رواية سجينة الظلم والانتقام الفصل الخامس والأربعون 45 - بقلم سارة الشمري

الكاتبة : سارة الشمري🖤
لقد دب الهوى لك في فؤادي دبيب دم الحياة إلى عروقي.

حسان حاول يكسر الباب بس ماكدر ..
خالد جان جسمة وبنيتة اقوى من حسان ...
دفع حسان وضرب الباب بكتفة اكثر من مرة ..

بالضربة الخامسة انكسر الباب ..
دخلنة وشفنة رائد نايم على وجهة عالجرباية بالعرض وايدي جوة راسة ..
خالد ركضلة ويكعد بي ..
رائد فتح شوية من عيونة .. جان شبه نايم ووجهة احمر وعركان .. خالد يحاول يكعدة بس هو ما يرد عليهم بس يون ..
نزلت دموعي وكلت بخوف : خالد شبي رائد ..
امي كامت تبجي وهي تشوف رائد هالشكل ..
حسان : ما بي شي لا تخافون .. بس حرارتة مرتفعة ..
مددوه الولد عالجرباية وملابسة رطبة من شدة الحرارة عركان ..
حسان التفت علية وكال : بسرعة طلعيلة ملابس من الكنتور ..
حجيت واني اطلع الملابس وابجي : خل ناخذة للمستشفى مو احسن ..
خالد وهو يمسح وجهة بالخاولي : ما يحتاج .. هسة تنزل حرارتة .. ما نكدر نطلعة وهو بهالوضع والجو بارد ..
رحت بسرعة للمطبخ .. حضرت طاسة وبيهة مي وحطيت بيهة كم قطعة ثلج .. اخذت خاولي زغير ورحت ..
لكيتهم مبدلين ملابسة وامي كاعدة يم راسة وتقرة علي قرءان ..
خالد التفت علية وكال بعصبية : شجاه هيج فجأة قفل الباب وهيج صار بي ..
هزيت اكتافي بمادري .. مادري شجاوبة .. اكولة كلشي صار بسببي ..
حطيت الكمادات على راسة وبقيت كاعدة يمة ..
انتبهت لامي راسهة صار يتمايل ..
اشرت لحسان ياخذهة ..
حسان انتبه عليهة .. كام وهو يلزمهة من ايدهة : يمة كومي تمددي شوية ..
ام رائد : عوفني ماروح .. اضل يم ابني خاف يكعد ..
خالد : كومي يمة احنة نكعد يمة .. روحي ارتاحي ..
ام رائد : اذا يكعد صيحوني ..
هزيت راسي بأي .. هي دنكت على راسة وحبتة وطلعت ..
خالد جاب منشفة رطبة وحطهة على رجلي حتى تسحب الحرارة .. حسان كعد برة لان كال ما يصير هوسة يمة خاف ينزعج ..
خالد اخذ حباية البندول وكعدة ويحاول يخلي ياخذهة ..
رائد جان مثل السكران .. ما يقبل ياخذ الحباية لان نايم .. ووجهة مثل النار واحمر ..
اخذت الحباية من ايد خالد وتذكرت ان خاتون كالت من تمرضت مها حطتهة بمي وشربتنياهة ..
جبت ربع كلاص مي وحطيت الحباية بي .. حركت المي حتى تذوب ..
خالد اخذ الكلاص وشربة الة ...
وخر اللحاف منة وجاب جرجف خفيف وغطاه حتى لا يعرك ...
خالد : ميامين روحي ارتاحي .. اني ابقى يمك ..
ميامين وهي تباوع على رائد : لا انت روح ا .. اني ماعوفة ..
خالد يعرف ان هي تعاند ومستحيل تقبل تطلع ..
عافهة وطلع كعد يم حسان بالصالة ...
ميامين رجعت راسهة على تاج الجرباية وهي تباوع علي ودموعهة تنزل : اسفة يبعد اختك .. ادري كلشي صار بسببي .. لو وافقت ان ارجع لغزوان ما جان صار بيك هيج .. بس شبيدي هسة .. خاتون راحت من ايديك بسببي ..
صارت تبجي وتمسح دموعهة بس ماتكدر تسيطر عليهن وهي تشوف اخوهة واعز ناسهة بهاي الحالة ..
عدلت كعدتهة بخوف وهي تشوفة يطبك حواجبة وهو مغمض ويهز براسة ..
صار يهلوس بالحجي .. : خاتون ما تتزوج .. ماخليهة تتزوج .. فارس كال هي الي .. اني احبهة ماكدر بدونهة ... شلون تتزوج ..
خافت اكثر علي من شافت صدرة كام يصعد وينزل يتنفس بسرعة ..
لزمت ايدة وهي تحاول تكعدة ..
عصر ايدهة حيل ودموعة صارت تنزل .. وهو يردد بأسم خاتون ..
ميامين هنا خارت كل قواهة وصارت تبجي وتشهك ..
رائد وهو دموعة تنزل وطابك حواجبة بضعف : احبهة .. ليش تتزوجة .. والله هو ما يحبهة مثلي ..
صارت تمسح دموعة وتغسل وجهة وتقرة علي ايات قرءانية ...
شافتة غفة وهدأ وارخى قبضة ايدة الي لازمة ايدهة ...
وخرت من يمة بسرعة وشافت خالد وحسان كاعدين بالصالة ..
حجت وهي كوة مسيطرة : خالد اني رايحة لغرفتي .. واحد منكم يدخل يمة ..
عافتهم ومشت حتى ما انتضرت منهم جواب ..
دخلت لغرفتهة وقفلت الباب وكعدت تبجي بالكاع وتشهك .. جنت متوقعة ان ضحيت بنفسي علمود اخوي رائد .. بس هسة اكتشفت ان جنت سبب دمارة مو سعادتة .. ليش يربي هيج تسوي بية ..
والله ماتحمل اشوفة بهالحالة ..
ربي عاقبني بأي شخص الا رائد ..
كمت واني ابجي وسحبت تليفوني واتصلت على رقمة ..
غزوان بلهفة : ميامي ..
ميامين وهي تبجي وكوة يطلع منهة الحجي : غزوان .. اسفة والله .. ماجنت ادري راح تنتقم مني بهالطريقة ..
غزوان نزل من السيارة مثل المخبل وهو يسمع صوتهة هيج ..: ميامي يروحي شبيج .. منو وياج .. منو مزعلج .. بس كليلي منو ..
ميامين وهي تبجي : غزوان اني موافقة على شرطك .. مو انت تريدني ارجع .. خلص موافقة على كلشي تكولة .. اي شي تريدة اني موافقة علي وانفذلك كل طلباتك .. واذا تريد ارجع عذبني مرة ثانية بس الله يخليك لا تعاقبني بأخوي ...
غزوان وهو مو فاهم شي : ميامين اهدي يروحي .. والله مستعد اسوي اي شي تردينة بس دموعج لا تنزل .. خلص اني هم موافق على خاتون .. بس امسحي دموعج ..
ميامين وهي تمسح دموعهة : غزوان الله يخليك لا تخلي اي احد يدري ان اني رجعتلك علمود رائد .. لان اذا عرف ان اني ضحيت علمودة للمرة ثانية ماراح يسامح نفسة .. وراح يبقى مقهور ..
غزوان بهدوء وغيرة مكبوتة : تخافين علي لا ينقهر ..
ميامين : اخاف علي اكثر من كلشي .. واحبة اكثر من اي شخص ..
غزوان وهو راص على سنونة : واني ؟..
ميامين مغصهة بطنهة من كلمتة ماتدري ليش ..: انت ولا شي بالنسبة الي هسة .. وراح اكولهة الك للمرة الثانية .. اني راح ارجعلك بس علمود رائد .. صح مستعدة اسوي اي شي تريدة بس مستحيل ارجع احبك لو ذرة وحدة .. انت انتهيت من كلبي ومسحت حبك من هذيج الليلة ..
غزوان وهو يحس كلبة يعتصر وهو يسمع كلامهة الي عبالك مثل الابر وتغرز بكلبة .. : واني اوعدج راح اخلي حبي يرجع ينبت بكلبج من جديد .. واخليج تحبيني مثل ما اني احبج ..
ميامين بسخرية : هه سوي الي تريدة بعد ما يهمني .. المهم هسة اخوي رائد .. والباقي كلة يهون ..
غزوان : تمام .. خلي اخوج يحجي وية ابوي ويطلب خاتون منة ..
ميامين قاطعتة : لا بالاول انت تطلب من رائد ان ترجعني حتى لا يعرف ان وافقت علمودة .. يعني من ارجعلك وراهة بكم يوم يلة اكولة ..
غزوان بإبتسامة : ماشي .. التردينة يجرالج ..
ميامين : ماشي .. اني اروح هسة ..
غزوان بحب : ديري بالج على نفسج ..
ميامين : مو انت الي تطلب مني ادير بالي على نفسي ..
سدت التليفون منة وشمرتة وصارت تبجي ..
كعدت بالكاع ورجعت راسهة على طرف الجرباية ..
صارت تفكر بالي جاي وياه .. شلون راح تكدر تتقبلة بعد الي سواه بيهة ...
بدون متحس على نفسهة غفت على وضعهة ..

£££££££

بيت غزوان ..
رجع للبيت وكعد بالبلكونة والجو بارد بس ماهتم ..
بين فرحان ان ميامين راح ترجعلة وبين صوتهة وهي تبجي ماجاي يفارق عقلة ..
واخيراً حبيبة روحي راح ترجع لحضني .. واخيرا راح ارجع اشوفهة .. اشم عطرهة ..
رفع راسة لفوك وتنهد :اااااه يربي فدوة لاسمك .. ربي اطيني القوة حتى اخليهة ترجع تحبني من جديد واخليهة تنسى الماضي ..

مؤيد الساعة ١٢ طلع يريد يقفل الابواب ..
شاف غزوان كاعد بالبلكونة ..
حجة وياه من جوة : انت مخبل لو صاحي .. اكو واحد يكعد بهالبرد برة ..
غزوان باوع على مؤيد من فوك وحجة بفرحة : ياخي عوفني اني مخبل .. والله الدنيا مو سايعتني من الفرحة ..
مؤيد ابتسم على ابتسامة اخوه وكال : فرحني وياك ..
غزوان : حبيبة روحي وافقت ترجعلي .. باجر اكل لابوي يرجع يخطبهة الي من اخوهة ..
مؤيد بإستغراب : وشنو الي غير رأيهة وخلاهة ترجعلك .. اكيد عقلهة بي شي .. ولا اكو عاقلة ترجعلك بعد الي سويتة بيهة .. بربك ليش تريد ترجعلك ...
غزوان التفت على مؤيد : وانت شعليك .. يلة قفل بيبانك وامشي نام .. صايرلي حارس البيت ..
مؤيد ضحك علي : تصبح على خير ..
غزوان من ورة خشمة : وانت من اهلة ..

&&&&&&&&

بيت حافظ(ابو احمد)

الضلام والهدوء مالي الغرفة ..
فقط ضوة التليفون الي بوجهة هو الي منور الغرفة بشي جدا بسيط ..
دموعهة مثل الؤلؤ على خدهة تلمع وية ضوة التليفون ..
مررت اصابعهة عالشاشة وشهكاتهة متواصلة ..
دفنت وجهة بالمخدة وبجت بحرگة وتشهك وتحسهن طالعات من كلبهة ..
هذا حالهة كل يوم .. تنام ودموعهة على خدهة وهي تتأمل صورة .. وتكعد الصبح ما تبين لاحد ضعفهة ..
جوري مررت اصابعهة على صورة فارس وهي تحجي وية الصورة وعبالك صدك واكف كبالهة .. : اشتاقيتلك والله .. اشتاقيت لصوتك .. حتى لو  تكلي خوية مو مشكلة .. بس عندي المهم اسمع صوتك .. واشوف طولك كدامي .. حتلو تكرهني .. وتكسر كلبي .. المهم ما تحرمني من شوفتك ..

غمضت عيونهة وهي تمر ابالهة لحضات اخر لقاء جان بينهم ...

قبل وفاتة بشهر تقريباً ..

جوري ملت وهو تنتضرة بس تريدة يباوعلهة لو يحس بيهة ..
قررت تستسلم وتروح هي وتبوح بمشاعرهة الة ..
هي تدري ان هالشي اكبر غلط ومو صح بحق البنت ان هي تبادر بهالشي .. بس هي تعبت وهو تنتضرة .. من جانت طفلة وهي تحلم بي وكبر هالحلم وياهة وزاد هالحب الي بكلبهة وتحول لعشق ..
ابتدا هالحب من جانو اطفال وما يفهمون من هالحياة شي ...
والحجية خاتون حجتهة بكل شقة وية احفادهة : ولج جوري انتي خنيسة (هادئة) ولسانج ماكول .. ومحد يلوكلج غير مؤيد لان هم مثلج حباب ومو وكح ... الا ازوجج الة من تكبرين ..
فارس اعترض على هالشي وكال بعصبية وبراءة الطفولة : ماا .. مؤيد ما اخلي يتزوج جوري .. جوري ام عيون زرك اني اتزوجهة واحبهة ..
الحجية بضحكة : هايهية حبوبة بكيفك .. بت عمك وانت ادرى ..
ما جان يعرف ان هاي كلماتة زرع اول بذرة من هالحب بكلب جوري ..
صارت تعتبرة الهة .. اخذت كلامة على محمل الجد .. كبرت جوري وكبر حبهة بكلبهة ويوم عن يوم هالحب يزيد ويتعلق بفارس ..
اما عن فارس ف ما كان ذاكر هالكلام من اصلة .. وحتلو ذكروه بي جان يعتبرة شقاوة طفولة ..

جوري كبرت وحست ان فارس صار كلشي بحياتهة ما جاي تكدر تطلعة من كلبهة ...
وصعب شعور ان انت تحب شخص لدرجة تفدي بروحك بس هو بالمقابل حتى ما منتبه لوجودك ..
فكرت جوري ان تعترف لفارس بحبهة والي يصير خل يصير .. خلص هي تعبت من الانتضار ..

راحت بيومهة هي وبسمة لبيت عمهة .. طلبت من بسمة ان تروح بحجة تشوف خاتون ومها .. بس هي تريد تشوف فارس ..
كاعدات بالصالة .. هو دخل سلم عليهن .. مثل العادة منزل راسة وهو يسلم ومايكول غير خوية ..
والله تعبت منك .. شوكت تحس بية ..
شافتة صعد لغرفتة .. استغلت ان البنات مشغولات بالسوالف ..
اخذت تليفونهة بحجة ان تخابر برة ..
بسرعة صعدت الدرج .. وكفت كبال السويت مالتة .. وكلبهة يدك مليون مو بس الف ..
سمت بالله ودكت الباب .. بس ماكو ردت ..
فتحت الباب شوية ودخلت راسهة ..
لفحتهة ريحت عطرة الرجالي ...
حجت بصوت مرتجف : فـ .. فارس ...
ماكو ردت ..
فتحت الباب ودخلت لنص الصالة ..
رجعت نادت بأسمة مرة ثانية بس هم ما رد عليهة ...
اعتقدت ان هو طلع من البيت ..
فتحت باب غرفتة ودخلت .. الغرفة مرتبة والمكيف مشتغل بيهة ..
ابتسمت وتقدمت لنص الغرفة وهي تتأملهة .. ومأمنة ان هو مو موجود ..
فجأة وبدون مقدمات كمزت من انفتح باب الحمام  ..
التفتت وتصنمت بمكانهة وهي تشوفة بس بالمنشفة الملفوفة على خصرة ومدنك راسة وينفض شعرة بأصابعة ..
شهكت من شافتة .. هو رفع راسة بسرعة وشافهة ..
جوري بسرعة انطتة ضهرهة ..
فارس بعصبية : شتسوين هنا ..
جوري وهي تتلعثم بالحجي : اجيت احجي وياك ..
فارس بعصبية : وعلمود تحجين وياي .. تصعديلي لغرفتي ؟..
جوري : لان الموضوع مهم وماكدر احجي ..
فارس بعصبية : انزلي انتضريني جوة يم البنات واني هسة اجيج ..
جوري وهي تفرك بأيديهة : كتلك ماكدر احجي كدام احد .. يعني ماكدر احجي كدام البنات..
فارس بنفاذ صبر : روحي انتضريني بالصالة مالتي علما البس اي زفت واجيج ..
جوري دنكت راسهة وطلعت بسرعة من غرفتة وبقت واكفة تنتضرة بالصالة مالت السويت مالتة ..
ايديهة ترجف وجسمهة كلة يرجف .. تحس بأي لحضة راح ينغمى عليهة ..
ورة دقايق انفتح باب غرفة فارس وطلع وهو لابس تراك ..
اول ما طلع حجة بعصبية : انتي تخبلتي .. شلون تدخلين لغرفتي واني بيهة .. لو احد هسة اجة وشافج شراح يفكر ..
جوري بإرتباك : تأكدت ان البنات ملتهيات واجيت ..
فارس بعصبية : احجي بسرعة شعندج ..
جوري ارتبكت وحارت شلون تبدي .. : اااء ... فارس اني ..
فارس : انتي شنو .. احجي ولا تطويلين السالفة ترة بديت افقد عقلي .. شنو هالموضوع الي يخليج تجين لغرفتي وانتي ما عمرج دخلتيهة ..
جوري نزلت دموعهة وكالت بضعف : انت الي جبرتني اجيها بهالطريقة ..
فارس استغرب دموعهة وكال : ليش تبجين .. وبعدين اني شعلية ..
جوري تقربت منة وكالت : شلون شعليك .. يعني تريد تقنعني ما حسيت بحبي طول هالسنين .. ما حسيت ان اكو وحدة ميتة بس حتى ترفعلهة طرف عينك وتباوعلهة ...
فارس بصدمة : جوري شنو هالحجي هذا ..
جوري بإنفعال : لا تكولي شنو هالحجي هذا .. انت اخذت كلبي وعقلي .. مو بيدي .. ماكدرت اسيطر على مشاعري .. تعبت واني اشوفك ما مهتملي .. لازم تعرف اني شكد احبك ..
فارس بعصبية : جووري اصحي لنفسج .. مهما جان حبج جبير ما لازم تنزلين كرامتج وتجين بنفسج تعترفين بحبج .. وثاني شي اني مستحيل اعتبرج غير اخت الي .. ما عمري فكرت بيج بالطريقة الي انتي تفكريني بيهة ...
جوري تبجي وصارت تضربة على صدرة بحركة : ليش ما تحبني .. شنو الي ناقصني وميخليك تحبني .. شنو الي بية ما عاجبك .. مو انت جنت اتكلي انتي ام عيون زرك الي .. مو جنت اتكول احبهة ولان حلوة وعيونهة زرك من تكبر راح اتزوجهة .. ليش هسة تغيرت .. ليش صرت تكرهني ..
فارس رافع ايدي لفوك ويراجع لورى وهي تتقدم منة وتضربة .. ما يكدر يوخرهة لان مايكدر يلمسهة .. غيرتة ما تسمحلة بهالشي ..
حجة بعصبية : كافي جوري .. اني ما اكرهج .. انتي بت عمي .. وكلامي هذا كلتة بطفولتي وماجنت افهم شي .. وانتي ما ناقصج شي وتستاهلين الاحسن مني ..
جوري حجت بضعف وترجي وعيونهة بعيونة : بس اني اريدك الك .. ماريد غيرك .. ماريد الاحسن منك ..
فارس بهدوء : واني ماكدر اتخيلج زوجة الي .. اني بكلبي وحدة ثانية .. وبعد كم يوم رايح لاهلهة واخطبهة منهم ..
جوري حست كلماتة مثل السهم الي اخترق كلبهة .. تراجعت لورى خطوتين وهي تريد تستوعب كلامة ..
شلون اني انتضرة طول هالسنين وهو يحب وحدة غيري .. شلون تجي وحدة تاخذة مني ..
اموت قبل لا يجي هاليوم ...
فارس غمض عيونة بقلة صبر وكال : جوري اذا خلصتي كلامج اطلعي بسرعة قبل لا يجي احد ..
جوري مسحت دموعهة .. كافي اهانات .. وكرامتهة نزلت ...
تعدتة وطلعت من السويت كلة ونزلت ..

(الاثنين ما انتبهو للشخص الي سمع كلامهم لان جوري من دخلت تركت الباب مفتوح ..
مصدوم من الشي الي سمعة .. بلع ريكة بصعوبة ونزل .. )

من بعد الي صار .. جوري ولا مرة راحت لبيت عمهة .. لحد ما وصلهة خبر وفاتة وهي انصدمت وانهارت واضطرو يدخلونهة مستشفى ...

صحت جوري من هالذكرى ودموعهة على خدهة ..
اصعب شعور هو لمى تشتاق لشخص ميت .. انت تعرف بي ماراح يرجع .. بس مع ذالك تبقى تتمنى ان يرجعلك .. ولمن تحجي تحس ان يسمعلك ..

££££££

بيت ابو رائد

جانت نايمة .. فتحت عيونهة بصعوبة ..
فزت بسرعة وهي تشوف الضوة بعيونهة ..
يالله اني شكد نمت .. باوعت للساعة جانت ٧ الصبح ..
لا لا لا ماجان لازم انام هالكد .. كامت من مكانهة دخلت للحمام غسلت وجهة وتوجهت لغرفة رائد ..
شافت حسان وخالد نايمين بالصالة عالقنفات ..

مشت بهدوء لغرفة رائد فتحت الباب بهدوء ..
استغربت .. وين رائد ..
دكت باب الحمام شافت ان ماكو رد .. فتحت الباب .. ما موجود ..
حجت بخوف : وين راح ..

الكاتبة : سارة الشمري 🖤

يلة حبايبي توقعاتكم ؟

رائد وين راح ؟

ميامين وغزوان حيرجعون يحبون بعض لو لا 🤔؟

جوري حتكدر تنسى فارس لو لا ؟

انطلقو ....