رواية سجينة الروح الفصل السابع 7 - بقلم ريام هادي

سجينة الروح
للكاتبة Reem
البارت السابع

تريد تعرف شنهو هن اليوجعني ؟!
انت والدنيا وشتا الله ...
وخبصة الوادم وحظي
والضياع الماد رجله بوجه عمري ....
والأماني المدري ياهو باگ بيهن !
والليالي التاخذ من الحيل من تريد تگضي ....
والضوه الما يشتهيني !
والهوه الما يعتنيلي !
والسما الما گمت اثق بالظال بيها
من طفه وجهك بعيني ...
ذني كلهن يوجعني !!

ودق :
جنت امشي بطريقي وقريب مااوصل البيت عثرت وشفت ولد يضحك باوعت عليه وكتله اكو شى يضحك شنو هاي السخافه شو هذا عقج وجهه
ماكو غيرج السخيفه
ودق : احترم نفسك شفتني عثرت ليش تضحك
بكيفي احد كلج الشارع مال ابوج
اني هيج گلي شبيت نار
انت واحد متستحي شون تحجي على بابا
محد حاجي ويله ولي دوختيني
ولت روحك ان شاء الله وعفته ودخلت جان يعيط هي انتي
ودق : وجعي شنو هي
لج شو انتي لسانج طويل ومتستحين
ودق : انت الي بديت شنو هي
قابل اعرف اسمج
ودق : روح بابا منا يله
بس كوليلي هذا بيتكم
ودق : لا بيت الجيران
بس لا انتي ودق
هااااا منين تعرفين
واني اكول هذا اللسان الزفر سامعه من زمان
انت منو
اني منير ابن عمج ياثوله
ودق : ولك منير الزقج ولو يازقج منيلك هذا الطول شطولك يول
منير : هههههههه ولت روحج شعبالج بابا كبرنا امشي طبي نبقى هيج نحجي بشارع مكافي وكعتي صدوك شكد لكيتي
ودق : شلكيت
منير : الي يوكع يكوله شكد لكيت والي لكيتيه بالنص اني وياج
ودق : هههههههه بعدك تنصب وتتشاقه
منير : يمعوده العمر خلصان
ودق : تعال ادخل ابو عمر عبالك عمره ٦٠ سنه هو انت كلك عمرك ١٨
منير : لج ١٨ و٧ اشهر اهم شى السبعه
ودق : تعال ابو سبعه

اعرفكم بنفسي اني منير فاضل راضي الحفيد الثاني لبيت حجي راضي وعيت على الدنيا اب مقتول غدر وام تركت اولادها واتزوجت تربيت تحت حمايه عمي حامد جان النا اب والنعم منه حبيته وتعلقت بيه وصار كولشي بحياتي رغم مرات احسه يحب مازن اكثر مني بس عادي ممهتم الحياه عندي كلها لعب بلعب حتى بالدراسه مكضيها بالدفرات والدروس الخصوصيه مااهتم لأي شى احب اقضي وكتي ويه جماعتي وطلعات اضحك واشاقه الدنيا ضاربها عرض الحايط اصلاً عمري ١٥ سنه وصادقت ويوميه ويه وحده مراهق والعب لعب بس مااتجاوز حدودي شكلي طويل حنطاوي البشره عيوني سود ومعاني رجوليه  ومربي لحيه خفيفه شكلي وسيم حتى احلى من اخويه مازن وهاي الكل تكولها مو اني واحب البس واكشخ وعطري يوصل لراس الشارع بسبب وسامتي واناقتي يوميه مصادق وحده

جنت اروح للعماره بس بالعطل واسمع اشكال المصايب والمشاكل هناك ماشاء الله الحجيه جميله لاعبه لعب جدتنا وبركتنا بس رغم هذا احنه نحبها لان نعرف بيها رغم القسوه بس تخاف علينا من الهوا عشت حياتي كلها بغداد وصارت حتى لهجتي بغداديه ومن اروح للعماره اكل عوده عودتين من الحجيه لان احجي بغدادي واحجي وياها عمارجي ومن احب اداهرها احجي بغدادي وتبقى تغلط وتعد احب اشاقيها بقيت بعيد عن كل الاحداث الي صارت لان مالي علاقه بيها من يوم مراحت امي وفضلت الرجال علينا واني وعدت نفسي مالي علاقه بأحد اعيش لنفسي وبس

بيوم طلب مازن مني اروح اودي الشهريه مال بنات عمي  بالبدايه رفضت بس هو كام يعيط تحمل المسؤوليه والى متى وانت كبرت دوخني مابيه حيله طلعت من الامتحان جنت سادس بوقتها اخذت الفلوس وانطاني العنوان ورحت

قريب مااوصل البيت شفت غزاله تمشي والله بنيه طول بجسم ومغريه بشكل  مبينه طالبه اعداديه والكصيبه لنهايه ظهرها غزال ويمشي شو اني حطيت عيني عليها دعثري واوكعي اني فطير كمت وضحكت وهاي استلمتني تكول منشار
اريد اسكتها ماكو وتالي طبت لبيت وصدوك وتطلع ودق الصدمه مستوعبتها هاي ودق بقيت اضحك واصنف وياها بس عيوني تركض وراها ركض شنو هاي الغزاله وين مضمومه وارجع واكولك ولك ارعن هاي غير عرضك وبنت عمك بس شسوي شكلها يخلي الحجر ينطق صح هي مو شكره وعيونها خضر بس حنطاويه ودمها يلعب لعب وبيها كل مقومات الانوثه الي تخلي اكبر واحد ينعجب بيها طولها وجسمها ب١٠ نسوان اهوو غير اسكت ولك هاي عرضك ياغبي

دخلت بيتهم وسلمت على امها اذا الام كيكه تكول داخل مصنع معجنات والله ياعمي عادل والله بيك بخت المره والبنات كيك الله يرحمك ماكعدت راحه تركض وره النسوان بس لا انه طالع عليه
خرب غير اطم روحي
شونج عمه
يمامه : عاش من شافك حبيبي ليش هاي السنين كلها منشوفك
منير : والله ملتهي
ودق : حقك شركات ومعامل شتلحك
منير : اسكتي ام لسان على اساس انتي الي تسألين

ودق : والله الي ميسأل علينا منسأل عليه لكل فعل ردت فعل
منير : هاي متأثره بالفيزياء شنو امتحانج اليوم
ودق : هههههه فيزياء
منير : شفتي عمه هاي بنتج مخبله طاكه فيوزاتها
شونك منير
رفعت راسي واشوف وحده دبدوبه سمينه بيضه شكره بس حيل سمينه ها منو بس لا ايه ام بطن
أيه : اشكرك
منير : هههههه ولج اشاقه وياج شونج شخبارج
أيه : الحمدلله عاش من شافك
منير : هاي شبيكم عمي الي يسمعكم يكول مكطعين السؤال عليه واني لابسكم
يمامه : هههههه غير نحبك ونسأل عليك

والله ياعمه بعد ماشفتكم ان شاء الله مااكطع
هله هله هاي الحلووه همسه تعالي شنو هذا الكيك
همسه : شكراً انت هم حلوو
والله ياعمه خوش انتاج عندج
يمامه : هههههههه والله يامنير عشت وشفتك رجال وشطولك الله يحرسك
منير : عمه هذا الحجي ميوكل خبز اني جوعان شنو ماعدكم اكل  نكضيها شونك وشونج

يمامه : ههههههه جنك على اكل وارقى غدا الك تدلل
كعدت اكلت وياهم تكول كاعد بالجنه اربع نسوان داير مدايري وحده احلى من الثانيه
اكول عمه هاي الشهريه مازن دزها
ودق : همزين انت الي جبتها مو اخوك
منير : ههههههه ليش مبين مضوجج
ودق : اهووو حقنه
يمامه : ودق عيب ماما شجاج

منير : عمه عوفيها والله الحقنه احسن موتني حتى اني كاتم على انفاسي لطب لتطلع وين رايح تعال اقره كوه يريد يطلعني دكتور واني اليس من النو مااعرفها
همسه : اليس معناها نعم والنو لا
منير : ههههه من فدووه للشطوره
ودق : منير الله عليك بعد انت جيب الشهريه مو مازن
منير : لتخافين مكابلكم وكاعد
يمامه : هله بيك عمه يوم عيد هذا بيتك
منير : اكول شو اكو وحده ولا سمعنالها صوت

أيه : دااسمع الكم كافي انتم تحجون
منير : بس هم انريد نسمع صوتج وتعالي كوليلي ولج شسمنج هيج كله من وره التشريب والموطات ولج خففي وزن بعدج صغيره
شو هاي كامت وعافتنا زعلت مو
ودق : هي تزعل اذا واحد حجه وياها على وزنها والمصيبه باقيه تاكل وماما شكد حاولت وياها وميفيد
منير : ميصير عمه خطيه حتى موزين على صحتها
يمامه : شسوي گلبي مينطيني عليها
منير : هسه تكبر بعد وتتغير وتنتبه على نفسها يله يابه ارفع الزحمه اروح
ودق : وين بعد وكت
منير : ولج غزال ارجع اشوفكم
ودق : غزال منو
منير : غير انتي
ودق : خوش تصجم
منير : بنت عمي واصجم بكيفي
ودق : وانت ابن عمي وبكيفي هسه اكسر هاي المزهريه براسك اكولهم صجمني همزين مياخذون فصل مني هههههههه
منير : هههههه شيخلصج من جميله تاخذه مربع (يعني اربع مرات)

ودق : اوف يجميله تورم الگلب
منير : لج هاي الحجيه جميله شيخه بيت راضي لسانج لزميه
ودق : اعرف عدكم هي خط احمر بس عندي هي خط اخضر اروح وارجع احجي عليها
منير : هههههههه بعيني اروح للعماره واكولها حبيبتج بت يمامه تحجي عليج وشوفي شون راح تقسم
يمامه : هههههههه ميحتاج حبيبي نعرف عمه شون تحبنا
منير : الله يزيدها هههههه يله مع السلامه

رجعت للبيت وصار بوجهي مازن
مازن : ها وديت الشهريه
منير : لك هاي شنو غير تكولي بنات عمك هيج كبرانات وصايرات يخبلن اما ودق غزال ويمشي
مازن : لك سكط شون تحجي هيج نسيت ذني عرضك وبنات عمك
منير : هسه اني شكلت گلت حلوات قابل جذبت

مازن : هو مو صوجك صوجي اني دزيتك اصلاً بعد ولا اسويها ومتروح الهم
منير : لابربك انت من كل عقلك بعد مااروح يمكن اصلاً اروح اعيش عدهم
مازن : منير كافي شقه واثكل تره من اتخبل تعرفني ابويه مااعرفه
منير : اذا تعرف دااشاقه شبيك تخبلت وعيونك دم ومتحضر عبالك واحد يريد يهجم ويضرب
مازن : مااحب طريقة كلامك لتنسى ذني عرضنا واي حجايه مردودها علينا عيب
منير : هاي شبيج شكد معقد
مازن : هاي موعقد هاي يسموها اخلاق ياعديم الاخلاق
منير : ههههههه يابه من تتعصب صدوك تضحكني

مازن : يله ولي وروح اقرا
منير : غير هسه راجع ياقرايه انام ساعتين ١٠ ساعات واكعد اقرا
مازن : لا فلحت والله حرامات ابويه ذب كومه فلوس عليك يدري بيك فاشل ليش متعب نفسه ماادري
منير : اي والله لو منطيني الفلوس ذني مشتري بيهن سياره هواي احسن
مازن : دروح نام ساعه واكعدك
منير : لا بطه ساعه خليها ساعتين بداعت جميله
مازن : يله ولي روح نام

مااعرف اختنكت من جاب طاري ودق مااحب احد ينظر لبنات عمي نظره مونظيفه بس ودق بالذات رغم اعرف احنا مثل الرويسيه بس نتعارك بس كدامي كبرت ودوم عيني عليها احسها مثل الشجره الي تكبر كدام عيني ومنتظر انتاجها ومااقبل احد يلمس ورقه منها مشاعري مختلفه اتجاه ودق مره اريد اشرب من دمها على لسانها وتجاوزها مره احسها طفله مجروحه محتاجه للحنان مره اشتاق اشوفها واحرك اعصابها احب اشوفها عصبيه ومن اصفن على مشاعري شنو الي شفته بيها من دون كل البنات الي اشوفهم بالكليه ليش هي جذبت انتباهي رغم مابيوم كعدنه وحدنا اذا متعاركنا
احبها لا مااعرف اصنف مشاعري من يانوع بس كل الي اعرفه مااريد احد يتقرب منها

ودق : تفاجأت اليوم بمنير ابن عمي شكد حًلو صاير وسيم ويضحك وجهه بشوش يدخل للگلب احسن من مازن العكره حتى ضحك ميضحك تكول الضحك بفلوس شكد احاول اهضمه لهذا الولد مترهم اكوم اكره ازيد بس منير لا حسيت براحه ويااه اول واحد من عائله بيت راضي استلطفه

بقيت اقرا واروح امتحن جنت حيل ذابه حيلي على الامتحانات جانت عندي صديقة اسمها جنات اخوها يوديها ويجيبها شكد تتوسل توصلني واني مااقبل احنا هسه سنه ٢٠٠٦ بدت الاوضاع تتأزم صح بمنطقتنا ماكو شى قوي بس صار كلام هوايه على سالفه الخطف وناس تكول يخطفون بنات اشكال الحجي وامي سمعت تخبلت على اساس بمنطقه زيونه بايكين بنات اعداديه اثنين والحنونه ماماتي كامت تلطم زين اني مبقى عندي بس ٣ امتحانات يعني مومال ادور خط ياخذني ل٣ ايام

يمامه : اني اوديج واجيبج بأيدي
ودق : ماما المدرسه بعيده وشون تعوفين خواتي وحدهن وجدو وبيبي رايحين للعمره وعمو نصار وزوجته مسافرين للشمال ماكو احد بيت جدي حتى تبقين البنات يمهم
يمامه : لعد اخليج وحدج ترحين
ودق : كلها ٣ ايام اكضيهم شون مجان هسه الي يسمعج ياماما يكول الحرامي واكف ينتظر ودق شوكت تطلع من المدرسه حتى يبوكها

يمامه : بنتي غير اخاف عليج شوفي اخابر ابن عمج مازن هو يوديج الصبح بطريقة ومنير يرجعج ولد عمج ويكدرون يحموج
ودق : اهووووو هم صخمان كله ولا مازن لو اعرف حتى للامتحان مااروح

يمامه : لج بطلي عناد موشيبتي گلبي
ودق : سمعي ياام ودق الغاليه مازن لو اموت مااخلي يوصلني وثانياً والاهم هو عنده امتحانات ولتنسين هاي اخر سنه اله بالكليه وملتهي ومنير ديمتحن بكلوريا مثلي بس سادس يعني راح تشغليهم
يمامه : مال اخليج ترحين وحدج گطنه وشيليها من اذنج

ودق : عندي حل صديقتي جنات اخوها يوديها ويجيبها وهي بيتهم قريب علينا الفرع الورانه يكدرون يذبوني ويرحون يعني بطريقهم مااخرهم يمكن ٣ دقايق وهي دوم تتوسل بيه اصعد وياهم تتوسل واني مااقبل اروح واجي ولا مازن ولا منير شتكولين

يمامه : خابريلي ام جنات خلي استأذن منها
ودق : اكولها يتوسلون ماما شتستأذنين
يمامه : خابريها من هسه مو عكب باجر امتحانج خلي يجوج
ودق : حاظر ست يمامه تدللين وبستها
بوقتها جانت الموبايلات نازله قليل الي عدهم بس متواجده وماما اشترت واحد وكالت يفيدنا لان بيت جدو هم عدهم واني مرات اخابر صديقاتي لان صديقاتي لو ابوها عنده لو الام  وخابرت على ام جنات وانطتني جنات وبلغتها وطارت من الفرح
وراها بيومين اجوني الصبح

صعدت وسلمت وجانت ماما واكفه بالباب وصت اخوها منتظر عليه اكلت راسه وهو ادللي خاله بعيني خاله كوه فكينا منها

اول مصعد منتظر دار المرايه الداخليه عليه مهتميت وكعدت اراجع وكل شويه تسألني جنات سؤال بالماده ونراجع سوه وكل ماارفع عيني اشوفه يباوع عليه مهتميت وصلنا وامتحنت والحمدلله جان جوابي مثل كل المواد ممتاز  وبالرجعه اجه منتظر صعدنا وجان يكول
منتظر : اليوم عازمكم على موطا ماطول مجاوبين
ودق : لا اعذرني مااكدر رجعني للبيت واخذوا راحتكم
جنات : ولج ليش منتأخر والله
ودق : لا فدوه ماما يضل بالها
منتظر : دقايق مااخرج
ودق : غير مره تسلم

محبيت نظراته والحاحه بس شسوي بس اريد تخلص الامتحانات الكشره
وصلنا واجه الامتحان الي بعده ومن صعدنا الصبح نفس الحركه سواها ودار المرايه عليه توترت هذا شبيه ميستحي لو ما امي مأمنتني عدهم هو جان شاب تقريباً عمره ٢٣ سنه يعني موصغير واعي بس خفيف ومن دانزل جان يكولي
منتظر : اليوم عليها مابيها بعد مجال نطلع نفتر واعزمكم على موطا
ودق : لا اسفه بيت عمي جايين ومااكدر
منتظر : يوميه حجه ليش احسج تتهربين مني

ودق : منك ليش شعندي وياك
منتظر : روحي للامتحان وبالرجعه نسولف
اهووو هذا لزكه
راح انداريت على جنات
تره محبيت تصرفات اخوج
ليش شبيه
شنو شبيه اول مااصعد يدير المرايه عليه وكل ماارفع عيني يباوع ومن انزل يكصني كص من فوك ليجوه والحاحه على سالفه العزيمه
جنات : تره اخويه حباب وانتي فاهمته غلط
ودق : حباب لنفسه فدوه احجي وياه هو امتحان واحد بقى واخلص اتحملوني
جنات : لج بابا شبيج قابل شيسويلج فوك منعزمج ونغيرلج جو
ودق : شكراً مااريد بس تحملوني بقى بس امتحان الاحياء الاكشر ونكمل

ومن طلعنا اول مصعدت جان يكول
هااا نتوكل
ودق : فدوه رجعني للبيت
منتظر : شبيج ودق عصبيه
لا عصبيه ولا شى بس مااحب اتأخر
وصدوك وصلني كلت اكول لماما هي توديني بس شون خطيه تتبهذل شيوديها وشيرجعها يله ماده وحده واخلصها شون مجان

واجه اليوم الي دمر كولشي اول مصعدت الوضع تمام مابي اي شى هدوء ونراجع حمدت ربي يله بقت بس الرجعه واخلص والتوبه السنه الجايه اخلي خط من بدايه السنه
كملت الامتحان ومكيفه جاوبت ممتاز صعدت جنات ماكو
وين جنات
منتظر : طلعت وكالت رايحه للمكتبه ويه صديقاتي شويه اتأخر خلي اوصلج وارجعلها
ودق : خلي ننتظرها
منتظر : تتأخر اقل شى نص ساعه اذا مو ساعه وانتي كتلج موطا خلي نشتري مقبلتي تتأخرين ٥ دقايق على اهلج اذا تكدرين تتأخرين ساعه نروح لجنات وناخذها من المكتبه ونطلع نفتر واعزمكم
ودق : هاا لا مااكدر اتاخر خلي ارجع مشي وانت اخذ راحتك

منتظر : شون تقبليها مشي وامج امنتج عندي راح اوصلج وارجع لأختي
ودق : اهووو وحدنا بس قابل شيسويلي كعدت وسكتت شو هذا متحرك هااا شو واكف
منتظر : احد گلج اني السايق مالتج
ودق : شنوو
منتظر : تعالي اكعدي ليكدام
ودق : لا ميحتاج امشي احسن
منتظر : كتلج متروحين وحدج صار عليج شى شيخلصني من اهلج تعالي هنا اكعدي انتي مثل اختي حالج حالها وامج امنتج عندي

ودق : الله مطولج ياروح نزلت وكعدت بصفه كلت صدوك عيب اكعد ليوره اكعد واسكت نزلت وصعدت بصفه بس لزكت نفسي بالباب وعيني على الشارع ومشينا جنت صافنه وممركزه على الطريق لان منايمه زين بس ساعتين من القرايه باوعت هذا موطريقنا نفس المنطقه بس قريب المستنصريه هناك اكو فروع هادئه لو الواحد ينذبح محد يعرف بيه
انت وين جايبني
منتظر : بس احجي وياج دقايق
ودق : رجعني بسرعه
منتظر : ماارجعج اله تسمعيني
ودق : وكف السياره بفرع هادئ داافتح الباب قفلها من يمه
لك افتح الباب

منتظر : اليوم اله تسمعيني اني معجب بيج
ودق : احترم نفسك عيب عليك هاي الامانه الي امنتها امي عندك
منتظر : اسمعيني اني قصدي شريف
ودق : الشريف الي يجي من الباب مو ياخذني بمنطقه هادئه بهاي الطريقة وحدنا
ومااشوف غير يريد يلزمني وعطت ودفعته وبلحظه وحده انكسرت الجامه الي يم السايق واباوع مازن وبيده مثل الحديده طويل كسر الجامه واشتغل عياطي موقف مرعب وهذا منتظر تخبل مازن جره من ياخته وهو جوه السياره يريد يحجي منتظر يكوله انت منو منطاه مجال مباشره ضربه على راسه خلاه يسبح بدمه حتى الدم طفر عليه من الخوف والعياط احس رجلي وكفت واسمع مازن يعيط عليه انزلي

واني ابجي بهستريا اكوله مااكدر الباب مسدود مد ايده وفتحه من يم منتظر واني بس ابجي واجي جرني من ايدي بقوه رادت ايدي تنخلع وصعدني بسيارته واني بس ابجي وخايفه ومنظر منتظر والدم الي يطفر مرعب وصعد مازن وشخط السياره بكل قوه وكبل للبيت وعفنا منتظر بنص الشارع سابح بدمه بسيارته

واحنا بالطريق وبس ابجي منهاره وممستوعبه الموقف شجابه مازن وشنو الي جان ناويه منتظر لو مااجه مازن لحظات من الخوف احس بلحظه يوكف گلبي وهو مباوع على وجهي ابجي واحجي والله هو الي جابني غصب هنا مجنت ادري كمت اخربط بالكلام اريد بس افهم مازن الموقف بس عاط بقوه ويريد يكطعني وكلي صوتج مااسمعه وجان يسحب الموبايل من جيبه وجان يتصل بيه اكثر واحد منتظر هاي اللحظه

مازن : دوم ابويه يوصيني احط عيني على بنات عمي وخاصه ودق صح مكلي بالتفصيل ليش بس اني جنت واعي وافتهم بالشرط الي شرطه ابويه حامد قبل سنين على ام ودق وفعلاً جنت بين مده ومده اروح بدون محد يعرف اشوف البنات واراقب تحركاتهم جان هذا السر بيني وبينه بس الشهاده لله جانن يرحن بطريقهن ويرجعن بطريقهن وخاصه ودق حيل ثكيله بالشارع واكبر واحد ميكدر يطخها وهذا الشى جان يسعدني

واعرف اليوم اخر يوم امتحان واكثر بنات بغداد بأخر يوم للامتحانات يطلعن لو يرحن يفترن ويه صديقاتهن مثل الوداعيه تقليد اكثر بنات المتوسطه والاعداديه يسوه وخاصه بأمتحانات البكلوريا لهذا امتحنت وطلعت من وكت من الكليه هاي السنه الاخيره اليه مال تخرج وابويه حامد اشترالي سياره واني بالمرحله الثانيه بالكليه حتى اروح واجي بيها واقضي طلباتي وطلبات اخويه فأخذت السياره وطلعت گبل لمدرسه ودق

وصلت شبه متأخر بس لمحتها من صعدت ليكدام ويه ولد شاب نار وشبت بيه مدخلت ردت اشوف شيصير وهذا منو وكأني انتظر الغلطه منها مشيت وراهم وشفته راح بأتجاه غير اتجاه البيت اني هنا فقدت صرت نار بس كلت انتظر اعرف المفروض ادخل من جانت باب المدرسه بس جان اكو شى بدماغي ومنتظره يصير وكفت مسافه عنهم بدون مينتبهون لمحت ودق تدفع بالولد بهاي اللحظه اخذت اني جنت احط مثل البوري حديد جوه كوشن السياره اخاف يصير موقف احد يتعدا عليه رغم اني ماهر بأستخدام السلاح بس مااشيله اني عصبي واكول اخاف بيوم اتعارك واضربلي واحد واكتله خلاص واتحمل ذنبه لهذا حاط بوري حديد جوه رجلي شلته وركضت كسرت الجامه ولو شايل سلاح صدوك بلحظتها افرغه براس هذا الولد وانعل ابوه يابوالي يطلعله سحبتها من ايدها واني ارجف عليها وهي بس تبجي وفاقده تريد تفهمني القصه متجمع ولا اني اريد اعرف غلطت ودق جبيره والي اريده والي يريده ابويه حامد صار واحنا بالطريق اتصلت بيه مردت اوصل لبيتهم وتقنعني امها اسكت

الو
حامد : هله بويه مازن شون كيفك
مازن : بويه تعال لبغداد هسه
حامد : خير بيكم شى احجي
مازن : تعال لبيت ام ودق
حامد : يمامه بيها شى البنيات احجي
مازن : سكتت وصلنا للباب باوعت عليها انزلي
ودق : فدوه مازن بس افهمك
مازن : بعيطه قويه انزلي ونزلت تركض
حامد : شنهي بويه دااسمعك تعيط ودق شجرالها
مازن : بويه الي ردته والي كاعد تنتظره صار
حامد : انه خوك يعني شصار بس لا البنت بيها شى
مازن : مابيها شى بس غلطت والي تنتظره صار سنين حصل تعال اليوم بسرعه
حامد : اليوم انه يمكم ماتغيب الشمس واله انه يمكم

يمامه : كاعده اسوي غدا وايه بعدها نايمه ساعه ١١ ونص الصبح وهمسه كامشه لعابتها وتلعب عمرها هنا ٨ سنوات واشاقه وياها ومااشوف غير ودق اطب تبجي منهاره وترجف يريد يتخرب وتوكع بالكاع يمه بنتي دخيلك رِّبًـي نفضت ايدي من الاكل وركضت عليها شبيج ماما
بس تبجي اريد افتهم شى ماكو وكعت بالكاع وتعيط وتبجي لج احجي احد سوالج شى فزت ايه تركض مخروعه على اختها وهمسه لازمه اللعابه واكفه على صفحه وتبجي اريد افتهم بنتي شبيها شصار وجان يدخل مازن
مازن شجابك وشبيها ودق بنتي شبيها احجي بروح ابوك احجي
مازن : عمه بنتج جانت ويه واحد بسياره وحدهم وجبتها من بين الفروع
يمامه : لطمت على وجهي من صخام الي صخمج يمامه
ودق : والله ماما ماعندي شى
ولج شون ماعندج شى وابن عمج لاكيج بسياره ويه واحد باوعت على مازن خابرت عمك مو
مازن : اي وجاي بالطريق
يمامه : لطمت على وجهي تعزيتي وتصخمتي يايمامه وكمت املخ بروحي لابقيت ربطه ماذبيتها لا شعري ماملخته فقدت عرفت هاي هيه انكسرت وصار الي راده حامد
ودق : من كثر ممنهاره مدااكدر افهمهم اني مظلومه وصارت الشغله غصب عني وماما سوده عليه فقدت بلحظتها ومكان متضربني كامت تضرب بروحها شعرها وجهه اريد الزمها مااكدر جيتت عليها ايه واني نريد نلزمها ماكو انهارت وبس نبجي حتى مازن حاول بس يهديها ميفيد وفقدت هنا حسيت الدنيا ظلمت بعيني واني اشوف امي مدده بالكاع لا ايد ولا رجل واشتغل اللعياط مالتنا كلت وكف گلبها وماتت
مباشره ركض مازن وجاب مي وذبه على ماما
مازن : فركي صدرها وانتن وخرن منها شويه هوا خلي يوصل الها
ودق : وبقيت افرك بصدرها واغسل وجهه وابجي والبنات ابتعدوا ايه حاضنه همسه ويبجون وبدت تصحى شويه باوعت على مازن وكتله اذا ماما صار بيها شى وربك المعبود اكتلك خلاص وبأيدي
مازن : باوعت عليها ومهتميت لكلامها اعرفها منهاره
يمامه : فقدت محسيت غير ودق تفرك بيه وتغسل وجهي وتشربني مي والبنات بعيدات واكفات ويبجن فتحت عيني وحاولت اكوم مكدرت الدنيا تفتر بيه مره ثانيه حاولت صحت ايه تعالي كوميني
ودق : اني اكومج ماما
يمامه : وخري من وجهي مااريد اشوفج دمرتينا ليش ولج بشنو قصرت وياج
ودق : شدمرت ماما ولا ملمسني والله مظلومه افهموني انطوني مجال افهمكم
يمامه : وخري من وجهي واياج اسمع صوتج
تعالي ايه اخذيني لغرفتي
ودق : كامت ماما ودموعها موكفت اريد افهمها منطتني مجال انداريت على مازن
كله من وراك انت فهمت شنو الشغله مباشره حكمت عليه
مازن : ميحتاج اعرف شفتج بعيني
ودق : وكعدت افهمه الموضوع وهو ولا مهتم
مازن : روحي لغرفتج ومن يجي ابويه يصير خير
ودق : ممصدكني موو ميهمني ولا تصدك المهم اعرف بنفسي ممسويه شى غلط وعفته وكمت من الكاع وصعدت لغرفتي

مازن : اني صدكت بيها لان من شفتها شون ادافع عن نفسها وتعيط مبينه مال وحده مجبوره لان لو راضيه بالوضع جان محاولت تصده بس مااكدر ابين مصدكها لان اذا ضاعت هاي الفرصه مااضمن تغلط بعد وخاصه هي كبرت واحتمال امها تعرفها على كولشي وتكون حذره واني اريدهن يرجعن للعماره مثل ابويه

حامد : من خابرني مازن احس الدنيا بدت تنصفني واخيراً صبر السنين مراح يروح گلت راح گلشي يضيع وخاصه من گلي مازن البنيات هادئات ويرحن ويجي بطريچهن ومالهن لازايده ولا ناگصه بديت أيس من كلشي بس مازن رد رويحتي وكلي تعالن
ركضت واخذت السويج مال السياره حتى ماكلت لأحد رايح لبغداد ردت بس اوصل وافتهم شنهي الي حصل وبسرعه وصدگ قبل اذان المغرب انه كدام باب ام ودق دكيت الباب فتحلي مازن
مازن :  الْحٍمَدٍ للـّہ على سلامتك بويه
حامد : الله يسلمك يابعد ابوك
مازن : تعال ارتاح
حامد : چا شنهي الدار مابي احد
مازن : كله وحده بغرفتها
حامد : تعال بويه شنهي حصل
مازن : وكعدت اسولف اله كولشي
حامد : شنهي والوليد وينه هسه
مازن : عفته غركان بدمه
حامد : يسلم ايدك وليدي هذا عرضك ولازم تصونه سبع
بس گلي البت حصل ليها شى
مازن : بويه البت مابيها شى وانه مصدكها واعرفها ماتغلط
حامد : هاا يمويزن جنك رايدها الغلطه مثل ابوك
مازن : يابه الحجي بينا انه مابقالي بغداد غير الهكم يوم وهنا الولايه جبيره والعيشه لأربع نسوان وحدهن صعبه والضروف يوميه كاعد تصير اصعب واليوم يمنهن وباجر ارجع للعماره وشغلي هناك والتهي عنهن منو الهن وشون نطمن عليهن لهذا كلت هاي الفرصه الوحيده الي نكدر ناخذهن ويانه لبغداد مصدك بودق بس اذا كتلها مصدكج وعدت هاي الشغله مراح تغلط بعد ولا نكدر ناخذهن للعماره

حامد : وانه سنين بويه انتظر
مازن : شفت يابه هذا قصدي غير هاي الفرصه ماكو وبقت يمك الي عليه سويته اني اريدهم يمنا وتحت عيونا الدنيا مو امان هنا وهنه عنوديات وماكو غير هاي الطريقة نكسر عنادهن
حامد : تربيتي يمازن والنعم ماربيت
مازن : بست راس وايد ابويه راح اصيحهن يمك والموضوع بقه عندك
حامد : چا السنين گلها انتظر هاي اللحظه روح بويه صيحهن

يمامه : دخلت للغرفه وبقيت بس ابجي شون بيج يايمامه ضاع تعب السنين شكد حاولت ابتعد عنهم رجعتني بنتي الهم ولمذلتهم ياربي مااستاهل هذا العقاب عيشتي يمهم دمار شون اتزوج حمايه اذا اني مااتحمل اكعد يمه ساعه شون يصير زوجي ويلزمني ويمارس حقوقه ويايه ااااااخ كمت الطم على وجهي وابجي ربي دخيلك نجيني ونجي بناتي منهم وين اولي وين انهزم گبل وكدرت انهزم بيهن هسه شون بقيت ساعات مره ابجي مره الطم لوما اخاف الله وذني برگبتي اله احرك روحي  ومااتزوج حامد وارجع للعماره

مااعرف شكد الوقت مر عليه بس هي ساعات وكأني محكومه بالاعدام ومنتظره التنفيذ واندكت الباب يعلم وصول سجاني
بدلت ونزلت بخطوات ثقيله رجل تقدم ورجل تأخر طبيت سلمت
السلام عليكم

حامد : وعليكم السلام اكعدي استريحي ام ودق
يمامه : اني اعرف ليش جاي اليوم
حامد : انه من يوم ماطلعتي وكسرتي چلمتي وحطيت الشرط وانه گلت اي غلطه اتصير انفذ الشرط
يمامه : بس البنيه تكول مظلومه احنا حتى مفتهمنا منها كولشي
حامد : يوم مااجيت اخذهن وكفتي وكسرتي چلمتي كدام
الزلم كلها ومشيت على هواج وخليت البنات يمج ورديتي وكفتي كدامهم ومره ثانيه كسرتي چلمتي وكلتي البنيات من يكبرن وره ١٨ سنه مالي حكم عليهن و عليچ وهم گتلج تامرين وسكتت
يمامه : صح
حامد : انه ماخالفت الشرط وكل الصار هاي السنين وعفتج براحتج ومادخلت لا بحياتج ولا حياة البنيات كلتي انه اعرف شون اربيهن مايوم جيتج وكتلج تعاي شسوين ماسوين دومي ماشي وياچ حتى بالغلط من جبتيهن بنص الاوضاع التعبانه ومارديتي وياي وهم كلت تامرين بس حدج لهنا وبسچ انه گلت غلطه وحده وتنفذين شرطي
يمامه : شون اتزوجك وازوج البنات
صعبه والله صعبه اجي وياك للعماره راضيه بس اترك سالفه الزواج والبنات شو يمكم بس يكبرن هنه يختارن حياتهن
حامد : مااتراجع بچلمتي لو على گص رگبتي

يمامه : اترجاك شيخ هذا ظلم ميصير تجبرني وتجبر البنات على الزواج
حامد : شوفي ياام ودق انه مااجبرنج على شى اذا ماتريدين اخذ البنيات وانتي عيشي حياتج على راحتج

يمامه : وكفت على حيلي شون تاخذ البنات وتعوفني غير اموت بدونهن
حامد : كتلچ واعيدن لو يتنفذ الشرط كله لو اخذ البنيات واردن للعماره

يمامه : كمت ابجي لاحول ولا قوه اليه اليك المشتكى ياربي
نزلت يم ايده اتوسله
قابله بكولشي بس بناتي لتزوجهم فدووه بروح اخوتك اني اتزوجك راضيه بس البنات بعدهن صغار ودق ١٥ سنه وايه ١٣ حرام وينهن وين الزواج
حامد : هذا شرطي وانتي رضيتي
يمامه، كتلك الي تريده يجرالك اني راضيه نتزوج بس عوفهن لحد ميبلغن ١٨ سنه وراها اعقد الهن اترجاك نزلت داابوس ايده والله انذليت اترجاك سحبها وكف على حيله

حامد : لا تسوين هيج ام ودق ماارضاها الج انتي تكعدين وتامرين الذله مو من شيمتي
ومو انه الي اذلن مره كومي ورفعي راسج والي تامرين بيه
يمامه : بس لتعقد الهن اله هنه يختارن
حامد : شون يعني
يمامه : يعني هنه يختارن من يكبرن يختارن شريك حياتهن لا تجبرهن
حامد : بس مايرحن للغريب
يمامه : هذا هو ميرحن للغريب كبالكم بس هنه يختارن اترجاك
حامد : اجمعي غريضاتج وغريضات البنات باجر من صباح الله طالعين للعماره

يمامه : بقيت الليل كله الم بغراض البنات وهنه بس يباوعن بوجهي ولا وحده سألت ليش وشكعد تسوين بس دموعهن تنزل ويايه حتى ودق اخذت موقف السكوت ولا حاولت افتهم منها شصار لان بعد ميفيد الحجي اخذت كم شغله وحامد كال عوفي الباقي غير مره ترجعين تاخذيهم مستعجل على سجني بقيت ابجي واندب حظي بشنو قصرت اني ليش هيج الحظ عكس ويايه
مشاعري متخربطه حتى بوجه بناتي مااكدر اباوع احس هنه السبب بسجني بحكم ظالم وعادات ظالمه يمكن لو ما هنه بحياتي جان اني هسه طير حر براحتي وارجع واكول اسوي مثل خيريه من عافت ولدها وراحت عاشت حياتها بس اني مااكدر مثلها ماعندي گلب انام واعوف بناتي يم جميله واحلام يسوهن خدامات مااكدر ذني روحي شون اعيش بدونهن

ثاني يوم قبل منطلع اجوي جماعه من اهل منتظر وكعد وياهم حامد الولد لاكيه بالانفاس الاخيره وهمزين عايش وحددوا موعد يكعدون ويتفاهمون والموعد بعد ١٠ ايام يعني اكيد يردون فصل

وراها طلعنا للعماره
وطول الطريق واني افكر شسوي ياربي حلها من عندك دخيلك
وصلنا للعماره وطول الطريق ساكتين حتى ودق بس تباوع من الجامه ايه الي دوم تخبصنا على الاكل وتبجي اذا متاكل بيومها محطت لكمه بحلكها جنا بوضع تعبان وكأن شمرونه بحر بيه امواج عاليه واحنا منعرف نسبح وكلوله اسبحوا واطلعوا ويدرون راح نغرك بس شمرونا هذا حال رجوعنا للعماره

واول مطبينا حامد عافنا وراح ومازن يدخل بالغراض دخلنا وجان  تستقبلنا اكثر وحده متشمته بيه جميله
جميله : هلا هلا چابين المسعدات
يمامه.: شونج عمه
الحجية جميله: شوني گل الخير رديتي من الاول ومااطلع ركضتي وعفتينا نكرمط وبنياتنا تربن بعاد عنا
يمامه : رجعت عمه ارتاحي
الحجية جميله: سمعي انتي وبنياتج من اليوم حسجن مااسمعه وال اكولنه يصير وحگ العباس اذا هيست (سمعت) حس وحده منجن وعانديتن ادفنجن بمجانجن
يمامه : اباوع عبالك غابه منا جميله تريد تاكلني ومنا احلام وبنتها يرجفن ومنا مرة حمود واكفه تترقب شيصير بس خطيه فضيله اجتني تركض تاخذ الغراض من ايدي ودق مدخلت اصلاً كعدت على المصطبه البره وايه وهمسه بوسن جدتهن ودخلن ركض

حسان : هااا شيخنا أبشر
حامد : ردن وياي
حسان : انه بس لو اعرفن منين هاي الثقه جايبها سنين وتصيح يردن
حامد : انه من يوم ماشفت ودق هدت على امي گلت هاي منا وكحه صلفه ماتخاف هو ياهو يكدر يوگف بوجه جميله وهي زغيره وماخافت لا مني احاسبها ولا من جميله وحامت  الأمها بيومها گلت وحده مثلها لابد يجي يوم وتغلط وغلطت الشاطر بالف وراهنت نفسي هاي البت هي الراح تردهن ماانكر  مرات خفت اخسر الرهان بس ربك ردهن وانه كاعد بمچاني لارحت ولا رديت
حسان : صار التريده خويه سنين وانت تتمناه ردت الطيره لقفصك
حامد : ماطبته(دخلته) حتى ترد ياحسان وانت تعرف الي جرى. خليني وحدي اريدن ارتاح
حسان : راح تروح لمچانك نفسه
حامد : هذا المچان يدري على گلشي ولو عده لسان جا حجه وصاح الله اكبر كل هذا جرالك
حسان : روح خويه روح يساعدك الله الجايك اصعب لاتنسى هي هسه تشوفك ابعينهه ظالم
حامد : وانه اشوفنها السجانه  السجنت روحي 
اروحن خويه
حسان : مودع بالله خويه
حامد : كعدت على الشط واجرن نفس گوي ورديت بذاكرتي واحن ليوم ماشفتها اول مره وشصار من شفتها

يتبع ....
الفيديو حاال حامد وحنينه للماضي 💔
ممكن تصويتكم للقصه 😊 واحب اسمع ارائكم
تحياتي لًلًـّــ💎ــجٌٓمٍَُٓيِّعَْٓ

[ينبغي أن يكون هناك GIF أو فيديو هنا. قم بتحديث التطبيق الآن لتشاهد المحتوى.]