رواية سجينة،الظلم والانتقام الفصل الرابع 4 - بقلم Renad.m

#سجينة_الظلم_والانتقام 🍂🥀

حجة بعصبية :هالكلب لا تجيبين اسمة كدامي مرة ثانية ... ورب الكعبة احسب الله ما خلقج
رديت علي واحاول اخفي الخوف : الي دا تحجي عنة هذا اخوية شلون اتكولي ما اذكرة
قرب وجهة مني وحجة بفحيح : اخوج مو ... من اليوم وجاي تنسين شي اسمة اخوج وامج واختج شيليهم من راسج
انصدمت من كلامة : شنووو ... هذولة اهلي شلون تريدني انساهم ... تريد تحرمني من اهلي
حسيت اصابعة انغرزت بخصري بكل قوتة صلبت ضهري من الألم
سحبني من شعري وقرب وجهي منة : اهلللج ... وربي وجلالة اذا ما حركت گلب اخوج عليج وحركت كلبج على اخوج واهلج مثل ما حركتو كلبي على اخوي ما يطلع اسمي غزوان الجاسر

#sara_zead

#البارت العاشر

#الكاتبة : سارة الشمري🖤

الرحمة جوهر القانون، ولا يستخدم القانون بقسوة إلا للطغاة
ويليام شكسبير

بالوقت الحالي قاطع سلسلة ذكرياتي هم اسمي بس هالمرة بهدوء : ميامين وين صافنة

بمكان ثاني ... شط العرب ....

غـــــزوان :

غزوان : اسمي غزوان عبدالله الجاسر ... عمري ٣٤ سنة ... ما متزوج وقبل سنة من اليوم جنت شايل فكرة الزواج من بالي
اني جنت دكتور جراحة عظام لكن ما حبيت ابقى على تخصصي درست ودرست لحد ما حصلت الدكتوراه بجراحة القلب والدماغ ....بس هالشي اخذ من عمري عمر تعبت كلش لحد ما حصلت طموحي .... جنت احب اقرة كتب وخاصاً كتب شعراء قدماء ... مو دائماً تجذبني كتب جديدة
صرت احسن طبيب بالبصرة الناس تجيني من محافضات العراق كلها ... واحياناً اني اروح محافضات بس علمود اجري عمليات للأشخاص الي ميكدرون يتحملون طريق البصرة
المستشفى الي اشتغل بيها مستشفى والدي اني واخوي مؤيد نشتغل بيها لان هو هم دكتور اطفال
والي يدير المستشفى شخص جداً نحبة ونعتبرة المعلم مالتنة يكون صديق الوالد اسمة ابو حمزة ... ابنة حمزة اقرب صديق الي ....

اني قبل سنة من اليوم جنت غير انسان ... شخصيتي جانت هادئة واكو اوقات للعصبية ... ابتسامتي جانت شبه دائمة ... لان اعتبر وحدة من اهم علاجات المرضى هو الابتسامة وبث الطمأنينة بكلوبهم ...

اني مراح احجيلكم من قبل سنة ... لا راح احجي من قبل سنة وست شهور

جنت رايح للكوت عندي عملية بأحد المستشفيات بالكوت
خلصت العملية عالساعة ١١ الصبح ... طلعت من المستشفى وكعادتي اذا بقى عندي وقت اروح لمكتبات المحافضة الي اروحلها واشوف اذا اكو كتب جديدة ...

بقيت افتر بين الرفوف واتصفح بعض الكتب

الى ان سمعت صوت وراي : شههد كافي ... بس هدووء احنة بمكتبة يعني ننطرد اذا طلعنة صوت

شهد بملل : اففف اني حروح انتضرج يم حسان

ردت عليها بتملل : افففف روحي بس خلصيني

راحت البنية الزغيرة وهي رفعت راسهة وصارت تتأمل بالكتب
تمنيت ما رفعت راسهة ... ما جانت احلا بنت شفتها بحياتي بالعكس اكو هواي احلا منهة بس ماكو وحدة جذبتني براءت شكلها
جانت لابسة ملابس المدرسة ولافة حجابهة الاسود الي بارز بياضهة بعد اكثر
وجهة خالي من اي مكياج
صفنت عليها على كلشي بيها ... خربطت عقلي
تباوع عالكتب وعاقدة حاجبهة بخفة وحاطة اصبعها بحلكها بتركيز ... شالت كتاب بين ايديهة وفتحتة وصارت تتأمل صفحاتة

واني اتأمل بوجهة جمالهة شرقي .... عيونهة كبار وسود ورموشهة كثيفات عبالك مكحلات عيونهة ... شفايفهة وخدودها حمارهن طبيعي ... كلشي بصفحة وحفرة الحنج بصفحة

النتبهت لجسمهة طويلة ومو ضعيفة لا مليانة شوي الصدرية شوية بيها ضيق عليها

قاطعني تأملي بيها رسالة وصلت لتليفونها
فتحتها وصارت تضحك
ضحكتها عالم ثااااني .... شالت الكتاب الي بيدهة حطتة على وجهة وصارت تضحك

لا ارادياً طلعت تليفوني واخذتلها صورة

وكفت ضحك على صوت اختها : اموني يلة امشي حسان ايكول خلص الوقت
ميامين بضوجة : افففف بعدني ملكيت ولا رواية حلوة
رجعت الكتاب الي جان بيدها واخذت اختها وطلعت
مشيت وراها اباوع عليها من كزاز المكتبة طلعت للسيارة وصعدت ومباشرة حركت السيارة

مشت واني بعدة وجهة ما يروح من بالي
رجعت للكتاب الي جانت لازمتة بيدها اخذتة ودفعت حسابة وطلعت
كعدت بالسيارة استوعب الي شفتة ... شكلها ما جاي يروح من بالي ... ضحكتها ... لمت شفايفها وهي تتأفف من اختها
طلعت صورتها الي بتليفوني صرت اتأمل بيها واني عقلي مو عندي
اخذت عقلي مني وكلبي هم ... غزوان الي ما جذبتة ولا بنية وولا عجبتة بنية هسة طفلة عمرهة مبين ما يتجاوز ال ١٧ سنة دودهت تفكيرة ... شكد سافرت دول غربية وعربية
... ماكو وحدة تشبهة ... ما شفت ضحكتها وبرائة نضراتهة ب ولا وحدة من قبل
خلصت شغلي بالكوت ورجعت للبصرة بس عفت كلبي بالكوت
كثرت روحاتي للكوت وخاصاً للمكتبة نفسها
حتى فارس صار يستغرب لان مرات من يروح للكوت اعرض علي ان اني اوصلة بدل ما يسوق هو بحجة ان عندي عملية بالكوت

بس ولا مرة شفتهة بهالمرات ... بكل مرة اروح وما اشوفها ازداد تعلق بهالمدينة واكول المرة الجاية اشوفها
الى ان مرة بأحد روحاتي للكوت قبل سنة وشهرين جنت كاعد بمطعم وحدي ... اتأمل بالناس وصورتها كدامي بالتليفون

شفتها تمشي وبيدها علاكة مبينة مال تسوق ملابس
كعدت على وحدة من الكراسي واني لهسة ما مصدك ... هي كدامي مرة ثانية
لازم ما افوت هالفرصة من ايدي متأكد ما راح تجي مرة ثانية
كمت متوجه الها وهي مشغولة بتليفونها

وكفت خطواتي من شفت شخص وكف كدامهة ومنطيني ضهرة
ميامين : وينك انت ... ليش تأخرت ...متت من الحر واني انتضرك
الشاب : اسف اموني .... الطريق زحمة ... يلة تعويضا عن تعبج بالحر راح اشتريلج ايسكريم

اتسعت ابتسامتهة : اذا هيج اوك يلة
اخذ العلاكة من ايدها وهي شبكت ايديها بأيدة ومشت وياه وهي تضحك

بذيج اللحضة ما اعرف شنو الي صارلي ....
فقدت الامل ... بنفس الساعة ركبت سيارتي ولزمت خط البصرة وبعد ما رحت ابداً للكوت

بقيت شهرين ... كثفت الشغل بالمستشفى وصرت اخذ مناوبات زيادة حتى لا انام وتجي ابالي
سافرت بشغل واني هناك اجاني الخبر الي نساني كلشي ... فارس اخوك انقتل وابوك اجتة نوبة قلبية وهو بالمستشفى
حاولت احجز بس جان لازم انتضر يومين يلة
بقيت بهاليومين تليفونات ما سكتت منعتهم يسوون كعدة لحد ما اجي
اتصلت بحمزة وعرفت كل الاخبار والادلة وان صديقة رائد الي قتلة
رائـــــد ... زاد حقدي من عرفت ان رائد الي قتلة

فارس جنت من اسألة منو اكثر اخوانك تحبة اني لو مؤيد ايكلي رائد
فارس الي جان يفضل رائد بكلشي علينة
فارس الي عاف دراسة الطب مع ان معدلة جان يسمحلة يدخل طب بس هو عافهة ودخل هندسة علمود رائد
فارس الي جان يجي يطلب مني فلوس حتى يفتح مشروع ويشترك بي هو ورائد حتى يكون شي يربط صداقتهم ويتذكرونة احفادهم بالمستقبل مثل ماكال فارس
بقيت بهاليومين ما انام الليل حتى ما بجيت
حقدي على رائد جان اقوى من حزني على اخوي

شلون احرك كلبك يا رائد شلون

اتصلت على واحد من اصدقائي وطلبت منة يعرفلي كل المعلومات الي تخص رائد

ورة كم ساعة خابرني واطاني المعلومات
ومن ضمنها عندة وحدة من اخواتة يموت عليها ومدللهة كلش ... بس ما اهتميت لهالشي جان همي اكتلة وبس
وصلت وصارت الكعدة بالكوت اول امرة ادخللها من بعد الصار وياي بالمطعم

فكرت ما راح ارتاح اذا مات لازم يشوف العذاب بعينة ... طلبت اختة فصلية واكيد راح ينطوني هاي اختة لان بس هي ما متزوجة و عندة اخت بعدهة زغيرة
اخذتها ورة الثالث مال فارس
شخصين جانو معارضين على موضوع الفصلية
الاولى خاتون الي جانت رافضة الفكرة بشكل قطعي
والثانية خاتون الجبيرة .... الحجية خاتون حبوبتي ام ابوي حاولت تقنعني ما اخذ فصلية ... وجانت كلمتها ( بس تدولبها تطلع حوبتها بيك لا مالها غرض هي بموتت اخوك )
بس اني جان حقدي اقوى من اي شي وماكدرو يمنعوني من هالشي
جبتها من الكوت ...
بالطريق هي نايمة التفتت عليها مغطية نص وجهة بالعباية ومغمضة ما اهتميت الها
درت وجهي واباوع على شوارع الكوت وصفت مر طيفها ابالي

حمزة : ما نسيت يخوي
غزوان : جا كلبي بكيفي وانسى
حمزة : انت ما شفتهة بس مرتين وهيج صار بيك
غزوان : ما سامع بحب من اول نضرة
حمزة : لا والله شلك بيها عوفها تولي هي بعد كلبها مو خالي مو انت هيج كلت
غزوان : اييه ... شعليك انت مرتاح كلبك تزوجت التحبها من انت زغير ... اشفت من عذاب الحب بعد
وصلنا للبصرة طلعت خاتون معصبة وكالت : سويت الي براسك وجبت وحدة مالهة ذنب بشي

غزوان : خاتونة لا تتدخلين بقراراتي ... روحي نزليها اريد اروح اتطمن على ابوي واشوف وضعة

نزلتها من السيارة واني كاره حتى اشوف وجهة

رحت للمستشفى شوية ورجعت تمددت بالصالة

سمعت وحدة نزلت من الدرج ما انتبهتلي لان اني مدد عالقنفة والقنفة ضهرهة صاير بجهة الدرج

استغربت هاي اكيد هي
شنو هالجرأة من اول يوم تفتر بالبيت
رفعت راسي وشفتها

انـــــــصــــدمـــــت

الكاتبة : سارة الشمري 🖤
#سجينة_الظلم_والانتقام 🍂🥀

حجة بعصبية :هالكلب لا تجيبين اسمة كدامي مرة ثانية ... ورب الكعبة احسب الله ما خلقج
رديت علي واحاول اخفي الخوف : الي دا تحجي عنة هذا اخوية شلون اتكولي ما اذكرة
قرب وجهة مني وحجة بفحيح : اخوج مو ... من اليوم وجاي تنسين شي اسمة اخوج وامج واختج شيليهم من راسج
انصدمت من كلامة : شنووو ... هذولة اهلي شلون تريدني انساهم ... تريد تحرمني من اهلي
حسيت اصابعة انغرزت بخصري بكل قوتة صلبت ضهري من الألم
سحبني من شعري وقرب وجهي منة : اهلللج ... وربي وجلالة اذا ما حركت گلب اخوج عليج وحركت كلبج على اخوج واهلج مثل ما حركتو كلبي على اخوي ما يطلع اسمي غزوان الجاسر

#sara_zead

#البارت الحادي عشر

#الكاتبة : سارة الشمري🖤

قد تغفر لك المرأة القسوة والظلم، لكنها لا تغفر لك عدم الاهتمام بها.
وليم شكسبير

سمعت وحدة نزلت من الدرج ما انتبهتلي لان اني مدد عالقنفة والقنفة ضهرهة صاير بجهة الدرج

استغربت هاي اكيد هي
شنو هالجرأة من اول يوم تفتر بالبيت
رفعت راسي وشفتها

انـــــــصــــدمـــــت

هاي ... شجابهة هنا
نفسي صار يصعد وينزل ... بثواني رجعت الاحداث تمر ابالي
الكوت ... المكتبة ... المطعم ... وووو الي ضربتة اباب بيتهم ... اكيد هو نفسة الي جانت وياه بالمطعم ... يعني الي احبها تكون اخت اكبر عدو الي ... الي جبت اختة حتى احرك كلبة بيها ...
لا لا لا غزوان اصحى على نفسك ... هي ما تحبك هي كدام عينك راحت لواحد ولزمت ايدة ...

اتذكرت الموقف واني عيوني شعت غضب بمجرد التفكير ان هي هسة مرتي وبالسابق جانت على علاقة وية شخص ثاني ... واخوها الغدر بأخوي وكتلة ...
تحولت عيوني للغضب وكمت وراهة

وكفت اباب المطبخ وهي منطيتني ضهرهة ما تشوفني ... اول مرة اشوف شعرها اسود
حاطة الشال على ركبتهة ولافة شعرهة وبعض الخصل الي نازلة منة على ركبتهة

فتحت الثلاجة وطلعت زيتون واكلت وحدة

تقربت منها وهي وكفت بمكانهة
قربتهة وحضنتهة من ورة خشمي صار قريب على ركبتهة ،.... اخذت نفس وغمضت عيوني

بس بسرعة تداركت الوضع وصرت اهدد بيها وهي جانت بين الخايفة وبين العنيدة الي ما تقبل على اخوهة
ضربتهة ودفعتهة وطلعت
كعدت بالسيارة اريد استوعب الصار
يعني ... ميامين اخت رائد نفسها اموني

لازم تنسى حبك غزوان ... هي مثلها مثل اخوها ... لازم تنتقم لاخوك ... مو بنت ما شفتهة بس مرتين راح تنسيك اخوك ... انت تكدر تنساهة بأكثر من طريقة

فكرت وحطيت ابالي ان اذا عاقبتهة وضربتهة راح اصير اكرهة وبنفس الوقت اكون انتقمت لاخوي ... وانتقمت لحبي الي راح للشخص الغلط

رجعت للبيت حاولت ادور اي حجة بس حتى اضربهة
سوتلي عشى ماكدرت اكول علي مو زين
اخر شي رادت تمشي كمت وضربتهة

علاقتهة بخاتون عصبتني ... ما اريد خاتون تتقرب منها هواي لان اخاف تنخدع ببراءتهة مثل ما اني انخدعت

بقيت بيومها ما كدرت انام بس افكر
اخذت عهد على نفسي ما راح افكر غير بأنتقام اخوي فارس ...
رحت ثاني يوم الصبح اني وحمزة ومؤيد طلعنا ابوي من المستشفى
الكعدة كلها والحجية خاتون تخزر بية

رحت كعدت بصفهة واني اعرف شبيهة
بس كعدت يمهة كالت : سويتهة يبن ابوك ... ما خفت من ربك
ابوي التفت عليها بأستغراب : شسوة يمة
الحجية : جا ما تدري بأبنك جايب اخت الكاتل فصلية
ابوي بعصبية : شلووون تسوي هيج بدون ما تكلي

رديت علي : حجي هو هذا الصح ... وخل يحمدون ربهم ما كتلتة وريحت كلبي

ابو غزوان : انت ما خفت من ربك ... شذنبها هاي البنية
غزوان بعصبية : ذنبها اختة وعزيزة كلبة ... واذا ما لوعت كلبة وحركتة عليها ما اطلع غزوان

كمت من يمهم ورحت للبيت واني عصبي شفت خاتون كاعدة يمهة
حاولت ابين هادئ
طلعت خاتون ما صدكت اني جريتهة من شعرهة لغرفتي وطلعت الحزام وضربتهة
ردت اوكف واني اسمع ترجياتهة ان ارحمها بس غمضت عيوني واني اتذكر فارس
زدت بضرباتي عليهة
اخر شي فحطت وكمت الهث طردتها من الغرفة
سديت الباب وكعدت بالكاع وصوتهة ودموعها لهسة بأذني
حجيت بفحيح : انســى غزوان مو هذا التريدة ... اي هذا تخليهة تكرهك وانت تكرهة وتاخذ انتقام اخوك لا تضعف
طلعت من غرفتي حسيت اختنكت

نزلت للحديقة شوية وبعدين رجعت للمطبخ اجاني اتصال وكعدت اخابر
ورة شوية هي دخلت اشرتلهة تسويلي جاي
حاولت اغيضها واخليها تغلط حتى اكوم اضربهة
بس ايدهة احتركت بالقوري كلت هايهية هذا كافي
طلعت من البيت التقيت بحمزة حجيتلة كلشي

طبعا الشخصين الوحيدين الي يعرفون بموضوع بنت الكوت الي جنت احبها همة حمزة والحجية خاتون
الحجية ما اكدر اضم عليها شي لان هي تعرفني قبل لا احجي وذكية تلكطها عالطايرة

طلعت ورحت لحمزة حجيتلة وانصدم ان نفسها ميامين
حاول بية ان انسى انتقامي واعيش وية الاحبها
بس رفضت ... وانتقامي لاخوي ... ما اعوفة لو اخر يوم بعمري
وطلع تفكيرة مثل تفكيري كال اكيد هذا زياد نفسة الي جان وياهة بالمطعم ... لان ما سمعتة من كال احبها وميامين الي
حسيت بقهر وغيض وعصبية

رجعت للبيت وشفت مها وخاتون يمها
ومها تتعارك وياهة

خليتهن يطلعن وردت منها بس تحجي حرف حتى اطلع حركة كلبي بيها
وكالت جملة جانت كافية تخليني انقض عليها
( اخوي اشرف منك ومن عشيرتك كلها )
طشرت المزهرية بالكاع شلت قطعة منها
قربت منها وهي ترافس بين ايدية
قيدتها
باوعت بعيونها ... اوووف يالدولبني
نزلت عيني لركبتها شفت نساوة لو نهة خفيف بركبتها
بلعت ريكي وتمالكت نفسي
اجة ابالي حبيبها ... مجرد ما تخيلت ان شاف النساوة لو  لمسهة الي جانت جوة ركبتهة على عضمة صدرهة
حسيت بغيض وشلت الكزازة وحددت النساوة وما اهتميت لدموعها لو لترجياتهة
خلصت وشمرت الكزازة بالكاع وطلعت
كعدت بالسيارة واني اتنفس بسرعة

غمضت عيوني وبين صراع كلبي وعقلي
اردد واحجي : تستاهل خليها تتألم همة الكتلو اخوك
بس كلبي يكول غير : بس هي مالهة ذنب

ضربت راسي بأيدي : لا دير بالك غزوان ... لا تمشي ورة كلبك
نزلت ايدي وشفت دمها موجود على ايدي

نسيت كلشي ونزلت من السيارة
صعدت للمكتب طلعت من صيدليتي شاش ومعقم ولاصق
نزلت لكيتهة واكفة يم المغسلة تريد تحط عليها مي
سحبتها وحطيت عليها القطن
وهي بقت تصيح وتجادل
وكفني سؤالهة : لعد ليش جاي تداويني
نزلت عيني عنها والتهيت بالجرح : هالشي راجعلي ولا تتدخلين بي

اجتها خاتون اني طلعت من يمهة

رجعت باليل الساعة ١٢ توقعت الكاها نايمة بغرفتهة
دخلت للصالة شفتهة نايمة عالقنفة حاطة ايديهة جوة راسهة ولامة رجليهة مبينة بردانة
قربت منها وصفنت بشكلها
حواجبهة مرسومة رسم وشفايفهة مورمة من النوم
كذلتهة جانت طايحة على وجهة
سحبت خصلة من شعرهة وقربتهة لخشمي
جريت نفس بأقوى ما عندي

انتبهت على نفسي ... فزيت بسرعة
مسحت وجهي بأيدي

كعدتهة بأزعاج كامت نضفت
اطيتها التعاليم والاوامر بتنضيف البيت
ردت اي شي اعاقبهة بي

ثاني يوم الصبح كعدت طشرت من ملابسي بالكاع
وهوست الغرفة شوية
اللحاف خربطتة شمرتة بالكاع .. مع ان اني اكره الهوسة وما اكعد بمكان بي هوسة
بدلت ملابسي وطلعت ومثل كل يوم لازم امر عالحجية خاتون واشرب الجاي يمهة
ردت اطلع تفقدت تليفوني  ماكو

بقى بالبيت ... وهسة هي تشوفة ... وتليفوني ما بي رمز ... يعني ممكن تشوف الصورة
لا لا مستحيل اخليها تشوفهة
عقل ما ضل براسي رحت اركض للبيت
ومثل ما توقعت شفتهة لازمة التليفون بيدها وتريد تتصل
الحمدالله ... ما شافت الصورة
اخذت التليفون وطلعت
رجعت وقت الغدا لكيت البيت نضيف وريحتة حلوة ... ضجت مو هذا الي اريدة اني لا
جابت الغدا وتغديت والاكل جان طيب ماكدرت اطلع بي حجة
جابتلي الجاي وجان حار بس تحججت ان بارد
قاومت وذبيت منة على ايدي
كمت وضربتهة بالحزام لحد ما صارت تبجي
طلعت من البيت رحت لبيتنا لان جان اليوم السابع مالت فارس

كعدنة وية الناس شوية وبعدين رجعت دخلت لحديقة بيتي
شفتها واكفة على طرف البلكونة وقريبة من الحافة
وما منتبهة لنفسهة لان صافنة حتى ما انتبهتلي من دخلت بسيارتي

صعدت اركض وحسيت الدرج صار شطولة خفت لا توكع
وصلت للبلكونة وصحت عليها : مــــيــامـــيــن
التفتتلي بخوف لان كمزت
شفتها انتبهت على نفسهة وين واكفة رجعت لورى بسرعة
لزمتهة من زندها حيل : انتي تخبلتي ... شمطلعج بالبلكونة ... ليش واكفة بالحافة
ميامين ردت بعيون خايفة : ما سويت شي والله ... خاتون اقترحت ان نطلع نشم هوى
ما ردتهة تشوف خوفي عليها : تشمين هوى لو تعرضين بنفسج للعالم .. ما تشوفين العالم كلهة تطب وتطلع من بيت اهلنا
ميامين : اسفة والله ما انتبهت
دخلتهة للهول وشمرتها بالكاع وقفلت باب البلكونة

رفستهة على بطنهة وهي صرخت ... سحبت شعرهة وكتلهة : مرة ثانية تصرفي من كيفج وشوفي شيصيرلج

طلعت من يمهة

مرن اسبوعين واني على هالحالة وياهة
رجعت لشغلي بالمستشفى كل يوم اداوم بس ما اخذ مناوبات
اخفي الي بكلبي بالضرب والتعذيب والاهانة
انتبهت ان صارت تتحمل ضرباتي وما ترادد مثل قبل
نضراتهة صارت تتغير مو نفس نضرات الكره

وبيوم جنت بالمستشفى ووصلتني رسالة

( غزوان ردت انطيك الخبر الي اكيد راح يفرحك ... قاتل اخوك فارس وصلني خبر عنة ... هو متصوب بالسجن بسجينة واحد من السجناء الي وياه ضاربة ... وهسة حالتة مينعرف اذا خطيرة لو لا ... يعني ممكن يموت وهذا الي تريدة انتة ... انتضر منك تنطيني الحلوان على هالخبر )

الكاتبة : سارة الشمري🖤

#سجينة_الظلم_والانتقام 🍂🥀

حجة بعصبية :هالكلب لا تجيبين اسمة كدامي مرة ثانية ... ورب الكعبة احسب الله ما خلقج
رديت علي واحاول اخفي الخوف : الي دا تحجي عنة هذا اخوية شلون اتكولي ما اذكرة
قرب وجهة مني وحجة بفحيح : اخوج مو ... من اليوم وجاي تنسين شي اسمة اخوج وامج واختج شيليهم من راسج
انصدمت من كلامة : شنووو ... هذولة اهلي شلون تريدني انساهم ... تريد تحرمني من اهلي
حسيت اصابعة انغرزت بخصري بكل قوتة صلبت ضهري من الألم
سحبني من شعري وقرب وجهي منة : اهلللج ... وربي وجلالة اذا ما حركت گلب اخوج عليج وحركت كلبج على اخوج واهلج مثل ما حركتو كلبي على اخوي ما يطلع اسمي غزوان الجاسر

#sara_zead

#البارت الثاني عشر

#الكاتبة : سارة الشمري 🖤

..جمال السماء فى نجومها وجمال المرأة فى شعرها..

رائد //

رائد : اسمي رائد عمري ٣٠ سنة ... متخرج من هندسة الكهرباء بالبصرة ... قضيت نص عمري بالبصرة
اني وصديق عمري فارس
من نجحت للأول متوسط انقلت لبيت عمي جانو عايشين بالبصرة ورحت ادرس يمهم

من اول سنة تعرفت على فارس ... صرنة اصدقاء كلش مع ان هو جان كلش شاطر ومبين من لبسة غني وعندة خير بس ولا مرة تفاخر بهالشي بالعكس جان يساعد اغلب الطلاب الي جانت حالتهم المادية مو زينة

تطورت المراحل الدراسية واحنة علاقتنة صارت تقوى اكثر ... جان يجيني لبيت عمي ... بس اني ولا مرة رحتلة لبيتهم جنت ارفض لان ما احب اروح بيوت ما اعرفهة
بس من كبرت صرت اروحلة لشقة نكعد بيها اني وياه وكم شخص من اصدقائنة تصير جمعة شباب نتونس بيها بس ماكو ممنوعات حتى تدخين جان يرفض يشوف احد يدخن
لحد ما دخلنة جامعة هو جان معدلة يسمحلة ان يدخل طب لان جان شاطر كلش

بس هو رفض حتى نبقى سوة ودرس هندسة وياي
توفى والدي وهو جان اكثر شخص واكف وياي
زادت المسؤليات علية وصرت اعتبر نفسي ابوهم

دورت على شغل ماكو

اقترح علية فارس ان نفتح مشروع بسيط ونشترك بي اني وياه

وكال اني ادفع الفلوس ... بس رفضت بس بعدين قنعني ان ارجعلهيا من تتيسر الامور ويتطور الشغل

وافقت لان ما عندي غير هالحل

فتحنا محل واشترينا اجهزة كهربائية من كافة انواعها وصار مجمع
نجح المشروع والحمدالله الامور تيسرت صرت اني الي ادير المشروع
وفارس يجي من البصرة بين فترة وفترة
هم يتطمن عالشغل ويجي يبات يمي

من بعد الحادثة الصارت

( ما راح احجيلكم شصار ... راح تعرفون بعدين )

فقدت فارس .... حسيت فقدت ابوي للمرة الثانية
اسودت الدنيا بعيني ... للمرك الثانية افقد سندي
فارس صارلي اخ واب وصديق ... يستشيرني بكلشي واني نفس الشي ... حسيت قطعة من كلبي راحت
محد راح يحس بشعوري غير الي جربة ويفقد اقرب شخص الة والي وكف بجانبة طول عمرة

صارلي ٣ اسابيع بالسجن

الليل ما اكدر انامة ... فارس ما جاي ايروح من بالي ... كل ما اتذكر الصار اكعد ابجي واكول بكلبي اني السبب ...
ومن جهة ثانية اهلي ... منو يكدر يصرف عليهم ... حسان ما عندة شغل ويدرس ... واني مقيد هنا

اجاني حسان ٣ مرات وامي اجتني مرتين لان كل ما تجي تشبع بجي وتروح واني منعت حسان ان يكثر جياتهة هنا
كل ما اسأل عن ميامين ايكولون ما تكدر تجي لان سادس وبكلوريا
واني اعذرها وهم ما اريدها تدخل لهالمكان وهي بعدهة زغيرة

لحد ما مرة جنت كاعد بالسجن ودخل الشرطي صاح بأسمي وكال عندك زيارة
استغربت لان حسان البارحة جان يمي منو الي جاي
طلعت وية الشرطي فتحلي الباب وشفتة

رائد : زياد
سلم علية ووجهة ما يطمن بخير
رائد : خير زياد شبيك ... صاير شي
زياد بقهر : شيصير بعد اكثر من هيج
رائد : زياد لا تشيل همي اني اكدر ادبر نفسي هنا
زياد بعصبية : وميامين شلون راح تدبر نفسها
رائد : ميامين شعليها بالموضوع
زياد : شلون شعليها ... وهي راحت فصلية لاخو فارس بسببك

حسيت احد ذب علية مي حار طفرت علي من ورة القضبان واني اضرب عالحديد : شلووون ... انت شتحجي زياد ... هالشي مستحيل يصير
زياد : لا مو مستحيل ... اخذوهة صارلهم ٣ اسابيع
وانت ما تدري ... كل هالشي بسببك ... انت الي خليتها تنهان لهالدرجة
صرت اصيح بعلو صوتي واضرب عالحدايد
سمعوني الشرطة ورجعوني للسجن واني مستمر بالصياح
اختي اموني ... روحي هاي ... شلون تروح فصلية ... بعدها زغيرة على هالعيشة
اختي تتعذب من وراي بسببي كلشي صار وياها
بقيت اصيح بعلو صوتي واضرب عالباب : طلعووووني ... اختي وحدهة هناك .. بعدهة زغيرة والله
واحد من السجناء كاعد ياكل وصاح : كاافي دوختنا ... خلينا نعرف ناكل لكمة

رحت يمة وكلبت الطاولة بالكاع هو كام وجرني من ياختي
ضربتة بوكس على وجهة
التمو علية اكثر من واحد يضربون بية
لحد ما حسيت بسجينة اخترقت خاصرتي
غوشت عيوني وصورتين صارت تمر كبال عيني

ميامين اختي و الصورة الثانية ابتسمت واني اشوفها

وبعدين سودت عيوني ما حسيت بشي

فتحت عيوني شفت امي كدامي وحسان

حجيت كلمة وحدة : ميامين
امي صارت تبجي بالزايد تأكدت ان ما جنت احلم

ضغطت على نفسي ووكفت ضهري : ااااه

اجة حسان ساعدني : لا تتحرك جرحك بعدة ما ملتأم
التفتت علي بعصبية : شلون كدرت تنطيها هيج
حسان نزل راسة وما حجة
رائد : خجلان مو ... مستحي من نفسك ... ولك لو تشوفني انذبح كدامك ما تسوي هالشي

حسان : رائد والله ما كدرنة نمنعهة

جاوبتة بعصبية اكبر : شنووو ما كدرت تمنعها ... بكيفها هي شنو ... زعطوطة هاي ماكدرتولهة

حسان : انت تدري ميامين شكد عنيدة .... ومستعدة تسوي اي شي حتى لا يصير بيك شي
صرخت بي بقوة : يطبني مرض خلي اموت بس ما اشوفها هيج تروح برخص
حطيت ايدي على الجرح بألم : رجال شكبرك ما كدرت تسيطر على بنية زغيرة
دخل الشرطي : خلص وقت الزيارة ... تفضلو برة

طلعوا من الغرفة واني بقيت معصب ومقهور
قهر الدنيا كلة بكلبي
اختي ... اعتبرها بنتي ... اخاف عليها من الهوى
تالي تروح للعذاب برجليها من وراي واني ما ادري

طاحت دمعة من عيني : اموني ... شنو حالج هسة
شصاير بيج يروح اخوج ... راح تكدرين تسامحيني لو لا

غمضت عيوني

قاطعني دخول واحد من الحرس
مدلي التليفون : تليفون الك
اخذتة منة بأستغراب : من منو
دار وجه وطلع
بعدة بيدي التليفون وصار يهتز
باوعت شفتة رقم غريب

فتحت خط : الو

ماكو رد
استغربت : الووو منو وياي
المشكلة اسمع صوت يم التليفون بس محد يجاوب
رائد : الووو تسمعوني

ماكو رد
رائد بعصبية : ليش محد يرد

سديت التليفون وصحت عالحارس وكتلة : منو هذا

الحارس : مو لازم تعرف
رائد : شلون مو لازم .. احجي ومحد يرد علية
الحارس : هالشي راجعلة
اخذ التليفون وطلع

بقيت يومين بالمستشفى وبعدين رجعت للسجن
لكيتهم ماخذين الي ضربني والي وياه وحاطينهم بغير سجن
تحمدولي بالسلامة البقية
اجة واحد منهم تعرفت علي من اجيت ... تهمتة ان قاتل واحد متحرش بأختة ..

سولفت وياه شوية جابولي اكل ... اكلت بالكوة
نفسي مسدودة تمددت عالفراش
مديت ايدي جوة المخدة
لامست اصابعي شي جوة المخدة ... ابتسمت
عرفت عالشي
طلعتها واني اتأمل بيها
اسوارة فضية مقطوعة ... صايرة مثل السلسلة
مشيت اصابعي عالاحرف الموجودة على السلسلة
ابتسمت واني اتذكرها

شلون مزعوجة من السوار لان كلساع يشكل بالردان مالت القميص
اراقبهة من بعيد
شايلة بيدها غراض وتمشي
لابسة شال وردي فاتح وتنورة طويلة وقميص قصير وردانة اطرافة مشبك وكلساع يشكل بالسوار

شكلها ... بشرتهة حنطية وعيونهة كبار وسود
جسمها مليان ومحليها هالشي ... عدها خدود وصايرات بعد احلا وية حرارة الشمس
شفتها وكفت وحطت الغراض بالكاع
العصبية مبينة عليهة لان الجو جان حار

كعدت تدردم بس ما اسمع حجيها لان واكف بعيد
عنها
مبينة معصبة وتحاول تفك السوار من القميص
اخر شي انقطع بيدها
باوعت علي شوية ... بعدين شمرتة بالكاع بعصبية وشالت اغراضها وراحت

خليتها ابتعدت ورحت شلت السوار
مكتوب علي حرف اسمها ... ومن يومها هالسوار ما فارقني .. حتى مرة ميامين اختي شافتة عندي ... وكالت هذا السوار بناتي وهذا حرف منو ... بالكوة لزكتهة منا ومنا وكتلهة هاي لصديقي جايبة لزوجتة ونساهة يمي ... بس عبرت عليها
رجعت للواقع عقدت حواجبي
شيلها من بالك رائد ... هسة انت مو بحالهة ... ولا هي بحالك

رجعت بذاكرتي لقبل موت فارس بيوم
جنة كاعدين بالسيارة

فارس : رائد اريد احجي وياك بموضوع ... اتمنى تفهمني وما يروح بالك بعيد
رائد : احجي وعوف هالمقدمات ... ما بيناتنة هيج حجي
فارس : ... اني قررت اتزوج
رائد بسرعة التفت على فارس : شنووو... صدك تحجي
فارس : اي والله ... شبيك مصدوم
رائد بفرح : ... واخييييراً
فارس بضحكة : شنو تريد تخلص مني
رائد : لا بس اريد اشوفك عريس
فارس : والله حسستني انت امي بكلامك هذا
رائد : اني اخلف بغل هالكبرة ليش تسودنت .... فارس : رائد ليش تخليني اوكف السيارة وانزلك بالشارع وعاد شوفلك احد ينقهر عليك ويوصلك رائد بضحك : ايا مجرم هاي بعدك ما تزوجت وهيج كمت تعاملني
فارس : هسة شلون ما تخليني اكمل كلامي
رائد : احجي شبيك صرت عصبي ..
فارس : احـم ... أ أ بس لا تفهمني غلط ويروح بالك بعيد ترة ماكو شي والله

رائد انتبه ان صار جدي : احجي فارس شبيك
فارس : رائد اني اريد اخطب من يمكم
رائد بأستغراب : من يمنة ... بس اني اخواتي متزوجات والباقيات بعدهن زغار
فارس : لا هي مو من خواتك
رائد : لعد منين
فارس : هي بنت عمك ابو زياد
رائد : ورود قصدك
فارس : اي ورود ... رائد لا تفهمني غلط والله ما شفتهة غير كم مرة وعجبتني اخلاقهة
رائد بأبتسامة : لا تعتذر فارس ... اني اعرفك زين شنو قابل تعلمني بيك اعرف اخلاقك زين ... واحنة وين نلكى احسن منك ... اني راح اتصرف بالموضوع واحلها
فارس بفرحة : صدك ... يعني انت راح تحجي وية ابوها ... حتى اذا وافق اجيب اهلي ونخطب رسمي
رائد فرحت من شفتة هيج فرحان : تدلل .. لعد اذا ما وكفتلك هسة شوكت اوكفلك
فارس بأرتياح : لعد اطلب اليوم اي مطعم تريدة معزوم على حسابي

رائد بضحك : شوف الكرم هذا كلة علمود العرس
فارس : يخوي صرت شايب جا بعد يمتة اتزوج
رائد : فارس اذا طلبت منك شي توافق
فارس : عيوني الك تآمر

رائد : فارس اني اريد احجي وياك بنفس الموضوع
فارس : موضوع الخطوبة قصدك

رائد : اي موضوع الخطوبة .... ما راح اطولها عليك
اني اطلب منك ايد خـــــاتـــون اختك

فارس بفرحة : انطيك واني مغمض عيوني ... محد يستاهلهة غيرك

رجعت للواقع من هالذكرى وبيدي السوار
ومكتوب علي حرف k ومن الجوانب نازلة منة نجوم زغيرة متعلكة بي

هالسوار صارلة ٥ سنوات عندي
٥ سنوات واني محتفظ بهالحب بس لنفسي
ما حاولت ابوح بي لاحد ... حتى لاقرب صديق الي ما كتلة لان خفت يعتبرهة خيانة مني ان باوعت على عرضة ... بس والله من اول ما حبيتها واني تمنيتهة حلالي
ومن عرفت ابن عمها خاطبهة ... نار وشبت بية
وابن عمها اني اعرفة زين وعندة سوالف بنات
ويومية وية وحدة ... ما حجيت لفارس كلت يبقى ابن عمة واكيد ما يرضى من احجي علي

ومرة لحكتها للكلية ومن صعدت بالسيارة تريد ترجع لبيتهم دزيت واحد للسايق مالتهم حتى يلهي ويخلي ينزل من السيارة بحجة ان يساعدة بشي بسيارتة عطلان
وكفت يم بابهة وهي جانت منزلة الجامة عالنص
وكفت ورة الباب بحيث ما تشوفني بس تسمع صوتي : ممكن احجي وياج كلمتين
هي فزت : منووو
رائد : اعتبريني فاعل خير
خاتون بعصبية : شتريد مني ... وخر منا ترة الم العالم عليك
حجيت بعصبية : شسويتلج هسة اني ... بس اريد احجي وياج بموضوع يخصج
خاتون : يخصني .... شنو الموضوع بسرعة
رائد : من الاخير ... ارفضي ابن عمج الي خاطبج
خاتون : عفففووواً ... بصفتك شنو تأمرني ارفض ابن عمي
رائد : كتلج فاعل خير ... ابن عمج هذا يومية وية وحدة ... واكدر اجيبلج ادلة ... وحتى ورة ما خطبج هو بعدة عندة علاقات وية بنات
خاتون بصدمة : شنووووو ... انت صدك تحجي ... انت جذاب منو انت حتى اصدك لو اثق بيك ... امشي منا
رائد بعصبية : ما مجذب عليج بشي ... كتلج ارفضي احسلج
خاتون بعصبية : ما ارفضة ... وولي منا
صاحت عالسايق وهو اجة وحرك السيارة ومشى بس بعدين سمعت من فارس ان كشفو ابن عمة وفسخو الخطوبة ...بوقتهة حسيت هم وانزاح من كلبي

جريت حسرة بكلبي واني احجي وية السوار : اوووووف يخاتونة ... عبالي دربج قريب علية ... صرتي هسة مني ابعد من السما عن الكاع
ميامين 👇🏻

الكاتبة : سارة الشمري🖤