رواية سجينة الظلم والانتقام الفصل السابع والأربعون 47 - بقلم سارة الشمري

الكاتبة : سارة الشمري 🖤

وما عجبي موت المحبين في الهوى ولكن بقاء العاشقين عجيب...

فزت على صوت تليفونهة ..
شافت الرقم عصبت اكثر .. صارلة اكثر من شهر يتصل ..
ردت بكل عصبية : انت ما تفهم .. مو كتلك بعد لا تتصل ..
زياد بترجي : ميامين اسمعيني .. الله يخليج لا توافقين ترجعين لغزوان .. والله هو ما يحبج بكدي ...
ميامين بعصبية : اني احبة وهو يحبني .. وانت معروف شنو نواياك .. وعلى فكرة حتلو جان اكو ذرة احترام الك بكلبي ف بعد الي سويتة انت مسحتهة .. صرت اكرهك واستحقرك .. من شفتك بهالمنضر وانت سكران وتجيني للبصرة وتتبلى علية وتتهمني بكلام باطل وتدري بهالكلام راح يجيب اخرتي ... روح وبعد لا تتصل علية .. ولا تفكر ممكن اسامحك بيوم من الايام ...
سدت التليفون بوجهة وشمرتة ...
يربي منين تطلعلي كل مصيبة صفح ...

دك تليفونهة .. رفعتة بعصبية وشافت الرقم ..
ابتسمت وهدأت من نفسهة : الوو ..
بسمة بعصبية : كولي والله .. انتي ووجهج لو ما داكة عليج اصلا جان ما دكيتي علية ..
ميامين : بسمة على كيفج .. شبيج معصبة ..
بسمة : شنو شبيج معصبة .. ليش مكلتيلي ان راح ترجعين .. لو هم كايمة تضمين علية ..
ميامين بتمثيل : بسووم .. يعني اكيد ما راح اكلج راح ارجع .. تدرين بية استحي احجي بهيج امور ..
بسمة وهي تقلد طريقة كلامهة : استحي احجي بهيج امور .. والله مال جلاليق هسة ..
ميامين : اعصابج .. مبقة شي واجيج وشبعيني جلاليق ..
بسمة : لا عيني منو يكدر يلمسج والاخ غزوان موجود ..
ميامين عصبت بس اخفت هالشي : لا عيني شعلينة بي .. انتي اولى بهالشي ..
بسمة بفخر : طبعا حبيبتي .. جاي من البرية ويريد ياخذ الاولية ..
ميامين ضحكت على كلامهة ..

£££££££

مرن هذن الاسبوعين على ابطالنة بطيئة على غزوان وسريعة على ميامين ...
غزوان جهز البيت من احسن ما يكون وفرحتة جانت مو سايعتة ويحسب الايام ساعة ساعة لحتى تجي صاحبة بيتة وكلبة .. حاول شكد ما يكدر ان يغير من اثاث البيت بس حتى من ترجع ما يكون اكو شي يذكرهة بالماضي ...
وطبعا خاتون ومها وبسمة اخذو دور ترتيب الشغلات البناتية والنسائية مثل الملابس والمكياجات والعطور .. وخلو هالشي مفاجأة لميامين من تجي تشوف مشترياتهم ...

ميامين طبعا جانت مو مهتمة وكل يوم يجي يزداز خوفهة من الي جاي وشلون راح تكدر تتقبلة ...
تحاول تبين للكل ان هي فرحانة بهالشي بس حتى لا رائد يكتشف الي هي سوتة ...
طبعا ورود طلعت تسوكت لميامين بحجة ان ميامين متحب تطلع للسوك ..
اشترتلهة فستان ابيض طويل بدون اكمام حتى تروح بي منا لان رفضت ان تلبس بدلة ع اساس ان هي متزوجة وميحتاج لعرس ..
وطبعا وجود بعض المشتريات الي جابتهن الهة ورود وهي حتى ما كلفت نفسهة تفتحهن ..

رائد جان طول الفترة متضايق لان راح يبعد اختة للمرة الثانية عنهم .. يحس ان هي جاي تجذب علي لان عيونهة يكولن غير كلامهة .. بس ما يكدر يرفض هالشي لان ما يريد يجبرهة ان تبقى ...

£££££££

يوم 2016/3/15 ...

كعد من النوم مو كلة نشاط والفرحة مو سايعتة .. اليوم راح يشوف حبيبة كلبة وروحة الي اشتاقلهة اكثر من اي شي وانحرم من شوفتهة لمدة ٤ شهور بعد ماكان ما يكدر يبتعد عنهة لمدة ساعات قليلة ..
دخل للحمام واخذ شاور وطلع ..
بدل ملابسة ولبس القاط الاسود مالتة وهو يدندن بأغاني مختلفة ...
شكثر مشتاق لو تدري .. شكثر مشتاق ياعمري .. ابوس عيونك الحلوات واضم صدرك على صدري ..
انتضرت هواي .. اشوفك جاي ...
قاطعة صوت تليفونة وهو يدك ...
رفعة وشاف المتصل .. رد بحدة : خيير يالمزعج متصل بهالوقت غير اريد ابدل ..
حمزة : دفتح الباب احنة جوة .. المفروض احنة نساعدك بالتبديل ..
غزوان : وليش يعني اول مرة ابدل مثلا وتردون تساعدوني ..
حمزة : يالغبي يعني لازم شوية عادات شبابية وهي اخوان واصدقاء العريس يساعدونة ان يجهز نفسة ..
غزوان : هااا .. اي يلة جايكم ..
قفل التليفون ونزل فتح الباب الهم .. حمزة ومؤيد وحسنين ...
حسنين بعصبية : ياخي جمدنة من البرد واحنة ننتضر برة .. ساعة وانت تستجوب بحمزة ...
غزوان : عمي اسف .. تفضلو تفضلو ..
دخلو وهمة يباوعون للبس مالتة ..
مؤيد : خسارة .. شوفة شلون طلع مبدل من غبشة الله .. مستعجل الاخ ..
حمزة : يلة هسة نسوي اللمسات الاخيرة ..
سحبوه وصعدو لغرفتة ..
حسنين يحطلة الطباقات مال القميص .. حمزة يمشط بشعرة ويرتبة ..
مؤيد سحب العطر وهو يرشة بهدوء على ملابس غزوان ...
غزوان الي جان منطرب وكلساع يغني اغنية شكل ..
: هذا اللون علية يجنن يشبه لون عيوني .. نضرات العالم متطمن خل احذر ليحسدوني ..
حسنين : خف علينة .. شجاب عيونك الزرك للون مال القميص ..
غزوان : ياخي خليني منطرب شعليك انتة ...
الكل انتبهو على هدوء مؤيد ...
مؤيد دنك راسة وكعد على ركبة كدام غزوان .. وطلع من جيبة الجفية مالتة ونزلهة على حذاء غزوان ويمسح بي وايدي ترجف ..
غزوان بسرعة مرت هالذكرى ابالة ونزلت دمعة من عينة .. دنك بسرعة وسحب اخوه وحضنة ..
حمزة نزلت دمعتة ومسحهة بسرعة وهو يعرف شنو الي تذكروه ..
غزوان مرت بسرعة هالذكرى ابالة .. قبل سنتين تقريباً ...
دخلو مؤيد وفارس بسرعة لغزوان الي جان هستوة مشتري سيارة جديدة واخر موديل .. كاعد هو وحمزة بالحديقة ..
غزوان جانت سيارتة بعدهة عزيزة ..
مؤيد : غزوان طلبتك خل اجرب اسوقهة ..
فارس : معليك بي .. اني اطيني خل اجربهة بروح العزاز ..
غزوان وهو يباوعلهم بغرور : واذا انخدشت لو توصخت ..
فارس : اني بعيني انضفهة الك ..
مؤيد : غزوان اني الجبير .. اطيني اني اجربهة ..
غزوان رجع ضهرة عالقنفة ببرود : عندي شرطين الكم ثنينكم ..
فارس ومؤيد سوة : شنو هنة ..
غزوان التفت لفارس : بعرسي .. يكول تزيين وغسل السيارة على حسابك ... موافق لو لا ..
فارس بسرعة : موافق ...
غزوان التفت على مؤيد وكال : وبعرسي هم .. راح تنزل على ركبك وتطلع جفيتك الي معطرهة وتنزل تنضف حذائي مال العرس ..
مؤيد وهو يحك راسة : تمام موافق ..
طلع السويج وشمرة عليهم وهمة طلعو يركضون .. غزوان وحمزة يضحكون عليهم .. غزوان جان مقرر اصلا ينطيهم السيارة بس حب يلعب عليهم شوية ..
رجع للواقع وهو يوخر اخوه ويمسح بدموعة ..
غزوان : صير قوي مؤيد .. هو بالجنة انشالله ..
مؤيد هز راسة ومسح دموعة ..
حسنين تأثر ويريد يغير جو : يلة عاد كلبتوهة مناحة .. ترة عمي ينتضرك لان هم يلة نلحك نروح للكوت .. ترة الطريق شطولة ..
غزوان : اي صح .. يلة تعالو خل نمشي ..
نزلو كلهم .. وغزوان ومؤيد دخلو للبيت .. وحسنين وحمزة والباقين ينتضرونهم بالاستقبال ..

دخل وشاف امة وحبوبتة وخواتة ..
دخل واستقبلوه بالهلاهل ..
ام غزوان نزلت دموعهة وتسلم علي وهي تنشر علي وتقرة ايات من الحسد ...
الحجية حبتة بخدة وهي تقرة علي ايات قرءانية ..
سحبتة من اذنة وكالت : شوف ولك غزيوان .. اذا اذيت بتي لو سمعت بيهة شاكية منك .. هالمرة اني اوديهة لاهلهة حتى ترتاح منك ..
غزوان بألم وهو يلزم اذانة : ايي .. حبوبة والله احطهة بعيوني .. انتي بس فكيني ..
الحجية فكتة وهو يفرك بأذنة ..
اجن خواتة سلمن علي ..
غزوان وهو يأشر عليهن بعصبية : انتن شمسويات بخلقتجن ..
مها وخاتون وحدة تباوع بوجه الثانية ..
خاتون : ترة عرس شبيك ..
غزوان : واحد كاللجن انتن العرايس .. يلة بسرعة تمسحن هذا البوجهجن ... تردني اطلعجن وانتن هيج مصبغات كدام العالم ..
الحجية : خايب عوفهن هي فرحة من العمر ..
غزوان : مااكو .. اذا يردن يرحن وياي بهذا مكياجهن لازم يلبسن بواشي ..
مها : اكيييد نلبس بواشي مادام متمكيجين ..
غزوان : اييه .. يلة روحي انتي جيبيلي شي خل اتريك قبل لا نطلع ..
مها راحت بسرعة تجيبلة ريوك ..
سمع صوت ابوه يطلع من غرفتة وهو مبدل ولابس العكال والعباية الرجالية ..
ابو غزوان وهو يلقي نضرة على ملابس غزوان ..
ابو غزوان : جا انت دومك مفشلني وجنك رايح لفاتحة .. ادور مو نيلي .. لابس اسود ولك ..
غزوان فهم كلام ابوه وكال بسرعة : لا بوية هاي تختلف .. يعني الاسود للكشخة مال عرسان ..
ابو غزوان بنص عين : والنيلي ..
غزوان خاف يخربهة على روحة : هيج بوية مابي شي ..
ابو غزوان ضحك على ابنة ..
طلعو غزوان ومؤيد وابو غزوان يتريكون همة والبرة بالاستقبال ..
وبعدين دخلو للبيت وغزوان مستعجل ما مصدك شوكت يروح ..
ام غزوان اخذت الذهب وياهة والبنات كل وحدة بدلت وحضرت نفسهة ولبسن عباياتهن ..

توزعن عالسيارات ..
سيارة ابو غزوان جان يسوق حمزة والي كاعد بصفة ابو غزوان .. ولورى ام غزوان ومروة .. طبعا الحجية ماراحت وياهم لان الطريق طويل وهي ما تكدر ...

سيارة مؤيد .. طبعا مها جانت كاعدة كدام بصف مؤيد ولورى كاعدات خاتون وبسمة الي اصرت تكون وية البنات بنفس السيارة حتى ياخذن راحتهن بالطريق ..
سيارة غزوان جان محد بيهة بس هوة ..
بقية العوائل كل واحد وية اهلة ..
انطلقو ووجهتهم ... الكوت ...

&&&&&&&

ميامين جانت كاعدة بس مغطية نفسهة باللحاف ..
دخلت امهة عليهة وهي تريد تكعدهة : وج ميامين كومي العالم راح تجي ..
ميامن من جوة اللحاف : ماما نعسانة اريد انام ..
ام رائد : وج يمة كومي مو وكت نوم هسة .. هم يلة تلحكين تحضرين نفسج ..
دخلت ورود وهي تكول : عوفيهة خالة اني اكعدهة ..
ام رائد : اي بس استعجلن ..
ورود وخرت اللحاف عن ميامين وشافتهة تبجي ..
كعدت يمهة بسرعة وهي تلزم خدودهة : اموني حبيبي شبيج ...
ميامين وهي تريد تتهرب : راح اشتاق لاخواني ..
اجاهة صوت من يم الباب : واحنة هم راح نشتاقلج ..
فزت من جربايتهة وحضنت حسان وخالد الي واكفين مبتسمين الهة ...
حسان وهو يمسح دموعهة : ليش هالدموع يعروسة .. المفروض تكونين فرحانة ..
ورود وهي تسحب ميامين : مو وكت سوالفكم هسة .. ترة هي متأخرة والعالم راح تجي ...

سحبتني ورود ودخلتني للحمام ... سبحت وطلعت لكيت ورود محضرتلي ملابسي والمكياج ..
كعدت كدام المراية وورود استلمتني تشسور شعري .. ورة شوية دخلت صديقة ورود تسويلي مكياج ...
سوتلي مكياج مو طوخ بس لون الحمرة ماروني يعني طوخ .. لبستني عدسات .. اني رفضت بالبداية بس هي اصرت ...
لبست الفستان وهي كعدت تسويلي شعري ..
رادت ترفعة لان كولش طويل بس اني رفضت بحجة ان مابية حيل من اروح هناك اكعد افتح ماشات .. عافتة على طولة بس سوتة ملفلف من جوة وسوتلي كذلتي باف من فوك وحطتلي تاج ناعم زغير ...

جانت سيارت الزفة اكو اجواء حلوة بكل سيارة وخاصاً سيارة مؤيد الي ماخذ البنات على كد عقولهن ومشغللهن الاغاني على راحتهن ويضحك عليهن ...
بسيارة غزوان هم جان مشغل اغاني ومنطرب ويغني وياهن وفرحان ...
سيارة ابو غزوان .. جانت ام غزوان تصفك وتهلهل والحجية تهوس..

صارو قريبين على بيت ابو رائد واعتلت اصوات الاغاني بسياراتهم ...
نزلو على شارعهم ... وجان بأستقبالهم ابو زياد وابو خالد وحسان وخالد ورائد ..
نزلو من سياراتهم واستقبلوهم ...
رائد بلع ريكة وخنكتة العبرة وهو يشوف مؤيد لان كلش يشبه فارس ... وينك ياعزي والله مشتاقلك ..
ومشتاق لضحكتك وسوالفك ..
سلم على ابو غزوان بحرارة وهو يباركلهم ..
تقدم غزوان منة وهو يسلم علي بأبتسامة ..
شاف الفرحة واللهفة بعيونة .. بس ما يكدر يرتاح الا يشوف هالشي بعيون ميامين يلة ..
دخلو للبيت وبعض سياراتهم اجو متأخرين ويضربون طلق بالسلاح ..

مؤيد قبل لا يدخل التفت لورى وشاف رائد واكع بالكاع ...
ركضلة بأقصى سرعة هو وحمزة الي انتبهلة هم ...

الكاتبة : سارة الشمري🖤