رواية سجينة الروح الفصل الثلاثون 30 - بقلم ريام هادي

سجينة الروح
للكاتبه Reem
البارت التاسع والعشرون

بارت طويل لعيونكم ☺️

(لسان حال ابراهيم )

كالو راح منك كام ينساك
كلتلهم وفي ومايوم ينساني
كالو مايريدك راح للغير
كلتلهم أبد مافكر بثاني
كالو كافي باسمه تكتب أشعار
كلتلهم على اسمه عاكد لساني
كالو مو شماته كلوبنه عليك
كلتلهم شماته تشوف باحزاني
كالو راح يكتلك طول الفراك
كلتلهم فدوة أموت وهو دفاني
كالو كافي عمي بطل وتوب
كلتلهم راح أظل لشوفته متاني
كالو حجة عنك حجي أشكال
كلتلهم يحن كلبه يريد يلكاني
كالو غربة راح تعيش للدوم
كلتلهم دفو صدره يصير عنواني
كالو هذا مو حب انت مجنون
كلتلهم سجن كلبي وصار سجاني.....

حامد : شنهي فضيله تهدي خلي اسمع زين
فضيلة : الحك خويه امك لو تلحك عليها لو لا
حامد : وكفت على حيلي انه جاي جاي
يمامه : شكوو حامد شصار
حامد : امي يمامه تعبانه
يمامه : وين رايح هسه شوف ساعه بيش غير ممنوع تجوال منو يخليك تطلع هسه
حامد : چا شون غير اروحن هاي امي يمامه اخافن يصير بيها شى وانه مو يمها
يمامه : الله يستر بس عفيه شون تطلع بهل الليل
حامد : اطلع لزم اطلع
وجان يندك التلفون فضيله وانه رجولي (رجليه) ماعانني (ميحملني) كلت راحت الحجيه مني
هااا فضيله
فضيلة : حامد خويه
حامد : احجي علي حسچ مااسمعنج زين ليش تسولفين على كيفچ
فضيلة : مااكدر اعلي حسي اخافن امي تسمعني اسمع خويه امك مابيها شى جنها العافيه بس وروح ابوي هيه گالتلي هيج احجي
حامد : الدم صعد لراسي صگد تحجين وليش
فضيلة : عبن انت تروح لبغداد وتريد تشوف وليدك علاوي وكالت گليله داموت حتى يرد وبيده علاوي اشوفنه
يمامه : خير حامد احجي مو گلبي وكع
حامد : ماشي خويه فضيله روحي هسه وانه اعرفن شون اتوب الحجيه هيج تهبطني عليها
فضيلة : خويه رحمه لأبوك لا تكللها خابرتك انه طلعت منها وگلت اخابرك عبن اعرف راح يضل بالك واخافن عليك من الطريق والدنيا ليل
حامد : ماشي روحي ليها وعينج عليها وانه باجر ارد للعماره
فضيلة : مودع بالله وسلملي على يمامه وبوسلي وليدك

يمامه : احجي فدوه شصار
حامد : اوف الحجيه فديوم تجلطني
يمامه : اسم الله ليش
حامد : گلشي مابيها وتريد تشوف علاوي وانه اهبط عليها واخذ علاوي واروحن ليها
يمامه : ههههههههه والله ياعمه عليها سوالف وخطط اكبر مخطط امريكي مو مثلها
حامد : وانه من وراها حتى راسي راح يطگ خفت لايصيربيها شى وانه مو يمها
يمامه : سلامه راسك گلبي شوو تعال افركه الك لزمت راسه وتمدد بحضني وافرك راسه بهدوء
حامد : اوف ياايدج كلشي بيج يريحني
يمامه : اهم شى راحتك گلبي
حامد : يمامه
يمامه : عيونها
حامد : انه اريدنج يمه تعبت وبعدج ماخذ حيلي
يمامه : مو گتلك ياگلبي بس اصبر السنه الجايه والتريده يصير
حامد : چا انه اصبر سنه بكبرها شون ترضيها متت بهاي السنه

يمامه : اسم الله الرحمن من عمري على عمرك لتكول هيج لتصعب الامور عليه فدوه لگلبك انت تحملت مبقى شى
حامد : چا بس انه مكتوب عليه تحمل چاانه ايوب حتى اكضي العمر كله صبر
يمامه : بسته من خده فدووه ابو علاوي تحمل لخاطر طيرتك
حامد : چا انه شمصبرني غير طيرتي
يمامه : بس اني اريد شى منك اذا رجعنا
حامد : شنهي تامرين
يمامه : مااريد ارجع بالبيت الجبير مااتحمل الهوسه الي بيه لازم نستقل بيت وحدنا بناتي كبرن ولد عمهم موجودين وناس طابه وناس طالعه مااريد ارجع لنفس المأساه
حامد : تعرفي انه عندي بيوت وخير من الله بس هذا بيت ابوي شون اهده (اعوفه) والكل بيه
يمامه : حتى لو تبني بيت بصف بيتكم المهم بيت الي ولجهالي فدوه حامد اريد استقل بحياتي مااريد ارجع للهوسه والضيم الي شفته قبل
حامد : سهله ياعيون حامه انه احلنها المهم تردين وياي أكول

يمامه : كول گلبي
حامد : مااشتاقيتي
يمامه : شنوو
حامد : لحضني
يمامه : هههههههه والله عليك سوالف اني بكل لحظه اشتاقلك بس يله كوم نام وراك طلعه من الصبح
حامد : تعاي بحضني اريدن انامن على ريحتج مشتاقلها
يمامه : بقى الليل كله حامد حاضني ونايم ويشم بشعري ويبوسني بس اني جنت بغير عالم جنت افكر شون راح اقنع البنات برجعتنا للعماره وخاصه ودق واني وعدتها نبقى بغداد اوف احس روحي داخله بحرب ومااعرف نتيجتها شنو باوعت على حامد الي حاضني بحب ومابيده يعوفني واكول اني ربحت حبك بس اتمنى مااخسر بناتي بسببك

أيه : من يوم الي عرفت حالتي واني نفسيتي كلها تغيرت حسيت انولدت من جديد جانت الفرحه ماسايعتني حسيت بأمل بان اعيش حالي حال البنات وبديت اشد حيلي بدروسي وكدرت اغير كل درجاتي طول هاي المده واني بعدني ملتزمه ويه الطبيبه النفسيه انقطعت بشكل تام عن ابراهيم ومااعرف السبب احس من اتصل بيه بذنب لان اني السبب بدخوله للسجن تمنيت يعرف بحالتي ويسمع صوتي بس متجرأت اتصل وجنت اسمع اخباره من عمو حامد من تسأله ماما عنه يكول زين ومنتظر رحمه الله وعمي حامد ديحاول بكل الطرق يطلعه بس يراد وقت اكثر جنت اموت قهر واتمنى يطلع وادعي رب العالمين يبرد گلبه لان الي سواه اليه محد يسوي وهو السبب اني هسه عايشه ومابيه شى

يمامه : كعدت الصبح حامد حبيبي اكعد
حامد : صبحج الله بالخير حبيبه
يمامه : صباح النور گلبي يله ساعه ٥ ونص هم يله
حامد : اي هسه كايم ولو حضنج مو مال واحد يكوم منه بس مجبور
يمامه : ههههه لتدلع بس اكولك شى ليش مااجي وياك ناخذعلاوي ونروح للحجيه
حامد : صگد تحجين تكدرين
يمامه : اي ليش مااكدر الحمدلله صحتي زينه وعلاوي زين والاربعينيه طلعت نروح هناك هم الحجيه تشوفه حتى تبطل افلامها ههههههه وهم اشوف فضيله والبنات بس انت بيك حيل ترجعنا باجر
حامد : چا ليش مابيه حيل
يمامه : والله من تحجي تحسسني العماره بالشارع الورانه تروح وتجي
حامد : چا الي يريد الحلو يصبر على مره
يمامه : اكوم اكعد البنات يحضرون نفسهم حتى منتأخر
ودق : اني مااروح ابقى هنا
يمامه : بنتي هيه كلها يوم ونرجع نزور بيبيتج واهل ابوج ونرجع منتأخر
أيه : اني هم مااريد اروح
يمامه : انتي الثانيه شجاج
أيه : اخاف اروح هناك
يمامه : بنتي ايوته لازم تكسرين حاجز الخوف الى متى ياامي لخاطري ماما امشي عمو يزعل اذا كتله البنات ميرحون
ودق : نرجع مو نبقى هوايه
يمامه : كتلج باجر نرجع
ودق : يله ايوو امشي نغير جو وهم نشوف السلطانه مسعده
أيه : هههههههه انتي راسج وراس مسعده اله فد يوم بيبي تشويج بالتنور من وراها
ودق : لعد شلون احرك گلب بيبيتج بحبيبتها ورفيجه دربها على كولتها ههههههه
يمامه : يله كومن بدلنا وكعدن اختجن بسرعه حبيباتي بين مااروح احظر الريوك

أيه : طلعنا والطريق كله صافنه واتذكر ايامي الي انقضت هناك وشلون اجيت من سنه من العماره منتهيه وانسانه ميته قبل منطلع طلبت من ماما ابد متفتح موضوع روحتي للطبيبه مااريد يرجع ينفتح حتى لو مابيه شى كلت اخاف ميصدكون ويدزوني على طبيبه ثانيه وتصدمني بكلامها ابقى على كلام الاولى وكلي امل افضل مما انصدم وتوسلت بيها وافقت
وصلنا بعد عناء طويل الجو بارد واحنا بنصف شباط سنه ٢٠٠٨ بعد ٣ ايام وتبدي المدارس جانت عطله نصف السنه لكينا الكل منتظرنا لان عمو بلغهم واول موصلنا ذبحو جوه رجل ماما طليان ٢ واني طفرت خايفه لزمتني عمه فضيله
فضيلة : اسم الله يمه تعالي بنيتي لتخافين
يمامه : اسم الله هاك حامد اخذ علاوي خلي اشوف ايه شبيهه
أيه : ارجف واحجي ماكو شى ماما لتخافين
يمامه : شون مابيج گلبي وانتي ترجفين
أيه : هسه تروح الرجفه لتخافين
هدأت شربوني مي وعصير وضعي استقر واجتي جنه تسلم عليه وكعدت يمي ونسولف نستني المنظر الي شفته

حامد : هاج يمه هذا علاوي حتى تبطلين سوالفج
الحجية جميله: اللهم صلِ على محمد وال محمد يمه يبعد رويحتي يعلاوي كضيت عمري گله متانيتك وگلت بس لا اموتن ومااكحل عيني بيك
يمامه : اسم الله عليج عمه
الحجية جميله: تعالي ليه ابوسنج
عبن جبتي الوليد وطلعتي سباعيه
يمامه : ههههه واني هم ابوسج وبستها من ايدها وراسها
حامد : يمه بربج هاي سالفه البارحه هبطتيني
الحجية جميله: انه جنت مريضه واليوم صبحت بخير چا غير ردت اموتن وردت وليدي جاري (يمي)
حامد : حجيه هاي دروبج مو عليه هاچ جنج العافيه شون مريضه بعد
الحجية جميله: چا الواحد مايمرض
حامد : يمه انتي ماجنتي مريضه انه اعرفنج بله بروح ابوي ماخفتي عليه بتوالي الليل ارد للعماره يصير علي شى بالطريچ
الحجية جميله: چا بس تعرف تروح ليها لبغداد بس ادك وهاهاهاها تركض عليها وماتكول ليل والطريچ لو عبن انه جميله مو يمامه
حامد : هههههههههههه والله ياحچيه هو انه اكدرلچ

بسگ يحميد وخليني افرح بلوليد لا ادوخني
حامد : معجبج الحجي صرت ادوخج
الحجية جميله: چا شون هسه اخذ مريتك وميلو مني اريدن علاوي اليوم بحضني اخذ بومتك مدري طيرتك وعوفولي الشيخ علاوي

يمامه : هههههه ماشي عمه تدللين
احلام : هله بالجاينه ومنور دارنا
يمامه : هله بيج حلومه وتبوس بيه
شون كيفج خيه والبنيات شونهن
يمامه : الْحٍمَدٍ للـّہ يبوسون ايدج
احلام : هموسه وينها حبيبت عمتها
يمامه : همسه تعالي مو الطريق كله خبصتيني على عمه احلام تعالي
همسه : هلو عمه اشتاقيتلج حيل
احلام : يبعد عمتج واهلها تشتاقلچ العافيه تعالي ابوسنج
يمامه : احلام صارت روحها بهمسه وهمسه هم كولش تحبها وطول مااحنا هناك متفارك حضنها

ودق : دخلت الهم سلمت على عمه فضيله واحلام وجنه وصلت للشيخه مديت راسي شفتها تناغي لعلاوي
هاا بيبي اجه الي اعز من مسعده
الحجية جميله: ها جميله الصغير اجيتي يم الطلايب
ودق : هههههه اجيت لخاطر مسعده اخاف محتاجه ضربه كتله دفره معدله
الحجية جميله: تعالي ابوسنج
ودق : دنجت ابوسها باستني وجان تلزمني من كصيبتي ااااخ بيبي ولج يمعكربه كضي مسعده وشوفي جميله شتعمل اشدنچ بلشجره واخلي الدواب (الحيوانات) كله ينطح بيج (يضربوج)
ودق : ههههههه العفو ماامد ايدي والله
الحجية جميله: اي هيچ صيري مره معتبره واركدي ولا وروح راضي اكضه لشعرج واحرك گلبچ عليه
ودق : يمه كله ولا شعري بطلت العفو عمي تريدين ابوس مسعده هم مستعده المهم شعري
الحجية جميله: اي هيچ تعاي ليه
ودق : مااا اخاف هم تجرين شعري
الحجية جميله: تعاي بت البومه چا انه لو اريدن اكض شعرج تكضيني تعالي اكعدي جاري

ودق : تقربت وكعدت بصفها
الحجية جميله: انتي كبرتي وصرتي مره وانه اكولن ليش ماتزوجين
ودق : شنوً على بختج بيبي وين كبرت بعدني صغيره
الحجية جميله: چا شطولج جنچ المسودن عبيس نفس الطول
ودق : عبيس منو
الحجية جميله: هذا واحد مخبل يفتر هنا بالديره چا شبيج من اجه اخذ اچل (اكل) وباك البطه مال فضيله
ودق : عزه بيبي عباس المخبل خلف الله عليج اني ويااه نفس الطول من امده حضج ودق ملكيتي غير عباس

الحجية جميله: چا شبيه اقلها مايرد الچلمه بشعره مثلج واني كلت انتي وياه نفس الطول ماكذبت
ودق : والطول شعليه بالزواج بيبي
الحجية جميله: انه اخافن عليج تبورين (تعنسين) وتضلين اهنا على افادي چا منهي ياخذج وانتي لسانج هاااطولاته اطول من عبيس

ودق : هههههههه مبين عندج عريس اليه بس لا العريس عبيس حتى تكمل لان اني كلشي اتوقع منج
الحجية جميله: لا ولج من دهر صابچ ياعبيس چا فوك ما الزلمه مدوهن ومسودن اسودنه بيج

ودق : هههههه اليوم بيبي خوش مستلمتني لعد منو العريس
الحجية جميله: زينه شباب بيت راضي الدغتور (الدكتور ) مازن
ودق : ههههههههه مازن ههههههه
الحجية جميله: يااا وسم كون احشن زردومج حش چا ليش تضحكين يسوه راسچ هذا دغتور وتتمناه الف بت
ودق : ههههههه يمكن مازن اخر واحد ممكن افكر اتزوجه
الحجية جميله: وليش يمه انتي وين تلكين مثله حليو ولسانه الشهد يطلع منه وكافي هو تربات حميد وليدي

ودق : بيبي اني ومازن نار وبانزين ومستحيل نتفق بيوم
الحجية جميله: والله الوليد عاقل اويلي عليج انتي
ودق : بيبي فدوه اروحلج سدي الموضوع هسه اليوم جايه اشوفج ليش تغثيني
الحجية جميله: فوكاها يلبايره زين ومنير هذا معدل ويضحك للهوا
ودق : خلي يولي هذا شنو اتزوجه هم عايزه
الحجية جميله: صخونه مال حصونه كون ولچ ياهي الي يعجبج بت البومه

ودق : هههههههه ولا واحد ومااتزوج من الاخير كاعده على گلبج
الحجية جميله: طركاعه السوده واطيح عليج ماتسمعين الچلمه
ودق : بست راسها بيبي حبيبتي هذا الموضوع انسي التهي بعلاوي ابن حامد ومسعده وانسيني بروح جدي
الحجية جميله: خايبه كومي مني لا وروح جدچ الحلفتي بيه اكوم اطگج واطلع ضيم گلبي گله بيج
ودق : هههههههههه كمت والله

وطفرت اركض واضحك على سوالف بيبي وجان انضرب بمازن ااخ
مازن : على كيفج شبيج تركضين
ودق : هلوو مازن شونك
مازن : الحمدلله على سلامتك شعجب نورتنا الست ودق
ودق : تغيير جو شونج دوامك شونه
مازن : بخير والحمدلله بشري هم وكعتي بمصيبه لا
ودق : ههههه ماطول شفتك الله يستر
مازن : خلف الله عليج
ودق : لا والله كعد اشاقه
مازن : كوليلي شبيج طلعتي تركضين من غرفه الحجيه وتضحكين
ودق : شتعرف بسوالف بيبي
مازن : وانتي مقصرتي
ودق : تريد تزوجني اتصور تكول بايره ههههه
مازن : شنوو
ودق : شبيك عقجت وجهك
مازن : المن تزوجج
ودق : اسمع النكته الاكبر تزوجني الك ههههه
مازن : وليش هذا الضحك وليش نكته ليش مبين مااعجب حضرت الست ودق
ودق : غابت الضحكه عن وجهي واستغربت وضع مازن شبيك مازن تره بيبي بكيفها تحجي
مازن : ليش اذا اتقدمت الج متقبلين بيه
ودق : انت شكعد تحجي
مازن : سألتج سؤال جاوبيني
ودق : اكيد لا طبعاً يحجي وصارت عيونه نار
مازن : ومنير اذا رادج
ودق : لا انت ولا منير ولا اي واحد زواج اني مااتزوج من الاخير ومن رخصتك عفته ومشيت صدوك ضوجني

أيه : طلعت اتمشى بالحديقة جان الهوا يخبل كعدت على المصطبه واتذكرت كل ايامي هنا ومعاناتي وصافنه واجتي عمه فضيله وبيدها التلفون
فضيلة : هاج يمه
أيه : شنو هذا عمه
فضيلة : ابراهيم يريد يسلم عليچ
أيه : انقبض گلبي لان مردت احجي ويااه گلبي يوجعني من اتذكر وضعه بس استحيت ارد ايد عمه واخذته منها وعافتني وراحت
خليت الموبايل على اذني واسمعه يكول

ابراهيم : ايوته احجي طگ گلبي وانه انتظر كلمه منج
أيه : الو شونك ابراهيم
ابراهيم : اوف من اشتعل ابراهيم اروح فدوه لصوتج ليش هيج ياروح ابراهيم هاي المرجيه منج كتلج اتمنى اسمع صوتج وتحجين ومتبشريني ليش يبت گلبي
أيه : دنجت خجلانه منه مكدرت اخابر
ابراهيم : اني احسب يوم يوم اسمع صوتج بيه وانتي تحرميني منه زين مفكرتي بيه كتلج اسألي عليه كتلج ولو خمس دقايق الكلمه منج ترد روحي هيج تعذبين روحي اهون عليج

أيه : والله موقصدي بس مااريد ازيد همومك مكافي انت بالسجن بسببي
ابراهيم : ايه انه لو انطي عمري كله الج اكول مقصر بحبي اتجاهج ليش هيج يبت گلبي يرويحتي هيج گلبج حجر على برهومج
أيه : كلامه يخليني اخجل بلزايد كولي شونك انت وشمدريك اني هنا

ابراهيم : خابرت على امي اطمن عليها سمعت هوسه يمها من سألتها كالت خطار ركزت بصوت عرفت عمه يمامه رجعت سألتها كالت انتم هنا زياره احس گلبي طار وحق ربج ممصدك كمت ارجف ولو تعرفين من كلتي الو شصار بيه احس جسمي كله رخه وكلبي راح يطلع من ضلوعي
أيه : سلامتك
ابراهيم : اشتاقيتلك يرويحتي شون شكلج هسه صار كالو متغيره
أيه : يكولون صايره حلوه وضعفانه
ابراهيم : انتي اصلاً احلى البنات ودومج عندي احلاهن واحسنهن انت بت گلبي ونسمه الي اداعب روحي وتنطيها الامان

أيه : اخجل من الغزل مالته واني مااكدر اجاوبه بس ساكته
ابراهيم : احجي لتسكتين
أيه : شأحجي
ابراهيم : اي شى سولفيلي عنج مرتاحه بدروسج شونج احد مضوجج احجي اي شى المهم اسمع صوتج
أيه : الحمدلله وضعي هسه احسن وتعلمت على المدرسه ومحد مضوجني وكمت امشي وكدامك صوتي واضح واحجي والحمدلله

ابراهيم : عساج دوم بخير
أيه :تدري قبل كم يوم سمعت الاغنيه الي غنيتها اليه
ابراهيم : ياهي منهم
أيه : مال قحطان العطار شكول عليك جانت كولش حلووه بس بصوتك احلى
ابراهيم : تردين اغنيها الج
أيه : كولشي منك حلوو غنيلي وبدا يغني وبنص الاغنيه حسيت بصدره عبره ومخنوك وجان يكطعها ويكولي

اني احبج ايه كولش احبج عايش هسه ومتحمل كل الي يصير بيه علمودج واكول يجي يوم وتقر عيني بشوفتها وتصير اليه راح تنتظريني
أيه : جفلت من كلامه اني ادري يحبني ويغارلني بس سؤاله وترني
ابراهيم : راح تنتظريني احجي اعرف اني مو مناسب الج وممكمل دراسه والحال على الكد بس يشهد الله عليه اخليج اسعد البنات واشيلج على راسي بس انتظريني

أيه : سمعت يصيحون عليه واجتي عمه فضيله بأتجاهي كتله اجوي لازم اروح
ابراهيم : ايه لتنسيني ودائماً خليني اسمع صوتج هوني عليه تعبي وضيمي
أيه : الله كريم انتبه لنفسك
ابراهيم : مودعه بالله يااغلى الناس
أيه : ابراهيم
ابراهيم : من فدوه لحلكج الي حتى اسمي غير شكل بيه كولي ياعيون ابراهيم
أيه : راح انتظرك
ابراهيم : اووويلي يابه ولج احس گلبي طلع صعد للسما ونزل انتبهي لنفسج يااغلى من نفسي
أيه : ان شاء الله مع السلامه
ابراهيم : مع السلامه ياحبيبتي وام بيتي

أيه : سديت التلفون والابتسامه بحلكي احس بشى جديد اتجاه ابراهيم اي اكو مشاعر غريبه مااعرف هيه شنو بس حلوه اجتي عمه فضيله وكعدت بصفي
هاا يمه سولفتي ويااه
أيه : اي عمه هاج هذا التلفون
فضيلة : يمه بنيتي اريدن منج شى ولا تفهميني غلط
أيه : كولي عمه
فضيلة : اريدن من تسولفين ويه ابراهيم لا تأملي بيج
أيه : شون مداافهم
فضيلة : شوفي انه احبنج والله شاهد عليه بس انه تعبت وانكسر ظهري على هلوحيد وانه عايشه انتظر ساعه ساعه يطلع من شدته ويوم مايطلع اريدن ازوجه بت عمه زهره
أيه : فتحت عيوني شكعد تحجي
فضيلة : بت عمه وتحبه ومن ثوبه ووليدي مايعرف طايش چا هو لو يعرف مصلحته مجان ذب روحه بتهلكه بس گلشي مكتوب وانه اتفقت ويه عمه وخطبت البت اله ويوم مايطلع ازوجها اله
أيه : نزلت دموعي بلحظتها افتهمت عمه متريدني اله لان مو بنيه ومكدرت اكولها على كلام الدكتوره ليش هيه مو تعرف شصار مو تدري بيه اني جنت مغصوبه وذوله الانذال كسروني

فضيلة : لاتبجين يمه انه احجي لمصلحتج ولمصلحته انتي محجوزه لولد عمج وابراهيم مايقتنع احجي الليل كله والنهار ومايفيد وانه اريدنها منج لاتنطي امل بيج كافي الصار بنيتي
أيه : بس اني مالي ذنب والله بلي صار
فضيلة : اعرف ليش انه مااعرف بس انه اعرف بمصلحته وزهره بت عمه من ثوبه وتكدر على الضيم وتلزم ظهره وتكون ام اوليداته وانتي بعيده عنه وماترهم تكونين مريته انه اريدن منج لاتنطي امل بشى وكليله ينساج انه اعرف انتي ماتريدي وتعتبري اخيج بس وليدي مسودن بيج وانتي بيدج تعقلي

أيه : شكول الها اكول هسه انطيته امل انتظره كتلها بس هسه كتله انتظرك وحطيت ايدي على وجهي وابجي
فضيلة : يمه ابوسن يدج ابعدي عن وليدي كافي الجرى انه مااريدن اخسره انتي عندج اهلج وامج وحياتج هذا يتيم ومنو اله ومايكدر يوكف بوجه الكل وياخذج اذا عنده معزه بگلبج اله وتريدين مصلحته انسيه ونسيه لاتنطي الامل بشى وكليله مااريدنك ابوس يدج بنيتي
أيه : العفو عمه وكمت حيل ابجي
فضيلة : لاتبجين يمه كلها نصيب ونصيبج ويه وليدات عمج وليدي ماله نصيب يمكم
أيه : مسحت دموعي وكتلها وهو شون تتوقعين يقبل
فضيلة : انتي بس ردي ولاتنطي عين وكليله انه احبنك مثل اخوي ومااريدنك شوي شوي ينسى ماكو واحد مات وره واحد

أيه : حاظر عمه
فضيلة : يحضرلج الخير بنيتي
أيه : باستني وكامت وكعدت ابجي مو عليه لا بجيت عليه لحد هسه صوته ولهفته بأذني شون ارده واني داحس بشى اتجاهه واقشمر روحي واتهزم منه بس اليوم من سمعت صوته حسيت گلبي نبض ويه كل همسه منه بس على كوله عمه لمصلحته لازم ابتعد عنه كافي الي شافه مني واني شايفتها لبت عمه زهره صدوك حلوه وتستاهله بس اني ليش مخنوكه ليش

يمامه : دخلت لغرفتي وشفتها على ً وضعها بس نظيفه ومرتبه وحتى اكو ملابس باقيه بيها انداريت على حامد هاي شنو الغرفه على حطتها
حامد : چا منهي يتجرأ يغير بيها هاي غرفتج وتظل طول العمر
يمامه : رفعت نفسي وحضنته حيل لان هو اطول مني وضخم وهمست بأذنه تدري اني كولش احبك
حامد : يمامه استري على رويحتج لا عبالج انتي هنا وهوسه ومااكضج تره انه روحي رجيجه ومااتحمل لمسه منج بس الله يعلم شون مصبر روحي عنچ
يمامه : هههههه هسه شگلت ياعيني بس گلت احبك
حامد : چا هاي گليله هاي تهزني هز جنچ تحارشين بيه كولي الصچ
يمامه : لا عيني لا اتحارش ولا شى اروح اشوف الحجيه شسوت بعلاوي يجوز الكاه كاعد بالديوان
حامد : الحجيه وتسويها
يمامه : ردت اطلع جان يجرني من ايدي وحضني حيل شبيك گلبي خوفتني بيك شى
حامد : انه احبنج وحگ علي احبنج بكد طلع النفس
تعالي شوفي شجبتلج وضامه گلت بس اجيبج هنا انطي الج بس ماطول اجيتي البسهن الج
وجان يطلع ست بتوت ذهب وزنجيل طويل بيه قران جبير ومحبس جانو حيل ثكال وحلوات باسني من راسي وكلي
هاي حلاوه سـْـْلامـْـتج
يمامه : كل متجيب شى وصحت حلاوه سلامتج گلبي بس ذني هوايه كولش ومبينات غاليات
حامد : مايغلى على طيرتي انتي ماتعرفين هنا (اشر على گلبه) شكد يعشگج
يمامه : واني هم كولش كمت احبك واتمنى نبقى هيج دوم وميصير شى يخرب سعادتنا
حامد : كولي ياالله لاتفاولين ويله ام علاوي نطلع اذا بقيت ثانيه بعد مااضمن اطلعج من الغرفه احبسج هنا طول اليوم
يمامه : لا نطلع وبسته من خده وظل يكمز واني اضحك طلعنا ورحت شفت علاوي بحضن الحجيه نايم ومتقبل تنطينياه توسلت بيها بس ارضعه كوه قبلت رضعته ورجعته الها وحلفت لحد منرجع يبقى يمها ومردت اكسر بخاطرها

ودق : مر اليوم بسلام بس مازن طلع وبعد مشفته اباوع على ماما مرتاحه هي وعمو بس اني وايه الي يشوفنه يحس هموم الدنيا كلها براسنه وايه بس تتصفن رجعنا ثاني يوم وتعبنا من الطريق وبقى عمو حامد يمنا ٣ ايام يله رجع للعماره رجعنا لحياتنا الطبيعيه بين بيت ودراسه وخلال هاي المده كلها مشفت لا مازن ولا منير اما منير من يوم الي اجاني واعتذر بلتلفون ومشفت جهرته ابد
ايه بس تقرا ومطلعتها الوحيده جانت يم الدكتوره النفسيه وعمو بالشهر يجي كم يوم ويروح وبدا علاوي ينشنش ويحلوو وحيل بيه شبه من ماما ودوم بوقت الفراغ نلعب ويااه خلصت السنه الدراسيه واني وايه بأمتياز ايه طلعت الاولى على مرحلتها وهذا الشى صدم الكل واني اصلاً الاولى وبدت مرحله الضيم السادس ومعاناته كامت ماما سجلتلي بالعطله مدرسين جنت مااحك شعر راسي بس اقرا وايه هم تقرا لان ثالث بكلوريا بس اهون مني

وبهاي الفتره جان يجي مازن يسلم ويروح واني ماانزله لو اتعذر بالف عذر المهم مااشوفه حتى منير اجه مرتين ومنزلت لا اني ولا ايوته بس ايه تسلم على مازن بس اني مااريد اشوف اي احد منهم المهم هسه انجح واكمل السنه واطلع معدل زين
وبيوم اجه منير عدنا وعبالي طلع نزلت وجان اشوفه كدامي
منير : واخيراً نورتي
يمامه : اعذرها ابني والله حتى اني مااشوفها من التعب والقرايه
منير : بس سلام مرايدين شى
ودق : هلو منير شونك
منير : بخير شنو السالفه يمعوده هو سادس
ودق : قابل اني مثلك ادور ستينات اني اريد معدل زين ادخل كليه من المجموعه الطبيه مو شون مجان
منير : حقج وتستاهلين انتي دوم شاطره
ودق : كام يبجي علاوي كامت ماما اله وهذا الخبل تقرب مني
منير : ليش متنزلين اشوفج لهاي الدرجه مطايقتني
ودق : اكيد مطايقتك متشوف مااطلع واسلم معناها مااريد اشوفك شنو هي كوه
منير : ودق اني اعتذر جانت لحظه شيطان والله متنعاد
ودق : هم عايزه تعيدها حتى هلمره اخلي عمي يذبحك ويعلكك
منير : ودق اني راح اطلبج من عمي مااكدر بعد اني اريدج
ودق : اياك والنبي اگلب الدنيا على راسك بابا اني مااريدك حس صير عندك كرامه لهاي الدرجه انت متحبني انت تريدني لان رفضتك
منير : لا انتي فاهمتني غلط
ودق : لا والله فاهمتك صح الصح وجان تنزل ايه جانت سابحه ولابسه برمودا وتيشيرت لونهم رصاصي وردي متدري منير هنا ولافه شعرها بالخاولي وهي بيضه والخدود طماطه وضعفانه صايره تجنن
وهذا الخبل فتح عيونه وهي تفاجأت بيه لا بيها تصعد ولا بيها تنزل احنا صح مو محجبات بس من يجي احد نلبس تراك لازم التيشيرت طويل او دشداشه مننزل هيج بس هي متدري وضلت واكفه على الدرج وهذا تخبل
منير : منو ولج هاي شصايره
أيه : هلو منير
منير : انتي ايه مستحيل
أيه : لا خيالها من يوم الي صار بودق من عنده واني مااطيق اسمع اسمه وتفاجأت موجود وضليت باهته مااعرف اصعد انزل بقيت جامده بمكاني
منير : تعالي خلي اشوفج ممصدك عيوني صايرن صاكه
أيه : عندي قرايه من رخصتك
منير : شويه اكعدي بس اشوفج وروحي لتخافين مااكلچ
أيه : اعذرني غير مره وعفته وصعدت فوك اركض

ودق : شبيك فتحت عيونك
منير : ولج صايره اختج صاكه صاكه ولا عرفتها
ودق : دوم هيه حلوه بس اكو ناس عيونهم فارغه ميمليها بس التراب
منير : اكيد اني
ودق : اكيد اكو غيرك
منير : بس متوقعت هيج متغيره هاي هيج السمن جان خافي هذا الجمال كله
ودق : لان انت عيونك فارغه وعبالك كل الناس مثلك تباوع على الشكل والجسم وينسى الروح لهذا مجنت اتشوف روحها لأيه بس جسمها مثل هسه لفت انتباهك جسمها وشكلها وبس
منير : اوكفي اكلتيني اكل شكلت اني
ودق : مكلت شى عيونك هيه الي تكول
منير : هااا شنوو غرتي
ودق : باوع هذا انت بابا شبيك من كل عقلك اغار عليك انت اخر واحد اصلاًيجي بالي واكوم اكمل قرايه انفعلي
منير : مو لسان رشاشه
ودق : باي منير وعفته وصعدت
اول مصعدت استلمتني ايه
أيه : انتي غير تكولين هذا الحقير هنا
ودق : هو اني هم تفاجأت بجيته والله
أيه : مردته يشوفني هيج
ودق : والله اني هم عبالي طلع وصار بوجهي يله خلي يولي لتهتمين
ارجع اقرا احسن اليه

مرت الايام وكان هدوء عجيب وكأنه الهدوء الي قبل العاصفه هيأت ماما النا كل الجوو للدراسه وجان البيت عباره عن مدرسه حتى علاوي بدا يزحف حابسته بالغرفه علمودنا حتى لنلتهي ويااه جانت

جانت ماما ونًعــٌٓمُٓ الام تسهر ويانا وحايره بكولشي يخصنا حتى تحضر جنطنا رغم كبار احنا مو صغار وملابسنه كشايه متخلينا نشيل ٢٤ ساعه تشتغل وحتى الاكل ليمنا تجيبه مهيأه جوو كامل للدراسه مقصرت لحظه ويانه وكل منشوفها تتعب نزيد بالدراسه حتى نرفع راسها وبدت الايام تمشي وبس نقرأ التعب سيطر علينا حتى عمو حامد من جان يجينا يحير شيجيب ويااه وخلصت السنه على خير واليوم منتظرين النتائج والگلوب ادك سريع

يمامه : دخيلك ربي لاتضيع تعبهن ياارب
أيه : ماما على كيفج ترجفين ان شاء الله خير
ودق : هسه ياماما لو خالتنا احنا نجيبها اله مازن
يمامه : والله اتفائل بهذ الولد مااعرف ليش اتذكر من جاب النتيجه مالتج اندكت الباب واني رجلي انتهت روحن افتحن الباب
ودق : اني اخاف ماافتح
أيه : هاي شبيكم اني افتح هلوو مازن تعال ادخل
مازن : السلام عليكم
ودق : هااا شطلعت
مازن : سلمي بالاول
ودق : صار اشهر مشايفه مازن ومن ارتباكي وخوفي من النتيجه حتى سلام مسلمت احجي يمعود
يمامه : احجي مازن مودمي نشف
مازن : مبروك ايوته ٩٤ معدلج
يمامه : كللللللش الف الْحٍمَدٍ للـّہ والشكر
أيه : طرت من الفرح وكمت اكمز واحضن بماما وتبوس بيه وتبجي
ودق : واني
مازن : مبروك ٩٦ معدلج
ودق : لا ليش
مازن : صدوك تحجين
ودق : والله لازم اكثر وكمت ابجي
يمامه : كلللللوش ولج ماما ٩٦ ومعاجبج
ودق : ماما توقعت اقل شى ٩٩ والله مجاوبه كل الدروس اجابه كامله
مازن : والله اتوقعت راح تكمزين من الفرحه
ودق : شكمز واني المعدل محابته
يمامه : حضنتها وابوس بيها ولكم انتم اليوم رفعتًو راسي اوف يابنات گلبي
ودق : بست راس ماما والله ياامي شمنسوي منجازي تعبج وسهر الليالي مالتج
أيه : بستها انتي احسن ام بالدنيا
ودق : باوعت على مازن دنج وكأن عيونه صار بيهم لمعه دمعه اكيد اتذكر امه حقه من يوم مطلعت وهو ولا شافها انداريت عليه حتى الطف الجو انقهرت عليه
يله عيني حظر نفسك
مازن : هااا لشنوو
ودق : لزميله الك بما ان هذا معدلي ميدخلني طبيه ادخل طب اسنان وانافسك
مازن : ههههههه وًٌيْــنج وين المنافسه
ودق : المهم حضر نفسك
مازن : من عيووني وهاج تفضلي
ودق : هاي شنو
مازن : هديه نجاحج
ودق : وشوكت اشتريتها وانت هسه جبت نتيجتي
مازن : جنت من زمان مشتريها لان ثاق بنجاحج
وهاج ايوته هاي هم مالتج
أيه : شكراً مازن فتحتها ساعه تخبل ماركه عااش. ذوقك
يمامه : تسلم ليش كلفت نفسك ياعيني
مازن : بلعكس قليل بحقهن رفعن راسنا
يمامه : افتحي هديتج ماما خلي نشوفها
ودق : فتحتها سوار ذهب ناعم كولش وبيه نجمه بطن نجمه وبنص النجمه الصغيره حرفي جان كولش راقي ونازك
تسلم مازن حلوو ذوقك
مازن : تدللين اروح اني
يمامه : وين تبقى على الغدا
مازن : لا والله لازم اروح لمنير اخذه ونشتري شغلات موصينا عليها ونرجع باجر ماالحك غير مره ان شاء الله
يمامه : والله تمنيت تبقى
ودق : ليش متبقى
مازن : لتخافين الايام الجايه هوايه مع السلامه

ودق : لبست السوار عجبني حيل وبيومها بقينا نركص اني وايه وهمسه وماما تصفك النا وعلاوي يكمز ويانا يكمز شويه ويوكع والضحك مالتنا تارس الدنيا بس احنا يمامه وبناتها مامكتوبنا الضحك دووم

وراها بأسبوع اجه عمو حامد حسيت وضع ماما مو طبيعي شكوو محد يحجي يمعودين احجو ماكو تالي اجتي ماما وصدمتني

يمامه : بنتي لازم نرجع للعماره
ودق : وكفت على حيلي شنوو ماارجع لو اموت
يمامه : بنتي الى متى يبقى عمج هيج رايح وراجع هو يريدنا يمنا وبنالنا بيت بصف بيت جدج يعني راح نكعد وحدنا ومحد اله علاقه بينا مثل هنا بس هو موجود يمنا
ودق : شفتي يوم هذا الي قصدته يوم محبلتي بعلي وكتلج راح يضغط عليج ويرجعج للعماره وبوقتها كلتي ماارجعكم لو اعرف ادوس على گلبي وينج يله شو دستي علينا مدستي على گلبج
يمامه : بنتي صار اكثر من سنه من اتفقت ويه عمج نرجع للعماره بس ردتكم تخلصون بكلوريا والحمدلله خلصتو وكلها ايام ويطلع قبولج يعني مستقبلج ماشي متغير ومحد جبرج على شى
ودق : لا جبرتوني اعيش هناك واني لو اموت ماارجع للعماره تردين اخذي ابنج وروحي ويااه اني مااروح
يمامه : عطت حيل عليها اسمعي لج ترحين ورجلج فوك راسج انتي شنو هاي الانانيه الي انتي بيها مكعد تشوفين عمج صار سنتين يروح ويرجع بين العماره وبغداد مفكرني بيه
ودق : ممجبور محد ضاربه على ايده والسبب كله منج انتي الي رجعتي يدخل بحياتنا سنين تحاربين حتى نطلعهم من حياتنا وكتلتي روحج حتى نرجع هنا وترجع حياتنا طبيعيه تالي تسوين هيج بكل سهوله توافقين

يمامه : كافي ودق بديتي تتجاوزين حدودج
ودق : اني مو صغيره كبرت وكافي تحكم بحياتي اني كتلج ماارجع للعماره لو تذبحوني وبدا صوتنا يعلى ودخل عمو حامد شبيكم
اسمع عمو اني ماانكر جنت مااحبك ولا اطيقك ولا اطيق اسمع كلمه وحده عن اهل ابويه بس بمرور الوقت حبيتك بس مو معناه اضحي بحياتي لخاطر احد حتى لو احبه
حامد : اول شى حسج نصي لاتنسين عمج واكف جدامج وامچ وفهميني شنهي الصار اطلعي يمامه وعوفيني وياها
يمامه : عوفها حامد موبكيفها ترجع ويانا
حامد : اطلعي يمامه
تعالي اكعدي وفهميني شنهي التريدي
ودق : عمو اني مااريد ارجع وياكم افهموني مااحب اعيش هناك هاي حياتي ممستعده اضحي بيها لخاطر احد
حامد : وشبينا احنا منعجبج
ودق : عمو مو قصه متعجبوني بس حياتكم غير حياتي هناك راح ادمر
حامد : ليش هناك يمنه ماكو مهندسات ودكتورات ومعلمات ليش تحسسيني احنا ناس متخلفه ومانفهم
ودق : العفو عمو مو قصدي اني الي قصدته اني طبيعه حياتكم مااكدر الها اريد اكون مستقبلي
حامد : محد كاضج الي تريدي يجرالج وخير على كلامي لحد هسه انتي بعدج بالمدرسه انه لو اريدن ابطلجن وازوجن وغصبن عليجن بس انه عفتجن براحتجن وحتى هاي السنه كضيتها رايح راد لعيونجن حتى ماتعبن بالنقل وتأثرن وانه هم من حگي مريتي وابني وبناتي جدام عيني يشهد الله علي شون هاي الايام گضت وانه بعيد عنكم والانفجارات والاوضاع التعبانه وتحملت گلشي لجل تكملن دروسجن

ودق : مراح تفهمني ولا واحد بيكم راح يفهمني
حامد : شوفي بويه ودق انه احبنج واعتبرج بنيتي بس انه مااكدر اعوفج بوحيدج هنا انه اذا اريدن اوفرلج حياه هادئه هناك وبنيت بيت ليكم مثل متحبون والگليه التريديها راح تدخلين ليها
ودق : واذا طلع قبولي بغداد شون
حامد : اردنج هنا بيت جدج تدرسين وبالعطله تردين للعماره عايل وياج انه
ودق : لا حشاك عمو
حامد : بويه صيري هادئه ونبهه ولاتاخذين الوادم بالحس العالي انتي بت وحسج دوم نصي وتفاهمي ويه المقابيلج حتى لا يضيع حگج
ودق : دنجت بس اني مااحب هناك
حامد : تحبي بويه وراح تشوفين وضعكم الجديد شونه يله كومي حبي على راس امچ واعتذري منها وحسچ لاتعلي عليها لاتنسين نفسج
ودق : حاظر عمو
حامد : تعالي وين
ودق : اروح اعتذر من ماما وابوسها
حامد : وانه مالي بوسه
ودق : ههههههه وبسته من خده
حامد : يله ببنيتي السباعيه

ودق : رحت اعتذرت من ماما وهيه خطيه بسرعه سامحتني وكالت اليه
يمامه : صح موفيت بكلمتي وياج بس والله الظروف اقوى مني ردت احافظ عليكم وعلى حامد مااريد اخسر اي طرف منكم وكمت ابجي
ودق : لتبجين فدووه ماما
يمامه : والله اني احبكم اكثر من روحي بس شسوي هي الظروف اجتي هيج وتمنيت نبقى هنا وحاربت صحيح بس
ودق : هذا هو ماما لتبررين اني اعتذر عليت صوتي عليج وحقج كله من وره علاوي الاجكم لعب بحالنا لعب
همسه : لتكولين اجكم اصلاً احلى منج
ودق : هههههههه يابه احلى ولا تزعلين
أيه : هسه شون فضونا نحظر غراضنا لو لا
ودق : تنهدت اوووف نحظر يله
أيه : صح اني مقبلت على رجوعنا واختنكت بس ماكو غير حل اذا عمو موفر بيت وحياه هادئه هناك شنو الخلل بعد لازم تستقر ماما وعمو اني احبه خطيه اشوفه شون يتعب بالروحه والجيه بالساعات وشون يشتاق لأبنه وماكو غير نرجع ونلتم سوه وهو وعدنا بالاستقرار واني اصدك بوعوده

رجعنا هناك ودخلنا للعماره بعد ايام من التعب بنقل الملابس وغراضنا الضروريه لان مو كلها اخذناها دخلنا لبيتنا الجديد وجان فعلاً بيت يجنن وراقي بشكل بانيه دبل فاليوم وجبير وكل وحده بينا مسويلها غرفه جان البيت بصف بيت جدي بس احلى بعد وارقى على الطراز الحديث حتى ودق الي طول الطريق تبجي من شافت البيت وترتيبه راحت دموعها وكل وحده غرفتها مجهزها بأحلى الاثاث الي عرفناه الاثاث جان ذًوقٌ مازن عدا غرفه نوم ماما ذًوقٌ عموو حامد والبيت بيه نقوصات بسيطه كال عمو حامد لماما اني وياج نطلع نشتريهم ماكو النه يومين وبعدنا نصفط بالبيت وصاحو لماما ونسمع حجي وصوت عالي ركضنا شفنا بيبي تعيط وتكول هذا الخميس العقد

ياعقد بيبي
الحجية جميله: هذا الخميس نعقد لمازن على ودق
ودق : شنوو هو بكيفكم وكمت اعيط گلبت الدنيا والله ماازوج والنبي احرك روحي لو تموتون مو بكيفكم
حامد : شنهي حسكم واصل للديوان شبيكم
ودق : هاي تاليها عمو هيج تقشمروني وتجيبوني من بغداد لهنا حتى تزوجوني
حامد : منو كال
الحجية جميله: شنهي منو كال البت صار ثمنطعش سنه (١٨) سنه واحنا شرطنا تزوجت مازن لو منير بهذا العمر وهيه تناسب مازن اكثر وانه حددت هذا الخميس تزوج
مازن : شبيكم يمعودين
ودق : طبعاً تلكاك طابخها ويه بيبيتك اسمع لو تموت مااتزوجك لو تبقى اخر رجال بالدنيا
يمامه : بعياط ودق احترمي شجاج خلي نفتهم تخبلتي
ودق : اسمعوا مااتزوج واذا غصبتوني احرك روحي كدامكم
مازن : ومنو كال اتزوجج انتي
أيه : جفلنا على حجايه مازن وكلنا صفنا
حامد : بويه انت مو
مازن : اقاطع گلمتك يابه بخير اي اريد اتزوج بس مو ودق اني طالب منك بنتك جنه تكون مرتي

يتبع ...
مساء الـ🌹ـورد والعافيه حبايبي طبعاً اعذروني اذا مااجاوب على تعليقاتكم بس إٱللـِْﷻـِْﮭﮧ شاهد اقراها كلها واتفاعل معاها وجداً تسعدني سواء المفرحه او الحزينه وجداً احب تفاعلكم بالقصه ومني لكم كل الحب والود والتحيه لأحلى متابعين
فْـْ(😘)ـْْـْْدْيْـ🥰ـْتْكم
اختكم ريام