شفاه مخملية الفصل الثامن 8 - بقلم 𝐙 𝐇 𝐑 𝐀

♛ ♛ ♛ ♛ ♛ ♛ ♛ ♛ ♛ ♛

تفاعلكم ميسوي واهس للكتابه ابد عوضواً بهذا البارت جميليني🌚🔥

"شفاه مخملية"

بقلم: زهراء السلامي.

#بـ فَيّ نعناع ؟
- چا والشوك والعاگول ذاك التارس سفوحه ؟
بـ فَيّ الياس ؟
- چا والناس ، والوهواس وآثار البجي ونوحه ؟
ترى التعبان من رُوحه، ما أظن تبرد جروحه .

♛ ♛ ♛ ♛ ♛ ♛ ♛ ♛ ♛ ♛

"هجران"
اخذتني الجمده من اسلوب امي والخوف الي بعيونهه بَـس تداركت روحي ورحت ادور ؏ غرفه ادخل بيهه، طبيت لوحده من الغرف چانت چبيره بَـس شفت منظر خلاني ارعش من فوگ ليجوه البنات گاعدات والوجوه مگلبه وناس تبچي وناس تلوب، اجتني جوريه وجهها مخطوف

-جوري: هجرااان مادريتي شصاااااار!!!!

-لا ولچ شكوو؟؟

-جوري: مروان وجماعته هدوا علينه

-ولچ منو مروان؟؟؟

-جوري بخوف: مادري بس يگولون همه عداوة تعاي نسأل رهف

رحنه ع رهف وجهها شاحب وحاظنه جواهر وبنيه لخ اكيد هاي "حلا" (اخت عميد)، حتى مالحگت اسلم ع البنات

-جوري: بنات فدوه ترا اني دا ارجف گولو شصاير؟؟

-جواهر: علمي علمچ حلا سولفيلنه شكوو

بلعت حلا ريگهه بخوف وگالت بصوت يرجف

-حلا: هذا مروان واحد طايح حظ سكير ابن شوارع، سوه سوايته ويه كومه بنات ومن يحبلن منه يذبحهن

-جوري: يممممااا صدُك تحچين؟!!

-حلا: والعباس

-هجران: لعد انتو شعليكم ليش هيچ خايفين وزعلانين؟؟

-حلا: اصبري جايتچ بالحچي.. فـ شيخ مروان واخوي عميد الدين چانو كلش گريبين ع بعض روح بالروح بس عميد مايدري بسوالفه المكسره لحدما يوم من الايام كادله مكيده ويه بت

دارت عيونهه ؏ رهف وسكتت، ظلينه وحده صافنه ع الثانيه ننتظرهه تكمل، بَـس چنهه مراح تحچي شي، جوري گالت بنفاذ صبر

-جوري: كمليييي حلا شبيچ سكتي!!!

ظلت ساكته واشرت ؏ رهف بعيونهه، سمعنه صوت الزلم والنسوان تتلاطم انهزززت الصاله هزز بالصريخ، طلعت جواهر تركض ورحت وراهه اشوف شكو اما شهد وحلا ورهف وجوري وندى بقن بالغرفه

-جواهر بخوف: هجراان دتسمعين صوت الطلللق هاي شكووو

-هجران: مادري جواهر خايفه ع بكر خاف يصيرله شييي

صفنت بوجهي ثواني واضح ع وجهها الخوف

-جواهر: يعني تگولين يجوز يصير شي للزلم؟؟

-مادري مادري بَـس اني خايفه

وگفنه بباب الغرفه نشوف الهوسه ونسمع العياط ماله والي كووومة زلم ونسوان بالصاله حتى ماعرف منين اجو ولا اعرفهم ولا شايفتهم من قبل.. صالتهم چبيره وانترست كلهه مدشدشه ومعگله

لمحت بكر واگف بصف فيصل، احس ردتلي روحي الحمد لله تطمنت مابي شي، دخلوا للصاله عميد الدين ومرتضى واحمد (اخو بكر) شايلين بيدهم سلاح بادت رجليه من الخوف هاي اول مره اشوف سلاح بالحقيقه، تقدمت مره ع عميد تبچي وتنوح، نفسهه الچانت تلطم اول مدخلت للبيت

-انتصار: ردلييي وليدي يعمييّد رده لحظنيي يبعد امك

-عميد بقهر: يمممههه وين ارددده مااات وليييدچ مااااات

-انتصار ببكاء هستيري: لاااا تگول ماااات اغضب عليك وعلييي لااااا تكول مااات ما ماات وليدي رده ليييه وحگ كافل زينب اذا مارديته لحظني لا انه امك ولا اعرفك

عميد حار وياهه والوجوه مگلبه وناس تتلاطم ويه ناس وهذا اليحچي وذاك اليعيط وهذا اليهدي الوضع، نهت ام عميد كلامهه بـ

-انتصار: اريدن راس مروان يعميّيد جيبلي راسه خلي يبرد چبدي يهيبة امك!!!

جحظت عيونه ببهته وكل الواگفين صفنوا بيهه، والزيد حيرتي حجية عطية وگفت وياهه وأيدت كلامهه

-حجية عطيه: شيخ سمعت چلام (كلام) اميمتك جيب راس مروان وردلنه كرامتنه لا تنسى دم مريتك الراح هدر من وره هالسگط

بكر تدخل وعاط بعلو صوته

-بكر: حبوووبة شلون نجيب راسه وحنه خذينه ثارنه منه هاي معناتهه تصير حرب من دممم ويروح بيهه عميد الدين

-انتصار: الشيخ عميد وليدي نچر وفحل الفحول ما يهزه چلامك يا بچر (يا بكر)

رجع الملاسن والحچي الزايد گلبي گام يدگ الف دگة بالدقيقه ودموعي تصب من الخوف، درت وجهي اباوع لـ جواهر مكممه حلگهه بأيدهه ونهر من دموع ينزل من عيونهه

الانظار كلهه توجهت ؏ عميد ينتظرون كلامه الاخير، تفاجأت من گال بصوت مهزوز

-عميد الدين: منين اجيبلچ راسه يوووم وهمه يردون فصليه وراس چبير من عدنه!!

شهگت انتصار ولطمت صدرهه وام غزل سوت نفس الشي، اما بكر وجهه انگلب دم وعلامات الدهشة مرسومه عليه، طلع عميد والزلم طلعوا وراه وبده صريخ وملاطم النسوان

الصاله انگلبت عزه هاي التملخ بشعرهه وذيچ التصيح بنيتي متروح فصليه وهاي التنعه وتجر مواويل حزن، وغيرهه تصيح خلي عميد الدين لو مرتضى يسلمون رواحهم وتفض، اجواء بحياتي مشايفتهه ولا متخيله يجي يوم اشهدهه لو اعيشهه

احس جسمي يابس مصفصفة وماعرف شنو اگول لازم اواسيهن؟ لازم اللطم وياهن؟ لو شنو لازم اسوي واني اصلاً مافهمت شنو المطلوب منهم!! شنو راس چبير؟؟ منو تروح فصليه؟؟!

اجتني امي ملهوفه عليه

-صباح: هجرااان ليش طالعه بره الغرفه؟!!!

-ماما شنو حيصير؟ منو حيمووت منو حتروح فصليه؟؟

-جواهر(گامت تنزل دموعي): خاله الله يخليچ گولي شنو حيصير حمووووت

-صباح: امشو جوه احچيلكم

طبينه للغرفه مره ثانيه والبنات گاعدات ويتراجفن، جوري بس شافت امي اجت تركض حظنتهه وگامت تبچي

-جوري: ماما شفتي فييصل؟؟ صارله شيي

-صباح: ماكو شي بنات شبيكم جوريه امي مابي شي فيصل وليش يصيرله شي من الاساس

-شهد(توأم جواهر): خاله سمعنه طلق بره شنو ماسمعتو انتو؟؟!

-صباح: سمعنه بس هاي ماكو شي ديضربون بالهوا مو فد شي لتخافون

-حلا: خاله احچيلنه شصار ليش هالسگط هد علينه؟؟

-صباح: مادري.. بس الفهمته وشيخ عميد گالب الدنيا لان يردون فصليه وراس من الكبار

جفلت حلا من سمعت هيچ ورهف رأساً خربت ووگعت من طولهه، ركضت امي عليهه واجت بيبي عطيه

-حجية عطيه: يممما يبعد حبوبتچ يمگروده ترحين فصليه، يمدلله عميد الدين يردون راس ابيچ يبعد ابيچ

تلطم ؏ رجليهه وتونون امي تخبلت البنيه غايبه عن الوعي وهاي گاعده تنحب وتبچي، حرنه شنسوي ندگ ؏ وجهها ونذب عليهه مي وهيه فاقده

-جواهر: بيبي حتمووت البنيه خلونه ناخذهه للمستشفى!!!

-حجية عطيه: وينه ابووهه حال الظيم حاله لفانه الظيم بين ليله وضحاهه يلمدللات (ومستمرة تدگ ؏ رجليهه وتمسح دموعهه بشيلتهه)

-صباح(ام هجران): خالة مو وكت النعي هسة شلون بينه!!!

-ندى: ماما خلونه نتصل ؏ بابا بلكي يگدر ياخذهه

جواهر گالت تتصل بواحد من الولد بَـس محد يجاوب، امي اتصلت ؏ ابويه واجه بسرعه سألناه عن عميد الدين وعن بكر وبقية الولد وليش محد يجاوب ؏ موبايله گال صايره طلابه مالهه اول ولا الهه تالي

راحن جوري وندى وماما ويه بابا واخذو رهف، توقعت حلا تروح بَـس ذيچ بغير عالم نحچي وياهه نريدهه تجاوبنه وهيه ماكو فاقده

صاحت عمتهم دلال تروح وياهم وامي اصرّت عليه اجي بَـس اني گلبي نار اخاف يصير شي وبكر يروح بيهه، فَـہ فضلت ابقى ويه جواهر وشهد

-شهد بخوف: بنات ماطول ذكروا سالفه الفصليه وراس چبير يعني اكو احد مات ويردون بدال دمه!!

-جواهر: معقوووله منو المات؟؟؟

-هجران: سمعت عميد الدين يگول لأمه وليدچ مات بَـس منو منهم؟؟

-شهد: قصده ؏ اخوهم رضا

-منو رضا؟

-شهد بهمس: رضا اخو مات قبل سنتين بسبب طلقه تايهه بعرس واحد من ولد شيخ مروان

-هجران: ليش احنه افتمنه منو شيخ مروان!!

-شهد: هذا سالفته سالفه

-هجران: اييي شنوو احچي متت والله

-شهد: ماعرف شنو بالضبط بَـس الاعرفه بيناتهم ثار ومليوصه صايره مجزرة بيناتهم وناس تذبح بناس

-هجران: يا ستااار يا ربي

باوعت ؏ حلا بلكي تفهمنه شي بَـس ماكو عيونهه ذبلانه والوجه مبلوع وميتفسر، احس حتى لسانهه انبلع اكيد من الخوف

انتبهت لجواهر اخذت موبايلهه ووگفت بعيد تتصل ع شخص، بس مبين مدا يجاوبهه منو هذا التدگ عليه وهيچ القلق مرسوم ع معالم وجهها، رحت عليهه اشوفهه شبيهه فزت بمكانهه

-؏ كيفچ جواهر شبيچ اخترعتي؟

-جواهر بخوف وقلق: هاااا لا عادي ماكو شي

-شبيچ حبي قلقتيني شبي وجهچ اصفر؟

-جواهر: مووو اءء ادگ ؏ امي

-صدُك اهلچ مجايين؟

-لا بَـس بابا جابني اني وشهد لان دوامنه يبدي الاحد

-هااا بس شعجب امچ ما اجتي؟

-جواهر: اختي فردوس زعلانه ويه رجلهه ومطنگرة متقبل تجي هنا

-هااا الله يهدي سرهه

-امين

اباوع عليهه ترجف وحالتهه حالة، كل شويه تدگ بالموبايل بَـس ماعرف ليش اكو احساس بداخلي هاي مو امهه التدگ عليهه، لان شكلهه مو طبيعيه وعبالك اكو شي ضامته ومتقبل تحچي بي، ابتعدت عنهه ودگيت ع بكر هم ميجاوب انوب خوف جواهر خلاني اخاف اضعاف مضاعفه لان اكيد همه يعرفون شيصير بهيچ گعدات ونادراً تعدي بدون دم

للعصر وامي ماكو بعدهه بالمستشفى الله يستر خاف صار شي لـ رهف، غزاله ماكو لا حچاية ولا روايه گاعده بحظن امهه ودموعهه تجري، متت قهر عليهه رحت احاچيهه اشوف بلكي اگدر اخفف عنهه

-غزل حبي شلونچ؟

هزتلي براسهه "زينة" ومتحچي شي، گعدت بصفهه

-حبيبتي لتخافين ان شالله تعدي ؏ خير

باوعت بعيوني ودموعهه تنزل بأستمرار من عيونهه الجذابه الچبيره

-غزل: هجرانه خايفه

-يروحي انتي ماكو شي ان شالله

-غزل: اخافن ؏ عميد اخافن يصيرله شي

بقيت ساكته وماعلقت، اردفت بصوت هامس

-غزل: اذا عميد يموت والله اموتن وراه ماتحمل بدونه انه هجران ماكدر بدونه يدفنو منا خليهم يحفرولي گبر بسده (بصفه)

-غزل حبيبتي ميصير هيچ تحچين حرام ليش تفاولين ؏ الرجال منو يگول يموت

-لا لا انه اعرف، اعرف والله راح يسوي كلشي بَـس حتى متروح وحده من عدنه فصليه يقدم روحه فدية حتى يحافظ علينه هوه يحبنه يحبني عميد يحبني هجران والله يحبني

انفجرت بالبواچي واني هم ماحسيت ؏ نفسي اله ودموعي تجري تخيلت عميد الدين يموت لاااء ليش عميد يموت ميروح اله الزين اله ابو الابتسامه الحلوة الحباب الهادئ الرزن

بالبدايه مافهمت السالفه من گالو يردون راس واحد چبير، بَـس شهد فهمتنه يقتلون واحد منهم ومن سألت منو گالو ؏ الاكثر لو عميد الدين لو مرتضى اخو واكيد عميد مراح يقبل اخو يموت فَـہ هوه يسلم نفسه وهسه غزل ثبتت هالشي

البيت مكهرب وام عميد الدين مابطلت تلطم وتونون، اما حجية عطيه ماسكتت وهيه تجر مواويل وتنعه، كزبر جلدي من گالت..

-"يبو لسان الحلو يالتعدل الديوان..
عليك اليوم دلالي صبح حزنان..
وتونّ تبچي الدلال وينحب الفينيان (الفنجان)..
يمدلل البنيات يالثجيل يالجساس..
يمزيون العشيرة يالركيز يالحساس..
يبن فحل الفحول يبن بطني يعباس..
يبوووووو وينك يعباس تعال شوف وليدك راح يسبح بدمه يبووووو يالحنييين يالهيبة يالعگل يالرزانه... يالـ... يالـ....

ماسكتت وهيه تنعى والنسوان وياهه يصيحن ويدگن ؏ وجههن ويصيحن يبوو

دگيت ؏ امي گالت همه بالطريق، رحت ؏ جواهر اشوف بلكي اتصل عليهه واحد من الولد بَـس حالتهه حالة عيونهه دم من البچي وشهد نفس الحاله اما حلا لسه متحچي شي

اذن المغرب ورحت اريد اصلي، توضيت وسألت غزل ؏ سجاده ماحچت شي گامت من مكانهه وانطتني من البوفيه ورجعت گعدت

گعدت ؏ السجاده ورفعت ايدي ودعيت من كل گلبي تمرّ السالفه ؏ خير وترجع حياتهم طبيعيه، لهناك واجت امي

-صباح: هاا هجرانه شصار بنيتي؟

-ماصار شي ماما بَـس بيبي عطيه ماسكتت وهيه تنعى وتبچي موتت الرجال وهوه لسه ماصار شي

-جوري: الله يساعدهم شلون يوم مشؤوم

-هجران: اي والله عاد كون تعدي ؏ خير وميموت عميد الدين

-جوري بشهگه: شنووووو عميد لازم يموووت؟؟؟!!!

-صباح: اسم الله الرحمن ان شالله ماكو شي لتفاولن ؏ الرجال

-هجران: لا ماماتي سمعت عمه سلمى (ام فيصل) گالت اذا سلم عميد نفسه لشيخ مروان السالفه تفض ويتنازلون ؏ الفصليات وينسون كلشي

-جوري بحزن: بجاه هاي المغربيه ميصيرله شي

-هجران: امين يارب امين

لليل وكلشي ماكو الزلم بالديوان والنسوان ؏ حالتهن، گامت كم وحده سون عشه وودوا للزلم كله مفلطح (تمن فوگاه لحم) طبعاً اذا همه قصابين اكيد اكلهم كله لحم وهبيط رحت اساعدهم، واكلت شويه لان متت جوع لا متريگه ولا متغديه، صحت لخواتي ياكلن بَـس هاي ندى تتماوع ومتقبل تاكل علبو تلعب نفسي

-ندددى اكلي واسكتي لعد تظلين تموتين من الجوع ورانه طريق طويل

-ندى: اريد بيتزا

-جوري: شو دنچبييي دتشوف العالم مليوصه وناس بنص ناس وگاعده تتوحملي ؏ بيتزا

-جواهر: حبي نداوي اطلبلچ بيتزا؟ لان هاي شهد هم متاكل لحم

-ندى: اي اي اريد

-هجران: جواهر صدُك جذب منو يحيبلهن بيتزا بهالوضع

-جواهر: لا نتصل ؏ المطعم يجيبه للبيت هسة اگول لحلاوة يتصل

-جوري: منو حلاوة؟

-جواهر: محمد اخوية نصيحله حلاوة

صدُك گامت تتصل ؏ اخوهه ثواني وطب للمطبخ بَـس شنو عيني صدُك حلاوة، كلنه صفنه عليه نسسسخة من جواهر اصلاً تگولون التوأم مالتهه بَـس هوه عيونه مو خضر وشعره بني طوخ، يطلع ابن الـ 23 سنة

-حلاوة (محمد): ها جواهر صحتيلي؟

-جواهر: يي حمودي حباب اتصل ؏ المطعم يحيب لشهودة ولندى بيتزا

-حلاوة: اگولج فشله من الاوادم هسة شيگولون عنه!! الناس رح تتذبح واحنه نوصي بيتزا خليهن ياكلن هالقاسمه الله ويسكتن

-جواهر: حلاوة شبيك انته تعرف شهد متتحمل ريحة اللحم مو انوب تاكله وهيه لسه بلا غده

-حلاوة: اووووف حواهر اوووف منچن، امري لالله هسة اطلب

-جواهر: فديتك

-هجران(ندى وجوري تقربن عليه وهمسن بنفس الوقت

-ندى+جوري: ولچن هذا صدُك حلاوة

-هجران: خرب ولچن اششش خاف اخته تسمعنه

وچنهه صدُك سمعت لان ضحكت وگالت

-جواهر: ههههه عادي حبايب هاي مو اول مرة اسمعهه اخوچ صاك

-ندى: خرب حظي المزفت ولچ يا صاك هذا يحط بيت الگصاب (بكر واخوانه وولد عمه) كلهم بجيب الصفح

اجت شهد ناحيتنه، جواهر ضحكت وعلقت

-جواهر: ههه شهد تعاي شوفي البنات هستوهن شافن حلاوة

-شهد: هااا شفتن اخويه الاچلح

-جوري: صخاام بوجهچ اذا هذا اچلح لعد اني شنو

-شهد: انتي ملحة

ضحكنه بالسكته خاف يسمعونه وبطيحون حظنه، جواهر وشهد كُلش محبوبات صح اليشوف جواهر يگول عنهه جامدة وثقيله بَـس من تحچي العكس تماماً، لهناك وطب بكر من باب المطبخ

النسوان كلهن ركضن عليه

-حجية عطيه: هااا بكر حبوبه شصااار عمييّد ويين؟؟

-بكر: ما صار حجية بعدنه جاي نقنع بيهم

-حجية عطيه: يبوووووو يعباس يبني يبووووو يبن بطني راح وليدك يبو طول الحلوووو يبو الضحكة الحلوة....

بكر عافهه وتوجه للصاله وهيه مستمره بسوالفهه التموت الگلب، چنت مستحية ومتردده احاچي لو اظل بمكاني واسكت، انتبهت جواهر عيونهه عليه بَـس هوه مانتبه عليهه

حسمت الامر وگلت اروح احچي وياه، شفته طب لوحده من الغرف وگفت بباب الغرفه انتظره يطلع، مرت ربع ساعه وهوه جوة، أيست يطلع ماعرف منين اجتني الجرأة ودگيت الباب عليه، اجاني صوته

-بكر: منهووو

-اني هجران

-تفضلي

دخلت بالغرفه شفته گاعد ؏ السرير ونازع الغتره عن راسه، مغطي وجهه بيده وساند عكسه ؏ ركّبه

-هجران: بكر انته زين؟

رفع راسه يباوعلي عيونه عباره عن جمرات كتل دم بيهن، صحت بلهفة

-بكرر شصايير؟؟؟

هز راسه بقله حيله ورجع غطه وجهه، گام ينحب بصوت عالي شكله يكسر الخاطر، انمرد گلبي واني اشوف حالته، تقربت عليه وگعدت ؏ السرير

-بكر صار شي؟ احچيلي

ماقبل يگول شي، سكتت ومالحيت وياه ماريد اضوجه.. بعد مرور خمس دقايق من الصفنه وهوه مغطي وجهه بيده، گال بعبره

-اخافن يروح عني

-منوو؟

دار وجهه يباوعلي، استحيت لان صرنه وجه بوجه بَـس تجرأت وبقيت اباوع لعيونه

-بكر: اخافن يذبحون عميد

-لا اسم الله عليه لتحچي هيچ

-بكر: انه اعرفهم هجران ذوله وسخين ومروان السگط عنده عداوة ويه عميد

-ميخالف ان شالله تنحل انته لتخاف فدووه

-ماگدر اوووف يا نار گلبي ولچ انتي تعرفين عميد شنهو بالنسبه ليه!! عميد اخوي وصديجي (صديقي) وحزام ظهري وعضيدي ما فد يوم مريت بضيج اذا ماشوفنه اول واحد بوجهي ولا بمحنه لوما يوگفلي طول ويسندني عميد تچايتي وعكازتي و و و و....

يحچي ودموعه تنزل، ماتحملت الكلام دموعي گامن ينزلن ويه كل حچاية يگولهه، معقوله هيچ يحبه ويعتبره كلشي بحياته

-بكر: تدرين هجران عميد الدين مو بشر لاا مستحيل اكو بشر مثله هوه ملاك منزه بالنسبه ليه اتحداچ تجيبين واحد يكرهه حتى مروان الي هوه عدونه هم ما يكرهه لان چانو اعز من الخوان

-لعد شبي انچلب عليه هيچ

-انتي گليتهه چلب!! زلمه ورنه (جبان) حط عينه ؏ مرية عميد ورادهه ليه

-شنوو شلون؟؟ مرت عميد مو متوفيه؟

-گبل لا تروح الله يرحمهه چان يريدهه وينوح عليهه

-يعني قبل ليتزوجهه عميد؟

-لااا السگط وره ماتزوجهه ورهف عمرهه خمس سنوات وهوه عينه الزايغه عساهه بالفگس ؏ "شيلاء" مرية عميد

-عزاا العزاه اييي وبعدين شصار؟؟

تنهد بعمق وفرك وجهه

-بكر: هجران تعبان اريدن انام

-هاا ماشي يله اخذ راحتك

گمت واني الف سؤال براسي، شفته نزع الدشداشه ظل بَـس بالبجامة، درت وجهي بسرعه عنه استحيت كُلش، گلت بصوت ناصي "تصبح ؏ خير" وفلتت، صارت بوجهي امي يبااوو حَ تعزيني

-صباح: هاي وين چنتي گعد ادور عليچ

-هااا اءء هنا بهاي الغرفه گاعده

-شتسوين بيهه؟؟

-ولا شي ماما بَـس گاعده

-هاا ديلا امشي روحي نامي ويه البنات

-شنوو حَ نبات هنااا؟؟

-صباح: اي لعد وين نروح وهمه بهالحال ابوچ گال فشله نرجع وهمه حتى الغربه باتت يمهم

-هااا وفاضل وحيدر شلون؟ يظلون وحدهم

-قابل جهااال شبيچ هجران

-هجران: لا لا مابيه يله اني اروح

رحت للغرفه شفت غزل ورهف وحده حاظنه الثانيه وغافيات، وحلا نفس حالتهه ماكو جديد وندى نايمه

شفت فارشين منادر وحده بصف الثانيه وجواهر وشهد وجورية متمددات، رحت بصفهن سندت ظهري ؏ الحايط واني افكر شنو الموضوع الصار وليش اله اليوم اجو ذوله الحقراء وهدوا عليهم، احنه شگد فگر كلما ننجمع ويه بعض تصير مصيبه

-جواهر: هجران حاچيتي بكر؟

-هاااا

-شهد بغمزه: شفناچ تطلعين من غرفته (گمزت عليه وگالت بصوت لعوب) شصاار هناك يولو

-جوري بضحك: شوكت نشوف ولي العهد

-شهد: هههههههههههه حمووووت الله يطيح حظچ جوري شگد فاسقه

-جوري: ههههههه ونبي احس صار شي بيناتهم احچي هجور مصارت غمزه بوسه لوسه موسه

-شهد: هههههههه لوسه شنو ولچ

-هجران: بنااات هسة وكت ضحكچن دشوفن احنه بيا حال متصخمات متعزايات وزلمنه ؏ غفله واحد يروح من ايدنه

-جواهر بخوف: اسم الله هجرااان فدوه لتحچين هيچ ترا اني گوة سانده روحي هسة انفجر

-هجران: هذا الصار جواهر بكر يگول حالتهم بالضيم

استغربت من شفت دموع تجمعت بعيونهه مسحتهن بسرعه وطلعت من الغرفه، ظلت براسي هاي شبيهه اكو سالفه غريبه واليوم اله اعرف الموضوع.. نامن شهد وجوري وجواهر لسه مارجعت للغرفه الساعه عبرت الوحدة ونص والكل نايم، امي وابويه انطوهم غرفه بالطابق الثاني، علساس حتى احنه ننام وياهم بَـس جوري وندى يردن ينامن ويه البنات

طلعت امشي ؏ اطراف اصابعي اريد اشوف وين راحت جواهر وهم بطريقي اشرب مي متت عطش، بالاول رحت للمطبخ فتحت الثلاجة وگعدت اكربع مايات

اححححح يمه شعوطت اليوم اففف حياتهم متعبه ذوله شنو هاي، سمعت طگطگة وعبالك واحد جاي يفتح باب المطبخ بالمفتاح، خفت ورحت بسرعه للصاله واذا اشوفلكم منظر خله الدم يصعد لراسي

جواهر چانت طالعه من غرفه بكر!!!!! ركضت اوگف وره البوفيه حتى متشوفني البوفيه ضخمه واني زقچة مابين، چانت واگفه تتلفت تخاف واحد يشوفهه، لهناك وطلع بكر من الغرفه

-بكر: ردي للحجرة ونامي لا تظلين تفترين بالبيت

-جواهر: اووّك تمام بَـس فدوه طمني ورد ؏ اتصالاتي حباب

-بكر: خوش روحي نامي

عافته ورجعت للغرفه، همه غرفهم متوزعات حول الصاله يعني كلهن يطلن ؏ الصاله، ظليت صافنه واني مامستوعبه الشفته هاي ليش چانت بغرفه بكر؟؟ وليش تگوله جاوب ؏ اتصالاتي؟؟ يعني بكر الي چانت تدگ عليه اليوم الظهر؟؟؟

كل هالافكار تتناطح براسي صار عندي صداع، گعدت بالصاله ؏ الكرويته ماريد ارجع للغرفه احس روحي مخنوگة، طلعت موبايلي من جيبي ورحت اشوف الفيس مال بكر چان نشط.. ركضت ؏ الفيس مال جواهر هم نشط!! معقوله جاي يحچون سويه؟؟!

قاطع افكاري صوت نحنحه مو غريبه عليه، رفعت راسي واذا اشوفلكم عميد الدين، بَـس شكله مو مثل كل مرة مبتسم ضاحك، لااا هالمرة مبين عليه مهموم وحزين وملامحه ذبلانه واضح من التعب

شكله مانتبه عليه گاعده او يجوز استحى يحاچيني لان فوراً تقدم ؏ وحده من البيبان وراد يدخل، حسيت لازم اسلم عليه واسأل عن حاله هم فشله، بَـس لا لا مو فشله اصلاً عيب احاچي واوگف هنا وحدي بله شافني بكر شيگول عني خليني ساكته وساتره ؏ روحي

دخل لغرفته واني هم رجعت، شفت جواهر بيدهه الموبايل تگلب بي بَـس شافتني نامت، والبنات نايمات واني الوووب للحظة ردت اخذ موبايل جواهر وافتش بي القهر عماني والشك نخر گلبي

غمضت عيني عسى انام، وفعلاً ماحسيت اله ؏ اذان الفجر وصوت ونين جاي من يم فراش غزل ورهف

گمت اشوف شكو، چانت رهف تون وهيه نايمه.. تطلع صوت غريب خفت عليهه هاي شبيهه.. ماتحملت ابقى ساكته رحت ادفهه ؏ كيف بأيدهه

-رهف.. رهوفه شبيچ حبي.. رهف اگعدي رهفف

حست غزل عليه

-غزل: هجران؟؟ شمالچ تصحيهه؟

-همست: شوفي گعد تون ليش تون؟؟

-غزل: هيه هيچ

-لا غزل مچانت هيچ قبل شويه ليش اله هسة

-عزل: حبي هاي جاي تحلم من تحلم تگوم تون بنومهه

-هااا والله اخترعت عبالي اختنگت لو صارلهه شي

-لا مابيهه شي

-تمام

رحت توضيت وصليت الفجر اما غزل رجعت نامت، رحت ؏ فراشي اريد انام واسمعلكم انوب صوت بچي

فزيت من مكاني واني اشوف رهف تبچي، هااااي شكووو وشبيهن ذني ميحسن شنو ميتاااات!!! گعدت غزل گامت مخروعه

-غزل: هاا هجران شمالچ؟؟

-ولچ شوفي رهف تبچي

-غزل: ياااء ليش رهف رهوفه اصحي رهففف

فزت رهف وگعدت ؏ حيلهه، فركت عيونهه وتتنفس قوي فحطانه، عبالك چانت تركض، فجأة وانفجرت بالصريخ والبواچي

-رهف: باااابااااا اريييدن ابووووي باااابااااا

كل البنات گعدن ؏ صوتهه وهيه تبچي وع صرخة الوحدة "اريدن ابوي صيحولي ابوي" ومغمضه عيونهه ماعرف ليش يمكن بعدهه نايمه، گمزت غزل وراحت بره الغرفه يجوز راحت لـ عميد تصيحله

شويه واسمع صوته بالباب واگف

-عميد: يا الله يا الله بنياااات ادخلل؟؟؟ يا الله!!!

-غزل: فووت بابا لابسات

دخل ملهوف عليهه، گعد ؏ سريرهه واحنه محاوطيهه

-عميد: بويه رهف انه هنا بنيتي شمالچ رهففف بويه اصحييي انه هناااا

اخيراً هدأت وباوعت بوجهه، گمزت عليه وحاوطت رگبته وحظنته منهه حيييل وتبچي وتنحب

-رهف: لااا تعوفنييي لا ياخذووك منييي بابا لا تعوفني

-عميد: يا روح ابوچ ماروحن مچان اصحي رهوفه انه هناا باباتچ هنااا انه هنا يبعد هلي

بقت ؏ هالحال تقريباً دقيقتين شابگتة شبگة مووت وهوه يهدي بيهه ويقره آيات قرآنيه، استغربت محد اجه لسه شنو معقوله محد سمع صوتهه وهيه تعيط، خو الطابق الثاني مستحيل يسمعون بَـس الغرف المجاوره شنو سالفتهم؟ ندى تقربت ؏ غزل وسألتهه بصوت ناصي

-ندى: غزل شعجب محد اجه؟

-غزل: متعودين

-جوري: شلون يعني؟

-غزل: بالسبوع اقل شي مرتين تفز مخروعه وتبچي

-جوري: ايا مسكينه ليش هيچ؟

-غزل: تحلم بأشياء

-هجران: وابوهه دائماً يجي يهدأهه؟

-غزل: اي واوقات ماترضى يبعد عنهه الا ينام بصفهه

-جوري: عززاا وينام هناا بينكم؟؟

-غزل: لا اكيد لا ياخذهه لحجرته وتنام هناك

-جوري: هااا عبالي

وصدُك كلام غزل، رهف اصرت ابوهه ينام وياهه فَـہ اخذهه لغرفته بَـس انصدمت من شالهه شيل مثل الاطفال وطلع بيهه لغرفته

بالاحرى مو بَـس اني انصدمت اني وخواتي انصدمنه اما جواهر وشهد وغزل وحلا عادي عبالك متعودات ؏ السالفه، رجعن نامن ولا كأن صار شي

شنو هاليوم الغريب العجيب ماكو شغله ماصارت شنو سالفة ذوله العالم وشنو سالفة حياتهم الغريبة، گوة رجعت غفيت والحمد لله گعدت ثاني يوم الصبح ماكو شي الكل هادئ والنسوان گاعدات يتريگن عدى حلا وام عميد بعدهن گاعدات مصفصفات ودموعهن تكت

رحت للحمام اغسل وشفت مرة واگفه هيه وبنيه شابه يسولفن المرة صاحت للبنيه نرجس، عرفتهه رأساً اكيد هاي عمتهم فتوح وبتهه نرجس، غزل حاچيتلي عنهن وگالت عنهن مو راحة

-من رخصتچ خاله

-فتوح: شنييي يممه؟؟؟ خاله شني انه عمتچ من عمت عيونچن

صفنت بوجهها هاي شبيهه؟؟ بَـس غلست عنهه ودخلت للحمام، طلعت منه وهنه بعدهن واگفات

-نرجس بأستهزاء: انتي بت صباح؟؟

-هجران: اي

-فتوح بصوت ناصي: هااا يخطافات الزلم

انزعجت منهه ومافهمت جملة "خطافات الزلم"، بَـس النرفزني اكثر وموتني من بتهه گالت بضحكة استهزاء

-نرجس: بَـس گوليلي شنهو شاف بيچ بچر (بكر) وخذاچ لا جسم لا طول لا شكل حتى سمرة تلوعين الچبد

حصرتني الدمعه وتمنيت اگدر اردهه بَـس طبعي خجوله وخوافه ماگدر احچي، راحت عني هيه وامهه گبر كرهتهن وحقدت عليهن..

گعدنه حول السفره وحاطين اشكال بيض وجبن وگيمر، جوري سألت ؏ فيصل گالو ويه الزلم الگعده من الصبح بدت.. وگالو ان شالله تفض ؏ خير

بَـس چنهه مافضت، كملنه ريوگ ورحنه نغسل المواعين، وشهد وجوري يضحكن ويحششن، ماحسينه الا باب المطبخ انفتحت حيييل، اجه مرتضى شايل سلاح ويعيط وفيصل واحمد مكمشين بيده

-مرتضى بصياح هستيري: مايااااخذووووهه!!!!! وعلييي ماياخذووووهه وحگ الرضاااا المسموووم اخلي الدم يوصل للرچااااب اذا ماصارت لييه

واگفين مبحلقين عليه وهوه وجهه مطعون صاير ازرگ من العصبيه، خفنه كُلش واضح اكو سالفه متبشر بخير، اخيراً جره احمد للصاله وطببه لوحده من الغرف، اما فيصل ظل واگف يضرب صفنات بالمطبخ

تقدمت سلمى (امه) عليه وسألت بخوف

-سلمى: فيصل شكووو شصاير؟؟؟

باوع ؏ امه بحيرة، حسيت اكو مصيبه راح توگع ؏ روسنه، وفعلاً وگعت والكل انسطر واولهن غزل وامهه

-فيصل: مرتضى نهى ؏ غزاله جدام الشيوخ كلهه!!

يتبع☘️...

[ينبغي أن يكون هناك GIF أو فيديو هنا. قم بتحديث التطبيق الآن لتشاهد المحتوى.]

♛ ♛ ♛ ♛ ♛ ♛ ♛ ♛ ♛ ♛
لتنسون التصويت والتعليق💚