رواية سجينة الظلم والانتقام الفصل السادس وأربعون 46 - بقلم طبيبة الاحساس

#سجينة_الظلم_والانتقام 🍂🥀

#البارت الحادي والخمسون

#الكاتبة : سارة الشمري🖤

قالوا الامل
هو حسرة الظمآن حين يرى الكؤوس
فى صورة فوق الجدار
هو ذلك اللون العبوس
في وجه عصفورِ تَحطَم عشه فبكى وطار
وأقام ينتظر الصباحَ لعل معجزةُ تُعيد
أنقاض مأواه المُخرَب من جديد

قاطعهم دخول ابو غزوان عليهم ..
وكفو ضحك همة ووكفو احتراما الة ..
غزوان عقد حواجبة بقلق وهو يشوف شكل ابوه الما يتفسر ومبين عصبي ..

غزوان : خير بوية صاير شي .. شو وجهك مو طبيعي ..
ابو غزوان : ما صاير شي .. مؤيد تعال وراي ..
طلع وعافهم واحد صافن بوجه الثاني ..

حمزة وهو يلزم مؤيد : انت مسويلك سالفة لو شني ...
مؤيد رفع اكتافة : والله مادري .. بس حسب علمي ما مسوي شي ..

غزوان : روح روح لا تتأخر علي ويعصب بالزايد ..
مؤيد وهو يطلع : الله اليستر بس ...

طلع مؤيد وراح ورة ابوه الي دخل للبيت ..

شاف امة وخواتة وبسمة وجوري وميامين بالمطبخ ... مؤيد : السلام عليكم ..

البنات : وعليكم السلام ..

مؤيد : شلونج ميامين .. بالعافية خوية ..
ميامين : الله يعافيك .. الحمدالله بخير ..
مؤيد : يمة ابوي وين ..

ام غزوان : راح لغرفتة زهكان مدري شبي ..
مؤيد وهو يطلع : هسة افتهم السالفة منة ..

توجه لغرفة ابو ودك الباب .. اجا صوت ابوه : تعال ..
دخل للغرفة وبقى واكف : امرني بوية ..

ابو غزوان يأشر عالكرسي : اكعد ..

مؤيد كعد عالكرسي بهدوء ..
ابو غزوان وهو يفر بسبحتة : مؤيد انة صحتك علمود سالفة .. اسمعني زين ..

مؤيد : امرني بوية .. شني مسوي شي واني مادري بروحي ..
ابو غزوان : لا بوية ما مسوي شي .. بس اريد طلبة منك ..
مؤيد بنخوة : عد عيناك بوية ..

ابو غزوان بتنهد : بوية اكو واحد متقدم لبت عمك جوري ..
مؤيد بلع ريكة : اي بوية بيهة الخير .. بس انة شني المطلوب مني ..

ابو غزوان بتنهد : اسمع بوية .. جوري بت عمك انة ادري بيهة جانت هاوية اخوك فارس ... وانة الله يشهد تمنيتهة لواحد من اولادي بس اخوك فارس جان دومة رافض ويكول مثل اختي ..

مؤيد جان يستمع لكلام ابوه ويريد يعرف شنو المطلوب منة ..

ابو غزوان يكمل : وهسة جايين خطابة عليهة .. حجو وية ابوهة وهو كاللهم اطونة مهلة ..

مؤيد : اي بوية بس انة شنهي بالسالفة ..

ابو غزوان : جايك بالحجي .. عمك ايكول اذا ما وافقت هالمرة برضاهة راح اخليهة توافق غصباً عليهة ..
مؤيد عقد حواجبة : وليش يريد يغصبهة ..

ابو غزوان : يابوية مو ايكول اجاهة اكثر من واحد وهي ترفضهم حتى بدون ما تعرف عنهم شي .. واختهة الاصغر منهة بسمة انخطبت وراح تتزوج وهي بعدهة .. يعني هي مو زغيرة تقريباً عمرهة ..

مؤيد بدون وعي : ٢٥ سنة ..

ابو غزوان : اي بعد شني .. ابوهة ايكول اذا ما وافقت هسة على الناس الزينة التجيهة وهي بهذا العمر .. بعد من تكبر ايكومون يجونهة المطلك لو مرتة ميتة لو جبير بالعمر ..
مؤيد بأستغراب : يعني لهالسبب عمي يريد يغصبهة على الي جايين يخطبونهة ..

ابو غزوان : اي .. شوف بوية انة ادري بجوري جانت تحب فارس .. والكلب من يهوى ويحب مو بسهولة ينسى .. وانة جوري عندي اعز وحدة ابنات اخوتي وخواتي واعتبرهة حالهة من حال مها وخاتونة .. وهي اذا تزوجت من واحد وهي كلبهة عد احد ثاني ما راح ترتاح وخاصا اذا رجلهة عرف بهالشي بساعتهة ممكن يعاملهة بطريقة مو زينة ..

مؤيد يفكر بكلام ابوه .. كلة صحيح .. بس عمي ما يعرف بجوري جانت تحب فارس ..

مؤيد التفت على ابوه وكال : وشنو الي تأمرني اني بي بوية ..

ابو غزوان : الي اريدة منك انك تخطب بت عمك جوري وتتزوجهة حتى تجنبهة اضرار الزواج من هالشخص الغريب .. واني اختاريتك لان ادري بيك تعرف بحقيقة حب جوري لفارس ..

مؤيد وهو مصدوم من كلام ابوه : بوية انت متخيل شجاي تحجي .. شلون تريدني اتزوج وحدة تحب اخوي ..
ابو غزوان : مؤيد انت تدري بأخوك متوفي يعني ليش مصعب الامور ..

مؤيد : بوية ماكدر اتخيل اباوع بوجهة واني ادري بكلبهة يحب اخوي .. اعذرني بوية بس كرامتي ما تسمحلي ارخص نفسي هيج ..

ابو غزوان : جا خوش .. وانت الدكيت صدرك وكلت عد عيناك بوية .. شبسرعة بدلت حجايتك ..
مؤيد : بس يابوية والله هالسالفة ماكدرلهة .. اني ماكدر اخذ وحدة تحب اخوي .. نفسي ما تطيني ..

ابو غزوان : انت فكر بالموضوع من ناحية انت راح تنقذ بت عمك وبس ..

مؤيد وهو يفرك وجهة بعصبية : بس بوية ..
ابو غزوان ينهي النقاش : لا بس ولا شي .. فكر بالموضوع زين وباجر رجعلي خبر .. واتمنى جوابك يريح كلبي ..
مؤيد وكف : من رخصتك بوية ..

ابو غزوان هز راسة ومؤيد طلع معصب ..
طلع مؤيد وشاف البنات كاعدات يسولفن ..
باوع لجوري بتنهد وبعدين نزل راسة وطلع ..

صعد سيارتة ومشى وهو ما يدري وين يروح ..
يسوق وعينة للطريق وهو تفكيرة بكلام ابوه .. شلون ممكن اتزوج وحدة تحب اخوي .. شلون راح اعيش وياهة وكلبهة مو يمي .. شلون راح اكدر اباوع بعيونهة بحب وعيونهة ماتبادلني هالشي ..

اني اعرف زين ان اذا حبيت مستحيل تكدر تنسى الي تحبة اعرف هالشي ومجربة .. واعرف زين هي مستحيل تحبني مثل ما تحب فارس .. جنت اشوف هالحب بعيونهة بس اكول يمكن يتهيألي .. بس من سمعتهة كالت هالشي لفارس بنفسهة واعترفتلة بوقتهة تأكدت ودعيت ربي ان يشيل حبهة من كلبي بس ماكدرت .. جنت اوهم نفسي ان نسيتهة وما افكر بيهة ومن اشوفهة فجأة كلشي يتبخر وترجع جروحي تتفتح من اول وجديد ..

صح هو ما يكدر يتزوجهة وهي تحب اخوه .. بس بنفس الوقت ما يكدر يشوفهة تتعذب وية شخص ثاني بمجرد ما يعرف بيهة جانت تحب احد ثاني ..

وكف سيارتة على صفحة وتنهد وهو يحط راسة عالستيرن (المقود) .. ربي ساعدني مالي غيرك .. دليني عالطريق الصح وساعدني اختار الخيار المناسب ..

££££££££££££££

مجمع رائد ...

كاعد عالمكتب وهو يفكر بميامين وشجاي تسوي هسة .. ابتسم وهو يمر طيفهة ابالة .. حس ان مشتاقلهة ومشتاق لشوفتهة ..

اختفت ابتسامتة وهو يكول : انساهة رائد .. خلص هي راح تتزوج .. مو من شيمك تباوع على حلال غيرك ..
تنهد من كلبة وهو يفرك بوجهة ..

دق تليفونة رفعة وابتسم وهو يشوف الاسم ..
رد بأبتسامة : امووني ..
ميامين : رائد حبيبي شلونك ..

رائد : الحمدالله ما ناقصني بس شوفتج ..
ميامين : مو البارحة شفتني .. شنو شوكت لحكت تشتاقلي ..
رائد : شسوي اشتاقيتلج بعد ..

ميامين وهي تريد توصل للموضوع الرئيسي : اذا تريد تشوفني .. تزوج حتى اجي احضر عرسك .. وهم اني ضايجة واريد اركص ..

رائد راحت ابتسامتة وتنهد : الله كريم عوفج مني هسة مو مال زواج .. مو راح يصير عدكم عرس واركصي بي ..
ميامين : عرس منو ..

رائد بألم : لا تستغبين مو حماتج خاتون راح تتزوج ..
ميامين بسرعة : لا جذب ما تتزوج ..

رائد كام على حيلة : شلون يعني ما تتزوج .. مو هذاك اليوم دزولج ان راح تتزوج ..

ميامين ابتسمت على صوتة كلة لهفة : لا هذا جان مقلب من البنات .. يعني تعرف مقالب البنات وكل وحدة اتكول انخطبت وراح اتزوج ومن هالحجي ...

غزوان بفرحة : يعني خاتون ما راح تتزوج ابن عمهة مو ..
ميامين بخبث : لا متتزوجة ... بس شبيك هالكد فرحان ..
رائد وهو يحك راسة : ها .. هيج ماكو شي ..

ميامين بأبتسامة خبيثة : امممم .. هسة تعال صدك ليش متريد تتزوج انتة ..

رائد بأبتسامة : وليش لا .. عادي ماعندي مانع ..
ميامين : اشوف تغير كلامك من بعد ما كتلك على خاتون ..
رائد : اكول انتي معليج .. يلة ولي عندي شغل مهم هسة ..
سد التليفون بوجهة ..

ميامين للتليفون : شوف الخاين .. بس اخذ اخبارهة سد التليفون بوجهي .. يصير خير .. هسة يرجعك الوكت علية ..

££££££

رائد من سمع ان خاتون ما راح تتزوج حس ان الروح رجعتلة .. هو حس ان ضيعهة من ايدة مرة .. مستحيل يضيعهة مرة ثانية .. لازم يتصرف بأسرع وقت ممكن ..
ركب سيارتة وتوجه لبيتهم ..

شاف امة بالمطبخ وخالد كاعد يمهة عالكرسي مال الطاولة ..
رائد تأفف : ياخي امنيتي ادخل لبيتنة ما الكاك موجود ..
خالد بدون اهتمام : بكيفي .. كاعد على كلبك ..

حسان دخل وهو يطك اصبع ويغني : وشعندك وشعندك ... وشعندك كاعد بكلبي ماعدكم بيت ..

ضحكو حسان ورائد .. وهالدمنطيهم الاذن الطرشة وما مهتملهم ..

ام رائد : صدك يمة شو جاي من وكت اليوم ..
رائد كعد عالكرسي بصف خالد : جايج بشغلة مهمة يمة ..
خالد التفت علي بفضول : شنو هي الشغلة ..

رائد يقلد كعدة خالد بعدم اهتمام : معليك ..
خالد ضربة بعكسة : دحجي لا تصير خبيث ..
رائد : ياخي شعليك انتة شكد حشري ..

ام رائد وهي تغسل ايدهة وتكعد عالكرسي كبال رائد وخالد .. : كول يمة .. خيرك ..

رائد يحك شعرة وهو ميدري شلون يبتدي بالموضوع .. : يمة .. مادري شلون احجي ..

خالد ببرود : شبيك .. تريد تتزوج مثلا واحنة ماندري ..
رائد التفت علي بسرعة : شمدريك ..

خالد فتح عيونة والتفت على رائد : صددك تحجي ..
ام رائد : رائد .. صدك يمة تريد تتزوج .. هيج وتفرح كلبي صدك ..

رائد بأبتسامة : اي يمة صدك .. وهالمرة استعجلي ..
ام رائد بفرحة : يا يمة انة ما صدكت تجي تكلي اريد اتزوج .. كلي اكو وحدة ابالك لو ادورلك ..

رائد بسرعة : لا يمة موجودة ما يحتاج تدورين ..

خالد لزمة من ايدة : منهي هاي .. يمتة لحكت تحب ولك ..
رائد نفض ايدة من خالد وباوع لامة : اي يمة نرجع لموضوعنة ..

ام رائد : كول يمة منهي هاي التريدهة ..

رائد ابتسم : احم .. اخت غزوان .. يعني حماة ميامين ..
خالد فتح عيونة بصدمة واختفت ابتسامتة ...

ام رائد : يا يمة زين ما اختاريت والنعم منهن ... بس ياهي بيهن لان هنة اثنين ..

رائد : الجبيرة .. خاتون ..

خالد رجعت ابتسامتة مرة ثانية .. حضن رائد وهو يضحك : كول والله .. ياااخي اني ليش احبك ..

رائد فتح عيونة : خييير انشالله ... شبيك فرحت من كلت خاتون .. شعليك انت ..

خالد بكل صراحة : لان اني اريد الزغيرة اسمهة مها ...

ام رائد : اوكف اوكف .. انت منين تعرف مها ..
خالد يحك راسة بتفكير : شفتهة من اجو البارحة ..
رائد فتح عيونة : وين شفتهة ولك ...

خالد : صعد سيارتي بالغلط وعبالهة سيارة اخوهة مؤيد ...
رائد برفعة حاجب : وشمدريك هي هاي مها ..

خالد بكذب : من خابرت مؤيد كتلة وحدة من اهلكم صعدت سيارتي بالغلط وعبالهة سيارتك وهو كال ياا هاي مها ..
رائد بعدم تصديق : اهااااا ...

ام رائد : هسة خلوني افتهم .. رائد انت تريد خاتون مو ..
رائد هز راسة : اي يمة اريدهة وماريد غيرهة ..
التفتت على خالد وكالت : وانت صدك تريد مها لو تجذب علية ..

خالد : لا يمة ما اجذب عليج .. اني من شفتهة دخلت ابالي وعجبتني واريدهة ...

ام رائد : على خير انشالله .. بس اول شي اخابر امك واكللهة حتى هي تكل لابوك .. وانت رائد خابر ابو غزوان واطلب البنية منة ... واذا اطاك الموافقة حتى اني اخابر ام غزوان ..
رائد بفرحة : انشالله يمة ..

ام رائد : الله يوفقكم انشالله ويكتب الي بي الخير ..
)))))))))))))))))))

مؤيد من بعد التفكير وهو ما توصل لاي حل ..
توجه لبيت حمزة ... دخل كعد بالصالة مالتهم ..
حمزة : مؤيد شبيك .. شو من طلعت ورة عمي اليوم وانت بعد ما بينت .. خير شكالك عمي ...
مؤيد حجالة الي صار من البداية ...
حمزة بحيرة : والله مادري شأكلك ..
مؤيد : اطيني حل شأكول لابوي ...
حمزة : والله انت واخوك مسويني مصلح اجتماعي احل مشاكلكم مال الحب .. احد ضحك عليكم وكال اني طبيب نفسي لو طبيب مجانين ..
مؤيد وهو يكوم : والله انت مو صوجك .. صوجي اني اجيتك ...

حمزة سحبة بسرعة وكعدة : اكعد اشاقة وياك والله ...
مؤيد كعد وهو بعز ضوجتة ...

حمزة : شوف بما انك اتكول تحبهة ف اكيد ما راح ترضى ان هي تتعذب مو صح .. وثاني شي انت ما تريد تتزوجهة لان هي تحب فارس صح ..

مؤيد : اي .. شنو الجديد بالحجيتة ..

حمزة : شوف اني الي افكر بي يعني وبرأيي انك توافق على هذا الزواج ..

مؤيد : شلون اوافق وهي ما تحبني وتحب اخوي ..

حمزة : شوف .. اكو نوعين للحب .. النوع الاول هو الحب الحقيقي .. والنوع الثاني الي احنة نعتقد هو حقيقي بس هو بالتالي مجرد نزوة او مراهقة ...

مؤيد بأهتمام : شلون يعني ..؟؟؟

حمزة بتركيز : شوف مثل ما انت كلت ان جوري تحب فارس من طفولتهة وهالشي ابتدئ ابكلبهة من جانت تسمع كلمات فارس وان هو يسميهة ام عيون زرك وايكول اني احبهة واتزوجهة من تكبر ... هالشي معناتة ان هي بقت تقنع بنفسهة ان هو فعلا يحبهة مع ان جانت طفلة زغيرة وهو هم زغير .. يعني لا هو جان يفتهم ولا هي تفتهم من هالدنيا شي ..

مؤيد : ايي ..

حمزة : هالشي يعني ان هذا نزوة طفولة .. جوري حبت فارس بس لان هو اهتم بيهة بفترة بسيطة من طفولتهة وهالشي خلاهة تتعلق بي وتعتقد ان هي حبتة بس بالتالي هي حبت اهتمامة لان مستحيل طفلة تكون بعمرهة تحب .. وهي كبرت وفقدت هالاهتمام من كبر فارس وصار يستحي يسولف وية بنات عمة مثل قبل .. يعني هي فقدت اهتمامة بيهة وبقة ابكلبهة هالشي وهي معتبرتة حب لدرجة راحت واعترفتلة بهالشي ..

مؤيد : يعني قصدك ان جوري ما تحب فارس ..
حمزة : هي معتقدة ان تحبة وهالشي راسخ بعقلهة مو بكلبهة ...

مؤيد نزل راسة بتفكير ..

حمزة حط ايدة على ركبتة وكال : اني برأيي ان توافق على هالزواج .. وصدكني ورة زواجكم من تبدي انت تهتم بيهة وتحبهة .. هي راح تحبك وتتعلق بيك وبالتالي تصير تضحك على نفسهة لان جانت معتقدة ان هي تحب شخص غيرك .. بس دير بالك تصير مثل غزوان و تستعمل العنف .. ترة الصبر احسن حل .. اصبر عليهة مهما كانت تصرفاتهة وهي بالتالي راح تتغير ..

مؤيد ابتسم وهو يباوع لحمزة ..

رفع ايدة وضربة على كتفة بكل قوة : يااااخييي وتلوومنة من نسويك مصلح اجتماعي .. لازم يسمونك ابو النصايح ..

حمزة وهو يفرك كتفة بألم : الله ياخذك بجاه الحبيب محمد .. كووول امييين ..

&&&&&&&&&&&

ميامين ومها كاعدات ابيت غزوان بالصالة ...

ميامين لازمة الريموت مال التلفزيون وتتابع مسلسل تركي ..

مها متمدد عالقنفة وحاطة راسهة على رجل ميامين ولا زمة موبايل ميامين وتكلب بالصور ..

وهي تكلب بالصور شافت صورة خالد كاعد على القنفة وميامين واكفة وراه وحاضنتة من ورة ..

شهكت وكعدت على حيلهة وهي تباوع عالتليفون ..

ميامين كمزت : شبيييج ...

مها : منو هذا الي بالصورة ..

ميامين بأستغراب : هذا خالد اخوي .. بس ليش تسألين ..
مها : عندج اخ اسمة خالد ؟..

ميامين : لا هو اخوي بالرضاعة وابن خالتي .. بس اني اعتبرة حالة حال اخواني .. شنو الي خلاج تتفاجأين ..
مها وهي متوترة : لا بس شفتج حاضنتة وقريبة علي وهو مو اخوج ..

: منو هذا الي حاضنتة وهو مو اخوهة .....!!!!؟؟؟؟

الكاتبة : سارة الشمري🖤

هلو حبايبي 😘 توقعاتكم للبارت الجاي 😘 فديتكم اتمنى عجبكم البارت