رواية سجينة الروح الفصل السادس وثلاثون 36 - بقلم ريام هادي

سجينة الروح
للكاتبة Reem
البارت الخامس والثلاثين
(بارت طويل لعيونكم اطول بارت انكتب من بدايه القصه لحد اليوم ومكدرت اقسمه حتى لتضيع الاحداث عليكم )
ملاحظه / بنات الي تكول البارت قصيره تره ديطلع نصفه عندج احذفي القصه وارجعي حمليها نهايه البارت بيه اغنيه وطويل
(لسان حال ودق)

ويـن تـريـد تـوصـل يـا زمـن ويـاي
أطخلـك راس تـحلم وأخضـع شحـدي
مـا أحتاج كَصبه من أعزف على الناي
بـيـه أحـزان تـطـلع حـتـى بالـبـردي
وأفوت بزود جرحي معاند أكبر سيـف
وآنـي بكيفي أنتهي وبكيفي من أبدي
يجرحني الـزمـن وأستصغره بـملكـَاي
وأستخطيه وأكـَول صـغـيـر مـو كَـدي

ودق : بعدني ردت اكول مموافقه عمو لتسأل جان يعيط مازن
مازن : ماعدنا مره اله واذا وافقت انهي عليها
حامد : (بعيطه قويه ) شنهي تسودنت يمازن شنهي تنهي عليها
ودق : تنهي عليه
يمامه : شبيك مازن صدوك تحجي على اي اساس
مازن : اني ابن عمها ومن حقي انهي عليها

أيه : اباوع على جنه اصفرت وترجف لزمت ايدها
حامد : لا انت موش طبيعي اطلع بره
مازن : يابه اني كلت كلمتي اذا ودق وافقت انهي عليها والي يصير يصير
يمامه : عمه مازن هاي انت العاقل هيج تحجي
حامد : هو بكيفه چا هيه تايهه
مازن : يابه من حقي انهي الي جايها ميناسبها
حامد : وانت شدخلك انه عمها مسؤول عليها
مازن : واني ابن عمها تكدر تكولي شجاب ولد من بغداد للعماره يخطب اذا مو الست متفقه ويااه معناه احنا عفناها هناك ومأمنين تدرس طلعت الخاتون تسوي علاقات وتحب وجايبه صاحبها يخطبها
ودق : اباوع على مازن عياطه اخذ الدنيا ويحجي ويرجف وعمي يعيط عبالك حرب واني صافنه بالوجوه لحد مكال صاحبها يخطبها متحملت وكفت
حامد : انجب وكض لسانك شنهي هذا الحجي
ودق : من رخصتك عمو
حامد : انتظري انتي بويه
ودق : فدوه عمو اسمحلي اسمع ياحضره الدكتور المثقف الواعي اول شى عيب عليك تكول صاحبها مو اني اصاحب واسوي علاقات واضيع تعب امي وكسرت ظهرها وحتى لو فكرت بيوم احب راح يكون كدام الكل مخايفه من شى ولا من احد
حامد : ودق بسچ
ودق : فدوه عمو خليني اكمل من رخصتك
مازن : عوفها يابه خلي نشوف حضرت الست شتخربط
ودق : اني مااخربط انت الي كاعد تخربط ونسيت نفسك وضعك لتنسى انت متزوج ومتزوج مو اي وحده بت عمك يعني جان المفروض احترام لعمك الي رباك وكسر ظهره عليك متكسر بته وانت اليوم كسرتها
مازن : ودق لتلعبين بالكلام
ودق : مداالعب ولا اسوي احقاد هذا حق وتعرف كولش زين كلامي صحيح
قبل متحجي ياحضرت الدكتور مازن وتنط وتكول انهي عليها ردت اكول لعمو ميحتاج تسأل لان مااريد اتزوج وانت تعرف اني رافضه مبدأ الزواج

يمامه : بنتي كافي
ودق : يووم فدووه خلي اكمل عوفوني
ولعبالك بهاي هوستك وعياطك راح اغير رأي وأوافق عليه عناد بيك واكولك غصب عنك اتزوجه وشسوي سوي لا غلطان اني مو عقلي صغير واضيع نفسي بلحظه غضب
واضيع كل تعبي حتى حضرتك تستمتع بأذيتي او اذي نفسي اني كتلك مره اختاريت طريق ويوم ماافكر بلزواج راح يكون انسان يفتهم عقلي ويقدر عاطفتي
ولعبالك خايفه منك علمود تنهي عليه لا عزيزي اعرف عمو حامد مراح يسمحلك بهذا الشى وحتى لو نهيت ميهمني هذا الشى ليقدم ولا يأخر عندي
وهاي كدام عمو وماما وانت هم تسمع اني رافضه الزواج وهااا تره الولد لا كفر ولا غلط حاله حال الالاف الشباب من يشوفون بنيه مؤدبه وخلوقه يروح يخطبها ومكان متتهمني عندي شى ويااه جان فكرت وگلت ودق متسويها وتعرف انت السبب ليش
وتكيف وتكول لعد بت عمي مؤدبه لهذا اجه الولد واتعنه من بغداد لهنا
بس انت دومك شايف نفسك وعندي الدنيا كلها غلط وبس انت الصح

مازن : اسكتي كافي
ودق : ليش اسكت لان كلامي اذاك موو بس مع الاسف طلعت انسان همجي ومتخلف وحالك حال كل رجال اناني متسلط همه يكسر المره وبس ولان رفضتك تريد تردها اليه وجان يشيل ايده ويضربي اني بقيت واكفه كباله ولا تحركت متوقعت يمد ايده
وجان يعيط عمي حامد ودفعه حيل لمازن
حامد : امشي اطلع بره شون تمد يدك عليها وانه واكف هذا احترامك ليه
مازن : يابه مكعد تشوف تجاوزها عليه وكدامك
حامد : انه اعرفن احاسبها على تجاوزها بس مو تمد يدك عليها اطلع بره ماتبقه بلبيت لحظه وحده
مازن : يابه اسمعني
حامد : اطلع بره وصلت حدها وياك وراح انعل يومك امشي ولي
وجان يطلع وهو نار صاير

يمامه : حضنت ودق وهيه ساكته ومترمش واني ارجف شون يمد ايده عليها بس مااكدر احجي لان حامد واكف من انكسرت ايده كون ان شاء الله
ودق : لتخافين ماما مابيه شى
حامد : ها المرجيه منج بنيتي شون تجاوزين وانه واكف
ودق : عمو اني متجاوزت اني انطيت رأي بمازن يعني تصرفه بنظرك صحيح
حامد : انه ماگلت صحيح ولا اقبل عليه بس مو تجاوزين وانه واكف
ودق : اني اعتذر اذا صارت بوجهك عمو وبست ايده وان شاء الله احاول متتكرر وبالنسبه لموضوع الولد اغلقه تماماً زواج ماازوج
يمامه : صفنت على ودق اول مره هيج تصير ومتعيط وتفقد وفوكاها اعتذرت بكل ادب

ودق : اني رايحه للبيت ماما
حامد : روحي وياها يمامه
ودق : لا مابيه شى ليضل بالكم
حامد : لا بويه امچ وياج احسن
من رخصتك عمو
طلعنا واخذت ماما واني ساكته وافكر بكل الي صار وابتسمت

أيه : اباوع على جنه منهاره ونار وخطيه دموعها عشره عشره بس اتسد حلكها حتى محد يسمعها حضنتها حيل واجر بيها حتى متسمع الكلام بس ميفيد اله تسمع للاخير
ومن طرده عمو سحلتها كوه وصعدتها فوك وبس تبجي لج كافي راح تموتين
جنه : سمعتي شون يرجف عليها شون يعشگها انه اعرفنه الغيره گلته عليها
أيه : والله مااعرف شكول الج بس انتي هم على كيفج شوفي وجهج اصفر ازرك وترجفين والله خوفتيني
جنه : انه نار هنا (وتأشر على گلبها) نار وتاكل بيه ليش ايه انه ماقصرت وياه كله تامر وماأذيته بنص چلمه والي يطلبه يجراله بساعتها اداري بيه من گل گلبي واتمناله الرضا واكولن رجلي وحبيبي وكل دنيتي هاي حگ المداراه والتعب والسهر

أيه : لج على كيفج راح گلبج ينط من صدرج
جنه : انه ماانامن اله ينام ومااگل اله يحط اللكمه بحلگه اباوع على حلكه وصرت خدامه ليه اكوم واگعد واكله انه احبك انت تاج راسي انت حياتي بشنهي قصرت گليلي فدوه ايه ليش ماحبني ليش ماحسني ليش تسودن عليها

أيه : كمت ابجي على حالها صعب الحب من طرف واحد بس هو الغلط هم غلطها هي تعرف ميحبها شجاج وافقتي بس مااكدر ازيد عليها المها سكتت وبقيتها بحضني واطبطب عليها واحاول اخفف المها

جنه : ابوي طرده وراح تكبر بينهم
أيه : لتخافين بابا حامد يحبه لمازن ومشكله وتصير وان شاء الله تنحل
جنه : انه تمنيت ودق تزوج وتروح حتى حياتي تصفى بس حظي اسود ماوافقت لاتزعلين مني انه اعرف هيه خيتج واقرب مني الچ بس هذا الي بگلبي
أيه : لا والله ماازعل انتي حقج بكل كلمه تكوليها بس بنفس الوقت هم فكري تره ودق مالها ذنب وشفتي من يوم زواجكم مشفتيها وحتى من اجتي من بغداد موصلت لهنا مراعاة لشعورج وحتى لتشوف مازن يعني هيه ممتعديه على حياتج ولا مأذيتج انتي الي زارعه بعقلج بأن ودق هي سبب برود العلاقه بينج وبين مازن بس هيه بعيده كل البعد ولو تريد مازن جان وافقت عليه او على الاقل تكوله انتظرني لحد مااكمل دراسه ونتزوج بس هيه رافضه الفكره كلها ومازن هو الي متعدي على حياتها بله هاي سالفه منه ينهي عليها

جنه : شسوي گليلي
أيه : لتذبين الصوج بودق مو ادافع لان اختي بس هذا واقع وانتي لتأذين نفسج البجي واللطم والعياط مراح يفيدج ولا راح. يخلي مازن يحبج صيري عاقله واهدي وسوي نفسج كولشي مسمعتي
جنه : شون مااكدر اموتن
أيه : لعد بسوالفج هاي راح صدوك تضيعين مازن انتي طريقج طويل بس صبر ماعندج تريدين مازن بيوم وليله يحبج وهذا الشى مستحيل يصير لازم تصبرين وتتحملين اذا تريديه واذا متريدي اتركي من هسه ماطول ماكو اطفال بينكم يتبهذلون
جنه : انه مااكدر اعوفه احبنه
أيه : ماطول تحبي تتحملين وهو وين يروح مرجعه الج انتي زوجته كومي غسلي وسوي نفسج معرفتي شى انتي قبلتي بمازن بسيئاته وحسناته وهسه السيئات طلعت اصبري وربج كريم وان شاء الله يهدي گلبه عليج وحضنتني
جنه : ابقي وياي لاتعوفيني
أيه : وين اولي مكابلتج وكاعده

ودق : دخلنا للبيت وطبيت للمطبخ طلعت برتقالات اثنين وحده ليمون وكعدت اعصر بيهم
يمامه : ماما حبيبتي بيج شى
ودق : ليش يوم شبيه
يمامه : وضعج مو تمام وتبتسمين
ودق : اتذكرت الموقف كله وابتسمت
يمامه : اني گلت راح تعيطين وتگلبين الامه لان ضربج
ودق : ههههههه لا مو لهاي الدرجه
يمامه : لا وفوكاها كعد تعصر برتقال بكل هدوءوتبتسم
ودق : ام علاوي اعصرلج ويايه
يمامه : ولج اخاف الراشدي شخط عقلج ماما ودق بيج شى
ودق : ههههههههه والله سمعه موزينه يعني الهدوء اليه علامه من علامات الخبال هيج اني همجيه بس اعيط
يمامه : مو قصه همجيه بس الموقف جبير وضربج مازن وفوكاها ترجعين هادئه وادورين عصير وتبتسمين شون ماافكر بيج شى

ودق : كملت العصر وحطيته بكلاص وحطيت ثلج واحرك بيه حتى يبرد وكعدت بصفها بميز طعام مال المطبخ واشرب واسولف وكتلها
ياام علاوي الي سواه مازن شى طبيعي
يمامه : شون يعني
ودق : ماما مازن أكلته الغيره وهيج سوه
يمامه : وانتي مكيفه
ودق : ههههههه مو قضيه مكيفه بس ردت اثبت اله وللكل اني مو طايشه ولا مااعرف اتصرف ويوم مختاريت ابتعد منه جان تصرفي صح اني وياه بانزين ونار منصفى بيوم صعب تجمع اثنين نفس الاعصاب ونفس الخشم اليابس اثنينا منتنازل واي علاقه سواء حب او زواج اذا ماكو طرف منهم يتنازل ويضحي مراح تمشي صح ولا تستمر واني ومازن اذا بقينا ساعه بمكان واحد يمكن نحركه هاي طبيعتنا لا اني اتغير لخاطره ولا هو يتغير لخاطري واليوم اثبتت الكم بأن مازن ميصلح الي

يمامه : انتي منو
ودق : ههههههههه والله بنتج ودق بس ياامي اكو مواقف لازم واحد يتعامل وياها بعقل جيت طارق فاجأتني لان هذا الشخص عجيب امره هم خشم ولسان وميعجبه العجب بس الفرق من يحس روحه غلطان يتراجع ويعتذر ميتمسك بغلطه وهاي صفه جيده لكن مو اوصل مرحله اوافق عليه
يمامه : انتي منين تعرفيه
ودق : اخو نور صديقتي
يمامه : اعرف اخوها بس طبيعه علاقتكم
ودق : اعتقد سمعتي ماما اني لو اريد احب اخلي الكل تدري واجيبه بأيدي واجيكم
يمامه : كفختها تسويها يابت يمامه ولو هذا الحجي فات موعده بس تره مازن خوش مازن
ودق : مكلت موخوش ماما بس ميتنازل وميتعب نفسه رغم كل حبه اليه واكيد انتي تدرين يحبني
يمامه : اي ادري
ودق : رغم كل هذا الحب حتى مكلف نفسه ينتظرني يجوز اكبر اتغير يتقرب مني
يمامه : بس انتي رفضتي رفض تام
ودق : وانتي رفضتي عمي رفض تام وحاربتي سنين حتى متتزوجي والنتيجه گلب الدنيا حتى ياخذج حتى لو بطرق محلوه بس حارب بكل الطرق حتى يكسبچ

بينما الاستاذ مازن بس كتله مااريدك طفر ويمكن هذا الشى احسن اليه واله
يمامه : تدرين انتي كبرانه وعقلانه
ودق : وكفت وكمت افتر وحليانه بس مو بحلات هاي العيون الحلووه وبقيت ابوس بماما وهي تضحك
يمامه : اوف منج انتي تضحكين وتكمزين وهناك عالكه
ودق : مو اني الي علگتها الي علكها يطفيها اروح انظف غرفتي واصفط ملابسي احسن اليه
يمامه : روحي ماما الله يسعدج وتبقين دوم هيج عاقله وهادئه
ودق : والله مااضمنلج ياام علاوي العقل والهدوء دوم عندي خيط مقطوع مرات يطبك اسم هذا الخيط ورث الحجيه جميله

يمامه : ههههههه حلو هذا الاسم ليش عود ورث
ودق : نفس طكاتها كل ساعه براي اني مثلها الله بلاج بأثنين جميله مو وحده
يمامه : عسل على گلبي المهم انتي بخير
ودق : والله ماكو غيرج انتي عسل وصعدت اغني
اليوم اني مرتاحه بالاول سالفه مازن وثانياً كسرت خشم طارق ورفضي اله اتخيل شكله حيل عباله كل البنات كاتلات روحهن عليه يله يطروق اگلها

صفنت ورجعت للذاكره قبل شهر ونص من شفت طارق بعد العركه بأسبوعين كاعدين اني ونور على مصطبه قريب قاعاتنا ونراجع امتحان وجان تكول نور هاي منو نورنا اخويه حضرت الضابط طارق وفاكه حلكها والابتسامه شاكه خدها ومكيفه الفطيره تكول عبالك مشايفته من سنين رفعت عيني بأتجاهه وهو جاي علينا ًويمشي بثكل وگأنما يكول انا السلطان طارق چاي وكاشخ كشخه رهيبه وعطره واصل يمكن للعميد والمناظر الماركه والساعه الي بكذا دولار ماركه اصليه ويلمع من فوك ليجوه وهو طويل ورشيق يجذب الانتباه حيل واكو كم وحده سخيفه اكلنه اكل بعيونهن وهو عود ممهتم

وصل ليمنا نزلت عيوني اباوع بلملزمه ولا اهتميت
طارق : السلام عليكم
نور : نورت حبيبي طروق
طارق : هلو حبيبتي نوره كلنا السلام عليكم تره السلام لله لو حضرت الاخت طرشه تريد اكتبها الها
ودق : رفعت راسي ومن وره خشمي جاوبت وگلت وعليكم ورجعت نزلت عيني بالملزمه
طارق : لهاي الدرجه حاقده گلت هسه نست الموضوع
ودق : نعم تحجي ويايه
طارق : لا ويه خالتي
ودق : هااا سلملي عليها
طارق : هههههه لج انتي شنو
ودق : لتكول لج مااسمحلك اسمي ودق ميعجبك تنطق اسمي لتحجي ويايه وطبعاً يكون افضل
نور : دودي حبيبي على كيفج تره اليوم طارق اجه علمودج
ودق : وليش علمودي خير شسامع
طارق : اني اجيت اعتذر لان رفعت ايدي عليج
ودق : رفعت راسي وباوعت عليه وبرود كتله اعتذارك مقبول ورجعت نزل عيني بلملزمه
طارق : هاي شنو بس هيج
ودق : احجي وعيوني بالاوراق لعد شتريد اهلهل واصفك واذبح طلي والله شكوو مو الاستاذ طارق اعتذرلي

طارق : يعني ميهمج اعتذاري
ودق : ميفرق عندي لان انت غلطت مو اني واصلاً ماكو معرفه وصله حتى اهتم بحضرتك واهتم بأعتذارك الطبيعي البشر من يغلط يعتذر وانت سويت الشى الطبيعي على شنو بعد احسسك انت مسوي انجاز

طارق : تدرين شكد شايف بنات وكحات ولسان وجريئات مثلج مشفت
ودق : شعتبره هذا ذم لو مدح
طارق : مااعرف بس مستغرب عليج
ودق : وكفت ولميت الاوراق انت ابقى صافن ومستغرب اني عندي امتحان وانتي نور متجين
نور : اي اجيت
ودق : من رخصتك وعفته ومشيت بس احس عيونه تريد تطلع لان مهتميت اكره الشخص المغرور

دقيقه واجت نور ورايه تضحك
ودق : شبيج فطيره
نور :والله اخويه اول مره يعتذر من وحده وفوكاها لبستي
ودق : شتريدين يمه اخذه بالاحضان وابوس بيه واكوله خلف الله عليك اجيت تعتذر
نور : اليوم هم راح يحترك البيت ذيج الايام كلها هو اعصاب من وراج وراح التحق والبارحه نزل
ودق : يمكن من جان يسوق طياره انضرب بالجامه صحى كال خلي اروح اعتذرلها يله كافي دوختينا انتي واخوج ورانا امتحان واذا مجاوبت درجه كامله احركچ انتي ويااه
نور : هههههه خبله وتسويها

وراها بيومين اجتي نور وكالت طارق مسوي تحقيق كامل وياها يستفسر عني وهاي الذكيه كولشي حاجيه اله هي صح صديقتي بس مو كولشي تعرف مثل ماعندي حدود ويه الكل عندي حدود ويه الصديقات رغم طيبه وحبابه وبنت ناس بس تعلمت مااثق بأحد غير امي وخواتي

نفضت ذاكرتي ورجعت للواقع بغرفتي وعرفت ليش استفسر عليه الاخ حبني من اول عركه والله بطران باوعت على الغرفه الي مكلوبه عباره عن ملابس كليه على ملابس بيت صايره سوك هرج من الهوسه وكعدت اصفط واغني ودخلت ايه عيونها حمره هااا لج تعالي شبيج
وحجتلي كولشي انقهرت على جنه واني شعليه ايوته والله مالي ذنب انتي سمعتي كولشي
أيه : اعرف بيج والله وماالومج اصلاً خفت عليج لتروحين توافقين
ودق : لا لتخافين مااغلط هيج غلطه
أيه : اذاج من ضربج
ودق : شكد ميكون مؤذي مو مثل احساس گلبه هسه
أيه : والله مازن حيرني هو مو متزوج وجنه تحبه شيريد بعد
ودق :يريد الي محصله تدرين مبدأه اذا محصلت الي اريده غيري ميحصله وهو هيج راد يكسرني ينهي عليه ويعوفني معلكه عباله اهتم
أيه : ولج شون متهتمين
ودق : اهتم لو اريد اتزوج او احب واحد واريد اصير اله وهاي الامور مو بالي اصلاً هسه عقلي بدراستي وبس عوفج من هذا الموضوع المزعج
اكولج عمتج فضيله لاحس ولا نفس شنو سالفتها

أيه : خاتله بغرفتها لو تبجي على ابراهيم لو تقرا قران وبشرى اكثر الوقت يم امها حتى قليل كمنا نشوفها اني وجنه والله مرات انقهر عليها
ودق : جذب تنقهرين عليها بعد كل الي سوته
أيه : مهما كان هاي ام وابراهيم ميصير يعاقبها بيه مثل مسوه بيه هيه تعتبره ابنها واخوها وكولشي بحياتي وفنت حياتها وشبابها لخاطره وخاطر اخته وتكوم وتكعد تصيح وحيدي صح دمرت حياتي بس هيه عبالها تبني حياة ابنها
ودق : والله هاي لو اني ومسويه هيج بيه يوميه اكعد ويه صلاة الفجر ويه صلاة المغرب ادعي عليها
أيه : وباقي الصلوات
ودق : استراحه
أيه : ههههههه لج لا خطيه حرام والله رغم كولشي مااكرهه اني مااعرف اشيل بگلبي على واحد بالعكس ادعي يرجع الها قبل اليه حتى ترتاح اني حتى سبب قبولي بأبن عمج الشفيه علمود لتتأذه وتموت ويصير ذنبها برگبتي

ودق : لان ثوله قشمرتج شبيها جنها الصل كولشي مابيها
أيه : تعالي شوفي حالها هسه نص بشر والله من اسمع بجيها من افوت من يم غرفتها اموت قهر
ودق : ياربي انتي شنو گلبج من شنو مصنوع
أيه : گلبي متأذي ويوجعني وااااااااه لو تعرفين شكد مشتاق اله
ودق : الله يعين گلبج اكولج ابن عمج شخباره
أيه : منير
ودق : اكو غيره الخبيث اوف شكد اكرهه
أيه : شفتج ومشفته خلصانه منه ومن ضيمه ولا وصل هسه يجوز بعد چم يوم ويهل علينا تلكيه بوجهنا بس اصبري
ودق : فال الله ولا فالج
أيه : غير عطله والمصيبه تخرج من الكليه يعني راح يتفرغلي ويكتم على انفاسي
ودق : مالج علاقه بيه ولطلعين اله
أيه : احاول يله اكوم انزل لماما اشوف اخاف محتاجه شى وانتي خلصي هاي الهوسه مالتج والحكيني
ودق : ماشي

يمامه : بقيت اليوم كله افكر بحامد وخطيه جنه بس لا سمعت الحجي همزين عمتي نايمه جان شخلصنا البنات ساعدوني بتنظيف البيت وكملنا شغلنا وعشيتهم ونامو حتى علاوي من اللعب تعب ونام اله اني انتظر بلكت يجي بالي يمه
تالي بليل اجه وروحه بخشمه الله يساعدك حبيبي
حامد : ويساعدج يمامه واليرحم والديج چاي راسي راح يطگ
يمامه : من عيوني ركضت فورت نومي حامض وصبيته وجبته طبيت للغرفه جان كاعد على الجربايه وحاط ايده على راسه ومدنج من شافني رفع راسه
حامد : هاي شنهي
يمامه : نومي حامض هم اطيب من الجاي ويعدل راسك والاهم يعدل ضغطك اكيد صاعد الجاي موزين گلبي عليك بهليل
حامد : لاتعاندين وروحي سويلي چاي لو اروحن هناك اشرب
يمامه : كعدت كباله بالكاع بداعت يمامه عندك لتتعصب واشرب هذا والله الجاي يأذيك
حامد : انتي شوكت تبطلين تحلفيني بيج
يمامه : ماابطل لان من احلفك تسوي الي اريده
حامد : هااااا هيچ
يمامه : اي هيچ يله فدوه لطولك الحلوو اشربه واخذه مني ويشرب ويباوع هاا طيب
حامد : گلشي من يدج طيب
يمامه : يله احجيلي شبيك ليش حبيبي مهموم

حامد : اووف شحجي وشگول
يمامه : زرفت گلبي الاوف مالتك شبيك ياعيني
حامد : گلها طايحه براسي وكلها تريد مني يمشون من شورهم ومن يطيحون تعال يحامد شيلني
يمامه : غير جبيرهم وظهرهم انت ياعيني
حامد : تعبت يمامه انه هم بشر والي حدود كضيت عمري كله انطي ومااخذ اركض لهذا وذاك ومايقدرون چا شون گليلي هاي گلها طايحه براسي وانه العاقل المتجي عليه يطلع مسودن
يمامه : قصدك مازن
حامد : المصخم اكو غيره
يمامه : على كيفك ياعيني ويااه
حامد : اليوم وروح ابويه لوما واكف بعيني ترباتي ليه وهو امانه فاضل اخوي عندي چا حطيت الچيله بصدره يوكف بوچهي ويريد ينهي على البت
يمامه : ليش نغالط روحنا حامد ولو كلامي راح يأذيك بس واقع تره مازن يحب ودق ومن غيرته هيج سوه
حامد : اسمعي شصار اليوم من طلع
طلعت ورحت للديوان وانه مورث منه اجاني حسان يهف شنهي شجرى شايف مازن عصبي ومسولف گلشي لحسان واجاني يركض وبيده مازن انه شفته تسودنت كضيته من قميصه
لك انت شون تريد تنهي عليها وتوكف جدامي بگل صلافه ولا هامك وانه واكف وتضربها للبت عبن يمامه ودق واكفات واله لو وحدنا چا نزعت هاذ (يأشر على رجله) وعلى راسك بس انه اكولن ماانزل من كدره عبن ولدي بس انت ماتستحي وچدامي وتهدد ولك نسيت نفسك

مازن : يابه ابوس ايدك لتزعل مني كل الناس تزعل اله انت مااتحمل زعلك ساعه
حامد : ولي مني انه غضبان عليك انت تسودنت
حسان : خويه حامد على كيفك ويه نفسك وافهم مازن
حامد : شفهم حسان مااحترم وجودي ونسى هو متزوج بتي وانه گتله اذا مسيت شعره من جنه لو نزلت دمعتها انسى هو ولدي واليوم هو نسى انه ابوه ونسى جنه ونسى الدنيا گلها واكف ويختض علينا ويهدد والبت ماسولفت ولا انطت رإيها وهو چن ابليس خش لراسه ويكمز لك اسمع اذا حسبت روحك زلمه تره انه سويتك زلمه لاتتمرجل علي

مازن : العفو يابه والله مو قصدي بس
حسان : احجي مازن شنهي الي بالك
مازن : مكدرت يابه والله مكدرت اشوفها تروح لغيري من شفته ولد مرتب ومبين ابن ناس وحجيه موزون وشايفها واخو صديقتها گلت اكيد متفقه ويه صديقتها حتى يخطبها عقل مضل براسي گلت معقوله تعرفه من زمان وتحبه زين بشنو هو احسن مني وتوافق عليه واني ادري بيها متريد تتزوج
حامد : هذا التخربط مالك مااحطه برجلي انه جيتك وگتلك انتظرها اصبر عليها وانت دكيت صدرك اريد جنه وماانتظر وبعت كرامه هذا حجيك لو لا وتنازلت عنها مالك حجه ولا اي عذر وانه گتلك بت ماعندي الك وانت تمسكت وضليت تزامط وانه وانه اسكت مازن عملتك اليوم ماتسولف وانه لو ما اخافن على بتي حتى اطلكها منك عبن انت مو كفو وتحافظ عليها

مازن : والله صحيح حجيك يابه اني اختنكت بعدني احبها انت مو ظليت ٢٠ سنه تحب عمه وانتظرتها سنين حتى تصير ليك ليش تلومني
حامد : انه ماالومنك انه اعيدن حجيك ليه انت بلسانك حجيت وگلت انه مو حامد واصبر ولا هيه يمامه وانتهى گلشي ولا تقارن ولا تنطي لرويحتك عذر انه كضيت ٢٠ سنه احبنها لان اخويه خذاها مني مو هيه رفضتني لو هيه منها الصوج مااعوفنها اصبر لحد ماتغير واحد منا لو انه انساها لو هيه تحبني وبلحالتين انه الربحان بس اخوي غدر بيه الله يسامحه وخذاها وتزوجت احلام مجبور بس انت مامجبور يمازن ولا انه جبرتك تزوج بتي انت أذيت رويحتك وطبگ مرض تحمل گلشي يجرالك

مازن : توقعت تفهمني لان مار بلي مريت بيه
حامد : افهمك لو مستخدم عگلك (عقلك) ومتصرف بحكمه مو تهوبز وتهدد وتوكف بوجهي وماتحترم ماخذت شوري وهاي تاليها اگلها
مازن : يابه بكولشي راضي بس لتزعل مني

حامد : وتعال گلي اليوم گلبت الدنيا وتريد تنهي والبت مارضت تزوج وسكتت چا هذا الحال يضل طول العمر هم يجي يوم ويتقدملها زلمه وترضى وهم ترجع تهدد وتنهي لو شنهي سالفتك
مازن : مااعرف بذاك الوقت شيصير بس هسه اي واحد يتقرب منها انهي عليها
حامد : لزمته حيل وخنگته
حسان : اذكر الله خويه هده الولد حيموت بيدك
شفت يحسان احد يلومني هسه اذا احطن چيله بگلبه بعدها الفكره براسه اسمع يمازن وحط هذا الشى براسك وحگ ابو فاضل اذا ماجريت عدل وتركت البت بحالها لا اندمك على اليوم الفكرت بيه تنهي عليها وانه اوكف بوجهك واريد اشوف يازلمه ينهي ولو انه لو انته ودفعته
مازن : يابه
حامد : حسان اخذه ولي مااريدن اشوف وجهه
مازن : بس انطيني مجال
حامد : بسگ مازن يله اخذه ولي مني ولا يرد للبيت
حسان : يله مازن امشينا يبرد ونرد ليه
مازن : اعتذر يابه وبست جتفه

يمامه : وتالي راح طلع يعني هسه هو بايت بره البيت
حامد : اي مايرد اريده يتربى
يمامه : على كيفك گلبي الولد عصبي هسه يبرد ويرجع يتندم ليش تأذي نفسك وتأذي وحتى جنه شنو ذنبه نايمه هسه بدون رجلها وهيه متعلقه بيه وتحبه
حامد : هو هذا السودني انه مااعرفن جنه تحبه من تزوجت يله عرفت شون تركض وراه وتخدمه وتباوع على طوله عرفت بتي تحبه وهوً باله وين
يمامه : منو ابوه مو اتزوج وخلص عمره يتصفن ويتذكر طيرته ويتحصر
حامد : انه ماغلطت مثله ولا تسرعت انه الزمن والغدر خذاج مني ولو چان زلمه غريب وحگ هو علي اگتله وماايگض شعره منج بس اااااااااخ

يمامه : اويلي من ڤًـدوه اروح للي يغار
حامد : كومي من الكاع لا تبردين
يمامه : اكوم وانام بحضنك بس حامد على كيفك تره ضغطك هاي الايام ديصعد اني اخاف عليك بس من وره عصبيتك ساكته
حامد : ربج كريم لاتخافين صحتي حديد
يمامه : يله حبيبي نام وارتاح وان شاء الله باجر تنحل
حامد : تعالي بحضني اريدن انام على ريحتچ تعبان وانتي راحتي
يمامه : من عيوني بقيت الليل كله افرك براسه والعب بشعره وهو نايم اباوع عليه شون تعبان ونومه عميق بس بتعب اوف يحامد جبتها وانت جاي تعب بتعب

ودق : مرت اكثر من ٣ ايام واشوف عمو يطب ويطلع ضايج وروحه بخشمه وممتحمل احد حتى علاوي الي روحه من الدنيا ماله علاقه بيه هو تعبان لان اول مره تصير هيج شغله ويه مازن كاعده اسولف ويه ايه ودك تلفوني نور صديقتي
هَــْـِْـْْـِلاّ بنوره شونج
نور : هلو دودي مشتاقتلج
ودق : والله اني اكثر
نور: منو يمج
ودق : ليش
نور : هيچ سؤال
ودق : اختي أيه
نور : يمي طارق ويريد يحجي وياج
ودق : ماكو كلام بينا وجان يجر الفون من نور
الووو شونج ودق
ودق : اهلاً طارق
طارق : شخبارج
الْحٍمَدٍ للـّہ تفضل رايد شى
طارق : سؤال واحد ماعندي غيره ليش رفضتيني
ودق : وليش اقبل بيك
طارق : شنو ليش تقبلين بيه
ودق : مثل مسألتني سألتك ليش اقبل بيك شنو المميز البيك الي يخليني اقبل
طارق : اني عباره عن مميزات شاب حلو وابن عائله وضابط والف بنيه تتمناني
ودق : اي واني مو من ضمن الالف ولتنسى مثل ماحضرتك تشوف نفسك مميز اني هم مميزه بعد كم سنه اصير دكتوره ومن عائله معروفه بالعماره وبنت شيوخ والحمدلله الله مفضل علينا لعبالك شفتني يتيمه گلت هاي ابوها ميت وامها متزوجه عمها واكيد مطيحين حظها لا عيني غلطان الحمدلله بجاه عمي واهل ابويه احسن عيشه عايشه وممحتاجه اتزوج وحتى لو اتزوجت اكيد مو انت

طارق : انتي ليش هيج هجوميه وماعندج منطق بالكلام توقعت
ودق : قاطعته بالكلام لتتوقع شى مموجود رجاءاً انت اتسرعت لو داز خبر بيد اختك كان سمعت ردي بدون متجي لهنا واتعب نفسك وطريق طويل
طارق :هذا اخر رد الج
ودق : بالضبط وسلملي على نور مع السلامه وجان اسده
أيه : عزه ولج شون حجيتي هيج ويااه
ودق : يابه خلي يطير شايف روحه فد شوفه شاب حلوو على اساس ماكو احلى منه ليش هيه بالحلا
أيه : بس شون تحجين بثقه ويااه
ودق : ايوته هيج نماذج شايفه نفسها تحس روحها احسن من غيرها لان اكو كم تافهه كبرو راسهم وعبالهم كل البنات تافهات وبدون هدف هو حتى مأجه واستأذن مني اخطبج لو لا تقبلين بيه گبل اجه هنا عباله من راح يجي اهلهل واطلع اكوله رحمه لأهلك اتزوجني اموت اذا متزوجت انتي لو شايفته شون يحجي من وره خشمه وميعجبه العجب على شنو يمه بشنو هو احسن من غيره
أيه : امنيتي اصير مثلج قويه
ودق : انتي قويه بس طيبه گلب وتتأثرين بسرعه وكلمن وطبعه يله خلينا هيج كافي وحده مخبله بالعائله ميصير اثنين جان هجت ماما من عدنا
جان تصيح ماما تعالو بنات ابن عمكم هنا
ودق :بس لا منير
أيه : لا عفيه
ودق : اباوع على أيه كامت تبلعم واصفرت يمعوده شبيج ترجفين
أيه : مااريد انزل حبابه مااريد اشوفه
ودق : لج ليش تصيرين جبانه على شنو هذا الرجف
أيه : مااريد انزله ولا اشوفه
ودق : اليوم باجر لازم تشوفي برگبتج هيه تعالي انزلي هسه واني كاعده يمج واخلصي

نزلنا وهاي ايه تريد تخرب
منير : شونج ايوته هاج
أيه : شنو هاي
منير : هديه نجاحج
أيه : شكرا. مااريد
يمامه : شنو متريدين ماما اخذي من ابن عمج عيب
منير : وخطيبها عمه لو نسيتي
يمامه : لا منسيت اخذي ماما
أيه : اخذتها
منير : وانتي دكتوره ودق شونج
ودق : بخير
منير : مجبتلج شى لان گلت اكيد متحتاج
ودق : شكرا. الله ليعوزني
يمامه : ودق كومي ضيفي ابن عمج
ودق : اهووو اي كايمه
منير : شونج ايوته اشتاقيتلج
يمامه : اني اروح اشوف علي واجيكم
أيه : عزه عافوني وحدي ويااه لو قطره دم مبقت بيه
منير : شبيج ساكته وترجفين قابل راح اگلج شجاج
أيه : منير انت شتريد مني
منير : هههههه حلو سؤالج بابا انتي مرتي شنو شتريد مني
أيه : بس اني مااحبك
منير : عادي واني هم مااحبج بس ارتاحلج انتي فقيره وحبابه واكيد راح تصيرين خوش مره وتراعين بيتج وجهالج
ودق : اجيت وبيدي الببسي لو بيدي اركعه براسه وامشي واحجي هاااا تريدها خدامه الك ولجهالك حتى تلعب بذيلك بغداد
منير : وانتي منو اخذ رأيج تبقين ماعندج ذوق وتدخلين بكولشي
ودق : مبين الكلام مأجه على هواك لان حق
منير : شوفي ودق اني اختاريت ايه رغم كل الي صار لان فقيره وبنت عمي احسن من الغريبه واربيها على ايدي وممستعد من وراج اضيع كولشي
أيه : اكوم اني
منير : انتي اكعدي ولتتحركين من مكانج وهسه ودق الحبابه تعوفنا وحدنا نسولف
ودق : لا باقي كاعده وين اروح وهاك اشرب
منير : يعني هيج ماكو احساس
ودق : بالضبط ماكو احساس
منير : عادي احجي كدامج قابل انتي غريبه اسمعيني ايوته اني مثل متعرفين تخرجت هاي السنه وجان عاجبني نتزوج بس ابويه حامد شرط تكملين السادس يله يعني هاي السنه والجايه شنو رأيج نتزوج وتكملين السادس يمي بيتج
أيه : وكفت على حيلي لا اكيد لا
منير : شبيج رجفتي مجرد اقتراح
ودق : واقتراحك مرفوض خلي تخلص السادس والله كريم وانت على شنو مستعجل
منير : غير اريد مرتي يمي شنو هيه بمكان واني مكان وفوكاها مااشوفها ومتقبل حتى تطلع ويايه
ودق : مكافي عليك بنات بغداد

منير : وانتي شعليج اذا مرتي نفسها متحجي انتي شكوو صدوك سمعت جاي عريس عليج والدنيا محتركه من وراج
ودق : واني شعليه الي حركها هو يطفيها
تقرب مني وجان يكولي تدرين اكدر افرها عليج واكولهم صاحبها وتطلع وياه
ودق :محد يصدكك
منير : يصدكون الف درب وشغله اسوي واخليهم يصدكون اما الحجيه جميله اصلاً متعبني ربع ساعه اكعد يمها اخليها تصدگ وتگلب الدنيا عليج
ودق : سافل وتسويها
منير : جوزي مني ولتدخلين بيني وبين ايه عوفيني اربي مرتي على ايدي واعلمها على اطباعي حتى لا اتعبها ولا اتعبني
ودق : لتهدد منير اني مااخاف منك ولا تهز مني شعره
منير : احلى شى ينهي عليج مازن ويبقيج لطولين سما ولا كاع ظلي هيج بايره محد يگلبج
أيه : منير كافي وياها عوفها
منير : واخيراً طلع صوتج مو مشكله الايام هوايه وهذا العطله كلها هنا ومكابلج وكاعده يحلوه اروح اني
خله وطلع من راحت روحك
أيه :شون بيه مااريد اشوفه بعد
ودق : انتي اخاف تنجبرين تشوفي البسي خلي يحجي وحده
أيه : هم يجي يوم واخلص منه
ودق : يااريت بس صعب واتمنى يصير شى ومتتزوجين
أيه : زين اني شون اروح لجنه هسه وهو هناك بالي كله يمها
ودق : شلج علاقه بيه غير بيت جدج انتي كبل اصعدي لجنه ومن تشوفي سلمي وامشي لتوكفين اصلاً
اني بالي كله يمها خطيه ترجف صار ٣ ايام ومازن مرجع واحنا نحجي وجان تدخل جنه العيون حمره دم والوجهه اصفر
شبيج يمعوده
جنه : ابويه مايرضى يرجع مازن گليلي شسوي گلبي طاگ عليه( ابجي واحجي)
ودق : من رخصتكم اصعد فوك
جنه : انه جايه عليج ودق اكعدي
ودق : اني خير تفضلي
جنه : بعد خيتچ انتي تحلين طلابتي
ودق : اذا اكدر من عيوني خير احجي
جنه : انه اريدن تطلبين من ابويه يرجع مازن
ودق : وليش مطلبين انتي
جنه : انه استحي منه وزحمه اگله اريدن رجلي
ودق : واني ليش ادخليني بالموضوع
جنه : عبن الشغله تخصچ والطلابه كلها صارت وياچ وابوي يحبچ اذا طلبتي هيچ مراح يردچ
ودق : اعذريني مااكدر ادخل
جنه : فدوه ودق انه تعبانه بلياه وگلبي يوجعني انه احبنه رغم گلشي وراضيه حتى لو يتزوجج
ودق : وكفت على حيلي ولج شيتزوج من كل عقلج اني من جان كدامي وشاب وممزوج رفضته اجي هسه وهو متزوج بنت عمي اقبل لو يصبوه ذهب مااقبل انسى هذا الشى وشيلي من عقلچ ومااريد بيوم اسمع كلمه من الي گلتيها
حطت ايدها على وجهه وتشهك وتبجي شكلها يبجي الكافر اووف كعدت كبالها وكتلها باوعي عليه وامسحي دموعج جنه مودااحجي وياج باوعي عليه
جنه : انه احبنه وهو محاس بيه عبن يحبج
ودق : اسمعيني زين انتي هسه زوجته واني بنت عمه وبس ورجاءاً مااريد اسمع منج كلمه. يحبج جنه انتي حلوه وحبابه وتحبي ومراعيه الله بيه بس هو محاس بالنعمه الي بين ايده وانتي السبب
جنه : مسحت دموعي انه
ودق : اي انتي دوم كاتله روحج عليه وتركضين وراه عبالك خدامه اله وشيكول اي وادلل
جنه : غير زلمتي
ودق : اني مدااحركج عليه هو صحيح زوجج الاحترام والاهتمام هذا واجبج وغصباً عليج بس مو كل ميغلط اكوله خلف الله عليك وين كرامتج تره الرجال ميحب المره بدون كرامه مالج علاقه من تشوفين المره تذبح روحها على زوجها وتنذل اله هذا غلط احترمه اقدره اقيم بواجبته بس بنفس الوقت هو هم مجبور يحترمني ويقدرني ويحترم مشاعري مازن مشايف العين الحمره منج ولا انتي تكدرين تصدي بس على الاقل حافظي على كرامتج من يأذيج اتخذي موقف اقلها يكون كلامج قليل متباوعين بوجهه حسسي بغلطه خلي يحس بلنعمه الي بين ايده كل ميغلط او يتجاهلج تركضين ركض وانتي تتوسلين بيه وبهاي تصرفاتج هيه الي وصلته لهنا سوه هذا الموضوع كله وتعارك ولا فكر لحظه بمشاعرج ونسى انتي زوجته ليش لان يدري بيج مابيج خير راح انتي تركضين تتعذرين اله وتتوسلين بيه يعني تخلي يتمادى عليج اكثر

جنه : انه غير احبنه
ودق : لج بابا اني مدااكولج لتحبيه حبي وموتي عليه بس خلي كرامه لنفسج حتى ميجرحج حتى ميكررها واحتمال بالجايات يسوي الاقوى الرجال لو مهما كان يحب المره القويه الصاحبه الشخصيه الي تحترم نفسها قبل متحترمه ومازن من هذا النوع الحب حلوو بس الكرامه احلى حافظي على كرامتج حتى تحافظين على مازن

واني حتى متنقهرين ولاتكولين ودق ردتني رايحه لعمو واكوله يرجعه بس انتي هم مو تركضين لحضنه وتعتذرين على شى مالج ذنب بيه والي يعتذر المفروض هو مو انتي لان هو داس على مشاعرج ومحترم وجودج بحياته

جنه : احاول
ودق : اني احجي لمصلحتج للمستقبل حتى تحافظين عليه ويله كومي غسلي وايوته وكليها شى مبينه مماكله عيونها منتهيه
جنه : مااشتهي
ودق : موبكيفج يله ايوو
أيه : يله جنه كومي گلبي تعالي ناكل سوه

ودق : صعدت لغرفتي بدلت ونزلت دكيت الباب على ماما
يمامه : هاا حبيبتي
ودق : ماما رايحه بذاك البيت مااتأخر
يمامه : ودق لو متروحين احسن هو الجو متوتر
ودق : مااتأخر يوم ليضل بالج
يمامه : لتتأخر واذا صار شى دكيلي
ودق : مااشي
طلعت اتمشى دخلت للبيت صارت بوجهي بشرى هلو بشرى
هله خيه
عمي وين
بشرى : بالديوان
ودق : شون خلي انتظره رحت لبيبي جميله مديت راسي شونج بيبي
الحجية جميله: هله يمعكربه چا زين تذكرتي عندج حبوبه
ودق : ليش مصار كم يوم مو اجيت سلمت عليچ
الحجية جميله: چا شنهي شوي ورحت تزوبلين وماشفت جهرتج
ودق : بستها من راسها وايدها شونج صحتج شونها
الحجية جميله: وجعانه
ودق : سلامتج الف سلامه شبيج
الحجية جميله: انه گلبي راح يطك من حميد وموزين
ودق : ليش عرفتي بالموضوع
الحجية جميله: چاشنهي انه اعرفن الهوا بهذا البيت وگله منچ ام شعفه
ودق : جان تجر كذلتي (مقدمه شعري) ااااخ بيبي انتي ليش سولتچ بشعري لخاطر ربج حصره احجي حجايه وجريتيني منها والله نص شعري تكطع من وراج
الحجية جميله: طبچ حريشي چا وتوبين گل طركاعه اطيح علينا من وراج ولا الاخره
ودق : واني شعليه ابن ابنج مخبل ويكمز وحده اتزوج ومتاب مني اني شنو
الحجية جميله: چا مثل امج البوه سودنت وليدي وانتي هسه سودنتي الوليد
ودق : والله انتم ظالمينا احنا شعلينا وهو مو تزوج يابيبي خلي يجوز مني كافي واني اصلاًرفضت الولد على شنو هذا الحجي الزايد
الحجية جميله: وتضلين بايره
ودق : بايره مصخمه المهم جوزو مني ياناس مااريد اتزوج
الحجية جميله: انه حجيت ويه حميد وهو صاكها صگ مايرضى يرد الوليد للدار وهاي جنه تطلك جدامي وتلوب عليه
ودق : اعرف خطيه شفتها واني اجيت احجي ويه عمو بلكت يرجعه
الحجية جميله: چا تكتلين الوادم وجاي تعزين بيهم
ودق : خرب بحظي اني شعليه يابيبي هو من وحده تخبل ولا اني وعدته بشى
وهاي فوك مترزلي اله شون ينهي عليه
الحجية جميله: انه لو منه انهي عليج واكسرن راسج واخذج غصب
ودق : هذا الكلام بعد ميفيدهو متزوج وخطيه جنه مالها ذنب فدوه بيبي ساعديني خلي نرجع مازن الها خطيه انقهرت عليها
الحجية جميله: أكلچ حبوبه ليش ماتكضين رويحتج وترضين تزوجين ونخلص
ودق : بيبي دخيل الله ودخيلج مااريد اتزوج اريد ابقى على گلبكم
الحجية جميله: چا وجعه بگلبج گون تلعبن لعب بنيات البومه
ودق : خلي اكوم احسن انتي مبينه شاده عليه
الحجية جميله: اگعدي لا احش رجولچ حش انه اريدن اسمع شتگلين لحميد
ودق : اوووف كعدنا ماكو وره نص ساعه دخل عمو لو باقي بعد ١٠ دقايق يمكن نتكافش اني وجميله من الروس

حامد : هاا بويه ودق محتاجه شى
ودق : اي عمو اريد احجي وياك
حامد : خير
ودق : علمود شغله مازن
حامد : لاتدخلين الشى بيني وبينه ومااريدن حچي زايد
ودق : عمو فدوه اكثر وحده متأذايه من هذا كله جنه خطيه روح شوف حالها بس تبجي مااكولك لخاطري لخاطر جنه وحيدتك
الحجية جميله: تسودنت البت وماتعرف تنام ولا تاگل متزوهره عبن زلمتها مو جارها
حامد : يايمه هو الماكعد راحه ويهوس ويتجاوز هذا مازن العاقل الدكتور هيچ حاله وچدامي
الحجية جميله: چا كيدهن عظيم ييمه زلم مشوربه اطيح يم رجولهن اسألني انه
ودق : ربج بيبي احجي الحق هو منو الي تحارش بمنو
الحجية جميله: بسچ لاتضيچين خلگي
ودق : اوف يابيبي المهم عمو فدوه رجعه للبيت ولتحجي ويااه المهم جنه خطيه ترجع لرجلها
حامد : هاي يراد اكضها وانگتها زين عبن رخصت نفسها ليه
الحجية جميله: چا يمه غير زلمتها وتحبه والبت مهضومه وتريده وحگها
ودق : دنحجي وجان تجي بشرى تركض كالت الكهوجي يصيح ويكول الدكتور مازن متعارك والدنيا مگلوبه وطفر عموو يركض واني وبيبي ظلينا على نار ننتظر وره ساعه طب مازن وراسه مفشوخ والدم تارس هدومه ترس وجهه عبالك طلقه مو فشخه اخترعنا

الحجية جميله: سوده بوجهي يمه شجرالك
مازن : ماكو شى جده لايضل بالج
الحجية جميله: چا وهذا الدم التارس طولك
مازن : عركه بسيطه وفضت
الحجية جميله: وحميد
مازن : يتفاهم ويه الناس
ودق : واكفه گباله ويحاول يسد الفشخه والدم ينفض نفض رحت للمطبخ للصيدليه الي هو مسويها مال الادويه علمود الحالات الطارئه اخذت شاش ومعقم وكطن ورجعت للغرفه واسمعه يسولف لبيبي وكعدت اسمع وبيدي الغراض واكفه وراه
مازن : والله ياجده جنت اعاين رجال جبير مرضيت اشلع سنه لان بيه سكر موزين عليه الا اسوي اشعه واقيس سكره خطر ميصير قسته لكيته كولش صاعد ميصير اشلعه ودافهمهم شو ذوله ولده اثنين كبو عليه اشلع السن بدون لغوه يابه اسمعو وافتهمو ماكو كلمه مني وكلمه منهم والولد ضخام وطوال ومااشوف خير واحد منهم يشيل هاي المغسله الصغيره غير مصبوبه بلكاع ولد الگلب والله قوه شلعها من الاعصاب واركعها براسي اني انتهيت اريد اندل دربي من الدم مكدرت مشفت روحي غير شايل مشرط من هاي الادوات الحاده الي بصفي وجرحته بجتفه شكيته من الطول للطول ودمه يجري غرك الدنيا والناس التمت وذاك الثاني يريد يهد عليه تخبل من شاف اخوه ينزف اني كوه واكف كلت اذا جيت راح يموتني لان مااكدر ادافع دايخ من الضربه ومااحس غير أبويه فوك راسي ولزم الولد من ايده ورجعهم ليوره حصره حصره خلاه دجاجه لا ايد ولا رجل وضربه گله براسه دموخه وهو لابس محبسه هذا الجبير وحيل على خشم ذاك خلاه يكعد بمكانه
الحجية جميله: يمه وليدي سبع ابن راضي
مازن : الاب خطيه ساكت رجال جبير تعبان كوه واكف وهذا الي ينزف هو شاف اخوه انجطل بلكاع هد على أبويه بلمكص جرح ايده بس ابويه تقاوه ويااه واخذ المكص من ايده وضربه بقوه بزره بلمكص نفسه خلاه مثل الطفل يكمز ومنشوف غير اخوهم الجبير وعمامهم ٣ فوك راسنا همه شافو الشيخ حامد لو تخبلو ضلو يبوسون بيه ويتعذرون حارو شون يطيبون خاطره وخاطري حتى همه المجروحين اعتذرو هو مقبل ابقى يمه ودزني للبيت بس الناس كلها شهدت همه الي تعدو عليه وحتى جبيرهم غلط عليهم لان تجاوزو على ابويه
الحجية جميله: يبعد بيتي يحميد چاهيه وليه مالك ظهر ييمه شفت ابوك شون يحبك ويخاف عليك وانت مسودن
ودق : وكفت كباله وخرت الوصله الي حاطها على راسه
مازن : وخري اني اعقم الجرح
ودق : مو وكت عناد اخذت شاش وكطن ولفيتهم وبديت امسح الدم من وجهه ومن الجرح لحد مبين فتحه شكبرها اباوع عليه هادئ جوه ايدي
ودق : مازن تره الجرح يرادله خياط
مازن : هسه ابدل واروح لصديقي اخلي يخيطه ليه
الحجية جميله: وهاي المسودنه موش دغتوره ماتخيطه ليك يمه
مازن : متعرف بيبي وانتي شسوين هنا
الحجية جميله: اجت توسل بأبوك يردك للدار
مازن : احد طلب منج تتدخلين
ودق : مو لخاطرك لخاطر جنه
مازن : وجنه شبيها
ودق : انت بعدين تعرف شبيها وبعدني امسح بلدم جان يلزم ايدي حيل وبگل اعصابه حتى نسى بيبي هنا
مازن : اسمعيني زين زواج ماكو لعبالج سكتت لو غيرت رأي اي واحد يتقدملج انهي عليج
ودق : عوف ايدي لو انت حلتلك شغله الضرب لعبالك سكتت ذيج المره هلمره مااسكت عوفني
مازن : حطيها ترچيه بأذنج انتي مو گلتي مااتزوج اله اخليج طول عمرج متتزوجين
ودق : انت اكبر اناني شفته بحياتي انت مو تزوجت شتريد مني
مازن : كولشي مااريد بس زواج ماكو
وتقرب عليه حيل شويه ويطخني جان يگولي تحلمين اخلي رجال ثاني يلمسج غيري
ودق : عوف ايدي وكافي تره لعبتها لنفسي ومالك حق بكولشي تكوله لتنسى روحك انت رجال متزوج عيب اصحى على نفسك مازن لتنسى روحك
مازن : هذا الي عندي ويله ولي مااريد اشوف وجهج ولتدخلين بيني وبين ابويه
ودق : اني الي مااريد اشوف وجهك وعساك تحترك ولا اليه علاقه بيك وجان يجر شعري حيل وسحبني عليه
الحجية جميله: يمه لاتكضها هيچ تسودنت لايجي حميد يجسرگ تجسر (يكسرك تكسر)
مازن : لسانج كصي لا اكصه الج ومنا وهيج تتحجبين ربطه ماكو
ودق : هلوو مو هو بكيفك
مازن : اي بكيفي اني صوجي انطيتج عين وماحكمتج من البدايه
ودق : انت شجاك تخبلت مجنت هيج
مازن : منا وهيج هذا حالي انتي مو من تجين هنا بس لابسه حجاب وهناك نازعته بعد ماكو واذا شفتج ملابسه ربطه وروح ابويه مااخليج اداومين
ودق : عوف شعري ولكم ملختوه انت وبيبيتك ومو من حقك تبطلني
مازن : جربي وشوفي خلي اشوفج تفترين بدون ربطه وشعرج مفتوح وحق الله اكصه الج واخليج بحصرته
ودق : اباوع عليه يرجف ويحجي ونار صاير ومنا كله دم صدوك شكله مرعب كتله حتى بس افلت منه ماشي البس ربطه بس عوفني حباب احس فروه راسي راح تجي بأيدك وجان يدفعني حيل وشعري تكطع بين اصابيعه احس روحي شاغت
مازن : يله ولي وصوتج مااريد اسمعه ولتدخلين بعد بشى ميخصج اطلعي ولي لبيتكم
ودق : وطلعت اركض ودمعتي بعيني من الله ياخذك كون وطبيت شافتني جنه محجيت شى وصعدت لغرفتي

الي عرفته من أيه مازن رجع للبيت بس عمو ميحجي ويااه بس رجعه
يمامه : دخل عليه حامد وايده ملفوفه تخبلت هاي شنوو
حامد : على كيفچ ويه نفسچ لايضل بالج جرح بسيط
يمامه : كمت ارجف وسحبت اللفاف وشفت ايده مخيطه تخوف وكعدت ابجي
حامد :كله ولا دموعچ تعرفيني اضيعن بيها
يمامه : منو هيج مأذيك
حامد : عركه بسيطه
يمامه : وكعد يحجيلي كولشي بله لو صاير بيك شى مفكرت بيه
حامد : بويه لاتخافين چا چدامچ زلمه لو موش زلمه
يمامه : على راسي بس اخاف عليك تعال خلي اضمدها كعدت مقابيله وامسح بأيده اوخر الدم اليابس الي عليها على كيفي رفعت عيوني شفت صافن عليه
يمامه : بيك شى كعد تأذيك
حامد : تذكرت من انجرحت گبل چم سنه بدايه زواجنا وتداويها ليه وارجف بكل گضه منچ چانت عيونج قاسيه وماتحس بيه وهسه اشوفن نفس العيون بس گلها دموع ليه وخوف وحب
يمامه : شذكرك حبيبي
حامد : انه گلشي عشته وياچ ماانساه هذا عمري يطيرتي
يمامه : وهسه مترجف من المسك
حامد : انه لهذا يومي ومن تكضيني ترجف گل اعضاي واحسن روحي مدولبه بيچ وتدوهن عليچ
يمامه : وجان يدنج يبوس رگبتي بكل هدوء افييييش ياريحه الجنه
ابتسمت وبست ايده والله انت الجنه نفسها
حامد : اگلج چاهاي عيونج ليش هيچ حلوات ولونهن يلعب برويحتي لعب
يمامه : ههههههه والله ياحامد انت تتغزل بأوقات عجيبه ولو صار ايام هادئ وغزلك ماكو
حامد : هاااا بس غزلي
يمامه : ههههههه اكعد راحه انت تعبان واكيد هسه ضغطك صاعد
حامد : چا انتي حبايه الضغط مالتي حضنچ يگفخ ابو الضغط تعالي ليه وقيسي وبعدها ردي بحضني واشمنچ وردي قيسي راح تشوفين الضغط انسمط جد جده
يمامه : ههههههه اووف شكد مشتاقه لضحكتك صار ايام محرومه منها
حامد : تحمليني انه تعبان وانتي راحتي
يمامه : متحملتك ياروح يمامه المهم انتبه لصحتك تره بدونك اتعب واتيه متعرف شكد اخاف عليك
حامد : اشتعل جدك يعبيس وتگلي ضغطك عبن هاي الشفايف العسل تصعد السگر موو بس تسمط الضغط
يمامه : هههههههه يله گلبي خلي اروح احضرلك الاكل حتى تاكل وترتاح
حامد : وتردين بحضني
يمامه : وين اروح غير هو بيتي حضنك بيتي
حامد : چا اليوم ادخلي برجلج اليمنه بيتج مشعول شعل عليج
يمامه : هههههههه من عيووني

ودق : مر اسبوع والوضع هادئ جداً عمو حامد على وضعه ميحجي ويه مازن الي عرفته جنه هم تحجي ويه مازن على كد السؤال والجواب كعدنا الصبح ساعه ٧ نمنا من وكت وكعدنا شبعانات نوم تريكنا اني وايوته
وكاعدين نسولف وكالت أيه
أيه : اني راح اطلع اتمشى
ودق : وين يمعوده
أيه : مخنوكه
ودق : خلي اجي وياج اني هم صار ايام مطالعه
أيه : خلي اجيب الربطه اجيبلج ويايه موو
ودق : هذا مازن الخبل اخاف منه جيبيلي امري لله
طلعنا نتمشى ونسولف شبيج مخنوكه
أيه : مااعرف تعبانه واحس گلبي يوجعني
ودق : شنوو رأيج نروح للشط هسه هناك الجو يخبل وبعد الجو بيه بروده من تصير بالعشره تحتر حيل
أيه : اي يله صار شكد مرايحه واحنا نمشي ونسولف احس گلبي دكاته ترجف شبيك ياگلب ترجف شجاك وصلنا للشط جمدت اباوع ممصدكه الوجه ضعفاف واللحيه ماكو بس شوارب وبيده جگاره ويجر النفس قوي ويه كل جره نفس يجر روحي ويااه
وصافن على المي همست وصوتي يرجف احس رجلي متشيلني
شلونك ابراهيم
يتبع .....
من ابراهيم لأيه

[ينبغي أن يكون هناك GIF أو فيديو هنا. قم بتحديث التطبيق الآن لتشاهد المحتوى.]