رواية سجينة الروح الفصل الرابع وأربعون 44 - بقلم ريام هادي

سجينة الروح
للكاتبة Reem
الجزء الثاني من البارت الاخير

اريد اكتب شعر واتغزل باسمك
لان اسمك جميل وجاي من رسمك
اذا مو الك اكتب المن لعد اختار
صدكني الكلب مشتاك يكتبلك
احتار القلم لمن جبت طاريك
يكلي الورق يخجل لو كتب اسمك
صفن بيدي القلم وصرت اني احاجيه
ويكلي بصراحة شراح اكتبلك
ضحكاتك غزل يا كامل الاوصاف
واشفافك عسل والورد من عطرك
وعيوني من تشوفك تبقى تحلم بيك
تحجيلك شعر والرمش يعزفلك
مو كافي وصف يل بيك حلو أطباع
بس شوصف بعد لو رايد اوصفلك
فداك العمر وحتى الكلب و الروح
ولك كلي فداك .... اتريد احلفلك

صار اكثر من ١٠ ايام وياه وبديت اتعلم على الشغل وايدي اخذت بسرعه وحتى جنت من ارجع من العياده الزم الملازم العملي وكتب ًواكعد اقرا حتى افتهم واتعلم اسرع
كاعدين نشتغل اني وياه دك تلفونه وكف على حيله
شفت وجهه انخطف لونه شبيك مازن
مازن : جنه صار عدها نزيف ونقلوها للمستشفى حالتها خطره
طلعنا ركض اني ومازن والطريق كله گتلنا الخوف من وصلنا لكينا ماما واحلام وعمو واكفين
مازن : خير بشروني
حامد : البت وكعت وتأذت وحالتها خطره ربك الستار انه گتلها لاتحبلين اااخ منها
احلام : يمه بنيتي راحت مني
يمامه : لتفاولين عليها عفيه تره كولشي مابيها بس ادعيلها
ودق : الله يستر ان شاء الله مابيها شى
مرت ساعه والقلق والخوف سيطر على الكل حتى مازن يرجف وطلعت الدكتوره
الْحٍمَدٍ للـّہ على سلامتها منو زوجها
مازن : اني
حامد : وانه ابوها شبيهه بتي
الدكتور : المريضه تعبانه ومريضه بلقلب شون تخلوها تحبل
مازن : والله ماخذين احتياط بس هي سوتها من ورايه ومن عرفت حامد اخاف الله مااكدر انزله
الدكتوره : هي واكعه وصار عدها نزيف واسقاط ونريد نسويلها كورتاج بس بلسونار طلع اكو طفل ثاني طلع جانت حامل بتوم واحد الله مكتبله يعيش والثاني بعده هسه انطيناها ابر مثبته وعلاجات وحاولو طول فتره الحمل متتحرك وتحت الرعايه والمراقبه والله يكتبلها السلامه
حامد : يعني بتي بخير
بخير شيخ بس انتبهوا على صحتها
مازن : الْحٍمَدٍ للـّہ
احلام : بعيوني احطنها بس تكوم ليه
ودق : بيومها رد الدم بوجوه الكل بعد الرعب الي عشناه وخفنا نخسرها بس الْحٍمَدٍ للـّہ الله لطف بينا ورجعها
مرت الايام وجنه تحت رعايه الكل حتى مازن كام يراقب حالتها وميقهرها ومرات اني اروح يمها اداري ابنها الكل تعاون على وضعها وهيه الفطيره بس تضحك تكول لو ادري هيج اداروني الا احبل من زمان

اني رجعت لكليتي جان يوم صعب بس الي هون عليه هي نور
نور مثلي تركت السنه لان حال امها بذاك الوقت جان حيل صعب لهذا بقت يمها اداريها ورجعنا هاي السنه اني وياها نكمل الي تركناه بس بدون نفس كل لحظه كل مكان حتى الهوا الي بلكليه يذكرنا بطارق وسوالفه وكعداته وضحكته البسمه نسيناها بس نقرا ونمتحن ونطلع حتى صوره التخرج محضرناها اصلاً مو دفعتنا لان ذولاك تخرجو ولا حفلات تخرج اي حفله تصير اني وياها بذاك اليوم منداوم مرت السنه مرور الكرام وتخرجت بس قبل ماارجع بيوم طلبت من نور اروح وياها لبيت طارق ردت اشوف امه وابوه واشم ريحته الي مفاركت مخدتي جنت كل مااغير الفرش ارش من عطره على المخده ومن تخلص الشيشه اروح اشتري نفس العطر حتى ميفاركني
دخلت وخطيه امه تحضني وتبوس بيه بكل لهفه وتكول روح طارق اجتي من اشوفج اشوفه وحتى ابوه خطيه حضني
بقيت شويه يمهم وصعدت لغرفتي اااااه ياغرفتي الي مالحكت اتهنى بيج
دخلت بعدها على حطتها رغم طلعت السنه بس نور تكول امي تنظفها وتعطرها وعافتها على حطتها
دخلت فتحت الكنتور ملابسه بيها اتلمس هدومه واشمهم لو تعرف حالي بعدك شونه
تمددت على الجربايه وغمضت احسه يمي احسه بأنفاسه يمكن محد يصدكني بس ليش احس بأنفاسه يمي ليش اشم عطره كمت ابجي حييل طارق اشتاقيتلك والله ميته بدونك والله
نور : كافي ودق شوفي حالج
ودق : ياحال بعده ليش اني الي حال وعيشه بدونه
نور : امر الله فدوه لتبجين امي تعبانه وابويه هم وسمعوا عيطتج ودك بجي اخاف يتخربطون انزلي هديهم فدوه همه كولش يحبوج
ودق : نازله بست صورته الي معلكه وطلعت نزلت على امه وابوه هدأتهم
ام طارق : يمه عيشي حياتج انتي بعدج صغيره
ودق : حياتي لطارق خاله وهو اخذها وراح
ابو طارق : ميصير بنتي هاي سنه الحياه
ودق : ماكو شى ميصير اني اتزوجت ابنكم وباقيه على ذكراه
ام طارق : بس انتي بعدج صغيره وحلوه ودكتوره والف من يتمناج
ودق : واني تمنيت واحد وراح خاله ومراح الكه مثله لتهتمون بس اذا تحبوني انتم من ريحته انتبهو على صحتكم ولتأذوني وتأذون طارق واتعبونه تره ميقبل يشوفكم هيج لخاطري ولخاطره انتبهو لصحتكم
ام طارق : تعالي زورينا عود يمه مو تنسينا
ودق : انتم اهلي واهل زوجي ومستحيل انساكم مثل مااني من ريحته انتم هم من ريحته اجيكم كل ماانزل لبغداد اجيكم بستهم وطلعت

ودعت بغداد بكل الحلو والمر بيها وعدت نفسي كل ماانزل لبيت جدي امر على اهل طارق عدا التلفونات الي منقطعت وياهم ويه نور بلذات
احنا هسه سنه ٢٠١٦ مرت ايامنا عاديه بس الجديد بيها جنه ولدت وجابت بنوته تخبل وسمتها رقيه وبيومها عمو حلفها بعد متحبل لان طلعت من الموت باأعجوبه ومرت ايامنا واني بديت افكر افتح عياده وامارس مهنتي بيها

بعد كم يوم زواج ايوته حددو العرس جنت حيل فرحانه بس مستغربه شو هاي لا راحت سوك ولا تفتر على البدلات اني بوقتها اسبوع كامل وكعت رجلي لحد ملكيت بدلتي شوهاي كاعده وساكته كاعده الصبح وافكر خلي اكوم افتهم منها بس اكمل الجاي البيدي طبت جنه
جنه : صباح الخير خيه
ودق : هلوو جنوو صباح النور
جنه : عروستنا وين
ودق : بلمطبخ ادخليلها
كمت خلي اشوفهن وجان اسمعها تكول لجنه
أيه : لا البس كوستم ابيض
جنه : صخام وليش كوستم خيه مطلقه ارمله ياستار
أيه : انتي من كل عقلچ البس بدله واختي انحرمت منها ابد
جنه : اوف حقچ خيه بس هاي صار سنتين والبت بخير وجنهه العافيه واكيد ماترضى تشوفج هيچ وتكسر فرحتچ
أيه : واني شون القبلها اگسر بخاطرها وأذيها واذكرها بذاك اليوم اني حجيت ويه ابراهيم البارحه وهو اقتنع لان اني وياه منهتم لهاي الشگليات
جنه : وامه راح تسگت
أيه : مو مشگلتي هو يحجي وياها وحتى ماما گتلها بلبدايه مقبلت بس اني قنعتها مااريد اختي تتأذه افرح واتزوج والبس البدله وهيه انكسرت مثل هيج يوم لا لا مستحيل
جنه : انيالها لاختج عليج ياريت عندي خوات وتصير مثلج انتي ودق
جنه : امشي لج غير انتي اختنا بله حجي ماصخ احنا اربع خوات
جنه : يمه من فدوه لخواتي
ودق : بجيت على كلام أيه ورحت لماما
يوم يوم
يمامه : ها حبيبتي
ودق : شون تقبلين أيه متلبس بدله
يمامه : هيه طلبت وبراحتها
ودق : انتي كولش زين تعرفين السبب الحقيقي ليش تأذوني
يمامه : تعاي حبيبتي اكعدي ليش ياامي بشنوو مأذيج
ودق : من تسون هيج اتأذه اتعاملو طبيعي ولتكسرون فرحتنا زواج ايه وابراهيم فرحه اليه قبل الها ومااقبل اختي واول عروس تطلع من هذا البيت تطلع بدون زفه وعرس
يمامه : والله يابنتي هاي اختج واني هم لخاطرج قبلت ليش اني مو امنيتي اشوفجن عرايس وافرح بيجن يوم عيد عايشه علمود اشوف بناتي متهنايات
ودق : حبيبتي ماما امشي العصر انروح نشوف الها بدله حلوه وبدون متدري
يمامه : والقياس شون
ودق : اني اعرف قياسها حتى نسويلها مفاجأه
يمامه : تعالي بحضني الله يحفظجن اليه
ودق : ويحفظج يااحلى ام بلدنيا
طلعنا الظهر وره الغدا وماما فهمت ايه عدها غراض تشتريهم يعني الموضوع مو يمها
ضلينا كومه نفتر وتالي لكينا بدله تجنن نفش مال اميرات وصدوك تلوك لأيوته تطلع سندريلا بيها اشتريناها وياها كل المستلزمات مقبلت أجر الها هاي هديتي ومقبلت ماما تساعدني بسعرها ردتها مني وبس وحتى الحذاء اشتريته
رجعنا مكسورين الظهر طبينا اني وماما نهلهل وصحت جنه لان حلوه الهلهوله مالتنا مو مثلنا فاهيات دخلنا لغرفتها والبدله بيدي والهلاهل تركع ماما وجنه وكفت على حيلها ممصدكه والدموع تصب حضنتها حيل

يله يااحلى عروس فرحينا نريد نشوفج احلى عروس بلعماره كلها
أيه : ليش هيج والله مااريد البسها
ودق : غصب عليج انتي اذا تريدين راحتي وسعادتي وتكولين صدوك احبها لأختي تلبسيها وتفرحيني وتفرحين ماما يله خلي نشوف القياس عليج لو لا
لبستها طلعت اميره نمشي ونصلي على النبي وبدت جنه وهوساتها المعتاده وهلاهلها واني اهوس وياها واكمز مااريد أيه تنقهر اريدها تفرح كافي الي شافته بحياتها
جنه : شايف خير ومبارك ياراعيهه ماينعرف خدهه من تراجيهه،)كللوووووش
زفوني ماريد العشه برهومي كدامي مشه
أيه : ههههههه ليش اهم شى العشا
جنه :دطيري عشه اگصن ايدي اذا مااجيتي على الزلمه بس تضلين وحيدچ ويااه
ودق : اي تغتصبه هههههه
أيه : ماما سكتيهن عفيه ناصبات عليه
يمامه : هههههه ولكم جوزو منها
جنه : يله خيه بعد عناد بعمتج
ودق : اي والله وياج وللصبح اليوم
جنه : ع عناد أمن لعبت لعب جنه
ودق : هههههههه اي والله على عنادها
أيه : واني هم وياكم كللللوش
جنه : استخفت العروس بعلي
ودق : بيومها ردح وركص لليل شفت الفرحه بعيونها وهاي عندي تسوه الدنيا اتفقت ويه ماما تكول لعمو من يجي واني باجر الصبح اروح ابلغهم على العرس لان منريد ابراهيم يشوف ايه قبل العرس عادات وتقاليد

فضيلة : شنهي هاي وليدي وحيدي ويتزوج لا زفه ولا بدله عروس انه مااقبلها تسودنت انته
ابراهيم : انه راضي يمه هو عرسي لو عرسچ انه اريدن هيج
فضيلة : لا انه اعرفن كله من سوالف هاي الخبيثه
الحجية جميله: شنهي ايه خبيثه هاي من اهل الله مسيجينة(فقيره) ليش هو اكو مثلها انتي ماظل بيج عگل
فضيلة : يمه واليرحم والديج احجي الحگ يصير ولدي يتزوج بله عرس شنهي ذنبي انحرم من فرحتي والله شنهي اختها اتعزت واتصخمت بعرسها وانه شكوو
ابراهيم : گتلچ انه راضي
الحجية جميله: بسچ دوختينا بس تلغين مامليتي الوليد وراضي وهذا عرسه يلغمه اركدي لاتوجعين گلب الوليد وتكسرين فرحته
فضيلة : يافرحه يمه وهو مايريد عرس انه من الاول ماردتها عبن اعرفها تگلب اوليدي علي بعدنا بأولها وكسر چلمتي من تالي يشمرني بلشارع لجل عينها
ابراهيم : انتي صگد تحجين هاي هيج انه بعيونج عاق ومالي چلمه وافتر وره مرتي
فضيلة : انه ماگلت هيج
الحجية جميله: چا شگلتي من دهر صابچ هسه ابراهيم يشرد منچ ومن سوالفج وضلي هنا اثغبي(تنوح) يمه شتريد سوي سوي هاي امك مسودنه ورگبتها الملايجه وتكوم وتكعد وتصيح ايه عبن تعرف بيك تحبها چاهاي غيره النسوان مااستحيتي تغارين من بت اخوج گبر اي والله گبر

فضيلة : يمه بحضچ وبختچ لو هذا وليدج لو حميد ترضيها
الحجية جميله: صمي حلگچ واسگتي مچابلتني وچاعده تراچفين
فضيلة : شفتي من وصلنا يم حامد اصمن حلچي
ابراهيم : يمه انتهى الموضوع عرس وماكو وايه تلبس الي يلد عليها ونسوي عشا ثواب لوجه الله وكلمن يولي لبيته واخذ عروستي للفندق ليله وارد
فضيلة :وروح ابوي اذا ماصارلك عرس ماتزوجها واحرگ الاخضر واليابس چا شنهي اختها تكدرت وكرطت الزلمه تكدر وليدي

ودق : جنت جايه اتفق ويه ابراهيم وابلغه على العرس ودخلت وسمعت عمتي شون تغرد حسيت النفس انكطع والقهره الي بگلبي صعدت براسي بس لازم ماابين كسرتي وخاصه كدام الناس الي احسهم متشمتين بيه
وليش ميصير عرس شكوو قابل ماخذ فصليه
ابراهيم : ودق هله بيج امي قصدها
ودق : سمعت ميحتاج تبرر ابراهيم
الحجية جميله: تعاي ليه يمه ابوسنچ
ودق : هلو بيبي وبستها
الحجية جميله: لايضيچ خلگج هاي عمتچ ثوله وتهذري وحيدها
ودق : احجي بصوت عالي وبخشم مرفوع لا ليش حجي عمتي صح على اي اساس ابنها الوحيد مينزف وحتى اختي ليش تنحرم من احلى ليله بعمرها شنو بيها عيب لو فصليه بلعكس تلبس احلى بدله ويصيرلها احلى عرس وبياضها يشوفه الشامت قبل المحب

ابراهيم : يابياض
ودق : هااااا مبين عمتي نست تكول الك حقها اعذرها لان هيه بس مركزه بيه شون كرطت خطيبي
الحجية جميله: نعلت الله على بليسچ فضيله يمه ودق خلي تولي لاتهمين بچلمه عمتج
ودق : لا على شنو بيبي هي كعد تحجي الي بگلبها خليها على راحتها
ابراهيم : تره اني افتر عقلي شنو بياض احجو لتخبلوني
ودق : المفروض امك تكول الك مرتك بنيه ومابيها شى
ابراهيم : شون يعني
الحجية جميله: يايابه يابويه يمه ابراهيم لاتصفن ايه بت
ابراهيم : شون مااصفن وضعها شنهي نسيتو لو تتشاقون
ودق : ماما اخذتها للطبيبه قبل كم سنه وكشفت عليها وكالت كولشي مابيها وانت ان شاء الله بزواجكم راح تأكد كلام الطبيبه شفته كام يرجف وميعرف شيحجي حقه صدمه اله
ابراهيم : وهي ليش مكالت ليش سكتت
ودق : انت تعرف بيها فقيره وتستحي واكيد هيج شى لازم امك تكوله لان الي افتهمته عمو مبلغ عمه وبيبي بهذا الشى يعني عدهم علم واكيد ايه بتوقعها انت تعرف
ودق : ومنشوف غير ابراهيم طلع يركض اتوقع على أيه وامه تصيح وراه ولا اندار

ودق : على كلاً اجيت ابلغكم بتنا جاهزه للعرس واكيد راح تطلع تخبل واحلى عرس راح يصير الها والكل يحظر كم ايه عدنا
الحجية جميله: يوم الچ حبوبه والله ينطيني عمر وازفنچ بيدي
ودق : الله ينطيج الصحه والعافيه بيبي بس زواج شلته من عقلي
الحجية جميله: شنهي صگد تحجين
ودق : اي والله بيبي جربت حظي من الدنيا ولهنا وبس
الحجية جميله: شگثر تظلين تاليتج بيت وزلمه وعيال
ودق : بس ادعيلي براحه البال والصحه كولشي مااريد
فضيلة : عيفيها يمه تالي تفلفل على الزلم گلها مده وتكول زوجوني بس گون يرضى بيها احد
ودق : ومااشوف غير بيبي تضرب عمه فضيله على ظهرها حيل بلعوجيه انكطع نفسها من الضربه والله لو ما العيبه اله اهلها حيل غير تسكت
فضيلة : ااااخ يمه شنهي كطعتي نفسي
الحجية جميله: واحش رجولچ حش بسچ من البت
فضيلة : انه ماگلت شى ورجفتي عليها الدور ذبيتيها براسي
ودق : اروح بيبي
فضيلة : روحي يمه مودعه بالله
فضيلة : هاي انتي هيچ تحبين وليدات عادل وفاضل ووليداتي ماتحبيهم
فضيلة : من حبچ البين كون ان شاء الله وطكچ بعصيه اثنين بسچ تراجفين وگل ماصار شى وانتم ماتحبون وليداتي چا انه لو اعرفن هيج گلبچ اسود احطچ براس زلمه مخبل هو يتكفيل بيج بلگت يعگلج من ساعه السوده الخلفتج بيها وليداتچ قطعه من رويحتي بس انتي هااهاها منچ صايره تنگطين سم اركدي يمسودنه لاتضيعين الاول والتالي الله يصبرني عليج
فضيلة : اروحن اكمل شغلي احسن
الحجية جميله: روحي من راحت روحچ يلمسودنه

طلعت واني الحصره الي بيه تهز الدنيا هز
مكدرت ارجع للبيت لان بس ادخل اعرف كولش زين ايه راح تحس بيه وخطيه مااريد اكسر فرحتها كافي من ورايه حتى عرس مرادت تسوي بقيت اتمشى بلبستان وهناك وكعدت على صبه واباوع على الحيوانات من بعيد شون ياكلون وصافنه واجتي ايدي على الكلاده مال طارق ااااه يانار گلبي وحصرتي اشتاقيتلك حيل اتمنى هسه انت يمي شفت من عفتني شون الناس تاكل بيه شون محد رحمني اقرب الناس اليه يتشمتون لعد الغريب شيحجي طارق حبيبي تسمعني ااااااااه شكد محتاجتك لو تعرف سمعت طكطكه ورايه مسحت عيوني وانداريت شفته مازن

مازن : شعندج كاعده وحدج هنا
ودق : هيج اشم هوا انت شعندك هنا مو عندك دوام
مازن : اليوم مداومت وجنت بلبيت وشفتج من اجيتي وجنت بره يم السياره من طلعتي وشفتج توجهتي لهنا عرفت بيج شى
ودق : لا مابيه
مازن : اكدر اكعد
ودق : تفضل
مازن : ليش عيونج حمر جنتي تبجين
ودق : لا
مازن : محلو الكذب تره وعيونج حمره حيل واصلاً حتى بعد بيهم دموع
ودق : اكوم اروح اكيد ينتظروني بلبيت
مازن : اكعدي اريد احجي وياج
ودق : خير اكو شى
مازن : ليش تتهربين مني احس من اني يمج لازم تنهزمين مضوجج بشى اني وممنتبه على نفسي
ودق : لا والله بلعكس كولش حباب ويايه ومااسمع كلمه محلوه منك
مازن : ليش حتى من اباوع بعيونج تبعدين نظرج عني وتتهزمين واي مكان يجمعنه مباشره تكومين
ودق :ممكن اسألك سؤال وتجاوبني بصراحه
مازن : اكيد اسألي
ودق : انت بعدك تحبني
مازن : هاااا
ودق : جاوب وراح اجاوبك سؤالك دنج وبهدوء كال
مازن : ليش هو مر يوم بعمري ومحبيتج بيه
ودق : شفت وهذا سبب بعدني عنك يوم مااحسك تنظرلي بنظره بنت عمك واختك بذاك الوقت راح مو بس اكعد يمك حتى اطلع وياك وحتى اكون مرتاحه بوجودي يمك
مازن : انتي من كل عقلج يجي يوم واعتبرج اختي مستحيل
ودق : واني مستحيل يجمعني بيك غير الاخوه والقرابه انت من تكون قريب مني مراح تنظر اليه مراح يرف گلبج مراح تفقد السيطره على كلامك واحياناً تصرفاتك واني ماالومك بس الوم نفسي اذا سمحت الك بهذا الشى والوم نفسي اذا انطيك امل بأن بيوم راح يصير شى بينا يتعدى القرابه
مازن : الى متى تبقين هيج
ودق : اني هيج ومااتغير
مازن : ودق تتزوجيني
ودق : لابربك انت صدوك تحجي اني هسه دااكول الك اريد اصير اختك وتنظرلي گأخت وانت تكول تتزوجيني
مازن : اني مغلطان بشى اني احبج وانتي تدرين واهلنا كلهم يدرون وحالياً انتي ممرتبطه شنو الي يمنعني من طلب ايدج
ودق : هواي شغلات تمنع اول شى انت متزوج ومتزوج جنه بت عمي وعمك بالاحرى يعتبر ابوك شون اطعنه بنته
مازن : بس ابويه هم متزوج اثنين واخذ الي يحبها
ودق : وانت مو حامد حتى تسوي مثله ولا ظروف امي مثل ظروفي وجنه تحبك وجازفت بحياتي في سبيل يصير عدها جهال منك والاهم من ذوله كلهم اني مازن اني مااحبك ولا احب اي رجال ولا اني نفس بأي واحد مهما كان اني حبيت مره وبصعوبه وحبيت انسان لو شكد مراح اشوف مراح الكه مثله
مازن : يجي يوم وتنسي
ودق : تكدر تنساني مجان نسيتني وصارلك كم سنه من تزوجت
مازن : اني وحد انتي عايشه وكدام عيني
ودق : وطارق عايش بگلبي وهم كدام عيني بكولشي اشوفه بأغنيه سمعناها بمكان كعدنا بيه حتى بلحلم يجيني طارق عايش بدمني ولهاي اللحظه لجمت فراقه نار وتاكل بيه لتتوقع بيوم انساه

مازن : هواي نسوان ترملن واطلكن وعاشن حياتهن ماكو واحد يموت نفسه لخاطر واحد
ودق : النفس وماتميل صح اكو نساء يمكن وره كم شهر تتزوج وره وفاة زوجها وتنسى بس هم اكو نساء بقن العمر كله مخلصات لذكرى ازواجهن مو كل اصابيعك سوه وگتلك النفس وماتميل واني هاي نفسيتي ومااكدر اغيرها يجوز يجي يوم وتتغير الله اعلم لكن اني حالياً وعن قناعه الزواج والحب شى صار بحياتي حبيت مره والله اخذ الي احبه ولا اعتراض على حكمه بس مال احب او اتزوج مستحيل ومنو گلك اني ميته اني نجحت وتخرجت والحمدلله العياده شبه كملت وحياتي ماشيه بشكل ممتاز وراح اقدم ماجستير وهم ارجع واكول الك طارق عايش ويايه

مازن : ااااااه لو تعرفين شگد احبج وشگد نفسي بيج ولو تعرفين من خطبج الله يرحمه شصار بيه
ودق : مااريد اعرف مازن زوجتك حبابه وبت عمك راعي الله بيها تره والله مالها ذنب بكل الي كعد تسوي
مازن : اني ممسوي شى الها بلعكس احبها واحترمها وممقصر بشى وياها بس احبها كعشره زوجتي وحبابه بس مو عشق انتي مراح تفهميني امنيتي مره تكعدين ويه نفسج وتفكرين بحبي الج والله مراح تلكين شخص بلدنيا يحبج بكدي
ودق : اترجاك سد هذا الموضوع واذا تطلب مني اكون طبيعيه وياك مااريد اسمع هذا كلامك واحترم مشاعري وخلي حدود فاصله بينا انت ابن عمي وبس غيرها مراح يكون
مازن : وانتي حبيبتي واول واخر حب بعمري وغيرها مراح يكون
ودق : هذا شى راجعلك اني الي عندي وضحته ورجاءاً لتحاول تتقرب مني على اساس الحب وغيره لان مراح تشوف مني غير الرفض واحتمال اتجنبك نهائياً خليني اعتبرك ابن عمي واخويه ومن احتاجك التجأ الك لتخليني انفر منك اترجاك
مازن : هذا هو ودق مراح اضغط عليج براحتج مثل ماانتي مقنعه مبدأ اني هم وراح احاول مااضايقج على الاقل متنفرين مني والي بلگلب يبقى بلگلب
ودق : هذا هو الي بلگلب يبقى بلگلب من رخصتك

ودق : رجعت للبيت اتمشى واشم هوا طيب دخلت لكيت ايه تبجي هاا ولج شبيج
أيه : ابراهيم زعل مني
ودق : ليش
أيه : اجه عليه صاير اعصاب ويعيط انتي شون متكوليلي انتي بنيه بعدج
ودق : اي كملي
أيه : استحيت اكولك ودنجت
ابراهيم : شنو استحيتي بابا اني زوجج يعني لوما ودق هسه تحجي شوكت اعرف بليله الدخله
أيه : والله توقعت عمه كالت الك
ابراهيم : شتكول وليش اسمع منها هو هذا موضوع ينضم
أيه : وشنو الفرق عندك هيج هذا الشى يفرق
ابراهيم : انتي تخبلتي شنو يفرق اكيد ميفرق اني حبيتك وذبحت روحي عليج وباعتقادي ذولاك
أيه : احجي ليش سكتت اغتصبوني
ابراهيم : انتي متعرفين احساسي من اتذكر المنظر الي جنتي بيه وشكد الوم نفسي واكول لو مستعجل اكثر لو راكض بكل قوتي اكثر جان لحكت عليها ومخليتهم يأذوها تدرين ابو المحل الي شافج ومحجه من انباكيتي شسويت بيه
أيه : كالو محله احترك من وره الكهرباء
ابراهيم : لا اني حركته وكدام عينه وحركت گلبه عليه لان شافچ وسكت وبيومها شلع گلبي يله حجه لو حاجي بسرعه او جاينا بنفس اللحظه الي انخطفتي بيها جان مصار كل هذا حركت المحل وشبعته كتل من حلات روحي من اتذكر شكلج وحالتج انهار ايه اني من وراج كمت ادخن جانت الچكاره اذا اشوفها بيد واحد تلعب نفسي كمت اشرب باكيتات بس حتى اطفي النار بيه هلمره اشعلها بلزايد الليل نسيت النوم بيه حتى اخاف انام اخاف اشوفج بلحلم بذاك المنظر المي الاكل كلهم طعمهم مر حتى الهوا من اشمه جنت اختنك واكول ليش هيج صار لو حاط عيني عليها زين مجان تأذت

أيه : كمت ابجي والله موقصدي اضم والله استحي بس انت ليش حركت المحل خطيه رجال جبير
ابراهيم : انتي هذا الي هامج انعل ابوه لابو شيب اهله لو حاجي جان مكدرو يلزمون شعره منج بس يعرف يبصبص على النسوان ويحط خشمه بلرايح والجاي وكلت اخاف يحجي لأحد من يصير الفصل وتنفضح شغلتج هججته من العماره كلها بس ابويه انطاه فلوس حتى يكدر يعيش بغير مكان لو بيدي ولا فلس انطي وانعل اهله بس ابويه مارضى وكال اكو عائله بركبته مالها ذنب

أيه : فدوه لتزعل مني والله عبالي تدري
ابراهيم : ولج هسه عرفت وانقهرت اني اخر من يعلم هاي تاليتها
أيه :وتالي عافني وطلع زعلان مني
ودق : ميخالف حقه
أيه : اخاف يعوفني لو ميجي على العرس
ودق : هههههههه مو هو لعب جهال خبله امسحي عيونج وتعالي غسلي ورانا نحفلج ونهيأج اله ميجي هههههه لو بيده هسه ياخذج والله تضحكين
أيه : شبيج تضحكين عليه غير اخاف يعوفني
ودق : ولج من كل عقلج هو ينتظر لحظه لحظه حتى بس ياخذج وتصيرين بحظنه بس هو زعل حبايب وبيوم الزفه لو ذابحه ابوه هم ينسى هههههههه
أيه : صدوك يعني تروح زعلته
ودق : وابو زعلته هم يله غسلي يحلوه وامشي ورانا الف شغله ميجي ههههههه
أيه : ابقي ضحكي عليه
ودق : حضنتها حيل وكرصتها من خدها اووف من فدووه لهاي الخدود الحلوات انياله لأبراهيم عليج راح يكرطهن كرط
أيه : ولج استحي
ودق : والله راح اطيحين حظ الولد بلمستحى مالتج يله امشينا على كوله عمووو
أيه : هههههه يله

بدينا نجهز والكل مخبوص والهلاهل مبطلت
اليوم الحنه بنات الكرايب گلهن اجني أيه جانت لابسه بدله نفش بسيط لونها زيتوني غامق وهي بيضه طلعت تجنن تضوي ورافعه شعرها بتسريحه بسيطه والمكياج برونزي كولش راقيه الكل فتح عينه عليها مدري شعجب عمه فضيله تقرا وتسمي عليها ماادري يمكن لان النسوان كل شويه وحده تكول الها بلعافيه عليج جنتج حسن وجمال وشهاده شتريدين بعد وهي خافت من العين يله علواه بلكت الله ينعدل حالها
اني لبست فستان قصير للرگبه عدل وكصيف ربع ردن نيلي غامق ومكياج جداً خفيف وشعري رفعته مالي حيل تسريحه وهاي السوالف شكلي رسمي بس حسب قول البنات طالعه تخبلين اما ست الحسن والجمال ست ماما دومها مميزه بفساتينها والالوان الغامقه الي تزيد جمالها وهيبتها وهلمره هي ام العروس يعني كشخه فول لابسه فستان عدل ردن شفافه جوزي غامق وذهبي ومكياج صالون لان ام الصالون اجتي للبيت مقبل استاذ ابراهيم تروح ايه لهذا جابوها وياها عاملتين علمود يكملون ايوته والي وياها واكيد اني مقبلت ردت اني اعدل نفسي بس ام صالون شافت ماما كالت اني اسويلها هاي مرت الشيخ ولازم معامله خاصه وعمه احلام عاطت وكالت لعد انه مرت العتوي غير انه الاوليه
يمامه : هههههههه والله حقج عيني سويلها لام جنه بالاول هاي الجبيره ومرت الشيخ الاصليه
احلام : يبعد رويحتي اسمعي خيه انه اريدن حمره لونها احمر وهذا الاحمر حيل موش هاي الالوان التسحل الروح الوحده تطلع چنها ميته

ودق : ههههه عمه غير موديل الالوان الهادئه
احلام : عمه شفهمچن انتن هو اكو احلى من الاحمر وفوك العين ازرك يطلع يهبل
ودق : ههههههه كولش
ماما اليوم الشيخ بايت يمج لا محاله حتى اذا ميجي اذا شاف مكياج عمه احلام ينهزم وربي حظريله حبايه تحت اللسان من الخرعه
يمامه : اشش لج عيب اسكتي
وبدت تشتغل بلدور بس ماما تميزت عن الكل بجمالها
بدا الكل يركص وفرحان بس اكثر وحده فرحانه ايوته طايره واجه ابراهيم يحنيها جانو مسوين حنه بره والكل حاظر صح سمعنا كلام هيه مو جانت مخطوبه لأبن عمها شعجب عافها بس غلسنا واذا جاوبنا ابن عمها ميريد يزوج وكال مااريد اظلمها وتركها وخطبها ابراهيم بعد نسوان شيخلصنا من غيبتهن
رحت اشوف صينيه الحنه كملوها لو لا وادخل واشوف منير يسولف ويه وحده من البنات جوارين بيت جد وابوها اقاربنا بس من بعيد والبنيه تكوله ليش عفتها للعروس
منير : محلوه جگمه
شنهي محلوه جنها جمار بيضه
منير : اني مااحب البيضه فاهيه توغف على الگلب اني اريد وحده مثلج يلعب دمها
تشوفني انه احلى من العروس
منير : اكيد ذيج اييع تحمض بمعدتي انتي عسل بمعدتي
ودق : اباوع على البنيه هم حرام واحد يحجي سوده والشعر فحم سيم تخوف وهذا يتغزل بيها وجان اعيط شونك منير
وطفرت البنيه وطلعت
منير : هلو ولج هاي شطالعه كيك بعلي
ودق : عوفك مني انت شجابك
منير : حظي الاسود اكو واحد بعرس مرته يحظر ولكم بلكيوليه مصايره
ودق :شسوي هنا
منير : اجيت اخذ جوازي عندي سفره ويه جماعتي لتركيا ونسيت اليوم الحنه عبالي اسبوع الجاي بس وصلت كلها صارت بوجهي هلمره اريد وحده بيجن اشوفها بس تسويلي طريق حتى اصعد للغرفه اخذ الغراض

ودق : هههههههه والله كبسه وتعال كوليلي بربك اختي محلوه وتوغف على الگلب وهاي احلى
منير : وين اولي ردت وحده اكضي وكت بين متبين وحده منجن
ودق : والله كون اخطبها الك تفيدك
منير :اكتلي واحد وادخل سجن ولا اتزوج هيج وحده بعد كل هاي الصياعه وهاي البنات الضالات اشكال والوان تالي هذا حظي من خرب بيه
ودق : ههههههه والله هذا الي يلعب على البنات نهايته سوده كون
منير : اكولج هاي اختج همسه صايره صاكه شنو هذا انتاج امج لخاطر محمد تحبل وتخلف لو تصنع كيك وتخبزجن
ودق : منير ومحمد الي حلفت بيه اذا تقربت من همسه اجرم بيك
منير : لا لج بس انتبهي عليها تره البنيه مراهقه ولتخلوها هواي تروح ويه عمه احلام لبيت اهلهاً
ودق : ليش سامع شى
منير : لو اكو شى غير اذبحها بس هناك عدهم ولد لتروح تحبنا واحد وهمه كلهم مابيهم خير وتعال يعمي شيلني
ودق : اي والله صدوك كلامك عود انبه ماما
منير : بنات عادل راح تجلطني يوميه وحده مكتوبلي اخذجن كرسته وعمل
ودق : انت بس اتقرب منها اخلي عمي يكصك نصين
منير : هههههههههه ابويه مسوي عليه حصار غلطه وحده وربج يذبني بلشارع متشوفيني عاقل
ودق : انت تعقل عبيس المخبل يعقل وانت لا
منير : هههه بله كوليلي شونها مرتي طالعه تخبل مو ولكم الله يقبلها احظر عرسها
ودق : ههههههه تعال اسويلك طريق واخذ غراضك وانزل وين راح تبات
منير : بيت عمو حسان وباجر من الصبح اطلع لبغداد وراها بيومين قادمون ياتركيا نشوف وجوه حلوه احلى منجن
ودق : هههههههه تروح وترجع بلسلامه
منير : الله يسلمج
خلصت الحفله والكل فرحان ونامت ايوته بحظني وحتى ماما بقت يمنا لان عمو بات هناك اجوه خطار من البصره

االيوم العرس غير عرس الغوالي والاثنين من بيت الراضي صح قبل مازن وجنه هم اقارب بس جان العريس مفرحان واضح هذا الشى عليه
بس هلمره اكثر اثنين تعذبو بلحب والله جمعهم بعد طول عذاب ومشقه
اجتي ام الصالون وكملت كولشي بقت بس تلبس البدله جان تفتحها ايوته
أيه : هاج لبسينياها
ودق : هاااا لا مااكدر
أيه : ليش
ودق : فال موحلوو
أيه : والله اذا ملبستيني وبأيدج ولا البسها
شنو هاي الخرافات انتي اصلاً كل الخير وكل الفال الحلوو انتي اختي وروحي يله لبسيني
ودق : حضنتها وكمت ابجي دخلت ماما علينا
يمامه : ولكم بعدكم ممخلصين
ودق : مسحت عيوني هسه يوم سميت ولبستها وطلعت اميره وصدوك احلى عروس بلعماره

أيه : گلبي يدك اليوم زواجي من ابراهيم ممصدكه رغم من ذاك اليوم مشفته بس منتظره اصالحه اجه دخل بكل هيبه والدشداشه بيضه والعبا بيضه وذهبي والشماخ عريس يجنن بعد هاي المده كدر يسيطر على مشيته رفع البركع باوع عليه
ابراهيم : سبحان الخالقج ممصدك واخيراً
أيه : ابتسمت وخجلت باسني من راسي وجنت بيومها كلشي مااسمع بس دگات گلبي القويه الي مره تنبض بقوه لان فرحانه ومره لان خايفه من هاي الليله مشاعر حيل مختلطه
ابراهيم : يله يرويحتي نكوم
أيه : بكيفك
ابراهيم : يله ياام بيتي
اخذني من ايدي وقبل مااطلع جان يطب بابا حامد
حامد : اوكف ماخذ بنيتي گبل مااسلم عليها
أيه : فتح علبه جبيره لبسني ذهب كومه مثل ذهب جنه وباس راسي اني بست ايده
حامد : وصيتك ايه دمعه منها احرگنك
ابراهيم : بعيوني يابه
حامد : وانتي بويه هذا العزيز حطي بعيونج
أيه : صار بابا وحضنته حيل ادور بعيوني على ماما ودق وهمسه لكيتهم تلاثتهم واكفين على صفحه يبجون ركضت عليهم حضنتهم
يمامه : مهنايه حبيبتي كافي لتبجين اريدج سباعيه وترفعين راسي اريد يكولون ربت يمامه والنعم من ربت
أيه : احبج يااحن ام بلدنيا
ودق : الف مبروك گلبي يله زوجج منتظرج وحضنتني وتشك اجه ابراهيم باس راس ماما واني سلمت عليه ابراهيم ورده ويستاهل ايه لان ضحه بروحه لخاطرها وهو رجال وسبع

رفعت عيني شفت مازن صافن عليه وخطيه جنه تركص ضاربه الدنيا عرض الحايط ملت من سوالفه انيال گلبها شون صابره اخذها لأيه ودعت حياه العزوبيه الله يهنيها

أيه : اخذني ابراهيم ودخلنا للفندق بلحظتها اختفت الفرحه وحل مكانها الخوف كمت ارجف
ابراهيم : ايوته تعالي شبيج لج صگد انتي گبالي ومرتي وحلالي
أيه : اي
ابراهيم : شبيج ياگلب ابراهيم وعمره
أيه : هاااا بس خايفه
ابراهيم : تعالي ارتاحي وخلي نسولف
أيه : انت بعدك زعلان مني
ابراهيم : اكو واحد يزعل من رويحته
أيه : يعني مسامحني
ابراهيم : تعالي اخذتها بحظني وحاولت اطمنها بس ميفيد
ايوو كومي بدلي
أيه : كمت بدلت بلحمام وهلمره مخلين سيت نوم يبوو لو باقيه على البدله استر
لبسته وكل شويه امد رجل وارجعها لحد ماابراهيم مد ايده وطلعني
ابراهيم : شو تعالي
أيه : فدوه ابراهيم
ابراهيم : شبيج رويحتي والله مااسوي شى بس تعالي ناكل متت جوع كعدنا وكل شويه اغطي برجلي بقينا نسولف ونضحك لحد مكملنا
ابراهيم : تعالي نتمدد
اجيت يمه حسيته ارتبك بيك شى گلبي
ابراهيم : مووو
أيه : شكوو حبيبي
اذا انزع الرجل تلعب نفسج اخاف تخافين لو تلعب نفسج والله حاولت انام بيها بس مكدرت
أيه : دمعت عيني واني اشوفه شون خجلان مني كمت على كيف ونزلت يم رجله هو جفل وحاول يوخرني منطيته مجال واني فتحتها ونزعت الرجل ودنجت وبست مكان الكطع محسيت غير سحبني بحضنه والدمعه بعينه
ابراهيم : لج اااااه يانبض ابراهيم شگد احبج
أيه : احنا واحد حبيبي وبعد النزع واللبس مسؤوليتي وشرط كل ماانزعك الرجل والبسك ابوسها
ابراهيم : الله يحفظج اليه گلت ماطول ارتاحت وحسيت بيها بدت تنسجم احاول اتقرب منها
أيه : بدا يتقرب مني ويبوس بيه اخذني بلمساته بهدوء ومن بدا يتقرب اكثر اتذكرت الي صار ومحسيت بروحي غير اعيط وابجي بهستيريا وادفع بيه
ابراهيم : ايوته حبيبي شبيج
أيه : مااكدر مااكدر
ابراهيم : على كيفج حبيبي ميخالف خلي تولي
أيه : موبيدي خايفه ابراهيم داارجف اذكرهم حط ايده على حلكي وسكتني كافي حبيبي وحضني حيل وبقيت اشهك بحضنه وهو يلعب بشعري ويغنيلي بهدوء اكثر من اغنيه ومحسيت بعدها غير الصبح واني بحضنه ونايم تذكرت البارحه شصار بخوفي ضيعت اول ليله النا بقيت اباوع عليه والعب بلحيته جان يعض ايدي طفرت اضحك
ههههههه اااخ
صباح الورد حبيبي
ابراهيم : هَــْـِْـْْـِلاّ بالصباح وهلا بالورد وعطره وهلا بأحلى تفاح ريان وخدود بلدنيا انتي صدوك بين ايدي لو احلم
أيه : لا صدوك وهاك حتى تتأكد جان ابوسه من خده
ابراهيم : الخد الثاني زعل تقبلين
أيه : ههههه وهاي للثاني وبسته
ابراهيم : والشفايف تره متحجي وياج
أيه : هههههه طماع وبسته بوسه خفيفه جان يسحبني وبدا الي حاول بيه البارحه وهم مكدرت جسمي خشب بسرعه وبقيت ارجف
ابراهيم : كومي حبيبي اسبحي حتى ترتاحين خلينا نرجع للبيت
أيه : كمت ابجي زعلت مني موو
ابراهيم : حضنتها شوفي حبيبي اني احب كولشي بيج المهم انتي اليه هاي الشغله اليوم باجر بعد سنه متهمني لالا مو سنه اسبوع جذب مااتحمل تره سنه
أيه : هههههه اعرف
ابراهيم : المهم بحضني وانام واكعد على ريحتج وعلى وجهج الحلو عندي هذا الشى يسون الدنيا
أيه : بسته واخذت حمام وبدلت بيومها جنا احلى عصفورين غزل وضحك والدنيا ماواسعتنا ورجعنا للبيت اول موصلنا ذبحو جوه رجلنا درت وجهي مااتحمل منظر الدم تأذيت
استقبلتنا عمه بلهلاهل وماما ودق وبيبي جميله ركضت بحضنهم وابوس بيهم
فضيلة : مبارك يمه يبعد بيتي
ابراهيم : الله يبارك بعمرج يلغاليه
أيه : بوست عمه وباركت اليه وبيبي هم بوستني وبعدني بحضن ماما وجان تكوله يمه وين البياض
ابراهيم : يابياض
فضيلة : صخام بوجهي بياض البيت
ابراهيم : موجود
فضيلة : اي وينه اريدن اشوفنه
ابراهيم : بعدين يمه
فضيلة : هاي هيه بينت ايه مو بت مثل ماامها زامطت ونفخت رويحتها
يمامه : شبيج فضيله ليش تعيطين غير نفتهم
فضيلة : شنفتهم خيه گتلونا البت مابيها وهسه وليدي كشف المستور
الحجية جميله: شنهي قضيتج ماتگليلي شجرالج بسچ لا وحگ هو علي اجسرچ اتجسر
يمه ابراهيم دشيت على البت
ابراهيم : لا جده وانه بكيفي وبلوگت الي يعجبني
فضيلة : لك يمه لا تحاميلها وصير سبع وكول البت بيها عيب
ابراهيم : اسكتي يمه مريتي ذهب وكولشي مابيها
يمامه : اني محترمه وجود عمه ومافتحت حلكي بس لهنا وبس واحترمي نفسج تره مصختيها حيل على شنو گالبه الدنيا وعياطچ وانتي
فضيلة : چا شنهي تريدني اسگت وتلبسين عار بتچ بينا
أيه : حضنتني ودق واني ارجف عمه گلبت الدنيا ومكعد تطي مجال واحد يحجي لحد معاط ابراهيم حيل وامه جفلت متوقعت هيج يعيط ويحجي
ابراهيم : كافي لهنا وبس كلمه ثاني وروح ابويه اخذ مرتي وعمرج متشوفيني لتدخلين البنيه مابيها شى جنا تعبانين وبكيفي اليوم باجر وأيه اشرف واحسن البنات ولو شميكون اني راضي كافي يمه تره حيل طلعتيها من ماعونها

فضيلة : تجسر علي يبراهيم نسيت نفسك ولك انه امك
ابراهيم : امي على عيني وراسي بس حيل كعد اتأذيني واطعنين بمرتي وفوكاها بت اخوج يعني شصار البارحه ومأخذتها الدنيا انگلبت اني طايح حظ اني مو رجال اني مابيه خير ارتاحيتي اله هيج
الحجية جميله: حشه يمه انت رجال والنعم منك چا شنهي يلمخبله انه امشي واوصي يمه ابراهيم اخذ مريتك واصعد لحجرتك
فضيلة : هاي تالي التعب والربى
تعيط عليه بعد مد يدك واضربني
الحجية جميله: بسچ لا اكومن اگلج أكل بسنوني لك اخذ مريتك واصعد
ابراهيم : حاظر جده يله أيه
أيه : باوعت على ماما اشرت روحي ويه رجلج بست ماما ودق وصعدنا ابراهيم گلي نكعد بيت وحدنا بس اني ردت ابقى بيت جدي لان بصف بيتنا يعني يم ماما ودق وهم جنه ويايه بنفس البيت يعني مراح احس بغربه وخوف لهذا حضرنا غرفه ابراهيم وصبغها واشتره غرفه ورتبها بس طك ضلع واكو فسحه مثل البالكون يم الغرفه بنه حمام حتى اخذ راحتي ومااضطر اطلع بره غرفتي اذا اريد استخدم الحمام
صعدت وجنه تأشرلي يعني معليج عمتج مخبله ابتسمت على سوالفها

الحجية جميله: يله يمامه اخذي بناتج وروحي وانتي فضيله حسابچ وياي بعدين
يمامه : من رخصتج عمه طلعت واني مخنوكه على أيه شون راح ادبر عيشتها ويه فضيله اذا من اول يوم هيج
ودق : لتفكرين يوم ومالج علاقه بعمه متعرفين سوالفها
يمامه : هاي اول يوم ودق الباقي شون
ودق : المهم ابراهيم وهو يموت عليها وراح دوم يدافع الها لتخافين
يمامه : إٱللـِْﷻـِْﮭﮧ يستر

دخلنا للغرفه جانت حلوه مال عرسان كعدت وشفت ابراهيم صاير نار سحب جگاره يريد يورث كمت واخذتها من حلگه
بداعتي لتشرب
ابراهيم : واليرحم اهلج عوفيني
أيه : مااعوفك تعال حبيبي اخذته من ايده وكعدنه على الجربايه
شبيك گلبي
ابراهيم : مسمعتيها بله لو غير امي افصمه فصم بس ااااخ الي مخلاني اتجاسر لان امي وفوكاها كدام الكل
أيه : لتضوج حبيبي شنو منعرف عمه فضيله
ابراهيم : انه گتلج نطلع بيت وحدنا حتى نرتاح انتي دكيتي رجل اله هنا
أيه : اني لو بكوخ راضيه اعيش وياك بس اهدأ گلبي تعال وحضنته حسيته هدأ صعدت جنه الاكل النا وعيونها تتلامز تموت ضحك كوه طلعتها
مر اليوم وابراهيم طافي روحه بخشمه اعرف السبب
أيه : برهومي حبيبي
ابراهيم : هاعيني
أيه : شويه واجيك
ابراهيم : وين
أيه : يم بيبي مااتأخر
ابراهيم : لاتتإخرين انتظرج
أيه : بسته من خده ونزلت اركض لبيبي لكيتها لازمه قران وتقرا شافتني صدقت وسدته
الحجية جميله: تعالي يحليوه هله بعروستنا
أيه : بيبي ساعديني
الحجية جميله: شبيج يمه ابراهيم أذاچ بشى
أيه : لا بالعكس ورده بس اني مااكدر اروح لماما هسه راح يعرف ويحس واني مااريد يعرف لهذا اجيت الج
الحجية جميله: كولي يمه
أيه : اني
الحجية جميله: تحجي شمالچ
أيه : من يتقرب ابراهيم مني ارجف واخاف واتذكر ذولاك الي أذوني شون واني البارحه ضليت ابجي وهو خطيه مكسر بخاطري بس شفتي عمه شسوت ومااريد يوميه عركه بسبب هذا الموضوع لان اكيد مراح تعوفنا
الحجية جميله: اسمعي يمه گلشي ربچ كاتبه الصار صار ومنعولين الوالدين ولو وانتي كبرتي وربچ كرمچ وطلعتي بت انسي حبوبه اقري الفاتحه ثواب لأم البنين وأيه الكرسي ومن يتكرب منچ افتحي عيونج وتذكري حب ابراهيم ليج وعشگم وانتي حلاله هيه صعوبتها اول مره وراها تنسين گلشي يمه ابراهيم تعب وانتي هم عيشي حياتكم ولاتسمحين لفضيله وغيرها تلعب عليكم وتخربها تعوذي من الشيطان وكومي لرجلچ يمه ماخاب من استعان بالله وانتي دومج مؤمنه والچ شاره وربچ مايعوفچ كومي يمه فرحي الوليد وادخلي بعين الگل وگليلهم هاي انه گلشي مابيه يله يبعد بيتي
أيه : ماشي بيبي بستها وصعدت شفت ابراهيم يگلب بالموبايل اخذت المنشفه وسبحت ولبست سيت حلو قصير جان كولش مغري وطلعت هو فتح عيونه اجيت يمه حتى اشجع نفسي واشجعه لان هو حيل طافي برهومي
ابراهيم : عيونه
أيه : هاك مشطلي شعري وكعد يمشط ويتلمس ارجف واتذكر كلام بيبي واقرا بالايات حس عليه
ابراهيم : لاتضغطين على نفسج حبيبه
أيه : اني اريد ساعدني فدوه وخلينا نجتاز هاي المرحله
ابراهيم : ايوته انتي عمري والهوا الي اتنفسه لتعبين نفسج وتسوين شى ممرتاحه اله واي واحد يحجي حتى لو امي هم اسكتها لتهتمين
أيه : يله حبيبي وتجرأت اني ابوسه وكأني اعلن اله الموافقه وبدا يتلمس بيه بهدوء ويهمس بأذني ويغني بهدوء بس غمضت
ابراهيم : افتحي عيونج حبيبي اني برهومي حبيبج
أيه : رجعت فتحتها وشويه شويه وبكل هدوء اخذني ماانكر من اصعب اللحظات لان توقعت يوكف گلبي وبنفس الوقت خفت ليطلع كلام الدكتوره غلط بس من شفت الدم ارتاحيت شفت ابراهيم بچه وحضني حيل واني صاكه على سنوني واكوله اي اني بنيه موو وابجي
ابراهيم : اي ياروح ابراهيم وست البنات وتاج على روس الكل
أيه : هدأني وباسني وجان ياخذ النيشان وسلاح ونزل ومااسمع غير الطلقات والهلاهل كوه تحركت للحمام بدلت واندكت الباب وجان اطب جنه واحلام وماما ودق والكل يهلهل واسمع بيبي حبيبتي تهلهل من جوه متكدر تصعد
يمامه : بالخير ماما
أيه : حضنت ماما حيل
ودق : شبيج متأذايه من شى
أيه : لا هاي دموع الفرح
ودق : ولج جنه فد هوسه بربج وجان هيه وعمه احلام خطيه يهوسن ويهلهلن واني وماما وياهم وأيه تضحك

ابراهيم : يله بيتك بيتك اريد مريتي
أيه : ابراهيم شجاك واضحك
ابراهيم : شنهي اريدن مرتي
يمامه : حقك امي يله بنات نروح بلخير والعافيه عليك امي
ابراهيم : تسلمين عمه
يمامه : نزلنا وصارت فضيله بوجهنا گتلها شفتي بنتي ست البنات
فضيلة : انه اريدن مصلحه وليدي وماگلت شى الحگ حگ
الحجية جميله: صخونه كون ولچ انتي تسودنتي حگ ويه بت اخوچ بسگم باجر الوادم جايه اريدن سفره لوجهه الله واهل البيت وبلغو الوليدات يذبحون عجلين وتتوزع گلها للفقره ثواب ودفعت بله
يمامه : حاظر عمه اكول لحامد
من رخصتكم يله ماما ودق

ودق : مرت الايام وابراهيم وأيه اسعد اثنين وكل متحجي شى عمه فضيله بيبي تلطها على حلگها ماما وعمو حامد طيور حب وحياتهم هادئه بس احنا ممكتوب الهدوء عدنا لازم يصير شى يعكر حياتنا والي صار اخر شى نتوقعه

بسبب طول البارت ٩٠٠٠ كلمه قسمته نصفين هسه نصف وبعد ١٠ دقايق انزل النصف الاخر لان مدينزل كله حاولت ميتحمل