رواية شائت الأقدار الفصل السابع والثلاثون 37 - بقلم نور الشمس

ريم..
ثاني يوم شفته ماخله عينه بعيني
عرفته نفذ الحچاه وبعد مايتنازل اكثر
أني اصلا مو قصدي اذله او يتنازل الي
لا چان قصدي يحس بيه ويشوف شلون انه تعذبت
بحچايته ضليت افكر شدعوه علي هوه هيج مايتحمل مني شيريد يعني وره كل هاي الفتره بس يگلي اروح احضنه وافرح
صح داخلي فرحان وبودي حضنته الگضيت سنين احلم بيها
بس الخطوه السويتها حته اشوف نفسي شگد غاليه
دماغي وگف ساعه اگول ضغطت علي هواي وساعه اگول لا السويته صح
أرجع افكر هسه شلون ابينله وشسوي
لو اسكت واخليها للزمن وهوه اذا يريدني يحاول
يووو شيحاول وهوه انطه وعد
لازم اشوفلي حل بس خل اصبر واشوف شلون تنحل
شسوي شسوي ماكو غير حوراء صديقتي واقرب وحده اله
گلت اخابرها تجيني واخليها تساعدني
خابرت حوراء
..ألوو
..هلا ريم شلونج
..هلا بيج حوري فدوه اريدچ بموضوع تگدرين تجيني
..موضوعيش اليوم مااگدر اجي على باچر تدللين
..خوش انتضرج باجر مع السلامه
..مع السلامه الله وياچ

ضليت هذا اليوم كله مامستقره
اشتغل اكنس اذب المكناسه
اروح للمطبخ اشوفلي شغله اعوفها ع النص
وارجع المكناستي
بالي مو صافي ابد
عمتي انتبهت عليه گالت عمه شبيچ
كتلها ماكو شي عمه يا ماكو شي
جا شمالچ تفترين بدون وعي ولچ شبي جعفر وياچ
انتم عدكم شي گولي
..عمه ماكو شي بس
..لاتبسبسين احچي انتي تعرفين كلش زين انه ماعندي بنات وحاسبتج بنت الي ماحاسبتج جنه
..فدوه اروحلچ عمه ادري والله
..چاخوش كون تدرين كليلي انه حال جعفر ماعاجبني
حچيت العمتي كل السالفه
گالت عمه عوفي كلشي واحوي رجلج
..عمه چاشلون انه اروح أگله تعال هوه حلف بعد مايوصل الغرفتي الا انه اريده وابينله بطريقتي
..مو الا تگليله تعال انتي فهمي
..شلون عمه
..الأسود ذبي يمه بعد يسمونج باسم رجال ماله داعي الأسود يولي وجهج  عدلي صبغي شعرج
رتبي روحچ اشتريلچ جهاز جديد
هيج راح يعرف انتي رايدته
خلي البنات يساعدنچ انه مالي خلگ هالسوالف بعد
جا ماخذتچ بيدي
..عمه انه خابرت حوراء وباچر تجيني بلكي هيه تاخذني

فكرت بحچي عمتي صحيح
شويه ارتاحيت كملت شغلي اروح يم دلال
كل شويه  اشوفها شمحتاجه هيه وضي
گبل چنت مالي علاقه بيها بس هسه وهاي الأفكار تدور ابالي من اشوفها اضوج عليها
بس شسوي هذا المكتوب علينه مو بيدي ولابيدها
گضينه اليوم كله وجعفر صار العصر يلله اجه ومن اجه ماصاحني ولا راد شي مو مثل كل مره
گعد يم دلال ويسولف وياها مبيين موضوع بيناتهم مو مال اروح
صحته من بعيد
..جعفر تريد أكل اسويلك
..لا ماريد
..أحضرلك شي جاي ماي حمام
..لا مشكوره انه لو ردت اسوي الروحي
بگلبي گلت هذا شبي اوو گام يتعزز عليه
خل اسوي الگالتلي علي عمتي واشوف شلون تاليها

جعفر..

رحت للشغل وكاظم گال الأسبوع الجاي العرس
مالته وحيل فرحتله
رجعنه من الشغل من وكت ومريت لهلي هناك وضليت وياهم ملتهين بالتحضيرات
من رجعت انه متغدي وشارب جاي ومااريد كلشي رحت يم دلال اريد اشوفها هم اشتاقيتلها
صح مااحبها حب ريم بس حب العشره وهم هيه مرتي والها حق عليه
وضي هم من هسه اخذت مكانه بگلبي
من گعدنه نسولف انه وياها شفت ريم انتبهتلي
وصاحت من بعيد تريد اكل احضر شي
گتلها كلشي مااريد انه لو ردت احضر
انه اصلا مااريد اي شي بس متعمد حبيت اغثها
واطلع نار گلبي بيها
بالي من وراها ماجاي يصفه مو حب هذا مرض
لا اركز بشغلي لا وي اليحچون يمي
كل شويه والگه روحي صافن
ضليت هذا اليوم كله گاعد يم دلال وضي وابوي گاعد وياي وكل شويه اشوفه ضي
وجعفوري يجي يمي اشيله والعب  اوبوس بي
سويت روحي كلش طبيعي وانه منتضر قرارها على نار
ارد اعرف هيه شلون تفكر وشنو ابالها ومنين اجاها
كل هذا الهدوء
كلت هسه انه ليش مهتم هيه يمي وفنه اليگربلها
واذا ع الصبر اصبر بس شيصبرني وهيه يمي
وانه مشتاق الكل شي بيها
گلت مهما يكون انه اخذت عهد على روحي واذا رجليني اخذني الها صدگ اكسرهن
حب مذله يوميه رايحلها وتجاوبني بكل برود
صار الليل وگوه جبرت روحي انام
ثاني يوم الصبح وهيه نفسها
ضليت اراقبها بعيوني تتصرف طبيعيه
وتتمشه ومرتاحه كدامي گلت بگلبي احترگوو اهلج
كل احساس ماعندچ انه بيه نار شابه وهيه مو يمها شي
مااعرف مشاعر ماعدها حجر واكفه گبالي لو حبها تغيير من ناحيتي
لا شنوو يتغير مبينه تحبني بس تكابر
اشتعلوو اهلها هيه مال تكبر هسه
مو طلبت السماح منچ وگتلج انه غلطان
شتردين بعد عيوني تراقبها وگلبي يسولف
وعقلي مشوش وكلشي بيه مامستقر
طلعت للشغل
ورحنه التهينه بشغلنه وهم عدنه شغلات نگضيهن سوه انه وكاظم
ريم ..
اجتني حوراء وسولفتلها على كلشي
گالت نطلع انه وياچ للسوگ للولايه نشتري كلشي نريده وكلشي تحتاجينه ومناك اخذج صالون
..شلون نروح ومنو ويانه وخاف جعفر مايقبل لأن ضال بخاطره مني
..لا معليچ خابري واذا ماقبل انه اگله
خابرت جعفر وانه خايفه منه اعرفه
شايل بگلبه عليه
..الوو
..هلا
..هلا بيك جعفر ارد اگلك
..گولي ريم عندي شغل ومستعجل
..ارد اروح للسوگ عادي
..ياسوگ
..السوگ يعني الولايه شچم سوگ عدنه
..لا ريم مو عادي شعندچ بالسوگ
..محتاجه غراص
..لا ماترحين انوب انه اخذچ
تكدرت وماجاوبته شي جرت التليفون مني حوراء
..الوو جعفر
..هلا مني حوراء
..أي حوراء شلونك
..الحمدلله گولي
..خلي ريم تجي وياي للسوگ نشتري غراض
..شعدجن بالسوگ حوراء ويامن ترحن
.نشتري غراض العرس جعفر نخلي ناصر ياخذنه
..حوراء انتي ورجلج بكيفچ ريم لا
..اوو جعفر شنهي سالفتك الخاطري فدوه
..تروح بس الياخذجن حيدر اخوي لو حسين
لو هذا لو هذا سمعتي
ريم ..حوراء كافي عوفي مااروح بطلت
..سكتي انتي گتلها وانه احچي گال هاي شبيها اليمچ ماعاجبها حجيي چاالمن خابرتني ماطلعت وحدها
..ضحكت گتله لو طالعه انت تسكتلها
..اكسرها تكسر ومحمد
..جا بعد شلون تگول ماراحت
..مو سمعتها الخاتون ماراضيه حوري يلله انه عندي شغل اسمعي راح اخابر حسين لو حيدر يجيجن مو تبطن
..أن شاء الله تدلل
سدت التليفون وگالت يلله امشي خل نروح
گتلها مااروح انه
..اوو خايبه امشي هاي مال زعل هسه امشي
بدلت وگلت العمتي
خابر حوراء گالها جايجن حسين
اخوي
گلت ليش ماخابر عليه يوو خابر ماخابر
اكيد زعلان فوگاها شني هاي غيره شك
ساعه يلله ينطي موافقه شراح يخلصها
وي هذا حبنه الشلع گلبي وگلبه كل مانتقرب
نبتعد اكثر الا تصير سوالف تبعدنه
بس هالمره مااعوفك واتحمل حته لو تخنگني شسوي

اجانه حسين وطلعنه
أشتريت فساتين الحنة كاظم
واشتريت ثياب نوم عجبني اخذ ابيض
قصير تور واخذت واحد ستن احمر من يم صدره تور
واخذت بنفسجي ووردي موديلات تختلف
كملت اشتريت ملابس بيت گلبيه حمره ضيگه من يم الخصر وعريضه من جوه
واشتريت نفس الموديل بيجي مطعم ببرونزي
اشتريت مكياج وعطور
وكل احتياجاتي افترينه تلث ساعات احنه بالسوگ
حوراء هم اشترت الها شغلات بس اكثر شي التهينه بشرايتي
بعدين عجبها تاخذلي حنه وگالت انقشلچ بالبيت
يطلع حلوو عليچ
كملنه غراض السوگ رحنه للصالون
شعري كلش طويل گالت اگصه الچ
حوراء ماقبلت گالت لا هيچ احلى انوب گلي الجعفر
اذا عجبه تگصي گصي
صبغته الي اشقر جكليتي وخصلت علي ميش
كلش حلوو صار عدلت وجهي وحواجبي اني ماعرفت روحي شگد الحزن يغير
حوراء باوستني وگالت هسه يطير عقله
من خلصنه نريد نطلع حوراء طلعت جهازها تخابر حسين لگت جعفر متصل عشرين مره
من گالت هيچ گلبي وجعني يبوو ادري الفرحه ماتدوملي هسه يگلب الدنيا
طبعا كل هذا الوكت
طلعنه بالعشره الصبح
ومن خلصنه خمسه الا ربع العصر
گتلها فلك طرني ولچ هواي تأخرنه
.. لا تخافين انه كلت الناصر
ومايگول شي
..ولچ ياناصر وجعفر الراح يگلب الدنيا
..انتي شعليج انه احلها جعفر ابنچ عند امي وخواتي ويشرب حليب صناعي بعدليش خايفه
وجعفر اخوي تحملي
طلعت جهازي لگيته داگ عليه عشر مرات
گتلها ولچ مخابر علينه تلاثين مره
والله ولا ارجع گليلي وين اروح هسه
..معليج انه احلها
خابرت ناصر وگتله ناصر احنه تونه خلصنه وراح نجي شوف جعفر وين واخذه بأي حجه طلعه من البيت تره مبيين صاير نار
يمكن جي تأخرنه وانه فهمتك على كلشي وشنو سبب تأخيرنه
ماكال شي ناصر گال لاتهتمن انه هسه اروحله ومن اطلعه اوديلج رساله
ضلينه على نار لحد مااجت الرساله خابرنه حسين اجانه
گال شالقصه جعفر گلب الدنيا يگول ماكوو هيج
بربچ حوراء اكو سوگ ضال الهسه وانتي خويه ام جعفر ماتعرفين جعفر شني ليش ماگتيله
انه سكتت من فشلتي ماجاوبت شي ولافه روحي بالعبايه مستحيه اايشوفني ويعرف بيه شمغيره من شكلي جي مستغربه روحي احس العالم كلها تباوعلي
حوراء گالتله مو بس مسواگ رحنه للصالون
ماعلي جعفر هسه يهدأ هيه وحدها خايفه لاتلوم بيها
بقيت الطريق كله انه على نار
شجابني شورطني ياتغيير يابطيخ هسه يطلع من عيني

جعفر..

رجعت بالأربعه العصر عبالي الگاهن بالبيت سألت امي على جعفوري گالت عد امك ام علاوي يم عماته كتلها
..جا وين امه
..راحن بشغله هيه وحوري
..صدگ جذب من الصبح راحن
..لا يمه توهن
..يمه فدوه اروحلچ لاتضحكين عليه ياتوهن من الصبح خابرني
..جا خوش كون گايلتلك
..لا والله هم عوزها ماتگول بس ارد افتهم ضال سوگ الهسه
..يمه الغايب عذره وياه
خابرت مره مرتين الحد ماعشره اتصلت ماترد حولت على خط حوراء انوب اتصلت اكثر وهيه ماكوو
احس راسي گام يبززني من القهر گلت الأمي ذني وين صارن
ادري مسواگ هوه لو خواره لو رايحات البغداد وراجعات هم وصلن
..الغايب عذره وياه يمه
..ياعذر يمه ياعذر انه ادري شصار بيهن هسه
ضليت افتر افتر وماخليت حچي ماحچيته من القهر
دلال تباوعلي وساكته ماحچت شي شويه وخابرني ناصر
الوو
..هلا ناصر انت وين
..جايك انه اريدك بشغله
من گال هيج شصار بيه تخيلت صاير بيهن شي
..شكوو ياستار احچي
..لاتخاف ماكو شي اريدك تشوف گاعنه مدري شبيها وشنهي ناقصها انت تعرف باختصاصك بس شوف شيحتاجلها
..بربك هذا وكته ولك مرتك وين ماضل بالك عليها
الله عليك من الصبح الهسه طالعات شنهي معناها هاي
..جعفر لايضل بالك جايات بالطريق بس بروح هاني عليك تطلع وياي ارتاح من يجن ويرتاحن حاسب مرتك مرتي انه. مخولها
..خرب بيها مراره تمرمرها طگت مرارتي خل تجي وانه اعلمها
وانت الخاطر هاني طالع انه وياك

ريم...
وصلت وانه خايفه ارعش مثل السعفه بيوم عجاج
جبت جعفوري واجيت وبس اريد اوصل غرفتي وارتاح
اول ماطبيت عمتي گالت هلا بيج يمه ارتاحي روحي واتباركتلي وباوستني جي حافه
دلال استغربت ومبيين وجها انعقج بس انه مو بحالها بحال ضيمي
گالت شيخلصج اليوم جعفر گلب الدنيا
انه منا مرعوبه وهاي صدفتني اكثر
وصلت خابرت حوراء
گالت ولچ هاي لعبتچ حضري روحچ اله من يجيج
حته لو ضاييج من يشوفچ يسكت
انه هم كوه ارعش
غسلت ونشفت شعري مشطته ولبست ثوب نوم الأبيض خليت مكياج وتعطرت وگعدت ع الجربايه ومتانيه بركان جعفر
كلها تسولف بعصبيته وشلون من يثور انه سمعانه بيها وماشايفتها بس مره من طگ دلال تخيلت هيچ راح يسوي بيه
ضليت قلقه افتر واطك باصابعي
شويه وسمعته اجه صوته عالي ودفر باب الصاله
حيل وين ريم وينها
سمعت عمتي گالتله بغرفتها روحلها
لاتعلي صوتك فشله من ابوك هناك تفاهموو
سمعته فتح باب الغرفه غمضت عيني من الخوف
گبل لايحچي گتله انت مو انتضرت قراري
هذا قراري

يتبع..