شفاه مخملية الفصل الثاني والعشرون 22 - بقلم 𝐙 𝐇 𝐑 𝐀

♛ ♛ ♛ ♛ ♛ ♛ ♛ ♛ ♛ ♛

"شفاه مخملية"

بقلم: زهراء السلامي.

#‏فكلي اي حاجز بروحك
انه مرهم مو جروحك
انه ذيج الطيرة المحلية شرفتك
انه ضحكتك مو دمعتك
اشتريني بمرة احبك
واشتريك بكلشي بيه 🤍🤍.

♛ ♛ ♛ ♛ ♛ ♛ ♛ ♛ ♛ ♛

"هجران"
چنت نايمة بفراشي ودگ موبايل بكر، جاوب بتملل وهوه لسه بالفراش، سويت روحي نايمه حتى منسولف بَـس ماگدرت اتحمل واني اشوفه طفر وصاح

"عمييد شماله؟؟؟"

نهضت روحي واني اباوعله، فاتح عيونه ويستمع للطرف الثاني بكل انتباه ماعرف منو هذا؟ وشبي عميد الدين؟؟ هز راسه عدة مرات متتاليه عبالك الطرف الثاني ديشوف حركاته بَـس واضح من الارتباك والتوتر حتى ميگدر يحچي، ختم المحادثه بـ...

"جااي هسة جااي مسافة الطريج"

طفر من مكانه وركض للحمام، غسل وبثواني بدل ملابسه، سألته والحيرة اكلتني

-بكر شبيك؟ شصاير؟

جاوبني وهوه يدگم قميصه بسرعه فائقة

-بكر: عميدي تخربط مانعرف شماله وخذو للمستشفى

-يااا يمه شبييي؟؟

-مادري مادري انه رايحلهه للمستشفى هسّ

-زين اخذني وياك اخاف ابقى وحدي

-بكر: ليش وحيدچ چا اخيتچ وين؟

-هجران: جوري طالعه من الصبح دزتلي رساله وره صلاة الفجر وگالت راح يطلعون لمدينه سياحيه

-يلاا چا بساااع هجرااان گلبي طاگ عليه

-يي يي ثواني

گمت بسرعه للحمام واخذت ملابسي ويايه، لبست جبة اسلاميه ولفيت شالي شلون مچان، كله هذا سويته يجوز بدقيقتين، طلعت برا الغرفه تفاجأت من شفت بكر مو هنا!! شنووو عافني؟؟؟

بنفس الاثناء دگ موبايلي وچان المتصل "حبيب گلبي" يعني بكر هيچ مسميته، جاوبته بسرعه وگال هوه جوه بالريسبشن منتظرني، طلعت واني اركض ركض اخاف يعوفني ويروح

اخذنه تكسي وبكر وجهه ميتفسر، اباوع لأيديه واشوفه يلعب بأصابيعه بتوتر، ماحچيت وياه لان ماعرف شنو اگول، اني اعرفه شگد يحب عميد وحاچيلي من قبل، بَـس هسة حالته ابد متبشر بخير وعلامات القلق مرسومة ؏ وجهه!! معقوله حاله عميد هيچ صعبه الي لهدرجة خايف عليه؟

وره تقريباً 40 دقيقه وصلنه لبنايه چبيرة، گال بكر هنا المستشفى، دخلتلهه وهوه يركض گدامي واني امشي بخطوات سريعه وراه، سألنه عن اسمه وگالو ناقلي للطوارئ، بكر شهگ ودگ ؏ راسه قوي

-بكر: دخيلك يابو فاضل لو الدنيا كلهه تروح ولا عمييّد

ركضنه للطوارئ واني امشي واقره فاتحة لأم البنين توگف وياه ويطلع منهه بسلامة، وصلنه للبوابه وسمعنه صوت هوسة، لمحت رهف تبچي بقوه وتصيح "اريدن ابوي، لا يموت ابوي" انفطر گلبي عليهه، ردنه ندخل لقسم الطوارئ بَـس ماقبلو وحتى عيالي طلعوهم لان صارت هوسة، الكل جاي

گعدنه بره وتوزعنه ؏ الكراسي، رحت ؏ رهف الي ماسكتت عن البچي وجسمهه يرجف وسنونهه تتطابگ، حظنتهه لصدري وحاولت احچي وياهه واهدئ بيهه، صراحة خفت عليهه يوگف گلبهه من الخوف ؏ ابوهه، اني ادري بيهه مريضه وعدهه فتحة بالقلب فَـہ خفت انوب المصيبه تصير مصيبتين

دعيت من اعماق گلبي يگوم عميد الدين بالسلامة لخاطر هاي اليتيمه الي يجوز تضيع من دونه

تفاجأت من ردة فعل غزل ساكته وكلمه ماحچت، بَـس وجهها ابد ميبشر بخير اصفرر ليمونه وامهه تحاچيهه ومتجاوب، گامت تدگ ؏ خدودهه حيل وتصيح

-سلمى: وللچ غززززل شبيييچ جاوبينييي غززززل احچييي يمممه بنتيييي، خلييييل تعال شوف بنتك متحچييي

اجه عمو خليل وهم حاول يحچيهه وهيه كلمه مانطقت، واجه مرتضى هم وهيه جافلة بمكانهه وملامحهه جامدة

-خليل: بويه شماالچ احچي!!! ولچ سلمى شمالهه بنيتچ؟؟؟

-سلمى: مااادري خليل فدووه شوف دكتوور اخاف بلعت لسانهه لو صارلهه شي

-حجية عطيه: ما يحتاج دغتور (دكتور) خلو البت لساهه مصدومة

-سلمى: عممه شتنصدمم ليش هوه مااات!!!!

-حجية عطيه: فااال الله ولا فاالچ ولچ سليييمه يومچ گبل يومه ان شالله

-سلمى: مو قصدي عمه بَـس خايفه ؏ بنتي

-حجية عطيه: گتلچ مابيهه شي لا تظلين تهوبزين (تگمزين)

-بكر: بسكممم خلونه نفتهم شماله الزلمه وطااح؟؟ شني انصدم؟ احد طگة بالغلط لو شنهييي؟؟؟

-انتصار ببكاء: لا يوم محد كظه چنه نسولف وع ساعه طاح علينه

-رهف(هجمت ؏ غزل وتضرب بيهه): كلللله من وراااااچ اذااا ابوي مااات يا غزززل بعلي مارحمممچ واطلع ضيمي وضيمه كله بيييچ دمرتييي الزلمة كللله من ورااااچ

گوة جريناهه عنهه وغزل بعدهه ساكته، صراحة الوضع يخوف وناس تتعارك ويه ناس والدكاترة تأخرو وهمه يشخصون حاله عميد الدين، اخر وحدة ختمت الجدال بيبي عطيه، ضربت بعوچيتهه الگاع قوي وعاطت

-حجية عطيه: ووولچن يالمسلوووعاات حسسسچن ماهيسه (صوتچن ماسمعه) لا وحگ هو علي أيّي (اجي) احوس بأفاددچن!! بدال ما تدعن للزلمة جايات تتعاركن ووتمالشن بالشعف (تكفشن بالشعر)

سكت الكل وهدأ الممر، يمكن احنه الناس الوحيدين الگاعدين هنا هسة، مرت تقريباً ربع ساعه وطلع الدكتور طمننا عن حالته، بَـس يحچي بالعجمي ومحد يفتهم فَـہ جابو مترجم وفهمنه حالته

گال لازم يسووله قسطره لان ممعلوم شنو سبب هالنوبه القلبيه الي جتاحته، محتمل عنده تشحم بالشريان الابهر او شي ثاني، وكل هذا يتوضح بالعملية

بَـس الحمد لله گالو هسه وضعه طبيعي والعمليه مو ضروريه الا هسه لان عميد الظاهر گاللهم باچر سفرتنه، بَـس لازم يسويهه بأقرب فرصه حتى متسوء حالته، تشكرنه من الدكتور وبكر طلب من عنده يدخل يشوفه بَـس گال ميريد يصير ضغط عليه ولازم يرتاح شويه ويحتاج هدوء

رجع الكل لمكانه ورهف شويه هدأت من سمعت هيچ بَـس خطيه تتنفس قوي مال وحده فحطانه، اجت عمه دلال وزيد يهدأون بيهه ودلال تفرك بصدرهه حتى ترتاح

-دلال: بسچ يبعد حيلي ابيچ مابي شي يوم لا تخافين

-زيد: رهف ؏ كيفچ ويه روحچ السيد مبي شي يا عيوني

-دلال: ايي يبعدي بهداي تنفسي يواش يواش

-حجية عطيه: رهف حبوبه ابيچ سبع وفحل الفحول ماتموته هيچ نوبه

وظلت تصلي ؏ محمد وال محمد بعلاة صوتهه وطلعت فلوس من صدرهه وعگدتهن بشيلتهه، ماعرفت شنو هاي لوما عمة سلمى سائلتهه

-سلمى: عمه شنو هاي الفلوس؟

-حجية عطيه: نذرت للرضا سلام الله عليه وگلت لو عمييّد رد لينه سالم اتبرع لمضيفه فلوس

-خليل: سلام الله عليه

خطيه خاله انتصار تتوسل بالاطباء تريد تدخل تشوفه وهمزين بالنهاية قبلوا تدخل بَـس هيه وممنوع تتأخر، ماطولت شويه ورجعت دموعهه تجري وتگول هوه زين ويريد يشوف رهف

حسيت روحي تعبانه وهواي طولنه بالمستشفى واجه حجي اسماعيل وحلاوة، بكر گال رح يتأخر وميقبل يرجع اله وعميد وياه، فَـہ اضطريت ارجع ويه بيبي عطية وعمه دلال ونروح لبيت خالة عميد الدين

اول مادخلت البيت تفاجأت من شفت جواهر وشهد گاعدات بالمطبخ ويه معصومه، گمزت جواهر واجت عليه عيونهه عبارة عن فصوص دم

-جواهر: هجرران شبيي عميييد؟؟؟ هوه زييين؟؟؟؟ شصااار؟؟؟ بيبي عمة دلال شصاااار؟؟؟ ليش مرجع وياكم؟؟

-دلال: يواشچ حبيبة الزلمة زين الحمد لله بَـس گالو يبيتوا اليوم بالمستشفى علما تردله عافيته شوي

-جواهر: شگد كلللت لأميييي خلونه نروووح نشوووفه مقبلتتتت

غطت وجهها وگامت تبچي قوي ودلال تسكتهه من جهه واني من الجهه الثانيه، اما بيبي عطيه بقت ساكته وتباوعلهه بنظرات غريبه

دخلنه لوحده من الغرف وجواهر مستمرة تبچي كسرت خاطري، اذن الظهر وصلينه وخالتهم شمس صبت غده بَـس مالي نفس آكُل خو جواهر مامدت ايدهه بَـس شهد شويه اكلت وعمه دلال همات

مشه الوقت واحنه وحده صافنه ؏ الثانيه وشهد مگابله الموبايل وگاعده، اما جواهر اختفت رحت ادور عليهه لان مليت گاعده وحدي، لگيتهه گاعده بالحديقه الخلفيه وحاطه ايدهه ؏ خدهه

-هجران: ليش گاعده وحدچ؟

ظلت ساكته وماجاوبتني، گعدت بصفهه وعيوني عليهه، بقينه ساكتات بحدود الخمس دقايق، وهيه بدت الحديث

-جواهر: شفتي عميدي؟

-لاء ماقبلو الدكاتره بَـس خاله انتصار ورهف

-نيالهن

-خطيه لو تشوفين حالة رهف وغزل الله يساعدهن يكسرن الگلب

-الله يعينهن هنه بناته

-ايي، وانتي هم كُلش متأثره لهدرجة عميد قريب عليچ؟

ابتسمت ابتسامه حزينه وهزت راسهه، گالت وهيه مدنگة وتلعب بأظافرهه

-جواهر: اني وعميد ضلوع

-يااا هههههههه صدُك تحچين؟؟

ضحكت خفيف وهزت راسهه

-جواهر: اييي وكُلش رويسيه ويه بعض ونتناگر هوايه ونتزاعل دائماً

-امممم

-هوه الوحيد الي اگدر اگول عنه صديق حقيقي، رغم ينزعج من اگوله انته صديقي يگول ماحب هالچلمه ؏ گولته هههه

-ههههه ليش؟؟

-مادري بَـس بنظره يگول ماكو صداقه بين الولد والبنيه

-هجران: اتفق ويه هالشي اني

-لا ليش اني اعترف بهالصداقات يعني اني وعميد هووواي نسولف ونضحك ونحشش ويه بعض بَـس ميقبل يگول عنه اصدقاء يعني كل هالامور ميسووهن الاصدقاء؟؟

-بعد ماعرف

-اففف مشتاقتله ومشتاقه لسوالفه حيييل

-هجران: البارحة شفتي

-بَـس حيصيرلنه اكثر من شهر منتحاچة

-هجران: ليش؟؟

-نسيتي هوه حالف ميطب لسانه ؏ لساني

-انتي مو گلتيلي حاچيتي بيوم عرسي من چان مريض

-اي بَـس ميعترف بهالشي ويگول مچنت واعي

-يله حبي ان شالله ترجعون مثل قبل كلشي ينرادله وقت

-الله يسمع منچ

-ديلا كافي زعل الرجال كلشي مابي بَـس تعب شويه، تعاي ندخل جوة يالصاكة (وغمزتلهه)

-جواهر: هههه يله

قبل لا اطب جوة اتصلت ؏ بكر وسألته عن عميد الدين گال وضعه الحمدلله كُلش زين واحتمال اليوم يطلع، كملت مكالمتي ورحت جوة لگيت شهد گاعده وجواهر بصفهه صافنه عليهه وعاگدة حواجبهه

-هجران: هاا بنات شبيكم؟

-جواهر: ولاشيي بَـس هاي اختي خبله

-شهد: اهووو جواهررر شعلييييچ

-هجران: يااء ولچن شكوو؟؟

-جواهر: اختي الثوله المطيه الزماله النعاله الـ...

-شهد: يبااووو اندلعت عليه بلسانهه بهيده بهيده بويه ؏ گوله الحُببببب

جواهر ضربتهه ؏ راسهه وخزرتهه قوي

-هجران: عاااا منو الحووووب

-جواهر: محدددد محدددد انسييي معليچ بهاي السخيفه

-شهد: ولچ تعاااي هجور متعرفين منو حبيب جواهر؟!!!

-جواهر: شهدددد قسماً بالله اذا حچيتي اموووتچ

-شهد: يابه دطيييري تعاي تعاي هجران اشاورچ

تدنيت عليهه واني كلني حماس اريد اعرف منو حبيب الگلب المدوخ جواهر الصاكة، توسعت عيوني من شهد همستلي بأسمه، صحت بحمااس

-عمييييييد الدييييين حبيبچ؟!!!!!!

-جواهر: وجعععععع شكووو شكووو تعاي صيحي بيبي عطيه وعمه دلال هم گوليلهن

-هجران: عزااا يبااااوو يبوووفاضيييل

-شهد: اي خيه اي گابليني گابلينيي

گامت تردح بمكانهه موتتني من الضحك

-هجران: ولچ جواااهر يعني بيناتكم علاقة وحببب وغرام وعشق ومعشووق و...

-شهد(قاطعتهه): وييين يحسرررة الحسرررة ولچ داده هاي اختي فاااهيه ليغرچ لسانهه الرشاشه بَـس من تصير يمه بَـس تتعارك وتدوس بمصارينه

-جواهر: ولچننن كافي لعبتن نفسي

-هجران: وچ لييش تتعاركين ويااه؟؟؟ زين هوه هم يحبچ؟؟

-شهد: امدددده حظيييي وحظ اختي المزفت المعقچ الطامس بالطين

-هجران: لااا جواهر بشرفچ لا تگولين ميحبچ؟؟؟؟

-جواهر: لا شوفي هوه....

-شهد(قاطعتهه): مندررري يحبهه لو لاا ولچ هذا عميدان عنوووودي وميعترف بسهوووله اله يسحل الطرف الگباله

-هجران: يعني يدري بيچ تحبي لو شلون؟؟؟

-جواهر: شوفي هجرانه اني....

-شهد(قاطعتهه): ولچ ايييييي يدريييي يدررري ياحظ المصخمممم

-هجران: يباااوو انلاااصت يالشيعه

-جواهر: ولللچن تفففف عليچن ثنينچن زيييين

-هجران: جواهر يعني انتي گلتيله احبك؟؟؟؟

-جواهر: سمعي اني....

-شهد (قاطعتهه): ولچ ايييييي گالتههه يابوووويه اشتعلنننه

-جواهر: لهنااا وبسسسس شهدددد ولااا مگلتهه بَـس يجوز هوه حاس عليه

-شهد: من اشتعلو مروان وخلفته لعد شنو الفرررق

-هجران: امداني ولچ متحچين وتعترفييين اله يطير من ايدچ؟!!!!

-جواهر: ولچن بنااات شسوووي حممموت رح يتزووج

-هجران: ولچ گابليني شهيدان گابليني

وشهد ماگلت لا وگفت گبالي وفتحت رجليهه وايديهه وگامت تدبچ مثل دبچ نسوان العمارة، جواهر قاطعتنه بعيطه قويه

-جواهر: وسممممم وزقنبوووت يالسلبوووحات چنچن رية وسكينه تعااالن باصرني شسوي يملطمااات

-هجران: متتت ولچ شنو هاي انگلبتي بيبي عطيه ههههههه

-شهد: اخخخخ بطني امداچ جواهر ههههههههههااااايييي

-جواهر: وجعااي خو هاي ضحكتهه مال رقاصات وادبسزياات

هدأنه من نوبه الضحك وجواهر واگفه متخوصره گدامنه وخازرتنه بعيونهه الخضر الكبار

-هجران: يله تعاي نتباصر هسة شنو حتسوين؟ رح تخلي يروح يتزوج هاي اليحبهه المجهولة الهوية؟؟!

-جواهر: تعاي هجران تعاي احاچيچ شويه

كيفت عبالي تگولي شي بَـس انطتني راشدي وعاطت

-جواهر: ترديييينيييي امووووتچ؟؟!! ونبي محمد اذا تزوجهه اله اشعله واشعلههه

-شهد: هااا هااا مو البارحة تگولين الله يهنيهم وخليهه تجيبله الولد احسن ماباقي هيچ؟؟ شنو التغير؟؟!

-جواهر: اففف ماتغير شي يله خلي يتزوجهه هوه كم يوم ونموت

-هجران: عززاا العزااچ بيش طالبه الرجال!!

-جواهر: گبررر اقصد اني امووت يحترگ گلبي يوم يومين وطببب اموت

-شهد: اححح واني وراچ وتلحگنه هجران هاهاهاهاهايييي

-هجران: امداچن ثنينچن انيييي رجاال احبه وماگوله احبك امدانييي اني بكر حتى من مزاعلته ذايبه فيهِ عشقاً وغراماً

-شهد: اويليي يابه حتى اني المسعد اموووت بي حتى من نتعارك

-هجران(ضيقت عيوني وگلت بمكر): وانتي ماعرفنه المسعد مالتچ؟؟

-جواهر: والله اله اگوله

-شهد: حتى اذبببحچ بطبر عميد الدين

-جواهر: حراام بعد حلفت يله رح اگول اسمه....

هجمت شهد عليهه وملخت شعرهه تملخ، فطست ضحك عليهن وهنه يتمالخن مثل البزازين، قاطع حديثنه وضحكنه عمة دلال اجت وشايله صينيه رگي بأيدهه

-دلال: يححح شني هااي رگي بنص البرد يابويه من اشتعلو مروان وخلفته

-شهد: عممه منين جبتييي يبااو انطيني حممووت يمكن حامل ودا اتوحم اني

ضربتهه دلال بخفه ؏ راسهه

-دلال: يا والغسلل لهالحلگ شني هالحچي تخلي حبوبة تسمعچ وعلي تييب مريانه (تجيب مرجانه) وترفس بأفادچ

-شهد: اهووو عمه اتشاقه، زين تعااي دلالو شعجب بيبي مجابت طاري مرجانه؟؟ شنو تزاعلن لو شنو سالفتهن

-دلال: ولچ غير سوت ذيچ الهوسة لـ عمييّد تريد تيبهه (تجيبهه) ويانه وتركبهه الطيارة

-شهد: عززا العزاااچ بيبي ههههههاااااييي

-دلال: مال اللطچ ؏ حلچچ احد يگلي لييش

-جواهر: عمه دختولي هاي بايعه ومخلصه

-دلال: من اغدي فدووه لهالحلگ المايحچي غير الجواهر يا جوااهر

-جواهر: عمه مو استووحيييي

(اگلكم چنهه شمرت ؏ جمارة هاي🌝🤔)

-شهد: اهووو بدينه بالتعوج احچي عدللل اله يجي الاحم ويفرك حلگچ

-هجران: ياااا شعليچ بيهه تخبللل اصلاً من تتنعوص چنهه كيكة والله

-جواهر: فديييت انييي

-دلال: ديلا بسچن تعالن اكلن ماجعتن يمعزايات لوك لوك لوك لوك بعلي انه احچي چلمتين احسن معدتي فرغت

ضحكنه وبدينه ناكل رگي، وعمه دلال انطرحت ونامت خطيه تتعب وتلهث حتى من تحچي لان وزنهه كُلش عالي، اذن المغرب وگمنه نصلي وجواهر تلوب امممم اكيد ؏ الحب

بعدنه بصلاة العشاء وسمعنه صوتهم وهلال عمه انتصار وعمه سلمى وگابلتهم بيبي عطيه تهوس بعوچيتهه گدامهم

-حجية عطيه: وهااا وهااا وهاا وهااا لدبچلك دبچ معدان ووصل الطين لچتافي

گابلتهه عمه انتصار تهلهل وتدبچ بعبايتهه

-انتصار: وهاا وهااا وعذرني يمه موش حيلي الاولي

-دلال: مأصل والله مأصل من عمه وخاله كلووووووششش

گلبو البيت عرس والكل فرحان ومكيف وعميد يبادلهم بأبتسامته البشوشه ويحط ايده ؏ راسه بمعني ممنون منكم

صاحتلنه خالتهم شمس (ام البيت) حتى نساعدهه نشيل ماعين العشه ونفرش السفره بَـس عميد هم ماقبل ندنگ لان جواهر نزلت تحط طاسه الزلاطه وصاح

-عميد: لا لا تدنجين گوم مرتضى اخذ من ايدهه

-مرتضى: اي صاار

حلو طبعهم وحتى الولد ميتعاجزون رأساً يجون ياخذون من ايد البنات خصوصاً اذا الاكل مختلط ونگعد سوا، اللتمينه حول السفرة والضحك والسوالف ترس المكان، اجواء تجنن وحلاوة وزيد واحد گابل الثاني ويحششون ؏ مرتضى ويضحكون عليه

-حلاوة: ولكم شنييي هاي گاعد بنص شروگيه راح اصير مثلكم يولوو

-مرتضى: شفايتلككك تصير نفسنه ؏ الاقل تصير زلمه

-شهد: هههههااااييي طننننن

-جواهر: عزااا مرتضى متتت حرام عليييك ههههه

-حلاوة: والله مو صوچكم صوچي اني گاعد وآكُل وياكم

گام من السفره وعميد گال بضحك

-عميد: استچن بمچانك ولك لا تصير دلوع وتزعل بساع

-شهد: يباااوو عميدي عود دتكحلهه عميتهه ههههااااييي

لطمتهه امهه ؏ راسهه ونترت بيهه

-ام جواهر: ولچ شنو هالضحكة متستحين انتي

-زيد: خاله عوفيهه شهد الخبله تونسنه والله

-شهد: ولك زيييد قصدك اني قرقوووز

-مرتضى: حشه القرقوز منچ

-شهد: انييي اعلمك مورتضىىىىى الاااا اگصبك بطبر عميد الدين

-مرتضى: هه مو تشوفين الدم وصحتي اووي عوووع ماتحمل انه ماگدر اشوفن دممم

-جواهر: اي غير احنه اناث رقيقه فوديتنه

-مرتضى: خوب انتي اسكتييي حسرة بگلبي ادخنلي جگارة وصحتي اختنگت ولعبت روحچ

طنننن چفص، عميد فتح عيونه وعاط بي

-عميد: ولك مرتضىىى تدخن يالاغممم

-مرتضى: هاااا لا خوية هيچ اوقات من اضوج

-عميد: لعنه الله ؏ ابليسك يالورن (يالجبان) تدخن من وراااي انه الك اليوم

-مرتضى: ياخوي هّود (اهدأ) السالفه ماتسوه وعلي لا تأذي رويحتك، بعدين مو انته تدخن وبكر وغيث وعثمان و...

-عميد: انطممم لا بارك الله بيك انته شلك غرض بغيرك!! حنه ندخن من الگهر (القهر) انت شكووو

-مرتضى: حبيبي اخوي احبن (ابوس) راسك هاا اهااا بعد ما ادخن وبوفاضل

-عميد: لا تحدر يمي ماريدن حبتك (لتجي يمي ماريد بوستك)

-شهد: هلاااا ايي ايي عفيه عميد خيولي وحباب عليك الله گصبه بطبرك خلي يتأدب

-مرتضى: ولچ انه الچ اليوم وعلييي

گام عليهه يريد يجرهه من شعرهه وعميد رجع عاط

-عميد: بسكم ولكم راسي صدع، تعال بكر وينه فيصل وحُرمته؟؟ انتو گلتوله انه طحت؟

-بكر: لا مرت ابوي (سلمى) مارضت اگللهم خاطر عود لا نزعجهم

-عميد: اي زين تسوون

-بكر: عميد شني زين نسوي چا هو رايح يتونس ويديح ووليد عمه طايح بالمستشفى

-سلمى (تدخلت): عيني سيد عميد اني مو قصدي شي بَـس المكان الراحوله بعيد واخاف يجون بسرعه ويصيرلهم شي بالطريق لو جوري تنهبط وهيه عروس

-عميد: لا عمه شني السالفه انه اصلاً ما ارضى خليهم هم جايين يتونسون ويه بعض وهاذ شهر عسل ما يتعوض

-سلمى: يا عيونني انته اسمع بكر اسمععع

-بكر (گالب وجهه): سمعت عممه

رجعوا الكل لضحكهم وتحشيشهم وبكر گالب وجهه، اني منتبهه عليه علاقته مو شي ويه مرت ابو (سلمى)، اللتفتت اباوع لجواهر عيونهه گصت عميد گصصص سوته گص لحم ودجاج، دغيتهه بعكسي وگلت بين سنوني

-عيووونچ ولچ

-جواهر: يوووه هجران عوفيني اريد اباوعله

-هجران: ولچ مو بيبي عطيه دتباوعلچ ماعرف شبيهه

دارت عيونهه تباوعلهه وهزت راسهه بماشي، كملنه عشه ورهف فدووا فرحتهه واضحة عليهه كل شويه تروح لأبوهه تبوسه من خده وتگعد بحظنه، ضحكت لان هيه طويله وتگعد بحضن ابوهه فَـہ المنظر يضحك شويه

غسلنه الماعين بَـس افتقدت غزل مالهه وجود؟ حتى ؏ العشه چانت متاكل بَـس ساكته وامهه تحط الاكل گدامهه ومامدت ايدهه ابد شنو شبيهه؟؟

رحت للغرفه احظر غراضي لان بكر گالي شويه ونرجع للفندق باچر ورانه سفر، شفت غزل گاعده بزاويه الغرفه وتبچي

-هجران: غززل شبييچ؟؟؟

مجاوبتني وبقت ؏ گعدتهه، علت شهگتهه وتبچي بصوت مسموع شگد حاولت احچي وياهه وهيه معانده، فَـہ متدخلت وعفتهه براحتهه، تمددت ؏ المندر الموجود بالغرفه احس ظهري مقسوم هاي اني ماتحمل اذا اوگف هواي رأساً يصير عندي وجع بالظهر، شويه واندگت الباب تفاجأت من شفت عميد ورهف واگفين

عدلت گعدتي ودخلو، سلمت عليه وتحمدتله ؏ السلامه لان ماسلمت عليه اول ما اجه، راح ؏ غزل يحچي وياهه، بَـس انشديت لحديثهم وماطلعت شلون يحچي بهدوء وسكينه صفنت عليه

-عميد: باباتي غزل عاينيلي

جر ايدهه عن وجهه وهيه منزله راسهه متقبل ترفعه، ضحك خفيف وگرص خدهه

-عميد: شني هيچ اهون عليچ حتى ماكلفتي ؏ رويحتچ وتحمدتيلي ؏ السلامه وانه چنت بين الحياة والموت

زادت بالبچي ورجعت تغطي وجهها، اللتفت عليه يباوعلي وابتسم من شافني مبگگة عيوني عليهم، اندار يكمل وياهه

-عميد: هسَّ شون بيچ انتي ولچ گومي مشتاگلچ، شمالچ حتى من گلت لأمي اريدن اشوفهه مارضيتي تجيني

-غزل: عميدي انه...

متگدر تحچي المسكينه تشهگ بصوت عالي واجتهه نوبة گحة قويه، وظلت تگح وتبچي

-عميد: اسم الله ؏ گلبچ بنيتي يواشچ ويه روحچ غزاله شمالچ يبعدي

هدأت شويه ومسحت دموعهه

-غزاله: عميد انه.. انه.. انه اسفه وعلي بعد مازعلك ولا اگولن شي يكدرك ولا...

-عميد بضحك: شني هاي هذا مشهد رهف مايصير تاخذينه انتي

ضحكت ورهف هم ضحكت وگالت بضوجة مصطنعه

-رهف: بابااا ليش تعيب عليّ

-عميد: ههههه من اغدي فدوة لبنياتي، تعالن ولچن

فتح ايده ورهف حظنته وغزل هم بَـس مستمرة تبچي، رهف ابتعدت عنه وگالت وهيه متخوصرة

-رهف: بااباا انته مو گلت بعد ما تكظ غزل شماله حاظنهه هسَّ

ضرب راسه بخفه وگال بضحك

-عميد: ولچن شني هاي الظاهر صابني زهايمر وانه بعز شبابي صاير انسى

-رهف: منيلك شاب بابا وبنيتك بطولك

-عميد: اويلي منچ ام لسان انه الچ اليوم

جرهه عليه ويدغدغ بيهه وهيه تضحك، ابتسمت ؏ سوالفهم وگلت خليني اطلع بره كافي عيب لاطشه بالعالم، رحت للمطبخ اشوف البنات، چان بكر گاعد ؏ الكرسي يدخن وبصفه استكان چاي وجواهر واگفه تغسل ماعين

-هجران: جواهر مو هستونه كملنه غسل ماعين ذني منين اجني؟

-جواهر: اكلو فواكه وگلت اغسل الماعين خطيه خاله شمس ومعصومة تعبن

-هجران: هااا ماشي (اللتفتت ؏ بكر) بكر شوكت نروح؟

طفه جگارته وشرب اخر كمعه من الچاي وگال بحماس استغربت منه

-بكر: يله هسَّ نطلع

هزيت براسي ورحت اجيب جنطتي، رجعت للمطبخ وشفته يحچي ويه جواهر

-كملت اني

-بكر: يله حبي نروح

-كلت بفهاوة: هاااا؟

-بكر: هههه شمالچ فكيتي عيونچ يله امشينا نروح

درت وجهي اباوع لجواهر غمزتلي وعضت ؏ شفتهه السفليه، طلعت وياه واني الفرحة البگلبي مانطيهه لأحد، هاي اول مرة يگولي "حبي" فوگاهه گدام احد عزااا سحت

الطريق كله بكر يدندن اغنيه ويقره، معرفتهه يا اغنيه هاي بَـس مبين عليه فرحان، دخلنه لغرفتنه بالفندق ونزعت شالي وهستوني اريد انزع الجبه، تفاجأت من حط ايده جوة خصري والثانيه جوه رجليه وشالني، شمرني ؏ السرير وبده يبوس بيه من دون ميگول شي

واني بنص صدمتي من اسلوب بكر الغريب بَـس الفرحة الي اني بيهه مستحيل اگدر اوصفهه، وقضيت احلى ليله ويه حبيبي وسولفنه هواي وحتى احس بي مرتاح واصر عليه ارجع احط من حمرتي المخملية بعدما انمسحت اثر بوساته...

گعدت الصبح وگلنه نروح نزور ونودع الامام وچان نشوف امة الثقلين هناك، تسالمت وياهم ؏ الخفيف واجت شهد چيتت عليه تريد تبوسني وجواهر گالت

-جواهر: دكاافي شگد تحبين تبوسين ماصارلنه اربعه وعشرين ساعه من تفارقنه

-شهد: يبووو يغيرتچ

-جواهر: اففف دولي يا غيره انتي

-هجران: هههه واضح ابد ماكو غيره

ضحكنه وكملنه زيارة، جبت علگ جايبته ويايه من العراق وشديته بالضريح طبعاً بطلاع الرووح متت ياله وصلت وشديته وهم مادري انشد لو وگع وراح بين رجلين النسوان

طلبت من الامام يحفظلي بكر ويرزقني طفل منه، كملنه زيارتنه وطلعنه للمطار.. الطريق گظيته بچي احس عفت روحي هنا عجيب الامام الرضا شنو من شعور واحساس الواحد يحسه من يفارگه

وصلنه للمطار ونزلنه الجنط واني دموعي عشره عشره ماعرف شبيه مدا اگدر اسيطر ؏ روحي، بكر گال

-بكر: وتالي وياچ هجراان اليشوفچ يگول عافت فريخهه

-جوري: اي والله شبييج يمعوده، يااا دشوف الدموع والشكل انگلب

-شهد: اويلي شگد حساسه ولچ مچنت اتوقعچ لهدرجة!

-هجران: لا بَـس احب الامام الرضا اني

-جوري: هوه انتي منو متحبين

-جواهر: يوووه دعوفو البنيه بحالهه استلمتوهه، معليچ حبي هجران ابچي اذا منبچي ؏ الائمه المعصومين عليمن نبچي ؏ حظنه

هزيت براسي وگوة لزمت دموعي، اجه عميد الدين علينه من شافني ابچي، گال بتعجب

-عميد: افااا العلويه تبچي شمالهه؟؟

-بكر: تبچي لان راح ترد للعراق

-عميد بأبتسامة: لهدرجة حبيتي ايران؟

-هجران: لا بَـس حبيت الامام الرضا وارتاح من ازوره

-عميد: انه هم احبن الرضا سلام الله عليه، طلبت رهوفه بنيتي منه

-هجران: صدُك والله؟؟؟ ووره شگد اجت؟؟

-عميد: يي بعلي، ماكو تلاث تشهر متزوج وشيلاء حبلت بيهه

-هجران: الله!!! (اللتفتت ؏ بكر وهمستله) حبيبي اني هم دعيت يصير عدنه طفل

ابتسم وهز راسه، شلنه الجنط ودخلنه للمطار، كملنه الاجراءات والحمد لله وصلنه بالسلامة وبيت حجي اسماعيل راحو لبيتهم، وثاني يوم اجن شهد وجواهر لان بده دوامهن..

مشت ايامي طبيعي يوم بكر يزعلني يوم اني اطنگر عليه، وهيچ گظت تلاث اشهر من زواجي بين يوم حلو ويوم مُر، وبيوم من الايام چنت دا انظف غرفتي واندگت الباب بطرقات متتاليه، سمحتلهم يدخلون اجت جوري طايرة عليه

-هجران: خير جورية شبيچ؟

-جوري: ياااااي هجرااان باركيلي باركيييلي

توسعت عيوني وگلت بفرحة غمرتني

-انتي حااامل؟؟؟؟

-جوري: ولچ ايييي عزااا هجرااان ولا توقعت احبل بهالسرعه

-هههه يروحيي الله يتمم عليچ واششش لتگولين هيچ لتحسدين روحچ

-جوري: اي والله اويلييي راح اطير من السعاادة والفرح

-تستاهلين والله، زين گلتي لفصولتچ؟

-لا لسه اريد اسويله مفاجأة وسوالف وحركات بركات

-هجران: ايي زين تسوين، زين صارلچ شگد ماعرفتي؟

-جوري: هوه صارلهه شهر ونص گاطعتني فَـہ الدكتوره گالت يجوز حامل ومادري بروحي

-الله يگومچ بالسلامة

-جوري: اميييين يارب، ويله انتي هم حللي مو گلتي گاطعتچ

-حللت وماكو شي

-ميخالف لتزعلين بعدنه بسم الله، ان شالله يوم النفرح بخبر حبلچ

-امين الله يسمع منچ

-ديلا اني اروح اتحظر الزلم ؏ وصول هسه هم ياله اللحگ

-اي عفيه همزين ذكرتيني حتى اروح اغسل الگاع وراهم

-جوري: عوووع شون تتحملين الدم ماعرف

-هجران: عادي تعودت كلما يرجعون اغسل ارضيه المطبخ وراهم وبوت وصدرية بكر بعد شسوي اذا مو اني اغسلهن منو يسويهن

-جوري: عوووع اني گلت لفيصل انته تغسل شغلاتك لو تنطيهن لأمك مثل قبل ولچ ماتحمل والله

-يمعودة مالي خلگ بكر يطنگر عليه، هوه يگولي ماريد غيرچ يغسلهن

-جوري: يي صح اتذكر گلتي، يله حب اني اروح

-ماشي باي

طلعت من غرفتي واني كملت ترتيب، طبيت اسبح وبدلت ملابسي وتعطرت وتمكيجت، هههه اليسمعني شنو من مكياج هوه كحلة وحمرتي البكر اليحبهه ماعرف غيرهن

وگفت اللبس شالي وسمعت صوت صياح جوة يا ساتر شصاير؟؟

ماعرفت شلون اللبس الجبه والشال وركضت بره، وگفت رجليه وقشعر جسمي من الصوت خفت اتقدم خطوه واني السمعته هز گلبي وزيد نبضاته، چان صوت عميد يعيط وصوت بكر رج الدنيا رج واخترق طبله اذني من عاط

-هدنييي عميييييد اله اذبحهه وعلي اذبحهه اليوووم!!!!

يتبع☘️...

♛ ♛ ♛ ♛ ♛ ♛ ♛ ♛ ♛ ♛
توقعاتكمم؟؟🦦 ولتنسون تفاعلكم الحلو والتصويت♥️.