رواية شائت الأقدار الفصل الثالث والعشرون 23 - بقلم نور الشمس

ياعيني لو سبعين يوسف يرد بيج
مايرد شوفج ذاك غير الگطع بيج

مر على صوابي اسبوع تحسنت وبقه وجع اكو بس قليل روحي طگت بعد مااتحمل ابقه بالبيت
وگعدت الغرفه خنگتني نزلت جوه على كيف اسند روحي ع المحجر واوگف شويه ارتاح
نزلت تلگتني امي
..هلا يبعد امك.هلا اندار على طولك سبع فدوات
..اسم الله عليج يمه انه رحت الشيلتج فدوه ابوي وين
..بالديوان ابوك ملتمين هوه وعمامك يتفقون باجر جايين عرب زامل يمشون
..ها جا خوش اروح يمهم
..روح يمه بس لااتعب روحك على كيفك
..ان شاءالله يمه
رحت سلمت على عمامي كلهم كاعدين واخواني تلكوني فرحوو بشوفتي
ابوي گلي گاعد نتفق شلون نتعامل وياهم
عمي ابو مالك گال نجليهم من العرب نشيلهم
والي گال يفصلونه فصل ثگيل
ابوي گال انت شنوو رايك
گتله بويه الراي رايك بس انه اكول مانجلي صعبه بويه همه مو بيت واحد بيوت وعوائل وحلالهم وعدهم جهال وين يرحون بيا حگ نطشرهم
شوفو غيرها
گالي عمي جا همه السوو العمله ويتحملون عواقبها
گتله ميخالف وياك انه بس ذوله شباب طايشين
انه اگول نحرم عليهم كيعانه مايوصلوها ومايعبرون الصوبنه
والفصل مو حگي بس انه حگ العشيره
بكيفكم انت وابوي
ابوي گالي يعني انت ودمك يوفيهن فصل عندي ميت على افلوسهم انه
گتله بويه هوه مو ع الفلوس اطلب طلب واذا تريد طيحهن انوب بس من يتعرضون الواحد من عربنه النطلبه يصير عليهم مربع
گالو خوش راي بس نضبهم اول وانوب نطيحهن
مر هذا اليوم واجه وكت المشيه والكل تحضر
وطلبوو منهم اليردونه وهمه هم الناس جايين وحيل ماراضين على ولدهم وانطينه شروطنه وخلصت الشغله .
ناصر گام يوميه يمر يشوفني شفته خوش ولد مو الي ابالي معشره حلوو
الحد هسه انه بعدني صارن عشر ايام طبت شويه الخيوط انفتحن اكو وجع بس قليل گمت اطلع ورجعت للشغل انه وكاظم سوه وناصر هم ماتيهنه
نتمشه وشفت حمود جاي فر گلبي علي من درس بالبصره وبعد مااجه قليل يجي بس يشوف اهله ويمشي سلمت علي وگتله اليوم تجي وياي وغداك.يمي گوه قنعته مشتاقله ومشتاق الصحبتنه گتله وين المدينه غيرتك علينه صاير ماتلفي
ضحك گال والله ملتهي وهناك اشتغل
. . الله يوفقك
طبيت للبيت وگعدته بالديوان ورحت للبيت وجهي يضحك صحت ريم ريم تعاي رايدج
أجت گتلها روحي شوفي بالديوان منو عدنه
ريم ..
انه ملتهيه جنت وسمعت جعفر صاحني استغربت وجها يضحك جنها ذيج ضحكته من جان يشوفني ردت روحي من شفت ضحكته فرحتله
گال شوفي بالديوان منو.. اجه هاني على بالي بس هاني يجي هنا شيودي للديوان رحت وياه طبيت لگيته حمود
رحتله ركض ابوس بي واخضنه واشمه يمه اروح فدوه الريحتك خويه ليش هيج گاطع بينه وبأهلك مشتاقيلك كال والله مشغول وملتهي وبالي يمكم انتي مطمن عليج اكيد مريحينج بس امي ابوي گلبي ياكلني اكل عليهم
التفتت الجعفر لگيته صافن علينه ومبتسم
كتله مشكور جعفر
هسه روحي ردتلي
.. والله حاس بيكم وبيه لهفه الهاني بگد لهفتكم هاي الله يجمعنه ان شاءالله
تغده حمود وضل يمنه للعصر وراح
صعدت وهاي هم گالبه خلقتها بس ماحچت شي
..شلونها الحلوه شكوو اليوم
..ماكو شي تعبانه
..الله يساعدج ع التعب بس تعب لو احد مضوجج
..منو يضوجني يعني
..ماادري سألتج
..لاحبيبي ليضل بالك مازعلانه
..متأكده ..
اي
..خوش تعاي يمي اجت وتمددت يمي ضليت احرك بأيدي بشعرها حسيتها ارتخت
هسه حبيبتي ماتگول شنو المضوجها
..خاف تزعل
..بيها زعل يعني
..اي
..ها جامابيه حيل بس الفضول يكتل گولي
..ليش بطبتك صحت ريم واته تركتني ترك
..ضحكت بس هاي
..جاهاي شويه
..وأنتي ليش تقارنين روحچ بريم هيه اختي وانتي مرتي
..ريم مو اختك مرت اخوك
..أي مرت اخوي بحكم اختي مادامها على ذمة هاني احترامها من احترام هاني ومادام هيه حامل وابطنها ولد منه وبينه ومن دمنه واجب علينه نقدرها ونحترمها انتي ليش احسج مزعوجه منها البنيه تأذيچ
..لا والله ماتأذيني بس ماارتاح من اشوفك مهتملها اكثر مني
..دلال اعقلي لاتخربطين شنهي اهتملها اكثر منج انتي مريتي وروحي من الدنيا ولج غير اخوها اجه وياي وردتها تشوفه
..بس
..اي بس عندج بعد شي لو خلصنه تحقيق عفيه نسوان ماتملن اله تنكدن ع الواحد
..هاي انه
..لا امي
.هههههه
..اضحكي اضحكي شعليج انتي
ولج شوكت تعقلين  وهاي السالفه بعد مااريد تنعاد شيلي ريم من راسج خوش
..خوش
..تعاي  يمي مشتاقلج هسه انه طبت وبعد ماتخلصين مني
..وانه هم روحي مفرفحه عليك
..احترگت روحج السودنتني
تدرين من اشوفج فرحانه افرح ضلي دوم هيج وعوفي سوالف نسوان الحمه ماتفيد وياي
انه اريدج تحترمينها وتعتبرينها اخت الج

دلال..
جعفر الحمدلله تحسن بس انه لو شفته يصيح ريم لو يحاجيها اتسودن وگوه اصبر على روحي واسكت
اليوم عاتبته وفهمني وادري بالگاله صحيح بس مو بيدي رضاني ومادام هوه وياي عندي الدنيا كلها مو بعيني  من انام بحضنه جني مالكه العالم كله
انسه كلشي وياه بس اريده الي وحدي وحيل اخاف لايرجع يحب ريم مثل گبل بس ادري بي وفي الأخو ومايسويها

نمنه وگعدنه حضرتله الحمام غسل وطلع بس حسيته مو مرتاح وضايج
.. جعفر شبيك
..دلال گلبي يوجعني گلبي مقبوض انطيني تليفوني
انطيته جهازه خابر هاني دگ مره مرتين ماحصل الثالثه يحصل وهاني مايرد
ضل يفتر بالغرفه رايح راجع كل شويه يتنهد قوي
.. جعفر شبيك گول يالله ليش هيج ضايج
..ماادري دلال گلبي معصور عصر
نزلنه جوه راد يلهي روحه طلع وگال اي واحد يحصل هاني يگلي ومن احصل انه اخابركم

جعفر..

گعدت من النوم گلبي معصور وابالي هاني وبس
خفت علي حيل خابرت مره مرتين ماحصلت الثالثه دگ وماشاله انوب تخبلت قلقت حيل وگلت بس اضل يم اهلي اقلقهم اكثر طلعت
افتر بالبساتين وبالي يم هاني
يارب احفظه مالي غيره يارب سهل علي احسه واگع بشده ماادري محاصرينهم جوعان عطشان ليش هيج گلبي معصور علي
شويه وگلت خل اتصل حاولت هواي يلله حصلت
..الوو
..هلا بجعيفر هلا بخوي
..هلا بيك ولك هاني راح تموتني ناقص عمر ليش ماترد
..جنت نايم والله شخبارك
..ولك ضلت اخبار روحي فرفحت عليك هاني فدوه اروحلك گلبي يوجعني بالك على روحك
..ان شاءالله جعفر الله الحافظ وكلشي الكاتبه الله يصير
..ونعم بالله بس ماوصيك بالك على روحك ماادري ليش گلبي يوجعني ومن اذكرك ينعصر
..على الله سكت شويه گال جعفر اوصيك وصيه
..هاني لاتگلي وصيه گلي امرك امر ولاتسولف للبعيد اني يومي گبل يومك ان شاءالله
..جعفر كلشي بيد الله اوصيك وخليها امانه يمك اليوم باجر بعد سنه بعد عشر سنين
وصيتي الك ريم وابنها مايطلعون من البيت ابد بأي طريقه مااريد ابني يتربه بعيد عنكم
..گول يالله هاني يربون بعزك خويه گلتها وخنگتني العبره گتله هاني فدوه الخاطر عزيزك بعدني عزيزك مثل گبل لو اجاك اعز مني ردت اغير الموضوع
..جعفر والله ماكو اعز منك على گلبي افتخر بيك انت اخوي ونعم الأخوو ولأن انت اخو گلبي امنتك هاي الأمانه
..هاني الله يرجعك سالم دير بالك على روحك
..ان شاءالله بوسلي ابوي وامي وبالك على ريم

سديت التليفون وزاد همي العبره تكسرت بصدري دعيت الله يرجعه سالم وكلشي مااريد

هاني ..
خابرني جعفر وشفته خايف عليه واكو ابالي وصيه ومن شفت هذا وكتها گتله بيها .
اليوم احنه طبينه منطقه جديده ولازم نمشطها ونفتر بيها نشوف شلون نتحرك
اني وياي اربع جنود واحد من اهل البصره واحد من اهل السماوه واحد من اهل كركوك واحد من بغداد الأعظميه .
ناقصنه بس علاء لأن تزوج وعنده اجازه زواج فرحان اله من كل گلبي شويه ارتاحينه ورحنه
نتحرك .
المنطقه منكوبه الأنقاض تارسه المناطق بصعوبه نحدد الأشخاص
ضلينه نتحرك بحذر
شويه وصرنه بنص منطقه الضاهر تحت سيطرة الدواعش

هاني ..شباب هاي هيه هذا حدنه نقاتل الأخر نفس. 
الجنود سيدي حاوطونه من كل مكان شنقاتل
الدواعش انتشروو صفوو الجنود واحد واحد
بقوو بس هاني لأن هوه الضابط شاف شكولهم القذره وعرف هاي نهايته اجت اباله امه شراح يگلولها ابوو جعفر ريم ابنه الماشافه مرت علي حياته  مثل الفلم جان راضي على حياته وحابها جان يتمنى يربي جهاله ويفتخر بيهم جان مشتاق المرته ويريد منها نضره اخيره
مرن عليه ذكرياته مثل الحلم
شاف الدواعش منتشرين يمه مثل القروده مايسمع شنوو يگولون الدنيا افترت بي وممركز وياهم باله مو يمهم ماخايف من الموت بكد ماخايف على اهله
واحد من الدواعش القذرين طلب يلم اسلحة جماعته الجنود الهم وهمه يصورو ويضحكون كل ضنهم يهينونه بهالطريقه وبعدها يقتلوو
فكر زين وگال كلشي الا الكرامه مو انه الي انهان
بهالطريقه .
اباله خطه وحب ينفذها حته لو نهايته بيها اهم شي نهايه بشرف
گام يلم الهم السلاح وبحركه سريعه منه وهوه ضابط كليه عسكريه من الاوائل على دفعته كان
بحركه سريعه منه راد ينطيهم السلاح ورماهم
كان اخر كلام نطقه اهزوجه اهل الجنوب معروفين بالأهزوجه حب ينهي مشواره بهالأهزوجه

شلك بالروح تباريها
الموت اولها وتاليها

انصدموو الدواعش انقتل منهم عدد مو قليل والي اتصوب.
الكامره موثقه كل الصار تفاجأو بشجاعته
وغبائهم الي خلاهم ينسون شجاعة العراقيين
سقط هاني على الأرض وصاح اخوي منين اجيبه
تشاهد وفاضت روحه الطاهره
ف بلادي يتكرر المشهد كل يوم مرات كثيره
فكم حلم ضاع وكم ام ثكلت وكم زوجه ترملت وكم من الأطفال تيتموو
وكم اخ فجع بأخيه
يتبع ..