رواية شائت الأقدار الفصل الخامس والعشرون 25 - بقلم نور الشمس

فرگتك تكلف عليه وتنهش بحيلي نهش
هيچي محد لچم گلبي صاحي ماضل
بي هرش
تگصر سنيني من اذكرك ومنجل فراگك
بالمخضر يحش
سالفه سواني فگدك منها حته الگلبه
مييت ينخدش
مثل طبعك وين أحصل تارسه عيونك
معزتي وداگ اسمي هنا نقش
مو وفي انه وليهسه عايش
كون هسه حذاك نايم واشم عطرك
وأنتعش
عازه الك بيه شكبرها عازة امضيف
جهوب وضال بعازة فرش

هاي الأيام تمر عليه يوم اصعب من يوم
الدنيا وگفت عندي ماكو شي اله طعم هملت كلشي
هملت نفسي وهملت حته الأحبهم غرفتي ماافوتلها الا نص الليل انعزلت حبيت الوحده مااريد شي يگطع ذكرياتي مابقالي من هاني بس الذكريات
اريد اعيد بيهن على راحتي انه وذاكرتي بس
صار الوفاة هاني اربع اشهر
انه بس بالليل ادخل البيت چنت ابقه بالبساتين لو على الشط وحدي أگعد حته كاظم مل مني من گد ماحاچاني وقنعني بس ماكو فايده مو بيدي
صعب كلش صعب فراگ شخص تحس روحك معلگه بي وبعد ماتشوفه هاني جان كلشي الي شگد مرت صعوبات علينه واختبارات هواي بعلاقتنه بيهم الي يوصلوله انه مو اخوو مجرد ابن عم چان يتمسك بيه اكثر وشگد قارنت بينه وبين حبي الوحيد شفت خوته اغلى من كلشي حسيت الدنيا حاربتنه بكلشي من وصلت ويانه الطريق مسدود وعرفت مافارگنه بس الموت تفارگنه بس هاني فارگني جسد روحه يمي
وجهي تغيير. ملامحي مو جعفر ذاك لا انه تغيرت بكلشي حته نفسيتي تغييرت
هواي صدمات مرن علي وهاي چانت الأخيره وجعتني حيل
ودمرتني .

دلال ..
جعفر حيل تغيير واحتاريت شلون اطلعه من الكأبه الي هوه بيها يتأخر بره يجي بالليل كلش مرات يلحگ عليه وبس يسلم وينام ومرات يلگاني اصلا نايمه مو جعفر الي اعرفه احتاريت شلون ارضي
حته عمتي اهله منتبهين اله صار اربع اشهر على هالحال
افكر شلون ارجعه جعفر القديم غسلت بدلت
تعطرت وحضرت نفسي فليت شعري اله ادري بي يموت علي سمعت خطواته ع الدرج سويت نفسي مشغوله ارتب بالميز دخل السلام عليكم
..هلا حبيبي وعليكم السلام شلونك شنو شو تأخرت
..الحمدلله لا ماتأخرت نفس الوكت يوميه اجي
..أي بس متأخر  جعفر جاي اشتاقلك والله
اريدك ترجع جعفر الي اعرفك قبل الگدامي مو جعفر الگدامي شخص ماجاي اعرفه
..سكتت احتاريت شجاوبها واني نفسي اعرف روحي تغييرت  دلال مالي خلگ  لاتبدين تعاتببن
البيه مكفيني
..جعفر والله طلعت روحي مليت
..تنهدت منين مليتي دلال
..مليت منك ومن تصرفاتك اني شنو ذنبي مااشوفك الا تالي الليل وتلف راسك وتنام اني شنوو قيمتي بالنسبه الك
..أللهم طولج ياروح ياقيمه تسأليني عنها ولج كلشي شنهي قيمته بدون هاني انه شنهي حياتي بدون هاني انه شنهي قيمتي بدون هاني تردين ارجع اضحك وافرح وجن ماكو شي صار ولج اخوي هاني اخوي تعرفين شنهي اخوي ولچ التصوير مايروح من بالي ولچ شفته بعيني شلون اسروهم وكتلوو . اخوي هذا الي رفض الأهانه وفضل الموت بشرف
هيج بهالسهوله انساه ترديني ارجعلج ذاك جعفر القديم ..احاچيها ودموعي ينزلن واضحك
ترديني ارجعلج اتغزل بيج واحضنچ واشمچ وچني ماعندي شي ولچ مو بيدي ماابالي غير هالمقطع انتي لو تحبيني صدگ جاعذرتيني
..عذرتك هواي جعفر هواي عبرتلك بداخل نفسي اعتذرتلك اعتب عليك بگلبي ونفسه گلبي يگلي عذري جعفر انت مو اول شخص يفقد عزيز العراق كل بيت بي شهيد وكلها اعزاز على اهلها لو كلها تسوي مثلك جان الحياة توقفت انت ماتحس بيه مشتاقتلك انه وگلبي بي حسره شكبرها
..فكرت بداخلي حچيها صح بس اني نفسي اريد اطلع من هذا وضعي ماأگدر تنهدت گتلها صبري عليه فتره وياريت اطلع من الي انه بي بس صعب والله صعب انتي ماتعذريني لأن مامجربه احساسي وان شاءالله ماتجربينه طول عمرج
..اني مااصبر اذا تحبني انت تغيير الخاطري الي تريده مني صعب
..دلال سدي الموضوع كافي
..لا مو كافي مو كافي
..لا اله الا الله شبيچ انتي شنو الضارچ
..أنت متغير والله اعلم شنوو ابالك
..ولج انتي شتخربطين شنهي البالي بالله نوريني
..أنت أبالك تاخذ ريم موو
..شنهي ولج انتي شتحچين شتخربطين ولچ شلون تتجرأين وتگليلي هيج انه اخذ مرت اخوي انتي أكيد تخبلتي
..لا ماتخبلت انه اعرف كلشي جعفر اعرف اليدور ابالك احاجي وشفته گام عليه وعيونه حمر دم لزمني من شعري وضاغط على سنونه بقوه
.. انتي ابد مو عاقله وحچيج هذا ينطيني الحق اموتچ خلاص
ولچ انه وين وانتي وين ولچ حته عدتها ماخالصه
..أخ وخر ايدك شمدريك انت بعدتها حاسبلها يوم يوم موو جرني حيل وشمرني ع الحايط
..لا اله الا الله يارب الصبر يارب ولچ دلال لاتطلعيني من طوري خليني هادي لاتسودنيني انتي شبيچ اليوم تخبلتي ولچ شبيچ شجاچ
..ولك جعفر انت دمرتني ماشفت الراحه من وراك چنت بنيه واحلم بيك وهسه يمي وامرمرني عيشتني يومين حلوات طلعتهن زقوم عليه
..لاتصيحين والولك هاي اذا گلتيها بعد السانچ اگصه
ماقصرت عليج بشي حبيتج وعشت وياج احلى ايام ماانكر بس انه هذا حضي هذا المكتوبلي اعيشلي يومين حلوات وتجيني مصايب شنهي ذنبي حته من تعاتبيني ادري بنفسي مقصر وماردت منج بس الصبر
بس انتي حيل تماديتي كل مره اعديها ألچ وأكول تتعلم على اطباعي دلال اذا ضليتي هيج تخسريني من هسه اگلج الحد اليوم انه لازم نفسي ومااريد اجرحچ مشكلتي هذا البين ضلوعي هذا المرمرني انوب ادوس علي دوس ومسويها گبل لاتجبريني على شي انه ماحابه سديت الباب وطلعت
نزلت ع الدرج سمعت امي تنعه

هاني يمه روحي ويروحگ فرد معلاگ
واثنينه مانهوه الفراگ

رحت يمها شافتني بچت
گتلها اي والله يمه اثنينه مانهوه الفراگ
والله هواي رادوو يفارگونه وماتفارگنه
يمه گلبي يريد ينطر گليلي شسوي يمه بديت اخسر كلشي يمه گلبي يوجعني وهذا مايريد ينسه أشرتلها على راسي يمه عقلي وگف يمه ادعيلي فدوه اروحلج شسوي
..عمت عيني يمه حگك اخوك شتگول على گلبي انه
..يمه انتي أم والله منطيچ صبر بس انه مالايحني الصبر ليش ماجاي اصبر وأكول الصار صار ليش روحي متعلعله
..يمه جعفر صير قوي الخاطر ابوك وابن اخوك لو صار ماله غيرك
..ألله كريم يمه بس انه تعبان محد حاس بيه
..يمه مرتك هم خطيه حگها
..باوعتلها مستغرب شمدريها گتلها شكتلج
لا والله ماشكت بس مبيينه من نزلتك منها وانت هذا حالك
..يمه حچت حچي ماينسكت علي نست روحها وحيل جاست هذا بحجيها ..أشرتلها على گلبي
.. ميخالف يمه اليحب يعتب
..يلله يمه اخذي راحتچ انه طالع
..وين يمه الدنيا ليل
..ميخالف يمه يم الولد مااروح بعيد

دلال ..
من طلع جعفر مني حيل ضجت وگلبي انترس حقد على ريم كله منها اكيد يفكر بيها وشلون ياخذها حاسب حته العدتها
الضاهر انه هيج عنده
يربي ماخلصت من ريم تزوجت وماخلصت منها انوب رجلها مات وردت على رجلي شسويلها حته ارتاح شسوي ضليت اكل بروحي أكل

ريم ..
يوميه مايعبر الليل اذا مااشبع بجي واعاتب هاني ليش تعوفني هذا الوكت ياهو الي انه والبطني وين اروح اليوم صارلي خمس اشهر بالحمل وچان كل بالي تخلص العده  بعد عشر ايام اخلص عده واروح للطبيب اشوف شنهي البطني وشلونه ولو ماكو فرحه بس هذا البقالي من ريحته ثاني يوم حاچيت عمتي وگالتلي عدة الحامل تختلف لمن تجيب يلله تفك عدتها
بقيت ابيت عيالي بس الحمدلله مريحيني صح دلال تذب الشغل الزايد عليه بس عمي وعمتي مريحيني حيل وجعفر اصلا مااشوفه ولا اسمع صوته قليل كلش اسمع صوته .
اهلي يردوني اجيب ابني هنا وبعدها اروح وياهم وحايره شلون بعمتي لو درت أمي تجيني بين فتره وفتره تشوفني وتروح

گاعدين كاظم والولد وناصر الي بعد الحادث تطورت علاقته وي ولد عمه كلش گام ناصر گلهم انه انسحب باجر اشوفكم راح الوكت هسه شيرضيلي اختكم
كاظم گله
..فراشك مفروش شوكت مايطلعونك تعال مد روحك بسكته
..هههههه افا عليك انه انطرد
..بالله گلي شتسوي لو انطردت
..لا ماانطرد اختكم كحيله ماتسويها اصلا هسه تتلگاني بالأحضان
حسن..لك انت ماتستحي تسولف گدامنه على اختنه
..ها وليش استحي شگايل انه
..ماگايل يخوي كلشي ماگايل
السلام عليكم
جاوبو وعليكم السلام وهمه متعجبين
ياهلا بجعفر هلا بيك
شافو تمدد بالفراش ونام
واحد باوع الواحد وضحكوو
ناصر ..لا الضاهر اختي اليوم غلبت اختكم
الولد ضحكو كلهم
جعفر ..شبيكم ولكم شتخربطون
لا ماكو شي بس الله عليك شجابك
..كاظم انه تعبان تخلوني ارتاح لو ارجع
..لا ارتاح ارتاح أشر للولد يطلعون
جرله جگاره انطاها الجعفر وگله شبيك
جعفر مو طبيعي
..كاظم مامرتاح من كلشي وانوب دلال زيدت همي وسوالف الغيره بدت عدها وانه مالي حيل اليوم عاتبتني وعذرتها وگلت حگها علي صح مقصر وياها بس گامت تتماده وانت تعرفني انه مااحب اطگ المره ولو طگيت تدري أيدي مو الي وخاف أذيها
..ليش شصاير بس لاطگيتها ولك
..لا طلعت لو باقي جا كسرتها والله
..لك جعفر اصحا دير بالك انت هم انتبه الروحك المرتك
..ولك والله مو بيدي وكتلك عاتبتني وعذرتها بس حيل تجاوزت تصور تگلي اعرف شنهي الشاغل بالك انت تريد تاخذ ريم ومتانيها تجيب وعدتها تخلص بربك هذا حچي وحده عاقله
..هيه هيج گالتلك حلووو معناها مخليه هذا الشي ابالها
..خاب وجع شنهو الحلو بالموضوع بس لا ابالك اخذ مرت هاني دير بالك تفكر تفتح وياي هالموضوع
..جعفر لاتغشم روحك اول وتالي انت ماخذها
..ولك لو اموت ماسويها انت هم تخبلت مثلها ولكم انتو ماكو احساس روحي مشتعله شعل على هاني شلون مفكريني اخذ مرته
..جعفر على كيفك ماگتلك هسه انوب تاخذها
..لا قسما بالله انتو تخبلتوو ولك كاظم هاي انت التعرفني هيج تحجي عليمن انه اعتب على مره تحكمها غيرة نسوان
..اني اگلك الحقيقه ليش الحقيقه تضوجك
..خايب شو ولي موصوچك صوجي انه الجيت يمك
طلعت وضليت اتمشه

كاظم ..
جعفر لازم يتزوج ريم خطيه بعدهي طفله وجايها طفل وحالت اهلها مو شي وعدنه البنت الزغيره ماتضل ارمله ننطيها الناس ماترحم. ياخذها هوه احسن مايجيها غريب ياخذها وابنها يربا بعيد عنها وعن ابووه
اليوم كيفت من گال دلال هيج گالتلي جنت احاول اقنعه وره السنه بس گلت خاف دلال ماترضه ماطول حاطه هالأحتمال ابالها معناها كلشي متوقعه

جعفر..
رجعت للبيت لگيتها گاعده وتخزرني بطرف عينها وانه هم مالي خلگها لفيت راسي ونمت
ثاني يوم الصبح كاظم يتصل عليه ماجاوبته غثني بحجايته امس .
نزلت جوه سلمت على امي ابوي مثل كل يوم
حته همه راحت الفرحه البوجوهم البيت حيل تغيير
امي اكثر وكتها تنعا وتبچي ومرات ابوي يشاركها النحيب ريم مااشوفها ولا اسمع صوتها ماتتواجد اذا اني موجود
يوميه على هالروتين
وره فتره گعدت وابالي اليوم اخر يوم للعده امي گالت لا عدتها لمن تجيب يلله تخلص
اني هم عندي صديق يعرف بهالأمور سالته واكد الگالته امي بس فهمني الحد مو معناها تنعزل نهائي مثل ممفكرين المهم ماتتواجد وياي بمكان وحدنه يعني ماكو خلوه واذا صار حچي بينه ضمن المعقول عادي واذا مضطره او تريد حاجه فهمني هواي شغلات بس عاداتنه احنه تختلف 
مرت على بالي حجاية دلال گلت ابالي صدگ
انه ليش احسب العدتها .
گلت بجوز لأن ماماخذ راحتي بالبيت وارجع بس بالليل لو خلصت بعد حته لو شفتها شافتني عادي ليش البنيه دافنه روحها واني ماارجع الا تالي الليل 

فكرت زين وشفت حزني باقي ويزيد والشخص اليطلع حزنه گدام كل الناس يصير شخص ممل
وحته الجان يتعاطف وياه يمله
الحزن يبقه بالگلب والمشتكى لله وحده هوه الي يجبر الخواطر
الأيام كفيله تنسيك أشخاص چنت بيوم من الأيام ماتتخيل لحضاتك بدونهم
صح يبقه جرحهم ومجرد ذكرهم يمك يخليك
تكره الحياة الي استمرت بدونهم وتكره نفسك على قلة وفائك بس هيه هاي الحياة وهاي الدنيا مانگدر نغيرها
تمر عليه الأيام ومايوم مااذكره وابچي ولايوم مافتحت جهازي واشوف صوره ومحادثاته الأخ والصديق صعب فراگهم كلش صعب بس حاولت يبقه حزني بيني وبين نفسي وبين الي مشاركيني الحزن يم ابوي وامي كاظم ذولي الأشخاص احسهم مشاركيني الحزن ويعرفوني شنو اريد
ناصر هم دائما يگلي سوي الي يريحك ولاتهم للعالم والي ينصحك ويگلك انت مو اول شخص فاگد ماحاس احساسك الي يلومك
مرات اگول كلامه صح ومرات اگول العالم حقها
قررت ارجع انتبه المرتي وانطيها حقها هيه هم بشر ويمكن فاهمه حزني وانعزالي عنها فاهمته بغير طريقه ابالها اني مليتها لو امهد الموضوع اصلا ماخاش مخي
دلال انه احبها بس تصرفاتها ماتعجبني
تتصرف بقلة عقل
ريم صار لازم تروح طبيبه والي عرفته ماكو اشكال اذا احتاجت شي او كلمتها بحدود

گلت الأمي ريم من زمان مارايحه طبيبه خل تهتم بروحها
..اي يمه اليوم تروح
..صيحيها الي عندي حچي وياها گدامج تره سألت وتأكدت عادي احاچيها واشوف شمحتاجه
هوه يحچي وي امه ومايدري اكو گلب تگطع بذكره الأسمها وهذا الگلب بده يحقد على ريم
دلال..
من سأل امه عليها ومهتم الأمرها اني متت حاسبلها يوم يوم وسائل ناس ومتأكد من خطوته بس حته يشوفها شمحتاجه وشتريد
گلبي احترگ حرگ وگمت احتار شسوي ضليت افتر من الصاله للمطبخ
.
صاحت ام هاني ريم
..ريم ريم يمه تعاي جعفر يريد يحاچيچ
..أجيت عمه اجيت
ريم ..
صاحتني عمتي ومن گالت جعفر يريد يحاچيج
گلبي گام يدگ ماادري خوف رهبه جان خوفي كله خاف من اجيب ياخذون ابني مني
نزلت جوه لگيته گاعد ومبدل جنه يريد يطلع
مخلي ايده وره راسه والثانيه بيها جهازه ويهز برجله حيل جنه متوتر
سلمت السلام عليكم
..وعليكم السلام هلا بيج گعدي ريم
..اباوعله مو جعفر هذا حيل متغيير السواد الجوه عينه اللحيه هاملها ومامرتبه وين گبل وين هسه
گعدت ومنتضرته يسولف وانه مدنگه
..ريم انه صحتج حته اگلج هاني الله يرحمه صح مات بس عايش ويانه احترامج من احترامه
البيت الج تعتبرينه واحنه عندچ خطار ابنج الي يصير ابنه والله يشهد عليه حته لوصاروو جهال يبقه هوه الكل بالكل بس خل يجي بالسلامه الأريده منج اي شي تحتاجينه انه موجود ورگبتي الج انتي مرت الغالي وكلشي يرخصلج ماطولج شايله ابنه
..باوعتله وبجيت گتله كلشي ماريد منك بس ابني لو صار مااريد تحرموني منه
..شفتها بجت روحي راحت عليها اباوعلها حيل متغيره وبطنها بارزه ومبينه من شفتها فرحت هاي الي عدها روح من روحي الي ابطنها قطعه من اخوي واغلى ناسي گتلها لاتخافين مستحيل احرمه منج كافي علي انحرم من ابوو ومايشوفه احرمه من امه هم شلون يصير ارتاحي من هالجانب وهاي امي يمج ودلال واي شي تردينه بلغيهن وانه حاضر
..رحم الله والديك تسلم
طلع جعفر يشوف شغله الي همله بالفتره الأخيره وذب حمله على كاظم وجان نعم الأخ الي يعتمد علي
طلع وترك دلال بنار الغيره
دلال صاحت ريم وگلتلها اليوم انتي تنضفين البيت انه تعبانه واذا مابيج حيل گولي عادي گالتها بحيله
..لا عادي انه انضف بدت تنضف وصلت للمسح ومسحت وكملت وهيه عرگانه ولازمه ضهرها ومكيفه لأن قربت تخلص
شالت دلال مصفي الطماطه وگلبته
..ياا زلگ مني
..عادي هسه اسوي
بعد جاي تمسح المكان الي توسخ
تعمدت دلال تطلع للحديقه بمداس البيت تكرمون
ورجعت دمرت البيت كله طين وصعدت بي نفسه للدرج خلته گبال غرفة ريم وراحت الغرفتها بدونه
انصدمت ريم من الي صار وحيل ضاجت هيه تعبانه رجعت تنضف من الدرج للجوه من جديد
حست بضهرها وگف من الألم وضلت تعاتب حضها وتعاتب رجلها وين عافها والمن

يتبع..