سجينة الظلم والانتقام الفصل الرابع وستون 64 - بقلم طبيبة الاحساس

#سجينة_الظلم_والانتقام 🍂🥀

#sara_zead

#البارت الثالث والستون

الكاتبة : سارة الشمري🖤

الحب هو اللعبة الوحيدة التي يشترك فيها اثنان ويكسبان فيها معاً أو يخسران معاً

دك تليفونة ورفعة : ها ابو اسد ..
طفر بسرعة من مكانة وكال بخوف ووجهة صار احمر : شلوون مؤيد مسوي حادث ..

كلنا وكفنة بخوف وعمتي لطمت على صدرهة ..
غزوان سد التليفون وراد يطلع بسرعة بس عمي وكفة : غزوووان وييين .. شني تعوفنة هيج شبي مؤيد ..
غزوان بسرعة التفت على عمي : بوية حمزة خابرني وكال مؤيد مسوي حادث وهسة هو رايح الة .. وطلب مني الحكة ونفتهم السالفة ..

عمي وهو يطلع : امشي نروح اني وياك ..
عمتي كامت تضرب على وجهة وكعدت بالكاع : يمممة وللدي راحو مني .. شمسوية بحياتج عفاف وهيج الله يخاذ ولدج منج .. يممة دخيلك ربي لا تحرمني منة والله مابية حيل وجعة ثانية ..

كعدت بالكاع وتنوح والحجية تحاول تهديهة : ولج كولي يالله انشالله مابي شي ..
فجأة التفتت بسرعة وصرخت من شفت جوري وكعت بالكاع مغمي عليهة : جووووري ...

رحتلهة بسرعة ورفعتهة واضرب على وجهة : جوري فتحي عيونج فدوة .. جوررري ..
رحت ركض جبتلهة مي وحاولت اكعدهة وهي بس جسمهة ينتفض وترجع توكع ..

جيرانهم سمعت صوت عياط عمتي واجن يركضن وحاولن يسكتنهة ..
اجت وحدة منهن وشلنة جوري اني وياهة وصعدناهة لغرفتهة .. ابجي على حالهة وادعي بكلبي انشالله ما بي شي ..

بقت هاي البنية تقرة عليهة ايات وتسمي عليهة .. واني لازمة تليفوني واتصل على غزوان اريد اعرف شصار ..
نزلت على عمتي لكيتهة منتهية من البجي .. والحجية حاطة شيلتهة على وجهة وتبجي وشكلهة استسلمت لكلام عمتي ..
كعدت بصفهة : عمة اهدي الله يخليج انشالله ما بي شي .. اكيد هسة يجون وهو وياهم ..

عمتي وهي تدك على صدرهة : شيجون .. من مات فارس هم كلت هيج بس ما اجة وياهم .. يربي والله كلبي خلص ما بية حيل لوعة ثانية ..
بقيت احاول اهديهة وكل شوي اروح اشوف جوري وهي على حالهة من نحاول نكعدهة جسمهة يكوم يرجف وتنتفض وبعدين ترجع يغمى عليهة ..

حرت بين عمتي وبين الحجية وبين جوري واني كل لحضة تمر اتذكر اليوم الي توفى بي فارس وخوفنة على رائد واتمنى يرجع مؤيد مثل ما رجع رائد ..
ورة ساعتين تقريبا والوضع على حالة .. لحد ما انفتح الباب ودخل غزوان وعمي ..

££££££

مؤيد .. جنت امشي بالسيارة ومتوجه للبيت .. فجأة اجت سيارة مسرعة من جهتي الي عالسايق وبسرعة وبذكاء فريت الستيرن والتفت السيارة وصارت عالجهة العكس .. اصطدمت السيارة بسيارتي وهزت السيارة هز بس الضربة صارت على الجهة البصفي لان لفيت السيارة ..

حسيت راسي افتر من قوة الضربة ..
هزيت راسي بسرعة وغمضت عيوني وفتحتهة وصحصحت الحمدالله ما صار بية شي ..

نزلت بسرعة من السيارة وركضت لصاحب السيارة الي ضربتني ..
سيارتة من كدام تحطمت والجام تكسر ..
حاولت افتح الباب بس شكلة مقفول من جوة ..
دكيت الشباك اكثر من مرة بس الولد مغمي علي وراسة مليان دم ..

حاولت الكى طابوكة حتى اكسر الجامة بس ماكو ..
سميت بالله وضربت الجامة بيدي اكثر من مرة .. ولان هي اصلا جانت مكسرة .. يعنب كم ضربة وكع الكزاز بس ايدي انترست كزاز من ورة الضرب ومع ذلك ما اهتميت ..
مديت ايدي مفتحت قفل السيارة من جوة وبعدين فتحت الباب ..

شفت الولد يطلع تقريباً عمرة بالعشرينات ووجهة غركان دم والكزاز نصة براسة ..
سميت بالله ومديت ايدي ورة ضهرة وايدة حطيتهة على كتفي ونزلتة بالكاع ...

تفحصت نبضة بعدة عدل .. كمت بسرعة للشارع اتلفت بلكي سيارة تمر .. ورة خمس دقايق مرت سيارة تكسي وكفتة ..
اجة يركض وشلنة الولد سوة وتوجهنة للمستشفى مالتنة ..
حاط الولد بحضني وايدي تنزف وهدومي انترست دم من راس الولد ..

وصلت للمستشفى وبسرعة صحت عليهم وجابو سرير متحرك وحطيتة بي وركضت لقسم الطوارئ ..
استلمة مني واحد من الدكاترة الي بالمستشفى : دكتور مؤيد خلص احنة استلمناه .. انت خل يعالجون ايدك لان مجروحة ..

كعدت عالكرسي والهث .. حتى ما اعرف هالولد واهلة منين .. باوعت ليدي تنزف دم .. صحت على واحد من الممرضين واجة يضمدلي ايدي ..
وورة ربع ساعة طلع الممرض من غرفة الولد وانطاني تليفونة ومحفضتة جانو بجيبة ..

اتصلت على اخر رقم جان هو متصل علي ومكتوب ابوي وبلغتة عنة وهو خطية انخبص وكال راح يجي ..
خلص الممرض من ايدي وفجأة شفت غزوان اجة يركض ووجهة احمر والخوف مبين بي ..
اجاني يلهث : مؤيد ..
حضني حيل وبخوف وهو يتنفس بسرعة : اااخ الحمدالله والشكر والله كلبي راد يوكف ..

حجيت واني اطبطب على ضهرة : غزوان اهدئ والله ما بية شي .. شوفني كدامك كلشي ما بية ..
وخر وهو يتلمسني ويتأكد : اكيد ما بيك شي .. شنو هذا الدم الي على ملابسك ..
مؤيد : هذا مو دمي .. الولد الي ضربني بسيارتة تأذة خطية وجبتة للمستشفى وهذا دمة على هدومي ..
تنفس براحة : الف الحمدالله ..

اجة ابوي كوة يمشي .. رحتلة بسرعة وسندتة : بوية على كيفك ..
ابو غزوان : ولك هديت حيلي .. تريد تلوع كلبي مثل ما لوعتة على اخوك ..

مؤيد : سلامة كلبك بوية .. شوفني كدامك سالم مابية شي ..
حمزة : والله خوفتنة .. دكو على ابوي من المستشفى كالولة الدكتور مؤيد مسوي حادث .. وكلشي ما افتهمنة .. عبالنة شو شبيك ..

مؤيد : ما تأذيت بس الولد الي تداعمت وياه خطية تأذة ..
ابوي شال ايدي : شلون ما تأذيت .. جا وهاي ايدك ..
مؤيد : بوية ما تأذيت والله بس ايدي انجرحت بالكزاز من طلعت الولد ..

ربت على كتفي : الله يجزيك الخير بوية ويدفع عنكم الشر انتة واخوك ويحفض كل الشباب لاهلهة ولا يشوف فكد الولد لاحد لان تمرد الكلب ..
الكل : امين انشالله ..

غزوان : يلة كوم نروح للبيت اكيد هسة امي كاعدة على نار ..
مؤيد : لا ما اروح .. انتضر اهل الولد يجون يلة ..
ما لحكت اكمل الا شفت واحد جبير بالعمر ووياه ٢ شباب اجو بسرعة علينة ..
الرجال : ويينة ابني .. حسام وين ..
رحتلة : لا تخاف عمي انشالله ما بي شي .. هسة يطلعون ويطمنوك علي ..

حجة بخوف : شلون صار الحادث ..
حجيتلة شصار وهو صار يتشكر مني ..
عفناه ورحنة للبيت .. دخلت وامي من شافتني حضنتني وصارت تبجي وتبوس بية ..
بستهة براسهة : يمة لا تخافين اني بخير ودعواتج ما راحت بلاش ..

رفعت ايديهة لفوك : ربي فدوة لاسمك والله لاذبح طلي لوجهك على هالبشارة ..
سلمت عالحجية وعيوني تدور عليهة .. وينهة ليش ماكو ..
ميامين : الحمدالله على سلامتك مؤيد .. خطاك الشر ..
مؤيد : الله يسلمج ما تقصرين... بس جوري وين .. ما اشوفهة ..

امي ردت علية : يمة مرتك من سمعت بيك وهي انغمى عليهة وهسة نايمة .. روح طمن كلبهة يمة ..
كمت بسرعة واني خايف عليهة ..
دخلت للغرفة وردت اكعدهة بس شفت شكلي بالمراية اكيد راح تخترع اذا شافتني كلي دم ..
دخلت للحمام وسبحت عالسريع وبدلت ملابسي ورحت كعدت يمهة ..
اباوع لشكلهة تعبان .. صرت العب بشعرهة وحجيت بهمس : جوري .. جوري ..

عقدت حواجبهة وتحرك راسهة : جوراتي كومي اني اجيت ..
فتحت عيونهة وكمزت بسرعة شافتني ودموعهة نزلت مباشرةً .. حضنتني وتمسكت بية حيل وتشهك : ويينك .. والله خفت عليك .. عبالي صار بيك شي ..
حضنتهة واني احاول اهديهة : اششش .. اهدي ما صار شي ..

جوري وهي تلزم ايدي : شلون ما صار شي وايدك ..
سحبتهة بسرعة : جرح بسيط ويروح لا تخافين ..
جوري : شلون ما اخاف .. والله للحضة تخيلت بعد ما اشوفك وما تحملت ..
طبكت حواجبي وباوعتلهة : وليش هالكد خفتي علية ..
طبكت حواجبهة ومسحت دمعتهة : ها .. شلون ما اخاف .. انت ابن عمي وهم زوجي ..

هزيت راسي : اهااا ..
كامت هي ووكفت : يلة انتة ارتاح هسة وتمدد .. اكيد تعبان ..
فركت راسي : اي والله تعبان .. فرشيلي فراشي بلا امر عليج وخليني اتمدد ..

جوري : نام انت عالجرباية اليوم .. اني انام بالكاع ..
رديت بسرعة : لا شلون تنامين انتي بالكاع ..
جوري : والله هذا الي عندي وراح انام بالكاع وانت تنام عالجرباية اوك ..

هزيت راسي : بأمرج ..
رجعت ضهري وحطيت راسي عالمخدة .. وبس غمضت عيوني غفيت من التعب ..

جوري .. كعدت بالصالة وافكر .. اني حبيت مؤيد ... اي حبيتة .. الي صار اليوم اثبتلي هالشي .. واكبر دليل ان ما صرت افكر بفارس مثل الاول .. وكل تفكيري بمؤيد وهالمرة بطريقة مختلفة وشعور اول مرة احس بي .. معقولة حبي لفارس ما جان حب حقيقي .. حسيت اليوم ان روحي انسلبت مني من سمعت ان مؤيد سوة حادث .. اذا صارلة شي اني اموت وراه .. ماكدر بدونة ..

اكتشفت ان مؤيد خلاني احبة بهالفترة القصيرة وبدون ما احس بهالشي .. واني متأكدة من حبة الي بس ما اكدر اعترفلة بحبي لان كلماتة بعدهة بأذني من ما عجبة تصرفي من اعترفت لفارس بحبي .. ماريد اعيد هالشي مرة ثانية ..

ميامين ... رحت لبيتنة ودخلت لغرفتي شفت غزوان كاعد عالقنفة ومرجع راسة لورى ومغمض بضيقة ..
كعدت بصفة وهو فتح عيونة وباوعلي ..
حطيت ايدي على كتفة : حبيبي شبيك ..
دنك وحط راسة على رجلية .. مديت ايدي والعب بشعرة وايدي الثانية على كتفة ..
حجة بصوت مخنوك : خفت اخسرة مثل ما خسرت فارس .. خفت اصفى بدون اخو ولا سند ..

دنكت وحطيت راسي على كتفة : الله ستر وما صار بي شي .. انشالله الله يحفضكم لبعض ويخلي سند الك دائماً ..
رفعت ايدة وحطيتهة جوة خدي : ويخليك سند الي ..
كعد على حيلة وسحبني لحضنة .. حطيت راسي على صدرة وهو ايدة تلعب بشعري وخدة على راسي .. : الله لا يحرمني من هالكلام هذا وصاحبتة ..

ابتسمت ورفعت راسي وخليت بوسة قوية على خدة ..
هو تنهد وكام : كومي كومي اني نعسان ..
ابتسمتلة : اي حبيبي نام تصبح على خير ..
باوعلي برفعة حاجب : لا والله .. شلون انام بدونج ..
باوعتلة بأبتسامة : انطيني ثواني ابدل ملابسي هذني واجيك ..
كمت وبدلت ملابسي وتمددت يمة .. حاطة راسي على صدرة ..

غزوان : ميامي ..
ميامين : هممم ..
غزوان : احبج ..
ميامين : اني اكثر منك ..
ضربني على راسي بخفة : لا تقارنين اصلا .. اني احبج اكثر ..

رفعت راسي الة : لا والله .. وليش عود ..
غزوان وهو يقربني منة ويحط وجهة بركبتي : هيج من الله عشكتج ...

£££££££££

بعد مرور شهر ..

جوري .. حياتي ما تغيرت .. نفس الشي .. بس صرت اتعلق بمؤيد اكثر بس هو لحد الان حريص من ناحيتي وما يبين حبة الي لان اكيد عبالة اني بعدني احب فارس وراح ارفضة وهو لهسة ملتزم بوعدة ..

جنت كاعدة عالقنفة بالغرفة مثل كل يوم واباوع عالتلفزيون وبيدي طاسة بوشار ..

خل مؤيد للغرفة وذب الجاكيت مالتة ..
اجة وكف وراي ودنك يم راسي واخذ من البوشار الي كدامي ..

حجة يم اذني : تدرين اليوم بشنو فكرت ..
بلعت ريكي من قربة وعطرة الي ملأ انفاسي : شنو ..
مؤيد : بما ان مرت فترة زينة على زواجنة .. كلت يمكن افاتح ابوي بموضوع زواجي .. يعني قابل ابقى هيج ..
انصدمت .. وكفت اللكمة ببلعومي .. رفعت راسي الة وعيوني مغوركة ..

باوعلي وطبك حواجبة : شبيج جوري ..
نزلت راسي بسرعة : ولا شي .. مبروك تتهنى ..
رفع راسي بأصابعة : كلت شبيج .. ليش تضايقتي ..
وخرت ايدة وكمت بعصبية ودموعي نزلت : كتلك ما بية شي .. روح تزوج شعلية اني ..

توجهت للباب اريد اطلع بس حسيت بأيدي حضنت خصري وسحبني الة وضهري ضرب بصدرة ..
همس يم اذني : ليش الدموع ..
ادفع بي اريد اوخر عنة : مؤيد عوفني .. ليش هالكد تحب تعذبني ..

دار الة وشد ايدي اكثر على خصري وهو طابك حواجبة : شوكت عذبتج اني ..
باوعتلة بضعف وحجيت ودموعي تنزل : يعني ما حسيت .. ما فهمت من تصرفاتي اني شكد احبك .. بس انت ولا على بالك .. واني الغبية الي عبالي تحبني بس طلعت تنتضر شوكت يمر الوقت حتى تتزوج ..

انفكت طبكة حواجبة وتحولت عيونة للفرح : اذا انتي ما حجيتي اني شلون راح اعرف ..
باوعتلة بعصبية : شلون احجي وانت كلتلي البنية الي تعترف بحبهة هي وتبادر قبل الولد مستحيل تحترمونهة وراح تعتبرونهة مو متربية لهالسبب ما ردت اعيد هالغلطة مرة ثانية ونفذت كلامك ..

تنهد وهو يباوع لعيوني :وانتي ما نفذتيهة الا علية ..
باوعتلة بعدم فهم : هاا ..
ضحك : هو شنو الها .. واخيرا نطقتيهة .. واخيراً طلعتي هالجوهرة من حلكج ..

حجيت واني ادفع بي : عوفني مو تريد تتزوج ..
مؤيد بأبتسامة : وانتي صدكتي اني اتزوج عليج .. اني لو اكعد عمري كلة انتضرج هم ما امل ..
فهيت بكلامة : كول والله ..
ضحك بصوت : والله .. والله احبج من زماااان وانتي ما تدرين عن حالي ..

حطيت راسي على صدرة وابتسمت واني اسمع دكات گلبة السريعة : اسفة والله ..
ابتسم وهو يبوس شعري: مو مهم الي راح .. المهم هسة انتي وياي وهذا الشي يكفيني ..

الكاتبة : سارة الشمري✍🏻

هلو حبايبي شلونكم 😘 طبعا القصة عن قريب راح تخلص واتمنى عجبتكم 😘 رأيكم بالبارت حبايبي