رواية سجينة الظلم والانتقام الفصل التاسع عشر 19 - بقلم طبيبة الاحساس

#سجينة_الظلم_والانتقام 🍂🥀

#الكاتبة : سارة الشمري🖤

#البارت الحادي والعشرون

كلكم عشاق أو مظلومين ، هذا لايعقل ، أليس فيكم خائن شجاع يكتب عن خيانته.
آل باتشينو

قاطعنة الصوت : وشمدريج ما واصلة هاي الوراثة لاخوانج
التفتت لمصدر الصوت وشفتة واكف ومكتف ايدينة لصدرة وساند كتفة عالباب
خاتون : شنو الي وصل لاخواني من الوراثة
غزوان وهو يتقدم ناحيتنة : الحب من اول نضرة ... يمكن وصلني الي .. منو يدري

التفتت علي بصدمة ... يعني اكو وحدة بحياتة ويحبهة .. ومن اول نضرة هم
خنكتني العبرة ... وغوركت عيوني ... حتلو ما يحبني ... بس ما توقعت يحب وحدة ثانية ...

خاتون باوعتلة بصدمة : غزوان .. انت تحب ؟؟؟ صدك تحجي
غزوان وهو ياخذ خاشوكتي من ايدي وياكل من ماعون الشوربة الي كدامي : وليش مصدومة ... شنو حرام علية احب ...

عصرت ايدي الي بحضني .. لا تبجين ميامين .. تحملي ..
خاتون انتبهت علية وحاولت تغير الموضوع : ليش راجع من وقت اليوم ...

غزوان وهو مستمر بالاكل : عندي سفرة اليوم بليل .. وحجزت واجيت ارتب اغراضي ..
التفتت علي بسرعة : وين رايح ...

باوع بعيوني وذب الخاشوكة : شبيهة عيونج مدمعة ..
خاتون بسرعة ردت : من الصخونة مالت البارحة ... شنو نسيت .. عيونهة بعدهن يحركنهة ..

غزوان بسرعة حط ايدة على گصتي وبعدين على خدي : ماكو حرارة .. يلة المهم هسة روحي حضريلي جنطتي ... مال اسبوعين
بلعت ريكي وكلت بهدوء : اسبوعين ؟؟
غزوان بهدوء : اي اسبوعين ... ويلة لا تضيعين وقت بالحجي
كمت من يمة ومجرد ما طلعت طاحت دموعي ...

يربي ما متعودة يبقى بعيد عني اسبوعين ...
رحت لغرفتة وطلعت الجنطة وكعدت ارتب بالغراض واني ابجي لان اكتشفت ان اكو حب بحياتة ... غبية ميامين قابل راح يحبج الج .. اكيد راح يحب وحدة ثانية ويعتبرهة بريئة ...

دخل هو للغرفة واني منطيتة ضهري ... مسحت دموعي بسرعة ...

انتبه علية واجة يمي ... شبيهن عيونج حمر ليش تبجين ...
ميامين واني دايرة وجهي عنة : ما باجية .. مثل ما كالت خاتون من الحرارة ...
غزوان وهي يلزمني من فكي ويدير وجهي بعصبية لجهتة ووجهة قريب مني : من احجي وياج عيونج تحطينهة بعيوني سامعة ...

هزيت راسي ب اي ...
عافني واني كملت ارتب بالملابس بالجنطة ..
التفتت علي
شهكت واني اشوفة بس بالنطرون وذاب القميص بالكاع ومنطيني ضهرة يدور مدري على شنو بالكنتور
التفت علية من شهكت وهو طابك حواجبة : شبيج ...
انطيتة ضهري .. وما اكدر اطلع لان هو صاير يم الباب ...: ليش مكتلي اطلع ... يعني حتى تاخذ راحتك
غزوان بدون اهتمام وهو يكمل شغلة بالكنتور : عادي ماعندي مشكلة ...

افففف عزة شكد جريئ ... وجهي صار احمر من الخجل
ما حسيت غير تقرب مني وصار صدرة بضهري ... يمممة كلبي يريد يطلع من مكانة ...
مد ايدة عالجنطة واخذ واحد من القمصان الي اني حاطتهن .. اخذة وحط واحد بمكانة وكال بهدوء يم اذني : حطي القميص الاسود احلا ...

هزيت راسي ب اي .. ماكدر احجي لان هو كلش قريب علية
اخذ المنشفة الي اني محضرتهة عالجرباية ودخل للحمام
كمت اهفي على نفسي : لا هالمرة صدك صخنت ... يمممة ولا يستحي

كملت ترتيب الجنطة .. التفتت للقميص الي جان لابسة هسة
شلتة من الكاع وحضنتة وشميت عطرة ...: نيالهة الي دخلت كلبك وخلتك تحبهة
سمعت صوت الدوش توقف .. بسرعة اخذت القميص وطلعت من الغرفة ...

رحت لغرفتي وضميت القميص ورجعت ...
دكيت الباب وهو كال : تعاي
دخلت لكيتة لابس تراك نص ردان ومتمدد عالجرباية : تريد اسويلك غدة
غزوان وبدون ما يلتفتلي ومشغول بالتليفون : اي سوي ... بس مو هسة من انام واكعد
ميامين : تمام ... امم غزوان ؟؟
غزوان وهو على وضعة : همممم ...

ميامين بهدوء : انت صدك حبيت من اول نضرة ...
التفت علية وعقد حواجبة : وليش تسألين ؟؟
ميامين : هيج مجرد فضول ...؟ يعني ما توقعتك تحب
غزوان : اي احب ... ومن اول نضرة خذت كلبي .. وكمت ما اشوف غيرهة ... شايلة جمال الكون كلة بيهة ...

بلعت ريكي وخنكتني العبرة عصرت ايدي واني اسمعة شلون يمدح بيهة ... حجيت بالكوة : من شوكت ... ووينهة هسة
غزوان بأبتسامة غريبة : من سنة تقريبا وهسة متزوجة هي
حجيت بصدمة : تحب وحدة متزوجة ؟؟؟
غزوان : لا .. شفتهة قبل لا تتزوج ... وعوفي الاسألة البايخة هسة وطفي الضوة اريد انام ...

طفيت الضوة وطلعت ورحت لغرفتي وسديت الباب وكعدت بالكاع ابجي ...
يعني يحبهة .. اخذت كلبة من اول ما شافهة ... ليش ما تزوجهة ...
يربي اذا هذا الحب ما مقسوم الي وراح ابقى اتعذب منة شيلة من كلبي ...
ليش اني حضي هيج ... يعني ما حبيت اي شخص بالدنيا غير غزوان ... مو هذا زياد جان كبال عيني دائماً ويحبني من زمان ... ليش ما حبيتة ... ليش كلبي ما دك بس لغزوان الي ما شفت منة شي حلو ولا لحضة حلوة ... صدك لو كالو الجـلـ## ما يحب الا خناكة ...

غسلت وجهي ونزلت للمطبخ ... سويتلة غدة
واني بالي ابد مو وياي ... من جهة افكر بالي يحبهة واريد ابجي ... ومن جهة السفرة هاي الي مدري منين طلعتلي
وكلت امري ل الله ودعيت ان يمحي هالحب من كلبي ...
خلصت الغدة وكعدت انضف بالمطبخ .. لان اذا كعدت اتخبل بس من التفكير ... عالاقل اشغل نفسي بشي ..

سمعت صوتة ... دخل للمطبخ
نسيت همي وحصرتني الضحكة على شكلة ...
هستوة كاعد من النوم وشعرة مخربط وطايح على وجهة .. ووجهة معفوس وطابك حواجبة .. والبدي مالت التراك مخربط
سحب الكرسي وكعد .. حجة بصوت مبحوك لان هستوة كاعد : صبيلي غدة اريد اطلع

بقيت واكفة بمكاني واني حاصرتني الضحكة وما انتبهت شنو كال

عاط بية وكمزت : مو احجي وياج ... عليمن تضحكين ... لازم جلدج يحكج وترديلج خبزة قبل لا اسافر
درت وجهي بسرعة .. هسة وكت ضحكج ميامين ...
صبيتلة الغدة وحطيتة كدامة
كعد ياكل بهدوء .. دك تليفونة وكعد يحجي وية واحد اسمة حمزة

صفنت بوجهة .. شلون راح ابقى اسبوعين بدون ما اشوف هذا الوجه ...
ما انتبهت ان سد التليفون واني بعدني صافنة بي
قاطعني وهو ايكول : شبيج صافنة .. لازم راح تشتاقيلي مو
فتحت عيوني عزة جني هذا : هاا .. لا بس افكر بغير شي وصفنت وعيوني صارت عليك
غزوان عقد حواجبة : بمنو تفكرين ..

ميامين : هيج عادية ..
غزوان بأصرار : وشنو هالشغلة العادية
ميامين : ماكو شي والله ... افكر بأمي اشتاقيتلهة
غزوان : اها ... امج كلتيلي
ميامين بتوتر : اي امي

كمل اكل وكام ... غسلت المواعين ورحت كعدت بالصالة ...
ورة شوية اجت خاتون ...
خاتون وابتسامتهة المعتادة الي تخليني افرح بس اشوفهة : مسائو يا حلو ... وين صافن
ابتسمتلهة : يعني ما يصير اصفن اليوم ... انتي واخوج كلساع مفززيني

كعدت بصفي : ممنوع الصفنات .. افرحي راح تخلصين من الكتل اسبوعين ... المفروض تركصين
ميامين بحزن : يعني ما اشوفة اسبوعين .. شلون راح اكدر اتحمل
خاتون : ميامين صدك جذب ... جا عود اني كلت راح تفرح لان اني راح ابقى بايتة يمهة اسبوعين
فتحت عيون : جذاابة ... حتنامين يمي

خاتون وهي تهز راسهة : ايوون ... راح اكعد على كلبج .. اكيد ماراح اعوفج تنامين وحدج هنا
ضحكت وكلت : والله احلا كعدة ...
بقينة نسولف لحد ما دخل غزوان من برة
خاتون : غزوان ابيش الساعة طيارتك
غزوان : ب ٨ .. وهسة راح ابدل واروح امر على مؤيد اخذ اوراق منة ومناك اطلع للمطار
بلعت ريكي التفتت شفت الساعة ب ٦

صعد هو للغرفة يبدل ... خاتون راحت لبيتهم ... واني اتذكر خاف ناسية شي ما حطيتة الة ...
سمعت صوت خطواتة عالدرج واضحة من صوت الحذاء ...
التفتت وفهيت بي ... لابس قاط اسود .. بارز عرض اكتافة ... وعطرة ترس الصالة ...
صليت على النبي حتى لا احسدة
حكيت راسي وكلت : صدك انت وين مسافر
غزوان وهي مشغول بتليفونة : لتركيا بشغل

ميامين : اها تركيا
افففف .. هسة اني شسوي بروحي وتركيا بناتهم وحدة احلا من الثانية
سحب الجنطة وحطهة كبال الباب ...
خلص راح يروح ... دمعتي صارت بطرف عيني
اول مرة راح افاركة ...

غزوان ببرود : انتبهي لنفسج ... وماريد حركة منا لو منا ... اذا تردين بس لبيت اهلي روحي وحدج ساعة لو ساعتين مو اكثر ... اني وصيت خاتون تبقى يمج ... يعني ما راح تملين وتتحججين
هزيت راسي ...وبدون مقدمات حضنتة ..
حطيت خدي على صدرة وصرت ابجي ...
هو بقى مصدوم ومنزل ايديه ما تحرك ...
ما اهتميت المهم حضنتة ...

ردت اوخر بس منعني ايديه الي حاوطني لصدرة بقوة ... وحط وجهة بشعري
تمسكت بي اكثر وصرت ابجي ...
وخرني من حضنة ومسح دموعي بيدة واني لهسة ما مستوعبة الي جاي يسويه ... اووف والله حيرتني وياك يغزوان ... ساعة حنون وساعة فرعون ...

رجع لطبيعتة وتوجه للباب وعافني وراه ...
وصل للباب ووكف ...
التفت علية ... ثواني ورجع علية ...
بعدني ما مستوعبة ... سحب الجفية من شعري

جنت دائما البس الجفيات الزغار يصيرن حرير ... اسويهن مثل الطوگ والم بيهن شعري لان ناعم ويضوجني من ينزل على وجهي الكذلة ...
اشدهن واسويهة مثل الفيونكة ليفوك ...

سحب وحدة من الجهات وانفكت كلهة ...
اخذهة وطلع حتى بدون ما يكول كلمة وحدة ...

كعدت عالقنفة وابجي ... مادري شصارلي ...
ميامين مو هذا الي تردينة .. مو تردين تخلصين منة
.. اذا انتي بعدة ما رايح وكعدتي تبجين ... شلون اذا باجر رجعتي لاهلج وعفتي ...
اجت خاتون يمي وحاولت تغير مزاجي وتسولف وتضحك وياي ...
اخر شي ملت وراحت لبيتهم كالت هسة اجيج

ورة نص ساعة تقريباً دخلت .... انصدمت
واني اشوف الحجية خاتون تمشي وياهة
رحتلهة بسرعة : اهلا وسهلا حبوبة تفضلي ..
الحجية بزعل : جا اذا انة صدك حبوبتج ليش ما تمرين علية يالبذاتة
ميامين : حقج حبوبة والله ادري مقصرة وياج بس اخاف اكول لغزوان ومايقبل
الحجية : جا هي بكيفة شني ... دخلي يفك حلكة بس تعاي كليلي ...

ضحكت عليهة ... والله مبينة قوية وسوالفهة حلوة يعني مبينة بت شيوخ وديوان ... : الله يخليج النة حبوبة
الحجية التفتت على خاتون : اخذيهة وروحي مثل ما وصيتج
حجيت بسرعة : لا حبوبة فدوة ... والله غزوان منبه علية هسة قبل لا يطلع كال ممنوع تطلعين من البيت

الحجية : اووف منك يغويزي اووف ... هسة شلون نجيب المرة هنا ؟؟
حجيت بأستغراب : يا مرة حبوبة
الحجية : مالج غرض من تجي تعرفين
خاتون : حجية لا تخافين اني هسة اروح اكللهة واجيبهة هنا
كامت خاتون واني كلشي ما مفتهمة ...

التفتت علية الحجية وكالت بحزم : كومي ذبي ثوبج ...

غزوان .. ميامين 👇🏻

الكاتبة : سارة الشمري🖤

اتمنى عجبكم البارت ... وهسة راح ارجع اسألكم نفس السؤال ... منو تتوقعون ديتعذب اكثر ميامين لو غزوان 💔

#البارت الثاني والعشرون

#الكاتبة : سارة الشمري🖤

إذا إنتصرت فليس عليك أن تفسر شيئا ، إذا خسرت فيجب أن تختفي كي لا تحتاج إلا تفسير شيء

التفتت علية الحجية وكالت بحزم : كومي ذبي ثوبج ...
التفتت عليهة بإستغراب : ليش حبوبة شبي ثوبي ..
الحجية : كومي ذبي الاسود
حجيت : بس شلون اذبة ... خاف غزوان ما يقبل ..
الحجية بعصبية : اكلج انة شني هنا وكلساع كلتي غزوان وغزوان ... وادور حتى بالاسود يحط روحة غزوان ... مالج شغل بي واذا حجة كليلة حجية خاتون ذببتني الاسود ... وترة مو بس انتي حتى مها وخاتونة راح اخليهن يذبن ... شهالمزعطة لابسات اسود .. شني الاسود راح يرد الولد
ارتاحيت من كالت حتى خاتون ومها : بس حبوبة منو ايكول يقبلن يذبن وخاف امهن ما تقبل ...

الحجية : لا حبوبة .. امهن هي الكالت خل يذبن ... اتكول خاف مو زين عليهن الاسود .. بس مارادت هي تكللهن وكالتلي اني اكللهن ..
ابتسمت وكلت : انشالله خير
الحجية : شعندج كاعدة بعد .. كومي بدلي ثوبج

صعدت لغرفتي عالسريع سبحت وبدلت ... ذبيت الاسود الي اني جنت لابستة احتراما وياهم لان مو حلوة همة لابسين واني لا ...

لبست دشداشة بيجي فاتح ... ردانهة كلوشة عريضة ومخصرة من الصدر للخصر والباقي عريض من جوة
نزلت وشافتني الحجية :  ... اي يحبوبة هسة طلع شكلج ... جا جنتي كالبة وجهج بالاسود ...

ابتسمتلهة
دخلت خاتون ووياهة وحدة متوسطة العمر ... سلمت علية وعالحجية وكعدت
خاتون : الله الله شهالجمال ... واني جنت اشوفج حلوة حتى بالاسود .. بس هسة احلة بعد ..

الحجية : وانتي خاتون .. يلة روحي ذبي الاسود وصيحيلي اختج خل اكللهة
خاتون : بس حجية اني ماريد اذب الاسود هسة ...
الحجية : روحي صيحي اختج وتعاي
طلعت خاتون وراحت تصيح مها ...

ورة شوية دخلت مها ... ما اهتمتلي وكالت : امري حبوبة
الحجية : روحي انتي واختج وذبن الاسود
مها : شنوو .. اني ما اذبة وفارس صارلة ٤ شهور من توفى
خاتون : حجية اني كتلج ماريد اذب هسة
الحجية بعصبية : وشني الاسود مالتجن راح يرد اخوجن لو شني ... سمعن ولجن ... حجايتي ما اعيدهة ... وترحن تذبن الاسود هسة وتجن كبالي اشوفجن يلة
خاتون : بس يا حبوبة .. امي ايجوز مــ....

قاطعتهة الحجية : معليج بأمج هي الكالتلي ذبيلهن مو زين عليهن الاسود
مها : بس حبوبة ...
الحجية بعصبية وهي تضرب عوجيتهة بالكاع : شني ولجن حجايتي صارت ما مسموعة هنا ... ما تحترمن جبير عليجن
البنات نزلن روسهن ومها كالت : اسفة حبوبة مو قصدي .. ما يصير الا التردينة

الحجية : يلة جدامي ترحن تبدلن وتردن اشوفجن يلة
طلعن البنات والحجي التفتت علية وكالت : يلة اكعدي خلي المرة تحفلج
ميامين : لا حبوبة ماكو داعي اني وجهي مابي شعر هواي
الحجية : دكعدي اكعدي .. ليشوفج مايكول معرسة .. حالج من حال البنيات

كعدت والمرة بدت تحفلي وسوتلي بحاجبي شمرة حلوة ...
دخلن البنات مها وخاتون ذابات الاسود ... صدك طلع شكلهن .. خوب مها طلعت تخبل ... هههه المفروض ما امدحهة بس صدك حلوة ... بس مو معناتهة خاتون ما طلعت حلوة ... فدوة لكلبهة لا مها ولا حذاهة ... خاتون لابسة دشداشة لون جوزي فاتح وشال بيجي ... ومها لابسة دشداشة خضرة وبيهة نقشة بالذهبي وهي شعرهة اشكر ...
مها شوفت الحجية لبسهة ومشت
وخاتون كعدت يمي ...

خلصت والتفتت عليهن
الحجية : اللهم صلي على محمد وال محمد ... صرتي شحلاتج يحبوبة ... ولو هو انتي من يومج حلوة ... التفتت على المرة التحف وكالت : ام منتضر ما عندج هنا كحلة احمر اخضر ...
ام منتضر : اي حجية تدللي ... عندي كحلة جايبة وياي ...
حطتلي كحل لداخل عيني
لتفتت على خاتون الي فتحت حلكها : ماشالله .. عينج صارت تخبل بالكحل ...

ابتسمتلهة : صدك ... ابد ممجربة احط مكياج .. حتى كحل ما حاطة ..
خاتون بصدمة : بعمرج ما حاطة مكياج
ميامين : اي والله ماحاطة
سحبت المراية وانصدمت واني اشوف شكلي ... هاي اني؟؟ صرت حلوة .. الكحلة سحبت عيني ووسعتهن ...
الحجية : وينة غويزي يجي يشوفج جا ما تيهج ابد ..
اني غصت ابملابسي من الخجل
بيومهة بقت الحجية لليل وبعدين راحت ... بقينة اني وخاتون بالبيت ...

بليل خاتون نامت ... اني ماكدرت انام ... اخذت قميص غزوان وخليتة يمي وحضنتة وابجي واني اشم ريحتة ...
حتلو ما جنت انام على ريحتة ... بس مجرد فكرة ان هو بعيد عني تخليني ابجي واشتاقلة رغم ما صارلة يوم من مشى ...
اووف شنو تاليلي وياك يغزوان ...

مر اسبوع على سفر غزوان ... كل يوم اكعد ابجي .. اشتاقيتلة كلش ... اليوم الي يمر احسة سنة ...
ما متعودة ابقى بدونة ... تعودت علي ...
خاتون ابد ما عافتني ...
دخلت علية خاتون وبيدهة علبة وحطتهة كبالي
استغربت : شنو هاي
خاتون : افتحيهة ..

فتحتهة واتفاجأت .. مجموعة مكياج جبيرة .. وبترتيب حلو ... يبدو خاتون مرتبتهم
ميامين : هاي المن ؟؟؟
خاتون : الج يعني المن ...
ميامين : بس اني ماعرف احط مكياج ...
خاتون : اني اعلمج ما يرادلهة روحة للقاضي

بدت تحطلي مكياج واني مستسلمة حتى ماكدر احجي ...
خلصت وانطتني المراية : عززززة خاتون هاي اني
خاتون بضحك : اي انتي ... طلعتي تجننين
اول مرة احط مكياج ... ما مجربة قبل حتى بالاعراس ما احط ...
تشكرت من خاتون واخذت المكياج وضميتة

بليل كعدت ابجي مثل كل يوم
بس خاتون الي عبالي نايمة كعدت : كافي عاد .. شكد بجيتي ...
ميامين : خاتون شسوي .. اشتاقيتلة
خاتون بملل طلعت تليفونهة واتصلت
واني ما منتبهة هي شداتسوي

فجأة حطت التليفون على اذني وسمعت : الو
تفاجأت والتفتت على خاتون الي مبتسمة وهزت راسهة
رجع كال : الو خاتونة تسمعيني
حجيت بتوتر : الو غزوان
غزوان بهدوء : ميامين
كلبي كام يدك سريع .. والله مشتاقة لصوتة .. مشتاقة لاسمي من يكولة ..نزلت دموعي مباشرة
خاتون ضربت على كصتها من شافتني ابجي
ميامين : شوكت ترجع ..
غزوان : جاي احاول اخلص شغلي بسرعة واجي ... يعني اقل الاسبوع

ميامين : تمام .. ترجع بالسلامة
غزوان : ميامين ليش تبجين ... انطي التليفون لخاتون خل احجي وياهة
مديت التليفون لخاتون : الو .... ها غزوان ... شبيك ... لا محد مضوجهة والله ... تبجي اتكول مشتاقة لامهة ... اي ماشي ... ماشي بلا متوصي ... مع السلامة ...
ميامين بسرعة : شنو كال
خاتون : ماكال شي .. وصاني عليج ...

ميامين : علية ؟؟
خاتون بابتسامة : اي عليج
ابتسمت وارتاحيت شوية لان سمعت صوتة...
خاتون وهي تتغطى : اني راح انام .. انتي هم نامي لا تبقين كاعدة
اني ما رديت عليهة بس مبتسمة وبالي يم غزوان ...
خاتون : اووهووو ... اني ويامن احجي ...
غطت راسهة ونامت ...
اني حضنت القميص ونمت ...

بقت خاتون يومية لازكتلي تعلمني بالمكياج حتى مللتني ... صارت ميكب ارتست براسي ...
واني تعلمت منهة شوية ...

دخلت علية خاتون وشافتني كاعدة وصافنة
خاتون : اهوو .. شلون يعني لازم كل ما ادخل عليج الكاج صافنة .. هم ياريت يستاهل شمحصلة منة
ميامين حضنتهة وبجيت : خاتون اريد امي مشتاقتلهة ... والله بعد ما اتحمل ... شكد حاولت اصبر واتحمل بعدهم عني .. بس بعد ماكدر تعبت والله ... اريد اعرف اخبارهم .. شصار بيهم .. شلون عايشين

خاتون بتنهد وهي تحضني : ميامين حبيبي لا تخافين .. اكيد اذا بيهم شي راح تعرفين ... يعني غزوان ميضم عليج هيج شي
ميامين : غزوان يتمنى يصير بيهم شي اليوم قبل باجر ... وحتلو صار بيهم ماراح يكولي ... يعتبرة خبر عادي ومايهمة الموضوع
خاتون سكتت شوية ووخرتني وكعدت عالقنفة ...
تنهدت بتفكير .. وبتردد طلعت تليفونهة ومدتة الي : اخذي اتصلي بيهم .. بس فدوة لا تكولين لغزوان اني انطيتة الج
حضنتهة بفرحة : الله لا يحرمني منج .. والله اني بدونج ماعرف شنو اسوي ...
خاتون : هسة عوفي هالحجي واخذي اتصلي .. حافضة رقم احد بيهم

ميامين بسرعة : اييي حافضة رقم حسان ...
سجلتة بتليفونهة وضغطت اتصال ...
التليفون يدك واني كلبي يدك وياه
: الو ..
انهاريت بالبجي من سمعت صوتة
حسان بلهفة : ميامين .. يبعد اخوج .. وينج سمعيني صوتج
بالكوة حجيت : حسان ..
حسان : يكلب حسان ... وينج .. شني اخبارج لا تسألين .. لا تكولين اهلي كلبهم يمي .. لا تكولين يبجون علية
ميامين ببجي : فدوة اروحلك لا تعتب .. والله مو بيدي ... هسة يلة حصلت فرصة اخابركم ...
حسان بسرعة : وليش محد يخليج تخابرين ... احجي شمسويلج ... شلون عايشة هناك

ميامين واني امسح بدموعي ..: الحمدالله عايشة بخير ... لا تخافون علية .. اصلا ما توقعت هيج راح يعاملوني ... صدكني مرتاحة ... التفتت على خاتون كلت ..: حتى البنات حبابات وزينات وياي .. واصلا كاعدة ابيت وحدي ... لا يضل بالكم علية
حسان : اموني اكيد ...
ميامين : اكيدين ... وهسة فدوة انطيني امي اريد احجي وياهة ...
حسان : ماشي .. لحضة ...
شوية وسمعت الصوت الي رد روحي : يمة ميامين ...
بس سمعت الصوت كمت ابجي بصوت : يمممة مشتاقتلج ...
ماما : يا عيون امج ... ليش هيج يمة ... تكطعين بية ... من ساعة السودة الوديتج بيهة الهم

ميامين : ماما لا تخافين علية ... صدكوني اني بخير ومرتاحة ... بس شوقي الكم الي معذبني ...
ماما : يمة والله كلبي يمج ... ومن يوم الرحتي ولهسة دمعتي ما نشفت لا عليج ولا على اخوج
تذكرت رائد وحجيت بسرعة : ماما شلونة رائد ... سمعت ان مضروب سجينة .. شلون صار
ماما : الحمدالله يمة عدت على خير ... بس من سمع بيج رايحة الهم علمودة عصب وزهك على حسان ولهسة ما يحجي وياه ...

ميامين : جا حسان شعلي ... اني الي سويت هيج عمداً ..
ماما : بعد اخوج رائد وتعرفينة ... وتدرين انتي شنو بالنسبة الة
ميامين :اي والله ادري ... طمنيني ماما اخواتي شلونهن
ماما : والله يمة اختج زينب رجلهة منعهة تجي يمنة لان على كولتة اهلج مجرمين ...
ميامين : هاي شنو .. شبي تخبل هذا
ماما : شنسوي يمة هم حضنة هذا ... واختج اشواق تجينة من فترة للثانية ... وشهد تبجي بواجي عليج ...
ميامين : يعمري شهودة ... كوليلهة انشالله ما اطول واجيهة ..
ماما : انشالله يمة

ميامين التفتت شفت خاتون مموجودة : يلة يمة اني اترخص منج .. ترة هذا تليفون حماتي وغزوان ميدري بية خابرت ... الله ينطيهة انطتني التليفون وخلتني احجي وياج
ماما : اي والله الله ينطيهة ... سلميلي عليهة .. وديري بالج على نفسج يمة
ميامين : انشالله يمة لا تخافين علية

سديت التليفون من امي ... وورة شوية طلعت خاتون من المطبخ ومسوية جاي
حطت كوب كدامي وهي كوبهة بيدهة
حضنتهة وهي ضحكت : والله ما انساهة الج ... والله لو ما انتي هنا جان اني من زمان انفجرت ومتت
خاتون : سمالله عليج يروحي ... بس مثل ما اتفقنا .. غزوان مراح يعرف بشي اوك ؟؟

ميامين : لا توصين حريص ... مستحيل اخلي يعرف
خاتون : هايهية لعد تطمنت .. بس ممكن اسألج سؤال ؟
ميامين : اي اكيد
خاتون : ليش ما كلتيلهم شلون عايشة هنا وبيا ضيم ...
ميامين : مادام انتي موجودة والحجية خاتون موجودة .. هذا ما يعتبر ضيم ...
خاتون : وغزوان مو ضيم شنو ؟؟ وهالضرب هذا مو ضيم ..
سويتهة بضحك حتى اغير الموضوع : مو ايكولون ضرب الحبيب مثل اكل الزبيب
خاتون ضحكت : والله عليج سوالف ...

ثاني يوم كاعدين اني وخاتون ..

كاعدين بالصالة وخاتون لاطشة بية
دفعتهة وكمت : اوووف خاتون كافي ... والله حتى كرهت المكياج من وراج
خاتون وبيدهة قلم : اوكفي الله عليج بس اسحبلج ايلاينر
ميامين : ماريد والله مليت .. ماشبعتي من المكياج ... شنو مسويتني مودل عندج
خاتون : يلة عاد حبابة بس اريد اشوف الايلاينر على عيونج ...

تأففت وكعدت : هذا اخر شي ترة ...
خاتون بحماس : اي والله اخر شي
كعدت ترسم بعيني ...
كالت : فتحي عيونج بلة
فتحت عيوني وخاتون : وااااو ... صدك يجنن .. عيونج تخبل بالايلاينر
كمت وكتلهة : يلة كافي طكت روحي ...

خاتون ضحكت : ماشي ... بس فدوة سويلنة شي ناكلة ترة جعت
ابتسمتلهة : تدلل دنفوشة ام خدود شعندي غيرهة
خاتون عوجت حلكهة وما عاجبهة الكلام : ولي بطلت ماريد شي .. عابتلج
ضحكت عليهة ودخلت للمطبخ
طلعت ذرة حتى اسوي بوشار ...
سمعت صوت خاتون تصيح بالصالة ... شعدهة بعد
طلعت للصالة وانصدمت .....

الكاتبة : سارة الشمري🖤