رواية سجينة الروح الفصل الخامس وأربعون 45 - بقلم ريام هادي

تكمله الجزء الثاني من البارت الاخير

جنا كاعدين سمعت ماما تتقيأ ركضت عليها 
شبيج يوم
يمامه : مااعرف احس روحي تعبانه ونفس كوه اجر خابري عمج خلي يجي خابرته وركض خطيه اجاها
حامد : يمامه شجرالج
يمامه : حامد ماعرف لشتي گلها ترجف ومصخنه
حامد : اسم الله عليج تعالي نروح للطبيب ماطول بعد وگت
لبست ماما كوه واخذناها اني وعمو للطبيب
طلب تحاليل كولش هوايه ويومين نركض هنا وهنا حتى حولنا لطبيبه نسائيه وهم تحاليل وفحص شنو هاي الهوسه منعرف  لحد مطلعت التحاليل وبيومها جنت وياهم
الدكتور : شيخ زوجتك من اجتني جان عدها التهاب حاد بالمعده والامعاء بس اثناء مكعد تحجي كالت ايدي مكعد اكدر ارفعها ومنطقه الصدر تأذيها
حامد : اي وانت حولتنا لدكتوره نسائيه
الدكتور : وجان شگي بمحله زوجتك مع الاسف عدها سرطان الثدي
ودق : هنا وگأن السما وكعت علينا لا كله ولا ماما
يمامه : شنو سرطان
حامد : لا اكيد انت غلطان
الدكتور : مع الاسف التحاليل وكل الفحوصات تأكد حالتها اني لو منك استعجل بلعلاج لان حالتها بدايتها ولازم تسيطرون على المرض وهذا كارت وعنوان دكتور ممتاز بغداد راجعوله وهو راح يوجهكم للطريق الصحيح للعلاج
يمامه : حسيت فقدت توازني شنو الي ديصير يعني اني راح اموت لزمني حامد وجانت الصدمه على وجهه اكبر مني اما ودق بس تبجي
طول الطريق والسكوت سيد الموقف نزلنا بعد مااخذنا العلاج من الطريق جان حامد هادئ هدوء عجيب
يمامه : ماما ودق الي سمعتيه مااريد بشر يعرف بيه خاصه خواتج سمعتي
ودق : ماشي ماما

حامد حبيبي بيك شى ميحجي
نزلنا للبيت وصلني وطلع مااعرف وين راح بقيت الوب منا حالتي وصدمتي دااحاول اتمارسك ومنا حامد الي اختفى بقت ودق يمي لحد مااخذت علاجي وبس تبجي كوه سكتتها وصعدت تنام

بليل اختنكت اريد محتاجته وينه دكيت عليه ميجاوب شون بيه دزيتله رساله تعال اتخربطت ردت بس يجي شون يعوفني بهيج وقت والله خمس دقايق وطب يركض
فتح الباب والرعب مبين على وجهه بس الي متوقعته حامد عيونه دم يبجي
حامد : بيج شى
يمامه : اي بيه انت
حامد : يمامه احجي
يمامه : والله بيه انت وجان يكعد بصفي وتنفسه سريع وساكت كتله بهدوء لتخاف مااموت واعوفك اني هيج گلت جان يحضني حيل ويبجي اول مره اشوف الشيخ حامد الي عشاير الجنوب تحسب اله الف حساب والي من يمشي يهابه الصغير والجبير اله الدمعه ماتنزل منه اله بأعجوبه واذا نزلت يضمها بس هلمره يبجي وعليه اني يبجي بقوه وبصوت ويكول لتعوفيني انه اموتن بعدج گلشي ولا انتي خلي ياخذون حالي ومالي وحتى رويحتي فدوه المهم انت عايشه وتتنفسين الهوا 
يمامه : ابجي واحجي اسم الله عليك حبيبي لتخاف مابيه شى هسه بلعلاج يروح

حامد : يمامه انه بيضت عيني يله صرتي الي ياما ايام سهرت وانه ادعي ربج مايحرمني منچ جنت دوم اگولن بگلشي راضي بس كون يمامه چاري انه لبغداد ماادزج لهلج عبن مااكدر انامن بدونج هلمره تروحين مني ااااااااه يانار گلبي ولج افادي انشلع احسن واحد وحركني وانه بيه نار يكطع من لحمي
يمامه : كافي من فدوه اروحلك والله بلعلاج ان شاء الله يروح

حامد : لا تعوفيني مالي عيشه بدونچ انه خلصت عمري كله انوحن عليج ويوم ماصرتي الي وبحضني وام ولدي تروحين مني لا ياربي دخيل اهل البيت عندك
يمامه : حسيته طير ومذبوح مفرفحه روحه ويبجي واني ويااه تالي رفعت راسه ومسحت دموعه وبسته من خده منا ومنا وكتله ماطول الله ويايه وانت موجود مراح يصير شى بس صير قوي دوم متعلمه عليك جبل ميهزك ريح انت مو تكول الي يصير بينا مجرد ريح وهاي ريح

حامد : انه گلشي مايهزني اله انتي گلشي يصير عادي ومستعد اله بس لاكون طيرتي
يمامه : طيرتك يمك وبجانبك تعال حبيبي حضنته حيل وتمددنا على الجربايه وبقيت اهدي بيه حبيبي اني مخايفه بس من شى واحد
حامد : شنهي
يمامه : اخاف يوكع شعري الي تحبه واخاف يشيلون صدري وتلعب نفسك مني
حامد : بسچ وحگ هوعلي بنابي طالب لو تضلين ولا شعره ويشيلوهن اثنينهم بس انتي سالمه جدامي تسوه ملك الدنيا انه اعشگنچ عشگ روح موش جسد انتي بعيده وما كاضچ وروحي تفرفح عليچ لا تلچمين گلبي واذا تحبيني لاتفكرين هيچ انه عندي انتي احلى النسوان گلها بس طيبي يمامه انه بلياج اضيع حامد ينتهي يطيرتي

يمامه : لتخاف ياعيون طيرتك بيومها للصبح نسولف اني وياه ساعه نضحك ساعه نبجي حسيت بيومها حامد مثل الطفل واني امه ويخاف تضيع منه
كعدنا الصبح وهو عاف كولشي وراح لمدير مستشفى يعرفه ابوه شيخ وسأله وصفله مستشفى بلبنان لأمراض السرطان
وخلال اسبوع حجزلي وباجر السفر بس تفاجأت صاحوني والكل مجتمع بلبيت الجبير مازن وحتى منير جاي من بغداد وجنه واحلام وابراهيم ودق وايه وهمسه الي منهارات من البجي وحتى فضيله تبجي متوقعت احد يعرف بس لكيت الكل عيونه دم ويبجي ومنهارين حتى جميله الي متوقعت هيج يصير بيها لكيتها تمسح بدموعها

تعالي ليه يمه
يمامه : كعدت يمها حضنتني
الحجية جميله: يمه ترحين وتردين لينه سالمه غانمه انه گلبي بارد واعرفن ربي كريم ومايرد عبده وهاي گلها تدعيلج بلسلامه واولهم انه
يمامه : إٱللـِْﷻـِْﮭﮧ يسلمج عمه حالليني واهبيني فدوه
الحجية جميله: يمه محالله وموهوبه انه حالليني عبن احجي عليچ انه احبنچ وحگ ابو فاضل وره ماجبتي الوليد وانه رويحتي حبتچ بس تعرفيني هذا انه وطبعي

يمامه : تمونين عمه وفدوه الج كولشي وصيتج بناتي عمه ذني امانه عندج وعلاوي ميحتاج اوصيج عليه هذا حبيب گلبج
الحجية جميله: لا يمه لا امانه ولا شى انه اريدنج تردين لينه وانتي تراعين بنياتج انه هاي گلها ماتهمني انه يهمني حميد يايمامه حميد بلياج يموتن ارحمي وليدي انتي طيرته لا تأذي يمه وردي ليه

يمامه : اووف ياحامد هو شمصبرني على مرضي غيره الله كريم بس ادعولي
الحجية جميله: الله ومحمد وعلي وياج و١٢ المعصومين يردوج سالمه لدارچ ولبنياتج ولحميد گبلهم گلياتهم

يمامه : حضنت بناتي حيل وبوستهن وعلاوي بحضني يبجي  ودق ماما خواتج انتبهي عليهن وعلاوي اياج تغفلين عنه
ودق : ابجي واحجي من عيوني ماما
أيه : ماما اني حامل
يمامه : شنووو اووي يابنتي وحضنتها حيل شبيكم تبجون هلهلو فضيله راح تصيرين بيبي هلهلي يله افرحو بنتي حامل وكامو يهلهلون ويبجون
أيه : يوم ارجعي وشوفي حفيدج ماما دخيلج لتعوفيني وحدي اولد
يمامه : لتخافين ماما ادعيلي انت فقيره وطيبه ودعائج مستجاب
سلمت على الكل وصيت احلام على همسه لان اعرف روحها بيها
لكيت حامد الچكاره بيده وترجف اوف حبيبي خايف لزمت ايده وسحبت الجگاره منها وگتله يله حبيبي امشي

طلعنا لبغداد سلمت على اهلي وماما مبلغتها لان مريضه واخاف عليها بس مرت نصار تدري وراها طلعنا للمطار اول مره اصعد طياره وكتله لحامد
تمنيت اصعد واني رايحه لبيت الله
حامد : ترحين يبعد رويحتي وهلي وانه وياج بس نكمل العلاج

وصلنا لبنان وهنا عشت اسوأ ايامي الكيمياوي وعذابه وناره الي تاكل بيه اكل جان المرض بدايته والحمدلله شالو الكتل بدون رفع الصدر لكن كالو من الافضل نرفعه وحامد اصر انرفعه كال مااريد اجازف بحياتج
كل الالم والنار الي جنت اتعرضله والعمليه بگفه ودموع حامد من انام واكعد واشوفه يمسح بيهم بكفه ثانيه

وبيوم نايمه وجنت ماخذه جرعه قويه وتعبانه طبعاً صار اكثر من ٦ اشهر هنا احنا هسه نهايه ٢٠١٧ حامد ترك كولشي ومقبل نرجع اله يتأكد من سلامتي عدا المبالغ الضخمه الي صرفها وامور العشيره كلها عافهه على اخوه حمود وحسان والي يسأل عنه يكولون مريض ويتعالج مو زوجته
وبيوم اسمعه يسولف گلت هاي ويامن فتحت عيني على كيف واشوفه صافن على الجامه لان الغرفه طابق ثالث ويحجي
حامد : ربي دخيل اسمك بحگ نبيك واهل بيتگ بحگ علي عندك والزهره السچيه تردها سالمه انه مااعترض على حكمك حشه لأسمك بس انه عبدك الفقير ارحم بحالي وانت ارحم الراحمين انه من يمشي النار بدمها احسه بدمي دخيل اسمج ياام البنين اريدن طيرتي منچ تحملت گلشي اله هيه
يمامه : حبيبي اندار ومسح عيونه
حامد : امريني
يمامه : تعال يمي اشتاقيتلك
حامد : انتي زينه انشد عليهم
يمامه : لا زينه لتخاف شبيگ گلبي مو الطبيب طمنك
حامد : وانه مابيه
يمامه : وهاي الدموع اوف لو ادري هيج تحبني اتمرض من زمان حتى اشوف كل هذا العشگ الي عندك
حامد : عمي طيبي ومستعد گل يوم ابجيلچ
يمامه : ههههه لتضحكني مااكدر اضحك تدري انت ماكو مثلك والله اخاف احسد روحي عليك انت ملاك والله دزك من السما اليه
حامد : انه بشر يمامه بس عاشگ وعشگج سودني

يمامه : من مات اخوك وتزوجتك تذمرت من حكم رب العالمين وگلت شنو حكمته بأن اتبهذل اني وبناتي واروح لبيئه غير بيئتي واترمل واتزوج حمايه ليش هذا العقاب
تالي عرفت هذا مو عقاب هاي رحمه من عنده لان لو بعدني على ذمة اخوك وصار بيه هذا المرض جان شمرني بلشارع اذا اني بصحتي وصغيره وخاني عاد من اكبر واتمرض هيج مرض قابل يبقى عليه طلع رب العالمين يحبني وراد مصلحتي عسى ان تكرهو شيئاً وهو خيراً لكم  وحتى بناتي رغم كل الي صار بيهن بس عيشتهن احسن عيشه واهم من هذا كله عشت الحب الصادق وياك عشت احلى حب ممكن مره تعيشه وفوكاها عشق الثلاثين اعظم عشق
انت هديه رِّبًـــ♡̨ـــٍْيٌٓ اليه حامد

حامد : وانتي فرحه عمري يمامه
يمامه : مااريد فرحه لتذكرني بيها جانت نار وتحرك بيه من الغيره
حامد : ههههههه تروحلج فدوه هيه وعشيرتها لتراب رجلج
يمامه : اووف شگد احبك
حامد : لا مااحبنها هيچ
يمامه : ههههههه احبنگ وحك علي بنابي طالب
حامد : اوووويلي الله
يمامه : ههههههه صوتك هسه يطردونه
حامد : رديلي ياشمعه عمري وعشگ السنين الي خلصن وانه انتظر ريحتج تعالي اشمنچ
يمامه : شتشم كلي ريحه ادويه
حامد : وحگ علي مااشمن ادويه اشمن ريحه الجنه بيچ
وجان يدنچ ويشمني من رگبتي من كل گلبه
افيييش ياريحه الجنه
يمامه : ههههههه انت الجنه والله

مرت الايام والاشهر ودخلنا ب٢٠١٨ جنا مأجرين شقه قريبه على المستشفى
حبيبتي ايوته جابت ولد وسمته هاشم على قمر بني هاشم عليه السلام
جانت هيه والبنات يومياً يخابروني وحتى بيوم ولادتها جنت حاظره قبل متدخل العمليات فتحولي كاميرا واشوفها حبيبتي بطنها واصله لخشمها وابراهيم يموت ضحك لازم ايدها ويرجف ويكول صوجي كله من ايدي شون احبلج وهذا مازن يضحك عليه

والحمدلله ولدت وصارت ام هاشم
ودق  ااااه ياودق بقت لهذا اليوم رافضه اي موضوع يخص الزواج وفتحت عيادتها ونجحت بيها وكعد تدرس ماجستير وهموسه انقبلت علوم فيزياء جامعه بغداد

اليوم رجعتي لبغداد بعد سنه غياب سنه حامد مرجعني اله تأكد من سلامتي سنه حاوطني برعايه اتحدى رجال حاوط زوجته مثله حتى تغسيل يغسلني حتى سبح بيده يسبحني جان مو زوج لا جان اب وابن وزوج وحبيب الله دزلي رحمه من عنده على هيئه انسان والي هو حامد

وصلت للعماره والكل منتظرني الذبايح والهلاهل بحيث دموعي مبطلت وخاصه من شلت حفيدي وجان يشاورني حامد
حامد : كبرتي وصرتي جده مو بس انه جد
يمامه : هههههههه شبقى من العمر اكيد كبرت
حامد : انتي بعدج طيرتي وحبيبتي بت ١٤ سنه
يمامه : بس شعر ماكو كله وكع
حامد : يطلع وانه اضفرنه بيدي واذا ماطلع كل مسامه براسج عطر من الجنه ليه
يمامه : اروح فدوه لكلامك الي يخبل
دخلت لبيتي بعد سنه غياب والكل كاعد وفرحان وبليل نمت بحضن حبيبي حامد
حامد : رديتي ليه ياطيرتي
يمامه : اني يمك ياروح طيرتك
حامد : احبنچ يمامه وحگ هو علي انفاسي انتي واعضاي وگلشي بيه
يمامه : الله لايحرمني منك يانظر عيني

حالياً ودق دكتوره ناجحه واسم معروف ومضربه عن الزواج تماماً ومازن لليوم يحاول يكسب گلبه لكن مقولتها الثابته طارق زرع بذره واستحوذت گلبي كله وماله مكان بيه لأي احد
اني ودق سجينة روح طارق لهذا اليوم والبدله معلكه بلكنتور يومياً من ابدل واروح للدوام الزمها والزم قميص طارق الي معلك بصفها وامسي عليه واكوله اشتاقيتلك حبيبي بعدني لهذا اليوم رغم نجاحي وحياتي المليانه حب من اهلي ومن ابن ايه وجهال جنه الي محاوطيني واموت عليهم بس تالي الليل احظن المخده الي بيها ريحه حبيبي الشهيد الي ادعي من ربي يجمعني بيه بيوم ولتخافون حياتي احسن حياه بس الگلب لطارق وبس

أيه : ام هاشم حبيبتي وبنوتي الطيبه عايشه مع الانسان الي فعلاً يستاهلها ابراهيم صاحب الحب العذري الي ضحى بروحه لأجل عينها ومخليها اسعد انسانه بلدنيا ودوم يمشون ويتغزلون وگانما عرسان جدد
اني ايه سجينة حب ابراهيم الشاب الي ضحه بعمره وشهادته لأجل عيوني
وادعي من الله يحفظه اليه ويحفظلي ابني

جنه : باقيه لهذا اليوم تحاول تكسب حب مازن لكن علاقتهم طيبه واثنين اطفال عدهم حامد ورقيه وعائله هادئه ومستقره وعلاقتها ويه أيه ودق اروع مايكون اكثر من خوات

فضيلة : من يوم ولاده هاشم وهيه بطلت أذيه بأيه وبدت تتقبلها وتحبها وهيه أيه هم طيبه وكدرت تكسب عمتها لكن هم مرات تطلع الها صفح بس متحملتها لخاطر ابراهيم

منير : بعده ممتزوج وحالياً عايش بتركيا حب الهجره واستقر هناك وتعدلت كثير من اموره واهمها ترك الشرب والتزم بالصلاه بس بعده عيونه تلعب على البنات

همسه : بنوتي الي قل الذكر بيها بلقصه لان حياتها جانت جداً هادئه بين بيتنا وبين بيت بيبيتها ومدلله الكل وحالياً طالبه علوم فيزياء ادعولها بلنجاح والتوفيق

احلام : على خبالاتها يوميه عالكه عركه من وراها بس حامد يرزلها بس ميأذيها وحجايتها الشهيره اني شعليه هنه خوثات ويمشن وراي انه شعليه

مازن : دكتور ناجح واب جيد وزوج نوعاً ما جيد ويحاول قدر المستطاع اسعاد جنه والتأقلم بحياته لكن بعده من يشوف ودق ينسى كل الي حواليه بعده من يكعد يمها يصفن بعيونها ودوم يراقب لبسها حركاتها صح مبتعد عنها لان تصده لكن عيونه فاضحته لهذا اليوم مازن سجين بحب ودق

الحجيه جميله وماادراك ماجميله بعدها لليوم تعد وتصف مباقي واحد خلصان من لسانها الجبير والصغير بس حميد عدها كله ولا حميد تحرك الگل المهم حميد مرتاح وعلاوي حبيب الجده والدلوع مالتها رغم عياطها ومراضيه على احد الكل تلزمهم تنعل ابهاتهم هههههه  بس هيه عامود البيت هيه بركته بوجودها ملمومين الجبل المرأه الحديديه ام گلب القاسي وكت الغلط والگلب الحنين وكت الالم وگلب الطيب وكت الشده ام وشيخه والنعم منها الله ينطيها الصحه والعافيه ويطول بعمرها

حامد : ااااااه ياحامد لو احجي العمر كله عنك مااوفي جزء بسيط من حبك وحنانك وطيبه گلبك ومن عشكگ الي يمتصدق انت حلم كل امرأه واني الله فضلني ودزلي مثلك لحياتي شيخ وحامي العشيره بحكمته وقوته واسمه الي يهز الكاع واب طيب ربه ايتام ومفرق بين اي واحد بيهم والكل يصيحله بويه لان يستاهل كلمه الاب لان فعلاً احسن اب للكل هو ورجال بار بأمه وشايلها على راسه وزوج طيب وحنون وفوك كله هذا عاشق ماصار ولا يصير مثله الله يحفظك اليه يااغلى من انفاسي

اني يمامه الي عشتم معاها شهرين متتالين قصة حياتها وقصه حياة بناتها قد تكون قصتي مؤلمه نوعاً ما وكذلك بناتي لكن اكيد بكل بيت بلعراق توجد الالاف القصص
ترددت كثير بقصتي لكن بناتي ودق وأيه شجعوني على طرحها وكالولي عمو يستاهل تنكتب قصته صح اخفينا بعض من الشخصيات والمواقف لتجنب معرفه الاشخاص الحقيقيين بس حامد كل الي انكتب عليه قليل بحقه

قصتي اعطيتها لأكثر انسانه حساسه اجادت وبشكل اقل مايقال عنه ابداع وتميز صاحبه القلم الماسي الدكتوره ريام كلمه الشكر قليل بحقك انتي انسانه بمنتهى الرقي وصاحبه اخلاق رائعه شكراً لتعبك كل هذه الايام وتحملك جميع الكلام وبقلب رحب تشرفت بمعرفتج ياغاليه وربي يحفظج
اتمنى تدعولي بأن ميرجع المرض وابقى تحت جناح حبيبي حامد وتبقى عائلتي بعيده عن الالم والنكبات تحياتي لجميع المتابعين يمامه

تم اطلاق سراحكم يامن كانت ارواحكم مسجونه بقصه (سجينه الروح ) اليوم اطلق سراحكم اتمنى القصه عجبتكم واعتذر على القفلات المجنونه الي تميزت القصه بيها القصه هذه طبيعتها تسجن كل من يقرأها واتمنى نجحت بسجنكم

لاتنسون التصويت حبايبي وحابه اسمع ارائكم حول القصه وكذلك اصحاب القصه يقرأون تعليقاتكم

تمنياتي لكم دوام الصحه والعافيه وربي يحفظ الجميع ويبعد عنكم السوء
تحياتي اختكم ريام