رواية سجينة الروح الفصل الحادي وثلاثون 31 - بقلم ريام هادي

سجينة الروح
للكاتبة Reem
البارت الثلاثون
بارت طويل لعيونكم

(لسان حال ابراهيم )

جنت اتنفسك وانته الهوى بدنياي
وجنت لو تبتعد علي لحضات تخنكني
معقوله الورد ينسى جميل الماي
معقوله بكل بساطه تنازلت عني
شسولف بعد طعم السوالف راح
ردت منك توافي وخيبت ضني
ادري الوكت ال خلى كلبك هيج
وادري الشماته الباكتك مني
بس قبل لا تبعد عندي سؤال
ارجوك فكر وي نفسك عود جاوبني
باجر لومتت وشوفني بتابوت
هم تبجي عليه وبعد تذكرني

مازن : اقاطع گلمتك يابه بخير اي اريد اتزوج بس مو ودق اني طالب منك بنتك جنه تكون مرتي

حامد : انت شتكول مازن
مازن : بويه انه اريدن منك جنه مره اليه
ودق : ضليت صافنه الموقف كله مكعد استوعبه صح اني ماكو شى بيني وبينه بس متوقعت يخطب جنه
جنه : سمعت مازن شيكول وانه گلبي طلع مني واعضاي ترجف لا مستحيل مازن يخطبني انه اريدن واحد يضربني اكيد انه احلم
حامد : كل واحد يروح لحجرته وانتي يمامه اخذي بنياتج وردي لدارج
يمامه : صار يله بنات امشو
الحجية جميله: شنهي يحامد

حامد : يمه رحمه لأبوي انه احلن الموضوع يله ليش واكفين
يمامه : اخذت البنات ورجعنا للبيت والكل ساكت واولنا ودق اصعدي ايوته كملي شغلج وانتي تعالي ورايه
ودق : نعم ماما
يمامه : يعني كوليلي شون بيج جبتج بالعيني والاغاتي ومفاد بالقوه والعياط ومفاد ليش تخليني اكره نفسي لان دللتج وانطيتج عين كلت كبرت وصارت شابه واحترم رأيها بس بعدج طايشه ورعنه وصوتج عالي ومتحترمين الاكبر منج كوليلي شنو الي اسوي واعدل اخلاقج الي مع الاسف فشلت بأن اصلحها

ودق : ليش هيج تكولين ماما اني شسويت
يمامه : شسويتي كل هذا وشسويتي صوت عالي وتجاوز بالكلام لااحترمتي وجودي ولا وجود اهل ابوج ولا اي احد بكيفج واكفه والصوت يلعلع وتهددين شنو لج ماكو اي بعينج مع الاسف تعبت وكسرت ظهري عليج كلت يجي يوم وافتخر بيج واكول هاي جبيرتي بنتي صاحب الاخلاق والقيم والادب
ودق : رجاءاً ماما لتحجين هيج شبيها اخلاقي ودمعت عيني
جنت ادافع عن حقي على اي اساس يزوجوني شنو اني لعبه عدهم ناس توديني وناس تجيبني
يمامه : هو احد صخمج وزوجج بيبيتج مره جبيره بالعمر وحجت وكالت اصبري اسمع من عمج مني او من مازن ركض تهددين وتجاوزين اريد اسكتج ماكو ليش هيج اخلاقج زباله
ودق : لان دافعت عن حقي صرت بلا اخلاق شتريدين مني اصير مثلج اركض ركض واتزوج واخلف واظلم جهالي ويايه
وجان تضربني راشدي ولزمت شعري حييل
اااخ ماما

يمامه : اسمعي لج صوتج مااسمعه بعد لا وحق القران تشوفين الي مشفتي مني لتشوفين نفسج عود اني كبرت واكدر اوكف بوجهكم (واعت حيل بشعرها كطعته ) لا غلطانه ادوسج بلي لابسته جري عدل اني لاخر لحظه مقصرت وياج والي ردتي على قول لسانج بس كافي طلعتيني من طوري كم مره اكول يجي يوم وتكبر وتعقل بس الظاهر اني معرفت اربي وراح ارجع اربيج من البدايه واول شى ماكو كليه تنجبين وتكعدين بالبيت اريد اصير ام حقير وياج بلكت تنعدلين

ودق : وخرت ايدها ونزلت ابوس ايدها لا ماما دخيلج كله ولا الكليه تعبت وانكسر ظهري حتى بس اسوي لنفسي كيان
يمامه : ياكيان واخلاق ماكو واحترام ماكو ليش الانسان بشهادته ولج هاي جنه ثالث متوسط مكملته واخلاقها آحسن من اخلاقج مسمعتها بيوم تعلي صوتها على ابوها او على امها بيبيتها اذا حجت شى تكولها صار حتى لو معاجبها الكل يمدح باخلاقها وتربيتها رغم امها راعيه مشاكل وطلايب وممهتمه الها بس هيه مؤدبه وشكد صارلي وياهم مسامعتها كالت كلمه لا مااسوي لاي واحد منهم ليش ولج هاي جزات تعبي الكل يحجي على تربيتي الج وكعدت بالكاع ابجي

ودق : ماما فدوه لتبجين اموت من اشوفج مقهورن مني
يمامه : دفعتها وخري مني لج ظهري كسرته عليكم حاربت زلم وعشاير علمود تبقن بحضني الليل ماانامه اذا مااتأكد انتن مرتاحات ونايمات ردت احرك روحي من كالو ناخذهن منج اني لو مااحبجن اسوي مثل مسوت خيريه ام مازن وغيرها وغيرها الالاف النسوان يموت رجلها تذب الجهال على اهل ابوهم وتروح تعيش حياتها وتتزوج وخاصه اذا جانت صغيره بس اني مسويت هيج گلت ذني عكازتي بكبرتي ذني روحي وعمري اعيش العمر كله الهن واتفاخر كدام الكل ذني بنات يمامه ادب واخلاق وعقل وشهايد ليش هيج تجازين تعبي ليش

ودق : كمت ابجي منهاره مراح تفهميني ماما شكد مراح اكولج الي بگلبي مراح تفهمي
يمامه : لو شميكون الي بداخلج مينطيج الحق تقللين الاحترام وتعكسين صوره محلوه عني وعن خواتج وتحسسين المقابيل انتي ممتربايه وفالته تدرين جم مره اسمع بأذني واموت قهر من يكولون لان مافوك راسها  ابو وتربيه مره  هيج اخلاقها واموت بدمي احس كلامهم خنجر بروحي
ودق : ماما اني مااريد اتزوج مااريد
يمامه : ومحد جبرج على الزواج

ودق : بس هذا جان اتفاقكم من زمان
يمامه : الوضع تغير وعلاقتي بحامد تغيرت صح قبل جان شرطهم بس هذه كولشي تغير واكيد الشرط هم تغير انتي لو عندج ولو ذره عقل جان سكتي وسمعتي عمج شيكول او انتظرتيني احلها الج واذا منحلت وانجبرتي جان بذاك الوقت كل الحق الج بس مو بعدج بس سمعتي هذا الحجي كمزتي تهددين وتعيطين وتعالي كوليلي هو شبيه مازن الي يسمعج يكون مزوجيج لواحد سايب بالشارع لو ما دكتور واخلاق وحلو ومتدين والعيبه متطلع منه والكل تحلف براسه من الثكل والرزانه الي شايلها والف بنيه تتمناه وحتى ارقى واحلى منج انتي مو بنتي والله مازن تتمنى الي احسن منج

ودق : ميهمني لو شميكون اني مااريد اتزوج واعرف لو ساكته جان زوجتونياه لان من البدايه هذا شرطهم وانتي وافقتي
يمامه : احد گلج دااحجي هندي كتلج الوضع اختلف والحياه اختلفت وعلاقتي بعمرج تغيرت ١٨٠ درجه اني ماانكر جنت رافضه رفض تام زواجكم من اولاد عمكم وافقت كلت منا لحد متكبرن الله كريم هو احارب ومااخليكم تتزوجون بس من مرت الايام وتقربت من ولد عمكم وبالذات مازن شفته اخو خيته واخلاق وصدوك رجال وتمنيته يصير الج وحتى وره شغله ايه لو ما سجن ابراهيم ولو طالع وبموافقه اختج والله اشيل ايه واكوله كبع واخذ اقلها اطمن على بناتي يم زلم حوك ويكدرون يراعون الله بيهن

ودق : كتلج مااتزوج مااريد
يمامه : طبج مرض بس الي سويتيه ممقبول شون توكفين بنصنا وتكوليله لو اخر رجال مااتزوجك تعرفين هاي الكلمه شكبرها بحقه وبحق اي رجال عنده كرامه
ودق : جنت منهاره
يمامه : هذا مو مبرر الي سويتيه شنو منهاره شنو تعبانه هاي قله اخلاق واهانه غيره واحد يلطج على حلكج جان اكو الف طريقة تردين  كولي اعتبره مثل اخويه كولي مااريد اتزوج لان صغيره واريد اكمل دراستي بس مو هاي الكلمه خليتيني اموت بدمي ولا هامج واكفه بنصنا وتراددين والكل واكف
ودق : ماما
يمامه : اششش كافي مااريد اسمع كلمه منج واني من اليوم اعرف شون راح اربيج اصبريلي
ودق : اوكفي ماما دفعتني وطلعت وبقيت ابجي ومنهاره
صعدت بغرفتي وبقيت اليوم كله حتى محد اجه عليه بس ابجي ميعرفون شنو احس

حامد : تعال بويه مازن ويايه
مازن : وين يابه
حامد : وين اكو غيره للشط چا احنه وين نصفي گلوبنا وتحجه غير على الشط
مازن : يله يابه وصلنا وكعدنا واحد بصف الثاني وابويه يدخن وصافن ومنتظره يحجي
حامد : اسمع بويه البشر مرات يغلط بلحظه غضب بس اللحظه هاي يمكن تكلفه عمره گله ويظل متندم عليها انه اعرفنك هسه طاكه رويحتك وعصبي وگلشي تكوله وتتصرفه مو بوعيك
مازن : قصدك لان طلبت ايد جنه لا جنت بوعي
حامد : لا مو بوعيك بويه انت تربات ايدي يمازن انت وليدي هيه مو چلمه وتنكال من اكولن انت وليدي انه احسنها من اكولنها انه اعرفك تحبها لودق ورويحتك بيها

مازن : لا مااحبه يابه
حامد : لا تجذب علي مامرجيه منك انت تجذب على ابوك
مازن : دنجت واني النار تطلع من روحي
حامد : انه اعرفنك بس اباوعن على عيونك چاشون وانه بالعشك استاذ تعلمني شون اميز اليحب والعاشك من المايحب انت تحب ودق وانجرحت منها عبن تجاوزت بالكلام هاي طفله وماتفتهم مصلحتها
مازن : لا يابه مو طفله بنيه شابه الي بعمرها حتى جهال عدهم وهي بالذات عقلها جبير وتعرف توزن الامور بس هي مطيقني ومتريدني على شنو اني مجلب بيه هيج ماعندي كرامه
حامد : شوف بويه انت هسه مجروح منها انه مااخذ جلمتك والي ردته واسوي نفسي ماسمعتك وطلبك مرفوض انته تزوج من ودق لازم تكسبها بويه انت وياها مثل الحيه والبطنچ دوم تعاركون وانته خشن بحجي وياها چا شون تحبك وتقبلك
مازن : يابه اني رايد جنه منك هي انسب اليه حبابه وعاقله
حامد : چا غير بتي ست البنات بس انته لو بمجاني ترضى تزوج بتك الوحيده لواحد گلبه مو اله ترضى بتك الوحيده تعيش تعبانه ومقهوره وهي تشوف زلمتها عاشك بت عمها اذا انت ترضاها انه ارضاها
مازن : اني اي اكولك احبها بس متناسبني شفت سلوبها وكلامها هي تكرهني كره العمى مابيوم تقبلت حجايه مني ليش اذل روحي على شنو
حامد : لان تحب بويه الحب يذل اكبر زلمه
مازن : بس انت مانذليت وبقيت دوم محافظ على قوتك وهيبتك كدام عمه يمامه
حامد : المذله انواع وكل نوع اله احساس شگل باگي احبها گل هاي السنين وسويت اشكال والوان حتى تحبني چا هذا مو ذل اكو نوع من الذل مايقلل من قيمه صاحبه بان تحارب حتى تكسب الي تحبه مايقلل من قيمتك

مازن : يابه واني مااريد احارب وادخل بحرب خسرانه
حامد : شوف وليدي انه ماعندي مره الك بت عمك هيه مريتك شون لون مااعرف تحاول وياها مره ومرتين وثلاث وماارضى منك هذا الاستسلام چا هيه غريبه لو ما بت عمك ومن لحمك ودمك انت زلمه وانه اعرفن بيك كدها يله بويه تعوذ من الشيطان البت بعدها صغيره كلها فتره وترجع لعقلها لاتظل هيج خشمك يابس الي يحب يتنازل حتى يربح بالاخير وراها كمز عليها انته اكسب گلبها وراها كمز عليها هههههه
مازن : مثل عمتي هسه كسبت گلبها وجبت للعماره
حامد : چا شعبالك انه اعرفن العبها صح وردت طيرتي لحضني وبلا غصب گله هنا واشر على راسي بالعقل والهدوء والحب گلشي التريده يصير يله وليدي وراك شغل كوم ولا تفكر بعد

رجعت للبيت وانه افكرن بودق ومازن وشون احلن شغلتهم ودخلت واشوفن يمامه مكدره (ضايجه او مقهوره)
حامد : تعاي ليه ياروح حامد
يمامه : اجيت تمددت يمه وبحضنه واحس روحي مخنوكه
حامد : شبيها طيرتي مكدره
يمامه : اوووف من وره ودق شفتها شسوت اليوم
حامد : بعدها صغيره تكبر وتتغير وتعگل
يمامه : باوعت عليه توقعت تزعل منها والله كلت راح يجي يضربها على جساره لسانها
حامد : شوفي يبعد هلي وناسي ودق شخصيتها تختلف عن كل خواتها وهي عصبيه وكل ماتزيد عليها تتمرد اكثر هيه ماتعرف تصرف عجوله والعجول دوم يوكع بمطبات وهيه راح توكع بمطب وتتندم على سوالفها
يمامه : بس اني حيل مقهوره منها مااريد يكولون معرفت تربي
حامد : اكطع لسانه الينطق هيچ
يمامه : كالو حامد وبترس اذني سمعتها
حامد : گليلي منو واكصن لسانه وحگ علي
يمامه : مو مهم منو بس اني مااريد ياخذون نظره محلوه عليها واليوم راح ابدي اعاقبها ومراح ادخلها هاي السنه گليه اريد اشوف شون متعدل
حامد : لا يگليب حامد هذا ماقبول منج البت تحب تكمل خليها بس اكرصيها
يمامه : شون يعني
حامد : گليلها ماتقدمين بس احنا نقدم ليها چا ماتفرحين بنيتج دكتوره
يمامه : اوووف اووف شون ماافرح عايشه لهذا اليوم الي اشوف بنتي احس دكتوره ورافعه راسي بس مو دكتوره واسلوب ماعدها وشايله خشمها على الناس الاخلاق اهم من الشهاده
حامد : صح وانه وياج وهيه من تعاقب هيج راح تجر عدل بنيتج گلبها جبير بس هيه ماتعرف تصرف لاتضوجين
يمامه : والله ماكو غيرك گلبج الجبير
حامد : چا شون مو جبير وانتي تسرحين وتمرحين بيه ً
يمامه : ههههههه والله ياحامد متعرف شكد انت مهون عليه
حامد : چا وانه غير مابدي توخرين من حصني هيج احبسنج حبس بضلوعي
يمامه : الله لايحرمني منك
حامد : ولا منچ يلغاليه

جنه : انتظرت ابوي يفتح موضوع مازن گلشي ماكو وانه نار بيه شون اعرفن شصار اروحن لأيه اكيد تعرف شى
أيه : اجتني جنه وعليها الحيره والقلق هاا ولج شبيج ترجفين
جنه : انتي سمعتي ابن عمي مازن شطلب من ابوي
أيه : اي سمعت وانت راح توافقين
جنه : اكيد چا هذا الدكتور مازن مخبله المتوافقك
أيه : الشهاده لله مازن ذهب ويستاهل كل خير
جنه : بس انه خايفه
أيه : ليش
جنه : عبن مازن يحب ودق
أيه : ههههههه شنو مازن يحب ودق
جنه : چا شنهي تضحكين ليش مااتعرفين
أيه : بابا شبيج مازن ودق يمكن اخر اثنين ممكن واحد يحب الثاني
جنه : لا ايوته انتي ماتعرفين شى
ودق : طلعت من غرفتي امسح دموعي وردت اشوف ايه ضجت كاعده وحده سمعت صوت جنه والكلام خلاني اوكف واتصنط عليها
أيه : احجي يفيلسوفه زمانج خلي نشوف عقلج الصغير وين موديج

جنه : عقلي جبير انه واعرفن گلشي انتم محد منتبه عليه مازن يعشكها لودق ومن زمان من هيه وصغيره بس هو يكابر وهو طبعه ثگيل چا ماتشوفين شون يرجف عليها اذا تأذت ودوم ينشد عليها عمه فضيله تشوفها وتطمن عليها بس هيه مامنطيته ريچ حلوو دوم تصده وتأذي بكلامها وهو بعده يحبها وباله هي تصير مريته بس صدها ليه خلاه يخطبني
أيه : لا بربج وانتي شمدريج
جنه : اليحب احد تظل عيونه تطارده وانه من حبي اله عيوني دوم تفتر وراه واعرفن كلشي يخصه
أيه : لعد شون بقيتي تحبيه وهو يحب غيرج وقابله ومكيفه لان خطبج
جنه : عبن احبه ايه چا الحب يسودن الواحد وانه اريدنه زلمتي مازن زلمه حوك وانه اصيرن ثوله اذا عفته هو اختارني عناد بيها اعرف گلشي بس راضيه

أيه : شون ترضين تعيشين هيج ممجبوره جنه ليش تظلمين نفسج وتخلصين العمر كله ويه واحد ميحبج وانتي الف واحد يتمناج
جنه : هو العمر خلصان خلصان يخلص بجاره واحبه وحتى لو هو ميحبني المهم انه احسن مايخلص بجار واحد مااطيقن اباوع بخلقته
أيه : كعد تلعبين بروحج لعب والله وبعدين تتندمين
جنه : خلي تصير بگلشي راضيه

ودق : ضليت فاكه حلكي مازن يحبني مستحيل بس اني بعمري مشفت شى يدل على حبه صح يهتم بأدق التفاصيل بس مو اني وحدي حتى بخواتي يدخل بدا عقلي يتعب من التفكير بس همي هسه مو مازن همي دراستي الي ماما راح ادمر كلشي من وراهم شسوي ياربي شون احلها
مرت الايام وصار هدوء ومحد فتح الموضوت بعد وماما متباوع بوجهي اصلاً وحتى اذا رادت شى تطلب من ايه يعني اشتغلت ويايه الحرب البارده بدت نفسيتي تتعب وبس ابجي مااحب ازعل ماما كل الناس بجفه وهيه بجفه ثانيه اني كلش احبها ومااحب زعلها مني وصار اكثر من ٣ اسابيع والهدوء بيتنا والروتين ماشي وماما مغيرت رأيها وبقت تتعامل ويايه بجمود وقسوه بدا التقديم على الكليات واني ارجف وخايفه لان مقدمت على الانسيابيه ودزيت ايه تكول لماما على موعد التقديم وجان الرد صاعقه بالنسبه اليه كالت خلي تكعد وتسكت هاي السنه ماكو كليه متت بجي واشهك يعني هيج ضاع كلشي تعب السنين كله بالشط

حاولت احجي وياها ولا حياة لمن تنادي حتى متقبل تكعد يمي أيست من دخول الكليه ودخلت بحاله من الكآبه وقلة الكلام والاكل بدت ايه تتقرب مني وتكعد ويايه تخفف عني بس ميفيد حسيت بلحظه ضاع كولشي بدت المدارس واحنا سنه ٢٠٠٩ ايوته رابع اعدادي عمو نقلها لغير مدرسه مو القديمه حتى لتتعب نفسيتها وحط خط الهم هيه وهمسه حتى يأمن عليهم من الطريق ايه هم احسها بغير عالم هوايه تتصفن وتتعب نفسيتها ومرات اسمعها بليل تبجي اسألها شبيج تبجين متقبل تكولي

وبيوم كاعدين اجتي جنه عيونها مورمه وتسأل عن ايه كتلها بالمدرسه
جنه : اروحن واجيها غير وقت
ودق : تعالي شبيج ليش هيج عيونج
جنه : لا مابيه ارحن انه
ودق : جنه محتاجه شى بيك شى تره ظل بالي
جنه : نزلت دمعتي موبيدي احس غصه بگلبي
ودق : شبيج وكعتي گلبي
جنه : مابيه
ودق : وهاي الدموع شنو وجان تدخل ايه من المدرسه وهاي جنه روحي واركضي عليها واحضنيها وابجي بكل قوه همزين ماما بالمطبخ وملتهيه بالغدا وعلاوي يمها يكمز متسمع

أيه : شبيج جنه
جنه : اريدن احجي وياج
أيه : امشي لغرفتي تعالي
ودق : رحت وراهم بدون ميدرون ردت اسمع شصار
وحطيت اذني على الباب
أيه : احجي شبيج وكعتي گلبي
جنه : ابوي ماارضى يزوجني لمازن
أيه : ليش
جنه : مااعرفن انه سألت امي وكالت ابوج كال سدن الموضوع حجايه وردت لمچانها
أيه : يعني معرفتي السبب
جنه : اكلها گلشي مااعرف گلشي مااعرف
أيه : حضنتها على كيفج گلبي ليصير بيج شى
جنه : داموتن انه تعرفين شنهي شعوري وانه اشوفن حلم عمري يضيع مني مازن حلم عمري گضيت هاي السنين كلها احلم بيه وهو ماحاس بيه
أيه : لتزعلين مني تعرفين بيه شكد احبج بس يجوز عمي يعرف بحبه لودق ولمصلحته ومصلحتج مقبل
جنه : اكيد ابوي يعرف چا هذا مازن حبيب گليبه گلشي يعرف عنه
أيه : لعد شون تردين يزوجه الج بربج شون راهمه
جنه : اااخ احسن روحي تطلع ليش مامكتوبلي افرح ليش
ودق : اسمع كلامها ودموعها متت قهر عليها مرات شى متريدي بس عند غيرج هو حلم عمره بس شنو الي بيدي اقدمه الها شو هو كولش زين يعرف مااحبه ولا اريده
رجعت لغرفتي واني الحيره سيطرت اكثر عليه وضعي كله مخربط افكر بجنه لو مازن لو الكليه الي ضاعت مني وره ٣ ايام اجه مازن لبيتنا وصار اكثر من شهرين مشايفته من العركه صاحتني ماما نزلت واني حتى روح مابيه ضعفانه وجوه عيووني سواد من السهر والتفكير السلام عليكم
مازن : وعليكم السلام تعالي اكعدي
ودق : نعم
مازن : تفضلي
ودق : شنو هاي
مازن : هاي ورقه قبولج كليه الاسنان جامعه بغداد
ودق : وكفت على حيلي وماارمش من الفرحه مدااصدك قبولي باوعت على ماما واكفه على صفحه ركضت عليها وابجي وحاضنتها
يمامه : كافي تبجين الف مبروك ماما
ودق : العفو ماما بعد مااضوجج والله والله مااسوي شى يزعلج وابوس براسها وايدها
يمامه : لتشكريني اليه عمج ومازن السبب همه الي قدمولج وكملو كولشي
ودق : انداريت عليه شكراً مازن والله الشكر قليل بحقكك
مازن : المهم ترفعين راسنا وتنجحين
ودق : ومن الاوائل وين عمو اريد اشكره
يمامه : عمج بالديوان بليل يجي واشكري
وحضري نفسج حتى اشتريلج احتياجات الكليه
مازن : وهاي اول احتياج
ودق : وجان بيده جيس اخذته منه جان صدريه مال طبيه وعلى الجيب مالتها مخيط اسمي بالانكليزي دكتوره ودق زادت دموعي وفرحتي لو ما العيبه الا احضن مازن
مازن : كافي دموع ويله صيري سباعيه وكملي كليتج حتى تنافسيني
ودق : تسلم مازن والصراحه مااعرف شكول من الفرحه
مازن : لتحجين شى كافي نشوف فرحتج بعيونج هذا هو
ودق : ممكن احجي وياك حجيت بصوت ناصي حتى ماما متسمع بس يمكن سمعت لان مباشره كالت اروح اشوف علاوي يمكن كعد
مازن : اكعدي واحجي الي تريدي

ودق : مسحت دموعي ودنجت ومااعرف شون ابدي الحجي
مازن : مطوله يله تحجين شنو سالفتج اسمعج احجي وين راح هذا اللسان الطويل
ودق : مووو
مازن : موو شنو احجي
ودق : اني اعتذر على كل كلمه كلتها بحقك مو قصدي جانت لحظه عصبيه
مازن : وبعد
ودق : اني محد يفهمني مازن واتمنى تفهمني انت لان انت الوحيد الي تعرف بكل الي صار بيه بطفولتي والعقده الي عافها عادل بيه ودار وجهه وراح
مازن : اعرف ودق بس العقده وعادل شله علاقه بقله احترامج
ودق : اني افقد اعصابي من احس روحي مجبوره على شى
مازن : ومنو جبرج
ودق : انتم
مازن : احنا ابد وليش انجبرج
ودق : مازن لنغالط روحنا كلنا نعرف بلشرط القديم واني مااريد اتزوج
مازن : متريدين تتزوجيني لو
ودق : لتكمل اني اصلاً مااريد اتزوج نهائياً لا انت ولا غيرك مازن انت شاب راقي وعلى كولت ماما الف بنيه تتمناك وصدوك الف بنيه بس اني مو منهم اني كارهه كولشي اسمه زواج ورجال الي شوفه اليه عادل خلاني اكره جنس ادم كله احس روحي مسجونه لواحد كل همه ياخذ عمري وشبابي وحياتي واصير خدامه اله ولجهاله وتالي شوكت ميحب يروح لنزواته ويكمز بين هاي وذيج ولازم هيه تقبل بكولشي والله شنو لخاطر جهالها

مازن : بس كلامج غلط ومو كل اصابيعج سوه الزواج موده ورحمه ليش ماخذته من منطلق السجن وبس امور الحيونه والخيانه
ودق : هذا عقلي بعد واني مامستعده اخلص عمري لخاطر واحد احبه وانطي كولشي والكاه بحضن غيري
مازن : ومنو يكول يخون مو كل الناس عادل تره اكو الشين واكو الزين
ودق : واني ممستعده ادخل بحرب اني نفسي ممقتنعه بيها وانتظر وتمشي ايامي لحد مااشوف الي ارتبطت بيه شين لو زين
مازن : بس هذا يعتبر مرض انتي مريضه ودق وتفكيرج كله غلط
ودق : مهما كان رأيك بيه ميهمني لان اني مقتنعه بأن الوحده تكدر اطور نفسها وتعيش احلى حياه بدون رجال يمها وتكون احسن وحده وتبني كيان مستقل بدون ميكون للرجال اي دور
مازن : ليش كل المتزوجات قابل ماعدهن كيان اكو نسوان اتزوجو وخلفو وكملو دراستهم وحتى اتعينو وصارو دكتورات ومعلمات واستاذات جامعيات وحتى مستشارات وحياتهن احسن حياه واكو رجال ساندها واطفالها يفتخرون بيها وحتى الي مكملت دراسه بنت بيت واسره مستقره وهادئه واولاد ينحلف بيهم وباخلاقهم ليش تفكيرج محصور بالخيانه وبأن ماكو رجال خير وزين

ودق : هذا عقلي وحياتي لهذا ياابن الناس اكولها الك لأول واخر مره عيش حياتك ولتنتظرني اني ماافيدك لان مراح احبك ولا راح احسك بيوم راح تخلص عمرك تنتظر سراب تلاحك لنفسك مازن اني ماافيدك نهائياً
مازن : شنو قصدج
ودق : دنجت وخجلانه بس لازم انهي هذا الموضوع وللابد
اني اعرف بيك تحبني وعندك مشاعر اتجاهي بس اني مااحبك ولا راح احـٍُـبك بيوم لتعب نفسك واشتري الي اشتراك
مازن : احس روحي تطلع وهيه تحجي شنو قصدج منو اشتراني
ودق : جنه تحبك مو بس تحبك تعتبرك حلم عمرها واعتقد هيج بنيه اكيد راح تعيشك سعيد هي حلوه وطيبه واخلاقها عاليه ومطيعه وقبل كولشي تحبك وهي الوحيده الي راح تكدر تنسيك ودق
مازن : كاافي اسكتي انتي ليش هيج حجر ليش ماعندج احساس تدرين بيه احبج وبكل برود تحجين واطلبين مني اتزوج غيرج شنو انتي من شنو مصنوعه
ودق : كلتها من حجر فعلاً اني من حجر هذا الحجر صنعه عادل بحقارته وصاخته خلاني اكره كل جنس ادم واكره حتى مشاعر الحب بين اثنين واحسها مجرد نزوه فراش وتروح ياابن عمي انساني وعيش حياتك وخليني اعيش حياتي بالطريقة الي اشوفها صح

كمت وكفت وهو عيونه دم وايده عاصرها بقوه وصاك سنونه وكتله اتمنالك السعاده لان انت تستاهلها

مازن : اجيت لأبوي بعد شهر من التفكير
يابه انه اجدد كلمتي واريد جنه تصير مره اليه
حامد : بويه لاتستعجل چا هيه حبها ولبط اصبر يابويه ليش هيج انته الله يساعد گلبي انتظرت ٢٠ سنه لحد مصارت طيرتي بحضني چا انت شهر والثاني وبزعت

مازن : اني مو حامد ولا ودق يمامه احنه نختلف يابه وكل واحد منه الي عقله وتصرفاته ولو ادري بودق اكو امل ولو واحد بالميه تتغير جان انتظرتها العمر كله بس اني اعرفها هي مصممه على هذا الشى ومابيوم راح يرف گلبها عليه ولا على غيري
حامد : چاشون تضل بدون زواج
مازن : اي هيه تريد هيج واعرف انتم مراح تعوفوها بحالها بس مهما كان مراح اكون طرف وياكم بأن اجبرها على الزواج مني مااتحمل رفضها يابه ودق كل كلمه منج تجرح گلبي مااتحمل ومامستعد اقضي عمري كله انتظر كلمه منها كتلك اني مو حامد

حامد : وانه مااكدر انطيك بنيتي تعذبها وگلبك ويه غيرها
مازن : انت تعرف بيه ناقص واذيها اني تربيتك يابه لو نسيت
حامد : انه ماانسى انت ضلعي واخوي وابني بس هي جنتي وانه اريدنها سعيده مااتحمل يمازن اشوف دمعتها بعينها وحزينه ومنك انت بالذات لو غير واحد اطگه واخلي دمه بطوله بس مو وليدي
مازن : لتخاف اذا اجتي بيوم وكالت مازن مأذيني كول انت مو رجال ومعرفت اربيك
حامد: شمعنه جنه
مازن : لان بنتك يابه ومن ريحتك وكلشي منك يرد روحي واعرف جنه راح تلزم ظهري وتصير ام بيتي وتراعي الله بيه
حامد : حيرتني وانه بعمري مامحتار هيچ
مازن : لاتحتار وكول ياالله وتوكل
حامد : اسأل البت والحجيه
مازن : الك كل الوقت اني رايح ايفاد اسبوعين لأبيل ومن ارجع انطيني الخبر

حامد : دخلت على الحجيه وفهمتها
الحجية جميله: چا هاي المسودنه ماترضى بيه
حامد : يمه مازن يحبنها بس هيه ماترضى
الحجية جميله: يمه لاتنسى البت نزلت من كدره وتجاوزت وانه ماراضيه عليها
حامد : انه تمنيت ينصلح الحال بينهم
الحجية جميله: طبها حريشي يمه هيه الخسرته چا هو الدغتور مازن وين اكو مثله توكل بالله وانطي بنيتك ليه مازن ولدنا وجنه هاي الغاليه وتستاهله
حامد : مااعرف يمه اخافن على جنه ماتنسعد
الحجية جميله: يمه فدوه اغديلك بسگ تفكر وتوكل انت العليك سويته اسأل البت اذا راضيه فوت بفالك
انتي اسأليها يمه
الحجية جميله: ولج جنه من فلك طرها ماتسمع ولج جنه
احلام : هااا عمه امري
الحجية جميله: انتي جنه
احلام : لاعمه احلام
الحجية جميله: چا اذا تدرين مسودنه احلام ليش اجيتي تركضين
احلام : مو عبالي تريدين شى مني وصحتي جنه تنشد عليه
الحجية جميله: كرمينا بسگوتچ وانشدي على بنيتج اريدنها بشغيله
احلام : تامرين عمه جنه يمه تعالي حبوبتج تنشد عليج
جنه : امري جده
الحجية جميله: وانتي راح تضلين هيچ
احلام : وين اولي عمه
الحجية جميله: ولي اي مچان اريدن جنه وحيدها
احلام : چا غير بتي واعرف شبيهه هاي هم طلابه وتخافين اسويها
الحجية جميله: صمي حلگچ واسگتي يلفينا كل الخير ولي منا ولا تلحين
احلام : عمه انه حاسه اكو شى اخافن بنيتي مسويه مكسوره وروح عمي البت مامسويه شى
جنه : يمه خلي نفتهم شكوو وانه مامسويه شى

الحجية جميله: امج تثرد بصف الماعون جنها عجينه مختمره من خفت يله اكعدي واسمعي شراح اكولن لبنيتچ عبن اعرفنج ماترتاحين اله تعرفين شكوو
احلام : اي والله ياعمه اموت اذا مااعرف شكووو اضلن ارجف
الحجية جميله: كبر اي والله كبر اسكتي نسيتيني شريد احچي هاااا يمه جنه ابن عمج مازن يريدج مره ليه ترضين لو لا

احلام : كللللللًوش
الحجية جميله: ايا والغسل تسودنتي
احلام : عمه تقبل چا هو بكيفها
الحجية جميله: وحگ علي اذا ماسگتي اكسرن العوجيه عليچ هاا حبوبه
جنه : الي يشوفه ابويه انه موافگه عليه
الحجية جميله: بيها الخيه يمه هسه هلهلي يلمصخمه
احلام : كللللوش واهوس فرح گلبي يوم دكن طبوله فرح گلبي يوم دگن طبوله كلللللوش

أيه : اليوم خطوبه مازن وجنه يمكن بيومها هي اسعد وحده بالدنيا عكس مازن جان جداً هادئ والي يصفن على عيونه يحس كل الالم بيهم
لبسها الحلقات وعلت الهلاهل والكل فرحان ويهوس اله هو ساكت ويباوع بالوجوه

اني لاول مره البس فستان
ماما اشترته اليه جان لونه نيلي (ازرق ) طوخ وبيه شذر ناعم وطويل والحلوو قياس صغير يمكن على قبل هذا القياس ميدخل بنصي فتحت شعري وسرحته وحطيت ماشات على شكل وردات ناعمات كل الي يشوفني من اهل بيت عمو عماتهم وبنات خالاتهم ميعرفني وماما تمشي وتصلي على محمد باوعت على شكلي بالمرايه صدوك طالعه حلووه بيومها اجه بالي ابراهيم زين ياترى لو يشوف شگلي شيكول وابتسم وارجع اتذكر كلام عمه فضيله تطفه فرحتي
واني امشي مااحس غير واحد يصير گبالي باوعت اهووو انت
منير : ولج طالعه تخبلين هذا الحسن وين جان مضموم

أيه : انت تبقى هيج فاشل
منير : شنوو احترمي نفسج
أيه : شحترم وانت محترمت حرمه بيت عمك وحاولت تعتدي على بنته
منير : منيلج هذا الحجي
أيه : اباوع عليه صار احمر ويرجف من الصدمه
أيه : جنت كاعده استاذ وسمعت كولشي الله لايوفقك ليش ولك مو هاي بت عمك
منير : تعالي ويايه
أيه : هد ايدي لااكسرها الك
منير : گتلج تعالي ويايه وجرني حيل وطلعني للحديقة البره واني ارجف واخاف منه بس مكدرت اصيح حتى لتصير هوسه بعدني جبانه واخاف من خيالي
بس سويت نفسي قويه كدامه خير شرايد
منير : شوفي ايه اني ماانكر جنت معجب بودق وقوته وجانت لحظه شيطان الله شاهد ورحت واعتذرت مكان المره اثنين ومستعد اعتذر ١٠٠ مره بس المهم تسامحني وانتي هم تسامحيني

أيه : اني مالي دخل انت بالنسبه اليه اعتبرك هسه انذل واحد بالدنيا والي سويته بودق مااسامحك عليه ليوم الدين وجان يلزم ايدي جريتها منه ومااشوف غير الحجيه وعمه فضيله فوك راسنه
الحجية جميله: هااا ولك يمصخم چا هيج تختلي بت عمك
منير : شبيج جده ماكو شى
الحجية جميله: شون ماكو شى وانت حاصرها بالظلمه وحيدكم
أيه : بيبي والله ماكو شى كعد نسولف واني ارجف واحجي ذوله شبيهم
فضيلة : تسولفين بلحديقة الورانيه وحيدكم وايد بأيد
أيه : دمعت عيووني شيقصدون شفت ماما طلعت مااعرف منو صايحها ركضت بحضنها
يمامه : شبيج ماما
أيه : مااعرف ماما شو عمه وبيبي يحجون عليه لان واكفه ويه منير
يمامه : شكوو عمه شصار
الحجية جميله: اسمعي يمامه بنيتج گبرت وانتي تعرفين وضعها ومايصير تختلي بأبن عمها لوحيدهم
يمامه : عمه ياوضع دخيلج الله البنيه بعدها طفله كاافي امي ايوته اسكتي لتبجين
فضيلة : خيه يمامه مايصير الولد شاب وهيه شابه چا يصير هيج واكفه وايد بأيد وبلظلمه والوادم كلها هنا لو شايفهم احد شيكول علينا
أيه : والله ماما هو لزمها وجريتها منه ابجي واني بحضن ماما

يمامه : احجي منير ليش ساكت
منير : شكول عمه
الحجية جميله: چا شيحجي بعد انه اصيحن حامد احسن ليه ماارضى بهاي المهزله

أيه : كمت ابجي وارجف  دخلنا جوه واشوفهم يلوبون يردون بس الناس تروح ويستلموني وفضت الخطوبه وبليل كبت الهوسه واني بس اباوع بالوجوه شفت ماما مثل اللبوه المجروحه بنص اسود تحارب حتى تحافظ على طفلها
حامد : يمه سدي الموضوع ابن عمها واكف يمها لاتكبريها
الحجية جميله: شون مااكبرها والبت واكفه وشوي وتصير بحضنه حتى ايدها بأيده شنكول للوادم چا تعزينا وتصخمنا يمه حميد
حامد : بويه ايه صگد هذا الحجي
الحجية جميله: چا تجذبني يمه حميد
حامد : يمه اسكتي واليرحم والديچ خلينا نفتهم من البت

أيه : ارجف واحجي واحس الكل تاهميني بشغله موزينه والله مسويت شى عمو
يمامه : احجي ماما اني يمج لتخافين محد يكدر يلزم شعره منج
أيه : من الخوف اغمى عليه ومحسيت غير ماما فوك راسي وتبجي والكل داير مدايري وتعيط ماما وتكول
يمامه : قسماً بالله بنتي اذا صار بيها شى اگلب الدنيا
حامد : يمامه حسچ مااهيسه شنهي ماعندج احترام انه مو واكف
يمامه : متشوف الي سوه بنتي والله متفقين عليها شطلع امك وفضيله بره بهذا الوقت وعايفين الناس والمعازيم
فضيلة : شنهي خيه مامرجيه منج هيچ تهميني چا فوك مااخافن على بنيتج
حامد : انتم ماخذين الموضوع بعياط شنهي ماعدكم احترام الي تفچ حلچها هسه وروح ابوي اطگها خلي نفتهم السالفه وانت لك احجي لا تسكت شعندك ويه بت عمك
منير : عمو من رخصتك اني اريد ايه واطلبها منك تصير زوجتي خصم لكل الموضوع
أيه : طفرت من مكاني وعطت لو اموت
حامد : بويه على كيفج
يمامه : على كيفج بنتي محد يجبرج وانتي بعدج صغيره وانه ماازوجج هسه
الحجية جميله: چا هاي المسودنه تصيح لو اموت وذيج العگربه تصيح لو اموت عساچن چا شبيهم ولد فاضل يكرصوچن

حامد : البت صغيره وانت هم بعدك ماكملت دراستك
منير : بس خطوبه لحد متخلص سادس
أيه : ما عفيه مااريد صاحت بيبي لعمو حامد اخذته وطلعت بره الغرفه

الحجية جميله: يمه حميد تعال ليه
حامد : هاا يمه
الحجية جميله: يمه چا انت نسيت وضعها للبت هاي منهي ياخذها خلف الله على ولد عمها يستر عليها
حامد : البت صغيره يمه والي صار قدر ونصيب وصار ومالها ذنب
الحجية جميله: اعرفن يمه مالها ذنب عبن مسكينه وربك دزلها الستر لاترفض الستر يمه
حامد : انه مااكدر اجبرها على شى

الحجية جميله: چا شنهي يحميد صار گلبك رچيج وين وليدي الچلمته ماتصير اثنين وزلم مشوربه ماتردك چا بت بكد الشبر ماتكدر عليها
حامد : يمه البت مكسوره وفقيره ليش نكسرها بعد
الحجية جميله: چا نسترها ونكسب بيها اجر وثواب هاي كسرناها يمه فكر بيها ولد عمها ستر وغطا عليها واذا مو اليوم باجر هيه مرجعها ليه چاتصير هسه ليه احسن ماتطلع مثل اخيتها وادولب بينا وماترضى تزوج ويضلن اثنينهن بايرات وذني بنيات والبنيات مالهن غير الستر حميد

حامد : اشوفن يمه
أيه : بيومها ادخل مازن وسد الموضوع اقلها كدامي بس احس الوجوه مو طبيعيه وثاني يوم الصبح عمه احلام صاحت ماما واخذت علاوي وراحت وبس اني وهمسه بالبيت اجتي عمه فضيله النا للبيت ترجف وتبجي
هااا عمه
يمه ابوس ايدج ارضي بمنير
أيه : عمه والله مااريد اتزوج والله بعدني صغيره
فضيلة : اقلها ارضي بالخطوبه
أيه : عمه دخيلج عوفيني مااريد وجان تنزل تريد تبوس ايدي وترجف وضعها ابد ميطمن حسيت على لحظه راح تنجلط وخفت لتموت
أيه : زين شنو ذنبي اتزوج منير اني مااحبه ولا اريده
فضيلة : زين خطوبه هاي الفتره وزواجكم وره سنين الف عمامه تنگلب وبذاك الوكت عوفي لاتزوجي

أيه : وشراح استفاد انحسب عليه رجال وخطوبه
فضيلة : يمه احلفنج بأمج ارضي بس هاي السنه وراها انه اوكفن وياج
أيه : چان وضع عمه كولش مريب كتلها الله كريم
فضيلة : يمه انه احبنج ولمصلحتج احجي ومنير يناسبج بنيتي فكري بيها مالج غير ولد عمج ستر الج
أيه : دنجت والدموع بعيووني مااشي عمه
فضيلة : اروحن فدووه للبنيات التسمع الچلمه
وباستني وطلعت
اجتي ماما خطيه مبينه جانت تبجي لان اكيد مستلميها هناك لان كل شويه يذكروها بوضعي ومتكدر تكولها بنيه تخاف ليطلبون كشف مره ثانيه واني كتلها اذبحيني ولا تكشفيني على طبيبه ثانيه
لتبجين ماما
يمامه : لتخافين امي لواعرف اخذج وارجع بيج لبغداد ولا اخليهم يغصبون عليج
أيه : مراح يعوفونا بحالنا يووم
يمامه : مو بكيفهم لو اعرف اضحي بكولشي ولا اضحي بيج لتبجين
أيه : اني موافقه على الخطوبه بس خطوبه منا لحد مااخلص سادس
يمامه : لا اكيد تخبلتي
أيه : لا يوم هذا احسن حل راح ترجع المشاكل وبيبي وعمه مراح يجوزن وكل شويه مذكراتج ومذكرات عمو بوضعي خلي انسكتهن هسه لحد متنحل
يمامه : شوفي ماما لو اعرف اعوف حامد ومااعوفج تسوين شى متريدي
أيه : لا يوم اريده وحالياً هذا انسب حل روحي لعمي وكوليله موافقه بس خطوبه حلقات وبس وهم اخلص من نك عمتي فضيله
يمامه : شبيها عمتج
أيه : مابيها يووم فدووه كوليلهم موافقه 

وبدت المشاورات وبقت ماما مصره متوافق وعمو حامد وكف بجانب ماما بس الكلام اشتد والي لازم ماما وعمو وضعي وكله السبب مني لو راضيه بالفحص مجان صار كل هذا واسكتهم خوفي وطيبتي بوقتها هو الي دمرني وهم بوقتها عمتي لعبتها صح وصارالي لا علبال ولا على الخاطر وقبل خطوبتي او جنازتي  اعتبرها بيومين وجان يدخل وبدخوله هز البيت هز وهز كياني وحالي واشتغل الطلق شكووو

ابراهيم طلع من السجن

يتبع ...

عن حال ابراهيم اتكلم

لو جان طبعك وفي
شوكك الي يرجعك
لو جان حبك نقي
ليلي ومخدته تلوعك
بحلمك جم مره سافرت
وماخذ من وعيونك وعد
تبقى رفيجي بالدرب
نمشي ونكمل بعد
بس وسفه كلشي خرب
وكلش بأحلامي ضعت
من فززوني الصبح
ولكيتني  مودعك
وين العهد شو خنت
كظيت عمري اشتري
وتاليها اني انبعت؟

تجاوبه ايه
ارجوك افهم تره
مجبوره انا عالبعد
بعدك ابالي حلم
وبعده الكلب عالوعد
رادتهم مو رادتي
ورادتي وياك انسعد

يجاوبها
يالخاين كلشي عرفت
وماتسوه نحجي بعد
من عيني ما طاح الدمع
طاح الفرح والسعد
ومبروك عالراودك اله
طعنه واجتني معدله
بس كلي من فرحو هله
ما كالو ما عندي احد ؟؟؟

بقلم ام حيدر (شكراً قلبي )