رواية سجينة الظلم والانتقام الفصل الثامن والخمسون 58 - بقلم سارة الشمري

الكاتبة : سارة الشمري✍🏻

إذا شكا لك شاب من قسوة امرأة ، فاعلم أن قلبه بين يديها...

همس يم اذني : ليش نايمة والساعة ٥ العصر .. مريضة شنو ..
ردت احجي بس فجأة حسيت بالالم عبالك سجينة ودخلت ابطني .. صرخت : اااااااه ...

غزوان ... رجعت للبيت واستغربت ميامين نايمة هالوقت .. حضنتهة وعرفت ان مانايمة لان نفسهة مضطرب وطابكة حواجبهة .. فجأة صرخت ..
كمزت بسرعة من الخوف : شبيج ميامين ..
لمت نفسهة مثل وضعية الجنين وحطت ايدهة جوة بطنهة وهي تصرخ : اااااه .. غزوان فدوة بطني موتتني ..
تخبلت .. ماعرف شسوي .. سحبتهة وحطيتهة بحضني : ميامين حبيبي اهدي .. بس فهميني شيوجعج ..
دموعهة صارت تنزل واني حاط ايدي فوك ايدهة وكلشي ما افتهم احس روحي انثولت من الخوف عليهة .. ايدية صارت ترجف ..
تمسكت بية وهي تبجي : غزوان فدوة احس بطني تتكطع من الالم .. اول مرة احس هيج والله ..
كمت ما اعرف شسوي ... حبيبتي وروحي جاي تتألم بين ايدية واني ماعرف شبيهة ..
سحبت التليفون واتصلت على خاتون وايدية ترجف .. مادري شحجيت وسديت التليفون ..
ورة شوية دخلن خاتون ومها وبسرعة ..
ميامين حاطة المخدة بحلكهة وكاتمة صرخاتهة ..
خاتون بخوف : شبيهة ليش هيج تبجي ..
حجيت واني افرك وجهي بخوف عليهة ومتوتر : مادري والله .. بس اجيت هي كامت تصرخ وتكول بطنهة توجعهة ..
مها : شوفهة انتة مو دكتور ..
غزوان : ماعرف شسوي .. والله احس انثولت ..
خاتون بسرعة : كوم خل ناخذهة للمستشفى ..
مها راحت جابت عباية كتف مال ميامين واني حاطهة بحضني وهي تتلوى من الالم ..
لبستهة مها الحجاب والعباية وخاتون اخذت عباية ميامين ..
حسيتهة ارتخت بيدي وثكل جسمهة ..
هزيتهة بس ما تحركت .. مها صرخت : بسررعة استعجل ..
احس ايدية ماتت من الخوف .. كوة شلتهة .. مستحيل اخسرهة .. هاي النفس مالتي .. ما راح تعوفني والله اموت وراهة ...
دخلتهة للسيارة وحطيت راسهة بحضن خاتون .. ومها كعدت بصفي ... صعدت بمكان السايق وطرت عالمستشفى ..

دخلتهة مباشرة لغرفة الطوارئ وصحت عالدكتور ..
الكل يباوعون علية لان يعرفوني وبيهم متفاجئين اول مرة يشوفوني بهالحالة ..
ما اهتميت لنضراتهم وكل همي لحبيبة كلبي النايمة كدامي ومادري شبيهة ..
اجت الدكتورة وسألت عن حالتهة كتلهة صارت تتوجع من بطنهة وبعدين اغمى عليهة ..
الدكتورة من شافت حالتي : دكتور غزوان ممكن تتفضل برة ..
حجيت بعصبية : ما اطلع .. ما اعوفهة وحدهة ..
الدكتورة : دكتور الله يخليك تفضل ماعرف افحص اذا اكو توتر يمي ..
مها سحبتني واني عيوني عليهة شلون نايمة ووجهة شاحب : غزوان امشي ننتضر برة .. وكفتك هنا مالهة فايدة ..
طلعت برة البنات كاعدات واني افتر بالممر وعقل ما ضال براسي ..
خاتون : غزوان اهدأ انشالله ما بيهة شي .. ميامين قوية وتكدر تتحمل ..
غزوان : شلون تتحمل .. انتي ما شفتيهة تتألم وتبجي ..
خاتون برفعة حاجب : ترة هي تحملت الاقوى من هالشي واكثر من مرة .. انشالله هالمرة هم تكدر تتحمل ..
باوعت عليهة بعصبية : هسة وكت هذا الحجي ست خاتون .. ابد ما راح تتغيرين ..
خاتون : ديلة هسة اني شحجيت .. وبعدين اني ما سألتك .. شسويتلهة حتى صار بيهة هيج ..
غزوان بعصبية : ما سويتلهة شي .. دخلت للغرفة وشفتهة متمددة وفجأة صرخت ..
قاطعنة صوت تليفون مها : هاي امي تتصل ..
خاتون : ردي اكيد هسة قلقت علينة ..
كامت مها تحجي وية امي واني كلبي نار عليهة واريد اعرف شبيهة ..
ورة نص ساعة طلعت الدكتورة ..
رحتلهة بسرعة : شبيهة ميامين ..
الدكتورة : دكتور غزوان ماعرف شنو اكولك بس الله ستر وكدرتو تتلاحكون ..
غزوان : شنو يعني .. شبيهة ميامين احجي ..
الدكتورة : المدام ماخذة حبوب (...) ...
فتحت عيوني بصدمة : بس ليش تاخذ هالحبوب وهي اصلا مو حامل ..
الدكتورة : وهذا الشي الي خلاني اكول همزين تلاحكتو .. دكتور هذني الحبوب مال اجهاض وهالنوعية كلش قوية يعني اذا جانت حامل راح يوكع الطفل من حبة وحدة .. واذا جانت مو حامل راح يأثر عالرحم مالتهة وممكن يسبب عقم .. بس الحمدالله كدرتو توصلون قبل ما يفوت الاوان وكدرنة ننطيهة مضادات لهذا العلاج وهو منضف للرحم ..
غزوان : وهسة هي شلونهة كعدت لو لا .. اريد اشوفهة ..
الدكتورة : راح ننقلهة لغرفة خاصة وتكدر تشوفهة هناك ..
راحت الدكتورة واني كعدت مصدوم .. ليش حتى تاخذ هذا النوع من الحبوب ..
مها بصدمة : يعني ميامين جان عبالهة ان هي حامل واخذت ذني الحبوب حتى تجهض .. بس ليش تريد طفلهة يموت ..
غزوان بغيض : ميامين ما عبالهة هي حامل .. مستحيل اصلا تشك بهالشي حتى ..
خاتون بعصبية : وانت شمدريك ..
غزوان بعصبية : تستغبين بية خاتون .. شنو مادري بمرتي اذا ممكن تكون حامل لو لا .. مستحيييل تكون حامل ... ولازم اعرف شلون اخذت هالعلاج .. اكيد بالغلط اخذتة...
انفتح الباب وطلعو السرير المتحرك ميامين نايمة بي ...
مشيت وياه بخوف وكلبي عصرني واني اشوف وجهة اصفر .. وصلت لحد غرفة خاصة ودخلوهة للغرفة .. الممرضة ركبت المغذي وراحو ..
كعدت يم راسهة واني اباوع لوجهة وانفاسهة المنتضمة ..
اباوع لخاتون كاعدة عالكرسي اليمهة من الجهة الثانية ومها صافنة وكأنهة تفكر ..
حسيت بحركتهة وطبكت حواجبهة ..
كمت بسرعة ولزمت ايدهة .. فتحت عيونهة وصارت تدور بأنحاء الغرفة وبعدين ارتكزت علية ..
ابتسمتلهة وكلت : الحمدالله على سلامتج يروحي ..
بلعت ريكهة وكالت بصوت خفيف : اني وين .. شصارلي ..
غزوان : انتي بالمستشفى .. تعبتي وجبناج هنا ..
خاتون : الحمدالله على سلامتج ميامي ..
مها : سلامتج حياتي شتحسين هسة ..
ميامين : ما احس بشي بس دايخة ..
غزوان : اكيد يروحي من العلاج راح تدوخين ..
ميامين طبكت حواجبهة وكالت : شبية ليش هيج صار وياي ..
مها : الدكتورة اتكول انتي ماخذة علاج اجهاض قوي واني اصلا مو حامل وهالشي اثر عالرحم ..
ميامين بأستغراب : يا علاج هذا .. ليش اخذ علاج اجهاض واني ادري بنفسي مو حامل ..
طبكت حواجبي وكلت : لعد شلون وصل هالعلاج الج ..
ميامين : مادري والله ..
ورة ثواني ومها صاحت : نورة ..
استغربت وكلت : نورة ؟؟
مها بأنفعال : ايي .. اليوم بالعزيمة مو حبوبتي رادت تضوج نورة وكالتلهة انشالله ميامين حامل وهي عيونهة صعدت لراسهة ..
خاتون وهي تستوعب وتحجي وية ميامين : اي صح .. ومن اصرت عليج الا تشربين من العصير .. اني حتى بوقتهة استغربت كلت ليش هالكد مهامة ان ميامين تشرب من العصير ..
وكفت بعصبية واني اريد اطلع ولزمتني خاتون : غزوان لحضة وين رايح .. شلون تهد عليهم وانت ما عندك دليل ..
دفعتهة وطلعت : انعل ابو الدليل ..

&&&&&&&&&&

خاتون ... بعد ما طلع غزوان معصب التفتت لمها : يعني لازم تحجين كدامة ..
ميامين : صح مها .. يعني تدرين بي ما راح يسكت ..
مها : خل تولي تستاهل ..
انفتح الباب بسرعة ودخلت بسمة ..: اموون حياتي شجاج مو مساع جنتي مثل الحصان ..
خاتون : واني اكول البنية شبيهة .. ثاري جايتهة عين
بسمة : هيهيهي بايخة على فكرة .. ميامين صدك شبيج فجأة ..
مها حجتلهة شبيهة ومن وصلت : واني اعرف منو سوة بيهة هيج ..
اندك الباب وفتحتة وطلع مؤيد وحسنين : شلونج خاتون ..
خاتون : الحمدالله انتة شلونج ..
حسنين : الحمدالله .. تكدرين تسويلنة طريق بس نتحمد بالسلامة لمرت غزوان ..
خاتون : اكيد تفضلو ..
سويتلهم طريق لان اصلا ميامين لابسة حجابهة ...
تحمدولهة بالسلامة ومؤيد اجاه تليفون من امي تريدة يجي يجيبهة لميامين وهو طلع راحلهة ..
بسمة للمرة الالف : مهااا .. مو اسألج منو انطة الحبوب لميامين ..
مها بنفاذ صبر : نوورة .. ارتاحيتي ..
بسمة بغيض وهي تتوجه للباب : ايا بنت اللذينة اليوم اموتهة على ادية ..
حسنين لزمهة : وييين انتي ما عندج غير الطلايب والعرايك ..
بسمة وهي تريد توخرة عنهة : عوفني هاي البنية زادت عن حدهة ولازم اربيهة من جديد .. محد يأدبهة غيري .. بس اطيني المجال ..
حسنين بعصبية : بسسسمة صووتج احنة بمستشفى .. وعوفي هالسوالف مالج شغل بيهة ..
بسمة بقهر : معليك انتة ..
حسنين وهو طابك سنونة : لسانج لا اكصة ..
بسمة بعناد : ماا اسكت ..
مها وهي تريد تهدي الوضع : بسمة ماكو داعي لهالعصبية .. اساساً غزوان راح يحل الموضوع ..
بسمة وهي تتخوصر : غزوان الفاهي يحل الموضوع ..
حسنين : بسسسسمة .. شهالصلافة تحجين عالولد بغيابة .. انطمي بمكانج احسلج ..
بسمة : انتة منو داسلك على طرف وصاير محامي ..
حسنين يفرك بوجهة بعصبية : بسمة خليني ساكت لان ماريد احجي ويطلع صوتي وكلهة تعرفني بالمستشفى ...
بسمة خافت : ماشي اصلا بعد ما احجي وياك .. شنو هاي صاير تعصب على اتفه الامور ..
حسنين : لا تحجين بعد احسن .. المهم ماسمع حسج ..
دخلت ممرضة للغرفة وانتبهت لحسنين : اوو استاذ حسنين .. شلونك ..
حسنين : هلا رؤى .. الحمدالله
رؤى : سمعنا بيك تزوجت .. بصراحة انصدمت ..
اباوع لبسمة رافعة حاجبهة وتباوع للبنية من فوك ليجوة وماعاجبهة الوضع ..
حسنين : وليش انصدمتي .. اني من زمان خاطب اصلا ..
رؤى : لا يعني ما توقعت تتزوج زواج تقليدي ..
حسنين بأبتسامة وهوة مل من عدهة مبين : لا مو تقليدي .. حبيتهة اربع سنين وبالكوة رضت بية ..
بسمة ابتسمت واخفتهة ..
رؤى : شنو هالغبية هاي .. اكو وحدة ترفض واحد مثلك ..
بسمة وهي تتخوصر : ننننعععععم .. الغبية التحجية عليهة ترة اني .. وبعدين اذا كاتلة روحج علي وهيج متلزكة ليش ما اخذتي .. لو ما حلة بعينج الا من تزوج ..
رؤى تفشلت ونزلت راسهة ..
بسمة التفتت على حسنين المبتسم على غيرتهة الواضحة ..: حبيبي اذا خلصت زيارتك تكدر تروح وبعدين مر علية ..
حسنين ضحك لان قبل شوية كالتلة بعد ما احجي وياك ..: ماشي حياتي تدللي .. يلة في امان الله ..

هو طلع والممرضة من خوفهة من بسمة طلعت تركض ..
احنة طكيناهة ضحكة على شكل بسمة المعصب ..
ميامين : اذا هالكد تحبينة ليش تسوين مشاكل ..
بسمة : هوة يدور مشاكل مو اني ..

&&&&&&&&&&&

غزوان .. طلعت من المستشفى واني ماشوف كدامي من العصبية ..
اتصلت على اركان وكتلة على الي صار : غزوان خاف يتهيألك .. يعني عندك دليل على هالشي ..
غزوان : تريد دليل مو .. اليوم اجيبلك دليل ..
سديت التليفون بعصبية ورحت لبيتهم ...
توجهت لاقرب صيدلية عليهم ودخلت ..
حجيت وية الشاب : خوية تكدر تخدمني بشغلة ..
الولد : اي تفضل انشالله اكدر ..
غزوان : تكدر تتذكرلي منو اخر شخص اشترة منك علاج اجهاض اسمة (....) ..
الولد بجدية : خوية هذا العلاج نادراً ما يشتريه احد من عدنة واذا احد اشتراه ما انساه لان انصدم منهم من يشترونة ..
غزوان بسرعة : تكدر توصفلي شكلة الي اشتراه منك ..
الولد بتفكير : جانت مرة لابسة عباية اعتقد ومتوسطة العمر يعني مو جبيرة ولا زغيرة وجانت سمرة كلش يعني حتى تميل للسواد .. هذا الي اكدر اتذكرة من اوصافهة ..
تنهدت وكتلة : شكرا الك .. اني ممنون منك ..
الولد : بالخدمة خوية ..
طلعت من الصيدلية واتصلت على خاتون .. : الو ..
غزوان : خاتون راح اطيج مواصفات وكليلي تعرفين وحدة بهالشكل ..
خاتون بتركيز : ماشي اسمعك ..
حجيتلهة المواصفات وهي تفكر .. بعدين صاحت : عرررفتهة ...
غزوان بسرعة : منو احجي ..
خاتون : هاي هدية ...
غزوان : هدية منهي ..
خاتون : هاي وحدة مطلكة وجوارين بيت ام نورة وهي تشتغل عدهم يعني تجي تنضفلهة وتطبخلهة وعمتي تطيهة فلوس ..
غزوان : متأكدة هي جوارينهم يعني نفسهة ..
خاتون : اي متأكدة .. اصلا من كلت سمرة كلش عرفتهة هي ..
غزوان : خوش لعد .. خاتون ..
خاتون : ها ..؟
غزوان : ميامين شلون صارت ..
خاتون : الحمدالله احسن وهاي تسولف وية البنات ..
غزوان : خوش لعد ديرو بالك عليهة بين ما احل سالفة عالعلة ..
سديت التليفون وتوجهت لبيت هاي الي اسمهة هدية ..

£££££££££££

جوري .. طلعت عمتي وية مؤيد وراحو لميامين واني بقيت هنا يم حبوبتي .. خطية ميامين بالي يمهة .. اتصلت على خاتون وسألت عليهة وتطمنت ..
صعدت لغرفتي وكعدت ارتب بالملابس ..
من الملل رتبت ملابسي من جديد ورحت ارتب ملابس مؤيد ..
طلعت ملابسة الشتوية لان البرودة راحت والجو صاير حلو .. طلعتهن واخذتهن لكنتور الغرفة ..
وخرت الملابس الي بي وطلعت حتى ارجع ارتبهن لان جانن محطوطات بأهمال ..
الباب الاول جان مقسم لاربع خانات وحدة فوك الثانية ..
طلعت الملابس مال مؤيد وكعدت ارتب بيهن خانة خانة ..
الخانة الاخيرة جانت عالية .. رفعت اطراف اصابعي ومديت ايدي ادور بدون ما اباوع بي لان ماشوف منة شي كلش عالي ..
تلمست شي بيدية .. سحبتة وشفتة .. عقدت حواجبي : شنو هذا ..؟

الكاتبة : سارة الشمري✍🏻

حبايبي اشكركم من كل كلبي على اضافتكم الي فديتكم والله 😘