رواية سجينة،الظلم والانتقام الفصل التاسع 9 - بقلم Renad.m

#سجينة_الظلم_والانتقام 🍂🥀

#البارت السادس والعشرون

#الكاتبة : سارة الشمري🖤

فإذا وقفت أمام حسنك صامتاً فالصمت في حرم الجمال جمال.. كلماتنا في الحب تقتل حبنا.. إن الحروف تموت حين تقال.
نزار قباني🖤

قاطعني صوتهن وهنة يكولن : اجت جوري ...

التفتت للباب وشفتهة وفتحت عيوني على وسعهن ...
جنت متوقعة ان مها احلا وحدة بعائلتهم ... بس سبحان من خلق هالبنية. ماشالله تجنن ... تشبه مها بس بعد احلا منهة ... عيونهة خضر وشعرهة ذهبي وبشرتهة بيضة وخدودهة ورديات ...

بس احس ناقصهة شي ... ماعرف شنو هو ... البنات كلهن لابسات الوان فاتحة بس هي لابسة تنورة سودة وقميص كحلي ... بس مع ذالك طالعة حلوة وعلى فكرة هم تشبه الحجية خاتون ...

الحجية وهي تفتح ايديهة الهة : يمة هلا بعزيزة كلبي ... هلا يبعد روحي ..
ابتسمت هي ابتسامة خفيفة وسلمت على الحجية : هلا بيج حبوبة ...

الحجية : شلونج يبعد بيتي ...
جوري : الحمدالله انتي شلون صحتج حبوبة انشالله زينة ...
الحجية بعتاب : شلون اصير زينة وانتي لا تجيني ولا تمرين علية ... ليش ما تسألين علية ها
جوري نزلت راسهة بحزن والحجية كالت : جا ضالة بالبيت وموديتلي هالخفيفة شني ...
بسمة : اللهم اني صائم ...

الحجية : واذا ما صايمة شتسوين ولج ...
بسمة : اني اعرف شسوي حبوبة ...
الحجية : احجيلي شتسوين ولج .. انتي بس تعاي قربي علية واني اريدهة من الله ... لو بيج خير اكعدي يمي مو شاردة ليغاد ...
بسمة وتسوي نفسهة كيوت وتحط رجل على رجل : لا بيبي اخاف اكعد يمج وتعلميني هاي السوالف مال الصياح والعصبية واني تدرين بية صوتي كوة ينسمع .. بس انتي ما شالله عليج ابد متسكتين ...

الحجية بعصبية : خايبات جيبنهة الي .. ورمتي كلبي .. كونج بت ابوج تعاي
بسمة بضحك : لا حبوبة اني مو بت ابوي.. اني بت حافظ ...
الحجية وما فهمت : شنيي ؟؟
ضحكنة على مناكر الحجية وبسمة ...
اجت جوري سلمت على خاتون وخاتون كالتلهة : جوري هاي ميامين مرت غزوان ...

هزت راسهة وابتسمت ابتسامة خفيفة ومدت ايدهة : اهلا وسهلا
رديت عليهة بإبتسامة وسلمت : وبيج اكثر ...
عافتنة وراحت كعدت وحدهة ...

ضربت بسمة بعكسي وكلت بهمس : اكلج بسمة متأكدة هاي تصير اختج ...
بسمة بصوت مسموع وهي تتوخصر : شقصدددج

حطيت ايدي على راسي وكلت بفشلة : اسكتي فدوة ترة كلهة تباوع علية ...
بسمة : اي حتى المرة الجاية تثمنين الكلمة قبل لا تكولينهة ... ترة اني احلا منهة بهواي ..
خاتون بنص عين : خفي علينة ...

كعدن مها وجوري سوة ... وطبعا مبين ان مها الي تحجي وجوري ترد عليهة بكلمة لو كلمتين وما تضحك بس ابتسامة خفيفة ... مبين الحزن بوجهة وكوة كاعدة ...
التفتت على بسمة وكلت : اسألج سؤال ...

بسمة : لا ...
ما انتبهت شنو كالت : ليش جوري هيج حزينة ...
بسمة : الطشي بعد ... مو كلنة لا ... جوري حزينة من ورة الحب
التفتت عليهة بسرعة : هاااه ؟ حب
بسمة وهي تتنهد بحزن : اي الحب ... جانت تحب فارس من صغرها .. وبقت ضامة هالشي بكلبهة وحتى هو ماجان يدري عنها .. ومن توفى تأذت كلش ... وهاي اول مرة من بعد وفاة فارس هي تجي لبيت عمي ...

بقيت مصدومة .. التفتت عليهة واتأملهة ومقهورة عليهة ... خطية واني اكول شبيهة .. الله يعينهة ..

دخلت نورة الي قبل شوية صيحت علية .. كعدت وحطت رجل على رجل ...
انتبهت ان هي الوحيدة من البنات لابسة بنطرون ازوك وضيك هم ولابسة وياه قميص احمر قصير ...
ملامحهة عادية يعني مو ذيج الحلا بس حاطة مكياج اطوخ مني ...

الحجية وهي تدفع رجلهة بالعوجية وتنزلهة : اكعدي عدل واحترمي الكبار الكاعدة ...
ام نورة : يمة على كيفج وياهة لا تتأذة رجلهة ...
بسمة بصوت : العار ما يموت لا تخافين عليهة ...
ام نورة وهي تحضن بنتهة : يمة سمالله على بتي ... ولج بسمة ابيش طالبتهة شعندي غيرهة ...
بسمة بسخرية : اي احضنيهة بعد اقوى خاف تطير لان كوة لازمينهة ...

نورة بعصبية : انتي شبيج اليوم ... لا تحجين عالخفة ترة انتي الي ما تكعدين ...
بسمة ببرود : هسة من اجيت لحد الان شفتيني كمت من مكاني ... لو انتي الي من اول ما اجيتي بس تتعاركين وتصيحين ... اندري شجاج
نورة وهي تباوعلي بنضرات غضب : وهذا منو الي وصلج الحجي ..

بسمة على نفس برودهة : ميحتاج احد ايكولي ... شنو قابل نسيتي نورة .. هي هاي صارت طقوس بالنسبة الج .. اي مكان تدخليله تتعاركين بي ... عووذة ..
نورة بعصبية : انتي شبيييج اليوم ... لو الا تردين اتعارك وياج يلة ..

بسمة بحماس واستعداد وهي ترفع ردانات قميصهة : يلة كومي .. هي اجت منج اليوم ...
الحجية صاحت بعصبية : كاااافي انتي وياهة ... ما تحترمن جبير كاعد هنا ...
لو تسكتن لو تطلعن برة ...

سكت هنة ثنينهن وكعدن ... اتعجبت من جرأة بسمة .. يعني ما تحسب حساب لشي وتذب الحجاية بدون خوف ... ورغم وجود عمتهة هي تتعارك وية بتهة ...
حجيت بصوت خفيف : بسمة انتي دائماً هيج ؟
بسمة بإستغراب : شلون يعني ؟
ميامين : يعني ما تخافين من شي وما تستحين وتحجين الحجاية مهما كانت ..

بسمة : هاي لان ما اعرف اجذب سويتوني ما استحي ... اي حبيبتي اني دائماً هيج يعني الي اكرهة اكولهة بوجهة اكرهك والي احبهم اسولف واضحك وياهم ... يعني مثلا نورة ما احبهة واضوج من امها لان حيل منطيتهة مجال ومسويتهة شيخة علينة ومدللتهة لان الوحيدة عدهة ...
ميامين : والله احسن ابقي هيج ... بس اسألج سؤال ...

بسمة : انتي شكد تسألين ... كولي ..
ميامين : انتو تسوون تطعيم بالعائلة لو كوكتيل لو شنو ..
بسمة : ليش ..
ميامين : يعني مثلا جوري حلوة وانتي متشبهينهة ابد .. ومها هم حلوة بس خاتون ما تشبهة ابد ..
بسمة وهي تلتفت على خاتون وتأشر علية : هي هاي ميامين الخبصتيني بيها ...

خاتون : اي هم مو صوجهة .. صوجنة احنة الكاعدين يمج ونسولف وياج وانتي تمدحين بغيرنة ..
ضحكت عليهن : خلص اسفة والله انتن محبوبات اكثر منهن ...
خاتون : اي عيني بس خل تتعارك وياج مها وارجعي كولي منو الاحلا ...

قاطعنة صوت نورة وهي توجه سؤال لمها : اكول مها .. ما ناويين تزوجون غزوان ..؟
مها : غزوان ممفكر بالموضوع هسة ... يعني حتى عيب تحجينهة لان اخوه ما صارلة كم شهر من توفى وانتي اتكولين زوجوه ... وبعدين وين نلكى وحدة تستاهلة ... بعدنة ملاكينهة
نورة : وليش تدورون ممكن تكون موجودة يعني من الاقارب ..

مها ببرود : لا عيني منريد من الاقارب .. نريد وحدة غريبة حتلو محافضات ..
ام نورة وهي تباوعلي بنغزة : بس القريبة اولى من الغريبة ..
مها : لا مو شرط ... الغريبة ممكن تكون اشطر من القريبة .. وهم احلا بهواي .. عدكم بنات الكوت
التفتت علية وكملت : مثلا ميامين ... حلوة وشاطرة ..

هنة يحجن واني اهز برجلي من العصبية ... وضاغطة على ايدي ... استغربت من حجت مها علية ..
التفتت بإستغراب على خاتون
بسمة بهمس وضحكة : لا تفرحين ترة كرهة لنورة يمكن اكبر من كرهة الج ... يعني مو محبة بيج بس تريد تسكت نورة لان تلزك ..

حجيت بأستغراب : وليش تلزك شعدهة ..
بسمة : حبيبتي هاي من زمان حاطة عينهة على غزوان بس هو ما ينطيهة وجه لان ثكيل ... ولو تشوفينهة من سمعت بي تزوج تخبلت ... وحاقدة عليج واكيد من شافتج حلوة حقدت بالزايد ...

التفتت على نورة وشفتهة تباوعلي بحقد ورافعة حاجبهة ...
دخلت ام غزوان ووراهة بنية مبينة عمرهة يمكن ٢٥ لو اقل وشايلات التمر واللبن وحطنة عالميز ...
كامت مها واخذت الماعون من امهة وحطتة ...

حجت ام بسمة : خية ام غزوان دكعدي يمنة ما شفناج ... مو هاي البنات خلي هنة يكومن بمكانج ...
ام غزوان : لا دادة اني طردتهن ماعرف اشتغل وهنة فوك راسي ... وانشالله خلص الشغل وهذا التمر واللبن افطرو ترة اذن ...

كامت خاتون ومها وضيفن التمر واللبن عالكاعدات ...
على ما كامن للصلاة فرشت ام غزوان السفرة والتفتت علية : كومي ساعدينة عيني .. لو هم الا نطلب منج ...
كمت بسرعة وياهة وبدينة نشيل بالمواعين وهي خطية وجهة احمر من الطبخ والتعب ...
كالت : بالاول سفرة الزلم ..

صبيت الاكل وياهة بالمواعين ومها تحط بالصواني
... وخاتون ووياهة البنية الي جانت وية ام غزوان هم يحضرن بالاكل ..
طبعاً لفيت حجابي للإحتياط خاف احد يجي ...
دخل مؤيد ومن شافني نزل راسة : شلونج خوية
رديت علي : الحمدالله الله يسلمك انت شلونك ...
مؤيد : الحمدالله ..

كمزت على صوتة الي اميزة من بين مليون صوت : مؤيد فضهة وعوف السوالف ...
بدو يشيلون بالاكل ... دخلو كم ولد ما اعرفهم وكلهم لابسين دشاديش ... ما انتبهت كم واحد بس بقيت ارتب بالاكل بالصواني ...

حاجتني ام غزوان وهي مخبوصة بالاكل : كومي شيلي الصواني اطيهن للولد بسرعة ...
شلت صينية ورحت للباب مالت المطبخ وصار بوجهي غزوان ... كال بعصبية وهو ياخذ الصينية من ايدي : ضمي كذلتج وامشي طبي للمطبخ لا تشيلين صواني وتطلعين كدام الولد ...

هزيت راسي ودخلت وخاتون اشرتلي ان ادخل لا يعصب اكثر ...
دخلت نورة للمطبخ وحجابهة لنص شعرهة وكذلتهة طايحة وملابسهة ضيكة وكالت بصوت كلة دلع : هلو غزوان شلونك
غزوان نزل راسة بسرعة وكال : هلا بيج خوية ...
اول مرة اشوف غزوان مستحي .. يعني مو بس مؤيد هيج كلهم يستحون ... والله ماشالله على اخلاقهم خوش ربيتي ام غزوان ..

نورة وهي تتماوع : هاي شبيك غزوان منزل راسك ترة عادي اني مو غريبة ...
بسمة وهي داخلة للمطبخ ولابسة حجابهة ومستورة كالت : صيامج كلة طار اليوم .. شلون طالعة كدام ولد ما يحرم الج بملابس ضيكة وشعرج طالع ..
نورة وجهة كام ينطي الوان ...

بسمة وهي تلتفت لغزوان وكالت : شلونك غزوان ...
غزوان وهي مبتسم ومنزل راسة : الحمدالله بسومة انتي شلونج ...
رفع راسة والتفت علية وابتسم وكال : ميامي بدون زحمة عليج اطيني الخبز من وراج حبيبي ...

فتحت عيوني بصدمة .. كال حبيبي .. غزوان كالي حبيبي ...
صحاني ضربة بسمة وهي تكول : ميامين شبيج .. رجلج يحجي وياج
التفتت بسرعة واخذت الخبز وانطيتة الة وهو اخذة وطلع ...
التفتت على نورة ووجهة ينطي الوان من العصبية ...

دخلت ام غزوان وكالت : يلة بسرعة خلي نحضر سفرة النسوان ...
بدينة نصب الاكل للنسوان ونشيل ونرتب بالسفرة
خلصنة السفرة وكلهن انجمعن عليهة ... الحجية صاحتني وكعدتني يمهة وكل شوية تشيل وتحط كدامي ...

حجت ام نورة وكالت : ميامين انتي صارلج يمكن ٦ شهور متزوجة .. شنو لهسة ما صار عندج حمل .. ترة نريد نشوف اطفال
ما عرفت شنو ارد ...

بس ردت الحجية صدمهن وسكتهن :.......

الكاتبة : سارة الشمري 🖤

هلو حبايبي .. اتمنى حبيتو البارت ... توقعاتكم للبارت الجاي تتوقعون شراح يصير ؟

#سجينة_الظلم_والانتقام 🍂🥀

#البارت السابع والعشرون

#الكاتبة : سارة الشمري🖤

وتسأليني ما الحب؟ الحب، أن أكتفي بك ولا أكتفي منك أبداً.
نزار قباني🖤

حجت ام نورة وكالت : ميامين انتي صارلج يمكن ٦ شهور متزوجة .. شنو لهسة ما صار عندج حمل .. ترة نريد نشوف اطفال
ما عرفت شنو ارد ...
بس ردت الحجية صدمهن وسكتهن : بعدهة زغيرة عالجهال توها بت ثمنطعش .. ليش ما تزوجين بتج وتشوفين اطفالهة مو هالصار عمرهة ٢٥ وهي بعدهة ما معرسة ...
نورة بغرور وهي تباوعلي : بعدني انتضر الشخص المناسب الي يستاهلني ...
الحجية : وهذا ياهو الميت عليج يا مكرود ...

بسمة ضحكت بصوت والكل التفت الهة .. هي انتبهت على نفسهة وسوت احم وهي بعدهة مبتسمة مبينة كوة لازم ضحكتهة ...
التفتت علية وابتسمت وغمزتلي وهي تأشر براسهة على نورة ...
ما لحكت افتهم الا على صرخة نورة : يالغبيييييية .. شسويييتي عدمتي بنطروني ...
بسمة وهي حاطة ايدهة على حلكهة ومسوية نفسهة مصدومة بس مبينة جذابة ...: ياااا اسفة حبي ما انتبهت ... يلة مو مشكلة بدليهن اصلا هاي ملابسج ضيكة مال اغراء يعني مو مال ينلبسن بعزيمة وبيهة ولد وهم برمضان ...
الحجية : اول مرة تحجين شي يعجبني يبسمة ...
بسمة وهي تشاورني وتحجي مصري : شرشحتهة اكثر ما هي متشرشحة ...
حبست ضحكتي كوة لان ما ناقصة مشاكل ...
اباوع على نورة الي كامت من السفرة حتى تغسل ملابسهة من اللبن الي كلبتة بسمة دولكة كاملة عليهة ...
اباوع على الكل ملتهي بالفطور ما عدا جوري .. منزلة راسهة وصافنة وتحرك الخاشوكة بالماعون ...
صدك انقهرت عليهة لان ادري مو سهل فراك الي نحبهم ...
انتبهت على بسمة جانت عكس جوري تماما ... حلكهة ما وكف من الاكل ... عزة هذا وين يروح الاكل حتى ما يبين بيهة جنهة عصفور ...
همستلهة : بسمة على كيفج لا تغصين ... ترة مو زين
بسمة : انتي هم تحسبين شكم لكمة اكل .. ترة ما احب احد يحاجيني واني اكل ...
سكتت وضحكت عليهة .. مستمرة بالاكل ولا عبالك احد موجود ...
خلصنة الاكل وكمت وية البنات عزلنة السفرة ...
واكفين عالسنك ونعزل بالمواعين اني وخاتون وبسمة ...
سألت خاتون : خاتون منو هاي الي لابسة اخضر الي تساعد عمتي مساع ..
خاتون وهي تبتسم : هاي مروة بت خالي ...
استغربت : لعد شعجب هنا
خاتون : هي متزوجة هنا ... ورجلهة حمزة صديق غزوان الروح بالروح ... تزوجهة وجان يحبهة من زمان ... جانت تجينة دائماً وتبقى يمنة فترة وهو شايفهة اكثر من مرة وحبهة ...
ابتسمت : شكد حلو .. الله يحفضهم لبعض ...
دخلت بسمة وهي تضحك : بنات فاتكم شكل نورة وهي كاعدة فوك ما تقبل تلبس التنورة الطويلة تريد الا بنطرون ...
ميامين : بسمة ترة عيب ان انتي تبدين بالمشاكل وهي ما حاجية وياج ... والمفروض متسوين الي سويتيه اليوم ...
بسمة : خل تولي تستاهل ... وبعدين اني ادري بيج ماراح تردين لهالسبب تصرفت بمكانج ... اني اريدهة من الله .. ولج مورمة كلبي عبالهة نفسهة ملكة جمال .. مو هاي احنة حلوين وما انغرينة مثلهة ..
ضحكت عليهة وفعلا بسمة احلا بهواي من نورة ... بسمة شكلهة كولش حلو .. حنطاوية وعيونهة وساع وناعسات وملامحهة كولش حلوة ...

دخلت مها وهي شادة راسهة : افففف .. فدوة خلصني من هالعلة الفوك .. والله لو ما عيب جان جريتهة من شعرهة وطلعتهة من غرفتي ...
بسمة وهي تضحك : شبيج شسوتلج ..
مها بعصبية : انتي اسكتي .. كلبتي عليهة اللبن واني ابتليت بيها ... روحي شوفيهة كلبت كنتوري فوك جوة ... يعني تدري بقياساتي ما تجي عليهة بس خباثة تدور بكنتوري ...
خاتون وهي تلتفت على مها وبيدهة المفتاح : الحمدالله غرفتي قفلتهة تحسباً لهيج موقف ...
تأففت مها وبعدين انتبهت علية وكالت بعصبية : ماجان ناقصني غيرج ... شعندج طابة للمطبخ ... مو كتلج ماريد اشوف وجهج ...
بسمة : شبي وجهة غير هاليخبل ويرد العافية ...
مها : لا والله يجيب الهم والفگر ...
ميامين : شكراً حبيبتي ما قصرتي .. بس اجيت اساعدكم بالمواعين ...
مها وهي ترفع رداناتهة : ما يحتاج احنة نغسلهن بس جفينة شرج وامشي من كدامي لان بس اشوفج تطلع ام العبيد عندي ..
استغربت : منو ؟
خاتون بضحك : هاي الحالة العصبية الي عند مها ... تصير ما تتحاجة وشكو احد يحجي وياهة تعيط بي وشوية تضربة ... ومن تصير هيج نسميهة ام العبيد ..
بسمة وهي تضحك بصوت ... مها وهي تحط ايدهة على حلك بسمة : كافييي ضحكتج فضيييحة .. العالم كلهة سمعتهة ...
عفتهم ودخلت يم للصالة ... شافتني ام غزوان خزرتني بس ماكدرت تحجي لان الحجية موجودة ...
شفت ماكو مكان عالقنفات .. وين اكعد .. بقيت واكفة ...
: تعاي اكعدي هنا ...
التفتت على جوري وهي تسويلي مجال يمهة ...
ابتسمتلهة ورحت كعدت بصفهة ...
رجعت هي لصفنتهة وتشرب الجاي مالتهة بهدوء ...
التفتت علية وكالت : ميامين ؟
ميامين : هاا؟
فاجأني سؤالهة الي اجة بدون مقدمات : ليش اخوج قتل فارس ...؟؟؟
التفتت عليهة وكلت : اخوية ما قتل احد ..
عقدت حواجبهة وكالت : شلون ما قتل احد ... وفارس منو قتلة .. والادلة كلهة على اخوج....
ميامين : اني بكد ما واثقة من شوفتج هسة واثقة بأخوي ما يقتل وخاصاً فارس ...
جوري : اذا هو ما قتلة لعد ليش هسة هو بالسجن ..
ميامين : سجنوه علمود كم بصمة لكوهة عالسلاح .. والفو قصة من يمهم واعتقلو اخوي ودموره ودمرو حياتي ...
جوري : شوفي مهما تكون ثقتج عالية بأخوج هذا ما يدل على براءتة ... واصلا تدرين اني شكد مقهورة عليج لان جاي تتحاسبين وتتأذين من ورة شخص نايم بالسجن بكل راحة وياكل ويشرب وكلشي مابي ... يعني انتي جاي تدافعين عن شخص وانتي كلشي جاي يصير بيج بسببة ... عبالج ما ادري غزوان شلون جاي يعذبج ... ترة انتي مالج ذنب بشي ... لا تدافعين عن شخص مجرم ويستاهل الموت بدال السجن ...
ميامين : صدكيني جوري راح يجي اليوم الي تعرفون ان اخوي بريئ من كل هاي الذنوب والجرائم الي انرمت الة ...
جوري : اتمنى ان يكون كلامج صح .. بس حتى انتي ترتاحين من هالعذاب ...
اوففف يا طيبة كلبج جوري ... رغم اني اخت الشخص الي كلكم معتبرينة قاتل .. والي انقتل الشخص الي تحبينة ... بس مع هالشي انتي مقهورة علية وتتمنين ان اخلص من هالعذاب ....

دخلت مها وكالت : حجية راح يجون الولد يسلمون عليج وعالباقين ...
الحجية : مية هلا حبوبة خل يطبون مامش من غريب ...
كمت لبست عباتي لان مالي خلك غزوان يعصب علية ....
البنات لبسن حجاباتهن ... دخلت نورة بسرعة للصالة وعبالك تريد تلحك خاف يفوتهة شي ...

كعدت بالاخير وجوري بصفي ...
دخلو مجموعة من الولد ... كلهم لابسين دشاديش ...
احلا شي بينهم غزوان ومؤيد واكو واحد ثالث ما اعرفة منو ...
الباقين مبينين اعمارهم بالعشرينات ...
دخلو سلمو على الحجية وعلى العمات ... سلمو من بعيد عالبنات ...
كعدو عالقنفات وغزوان رفع عينة وشافني .. ابتسم ابتسامة خفيفة من شافني لابسة عباية ...
نورة : غزوان شخبارك ...
غزوان : الحمدالله على الله ...
دخلت خاتون وبيدهة صينية الاستكاين مالت الجاي ... ووراهة مروة شايلة صينية اللقيمات ...
كمزت نورة واخذت الصينية من مروة ع اساس هي تضيف بمكانهة ...
بدت خاتون تضيف الجاي ... وصلت يم واحد كاعد وشكلة مو راحة ويباوعلهة بنضرات مو حلوة مبين ملعب ... وهو الوحيد بينهم الي ما نزل راسة عن البنات وكلساع يباوعلي ... اففف شبي هذا ..
اخذ استكان الجاي وكال : شكرا خاتونة ..
خاتون عافتة وماردت علي وكملت ...
وصلت لغزوان اخذ الستكان منهة بأبتسامة وكال : عاشت ايدج خاتونة ..
خاتون بأبتسامة : الف عافية ...
دنكت نورة بالصينية كدام غزوان وكالت : تفضل ابن خالي .. حلي وية الجاي ... ترة كولش طيبة ...

يربي بودي اكوم اكطعهة ... لزكت على غزوان ...
غزوان مد ايدة كدامهة : شكرا .. اريد اشرب بس الجاي ...
نورة بدلع : وترد ايدي الي تقدملك الحلا ... ترة اني كولش احب الحلويات وخاصاً هاي اللقيمات ...
غزوان : لا يابة ما نردج ... وهاي اخذنة ...
مد ايدة اخذ قطعة .. هي ابتسمت والتفتت علية وهي رافعة حاجبهة ... بمعنى على عنادج ...
رديتلهة الابتسامة واني اباوع وراهة ...
هي استغربت ابتسامتي والتفتت على غزوان شافتة ذاب القطعة عالطبلة بدون ما ياكل منهة شي ...
نورة : ليش ما اكلت منها غزوان ..
غزوان ببرود وهو يشرب من الجاي : ما احبهة هاي الحلاوة ... واصلا اكره الحلويات كلهة ...
ابتسمت واني اباوع علي ... فدوة لكلبة والله سكتهة ...
حسيت بهزة وراي .. التفتت شفت بسمة وخاتون واكفات يمي ...
وخاتون مبتسمة .. وبسمة سادة خشمهة وحلكهة ووجهة احمر .. : شبيج وجهج احمر ...
بسمة : اسكتي ترة كوة لازمة روحي لا تطلع ضحكتي المفضوحة ...
ضحكت عليهة ... اجت كعدت يمي على ايد القنفة ... وكالت : خل اعرفج عالشباب هسة ... شوفي الي كاعد عالكرسي ابو الدشداشة الرصاصية فدوة الطولة هذا اخوي احمد ... واللوكي الي بصفة ويسولف وياه ابو دشداشة بيضة هذا حسنين ابن عمتي الي كتلج علي ...
التفتت عليهة بصدمة : هذا وما تردينة وج مو هاليخبل ...
طبعا هو نفسة الي كلت احلا تلاثة بيهم ....
بسمة : اسكتي فدوة خل يولي ... خل اكملج ... شوفي هذا العوينجي الي ما نزل عينة عن البنات ايكون عمران ابن عمي حاضر وهو الي جان خاطب خاتون من عابت شكلة ... وهذولة الي بصفة اخوانة التوم رؤوف وعبدالله ... والي بصفهم تعرفينهم مؤيد وغزوان ... وهذولة المزعطة الباقين اعمارهم ما تتجاوز ال١٨ ولد عماتي ...
ميامين : يعني اكبر واحد من ولد عماتج حسنين مو ...
بسمة : اي حسنين ... هو بكد مؤيد ...
التفتنة على خاتون شفناهة طابكة حواجبهة بعصبية ... التفتت على وين تباوع شفناهة تباوع على عمران ...
بسمة : خاتونة شبيج ... خل يولي عوفي ...
خاتون بعصبية : ما تشوفينة شلون اكلني بعيونة ...

قاطعني صوت خفيف : والله مبين يحبج .. شوفي ما نزل عينة عنج ...

الكاتبة : سارة الشمري🖤

ارائكم حبايب وتوقعاتكم للبارت الجاي 😘

#البارت الثامن والعشرون

#الكاتبة : سارة الشمري🖤

هل تسمعين أشواقي عندما أكون صامتاً؟ إن الصمت يا سيدتي هو أقوى أسلحتي.. هل شعرت بروعة الأشياء التي أقولها عندما لا أقول شيئاً؟
نزار قباني🖤

التفتنة على خاتون شفناهة طابكة حواجبهة بعصبية ... التفتت على وين تباوع شفناهة تباوع على عمران ...
بسمة : خاتونة شبيج ... خل يولي عوفي ...
خاتون بعصبية : ما تشوفينة شلون اكلني بعيونة ...

قاطعني صوت جوري خفيف : والله مبين يحبج .. شوفي ما نزل عينة عنج ...
خاتون بعصبية : حبة برص انشالله ... اني اكرهة اموت منة ... ابو النسوان ... عوينجي كلساع يباوع على وحدة... وبكل عين وكحة يحجي وياي ...

جوري الي لاول مرة تضحك ... شبعت ضحك ووجهة صار احمر من كثر الضحك ...
خاتون وهي طابكة حواجبهة : على شنو الضحك بلة ...
جوري : حرام عليج هذا كلة طلع بغزوان .. لا وادور تدعين علي ..
خاتون : ليش غزوان شعلي اني احجي على الزفت عمران ..
جوري بإبتسامة وهدوء : بس اني ما جنت اقصد عمران بكلامي ... اني وجهت الكلام لميامين .. كلت ان مبين يحبهة ومانزل عينة عنهة ...
اني انصدمت منها وبسرعة التفتت على غزوان وصدك شفتة صافن علية ...
نزلت عيني بسرعة وجوري همستلي : هسة صدكتي من كتلج ان يحبج ...
ميامين : لا اكيد يتهيألج .. غزوان مستحيل يحبني .. هو اصلا كال ان يحب وحدة ويموت عليهة ..
جوري وزادت ابتسامتهة : وليش مو ممكن تكون هاي الي يحبهة هي انتي ..
رديت عليهة بإحباط : لا ايكول احبهة من سنة .. واني صارلي بس ٦ شهور من اجيت ...
جوري : عادي ممكن يكون كال هالشي بس حتى يضيعج وحتى لا يخطر ابالج ان ممكن تكونين انتي ...
التفتت عليهة واني اعقد حواجبي بتفكير : وانتي شنو الي يخليج تفكرين بهالشكل ...
جوري : لان ببساطة اولاد عمو عبدالله كلهم ما يرفعون عينهم اذا جانت الكعدة بيهة بنية ما تحرم الهم ...
حجت بحزن : وخصوصاً فارس .. جنت اتمنى منة نضرة وحدة .. المهم وهسة شوفي غزوان شلون ما نزل عينة عنج .. وانتبهتلة يباوع على كل حركة تسوينهة .. مو بهدف المراقبة لا .. بالعكس مبتسم وهو يباوعلج وما منتبه اذا احد شافة لو لا ..
واكو من اكدلي هالشي ...
باوعتلهة بإستغراب هي فهمت واشرت على نورة ... : شوفيهة شلون معصبة من نضراتة الج .. اكلتة بعيونهة وهي تشوفة شلون ما يباوع على غيرج ...
بقيت مفهية ومصدومة من كلام جوري ... يربي معقولة يكون كلامهة صح ...
جوري : ترة على فكرة انتي هم تحبينة ... لا تنكرين ..
التفتت عليهة بصدمة : شمدريج ...
جوري بإبتسامة : مبين من عيونج من وكفت نورة يمة ... وهم اني مريت بنفس حالتج ...
حزنت على حالهة مبينة جانت تحبة كولش ...
كملت : ميامين انتي لازم تستغلين هذا الحب حتى تكدرين تحافضين على نفسج ...
ميامين : شسوي يعني ...
جوري : مثلا البسي تعدلي تكشخي .. ولا تنسين اهم شي الابتسامة ...
ميامين : هو اني يمتة اشوفة حتى يشوفني كاشخة ... يجي بليل ومباشرة يصعد لغرفتة وينام ..
جوري : شنو لعد انتي مو وياه بنفس الغرفة ...
ميامين هزيت راسي بلا ... وكلت : اصلا ذاك اليوم من سافر ......
حجيتلهة شصار بيومهة وان من بعد الي صار ما شفتة كعد بالبيت ...
ميامين : اصلا خليني مرتاحة ... عالاقل صار ما يضربني ...
جوري بإبتسامة : براحتج لعد .. الله يوفقج انشالله ... ويعينجً...
ابتسمتلهة والتفتت علي واني افكر اذا هو صدك يحبني لو لا ...
كام غزوان وكال : يلة احنة نستأذن .. عندي شغل لازم هسة اطلع ... تعاي ميامين
الحجية : عوفهة متونسة وية البنات ... بعد شوي احنة نوديهة لبيتهة ...
غزوان : حجية اريدهة تحضرلي ملابسي واصلا الوقت تأخر شوفي الساعة راح تصير بالعشرة ... كومي ميامين ...
كمت سلمت عالبنات وطبعاً بسمة حاضنتني وتبوس بية ...
غزوان صاح : فضييهة ..
عفتهة بسرعة ومشيت وصلنة للحوش ووكفنة صوت بسمة : لحضة غزوان ..
غزوان التفتت وهو منزل راسة : امري بسمة ...
بسمة برجاء : اطلب منك طلب كول تم ..
غزوان بنفاذ صبر : تم كولي ..
بسمة : اريد كل فترة اجي حتى اشوف ميامين ... اني ردت اجيكم من قبل بس خفت انت ما تقبل لان خاتون كالت ان هي وكوة سمحتلهة ..
غزوان بإبتسامة : بسومة اكيد ما راح اطردج من بيتي .. ومثلا اذا طردتج من بيتي راح تسمعين الكلام وتطلعين ؟؟
بسمة بغباء : لا ما اطلع ليش ..
غزوان : لعد ليش الغباء .. تعاي بأي وقت ... اهلا وسهلا بيج ...
اني فرحت من سمعتة وضحكت لبسمة الي هي فرحت وكالت : اي هذا ابن العم الصدك .. هو هذا ابن الجاسر ما يطرد من الباب ...
غزوان : بسمة لا تطولين بالحجي .. يلة امشي

اشرت لبسمة بمع السلامة ومشيت ... رجعت للسجن ولجو الكآبة ...
غزوان بس دخل شمر روحة عالقنفة ... استغربت مو ع اساس يريد يطلع ...
ميامين : يا ملابس احضرلك .. مو كلت تريد تطلع ..
غزوان : ماريد اطلع .. ردت اطلع من يمهم لان راسي صار شكبرة من السوالف ...
حجيت بتردد واني خايفة : احم .. غزوان
غزوان وهو مغمض ويفرك براسة : همممم
حجيت واني افرك بيدية وخايفة : بما ان اليوم اول يوم رمضان .. اكدر اطلب منك شي ..
غزوان : احجي شتردين ..
ميامين وعيوني غوركت : فدوة خل اعايد امي عالشهر ... هذا اول رمضان الي بدونهة ...
غزوان ووخر ايدة من عيونة وباوعلي : شكم مرة طلبتي مني هالشي واني رفضت .. ليش ترجعين وتعيدينهة...
حجيت واني دموعي نزلت : غزوان حرام عليك .. ليش تحرمني منهم ... والله مالي ذنب بشي ...
غزوان بعصبية وهو يطفر علية وايدة حاوطت ركبتي وهو يعصر بيهة : واني شذنبي .. حرمتوني من اخوي ... ولج الليل بالكوة انامة ... كوة انام واني اتخيل اخوج نايم بفراشة ومتغطي ومرتاح واخوي نايم بالتراب من ورة اخوج ...
حسيت نفسي اختنكت وركبتي وجعتني لان لابسة الكلادة مال رائد وهو ضاغط عليهة على ركبتي ...
وجهي صار احمر وكوة حجيت ...: غــ..غـزو..ان ...
حطيت ايدي على ايدة ودموعي نزلت وغمضت عيوني حيل ... وهو انتبه وبسرعة فكني ...
شهكت بكل قوتي وطحت بالكاع واني اتنفس بسرعة ودموعي تنزل ... بقيت اكح ..
هو نزل علية بسرعة ورفع راسي .. باوع لركبتي وكال بأستغراب : ركبتج تنزف ... منين اجة الدم ..
كوة حجيت واني وجهي احمر : من الكلادة ...
غزوان مد ايدة عالكلادة يريد يكطعهة بس اني بسرعة لزمت ايدة وكلت بترجي : فدوة لا تاخذهة .. ماكدر بدونهة ..
غزوان بإستغراب : وليش ؟
خفت اكولة من رائد ويعصب بالزايد ... وكلت بسرعة : لان من زمان لابستهة وماذبيتهة ابد ... وتعودت ما انزعهة ...
غزوان بعدم اهتمام : وخري ايدج لعد خل اشوف الجرح...
جاب كلينكس وحطة على ركبتي ..
اخذت الكلينكس منة واني لزمتة ..
غزوان كام وهو يريد يغير الموضوع : تونستي اليوم ... شصار وياج .. هم احد حجة وياج ..
ميامين : لا محد حجة وياي .. اصلا كلهن حبابات ..
عزوان التفت علية وكال : ونورة ؟
استغربت من كال نورة ... : وشمعنى نورة سألت عليهة بالذات ..
غزوان ببرود : لان تحبني .. وببساطة ما تسكت ... وشفتهة حاولت تغيضج ...
عصبت .. يعني يدري بيهة تحبة : اذا تدري بيهة تحبك ليش ما تزوجتهة ... مو خطية تعوفهة هيج تفتر وراك ...
غزوان ببرود : ولان تفتر وراي ماريدهة ... يعني ما اعتبرهة غير اختي .. بس هي تفكيرهة غير شي ...
حجيت بأستغراب وكأني تذكرت : صدك غزوان انتو ليش دخلتو بعمر ٣٠ وبعدكم ما متزوجين ... يعني مو زغار انتو ...
غزوان : اني ما فكرت بالزواج لان الشغل جان ماخذ كل وقتي وجنت اسافر هواي ... واخواني ما تزوجو لان ما يردون يتزوجون الا اني اتزوج يلة ...
ميامين حجيت بدون وعي وما انتبهت شكلت : العمر يخلص والشغل ما يخلص ... مو هاي انت صرت شايب .. شعرك طالع بي شيب ترة ...
هو باوع علية ورفع حاجبة ... بعدين ابتسم وتحولت ابتسامتة لضحكة
وكام يغني موال ويجر بي : عيييرتني بالشيب وهو وقارُ ... ليتها عيرتني بما هو عارُ ... ليلة عجب بالشيب تعيرني ليلة ...
انصدمت من صوتة .. هو مقطع موال زغير بس جرة واول مرة اكتشف ان صوتة حلو وبي بحة ...

غزوان ضربني بخفة على خدي وكال : كومي يحلوة سويلي جاي بلكي اخلص شغلي قبل السحور ...

كمت للمطبخ سويتلة جاي واخذتة الة للصالة ... وهو كعد يشتغل بأوراق مدري شنو ...

اني صعدت بدلت ملابسي ومسحت المكياج ... وتمددت عالجرباية ...
بقيت افكر ... يا ترى شنو حالك هسة ياخوي ... شلونة حالك ورمضانك راح تكضي بالسجن ...
والله مشتاقتلك ... لزمت الكلادة الي بركبتي وكعدت افكر بي وبأمي واهلي كلهم....

تذكرت العام الفات اول يوم رمضان ...
جانت امي مسوية دولمة عالفطور ...
الجدر عالطباخ واني كاعدة اسوي بالزلاطة ...
وامي تحضر بالسفرة ..
ما باقي غير كم دقيقة للآذان ....
دخلو رائد وحسان واحد يدفع بالثاني ... وصوتهم وصللنة وهمة بعدهم بالباب ...
رائد بعصبية : حسان وخر اني قبلك ...
حسان : لا بلة .. شنو انت قبلي ليش مسوينهة الك ...
دخلو للمطبخ وهمة يتسابقون ...
كل واحد اخذ خاشوكة ووكفو يم الجدر وفتحوا الغطا عنة ... وواكفين وواحد يباوع عالثاني ومنتضرين الاذان ...
حسان اجة يمد ايدة عالجدر بس رائد ضرب ايدة بالخاشوكة ..: وخرر كتلك اني اول واحد يضوكهة ...
سمعو صوت الاذن وثنينهم رادو يمدون ايديهم بس امي صاحت بيهم وسدت الغطا عالجدر وضربت ايديهم واخذت الخواشيك منهم ... : يلة انتة وياه ... ماكو اكل لحد ما تصلون ... خلصو صلاة وتلكون الدولمة عالسفرة ...
رائد : يمة فدوة بس وحدة .. والله احب اكلهة حارة من الجدر ...
امي : امشي كتلك ماكو ...
حسان التفت على رائد : ارتاحيت هسة كلشي ما حصلنة ..
رائد : هو اني لو انت تلطلطت ...

صحاني من هالذكرى صوت شخطة السيارة برة ... استغربت منو اجة ... غزوان اصلا هنا ...

كمت فتحت البردة ... وشفتة

فتحت عيوني من الـــــصــدمـــة ...
كوة طلعت الكلمة مني واني اشوفة ...:........

الكاتبة : سارة الشمري🖤

اعذروني بنات لان البارت قصير بس مالحكت اكتب والله البارحة جان عدنة شغل ... اتمنى عجبكم البارت ..
يلة حبايبي كلكم اكتبو توقعاتكم للجاي ... وخل اشوف منو اكثر توقعاتة صحيحة ... ومنو بيكم متحمس للقصة