رواية سجينة الروح الفصل الخامس وثلاثون 35 - بقلم ريام هادي

سجينة الروح
للكاتبه Reem
البارت الرابع والثلاثون

شيوجعج...!؟
يالتوجعين الله بدعائج
تريد تعرف شنو هن اليوجعني ..!؟
انت والدنيا وشتا الله
وخبصه الوادم وحظي
والضياع الماد رجله بوجه عمري
والأماني المدري ياهو باگ بيهن ..! والليالي التاخذ من الحيل من تريد تگضي..
والضوه الما يشتهيني
والهوه الما يعتنيلي
والسما الما گمت اثق بلظال بيها
من طفه وجهك بعيني
ذني كلهن يوجعني ...!!💔

فضيلة : ضيعت وليدي يحامد هاي تاليها
حامد : انتي اخر وحده تحجي هم الج عين وتراددين
فضيلة : چا تذب وليدي بالنار وتريدني اسگت
حامد : موش انه ذبيته يفضيله لو نسيتي من سوالفچ كله من ايدچ حطمتي ابراهيم وهچ من العماره گلها
فضيلة : چا شون ترضى يروح انته تكول وليدي وليدي چا لو مازن لو منير لو وليدك علي تقبل يروح
حامد : لچ انتي شبيج تسودنتي شنهي هاي الحقد والتفرقه الي بگلبج انه مافرقت بينهم ويشهد الله حجيت وياه ردت عالجت وهم راسه يابس يريد يهچ ومايظل هنا كله منچ
فضيلة : يبوووو عليج يفضيله راح وليدچ منچ الحك ليه بويه چا لو انت موجود هيج يصير ليه
حامد : ولي لحجرتج لا وحگ هو علي اجنزج تجنز (يضربها قوي ) انتي تعلمتي على الطك (الضرب) وعقلچ تهبل وانه ماعندي وكت اكضي يمج

الحجية جميله: يمه حميد شجرالك شنهي حسكم مسمع العماره گلها
حامد : هاي بنيتج حجيه لعبت بوليدها وهججته وتذب الصوچ بيه
الحجية جميله: ابراهيم وين
حامد : تطوع يمه على الجيش ونزل لبغداد ينتظر كتابه وشوف وين ينسبوه انه ردته هناچدام عيني وهو مارضى
الحجية جميله: چا يمه غير تكضه وماتخلي يروح هو بكيفه وهو مو محكوم شون قبلوه
حامد : چا هو زعطوط واكضه يمه هذا زلمه والشور من راسه انه صح حسبت ابوه بس يبقى الشور من راسه وهو دك رجل اله يطوع وبالواسطه والفلوس گلشي يصير الدوله تايهه كلمن اله عندك فلوس وظهر تصير مدير عام مو بس بلجيش يمه
الحجية جميله: اي والله يايمه چا هيه الحراميه صعدت وصارت بالدوله يجوز گلها چم سنه ونشوف ابراهيم وزير چا هيه صارت كلمن اله عساها بحضهم وبختهم
فضيلة : يمه حامد حصله موافقه ودز وليدي للنار چا ذب فليساته حتى يموت وليدي

الحجية جميله: بسچ حسچ منا الوادم وادخلي چا تسولفين على اخيج  لعبتي فلك وصرتي فهيمه وتخططين لحد ماسودنتي ابراهيم لو نسيتي طلابتج وياه
فضيلة : شنهي احرك روحي چا غير وليدي واريدن مصلحته
الحجية جميله: وهاي الجنيتي هچ من الديره گلها كومي يمه وادعي وليدچ يرد سالم هذا الوليد من يوم مافتح عينه على الدنيا وهيه سوده مصخمه بوجهه وانت وليدي توكل على الله وحط عينك عليه والله يستر

حامد : يمه عقلي بتچ مااني ناقص ضيجت غلك البيه كافيني
فضيلة : خويه ابوسن يدك ردلي ولدي
حامد : كومي فضيله واذكري الله والوليد ان شاء الله يرد بس الصبر
فضيلة : چا خلصت العمر كله صبر من امداه لحظي
يمامه :اباوع عليها مدري انقهر لو اكول السبب منها بس من اتذكر حالي ويه بناتي هيه هم تريد الخير لأبنه بس اتصرفت غلط كل وحده من عدنا من حبها بجهالها لان تحس بس ذوله الي طلعنا بيهم من الدنيا نتصرف غلط وعلى هوانا انكول هو هذا الصح ومن يوكع الفاس بلراس نلطم لهذا اني حاسه بيها بس مكدرت اتقرب منها مردت احتك بيها رغم شكد جانت علاقتي قويه بيها بس بعد موضوع ايه بس السلام بينا

اباوع على حامد شون تعبان ومهموم كل المصايب الي تصير هو واكع بيها ومطلوب منه يحلها تمنيت اكدر اخفف عنه بس هو زعلان بعده مني طلع وبعد مرجع وعمه اخذت فضيله ودخلتها بغرفتها لان ناس طابه وناس طالعه خطار الكل جاي يهني بصباحيه مازن وجنه

أيه : سمعت كلامهم گلبي وجعني والدنيا افترت بيه ليش ابراهيم رحت ليش تأذيني بيك ليش تخليني اموت كل لحظه صح اني بعد مااكدر اكون الك بس اقلها كبالي وسالم هسه هذا السويته گتلتني بيه ربي دخيلك دعوه يتيمه مظلومه لتلجم كلبي بيه اعرف حرام بعد افكر بيه بس زرعت حبه بقلبي وقادر ترجعه سالم يـِْ♡̨ـِْا رَبّ طلعني من گلبه حتى يكدر يعيش مرتاح واني شيصير بيه خلي يصير المهم هو عايش ويشتم الهوا
بديت ارجف وتجمعت الدموع بعيني

جنه : امشي نصعد كافي اصفريتي وشفتج بيضت راح يوكف گليبج
أيه : عساه يوكف واخلص من كل هذا العذاب
جنه : امشينا لحد ينتبهه عليج وتصير سالفه مابينا حيل
أيه : جنه دارجف مااكدر حتى اوكف
جنه : امشينا انه الزمج بس لاتخلين احد يحس

أيه : ولج غرفتج اول مره اطبيلها وانتي عروس غير انتي ومازن ادخلون گبلي
جنه : چا انتي خيتي وماكو فرق ومازن شغلته مطوله مشفتي الوادم گلها چاي تبارك وطلع ليهم امشينا قبل ماالنسوان تلزك بيه وانتي هم ترتاحين
أيه : يله وكوه صعدت احس جسمي قالب ثلج وعظامي كلها كامت توجعني هبطت عليه

جنه بقت عايشه بيت جدي هي ومازن لان بيت العائله الجبير وبابا حامداقترح عليهم يبقون لان الطابق الفوك كله فارغ والبيت جبير وميريد لا جنه ولا مازن يبتعدون عن عينه ومازن حب الفكره وجنه اكيد طارت من الفرح هي بكولشي راضيه المهم تبقى ويه مازن  لهذا حظرلهم اكبر غرفه بلبيت وصبغوها واشترو غرفه عرايس كولش حلوه واليوم اول دخلت جنه بيها وانه دخلت ويااها

جنه : تعالي اكعدي شبيج يابعد رويحتي شنهي ياأيه دمعتج بطارف عينج
أيه : ليش انتي مسمعتي ابراهيم شسوه
جنه : چا هو بيدچ هو راد انتي شلچ غرض
أيه : خايفه عليه حيل ليش مكتوب عليه العمر كله اكضي خوف وبجي
جنه : اذكري الله قابل هو رايح يحارب
أيه : اني ابراهيم اعرفه زين راح حتى يموت نفسه ذب روحه بلنار من ورايه. وكمت ابجي
جنه : شنهي انتي مالج ذنب گله من عمتي رادته جارها هججته لاخر الدنيا واذتج واذته إٱللـِْﷻـِْﮭﮧ يسامحها هيه هسه هم گلبها نار عليه بسچ فدوه مو وجعتي گلبي
أيه : مسحت دموعي سكتت عوفج مني اني شغلتي مطوله متخلص المصايب منها احجيلي عنج

جنه : چا شحجي وانتي هيچ حالتج
أيه : لا احجي حتى شويه انسى كولي شبيج تلوبين

جنه : شفتي حجرتي گلش حلوه
أيه : اي والله حلوه تتهنين بيها گلبي يله احجي شبيج تلوبين
جنه : تعالي احجيلچ گلشي صار
أيه : وبدت تسولف صخام اكو وحده بليله عرسها تكول لزوجها اعرف بيك تحب بت عمي لج انتي شنو من عقل
جنه : چا انه لو عندي عقل مااگله اصلاً
أيه : رحمه من الله تدرين ماعندج عقل بابا بطلي سالفه انت تحب بت عمي وسمعتك وهاي شغلات تره والله اطيري من ايدج شون تنسي ودق وانتي متنزل من لسانج
جنه : خيه صارت بعد وانه گلت بعد مااجيبن طاريها
أيه : ديري بالج وانسيها تماماً ولا كأن سمعتي شى
جنه : اگلج هي ودق ليش ماجت للعرس
أيه : يبوووو على حظي ولج شجنت احجي اكولها انسيها تكول ليش مأجت للعرس وانتي كل هاي الهوسه والناس ومركزه وانتبهتي مأجت غير قابليه ولج
جنه : چا غير شريجتي
أيه : هههههههه حسستيني ضرتج وادورين عليها لتخافين مأجت حتى تاخذين راحتج وتفرحين ومتفكرين بيها
جنه : بعدها تعبانه وتبجي
أيه : جنه لتخليني اكمشج هسه واهلس شعرج الحلوو هذا مالج علاقه بودق بجت ضحكت وهيه اصلاً باجر نازله لبغداد عدها دوام ومراح تشوفيها منا للعطله الجبيره اقل شى ٣ اشهر
جنه : الله يوفقها
أيه : ويوفقج قلبي يله كومي اسبحي وارتاحي وراج مشوار طويل من الخطار والعزايم واني اروح للبيت
جنه : صرتي زينه
أيه : ميفرق اذا زينه او لا الگلب موزين جنه وتعبان اروح مااريد اضوجج انتبهي لنفسج وبستها وطلعت

دخلت للبيت بدون مااحجي ورحت لغرفتي سديت الباب وشمرت نفسي على جربايتي وحطيت وجهي بالمخده وكمت اعيط بكل قوتي احس نار تطلع من گلبي ومن راسي واحد وحرگني  اااااااااااه ليش ابراهيم ليش واعيط وحابسه وجهي حيل بالمخده وابجي واصرخ اااااااااه انت مو تحبني شون ادمرني شون مگلت هاي من تسمع شراح يصير بيها انت مو گلت أني من الهوا اخاف عليج لعد ليش مخفت على روحي وتشوفها تتعذب وتقلق وتخاف عليك يعني هذا عقابك اليه اني شنو ذنبي هو حظي هيج شنو ذنبي

ودق : اسمعت صرخات مكتومه بس قويه طلعت اركض ماكو غير ايه فتحت الباب واشوفها تعيط وحابسه وجهه بالمخده وتبجي بأعصاب لج ايه اسم الله الرحمن لج شبيج وجريت وجهه راح تختنكين شبيج منو وياج
أيه : ودق راح وعافني راح يموت روحه من ورايه شفتي شون عاقبني
ودق : لج منو ابراهيم
أيه : اي ابراهيم اطوع بالجيش حتى ميشوفني حتى يموت روحه
ودق : استغفر الله هسه بيش مفاوله الولد واذا اطوع قابل راح ينتحر يجوز يبقى بمكان زين ويداوم وماكو شى شنو هذا اليأس العندج
أيه : هو مراح علمود راتب لو علمود يبتعد ويرتاح هو راح حتى يموت اني ادري بيه بس ميعرف هو ديموتني وياه زين هو مو يحبني هااا كوليلي مو يحبني
ودق : اووف اشوفها تشهك وتبجي حضنتها اي حبيبتي يحبج
أيه : لعد ليش يأذيني ليش يگتلني بيده ليش هو هم مرحمني
ودق : حبيبتي ايوته الولد تعبان وضعه صعب خلي فتره ويرجع ميتحمل يبقى صدكيني
أيه : هاي اذا رجع
ودق : ولج شبيج تخبلتي كولي ياالله
أيه : كوله مني والله اني السبب
ودق : انتي شعليج
أيه : اني غبيه وجبانه ومابيه خير صدكت امه وخفت عليها واني هسه اكلتها لو مقابله واكفه بوجهه مجان هذا حالي
ودق : انتي شمدريج ياعيني غير عمتج اخت ابوج ومأمنه بيها خرب بالدنيا الي متخلي الواحد اقرب الناس اله يأمن بيه

أيه : لا اني جبانه وماعندي شخصيه دومي مهزوزه  مكلت لا وفوك ثولي اني اتوسل بماما علمود الخطوبه ضيعت ابراهيم من ايدي
ودق : انتي فقيره وهادئه مو جبانه وهذا طبعج ياعيني متكدرين لاتجادلين ولا توكفين بوجه واحد صدكيني كله واحد وطبعه ومتكدرين تغيري انت طيبه أيه والطيب يجي يوم وربج يجازي

أيه : شوكت كوليلي مو والله تعبت شنو ذنبي وعمري ١٤ سنه ويغتصبوني شنو ذنبي وعمري بعد ممتجاوزه ١٨ سنه وانخطب غصب لأبن عمي واثنينا نعرف منير شنو ونعرف راح يدمرني وفوك كل هذا ساكته شنتظر متكوليلي
ودق : زين نكول لعمو حامد على سوايته ويايه
أيه : ليش عبالج راح يصدكون بعد كل الي صار راح يكولون متفقات علمود افصخ من وره ابراهيم ومو بعيده يتهمون ابراهيم متفق ويانه
ودق : يمعوده شنو هذا التفكير وين رحتي
أيه : لازم اروح لهيج تفكير مهما صار وشكد يحبونا بس هذا الموضوع حساس وراح تفتر علينا واكيد منير مراح يسكت واشكال يسوي
ودق : انتي ليش تخافين منه
أيه : شوفي ودق خفت وان ماخفت هذا منير واحد حقير وكولشي توقعي منه يجوز يگلبها علينا وحتى يتهمني بشى موزين احنا معودنا الگلوب تتصافه وماما حياتها تتعدل وياهم نرجع نگلبها
ودق : بس ماما لو تعرف مراح تسكت
أيه : لهذا مردت ماما تعرف يصعد ينزل منير ابن عمي ولد كولشي اله حق يسوي واحنا بنات واصلاً اني وياج بالذات من يوم مأجينه هنا بس المشاكل يكالت ايه ويكالت ودق صدكيني الكل راح تگلب علينا والموضوع صارله مده طويله كولش ميكولون شمعنه هسه اتندرتو واتذكرتو تحرش منير وليش سكتو بيومها وليش سكتو قبل العقد وليش وليش وبذاك الوكت تعالي شيخلصج من لسان فضيله ومنير كله حتى يشوهون صورتنا ويطلعون همه الحق واحنا الباطل ويجوز حتى يعاقبونه ومنكمل دراستنا

ودق : والله محد شال حالي غيرج كتلج خلي احجي وشيصير خلي يصير
أيه : راح نفتح جهنم علينا ويجوز هلمره يجروني من شعري ويزوجوني اله واضيع حتى دراستي والله حتى يخلصون من القال والقلت وانتي يبطلوج من گليتج يعني منير برگبتي برگبتي

ودق : كافي بجي وكومي غسلي وجهج وعوفيها على الله وانتبهي لدراستج محد يفيدج شدي حيلج ومنا لذاك الوگت الله كريم
أيه : وابراهيم
ودق : هذا يعينه الله ويحرسه ماعدنه غير الدعاء اله وانتي حاولي تقللين روحتج هناك تره عمتج تذب حرگتها بيج واذا على جنه خلي هيه تجيج
أيه : راح تروحين وتعوفيني
ودق : لو بيدي ابقى بس لازم ارجع ورايه امتحانات ودراسه صعبه واني يوميه اخابرج واسأل عليج مااعوفج لتخافين
أيه : حضنتها وبقيت نايمه بحضنها
ودق : اوف ربي ريحها هاي فقيره

يمامه : رجعت للبيت والحيره اگلت گلبي بقيت اشتغل وعلاوي يمي يكمز ويلعب كملت الغدا وغسل الملابس بس بالي مو يم الشغل اصلاً بالي يم حامد
يله بنات ًوينكم
ودق : هاا ماما
يمامه : تعالو تغدو صيحي اختج
ودق : تكول مااشتهي
يمامه : صيحيها يله ماكو مااشتهي
نزلو البنات وجوهن هم تعبانه اباوع عليهن حظجن مثل حظ امجن اوف دوم مشلوعات الگلب
ودق : اكول ماما همسه ليش دوم هناك حتى اكل كامت متاكل يمنا
يمامه : شسوي ياماما روحها بعمتج احلام هاي تجي تدرس وتكمل وتطفر يمها منعتها كم يوم بقت بس تبجي واحلام وجهه ثگل رجعت دزيتها
ودق : بس ميصير ماما هذا غير بيتها ولازم تتعلم هنا
يمامه : حاولت وياها بس عمج كال قبل مده قابل تبات بيت غريب شنو تنام يم احلام وعينها عليها والشهاده لله المره قايمه بكل واجباتها تكول بتها وهم همسه شاطره ممقصره بواجباتها ماعندي حجه عليها
ودق : بس عمه احلام طبعها غير طبعنا واكيد همسه راح تتعلم منها
يمامه : لتخافين عيني عليها ودوم اراقب تصرفاتها وحركاتها كوليلي شوكت ترجعين لبغداد
ودق : باجر
يمامه : شبسرعه مشبعت منج حبيبتي
ودق : مااكدر بعد ابقى تاخرت ورايه دوام يوم وهمسه اجتني الصبح وكالت عمو حامد يرجعني
يمامه : ليش عمج راح يروح لبغداد
ودق : حسب كلام همسه اي لان هو كال خلي تحظر روحها اني ارجعها
يمامه : شعنده ياترى
ودق : والله مااعرف  الْحٍمَدٍ للـّہ شبعت
يمامه : شبسرعه
ودق : والله لخاطرج اكلت اني العصر اروح لبيبي اسلم عليها لان من الصبح نطلع لبغداد اخاف مااشوفها
يمامه : ايوته ليش ساكته ماما وحتى اكل كوه تاكلين
أيه : مابيه ماما شبعت وصاعده انام
يمامه : شون بيجن والله گلبي ورم بس لو تكولن شبيجن الوجوه مگلوبه
ودق : بست راس ماما وكتلها مابينا شى بس انتي انتبهي على صحتج كولشي منريد

يمامه : بليل كاعده ارتب بالغرفه وجان يطب حامد وكفت على حيلي الله يساعدك
حامد : ويساعدج اريدن اخذ غرض منا واروح
يمامه : سمعت باجر رايح لبغداد اكو شى
حامد : يهمچ
يمامه : شون ميهمني بالي كله يمك باوع صفح وفتح الكنتور ويگلب بالملابس سحب كم قطعه
يمامه : شو هوايه اخذت
حامد : راح اضل ١٠ ايام
يمامه : شنوو مو هوايه ليش
حامد : شنهي تحاسبيني
يمامه : مو احاسبك بس شعجب تبقى هلكد وين راح تبات ويه منو
حامد : بعد تريدين اخذ الاذن منج اكل اشرب انام وتقبلين لو لا
يمامه : شبيك حامد تحجي ويايه من وره خشمك عفيه والله تعبت مكافي هيج عايفني محن گلبك عليه اعتذار واعتذرت تواسيل وتوسلت وكتلك مااعيدها وباقي على نفس العصبيه وبوجهي متباوع والله شاهد ميته عليك وگلبي نار ليش هيج قاسي شنو نسيت حبيبتك نسيت حبك اليه نسيت طيرتك كعدت على الجربايه وحطيت ايدي على وجهي وكمت ابجي محسيت غير ايد حامد على ايدي وخرهم من وجهي كعد بصفي ويباوع بعيوني ويمسح دموعي

حامد : تعرفين بيه ماتحمل دمعتج وانه كتلچ لاتبجين شون بيچ گليلي
يمامه : حامد اشتاقيتلك حس بيه والله احبك وغلطت بحقك
حامد : گلشي سوي يمامه اله تكسرين چلمتي وماتحترمين تدرين لو ما حبچ بگلبي وانتي غاليه عندي جان هسه انتي مو على ذمتي
يمامه : اطلكني
حامد : لحظه ماتضلين على ذمتي وحگ هو علي بس انه عشگچ سودني وهو الوكف بعيني هاي المره بس وروح ابوي وحگ گل حـبي الج ولوعه گليبي يايمامه اذا انعادت ماتبقين لحظه على ذمتي مثل ماانه مقدرج غصب عنج تحترمين وتقدرين وماتكسرين الچلمه ولا تضمين شى ولا تتصرفين بكيفچ
يمامه : صار والله بس كافي زعل وشمرت نفسي بحضنه وهو حضني حيل
حامد :اوف يبعد گلبي
يمامه : حيل اشتاقيتلك فوك متتصور
حامد : اعرفن بيج
يمامه : باوعت بوجهه وكتله تدري كمت احبك لدرجه مااكدر لحظه بدونك كمت احبك لدرجه اعتبرك نبض گلبي وانفاسي حامد انت اغلى من روحي شو ساكت
حامد : تعرفين انه شكد صارلي انتظر هاي الچلمه منچ جنت انامن واگعد وافكر واكولن هم يجي يوم وتباوع بعيوني وتگلي انت حبيبي وانه اليوم اريدن اسگت واسمع واملي عيني منج اريدن گلبي يرتاح بعد كل هلعذاب
يمامه : سحبته بحضني وبيومها حامد مفارك حضني وبقيت اتغزل بيه للصبح وهو بس يسمع ويغمض وگأن رجع لقبل ٢٠ سنه وتحققت امنيته
كعد من الصبح

حامد : طيرتي انه طالع
يمامه : طفرت من الفراش شوكت كعدت وساعه بيش هسه
حامد : ساعه ٦ هميله اروحن وراي طريق
يمامه : لتروح فدوه
حامد : مااكدر انه راح لجن اكدر اقنع ابراهيم يرد وياي واذا مارد امشيله بمعاملته واحاول احطنه بمچان زين وبعيد عن الخطر
يمامه : بس راح تتأخر عليه
حامد : لاتخافين گلها چم يوم وارد
يمامه : خلي اسويلك ريوك
حامد: لا نامي تريكت انه ودق
طلعت وراهم سلمت عليهم وذبيت مي ياارب احفظهم اليه ورجعهم سالمين

ودق : طول الطريق وعمي ساكت وكتله هاا صالحت ماما
حامد : ها بويه جنچ مركزه ويانه
ودق : هههههه لا بس مبين من وجهه مرتاحه عمو ديري بالك على ماما تره والله تحبك
حامد : اعرف بويه وانه هم احبنها
ودق : اعرف والله يديم محبتكم
حامد : امين
ودق : جان على طرف لساني شغله منير بس اتذكرت كلام أيه وسكتت گله خاف صدوك تنگلب الشغله علينا وصلني لبيت جدي وراح
بقيت يومين بالبيت وراها داومت جانت الدراسه صعبه حيل واني اجاهد في سبيلها ونور صديقتي شاطره ونتساعد اني وياها وبيوم ابو الخط مأجه
نور : تعالي ويايه شبيج غير خابرت طارق اخويه وراح يجي ياخذنا
ودق : لا هسه اخابر خالو نصار يجي ياخذني
نور: يمعوده بين ميجي خالج احنا واصلين
ودق : انتظري خلي اشوف ودكيت وطلع خالو بعيد وميكدر يجي اله بعد ساعتين
يله اروح وياج ولو ازاحمكم
يمعوده صدوك كذب تدللين

وصل اخوها اباوع سيارته عاليه
ومناظره وهو كشخه على اخر حبه صعدت سلمت شوهذا نزل المناظر للنص يباوع مهتميت
طارق : معرفتينا
نور : صديقتي ودق الي كتلك عليها وهذا اخويه طارق
ودق : اهلاً وسهلاً
طارق : اهلاً بيج سمعت الاخت من العماره
ودق : اي
طارق : شونها العماره
ودق : تمام
طارق : شو متحجين چا
ودق : شنو حضرت جنابك تستهزأ
طارق : لا بس اعرف كلهم يكولون چا
ودق : اولا مو گلهم ثاني شى يامحلا الچا بحلكهم هو اكو احلى واطيب واحسن من اهل العماره
طارق : والنعم شبيج عصبيه
ودق : منو كال عصبيه
طارق : شوفي نفسج ترجفين
ودق : غلطان ودرت وجهي على الجامه اوف شكد مستفز مااعرف من جاب طاري العماره تعصبت صح اني رافضه اعيش بيها بس مااتقبل احد يستهزا بيها
طارق : مبين صديقتج عصبيه
نور : شويه
ودق : لا مو عصبيه وانفخ احس راح اطگ
وصلنا واني مطايقته ونزلت وركعت الباب ماادري مو عصبيه اجت الركعه قويه وهذا كام يكمز
طارق : شبيج تخبلتي
ودق : العفو مو قصدي صارت
طارق : شنو تذبين حرگتج بالباب صدوك ناقصات عقل
ودق : اني هنا متحملت كتله اذا تحجي على كل النسوان ناقصات عقل لتنسى عندك ام واخت والام هاي الي تتهمها ناقصه عقل هي الي خلفتك وكبرتك وسوتك رجال شطولك شعرضك وكسرت ظهرها عليك علمود تجي حضره جنابك وبسهوله تكول ناقصات عقل اذا احنا ناقصات عقل انتم بلا عقل اصلاً
طارق : نصي صوتج واحترمي نفسج
ودق : اني محترمه غصبن عليك افتهمت
نور : ياجماعه كولو ياالله طارق شبيك ليش هاي الاعصاب
طارق : اعتقد صديقتج ماعدها اخلاق ومتعرف تحجي
ودق : اخلاقي احسن منك جان يرفع ايده يريد يضربني يله مدها حتى ورب الگعبه هاي العماره الي قبل شويه جنت تستهزأ بيها اگلبها عليك واراويك ناقصه العقل وام الچا شنوو

طارق : صعدت متعصب للسياره منها
ودق : شخط السياره وراح وجع اي والله شكد مستفز بس هذا خبل شنو هاي الاعصاب دكول كاتله ابنه مو سديت باب السياره
ثاني يوم داومت واجتي نور تحجيلي تكولي
نور: ولج صار نار اليوم كله يتعارك ويه ذبان وجهه ويكولون شون وحده تتجاوز عليه واسكتلها اني كلت راح يمنعني منج
ودق : والله لتزعلين مني اخوج ماعنده اسلوب شايف روحه فد شوفه
نور : مو لان اخويه بس هو طيب وحباب عيبه عصبي
ودق : على نفسه شنو يمشي ويتعارك تايهين اله خوما تايهين وشنو هذا الخشم اليابس
نور : عيني حقه ينغر انتي شايفه البنات الي يكتلون نفسهن عليه اشكال والوان يتوسلن بيه
ودق : حق اووي مامي خلي يطير لو يشبه مهند التركي جان شسوه
نور:لا ودق والله اخويه حلو وشخصيه وانيق
ودق : الشادي بعين امه غزال
نور : ههههههه كون يسمعج اله يموتج
ودق : انه ماانساها اله شون يرفع ايده عليه ويريد يضربني
نور : العفو نيابه عنه بس انتي هم مقصرتي دك عياط وكلمه بكلمه
ودق : شعباله اسكتله خلي يطير
نور :إٱللـِْﷻـِْﮭﮧ يساعد الياخذج
ودق : امه داعيه عليه هههههه
نور اي والله

يمامه : خلصت ١٠ ايام ورجع حامد جنت حيل مشتاقه الك گلبي طاك عليه
حامد : تعالي ليه لو تعرفين مشتاگلج بكد رحمه ربج
يمامه : واني مشتاقه لكولشي بيك  شسويت علمود ابراهيم
حامد : مايفيد الوليد راكب راسه والمصيبه دخل للفرقه الذهبيه صنف مداهمات اخطر مكان الفوج التكتيكي وهذا بگل مچان خطر يروحون ليه
يمامه : يمه عزه وتالي فضيله عرفت
حامد : لا انه كتلها حطيته بمچان زين موش خطر حتى اخلص وماتسألني وانتي اياج تحجين
يمامه : لا مااكول الله يستر ويحفظه
حامد : انه گلبي يلعب هلوليد تعبني گل مااحجي وياها شوره من راسه واخافن يصير بيه شى
يمامه : لا اسم الله الله يحرسه
حامد : اكلج
يمامه : كولي حبيبي
حامد : عيديها
يمامه : حبيبي وروحي وگلبي وكولشي بدنيتي
حامد : من اشتعل عبيس وهله انه رچيچ وگلبي مايتحمل لسانج هاذ
يمامه : اموتن بالرچيچ
حامد : لا انتي ناويتها ومااعوفنچ لو يحضر ابوي من گبره
يمامه : ههههههههه اموتن عليك

أيه : هدأ الوضع وكلمن التها بشى اني ودق بدراستنا وماما ملتهيه بابا وبينا
جنه ملتهيه بمازن بس كل شهر تبجي والله شنوو محبلت وهي كلها ٣ اشهر من اتزوجت
صار ٣ اشهر مشايفه ابراهيم ويتصل بفترات بعيده حيل بيبي جميله ويطمنها بس ميحجي ويه عمه فضيله هذا الحجي طبعاً من ست جنه تتسنط وتجي تحجيلي
منير من عرس مازن مشفته ولا وصل وهذا احسن شى عم الهدوء حياتنا بس گلوبنا تعبانه وخلصت السنه الدراسيه ونجحت ورحت للخامس الاعدادي جان المفروض للسادس بس من وره الحادثه تأخرت سنه
ودق نجحت وبأمتياز وماما طارت من الفرح

مرت عليه ايام بارده خاليه من كولشي الاشتياق والحنين لابراهيم هد حيلي اضافه للخوف والقلق عليه كل مااكول كافي اني على ذمه منير ينبض گلبي عكس لساني مو بيدي احبه
رجعت ودق من بغداد وحسيت جنه مرتبكه
أيه : شبيج جنه
جنه : خايفه
أيه : من شنًو يمعوده
من ودق
أيه : بس لا تخافين على مازن منها
اي ليش اجذب
أيه : كولي ياالله تره الي بالج ماله وجود وشفتي مازن شون حباب وياج و ورده وبحجايه مماذيج انتي من لسانج گلتي مراعي الله بيه
جنه : اني ماانكر بس اخافن يشوفها ويحن
أيه : هو لازم يشوفها اذا مو اليوم تبقى بت عمه باجر لتعبين نفسج ولدوخين
جنه : ااااخ يانار گلبي
أيه : هههههههه حلوو من تغارين
جنه : اضحكي علي وانه مسموط جد جدي

يمامه : جان اكو فصل والدنيا مگلوبه واني بالي يم حامد لان اعرفه تعبان تأخر حيل شو دخل مازن وكال والله ابويه سبع حلها وهي ماتنحل
الحجية جميله: چا غير وليدي هذا الشيخ حامد ابن الشيخ راضي گلها تهابه
يمامه : وهو وين
مازن : جان يفض شغله الهديه
يمامه : ياهديه
مازن : غير كرموه بمره
يمامه : وكفت على حيلي من عزه العزاني يامره
مازن : كرمو ابويه حامد من انتهى الفصل بمره
الحجية جميله: چا شبيهه بالخير والبركه
يمامه : ياخير يابركه عمه انت تحجي صدوك
مازن : اي والله ويكولون البنيه حلوه وصغيره وراح واحد من الولد يجيب سيد
واني احجي واشوف عمه يمامه وكعت من طوله
الحجية جميله: يا فلك طرچ يلبومه ماتحملت ولك الحگ انطيني ماي اذبن عليها لا يوگف گلبها
مازن : ركضت جبت المي وبركضتي طب ابويه حامد
حامد : ها بوبه خيرك
مازن : بويه عمه يمامه وكعت من طولها وتخربطت
حامد : انه اخوك وركض
يمامه : فتحت عيني ويغسلون وجهي واني بحضن حامد اني شفته لو طكيت بجي واحجي ليش حامد تقبل تتزوج عليه مو راضيتك مو كتلي هذا هو ليش تأذيني والله مااتحمل تتزوج عليه متبت من فرحه ومصايبها هلمره جبتنا وحده ثانيه

الحجية جميله: سوده بوجهچ جا غير حكه والشرع حلل اربعه
حامد : يمه شنهي ياشرع يافرحه
الحجية جميله: يمه مالك دخل بيها هاي تسودنت توكل على الله وتزوج وجيبها ليه انه اعلمنهاشون تداريك والبيت جبير ويساعنا گلنا
يمامه : دخيلج عمه لتحجين هيج غير اموت
حامد : يابه بسچ بچي خليني افتهم شنهي الصار
يمامه : كالو اتزوجت
مازن : يابه دااحجي على المره الكرموها الك وغمزت اله
حامد : هاااا چا شبيها مره حليوه وصغيره واعيدن شبابي عليها
يمامه : طفرت من حضنه واني حامد
حامد : انتي بيتج شنهي احد اجه جارچ
يمامه : وحق الله اذا تزوجت ماابقى لحظه وحده

الحجية جميله: حريشي اليطمچ ولي احد كاضچ عوفي الوليدات ولي
حامد : لاتهددين وبسچ تخربطين
يمامه : گتلك متتزوج يعني متتزوج
حامد : انه لو اريدن اتزوج مو وحده لا اثنين وغصب عنج واتضلين هنا وهم غصب عنچ
يمامه : كعدت بالكاع ابجي وجان يجرني لحظه
حامد : هههههههههه صايره ام دميعه طيرتي
الحجية جميله: بومه من يومها بس تنعي
يمامه : حامد فدوون لتتزوج
حامد : هههههههه هو انه تحلالي مره غيرچ
مازن : ههههههه والله عمه متوقعتج هيج گلبج رهيف بلعافيه عليك يابه خوش صايدها صيده
حامد : انه ابوك يمازن صياد اسود مااصيدن طير البراري
يمامه : اباوع ميتين ضحك واحد يغمز للثاني مسحت دموعي انت جذبت مو مازن
مازن : لا والله صدوك كرمو ابويه بمره بس هو مرد الكرم وزوج البنيه لواحد من ولد عم ابويه وجابو السيد وعقدو

الحجية جميله: چا شون ترد الهديه يحميد
يمامه : عمه ابوس ايدج لتذبين بانزين على النار
حامد : هههههه يمه انه عندي احلام ويمامه والحمدلله مااريدن مره
الحجية جميله: لا يبعد امك انته عندك بومتك تبيع رويحتك ليها
يمامه : انداريت على عمتي بومه غراب قرد شتكولين كولي وراضيه والله بس لتكولين يتزوج عليه جان حامد يبوس راسي
انتي ام علاوي الذهب
الحجية جميله: عشتووو اخذها يمه وروح مني انه ضغطي صعد واذا تضل افتحلك راسها

حامد : لايمه اخذها واروح هههههه بست ايد امي  وكومت يمامه من الگاع
يمامه : اني الك مازن هيج تهبطني
مازن : شويه اكشن ضايجين
يمامه : والاكشن مالتك مطلع بس عليه
حامد : ماضاع الربى بيك والنعم منك وليدي هههههه
مازن : بالخدمه يابه
حامد : روح لمريتك وانه اخذ مريتي ماقصرت هههه

يمامه : اضحك انت شعندك مكيف
حامد : تعالي وانه اكلچ ليش اضحك
يمامه : رحنا للبيت واول مدخلنا حضني وكمت ابجي بعدها الغصه بگلبي
حامد : ليش تبجين مو فهمتچ
يمامه : والله بعدني مقهوره
حامد : انتي من گل عقلچ تحلالي مره غيرج انه تزوجت فرحه والبت صغيره وحليوه وضلت شهرين جاري وماكضيتها وهيه حلالي وتتمناني وانتي چنتي ماطيقين شگلي وتحملت چا هسه بعد گل هذا الحب نفسي تدنى على غيرچ مستحيل
يمامه : حضنته اووف شكد احبك
حامد : تعالي ندخل لحجرتنا وانه اگلج شكد احبچ

أيه : اجتي جنه مثل كل مره تنطيني موجز انباء البيت كل واحد شصار وراحت ماكو نص ساعه ورجعت وجهه مگلوب والدمعه بعينها
أيه : خير شبيج
جنه : راح اطكن واموت
أيه : ياستار ياربي شصار
جنه : اجه زلمه على ودق ومازن اركض للديوان ومااعرف شصار
أيه : منو هذا
جنه : مااعرف
ودق : شكوو شبيكم هلو جنه شونج
شبيج
جنه : مابيه
أيه : اكو واحدجاي يسأل عنج
ودق : عني اني
أيه : اي
ودق : منو هذا
أيه : شمدريني وجان تجي همسه
همسه : ودق بابا حامد يريدج
ودق : اي اجيت نزلت على ماما
يمامه : هاا حبيبتي وين
ودق : عمو حامد دز عليه تعالي ويايه مااريد اروح وحدي
أيه : اني هم اجي
رحنا كلنا اول مطبيت واسمع عياط مازن
مازن : كوله يابه ماعدنا مره
ودق : شكوو شصار
حامد : تعالي اكعدي يابه وانتن روحن لحجرتجن واكعدي يمامه جاري
أيه : ركضنا طلعنا بس اكيد منفوت هيج فرصه بقينا نتسنط على الباب انعديت من جنه
حامد : بويه ودق اكو زلمه اجانه من بغداد وطلب ايدج مني
ودق : منو هذا
مازن : منين تعرفي هااا احجي
حامد : بسگ مازن خلي نفتهم من البت
ودق : مباوعت على مازن من يوم الي حجيت وياها صار اشهر مشايفته واليوم شفته حتى سلام بينا مصار لان الوضع متكهرب واشوفه يعيط ويرجف
حامد : بويه الوليد يكول اخوه زميلتچ بلكليه اسمه طارق
ودق : طارق اخو نور مستحيل
مازن : يعني تعرفي
ودق : اكيد غير اخو صديقتي
حامد : والوليد شاريچ وانه اسال عنه واشوفنه زين شين بس انتي فكري بين مااسأل عليه
ودق : بعدني ردت اكول مموافقه عمو لتسأل جان يعيط مازن
مازن : ماعدنا مره اله واذا وافقت انهي عليها
يتبع .....

مساء الـ🌹ـورد غوالي لاحظت بالفتره الاخيره القصه تعبتكم نفسياً وعقلياً اعرف القصه متشابكه لهذا تمسكت بكتابتها رغم التناقضات بشخصيات القصه لكن تبقى مشاعر الانسان بلحظه الموقف هي الي تحكمه القصه اسمها سجينة الروح اختاريت الاسم لان ابطالها جميعهم مسجونين بعواطفهم وردت اسجن كل شخص يقراها معاهم واعتقد نجحت من خلال التعليقات اكتشفت الكم الهائل من المتابعين الي متأثرين بالقصه بشكل كبير لهذا قررت اطلق سراحكم واختصر بالقصه حتى لتعبون بعد تمنيت مثل متنسجون بالقصه ومشاعرها ومواقف ابطالها تستمتعون بقرائتها مو تتأذون نفسياً لهذا احاول بالايام القادمه اختصر حتى لتتأذون 😊
اتمنى لكم قراءة ممتعه وايام جميله كجمال قلوبگم
تحياتي لًلًـّــ💎ــجٌٓمٍَُٓيِّعَْٓ