رواية سجينة الظلم والانتقام الفصل الرابع 4 - بقلم سارة الشمري

الكاتبة : سارة الشمري 🖤

شيء يشجع الإثم مثل الرحمة.
وليم شكسبير

حسان ونفسة يصعد وينزل من العصبية ويحاول يهدي نفسة لا يهجم ويخرب الاول والتالي : شتريد لعد بالمقابل بلة

التفت علية وابتسم بخبث : اخــــــتـــــك ...

حسان وعبالك احد ذب علية مي حار طفرت : شنوووو ...

زياد الي كان طول الكعدة ساكت هم طفر : احتتترم نفسك واعرف الحجي الي يطلع من حلكك قبل لا تكولة
هو طفر وياهم وحجة بعصبية: حجيي اعرفة زين قبل لا احجي وهي كلمة وحدة عدكم خيارين ...لو اكتل اخوكم وعندي هذا انسب حل والي يريح كلبي .... لو تطوني فصلية حتى يبقى بالسجن وعدل واريد اختتتتة بالذااات ... وعدكم عطوة منا لبعد تلث ايام بين ما اسوي فاتحة اخوي ...اذا ما رجعتولي خبر وربكم وجلالة ما اخلي يعتب باب السجن الا جنازة
سحب سلاحة وطلع وكلهم طلعو وراه
زياد راد يلحكة ولزمة عمي : وييين رايح تخبلت ما تشوفهم شلون مسلحين غير ينخلونك نخل

زياد : يابة فدوة اروحلك عوفني ما تشوفة شيحجي
هالكلب هذا
حسان طلع وراح لسيارتة ولحكة زياد وعمة وراحو للبيت

قطع علي تفكيرة صوت الباب وهو يندك : تفضل

دخلت شهد وبيدها ملابس وهي هم كاشخة
حسان : ها شهودة
شهد : هاي ملابسك دزتهن ماما اتكول كويتهن خاف تريد تبدل
حسان : شكرررا يا احلا اميرة
شهد : اني اسمي شهد مو اميرة باوعتلة صفح وطلعت وطبكت الباب
حسان ضحك عليها وعلى خبالهة

بمكان ثاني بنفس السيارة

ميامين

صعد يمها بالسيارة : ها خوما تأخرت
ابتسمت: لا
كمل هو : يلة ارجعي نامي لان بعد كدامنة الطريق طويل
هزيت راسي بدون ما احجي ورجعت لوضعيتي غمضت عيني وحسيت الهواء البارد ضرب بوجهي
رجعت لسلسلة افكاري وكملت

قبل سنة

ميامين شفتهم من شباك الغرفة اجو ووجوهم ما تطمن بخير زياد عصبي وحسان بعد اكثر نزلت اركض ومباشرة فتحتلهم باب الاستقبال
صار حسان بوجهي باوعلي بنضرات ما فهمتها شنو

حجيت واحس كلبي راح يطلع من مكانة : حساان شصار .. شنو كالو
نزل راسة ودخل للأستقبال وزياد وراه عمي لزمني من كتفي ودخلني وياه : تعاي بابا هسة تفتهمين السالفة
دخلت واني كلبي صاير طبول كعدو
وكل واحد بيهم حالة مو احسن من الثاني
حسان كاعد وراسة بين ايدي ومدنك
زياد وجهة احمر من العصبية ونفسة يصعد وينزل ويباوع بالكاع
وعمي مبين بي التعب وقلة الحيلة ولازم سبحتة ويسبح بيها

دخلت امي للأستقبال وشافتهم : ها بشر يمة شصار وياكم ما طلع اخوك شكالو اهل الولد
شفتهم طولو وهمة ساكتين : احجوووو شصار شنو طلبو شكد يردون فلوس
حسان وهو على وضعيتة وراسة للأرض : ما يردون فلوس يردون يخربون بيوتنا
حجيت برجفة والحجي كوة يطلع مني : ش..شنو شيردون ...
كعدت كدامة ولزمت ايدة : فدوة لا تكول يردون يقتلون رائد
حسان رفع راسة وباوعلي وعيونة مغوركة : هذا واحد من الخيارين الي انطوهن النة
مامين استوعبت الموضوع خيارين يعني اكو شي غير القتل ممكن ينقذ اخوي من الموت حسيت الامل رجعلي : شنو الخيار الثاني اكيد احسن من الاول اهم شي ما يصير شي لرائد

حسان طاحت دمعتة ومسحها بيدة : حسان احجي شيردون وميقتلون رائد
باوع بعيوني وحجة كلمة وحدة بس : انـــــتـــي !
استغربت من جوابة : اني شنو
حجة حسان الخيار الثاني الي نزل على كلبي مثل النار : يردونج فصلية بمقابل ميقتلون رائد ويبقى بالسجن وعايش
انصدمت وحسيت الساني انشل عن الكلام مكدرت احجي شي بس اسمع الصوت وعبالك رحت بغير عالم
امي تبجي وتلطم : يممة وليداتي ليش هيج يربي
.... الخيار الاول اخسر ابني والخيار الثاني اخسر بنتي ربييييي ليش هيج تعاقبني والله ما اذيت احد بحياتي ليش تحرك كلبي على اولادي

وكف زياد وكال : عمة لا تخافين ماراح ياخذوهة لمكان اني اعقد عليها ونكوللهم ما عندة خوات ممتزوجات بس وحدة وزغيرة
عمي ابو زياد : وعبالك هيج شغلة راح تمر عليهم اكيد هسة ايكولون ليش ما حجيتو هالشي بالديوان ويسوونها سالفة عناد ويقتلون رائد
طلعت اركض من يمهم رحت لغرفتي وكعدت ابجي : ياربي ليش هيج يصير ويانة اذا رفضت راح ينقتل اخوية وتدمر عائلتي واذا وافقت حياتي كلها راح تدمر
بس رائد ضحى بهواي شغلات علمودنة ضحى بشبابة وصار يشتغل ليل ونهار بس حتى يعيشنا صار ابونا واخونا وما حسسنا ابد ان احنة ما عدنة اب واتذكر كلمتة الي مرة

رائد : اموني اني اسوي اي شي بس علمود تبقين فرحانة ما راح يأذيج شي مادام راسي يشم الهوة

يربي والله اموت اذا صارلة شي وامي تموت وراه ومحد يبقالنة
وكفت على حيلي وكلت : رائد ضحى بهواي شغلات علمودنة وهسة صار لازم اردلة جزء بسيط من حقة علية حتلو جان على احساب حياتي هالشي حتلو راح اتعذب واعيش ذليلة بأسم (فصلية) المهم ميصير شي بأخوي المهم يعيش وهذا اهم من حياتي كولها
مسحت دموعي ونزلت واني مصرة على قراري دخلت عليهم وامي على حالهة بس تبجي حتى عيونها انعمت من البجي
وكفت وحجيت وكلهم التفتو الي : اني موافقة عالزواج
وكف زياد : ماشي لعد اني اروح اجيب شيخ ويعقدلنا
رديت علي : زياد اني مداحجي عنك
طبك حواجبة : شنو قصدج لعد
ميامين : اني موافقة اروح فصلية بمقابل مينقتل رائد
كلهم وكفو : شنوووو
ابو زياد : وج بابا تخبلتي شنو هالحجي
حسان : ميامين انتي متخيلة شدتحجين انتي تعرفين الفصلية شنو يصير بيها
كتلة : شنو يصير يعني احجيلي
حسان بأنفعال : وج حضج يطيح كرامتج تنداس تصيرين خدامة الهم وحالج حال الجلب تبقين ابيتهم لا طلعة ولا طبة ويحرمونة منج
ميامين قربت منة : هذا كلة اهون من ان يقتلون رائد خليني اصير خدامة ويذلوني بس المهم ميقتلون اخوي
ماما : وج يمة اتخبلتي تردينهم ياخذونج مني
دنكت عليها وبست ايدها : ماما الله يخليج على الاقل اثنينة نكون عايشين ورائد تكدرين تشوفينة بين فترة والثانية واني اكيد راح الكة طريقة احجي وياج بيها
زياد : اني طول هالفترة ساكت بس هسة ماكدر اسكت لو تنكلب الدنيا متتزوجينة
وكفت بوجهة : زياد الله يخليك لا تتدخل اني اريد انقذ اخوية وميقتلونة
زياد التفت على حسان : حسان احجي وياها انت مو تدري بية احـ .... احبها واريدها بس انت كلت مو هسة خلي تخلص السادس يلة
باوعتلة بصدمة : شنووو انت كل عقلك تحجي زياد انت مثل اخوية مستحيل اتقبلك غير شي
زمخ بية بعصبية : اني مو اخوج ولا بعمري صرت اخوج اني احبج من جنتي زغيرة ومنتضرج تكبرين حتى تصيرين الي وتالي تردين اخليج تتزوجين هالشكل
عمي ابو زياد : زياد ليش هستوك يلة حجيت هسة ارتاحيت يعني من طاح الفاس بالراس
التفتت على زياد : زياد لا تحاول تتدخل بحياتي انت مجرد اخ بالنسبة الي واني اريد اسوي هيج حتى انقذ اخوي ... اذا ما سويت هيج راح يموت واذا مات راح تكون انت السبب وعمري كلة ما راح اسامحك
زياد بأنفعال: هسة صرت اني السبب وج اني احببببج وماريدج ترحين لغيري وج كلبي ما يقبلها اشوفج عند احد ثاني
جاوبتة بنفس النبرة : اني هم كلبي ما ينطيني اشوف اخوي جنازة كدامي بس علمود حضرة جنابك لا ينكسر كلبك
حسان : بسسسس كافييي... ميامين زياد يحبج من زمان وهو يريدج انتي ليش متردي
ميامين : حسسسان افهمني ... اذا وافقت على زياد راح يقتلون رائد شي اكيد واني عندي افضل اموت ولا يقتلون رائد بسببي بس لان رفضت ورحت تزوجت زياد علمود لا يزعل

حسان : اوووف والله راح انفجر من التفكير شسوووي هسسسة وينك رائد انتة الي دوم جنت تحل المشاكل مالتنة هسة وحدي ماكدر اسوي شي

ميامين حطيت ايدي على كتفة : حسان الله يخليك استسلم للأمر الواقع ووافق على هالشي ترة ماعدنة حل ثاني ... الله يخليك لا اكون سبب موت اخوي

حط ايدة على خدي : وبهيج راح افقدج انتي ونخسر شمعة البيت
حطيت ايدي على ايدة الي على خدي : احسن من ان يطيح عمود البيت ونفقد قوتنا والسبب ان خفت على روحي من كم حجاية راح تنكال الي

دنك راسك وصار يبجي : حسان فدوة لا تخليني افقد اخوي سوي الي كتلك علي
هز راسة بالموافقة ورفع راسة لفوك : ااااخ ... ربي عيينّي على ما ابتليت
زياد سمع كلام حسان طلع وركع الباب وراه وعمي نزل راسة لان يدرون ماكو غير هالحل اني اخذت امي الي بدورها انهارت من البجي طلعتها وكعدتها بالصالة واخواتي عرفن بالموضوع وصارن يبجن شهد الي ما فهمت شنو يعني فصلية بس شافتهن يبجن وكامت تبجي وياهن
صعدت لغرفتي وسديت الباب خاااارت شكو قوة بية وطحت بالكاع وصرت ابجي بحركة كلب : ربي دخيلك كون وياي ولا تعوفني
توضيت وفرشت سجادتي وبديت اصلي ملجأي الوحيد هو الله سبحانة وتعالى هيج جان رائد يوصيني : اذا ضاقت بيج الدنيا بس ادعي ربج والله ما يعوف عبده .. واذا صارت مشكلة وياج اصبببري وكولي الحمدالله لان الله اذا حب مؤمن ابتلاه ... لا تطلبين حاجتج غير من الله بالدعاء وبصلاتج ... وكل كربة صدكيني نهايتهة فرج من الله

كعدت ادعي ربي : ربي دخيلك احفضلي اخواني من كل شر .. ياربي ساعدني واوكف وياي بكل خطوة اخطيها .. ياربي توكلت عليك انت الي تقضي حاجتي وتنطيني الصبر على الي جاي

خلصت صلاتي ونزلت وهمة على وضعهم بس حسان كاعد يم امي وبيت عمي ماشين
كعدت يمة : حسان شوكت ترجعلهم خبر
دنك راسة وحجة : عمي كال باجر اخابرهم وارجعلهم خبر وهمة يردون تخلص فاتحة ابنهم ويجون يعني بعد تلث ايام
جريت نفس يعني بعد تلث ايام ومصيري ينكتب بيد واحد ما اعرفة ولا اعرف شنو اسمة ومادري شنو نوع المعاملة الي منتضرتني بس مبين من طلبهم ان ناويين علينة نية سودة سلمت امري لله ودعيت بداخلي الله يوفقني
اجت شهد وكفت كدامي : اموني انتي وين راح ترحين
ميامين بهدوء : مرايحة لمكان شهودة
شهد بعناد : لا راح ترحين ويييين
ميامين وحبيت الطف الجو لان هي تعاند: امممم تكدرين اتكولين راح اسافر
شهكت وابتسمت : ويييين تسافرين اروح وياج
ميامين : لا حياتي متكدرين تسافرين وياي لان بعدج زغيرة بلعت ريكي وكملت ورائد راح يروح وياي يعني مو وحدي
برطمت حلكهة بزعل : ماشي بس جيبيلي ككاو وياج تعرفين بية احبة
ابتسمت على حركاتهة نسخة مني من جنت بكدها وهسة وبعد نسخة مني كولش تشبهني بالشكل وبالتصرفات والحركات مادري شلون راح اعيش بدونهم: مااشي اجيبلج سلة كاملة حلويات ومصاص هم
بقت مبرطمة : اي اصلا انتي رايحة تتونسين واني اكعد بالبيت
هه رايحة اتونس : لا حبيبي رايحة بشغل مو ونسة
شهد وهي تمشي : ماشي روحي اصلا عادي

مرن التلث ايات بسرعة وعرفت ان عمي مرجع خبر الهم واليوم يجي الشخص الي راح يعقد علية حتى ما اعرف لمنو راح ينطوني اخو لو ابن عمة لو ابن خالة حتى مادري اذا شايب لو شاب هه اكيد شايب شنو ترديهم ياخذوج لواحد شاب وحلو ترة انتي فصلية مو زواج عادي يعني حالج حال الخدامة لو علاكة يجيبوهة للبيت مراح يعبرونج بفلس بس يلة كلشي يهون لخاطر رائد
اجتني ورود ساعدتني بتحضيرات بسيطة بنفسي واني دموعي ما وكفت وكلساع حاضنة امي وابجي اخذت كم قطعة ملابس بجنطة زغيرة وشالات هذا الي كدرت وحاولت ما اكثر حتى لا ايكولون معتبرة نفسها عروس ومكيفة وماما كالت اخذي ملابس اسود لان همة اكيد حزينين على ابنهم
لبست حجابي وعباتي ونزلت جوة كعدت يم امي وحطيت راسي على رجلهة وابجي ومنتضرة اجلي شوكت وفعلا ما طول دخل ووجهة مبين بي العصبية : يلة كومي ميامين اجة الشيخ

اطرافي كامت ترجف حضنت امي وبجيت بصوت عالي ومبحوح من كثر ما بجيت صوتي راح
كمت لحسان وحضنتة وهو حضني وصار يبجي : سامحيني ميامين والله مو بيدي ... اسف
ميامين : لا تتأسف هذا مو ذنبك ... اني مكتوبلي هالشي ومستعدة اسوي كلشي علمود رائد ... لا تخاف اني مو وحدي الله وياي
طلعت وياه ووكفت ورة الباب الي شوي مفتوح
حجة الشيخ واني اسمع : هل تقبلين يا ميامين ان اكون وكيلك و غـــــزوان زوجك ......

لا تتفاجؤن اذا كتلكم هسة يلة عرفت اسمة غزوان

رديت عالشيخ الي عاد سؤالة ٥ مرات : نعم وانت وكيلي
ردت ارجع للبيت بس وكفتني حجاية واحد دخل من الباب البرة للأستقبال : غزوان ايكول انتضر برة وهو ايكول ما ادخل لبيت العالم الكتلو اخوي

زياد👇🏻

الكاتبة : سارة الشمري 🖤