رواية سجينة،الظلم والانتقام الفصل الثامن 8 - بقلم Renad.m

#سجينة_الظلم_والانتقام 🍂🥀

#البارت الثالث والعشرون

#الكاتبة : سارة الشمري🖤

الحب يستأذن المرأة في أن يدخل قلبها ، وأما الرجل فإنه يقتحم قلبه دون استئذان ،
وهذه هي مصيبتنا
(برنارد شو)

سمعت صوت خاتون تصيح بالصالة ... شعدهة بعد
طلعت للصالة وانصدمت .....
غوركت عيوني واني اشوفة ... اسبوعين محرومة من شوفتة .. حسيتهن سنين ...
خاتون حاضنتة وتسلم علي
التفتت شافتني واكفة كالت : اني اروح اكول للحجية على جيتك
طلعت خاتون .. وهو التفت واختفت ابتسامتة من شافني ...

غزوان // من ذاكرة غزوان

اجتني سفرة مستعجلة لتركيا بشغل ... حاولت ان ارفض بس ما قبلو وكالو مهمة ...
رجعت للبيت وسمعت صوت بالمطبخ خاتون وميامين يسولفن ... حب من اول نضرة .. ههه اني شلون نسيت ماخذ الوراثة من ابوي وجدي ...

دخلت كتلهن عالسفرة ... راحت هي تحضر جنطتي
وورة شوية مشت خاتون واني صعدت وراهة
شفت خشمهة احمر وعيونهة مغوركة ... سألتهة بس كالت من الحرارة .. ما دخلت براسي ... المفروض تفرح لان راح تخلص مني ...

بدت هي تعدل بالجنطة واني ذبيت القميص .. شفت وجهة صار احمر ابتسمت على شكلة .. اووف يربي اسبوعين ماشوف وجهج شلون بية ...
حسيت ان تعودت على عطر شعرهة ... تحججت بالقميص وصرت وراهة وهي الرجفة مبينة بيدهة ... اخذت نفس قوي من شعرهة .. ردتلي روحي ...

ردت انام تمددت وهي دخلت وتفاجأت من سألتني على الي احبهة ... شأكللهة انتي الي احبهة .. انتي الي اشوفج احلا وحدة بهالكون ... انتي كلبي وروحي وكل نبضة بكلبي ما تدك بس بأسمج
حسيتهة ضاجت وطلعت من كلت هيج ... استغربت تصرفاتهة ... بس كلت يمكن مثل ماكالت خاتون مشتاقة لامهة ...

نمت ساعتين ونزلت لكيتهة بالمطبخ ... انتبهت ان هي صافنة ... من سألتهة كالت مو عليك
اكيد صافنة بهالحيوان زياد ... بودي اكوم هسة اطيح حضهة بس شأكول ... اغار عليج وكلبي يحترك ويشب نار من يجي ابالج لو تفكرين بي ... ربي ساعدني اذا اني حتى من حبهة لاخوهة اغار منة ... تحب العالم كلهة الا اني ... هه وهم عوزها تحبك غزوان ... اشافت منك حتى تحبك ...

رحت سلمت على اهلي وكعدت يمهم شوية ... ورجعت للبيت ... بدلت ملابسي ونزلت ونزلت جنطتي وياي وعيوني تدور عليهة ...

شفتهة .. بديت انطيهة توصيات وقوانين .. ردت شكد اطول .. ماريد افاركهة ... شلون بية اسبوعين
...
ما حسيت غير حضنتني .. انصدمت .. عصرت ايدي حيل ... لا وخري دخيل الله ... والله يمكن الغي السفرة واكعد هنا والي يصير يصير ...

رادت توخر .. ما تحملت وحضنتهة وسحبت نفس من شعرهة ... شعرهة صار الهوة بالنسبة الي .. النفس لريتي .. ادمنت بي ...

مسحت دموعهة وردت اطلع ... ماكدر ابقى اكثر من هيج ... ردت اي شي من عطرهة ... سحبت الجفية الي لابستهة بشعرهة لونهة ازرك فاتح ... طلعت بسرعة من عدهة ...

وصلت لتركيا ... وطول الطريق هي ماغابت عن بالي ...
انهكت نفسي بالشغل ... من المستشفى للشقة ...

جنت كاعد بالمكتب مالت المستشفى واقرة بالملفات مالت المرضى ...

دخلت علية دكتورة تركية لابسة فستان احمر قصير .. اقصر من الصدرية الطبية ... وشعرهة اصفر فاتحتة وحاطة لو حمرة احمر طوخ ...

استغفر الله ... لزكت هاي صارلهة اسبوع
كعدت كدامي عالكرسي وحطت رجل على رجل ومدت ملف كدامي وحجت بالتركي : دكتور غزوان ... هل يمكنك مساعدتي ... هل تدقق هذا الملف من اجلي
حجيت بالعربي واني اتأفف : شلون لزكة هاي ...

حجت بدلع وهي تفر بطرف شعرهة : هل قلت شيئاً دكتور
غزوان : انا مشغول الان ... الايوجد اطباء غيري
حجت بنضرات غريبة وهي تباوعلي : يوجد .. ولكن ليسو مثلك دكتور غزوان
عقدت حواجبي : ما قصدكِ
حجت بدلع : اقصد انهم ليسو بمثل دقتك بالعمل ...
لعبت نفسي منهة والله لزكة ... عود هم تدلع ...
وينهة ووين ميامين ...

ابتسمت واني اتذكرهة ... الدلع والبرائة عدهة عفويات ومو تصنع مثل هاي ...
اخذت الملف منهة وقريتة واني اريد بس اخلص منهة ... خلصت من الملف وانطيتة الهة ..

كالت : اشكرك دكتور غزوان ... امممم يوجد اليوم حفلة بسيطة للأصدقاء في البيت .. هل يمكنك المجيئ ارجوك ... لا اعتقد انك ستكسر بخاطري ...

غزوان حجيت ببرود واني روحي طالعة منهة : اعتقد انك اسأتي فهم مجيئي الى هنا ... انا هنا من اجل العمل وليس للتسكع ... لذلك لن اتي الى الحفلة .. اتمنى لكم وقت ممتع ... والان اريد العودة للعمل
تفشلت هي واخذت الملف وطلعت ...

تأففت بملل .. اجت ابالي ميامين .. طلعت محفضتي واخذت صورتهة بالمكتبة الي سحبتهة من تليفوني ...
كل ما اشوف صورتهة هاي ابتسم ... ضحكتهة ... برائتهة ... جمالهة ...

صارلي اسبوع ما شايفج ... شلون متحمل مادري ... اكيد مرتاحة هسة ... اسبوعين غزوان مو يمج وخلصانة منة ...
رجعت الصورة لمكانهة وخلصت الي بأيدي وطلعت اشم هوة لان حسيت اختنكت من كثر التفكير .. ماجاي تروح من بالي ...

بقيت كاعد عالبحر مادري شكد بقيت لان المكان هادئ وحلو ...
دك تليفوني شفتهة خاتون ورديت عليهة ..
من سمعت صوت ميامين حسيت الروح ردتلي ...
كلبي انعصر واني اسمعهة تبجي ...
وصيت خاتون عليهة ... سديت التليفون
رجعت مشي للشقة .. شفت بالطريق محل .. وملابس معروضة من ورة الجام ...

شفت فستان احمر .. مباشرة اجت ابالي ميامين ... تخيلتهة لابستة ... ابتسمت ..
جان فستان احمر طويل وبي حزام ذهبي ناعم ...
يصير من فوك ضيق عالجسم ومن جوة مثل ذيل السمكة ومنقشة اطرافة بالاسود ... ويصير بدون ردانات ... وفتحة الصدر مثلثة ..

بدون تفكير دخلت للمحل اشتريتة .. طلعلي مجموعة مجوهرات للتنسيق وية الفستان ...
جذبتني گلادة ناعمة ... على شكل صقر اسود وشايل وردة حمرة بمنقارة ... اخذتهة والفستان وطلعت

ما متعود اسافر اذا ما اشتري لاخواتي شي ...
اعرف خاتون تحب المكياج وهالشغلات البناتية ... ومها تحب الكتب والشالات المنقشة ...
اشتريت لكل وحدة منهن مجموعة اشياء

رجعت للشقة حيلي مهدود ...
حاولت انام ماكدرت ... طلعت الجفية مالتهة واخذت نفس منهة ... ادري راح تكولون شبي هذا ... بس ادمنت عطرهة وشعرهة ... مثل ما البعض يدمن على الشرب لو الجكاير لو العياذ بالله المخدرات ... اني ادمنت على عطر ميامين وشعرهة ... الفرق بينهة وبين ذني الاشياء ان هنة محرمات وقذرة ... بس هي اطهر شي بحياتي ادمانهة حلال وعبادة بالنسبة الي ... شوفتهة وشم عطرهة كلهن حلال الي اني وحرام لغيري ...

اخذت نفس من جفيتهة وحطيتهة على كلبي وكوة نمت ...
بقيت اسبوع ثاني واني احس روحي تطلع وية كل يوم ...

شفتهة لابسة فستان ابيض حرير وفاتحة شعرهة الاسود على طولة ولابسة طوك الورد على شعرهة
طالعة مثل الاميرات ...

تقدمت عليهة بلهفة وبأبتسامة مديت ايدي الهة
اختفت ابتسامتي واني اشوفهة تتراجع خطوتين لورى وتحط ايديهة ورى ضهرهة وتهز راسهة ب لا والخوف بعيونهة ...
تقربت منهة خطوتين : ميامي حبيبي اطيني ايدج .. ليش خايفة مني ...

تراجعت خطوتين ثانيات ... رفعت راسهة وعيونهة تحولت وراي وابتسامتهة انرسمت على شفايفهة

التفتت لوين تباوع ...
شفتة واكف عيونة عليهة ومبتسم
هي حجت بلهفة واضحة : ليش تأخرت ...
مد ايدة الهة .. هي بدون تردد ركضتلة وحضنتة
حسيت الغيرة جمرة وشعلت كلبي ... رحت وسحبتهة وحطيتهة ورة ضهري ...

حجيت بعصبية : ماتكدر تاخذهة مني .. ميامين الي
رائد وابتسامتة على وجهة : ماراح تكدر تمنعني اخذهة حتلو وكفت بوجهي ...
وخرت هي من ورة ضهري وصارت بصفة .. حطت ايدهة بأيدة ... اخذهة وطلع
ردت اتحرك ماكدرت ... اريد اصرخ بس صوتي ما يطلع ..
اخذهة كدام عيني .. واني واكف ما منعتة ...

فزيت من النوم مختنك ... من هالكابوس
افرك بصدري اريد اتنفس وايدية وجسمي كلة يرتجف ...
نفسي يصعد وينزل بسرعة ...: اوووووووف ...
كمت افتر بالغرفة واني افرك بوجهي ... اريد اهدء ماكو ...
ادري بي كابوس .. بس خايف هالكابوس يصير حقيقة ...
اخذت كلاص مي شربتة كلة مرة وحدة ...
مختنك واتنفس بسرعة العرك يتصبب مني رغم ان الجو بارد ...

فتحت البلكونة وطلعت ... دخل الهوى البارد لريتي ...
مااخليهة تروح مني ... ماكدر اعيش بدونهة ... بأي حق ياخذهة مني ... هي مرتي ما اخليهم ياخذونهة ...
اخذت تليفوني واتصلت حجزت على اقرب طيارة للعراق ... ماكدر اتحمل بعد .. المفروض طيارتي بعد يومين ... بس حجزت واقرب طيارة بعد ساعتين ...

اخذت كل غراضي وتوجهت للمطار ... طول الطريق اني تفكيري مشتت ... مشتاقلهة وكلبي يريد يطلع من مكانة ... احس الطريق من المطار للبيت صار شطولة ...
دخلت لبيتي مباشرة ... تلكتني خاتون وسلمت علية واني عيني تدورهة بالبيت ... وينهة ليش ماكو ...
التفتت وشفتهة واكفة اباب المطبخ وتباوع علية ... يمكن لو القلب الة صوت جا هسة كل العالم سمعت صوت كلبي من كثل دكاتة ...

خاتون طلعت حتى ما انتبهت شنو حجت ...
تقدمت كم خطوة منهة اريد استوعب الي كدامي هي ميامين ... لابسة دشداشة بيضة اول مرة اشوفهة بغير الاسود وشعرهة الاسود نصة شايلتة بالقراصة والباقي طايح على وجهة وركبتهة ...
شمسوية بوجهة ... فهيت بعيونهة هنة من الاصل ما مخليات عقل براسي ادور مكحلتهن ...

شفايفهة الي بلون الوردي يرجفن وعيونهة مغوركة ...
شهكت وبعدين اجتني تركض ... اني ما صدكت
فتحت ايدية الهة وهي حضنتني وصارت تبجي ... حضنتهة حيل لصدري .. دفنت وجهي بشعرهة
واخذت نفس .. اريد هوى .. اريد دواي .. هسة ردت روحي وطابت ...
سحبت نفس من شعرهة : اوووووووف ...
وخرت هي ايديهة مني بس اني بعدني محاوط خصرهة بيدي وايدي الثانية امسح بيهن دموعهة ...
غزوان بحنية : ليش الدموع ... لا تخربين عيونج بيهن ..
ميامين وهي شفايفهة مطبوكة مثل الاطفال وتشهك : ليش طولت هالكد ..

حجيت واني مفهي بحركاتهة ..: شغل والله شغل
ميامين وهي تمسح بدموعهة : تمام ... نزلني
حجيت بغباء : هااه ؟ وين انزلج
ميامين وهي تأشر على ايدي : نزلني غزوان ...
انتبهت ان اني لازمهة من خصرهة ورافعها واكفة على رجلية ومقيد حركتة ماتكدر تنزل ...
وخرت ايدية من خصرهة وخرت وتعدل بشعرهة من الارتباك ...

ميامين بأرتباك : اااء ... ارتاح انت على ما اصعد الجنط واجيبلك شي تاكلة
حجيت بهدوء : ماشي ..
راحت هي بسرعة سحبت الجنطتين من الباب ودخلتهن للصالة ودخلت للمطبخ ...
كعدت ورجعت راسي عالقنفة اريد استوعب شنو الي سويتة هسة ... نسيت نفسك غزوان ...
انتبه لا تتأمل اكثر ترة مستحيل تحبك ...

قاطع تفكيري صوت مها وهي داخلة : غزوووااان ...
ابتسمت وكمت حضنتهة .. : مشتاقلج يالفيلسوفة ..
مها : اني هم مشتاقتلك ... شنو جبتلي وياك
غزوان : اي كول من البداية جايتني تركضين علمود الهداية مو
مها : اممم يعني تكدر تكول هيج
غزوان : روحي لعد كلشي ما اطيج ..
مها : لا لا اسفة اشاقة وياك .. اصلا شعندي غيرك

رادت تروح تجيب الجنط وصارت ميامين بوجهة وبيدهة صينية الاكل ..
مها : اوووف .. يعني لازم تطلعين بوجهي ..
ميامين : جبت الاكل لغزوان ... اكيد ما راح انتضرج ترحين حتى اطلعة ..
مها بعصبية : وخري من وجه وبلا حجي زايد .. لسانج شطولة تردين الكلمة بعشرة ...
غزوان بعصبية : مهااااا .. احترمي وجودي .. شني اني واكف وانتي ترفعين صوتج ...

مها خافت : اسفة ...
ميامين حطت الاكل كدامي ورادت تروح بس خاتون وكفتهة : وين رايحة .. ابقي يمنة
مها فتحت الجنطة الزغيرة وطلعت علبة واشرت عليهة : هاي لمنو
غزوان : هاي لخاتون ...
خاتون : يعمري ليش تعبت نفسك ...
غزوان بأبتسامة : عادي هو اني شجايب
مها طلعت العلبة الثانية شوية اكبر من الاولى : وهاي اكيد الي صح
غزوان : اي الج ... مثل ما طلبتي .. شالات تركية وبالالوان الي ردتيهة ...

اجت حضنتني : ياا عمرييي ... والله احسن من مؤيد كل ما اكولة ايكول واني شمعرفني بسوالف البنات هاي ...
غزوان : والله اني هم ما اعرف بس من ادخل المحل الكة بنية بالمحل واطلب منهة تختار ... عاد همة ينسقون
مها : بس والله ذوق .. شوف النقشة تخبل
شافت علبة ثالثة وطلعتهة .. جانت اكبر علبة بيهن ... : هاي المن العلبة
غزوان بسرعة : هاي لميامين ...

ميامين وخاتون التفتن علية بصدمة ... ومها صدمتهة ما تقل عنهن بس بعصبية : جايب لهاي هدية ... والله هاي كونية وهواي عليهة
خاتون بعصبية : وليش ما يجيبلهة .. مرتة والهة حق علي ...
مها وهي تريد تفتح العلبة : اشوف شنو جايبلهة بلة
سحبت العلبة من ايدهة : مهااااا .. لا تدخلين كتلج هاي لميامين ... هي بس الي تفتحهة ...
مها وهي تاخذ علبتهة : اي ليش لا ... بالعافية خلوهة تغسل مخكم كلكم
طلعت مها واني التفتت على ميامين الي لهسة تباوع علية بصدمة ..
حجيت بهدوء : ليش واكفة .. تعاي اخذي هديتج ..

تقربت هي بهدوء واخذت العلبة ...
خاتون : اني اترخص .. اخليك ترتاح اكيد تعبان من الطريق
غزوان : اخذي راحتج ...
طلعت خاتون ... واني التفتت على ميامين ... : لمي الاكل اريد انام بالاول
هزت راسهة .. اخذت الجنطة مالت ملابسي وصعدت لغرفتي ...
شفت تليفوني مابي شحن ...
فتحت الجنطة اريد اطلع الشاحنة ...

استغربت واني اشوف : هاي العلبة شجابهة هنا ...

غزوان ... ميامين 🖤

الكاتبة : سارة الشمري🖤
اسفة عالتأخير حبايبي ... اتمنى عجبكم البارت 😘 لا تنسون تنطوني توقعاتكم للبارت الجاي ....؟؟

#سجينة_الظلم_والانتقام 🍂🥀

#البارت_الرابع_والعشرون

#الكاتبة : سارة الشمري🖤

وأعد أعد عروق اليد فعروق يديك تسليني وخيوط الشيب هنا وهنا تنهي أعصابي تنهيني.
نزار قباني 🖤

صعدت لغرفتي ...
شفت تليفوني مابي شحن ...
فتحت الجنطة اريد اطلع الشاحنة ...

استغربت واني اشوف : هاي العلبة شجابهة هنا ...

فتحتهة وشفت الكلادة الي جبتهة لميامين ...
نسيت احطهة وية العلبة مالت الهدية ...

حطيتهة عالميز ودخلت سبحت عالسريع بدلت ملابسي ولبست تراك .. اخذت العلبة ونزلت
مالكيتهة جوة اكيد بغرفتهة
صعدت لكيت شوية من الباب مفتوح ...
فتحتة ودخلت وياريتني مادخلت ...
جمدت بمكاني واني اشوفهة .. لابسة الفستان الي جبتة الهة ... شكول لو شأوصف ...

فاتحة شعرهة وحاطتة على صفحة ....
هي بيضة ولابسة احمر برز بياضهة بالزايد ...
منطيتني ضهرهة والسحابة مفتوحة كلهة لنهاية الضهر ... هي تحاول تسدهة بس مبينة معلكة ...

بلعت ريكي واني اشوفهة بهالجمال ... ما تشوفني لان ضهرهة علية ووجهة عالمراية ومدنكة راسهة وتحاول تسد السحابة ...
غبت عن العالم ونسيت نفسي ... صرت ماشوف غيرهة ..
تقربت منهة وصرت ورة ضهرهة
حجيت بهمس يم اذنهة : اكدر اساعدج بيهة ..
هي طفرت من الخوف ورجعت لورى والتصق ضهرهة بصدري ...

حجت بأرتباك : اااء غزوان .. اسفة والله عبالي نمت .. كلت اجربة بما ان ماعندي شي ...
غزوان هي تحجي واني ذايب بيهة ... اباوع عليهة بالمراية ...
وخرتهة من صدري ومديت ايدي حتى اسد السحابة ..
ميامين بسرعة وخرت : غزوان والله ماكو داعي .. خلص راح انزعة ...
جريتهة الي وكلت بهدوء يم اذنهة : ششش خلي اريد اشوفة عليج .. لعد المن جبتة اني ..

حسيتهة كامت ترجف ... مديت ايدي عالسحابة وبديت اسدهة بهدوء ... اصابعي لامست ضهرهة وبشرتهة الناعمة .. وهي صلبت ضهرهة وارتجفت ...
سديت السحابة ونزلت ايدية لخصرهة وقربتهة مني ... حطيت وجهي بشعرهة واني مغمض عيوني وناسي كلشي وماشوف غيرهة كدامي ... : ليش عطر شعرج حلو ...

ميامين بإرتباك : هــ هااه ؟
درتهة علية وعيونهة صارت بعيوني ... دخت بالزايد ... : ليش حاطة كحلة ...
ميامين بخوف : والله خاتون اصرت ان تحطلي ... اني ماردت احط
تحجي واني ذايب وية كل حركة منهة ..
قربت منهة وخشمي لامس خشمهة : ارحميني .. اني بدون الكحلة وما اشوف دربي .. شلون اذا خاطتهن ...
انصدمت ورفعت راسهة وعيونهة علية ...

رفعت طرف اصابعي على خدهة وصرت اتلمس خدودهة بخفة ... بشرتهة الناعمة وخدودهة حمر ... مغمضة عيونهة من لمستي على خدودهة
.. ارتجفت شفايفهة من اجت اصابعي عليهن ...
نزلت اصابعي لرگبتهة ... نزلت عيوني على مكان النساوة ...
بلعت ريكي واني اشوف نفسهة يصعد وينزل ..
نزلت راسي وخليت شفايفي على نساوتهة وبستهة علكيف ...
رفعت راسي وشفتهة مغمضة عيونهة حيل وخايفة ...

مشيت اصبعي الابهام بين حواجبهة وهي فتحت عيونهة ...
عيونهة توديني لغير عالم ... احس كلبي يصير دمام ...
نسيت نفسي شجاي اسوي وقربت شفتي منهة
... شفايفهة الدافية خلت كلبي يذوب ... غمضت عيوني واني مستمتع بطعم شفتها ... وايد على خصرهة والايد الثانية ورة راسهة ...
مادري شكد طولت بوستي لان ماحسيت بالوقت وناسي كلشي ..
لحد ما حسيتهة اختنكت وتدفع بية ...

وخرت عنهة واني اشوف وجهة احمر ... استوعبت اني شجاي اسوي ... غزوان تخبلت ..
عفتهة بسرعة وطلعت وحتى نسيت على شنو جنت جاي ...
دخلت للغرفة وسديت الباب بعصبية ... شسويت غزوان .. تخبلت اي تخبلت ... شلون سويت هيج .. ليش ماكدرت اسيطر على نفسي ... والله ماجنت هيج ... معقولة نسيت اخوك ... معقولة حبك لهاي البنية خلاك تنسى انتقامك لاخوك ... لا لا لا غزوان مو هذا الي تريدة ...

شلون سمحت لنفسي اسوي هيج ... ماريدهة تحس بحبي ... ماريدهة تتخذة نقطة ضعف عني ...
حطيت ايدي بشعري وكعدت عالجرباية واني اهز برجلي من التوتر ...
حطيت ايدي على شفتي واني اتذكرهة ... حاولت تمنعني بس اني الغبي ما سيطرت على نفسي ...
رادت تدفعني بس ماكدرتلي ...

غزوان ليش هيج سويت ... هي تكرهك وتحب شخص ثاني ... ماراح تحب شخص غيرة مثل انت ما راح تحب غيرهة ....
حسيت اختنكت من كثر التفكير ... طلعت من الغرفة ومن البيت كلة ...
رحت للشط وبقيت كاعد مادري شكد مر من الوقت ... بقيت افكر شلون اباوع بوجهة بعد ...

اذا شفتهة راح تعرف بحبي الهة .. هاي اذا ما عرفت وحست بهالشي ... افضل حل ابتعد عنهة ... اي لازم ما تتعود علية ... صبرني ياربي عالجاي ...

صارت الدنيا غروب واني بعدني كاعد هنا ...
كمت وركبت سيارتي وتوجهت للبيت ...

دخلت للصالة .. البيت هدوء ... يعني خاتون مو هنا ...
رحت لغرفتي وتمددت ونمت على بطني ...

اندك الباب وعرفتهة هي ...: خييير
دخلت واني ماشوفهة لان داير وجهي عالجهة الثانية ...
سمعت صوتهة بتوتر واضح : العشا ...
حجيت بعصبية : ماريد عشا اطلعي وسدي الباب اريد انخمد ...
طلعت هي بهدوء واني احس بتفكيري مخربط ... مادري شسوي ...

عقلي ايكلي ابتعد عنهة احسن بس كلبي ماجاي يخليني ...
اتخذت قرار وهو الافضل ... راح ابتعد عنهة .. يمكن اني هم انسى ...
اتخذت اسلوب القسوة وكلت يمكن اكرهة بس ماكدرت ...
يمكن اذا تجاهلتهة راح ينتهي حبي ...

مر اكثر من شهر واني تغيرت ...
صرت ما اتواجد بلبيت الا وقت النوم ... وقلة اشوفهة باليوم ومرات اصلا ما اشوفهة ...
صح احس بشوك الهة يذبحني بس هذا الاحسن ...

من ذاكرة ميامين //

ميامين ... مر شهر ونص من بعد ذاك اليوم ...
كل ما اتذكر الي صار مادري شيصير بية ... هو تندم لان من وقتهة صار عصبي بالزايد وما يتواجد بالبيت ...
باقي على رمضان يومين ... هذا اول رمضان الي بدون اهلي .. واول رمضان الي بهذا البيت الي صار حبس بالنسبة الي ... اختنك مرات واكعد ابجي من الضوجة ...

الله يخلي خاتون تجيني وتبقى يمي وتحاول بكل الطرق ان تونسني ... مثلا تجيب سيديهات افلام وتحطهن عالتلفزيون ونكعد سوة وكعدتهة ما تنمل
... ما اجذب واكول ما اشتاقيتلة لا بالعكس ... صرت نادراً ما اشوفة بالبيت ... واذا اجة ما يحجي وياي ومايطلب مني شي ...
ومن اسأل خاتون اتكول يتغدة ويتعشى يمنة ...
يطلع الصبح قبل لا اكعد ... ومن يرجع اني اكون نايمة ...

جنت كاعدة بالصالة واباوع عالتلفزيون بملل مو طبيعي واكلب بالقنوات بدون هدف ...
دخلت علية خاتون وبيدهة علاليك ...
خاتون : مسائو على الحلوين ...
ميامين بأبتسامة : مساء النور ..
خاتون وهي ترفع العلاليك : احزري شنو جبت ..
ميامين وبدون اهتمام : مادري انتي احجي ..

خاتون بتحطم وتنزل العلاليك : انتي ابد ما تسوين واهس ...
حجت بعصبية : كومي اختاري واحد منهن ...
ميامين : وشنو ذني ... غير اعرف بالاول ...
خاتون وهي تفتح العلاليك وتطلع منهة ملابس ..
حطتهن كبالي ...
واني اباوع عليهن وعلى خاتون : شنو ذني شسوي بيهن ...
خاتون : سويهن تشريب واكلييهن ...
رفعت حاجبي عليهة وهي حجت : يعني شتسوين بيهن مثلا ... تلبسينهن اكيد ...

ميامين : بس اني ماريد ملابس عندي هواي ..
خاتون وهي تكعد عالقنفة : والله حبيبتي اليوم الحجية خاتون دزتني مخصوص علمودج للسوك وكالت اختاريلهة احسن النفانيف التلكينهة كدامج ونسقي وياهن شالات ...
حجيت بأستغراب : وليش ؟؟
خاتون : لان عدنة عزيمة بأول يوم رمضان يعني بعد يومين .. والحجية خاتون طلبتلج الاذن من غزوان وهو وافق ...

حجيت بصدمة : وافق ؟؟؟ متأكدة
خاتون بأبتسامة وهي تهز راسهة ..: اي والله وافق .. واني جنت كاعدة من كالتلة وكاللهة سوي التردينة
..
ميامين : ومنو راح يكون بالعزيمة
خاتون : بيوت عماتي تلاثتهن ... وعمامي اثنين كل واحد هو وعائلتة ...
ميامين بسرعة : لا فدوة لعد ماكدر اروح ..
خاتون : ليش مترحين .. شبيج اخترعتي ...

ميامين : شلون ما اخترع .. تاس ماعرفهم واول مرة اشوفهم ... واكيد محد بيهم طايقني ... وماعرف اذا زينين لو مو زينين
خاتون : ماكو داعي للخوف اني راح اكون موجودة يمج ... ولا تنسين الحجية خاتون واكفة بصفج يعني الحصة الجبيرة ومحد يكدر يحاجيج ... واذا خايفة منهم يعني اكو منهم الزينين واكو الموزينين .. بس لا تخافين من شي ...
ميامين : عفية خاتون اعفيني من هالسالفة .. والله مالي خلك مشاكل ..

خاتون وهي ترفع ايدية : والله حبيبتي اني معلية ... هذيج الحجية خاتون واحجي وياهة ...
تأففت وكعدت
خاتون : يلة اختاري واحد منهن الي تلبسينة بالعزيمة ..
حجيت بعدم اهتمام : عوفيلي اي واحد مو مهم ..
خاتون : حبيبتي هنة ثنينهن الج .. بس ردت اعرف يا واحد حتلبسين ...

ميامين : وليش ثنينهن ..
خاتون : الحجية رادت هالشي حتى تختارين الي يعجبج
ميامين ابتسمت الهة : شكرا خاتون .. واتشكريلي من الحجية خاتون انشالله اكدر اجي ..

باجر رمضان ... كعدت بليل سويت سحور وصعدتة لغزوان .. دكيت الباب ماكو صوت بس المكيف يشتغل ...
فتحت الباب والغرفة ضلمة وبااااردة ... قشعر جلدي من البرودة ... ماحب البرد ابد ...
حجيت على كيف حتى لا يفز : غزوان .. غزوان
غزوان وهو نايم .. : همممم ؟؟
ميامين : اكعد جبتلك سحور ..
طبعا ما جنت اشوف شي لان الغرفة ضلمة وبس ضوة خفيف من الباب ... واحجي من يم الباب وبيدي الصينية ...
غزوان بصوت كلة نوم : شغلي الضوة ونزلي الاكل جوة ماحب اكل بالغرفة ...

شغلت الضوة وانصدمت نايم بس بالبجامة ...
هو ما اهتملي وكام للحمام وولا عبالك يشوفني لان مسطور من النعاس ...
نزلت بسرعة وحطيت الاكل عالطاولة بالصالة ...
دخلت للمطبخ وتسحرت وحدي ... شربت مي وطلعت .. لكيتة يتسحر وعيونة كوة مفتحهن ...
اتأمل بشكلة وهو ياكل ويتحرك ... صارلي هواي ما شايفتة هيج ... ضعفان شوية ولحيتة طولانة ...

جبت دولكة مي وحطيتهة كبالة ... هو خلص اكل وشرب مي وراد يكوم .. التفت علية وكال : باجر اكو عزيمة عند اهلي .. الحجية خاتون تريدج تجين ... وماكدرت ارفض هالشي ... باجر تجي خاتون تاخذج .. حاولي تبقين يم الحجية خاتون .. اذا وحدة حاجتج كلمة من الموجودين كليلي ... صار معلوم ..؟
هزيت راسي ب اي .. هو كام لغرفتة

رحت نمت ... كعدت الساعة ب 11 .. نضفت البيت للإحتياط ... واني التوتر ماخذني وافكر شراح يصير اليوم ... خايفة وبنفس الوقت فرحانة لان راح اطلع من البيت واشوف العالم ...
صارت الساعة ب 1 رحت تمددت ونمت ..

كعدت على صوت خاتون : ميامين اكعدي الساعة ب 3
حجيت بنعاس : بعد وكت ليش مكعدتني من هسة ..
خاتون : دكومي على ما تتجهزين تصير بالاربعة ولازم تكونين قبل الكل موجودة هناك لان انتي جنة العيلة
ميامين بتأفف : اففف والله مصدكة انتي .. ترة محز معتبرني جنة بس انتي والحجية خاتون ..

خاتون : وهذا المهم .. بعد معليج بالباقي .. ان اعتبرو او ما اعتبرو ما يهم .. انتي بالتالي تكونين زوجة ابنهم ... ويلة كومي لا تتأخرين اكثر ...
سحبتني من الفراش ..
دخلت للحمام وسبحت وطلعت لكيتهة مطلعتلي واحد من الي جايبتهن الحجية ... ومحضرة مكياج وكاعدة ..
حجيت واني اشر عالمكياج : شنو تردين تحطيلي مكياج ..
خاتون : طبعا .. يعني اول مرة راح يشوفونج واكيد ما راح اخليج تطلعين عليهم بدون مكياج ...

ميامين : خاتون ماريد احط مكياج ماحبة ..
خاتون وهي تسحبني وتكعدني على كرسي المراية : والله حبيبتي ما جاي اخذ رايج اني ... انطيج خبر وبس ..
فتحت شعري ونشفتة بالشسوار ... كعدت تمكيجني بس اني طلبت منهة يكون خفيف ... لان ما احب الطوخ ...

اختاريت واحد من الملابس ... قفطان مغربي لونة ماروني وحزامة لونة ذهبي وهو النفنوف منقش بالذهبي ...
سويت شعري ذيل حصان على طولة ونزلت كذلة ...
حطيت الحجاب على ركبتي ونزلت للصالة وبيدي عباتي ...
ثواني ونزل غزوان ...

فهيت من شفتة ... اول مرة اشوفة بالدشداشة البيضة .. جان يلبس الوان غامقة ...
نزل وعطرة سبقة ... معدل لحيتة ومحددهة ... مخفف شعرة ... طالع يجنن ...
باوع علية حسيتة انصدم من شافني ...
نزل عيونة وراد يطلع وخاتون كالت : يلة ميامين خلي نروح
التفت علية وكال : ........

الكاتبة : سارة الشمري 🖤

اعذروني حبايب كلبي ادري طولت بس والله صارت عدنة ضروف ومكدرت انزللكم شي ... وشكرا لكل الي سألو علية ..😘 فديتكم

توقعاتكم للبارت الجاي ... شراح يصير ؟؟؟

#البارت_الخامس_والعشرون

#الكاتبة : سارة الشمري🖤

إني عشقتك واتخذت قراري.. فلمن أقدم يا ترى أعذاري؟ لا سلطة في الحب تعلو سلطتي فالرأي رأيي والخيار خياري.. هذي أحاسيسي فلا تتدخلي أرجوك بين البحر والبحَّار.

خاتون : يلة ميامين خلي نروح
التفت علية وكال : خففي لون الحمرة مالتج .. ولد عمي راح يجون يسلمون عالحجية
هزيت راسي وهو طلع ... واخذت كلينكس وخففت الحمرة
لبست عباتي وطلعنة اني وخاتون ... كلبي يدك الف متوترة كولش ...
دخلنة للمطبخ شفت ام غزوان واكفة عالطباخ ...
التفتت علية وباوعتلي بنضرة عصبية بس رجعت دارت وجهة ... استغربت ان ما ذبت علية حجاية لو رزلتني ...
ردنة نطلع من المطبخ وندخل للصالة حتى نشوف الحجية بس صارت مها بوجهي ...

شافتني عصبت وبسرعة رفعت اصبعهة بوجهي وكالت : باعي ولج ... اليوم ماريدج تطلعين بوجهي وما اريدج تحجين وياي ولا كلمة لان ما الزم روحي وراح يخرب صيامي ... لهالسبب تجنبيني والافضل لا تطلعين من غرفة الحجية ...
حصرتني الضحكة عليهة ... يعني لهالسبب ام غزوان ما حاجتني اليوم ... يالله هاي هم نعمة ...
ميامين بضحكة : ماشي تدللي ...
خاتون وهي تسحبني : يلة تعاي تأخرنة عالحجية

دخلنة لغرفة الحجية وخاتون كالت : وهاي اجت جنتج بعد شتردين
الحجية بأبتسامة وتهلي : يا مية هلا ومسهلا ... اللهم صلي على محمد وال محمد .. رمضان العافية عليج يحبوبة ...
دنكت على ايدهة وبستهة : عالجميع انشالله .. شلونج انتي حبوبة
الحجية : توني صرت بخير من بعد ما شفت هالطول
تذكرت وحجيت : شكرا حبوبة عالملابس والله مادري شلون اجازيج ...

الحجية : دكعدي يحبوبة اجازيج شني .. هو هذا حكج ...
ميامين : الله يخليج النة يارب ...
الحجية وهي تلتفت لخاتون : خايبة اطيني هذا الصندوك الاحمر ...
جابتة خاتون وانطتة الهة ... فتحتة وطلعت منة ٤ اساور ذهب ..
الحجية : البسيهن حبوبة ... انشالله عجبنج ... ترة جبتهن علمودج
حجيت بسرعة : لا لا فدوة حبوبة والله غزوان ميقبل
الحجية : شني جا بكيفة .. ادور هم بالهدية يحط روحة
خاتون بإبتسامة : ميامين البسيهن .. ترة غزوان يدري بيهن ...

ميامين : يعني ما حجة شي ...
خاتون : لا ما حجة شي والله كال شتردون تسوون سوو ..
الحجية : وهسة ارتاحيتي ... دلبسيهن يلة ...
لبستهن وتشكرت من الحجية .. كولش حلوات شكلهن مثل الضفائر
التفتت على خاتون : اذا يحتاجون مساعدة عادي اروح اني اساعدهم ؟
الحجية : اكعدي راحة حبوبة المن مولية ... تدورين العرايك ... خليهن صويمات
ميامين : حبوبة والله اني ما مسوية شي .. اصلا ولا مرة بديت بعركة ..
الحجية : جا ما ادري شني ... بس هنة اليبدن بالعرايك ... اكعدي هنا احسلج وفنهة التفك حلكهة وياج ...
كعدت وسكتت وخاتون راحت تساعدهم وكل شوية وجاية علية ...

سمعت صوت هسوتة برة ... اكيد اجو ...
اجيت اكو بس الحجية كالت : اكعدي وين رايحة هنة يجن ...
دخلن ٣ نسوان كبار بس يعني مو كولش كبار ... ووياهن بنات اكيد بناتهن ...
اجت اول وحدة سلمت عالحجية والتفتت علية وكالت بإستغراب : انتي منو ؟؟؟
احتاريت شنو ارد عليهة .. اكول اني مرت غزوان لو اكول الفصلية ..
الحجية ردت عني : هاي جنتنة .. مرت غزوان ...
سمعت صوت وحدة من البنات الي واكفات حجت بصوت عالي .. : هااااي مرت غزوووااان ...
الحجية التفتت عليهة بعصبية : ولج نويرة شو حسج عالي واني كاعدة ... اي هاي مرت غزوان ...

حجت بعصبية ومبين القهر بيهة : وشكو مكعدينهة هنا ... وشلابسة جنج عروس .. شو ما تستحين ولا عبالك فصلية ... هاي ضاحكة عليهم مو .؟
الحجية بعصبية : ولج نويرة كومي اطلعي برة لا هاي العوجية احطهة بخاصرتج ...
نورة بقهر : اي اني طلعيني والخدم تكعدينهم يمج ...
وحدة من النسوان ردت : نورة كافي اطلعي ما تشوفين امي شلون عصبت ...
نورة وهي تنفض شالهة على ركبتهة تتأفف وتطلع ...
ثنين من النسوان سلمن عادي مثلا ... هلا بيج عيني ... ووحدة منهن ما سلمت وكعدت تباوعلي بنضرات عبالك بايكة حلالهة ....

والبنات اكو بيهن سلمن واكو كم وحدة سلمن من ورة خشمهن لان خافن من الحجية يمكن ...
دخلت خاتون بسرعة وكعدت يمي وحجت بصوت بس اني اسمعة ..: اسفة ميامين عفتج وحدج والله جنت فوك وما ادري بيهم من اجو ... اكيد حجن وياج شي ..
ميامين : عادي حبي ... اصلا الحجية كفت ووفت ..

قاطعتنة الحجية وهي تسأل خاتون : جا نسوان عمج ما اجن لهسة ...
خاتون : لا بيبي بعدهم ... اكيد هسة على جية...
الحجية : شني على جية ... جا همة عضامة يجون وكت الفطور ... غير يجن نشوفهن نسولف وياهن ...
قاطعنة دخول ٢ نسوان ووياهن ٢ بنات ...
استغربت ان الحجية رحبت بيهن اكثر من بناتهة الي اجن قبل شوية ... وهنة سلمن عليهة بحب واحترام واضح ... اجن البنات سلمن على الحجية ...

اجت وحدة منهن يمكن عمرهة يطلع بكد خاتون ...
سألتني وكالت : انتي ميامين ؟
جاوبتهة بإستغراب : اي ميامين ... منين تعرفيني ..
مدت ايدهة بإبتسامة وكالت : اني بسمة بنت عم غزوان ... يعني حماتج ...
مديت ايدي الهة وهي سحبتني وباستني ... فاجأني تصرفهة ... واجت كعدت بيني وبين خاتون ...

اجت بنية ثانية ولابسة نضارات طبية سلمت علية بهدوء وراحت كعدت على صفحة ...

خاتون وهي راصة على سنونهة وتحجي بصوت محد يسمعة بس اني وبسمة ومتصنعة الابتسامة ..: بسمة شجاي تسوين .. كومي فشلتيني القنفات كلهة فارغة يعني ما حلتلج الكعدة الة هنا
بسمة وهي تدفعني وتدفع خاتون حتى تسوي لنفسهة مجال : دووخرري ... شنو اعوفجن وحدجن تسولفن ... واني ما صدكت اشوف ميامين ...
حجيت واني اسويلهة مجال حتى تكعد ..: وانتي منين تعرفيني ...
بسمة وهي تأشر على خاتون ..: الله يخلي هالبطة خابصتني بيج ... ماكو على لسانهة غير ميامين ... خلتني اتمنى اشوفج ...
ابتسمتلهة وكلت : تشرفت بمعرفتج ...

شو هاي حضنتني وكالت : يحبيبتي فديتج ... والله اني الي تشرفت ... وباستني بخدي
عزة هاي شبيهة البنية
الحجية وهي تدفعهة بعصاتهة : كومي يمفلوكة خنكتي البت ... جا انتي ما تبطلين اللطلطة هاي .؟
بسمة : حبوبة انتي شعليج ؟؟
الحجية فتحت عيونهة بعصبية : شنهي ولج .. انا امك يعبدالله ... وشمرت عليهة العصا ...
بسمة راحت كعدت يمهة وحبت ايدهة : اسفة حبوبة والله من زمان ما متعاركة وياج كلت اتعارك ...
الحجية وهي : دكومي عني وحطي بلوكة بحضنج ... اركدي شوية ... شمالج كلساع بصفحة ... ترة انتي انتي مو زعطوطة يحبوبة ...

بسمة وهي تكوم وترجع لمكانهة بيناتنة : عن اذنج جدة ...
الحجية وهي تسأل وحدة من نسوان ولدهة : جا جوري وين ...
ردت عليهة : عمة راح تجي بالسيارة الثانية وية اخوهة ...
الحجية : وليش ما عفتي هاي المكموعة وجبتي جوري ابدالهة ...
بسمة : مقبولة منج خاتونة هانم ... همة هم كالولي تعاي بالسيارة بس اني ما قبلت وكتلهم جدتي مشتاقتلي وبعد ما تصبر ...

الحجية : هم عايزة هاي ... خايبة انة اشتاقلج ... شمالني ...
بسمة : خوش حجية عود اني زعلت ... ليش تفرقين يعني تحبين جوري اكثر مني ..
الحجية : جا ما يرادلهة ... غير عزيزة كلبي هاي ...
بسمة : اي مو لان منطيتج على مايج وما تكلج لا هالحبيتيها ...
الحجية : البت تعرف الاصول وحبابة وراكزة وما ترفع صوتهة مثلج ...
بسمة : حجية جا غير اتشاقة وياج ...
الحجية : تشاقي وية البعمرج موش انة ..

ضحكت على سوالف الحجية وبسمة ...
بسمة مبينة محبوبة ولسان وحركة ...
بسرعة ذبت الميانة وياي وعبالك صارلهة سنة تعرفني ....
حجت بسمة وهي تنغز خاتون : اكلج ما راح تعرفين خاتون عالكاعدات
خاتون وبدت تحجي بهمس : اي صح نسيت ... خل نبدي بالسرة ... شوفي هاي الي كاعدة يم الحجية تصير مرت عمي حافظ وعدهة ٣ بنات وولد واحد ...
بسمة تلبك بسرعة : يعني امي ...

خاتون : مو كلنة بالسرة يعني ندري بيهة امج .... المهم وهاي الي بصفهة مرت عمي حاضر وعدهة ٣ ولد وما عدهة بنات ...
بسمة وهي تسكت خاتون : اوكفي خلي اكمل اني الباقي ... هاي تكون عمتي ام ناصر وعدهة ٢ بنات و٢ ولد ... والي بصفهة الي نافشة ريشهة ونافخة روحهة تصير عمتي ام عبدالله يعني مسمية ابنهة على اسم عمو عبدالله لواكة ..
خاتون وهي تسكتهة : عزة بعينج اسكتي لا تسمعج ...
بسمة بعدم اهتمام : عادي خل تسمع اني ماحب اجذب ... المهم هاي ام عبدالله عدهة بنية وحدة و٢ ولد ... والي بصفهة هاي عمتي ام حسنين عدهة اربع بنات وولد واحد والله يخلصني من شرة
وارتاح ...

التفتت عليهة بإستغراب : منو قصدج
بسمة : بعدين اكلج بالاول خل اكملج ...
هسة دور القطار هذا مالت البنات كلة ... اول وحدة اسمهة زينة بت ام ناصر والي بصفهة اختهة زينب .... وهذني الاربعة المسطرات بنات ام حسنين ... اول وحدة شمس والثانية حوراء .. والثالثة هاي الفاهية الفاتحة حلكهة تكون دعاء .. وهذيج الرابعة شوق ... والي كاعدة وحدهة ولابسة نضارات طبية هاي مرام اختي الزغيرة ...
حجيت بتردد : والي جانت قبل شوية هنا وطلعت تصيح منو ...

خاتون بإستغراب : منو صيح هنا ...
بسمة وهي تفر بعيونهة : يعني منو غيرهة اكيد نورة ... هاي نورة تصير بت ذيج النافخة ريشهة يعني بتهة الوحيدة ... هاي شايفة نفسهة ومغرورة وتغار من كل وحدة حلوة ... خل تولي لا تهتمين الهة ...
اجت دعاء علينة مبينة عمرهة ما يتجاوز ال ١٦ سنة .. وتحجي وية بسمة بفهاوة وتجر بالحجي جر : بسمة هاي الورقة دزهة حسنين الج ..

بسمة وهي تقلدهة بالفهاوة : ماريدهة ... رجعيه الة
دعاء : عفية ترة كال مهمة واخاف يعصب علية ...
بسمة : شيعصب هو انتي بس ينفخ عليج تطيرين ... دجيبي ...

اخذت الورقة منهة ... اني ضحكت عليهة شلون تحجي ...
بسمة وهي تفتح الورقة بتأفف وتقراهة بصوت خفيف وبس احنة نسمع وياهة : بسمتي .. مشتاقلج .. الله عليج اليوم لا تحرميني من شوفتج ... لشوكت تبقين هيج ... شوكت تحسين بية وتريحين كلبي ...
سدت الورقة بتأفف وتملل : كل مرة نفس الحجي ... عفية ولد ولا يتعب ...

ميامين : شبيج شنو يضايقج ...
خاتون : لا يحبهة ... صارلة ٤ سنوات يحاول وياهة والخانم قافلة اتكول ماريد اتزوج وخاصاً هو ... والولد ما يعيبة شي اشو صيدلاني ويشتغل بالمستشفى وية الولد وحلو وشخصية واهم شي يحبهة وهي تدلل علي ...

ميامين : خاتون لا تضغطين عليهة .. خليهة تقتنع بنفسهة ...
بسمة : فدوة لهالحلك اول مرة وحدة تفهمني ..

دخلت مها واجت بفرح : بسوووومة ...
بسمة وهي تكوم وتحضنهة : هلاا بالصاكة ...

خاتون وهي تهمسلي : شوفي بسمة شراح تسوي
التفتت وجان بسمة تبوس مها بخدهة بوسة قوية ...

مها وهي تدفعهة بقرف : ايييع شنو هاي ... شكم مرة كتلج لا تبوسيني ماحب احد يبوسني ... شهالقرف ...

بسمة : شسوي انتي خدودج مثل خدود البيبي مال كرط ...
ضحكت على تصرفات بسمة ... مرحة وضاربة الدنيا جلاق ...
قاطعني صوتهن وهنة يكولن : اجت جوري ...

التفتت للباب وشفتهة وفتحت عيوني على وسعهن ...

الكاتبة : سارة الشمري🖤

رأيكم بالبارت 😘 توقعاتكم للبارت الجاي حبايبي