رواية شائت الأقدار الفصل الرابع والعشرون 24 - بقلم نور الشمس

مبيين مامدنگ جيلته بگصته
ابني يموت واگف هيج علمته
أوگف گتله خيدنگلك التاريخ
وياخذ من ضواك الضلمه كاتلته
اليختل ماتوون العاشگته عليه
ولاينطبگ حسها من الثغيب اخته
الحدر دخانهن هوس وماطخ راس
هذا زنود زرگه تصير فاتحته
أوليدي حط ايدك بخصر
الجنها ليل وصيح
مايعبرني واحد مره مخلفته
بعد يالمگبره شتردين
ضاگ السانچ الحلوين
ألج زفينه چم عريس
وتعصبت جم گذله
تره شبانه طبوج
جي ماعرفوو الختله
اليطبلچ گام يشتم
ريحة وادم معرسين
عافوهن دمعهن طاح
خرب كشخة البدله

جعفر ..
سديت التليفون وگلبي بي نار شابه
سمعت صوته بس ماارتاحيت لوبيدي اروح اله هناك واشوفه واريح گلبي خابرني كاظم گلي تعال مجتمعين كلنه تعال تونس ع الواهس صارلك فتره ماكو اكيد ضايج
كتله كاظم مالي خلگ گلبي معصور وضايگه بيه الوسعه اول مره هيج احس وانه خايف على هاني
..گول يالله يخوي ماعلي ان شاءالله
..ونعم بالله بس شسوي الگلبي مو بيدي الله يسمع منك هالمره لو اجه بعد مااخلي يروح يوميه راحتي مسلوبه گلبي خلص شيگضي هذا الأسبوع
..ألله كريم جعفر تعال شويه ارتاح
..لا كاظم مااگدر اعذرني الليله راجع للبيت
رجعت للبيت ومن شفت ريم گلبي عصرني اكثر شلون وصاني عليها
اباوع بوجه امي وابوي وگلبي مقبوض
گتلهم هاني يسلم عليكم
..ألله يسلمه
امي گالت جعفر اخوك زين
..يمه زين توه حاجاني گبل نص ساعه
..يمه گلبي يوجعني علي مرتين احط اللگمه بحلكي ومن اذكره اغص بيها
ماحچيت شي خفت ازيد. وگلبي حسيته يريد ينفجر اول مره يدگ بهالسرعه
گمت وگوه اجر برجليني گلت عليك ياعلي كلشي ولاهاني ..
افكر أگول هالمره بس يجي اوگفله بالباب وگفه وامنعه يلتحق بس شلون امنعه وهذا واجبه
خلص گلبي وعقلي وگف من التفكير
طبيت الغرفتي وبالي ابد مو صافي
اريد انام مااكدر غسلت واجيت تمددت ضليت اتگلب بفراشي وماطبگلي جفن للفجر
نزلت اصلي وي ابوي وانه بصلاتي ادعي وجني مأيس عبالك واحد ويگلي دعائك راح وكته
استغفرت ربي واحساسي خنگني
طلعت ومااخذت تليفوني بقه بفراشي طلعت بالحديقه اشتم هوه
ضليت ربع ساعه وسمعت اصوات ابابنه البره فتحت الباب صاروو بوجهي اخواني وابوي
أشوف كاظم يبچي والباقي اصلا مااشوفهم ولا مركز بيهم بس حركتله راسي ارد افتهم ارد انطق ارد أگله شعدكم مااگدر رجليني بادن اريد واحد يسندني
گال جعفر عمت عيني ياخويه گلبك حاس جعفر هاني راح منك
سجينه وشگت گلبي شگ حركتله أيدي گتله اش لاتكمل لاتكمل گلتها على كيف من شفت ابوي نحب
واصواتهم وبچيهم
صحت بصوت احسه وصل للسمه
هاااني ولك خويه وين رايح بعد وكتك
احتاريت شسوي اريد اطلع الحسره البگلبي
طبيت للبيت اباوع الأمي شگلها ابوي شحچيله
لگيتهم متحضرين بس مامصدگين بس سامعين صياحي عيوني مااشوف بيهن من الدمع
أبوي گالي جعفر لاتگولها
هاني مو هاني راح
اي بويه راح هاني راح
صاح ياحيف والله
ياحيف والله وهوه يصفگ بأيده
أمي موتتني كلها شي وامي شي ثاني
طلعت ماأگدر اضل يمها مااكدر اشوفها هيج

ي

طلعت وانه اكول جذب هسه يتلگانه هاني
ماميت مشتبهين كل هذا وانه مااريد اصدگ
عمامي گالو الأبوي انت ابقه احنه نروح وجعفر ويانه
بارده بيومها ثلج خمسه واحد اسوأ تاريخ بحياتي

طلعنه رحت وي اخواني كاظم وحيدر
ايدي ترعش الجگاره مااگدر الزمها اعاتبه ليش هاني ليش مستعجل خويه ابنك ماشفته ولاعرفته ولد لو بنيه خويه مرتك ياهو الها حملك ثگيل ثگيله امانتك
أمك شنهي عيشتها ولك عشت عمر وياك وبس انت حاسبك اخوو سبع اخوان عندي وماحاسبهم وياك
بس انت اخوي ليش تعوفني بعدني بعازتك هاني
طريق الناصريه البغداد صار سنه اريد بس اوصل بلكي يگولون اشتباه وصلنه والجثث ماواصله
اعصابنه تلفت كل شويه اشوفلي شاب جايبينه
وادعي ربي كون تطلع جذب .
بس گاطع الأمل ارجع اتذكر هاني وكعداتنه هاي هيه بعد لهنا وخلصنه .
اريد اتذكر شكله كامل بودي احضنه بودي اگعد وياه ساعه وبس
ولك والله فراگك كلف مالي حيله
بقينه اربع ساعات ننتضر گالو طبت الوجبه
من علنو الأسامي اول واحد صاحوو بأسمه
هاني مسلم هاني
بهاي اللحضه كل امل عندي فقدته كل لحضه حلوه ماتت وياه اريد رجليني توديني اشوفه ماأگدر ثكلن رجليه ومايعينني وصلتله
گتله هاني خويه راح الحيل وي روحتك
ولك هاني شاب گلبي گبل راسي
ولك انت حيلي خويه انت حيلي
وين الگاك بعد
اباوع الطلقه بگصته واثنين بصدره
..خويه متلگيهن ملگه حلوو
خويه متلگيهن ملگه واحد ملهوف على اعزازه
ولك هاني امك شگلها
ولك مرتك ياهوو الها
خايب ابوك انكسر ضهره
ولك خووويه اگعد اتلگاني ولك انه جعفر
انه اخوو گلبك
بجيت وحجيت وكلشي مافاد
رجعنه وشدوو التابوت فوگ السياره
گتلهم انه اضل وياه ماانزل
..جعفر بويه مايصير بارده وهذا شته الطريق طويل وانت صوابك بعده
..عمي لو تشبكوني تشبگ مااگعد بالسياره وهاني معلگ فوگ
گعدت طول الطريق وانه عدت ذكرياتي كلهن وياه
هذا هوو ولك هاني هذا حدنه خويه والله مشتاقلك
ولك اريد وياك ساعه ساعه وحده وبعد مااريد
ارد أگلك امانتك ثگيله خويه
شلون احملها ولك انه مو مثلك ولك ابنك شگله لو صار وگال وين ابووي

وصلنه السلفنه وشفت ابوي من بعيد
ضليت أشرله بيدي وادگ على راسي 
يردوني انزل مااگدر انزل اريد اضل يمه
ورجليني متشنجه من البرد .
شالوني ولد عمي شيل ونزلوه

ريم ..
من سمعت الخبر روحي فرفحت گتلهم لا هاني عدل هسه يجي هوه يريدله ولد وهذا الولد ابطني شنهي مات وماشاف ابنه اتخبلت گطعت روحي تگطع
اشوف عمتي فاقده النسوان كلها التمت امي تصيح صخام الصخمج راح ابو بيتج يمگروده ضلينه نملخ برواحتنه مابدينه شي تأخروو يله طبوو
جابوو النه شايلينه التمينه علي
كتله وين اروح وصيتمن بيه وصيتمن بأبنك
مرن ايام العزه وجنهن حلم نوبات اكول مامات هوه
هسه يجي
ضلينه على هالحال .
أمي گالت ريم بعد ماتضلين هنا انتي لازمه عده
وابوج يكول بيت اهلها اولى بيها حماج وياج نفس البيت مايصير تلزمين عده وهوه وياج
كتلها يمه شلون يصير مااطلع انه حته فشل منهم
شلون ترضينها گالت جاشلون انه احاجي عمتج
شفت عمتي بچت وهيه حيل تعبت بهالأيام گالت هاي هيه بعد مايضلي من هاني شي ريم من ريحته
وانه عندي أمل بوليدها البطنها اريده يصير گبال عيني استحت امي منها وماحچت شي

جعفر ..
هاي الأيام انكسرت كسر النفخه اطيحني مالي حيل كلشي ولاالي خلگ
هاني كلشي بالنسبه الي سويت كلشي حته مااخسره تاليتها يروح هيج مني .
طبيت امي صاحتني
گالت اهل ريم يردونها تروح يگولون تكمل عده عدنه
گتلها يمه شنوو المطلوب يعني هيه رايده لو شنهي انه گلبي خلصان ووصية هاني الي بيوم استشهاده
ريم ماتطلع من البيت وابنه يربا عدنه
.. بچت امي  جاشلون تعوف وصيته گتلها مابيدي يمه
هاني ذب عليه حمل مالي حيله شسوي هسه گولي
گالت انه مااريدها تطلع
.. هذا هو انه احاچي حمود أكله مااطب للبيت بس بالليل واطلع گبل گعدتها وماشوفها ولاتشوفني
رحت حاجيت ابوها وحمود
گتله عمي هاني وصاني بليلة استشهاده ريم ماتطلع من البيت وانه مستعد الخاطركم اطلع بيت وحدي وهيه تضل يم ابوي
.. شلون حچي هذا ياعمي
ابوك انحرم من هاني تريدني اخليك انت هم تطلع وياهو اله
گتله اطلع من البيت وماارجع بس بالليل
بس فدوه اتساهل وياي منا امي تبجي تگول بس هيه من ريحته ومنا وصيته ضاله ابالي
.. خوش فتره مااوعدك تضل دوم بس علما شويه يلتم جرحكم بويه انه هم متأذي والله بس هاي الأصول وانت اعرف المره بعد زلمتها شنهي ضلتها عدكم
..حگكم وطلعت وگلبي مهموم
شلون بهاي السالفه .
خليتها على الله
وگلت اي يادنيا شعندج بعد وياي لاتخلين ضوگيني من كلشي ضگت المر بأنواعه بس ماكو مثل مرارة
فگد الأخوو
اخواني ماتركوني صح
بس مابيهم اليسد خلة هاني جذب واحد بگلبي
اله مكانه مثل هاني جان الي أخ وصديق ودنيا بحالها

توضيت الصلاة الهجر واصليت
بخشوع وطرف خشمي الروح وصليت
أبو اصيبع خذلي يمك غاد وصليت
گبر يم المسوي فتوگ بيه

يتبع