رواية سجينة الروح الفصل الثامن 8 - بقلم ريام هادي

سجينة الروح
للكاتبة Reem
البارت الثامن

ترستك ماي خوة لا نداوة الكــــيت
طلع جودك شبج واسراري تتطشر
خاويتك عشب وي كل نسيم اتميل
جربتك شجر بالريح تتكســــــــــــــر
ومن صارت صدك ردتك ولو حاجـــوز
وغصب عذرك قبلتة اتخاف تتعـــــور
بزلاتك اضم ردتك ضمير اتصـــــــــير
وجذبت الصدك حتى انت ما تخسر
وعاونتك علي من شفت عذرك خاب
وقنعت النفس كلتلها يتغـــــــــــــير
لا كصرك طول لا فاض بيك الطيب
لا شمسك علت والراكد اتبــــــخر
لا مدك وصل والعين شافت نـــــور
لا كصرك طول لا لغزك اتفســــــــر
كدامك طحت ما شفت وجهك كام
وهاك ابسط مثال وشوف واتصور
ولك خشبة بطبر فركست جف حطاب
من شافت حطب كدامها اتطـــــبر.

حامد : كعدت على الشط واجرن نفس گوي ورجعت بذاكرتي واحن ليوم ماشفتها اول مره وشصار من شفتها

انه حامد الكضه عمره كله يداوي جرح گلبه وماطاب انه من العماره رجال عراقي عمارچي حياتنا وعاداتنا وتقاليدنا موروثه من اجدادنا ونحبها ونفتخر بيها تربينا على الشيمه والاخلاص ورواحنا نفديها لهلنا وخوتنا انه من عائله معروفه بالعماره ابوي الله يرحمه الشيخ راضي شيخ والنعم منه چان من يطب ديوان الناس كلها تاهبه ولو طب بفصل دم يحله الكل تحسبله الف حساب رجل عادل وشهم واخو خيته وگلبه اسد مايخاف من اكبر واحد حب بت عمه وچانت شيخه والكل تهابها وماكو احد يتجرأ حتى يخطبها لان يعرفوها شيخه جميله ماترضى على اكبر واحد وهو حبها لگوتها وتگدم ليها وهي شرطت عليه تكون دوم جانبه ويشورها بكلشي وهو يعرفها حكيمه وكويه لهذا وافق وتزوجو وجانت والنعم منها زوجه وشيخه وگفت وي ابوي بأصعب المحن واجيت انه على الدنيا وجانت فرحة اهل الديره كلها ابن شيخ راضي وشيخه جميله وراها اخوي فاضل وحمود وعادل وفضيله وكريمه

تربيت على الگوه ويه ابويه وين مايروح اروحن وياه دون اخوتي كلهم جان دايمآ يگلي انت الشيخ بعدي
ومن شبيت ابوي كال لازم اتعلم كتله شسوي بالعلام وانته يابوي مامتعلم وتعرف كلشي واحسن من اكبر متعلم چان ابوي يكول من الشيخ حكيم ومتعلم يگدر يحل اكبر قضيه وانه اريدنك علم بكل شي موبس بالشيخه ورحت لبغداد لبيت عم ابوي ودرست وتعلمت اخوتي فاضل وحمود ظلو بالعماره تعلمو شوي وكعدوا مايحبون العلام يحبون الزرع والشغل وأبوي عاف الشغل كله عليهم

وكبرت ودرست اعداديه بغداد وكملتها بس مادخلت كليه لان بوكتها ابوي بدا يتعب وصارت حرب ايران والوضع خرب كلش ولابد عون وياه ورديت للعماره

بهذا الوكت كبر اخوي عادل وجانت امي روحها بيه چيف الزغير وكالت لازم يتعلم بغداد ويصير مهندس زراعي حتى يراعي كاعنا وابوي وداه وهم درس وكمل الاعداديه بس دخل كليه وانقبل مثل ماكالت الحجيه كليه الزراعه

جانت الكليه بأبو غريب بغداد بوكتها بيت عم ابوي بعيد عليه وهو مارضى يگعد اقسام داخليه امي گالت ناخذله شقه يگعد بيها هو واثنين اصدقائه وهو كبر يگدر يدير باله على روحه ورديت لبغداد ادور على سكن گريب من الكليه دورت بالعامريه مالگيت ورجعت لمنطقه اسمها الغزاليه هم گريبه على الكليه واني افتر وبوكتها جان عمري ٢٢ سنه بسنه ٨٦ وافتر من مچان لمچان ادور على شقه لأخوي وصلت فرع بيه بس بيوت واتمشى واشوفنها

طيره وتمشي وتسولف وتضحك والضحكه ترد الروح انه بطبعي مااباعن على عرض الوادم انه ابن شيخ وصعبه نحامي لعراض الوادم وندوس عرضهم بس موبيدي من شفتها هيست سهم وطب بگلبي

جان دربي اروحن ادور سكن لعادل ماحسيت بروحي غير رجلي تمشي وراها وتتبعه واندليت بيتها وضلت روحي تلوب عليها هاي البت شكد عمرها جانت مبينه غيره بس هي حلوه وعيونها تكتل ادگول عيون غزال وشعرها ب١٠ نسوان كصيبتها تحل المعدوم من شنقه
ثاني يوم واروحن وراها وشفتها طبت المدرسه وظليت ايام بين ادور سكن لخوي وبين امشي وراها وهي ماتحس بيه
سألت عليها وعرفت عمرها ١٤ سنه وطالبه ثاني متوسط وزغيرة أهلها واسمها يمامه اوف ياطيره البراري وسكن روحي انه طبيت بقفصها موش هيه وسالت على كلشي يخصها

لگيت سكن لخوي وجانت فرحتي چبيره والدنيا ماسايعتني چي گريبه عليها بينهم فرعين حتى من اجي اسير على عادل اروحن اشوف ارويحتي من الله حبيتها ودخلت گلبي وهي ماتعلم دخلت الگلب وحسها چنت اسمعنه من تحجي ويه البنيات اليمشن وياها
ماتجرأت اگرب ليها عيب شگللها وانه من سألت گالو زغيره وابوها مايطيها
احنا بالعماره البت بس تبلغ عادي تتزوج بس بغداد ماعدهم هذا الشي لچن ماتگربت ليها حتى ماتنفر مني وخاصه هي زغيره
حسيته زرعتي واروي عشگي بيها واناطر ثمرها ليه
رجعت للعماره وروحي مثل الطير المذبوح واخافن لا تروح من ايدي بس تطمنت من وديت خبر بيد ولد جيرانهم چان ابوه صديج ابوي وكتله روح تكلم وياه نگدر نتقدم ونخطب بته حتى اجيبن عمامي
ابوها گال ماازوجها البت زغيره ومادخل صديجي بأي شي چي ابوها بسرعه سد السالفه وگال ماازوجها
تطمنت ورديت للعماره وجنت كل شهرين اردن لبغداد بحجه هم اشوفن عادل وهم اشوف رويحتي
يوم وره يوم وانه اشوفنها تكبر كدام عيني وگلبي يرفرف عليها

ابهل وكت الحجيه اكلت راسي تزوج كبرت بعد واخذ بت عمك احلام خوش بت وتصونك
ومن كثر ملحتها للحجيه حجيتلها على البت وكتلها متانيها تكبر واتقدم ليها
وهي ماقصرت عدت ولطمت لحين ماسكتها الحجي وكلها طول ماالوليد عاشگها خلي وهي بعد چلمه ابوي ماتناقش
ومرت السنه والسنتين وانه معابد بالفرع كل حجاره بيه تعرفني اله يمامه ماتعرفني ماتعرف اكو شخص يعشك التراب التمشي عليه انه ردتها حلالي لهذا ضليت بس اترس عيوني منها ومااتگرب ليها
ومرت سنتين ورويحتي صارت ١٦ سنه وانه مگضي حياتي بين بغداد والعماره
وبيوم تجرأت وكتبت رساله ليها
انه رغم مادخلت گليه بس جان خطي حلو عبالك خطاط ابوي دايمآ يگلي انت فنان صح مايقرأ الشيخ بس يصفن على خطي گلت لابد اعرفن گلبها خالي البت صارت ١٦ سنه وانه اخافن تعشگ غيري

كتبت الرساله وشعرت بيها مشاعري مال سنتين من كتبتها حسيتها تظلم مشاعري چي انه حبي الها الف رساله ماتكفي
اخذت الرساله ردت بس تحس بيه كافي تعبت سنتين واحبنها من بعيد وهي ماتدري
وصلت گريب ليها ترددت من كثر حبي ليها دخل گلبي الخوف لا تصدني ويتكسر گلبي انه احبها بگد هوى الله الاتنفسه وكل لساني وگوتي گدامها راحت ويه الريح
رديت وماتجرأت اطيها الرساله والقلق اكل گلبي اريدن تعرف بحبي ليها وانه شاريها بس دكول نعم اگلب العماره كلها واجيبها لحد يمها
شافني اخوي عادل متوتر والوبن
عادل : اشمالك حامد تروح وترد من موتتني اريد اقره ماكو عدي امتحان باجر وانت تفتر فوگ راسي
حامد : چا شنهي ماتقرا انه كاظك
عادل : شوف روحك چنك حامل وتطلك
حامد : اسكت ولك انت ماتجوز من لسانك هذا وتعال ليه الحجيه موتكلك لاتحجي بغدادي من انه يمك حتى لا لهجتك تنساها
عادل : هههههههههه هو اكو احلى من لهجه بغداد وبنات بغداد
حامد : يعويدل لاتنسى روحك انت ابن شيوخ ومايصير تندك بأعراض الوادم انه وضعك ماعاجبني وساكت وماكلت للشيخ حتى لايحرمك من الكليه
عادل : دخيلك حامد كله ولا الشيخ غير يموتني هسه اني شمسوي هنه يخبلن وگلبي رهيف مااتحمل اشوف حلوه ومااتگرب ليها
حامد : عرض الوادم مولعبه يبن ابوي
عادل : هسه عوفك مني شبيك وضعك موطبيعي وجياتك هاي الفتره لبغداد ابد موطبيعيه ولتكول لخاطري كل متجي تطلع بأوقات محدده وين تروح
حامد : راح اگلك چي ماعدي غيرك يساعدني
عادل : احجي ورايه امتحان خلي نفتهم الشيخ حامد شبيه
حامد : وحجيت لعادل كلشي
عادل : يابويه اخوي عاشك وانه ماادري
حامد : هههههههه ردت لهجتك
عادل : انت تنطق الحجر بله من كل عقلك سنتين وانت تباوع عليها من بعيد شتنتظر من تشوف بيدها جاهل ومتزوجه
حامد : چاغير اموتن
عادل : لو تروح تخطبها لو تروح تكولها احبج وتتعرف عليها
حامد : چا هيه لويطونها انتظرك چا هسه هي بداري بس حاولت وابوها قافل حتى ماسأل عني منو انه ابن منو سد الموضوع ماازوجها
عادل : حقه صغيره انت تكول عمرها هسه يطلع ١٦ سنه واحنا بغداد وبنات بغداد مو مثلنا بالعماره بس يبلغن يزوجوهن وهسه شراح تسوي
حامد : انه كتبتلها رساله وردت بس ردها عليها واذا شفت منها قبول اعترف ليها بحبي وراها اجيبن هلي ويخطبوها مره ومرتين لحد ماينطوها ليه
عادل : شتنتظر لعد متنطيها الرساله
حامد : هنا الطركاعه من اكوفن كبالها جسمي يثلج ولساني ينعكد وروح تسيح ياخوي

عادل : هههههههه وين جميله عنك الشيخ حامد الي تهابه الناس يسيح كدام مره لوتدري امي تحرك روحها
حامد : انه حجيت وعده علم لان كلت راسي بت عمك احلام وانه مااريدنها
عادل : واكيد گلبت الديره
حامد : ههههههه الشيخ سكتها واله شتعرف امك
عادل : زين انطيني انه اوديها للرساله
حامد : اي والله يبعد اخوك تنقذني
عادل : انطيني الرساله واني اوديها واخذ الجواب منها بس هاا كولشي بثمنه
حامد : روحي ترخص ليك خويه
عادل : سالمه روحك اريدن فلوس عندي سهره ويه الولد
حامد : بس لاتتأخر اخافن عليك
عادل : انطيني الفلوس ورسالتك وان شاء الله خير

اطيته لخوي وحزام ظهر رسالة عذابي وراها بيومين اجاني
هاا خويه ابشر
عادل : والله ياخوي ماقرتها الرساله وشكتها وشمرتها بوجهي
حامد : لادگوله صدك عود چاليش شسويت انه
عادل : مبين البنيه تحب واحد
حامد : لا يعادل مامرجيه منك البت اشرف من الشرف وصار سنتين امشي وراها ماشفت منها غير كل خير

والله ياخوي العندي كلته وانت براحتك

حامد : بيومها قررت اروحن احجي وياها خاف فهمتني غلط كعدت الصبح لبست وتعطرت انه بغداد البس مثلهم مالبس دشداشه وعگال
وردت اطلع ليها ووكفني عادل

عادل : وين رايح وبهاي الكشخه عبالك عريس
حامد : ماشي لطيرتي لازم ولابد تفهمني
عادل : يمعود وين رايح تفشل روحك اكعد واسكت
حامد : چا اتاني لحد ماتروح من ايدي
عادل : شوف حامد انت ماتعرف بنات بغداد عبالك مثل بناتنا ذني حتى توكعهم بحبك يرادلهن صبر وعلى نار هاديه
حامد : بعد اخوك ياصبر وانه صار سنتين انشوي على هاي النار
عادل : بس هي ماتعرف شنو الفايده شوف عوفها يمي واني اخليها تجي لحد يمك وهي تكول الك تعال احبك
حامد : خويه انه رايد البت على سنه الله ورسوله ماريدن العب مثلك انه رجال اخاف الله والبت عاشگها وداخله بصدري وبضلوعي هناااا (واشر على گلبي) واريدنها حلالي
عادل : تصير خويه تصير بس أصبر هسه انت صبرت سنتين متصبر شهر شهرين انت رد للعماره ومن تجي المره الثانيه الك البشاره
بس اليوم لاتروح
حامد : هاهيه خويه اسمع حجيك لچن انت تفهم بهاي السوالف انه رجال مااعرف الف والدوران عشگتها لحد كطع النفس واريدنها حلالي ساعدني يخوي
عادل : تامر خويه
حامد : انه اروح اشوفنها من بعيد گلبي جمر عليها
عادل : وتالي وياك يمعود لتشوفك وتخرب كولشي وتضيع منك
حامد : انه اليوم اروح اشوفنها وروح جدك من بعيد ومااحسسها بمچاني چا سنتين وانه اراقب بيها وماحضت بيه (لكفتني) هسه والحظ تشوفني لا تخاف ماتشوف خويه
ورحت شفت طيرتي طير البراري ويمشي على گلبي كل خطوه ليها تهزني هز وبيومها بعد ماشفتها رديت للعماره وعفت رويحتي واتاني ارجع وتكون ليه
من رجعت تفاجأت ابوي الشيخ راضي طايح ومكسور وانه انقهرت هذا الجبل ابويه هذا حاله وانه مااعرف بهذا الوكت ابوي عاف گلشي على راسي ودخلت الديوان وانه شاب صغير وجنت احكم وحكمي الكل يهابه صدك جنت زغير بس جنت من تصعب شغله عليه اروحن للحجيه تحلها ليه بثواني وگدرت اسيطر على امور الشيخه وطلايبها وشهر جر شهر وانه مااكدر اعوفن العشيره وابوي التعبان ومارحت لبغداد وعادل يجي يوم واحد وكل مااسأله عن رويحتي يكلي مارحت التهيت بالدراسه
وبيوم كاعد على الشط بعد ٣ اشهر من سالفه الرساله واجه يمي اخوي وصديقي حسان چان گلشي يعرف ودوم يكلي لاتترك طيرتك وحيدها ترى تنصاد وانه شبيدي ياخوي والحمل زاد علي
وفرفحت روحي عليها ومحسيت بروحي غير ماخذ السياره وساعه ٧ المسا وساحل حسان ويايه ولبغداد اشتاقيت الها حتى لو اوكف بالفرع واشم الهوا التشتمه وصلنا تالي الليل وجانت حرب والدنيا عالگه وضرب وضلينا بالسياره گتله مااريدن عادل يعرف جاي ونمت بفرعهم وگبال بيتها واباوع عليه سهرت وبيني وبينها امتار وانه اباوع على بيتها والليله گمره واسمع اغنيه ياس خضر اعزاز ومشغلها وراد راسي على الكشن واشرب جكاير وعاين عليها وادندن ويه الاغنيه

عزاز عدنا عزاز عزاز

وشوقهم شوق لشواطي الليل وآخ الليل دجلة

عزاز والله عزاز.. شوقهم شوق شواطي الليل دجلة

مدللين والفراق بعينهم شوف الحمام الجاي لهلة

والعتب بشفاهم ود وحنين.. مدللين احباب قلبي مدللين

عزاز حق الله عزاز
حسان : چا اليوم مانامن تعال ليه ماكافي ساحلني من العماره لبغداد ونايمين بالشارع وفوكاها تغني
حامد : نام خويه نام العاشگ مثلي ماتغمض عينه ورويحته مويمه
حسان : چا انته جاي لرويحتك انه شكو
حامد : غير خوي واريدك وياي
حسان : خوة السوده بله هسه شون بينا شيردنا انت تسودنت من عشگت البغداديه
حامد : ااااخ عزاز حق الله عزاز
حسان : احرگ روحي انامن احسن اعرف انه الراح اردك للعماره واسوق عبن انت ماراح تنام وماتگدر تردنا الصبح
حامد : انه مااردن للعماره اله اشوفنها الصبح
حسان : خوش وانه اذا جميله تسودنت علينا اگللها موش انه هذا شيخنا تسودن بعشگ البغداديه
حامد : نام خويه لاتخليني اتسودن وادگن بابها عبن گلبي وجر مشتاگ ليها شوك المسجون للحريه
وضليت الليل كله على بابها وماغفت عيني وهذا حسان مسويها سنفونيه بالشخير
لحد ماصار الصبح وطلعت طيرتي وردت رويحتي شفتها واني گلي يرجف بويه بعد بيتي وهلي
حسان : طفرت من النوم شنهي شبيك
حامد : تعال ليه گلبي اضنن وگف
حسان : چا لوواكف شون تحجي
حامد : شفتها وردت رويحتي لمجانها
حسان : وانه طلعت رويحتي من الجوع
حامد : انته كل همك المواچيل (الاكل)
حسان : چا هو اكو احلى من المواچيل
حامد : طيرتي هي الهوا والمواچيل ليه
حسان : وانه شمحصل انت تتمعشگ وانه اموتن جوع مو
حامد : ههههههه يله نردن للعماره تاخرنا
حسان : وحگ علي مااردن اله أكل چا هي وليه ساحلني من العماره والليل كله بالشارع ونايمين بالسياره وتريد اردن هذا الطريق كله واني بطني تصيح من الجوع مااردن اله توكلني
حامد : ههههههه امشينا نتريك وراها نرد لاهلنا

رديت للعماره وبعدها بكم يوم توفى ابوي انكسر ظهري بوفاته وگفت على تابوته وبچيت وهاي اول مره تنزل دموعي ومسحتهن جميله وگالت
الحجية جميله: انت الشيخ وشيخنا مايبجي لابد تكون گوي وتثبت للكل راضي مامات خلف اسد مثله
بست ايدها وراسها الله يحفظج ليه يايمه
الحجية جميله: يبعد امك انه اريدنك جبل ماتنزل راسك روح يمه لعزاا ابوك ووگف جبل وگللهم راضي مامات انه بمچانه

حامد : تغيرت حياتي كلها وصرت اركض بين الفصول والعشاير مااندل دربي حياتي كلها تغيرت ومن يومها قليل اروحن لبغداد بس دوم اسأل عادل عن طيرتي ودوم يگلي زينه
جنت اروحن كل ٤ اشهر او ٥ لبغداد ليله أسهر أبابها واشوفنها من صباح الله واردن
اشمن الهوا التشتمه وترس عيني منها واردن وكل فتره أشوفن طيرتي تكبر وحبي يكبر ليها عشگتها لحد كطع النفس بس مااكدر اتقدم ليها چن والدي متوفي جديد وعدنا بذاك الوكت مايندك فرح أبيت الميت اله وره سنتين وخاصه اذا بيت الشيخ

ومرت وصار ٤ سنوات وانه احبن طيرتي يمامه وتلعب بروحي لعب وقررت اودي اهلي يخطبونها البت كبرت وصارت ١٨ سنه وابوي فات على وفاته سنتين وحجيت للحجيه ورادتني بس أزوج حتى لو البغداديه بس صار المامحسبله

اجانه بيوم من الايام عادل وگال احبن بنيه واجو خطابه عليها واريدكم تخطبوها ليه
وتسودن علينا اله نروح نخطبها عادل جان يعرف انه بهذا الشهر مااگدر اروحن لبغداد لان چان عدنا فصل بالديره چبير بين عشيرتين والدم واصل للرچاب (للركبه) ومن كل عشيره راحت زلم چثيره ومن كل ولابد افضن السالفه والا السلف كله يحترگ

وبوكتها دك رجل اله هسه تخطبوها ليه يمعود اصبر بس اكملن الفصل واهدي الوضع اصبر يومين ماقبل گال البت تروح من ايدي طلبت من فاضل يكون بمچاني (مكاني) ويروح يخطب البت وانه گتله احظر وياك العقد كون انه الجبير وبحكم ابوه ً وسألته البت سألت عليها تعرفها كال مضمونه واني سالت واحبها وتحبني
ولك عويدل هذا زواج عشرة عمر مولعب يبن ابوي
عادل : بس اخطبوها وعوفو الباقي عليه بس همه عدهم شرط
الحجية جميله: چا خوش المسعده تتشرط علينا
حامد : شنهي شرطهم
عادل : يردون اعيش بغداد وياها
الحجية جميله: اصخام الصخمني تخبلت ولك تروح ليها وتعوف امك
عادل : يمه وين اروح هو تاليتي ارجع هنا
حامد : شون ترد وهمه يردون بتهم يمهم بغداد
عادل : اني اتفقت وياها بس اول شهرين وراها نعيش هنا بس گدام اهلها عادي كأن نگعد ابغداد وبعدين انطلع حجه ونرجع للعماره
حامد : هذا يسمونه لعب ماخذ زلم مشوربه ويطونهم عهد وانت تريد تكسره
عادل : البنيه راضيه بكولشي بس مشوو الوضوع بس اتزوجها اني احلها
الحجية جميله: ترد هنا يعادل واله اغضب عليك اليوم الدين
عادل : لاتخافين يمه راد للعماره بس اتزوجها
ومشو وخطبوها وبعدهه بيومين صار العقد واصريت اروحن وياه للمحكمه هو مارضه شون تعوف العماره وراك خطار وناس بس گلت انه اخوه الجبير وبحسبت ابوه ماينطني گلبي اعرفه وحده ويه الغرب لازم احضر وصلنا للمحكمه
وعادل متوتر وعصبي مافهمت توتره لحد ماشفتها دخلت والابتسامه شاره على خدودها وصلت يمي وان جمدت حسيت بلحظه والجبل التكول عليه جميله انهدم ماعرفت شسوي عين على أخوي الي دنج من شافني وعين عليها وعلى عيونها الي تلمع من الفرح سلمت واول مره اسمع حسها بليه مااختل واسمعه بس وانه حماها
نار وشبت بيه اختنكت وگفت من الصدمه ماحچيت وعقدت گدامي طيرتي على اخوي
ولك خويه ابن امي وابوي شعملت ليه

ماحچيت وي عادل وبس كملو العقد طلعت اركض وصعدت لسيارتي ورديت للعماره وطول الطريق آنه صافن اي انه ابحلم اخوي مايسوي هيچ هذا انه ربيته وكسرت ظهري عليه ايام ماانامن حتى اداري من يتمرض واروح وارد وحاير بيه وبدوامه جنت مااحطن اللگمه بحلكي اله احطها بحلكه الفلوس الي ابوي يطيهن ليه اشيلهن واحطهن بجيبه واذا تعارك اهدن وياه واحمي بصدري واتأذه وكله ولا تنلمس شعره منه زين هو يدري بيه اعشگها ليش ياخوي

واول ماطبيت لغرفه الحجيه
الحجية جميله: هاا يمه رديتو شبسرعه بشر تزوج اخوك
هنا صحيت من الصدمه وكتلها يمه ولدج تزوج طيرتي
الحجية جميله: يمه حميد شجاك بيك شى ليش ترجف يبعد امك شجرالك
حامد : وهنا فقدت اصيح واكسر كلشي حولي والحجيه تلطم تريد تعرف السالفه
الحجية جميله: يمه بروح ابوك تهدا وگلي شنهي الصار اخوك بيه شى
حامد : انه الي بيه يمه انه
الحجية جميله: يمه اسم الله دخيلك ربي شبيك يمه
حامد : انه الطعني اخوي واخذه رويحتي وگاعد أحجي وشوفن يدخل عادل كظيته من اهدومه
ولك من دون كل بنات الوادم ولك هيج انت نذل طايح حظ تحط عينك على حبيبتك اخوك
عادل : اوكف حامد خلي افهمك
حامد : شتفهمني ينذل وبديت اضرب بيه والحجيه تفاكك بينا وتصارخ
الحجية جميله: يمه ولدي راح يموتون يمه الحگو ليه وليداتي ضاعوا
حامد : كظيت عادل شبعته كتل واصيح واگله ولك ليش شسويتلك هاي النسوان الظاله كلها مسدن عينك ماحلت اله يمامه وتعلم بيه احبنها وعاشگها آشون گدرت تتكرب ليها وتخليها تعشگك وتاخذها مني
عادل : اني مااخذت شى منك لان هي مو حبيبتك ولا ملكك واخذته منك مكافي كولشي الك الشيخه والبيت والگياعين وابوي من جان يحجي يگول ولدي حامد ولدي حامد چن بس انت ولده
حامد : ولك ياسگط ابوي محملني امانه انتم ودومه يگلي اخوتك امانتك گلي بشني گصرت وياك حتى انت احسن علام بينا وخلصت كليه وشتريد نگولك صار ليش طعنت اخوك ليش غدرت بيه وهنا گام يصيح ويحجي
عادل : حبيتها موبيدي من شفتها عجبتني وبمرور الايام حبيتها
الحجية جميله: يمااي شجاكم يبعد هلي يماااي ضاعو وليداتچ يجميله من وره البغداديه طرگاعه اللفتهه كون
حامد : اليوم اكتلنك خلاص اذا ما اطلگها
عادل : مااطلگ لو على گص رگبتي وشسوي سوي
حامد : جريت السلاح وحطيته براسه
الحجية جميله: يمه دخيلك ربي اشجرااك حميد هذا اخيك بروح ابوك لاتكتله. يمااي عين وصابتنه
عادل : عوفي يمه خلي نشوف شون يكتلني
الحجية جميله: ولك سد حلگك يمسودن من طاح حظك لعبت بحالنا لعب ماطيتنه درب لو اعرفن هي نفسه البت ولا اروحن واخطبها
حامد : طلگها واليوم
عادل : حتى تتزوجها مو لو تموت مااخليك تلمس شعره منها
حامد : لك من يوم مادنت نفسك عليها وصارت على ذمتك حرمتها علي انه مو نگس مثلك واطلگها منك واتزوجها بس عوفها
الحجية جميله: ولك يمه عادل طلگها وازوجك مره تسوى عشيرتها يمه اخذ كلام أخيك
عادل : كتلكم مااطلگ تريد اكتل اكتل بس طلاگ مااطلگ

حامد : نزلت السلاح وكتله عوفها خوي روح تزوج اي وحده اله هيه انه مامعترض لو هي متزوجه اي واحدهاي قسمة ربك بس مو اخوي
الحجية جميله: يمه عادل طلگها هاي البت ماتفيدك اخوك عاشگها آشون الك نفس بيها واخوك عاشگها
عادل : يمه احبها وهي تحبني اذا هو حبها هي شنو ذنبها
حامد : ولك انت تدري احبها ليش گربت ليها

عادل : البت ماتريدك هي گوه
الحجية جميله: چا البت تدري اخوك عاشگها ورضت بيك
عادل : هاااا اي تدري وكالت انه مااحب اخوك وماعندي شى وياه وتحبني اليه ورايدتني الي ليش تظلموني

الحجية جميله: نعلى ابو اهلها بلوه وطاحت علينا هلكيوليه شترجه منه راح تضيع وليداتي
عادل : يمه شعليها البنيه ابنج هو الي لازگ بيها وهي متريده گوه
حامد : طلگها وعسى تتزوج ١٠ نسوان انه اخطبهن ليك وهي اي واحد تتزوج مالي بيها بس لا اخوي ولك لاتكسر ظهري يعادل

عادل : انه اتزوجتها ومااطلگها
الحجية جميله: اسمع يولد راضي تطلگها ورجلك فوگ راسك والبت تنساها واله وحگ الرضا المسموم ال ماارضى عليك ليوم الدين
عادل : مااطلگها وشسوون سوو
حامد : اطلع بره وماتطب لهنا هذا البيت واهله حرمو عليك وحتى على گبري ماتوگف يعادل
هسه عرفت ليش اختاريت هذا الوكت للمشيه ثاري تدري مااكدر احضر بالخطبه واختاريت اكثر وگت صعب احظر بيه لان تعرف لو حاظر المشيه وحك علي اخربها
عادل : المهم صارت زوجتي ومالكم اي حق يمي
حامد : اطلع بره لابارك الله بيك
عادل : طالع وبعد متشوفون وجهي
الحجية جميله: ولك عويدل كسرت الخوه يبن بطني دمرت اخوك تعال يراضي شوف وليداتك من النسوان خوتهم صارت مااي

حامد: طلعت واني الدم ينگط مني ضغطي صعد وخشمي طك دم وانه امسح بطرف دشداشتي وارجف وصلت للشط وگعدت وهنا طحت بعد مابيه حيل راح وگمت ابچي على ابوي من مات مابچيت هيچ
وابچي وعبالك جاهل ابچي على طعن وغدر اخوي ليه وابچي على رويحتي وطيرتي الراح تنام بحضن اخوي انه لو ماخذه غير اخوي اگولن قسمه وقسمتي موهيه وماصارت ليه بس موو اخوي ابچي واتخيل يحبها ويشمها ويكضها اااااااااه يانار گلبي واعيط وابجي ااااااااه يابويه تعال ليه وشوف حالي يابويه انكسر ضهري يابويه ومنين من حزام ضهري
گضيت ليلتي على الشط انحب (ابجي) مثل النسوان الغدر صعب ومن اخوك طعني بظهري وكسرني
رديت اجر بروحي ولگيت امي متخربطه وماخذيها للمستوصف هم زين ماماتت ضاله تلطم وتنعي ومتخربطه فرد مره صايره
ضليت ايام حابس روحي بحجرتي وعفت الديوان والعشيره والدنيا كلها وحبست روحي وانه كاره الدنيا هاي الشكبره ضاگت بعيني ليش ياخويه عفت نسوان الدنيا كلها ماحلت بعينك بس محبوبت اخوك وهي صدك تعلم بيه احبها مااصدك لان من شفتها بالمحكمه وچنها ماتعرفني چا بان عليها ترتبك تقلق لا عادل لعبها صح ليش ياخوي

وطبت امي عليه بعد ماحبست روحي ١٠ ايام وبس جكاير بين حجرتي والشط وحسان ماعافني گاعد گبالي
الحجية جميله: هايمه أشونك اليوم يبعد امك راح أموتن من وراك تراضاها ليه
حامد : يمه واليرحم والديج عوفيني بحالي
الحجية جميله: يمه انت چبيري وبلياك هاي الوادم كلها تضيع چاهاي السنين كلها ابوك يربي ويكبر حتى تصير حزام لينه يمه اذا عفت گلشي الوادم ذيابه ماترحم ترضى تعب ابوك وجدك يروح الوادم كامت تناشد الشيخ حامد مامهتم للعشيره عايف الوادم تتذابح وهو نايم بحجرته ليش ياوليدي تخليهم ياكلون وجهنا انت ابن الشيخ راضي الجان بعز تعبه يوگف بين الوادم ويحل طلايبهم يمه الدنيا ماترحم الضعيف واذا انت اضعفت احنا نضيع يمه گلها هاي برگبتك واذا اخوك غلط وضيع نفسه وركبه الشيطان انت لاتغلط يايمه وتضيعنا كلنا
كلنا بشاربك يحميد

حامد : يمه گلبي وروحي مكسوره يمه
الحجية جميله: من سوده بوجهي شبيدي عليك يمه هذا حظك يبعد چبدي (كبدي) هاي النسوان شياطين تخرب بين الخوه
حامد : يمه البت شعليها هذا وليدج الشيطان
الحجية جميله: يمه چا ماسمعته من كال تدري انت عاشگها چا شون ترضاه هاي وحده خبيثه وخربت بينكم وركبت ودندلت رجلها عساها بحظها وبختها ولاتشوف يوم راحه ويوجع گلبها بمرض ماطيب منه مثل ماوجعت گلبي على وليدي بجاه ابوفاضل

حامد : يمه لاتدعين عليها بروح ابوي
الحجية جميله: لاوالقسمه بعدك تحبنها امدا حظي اي والله
حامد : يمه چاهي دگمه وادوسنها وانساها
الحجية جميله: يمه دواك يمي
يادوا يمه البيه طب الدنيا كلها مايداويه
الحجية جميله: تتزوج يمه وتعيش حياتك وتنساها
حامد : صدگ تحجين انه اتزوج يمه جوزي مني لااهج من الديره كلها وشرف محمد
الحجية جميله: چا تظل عمرك كله تنوح عليها وتعيش من دون زواج وهي مطموره بحضن اخوك
حامد : دنجت رحمه الله والديج يمه ذكريني كل شوي هي بحضن اخوي
الحجية جميله: سوده بوجهچ جميله يايمه شسوي چا انت تحجي الاخرس وانه اخافن عليك وگلبي وحك العباس نار واجه (شاعله)بيه گلي اشون وانه اشوفنك تضيع مني انت شمعه بيتي يحميد واخافن عليك واريدنك ترتاح يبعد ارويحتي ييمه

مرت الاشهر وانه ذبيت حيلي كله على المضيف وطلايب الوادم واركض منا ومنا مااگعد حتى لاافكر بلصار وحسان چان وياي ونعم الاخو والصديج ودومه يهون علي

وبيوم اجه ليه عمي محيسن وكلي بنيتي احلام ليك يشيخ آنه مارديت عمي چيف الوادم كلها گاعده بس روحي طلعت انه مااريدن اتزوج ورحت للحجيه وهي تتوسل اوقبل واتزوج كلت مابيها مجال اودي على احلام واحجي وياها ووديت فضيله واجت تركض وگعدت گبالي
شوفي يبت عمي انه عمي هداج ليه وانه مااريدن اتزوج
احلام : ياشيخ اصيرن خدامه ليك بس لاتعوفني

حامد : يابت الناس انه رجال گلبي موليه وحياتي صعبه راح اتعبج شوفي واحد من ولد عمومنا يتزوجچ ويعيشچ العيشه التستاهلينها
احلام : بكلشي راضيه ومااريدن غيرك
حامد : استغفر الله مااريدن اخش بخطيتچ اكلچ گلبي مو اليه خلي اگولنها بوجهج انه احبن وحده
احلام : من اصخام الصخمچ احلام ومنهي هاي
حامد : مالچ شغل
احلام : چا ليش ماتزوجتها
حامد : ماتصيرلي مره
احلام:چاشنهي حزوره
حامد : لاحزوره ولاشى انه مااريدن اتزوج
احلام :چاتريدني اعصي ابوي وكلامه انه اليكوله ابوي امشي بيه
حامد : يعني راضيه تعيشين ويه واحد مامتحمل روحه
احلام : راضيه وانه اخليك تتحمل روحك وتحبني هم وتحب الدنيا كلها
حامد : لا اله الا الله سكتت البت تكمز وراضيه بكلشي وبت عمي موغريبه والحجيه مافكت عني اله اتزوج والاريدنها حرمت علي حتى لازم ماافكر بيها لان صارت مرت اخوي وحرمت نفسي حتى بالتفكير ومن احن ليها استغفر ربي واتذكر هي هسه حرمت اخوي

واتزوجت احلام وجانت كد الكول بس بالمگلوب وكرهتني الدنيا كلها وحده بس الطلايب وراها يوميه هوسه بالبيت وحايره هاي گالت وذيج حطت وخاف چنت اتحمل البيت ساعه ساعتين صرت اكره كلش
ونورت جنه بنتي وحيدتي وسميتها جنه لان هي الشى الوحيد بذاك الوكت اجه جنه لحياتي الميته
ومرت السنين وانه كلشي مااعرف عن اخوي ٧ سنوات وانه ماشايفه بس اسمع اخباره من الوادم ومرات حسان يشوفه ويگلي
چنت اعرف امي توديله فلوس كل شهر حتى البيت والمحل الشتراهم الفلوس ودتهم امي بس سكتت لان ماردت يتبهذل وانه اعرفنه مابيه خير مايگدر يشتغل ويلم نفسه واحنه خير من الله ورثه بكاع ابوي موجود خليت امي توديله ومامنعتها حتى يعيش ويعيش هله (عائلته) بدون مايمد ايده للوادم

لحد مابيوم اجاني يرجف للعماره وانه وگفت على حيلي وعرفت مسوي مصيبه ويه بت بيت وماخذ وجهه (عذريتها) والبت حبله وانه تخبلت بيومها كضيته وبالحزام گطعته تگطع عليه أشون يسوي بينا هيچ ابن الشيخ يدوس شرف الوادم چا ويمامه مويحبها وباع اخوه علمودها
كل الي افتهمته بوكتها غلطه وصارت ويبچي
وبقى ٣ ايام يمنا بالعماره وامي اداوي بيه لان اذيته گطعت الحزام كله عليه فقدت عليه راح بطرگاعه وكسر اخوه ورد بطرگاعه اكبر وكسر بت
ولوما حلفان امي ماادخل ردته يتأدب بس امي حلفتني بأبوي وهاي سمعتنا
وتدخلت وكعدنا ويه الوادم وجوهنا مكسوره من وره طيحان حظ عادل والوادم شرطو يتزوجها وفصل واحنا وافقنا
عادل : مااتزوجها لو اموت
حامد : تتزوجها ورجلك فوگ راسك واله وشرف محمد اخليهم يكتلونك ويذبونك للذيابه ذبت الچلب انت كسرت البت وغصب عنك تصلح غلطتك
عادل : وزوجتي شگول الها
حامد : چا من نمت بحضن غيرها مافكرت بيها
عادل : كتلك غلطه وصارت ساعه شيطان
حامد : هذا الصار وباچر تعقد عليها للبت
عادل : بس همه مهدديني بناتي
الحجية جميله: جيب بنياتك هنا
حامد : لا يبقون بغداد وادز جماعه يحرسوهم
الحجية جميله: يمه واخيك أشون ينام وبنياته ومرته حبله هناك هي چم يوم تفض الطلابه الگشره ويردن لداره
حامد : طلع عادل يجيب زوجته وبناته ليش يايمه ليش تگربيها ليه ماعونت گلبي يسكت ويهود من ناره (احجي بگلبي)
واجت وشفتها صار ٧ سنين ماشايفه درت وجهي منها هاي مرت اخوي مو انه الاحطن عيني على عرض اخوي

انه حرمتها عليه حرمت رضيعتي حتى بالشوف

وبعد الفصل والگعده اخذو منه فلوس وعقد عليها عادل جان بوگتها المبلغ جبير كلنا المهم تفض والوادم قبلت بالفلوس وره مافض گلشي وجان المفروض باجر نستلم البت منهم حتى تبقى يمنا زوجته صارت بعد ومنشوف اله تولونا وكتلو عادل رغم نفذنا كلشي كالو زين اذا هم يردون يكتلوه حتى ينتقمون لشرفهم ليش خذوا الفلوس
وجذبو علينا وصار الثار
وكل الي صار بعدها سببه الغدر

صحيت على صياح ابراهيم من ذكرياتي ومن كل الجره ليه حيل شكد صار وكت وانه صافن واتذكر
ابراهيم : بويه امي فضيله تكول صبينا الغدا تعال
حامد : چاي بويه ردن لامك
يمامه : رجعت لسجني واني مخنوكه وكمت مااطلع اسمع اشكال العياط والحجي ومنتظره اعدامي قصدي زواجي من حامد بس مااعرف شينتظر صار اكثر من ١٠ ايام من رجعنا للعماره واني وبناتي بين الغرفه والحمام وفضيله المسكينه مثل كل مره تحير بينا بس طول ١٠ ايام ودق ساكته تحجي شويه ويه خواتها واني حتى بوجهه مباوعت موبيدي الوضع الي اني بيه خارج تحملي حتى ابويه من خابرني من العمره مكتله على شى مردته يتأذه وهو هناك قابل شيريد يسويلي رجال جبير لاحول ولاقوه وامي مره تعبانه ونصار اخويه فقير لايحل ولا يربط كلت من يرجعون افهمهم

من البارحه اسمع عياط وحجي اشكال بس مكعد افهمه بس هوسه صحت فضيله لان سمعت اسم بنات يمامه واسم ودق لازم افهم كولشي

تعالي فضيله اكعدي
فضيلة : شنهي خيه محتاجه شى امريني
يمامه : ميأمر عليج ظالم بس اريد افتهم شكوو صار من البارحه عياط وصياح وحجي شصاير وتعرفين بس اطلع واسال امج مراح ترحمني
فضيلة : والله ياخيه مااعرفن شكولن
يمامه : خير يمعوده وكعتي گلبي
فضيلة : تعرفين الوليد الي ضربه مازن ابن اخوي
يمامه : دنجت وباوعت على ودق اووف اي اعرفه منتظر شبيه
فضيلة : الوليد ضربته مأذيته ويكولون شبه مسكط وطافيه وحده من عينه خيه مازن ضاربه ضربه موت
يمامه : يمه اسم الله وتالي
فضيلة : هله (اهله) يردون فصل فوك دكت ولدهم بس الفصل الي يردوه هو
يمامه : شنو هو
فضيلة : مره
يمامه : شون يعني مره
فضيلة : الوليد طلع من عشيره معروفه وجبيره من الناصريه وذوله اوادم طبابين شر وبعد الحجي وروح عمك وجيب عمك كالو نريد مره لمنتظر فصليه يعني تعرفين الفصليه خيه مو
يمامه : لطمت على وجهي دخيلك ربي وتالي
فضيلة : وهسه اخوتي ولاد عمومي ديقررون يابت تروح فصليه واله يصير دم
يمامه : شنو هذا التخلف وذولاك ميخافون الله فوك ما ابنهم متحارش بعرض العالم
فضيلة :چا هي الوادم هسه تعرف الله كلها تشتغل بالحرام المهم فلوس
يمامه : خلي ياخذون بيتي واكو البيت الثاني وذهبي كله انطي بس تنسد الشغله
فضيلة : خيه تحزمو حزام اله مره مايردون اله فصليه
يمامه : ومنو تروح
فضيلة : هسه سمعت امي واحلام ويمهم حامد يكولون وحده من بنياتج
يمامه : لطمت على وجهي وطفرت لبست الربطه وطلعت اركض
احلام : والله انه بس هلبت وماانطيها وهي شنو ذنبها بنت عمها تلعب واحنا نبتلي

حامد : حسج مااسمعه انتي شنهي الي كعدج بنصنا
احلام : ياشيخ انتم تريدون بنت وماعدنا بس بتك وبنات الحيه
حامد : كضي (الزمي) لسانج لا اكصه
شون اكضه وانه اشوفن الظلم بعيني بنياتها السبب ومازن دافع عن شرف بنت عمه وماكو غيرهن انه هلوحيده وبنت فضيله مالنا حك عليها ومازن ماعنده اخت يعني ماكو غير بنت يمامه
يمامه : دخلت مخروعه وابجي واتوسل بجميله دخيلج عمه كله ولا بناتي بكولشي راضيه بس بناتي لتنطون وحده منهن فصليه
الحجية جميله: چا من سوت المكسوره مافكرت بنيتج
يمامه : والله مظلومه ودافعت عن نفسها والله انداريت على حامد دخيلك شيخ بنتي امانه عندك كولشي مااريد بس بناتي منك
الحجية جميله: اسكتي حسج مااهيسه
تعال يمه حميد نروح للزلم ونطيهم قرار منهي تروح فصليه

طبت الحجيه والعوجيه بيدها والكل وكف الها يسلم واني ابجي واضرب على وجهي راحت بنتي اكيد ودق راح ينطوها فصليه
وجان تكول
يتبع ......
مساء الـ🌹ـورد حبايبي بارت اليوم طويل لعيونكم شكراً لتصويتكم للقصه وتعليقاتكم كلها اقراها واسفه اذا مجاوبت عليها لكن اقراها كلها إٱللـِْﷻـِْﮭﮧ شاهد واستمتع معاكم بيها
تحيااتي من القلب وانتظروني الاربعاء ببارت جديد واحداث مشوقه من سجينة الروح
تحيااتي لًلًـّــ💎ــجٌٓمٍَُٓيِّعَْٓ