رواية سجينة الروح الفصل الخامس والعشرون 25 - بقلم ريام هادي

سجينة الروح
للكاتبه Reem
البارت الرابع والعشرون

ودق : ركضت بالشارع واني فاقده واركض ويركض ورايه مازن ومنير ومااحس غير مازن يجرني حيل وعاط بيه
مازن : تخبلتي شجاج
ودق : عوفني ابجي واحجي
مازن : ولج وين تولين امشي وجان اجرها حيل
منير : على كيفك وياها مازن متشوفها تعبانه
مازن : وانت شعليك
منير : شنو شعليه نسيت هي بنت عمي وانصدمت امها ماكو ميصير هيج تتصرف وياها
ودق : ادفع بأيده عوفني اروح لماما
منير : جريتها من ايد مازن شو عوفها تعالي ودق
مازن : جرها من ايدي واني تخبلت وعطت عليه انت شون هيج تسوي
منير : شسوي البنيه منهاره وتعيط وانت اتزيد انهيارها تعالي وسحبتها وامشي
كافي تبجين افتهمي الموضوع يله
ودق : اشهك وابجي ماما عافتني منير ماما متحبني
منير : انتي متعرفين ظروف امج والي سمعته بس تخلصون امتحانات ترحون يمها
ودق : لا مراح يخلونا انروح اني اعرفهم ذوله ميخافون إٱللـِْﷻـِْﮭﮧ
مازن : احترمي نفسج شنو هذا اسلوبج
منير : شبيك مازن صدوك كذب صوتك العالم بدت تتفرج
مازن : من وره سوالف هاي الثوله
ودق : مااسمحلك اني مو ثوله شوف اسلوبك وبعدين احجي على اسلوبي
منير : تعالي ودق نرجع للبيت والي تريدي يجرالج وراح نخابر امج وافتهمي منها
واخذتها من ايدها وللبيت وتمشي وتبجي وهذا مازن عيونه براسه يريد يطك

اول مدخلنا للبيت
الحجية جميله: من صخام بوجهج چا هاي سوايه تسويها
منير : جده البنيه تعبانه لاتزيدين عليها
الحجية جميله: عياره شبيها تعبانه هيه مسودنه من زمان وبس واحد يكضها تخيل هاي مامكسوره عصا زينه عليها چا جرت عدل
منير : ميخالف جده لتعيطين
الحجية جميله: هاي امج البومه گل طركاعه تسويها ولا الثانيه وتعال يعمي شيلني من فلك طرها
منير : هاج ودق اخذي التلفون واحجي ويه امج وافتهمي منها
ودق : مسحت دموعي واخذت التلفون وطبيت

مازن : انت تعال فهمني شنو سالفتك وياها
منير : ماعندي اي سالفه
مازن : وضعك مو طبيعي
منير : هاااا انت دوم هيج تظن السوء بيه
مازن : ولك منير ماكو واحد بالدنيا يعرفك بكدي شعندك ويه ودق فضني (احجي بحركه گلب لوبيدي اكطعه)
منير : بابا كل مافي الامر البنيه بنت عمي ويتيمه وانقهر عليها
مازن : تنقهر على منو على ودق لك انقهر على روحك هاي وحده توديك للبحر وترجعك عطشان

انت لان متعرف تتصرف ويه البنات وكضيت حياتك كلها بالكتب عبالك اني مااعرف اتصرف هيج وحده مثل ودق كل متشد وياها تتخبل بالزايد هيج وحده نمره متمرده متجي بس بالعيني والاغاتي اسلوب الارهاب مالتك تره ميمشي وياها بالعكس هيج يخبلها بالزايد ويطلع لسانها عليك اكثر
مازن : ماشاء إٱللـِْﷻـِْﮭﮧ صاير اخويه خبره بالبنات
مازن : وربك بكل الانواع كبار صغار انت بس دزهن اليه واني احسن دكتور الهن ههههههه
مازن : وجع هم الك عين وتضحك
منير : اكولك صدوك فلوس الكارت عليك لك هاي اليوم راح تخلص الرصيد واخوك مفلس

مازن : على اساس انت الي تشتري الرصيد ميخالف بس نشوف الست ودق شيصفى وياها وانطيك فلوس

ودق : الووو ها ماما ليش عفتيني
يمامه : اسمع صوت ودق تبجي وتشهك
شبيج حبيبتي
ودق : ليش عفتيني ماما شنو بعد متحبيني
يمامه : منيلج هذا الحجي ماما
ودق : لعد ليش عفتينا اني وهمسه
يمامه : حبيبتي ايه تعبت ونقلناها حتى تتعالج وكلها جم يوم تكملين امتحاناتج وعمج يجيبكم
ودق : اخاف ميقبل
يمامه : لا ياعيني اتفقت وياه
ودق : ليش منتظرتينا نكمل ونروح سوه
يمامه : كتلج اختج تعبت وجان لازم نرجع شوفي دودوو امانتج اختج هسه انتي بمكاني مااريد مشاكل كلها ٢٠ يوم ادفعيهن شون مجان مااريد مشاكل وخاصه ويه مازن وصيري عاقله بنتي
ودق : شون اتحمل ٢٠ يوم بلياج وبليه ايه
يمامه : ميخالف امي تحملي لخاطري وكتلج لتسوين مشاكل عيب مااريد يكولون يمامه متعرف تربي
ودق : اكيد من اخلص امتحانات يجيبونا الج
يمامه : اكيد ماما بس اسكتي مو مردتي گلبي ناقصني تعب اني ياحبيبتي
ودق : هذا هو سكتت
يمامه : عفيه واريد عينج على اختج ديري بالج عليها ابد لتغمض عينج عنها
ودق : صار بوسيلي ايوته
يمامه : يوصل حبيبتي روحي انزعي ونزعي اختج وشتحتاجون كولي لعمتج فضيله لتستحين
ودق : مااشي احبج ماما
يمامه : واني روحي بيج يااروح امج
سديته منها وكمت ابجي گلبي نار عليهن بس مابيدي شى بعد

حنان : كافي من اجيتي لحد هسه تبجين مخلصن دموعج
يمامه : والنار الي بگلبي شون حنون شون
حنان : والله انتي الي جايبته لروحج متخبله على الرجال ويوميه تكمزين هنا وهنا ارضي بنصيبج ياعيني بس شون لازم تخربين كولشي
يمامه : حتى انتي ضدي
حنان : موضدج بس حجي الحق اعرف بيه ينزعل منه وانتي صايره اي واحد يحجي حق تزعلين بس جاوبيني شنو مشاعرج هسه اتجاه حامد
يمامه : دنجت وابجي
حنان : يبوو عليه فهميني خلي افهم شتريدين
يمامه : كولشي مااريد بس اريد احافظ على بناتي ومستقبلهن
حنان : وبعدين شراح يصير راح يكبرن وكل وحده تشوف حياتها وانتي كاعده وحاطه ايدج على خدج وتهشين ذبان

يمامه : شتريدين لعد اضحي بيهن لخاطر نفسي
حنان : هو لو اطخه لو اطلع مخه الزمي العصا من النص من جهه بناتج ومستقبلهن ومن جهه حامد وحبه ولج يرعنه وين اكو واحد يحب هيج حب اني اخوج اذا كلي حبيبتي اضل صافنه يوم كامل اخاف مسوي مكسوره واله شون يكولي حبيبتي

يمامه : هههههه والله اخويه فقير بس انتي لسان وميكدرلج
حنان : والله خوفج من الفقير اصلاً الساكت دوم وراه بلاوي بس الي يحجي ويدردم هذا يصير گلبه فارغ بس انتم فاهمينا غلط
يمامه : ههههه لا والله فاهميكم صح الصح
حنان : هسه عوفج من كل هذا الحجي شراح تسوين
يمامه : بشنوو
حنان : بحياتج بأيه بكولشي
اهم شى ايوته هسه اشوفلي دكتور زين يشوف حالتها والكسور الي بجسمها وطبيبه نفسيه لازم اعالجها بأسرع وقت

حامد : رجعت وطول الطريق انه تعبان ليش هيچ سوت بيه يمكن الخلل مني انطيتها اكثر من قيمتها او انه حبي حرامات عليها لو مكعد افهمها وين الخلل وين وكفت على الطريچ شربت جاي احسن راسي راح يطك
دك التلفون هااا بويه مازن خير
مازن : خير يابه بس بالي يمك انت زين
حامد : زين لاتخاف ردن البنيات من مدارسهن
مازن : اي وهاي ودق تخبلت وحجيت كولشي لعمي
حامد : مايخالف حگها امها ماتكدر بلياها انه راد للديره لايضل بالك وعينك على بنيات عمك وخاصه ودق لاتخفل عليها
مازن : لايضل بالك يابه انه موجود

حامد : اوووف شون راح تخلص ايامي وياج مااعرف طگيتي چبدي وكرهتيني بحياتي وبساعه الي عرفتچ بيها

يمامه : رحت لبيتي اني وجنان وجان وصخ لبست ملابس مال تنضيف وهلمره الجو ثلاجه والبيت كله تراب وبارد ودك شغل هلكنا من السطح للكراج سوينا البيت يلمع غيرت الفرش واجه خطيه نصار جايب نفط لان الكهرباء موزينه طلعنا الصوبات النفطيه اثنين وشغلهم وراح وراها بساعتين اجه محمل مسواك اشكال والوان ممبقي شى يعتب عليه
ليش كلفت روحك جان اني باجر اطلع للسوك واشتري
نصار : انتي بس لو سامعه كلامنا وباقيه يمنا نفرغلج الغرفه مال الفرشات وننقل غرفتج يمنا وتكعدين انتي وايه وحتى من يجون البنات هم يكعدون
يمامه : لا نصار المن حاصره بناتي بغرفه صغيره وبيتهن موجود لازم من يرجعن يلكن كولشي مضبوط وخاصه ايه اريدها ترتاح
نصار : هذا الحقير الي دعمها مطيحو حضه اهل ابوها
يمامه : اي بس هو قضاء وقدر
اني مكلت عن حاله بنتي لأهلي استصعبت الحاله ردت تعيش ايه حياة طبيعيه هنا ومحد يسمعها كلمه تذكرها بلي صار لهذا كتلهم اندعمت وهي راجعه من المدرسه ومن الهبطه راح صوتها واتفقت وياها اخاف احد يسألها من اهلي نفس الكلام تكوله اباوع عليها سوده عليه دموعها بعينها وخجلانه وخدودها طماطه حضنتها وكتلها لمصلحتج ماما الله ينتقم منهم الانذال كسروها

رجعت بتت بيت اهلي لان البيت بعده ممفروش وتعبنا من الشغل كلت باجر افرش ومن التعب نمت على وجهي وايوته بحضني

ودق : كاعده اقرا بس گلبي يوجعني وحاسه بتعب وبخوف من الجاي ممصدكه راح يرجعونا لامي اندكت الباب كمت فتحته لكيت منير بلباب
منير : هاا يحلوه اساعدج بشي اقريج شى
ودق : لا تسلم ممحتاجه شى
منير : شنو مراح تكوليلي تفضل
ودق : هااا اي تعال وبقيت الباب مفتوح
منير : ههههه شنو تخافين تسدين الباب
ودق : لا بس مااريد احد يحجي
منير : قابل منو يحجي شوو سدي
ودق : كعدت وهو قريب عليه وهمسه متمدده بالكاع وتقرا
منير : هموسه جيبيلي كلاص مي
همسه : دااقرا حباب مااكدر اكوم
ودق : اني اجيبلك وجان يجرني من ايدي ويكعدني
انتي اكعدي
منير : هاج هذا الف حتى تشترين باجر بس اريد مي
همسه : اي انطيني الالف واجيبلك
منير : هااج وسدي الباب وراج
وخلت وطلعت
شبيج اصفريتي
ودق : هااا لا بس محلوو منظرنا هيج واحنا بغرفه وحدنا جان يتقرب عليه ويحجي قريب اذني ولزم طرف شعري
منير : يجي يوم ونبقى وحدنا بالغرفه وانتي متقبلين اطلعين منها
ودق : طفرت منه حسيت حركته مو راحه
وشنو المناسبه ابقى وياك بغرفه وحدنا
منير : شبيج طفرتي وخفتي لتخافين وتقربت منها
ودق : منير عفيه اطلع بره ليجي احد عيب
منير : صرت قريب منها ليش عيب بت عمي ويجوز بيوم تصير مرتي ومن حقي اتلمس املاكي

ودق : شنو املاكك شنو هذا الحجي منير تره عيب اني اعزك واقدرك بس لتتجاوز حدودك
منير : انتي مو تعرفين من يصير عمرج ١٨ سنه لازم تتزوجين لو اني لو مازن
ودق : منيلك هذا الحجي
منير : لابالله لتكولين متعرفين
ودق : انصدمت من كلامه انتم بكيفكم تقررون
منير : صوتج لحد يسمعج
ودق : شنو لحد يسمعني وهذا الحجي ماما تدري بيه
منير : اكيد ومتفقين من زمان عليه واني من عرفت كيفت لان ماالكه احسن منج مره اليه
ودق : ومنو كلك اقبل بيك

منير : اذا متقبلين لازم تتزوجين مازن وانتي وياه مثل توم وجيري مستحيل تتوالمون
ودق : شنو هي كيكه وتتقاسموها بكيفكم لا انت ولا اخوك ولا اتزوج بالعماره كلها

منير : عادي نتزوج بغداد ولا يمهمج المهم تقبلين
ودق : رجاءاً منير اطلع والله لعبتوها لروحي يوميه هزه شكل منكم حتى المستقبل تتحكمون بيه وفوكاها اخوك يضوج من ادعي عليكم

منير : شوفي لوتدعين منا لحد متموتين مراح يتغير شى هذا الموضوع منتهي ومن زمان وحتى امج تعرف بيه
ودق : هسه اخابر ماما وافتهم منها مااقبل موبكيفكم والله اهج منكم ومتلكولي طريق
منير : هههههه بابا ارضي بنصيبج لو شمسويين ميفيد هاي امج شكد حاولت تفلت من ابويه حامد كدرت لا وجابها جابها واتزوجها وغصب عنها كعدها هنا وبقت وهي الممنونه ولو مااعرف هسه شنو الي صار وخلاه يرجعها لبغداد بس الي بعقله سواه وماطول الشيخه جميله والشيخ حامد كالو كلمتهم معناه الموضوع انتهى وبدون نقاش

ودق : كعدت بالكاع وايدي على وجهي وابجي دنج منير وكومني
منير : كافي تبجين مااتحمل دموعج
ودق : شون ماابجي واني حتى مستقبلي همه حكموه ودراستي وحياتي
منير : لتخافين اخليج تكملين دراستج وبالكليه الي تريديها ونعيش بغداد هم
ودق : شو انت بكيفك تخطط
منير : هههههه صدكيني اني انسب واحد الج متفاهمين وعقلنا واحد وفوك كل هذا احبج
ودق : شنوو تحبني
منير : ليش استغربتي احبج صح مو حًب قوي بس اكيد منا لحد منتزوج بعد سنتين اكيد احبج اكثر وانتي هم تحبيني
ودق : عفيه منير اطلع بره
منير : طالع بس فكري بيها اني انسب واحد الج واخلصج من كل العذاب الي ممكن تشوفيه بحال تزوجتي مازن تقربت منها وجان تدخل همسه
همسه : هاك المي ومازن يدور عليك كتله يم ودق

منير : عزه العزاج
همسه : لتخلط قابل اجذب
منير : لايابوي بس تعرفين تجذبين حتى تاخذين الف مني
همسه : هههههه حتى اشتري انت متشتريلي وتاكل الموطا مني روح مازن يريدك
وانتي ليش تبجين
ودق : مالج علاقه واكعدي ادرسي

مازن : تعال وين جنت
منير : جنت اشوف ودق ليش
مازن : وشون اطب عليها وهي وحدها مستحيل
منير : قابل شسويتلها وهي مو صغيره ولو متعدي حدودي وياها هي تعرف شون تصدني
مازن : لتخبلني من شوكت انت هيج جرئ ويه اهلك نسيت هيه عرضك وبت عمك
منير : لتحسسني جنت اتحارش بيها لو مسوي شى وياها بالحرام رحت بس اشوفها شونها وطلعت
مازن : هاي اخر مره اشوفك تدخل عليها وهيه وحدها واله وروح ابويه اكطعك
منير : مازن رجاءاً التزم حدك ويايه اني كبرت موصغير واعرف اتصرف كافي تمثل دور الاب انت موابويه انت اخويه الجبير واحترمك بس لتتعدى حدودك

مازن : هاي من شوكت هذا الكلام طول عمري بكولشي وياك وياك شنو هاي النبره الجديده
منير : من اليوم وكل واحد يلزم حده اني طالع ويه جماعتي ساعه وارجع بلغ ابويه مااتأخر
مازن : بقيت صافن شون يحجي منير هيج ويايه وليش احس كلامه ويايه كله تحدي

ودق : بقيت طول الليل افكر بكلام منير وشفته واقعي اذا انجبر على واحد منهم اخذ منير احسن من مازن واقلها يعيشني بغداد وميرجعني بالعماره اوف شوكت اخلص منهم

رجعت للعماره ومكدرت ادخل للبيت احس الدنيا ضاكت بيه البيت كل شبر بيه يذكرني بيها بقيت كاعد بالديوان واجاني حسان
حسان : السلام عليكم هاا خويه الْحٍمَدٍ للـّہ على سلامتك
حامد : وعليكم السلام
حسان : چا شنهي حلتلك الروحه يوميه رايح رادلبغداد چا مامليت من الطريچ انه لو ابوي يطلع من الكبور ويروح لبغداد مااروحله منا لشهر خلي يرد للكبور وانه اكله شوكت يروح چا لعبت روحي الطريق اخذ نص حيلي شيخ حامد حميد حميدان
حامد : هااا حسان
حسان : هااا يخوي السفن غرگن اسولف وارطن وانت صافن چا شبيك

حامد : انه اغركت خويه
حسان : اكيد ام ودق چا هيه منهي غيرها تنعل سلفى سلفاك وحگ علي هاي البت راح تجيب اجلك تالي نكتب على الكطعه مال الوفاه سبب الموت اثر مرض طيرته شلت حاله

حامد : اي وعلي شلت حالي چا غير افهم شتريد ولك حسان سودنتني احيرن شسوي ومايفيد لا بالعيني والاغاتي ولا بالعياط والصياح گلي درب امشي ليها تعبت منها گلش
حسان : طلكها وعوفها واخذ بت تراعي الله بيك چا اتضل طول عمرك هيچ مكافي الراح وهاي بنت عمك شامرها وماتسأل عن حالها
حامد : باجر اردها لبيتها وبتها
حسان : چا وانت ماتريدها
حامد : حسان لاتغالط روحك
حسان : هو انه اغالط لو انت البت ماتريدك وحاولت ورد چا هيه كوه خوما كوه
حامد : لو اعرفنها مثل قبل ماتريدني وروح ابوي اطلكها بس هيه تحبني انه اعرف بيها
حسان : چا شون عرفت رحت للسحاره مال ام فرحه ههههههههه

حامد : على ذكر ام فرحه شنهي الصار
حسان : طلع وليدها من السجن ورد ليها وشغلت الكاع ماادخلنا بيها مثل ماكلت كرصت اذن ليهن عبن سون الهوايل وام فرحه اجت وطردتها ورادت بس تحجي وياك ماانطيتها مفكه
حامد : رحمه الله والديك وانه باجر الصبح اروحن اطلكها وانطيك مؤخرها توديه ليها ويلون همه وشرهن وسحورتهن
حسان : انت بس لو راضي چان هدمت الديوانيه على روسهن
حامد : مو انه الي استكوه (اكون قوي) على نسوان لو زلمه اطره طر ومااخلي يشتم الهوا
بس ذني نسوان گل عكل (عقل) ماعدهن وميخافن الله وانه اخافه وربك عادل منتقم جبار هو ياخذ حگي منهن

حسان : ونًعــٌٓمُٓ باإٱللـِْﷻـِْﮭﮧ خويه اروحن انه تعال ويه لبيتي هنا بارده
حامد : لا انه اريدن هوا الجو طيب توكل بالله
بقيت وحدي والجو بارد وصافي والنجوم گلها طالعه صافن على حالي واتذكر شون البارحه عيشتني الجنه وجانت بلسم بحضني واحسن بحنانها وحبها ورغبتها وشون اليوم عيشتني الجحيم بگل انواعه وحكمت علي وعليها بالضيم وسهر الليالي
الكهوجي : امر عمي
حامد : حضرلي چاي وروح لبيت تأخر الوگت
الكهوجي : وانتي عمي شون اعوفنك
حامد : روح لايضل بالك انه مرتاح هنا روح لعيالك
حاظر عمي
ورثت الجكاره وبيدي السبحه سحبت المسجل وشغلت ونيسي بتعبي بحب يمامه ياس خضر واسمع ليه شغلت اعزاز واسمعها طفيتها وادورن على بين الاغاني اي هيه هاي واشغل اغنيه ياس مجروحين وجنها تلجم جرحي ويه كل چلمه يكولها

‎مجروجين وجرح الي بينا

‎يا دنيا والله يكفينا

‎لو ندري الحب هموم

‎ولو ندري الناس اتلوم

‎يا دنيا ما حبينا

‎حبيناكم والحب ضاع

‎يا لعفتونا بيلا وداع

‎مانريد درب الهوى

‎ولا بعد نرجع سوا !!

اوف شكد جرحتيني وگلبي يحبج چا شوكت اموتن واخلص من نارچ لاانه العايش ومتنعم بحبج ولا انه الميت وخلصان من نارج بقيت الليل كله احش بالجكاير لحد ماصاح الله اكبر توضيت وصليت ورجعت للبيت والكل نايم بس الحجيه تتوضى
الحجية جميله: هاا يمه الله يساعدك
حامد : ويساعدج يمه
الحجية جميله: چا سويت الفلحه من رديتها
حامد : يمه تعبان ومالي خلك
الحجية جميله: چا ياخذ من حيلها لحيلك
انه حلچي يبس وياك وانت ماتسمع چلمتي وهاي تاليها يحميد صفيت وحيدك
حامد : اروحن انام يمه وروحي صلي
الحجية جميله: چا انه لو مااخافن من الله ومااريدن اكسر چلمتك مااخليها تشوف اظفر بت والوعها مثل مالوعت گليبك يمه
حامد : الله كريم وبست راسها ودخلت لحجرتي دخلت واباوع على غريضاتها مطشره ماماخذتهن كلهن تمددت على الجربايه واشمن ريحتها بفرشتي چا وين اولي واروحن منج وانتي تفترين علي مثل ملك الموت حتى ريحتج تنشد عليه حطيت راسي وتعوذت من ابليس ونمت

يمامه : كعدت الصبح ريگت ايوته
رحت فرشت البيت وكملته واخذت ايه ورجعنا للبيت جان هدوء عجيب فاقدته من زمان بس محاسه براحه رغم الي ردته صار وكلها ايام ويجون بناتي وارجع لحياتي بس ليش گلبي يوجعني واحس مضيعه شى
مر اليوم  واني اخابر على ودق واسأل عن حاله ومرات احاول أسـأل عن حامد بس الي عرفته يطب ويطلع وقليل يكعد بالبيت وسمعت طلك فرحه ليش من يمي فرحت رغم اعرف هو گلبه مني شايل

ودق : مرت الايام واني بين الامتحانات رجعت احلام للبيت واول مدخلت تهلهل لان فرحه ماكو ههههههه والله هاي المره عجيبه تموت على المشاكل بس گلبها طيب

اما بتها جنه دوم اشوفها تباوع على مازن تريد تاكله اكل بعيونها بلكت يتزوجها ويخلصنا اذا هو حاط عقله ويايه حصره اطب اطلع وين رايحه هاي الكلمه اسمعها اكثر من اسمي اما منير من يوم مدخل غرفتي بعد مشفته وبليله نايمه اندكت الباب منووو محد يجاوب كمت على حيلي ولميت شعري وطلعت واشوف منير كدامي

خير منير محتاج شى
منير : اي تعالي ادخلي ليجي احد ويشوفنا
ودق : وكفت وحطيت ايدي بالباب هوب وين داخل انت كعد تشوف بيش الساعه
منير : واذا قابل اني غريب لو جايج من الشارع
ودق : منير اذا حس بيك واحد من اهل البيت الدنيا تحترك روح نام وباجر نسولف بأي موضوع تحبه ومو بالغرفه لا بالحديقة او بالصاله بأي مكان كدام الكل
منير : شنو تخافين تبقين وحدج يمي
ودق : ليش اخاف قابل شسوي غير اكص ايدك اذا حاولت تتجاوز بس الاصور اصول واني مااحب احد يتجاوز حده ويايه

منير : زين دقيقتين
ودق : كتلك ماكو روح نام وجان نسمع مازن
مازن : خير منير شعندك بليل تفتر
منير : هاااا هيج ردت أسـأل ودق باجر اداومين
مازن : وملكيت غير هذا الوقت تسألها
ودق : تصبحون على خير انداريت ردت ادخل للغرفه جان يكولي مازن
مازن : اوكفي دقيقه
وانت منير روح نام وراك ركضه باجر لان عكب باجر ترجع لبغداد علمود امتحاناتك لو نسيت
منير : لا منسيت يله تصبحون على خير
ودق : خير اني هم اريد انام شتريد
مازن : اقفلي بابج عليج
ودق : استغربت من كلامه وشفته يحجي بهدوء وكأنه خايف عليه ليش
مازن : احسن حتى تنامين مرتاحه
ودق : مااشي
مازن : ودق
ودق : نعم
مازن : انتبهي لنفسج ولتصدكين بكولشي ينكال الج الحجي هوايه بس الفعل قليل لتنخدعين بالمظاهر ً
ودق : مفهمت
مازن : يجي يوم وتفتهمين روحي نامي
ودق : سديت الباب وفكرت بكلامه يجوز حس على منير راد يسوي شى لان منير مبين بوقتها نيته مو سليمه ويايه او راد شى مني بحكم يحبني يعني بكل الاحوال جيته بعدا الوقت غلط لزمت القفل وقفلت الباب ونمت

يمامه : اليوم راس السنه وباجر عيد الاضحى والناس كلها محتفله واني حايره بزماني اسمع الطلقات والصعادات واني الوب نمت من وكت من قهرتي تمنيت بهذا اليوم بين بناتي وهو هم يمي رغم ٣ ايام فاتت بس اشتاقيتله
صبح الصبح واليوم العيد خابرت طلعتلي ودق كل عاام وانتي بالف خير ماماتي
يمامه : وانتي بخير حبيبه امج شونج
ودق : الْحٍمَدٍ للـّہ هذا ثاني عيد واصبح وانتي ماكو
يمامه : اي بس ذاك العيد اجيتكم من الصبح وجان عمج يتزوج بشريني هلمره هم يتزوج
ودق : ههههههه لا هلمره سلامات كاعد وساكت بس البيت هوسه عماتهم وبيت عمومهم الدنيا مكلوبه
يمامه : ولج ماما اسمهم عماتنا وبيت اعمومنا غير همه اهل ابوج
ودق : اي اعرف بس حلكي ماخذ هيج
يمامه : ولج روحي تأكدي لان ذاك العيد نفس اللمه وطلع زواج عمج
ودق : واذا تزوج قابل يفرق عندج
يمامه : هاااا بله موصوجج صوجي اني عبالي بنتي كبرت واسولف وياها
ودق : ههههههه والله اشاقه وياج ماماتي هاي همسه خبصت الدنيا
همسه : هلو ماما
يمامه : ياروحي كل عاام وانتي بخير ياهموستي
همسه : وانتي بخير ماما عمو انطاني عيديه وبيبي وعمه احلام كلهن صار كومه فلوس عندي

يمامه : بالعافيه ماما بس مواطلعين تشترين وحدج اياج انطيني اختج
ودق : نعم ماما
يمامه : بنتي لتعوفين اختج ابد تره هاي شافت فلوس بيدها اخاف تطلع ومتدرين بيها
ودق : لا لتخافين عيني عليها
يمامه : عايدتي بيبيتج وعمج
ودق : هااا لا بس عمه فضيله واحلام وجنه وبشرى
يمامه : ودق لتخليني ازعل منج ترحين تعايديهم وتبوسين ايدهم
ودق : يعني لازم
هاي الاصول امي انتي ليش تخليني احجي عليج واوجع گلبي وياج روحي سوي الكتلج عليه يله
ودق : ماشي اروح بيباي
رحت وصلت لغرفه بيبي
الحجية جميله: تعالي ليه ماتريدين تعايدين حبوبتج
ودق : تقربت بست ايدها
الحجية جميله: چا ماتصيرين عاقله دومج مسودنه
ودق : يعني اني اجي اعايدج اله ترزليني وجان تضربني بالعوجيه على ظهري

الحجية جميله: انه لوبيدي اكسرن راسج وهذا لسانج اكصه بس انه احبنج عبن بت المرحوم يله ولي هااا هاج عيديتج اخذيها
ودق : هااي هوايه
الحجية جميله: مالج دخل انه بكيفي انطي هواي قليل يله ولي
طلعت اضحك على بيبي مرات احسها تحبني بس اني من اتذكر سوالفهم ويه ماما اطك خبالاتي عليهم
فات عمي من يمي كتله كل عام وانت بًخٌير عمو
حامد : تعال يبعد عمج وباسني وانطاني عيديه متنلام همسه من تكيف لان العيديه هوايه
منير : كل عاام وانتي بخير يوم متصيرين مرتي وبحضني والعب لعب وياج
ودق : لسانك واستحي
منير : ههههههه شكد حلوو من تستحين لكيت مازن عيونه براسه ولو هو دومه هيج تكول ماخذه ورث ابوه سلمت جاوب من وره خشمه اووي عشتو عساه مسلم

يمامه : بقيت الوب اريد اعايده شون اخابر اخاف يفشلني بس لازم
دكيت دكيت مشاله انقهرت وبقيت اكل بروحي

حنان : تتذكرين من رحتي للصالون وحضرتي روحج وتالي لكيتي متزوج امشي الله عليج هم اوديج وهلمره نلكاه متزوج ٢ موو وحده هههههه
يمامه : تضحكين عليه مو كتلج متزوجها على الورق وبس
حنان : بس شهرين انطحنتي بيهم لو لا عبالج متزوج صدوك والله انيال گلبج لو اني يمكن اطك واموت
يمامه : شنو الفايده واذا طكيت ومتت هم راح يتزوج
حنان : ظلي بهاي عقليتج لحد ماالرجال هلمره صدوك يتزوج ويطلكج وحتى ينسى شى اسمه يمامه
يمامه : فال الله ولا فالج
حنان : احرك روحي بس فهميني انتي شتريدين
يمامه : ماادري
حنان : الله احلى جواب اروح اكمل الغدا ليروح نصار يعيط لا انتي ولا حامد تفيدوني اذا ترزلت
يمامه : روحي كملي بقيت انتظر ومدك للعصر واسمع تلفون دك وركض واشوفه حامد اويلي گلبي نبضه يقرا الف جاوبته

حامد : جنت ملتهي ويه الخطار والشيوخ الي اجو من المحافظات يعايدون وما منتبه على التلفون وين واشوفن مكالمتين منها واني اعضاي رجفت معودت الوادم تخف وطلعت ودكيت واجاني صوتها

يمامه : كل عاام وانت بخير حامد
حامد : وانتي بخير صاير شى
يمامه : هاا لا بس ردت اعايدك
حامد : ايه شونها
يمامه : الحمدلله
حامد : وانتي
يمامه : الحمدلله وانت شونك
حامد : بخير
يمامه : الله يجعلك
حامد : اروحن انه عندي خطار
يمامه : الله وياك وسد التلفون جان اتصال بارد جامد خالي من اي مشاعر وكأن اثنين غربه ماالومه لان الي سويته مو هين وتمنيت لو ممخابرته لان تلفونه وكلامه وبروده اذاني مريحني
ومر العيد واني ولا حسيت بطعمه بس افكر بلي راح يصير

ودق : مرت الايام منير رجع لبغداد علاقتي بمازن بعدها دوم من نتشاوف لازم نتعارك بيبي جميله مالها علاقه بيه اما عمه فضيله خطيه دوم لو ساكته وتشتغل لو تبجي على ابراهيم اما عمه احلام اهتمت حيل بهمسه بلبسها بسبحها شالت هوايه مني مرات احسها بشخصيتين مره عصبيه وتعد وتغلط وتصف وتسوي مشاكل والكل صايح الغوث منها ومرات انعم من الدخن حبابه وطيبه وادارينه حتى اني تتعامل حلو ويايه ومتسمعني كلمه محلوه اما جنه دوم بعيده عني واي كلام بينا ماكو بس اشوف علاقتها بأبوها حلوه شون من يشوفها يبوس راسها وهي تبوس ايده ويكعدها يمه وتسولف ويااه حتى لو دقايق بس اشوف الفرحه بعيونها لحظات احسدها واتمنى لو بابا مثلها بس شون وهو خلص حياته بين النسوان وامي عايشه بالعسل ومتدري اووف شفت بلاوي من عادل ومحد يدري

اليوم اخر يوم بالامتحانات واني اقرا وادعي تفض على خير طلعت واني الدنيا مواسعتنه من الفرح واخيراً راح اروح اشوف ماما وايوته رجعت للبيت حضرت كولشي
فضيلة : هايمه احضرلج الغدا
ودق : اي عمه فدوه ميته جوع
مازن : متكومين انتي تصبين مكسوره ايدج شكبرج ماعون تمن متعرفين تصبين
ودق : اهووو هم ادخلت انت شعليك والله هاي حلوه
فضيلة : عوفها يمه انه اصبلها البت تعبانه وجاي من الامتحان
مازن : مجايه من الجهاد حالها حال الالاف الطلاب وهي مو صغيره واذا متعرف تتعلم كومي صبي لنفسج احد كلج عمه تشتغل عندج
ودق : هسه القاضي راضي انت شعليك ومااكوم عناد بيك
فضيلة : يمه حبيبي مازن انه اصبلها چا هيه شيرادلها
مازن : هيه لان مايرادلها شى تصب وعنادي فوك عنادها يله كومي صبي
ودق : مااريد اكل
فضيلة : ليش ياابني شفت البنيه زعلت ومراح تاكل
مازن : طبها مرض هسه يكتلها الجوع وتصب بداعت ابراهيم عمه لتصبيلها
فضيلة : ليش تحلفني بالغالي
مازن : كتلج عمه بداعته عوفيها هاي ام خشم اليابس هي تصب لروحها غصب عنها
وبقيت اكثر من ٣ ساعات اراقب بيها هسه تجي تصب ابد خرب بيها شكد عنوديه والله واسمع الباب انفتح ادري بيها راح تجوع وتطلع تاكل لان لاريوك ولا غدا
ودق : كتلني الجوع الله ياخذه خلي اروح اصب امري لله
طلعت وهو كاعد على القنفه وبيده كتاب ولا باوعت بوجه ورحت فتحت الطباخ وبدا الاكل يحمى شلت الجدر مال المركه جان باميا ومااحس غير شى طك عبالك قنبله اثاري من ثولي ممتعلمه اني اطب للمطبخ شغلت الطباخ وعفت الجداحه قريب النار لحد محمت وطكت واني الجدر بيدي من الهبطه شمرته وكعت مركه على رجليه وعطت

مازن : انتظرتها تطلع واني احس بأنتصار لان طلعت تحمي الاكل ومااسمع غير طكه قويه وعيطه طفرت مثل المخبل عليها كلت طك الطباخ عليها وطبيت ولكيتها كاعده بالكاع والمركه بكل مكان ولازمه جف رجلها وتبجي
مازن : بيك شى
ودق : رجلي احتركت
مازن : اششش لتبجين هديها خلي اشوفها
فضيلة : دخيلك يــْـْا علي شنهي يمه شصار الصوت رج البيت گله
مازن : ماادري اكو شى طك ودق طفرت والجدر وكع على رجلها
فضيلة : سوده بوجهي خوما تأذيتي يمه
ودق : احجي وابجي عمه رجلي تحركني يمكن احتركت
الحجية جميله: شنهي هاي شصار

فضيلة : هاي ودق تصب اكل وكع عليها
الحجية جميله: عميه وماتشوفين چا انه بعمرج اذبح هوايش واطبخهن دهر صابچ ولا بيج فايده

ودق : ابجي فدووه بيبي اسكتي اني رجلي تحركني وانتي تحجين عليه
مازن : وخري ايدج خلي اشوفها
ودق : اصلاً كله منك لو ماانت لحيت اصب مجان صار هيج
الحجية جميله: چا بعد ايدي يحبوبه هاي ماتمشي عدل اله هيچ
ودق : احرك روحي حتى ترتاحون مني
الحجية جميله: مايحتاج حبوبه انه انطيج تخبزين وتحركين الديره كله چاانه اعرفنج بس لسان الصخله مسعده بيه نفع احسن منچ
ودق : بيبي تشبهيني بالصخله مالتج اله اكتلها الج واحرك گلبچ عليها
الحجية جميله: چا كضيها اله احطنچ بالتنور واسكف عليچ سمچ يبت البومه گعدي واركدي

فضيلة : يمه فدوه عوفي البت وتعالي اوديج لغرفتج
الحجية جميله: عيفيها ليه انه ليها تريد تكض مسعده هاي تسوه راسج اقلها بيها فايده مو مثلچ بس اكل ونوم
فضيلة : يمه فدووه امشي

مازن : وخرت ايدها واني اشوف دموعها وگلبي نار عليها لزمت رجلها وجبت خاولي ومسحت رجلها من المركه وهي تبجي
كافي ام دميعه الحرك بسيط
ودق : مو هيه رجلك لو رجلي والله كله من وراك
مازن : يابه اعتذر
ودق : مسحت عيوني وكام جاب عصاره مال حروق وكعد يمي بالكاع لزم كف رجلي وبدا يحط الدهن بلحظه حسيت مازن مقهور عليه ومتأثر لان تأذيت جان بيني وبينه مسافه كولش قريبه شبه واكعد بحضنه حسيت بأنفاسه وجان عطره كولش طيب اول مره انتبه عليه شون نظيف ويلمع ولابس كلاده فضه مدخلها جوه الدشداشه اخذني الفضول وصفنت على كل تفاصيل وجهه رگبته وحتى الحرك نسيته هو حس بيه

مازن : عجبتج
ودق : شنوو
مازن : شبيج هيج مدققه وصافنه
ودق : لا ماكو شى ودنجت
مازن : يله كومي كافي دلع رجلج صارت زينه
ودق : ردت اكوم عطت منها لزم ايدي يله امشي اوصلج للغرفه
كمشني مثل الجهال واخذني للغرفه وكعدني على الجربايه هسه تصيرين زينه لتخافين هاي العصاره حتى اثر متبقي
ودق : مازن
مازن : نعم
ودق : شكراً
مازن : ادللي بس مره ثانيه انتبهي من تشغلين الطباخ يافهيمه الجداحه حطيها على الميز مو بنص الطباخ
ودق : شمعرفني
مازن : تتعلمين
ودق : عافني وطلع وراها بنص ساعه دك الباب انطاني لفات اثنين كص وياهم قوطيه جبيره مال ببسي وخله وطلع
هذا منووو مدااصدك احد يكرصني

لليل اندكت الباب دخل عمو حامد
حامد : هااا بويه كالو تأذيتي
ودق : هلو عمو لا شى بسيط وراح
حامد : عمي اوديج للمستشفى
ودق : لا تسلم
عمو ممكن اسألك سؤال
حامد : شنهي بويه
انت راح تودينا لماما لو لا
حامد : انت كملتي اليوم ارتاحي وعكب باجرجمعه اوديج لامج
ودق : يعني مراح تبقينا وتحبسنا هنا
حامد : ليش بنيتي احد گلچ عليه ماعندي رحمه
ودق : هااا لا موقصدي
حامد : سمعي بنيتي انه كل الي سويته لمصلحتكم يجوز بطرق انتم ماتفهموها بس
يشهد الله علي انه احبنكم واريدن راحتكم وانتي بالذات اريد راحتج بويه
ودق : وراحتنا بغداد
حامد : خلص بنيتي روحو لبغداد كون تشوفون الراحه
ودق : تسلم عمو مقصرت وجان يبوس راسي وطلع جان امنيتي اتقرب منه مثل ايه بس اكو شى يمنعني عنه
طول اليومين واني مااتحرك بس للحمام والاكل يوصلني ومازن يمشي ويضحك يكول عود مكيف ردتج تصبين الاكل لروحج كام الاكل يجي ليمج واني اغوره ومكيفه يمكن من سنين ولاول مره منتعارك ونضحك اني ويااه

اجه الجمعه وحضرت كولشي وصعدنا الغراض وسلمت عليهم وشفت شى دوخني بيبي جميله تبجي ومقهوره لان راح تروح بلحضتها حضنتها وصعدت بالسياره وطول الطريق صافنه بلي صار كله منو الصح ومنو الغلط بس ماعندي اجابه بذاك الوقت لان عقلي جان عقل مراهقه بين موقف وموقف يتبدل

يمامه : اليوم البنات يوصلون ميته على شوفتهن وصلو وحامد وياهم جان سلامه اليه كولش بارد وحتى مقبل يدخل وصلهن وگلي
هااي بنياتج والي ردتي صار
يمامه : ليش متدخل هسه اجيت وتعبان من الطريق
حامد : انه گلي تعب ماظل على هاي سهله شونها حياتج الجديده بلياي حلوه لا
يمامه : دنجت ردت اكوله اشتاقيتلك
حامد : البنات امانتج واي شى تريدي خابري وعينج عليهن لاتغفلين
يمامه : لا لتخاف ان شاء الله ماكو شى
راح واخذ روحي ويااه حسيت بقهر وتعب اخذت بناتي بحضني وبديت اعدل حياتي الي عفتها وراها بأيام اجه مازن وجايب اوراق نقل البنات للمدارس الجديده الي بشارع فلسطين وخطيه كمل المعامله كلها سألته عن حامد شونه

مازن : ابويه تعبان عمه
يمامه : شبيه اسم الله
مازن : متعرفين شبيه كولش متأذي على فراكم صح يكابر ويبين كولشي ماكو بس اني اعرفه زين
يمامه : موبيدي مجنت اريد أذي
مازن : كولشي توقعي منه يجوز من يوصل مرحله بالاذيه يجوز تلكي بذيج اللحظه تاركج للابد
يمامه : شون يعوفني للابد
مازن : يجوز يحررج منه ويطلكج
يمامه : انت شتحجي تخبلت وصرت عصبيه
مازن : كتلج كولشي توقعي والي داشوفه انتي عندج مشاعر اتجاهه لتضيعيه عمه والداير مدايره هواي ويجوز من الفراغ والتعب يلكه الي تريحه
وينسى وحده اسمها يمامه ويعيش حياته لان الانسان شكد ميتعب وينطي يجي يوم ويصحى على نفسه ويوقف العطاء وينتبه لروحه والشى الي مأذيه يتخلص منه ويدور على راحته ماكو واحد يبقى العمر كله يحب ويضحى كلشي اله وقت ويخلص
يمامه : شنووو وكفت على حيلي

مازن : اني الي عليه كلت وبلغت بحكم العشره وانتي غاليه عليه والله يريحكم من رخصتج اني راجع للعماره عندي دوام باجر
يمامه : كمت ارجف ومااعرف شحجي نار وگبت بروحي صدوك هذا الشى يصير وحامد ينساني وينسى حبه اليه مستحيل بس مازن لو ما شايف شى ميكول وهذا اقرب واحد لحامد بعد حسان
مازن : طلعت من البيت واني اضحك بداخلي حركتها حرك خلي شويه تحس بأبويه مو سمطته سمط كافي حسي دروحي وظلي فكري وكمزي بس كون ميعرف بالحجي الي كلته الها والله يعلكني من اذاني ههههههه

يمامه : بقيت اكثر من اربعه ايام تعبانه وافكر بكلام مازن ومنحس غير الباب تندك ساعه ١٢ بليل وجان ممنوع تجوال صحت منوو
اني نصار افتحي الباب بسرعه
ركضت على الباب هاا نصار بابا بيه شى
حامد : جنت نايم ودك التلفون عليه يمامه وتبجي كمزت هااا بيج شى
يمامه : ابويه حامد الحك
وره طلعت الفجر واشوف حامد كبالي ومن حلات روحي شمرت نفسي بحضنه وابجي

يتبع ...