رواية سجينة الظلم والانتقام الفصل السابع 7 - بقلم سارة الشمري

الكاتبة : سارة الشمري🖤

ليس في العالم وسادة احن من حضن امي ..

كمزت على الصوت وراي : شتــســوين هــنــا ؟

التفتت شفتة واكف ومكتف ايديه ويباوعلي بعصبية
حجيت بتوتر : و و ولا شي بس جنت اتفرج عالبيت

حجة بتحذير ورفع اصبعة بوجهي : اول واخر مرة اكلج هاي الغرفة ممنوع توصليلها .. ان جان اني موجود بيها او لا ... سمعتتتي ؟

ميامين هزيت راسي : تمام

غزوان : وهسة وخري من وجهي
ميامين : اسويلك غدا لو تتغدا برة
غزوان صك سنونة : مااااريد ... انكلعي من وجهي كتلج
درت وجهي اريد امشي واني اسمع صوت المفتاح ودخل للغرفة وسدهة وراه

رحت للمطبخ سويت جاي وطلعت جبن وكعدت اكل
اتذكرت رائد ... ياترى شنو وضعة هسة ... عرفت بية اجيت فصلية لو لا ... اتمنى ما يعرف حتى لا يحس بالذنب
ورة شوية سمعت صوت خطواتة طلع من البيت :اكيد جان جاي بشغل

كمت تمددت عالقنفة مالت الهول
محسيت على نفسي من غفيت
كعدت على صوت : ميامين كومي ... ليش نايمة هنا
تخيلتها امي : ماما عوفيني نعسانة
: ميامين ... اكعدي الساعة صارت ب ١
فتحت عيوني : خاتون
خاتون : اي يلة كومي الساعة بالوحدة
طفرت من مكاني : عزااااا هاي شكد نمت
خاتون : مادري ... ليش نايمة هنا
ميامين : مادري شلون غفيت قبل شوي ... يمكن لان البارحة نمت متأخر
خاتون : وليش نمتي متأخر
ميامين ارتبكت : هيج بس لان مغيرة مكاني ممتعودة بعدني
خاتون بعدم تصديق : ايه ... علا كولاً جبتلج ماعون تمن باقلاء مسوينة لان بابا يحبة ... كلت يمكن تحبينة
ابتسمت على طيبتها ولان فكرت بية : شكراً يعمري ... الحمدالله على سلامة والدج .. حضنتها وهي ابتسمت : الله يسلمج حبي ميامي
ضحكت : ومدلعتني هم ميامي بعد شريد
خاتون ابتسمت : يلة تعاي اكلي لا يبرد ترة يصير مو طيب .. تذوقي شغل ام غزوان شلونة
ميامين تذكرت : بس خاتون انتي تدرين بي ما يقبل تجيبين اكل هنا ... اني ماريد تصيرلج مشكلة بسببي
خاتون : معليج بي اكلي ... ميكدر يسويلي شي
حجيت بكلبي ( بس اني يكدر يسويلي وتطيح بية )
كعدنة ناكل التمن وهي حاطة علي سهم لحم جبت زبادي واكلنا وياه الطعم يجنن اول مرة اتذوق هيج شي خلصنا الماعون كلة
خاتون ضحكت : عافيات ... لو ادري جايبة بعد
ميامين : لا والله شبعنا
خاتون : تحدثي عن نفسج اني بعدني مشبعانة
ضحت عليها
تربعت كبالي
سألتها بفضول : ميامين احجيلي عنكم .. يعني عن عائلتكم .. عنج انتي
خاتون : اممم احنا ٣ اخوان (غزوان و مؤيد و فارس ) و٢ اخوات ( خاتون ومها )
ميامين : ماشالله ... غزوان الجبير الصح
خاتون : اي صح غزوان عمرة ٣٤ و مؤيد ٣٢ و فارس الله يرحمة عمرة ٣٠ ووراه اني عمري ٢٣ ووراي مها اصغر وحدة عمرها ١٩
ابتسمتلها : يعني انتي اكبر مني بخمس سنوات .. مبينة اصغر من هيج
خاتون : اي صح كولها اتكول هيج
ميامين : شنو درستي جامعة
خاتون : درست تربية اسلامية ... ومها حاليا تدرس علم النفس اول سنة ... وانتي شنو تدرسين
ميامين دنكت : اني سادس علمي يعني بكلوريا ... بس مثل متشوفين ما كملتة
خاتون حاولت تغير الموضوع : شنو هواياتج
ميامين : احب اقرة روايات واستمتع بالقصص الغامضة مثل قصص اجاثا كريستي
خاتون : اني اخلص من مها تطلعيلي انتي
ميامين ضحكت : ليش انتي شنو اخر كتاب قريتي
خاتون بتفكير : امممم بحث عن تعاليم الدين الاسلامي بالجامعة
ضحكت عليها : يعني متقرين كتب ابد
خاتون : لا ماحب
ميامين : لعد شنو تحبين تسوين بوقت فراغج
خاتون : اممم اطبخ مثلا
ميامين اشرت على جسمها بشقة : مبين عليج تحبين الطبخ
ضحكت وضربتني على كتفي ع كيف : ع اساس انتي رشيقة ... اني اسمن منج بششششوي
ضحكت عليها
قاطع ضحكاتنا صوتة : ما شاء الله كالبات البيت كهوة
اختفت ابتسامتي من شفتة
خاتون : عادي جنة ندردش شوي ... تفضل اكعد ويانة
غزوان ببرود : حشاج خاتونة بس مو من مستواي هيج كعدات
خاتون : غزوووان ..... اني رايحة عن اذنكم

طلعت خاتون واني مشيت من يمة اريد اروح بس جرني من زندي حيل : وهسة اجة دورج

ميامين خفت بس حاولت ما ابين : بشنو

غزوان : افا ... ما عرفتي شنو ... انتي تدرين اني جنت مشغول عنج وملتهي بالمستشفى يم ابوي .. بس هسة محد يخلصج مني
ميامين خفت من بعد كلامة : ليش شنو ناوي تسوي بعد اكثر من الي سويتة
غزوان : اوووو .. بعدج ما شايفة شي .. هسة تعرفين شسوي
جرني من شعري ويسحب بية واني احس شعري تكطع بيدة : غزوان الله يخليك فك شعري والله دتوجعني
غزوان بدون ما يباوعلي ومستمر بالمشي : هسة تعرفين الوجع الصدك
ميامين ايدي لازمة ايدة الي على شعري : وين ماخذني ... عوفني فدوة
شفتة ماخذني بأتجاه وحدة من الغرف خفت هذا شيريد يسوي
فتح الغرفة وشمرني بالكاع ودخل وسد الباب
ميامين وابجي كلت بتوسل : غزوان الله يخليك لا تلمسني
غزوان بسخرية : هه مو غزوان الي يلمس وحدة مثلج .. جاية من عائلة خونة ومجرمين ... انتي شتطلعين لعد
ميامين بعصبية : اهلي مو خونة ولا مجرمين ... انتو الي عقليتكم منحطة
غزوان قرب مني وجر شعري من ورة صار وجهة قريب كولش من وجهي وانفاسة الحارة من العصبية تضرب بوجهي : احنة عقليتنة منحطة مو ... راح اخليج بنفسج اتكولين اخوي الكتل فارس

ميامين حجيت بعصبية ووجهي بعدة قريب منة : مستحيل هالشي ... بأحلامك ... اخوي لو اشوفة بعيني يقتل فارس ما اصدك

غزوان وهو يوكف : سهلة هسة انشوف

راح فتح الكنتور طلع منة حزام ... اني كلبي راد يطلع من مكانة
زحفت لورى وهو يتقدم ناحيتي ويطبك بالحزام وعلى وجهة ابتسامة خبث وهو ايشوفني اشلون خايفة
زحفت لورى الا ان حسيت ضهري انضرب بالكومدي ... اعتلت ابتسامتة
حسيت فخذي اشتعلت بي نار من قوة الضربة الي اجت علي صرخت من كلبي من الوجع
تعمد يخلي جهة الحديدة بأتجاهي حتى اتألم اكثر

حاوطت وجهي بأدية حتى احمي من الضربات الي توالت على جسمي لميت رجلية لصدري وغطيت وجهي بأيدية واني اشهك واستنجد بي ان يتوقف بس لا حياة لمن تنادي
ضربة الحديد صارت مثل لسعات النار على ضهري وهو صار يلهث من كثر الضرب بس استمر بالضرب

رفسني بخاصرتي وكعني بالكاع حتى افك نفسي ويكدر يضرب باقي جسمي

صرخت بقوتي لما اجت الضربة بالحديدة على بطني : ااااااه ... كافي ارحمني فدوة

غزوان وكف وهو يلهث من كثر الضرب : انسي شي اسمة رحمة وانتي يمي .. وهسة كومي اطلعي من غرفتي
ميامين جسمي كلة يرجف ما اكدر احركة من الوجع وبس شهكاتي تطلع وخدي عالارض ودموعي تصب

فزيت على صوتة وهو يصيح : كووووومي ... لا وربج هسة اكمل عليج اكثر من هيج
شديت على نفسي بالكوة وكمت جريت نفسي جر واني اتمسك بالحايط وايدي على بطني مكان الضربة مجرد ما المسها يزيد الالم
طلعت من غرفتة طبك الباب وراي ... بالكوة وصلت لغرفتي سديت الباب
شمرت نفسي عالجرباية وجريت المخدة ودفنت وجهي بيها وطلعت صرخة من كلبي مو بس من صوتي
حطيت راسي عالمخدة ولميت جسمي مثل الجنين وصرت ابجي واشهك واون من الالم : ااااخ يممممة ... وينج يمة تعاليلي ... محتاجتلج ... اخذيني لحضنج
بجيت وبجيت لحد ما تعبت كمت من مكاني .. بالكوووة سيطرت على جسمي من الالم
دخلت للحمام ... شغلت المي البارد حتى يبرد جسمي الي اشتعل نار بس من الضرب .. وبلكي يبرد كلبي
دخلت جوة الدوش واختلطت دموعي الحارة وية المي البارد
بقيت شوية جوة المي وبعدين نشفت شعري بالمنشفة باوعت لجسمي بمراية الحمام ... صاير شي ازرك شي بنفسجي شي احمر ..
باوعت لنفسي بالمراية : هاي اول يوم وهيج صار بيج ميامين ... وانتي ضعفتي من اول يوم ... لا قوي نفسج تحملي الي جايج ... انتي اختاريتي هالشي ولازم تتحملين ... الي جاي اقوى من هذا وانتي من اول مرة انهاريتي ... لا ديري بالج اتحححممملي

فتحت المغسلة وغسلت وجهي بمي بارد اكثر من مرة نشفت وطلعت
طلعت دشداشة سودة وشال اسود
مشطت شعري ولفيتة خليت معطرات الجسم
بدلت وكملت باوعت للساعة ب ٤

نزلت من الدرج البيت هدوء .. يمكن طالع
وگلعتهم خلي يطلع ارتاح من شوفتة شوية

دخلت للمطبخ شفتة كاعد ع كرسي الطاولة ويخابر

ردت اطلع بس اشرلي انتضر واشر بيدة بحركة الي يخوط بيها الجاي .. بمعنى سويلي جاي
رحت حطيت بالقوري مي حار من البراد وحطيتة عالنار
ما انتبهتلة من سد التليفون : هه اشوفج رجعتي مثل قبل ... لازم ما اثرت بيج الدكة ... بس ولو هو المطــ## شما تضربة ما يأثر بي
رديت علي بأبتسامة : كلامك هذا يدل على اعترافك بقوتي وقدرة تحملي الك
غزوان زادت ابتسامتة ورد ببرود : اي صح واكبر دليل .. العيون الحمر والدموع الي ماوكفت ... والترجي .. والخوف .. وشنو بعد ؟ .. هاا اي و ارحـــمــنـــي .. مفهومج غلط عن القوة والتحمل

من عصبيتي التفتت عنة ونسيت وحطيت ايدي على ايد القوري الحديد .. نشييت من الالم : اااااه

غزوان يبتسم بخبث وما تحرك من مكانة : هه حتى القوري كاره تقربين منة
اجيت افتح المي البارد واحط ايدي
قاطعني ببرود وهو على نفس وضعيتة ما تحرك : الافضل متحطينهة جوة المي لان تطكك ..
تراجعت واني اباوعلة بمعنى شسوي لعد
اشر بيدة على فريز الثلاجة
فتحتة ومديت ايدي
غزوان : عالبرودة بس .. لا تلزكينهة عالثلج .. هه ترة ينشلع الجلد من مكانة
كام من مكانة وراد يطلع
ميامين : وين
التفت علية ورفع حاجبة
ميامين : قصدي والجاي
غزوان بسخرية : ههه داوي بي ايدج
طلع ورحت طفيت عالقوري الي بي بس مي
كعدت عالكرسي وانفخ بهدوء على ايدي

ردت اصعد لغرفتي بس بعدني ما طالعة من المطبخ وسمعت صوت انثوي بالصالة يصيح

: غــــــزوان ... غــــــزوان

غزوان👇🏻

الكاتبة : سارة الشمري🖤