رواية سجينة الروح الفصل الثالث والعشرون 23 - بقلم ريام هادي

سجينة الروح
للكاتبه Reem
البارت الثالث والعشرون

مو شرط اليحب دماعتة فتحت باب
مرات اليحب بيبانة مقفولة..
مرات الدمع ما يسگي رمش بعين
ومرات الدمع لو ينزل بطولة..
مثل الدنيا من تعرف تأذي الناس
أعرفنة الترف من طگة حجولة..
وما أگلك بگلبي شصار من صديت
اليعشگ من صدگ البگلبة ميگولة..
أول مرة أشوف الظلمة نهر بگاع
الليل بلا نجم للفارگ شطولة..
يل مخليني أرجف علم من الشوگ
طفل بمگبرة وأشباح طلعولة..
أنه أعلم بالشجر جم ورگة صفرة اطيح
بس وياك أحس تاليتي مجهولة .
مرات العيون الباردة التأذيك
مو شرط التضيعك عين حراگة..
وأنه بجرفك البارد ضعت دمعة بريح
مثل گلبك الضيع گلبي بفراگة..
عفية الشال لتذبة أطيح وياه
لتوازيني اخلي عيوني تعلاگة..
لتوازيني أباوع عل الشمس مكسور
وأخلي الدنيا كلها تصيح مشتاگة..
لتوازيني أصرخ محترگ باليل
وما خلي غصن ما ينزع أوراگة..
وما أعرف شسوي  العمر طيرة وياك
لا انتة التطيرة ولنتة خناگة .،
من تروح أخاف ويكثر الدخان
ومن تحضني گلبي يموت باشواگة..
مثل المكص من نفترگ شر يصير
ولازم ننذبح لو ردنة نتلاگة..

يمامه : طلعت اركض واني اشوف فضيله تكمز وتعيط وتصيح يمه ابراهيم وليدي وحامد يحاول يهديها يحضنها ويكولها ان شاءالله مابيه شى لتخافين

يمامه : شبيه ابراهيم
حسان : خابرونه هسه عدنا ضابط صديق النا يداوم بالسجن الي بيه ابراهيم  وانوصي عليه كال ابراهيم مضروب سجينه وحالته خطره كولش ونقلوه بالمستشفى
يمامه : ظربت على صدري يمه دخيلك ربي وهسه
حسان : منعرف شى ولازم نروح لبغداد ومن حظنا الاسود اجيت اركض ابلغ حامد على الخبر وصوتي عالي سمعتنا فضيله وهذا حالها

حامد : يمامه تعالي اخذي فضيله لحجرتها
فضيلة : ياحجرة وروح ابويه واخويه اذا ماخذتوني وياكم احرگ روحي چا وليدي ديموت وتريد اگعد واسگت
حامد : الطريق طويل ومنعرف شنشوف هناك ولا تنسين ابنج مسجون يعني حتى صعب تشوفي حتى لو بالمستشفى
فضيلة : حامد خويه ابوسن اديك أخذي انه اموتن اذا ماشوف وليدي
يمامه : اخذها وياك والله اذا بقت تموت متتحمل
حامد : جهزي حالج دقايق ونطلع
الحجية جميله: شنهي صار عياطكم اخذ الدنيا چااصلي وركض معودت اخلص الصلاه واعرف شبلاكم
حامد : يمه ابراهيم انضرب سجينه بالسجن وحالته خطره
الحجية جميله: من صخام بوجهج فضيله تصخمتي وتعزيتي يمه وتالي وليدي هسه شونه
حامد : منعرف بس لازم نروح لبغداد ونشوف حاله ادعي يمه تمر على خير
الحجية جميله: نخيتج ياام البنين تردين ابراهيم سالم يمه وليدي هذا ابراهيم عزيز الگلب واختك وينها
حامد : ركضت تحضر نفسها اخذها وياي
الحجية جميله: يمه عينك على اخيتك هاي ماتتحمل لاتموت
حامد : لاتخافين والله الستار
يمامه : اجي وياكم ابقى ويه فضيله
حامد : لا ضلي هنا خلي نشوف شيصير

يمامه : طلعو وعافوني ويه الحجيه وجان تصيحني وبلعت ريك اهوو والله مابيه حيل اترزل منها
نعم عمه
الحجية جميله: اگعدي
يمامه : محتاجه شى
الحجية جميله: اسمعي انه اعرفن انتي ماتحبين تعيشين هنا وتردين ترحين لبغداد حتى لاصداد ولا رداد
يمامه : عمه شفتي عليه انه والله لخاطر بناتي مديتحملون العيشه هنا ليش ظالمتني ومتحبيني
الحجية جميله: انه اكرهنج عبن دمرتي وليداتي
يمامه : (بأستغراب) وشعليه اني
الحجية جميله: چا البت التعرف واحد يحبنها وتعوفه وتحب اخوه شترجى منها
يمامه : مفهمت قصدج
الحجية جميله: چا افتهمي يثوله جنتي تعرفين بحامد عاشكچ ورضيت تزوجين اخوه عادل ومن ورا طركاعتج صار دم الوليدات مي واحدهم مايرضى يباوع بوجه الثاني چا شون احبنج بعد وانحرمت من وليدي ٧ سنين ويوم مايرد گلها كم يوم وكتلوه

يمامه : اني اعرف حامد يحبني ورضيت اتزوج عادل مستحيل ماكو هيج شى اصلا. مصار ايام من عرفت حامد يحبني كل هاي السنين
الحجية جميله: چا والحجي الكاله عادل
يمامه : اوووف ياعادل شمسوي انت اسمعيني عمه اني مااعرف شنو الي كايله عادل عني ويمكن مثل مشوه صوره حامد بعيني شوه صورتي عدكم 
الحجية جميله: چا شنهي وليدي مايسوي هيج بأخوه
يمامه : عمه يعني تتوقعين واحد اخذ حبيبة اخوه ومارفله جفن ميكذب اعرف هو ابنج وتحبي وابد متقبلين احد يحجي عليه بس هذا واقع اني قبل مده بسيطه يله عرفت بمشاعر حامد وحتى عادل جان مفهمني بأن انتم اخذتو ورثه ومقبلتو تنطوه اي شى والسبب زواجه مني
الحجية جميله: يااا لا تسودنيني
يمامه : وداعت ابويه هذا الي صار كلي حامد ميقبل ينطي فلس واحد لان خطبني وعاف اهله ورثه علمودي
الحجية جميله: اوف ياوليدي ليش هيچ
يمامه : عمه اني مااكرهج ورغم كولشي تحجي عاذرتج اني ام واعرف مشاعرج بس كرهج الي بدون سبب تره اني كولشي مااعرف ولا ادخلت بين الاخوه ولا اعرف اساس العركه اصلاً غير قبل ايام

الحجية جميله: هسه عيفينا من الراح
شون تاخذين البنيات وتولين لبغداد چا هيه سايبه
يمامه : عمه ابوس ايدج افهميني اني تعبت وبناتي تأذن وشفتي ايه شصار بيها
الحجية جميله: هذا قدر وصار وچا هسه بغداد امنه گلها گتل وناس تمالخ بناس
يمامه : منطقتنه امنه واذا صار شى ارجع
الحجية جميله: چا هيه لعبه رايحه وراده اكرصي روحج واركدي لو ماتكدرين البيج مايخليج
يمامه : هاي لو احجي وياها لباجر ميفيد قافله
الحجية جميله: شو صفنتي مثل الطرنه
يمامه : وياج عمه
الحجية جميله: اركدي واسكتي البنيات اريدهن كبال عينا
يمامه : عذريني عمه لازم اروح اذا ابقى راح اتأذه واني والبنات
الحجية جميله: انه صوجي اسولف وياج يجي زلمتج وسالفتي ويااه
يمامه : كمت من عدها وهي صايره نار وتعيط دخلت لغرفه البنات لكيت ايه صافنه
شبيج ماما
أيه : ابراهيم شبيه
يمامه : سديت عيني وفتحتهم بحيره واني مااعرف شكول الها
أيه : كتبت احجي ماما ابراهيم شبيه
يمامه : مااعرف ماما خابرو عمامج وكالو متأذي
أيه : نزلت ادموعي اعرف بيه متأذي اجاني بالحلم وگلي لتعوفيني ولزم ايدي
يمامه : اي وشصار
أيه : كتله مااعوفك شو اجتي وحده وجرته حيل مني ودفعته بالكاع ركضت اشيله جان اجرني حيل واخذتني وياها وبقى هو يصيح عليه ويكول ليش عفتيني
وكعدت ابجي ومخروعه عليه
يمامه : ان شاء الله خير بنتي بس لتبجين امي شربتي علاجج
أيه : لا
يمامه : ليش ياامي غير حتى اطيبين اوف والله انشلع گلبي تعالي ودق شربي اختج علاجها
ودق : ماما هسه راح نروح لو لا كل شويه براي
يمامه : غير نشوف شيصير وابن عمتج شصار منه
ودق : إٱللـِْﷻـِْﮭﮧ يكومه بالسلامه ابراهيم حباب جان اسمع صوت يااهل الدار وينكم اي هذا صوت منير وركضت
يمامه : على كيفج لتوكعين على وجهج
أيه : من سمعت صوت منير انقبض گلبي مااريد اشوفه هو بلاشي قبل جان يعيب عليه هسه وبهذا وضعي وحالتي التعبانه شراح يسوي

ودق :  الْحٍمَدٍ للـّہ على سلامتك شنو هاي رحت ونسيتنا
منير : هلو غزاله ولج اعوفج جم يوم ارجع الكاج احلى متكوليلي شتاكلين لخاطر الله وهيج تحلوين
ودق : ههههههه شكد كذاب كولي شونك صحتك شونها وبالكليه هم تكمز لو عقلت
منير : استغفر إٱللـِْﷻـِْﮭﮧ يابنتي اني انسان مؤمن واخاف من الحرام
ودق : لا بالله هذا منو اليحجي متسكت لابربك كولي شونها الكليه
منير : يمعوده خلصونا تتغير حياتك بالكليه وتصير تخبل شو صارت سوده مصخمه كمت اترحم على السادس غير دك دراسه وتعرفين اوامر الباشا حامد لازم انجح من اول دور واذا منجحت يبطلني ويلزمني الكاع فأني شسويت كم اقرا ولا ارتاح وكوه اطلع درجه نجاح
ودق : الله يوفقك وتنجح بأمتياز
منير : باع هاي ياامتياز اريد مقبول (درجه 50) ابوس ايدي وجهه وكفه  السچ والدراسه الج عيني
ودق : شعبالك اعجبج
منير : انت تعجب الملك ياملك
ودق : ههههههههه والله انت فد واحد كارثه
منير : كوليلي شو البيت هدوء متعودت على هيج هدوء اذا مو عركات وصياح ولطم ميصير هذا بيت الحجي راضي اخاف دخلنا لبيت غلط

ودق : هههههه لا بيتك بس خطيه عمو حامد وعمه فضيله راحو علمود ابراهيم مضروب بسجينه
منير : لا بربج وتالي
ودق : بعدهم مواصلين لبغداد وميعرفون شنو حاله الله يستر
منير : اني لازم ارجع لبغداد
ودق : قابل شسوي هو انت طبيب وانت هسه اجيت والي لازم يروح مداوم ولا هامه شى وجان اسمع صوت ورايه

مازن : ومنو گلچ مهامني بكيفج تحجين
ودق : جفلت فززتني شبيك
مازن : وشبت بيج انتي ليش تمسلتين هوايه
ودق : اهووو هذا يريد يتعارك من رخصتك منير ادخل جوه احسنلي
مازن : احسن جفينا شرج وشر لسانج

حامد : وصلنا لبغداد بعد وقت طويل وجو تعبان وبارد ومصار وقت قليل من رجعنا من كربلاء يعني موت تعب بس خوفنا على ابراهيم نسانه كولشي وديت فضيله لبيت كريبي بغداد الجديده كوه اقتنعت  ورحنا للضابط عمار وگبل لمستشفى الكاظميه

واخذلنا اذن بالزياره دخلنا على ابراهيم جانت حالته تعبانه ومشدوده بطنه بس عدا مرحله الخطر
ابراهيم : فتحت عيونه واشوفن ابويه حامد وعمي حسان جنت حيل مشتاق اليهم هاا يابه الله يساعدك
حامد : هاا بويه صگد جذب هيج توكع گلوبنه چا حيلنا انهد وامك ادك وتطلم

ابراهيم : شونها امي
حسان : شونها چا غير مرعدت (ملخت) روحها عليك ودكت رجل اله اشوفن ابراهيم
ابراهيم : وهسه هيه وينها  
حامد : بيت ابو علي گلي بويه شجرى وعلى كيفك سولف مااريدنك تتعب
ابراهيم : (احجي بتعب ) والله يابويه انه كاعد بأمان الله ومااشوفن غير وليد بعمري  تكاثرو عليه ودك ضرب وهو يحاول يفگ منهم مايكدر  انه انقهرت عليه وادخلت كتلهم چا هيه سباعيه گلگم على واحد ومااشوفن غير جبيرهم ضربني راشدي انه انهضمت چا شون يضربني ومااشوفن نفسي غير اطيح عليه دك ضرب يردون يهدوني مايكدرون

حامد : يابويه انت شدخلك يجوز مأذيهم
ابراهيم : بويه الوليد فقير انه اشوفنه دوم خانس وساكت وبيده كتاب ويقرا وماله شغل طشت رشت بس همه اليسكت ياكلوه
وانه ماتحملت هيج ولزمت جبيرهم دك وانه ذبيت حركت گلبي كلها بيه جيتو عليه وتعرف هنا الكثره تغلب الشجاعه ومااحسن غير سجينه شگت خاصرتي شگ
حسان : مراح يعوفوك الي سويته راح يردوه
ابراهيم : چا شيسون يسون انه مااخافن

حامد : بويه اعرفنك ماتخاف بس ذوله مجرمين والغدر طبعهم چا ربك ستر وعشت المره الجايه مااعرفن شيصير
ابراهيم : والله يابويه گلشي بيد ربك والروح بيده
حامد : انه اشوفلك صرفه لازم انقلك لغير مچان لو اعرفن انطي حالي ومالي المهم ماتأذه
ابراهيم : ابويه شونها امي جده مازن ومنير  عمه يمامه البنيات
حامد : گلهم بخير
اروحن اشوف الضابط واجيك
حسان : طاحت گلوبنا عليك
ابراهيم : عمي شونهم
حسان : اعرفن عيونك عليمن تسأل بخير بويه لاتخاف البت زينه
ابراهيم : ماحجت ماطلع صوتها
حسان : لا بويه على حطت ايدك گلشي ماكو بس جن راح يرحن لبغداد
ابراهيم : طفرت من مكاني وتأذيت حيل
حسان : ولك مسودن شون تطفر هيج الخياط گله ينفتح
ابراهيم : ليش تروح لبغداد شصار
حسان : هاي امها ركبها ابليس واله ترجع لبغداد سودنت خالك وحاول يقنعها ومايفيد
ابراهيم : وايه شون راح تروح
حسان : چا وليدي غير امها ولزم تروح وياهم
ابراهيم : وشكد يبقون
حسان : والله وليدي اظن مايردون للعماره چا هاي امها عقلها موش براسها تمشي وتصيح اريدن بغداد والحجيه تصيح وتستريح ومايفيد چن هلمره يوليدي مامش رده  ليهم
ابراهيم : گلبي نار عليها وجان يطب ابويه حامد
حامد : شوف وليدي اتفقت ويه عمار وانطيته المقسوم راح يدخلك موبايل وانت ضمه زين لاتخلي احد يلكفك وعمار اتفق ويه اثنين من حراس السجن يعرفك عليهم بوقت واجبهم تكدر تخابر من يرحون ويجي واجب غيرهم تضمه زين وابتعد عن المشاكل راح ينقلك لغير قاوش مابي ذوله الوادم اخافن عليك وليدي

ابراهيم : والله يابه دخلتني الجنه من دخلت الموبايل ليه وانه اضمنه بروحي بس اكدر اطمن عليكم
حامد : ابراهيم لا تأذي امك بيك تره انه مااتحمل ملامتها وعيونها تحمل مده واطلعنك بس تحمل
ابراهيم : لا تخاف يابه ابنك سبع
حامد : اعرفنك سبع بس انتبه لنفسك نعوفك هسه ونرد عليك باجر لان اضابط كتل روحه يخاف من المسؤوليه
ابراهيم : مودعين بالله وسلمولي على امي
حامد : يوصل وليدي وباجر نرد نشوفك

حامد : ردينا لفضيله وطمناها
فضيلة : انه گلبي مامرتاح اله اشوفن وليدي واشمنه
حامد : چا انه اكذب عليج
فضيلة : خويه رحمه لبوي انه ابراهيم النفس ليه واذا صار عليه شى انه اموتن انه ماگلك تكذب حاشاك بس انه گلبي مايرتاح اله اشوفنه
حامد : مااكدر اخذج وياي عبن كلها حرس وزلم غربه بس محلوله اخليج تسمعين صوته
فضيلة : يبعد اختك گلشي راضيه المهم يبرد گلبي

يمامه : بقيت افتر  الليل كله ومااكدر انام وماكو خبر عنهم والحجيه اكلت راسي خابري وخابري واني ادك على حامد ميجاوب وجان يدك
حامد : هَــْـِْـْْـِلاّ يمامه داكه علي
يمامه : اي شكد دكيت وين جنت
حامد : جنت العب چا انتي موتعرفين وين
يمامه : مًو هذا قصدي بس قصدت شصار بشرنا گلبنا نار على ابراهيم وخاصه الحجيه اگلت گلبي ومن ادك ومتشيله عبالها اكذب وتبقى تعد وتغلط
حامد : هههههه والله الحجيه ماترضى عليج لو شماسوين مربيتلها عله
يمامه : اعرف تموت مني المهم طمنا
حامد :الحمدلله مابيه شى ربج لطف بينا والوليد بخير
يمامه :  الْحٍمَدٍ للـّہ والشكر وانتم وين هسه
حامد : بيت ابوعلي كرابتي
يمامه : ليش مرحت لبيتي ترتاح هناك اكثر
حامد : لا مااريدن مرتاح هنا
يمامه : براحتك المهم تنتبه على نفسك
حامد : هاااا انتي ياهي اخاف غلطان انتي يمامه لو منهي
يمامه : هاي شبيك قابل شگلت
حامد : هذا هو عمي مشكوره روحي طمني الحجيه ونامي
يمامه : مااشي صحت حامد
حامد :خير
يمامه : سكتت وبقيت ساكته
حامد : اعرفن گلبج حجر چا جديده علي (احجي بگلبي) مايهون عليج تريحيني ولو بچلمه لازم تعلگيني وتأذيني احجي شنهي ليش ساكته
يمامه : تصبح على خير
حامد : چا هذا الي الله كدرج عليه
يمامه : شنو قصدك
حامد : وانتي من اهله وسديته بوجهه

يمامه : سده بوجهي عرفت ضاج اني بحيره من امري مره مقسومه اثنين بين حياه بناتها وتفكر بيهم وبين شخص بدا گلبها ينبض اله واذا اختارت واحد منهم الثاني يتأذه

حامد : ثاني يوم رحنا لبراهيم الصبح  وجان حاله احسن  الْحٍمَدٍ للـّہ واخذت تلفون اله بس لازم مابيه كاميرا مومهم المم نسمع حسه ونطمن عليه
هاك بويه خابر امك
ابراهيم : هااا يمه
فضيلة : (اعيط وابجي) يبعد امك ورويحتها بيه ولا بيك يمه
ابراهيم : يمه رحمه لجدي لاتبجين انه تعبان لاتعبيني
فضيلة : يمه شون ماانهضم وحگ الرضا المسموم انه متت والله حياني چا وليدي مضروب ومااتسودن
ابراهيم : اذا يمه تردين ارتاح لاتبجين انه بخير لاتخافين
فضيلة : يمه ماخلاني خالك اجي اشوفنك
ابراهيم : يمه وين تجين زين يسوي ابوي چا كلها زلم غربه وحرس يمه لاتخافين ولدج زلمه من ظهر زلمه ماينخاف عليه
فضيلة : اوووف ياوجعه گلبي انت يمه شوكت ترد ليه واملي عيوني منك يبعد امك
ابراهيم : ان شاء الله خير يمه بس اخذي علاجج ولا تعبيني عليج واذا تريدين راحتي مااريدن تنوحين
فضيلة : بس اسمع حسك ارتاح يمه
ابراهيم : لاتخافين احاول اخابرج واسمعج حسي بس لاتبجين يله يمه اروحن اخاف يجون والموبايل ممنوع
فضيلة : مودع بالله وليدي الله ومحمد وعلي وياك
حامد : امك سمعت صوتك وهذا عندي اهم شى چا شيخلصني منها
حسان : إكلك حامد ليش مايخابر على الحجيه هم يطمنها
حامد : عدنا ربع ساعه والحجيه اذا سولفت ساعتين وتكول هسه سولفت مصار ١٠ دقايق

ابراهيم : بويه اريد اسلم على ايه والبنيات ولزم اخابر على عمه يمامه ترضى
حامد : چا وليدي غير خياتك خابر بويه وانه اروحن لعمار راد فلوس بعد شسوي نحشي حلكه حتى يحط عينه عليك دقايق وارد

ابراهيم : ايدي ترجف من انطاني الرقم ودك ويه كل دگه احس گلبي يدك
يمامه : جنت اغسل مواعين لان ماكو احد بالبيت وجنه تساعدني ودك تلفوني رقم غريب جاوبت الو اسمع صوت واحد تعبان ويصيح شونج عمه انه ابراهيم تفاجأت وكيفت هلوو عمه شونك  الْحٍمَدٍ للـّہ على سلامتك والله بالنا يمك
ابراهيم : الله يسلمج
يمامه : انطيك الحجيه
ابراهيم : هااا انه اريدن اسلم على ايه
يمامه : شنوو أيه بس ايه متحجي مو تدري
ابراهيم : بس تسمع صوتي اسلم عليها وعلى البنيات
يمامه : تدلل بس البنات بالمدرسه بس ايه موجوده
ابراهيم : چا انه مااريدن الدنيا گلها اريدن رويحتي (احجي بداخلي)

طبيت للغرفه باوعت نايمه غاطه بالنوم

بس لازم اكعدها خطيه منو يكول يكدر يخابر بعد
ماما ايوته اكعدي
أيه : فتحت عيوني بنعس واسمع ماما تكولي ابراهيم على التلفون طفرت من مكان
يمامه : اسم الله بنتي الرحمن على كيفج لتأذين نفسج هاج احجي هو كال حتى لو متحجي اريداسلم
أيه : اخذت التلفون من ايد ماما وشفت ماما عافتني وطلعت
يمامه : اني اعرف ابراهيم يحب ايه وتمنيت منحكم جان كبعتها وانطيتها اله هو الوحيد الي يستاهلها حافظ على سمعت بنتي وضحى بروحه لخاطرها بس حظه المسكين وفوكاها ٢٠ سنه عفته يحجي وياها اعرفه يحبه واكيد طاك گلبه عليها

ابراهيم : تسمعيني إيه بس اتنفسي قوي حتى اعرف كعد تسمعيني
أيه : تنفست كولش قووي ردت اصرخ واكوله اشتاقيتلك خوما بيك شى أذوك
ابراهيم : سمعت انفاسها اااووووف ياانفاسج شونج ايوته اشتاقيتلج بطه اعرف متكدرين تحجين بس تسمعيني تسوه الدنيا عندي اني زين لتخافين ويوميه اتذكرج واكعد احجي وياج واغنيلج 

أيه : اسمع كلامه وابجي
ابراهيم : دااسمع دموع لتبجين اني زين لخاطرج ايوته ارجعي احجي مشتاق لصوتج امنيتي اسمعه متعرفين شون راح يهون عليه سجني اني عندي تلفون صار راح اتعلم منين يكتبون رساله وادزلج بس اخاف من عمه يمامه واستحي منها من تكدرين تكتبين اكتبيلي حتى اراسلج
ايوته تره انه احبنج وروحي معلكه بيج
أيه : كمت ابجي بصوت مسموع مقهوره شنو ذنبه بسببي تنتهي حياته وشبابه بالسجن لزمت التلفون اني اعرف اكتب رساله بيه وكتبتله مشتاقه الك ولصوتك من تغنيلي انتبه لنفسك وتغطى زين من تنام واني زينه ليضل بالك

ابراهيم : واني احجي وجان يصير صوت باوعت رساله ادوس خرب چا بس لو اعرف شون يفتح هذا ااي فتحته قريت كلامها
ورجعت كتلها دومج بخير ياغاليه اروحن انه
امنتج على صحتج انتبهي عليها
مودعه بالله
يمامه : طبيت لكيت ايه تبجي حضنتها شبيج ياماما وجان تكتب ضاع ابراهيم من ورايه
لا ياامي انتي شعليج كله قدر ومكتوب قابل انتي مرتاحه ادعيله الله يفرجها عليه وعليج انتي هم لازم تصيرين سباعيه وتجازين تضحيته لازم ترجعين قويه حتى ليكول ضيعت عمري علمود لا شى اريد بنتي ترجع تضحك وتكمز وكولشي تسوي
أيه : كتبت ماما شوكت نروح لبغداد
يمامه : اووووووف انروح ماما خلي يرجع عمج ونروح

حامد : وره ثلث تيام (٣ايام) رجعنا للعماره بعد ماطمنا على ابراهيم وطول الطريچ وانه افكر چا هسه شون گل يوم طلابه تأجل روحه يمامه لبغداد بعد مابيها مجال لازم ترد وصلنا والتعب مسيطر علينا گلها ركض برگض دخلت وعيوني تدور عليها وطلعت من غرفه البنيات
يمامه : سمعت صوته يسلم على امه مشفت نفسي غير طافره من مكاني والبس الربطه لان اكيد حسان وياهم وسلمت
الْحٍمَدٍ للـّہ على سلامتكم
حامد : الله يسلمج حضريلي ملابس نظيفه اريدن اسبح وتعبان
يمامه : احضرلك الاكل
حامد : لا اكلنا بالطريچ
شونج فضيله  الْحٍمَدٍ للـّہ على سلامة ابراهيم شونه هسه
فضيلة : هله خيه الله يسلمج الحمدلله يم الكريم
يمامه : الله يحفظه ويرجع الج بخير
فضيلة : رحمه الله والديج من رخصتج اروحن ارتاح
يمامه : مرخوصه
حامد : يله بسرعه تره تعبان وكوه واكف على رجلي
يمامه : ركضت طلعت ملابس اله دشداشه نظيفه وملابس داخليه وحطيتهم على الجربايه اخذهم وراح انتظرته وره مده اجه ينشف بشعره
حامد : دخلت للغرفه لكيتها كاعده خير محتاجه شى
يمامه : هااا لا بس گلت خاف انت محتاج
حامد : لا مامحتاج طفي الضوه وراج اريدن انام ولا تكعديني على العشا
يمامه : اخاف تجوع بليل
حامد : جعت انده عليج چا اطيرين
يمامه : مااشي وطفيت الضوه وطلعت
بقيت اقري البنات جان عدهم امتحان مراجعه مال قبل نصف السنه تعبت انكسر ظهري ويه همسه بس ودق هي تدرس وحدها اباوع على ايه ينكسر خاطري من اشوفها تباوع على خواتها من يقرن بس وين اوديهن هنه تلاثتهن بنفس الغرفه كملت وسويت عشا واجوي الولد تعشو

ودق : ماما وديتي اكل لمنير
يمامه : انتي شنو سالفتج ويه منير
ودق : هاااا شنوو مداافهم
يمامه : اشوفج هوايه تكعدين يمه وسوالف وضحكم لوين واصل لتنسين نفسج ودق
ودق : لا ماما غلطانه
يمامه : اسمعيني زين انتي هسه صغيره ومتعرفين مصلحتج تره مستقبل البنيه شهادتها تلحكين على هاي الخرابيط
ودق : شبيج ماما دخلتينا بمتاهات
يمامه : انتي لدخلين نفسج بمتاهات تره الشمات كلها تنتظر اوكع لتكسريني بيج ودق مكافي الي صار ورجعتنا هنا شون صارت
ودق : دنجت ماما ممسويه شى
يمامه : اعرف ومااسمحلج تسوين شى ابن عمج شاب وصغير وكعدتكم وحدكم محلوه بحقج لتنسين نفسج ومااريد اكرر كلامي مره ثانيه كدامه افشلج
ودق : ماشي العفو مااعيدها
يله نامي وراج دوام وحاولي تحطين عقلج بدراستج اريدج الاولى
ودق : حاظر تصبحين على خير
يمامه : وانتي من اهل الخير
طلعت والبيت صنطه والجو بارد كولش وجان نهايه شهر ١٢ وبعد ٣ ايام راس السنه اخذت المنشفه مالتي ودخلت للحمام سبحت والمي حار يخبل واتذكرت مااخذت ملابس ويايه شنو هذا الغباء اضطريت البس نفس دشداشتي واطلع من الحمام زين شون هسه صعدت للسطح والمنشفه على راسي كمشت الملابس صايرات ثلاجه ومنديات كلهن مي اوف لازم ادخل للغرفه على كيف اخذ ملابس شسوي لعد ابقى بهايه كلها ريحه اكل وتكلاه مال العشا

طبيت على كيف فتحت الضوا الخافت وفتحت باب الكنتور جان بيه صوت خفيف اخذت ملابس باوعت منطيني ظهره حامد وغاط بالنوم كمت نزعت على كيفي وبديت ابدل لبست دشداشه صيفيه مااعرف انام بشى ثخين وجانت ربع ردن وكصيفه وحطيت على راسي المنشفه ودااطلع وجان يصيح وين رايحه طفرت طفره زين ومجلطت من الفزه

حامد : شبيج شفتي جني متمدد على الجربايه وداير وجهي عليها
يمامه : لا بس عبالي نايم
حامد : غير نايم وانتي تحومين على راسي كوه تتحارشين
يمامه : اني اتحارش والله اخذت ملابس ورايحه انام يم البنات
حامد : فتحت عيوني زين هاي شنهي المصخمته
يمامه : شمسويه
حامد : شون تطلعين هيج تسودنتي
يمامه : الكل نايم والبيت تمشر الابره بيه تسمع صوته
حامد : بله نزل واحد من الولد چا ينتظرون ياخذون رخصتج يله والله شنهي الست يمامه تدري الكل نايم وطالعه مصلخه

يمامه : اني موو مصلخه لابسه دشداشه
حامد : چا انتي والمصلخه سوه الزنود والصدر كلها طالعه وحصر بعد شحابه اطلعين عندج عرض ازياء
يمامه : تقربت منه وصرت عصبيه رجاءاً حامد لتجرحني بالكلام اني ممتقصده وغرفه البنات مو بعيده كلت بسرعه اروح للغرفه والمنشفه على راسي وانزلها على ايدي يعني كولشي ميبين

حامد : چا وهذا جسمج شون تغطي بيدج وانه چم مره منبه ماتطلعين هيج يمكن وانه ماموجود هيج تفترين
يمامه : تره طوختها حيل عيب هذا الحجي حامد شايفني والله هاي اول مره ولان تعبانه والكل نايم سبحت وبدلت وكلت اروح انام كعد على حيله تربع بالجربايه وصاح
تعالي ليه
يمامه : هسه راح ابدلها
حامد : اكلچ تعالي ليه
يمامه : عيونه تجدح نار ويصك على سنونه تكول كعد من النوم بس حتى يتعارك ويايه تقربت منه وجان يجر المنشفه من راسي وشمرها بالكاع
حامد : حسيت عليها من اول مادخلت وانه گلبي الطايح حظ يلوب عليها چا وفوكاها سابحه وانه اسمع صوت شون تنزع وتلبس چا هيه روح لو خشبه وانه صار مده ماكاضها وروحي مفرفحه على ريحتها انداريت ردت اشوفها واملي عيني منها واشوفنها لابسه ملزك والثوب يريد يطك عليها ورثت منها لو الزمنها اكطعها چا شون تطلع هيج وفوكاها مامهتمه صحتها وكفت كدامي مثل الطالب وخايف من مديره وانه گلت لازم اكرصها حتى اتوب وجان الزم الثوب من صدرها وارعطه نصين من الطول للطول  (شكيته نصين ) وهي شهكت يله ولي بدليها حتى ماتكرريها

يمامه : شو هذا لزم الدشداشه وشكها عليه اني تخبلت بس سكتت وحصرتني الدمعه اباوع عليه وكأن جنا بحرب وهو فاز بيها عفته ومشيت ابدلها

حامد : شفتها ظلت هيج وانه تخبلت اباوع على جسمها كل مسامه بيه اعشقها وحسيت بيها تشهك من اشتعل ابيج انه مااتحمل اشوفنها هيچ وماحسيت بروحي غير اروحن وراها واحضنها من وره واشمنها من ركبتها هي هنا عبالك طفله وماخذين لعابتها وكامت تشهك سحبتها من ايدها
يمامه : عوفني احجي وابجي
حامد : تعالي شوي واعوفنج
يمامه : اترجاك عوفني حامد
حامد : تعالي لا تعاندين وسحبتها ودموعها عشره عشره  نزعت دشداشتي وتمددت وخذيتها بحضني
يمامه : رحت ويااه واني ابجي بس جنت محتاجه حضنه تعبانه من كثر التفكير وكل شويه براي ردت هاي الليله بحضنه بدون ماافكر بشى ولا بأحد ردت ولاول مره اكون بحضنه واني احبه مو واجب لان زوجي رغم تصرفه محلوو  بس مشفت نفسي غير امشي ويااه وابجي

نمت على ايده وسحبني بحضنه 
حامد : لاتبجين باجر اشتريلج اغاتها
يمامه : انه مو عليها حامد انه ابجي على حالي
حامد : شبي حالج
يمامه : تتذكر قبل كم يوم من حجينا بليل من جنت بيت فرحه
حامد : الله لايذكرهم بخير ناس متخاف الله اي كملي
يمامه : كتلي تعبان اني هسه اكولك تعبانه
حامد : شنهي التعبج
يمامه : انت حامد
حامد : من ساعه السوده عليه انه اعرفن گلشي يصير وصحتي حامد

يمامه : مفهمتني
حامد : چا انه فاهمج كبل حتى افهمچ هسه
يمامه : حامد ممكن اطلب منك شى
حامد : يايوم طلبتي ومانفذته
يمامه : اخذني بحضنك حيل
حامد : اوويلي عليك حميد چا لو كل طلباتج هيج انه داخل الجنه

يمامه : ابتسمت والدموع بعيني بقيني اليوم بحضنك
حامد : بس اليوم
يمامه : تنهدت وكتله احضني واتذكر  اني شنوو بالنسبه الك
حامد : حضنتها بقوه وشميتها من شعرها انتي طيرتي وعلتي وتعب السنين

يمامه : بده حامد يتلمس بهدوء بيه واني مغمضه ردت انطي بهدوئي اشاره بأن موافقه يلمسني
حامد : ردت طعمها مشتاق ليها وگلبي يدك ويمكن الدنيا گلها تسمعه وارجف واحاول اسيطر على نفسي مااكدر وخايف لاتنفر مني بس انه روحي مفرفحه چا هيه بحضني واحسن بكل مسامه تلامس جسمي واسكت لا اله تسودنت وماظل عقل واتركها  وبديت اشمنها من رگبتها واسمع انينها هدوئها وتقبلها ليه دمرني بذيج اللحظه فقدت عليها وفوكاها احس هي بحركاتها وياي تكول انه الك گلي الك وتقربت منها ويه كل لمسه مني احس بحبها ليه اول مره احس يمامه ذايبه وراغبتني مثل ماانه راغبلها وكضيت وياها ليله تسوه عمري گله وتعب السنين حتى اكثر واحلى من اول ليله لمستها بيها لان حسيتها تريدني

يمامه : ذبت بكل لمسه منه بديت اتجاوب ويه كل حركه منه نسيت كل الي صار ردت اكون بحضن الانسان الوحيد الي مستحيل احبه بيوم بس اعترف حبيته وحب عجيب صح متناقضه بقراراتي بس الشى الوحيد الي متأكده منه اني صرت مو بس احبه لا صرت اعشقه واعشق حتى لمساته اليه لهذا نسيت بليلتها كولشي وشلت حاجز الخجل بينا وقضيت ليله تجنن بحضن صيادي اي اعتبره صيادي الي صادني من الدنيا كلها وخلاني سجينه بحبه وللفجر احنه سوه وكانه بصراع گل واحد يثبت للثاني شكد يحبه وراغبله

كعدت الصبح كلها ساعتين نمتهم واشوفه شون حاضني حيل عبالك طفل ميريد يترك امه سحبت روحي منه على كيف وهو نايم وحتى على وجهه مبين نايم مرتاح بدلت واخذت ملابس نظيفه ويايه ورحت سبحت كعدت البنات ريكتهم وبدلن وطلعن

حامد : كعدت مرتاح والدنيا طايره طير بيه احس روحي توني عريس جديد ادور عليها ماكو كمت لبست وطلعت لكيتها بالمطبخ وانه اضحك ومرتاح بستها وطفرت
چا بس لو تبطلين كمزاتج
يمامه : صباح الخير انت تكمزني دائماً
حامد : شعندج كاعده مصار هواي من نمنا واغمزلها
يمامه : شنو نسيت مدارس البنات وهذا وقت كعدتنا بس الظاهر حلت الك النومه
حامد : چا كل هاي الراحه وماتريدين تحلى اليه النومه وسحبتها عليه وجان اشمنها من حلكها
يمامه : باسني واني مبادلته
حامد : شبيج يمامه وضعج معاجبني
يمامه : اكولك شى بس متزعل
حامد : ياستار خير
يمامه : اني بعدني مصره اروح لبغداد
حامد : شنهي
يمامه : بس يخلصون البنات امتحانات اروح

حامد : عيدي ماسمعت زين اخاف بعدني نايم
يمامه : كتلك ارجع لبغداد بعد ميخلصون البنات امتحاناتهم علمود وبعدني ممكمله كلامي

ومااشوف غير ينگلب عليه تخبل تهستر وشكو مواعين كدامه كسرهن
بت الچلب انه لعبه بيدچ گل شوي براي طفل كدامج
يمامه : كمت ابجي وخايفه منه على كيفك فدوه بس خلي افهمك
حامد : شتفهمين ولزمتها حيل من ايدها تلعبي علي يمامه انه حامد الي هاز الدنيا هز زلم مشوربه تخاف من اسمي انتي تلعبين علي
يمامه : والله ملعبت بس خلي افهمك وهو يهز بيه ولازمني حيل عيونه براسه وعروق ايده تريد اطك من الاعصاب
حامد : چا شسمين الي صار البارحه نزوه لو شهوه لو لعب

يمامه : ولا وحده منهن والله اني
حامد : انتي شنهي انتي سبب دماري وانه اليوم اگلچ انه مااريدج ولو يصبوج ذهب مااكربلچ وامشي
يمامه : كام يسحل بيه واني ابجي وامه وفضيله وجنه طلعو يركضون وهو يسحل بيه اريد افهمه اكوله بنتي تعبانه لازم نروح فتره حتى نرتاح وتعال كل فتره يمنا لازم اودي ايه لطبيب ميصير ابقيها هيج بس هو منطاني مفكه عباله البارحه مجرد نزوه مني ميدري انه البارحه جنت بمنتهى الحب ويااه
جان يجرني للغرفه وشمرني بالكاع اسمعي لج تلمين ملابسچ گلها اروحن احضر السياره اوديج لبغداد
يمامه : حامد اعصابك بس خلي افهمك اني لازم اروح علمود ايه البنيه تعبانه
حامد : اسمعي تاخذين ايه وياج اليوم والبنيات يضلن يخلصن امتحانات وادزهن الج
يمامه : كمت ابجي بصوت عالي مااكدر اعوفهن كام يعيط بالزايد ولزم غراض الميز تواليت وكومهن بالكاع
چا بس تعرفين تعوفيني يله اذا كملتي خلال ساعه وتراب ابوي اسحلج من شعرج واخذج لبغداد وحيدج وتحرم بنياتج عليج يله

الحجية جميله: يمه دخيله شجرالك ولج يمصخمه شعملتي
يمامه : كمت ازحف وكعدت يم ايد عمتي وابوسها عمه دخيلج خلي يتحملني بس هلكم يوم مااكدر اعوف ودق وهمسه هنا ردت افهمه لازم اروح علمود ايه تعبانه
الحجية جميله: يمه اسمع للبت چا هيج تعيط وتكسر كلشي هاي انت العاقل الشيخ
عوفها گلها چم يوم يكملن البنيات وتاخذهن وتولي وانه مااخليك تشوف خيالها

حامد : يمه حلفت تراب ابوي اذا ماتمشي هسه تحرم تشوف بنياتها
الحجية جميله: كومي يمه ماطول حلف مايرد چلمته اكسري الشر واستري على نفسچ وانت حميد على كيفك ويه نفسك چا هيج كالوها انه ماارضى تاخذ البنيات وتولي بس مو هيچ يمه
حامد : هذا الي عندي حجيه يله بسرعه

يمامه : كمت اشهك وكمت وكفت وطلعت كم قطعه من الملابس وطلعت من الغرفه وطبيت لغرفه البنات لكيت ايه تباوع بعيون حيرانه شافتني ابجي حضنتها لتخافين ماما تعالي ابدلج حتى نروح لبغداد
كمت بدلت وحضرت كم قطعه الي ولايه واباوع عليه من الشباك وبيده الجگاره ويروح ويجي يطفي وحده يشغل الثانيه والسبحه تريد تنكطع من ايده صحته علمود يشيل ايه ويايه مااكدر وحده وحطينها بالكرسي

الحجية جميله: يمه تعالي اشمنج أيه حبوبه ردي ليه واسألي على حبوبتك لاتكطعين
أيه : بست بيبي من راسها ومن ايدها واباوع على عمو عيونه شرار وماما مبطلت بجي مبينه عركه بينهم وسمعت شكال الها بس هسه ودق تتخبل لان ماما عافتها وراحت وهمسه شون تتحمل بدون ماما

يمامه : طول الطريق واني ابجي بهدوء وهو يضرب على الستيرن وبعصبيه كافي اسگتي چا ليش تبجين مو هذا الردتيه
يمامه : انت مسمعتني وبقيت تعيط وتكسر
حامد : يمامه وحگ من خله حبج بگلبي اله اندمنج لج انه هيج تسوين بيه
يمامه : والله مسويت شى ردت احافظ على بناتي شوف حالها اندار عليها الى متى نبقى نتفرج عليها وهي لا ايد ولا رجل بس تك ايدها وفوكاها اخرست ونفسيتها التعبانه لشوكت نعوفها هيج لحد متعيد الانتحار مره ثانيه مو بس اني وياك بالدنيا اكو هواي شغلات اهم مني ومنك لازم نراعيها واولهم ايه

حامد : اسگتي خلي اسوق
يمامه : انت ليش متفهمني
حامد : اسكتي لا اكلبها بيه وبيج
يمامه : طول اكثر من ٣ ساعات واحنا ساكتين بس اثنينا اعصابنا تلفانه
وصلنا لبغداد

اول مطبك لباب بيت اهلي دكيت الباب طلع نصار سلم عليه بس الحيره على وجه بابا ونصار عرفو اكو شى وسألوني عن ودق وهمسه كتلهم عفتهم بيت جدهن عدهن امتحانات حتى مقبل يطب نزلنا ايه دخلتها بالبيت جان يدنج عليها وگللها
حامد : اريدن بنيتي سباعيه لاتخافين انه يمج وبس اشري تامرين وبست من راسها
أيه : لزمت ايده وبستها ولزمت القلم وكتبتله اني احبك بابا حضني حيل وراح

يمامه : من قريت شكتبت ايه بجيت بصوت لعد شكد تحبه باوعت عليه وعيوني تستنجد وتكوله افهمني تره اني احبك بس هذا التردد الي بداخلي دمرني خوفي على مستقبل بناتي هو الي خلاني اضحي بحبي لحامد حاله ايه وتمرد ودق هو الي خلاني افكر الف مره بأن ارجع لبغداد ردت ابني بناتي كافي الي ادمر حياتهم غير حياتنا عاداتهم وتقاليدهم مكعد اتوالمهن  وبناتي من سيئ لأسوأ والبيت دوم هوسه ومشاكل وطلايب ميفرغ دوم عايشين بقلق ودم ومشاكل واني كولشي سويته من يوم مرجعت للعماره لخاطرهن ولخاطر مستقبلهن ومو اني الي اضحي بيهن لخاطر راحتي لو اريد اضحي جان من زمان عفتهن الهم ودرت وجهي وعشت حياتي بس ذني روحي وثمره حياتي شون اعوف بناتي لخاطر نفسي طلع حامد وحتى مباوع بوجهي عافنا وشحط السياره وطلع شمرت نفسي بحضن بابا

شبيج يابنتي شصار وشبيه رجلج وضعكم مو طبيعي
يمامه : تعبت بابا ومحد حاس بيه
اني يمج واحس بيج تعاي ادخلي والله كريم گلشي يهون
ودق : رجعت مكيفه لان جاوبت واخذت درجه كامله وهمسه بيدي تكمز هم ماخذه ١٠ بالاملاء منير اجه اخذنا

منير : اكولج شو ايه ليش متقبل تشوفني
ودق : عوفها براحتها
منير : اني اعرف كولشي وكل الي صار تره هي مو ذنبها وليش تستحي تطلع
ودق : الي مرت بيه مو قليل وان شاء الله ترجع احسن من قبل واقوى
منير : والله اني احبها اعتبرها اختي الصغيره واداهرها وتمنيت اشوفها واوكف بجانبها بس هي متقبل
ودق : ايام وتمر وترجع احسن يله امشي بسرعه اني ميته جوع اريد اوصل اتغدا حتى اقرا الامتحان مال باجر
دخلنا نضحك اني ومنير بس الوجوه مگلوبه مهتميت عادي يوميه عدهم مصيبه مو جديده عفتهم ودخلت للغرفه ايه ماكو والغرفه هوسه شنو السالفه طلعت وسألت
وين ماما
فضيلة : تعاي بنيتي اكعدي ارتاحي
ودق : ماما وين وايه وينها
الحجية جميله: امج راحت لبغداد هيه وايه
ودق : شنو ماما عافتني وراحت ركضت للشارع مثل المخبله وجان تصير سياره گبالي ردت اندعم وضرب ابريك قوي
مازن : وين رايحه وتركضين وحدج
ودق : ابجي واحجي ماما راحت لبغداد اريد اروح وراها
مازن : ارجعي للبيت عيب منا العالم شنو طالعه هيج
ودق : كمت اعيط عليه اريد ماما كله من وراكم انت وعمك اذيتونا الله لايوفقكم ودفعته وركضت للشارع العاام ومنير ومازن يركضون ورايه ومااحس غير

يتبع ..
خميس سعيد احبتي لاتنسون التصويت 😁
تحياتي لًلًـّــ💎ــجٌٓمٍَُٓيِّعَْٓ
احـٍُــبٌــ💘ـٍَــْگُِم