سجينة الظلم والانتقام الفصل الثاني وستون 62 - بقلم طبيبة الاحساس

#سجينة_الظلم_والانتقام 🍂🥀

#sara_zead
#البارت الثاني والستون

الكاتبة : سارة الشمري✍🏻

الحب يستأذن المرأة في أن يدخل قلبها ، وأما الرجل فإنه يقتحم قلبه دون استئذان ، وهذه هي مصيبتنا (برنارد شو)

ورة نص ساعة سمعتهة رجعت صاحت : مؤيييد ..
رفعت راسي الهة بملل : شكو هم صرصور ..
كمزت بسرعة بخوف واني اشوف وجهة احمر ومغمضة عيونهة ..
رحتلهة بسرعة وكعدت يمهة ولزمت ايدهة : جوري فتحي عيونج ..

واضح ان جاي تحلم وتردد بس اسمي ..
كصتهة عركانة .. : جوري اصحي هذا حلم ..
شفايفهة ترجف وفجأة شهكت وفتحت عيونهة ..
شافتني كدامهة وبسرعة حضنتني وتمسكت بية ..
لنصدمت بس خضنتهة من صارت تبجي : مؤيد لا تروح فدوة ...

صرت امسح على راسهة : اششش ما رايح اهدي ..
صرت اقرى ايات قرءآنية بصوت وهي هدأت شوي ... وورة ربع ساعة غفت ..

££££££

يوم الزفة ... الصبح ..

غزوان ... فتحت عيوني واباوع بالغرفة تأكدت ان مو حلم .. ابتسمت واني اسمع صوت المي بالحمام ..
رفعت تليفوني الي يدك .. شفت المتصل خاتون ..
رديت بصوت رايق : صباح الوررد ..

خاتون بصياح : بععععد وووكت همزين جاوبتو .. من الصبح لهسة ادك على ميامين وما تجاوب .. ممكن تكلي وينهة ...
وخرت التليفون من اذني من صوتهة العالي وخليتهة تكمل ورديت : ميامين بالحمام وهستوهة كعدت .. ليش اكو شي ؟؟..

ردت بقهر وعصبية : شنو اكو شي .. اليوم عرسي واحنة متفقين نروح سوة للصالون وحضرتهة هسة كعدت والساعة ١٠ .. كللهة عفناهة ورحنة وهي خل تبقى تتجهز بالبيت ومشكورة ..

سدت التليفون بوجهي واني اباوع للتليفون واضحك .. حتى نسيت اليوم عرس خواتي ..
انفتح باب الحمام .. طلعت بالبرنص وشعرهة المبلل وطويل نازل على وجهة ...

ابتسمت من شافتني : صباح الخير ...
كمت وسحبتهة من خصرهة الي وحطيت وجهي بركبتهة اتنفس عطرهة واتنهد : صباح الخير والمسك والعنبر والكادي والياسمين والقرنفل ...

ضحكت وهي تحاول تفك نفسهة مني : غزوان وخر والله تأخرت عالبنات اكيد ينتضروني هسة ..
باوعتلهة بضحكة : خاتون كالت كول لميامين تجهز نفسهة بالبيت ومشكورة .. وهنة عافنج ومشن ..

فتحت عيونهة بأعتراض : لاااا مو متفقين نروح سوة ..
غزوان : وانتي راحت عليج نومة ..
ضربتني على كتفي بخفة : كلة من وراك ما خليتني انام البارحة ..

باوعتلهة بخبث : ليش شسويت اني البارحة ...
وجهة صار احمر وتحاول تدفعني : غزووان وخررر خل احضر نفسي ..
قربت وبستهة من خدهة : شنو رأيج تعوفين العرس وتبقين يمي اليوم ...

فتحت عيونهة : لاااا طبعا .. اني اخت العرسان وانت اخو العرايس وعيب ما نحضر ..
درت وجهي عنهة : قنعيني لعد ...
حطيت ايدهة ورة ركبتي وايدهة الثانية مشت على لحيتي وكالت بدلع : غززوووان ....

ذبت وياهة كبل : اقتنعت ...
باستني بخدي واني ضاعت احوالي : يلة هسة عوفني خل اجهز نفسي حباب ..

وخرت عني وراحت تبدل ملابسهة واني دخلت للحمام ..
ميامين ... نشفت شعري وبدلت ملابسي وحضرت ملابس غزوان ..

كعدت احط مكياج وغزوان طلع من الحمام وكلساع يتحارش بية .. كوة خلصت المكياج .. ولبست فستان طويل لونة اخضر طوخ .. ولفيت شالي بفيكة حلوة ...
غزوان لبس دشداشة بيضة ولف جراوية لونهة رصاصي وطلع يخبل ...

اتصلت عالبنات واعتذرت منهن وخاتون كوة قبلت تراضيني ..

جوري .. من كعدت من النوم لهسة واني الحلم مال البارحة مجاي يروح من بالي ..
كاعدة عالكرسي والمصففة تسوي بشعري ومها وخاتون ام الصالون تسويلهن بالمكياج ..

ما ردت اجي لان حاسة بضيقة مو طبيعية بس البنات اصرن علية ان اجي وياهن ..

صارت الساعة ١١ وخلصنا كلنا .. البنات طلعن يخبلن ماشالله ..
اجة مؤيد مر علينة للصالون وطبعاً بأمر منة كلنة نلبس بواشي لان حاطين مكياج ..

كعدت بصفة جان مبدل وكاشخ طالع يخبل ...
وصلنة للبيت ودخلن البنات ولبسن بدلاتهن جوة لان كالو الزفة راح توصل ..
صعدت لغرفتي واخذت فستاني ولبستة ..

واكفة كدام المراية اتأكد من مكياجي ودخل مؤيد..
شافني وبقة واكف بمكانة .. بعدين ارتبك ونزل عيونة .. وكال بتوتر : جيبيلي طباقات مال دشداشة لان هاي انكسرت ..
دخلت للغرفة وجبتلة طباقات .. اخذهن مني وباوع بوجهي : هيج راح ترحين وحمرتج طوخ ...

حطيت ايدي على حلكي : ليش مو حلوة شنو ..
مؤيد بسرعة : لا بالعكس ... يعني قصدي ما يصير ترحين وحمرتج طوخ .. حطي لون خفيف ..
هزيت راسي وابتسمت وهو طلع ...

ضحكت يغار علية يعني ... مسحت الحمرة مالتي وحطيت لون خفيف ..
نزلت كعدت يم البنات ..

ميامين ... رحت لبيت عمي وطبعا من بعد عركة وية غزوان ومنعني اروح وياهم بالزفة لان هستوني رجعت من يمهم .. بس بعدين وافقت يعني ماعندي خيار ثاني ..

كعدت يم البنات وشغلت الديجي وكمنة نركص اني وبسمة وجوري وورة ربع ساعة كالو اجت الزفة ...

طبعا دخلن النسوان اول شي وبدينة بالهوسات والركص .. وغزوان كل شوي يخابرني يريد يسولف وياي ايكلي اشتاقيتلج ..

كاعدة عالدرج واحجي وياه واجت اختي زينب : ميامين ويامن تحجين هسة وكتهة .. دكومي عود انتي اخت العرسان ..

هزيت راسي واشرتلهة بمعنى هذا غزوان ..
ضحكت وهزت راسهة ومشت ..
بقيت احجي وياه وصوت الهلاهل مالتهن طرش اذني .. ورة ربع ساعة رجعت اختي اجت : انتي بعدج تحجين وية غزوان .. دكومي شنو ما عدكم بيت وهستوكم تحجون .. ما مليتو ..

غزوان سمعها وحجة : الله واااكبر .. منو هاي الحاسدتنة ..
حجيت بضحكة : هاي اختي زينب ...
غزوان بعصبية : كليلهة صلي عالنبي احنة ما صدكنة ..
حجيت بصوت خفيف : فشلة ..
ورة ربع ساعة كالو راح تروح الزفة ...

دخل رائد وخالد واخذو العرايس وصعدوهن بالسيارات .. واني شوية واريد ابجي لان غزوان منعني من الروحة ..
مشت الزفة وكعدنة اني وجوري وبسمة نبجي على مها وخاتون .. يعني طقوس ورة كل عروس .. الي يشوفني مو عبالك اخت العرسان .. بس الي مطمني ان راح يوصلون متأخرين ويزفون مباشرةً ..

وحتى عمتي ما راحت لان عمي ما قبل وما متعودين ان تبقى برة البيت ...

بسمة ورة العشى مشت لبيتهم وبقينة اني وجوري .. كعدنة نسولف ...

خاتون ... وصلنة للبصرة وطول الطريق رائد لازم ايدي واني وجهي يكلب الوان من الخجل لان ما متعودة علي ..
طبعا وصلنة الساعة ٨ بليل لان الطريق طويل وهم زفة والسيارات كلساع توكف واكو شباب ينزلون يركصون بالشارع .. يعني تأخرنة ..

اخذونة اني ومها وكل سيارة توجهت للبيت العريس .. يعني سيارة خالد راحت لبيتة وسيارتنة راحت لبيت اهل رائد ..
نزلت من السيارة ودخلني اخواتة وبدن يهلهلن ويركصن ويهوسن ..

ورة نص ساعة صعدوني للغرفة .. جانت كولش حلوة والبنات يرتبن بملابسي بالكنتور لان الجنط هستوهة اجت ..
ورة شوية سمعنة صوت الهلاهل والركص اقتربت من يمنة
ودخل رائد للغرفة .. اني جنت افرك بيدية من التوتر ..
مدنكة راسي وشفت رجلي صارت كدامي .. رفع الطرحة عن وجهي ..

حسيت بأصابعة على فكي ورفع راسي برقة ..
عيوني اجت بعيونة ...
نضراتة جانت تحجي مو لسانة .. الحب جان واضح بيهن .. نضراتة تتأمل عيوني بحب وابتسامة ..

حاوط وجهي بأيدي وقربني وباسني بكصتي ..
حجة بهمس حب : نورتي بيتج ونورتي كلبي وعيوني ..
ابتسمت بخجل .. حط ايدي على اكتافي وكعدني عالجرباية : ليش جسمج بارد .. شنو بردانة ..
حجيت بتوتر : لا .. يعني مو كلش ..

ابتسم وكام فتح المجر الي يم راس الجرباية وطلع علبة حمرة ..
كعد على ركبة كدامي بالكاع .. وفتح العلبة وطلع من عدهة حجل ذهب ابو السلسال ونازلة منة وردات زغار كلش حلو ونازك ...

رفع البدلة ولزم رجلي .. حسيت بقشعريرة مشت بجسمي من لمستة .. رفع الحجل ولبسنياه برجلي ..
رفع ايدي وباسهة : واخيراً صرتي الي .. ما تدرين شكد انتضرت هاليوم ...
بلعت ريكي واني احس راح يغمى علية من التوتر ..
رفعت بدلتي وكلت : اني راح ابدل ملابسي لان البدلة ضايقتني ..

ردت اروح بس سحبني بسرعة وضربت بصدرة ..
حجة وهو يحاوط خصري بأيدي : ما يحتاج اني اساعدج بيهة ..
ما لحكت استوعب الا وهو باسني من شفتي وايدة انمدت للبدلة مالتي ...

££££££££££££

مها ... كاعدة بالغرفة ودخل خالد واني شوية واريد ابجي من الخوف .. يربي اني ليش وافقت اتزوج ..
يعني لو باقية ابيت اهلي شجان صار ..

وكف كبالي ورفع الطرحة مالتي ..: مبروك يالزركة ..
انصدمت ونسيت نفسي وباوعتلة : نعععم ..؟ منو الزركة ..
خالد بأبتسامة : انتي ام عيون زرك .. عيونج زرك لهالسبب اسميج الزركة ..

رفعت حاجب وكتلة : بس الزركة تنكال للمو حلوة ..
لزم ايدي وكال وهو عيونة تمشي علية من فوك ليجوة : والله اذا عالحلاة ف انتي من اول يوم شفتج بي واني كلت ماكو بحلاتهة ..

دنكت راسي بخجل .. حضني لصدرة وهمس : انتي تدرين شسويتي بية من اول مرة شفتج .. اخذتي كلبي وعقلي وراحة بالي ..

ابتسمت على كلامة ورفعت ايدية وحضنتة ..
حطيت خدي على صدرة ..
ورة ثواني كال : شلون يعني راح نخلصهة هيج ..
وخرت كتلهة بأستغراب : هاا ..

سحبني الة مرة ثانية : دتعاي واني اعلمج شنو الها ..
باسني بشفتي واني فتحت عيوني ما مستوعبة ...

£££££££££

زياد ... صاعد سيارتي ومتوجه للمطار ...
اليوم الكل فرحان ومحد حاس بنار كلبي .. شنو السويتة اني حتى اتعاقب هيج .. ذنبي لان حبيت هيج صار بية .. عمري كلة راح واني انتضرهة ..

ما جاي اكدر اطلعهة من كلبي .. ليلي ما انامة من وراهة .. وهي ولا على بالهة .. ليش اني حضي هيج يربي ..
وكفت سيارتي على جهة ورفعت تليفوني وشفت رقم اختي ورود تتصل ..

جاوبتهة بهدوء : ها ورود ..
ورود : زياد وين انتة .. ليش تأخرت ..
جاوبتهة بأبتسامة الم : لا تنتضروني ما راح ارجع ..
ورود : ليش ما ترجع .. وين انت زياد احجي ..
زياد : ورود اني مسافر ومادري اذا ارجع لو لا .. ديري بالج على اهلي بغيابي ..

ورود : شنوووو .. زياد شنو هالحجي وين راح تسافر ..
جاوبتهة واني روحي طالعة : ورود ماكدر اكلج وين بس الاكدر اكولة ان تعبت وماكدر اتحمل اكثر .. خليني اروح يمكن اذا ابتعدت اكدر انساهة ..
ورود وهي تبجي : زياد الله يخليك ارجع .. صدكني راح تكدر تنساهة وتحب غيرهة ..

ابتسمت : السنين ما تكدر تمحيهة ايام .. مع السلامة ورود ..
سديت التليفون وتنهدت من كلبي ...
طلعت تليفوني الجديد واتصلت على رقمهة لان ماتعرف هذا رقمي ..

ردت علية بصوتهة .. ابتسمت ونزلت دموعي ...
: الوو.. الووو .. ليش محد يرد ... اففف ..
سدت التليفون بوجهي .. ذبيت التليفون ورجعت راسي عالكشن ومسحت دموعي بسرعة ...
شغلت سيارتي وتوجهت للمطار واني اريد ابتعد عن كلشي بلكي تطلع من كلبي ..

وصلت للمطار وورة نص ساعة اقلعت الطيارة واني ابتعدت عن كل هالناس واريد ابعدهة من كلبي ..

£££££££

ميامين ... كاعدين بالصالة ودخل عمي علينة .. شافنة نبجي عالبنات ..
كعد عالقنفة : دكافي ولجن انة كوة لازم روحي .. هسة حسيت بأخوي من زوج بناتة ثنينهن بيوم واحد ...

كمنة اني وجوري وكعدنة يمة ..
جوري : احنة بناتك ...

ميامين : هنة اثنينهن تزوجن اعتبرنة احنة الاثنين مكانهن ..
جوري : احنة ما راح نعوفك وراح نبقى يمك ..
حضنة وباسنة براسنة : انتن اصلا بناتي .. الله يحفضجن يا بوية ..

التفت على عمتي : عليمن تبجين وعندج هالوردات ذني .. انشالله يعوضنج عن بناتج ..

عمتي بأبتسامة : الله يحفضهن انشالله جا شعندي غيرهن ..
دخل غزوان وهو يباوعلي بأبتسامة ..
كعد يم الحجية : كواج الله حجية ..
الحجية : كواك الله .. دكعد ولك عندي حجاية وياك ..
غزوان : امريني .. شمسوي هالمرة بعد ..
الحجية : جا ولك هاي سواية تسويهة .. تمنع البت من عرس اخوهة ...

غزوان : جا حبوبة غير صارلهة اسبوعين عدهم ..
الحجية : جا ما كلت خواتي يستاحشن غاد وحدهن .. لو رايحة هي وياهن جا ضالة يمهن ..

غزوان : حبوبة خواتي ما عليهن .. كل وحدة يم رجلهة وااني تردين تودين مرتي يمهن .. جا ما تكولين علية خطية ..
الحجية : دكوم غاد كوم .. انت زلمة شطولك شكدك .. جا ما تكدر بدون مرتك ..

غزوان : حبوبة انتي ليش دومج واكفة ضدي ..
الحجية : عبنك موش ادمي ودومك مهور ما ينكدرلك ..
غزوان بضحكة : لا والله حبوبة مو مهور بس هي هالبت سودنتني بعشكهة شسوايتي بعد ..
فتحت عيوني ووجهي صار احمر .. يمة ولا يستحي ..
دك تليفونة ورفعة : ها ابو اسد ..
طفر بسرعة من مكانة وكال بخوف ووجهة صار احمر : شلوون مؤيد مسوي حادث ....

الكاتبة : سارة الشمري🖤

حبايبي ادري البارت قصير بس والله البارحة اكتب بالبارت وافتح عين واغمض عين من النعاس والله 😂 يعني اذا شفتو اخطاء غلسو عليهن فديتكم 🤫