رواية سجينة الظلم والانتقام الفصل الثالث 3 - بقلم سارة الشمري

الكاتبة : سارة الشمري 🖤

الرجل الذي يعامل المرأة كملكة دليل على أنه تربى على يد ملكة أخرى.
وليم شكسبير

الشرطي : انت رهن الاعتقال بتهمة قتل المدعو فارس عبدالله الجاسر

هو كال هيج واني ضربت ع خدي وسمعت صياح رائد بعصبية : انت شتحجي اكيد اكو غلط بالموضوع اني مستحيل اقتل فارس

الشرطي : تفضل ويانة وكلامك وفرة للنيابة

رائد : شنو تفضل ويانة وكلتلكم اني جنت راح انقتل وياه شلون اقتلة
وبعدين هذا اخوي شلون افكر هيج

الشرطي : والله هذا السؤال اسألة لنفسك اني عندي امر ب القاء القبض عليك
واشر لواحد من الي وياه ان يلزموه
هنا اني تخبلت وطلعت وماما من سمعت اجت واخواتي طلعن
رائد صار يدفع بيهم بس الكثرة تغلب الشجاعة
رائد : عوووفني كتلك ما كتلتة .... لك هذا فارس تعرف شنو يعني فارس .. عوووفني ما اروح وياك

حطوه بالسيارة وهو ما زال مقاوم انهاريت واني اشوف سيارة الشرطة مشت واخذت اخوية
ماما كامت تعيط واتكول: يمة راح مني ابني ليش يربي كلساع ماخذتلي حرگة ع وليدي
اخذناها ودخلنة جوة ونصبر بيها وهو اني اريد الي يصبرني
كعدنة نبجي اتصلت على حسان وكتلة ع الي صار وكال اني اروح اكول لعمو يلحكهم
بقيت بالبيت اروح وارجع افتر وماكدر اكعد كلبي صاير نار علي
وماما انطيتها علاجها وتعبت من البجي وغفت
اجتني اختي شهد الزغيرة : اموني عفية ليش اخذو رائد يعني هو صدك قتل فارس
ميامين : لا حبيبتي شهودة ماكو هيج حجي رائد مستحيل يقتل احد وهمة اخذوه علمود يحققون وياه ويرجعوه
شهد تبجي : بس اني سمعت الشرطي يكولة انت الي قتلت فارس .... يعني راح ياخذون من عدنة رائد ويحبسوه
ميامين : لا مراح يحبسوه هو مسوة شي ومستحيل يقتل احد وانتي مو تدرين بي يحب فارس شلون يقتلة
شهد : اموني عفية كوليلهم خل يرجعون رائد والله ما اسويلة شي وما اعاندة بعد
ميامين حضنتهة واحاول اهديها : لا تخافين ياروحي همة اكيد راح يرجعوه لان هو ممسوي شي
شهد تمسح دموعها : يعني هو راح يرجع
ميامين : اي راح يرجع وبعد ماريدج تبجين ماشي
شهد : ماشي
طلعتلهة نستلة اريد اسكتهة وراحت كعدت على صفحة
طلعت تليفوني اتصلت على حسان وميرد علية
: يارب دخيلك تفرجهة علينا
رحت كعدت وكل شوي اتصل على حسان وهم ميرد اخر شي صار مغلق
وماكدر اتصل على رائد لان اصلا موبايلة باقي بلبيت
كعدت وسكتت واني واثقة اكثر مما واثقة بنفسي ان رائد مستحيل يقتل اي احد شلون اذا فارس

صارت الساعة بال 6 واعصابنة صارت نار وهمة محد متصل ولا طمنونة

ماما كامت : كومي ميامين جيبي عباتي اني بعد ماكدر اصبر اكثر
ميامين : فدوة ماما لا ترحين هسة همة يجون ونفهم .. انتي مريضة واخاف ضغطج يرتفع
ماما : اكلج كومي جيبي العباية ابني بالمركز عند الشرطة اخذو كدام عيوني وتكليلي اكعدي
ميامين : ماما الله يخليج ابقي واني اروح بمكانج
ماما : شنوو تخبلتي ولج شلون اخليج ترحين للمركز بهالليل كتلج انطيني عباتي اني اروح
ميامين : مامــ...
قاطعنة الباب وهو ينفتح ودخل حسان ووجهة اصفر
رحنالة كلنا وماما تلهث : يمة حسان وين اخوك
التفتت وراه تدرو على رائد ويينة اخوك ليش ما اجة وياك
ميامين بعصبية : حسان احجي ليش ساكت وين رائد
كعد حسان على اقرب قنفة : رائد بقى بالمركز ما اجة وياي وراح يتحول للنيابة
شكهت وضربت على صدري وامي كعدت بالكاع وكامت تبجي وتون
ميامين وتبجي : ليش يتحول للنيابة وهو ممسوي شي هو مستحيل يقتل فارس
حسان وحاط راسة بين ايدي : ماكو دليل يثبت برائتة كلشي ضدة كل الادلة تثبت ان رائد هو الي قتل فارس
ميامين بصدمة : شنوووو انت شدتحجي هاي يا ادلة اكيد كلها مزورة
حسان : السلاح الي انضرب بي فارس علي بصمات رائد ودم فارس جان موجود على قميص رائد ورائد هم جان على جسمة ضربات وكدمات يعني همة متضاربين ورائد ضربة بالسلاح وتفقدو مكان الحادثة ماكو كامرة مسجلة الحدث هذا الي تبين بالتحقيق بس رائد جاي يكول العكس بس محد يصدكة لان ماكو ادلة وياه

ميامين من سمعت كلامة انهاريت من البجي وامي صارت تعيط واخواتي يبجن شنو يعني رائد ضاع راح من عدنة بس والله هو مستحيل يقتل فارس اني لو اشوف كل الادلة ولو اشوفة بعيني هم ما اصدك هذا اخوي ودنيتي واعرفة زين ما يسوي هيج شي هو اصلا جان ما يقبل يشوف احد يتأذة كدامة وميساعدة ويحب الناس وميقبل بهيج شي شلون عاد هو يقتل بشر ومنو عاد فــارس اخو الي مجابتة امة مثل ميكول

ميامين ودموعها مغركة وجهة : وشنو الحل هسة شنو راح تسوون
حسان : ماكو هسة حل الشرطة اتصلو بأهلة وبلغوهم وهمة يتخذون القرار يتنازلون او ياخذون فصل ميكدرون ينطون قرار لحد ما اخوه الجبير يرجع باجر من السفر وهو يقرر وممكن يكونون من الناس الي تاخذ حقها بيدها
ميامين : شنو يعني ... شقصدك
حسان : يعني ممكن ياخذون واحد بواحد وياخذون ثار ابنهم
ميامين بخوف : يعني شنو يقتلون رائد شنو
حسان : مادري لان همة من البصرة واهل البصرة كلها شيوخ وسلاح وثارات بس انشالله همة يتفاهمون واخوه دكتور ومثقف بلكي يتفاهم بهالموضوع
ميامين : حسان الله يخليك خابر اخوه بلكي يتنازل كولة مالنة غيرة والله منكدر بدونة
حسان : ميامين ترة مو حل هذا ... العالم بعدهة كلوبهم محتركة على ابنهم وبعدهم الفاتحة ممسويهة والولد بعدة بثلاجة المستشفى يعني ممدفون شلون ترديني اروح اتصل بأخوه واكولة تنازل وهو بعدة كلبة ما بارد على اخوه ما دافنة
وهو الي مانعرف عنة شي وماعدنة اي علاقة بي

ميامين بصياح وبجي : يعني شنو نشوف اخونة يروح كدام عيونة ويضيع عمرة وينحبس ضلم ومنسوي شي
حسان : ميامين ترة بس انتي واحنة الي مصدكين ان رائد ميقتل احد بس الناس متصدك وكلبهم فاير على ابنهم وكلشي يثبت ان رائد هو الي قتل

ميامين وكفت بعصبية : مادام رائد كال ما قتلتة يعني ما قتلة
حسان وكف وياها : انطيني دليل يثبت هالشي لعد
ميامين : ثقتي بي اكبر من اي دليل
حسان : ثقتج مراح تفيد النيابة بشي
صعد لغرفتة واني كعدت ابجي واشوف امي تبجي ومنهارة بالكاع واخواتي يصبرن بيها ويبجن
: ياربي ليش هيج يصير بينة يعني مو كافي فقدت ابوي ليش تاخذ مني اخوي الجبير وسندي بهالدنيا

مر اليوم بحزن وبجي علينة وخوف على امي وعلى رائد

ثاني يوم الصبح الساعة ٨ طلع حسان لبيت عمي واحنة بالبيت حاولت اخلي ماما تاكل اي شي بس ماكو فايدة لمن اجتها خالتي ( مرت عمي) وبالكوة خلتها تاكل شي علمود العلاج

اجت ورود وكعدت ويانة واني احاول اكون اقوى وحدة بيهن لان ايماني بالله جبير وثقتي برائد هم ومستحيل اصدك هالشي قويت نفسي حتى اصبر امي واوكف وياها حتى لا تتعب صحتها

للعصر اجة حسان ووجهة ما يبشر بخير وعرفت ان اجو اهلة ويردون يسوون كعدة وراح يشوفون شكد يطلبون فصل واذا ممكن يتنازلون بس كال وجوهم ما تبشر بخير وخصوصاً اخوه بدل ملابسة وطلع وطبعا هالحجي محد سمعة بس اني وهم ما حجالي سمعتة يخابر بزياد ويطلب منة يجي وكالة هالحجي
رحت لغرفتي توضيت وفرشت مصلايتي وصليت وكعدت ادعي ربي وابجي وكلبي محترك
: يارب دخيلك برد كلوبهم ولا تخلي اذى يصيب اخواني يارب لا تخلي حقدهم يعمي عيونهم والله اخوي مالنة غيرة اذا صار بي شي اموت
دخيلك ربي عديها على خير وانصفنا انت تعرف الحق وية منو انصفة يارب
بقيت افتر بالغرفة وكلساع اباوع من شباك غرفتي بلكي اجو واعصابي صارت نار ما خليت دعاء ما دعيتة بكلبي وختمت القرءان من كثر ما اقرة

ورة ساعة ونص تقريبا سمعت صوت سيارة ركضت للشباك شفتها سيارة زياد ونزل منها عمي وزياد وحسان
زياد وحسان وجوهم حممر ومبينة من العصبية ونزل عمو سحبهم ودخلهم للبيت
اني نزلت اركض وفتحت باب المطبخ حتى قبل لا يندك
فتحتلهم باب الاستقبال ودخلو ومبينين معصبين

قاطعني من تفكيري اختفاء صوت السيارة والهوا خف التفتت علي لكيتة مبتسم بوجهي : راح افول بانزين وارجعلج بس سديت الجامة حتى لا تشمين ريحة الكاز وتلعب نفسج
ابتسمت ببهوت بوجهة : اوك

،،،،،،،!!!!
بمكان ثاني

حسان ://///

دخلت للبيت واشوف الكل فرحان ابتسمت وحمدت ربي واعرف سبب فرحهم
صعدت لغرفتي دخلت تمددت على فراشي ورجعت راسي عالمخدة واني اتذكر قبل سنة

طلعت من البيت توجهت لزياد واخذتة ورحنة لمضيف واحد من الشيوخ الي راح تصير بي الكعدة
الطريق كلة حاط ايدي على كلبي وخايف لا يقتلون رائد اخوي الوحيد والجبير مالتنة

تذكرت نضرات اخو فارس الجبير بالمركز من شافني وهو عيونة حمر وتجدح عبالك يريد يهجم علية

نزلنة من السيارة ودخلنة طبعا احنة قبلهم ورة شوية همة اجو اكثر من ٧ سيارات وكلهن راقيات يعني عبالك سيارات رئيس نزلو وهمة مسلحين وحزامات اسلحة ولبس عربي لابسين عبالك عدهم عركة وجايين وما ابالهم غير القتل والضرب : يارب استر
كعدو بالديوان والشر يطلع من عيونهم وبدة الشيخ مالتهم يحجي استغربت ان ابو فارس ما جاي بس عرفت من حجي الشيخ ان من عرف بأبنة مقتول صايرة بي جلطة ومدخلينة مستشفى حجيت بكلبي (اكيد هسة حقدهم زاد علينا يعني اخوهم وادور ابوهم هم .... الله اليستر على شنو ناوين)

حجة عمي ابو زياد : يابة احنة حاضرين شكد ما تطلبون ما عدنة مشكلة واحنة عاذرينكم بأي شي تطلبونة لان ندري بكلبكم محترك على ابنكم واحنة هم نعرفة الولد والله يشهد علينة هو مثل ابنة بس ماندري الشيطان ليش دخل بينهم ....وهسة احنة حاضرين بألي تأمرونة شكد تطلبون فصل انشالله نكدر علي

حجة اخو فارس الجبير بسخرية وحقد بنفس الوقت : هه وتريد نتنازل
ابو زياد : والله يا ابني الولد جبير اهلة وهو اليصرف عليهم ومالهم غيرة ... اخوه بعدة يدرس جامعة واخواتة محتاجاتة يوكف وياهن هو بأعتبار ابوهن

اخو فارس : لعد شني اني بايع اخوي بسوك السمج حجي .. هم جنت محتاجة يمي مو ينكتل وهو بعدة بعز شبابة
ابو زياد : حقك عمي حقك بس هم والله احجي لخاطر هالعايلة الي عيشتهم علي .. تفضل ابني بالمبلغ الي تأمرون بي وانشالله نحلها

اخوه ببرود : ياكثرها الفلوس .. انت متوقع اسكت عن حق اخوي واعوف دمة بالكاع مقابل الفلوس

حسان بلعت ريكي وحجيت بترقب : لعد شتريد بالمقابل

التفت علية وكال : انت اخوه مو
رديت علي : اي اخوه اني

طلعت طيف ابتسامة خبث على شفايفة وكال : العين بالعين ... والسن بالسن ... رص سنونة وكمل والباااااادي اضلم

حسان : شنو قصدك احجي من الاخير شنو المطلوب
اخوه : المطلوب مبين .... دم اخوي اريد مقابلة دم

وكف عمي على حيلة واني وكفت : استهدي بالله عمي ترة ما تنحل الامور هيج كول يالله
وكف شيخ دين وبدى يهدي بي ويذكرة بفوائد المسامحة ويذكر احاديث تنص على هالشي

التفت علي وكال : شيخنا ترة الدين هم ما نص على القتل
رد علي الشيخ : ابني النفس امارة بالسوء والشيطان مامات
ابتسم بحقد وكال : واني نفسي امرتني بالسوء هسة والشيطان يفتر بعقلي ... اني كتلكم دم اخوي اريد مقابلة دم التفت علية وكمل حجايتة : واني اعرف منو اريد دمة
كتلة : شقصدك
كمل ببرود : دم اخوك مقابل دم اخوي
طفرت بوجهة : تخسسسي تمد ايدك على اخوي واني عدل
ضرب طرف اسلاحة بالكاع وحجة بصوت عالي : حجاية وما اثنيها دم اخوي ما اخذ فلوس مقابلة اريد دم بمكانة
ابو زياد : ابني كول يالله احنة ما نطلب منك تطلعة من السجن بس عوف سالفة الدم على صفحة

رجع كعد بمكانة والتفت علية وكال : اذا تردون ابنكم ما يموت ويبقى بالسجن اريد مقابل لهالشي

حسان بأنفعال : هذا يا مقابل بعد اكو اكثر من هيج تريدة ينحبس وهم تريد مقابل

رد علي : وعبالك الحبس راح يريح كلبي ... شني فايدتة كاعد مرتاح نايم والاكل يجي يمة ... عبالك هيج ارتاح لا والله يخسي اخلي كلبة مرتاح

حسان ونفسة يصعد وينزل من العصبية ويحاول يهدي نفسة لا يهجم ويخرب الاول والتالي : شتريد لعد بالمقابل بلة

التفت علية وابتسم بخبث : اخــــــتـــــك ..

حسان 👇🏻

الكاتبة : سارة الشمري 🖤