رواية سجينة الظلم والانتقام الفصل السادس 6 - بقلم سارة الشمري

الكاتبة : سارة الشمري🖤

الرجل الذي يعامل المرأة كملكة دليل على أنه تربى على يد ملكة أخرى.
وليم شكسبير

هذا الخوف تحول الى الم كطع شعري
انسحبت من شعري على ورة وضهري انضرب بشي صلب من الخوف ما كدرت احجي شي بس ايدية ترجف وركبي شي تطك بشي حسيت انفاس يم اذني ... غمضت عيوني بخوف واني اسمع صوتة بفحيح : اشوفج صرتي بساعة وحدة ام البيت ... تفترين وتاكلين بكيفج ... حلالج الجو
حجيت برجفة مادري شلون طلعت الكلمات مني : لـ ... لا وو والـ ـلـله بس مــ ماعرفت ش شنو      اســ .. ـوي ونزلت اكل شي ... مو قصدي شي والله

حجة واني ضهري بعدة لهسة على صدرة وايدة مقيدة ايدية وايدة الثانية لازم شعري حيل : هه مسوية نفسج خايفة وعبالج اصدكج ... انتي مثل اخوج هذا المجرم والكلب بس اني اعرف شلون اأدبة
نسيت خوفي وحجيت بأنفعال واني على وضعي ما تحركت : رائد مو مجرم لا تحجي علي

دارني لجهتة ولاول مرة اشوف وجهة وعن قرب هم ما تفصل بيناتنة غير سانتيمات قليلة
عيوني الخايفة اجت بعيونة الي صايرات حمر من العصبية لون عيونة ازرك طوخ وحواجبة المطبوكة بطريقة تخوف
حجة بعصبية :هالكلب لا تجيبين اسمة كدامي مرة ثانية ... ورب الكعبة احسب الله ما خلقج
رديت علي واحاول اخفي الخوف : الي دا تحجي عنة هذا اخوية شلون اتكولي ما اذكرة
قرب وجهة مني وحجة بفحيح : اخوج مو ... من اليوم وجاي تنسين شي اسمة اخوج وامج واختج شيليهم من راسج
انصدمت من كلامة : شنووو ... هذولة اهلي شلون تريدني انساهم ... تريد تحرمني من اهلي
حسيت اصابعة انغرزت بخصري بكل قوتة صلبت ضهري من الألم
سحبني من شعري وقرب وجهي منة : اهلللج ... وربي وجلالة اذا ما حركت گلب اخوج عليج وحركت كلبج على اخوج واهلج مثل ما حركتو كلبي على اخوي ما يطلع اسمي غزوان الجاسر

حسيت كلبي راح يوكف من بعد كلمتة هذا على شنو ناوي : الله يخليك لا تأذي اهلي واخوي والله مالهم ذنب
صرخ بية طفرت روحي من الخوف: واخوي شجان ذنبة حتى ينكتل ... واني شذنبي انحرم من اخوي

ماكدرت احجي من الخوف حسيت شعري تكطع بيدة ... جرني وشمرني بالكاع حسيت عضامي تكسرت ... كعد على ركبتة كدامي وجر شعري ورفع راسي حجة قريب من وجهي وبأبتسامة كلها خبث وحقد : سمعت انتي حبيبة كلب اخوج يـــا .... ذكريني شنو جان اسمج
غمضت عيوني ودموعي تصب وشعري احسة تكطع حجيت بالكوة : م مـــيــا مــين
ابتسم بخبث : تدرين يا ميامين اخوج ما يدري بيج اجيتي فصلية بسببة ... وطبعا اني الي راح اكولة .. معقولة افوت فرصة شوفتة وهو يسمع خبر حبيبة  گلبة اخذوها فصلية
غمضت عيوني وجريت حسرة
دفعني من شعري وحجة : خلي هسة على ما يطلع ابوي من المستشفى واني اعرف شلون اتفرغلج
رفسني برجلة على ضهري فزيت من الوجع : ااااخ
طلع هو واني كمت اجر بنفسي جر واكول الحمدالله على كل حال اتحملي ميامين هاي بس البداية ... لازم متضعفين ابقي قوية .. تحملي الله وياج انتي مو وحدج
كعدت اصبر بنفسي بهالحجي
صعدت لغرفتي دخلت للحمام غسلت وجهي ونشفتة طلعت ولميت شعري زين لان من كثر ما جرني من شعري انفتح واني شعري طويل ويتعب

كعدت بالكاع ولميت رجلية لصدري كعدت افكر شنو حياتي الجاية اذا هاي بدايتها الله يعينج ميامين على الي جاي

ورة شوية سمعت صوت الباب يندك كمزت بس كلت اكيد مو هو لان هاي دكة خفيفة وهو ما اعتقد يدك الباب اصلا
كمت وفتحت الباب ابتسمت : خاتون

خاتون وبيدها صينية اكل زغيرة : اي خاتون ... كلت بما انج اجيتي متأخرة اكيد ماكو شي موجود حتى تاكلي ... جبتلج اكل تعالي نتعشى سوة
ابتسمت الها وهي دخلت حطت الصينية بالكاع وتربعت : يلة تعالي ليش بعدج واكفة
كعدت كدامهة وبديت اكل شي بسيط مع ان اني احب الاكل بس انسدت نفسي من بعد الي صار

خاتون : ميامين ؟
ميامين بالي مجان يمها رديت بسرعة : ها
خاتون بنضرة تفحص : ليش عيونج حمر ... شنو جنتي تبجين .... غزوان سوالج شي
ميامين ارتبكت : لا اصلا من شفتة طلعت لغرفتي
خاتون : ميامين ... لا تخفين شي .. اني اعرف غزوان وعلى شنو ناوي ... حاولت امنعة بس هو محد يكدر يوكف بوجهة .. الانتقام عامي على عيونة وميشوف كدامة غير فارس ... بس لا تخافين اني راح اكون وياج .. صح ما اكدر امنعة لان مستحيل يسمع مني
...
ميامين اسمعها تحجي وطاحت دموعي : ليش متفكرين مثل اخوج ... ليش متعاقبيني على موت اخوج
خاتون : ببساطة لان مو انتي الي قتلتي فارس ... اخوج الي سوة هالشي وانتي مالج ذنب
ميامين : رائد مستحيل يقتل فارس ... خاتون انتي يمكن متعرفين رائد شكد يحب فارس يعني وين ما يكعد هو بسيرتة ... ينام ويكعد وهو وفارس ليل ونهار يتخابرون ... تدرين هو جان ايكول هذا اخوية الي مجابتة امي ... بعد شلون تتوقعينة يقتل اخوه

خاتون وكفت : ميامين الشيطان عدل ما مات ...

ميامين : بس اني اعرف اخوي عدل ... وهو مستحيل يقتلة
خاتون بأنفعال : ميامين اني ما عندي شي وياج يخليني اكرهج .. بس اخوج مستحيل نسامحة لان بسببة انحرمت من اخوي ... وانتي هسة تحجين هيج بدافع عاطفتج على اخوج وحبج الة ... بس احنة لا
شالت الصينية وطلعت اني طلعت وراها اريد اعتذر منها لان هي مالها ذنب وحالها حال اي شخص صدكو بألي شافوه من ادلة ...وكلبها محروك على اخوها
طلعت واني طلعت وراها ردت احجي بس صار بوجهنا غزوان الي كاعد بالصالة ومدد رجلي عالطاولة
ردت ارجع لو ما هو شافني ...

ابتسم بسخرية : اوووه خاتون هنا ... صايرات صديقات .... بهالسرعة كدرت تفر راسج
أشر عالصينية : لا وجايبتلها الاكل لعندها ... عفية بخاتون
خاتون بحدة : غزوان مالة داعي هالحجي ... انت من البداية تعرف شنو رأيي بالموضوع ... واذا عالعشا انتو اجيتو متأخرين واكيد هي متلحك تسوي اكل بهالوقت وخصوصاً هي متندل شي هنا

التفت علية وهو على نفس سخريتة : هه لا مبين متندل شي هنا ...
وجه كلمتة الي : خاف متندلين المطبخ تردين ادليج بي ... خطية لان بعدج مستغربة المكان وتستحين ترحين وحدج
نزلت راسي وخاتون الي ما فهمت شي : يلة اني رايحة ... تريد شي
اجيت اكوللها فدوة لا ترحين اخاف ابقى وحدي وياه
غزوان ببرود : سلامتج ... اشر عالصينية ماريد هالشي يتكرر
خاتون تنهدت : ماشي .... تصبح على خير

ما رد عليها وهي طلعت

اني درت ضهري ردت اصعد لغرفتي

: ويييييييين

التفتت علي بخوف : تعبانة من الطريق ... اريد انام

غزوان بسخرية : تعبانة من الطريق وانتي جايبتة كلة نايمة
رجع كعد بمكانة ومد رجلي عالطاولة كدامة : روحي سويلي عشا ... واذا شفت شي ما عجبني
ساعتها نتفاهم
بلعت ريكي ورحت للمطبخ :اففف هسة اني شمدريني شيعجبة هذا
فتحت الثلاجة شفت خيار وطماطة
قطعت الطماطة وحطيتها بالطاوة اتذكر من جان يجينة بليل فارس ويبات يم رائد يكعدني بليل اسويلهم طماطة مقلية
كسرت بيضتين فوك الطماطة
قطعت الخيار بماعون وحطيت من الزيتون الي مساع ما تهنيت بي
لكيت روبة زبادي حطيت بكاسة زغيرة
طلعت خبز من المجمدة وحطيتة بالفرن شوية حتى يطلع عبالك هستوة مخبوز
اخذت الصينية ورحت للصالة حطيتها كدامة
هو يباوع عالصينية حسيتة ضاج لان الصينية مرتبة وما عليها حجي
ردت اروح مرة ثانية : اووكفي
حسيتة اجتة من الله حركتي هو من البداية رايد يضربني
بدون ما اباوعلة : ها
اشر على الكاع يم رجلي : تعاي هنا
رحت كعدت وين ما اشرلي
لزم شعري بكل قوة ورفع راسي وقرب وجهة من وجهي : اول قاعدة .. مرة ثانية اذا شفتيني اكل تبقين واكفة لحد ما اخلص .. وتاخذين الاكل من كدامي وتسأليني تريد شي لو لا ..صار معلوم

غمضت عيوني من الالم شعري تكطع
جرني اقوى بعد وكرر بصوت اعلا : صااار معلوم

رديت بانفعال : ليش انتضرك ... اذا ردت شي صيحني
غزوان وعلى نفس وضعة : هذا التصرف يسوونة الزوجات الطبيعية ... اما انتي خدامة هنا او جارية فــــصـــلية
صكيت سنوني من الالم وحجيت : والفصلية مالها رب الخدامة مالها رب
غزوان صك سنونة وغرز اصابعة بفكي حسيتة راح ينخلع : لسااانج ... صوتج ما يعلى كدامي مرة ثانية

حسيت خدي انشل من قوة الراشدي الي ضربنياه
طحت بالكاع سندت نفسي على ايدية
داس على اصابعي ووكف : ااااااااه ايدي ايدي ... فدوة اصابعي حتتكسر
غزوان ببرود : وهذا الوطلوب
رفسني بخاصرتي برجلة الثانية شهكت من الالم
عبر فوكاي ومشى وولا عبالك سوة شي
بقيت اتلوى بالكاع مدري من ايدي مدري من خاصرتي مدري خدي الي احسة مشتعل نار من قوة الراشدي
كمت بالكوة من مكاني شلت الصينية لان ماريدة يلكاها حجة ويرجع يضربني
غسلت المواعين ونضفت وراي المطبخ ورحت لغرفتي تمددت بس ما كدرت انام اتكلب وابجي
من اول يوم اشتاقيت لامي
مسحت دموعي : قوي نفسج ميامين مو وقت ضعف انتي بعدج ابداية الطريق ... لا تخلينة ياخذها حجة عليج ويستمر بتعذيبج ... لا تصيرين خوافة واوكفي بوجهة
بقيت اتكلب مادري شلون غفيت

كعدت الصبح بارعت عالساعة ٩ : عزززاااا اني بعدني لهسة نايمة .. هسة انكتل لان ما سويتلة ريوك
كمت فتحت البردة وفتحت الشباك حتى تتهوة الغرفة ... سمعت صوت جوة باوعت من الشباك
شفت ٣ سيارات هستوهن دخلن لبيت اهل غزوان

اول سيارة نزل منها غزوان بسرعة وفتح الباب الورى ونزل منها رجال جبير بالعمر شعرة ابيض ولابس دشداشة سودة خمنت ان هذا ابو غزوان لان غزوان يشبهة كولش
نزلو من السيارات الباقية كم واحد من ضمنهم حمزة الي جابنا من اهلي ... وواحد ثاني فتحت عيوني من شفتة لو ما فارس ميت جان كلت هذا فارس
ركزت بشكلة ... بس هذا مبين هادئ ورزن ووجهة يطمن مثل ميكولون وهم اضخم شوي من فارس
... يمكن اخو لو كرايبة
اني فارس شايفتة هواي مرات وية اخوية اشوفة من بعيد وهم صورة هو ورائد تارسة غرفة رائد

شفتهم التفو علي وسندوه حتى ينزل بس هو وكفهم واخذ عوجيتة (عصا) من حمزة وسند نفسة
ما اسمع اصواتهم بس اشوفهم غزوان والولد الثاني يأشرولة ان يسندوه بس هو رافض

بعدين انتبهت لنفسي شدا اسوي : عزا العزاج ميامين سدي الشباك ترة اذا شافج غزوان ترحين وطي
رحت رتبت فراشي وبدلت ملابسي لان جنت لابسة تراك ماعرف انام بدشداشة
لبست دشداشة سودة وشال اسود ونزلت جوة

يعني شسوي بلة ... هسة حتى ماعندي تليفون اسلي نفسي بي وهمة عدهم فاتحة يعني ميصير افتح تلفزيون

رحت للمطبخ كلت خلي اسوي غدا مع ان بعد وكت .. بس رجعت فكرت اكيد اليوم يتغدى يم ابوه مادام طلعوه من المستشفى

طلعت وبقيت افتر بالبيت
بي اكثر من غرفة ... شفت غرفة مقفولة حاولت افتحها بس ما تنفتح .. شدتني لان بابها مو بس واحد لا بابين وجبير الباب بعدني ردت افتحها

وكمزت على الصوت وراي : شتــســوين هــنــا ؟

غزوان👇🏻

الكاتبة : سارة الشمري🖤