رواية سجينة الظلم والانتقام الفصل الثامن 8 - بقلم سارة الشمري

الكاتبة : سارة الشمري 🖤

عجباً ايها الليل يقولون عنك هادئ وفيك تصرخ كل القلوب

ردت اصعد لغرفتي بس بعدني ما طالعة من المطبخ وسمعت صوت انثوي بالصالة يصيح

: غــــــزوان ... غــــــزوان

استغربت هذا مو صوت خاتون
طلعت للصالة شفت بنية كولش حلوة
ملامحها وجسمها كولها ناعمة
ما انتبهتلي الا لمن حجيت والتفتت علية بسرعة : غزوان مموجود .. طلع قبل شوي .. تفضلي منو حضرتج
باوعتلي وبعدين تحولت نضراتها لحقد وسخرية : هه يعني انتي الفصلية
شلون بية اني يعني ما خلصانة من سخرية غزوان تجيني هاي انوب
رديت عليها بهدوء ضاهري : اي اني الفصلية ... تفضلي رايدة شي
تحولت نضراتهة للعصبية وقربت مني : وانتي شكو .. بس لا طابة لبيتج واني مادري ... وبعدين شكو تطلعين بخلقتي ... سمعتيني صحت بأسمج لو بأسم غزوان
ميامين بهدوء : اني مطلعت بوجهج ... جنت صاعدة لغرفتي وسمعتج تصيحين ... بس اذا هالشي زعجج خلص لعد المرة الجاية اعوفج تصيحين وحدج وما ارد عليج
وجهة صار ينطي الوان من العصبية : انتي شنو هالجرأة العندج حتى تردين علية بهالشكل ... كلج على بعضج فصلية ... يعني سلعة انطوج اهلج حتى يحمون ابنهم المجرم الي يستاهل الموت
ميامين بعصبية : اخوي مو مجرم ومستحيل يكون مجرم بيوم من الايام .. انتو تبليتو علي
تقربت رادت تضربني بس صوت خاتون من الباب وهي داخلة وكفها : مـــــهــــا .... شدتسوين هنا

مها التفتت لاختها بعصبية : اجيت لبيت اخوي ... شنو عيب لو حرام .. لو من دخلتة هالحية اخت المجرم صار البيت ما ينطب
خاتون بعصبية : مها عيب هالكلام احترمي نفسج .. ميامين مالها ذنب
التفتت علية : ميامين حبي لا تهتمين لكلامها بعدهة زغيرة ومتعرف شتحجي وانطتها خزرة

بس مها ما اهتمت : وتعتذرين منها هم .. بعد روحي بوسي رجلها ... انتي ما عندج احترام ولا معزة لاخوج ... مدللة هالمجرمة اخت الحيوان الي قتل اخوج
ميامين مكدرت اسكت صحت بعصبية : احترررمي نفسج ولا تغلطين على اخوي .... ترة من الاول اني محترمتج وما رفعت صوتي بوجهج ... بس توصل ان تغلطين على اخوي كدامي ما اسكت

: شتسوين مثلا

التفتنا لمصدر الصوت شفناه واكف ويفر السويج بأصبعة
مها راحتلة تتشكى : غزوان .. هالفصلية يرادلها تأديب .. ترد بوجهي بكل وقاحة واخلاقهة زفت ... انت لازم تأدبها لان يبدو اهلها ما علموها شي عن الاحترام ...
خاتون بعصبية : مهااااا ... حرام عليج هي مالهة ذنب بشي وما الها ايد بقتل فارس .. ليش تشحنين غزوان عليها
غزوان التفت لخاتون ببرود : اخذي مها وروحو للبيت
مها : مو قبل ما اشوف شراح تسويلها
التفت عليها وما حجة شي مجرد نضرة وابتسامة

مها : ماشي رايحة
طلعت مها
خاتون تقربت لغزوان : غزوان الله يخليك لا تسمع كلامها هي مها الي بدت واستفزت ميامين وجبرتها تصرخ بوجها
غزوان على نفس برودة : خاتون ... تدرين بية ما احب اعيد حجايتي مرتين
نزلت راسلها والتفتتلي بمعني مابيدي شي : ماشي

طلعت خاتون

هو تقرب بسرعة ولوى ايدي ورى ضهري وقرب شفايفة من اذني وكال بعصبية : والله وطالت بيج ترفعين صوتج بوجه اختي

حاولت اكتم خوفي : اختك هي الي بدت ... حجت على اخوي .. مثل ما انت ما تقبل على اختك اني هم ما اقبل على اخوي
غزوان دارني لجهتة وايدة لاوية ايدي لورة ضهري
صرت لازكة بي : وانتي تقارنين اخوج المجرم ابو السجون ... بحفيدة الشيخ الجاسر
ميامين بانفعال وعصبية : اخوووي اشرف منك ومن عشيرتك كلها ...
دفعني بالكاع ودنك علية وغرز اصابعة بفكي وعيونة صارن حمر من العصبية وطبك حواجبة : حجايتج هاي كدها انتي ...
ميامين : اي كدها وما اتراجع ... واذا تريد اعيدها لان هاي الحقيقة
غزوان بعصبية : لعد تحملي الي جايج

بلحضة شفت المزهرية الكزاز مطشرة بالكاع
كسرها وشال قطعة منها وقرب مني
اني هنا عقل ما ضل براسي من الخوف
رجع تقرب مني
مكدرت اتحرك من مكاني من الخوف
دنك علية اني نزلت ضهري للكاع
دفعني وراسي انضرب بالكاع
قرب وجهة من وجهي وكال : هسة اعلمج شلون تقيمين حجايتج كبل لا تطلع من حلكج

باوع بعيوني وبعدين نضراتة نزلت لركبتي الي جانت طالعة لان الشال طاح بالكاع والدشداشة دلعة شوية
باوع على ركبتي وبعدين رجع عيونة بعيوني وكال : نساوتج فاهية ... شتكولين لو اطوخها
حطيت ايدي مكان النساوة الخفيفة الي كانت على العضمة الموجودة بين الركبة والصدر
سحب ايدي من ركبتي وقرب الكزازة من ركبتي : فدوة لا .. الله يخليك وخرها عني
ما اهتملي مقيد ايدية وحدة حاطهة جوة رجلة والثانية لازمهة حيل
صرخت من حسيت الكزازة جرحت ركبتي
صرت احرك براسي يمنة ويسرة بس ما اثرت بشي لان النساوة جوة ركبتي
صار يمشي الكزازة على النساوة مثل الي يرسم على ورقة بيضة بقلم احمر ... حدد النساوة وبعدين صار يشخط بالكزازة بالوسط
اني حسيت روحي فرفحت فقدت الامل صرت بس ابجي واشهك واتألم
خلص وذب الكزازة الي انملت دم وقرب وجهة من وجهي : المرة الثانية حجايتج قبل لا تطلع من حلكج كوني عارفة مصيرج بعدهة
كام مني وطلع من البيت

مجرد ما طلع دخلن خاتون ومها
خاتون اجت تركض علية وشهكت من شافتني
بقيت اتلوى بالكاع واون من الالم واشهك
قربت خاتون وسندتني وكعدتي
كامت تبجي وياي التفتت خاتون على مها وصرخت بيها : ارتاحيتي هسة
مها جانت حاطة ايدها على حلكها ومصدومة من المنضر ... بس عافتنة وطلعت
حضنت خاتون وصرت ابجي واشهك
خاتون ودموعها تنزل : اهدي ميامي فدوة ... والله مجنت اعرف راح يسوي هيج ولا مجان عفتج والله

حطت ايدها على مكان الجرح اني صرخت : ااااه
هي شالت ايدها بسرعة : كومي ميامين فدوة خلي اعقمة قبل لا يتجرثم
كمت وياهة ودخلتني للمطبخ : راح اروح اجيب علبة الاسعافات من بيتنة انتضريني لا تتحركين

طلعت هي واني جبت كلينكس وحطيتة بمكان الجرح بس الدم مجاي يوكف كمت اريد اغسلها بالمي .. فتحت السنك ردت اغسل مكانهة بس حسيت ايدي انجرت التفتت شفتة هو

ما لحكت استوعب وجودة لان مباشرة صرخت من الالم بكل قوتي : ااااااااااااه .... شيييلها حرام عليك

غزوان وهو حاط ايدة على مكان الجرح وبيها قطن والايد الثانية مثبت رگبتي بيها : اششش .. بيها معقم راح تحرگج شوي
تخبلت من عرفتها تعقيم يعني هو يجرحني وبعدين يرجع يداويني صرخت واني ادفع بي : وخررررررر عني .. ما اريدك تعقمها ... كلة من وراك انت الي جرحتني لا تحاول تداويني
تهسترت واني ادفع بي اخر شي صرخ بية : بسسس ... كافي والله اذا ما سكتي هسة اجي واكمل عليها بالزايد وانعل ابو الي يداويج بعدها

جرني وكعدني عالكرسي واني اهز برجلي بعصبية سكتت لان خفت من تهديدة
عقمها واني ادفع بيها
صاح بعصبية : شلووون .. وتالي
رفعت راسي وكتلة بعصبية : تحرررگني
غزوان رجع القطنة وعينة على رگبتي : تحمليها
رديت علي بعصبية : اساسا لو ما انت الي جرحتني مجان هسة اني هيج
غزوان رفع عيونة بعيوني وكال ببرود : ولو يرجع الوكت ارجع واجرحها ... لا عبالج من داويتج يعني متندم
ميامين بعصبية : لعد ليش جاي تداويني
غزوان وهو يحط الشاش وفوكاه اللاصق : هالشي راجعلي ولا تتدخلين بي
ردت ارد بس قاطعتنة خاتون وبيدها علبة الاسعافات الاولية : بعد الي سويتة جاي تداويها

التفت عليها ابتسم ببرود وبدون اهتمام شال المعقم والشاش واللاصق وطلع من المطبخ

دخلت خاتون وركعت العلبة عالطاولة : بس لو اعرف شنو الي يدور براسك جان ارتاحيت

التفتت علية وكالت : خو ما اذاج الجرح
رديت بأبتسامة : اي من التعقيم اذتني كولش
خاتون : ليش مكلتيلة لا يخلي تعقيم .. لو حطيتي عصارة ما تأذيج
ميامين : ليش هو اخوج انطاني مجال .. كبل لزك القطنة بركبتي حتى مادري بي واكف وراي

خاتون : بس همزين ما اذى وجهج بالكزاز
رديت عليها بسخرية : لا تخافين لو جانت النساوة بوجهي جان ما تردد
خاتون ما افتهمت : نساوة شنو
ميامين : غير حدد النساوة الي بركبتي بالكزازة .. ايكول فاهية خل اطوخها الج
خاتون انصدمت ومثل الي خجلت من تفكير اخوها : ميامين اني اسفة ... مها بعدها زغيرة ومتعرف شلون تتصرف
ميامين حطيت ايدي على ايدها وابتسمت : خاتون لا تتأسفين انتي مالج ذنب بشي ... وحتى مها اني عاذرتهة لان كلبها محترك على اخوها ... واصلا الي سواه غزوان مو بسببها
خاتون بأستغراب : مو بسببها ... لعد ليش
ميامين : اني استفزيتة بالحجي وهو ما تحمل وسوة الي سواه
خاتون بعصبية : بس مهما ايكون الحجي الي كلتي ما يستاهل يسوي هالشي بيج
ابتسمتلها وكلت واني اقلد جملتها : عاد غزوان منو يكدر يوكفة
ضحكت هي وضربتني عالخفيف : ميلوك ترة لا تقلدين
ضحكت عليها : عششتو
ابتسمتلها وحضنتها : عفية خاتون لا تعوفيني ... محد يريدني هنا .. انتي الشي الوحيد الحلو هنا

حضنتني وكالت : لا تخافين اني وياج .. بس ترة اكو شخص ثاني غيري هم حلو
رفعت راسي وكلت بأستغراب : منو
ابتسمت خاتون : حتعرفين بعدين

قاطعنة صوت مها يم الباب : اذا خلصتو رومنسية انتي وياها ممكن ست خاتون امي تصيحج
التفتت علية مها وكملت : عبالي متي فرحت .. بس طلعتي مثل الجلـ## بسبع ارواح
دارت وجهها وطلعت
ميامين التفتت على خاتون واني اشر على مكان مها الي جانت واكفة بي : اكيد مو هي الشخص الحلو

خاتون : معليج بيها خلي تولي لا تهتمين لكلامهة

ميامين بدون اهتمام : عادي اصلا .. اخوها شبهني بالمطـ## وهي شبهتني بالجلـ##  ماكو فرق

خاتون وهي تكوم : بيباي ميامي .. حروح اشوف امي شتريد
ميامين بأبتسامة : بيباي

طلعت هي
اني التفتت للساعة بال 7 اووف شبسرعة مر الوقت

مالي نفس اكل شي نفسي انسدت
رحت للقنفة كلت خاف اصعد ويجي يلكاني نايمة وانعلس
خل انتضرة يجي خاف يريد عشى
رجعت راسي مادري شلون غفيت

فزيت على صوتة وهو يصيح : كووومي

ميامين بخوف : بسم الله شكو

غزوان بعصبية : كومي نضفي الكزاز عايفتة بالكاع

ميامين اوف نسيتة

كمت نضفت الكزاز

التفتت علي : متعشي لو تريد اسويلك عشا

غزوان بسخرية : هه لا منتضرج لهسة ... انتي شايفة الساعة ابيش
التفتت عالساعة شفتها ب ١٢ عزززة شجاني عالنوم اني
التفتت اريد اروح لغرفتي
غزوان : اوكفي .... سمعيني زين
التفتت علي بدون ما احجي
كمل كلامة بأمر : من باجر ما اريد البيت اي وصخ بي ... كل يوم يتنضف ... وغرفتي كل يوم ترتيب وتعزيل وتنضيف وكلشي بمكانة ... ملابسي تنغسل وتنكوي اول بأول ... واذا شفت اي شي مو مرتب او مو نضامي ف اعتبرة انج تكليلي تعال عاقبني
وانتي تعرفين عقوباتي هواي ... صار معلوم

هزيت راسي ب اي : حاضر

غزوان ببرود : حلو .. هسة ولي انطمري

رحت لغرفتي تمددت ومباشرة نمت .. مادري شجايني عالنوم

كعدت الصبح من وقت رحت دكيت باب غرفتة
ماكو صوت ... اكيد طالع
فتحت الباب وشفت الغرفة هوسة
هاي شنو .. مو خاتون كالت مو فوضوي ويكره الهوسة لعد هاي غرفة جدي
بس والله مبين متعمد يهوسهة علمود اتعب بيها

عزلت الملابس الي نضيفة ومكوية بس مطشرهن بالكاع
عزلت الغراض الي عالميز ... شفت تليفون موجود عالمجرات
اجت فكرة ابالي بس خفت ... : اففف ميامين لا تخافين هو مو هنا
شلت التليفون ومجان بي رمز فرحت

دخلت رقم اخوية حسان لان بس هو حافضتة

ردت اتصل بس فجأة : ااااااااااه

الكاتبة : سارة الشمري 🖤