رواية سجينة الظلم والانتقام الفصل الستون 60 - بقلم سارة الشمري

الكاتبة : سارة الشمري✍🏻

مأساة الحب تتلخص في أن الرجل يريد أن يكون أول من يدخل قلب المرأة . و المرأة تريد أن تكون آخر من يدخل قلب الرجل

بست راحة ايدهة (باطن كفهة) وكلت بحب : واني شأريد غير راحتج .. بس لا تطولين علية ..
ميلت راسهة وحطتة على صدري .. للحضة كلت نامت بس من حجت استوعبت : لا تخاف ما راح اتأخر ..
تنهدت من كلبي وحطيت خدي على شعرهة .. ما طلعت الحنية الا هسة من رادت تروح ..
ورة شوية انتضمت انفاسهة وجسمهة ثكل .. عرفت ان نامت .. حطيت راسهة عالمخدة وبستهة بكصتهة وطلعت وصار بوجهي رائد ..
غزوان : شوكت راح تروح ..
رائد : باجر الصبح انشالله ..
عفتة وتوجهت للمكتب مالتي ..
مددت عالقنفة واني احس بتعب مو طبيعي ..
من هسة شايل هم شلون راح اعوفهة تروح وابقى بدونهة هالكد ...

£££££££££

ميامين ... مادري ليش حسيت بخنكة من كال رائد اخذج وياي .. يعني تعودت على غزوان وعلى حضنة .. بس حسيت ان مشتاقة لبيتنة ولازم ارتاح وافكر بحياتي الي جاية .. ماريدهة تبقى هيج ..
من حضني حسيت ان محتاجة لهالشي .. غمضت عيوني واني اشم عطرة مثل كل يوم تعودت ما اغفى الا على عطرة ..

&&&&

جوري ... عفت مؤيد يتعشى وجان عدنة مطبخ تحضيري زغير بالجناح مالتنة يعني للأشياء البسيطة ..
شغلت القوري الكهربائي وحطيت بي مي وجاي ..
بقيت واكفة وافكر .. ليش يربي من عرفت بي يحبني ونضرتي تغيرت وصرت بس افكر بي .. يا ريتني ما تليكفت وفتحت الصندوك ..
شلت القوري من شفتة كام يفور ..
اريد احطة بالكلاص بس اختل توازن ايدي وطاح القوري من ايدي ..
صرخت بألم : ااااه رجلي ..
صرت اطفر لان القوري انكلب على جف رجلي واحترك من فوك ومن جوة .. كعدت بالكاع لان ما اكدر اوكف عليهة ..
دخل مؤيد مفزوج وبسرعة كعد كدامي : جووري ..
دموعي نزلت وكلت بألم واني اهفي على رجلي : رجلللي احتركت بالجاي ..
حط ايدة على جف رجلي واني كمزت وهو بسرعة وخر ..
اباوعلة مرتبك واني رجلي الالم صار يزيد بيهة وتحركني .. : اااي يممة رجلي موتتني ..
ما حسيت غير مد ايدة جوة رجلية وايدة الثانية ورة ضهري وشالني من الكاع ..
شهكت بس من الالم ما اكدر احجي ..
دخلني للغرفة وحطني عالجرباية وكام بسرعة للحمام وطلع جايب وياه خاولي مرطب بمي بار ..
اني صرت انافخ من الالم : فدوة مؤيد شنو رجلي راح تتشوه ..
باوعلي بعصبية : بعز الالم والبجي تفكر بجمال رجلهة .. انتي بس لا تبجين واني اعرف شلون اعالج رجلج ..
مسحت دموعي وحطيت ايدي بحلكي ..
هو لف الخاولي على رجلية وطلع بسرعة ..
ورة دقايق رجع ووياه خاتون وبيدهة علبة الاسعافات : شجاج يا جوري .. غير تنتبهين ..
مؤيد اخذ العلبة منهة وطلع عصارة الحروق ..
حجيت واني اريد ابجي : شمدريني بالي ما جان يم الجاي ..
مؤيد سحب رجلي وحطهة بحضنة : اكيد هو انتي شوكت بالج يصير عندج .. طول النهار بس تتصفنين ..
سحبت رجلي من حضنة : شجاي تسوي ..
رجع سحب رجلي مرة ثانية : شسوي يعني خليني اعالج الحرك ..
خاتون تباوعلنة بأبتسامة ما فهمتهة وكالت : مادام مؤيد موجود لعد اني اروح ..
مؤيد بدون ما يرفع عينة : اي روحي شكراً ..
راحت خاتون واني نزلت عيونة الة ..
حاط رجلي بحضنة ويوزع بالعلاج على الحرك بحذر وبخفة اصبعة حتى لا يأذيني ..
طابك حواجبة بتركيز وعبالك عندة عملية .. ابتسمت على شكلة المتوتر وكلساع ينفخ على رجلي .. الخوف مبين علي .. حسيت بقشعريرة من لمسة اصابعة على رجلي وهو ينزلهة ويرفع الثانية ويرجع يحطلهة العلاج نفس الشي ..
حجة بهدوء بدون ما يرفع عينة علية : تأذيج ؟؟...
حجيت بأبتسامة : تأذيني بكد خوفك علية هسة ..
رفع عيونة الي وضحك : مو صوجج .. اني خفت عليج وانتي تتمضحكين علية ..
ابتسمت : لا والله ما اضحك بس شكلك حلو وانت تهتم ..
طبك حواجبة بأستغراب : عادي يعني اي مريض اني اهتم بي هيج ..
باوعتلة برفعة حاجب : يعني كل مريض انت ايديك ترجف وهيج متوتر وخايف ..
فرك كصتة وكال وهو يكوم : ديلة لا تاخذين دور المحقق هسة .. اخذي من هذا العلاج هسة تنامين لان الحرك ماراح يخليج تكدرين تنامين ..
هزيت راسي وكلت بأبتسامة : شكراً ..
عافني وراح للغرفة مال الملابس وورة دقايق طلع وبيدة تراك الي ..
حطة كدامي وكال : اني طالع وانتي بدلي ملابسج بين ما ارجع ..
طلع من الغرفة واني ابتسمت علي ..
بعدين اختفت ابتسامتي وحطيت ايدي على كلبي .. يربي شبية بس اشوفة كلبي يصير يدك سريع ..
اول مرة احس هيج بتوتر وما اعرف شتصرف ..
لا لا لا مستحيل هالشي يكون صحيح ..
هزيت راسي ونفضت هالافكار من بالي وبدلت ملابسي بسررعة وتمددت واحاول انام بس ما اكدر ..

££££££

بسمة ... كاعدة عالقنفة واتابع فيلم هندي اسمة (sanam re) حسنين دخل وشافني مدموجة وية الفلم ..
كعد بصفي واني حتى ما التفتتلة على اساس زعلانة يعني ..
لازمة بيدي السنيكرز واكل ..
حسنين : يعني هسة انتي ليش زعلانة .. يعني بربج زعلتي لان حجيت وية الممرضة .. هاي هم حاسبتهة سالفة ..
انقهرت من كلامة .. لا ويحجيهة بكل بساطة ..
سويت نفسي ما سمعتة اصلا وحطيت ايدية جوة حنكي واباوع عالممثل بهيام وعبالك كدامي واحجي وياه : ايييه ياخي انت منين مصنوع .. امك بشنو تنست من حملت بيك .. انت سنيكرز لو نوتيلا .. والله حقهن الاخوات ثنينهن يموتن عليك..

ما حسيت غير الريموت انسحب مني والتلفزيون طفى ..
باوعتلة بعصبية : ليش طفيتة .. ما تشوفني جاي اتابع ...
باوعلي بغيض وعصبية : جاي تتابعين لو تتغزلين بالممثل ..
بسمة : وانت شعليك بية ..
حجة بعصبية اكثر : شلون شعلية .. تردين اشوف مرتي تتغزل بواحد واسكت .. لا وكدامي هم ..
كابتلة وتربعت وتخوصرت وكلت بقهر : لعد وين راح كلامك قبل ثواني .. شلون شلون بربج زعلانة لان حجيت وية الممرضة وهاي هم حاسبتهة سالفة .. وين راح كلامك هسة واني اصلا حجيت على ممثل يعني من ورة الشاشة مو انت داكلهة سوالف وية الممرضة وكدددااامي هم ..
رفع حاجبة وكال : وحدة بوحدة يعني ؟..
كتفت ايدية بعناد : اي وحدة بوحدة .. العين بالعين والسن بالسن والبادي اضلم .. واصلا بعدة كلبي ما شفة منك .. واريدك تتعاقب اكثر ..
ضحك هوة : شتردين تسوين يعني ..
باوعتلة بقهر يا برودة اعصابك ..
قربت منة وبسرعة عضيتة من كتفة بكل قوة ..
بقيت متمسكة بي حيل وهو دفعني بقوى ويفرك بكتفة : يااحيوانة .. شهالتصرفات مال المزعطة ..
حجيت بتشفي: تستاهل .. هسة ارتاح كلبي ..
حسنين تحولت تضرتة للخبث : ما دام كلتي وحدة بوحدة لعد جبتيهة لروحج والبادي اضلم ..
فتحت عيوني اريد استوعب بس ما لحكت احجي الا وهو شايلني عالجرباية ..

£££££££££££

ميامين .. فتحت عيوني الساعة ٧ الصبح احس شبعت نوم .. التفتت شفت عالقنفة الطويلة غزوان متمدد ونايم والتعب مبين بوجهة ..
كمت بهدوء ونزلت من الجرباية ماريد ازعجة ..
دخلت للحمام وغسلت وبدلت ملابسي لان اليوم اطلع ..
طلعت من الحمام شفتة كاعد ..
كام وكال بأبتسامة : صباح الخير .. شلون صرتي ..
رديت علي واني اكعد عالجرباية : صباح النور .. الحمدالله احسن بس شوية دوخة من العلاج ...
غزوان : بس تتريكين تصيرين احسن ..
ابتسمت واني اعدل حجابي ..
اندك الباب وبعدين انفتح : صباح الخير يروحي ..
ابتسمتلة : صباح النور حبيبي ..
رائد وهو يحط الطبلة كدامي : جبتلج ريوك يحبة كلبج .. يلة تريكي .. حتى تصيرين زينة ..
غزوان : واهم شي تشربين الحليب كلة .. لان مفيد
باوعتلهم ثنينهم : ترة اني مو طفلة حتى تعاملوني هيج ..
رائد كرصني من خدي : لا طفلة واحلا طفلة هم ..
اباوع لغزوان ما عاجبة الوضع والضيقة مبينة علي ..
وكف وهو يريد يطلع : اني رايح اجهز اوراق الخروج بين ما تخلص ريوك ..
طلع من الغرفة ورائد كعد كدامي ..
حجة بأبتسامة : تدرين هم وانزاح عن كلبي من شفتج مرتاحة وياه ...
ابتسمتلة وكلت : الحمدالله ..
رائد : غزوان مبين علي يحبج ويخاف عليج .. البارحة ماكدر ينام وهو بالة يمج واجة طلب مني هو يبقى هنا واني وحت نمت بالمكتب مالتة .. يعني ميامين غزوان يحبج ديري بالج علي ولا تخسرينة بسبب بعض تصرفاتج ..
باوعتلة بتوتر : ليش شمسوية اني ..
ابتسم بوجهي : ما مسوية شي بس مرات تعاندين وتقفلين عالسالفة والرجال ما يحب الي تعاند على كلشي وبالتالي يمل منهة ويدور غيرهة .. لهالسبب اكلج حافضي علي وبطلي من عنادج شوية ..
هزيت راسي وبديت اكل وافكر بكلام رائد وتصرفات غزوان ..
كملت اكل وحضرت نفسي واجة غزوان ..
رائد : اني طالع كدامكم واخذ الجنطة وياي .. غزوان جيبهة وتعال وراي ..
غزوان هز راسة ورائد طلع ..
باوعت لغزوان وهو تقرب علية واخذني بحضنة بدون ما يكول اي شي ..
رفعت ايدية بتردد وحضنتة وهو تمسك بية اكثر ..
غزوان : يعني لازم تروحين ؟..
هزيت راسي : اي اكيد رائد ينتضرنة ...
حط شفايفة على كصتي وباسني بوسة طويلة وبعدين وخرت ..
لبست عباتي واريد اطلع ..
شفتة ماد ايدة الي وينتضرني ..
مديت ايدي وحطيتهة بأيدة وطلعنة .. نمشي بممرات المستشفى وكل الممرضات يباوعلة مستغربات وجودي وهو ما مهتم وما باوع لاي وحدة .. يمشي وهو رافع راسة وايدة لازمة ايدي ..
اباوع لطولة ومشيتة وتفاصيل وجهة وجسمة ..
احبة هالشخص .. اي احبة .. مهما حاولت اقنع نفسي ان اكرهة واحقد علي ماكدرت .. حقدي جان عامي على عيوني .. تعودت على وجودة بحياتي .. تعودت اسمع صوتة كل يوم .. ما ينام الا يشم عطري كل يوم بس هو ما عرف بهالشي خلاني اني صرت ماكدر انام الا هو حاضني ..
طلعنة من المستشفى وجان رائد بأنتضارنة ..
صعدت بالسيارة وغزوان سلم على رائد وبعدين تحرك رائد بالسيارة وتوجه للكوت ..
اباوع لرائد مبتسمة واني اشوفة يغني وية ياس خضر مشغلة بالسيارة ..

يم داركم .. صدفة واخذني الدرب من يم داركم ..
والتمت بروحي المحنة واشتهيت اخباركم ...

انتبهت لنبرة الحزن بصوتة وتنهيداتة العميقة ...
عرفت ان يقصد فارس بهاي الكلمات ومو خاتون ..
الله يرحمك يا فارس ..

£££££££££

جوري .. كعدت من النوم وباوعت للساعة ٨ ونص .. نزلت رجلية واني ناسية الحرق تماماً ..
حسيت بالضغط على رجلية بسرعة كعدت بألم : ااه .. اففف شهالغباء جوري ..
طلع من الحمام وهو ينشف شعرة بالمنشفة ويحجي : الحمدالله من عرفتي بنفسج غبية ..
صفنت بشكلة .. لابس كيمونة سودة وايدي بارزة عضلاتة .. وشعرة لان مبلل نازل على كصتة والباقي مخلبص لان جان ينشف بي ..
قاطعني وهو يكول : ادري بروحي حلو بس لا تصفنين زايد ترة كثرة الحلاوة تسوي سكر ..
دنكت بفشلة ..
فجأة حسيت نفسي مرفوعة ..
شايلني ومتوجه بية للحمام : مؤيد نزلني شجاي تسوي ..
مؤيد : مو تردين ترحين للحمام .. شلون ترحين وانتي رجليج ما تكدرين تمشين عليهة .. خلص كلت اني امشي بمكانج ..
حجة هالجملة مادري ليش اثرت بية .. مع ان هوة كالهة بدون تعبير بس حسيت بيهة .. قربة مني خلة كلبي صار يدك بسرعة واحس نفسي صخنت ..
وكف كبال الحمام ونزلني بهدوء وايدي بعدهة محاوطة خصري : تكدرين تمشين على كعب رجلج ..
هزيت راسي بأي .. تمسكت بالباب ودخلت وقفلتة ..
رجعت جسمي عالباب وحطيت ايدي على كلبي .. شبية من البارحة واليوم ..
صرت اهفي على نفسي واني احس بحرارة خدودي ..
غسلت وجهي وفرشت اسناني وطلعت ..
شفتة مبدل ملابسة ولابس دشداشة بيضة ...
باوع بوجهي وكال بأبتسامة وهو يخبص شعري : وهسة نكول صباح الخير ..
ابتسمت : صباح النور ..
رجع شالني واخذني لغرفة الملابس واني مادري ليش مستمتعة ..
سحب الطبلة من جوة المراية برجلة وكعدني عليهة ..
صار يكلب بملابسي بتفكير : اليوم اختارلج على ذوقي ..
ضحكت وكلت : ترة كلهة دشداشة شتختار منهة وبعدين اني رجلية محتركة يعني مو مكرمة حتى تختار بمكاني ..
مؤيد: اسكتي وخليني اختار بكيفي ..
سكتت وهو يكلب الملابس وشي تعجبة وشي ما تعجبة ..
اول شي طلع دشداشة صفرة وحطهة كدامي بس بعدين وجع شالهة وكال : لا هاي تطلعين بيهة ابو صفار ..
ضحكت علي .. رجع طلع دشداشة حمرة حلوة بس هم رجعهة وكال : لا انتي بيضة وهاي حمرة تبرز عليج ..
يربي شبي هذا .. طلع دشداشة زركة وحطهة كدامي وابتسم : هاي حلوة .. بلون عيونج ..
ابتسمت : تمام راح البسهة ..
طلع هو من الغرفة واني لبستهة جانت خليجية بيهة خرز وحلوة ..
ورة دقايق هو دخل .. طلعلي شال ...
اخذ العطر ورش منة على رگبتي .. اني بسرعة قشعر جلدي وانكمشت على رگبتي ..
باوعلي بأستغراب : شبيج ؟
جاوبتة واني امسح رگبتي : ماحب العطر يجي على جلدي مباشرةً .. احس روحي وصخة ..
ابتسم وكال بشقاوة : فعلاً عطر فوك عطر ما يرهم .
بلعت ريكي من كلامة .. هو يحجي بشقة واني كلبي صاير طبول مادري شبي ...
لبست الشال وردت اكوم .. رجع شالني مرة ثانية صحت بي : وووين نزلني اريد انزل جوة ..
مؤيد : اي اني اوصلج ..
فتحت عيوني : شنووو .. لا فدوة والله عيب منهم ..
مؤيد : وشنو العيب بالموضوع .. عادي ترة انتي مرتي كدامهم .. وبعدين شلون تنزلين هيج ورجليج ..
ما انطاني مجال احجي ونزلني جوة واني اريدة ينزلني بس ما يقبل ...
دخلني للصالة وجانت بس حبوبتي موجودة ..
الحجية بخوف : يا يمة شبيهة البت ..
مؤيد وهو يكعدني عالقنفة : الشاطرة كلبت القروي على رجليهة البارحة ..
الحجية ضربت صدرهة : يا يمة شجاجن من البارحة هم انتي وهم ميامين .. والله هاي عين وما صلت عالنبي .. لازم ابخرجن ..
دخلت عمتي علينة : ها يمة جوري شلون صرتي .. البارحة خاتون كالتلي عليج .. غير تنتبهين زين ..
باوعتلهة بأبتسامة : شسوي عمة الحمدالله ... 

£££££££££

خاتون ... بلشنة تجهيزات من ثاني يوم سمعنة الخبر .. يعني بكل مرة لازم نجهز لعروستين .. بس شعور حلو ومختلف لمن تتجهزين لنفسج كعروس ..
جوري ما كدرت تطلع لان رجليهة احتركت خطية ..
طلعنة اني ومها وبسمة .. وميامين جانت على تواصل ويانة واحنة نصور وندزلهة ..

ميامين .... صارلي ٣ ايام من اجيت .. غزوان كل يوم يتصل علية ويتطمن وذعدين يسد التليفون .. اني الي صرن ماكدر انام وبكل لحضة بس افكر بي تعودت علي وماكدر اغمض عيوني بدونة ..

الساعة هسة ١ بليل واني اتكلب وماكدر انام ..
طلعت تليفوني ولا اراديا اتصلت على رقمة ..
ثواني واجاني صوتة متلهف : ميامي ..
حجيت بصوت هادئ : غزوان .. ازعجتك صح ..
بسرعة جاوب : لا والله بالعكس اصلا ما جنت اكدر انام وبس اتكلب ..
حجيت لا اراديا : اني هم ما جاي اكدر انام والله ..
غزوان بخوف : ليش يروحي شنو السبب .. تعبانة من شي ..
ميامين : لا مو تعبانة بس ....
غزوان : بس شنو ..
ميامين .: غزوان ..؟
غزوان بتنهيدة : ها يروح غزوان ...
ميامين :.....

الكاتبة : سارة الشمري ✍🏻
هلو حبايبي طبعاً مثل ما طلبتو خليت القصة الابطال يحجونهة مو اني .. اتمنى تستمتعون بالبارت حبايبي رأيكم 😘✍🏻