رواية سجينة الظلم والانتقام الفصل السابع وأربعون 47 - بقلم طبيبة الاحساس

البارت الثاني والخمسون

الكاتبة : سارة الشمري🖤..

قلبيَ الحُر الذى لم يفهموه
سوف يثلقي في اغانيه العزاء
لا يظنوا انهم قد سَحقوه
فهو مازال جمالاً ونقاء
سوف تمضى فى التسابيح سنوهُ
وهم فى الشر فجراً ومساء
فى حضيض من آذاهم القوةُ
مُظلم لا حسن َ فيه ولا ضياء

مها وهي متوترة : لا بس شفتج حاضنتة وقريبة علي وهو مو اخوج ..

: منو هذا الي حاضنتة وهو مو اخوهة .....!!!!؟؟؟؟؟

التفتن الة واكف بعصبية ..
مها بخوف من عصبيتة : خالد ..
غزوان بعصبية وهو يسحب التليفون : وخالد ليش تحضنينة .. هو مو ابن خالتج ..
ميامين تصنعت الابتسامة : اي لان خالد يكون اخوية من الرضاعة .. يعني عادي شبيك عصبت حبيبي ..
غزوان ارتخت حواجبة ورفع عيونة الهة بفهاوة وممصدك : هاه ..؟؟؟
مها حصرتهة الضحكة وكالت : من رخصتكم اني رايحة ..
طلعت مها وميامين التفتت على غزوان ببرود .. : ترة لا تصدك .. كلت هالشي لان مها واكفة .. واتمنى انت هم نفس الشي يعني تبين كدامهم احنة عايشين طبيعي لان اني هيج مفهمتهم ..
غزوان قرب وجهة منهة بأبتسامة : شلون يعني طبيعي ..
ميامين ببرود : يعني نتصرف كأي زوجين طبيعيين .. ماشي ؟ ..
غزوان بأبتسامة : ووين اكو احلا من هالشي ...
ميامين بدون اهتمام كامت من يمة وصعدت فوك ..
غزوان يتأمل مشيتهة ويتنهد من كلبة .. لابسة دراعة خليجية لونهة ابيض ومنقشة بالاخضر وفاتحة شعرهة لان جان اكو خطار هنا وجايين يتباركولهة ..

££££££££

اليوم الثاني

طلع مؤيد من غرفة ابوه بعد ما بلغة بموافقتة على الزواج من جوري .. سلم امرة لله وطلع ..
شاف الحجية كاعدة بالصالة .. كعد بصفهة وحط راسة على رجلهة وتمدد على القنفة ..
الحجية وهي تحط ايدهة بشعرة : سمالله يمة شبيك .. انت ما تكعد هاي الكعدة الا عندك بكلبك شي ..
مؤيد تنهد : حجية عن قريب راح ترحين تخطبيلي انشالله ..
الحجية : خايب دحجي صدك لا تجذب علي ..
مؤيد : والله ما مجذب عليج .. هسة حجيت وية ابوي وهاي جيتي من عندة ..
الحجية بفرح : يممة صلاوات عالنبي .. هيج الله هاديكم هالايام .. عساهة دوم انشالله .. بس ما كتلي ياهي التريدهة ..
مؤيد ابتسم لان يدري بحبوبتة تحبهة : عزيزة كلبج ... جورية بت عمي حافظ ..
الحجية بفرحة اكبر : يممممة هاي الاخبار الزينة .. والله انة من انتم بعدكم جهال وانة كلبي حس انتة راح تاخذهة ..
مؤيد : كولي يالله حجية .. بعدنة حتى ما كايلين لعمي حافظ .. ايجوز ما يوافقون ..
الحجية : وليش يمة ما يرضون .. وين يلكون مثلك .. شو دكَتور وزلمة ولحية وشوارب وتخبل ..
مؤيد بضحك : حجية شو صايرة من بنات هسة الي يدورن لحية وشوارب ..
الحجية : شمدريني حبوبة غير هالايام البناويت كلهن يكولن ماكو ولد حلو هسة كلهم جنهم جرابيع لا لحية ولا شارب ..
مؤيد يضحك على كلام حبوبتة .. دائما حتلو جان بعز ضوجتة بس يجي يمهة تحاول بكل الطرق تضحكة ..
دخلن خاتون ومها للصالة يحطن السفرة ويحضرنهة للعشا ... ووياهن ميامين تشيل بالاكل ..
مؤيد اعتدل بكعدتة من شاف ميامين لان بعدة يستحي ما متعود عليهة ..

كملن السفرة والكل اجتمعو عليهة ..
ابو غزوان ابتسم على لمتهم حوالينة كلهم .. تنهد وكال بكلبة (الله يرحمك يافارس يابوية) ..
ابتسم وكال : بما ان الكل موجود .. عندي الكم ٣ اخبار اريد اكولهة ..
الكل التفتو الة بأصغاء .. ومؤيد يعرف ان راح يحجي على موضوع خطوبتة ...
ابو غزوان بأبتسامة وهو يحط ايدة على كتف مؤيد : الخبر الاول قررنة نخطب لمؤيد جوري بت عمة ...
ام غزوان بفرحة : صدددك يمة .. دخيلك ربي فدوة لأسمك على هالاخبار الحلوة ..
البنات باوعن كل وحدة بوجه الثانية بصدمة .. شلون مؤيد يخطب جوري .. جوري تحب فارس ومستحيل توافق على مؤيد ..
غزوان ابتسم : مبروووك ابو المود ..
مؤيد متصنع الابتسامة بهدوء : الله يبارك بيك ..
البنات حسن على نفسهن وباركن لمؤيد ورجعن عيونهن للماعون وتفكيرهن وية هالخبر هذا ...

ابو غزوان : ما راح تسألون شنو الاخبار الثانية ..
ام غزوان : ياا .. احنة على فرحتنة بمؤيد نسينة نسألك ..
ابو غزوان وعينة لخاتون : الخبر الثاني هو .. خاتون عن قريب راح تودعنة وتعوفنة ..
الكل استغربو وخاتون رفعت راسهة : ليش وين تردون تودوني ..
ابو غزوان بأبتسامة : وين يعني .. افهميهة ان جايينج خطابة وخوش ناس ..
خاتون فتحت عيونهة بصدمة واللكمة وكفت ابلعومهة ..
ميامين وغزوان التفتو على ابو غزوان بصدمة ..
باوعو واحد بوجه الثاني وميامين عبالك تحجي وياه بنضراتهة وتكلة شلون صار هيج ورائد شلون ...
غزوان التفت على ابوه : بوية منو هذا الي خطبهة ..
ابو غزوان بأبتسامة : رائد .. اخو ميامين ..
الكل انصدمو ما عدا غزوان وميامين .. لان محد جان متوقع هالشي ..
خاتون بلعت ريكهة بخجل وهستوهة تستوعب ان ابوهة حجة عن خطوبتهة كدام الكل وجهة صار احمر وكامت من يمهم بسرعة لان استحت من ابوهة واخوتهة وتفاجأت بنفس الوقت ..
الكل ضحكو على خجلهة ..
الحجية : والله خوش ناس والنعم بيهم .. يستاهلون المرة ..
ام غزوان بأبتسامة : والله عائلة اخلاق ماشالله ..
اشرت على ميامين وكالت بأبتسامة : مادام ميامين تربيتهم هايهية لعد .. وام رائد والله خوش مرة وطيبة ..
ميامين الفرحة مو سايعتهة : فدوة لكلبج عمة..
غزوان : والله بوية رائد ما ينرد .. وخوش ولد ..
مؤيد : صحيح هالشي .. والله خوش رجال ..
ابو غزوان : وانة والله فرحت من خطب من عدنة .. لان ادري بي يصون مثل ما حاول يصون فارس بس الدنيا ما سمحت وكبر بعيني اكثر من عرفت ان هوة كل اسبوع او اسبوعين يروح لقبر فارس يزورة .. وكل خميس يدفع من فلوس المجمع مالتهم للمحتاجين والفقراء بثواب فارس ..
ميامين ابتسمت على كلامهم وهمة يمدحون بأخوهة رائد ..
ام غزوان مسحت دمعتهة بسرعة وكالت : الله يطي انشالله ..
مها وهي تريد تغير الموضوع لان شافتهم كلهم ضاجو ..: بس بابا شلون خاتون راح تبتعد عنة هالكد مسافة ...
ابو غزوان : اول شي خل تفكر هي براحتهة وتوافق يلة ... وبعدين ليش مو انتو بعدتو بتهم عنهم بكد هاي المسافة ..
مها وهي تحك راسهة وتباوع لميامين : اي صح ...
ابو غزوان وهو يضحك : بس لا تخافين انتي هم راح تطيرين وراهة ..
مها ما فهمت وحجت بغباء : شلون يعني اطير وراهة ..
ابو غزوان : ابن خالة ميامين خالد خطبج .. هسة ابو خابرني وطلبج مني لابنة ...
مها جانت تاكل وغصت باللكمة من سمعت ان خالد خطبهة وصارت تكح .. ميامين كاعدة بصفهة حتى ما حاولت تضربهة لو تنطيهة مي لان هي نفس الشي جانت فاتحة حلكهة ومصدومة ..
ام غزوان : يمة سمالله شجاجن ولجن ..
غزوان ضحك على اشكالهن وضرب ميامين على راسهة وبعدين ضرب بسمة على ضهرهة وانطاهة مي ..
مها وجهة احمر من الكحة .. ميامين ومها وحدة باوعت بوجه الثانية بصدمة حجن بصوت واحد : منووووو ؟؟؟
مؤيد استغرب وعصب بنفس الوقت وباوع على مها بنضرات محد فهمهة غيرهة : كافي انتي وهي خل نفتهم السالفة ..
البنات سكت وكل وحدة مصدومة اكثر من الثانية ..
مؤيد بأستغراب : بوية انت قصدك خالد ابن خالة رائد خطب مها ..
ابو غزوان : اي شبيكم مصدومين .. شبي الولد ..
غزوان : ما بي شي بوية بس ما توقعنة ..
مها : وليش يخطبني اني .. شيريد مني ..
مؤيد بحدة : شيريد منج ؟؟.. خلي عندج شوية خجل واطفري مثل اختج .. مو كاعدة ويانة وتسألين عالولد ..
مها حست على نفسهة ووجهة صار طماطة .. كامت بسرعة من يمهم وراحت لغرفة خاتون وهمة ضحكو عليهة ..
ميامين من بعد ما راحت مها .. شوية استوعبت ان بقت بس هية .. كامت ورة البنات ..

مها دخلت لغرفة خاتون لكتهة تفتر رايحة جاية بالغرفة وتفكر بصوت عالي وتحجي وية نفسهة ..
وحدة باوعت بوجه الثانية
وحجن بصوت واحد : شلوووون ..؟؟؟
بقن واكفات .. دخلت عليهن ميامين وسحبت مها من زندهة وكالت : شلووون بس كليلي شلون ..
مها : شمدريني شلون .. روحي اسألي هوة مو اني ..
خاتون تباوعلهن بأستغراب : شبيجن .. منو هوة ..
ميامين وهي تطلع تليفونهة : خالد ابن خالتي خطب مها ..
خاتون بصدمة وهي تباوع لمها : خالد منو ؟..
مها بغباء : شبيج هذا الي صعدت بسيارتة وعبالي سيارة مؤيد ..
خاتون بصدمة : كوولي والله ..
قاطعهن صوت ميامين : الووو .. خالد يالخسيس ..
خاتون سحبت التليفون وفتحت مكبر الصوت ...
خالد : اعوذ بالله .. شبيج ..
ميامين : شلون ما تكلي راح تخطب مها ..
خالد بأبتسامة : وليش اكلج ..
ميامين بأبتسامة وهي تباوع لمها : وين شفتهة انتة حتى تخطبهة .. يمكن تطلع مو حلوة ..
خالد بهيام : شلون ما شفتهة .. غير بس شفتهة انسحرت بجمالهة .. اسم على مسمى مها وعيونهة عيون المها .. الوجه ابيض والخشم فستقة والحلك زيتوناية .. و ال
قاطعتة ميامين : بسس مو ناقص غير تنطيني مقاس رجلهة شكد .. يالسافل طلعت عوينجي ..
خالد : والله مو عوينجي بس هي الوحيدة الباوعت عليهة لان جمالهة مو طبيعي ..
ميامين باوعت لشكل مها الي وجهة انكلب احمر ومصدوم .. : دكافي يلة ولي .. ترة سمعت كلامك كلة ووجهة الابيض انكلب طماطة ..
خالد ضحك : فديتهة ..
ميامين : انجبب ولك .. يلة ولي ..
سدت التليفون بوجهة .. وتربعت وكالت : احجيلي وين شافج ..
خاتون وهي تكعد : بيوم رحنة عليكم .. هي خربطت بين سيارة مؤيد وسيارة خالد وصعدت سيارتة وهو شافهة واتصل على مؤيد .. ولو تشوفين مؤيد بيومهة شلون انطاهة رزالة غسل ولبس ..
ميامين ضحكت : حيييل .. والله اجت من صالح خالد ..
مها وهي تضربهن : بس انتي وياهة كعدتن ركبة ونص الي وما عبالك خاتون هم انخطبت ..

خاتون تذكرت ورجعت تفكر بصوت : الي محيرني وين شافني رائد حتى يخطبني .. هاي المحيرتني ..
ميامين وهي تضربهة بعكسهة : لا تحيرين حبيبتي .. رائد من كم سنة هو رايدج مو هسة ..
خاتون بصدمة : شنو ..؟؟
ميامين : اي مثل مكتلج .. حتى هوة خطبج من فارس .. وفارس وافق .. بس قبل لا يبلغكم صارت الحادثة وتوفى فارس ..
خاتون بأستغراب : وهو شلون عرفني ..
ميامين : اعتقد جان يشوفج من تطلعين من الدوام لان هو هم جان يجي هنا علمود فارس ..
خاتون : شلون اني ما انتبهتلة ..
ميامين بغمزة : حبيبتي جان من بعيد لبعيد شتنتبهين ..
خاتون بخجل : تمام هسة اطلعو وعوفوني افكر بالموضوع ..
مها وهي تكوم : اني هم رايحة لغرفتي رجاءً ما اريد ازعاج ..
ميامين وكفت وتخوصرت : بلللة شووو .. احلفي انتي وياهة .. ومنو تلم السفرة وياي انشالله ..
خاتون سحبتهة وطلعتهة برة هي ومها : اني مستحيل انزل واشوف وجهي لابوي بعد .. يلة برة ..
مها وميامين يباوعن عالباب الي انسد بوجهن ..
مها دارت وجهة وتوجهت لغرفتهة : والله حبيبتي اني هم نفس الشي .. يلة روحي روحي اغسلي المواعين ..
ميامين نزلت وهي تتحلطم .. ام غزوان ضحكت عليهة وحاولت تلم السفرة وياهة بس ميامين ما قبلت ..
حطت الجاي عالنار وغسلت المواعين بملل لان وحدهة ..
خلصت المواعين وكعدت يم الحجية تسولف وياهة لان سوالفهة حلوة وما انتبهت للوقت ...

قاطع كعدتهن نزول مؤيد من الدرج ..
استغرب وكال : ميامين بعدج هنا ؟ .. اني عبالي رحتي لان الوقت تأخر .. واجيت اقفل البيبان اذا بعدج عادي ...
ميامين رفعت تليفونهة بأستغراب تريد تشوف الساعة .. شافت الساعة ١٢ وبنفس الوقت مكالمات غزوان الفائتة انهالت عليهة لان هي مسوية تليفونهة صامت ..
كامت بسرعة وكالت : والله محسينة بالوقت .. يلة تصبحون على خير ..
طلعت بسرعة من البيت .. عزة شبسرعة مر الوقت ..
وصلت لبيتهم وصعدت فوك ...
دخلت للغرفة وفزت بسرعة من حست ايدين على خصرهة من ورة ورفعتهة لمستواه ورجليهة صارت مو بالكاع ..
غزوان بهمس يم اذنهة : ليش تأخرتي ..
ميامين حاطة ايدهة على كلبهة وكالت لا ارادياً .. : يممة كلبي راد يوكف .. شبيك كمزتني ..
غزوان وهو هايم بقربهة منة : سمالله على كلبج .. بس شسوي اشتاقيتلج ..
ميامين انتبهت لنفسهة وضربتة على ايدة بخفة : نزلني ..
غزوان : ليش ؟
ميامين انقهرت من برودة : نزلني شنو ليش .. لا اطيح ..
غزوان وهو يحرك خشمة على رگبتهة برقة : تتوقعين يعني تطيحين واني الي لازمج ...
ميامين بقشعريرة وهي تحط ايدهة على رگبتهة : اصلا اخاف لان انت الي لازمني ..
غزوان نزلهة بضيق من كلامهة ..
عافتة بدون اهتمام ودخلت للحمام .. سبحت وطلعت بدلت ملابسهة بغرفة التبديل ومشطت شعرهة ..
غزوان شافهة طلعت وهي مبدلة .. ابتسم على شكلهة الطفولي ... لابسة برمودة عريضة لونهة وردي ووياهة بدي لونة اسود ومرسوم علي ميكي ماوس ..
تمددت بجهتهة وهي تريد تنام ..
غزوان همس وهو يخلي شعرهة ورة اذنهة : شنو ما فرحتي بخبر خطوبة رائد لخاتون ..
ميامين بأبتسامة وانطلقت بالحجي : شلون ما فرحت .. هذا اخوي وحبيبي وكل دنيتي راح يخطب وتريدني ما افرح ..
غزوان تنهد وهو يحط راسة على مخدتهة وراسة ملاصق لراسهة .. رفع ايدهة وباس راحة ايدهة  (باطن كفهة)وصار يلعب بأصابعهة : تدرين من اسمعج تحجين هيج احس ودي الزم رائد واسوي وصلتين ..
ميامين التفتت علي بعصبية وصارت اقرب علي اكثر : لا بالله .. وليش تسوي وصلتين ..
غزوان وهو خشمة ملاصق لخشمهة : اغار منة .. شكد تحبينة .. وتضحين علمودة .. وتتغزلين بي وحبيبي ودنيتي .. شلون ترديني اسمع هالكلام وما اغار ..
ميامين رجعت راسهة لورى : مو من حقك تغار .. هذا اخوي وشي طبيعي احجي هيج .. وهو حبيبي وروحي ودنيتي وهلي وناسي ..
غزوان فز ووجهة صار فوك وجهة : واني ..
ميامين عقدت حواجبهة : انت ؟؟
غزوان وهو ينقل نضراتة بين عيونهة : شنو اني من هذني الي عددتيهن ..
ميامين غوركت عيونهة وبلعت ريكهة : ....

الكاتبة : سارة الشمري ✍🏻

حبايبي شلونكم 😘 اريد توقعاتكم للبارت الجاي .. 😘 اتمنى عجبكم البارت وحبيتوه 🖤