اروحن اول يوم واوديهه للمدرسه لان بت اخوي ويتيمه وعرف بغداد بهيج يوم يودونهن وي ابوهن لو أمهن وماردت الزغيره تحس بفرق وطلعت من غبشه وصلت البغداد واني اريدن ادكن الباب  ومااشوف اله تطلع يمامه وبله ربطه(حجاب) والشعر طالع نار وشبت بيه ولابسه بنطرون ياعيبت العيبه

شنهي ولج أشلابسه شنهاي الملابس
يمامه : بالاول يكولون صباح الخير وبالثاني يكولون شنو سبب الزياره من الصبح وبعدين يله تسأل الي تريد تسأله واجاوبك

حامد : صبحج الله بالخير
يمامه : صباح النور خير صاير شى شو من الصبح هنا
حامد : نزلت من السياره وشلت ايه وحبيتهه
عمي اليوم انه اوديج للمدرسه شتكولين راضيه لولا
يمامه : ميحتاج المدرسه خطوتين واني اوديها وانت جاي من العماره لهنا بس حتى تودي ايه للمدرسه
حامد : هاي بت اخوي واول يوم الها وتره انه لاتنسين جنت بغداد وعرف كلشي عنها وعرف هذا اليوم مهم  لكل طالب وردت اكون بمچان عادل الله يرحمه
يمامه : ميحتاج اني موجوده
حامد : تعالي عمو ودق اسلم عليج
ودق : يله ماما تأخرنا
يمامه : سلمي على عمج ماما
ودق : ماااا
يمامه : ودق سلمي ( صرت عصبيه عليها )
ودق : ماااا
حامد : عوفيها وعاينت عليها ضلي ب يويه هيج انه اريدنج هيج
يمامه : شنو قصدك
حامد : يجي يوم وتعرفين شنهي قصدي يله اخذكم أويايه
يمامه : صعدت ليوره مااريد اكعد يمه وايه بصفه مكيفه ودق يمي متباوع بوجهه عمها وتموت منه
وصلنا البنات للمدرسه وشفت شون ايه حضنت عمها رغم تخاف منه بس تحبه بعدها صغيره متعرف اله ودق كميه الحقد الي شايلته على عمها عجيب رغم صغيره
وحتى مسلمت عليه
ومن دنرجع استحيت اكعد ليوره كعدت ليكدام انتبهت على حامد لابس بنطرون وقميص موو دشداشه وعكال والطريق كله ساكتين بس هو نفسه عالي عبالك واحد ويريد ينفجر وصلنا لبيت اهلي كتله تفضل شو هذا طفه السياره ونزل ودخل عبالي يروح
وكعد بالصاله وجان يكول
تعاي اكعدي عدي وياج چلمه وروحن
يمامه : بس اصيح اهلي
حامد : اركدي هسه واسمعيني
يمامه : خير
حامد : هايه اخير مره احجي بيها لو طلعتي بدون ماحاطه ربطه على راسج وحك العباس اكصن شعرج
يمامه : وكفت على حيلي شنوو وانت منو وتحكمني هيج نسيت نفسك انت متقربلي ولا ولي امري لتشوفني ساكته واستقويت عليه
حامد : العدي كلته ومااحجي مرتين حطي ربطه واركدي تره وصلت حدها وياج
يمامه : مالك حق يااخي تدخل بيه اني حره نفسي وممسويه شى غلط اني اصلاً مو محجبه واذا لبسته ذيج الفتره احترام للحزن مالتي ولو اصلاً المفروض مااحزن بس عيب من العالم والناس بس مال تجبرني اغطي راسي مالك حق
وجان يتقرب مني حيل بعد شويه ويطخ بيه بحيث اشتم عطره وجان يكولي بصوت ناصي وبحزم
حامد : يمامه امشي وياي عدل ولاتخليني اكصنه الج حذرتج وخلص
وعافني وطلع والله مخبل موو عاقل

واني بقيت افكر بكلامه كلت خلي اجفي الشر واحطها هيج كلاوات من اطلع اخاف بيوم يصير بوجهي وشيخلصني

اني ودق عادل راضي بنت حالي حال الالاف من البنات الي تشوف اهلها وتتعلم منهم جنت صغيره واني اشوف امي تتعذب من اهل ابويه ومااعرف السبب ليش وعلى شنو رغم صغر سني بس كان ذكائي يفوق عقلي

جنت اشوف بابا يحبها لماما وحياتنه هادئه وبيوم انكلب كولشي وادمر من اخذنا بابا لمحافظه ثانيه وكل الاحداث اجتي بعدها وفاته على بهذلت امي على التفرقه الي جنت اشوفها من بيبيتي جميله جانت انسانه قاسيه والكل يخاف منها حتى اني بس اني اعاندها مااحبها لان دوم اسمعها تحجي على امي واموت قهر

جنت اكعد باب المطبخ واسمع نسوان عمي يحجن عليها واشكال الكلام الي افهمه والي من كبرت فهمته بس الي جنت اتعجب منه عمه احلام زوجة عمو حامد جانت تتمنى تموتها لأمي ودوم تكوم وتكعد ادعي عليها وتسبها وتغلط رغم ماما حابسه روحها بالغرفه ومتطلع حقدت عليها وعلى بنتها جنه الحقيره وحده غيوره تموت مني كولشي بهدا البيت كرهته بس ماانسى يوم منهزمنا منهم واشوف ماما ينزل منها دم وتعيط وجابت اختي همسه كرهتهم حيل لان لوما همه مجان صار كل هذا امي رادت تموت وهمه السبب وحتى رادت تحرك روحها حتى لياخذونا شون بعد احب عمي واسلم عليه
كبرت قبل عمري وشفت اشكال المصايب واسمع من كل واحد شى لحد موصلت على قناعه ذوله اعدائي مو اهلي وماما واهلها همه اهلي
يمامه : مرت السنين وهسه احنا ٢٠٠٣ والوضع تعبان وعلى ساعه الامريكان يدخلون عمر ودق هسه  ١٢ سنه بالسادس ابتدائي طويله على اهل ابوها حنطيه البشره اني اعشق الشعر الطويل لهذا بناتي كلهن اهتم بشعرهن وشعري وياهن ودق شعرها تمري سرح مي وطويل لحد نهايه ظهرها صح شالعه گلبي يوميه الصبح من امشط الها بس شسوي مينطيني گلبي اكصه الها
رشيقه وبينت معاني الانوثه عدها مبكره وبلغت مبكر وهي بالسادس ابتدائي اما الحلووه ايوته صار عمرها ١٠ سنوات حبيبتي بيضه مدبدبه من الاكل روحها بالاكل شكره وعيونها عسلي وشعرها اشقر طويل بس كيرلي (ملفلف موو سرح ) بس ناعم وهم طويل جانت طفله هادئه وشطوره وكل همها الاكل والنوم وعود وراها تدرس نوعاً ما مريحه
اما همسه عمرها صار ٥ سنوات طبق الاصل مني بيضه والعيون خضر والشعر جوزي سرح بس دبدوبه مثل ايوته وتركض بين الرجلين وابويه روحه بيها وحتى تصيحله بابا

حجي سلمان : بنتي الوضع صار موزين لازم نطلع من بغداد
يمامه : وين نروح يابابا واني برگبتي ٣ بنات
سلمان : انتي كعد تشوفين منطقتنا صارت كولش خطره والوضع ميطمن خلي نروح لكركوك لبيت عمتي واخويه راح ياخذ ولده وعوائلهم
يمامه : خوش والله هذا الجوك كله وتريد نروح وياهم خليني هنا معززه مكرمه بيتي احسن الي ولبناتي
نصار : اني مااكدر ابقى هنا هم اخاف على جهالي وزوجتي
يمامه : روح حبيبي اخذ عائلتك وروح اني مااطلع
ام يمامه : شنو هذا العناد يابنتي ميصير كلنالج الوضع موزين ويكولون الامريكان دخلو وشمدرينا شراح يسون بينا

يمامه : كتلكم مااطلع باقيه بيتي وساكته
ودق : ماما عفيه خلي نروح وياهم والله كل صديقاتي طلعو كالو الامريكان الي يبقى يذبحو

يمامه : ماكو هيج شى ماما لتخافين
بقيت اعاند والوضع صار اسوأ ونصار اخذ عائلته وطفر وخطيه بابا وماما اضطروا يبقون من ورايه لحد ما صارت الحواسم والخوف سيطر على الشارع والكل كالو راح يكسرون بيوت الناس ويبكونا واحتمال حتى يذبحونا انتشرت اشكال الاخبار الكاذبه واشكال الاقاويل منعرف الصح من الغلط بس بقى الخوف سيد الموقف

لحد مابيوم اجه بابا وكال منبقى لان الامريكان يفترون بالشوارع ويدخلون على البيوت وياخذون البنات ويعتدون عليهن اني تخبلت يمه كله ولا بناتي وكتله يله نروح وره نصار لكركوك وحضرت غراضي وغراض البنات ومن الصبح طلعنا والطريق طويل متنا تعب كوه وصلنا وصدوك مثل متوقعت بيت كرايب بابا صايره لحم ناس فوك ناس والوضع يلعب النفس بله اني شجابني وهاي مرت خالد تريد تشرب من دمي تكول بايكه رجلها وهو يفتر ورايه كل شويه محتاجه شى ام ودق رايده شى ام ودق كرهني بإسم بنتي واكوله سلامتك مااريد شكراً ولا يفيد يومين تكول جحيم

ثالث يوم دك التلفون الارضي جانت التلفونات بعدهن يشتغلن وجان تصيحني مرت عم بابا
تعاي بنتي هذا التلفون عليج
وبس صحت الوو
حامد : عندج ٢٤ ساعه واشوفج جدامي
يمامه : شيخ حامد
حامد : انتي شون تاخذين البنيات وترحين
يمامه : انت مكعد تشوف الوضع شونه بغداد
حامد : ترديهن النه احنا نحميهن

يمامه : المن اجيكم للعماره لو اموت
حامد : عندج ٢٤ ساعه واشوفنچ كبالي انتي والبنيات ولا حك علي اجيكم واخذ البنيات منج وماتشوفيهن لو تموتين
يمامه : انت كل شويه مهددني والله موتتني وتعال كولي شمدريك احنا بكركوك ومنين جبت الرقم
حامد : لا عبالج انتي بغداد وانه بالعماره مااعرفن شى عنچ لا غلطانه النفس الي تاخذي احسبنه عليج
يمامه : والمطلوب هسه
حامد : تردين للعماره وراح ادزن حسان يجيج انتي والبنيات واي خطار وياج هله بيه بس ليله ماتضلين هناك
يمامه : الوضع طايح حظه بيت اقارب بابا وخالد ومضايقاته وخوفي على بناتي خلاني اوافق وكتله بشرط
حامد : چا فوكاها تتشرطين
يمامه : بس يهدأ الوضع ارجع لبيتي
حامد : حضري نفسج من الصباحيات جاييج
وسد التلفون بوجهي وكمت اعيط بابا
سلمان : ها بنتي اسم الله شبيج
انت منطي العنوان والرقم هذا لأحد
اي لجيرانه بيت ام محمد
يمامه : ليش يابابا ليش
كلت خاف يصير شى على بيوتنا وهمه خطيه مطلعوا وصيتهم اذا صار شى يخابرونا
تدري من وره سوايتك حامد جاي ياخذني اني والبنات باجر الصبح كال ليله بعد متبقين
خالد : هو بكيفه
يمامه : رجاءاً لتدخل
خالد : لتنسين اني ابن عمج
يمامه : وهذا الشى ميخصك دااحجي ويه بابا مو وياك
عمي اني رايد يمامه منك
يمامه : شنوو
خالد : اي اريدج على سنه الله ورسوله
وبعدني مفاتحه حلكي دارزله وجان اسمع عيطه زوجته
يبوووو تتزوج عليه هاي تاليتها اليوم احرك البيت عليك
وانتي ضبي نفسج ام الزلم لتشوفين نفسج بليه رجال وجايه تفترين على رجلي
يمامه : عيب عليج شنو هذا الحجي
انتي شايفه بعد اليوم اله اكطعج واعلمج شون تغوين رجلي
وجان يلزمها خالد قبل متجيت عليه وبقى يضرب بيها وهي ترد الضربه وتعيط
وناس تمالخت ويه ناس وتريد تضربني اني شعليه اني عاد عطت بيها
هو رجلج طايح حظه وعينه زايغه اني شنو واصلاً لو يموت مااتزوجه اني متزوجه بناتي وذني سندي بالدنيا ورجلج خلي الج اشبعي بيه عفتهم واخذت بناتي وطبيت للغرفه حضرت غراضي وغراضهن واشول ودق تاكل بأضافيرها

شبيج ماما
ودق : مااريد ارجع هناك
يمامه : كم يوم حبيبتي ونرجع لبيتنا
ودق : اخاف يحبسونا هناك
يمامه : لا حبيبتي ميحبسونا لتخافين
ودق : ماما حبابه خلي نبقى هنا
يمامه : بنتي لتعاندين وكومي حضري غراض خواتج ويايه
وللصبح تتكلب ودق ومنايمه شكد حاولت اطمنها وميفيد
ومن ساعه ٧ الصبح اندكت الباب فتحوها طلع حسان ومازن
سلمت عليهم وصعدت ودق عيونها تجدح تريد تعيط حتى سلام مسلمت
الطريق طويل وهاي ايوته كل ساعه موكفتنا لو جوعانه لو عطشانه لو محصوره موتتنا اما ودق طعم الاكل مضاكته بس المي شكد حاولت وياها ابد ومازن يباوع عليها وعاط بيها وهي ولا يمها

بعد ساعات من التعب والقلق النفسي والطريق الخطر وصلت للعماره طبعاً بابا يمشي ويوصي حسان علينا مكدروا يجون لان الطريق متعب وهمه كبار بالعمر ميتحملون
وصلنا ودخلت للعماره ورجعت ذاكرتي لقبل كم سنه من طلعت مهزومه واتختل
دمعت عيني ودخلنا للسجن الي عشت بيه ايام تعيسه
وصلنا
حسان : ياهله بديرتنا نورت دشي (دخلي) البيت بيتج خويه
دخلت وجان تصير الحجيه جميله بوجهي صار كم سنه مشايفتها
هلا عمه ومااشوف غير توكف على حيلها وتجي ليمي وعيونها نار وشرار وصلت صارت كبالي وهي ضخمه وجان  تصلخني راشدي فر وجهي فر تكول ضربة رجال مو مره متت بدمي دااعيط داكولها ليش تضربيني وماشوف غير ودق اتجيت على بيبيتها وتريد تضربها 
يتبع ...