رواية سجينة الظلم والانتقام الفصل التاسع والخمسون 59 - بقلم سارة الشمري

الكاتبة : سارة الشمري ✍🏻

الذي يحب يصّدق كل شيء أو لا يصّدق أي شيء مأساة الحب تتلخص في أن الرجل يريد أن يكون أول من يدخل قلب المرأة...

تلمست شي بيدية .. سحبتة وشفتة .. عقدت حواجبي : شنو هذا ..؟
صندوك زغير لونة جوزي .. شكلة وتصميمة قديم ..
كعدت بالكاع وفتحت الصندوك ..
جان اكو ورقة مطبوكة ليفوك .. فتحتهة بفضولة ..
جانت رسمة عادية .. يعني رسمة واحد بالابتدائية .. عبارة عن شجرة وملونة بالاخضر وطيور بالسما وبصفة بيت زغير .. استغربت شنو الحلو بالرسمة حتى يضمهة انتبهت لأسم اسفل الورقة وخفيف كوة يبين مكتوب رسم مؤيد عبدالله ..
ضحكت اوف يالفنان ومكيف بروحك راسم لوحة الموناليزا ..
حطيت الرسمة على جهة ورجعت للصندوك ادور شبي ..
استغربت من شفت ملهي (مصاصة الاطفال) او البعض يسمونهة اللهاية او اللهاو المهم .. رفعتة وجان مبين قديم ولونة ولونة ازرق ومثبتة بي ورقة مكتوب بيهة (مؤيد عبدالله بعمر ٩ اشهر) .. ابتسمت فدوووة .. حلووو ان الشخص يحتفض بهيج شغلات من طفولتة للذكرى من يكبر يبتسم عليهة ..
طلعت صورة وشفتهة وضحكت .. خاتون وبسمة واني ومها ...
جنت اني الجبيرة ووراي خاتون وبعدين بسمة وصايرين مثل الدرج واحنة واكفين ومها كاعدة بالكاع لان جانت زغيرة وما تمشي .. والمضحك بالموضوع ان كلنة لازمين ككاو بيدينة مادري ليش ..
حطيت الصورة على جهة ورجعت للصندوك العجايب ..
شفت سلسلة فضية مقطوعة وبيهة مدالية على شكل وردة .. استغربتهة بس ما اهتميت ورجعت ادور واني كلي فضول بهالصندوك ..
شفت دفتر حجمة وسط وملفوف حوالينة خيط متين ومشدود ..
سحبتة وتربعت بفضول .. فتحت الخيط وحطيتة على صفحة ..
فتحت اول صفحة وجان مكتوب
اعترافات كل من ( فارس , حمزة , مؤيد )
بتاريخ .... جا التاريخ قبل وفاة فارس بأسبوع .. 

الاول .. فارس ..
اسمي فارس عمري ٣٠ سنة ..
اعترف ان اكثر من مرة سويت مصيبة وذبيتهة براس مؤيد وهو جان ياكل الرزالة من ابوي اسف مؤيد حبيبي نردهة الك بالافراح انشالله ..
واعترف ان اكثر من مرة اعزم حمزة عالاكل واخلي هوة يدفع بحجة نسيت فلوسي .. اسف ابو اسد عود سجلهن عالحساب بعد اخوك ..
اعترف اهم اعتراف وهو فلوس حبوبتي خاتون نصهن صارن بجيبي لان اسوي روحي مفلس وهي تنقهر علية وتطيني هالمقسوم ..
والاعتراف الاخير الي اصرو علي اولاد قيس وليلى وهوة هم حبيت لو لا والجواب اي حبيت وعن قريب راح تعرفون منهي من اخطبهة وهسة خليهة حرشة بدمكم ..

اقرة بكلماتة ودموعي تنزل مادري ليش .. اشتاقيت لصوتة .. ارجع وحقق الي تريدة مو تريد تخطب .. يلة تعال بس المهم اشوفك ...

مسحت دمعتي وكملت قرائة ...

الثاني .. اعتراف مؤيد..
اسمي مؤيد وعمري ٣٢ سنة ..
اعترف مرتين سافرت بدون محد يدري بية بحجة عندي شغل ابغداد لان ادري بأبوي مايرضى اروح وحدي ..
اعترف حبيت مرة وسمعت عنهة شي وبعدين نسيتهة .. يعني من الماضي ..
اعترف مرة ردت اغرق ووصلت الموت بس انقذوني لان جنت ماعرف اسبح وهالشي قبل ٦ سنوات ولحد هسة محد يدري بهالشي من اهلي ...

............

اقرة بيهن ومصدومة مؤيد يحب وحدة ومن سمع عنهة شي نساهة .. منو هاي الوحدة ..
كلبت للورقة الثانية بلكي اكو تكملة بس جان اعتراف حمزة .. تركتة واني كلي فضول اعرف منو هاي الي يحبهة مؤيد ..
شفت ضرف مسدود .. فتحتة بسرعة وجان بي صور ..
اول صورة شفتهة وفتحت عيوني .. هاي اني بحفلة التخرج الي سونهة البنات الي من تخرجت لان ابوي ما قبل اروح للحفلة والبنات ما رادن يكسرن بخاطري سولي حفلة بالبيت .. جنت لابسة فستان احمر قصير وربع ردان وفاتحة شعري الاشقر واصل لنهاية ضهري ..
انصدمت واني اشوف الصورة .. شجابهة لمؤيد وليش محتفض بيهة وية هاي الاشياء ..
طلعت الصورة الثانية هم جانت الي من جنت بالسادس اعدادي تقريباً ولابسة صدرية المدرسة وشعري ضفيرة صفح ..
الصورة الثالثة هم اني بس هاي بحفلة الحنة مالتي .. شوكت لحك يسحبهة ..
واخر صورة جانت الي اتذكرهة اول يوم رحت بي للمدرسة الابتدائية وجنت ابجي لان خايفة من المدرسة وماخذيلي صورة ...
اباوع للصور مصدومة .. شجاب هاي الصور هنا .. ليش عند مؤيد صوري .. ليش محتفظ بيهن .. وشلون كدر يحصل عليهن ..
لحضة .. بدة عقلي يستوعب ويربط شي بشي ..
كاتب بالاعتراف جان يحب وحدة ومن سمع عنهة شي نساهة .. وهو بنفسة كال ان سمعني واني احجي وية فارس .. ونضراتة الي من جان يوصف حالتي وعبالك هو هم مجرب شعور الحب من طرف واحد .. والدليل الاكبر هاي الصور الي محتفض بيهن وكل وحدة عن فترة معينة من حياتي .. وبعدين اني جنت اسأل نفسي ليش حتى مؤيد يساعدني وينقذني من الزواج من الي خاطبني معقولة لان بس بنت عمة هيج جنت اسأل نفسي .. بس هسة فهمت ..
طاحت الصور من ايدي من الصدمة .. لا يربي ليش هيج .. يعني مؤيد يحبني ومن زمان .. بس هو كاتب ان نساني من عرف بية احب اخوه .. يارب يكون هالكلام صحيح ..
فزيت بسرعة من سمعت صوت سيارة جوة ..
بسرعة رجعت كلشي مثل ما كان ورجعت الصندوك والغراض ..

£££££££££££

غزوان .. توجهت لبيت هدية .. دكيت الباب وطلعلي ولد زغير ..: تفضل منو انت ..
غزوان : هدية موجودة ..
الولد : اي عمتي هدية موجودة بس انت منو ..
غزوان طلعت خمسة من جيبي وانطيتهة الة وكتلة : روح صيحها وكللهة يردونج برة ..
دخل الولد يركض .. ورة شوية طلعت وحدة سمرة مثل ما كال الولد ..
هدية بس شافتني : يااا هذا الدكتور غزوان .. مية هلا بيك .. تفضل ..
غزوان بغيض : هلا بيج ..
سوتلي طريق ودخلت للأستقبال ..
هدية : امرني ..
حجيت بسرعة : بدون لف ودوران وجاوبيني على سؤالي .. انتي الحطيتي الدوة لميامين بالعصير ..
فتحت عيونهة بصدمة وبعدين كامت تفر بيهن وتفرك بيديهة ... : هذا يا دوة دكتور ..
كمت بعصبية : احجييي لا والله هسة اتخذ شغلي وياج وانت ما تعرفين شني الاكدر اسوي ..
هدية بخوف : لا دخيلك والله مالي شغل بشي اني عبد مأمور ...
غزوان : منو امرج بهالشي .. احجيي ..
هدية : نورة بت عمتك .. جنت يمهم بيوم العزيمة وطبت علية عصبية وهددتني بأبني اذا ما رحت هسة للصيدلية وجبتلهة دوة اجهاض اقوى مفعول موجود .. ومن رحت ما رضى يطونة الا بوصفة دكتورة وكتلهم ضاعت الوصفة .. وكوة اطونيا ..

عيوني صارت بكصتي واني اسمع حجيهة ..: كومي بسرعة وياي ..
هدية : وين اروح ..
عطت بيهة وهي كمزت : كووووميي ..
طفرت لبست عباتهة واجت ..
طلعت من بيتهم وتوجهت لبيت عمتي الي جان يبعد عنهم كم خطوة ...
دكيت الباب وطلعلي رجل عمتي : خير غزوان صاير شي ..
حجيت واني روحي طالعة : عمي سويلي طريق بعد اذنك ..
ابو نورة : اي تفضل ابني محد غريب ..
دخلت لبيتهم وكعدت بالصالة وهدية تمشي ومنزلة راسهة ..
كلت بصوت عصبي : عمي انة اجيت حتى اشوفك عمايل بتك ..
ابو نورة : شمسوية بتي .. غزوان شنو هالحجي ...
غزوان : بالاول صيحهة عمي وتعرف السالفة ...
راح ابو نورة وصاحهة ودخلت هي وامهة ..
نورة دخلت بأبتسامة وولاعبالك مسوية شي : هلا غزوان .. شعجب جاينة اليوم ..
طبكت سنوني وكلت : ما جاي لسواد عيونج .. جاي اخلي ابوج يكشف حقيقتج ..
بلعت ريكهة وكالت : هاي يا حقيقة ..
التفتت على ابوهة وكلت : عمي هاي بتك المصون حاولت تموت مرتي اليوم ..
حجيتلة كلشي من البداية ومن جانت تحط الكلينس والعطر بجاكيتي ..
نورة وهي ترجف : جذاب لا تصدكة بابا اني مستحيل اسوي هيج ..
ابو نورة : غزوان انت منتبه لكلامك هذا ..
حجيت بعصبية : عمي اذا ما مصدك اسأل هاي الي تشتغل عدكم ..
التفتت على هدية وكلت : احجي وكولي منو الخلاج تشترين هالعلاج ..
هدية وهي منزلة راسهة : اي عمي والله هي جبرتني اروح للصيدلية واجيبلهة الدوة ..
غزوان : صدكت هسة وترة عندي شاهد ثاني وهو العامل اليشتغل عندي واجتة نورة طلبت منة يحطلهة العطر على هدومي توكع بيني وبين ميامين .. عمي انة سكتت عن اول مرة وكلت لأركان يعقلهة وما كتلك الك .. بس توصل بيهة ان تأذي ميامين لا والله اموتهة بيدي ..
ابو نورة كعد عالقنفة وهو يفرك راسة : والله مادري شأكلك بوية غزوان .. فدوة سامحني ..
غزوان : عمي انت مالك ذنب .. بس اريدك توقف بنتك عد حدهة ..
التفت على بنتة وكال بعصبية : لا تخاف من هالناحية .. هسة اخابر اركان انطي الموافقة ويجي يخلصني منهة ..
نورة كامت تبجي : لا بابا فدوة لا تجبرني ماريد اتزوج اركان ..

عفتهم وطلعت عسا نارهم تاكل حطبهم ..
توجهت للمستشفى اريد اشوف حبيبة روحي بالي يمهة ..
وصلت للمستشفى وانصدمت من شفت سيارة رائد بالكراج .. رائد هنا ؟...

&&&&&&&&&

خاتون .. جنة كاعدين يم ميامين .. امي هستوهة طلعت هي ومها ورجعن للبيت وبس اني بقيت يمهة ..

فجأة انفتح الباب وفتحت عيوني بصدمة .. هذا رائد شجابة هنا .. 
بسرعة وحتى بدون ما يباوعلنة وراح لميامين حضنهة وهو يلهث وحجة بخوف : اموني يبعد اخوج شبيج .. بس سمعت بيج بالمستشفى اجيتج واني جنت قريب اصلا لان عندي شغل هنا ...
ميامين وهي تبتسم : ما بية شي لا تخاف .. بس خربطت بالعلاج واخذت الغلط واثر علية ..
انصدمت .. ليش ما كالتلة الحقيقة ..
رائد : غير تنتبهين شلون تاخذين علاج مو الج ..
ميامين بخبث : يلة ما صار شي .. وبعدين المرة الثانية من تدخل دك الباب بالاول .. شوف اكو ناس وجوهم صارت طماطة ..
باوعت بصدمة عليهة .. عزة العزاج خاتون اني ليش بقيت واكفة اصلا ..
التفت علية بأستغراب ومن شافني انفكت حواجبة وطفر من الجرباية ..
اني بسرعة طلعت من الغرفة وكعدت عالكراسي البرة .. يمممة يالفشلة ليش ما طلعت من البداية .. اففففف .. وجهي صار احمر من المستحة ..
سمعت صوت غزوان : ليش كاعدة برة ..
باوعتلة بتوتر وماعرف شحجي : هوو لأن ..
قاطعني بأبتسامة : رائد جوة ..
نزلت راسي : اي ..

£££££££££££

ميامين ... طلعت خاتون واني التفتت على رائد : شبيك طفرت مثل الملسوع ..
رائد وهو يحك راسة من ورة : شمدريني ما انتبهتلهة من دخلت ..
ضحكت وكلت : امممم شبيك اختصبت مرة وحدة .. دكعد ترة طلعت هي شبيك مرتبك ..

انفتح الباب ودخل غزوان ..
تقرب مني وباسني براسي : شلون صرتي يروحي ..
ابتسمتلة وكلت : الحمدالله احسن شوي ..
رائد التفت لغزوان : شكالت الدكتورة ..
غزوان وهو لازم ايدي : اتكول لازم ترتاح كم يوم لحد ما ترجع صحتهة ...
رائد : ماشي لعد لازم ترتاحين ..
التفت لغزوان وكال : شتكول غزوان لو اخذهة وياي للكوت هم ترتاح وهم تحضر تجهيزات العرس لان اني قبل شوي خابرت الوالد وكتلة نخلي الزواج بعد اسبوعين هوة عقد وهو زفة ...
باوعتلة بصدمة وتخوصرت : وليش اني اخر من يعلم بهالقرار ..
رائد : اصلا هسة تقرر لان خالد طلعتلة سفرة مهمة وما يكدر يحضر العقد واجلناه للزفة ..
ميامين : على هالحجي اني لازم ابقى وية البنات حتى اساعدهن بتجهيز اغراضهن ..
رائد بحدة : لا .. اني اريدج تجين وياي لان ادري بيج ما تكعدين وتضلين تفترين .. شتكول غزوان ..
غزوان وهو يباوعلي وكأنة تورط .. : يعني شكد تريدهة تبقى ..
رائد : شوف هي اول وتالي راح تجي بيوم العرس .. ف شتكول لو تبقى منا للعرس ..
غزوان فتح عيونة : لا هواي هيج ..
رائد : غزوان هونهة .. ترة هنة اسبوعين واذا تريد بيوم العرس اخذهة ..
غزوان واضح من شكلة ما عاجبة بس ما كدر يرفض : ماشي اخذهة بس دير بالك عليهة ..
رائد : عيب عليك ترة هي اختي قبل لا تصير مرتك ..

£££££££££

جوري ... كاعدة وافكر بالشي الي اكتشفتة ...
يعني مؤيد مثلي حب من طرف واحد .. يربي ليش هيج يصير ما جنت اريدة يحبني اصلاً ..
انفتح الباب ودخل هوة والتعب مبين بي ..
حجيت بهدو : الله يساعدك ..
كعد وبأبتسامة : يساعد بختج ..
مادري ليش تغيرت نضرتي الة ما اكدر اشوفة مؤيد اليضحك ويتشاقة وياي ..
حجة بصوت : شبيج جوري وين صفنتي ...
هزيت راسي وكلت : ولا شي ..
عفتة ونزلت للمطبخ احضرلة العشا واني تفكيري يمة ..
اعرف شنو شعورك مؤيد .. اني جنت اعيش نفس الشي .. حبيت الشخص الي ما جان حتى يباوعلي غير كأخت الة .. وهسة اني جنت معتبرتك اخ الي بس انت جنت تحبني .. يربي والله عقلي مشوش وما جاي اكدر استوعب شي او افكر بشي ..
اخذت الصينية وصعدت للغرفة ..
لكيتة مبدل ملابسة وفارش السجادة ويصلي ..
حطيت الصينية عالطبلة وكعدت استمعلة وهو يصلي ويحجي بصوت عالي ويردد القرءان بترتيل وبطيئ ..
صفنت بوجهة المسالم ويحمل رجولة وبنفس الوقت طيبة .. اكتافة العريضة وعضلاتة البرزت من البدي الضيك شوي علي ..
حطيت ايدي على كلبي الي صار يدك بسرعة من كال : جوارتي بيج شي اليوم .. شو بس تتصفنين ..
حجيت بفهاوة : جوارتي ..؟.
مؤيد وكأنة انتبه : اسف يعني هيج طلعت لا ارادياً ..
حجيت واني اكوم واشيل السجادة مالتة واريد اتهرب من نضراتة : لا عادي بس افكر بميامين .. يلة تعشى بين ما اسويلك الجاي ..
دخلت لغرفة الملابس واهوي لوجهي .. شبية يربي ليش هيج كلبي يدك بسرعة .. افففف

££££££££££

خاتون ... كاعدة بالسيارة وية غزوان المعصب الي خلاني ارجع حتى احضر جنطة ميامين لان راح تروح وية رائد .. وغزوان شكلة ما قابل ..
وصلنة ورحت حضرت الجنطة وانطيتهة لغزوان ياخذهة لميامين واني رحت لبيتنة ..
رحت لغرفتي وتمددت وافكر برائد اول مرة اشوفة عن قريب هالشكل واركز بي ...

قاطعني الباب الي انفتح بسرعة ودخلت مها مثل الاعصار الهايج ..: استللمي الحجي الزين ..
باوعتلهة بأستغراب : شبيج طابة علية جنج ثور فاكين حبالة .. احجي شبيج ..
مها : لا سلامتج حبيبتي .. بس العقد التغى هالاسبوع وصار بعد اسبوعين هو عقد وهو عرس ويعني تعاي تجهزي ..
كمت بسرعة : شنووووو .. ليش بهالسرعة ..
مها بقهر : اندري .. اجة بابا وكال هيج .. وخلاني كمت اتشلوط .. بربج شألحك واني لهسة التعب مال عرس مؤيد بية ..
كعدت بأحباط عالجرباية : شلون يربي والله مابية حيل اتسوك ..

£££££££££

غزوان ... عصبت من طلب رائد مني ياخذ ميامين بس ماكدرت ارفض لان اول مرة يطلب مني شي ..
اسبوعين شلون اكدر بدونهة .. والله حالة يربي .. اخوانهة يتزوجون واني ابتلي ..
دخلت عليهة للغرفة من بعد ما جبت الجنطة مالتهة ..
شفتهة كاعدة ورائد ما موجود ..
باوعتلهة بقهر : يعني راح ترحين ..
ابتسمت : وانت ليش معصب ..
عصبت بالزايد : شلون ما اعصب وانتي تردين ترحين اسبوعين .. شلون اكدر اتحمل اسبوعين بدونج ..
ميامين : غزوان الله يخليك والله مشتاقة لبيتنة واحس راح ارتاح اذا رحت كم يوم هناك ..
كعدت يمهة ولفيت ايدي على كتفهة وسحبت ايدهة وبست راحة ايدهة (باطن كفهة) وكلت بحب : واني شأريد غير راحتج .. بس لا تطولين علية ..
ميلت راسهة وحطتة على صدري .

الكاتبة : سارة الشمري ✍🏻
حبايبي شلونكم اتمنى عجبكم البارت 😘😘