رواية سجينة الروح الفصل السابع وثلاثون 37 - بقلم ريام هادي

سجينة الروح
للكاتبة Reem
البارت السادس والثلاثون

وكت الخير عشتة
وما شفت بي خير
صاحولي ملك
بس ما شفت عرشي
عندي عيون
بس محسوب عل عميان
انة امفتح ولكن
ما شفت كلشي
احلم بالفرج
واترس الضلمة حجار
ضل هواي ليش
نكول ماضل شي
شيمشي العمر
من اوصل الخمسين؟
انة بعشريني
واكف عمري ما يمشي

شلونك ابراهيم اندار عليه وفتح عيونه مصدوم يمكن اخر شخص يتوقع يشوفه بهذا الوقت هو اني شمر الجكاره واجه بلهفه بأتجاهي
ابراهيم : ايوته شونج
أيه : شوني بعد معرفت الي سويته والتطوع مالتك
ابراهيم : عوفج من هذا الموضوع طمنيني عليچ
ودق : شونك ابراهيم  الْحٍمَدٍ للـّہ على سلامتك
ابراهيم : إٱللـِْﷻـِْﮭﮧ يسلمج  ودق انتي شونج
ودق :  الْحٍمَدٍ للـّہ اني واكفه هنا قريب لتتأخرين ايوو وعفتهم ومشيت ردت يحجون وحدهم لان عيونهم كلها حب على لهفه على دموع وگأن واحد يحضن الثاني بعيونه بقيت قريبه اشوفهم بس مااسمعهم

أيه : ليش هيج سويت بيه
ابراهيم : انه سويت لو الدنيا الطيحت حظي وجعتلي گلبي وشردت لأخر الدنيا وطيفچ وياي
أيه : ارجع اترجاك وعوف كولشي
ابراهيم : صعب بعد مااكدر اعوف جماعتي
أيه : بس تكدر تعوفني تكدر تعوف امك بين الحياه والموت
ابراهيم : امي هيه الي جابتها لروحها
أيه : مكافي تعاقبها وتعاقبني وياها
ابراهيم : معاقبت احد انه عاقبت نفسي لان مكدرت احويج وضعتي مني تمنيت يجيبوني شهيد بس ربج كاتبلي عمر
أيه : كمت ابجي احس نار بگلبي ودنجت وكعدت بالكاع
ابراهيم : لتبجين كل دمعه منج تزرف گلبي لتزيديها عليه تره البيه كافيني الله يعلم شون ايامي كعد تخلص واني بعيد عنج وعن اهلي
أيه :حباب ارجع تره داموت والقلق ماكل روحي والله مالي ذنب بلي صار وكولشي مابيدي وتعبت من التفكير والقلق والنوم ودمعتي بعيوني واني افكر اكلت شربت نمت صار بيك شى ابراهيم حس بيه تره مدااتحمل فراكك صار عصبي وصوته عالي ويرجف ويحجي

ابراهيم : ليش انه الي اتحمل انه گليلي انهزمت لاخر الدنيا وبنص الموت گفيلج الله بنص الموت وتفترين داير مدايري وصلت مرحله احجي ويه رب العالمين اكله حتى الموت عزيته عليه انه مارايد شى بس استشهد
أيه : ليش هيج تسوي مفكرت بيه مگلت اذا تموت هاي شيصير بيها
ابراهيم : تبجين يوم يومين وراها تعيشين حياتج الحياه متوكف على واحد
أيه : لعد ليش حياتك وكفتها عليه ليش معشت ورايه واتزوجت وسويت بيت وعائله
ابراهيم : انه اختلف
أيه : بشنو تختلف بس انت تحب واني لا بس انت تأذيت واني لا عبالك حياتي ماشيه سعيده وممهتمه عبالك احظر لعرسي وناسيتك لهاي الدرجه تتوقع مني الخيانه صح اني هسه على ذمه رجال ثاني وحرام عليه افكر بيك او حتى احس بيك بس موبيدي يشهد الله عليه مرات ادعي اطلع من گلبك حتى ترجع لحياتك بس منسيتك لحظه
ابراهيم : وليش متدعين اطلع من گلبج
أيه : لان انت گلبي شون اطلعك منه وانت كله اذا دعيت اطلعك معناها اموت ابراهيم اني لأخر لحظه عندي ايمان برب العالمين بأن راح يبدل قدري بزين بشين مااعرف بس حاسه راح يتبدل بس كولشي مستعده اتحمل بس مااتحمل يصير بيك شى اشوفك سعيد وعايش وتشتم الهوا تسوه الدنيا عندي حتى لو ويه غيري المهم عايش

ابراهيم : بس انه مو مثلج انه مااريدج تعيشين سعيده ويه غيري انه مااريد غيري يلمسج ويشمج وينام على ريحتج انه مااريد اشوف طولج ممدود بصفه انه هسه من شفتج لو بيدي ولو مااخاف الله اله احرك روحي الله يقبلها اشوفج تكبرين وتحلوين لغيري كضيت عمري كله عيني عليج واتمناج لحظه لحظه تالي ياخذوج مني لو حاسبج حبيبتي بس جان هانت اني حاسبج بتي وحبيبتي ورويحتي وام بيتي وقبل ذوله كلهم حاسبج الهوا الي اشتمه شون تريدين اعيش بليه هوا شفت شون منير يفتر عليج ويكدر يلزمج واني الي عمري كله فديته الج مالي حق حتى ارد عليه واكوله لطخها يعني تتوقعين اتحمل اشوفج تنزفين اله تتوقعين اتحمل تمر الليله الاولى وانتي بحضنه ويصبح بعيونج لو حجر هم جان نطق بس افكر شون يجي هذا اليوم احس واحد ولازمني من رگبتي ويخنكني حيل ويوميه بلصلاه اكوله ربي اخذ امانتك گبل هذا اليوم
أيه : ابجي واشهك كافي عفيه كافي
ابراهيم : شنو كافي النار الي بصدري الي يوميه تزيد لو كافي اختنك بشهكت دموعي يوميه الفجر لو كافي من ادور عليج بعز البرد واريد ادفه بشوفه عيونج واتذكر هاي العيون راح تشوف غيري وتصير اله انتي شكد متحسين بتعب وأذيه ربع الي بگلبي موصلتيله

أيه : وشنو بيدي اسوي كول اليه
ابراهيم : ادعيلي ماارجع ادعيلي ارتاح تعبت تدرين كم مره الامر يأمرني انزل اجازه واني مااقبل وابقى اخذ مكانات اصدقائي يكلي بابا انت ماعندك اهل ممشتاق الهم اكله خليني هنا احسن بس الگلب يكول طگ نبضي وشرياني على رويحتي حس وروح شوفها ومن احظر نفسي اريد اجي اشوفج وكلي لهفه اتذكر انتي مو حلالي وحرام حتى عليه افكر بيج وارجع افتح الجنط واكعد واسكت واكول هذا هو سلم امرك لله ومن يجي الليل اااااااااااااه ياليل العاشگ ومحبوبك مو يمگ شكد طويل وكل دقيقه بيه مثل الابر تدخل بكل مسامه بالجسم وتبقى تحفر تحفر لحد ميطلع الفجر وانه انزف عذاب وحب واشتياق وفوك كل هذا مااكدر اسوي حل ولازم ابقى اتفرج عليج وانتي تنزفين اليه  تدرين من اطلع ويه جماعتي استطلاع لمنطقه نمشطها اخاف بيها ارهاب شى وره منكعد ونستقر اضل الليل كله انوح عليج واغني گل جماعتي تعرف بيه متلوع ويلجموني بيچ تدرين شيكولون اليه حتى اغنيلهم ويسمعون صوتي حتى الوكت يكضي
يكولولي رويحتك كبالك شتكللها وابقى اغني واتخيلج كبالي بضحكتج بدمعتج بنومتج بطولج بشعرج بريحتج  وگلبي ينزف ويه كل كلمه تنكال

أيه : زاد البجي مالتي شأكول اله احس العذاب والي كعد نحس بيه حتى مكعد يترجم بالكلام
ابراهيم : كافي لخاطر ربج ارحميني لتبجين وكومي ارجعي من الله ياخذني ولا اشوفج هيج تشهكين
أيه : اسم الله يومي گبل يومك
ابراهيم : كومي ايوته وارجعي للبيت
أيه : مسحت دموعي وكتله انت شوكت اجيت وليش مرحت للبيت
ابراهيم : انه من البارحه نزلت وكعدت بلبيت الي بستان ابويه حامد اجيت علمود زواج بشرى خابرني ابن عمي مستعجل على الزواج وابويه حامد كال لازم احظر اجيت ازوجها واولي
أيه : وليش متروح لبيت جدو
ابراهيم : هناك اريح مااريد افتح نقاشات وكلام بيوم الخطبه احظر وثاني يوم شرطت عليهم كولشي بنفس الاسبوع حتى ماابقى هوايه وارجع لدوامي
أيه : شون اقنعك متروح
ابراهيم : ميفيد الحجي بعد
أيه : وامك شون بيها
ابراهيم : الها الله مايترك عبده روحي ليجي احد وحاولي مطلعين هيج وكت حتى لو ودق وياج اخاف عليج لتوجعين گلبي وتقلقيني مكافي النهار والليل كله افكر بيج هلمره اقلق على سلامتج
أيه : مطالعه بعيد جنت مختنكه ومااعرف السبب وهسه عرفت گلبي جابني غصب عني الك
ابراهيم : اروح فدوه لكلبچ اوووووووف ربي ارحم بحالي تره والله الحيل انتهى
ودق ودق تعالي
ودق : هااا ابراهيم
ابراهيم : اخذي اختج وارجعوا ولطلعون هيج وكت بعد وحدكم
ودق : مااشي يله ايوو
أيه : واكفه صافنه عليه وعيونه مدمعه واني اصلاً دموعي مبطلت تنزل حتى واني اسولف تنزل دموعي خايفه بعد مااشوفه خليني واكفه يمك
ابراهيم : روحي أيه تره اذا ضليتي يمكن اتسودن وانهبچ خلي هلكم يوم تعدي على خير يبت گلبي واولي عساي لا رديت
ودق : اسم الله كول ياالله امشي ايوته ليجي احد ويشوفنا
أيه : مااريد اروح
ودق : امشي حبيبتي وكافي كعد تشوفين ابراهيم تعبان خلي يرتاح
أيه : ماشي دنجت وگلبي يوجعني من القهر وانداريت ومشيت وجان يكولي يرويحتي
انداريت عليه وعيووني تصب دموع

ابراهيم : وحق الي خلق السما ورفعها بلا عمدان وحق من خضر الكاع ويبسها وحق من نفخ بينا الروح اعشگج لحد كطع النفس وروحي هاي الج وحدج واذا اخذها ربج هم تجي وتفتر يمچ ديري بالج على نفسج تره انه عايش لليوم لان اكوم واگعد واصيحن بأسمج
أيه : اذا تحبني هيج ارجع ولتأذيني بيك اذا صار بيك شى متطلع جنازه وحده من بيت حجي راضي تطلع اثنين حطها بالك وعفته ومشيت

ودق : كمت ابجي على حالهم عساها بحضكم وبختكم يامنير ابن فخريه ويافضيله بت جميله من كسرتوهم هيچ كسره بله شنو ذنبهم لزمت ايه من ايدها وامشي بيها وهيه بس تبجي وتشهك وصلنا قريب البيت امسحي دموعج يمعوده لتشوفج ماما شيخلصج منها
أيه : راح اصعد بغرفتي واذا سألتج عليه كوليلها نايمه
ودق : روحي حبيبتي اووف شراح يخلصها

مر يومين وماكو شى جديد نفس الروتين القاتل واليوم خطوبه بشرى وكطع المهر مالتها وباجر هيه حنه وهيه زفه سريع سريع حتى يرجع ابراهيم يلتحق مردنا نروح ونحظر بس ماما مقبلت كالت عيب بنت عمتكم وزحمه صعدت لأيوته لكيتها تبدل ولج هاي شطالعه تخبلين راح تكسرين العروس
أيه : يمعوده شطالعه نفس الجهره
ودق : امشي لج تخبلين طالعه جانت لابسه بنطرون وستره لونهم اسود وقميص اسود وبيه نقاط بيض وربطه عنق ملابس رسميه اول مره اشوفها هيج كبرت وصارت شابه تجنن وهيه حلوه والضعف زادها جمال وشعرها شايلته بطريقة نازكه ومنزله كم شعره على وجهه هااي شنو الربطه راح تخرب كولشي وانتي لابسه ربطة عنق راح تختفي
أيه : لا بس هيج احطها على راسي ومن اوصل هناك اذبها لان الصاله بس بنات اخاف واحد من الولد يدخل
اكولج شنو اثنينا تقريباً نفس الملابس انتي هم بنطرون وستره بس الالوان تختلف
ودق : ههههه طالعين تشريفات نوكف بلباب ونستقبل الضيوف بله اني ومتعلمه البس رسمي انتي شجاج
أيه : بعرس مازن عجبني اللبس مالتج وطلبت من ماما تشتريلي مثله ولكيت هذا السيت وحبيته
ودق : طالعه راقيه وتخبلين هسه ياكلوج اكل اقري المعوذات
أيه : قابل شيصير اكثر من الي صار
ودق : ان شاء الله ماكو شى يله امشي تأخرنا

طلعنا وصلنا البيت دخلنا سلمنا على الكل اله فضيله مردنا نحتك بيها لحد هاي اللحظه محمله مسؤوليه كل الي صار والتحاق ابراهيم براس ايه وهيه صايره نبي ولا كأن سوت شى
اباوع على أيه كاعده والرجل تتحرك بقلق وتوتر وممرتاحه كعدت بصفها ولزمت ايدها شبيج ايوته
أيه : مادري خايفه اشوف منير وابراهيم هنا
ودق : وين تشوفي اكعدي يمي ولتتحركين مراح تشوفي قرو الفاتحه والكل يهلهل ويركص كالو العريس راح يدخل منشوف غير ابراهيم يدخل ويااه ومنير ومازن وحسان ولد عم عموو حامد ٤ شباب وكفنا نشوف دخلتهم جانت حلوه وفضيله عاطت وممصدكه الي طب عليها ابراهيم وحضنته وتبجي وتبوس بيه بكل لهفه خلت الكل يدمع على حالها كل اعتقادها الي قرا الفاتحه عمو حامد لان لحد مكمل كولشي ابراهيم مبين وحتى احنا مكلنا لأحد حتى ماما علمود محد يعرف شفناه

فضيلة : يمه وليدي شمعه بيتي
ابراهيم : شونج يمه (باس راسها)
فضيلة : ميته يمه وحييتني بدخلتك عليه
ابراهيم : الله ينطيج طوله العمر والصحه
فضيلة : ياصحه يمه وانت خذيتها ورحت وانه اتكطع عليك هيج گلبك حچر عليه لك انه امك وماتحن عليه چاهيج يبراهيم ماتعرف غلاتك عندي انت طالع من لبه گلبي هيج ادير وجهك وماتسأل عني چا الربه والتعب وين راح
ابراهيم : مو وكته الحجي هاذ الناس فرحانه وعرس بشرى لا تكدريهم شوفي بشرى شون تبجي
بشرى : خويه الحمدلله على سلامتك هسه فرحت بدخلتك سالم علينا انه گلت ماتحظر
ابراهيم : شنهي مااحظر نسيتي انه ابوج واخوج وانه اكطع حقچ لا تخافين موجود وازفچ بيدي لرجلج اكعدي وارتاحي وافرحي

أيه : اباوع عليه اوف اروحلك فدوه طالع يخبل لابس دشداشه اوف وايت (لون كريمي) وشماخ جوزي وكريمي مسوي مثل كل مره مثل الزي الخليجي ومزين وشواربه طولانه ولحيه ماكو وعطره اووف ياعطرك كل البنات يباوعون عليه لان حيل متغير وصاير شكله حيل رجولي وهو طويل حتى عبالك بيه شبه من عمو حامد بنات عمة بابا ٣ بنات اكلو بعيونهم وانه نار وارجف وكلها كوم وزهره بت عمه كوم ثاني مترمش تريد تاكله ومااحس اله الغثيث منير بصفي

منير : اني يوميه انصدم بجمالج شنو هذا الحسن شبيج لعد من اجيج للبيت اطلعيلي جنج واحد صاحبي حتى شعرج متمشطي وساحليج سحول تكول رايحه للاعدام مو لرجلها
أيه : وهسه شتريد
منير : اريد امتع نظري بحلالي يبوو عليك منير كل هاي البقلاوه اليه
وجان يتقرب ويشاورني خفت ليشوفني ابراهيم معودت شفت الضحكه بشفته وجان يهمس بأذني رغم الكل يركص وملتهي وهلاهل ومستحيل احد يسمع وخاصه ابراهيم بس اني ارجف وكأن ابراهيم بصفي ويسمع كولشي وجان يكول
منير : تدرين بليله عرسنا اكلج اكل ماابقي قطعه بجسمج ماامصها
أيه : متت بدمي وابتعدت ودمعتي اله شويه تنزل جان يلزمني من ايدي وهو يضحك بخبث بس ثواني وعيونه كامت اطك شرار لان لزم اصبعي وتلمسه ماكو حلقه

منير : وين حلقتج
أيه : اختنك منها ماالبسها
جان يعصر اصبعي حيل ويلوي حسيت عظام اصبعي بدت تتكسر جوه ايده واني مااكدر لا اعيط ولا اسوي اي شى بس كاتمه المي بحيث وجهي دم صار من الالم استحي اعيط الناس واكفه
منير : سمعي لج مره ثانيه اذا شفت اصبعج مابيه حلقه اكصه الج هلمره عوجته الج مره ثانيه ابتره
أيه : زاد الالم باوعت عليه ودق جانت ملتهيه تباوع على العرسان شافت عيوني وكأنها تعيط وتكول الحكيلي انتبهت على ايده وجان اتجر ايدي حيل منه
سحبت ايدي وبديت افرگ بأصبعي ماكو شويه وابجي
ودق : من انكسرت ايدك لك انت شوكت تعقل
منير : وانتي شوكت تبطلين تدخلين
ودق : شوو خلي اشوف اصبعج عزه الي عزاك كون كسر بگلبك بله لو صاير شى بأيدها
منير : حتى اتوب وتلبس الحلقه شنو مو بعينها مو مخطوبه شنو معناها ملابستها
ودق : تختنك منها وبكيفها حتى بهاي تدخل
منير :اني كتلج اذا مشفت الحلقه بأيدج اكسرلج اصبع اصبع واخليج سگط طول عمرج
أيه : لزمت ودق مردتها ترد عليه اخاف احد ينتبه وتصير حچايه وخاصه هواي بنات هنا وراح يتشمتون والحمدلله ابراهيم ملتهي بلهوسه بقى واكف وعيونه اطگ شرار ومااكدر اوخر منه صايره هوسه وين اطلع بقيت وارجف وافرك بأصبع الي صار دم من وره حركته

دخلت بيبي جميله تهلهل ولبست بشرى ذهب هديه بابا حامد لان مكدر يعوف العالم لبستها كلاده جبيره سبيكه على شكل قران واثنين ملاوي وهديه بيبي محبس وسوار جبير خطيه جانت بشرى فرحانه وطايره اول مره هيج اشوفها
الحجية جميله: مهنايه يمه
بشرى : يبعد روحي جده
وجان ابراهيم فتح علبه لبسها ٦ سوارات ذهب وزنجيل طويل بيه ايه الكرسي ثگيل وباست ايده بيومها اهلنا رفعوا راسها كدام عيالها وجان تنط فضيله
فضيلة : يمه برهومي يوم الك وازفك بأيدي وافرح بيك ونذر عليه صينيه الحنه على راسي منا لبيت عروستك ولو مابگى شى ونفرح بيك

أيه : گلبي انعصر فوك الي صار ويه منير وهسه كملتها فضيله اباوع على زهره ضحكت ودنجت وگان الكلام وياها لان فضيله تحجي وتأشر على زهره حتى الميفتهم افتهم تقصد زهره
ااااااه يانار گلبي لو بيدي اعيط بنص الناس واكولهم ارحموني كافي داموت بس گلب المحب دليله والعيطه والحصره الباقيه بگلبي والي مكدرت انطقها عبالك  سمعها ابراهيم جان يندار شون اندل مكان وكفتي مااعرف رغم كل هاي الهوسه وصرنا عين بعين وجان يكول بعلو صوته وفوكاها يمكن اكو اكثر من ٥٠ بين مره وبنيه بس كلهم گرايب بت العم وابن الخال يعني ماكو غريب وبعلو صوته جان يكول
ابراهيم : البگلب بلگلب ياام ابراهيم ومايسكن الگلب غيرهواه وتحرم مره تنام بحضني غير بت گلبي ولو تنام بحضني ويرتاح واتهنى بيها لو انام بحضن الگبر

أيه : هنا الدمعه اعتذرت مني وكالت مااكدر ابقى بعد بعيونج ونزلت بس جمر من الگلب للخد وكلها صاحت اسم الله واني بگلبي اكول يومي گبل يومك كون
لزمت ايدي ودق ونبهتني على حالتي لان نسيت نفسي ونسيت العله الي بصفي نزلت وجهي ومسحت دمعتي على كيفي بس منير انتبه
منير : شكوو بجيتي
أيه : شكول اله بله هاااا من وراك اتأذه اصبعي
منير : قابل شكوو كسرته امسحي عيونج لتفضحينا وانجبي واسكتي حيل بيج حتى اتوبين
أيه : لتخاف مسحتهم رفعت عيني وشفت ابراهيم يباوع على منير يريد يكطعه لان قريب مني ويحجي بأذني عباله يتغزل لو شوف شنوو ميدري ديرزلني
فضيلة : يمه هذا حچي شنهي گبر الي ياخد عدوينگ والي بالي واخلصن
ابراهيم : بسچ يمه
الحجية جميله: بسچ يمعزايه لاالوادم تسمعچ وانت يمه اخذ الوليدات واطلعو كافي البنيات يردن ياخذن راحتهن چلبتو
ابراهيم : تامرين جده
يله يولد نطلع
يله منير امشي
منير : هااي شنو غير واكف يم مرتي
ابراهيم : امشينا منير
أيه : اذا بقى منير بعد ثانيه وحده يمكن العرس ينگلب عزه
مازن : يله يمعود امشي نطلع عفنا ابويه وحده
ودق : يباوع عليه طول ماهو واكف ولا حسب حساب جنه وخطيه واكفه بصفه وتباوع عليه وعليه ومتوتره حقها ماالومها واني ولا باوعت بس مره اخاف النسوان ينتبهن وهنه ماشاء الله يموتن على القشبه بس يردن موضوع يلغن بيه
من ديطلع ابراهيم باوع عليه بكل حنيه عيونه تحجي ويايه اااخ ياگلبي شتتحمل بعد

طلعو الولد والبنات استلمو الصاله دك ركص تكول مصروعات وجوعانات ركص طول الحفله واني بوادي ودق بوادي وجنه بوادي الي يشوفنه يكول اسعد البنات بلعافيه عليهن بس ميعرفن احنا شون عايشين وشنو حالنا ماما بيومها مثل كل حفله حديث الكل مرت الشيخ وام الوليد طالعه تخبل لابسه فستان مثل الصايه نيلي وذهبي طويل وهي بيضه طالعه تشع ومكياج فاتح بس الحمره طوخ  بارز جمالها وحذاء كعب عالي وتمشي مثل الشيخات بس هلمره عمه احلام وماما واكفات سوه ويضحكن والكل تباوع شون ام المشاكل والطلايب حلومه هيج تحب ضرتها واما همسه متفاركها لعمه تكول هيه امها وماما متحب تجرحها وحتى وصلت مرحله همسه تصيحلها ماما احلام وماما معترضت وكالت الها كلهن بناتج وحتى علي ابنج جانت اغرب علاقه بين ماما واحلام ضراير بس حبايب شون مااعرف والكل مستغرب بس عمه خطيه تمشي وتصلي على محمد اتخاف من العين رغم يوميه عمه مسويه مشكله ويه وحده اله ويه ماما ابد محاولت بيوم تسوي مشاكل وحتى من يروح بابا حامد يمها تكوله تعبانه روح لطيرتك حتى هيه كامت تسمي ماما طيره مثل بابا حامد وهو جان دوم يتحمل خبالاتها ومشاكلها وحتى من يصير شى ابد ميفشلها كدام ماما صح يرزلها ويلعب بيها طوبه لان يوميه كابه عركه بسببها بس ميحرجها كدامنا وهذا احلى شى جان بابا من يحب يرزل وحده من نسوانه مو كدام الكل وخاصه الفتره الاخيره

يمامه : جنا نضحك اني واحلام متكعد راحه كل شويه تحجيلي عن وحده وتأشرلي على الكاعدات وتنطيني تاريخها كله تموتني ضحك وجان يجي ابن حسان يكول اخوج بره واني طفرت ركض هم خوف كلت خاف صار شى على امي وهم اشتياق لاخويه اخذت الحجاب ومديت راسي واشوف نصار اخويه وابن عمي خالد هلو حبيبي نصوري وحضنته وبسته شونك خالد
الحمدلله ام علي شونج
يمامه : بخير صار شى نصار طمني ماما بيها شى
نصار : يعني ميصير ازور اختي
يمامه : صار شكد مجاي والله هبطت
نصار : جانت عدنا شغله بلعماره مال ولد صاحبنا وتاخرنا كلنا نمر عليج هم نشوفج وهم نبات يمج اذا مابيها احراج لان دااشوف الوضع مگلوب وعدكم عرس
يمامه : عين غطا وعين فراش صدوك كذب بيتكم
خالد : تسلم عينج يلغاليه
يمامه : ومااشوف غير حامد فوكانه وهو لابس الدشداشه والعگال والبشت (عباه) على جتفه هيبه تكول هو العريس والسبحه الي ابد مفاركته بيوم بس عيونه قلقتني ليش يخزرني
حامد : هَــْـِْـْْـِلاّ بلجاينه
نصار: هله بيك شيخ
خالد : شونك شيخ حامد
حامد : هلا بيك تفضلو ويانا بلديوان
نصار : نعتذر لان مبين اجينا بوقت ممناسب
حامد : ها شنهي مامرجيه منك خويه هذا بيتك والعماره منوره بيك وبخطارك وشوكت ماتزور العماره نشيلك على راسنا
نصار : سالم راسك متقصر
خالد : اجينا هم شغله وهم نشوف يمامه صار فتره طويله مشايفيها اشتاقينا الها
يمامه : هنا حامد عيونه صعدت براسه يمكن كلمه ثاني وخالد مكان مينام مرتاح بيتنا ينام بلمستشفى

حامد : يمامه ادخلي جوه النسوان اكيد ادور عليچ
يمامه : اني هم اثوليت وجان اكوله لا محد يسأل
حامد : گتلچ ادخلي للنسوان والولد وياي
يمامه : ماشي بس من ترجعون للبيت صيحني حتى اجي وياكم
حامد : الله كريم
خالد : راح نتعبج ام علاوي
يمامه : لا تعبكم راحه
اخذهم حامد ماكو ١٠ دقايق وصاحوني حامد يريدني واني مكيفه شفت نصار رحت لغرفه الحجيه ومن دخلت الابتسامه شاكه حلكي وشفت حامد بركان
حامد : شنهي هاي خفيتج مستحيتي
يمامه : على كيفك شسويت اني وليش تعيط عليه
حامد : احمدي ربچ مازركتج بچف اعدل جهرتچ كلها
يمامه : شسويت فدوه
حامد : اشوفنج واكفه وتمضحكين ويه هذا خالد شگالت روحج هيج انتي خفيفه
يمامه : انت صاير نار لان واكفه ويه خالد شنو نسيت هو ابن عمي ونصار اخويه
حامد : لا مانسيت ولا انتي تذكريني اسمعي لج اذا طلعتي بره احش رجولج حش وحگ هو علي ماابقى عظمه صاحيه بيج
يمامه : حبيبي انت تغار وفتحت عيوني نسيت الموقف الي صار بين حامد وخالد قبل سنين وشكد جنت ضايجه لان يعيط ويريد يضربني ابتسمت على غيرته وحضنته يمه من فدووه للي يغار
وجان يدفعني
حامد : اسمعيني زين تردين انتي والبنيات للبيت والولد ابيتهم هنا
يمامه : خاف عيب وخاصه نصار يستحي شراح يكول بات هنا وبيت اخته ميبات بيه
حامد : لاتخليني اعلگ اخته بلسكف تره روحي گابه للسما وانتي واكفه وتتمضحكين  والاغم يسولف اشتاقينالها من اشتاقتله النار كون وانه احركنه بيها
يمامه : هههههههه صار شكد مشايفتك تغار
حامد : بسچ لا وروح ابوي وابوج اطخ خبالاتي وانوم خالد بلجول حتى السباع تاكله وتخلصني منه
يمامه : ههههههه لا سكتت وبسته من خده ومسحت الحمره لان صارت بخده
حامد : لاتقشمريني مايفيد تكعدين بيتج ومااطلعين لحد مايولي ابن عمج الشفيه واخيج انه ادزه عليج خيالج مااريدن يشوفه خالد افتهمتي لو اعيدن
يمامه : تامر شيخ
حامد : يله ولي
يمامه : اوكف باوع عليه
حامد : هااا فضيني
يمامه : رفعت نفسي وحضنته حيل تدري انت تسوه الرياجيل كلهم عندي انت حبيبي وروحي وابو ابني ويروحلك فدووه خالد هو وعمي جان يبتسم
حامد : اوويلي منچ تعرفين شون تطفيني
يمامه : حضنته وبسته وكتله واعرف شون اشعلك
حامد :اروح لأخوج ولمشعول الصفحه وانتي اثگلي
يمامه : حامد
حامد : خير
يمامه : وحگ هو علي بنابي طالب احبنگ موبس احبنگ اعشگنك
حامد : من اشتعل خالد وابيه خلي اولي لا اجرم بيج هسه
يمامه : هههههه الله وياك گلبي

ودق : خلصت الحفله ورجعنا وثاني يوم زواج بشرى مرحنا كافي الي صار البارحه بس قبل متجي الزفه رحنا اني وايه باركنا الها ورجعنا
وثاني يوم من الزفه طلعت ايه من الصبح حسيت اكو شى طلعت وراها خفت عليها شفتها ادور على ابراهيم سألت همسه كالت التحق ابراهيم وهاي انهارت
أيه : شفتي عافني وراح وحتى مودعني
ودق : والله احسن شى سواه تدرين الوداع الج واله صعب يله گلبي امشي نرجع ليشوفج منير وتصير سالفه تدرين بيه على الحركه صاير يحاسب يله نرجع قبل ميطلع

مرت الايام بطئ عجيب وايامنا متشابهه أيه دوم ساكته وتفكر بأبراهيم ومنير مبطل يتحارش بيها وهيه دوم تصده واني احاول اتجنب مازن ومااحتگ بيه
خلصت العطله واليوم راجعه لبغداد علمود كليتي سنه ثانيه اجه خالي ياخذني هم عنده شغل وهم مر بدربه ياخذني ومااشوف غير مازن بوجهي
مازن : رايحه
ودق : اي
مازن : اسمعيني زين لعبالج ترحين هناك مراح اعرف تحركاتج وسوالفج النفس اعرفه من تشتميه
ودق : شنو تراقبني على اي اساس
مازن : جري عدل واياج بيوم الكف شى عليج واله اندمج والربطه متنزع ابد
ودق : تدري بيه مااخاف ومااسوي شى موزين موو علمودك او خوف منك بس لخاطر ماما ولخاطر نفسي اطمن والربطه هم ماانزعه بس جوز مني
مازن : وهذا الولد اذا اجه وحاول يحجي وياج كوليلي واني اعرف اتصرف ويااه
ودق : عندي لسان واعرف احجي واصد ممحتاجتك شكراً
مازن : مكافي شمخره وخشم يابس
ودق : وانت مكافي تدخل بحياتي تره والله مصختها
مازن : روحي وكافي لغوه زايده
ودق : باي وصعدت ورجعت لبغداد طول الطريق افكر شون بمازن هذا يوم بعد يوم ايزيد عناده وعصبيته شون اتخلص من تحكمه الي عرفته من ايه بأن جنه اخذتلها كم يوم تضبط عليه ومسويه نفسها زعلانه وراها بكم يوم رجعت لنفس طبعها القديم متفيد النصيحه وياها خليها الي عليه سويته

هاي السنه اني مرحله ثاني كليه وايه خامس خطيه جان المفروض سادس لو ما حادثتها وهمسه سادس ابتدائي
داومت ومن اول يوم محاظرات وتعب مر اول شهر واي جديد ماكو الوضع تمام جان اكو طالب مرحله خامسه دوم يفتر ورانه وعينه مينزلها مني مهتميت حاله حال اي ولد بلكليه بس اجه وطلب مني يحجي على انفراد مقبلت وحجه كدام نور صديقتي بأن هو سأل عني وعن اخلاقي واهلي ورايد الولد اتعرف عليه حتى يتقدملي رفضت بأدب وهدوء لان الولد جان مؤدب حيل ومبين ابن ناس واعتذرت منه بحجه احب اكمل دراستي وممفكره بالزواج والموضوع كله ماخذ اكثر من ربع ساعه بس ثاني يوم واشوف طارق افندي جاي للكليه بزي العسكري الي زايده هيبه وكاريزما بحيث مبقت وحده مفتحت حلكها ونتمشى اني ونور اخته وصار مقابيلي وبدون سلام مباشره جان يكول وهو عصبي
ليش مرفضتي للولد البارحه شنو موافقه عليه
اريد افتهم شنو موافقه اني البارحه رفضته للولد وهو شمدري باوعت صفح لنور الي وجهه ليمونه عرفت مسويه مكسوره لان الحجي گله كدامها وسديت الموضوع هاي شكايله اله وخلته ينزل من دوامه لكليتنا وجاي يرجف من الاعصاب
ودق : وانت منو حتى تسأل هيج سؤال
طارق : ليش مرفضتي للولد لو عاجبج
ودق : انت شتريد مني ابن عمي ابن خالي هو انت اخو صديقتي يعني اي صفه الك بيه ماكو ليش تدخل بعد بحياتي
طارق : تدرين اذا سمعت مرافضته شسوي
ودق : شسوي
طارق : اروح للولد واخلي يعوفج
ودق : متلاحظ هواي اتجاوزت وساكته الك لخاطر نور
طارق : من اليوم اعتبري روحج خطيبتي ومامسموح الج ابد تجاوبين ولد
ودق : ههههههههه والله ضحكتني شنو هاي الثقه
نور: فدوه صوتكم عالي

طارق : فهمي صديقتج وكوليها انتي صرتي بأسم طارق وماطول بأسمي الهوا اذا لمس شعره منها احركه
ودق : مجاوبته لان اعرف راح يزيد بلحجي بس كتله تره انت حيل مغرور
طارق : وانتي بلحجاب طالعه حيل حلووه
ودق : خجلت من كلمته وارتبكت ممكن تروح الطلاب كلها تباوع
طارق : اني اليوم جاي من الدوام واحتمال اتعاقب لان عفت الواجب بس لأجل عيونج هاي حتى لو انفصل هم قابل
نور : هله هله اخويه وكع
ودق : نور اسكتي

طارق : اسمعي مرتي من ارجع من الواجب اجي اشوفج لان عيووني بعدها مشبعانه منج وهااا الي يوصل يمج وتحجين ويااه احرك اهله واطيح حظج هم لان انتي مرتي ومااقبل مرتي تحجي ويه ولد غربه
ودق : وحق الله انت مو صاحي وفوكاها تتجاوز هو انت منو سمحلك ردت اعيط عليه جان يجر الدفتر من ايدي حيل وحاط قلم بدلته العسكريه وجان يفتح الدفتر ويكتب احبج مرتي على طول الورقه وانطاني الدفتر وشمر بوسه بلهوا وراح بقيت فاكه حلكي على جرئته
انداريت لنور الخبله الي لو بيدها تركص من الفرح بنص الگليه
تعالي لج شحاجيه لأخوج واجانه مثل المخبل

نور : يوميه يسأل عليج ولج على امي ميسأل هلكد يومياً من هو بلواجب يخابر بليل ولازم انطي موجز عن تحركاتج ومثل كل يوم حجيتله بس الصراحه حبيت احرگ الغيره الي عنده لان الي حسيته اخويه ولأول مره بعمره يهتم بوحده هيج جان دوم عنده البنات لتقضيه الوقت وبس واكثرهن ماعدهن شخصيه ولا كرامه ومن صديتيه تخبل اما من رفضتي الخطوبه هاي كارثه بس عرفت من اهتمامه ورجفته عليج واخيراً طارق حب واكولها وعن ثقه طارق يحبج من گلبه ودق وانتي اول وحده تدخل گلبه وربج اعتبرها معجزه لان بحياته معترف بشى اسمه حب لهذا كلت خلي اشوف شيسوي اذا كتله انتي مرفضتي الولد وحلفني وحلفت مكذبت بشى بشغله انتي مرديتي الجواب للولد وشفتي متحمل اجه طاير

ودق : اذا انتي خبله فأخوج رسمي
نور : والله طارق ورده مو لان اخويه ادافعله بس هو حباب وگلبه ابيض
ودق : وخشم يابس ومغرور
نور : يامغرور رحمه لأبوج شفتي هسه شسوه ياريت تفكرين بيه بشكل جدي
ودق : مااريد لا احب ولا اتزوج
نور : الايام طويله والله كريم هسه بس ماطول حبچ ميعوفج لو تموتين
ودق : براحته المهم اني موو هو

فاتت ايام وبعدها اشهر وطارق كل شهر يمر يوم يتغزل ويذب كم كلمه اكمز منها ويروح تعلمت على سوالفه ومرات استغرب من نفسي انتظر جيته معقوله گلبي يرف لرجال مستحيل
مازن مرتين خلال السنه يجي للكليه صدفه بحجه عنده شغل بس اني اعرف حتى يشوف وضعي ويسلم ويروح خلصت السنه وكلنا على نفس وضعنا نجحت وايه هم نجحت بس اي فرحه بعيونها ماكو احنا هسه سنه ٢٠١١ طول هاي السنه أيه مشافت ابراهيم بس تسمع اخبار هو عايش وكولشي متعرف ويدز راتبه كل شهرين لأمه ومنير اتعين بواسطه من جماعه عمو حامد بوزاره الاسكان وراح لبغداد شويه وضعها استقر اما جنه محبلت وهذا الشى أزم الحاله النفسيه عدها وخاصه من حبلت بشرى ماتت بدمها انقهر عليها وحياتها بارده ويه مازن وماما وعمو حامد هدوء مثل عصافير الحب يغردون وحدهم

بدت ايه تقرا للسادس من العطله وتركض بين المدرسين الخصوصين حتى اطلع معدل رجعت للعماره بلعطله وطارق مثل المخبل يكمز شون ارجع وكل متخابرني نور يجر التلفون منها واول كلمه اسمعها منه شونج مرتي تره بيتج فارغ كافي باقيه يم اهلج ارجعي اشتاقيتلج المره الجايه ولا ادزج الهم شنو لزكتي
ابتسم على سوالفه واحياناً افكر بكلامه

كلها اسبوعين وارجع لبغداد لان راح يبدي الدوام وجان تصيحنا ماما نزلنا مثل كل يوم كل اعتقادنا هذا اليوم حاله حال غيره تريد ماما نساعدها  لان جمعه والكل بذاك البيت موجودين واكيد تكمل شغل وتروح يمهم بس اني وايه نبقى هنا لا اني اريد اشوف مازن واحتك بيه ولا ايه تريد تشوف فضيله وتسمعها احجايه تسم گلبها وجنه اصلاً يوميه يمنا تنطي موجز الانباء مال البيت كله نفر نفر لأيوته نزلنا وجانت ماما كاعده بلهول
هاا يوم شمحتاجه
يمامه : تعالو بنات اكعدو
أيه : خير ماما صاير شى
يمامه : لا حبيبتي بس
ودق : احجي ماما وكعتي گلبنا
يمامه : منير اجه البارحه من بغداد وحجه ويه عمكم علمود وضعه وهو هسه ساكن بشقه وحده ويكول الى متى ابقى هيج اني استقريت مادياً وبلدوام وضعي تمام بقى بس اكمل زواجي
أيه : يعني شيريد مفهمت
يمامه : عمكم حامد كال خلي ايه تحظر نفسها عكب باجر نروح للمحكمه نعقدلها كافي صاربلسنتين على عقد السيد ومنير دك رجل يعقد واحتمال على عطله نص السنه الزواج لان يكول عايش وحدي اريد مرتي يمي
أيه : وكفت على حيلي شنوو اتزوج

يمامه : اسم الله الرحمن شبيج بنتي ليش انتي مو زوجته هاي شكليات انتي ماطول عاقده مال سيد يعني زوجته شرعاً
أيه : كمت الطم على وجهي فقدت حتى خرمشت خدودي مااريده مااتزوجه حسيت بهاي اللحظه اي امل بتغير الواقع اختفى وهذا هو اجاك الموت ياتارك الصلاه
يمامه : لج ايه شبيج ماما وحضنتها حيل حسيت بتي راح يوكف گلبها وتروح من ايدي
ودق : ايه على كيفج
أيه : مااتزوجه احرك روحي ومااتزوجه
يمامه : انتي مو وافقتي عليه صار سنتين انتي خطيبته ومحجيتي شجاج هسه
أيه : فدوه ماما نزلت ابوس بأيدها ورجلها لتزوجوني اله مستعده لأي عقاب كطعوني اذبحوني بس لتزوجوني لمنير
يمامه : ياامي شبيه منير ابن عمج وحباب وشاريج وموظف والي بالج مستحيل يصير
وانتي تعرفين بعد مستحيل تنجمعين بلي بالج

ودق : ايوته كافي راح تموتين
أيه : اي اريد اموت مااتزوجه
يمامه : كافي تره زودتيها من زمان وافقتي عليه وصار سنتين وانتي قانعه وساكته العالم كلها تدري انتي خطيبته بس تعوفي عبالهم بيج شى وهو الي عافج مو انتي الناس عليها الظاهر مع الاسف وميهمهم  البنيه اي غلط يذبوه براسها
ودق : ماما حاولي ويه عمو بلكت يقنع
يمامه : شيقنع يابنتي اذا الرايح والجاي يحجي عليه شون بنت المرحوم مخطوبه لهسه شون مزوجتها وباقيه مخطوبه وابن عمها يمها واشكال الحجي وهو ساكت لأجل عينها يكول مااريد اجبرها بس بعد مترهم الناس اكلت وجهنا واختج الله يسلمها هي من البدايه حطتنا بهذا الوضع

أيه : صعدت ابجي مااريد اختنكت ركض للسطح واباوع على السما يارب انت اعلم بحالي ارحمني دوم واكف بحانبي انصفني منير راح يدمرني واني عبده من عبادك وانت مترضالي الاذيه يارب احلفك بحبيبك محمد احلفك بأهل البيت بحق اصحاب الكساء انقذني ماعندي غيرك وكاعده بلسطح وابجي
ودق : اباوع على حالها شون بيه يارب ساعدني هيه لو بلهدف لو بلنجف المهم اسوي شى الها هاي فقيره ومابيها خير دومها سلاحها الوحيد البجي عفتها كاعده بلكاع ونزلت ركض لماما

يمامه : هاا بشري شونها اختج
ودق : ماما سوي اي شى المهم ايه متتزوج منير
يمامه : شسوي مثلاً هااا كوليلي شنو الي بيدي وشبيجن بس تسمعن بأسمه تصركعن والولد يحبكم والعيبه مطلعت منه
ودق : قصدج هو عباره عن عيبه هذا واحد سافل منحط وحرامات اختي تتزوجه
يمامه : وجع شنو هذا الاسلوب رجعتي تتخبلين علينا مو كلت كبرت وعقلت
ودق : من راح تسمعين الي صار بذاك الوكت عود كولي وجع وبديت احجي لماما شون حاول يتعدى عليه وكل الي صار  وماما من الصدمه خربت لا ايد ولا رجل واني عطت ولج ايه الحكي اريد احرك ماما ماكو
أيه : نزلت اركض على عيطت ودق واشوف ماما مدده ولا حركه ولج شبيها
ودق : روحي جيبي مي بسرعه مااكدر اعوفها واكوم
أيه : نصيح بابا حامد
ودق : لا اياج بس خلي تصحى
وفتحنا الدكم مال الدشداشه وايه تفرك بصدرها واني اغسل وجهه عسى ولعل تحس والله شويه وحست والعيطه عيطه ودك ولطم على راسها ايه متعرف شحجيت بس بقت فاكه عيونها ومستغربه من تصرف ماما
يمامه : من عزه العزاج يمامه مصيبه وكعت على راسج ولج ليش محجيتي لييييش سكتي
ودق : شون احجي غير يذبوها براسنا
أيه : فهموني شكوو
يمامه : جريت ودق حيل كوليلي كدر يسوي شى احجي
ودق : والله لا والله كولشي مكدر يسوي ركضت للكراج ومكدر والله
يمامه : ودق وحق الله اذا كذبتي بيدي اكتلج خلاص
ودق : وداعتج ماما مكذبت ولا حرف وسألي ايه
أيه : شكوو احجو
ودق : حجيت لماما على دكت منير
أيه : عزه وليش حجيتي
يمامه : وانتي الثانيه يرعنه شون تسكتين شون تقبلين بواحد راد يعتدي على اختج هااا وضربتها حيل
أيه : والله استاهل مو بس تضربيني تذبحيني هم بس هاي اني جبانه ومابيه خير شسوي
يمامه : ولجن شون هاي تاليها وين انطي وجهي شكول لحامد وراح يصدك شيصدك اذا الرعنه بت الرعنه الجبيره سكتت والثانيه قبلت بمنير ولكم شون
أيه : على كيفج ماما راح يصير بيج شى
يمامه : ياريت صاير يعني مو خلفتجن لو بس المصايب فوك راسي وراس الخلفني لا من انتن صغار مرتاحه ولا من كبرتن ارتاحيت وين اولي للكبور اطم روحي هم ماارتاح شون اشوفج تنزفين لواحد راد يأخذ عرض اختج وفوكاها ابن عمجن اني احجي وادعي على الغربه الي اذو ايه يطلع منير انكس منهم

ودق : كافي لطم فدوه يووم كافي كاعده بالكاع وبس تلطم مره على وجهه مره على صدرها مره على رجلها انزيد نلزمها اني وايه ماكو الي منتبهنا عليه علاوي جان واكف فجأه اختفى اثاري مو شاف ماما وكعت وخربت ركض على عمو حامد عمره اكثر من ٣ سنوات ولسانه لبلبان طاب للديوان من الخوف يبجي كال ماما ودعت (وكعت) وعمو ركض واثناء ما ماما تسولف عمو سمع اهم جمله انكالت
شون اشوفج تنزفين لواحد راد يأخذ عرض اختج وفوكاها ابن عمجن اني احجي وادعي على الغربه الي اذو ايه يطلع منير انكس منهم
وعاط عمو عيطه طول حياتي ماانساها احس من الخوف گلبي راد يوكف ومعدتي اتقلصت وراح اتقيأ من الموقف كله وايه اصلاً يبست من الرجفه وماما هاي بحث اخر منهاره وتحجي وتبجي وتلطم

حامد : شنهي السمعته احجي لكم احجو لاتسودنوني
يمامه : الحكلي حامد ابن اخوك تربات ايدك راد يضيع ودق
حامد : منير
ودق : جان يجرني حيل عمو من ايدي بكل قوته وعيونه صارت دم ويحجي كلشي هسه تحجين
ودق : وبديت اعيد الموقف كله
حامد : انه بيومها مو اجيت وشمرته يم رجلج وكتلج احجي
ودق : هنا من خوفي من عمو واعصابه كمت ابجي جنت شكد متماسكه بس الموقف حتى الجبل يخلي ينهار والله خفت يذبون الصوج بينا وجان موضوع ايه مصار شهرين
حامد : كضچ
ودق : شون يعني
حامد : اخذ وجهج
ودق : هااا لالا كدرت افلت منه والله وجان يدفعني حيل وكام للغرفه نسمع بس صوت ركع بوب الكنتور وسحب اقسام مال مسدس شكد جانت ماما واكعه ومنهاره طفرت من الكاع ركض على عموو لان عرفنا ناوي يخلص عليه وكفت كباله تحاول تمنعه يطلع واحنا وياها ونبجي
يمامه : دخيلك حامد لتكتله اضربه بعوده اطرده كسر عظامه اي عقاب بس لا بلمسدس
حامد : ولج هذا واحد عار لازم يموت شون يكض بت عمه انه لهاي اللحظه من اتذكر الزلم الي كضو ايه اكولن لو عايشين الزمهم واكطع من لحمهم وذره وذره ومايبرد گلبي تالي ولد اخوي تربات ايدي يتعدى على عرضه انه الازامط بنص الشيوخ بترباتي للوليدات واكولن گلشي ولا الشرف تالي ابن اخوي ناقص شرف مكافي الي مات وعاف العار لينه تالي هذا هم ينكس روسنا وينزل كدرنا ويه منو ويه عرضه اليوم مايبات اله بلنجف
ودق : حاولت ماما تلزمه واني وايه نبجي ونتوسل مفاد هو طويل وضخم مكدرنا دفعنا بقوته حيل وراح هناك واحنا نركض وراه ماما اصلاً حافيه وجان يدفر الباب ويصير منير ومازن كدامنا

يتبع ...

مساء الـ🌹ـورد حبايبي شكراً على جميع تعليقاتكم وتفاعلكم الرائع للقصه فْـْ(😘)ـْْـْْدْيْـ🥰ـْتْكم
وكل الي علق بتعليق سلبي وغلط وتجاوز عليه احب اوجه كلمه الهم مهما تكلمتو وتجاوزتو اخلاقي متسمحلي اجاوب وكل شخص يعكس اخلاقه ومااحب انزل نفسي لهيج مستويات تعبانه
اما حبايبي الغوالي متابعيني الراقين الف تحيه حًـ❤️ـٌبُ مني الكم  وخميس سعيد على عيونكم الحلووه اختكم ريام