شفاه مخملية الفصل السابع 7 - بقلم 𝐙 𝐇 𝐑 𝐀

♛ ♛ ♛ ♛ ♛ ♛ ♛ ♛ ♛ ♛

"شفاه مخملية"

للكاتبه: زهراء السلامي.

فنـه اليجيس اهـواي ويمس خـياله
الـبرد لـو جـاساه گل عطـوه مـالـه!

♛ ♛ ♛ ♛ ♛ ♛ ♛ ♛ ♛ ♛

"غزاله"
ركضنه عليهه شفناهه واگعه بحظن زيد و"مرجانه" ؏ راسهم مبگگه عيونهه التخوف، صفنت ؏ حالتهم وشلون زيد كاظهه گمت ارجف وانه اشوفن عميد عيونه تگلبت من العصبيه...

-عميد بصياح: شمااااالچ بووويه زيد لييش كااااظهه؟!!!!!

-زيد: سيد والله ماعرف اجيت.. اجيت.. للمطبخ و...

قاطعه واجه طاير ؏ رهف واگعه غشيانه

-عميد: لچ بوويه رهف اصحييي شمااالچ شصاار بنيتييي

يضرب ؏ وجهها وهيه ماكو لا حچايه ولا روايه، دقايق والدنيا تجمهرت بالمطبخ يشوفون شجرى

-حجية عطيه: يا خيه ولكم شمالكم؟؟ شمالهه هاي تعيط عياط المعزايات

عميد عاف الكل واخذ رهف صاح بيه اجيبلهه ربطه، رحت بسرعه ورجعت راح وياه بكر وابوي واخواني كلهم اليشوف يكول رايحين زفه للمستشفى

بَـس حقهم يخافون عليهه رهف عدهه فتحة بالقلب وممكن أي خرعه او خوفه تروح بيهه، ركضت ؏ مرجانه واگفه وتصفن بينه هالصخلة النعاااله چان ماتت البنيه من وراهه، هجمت عليهه اريد اطلعهه بره وجدة عطيه تصيح عليّ

-حجية عطيه: ولچ غزلللل عيفييهه ولچ لاا تجرجريهه مثل المطييي ولچ غزللل

-غزل: حبووبه خوفت رهف چان ماتت

-حلا: جده ليش هاي هنااا شوفيهه شلون تخوف فوگاهه لونهه اسود مصخم

-حجية عطيه: والله ماكو غيرچ سوده ومصخمه يملطمه معليچن بيهه جيبوهه ليه

ماگدرنه نسوي شي راحت مرجانه تركض لجدة عبالك بتهه

-سلمى(ام غزل): عمه صدُك جذب تحچين حاظنه صخلة وگاعده

-حجيه عطيه: معليچن انتننن ولچن ولننن عن ويهييي (وجهي)

-سلمى: عمه البنيه اخترعت شجاچ بنص الليالي تفتر صخلتچ المصخمه بيناتنه عبالك من اهل البيت

-انتصار(ام عميد): عمه مو گصدنه شي بَـس هاي رهف تخاف منهه واكثر من مرة مخترعه خلينه ساترين ؏ رواحتنه ومحافظين ؏ الطفله بله صار بيهه شي هاي يتيمه ولو رهف صابهه شي وعلي عميد يموتن وراهه

-حجية عطيه: حتى انتييي ولچ انتصااار امشن امشن ولننن امشن لا توگفن بوجهي چنچن شمعات فگر

-غزاله: هسة يجي عميد ويذبحهه هوه هذيچ المره هدد وگال اذا اخترعت رهف منهه بعد مره يذبح مرجانه خلاااص

-حجية عطيه: فااال الله ولا فااالچ يالغمه يالطمه خلي يذبحني گبلهه

-دلال(العمة): يمه من كل عقلچ يذبحچ گبلهه شني تساومين روحچ لخاطر بهيمه

-حجية عطيه: چا هاي بنيتي ربيتهه وهيه هالگداتهه اهئ اهؤ اهئ اهؤ

بدت حبوبه عطيه بسنفونيتهه تصعدد وتنزل، يبووو شيخلصهه الليله علينه اليوم

-حلا بهمس: وعلي تحب مرجانه اكثر مننه كلنه

-غزل: اي بعلي ادري بيهه عدهه لو نموت گدامهه مايرفلهه جفن بَـس لو احد طخ مرجانه تگلبهه كربله

-حلا: فوگاهه هاي الصخام كلشي مايطلع منهه لا ميييع لا بيييع شنهوو سخله لو شني، وين الله وعميد يذبحهه ونرتاح منهه

-غزاله: يارييت ؏ الاقل ما نخترع كل يوم وهيه طابه علينه وعلي اوقات اخافن اصحى واللگاهه بفراشي

-حلا: چا انه مو اكثر من مره اشوفنهه بوجهي اول مافتح عيوني الصبح

-غزل: اووف شوكت تموت ونخلص منهه

-حلا: بالعباس تموت جده عطيه وراهه

-غزل: چا تموت رهف احسن تذكرين چم مرة مخترعه منهه وتوگع غشيانه

-حلا: اي والله اتذكر

-غزل: عاد كود تعدي ؏ خير وترجعلنه بالسلامه

رجع الكل لمكانه وانه گلبي نار ؏ رهف خايفه عليهه، جگد امي رادتني ارد لغرفتي وانام بَـس ماگدر هاي رهوفه اخيتي وتوأمي احنه صح بيناتنه سنه بَـس تفكيرنه نفس الشي وحتى شنو نحب وشنو نكره

بَـس نختلف بموضوع الدراسه لان اكرههههااا وهيه تموت ؏ الدراسه طالعه شاطره ؏ ابوهه، قريب الوحدة بالليل وردوا الولد بَـس عميد گوه يمشّي رهف عبالك طفل توه يتخطى

-غزاله: رهفففف يروووحي انتي زينه؟؟ شمالچ وگعتي غشيانه؟؟

هزت راسهه بـ "زينه" وابوهه خذاهه للغرفه ترتاح، اما انه وجده عطيه وعمه انتصار وامي وحلا كلنه بالصاله گاعدات ننتظر عميد يحچيلنه شصار ويه رهف وشمالهه وگعت، شويه وطلعلنه من الغرفه الوجه احمر وعروگه ناطه يعني اكو مصيبه تنتظرنه، رعد بغضب گوة كاتمه

-عميد: وييييين سخلتچ حجييية؟؟؟؟

-حجية عطيه: لا يعمييّد لا يبعد هلي عوفهه هاي سفيّه ماتفهم

-عميد: حبوووبه انه حذرتت وقد اعذذذر من انذذذر گلت اذا مرجانه دخلت للبيت وعلييي اذبحهه بأيدييي

-انتصار: يمه عميد يبعد امك ؏ كيفك لا توجر گليبك

-عميد: يممممماااااا بنيتي رااادت تموووووت انگطعععع نفسهه من الخووووف وبو فااااضل لو رهففف صابهه شي وعلي مارحم احدددد

-غزاله(عميد صاير كبريت هوه مايعصب ؏ سوالف تافهه بَـس من توصل لـ رهف لااا رهف خط احمرر عنده، طلع بكر وابوي يهدأو وهوه راكب راسه الااا يذبح السخله "مرجانه" وحبوبه عطيه تدگ وتلطم تگولون ماخذين بنيتهه وحَ يذبحوهه، گوووه وبشلعان الرووح بكر قنع عميد يرد وياه للغرفه ويحچون، اخييراً رجع الهدوء بالبيت والكل تطشروا بغرفهم

رحت ركض ؏ رهف شفتهه بسابع نومه وانه وحلا همات نمنه، بَـس خفت تفز رهف بالليل تخترع فَـہ نمت وياهه ؏ الفراش، شنو هاليوم الملطم بالمهر انگلبت محزره انوبينه ردينه وهاي المسكينه وكعت غشيانه من الخوف..

صبحت ثاني يوم البيت هدووء ورهف مو بفراشهه، سألت حلا

-حلاوي رهوف وينهه؟

-حلا: بالمدرسه

-هاا شعجب راحت هيه مو مريضه؟

-حلا: انتي ماتعرفين رهف تخرب ؏ المدرسة الي يشوفهه يگول رايحة لمدينه اللعاب

-غزل: ههههههه ماعرف شتحب منهه والله غريبه هالبت

-حلا: هههه اي بعلي

گمنه وكل وحده استلمت شغلهه وست نرجس گاعده رجل ؏ رجل محد يسخرهه تصير بت عمتي "فتوح"، كلما احاول احچي وياهه شي تگب بوجهي مثل العفريت

-نرجس: انتييي شعللليچ شفتووو كلكمممم بالبيت عليّ وتعيرووون بيه عبن مطلگه

-غزل: ولچ ياهو جاب طاري طلاگچ

-نرجس: انتيييي انه اشوفنچ تبسبسين ويه حلا ورهف وتضحكن عليّ عسسسسى اشوف بيچن يوووم وتطلگن من اول اسبوع زواجچن

-غزل(دگيت ؏ صدري): ايااا معزااايه شني هالدعوه الله ياخذچ

-نرجس: حتى ما تندگن بيه

-غزل: الغسل ؏ هالوجه الاچلح

عفتهه ورحت اكمل شغلي وييع تلعب روحي منهه هم چلحة ملحة چنهه طرشي معفن وهم لسانهه والدعاء كلما احد يحاچيهه تنزل عليه دعاوي سوده

مشت الايام طبيعي خاليه من أي احداث جديده كله شغل وكرف والخطار طابين طالعين، والولد يطلعون للشغل الصبح مايردون اله ؏ الغده ويردون مرة ثانيه مايرجعون اله تالي الليل حتى عميد الدين وياهم، رغم هوه شيخ ولازم يگعد بالديوان بَـس يحب شغله ويگول اطلع حرگتي بالبهايم والذبح اخفف ؏ رويحتي، اوقات اخافن من يحچون هيچ الچان هوه والچان بكر اخوي بَـس كلمن حاير بضيمه والله الوحده عالم بشنو مروا والقهر الشافو..

اكثر الوقت ابوي يگعد بداله بالديوان من يروح للشغل بَـس من تصير شغله چبيره ويحتاج يتدخل يندهون لـ عميد يحلهه وماشالله عليه يحلهه بنفس الساعه بذكائه وفطنته وارث هالسالفه من ابوه ؏ گوله جده عطيه تسولف عمي عباس الله يرحمه ذكي ونبه يلگف المظلوم من الظالم من النظره الاولى وعميد طلع عليه رغم استلم المشيخة وهوه بعمر الـ 21 سنه بَـس دار الموضوع وصار شيخ كل السلف يحچون بي ويحچون بأحترامه واخلاقه العاليه وكرمه وجوده..

رحت للمطبخ امسح وادندن اغنيه احبهه، سمعت صوت ورايه نززني

-الللله شنو هالصووووت

-غزل: مرتضى؟؟

-مرتضى: هههه اي شمالچ جفلتي

-هااا لا مابيه شي بَـس عبالي انته بالمحل

-مرتضى: لا ماطلعت اليوم تعبان

-اممم سلامتك

-مرتضى: الله يسلمچ غزالتي

سكتت وماجاوبته، رديت امسح قاط ثاني، اتخبببل من يصيحلي "غزالتي" محد يصيحلي هيچ غير عميد الدين حتى اخواني مايصيحولي هيچ

-مرتضى: وين حلاوي؟

-غزل: نايمه

-شمالهه هاي العوبه ما تشتغل وياچ؟

-غزل: اليوم المسح عليّ وهيه عليهه المواعين

-ايي حتى لو خليهه تعاونچ شوفي انكسر ظهرچ ماتتحملين انتي

-وشمالي ماتحمل عادي متعوده

تقدم عليّ وهمس بصوت مليان حنيه ودفو

-مرتضى: غزل ماريدچ تتعبين

-مرتضى شمالك گتلك ما تعبانه انه متعوده

-هاااا چا براحتچ بعد

انطيته ظهري وكملت مسح، گعد ؏ ميز المطبخ واشوف عيونه اكلتني شبي هذا خفيف.. شويه واجت رهف ايييي الحمد لله اجيتي والله جابچ

-رهف: غزل بدت المسلسل

-اي اي جايه

ركض ذبيت الوصله وغسلت وافلتتت للغرفه، گابلت المسلسل وگعدت يبوووو يمن فدوه لهلوجوه لكم بويه شني ذوله حلغووم خوب ما حلغووم، اجتني حلا تفرك بعيونهه

-حلا: ها غزل بده المسلسل؟

-اييي ماتشوفين

-حلا: ايي ايي اشوفن

راحت رهف تجيبلنه نميات وحبشكلات وگابلناه وللسته المغرب متابعات اربعه وواحد وره الثاني وكلهن تركي.. شويه ونسمعلكم واحد يدگ الباب، گمزت رهف

-رهف: ولچنننن هذا ابوووي

-حلا: يبووو يبووو طفن التلفزيووون طفننن لا يجي يصخمنه

-غزل: ولچ رهييفه ابوچ مو بالمحل شجابه؟؟

-رهف: هاااا مو.. مووو...

-غزل: وقزرقط موو شنووو

-رهف: مو اتصل بيه وگتله تعبانه فَـہ اكيد اجه يشوفني

-حلا: والغسللل شمالچ تعبانه عرج مابيچ تنططين چنچ سلبوح

-رهف: ايييي شمالچن وياااي چنت تعبانه

-غزل: وجعههه بسچن فتحن الباب للزلمه عايفاته بره چنه حارس

-رهف: ايي يله گايمه

گامت فتحت الباب واجه عميد ملهوف عليهه بوسهه وحظنهه وسحبهه گعدهه بحظنه عبالك جاهله

-عميد: شمالچ يبعد ابوچ تعبانه؟

-رهف: لا باباتي صرت زينه

-عميد: عساچ دووم تاج راسي خفت عليچ بنيتي

-رهف: لا تخاف حبيبي مابيه شي

يحاچيهه ويضحكهه كُلش تعجبني علاقتهم ولا تگولون اب وبنته لاا لبالك اصدقاء، واحلى حچايه عندي من عميد يگوللهه "تاج راسي" ياخي تحسوهه حچايه هيبه وكلهه احترام رغم رهوفه زعطوطه بَـس يحترمهه ويحبهه ويحاچيهه مثل الكبار

طلعنه انه وحلا لان امي صاحتلنه نساعدهه بالعشه، شويه ودگ نقالي (تلفوني) يبوووو منهو هذاا، ابتسمت من شفت الاسم المسجل "هجران"

-هلاا بمرت اخووي

-هجران: هـلا بيچ يروحي شلونچ ولچ وينچ گطعتي لتسألين لتگولين

-غزل: هههه ادري يگليبي مگصره وياكم بَـس تعرفين بعد شغل البيت وهمّ الزلمه والفروخ وعمتي تنگ براسي وتغار مني ؏ ابنهه حتى ماتخلينه نتهنه

-هجران: ههههههههههه الي يسمعچ يصدگ

-غزل: هههههه لچ خيه خليني مستمتعه اتخيل نايمه بحظن حبيبي واتغزل بي

-هلووو شنو هالتطوورات عيني غزلل

-ههههه چا انه اسم ؏ مسمى اموتن بالغزل واستاد بي

-هجران: هههه هنياله سعيد الحظ عيني ان شالله الله يجمعج ويه حبيبج وتنامين بحظنه

-لچ اووووف من تمك لأبواب السما ياااا حئ (من حلگچ لباب السمه يا حق)

-هجران: هههههه والله يا غزاله سوالفچ متنمل

-المهم عوفچ مني شو داگه خيرچ

-ياا يااا هاي شنوو فوگما تكيفين ادگ واسأل عنچ

-غزل: لا افرح واكيف اذا صگد داگه علمودي شني السالفه احچي احس اكو سالفه تحوص بلسانچ چطيهه يخيه ولا تهتمين

-هجران: صراحة اي والله غزل اكو

-گولي يچبدي

-بكر شبي؟

-يا ستار شماله؟

-مادري اني اسألچ تدرين حيصيرلنه شهر ونص خاطبين وهوه متصل عليه بس تلث مرات وگوووة يحچي مادري لشنو اشترالي موبايل وشريحة وفوگاهه دز الموبايل بيد فيصل ما اجه هوه بنفسه وانطانيا

-هاااا اي خيه عذري تره هوه مشغول و...

-مهما يكون شغله غزل تره اني دا احس هوه مجبور عليه

-لاا خيه شني مجبور اكو زلمه ينجبر يتزوج

-من اشوف فيصل يووميه جاينه وطاير بجوري طير واني حتى ميكلف ؏ روحه ويدگ عليه ولا رساله ولا شي شنو سالفته احس اكو شي مو طبيعي

-لا تتوهمين

-اوووف اتمنى اتوهم لان ملييت والله

-من شنهو مليتي؟

-من بروده من تشرده من كلشي

-تشرده؟؟؟

-هجران: ايي تدرين بابا اربع مرات يعزمه هوه وفيصل ويجي فيصل ركضضض اله هوه يطلعله الف عذر ميگدر يجي، اوقات احسه يتهرب مني

-غزل: لا يروحي بَـس بكر مشغول والله لو تشوفين دائماً ببغداد يروح

-شعنده ببغداد؟؟

-هااااا ءء احم لا شنهو يعني.. ءء يروح شغل

-هجران: بَـس بكر ميشتغل ببغداد وسائله فيصل عنه كم مرة يگول شغلكم كله بالناصريه وخواله انبار!!

-اءء انه ماعرفن.. هوه يروح شغل بعد ماعرف خيه

-هجران: اممم تمام يله اخذي راحتچ اكيد اخرتچ عندج شغل

-لا يرويحتي شني السالفه

-هجران: حياتي انتي مع السلامه (سديت الخط ويه غزل واني ممرتاحة احس اكو سالفه ظاميهه عليه، صاحتني امي اسوي العشه اگلي بالكبه واني افكر بـ بكر اووف اني ليش افكر بي لهدرجة؟ معقوله حبيته بهالسرعه بَـس لا مستحيل اني اشفت منه حتى احبه بَـس يجوز عجبني من كلام غزل عنه لان دائماً تحچي بي..

رحت للغرفه شفت جوري متمدده ؏ الفراش وتحاچي فصولتهه (فيصل) كالعاده ضحكهه ليوين واصل، وبيهه طبع اله تفتح مكبرة صوت مادري ليش، سمعت فيصل يگول

-فيصل: من اشتعلو مروان وخلفته من اغدي سبع فدوات ونذور ؏ هالصوت يبعد حيلي

-جوري: هههه اسم الله عليك حبيبي

-فيصل: يبوووو لچ جوري لا تسودنيني ترا وحگ هوه علي انه شارد من بكر حتى احاچيچ تالي ارجع اشتغل

-جوري: لا حبيبي احنه متفقنه هيچ روح كمل شغلك لتخلي احد يحسب عليك نقطه

-فيصل: يبوووي التفتهم لكم انه اگلكم اعشگ هالبت وعلي مدوهنتني وماجاي اشوفن دربي

-جوري: احبككك

-فيصل: اعشگچ عشگ مسودن يبعد عشيرتي كلهه

-جوري: هههه الله وياك حبيبي

سدت الخط واني صافنه عليهه، تتنهد وتلعب بشعرهه وسرحانه بالفضاء

-هجران: جورية

-جوري: اممم

-هجران: اهل فيصل هم عدهم شغل ويرحون لبغداد؟

-جوري: لا ماعدهم شغل هناك ليش تسألين؟

-هجران: مادري بَـس غزل تگول بكر دائماً يروح فتوقعت عدهم محل قصابه هناك هم

-جوري: لا ماعدهم

-هجران: هاا (نمت بليلتهه واني افكر شنو سالفه هالرجال، اروح ؏ الفيس مالته دائماً نشط وعادي يعني مبين يلزم موبايل شبي ميحاچيني.. حتى لو ميحاچيني لو بَـس رساله حتى اتطمن هوه بخير،، گعدت الصبح وگعدت جوري اليوم نستلم الرقم السري مال الجامعات ونرجع كتبنه للمدرسة.. نسيت ابشركم نجحنه ثنينه وجبت معدل 79 صح مو نفس المعدل الي ببالي بَـس هم انعم الله

-جوري: هجرانه اكولج اللبس هذا لو هذا ويا عطر احط منه الاسود لو الوردي؟؟

-هجران: شبيچ مخبوصه حتى لو تلبسين بجامه هوه احنه لابسات عباية بعد شكو

-جوري: اوووف اظل اعلم بيچ اني ولچ بنتي لازم نرتب رواحنه احنه بنااات ولازم دائماً نظل نظيفات ونلمع

-هجران: وشبي التراك مالتي وصخ قابل

-جوري: لا حول الله لچ شبيييچ ماگول غير الله يساعدك بكررر

-هجران(ماتحملت كلامهه طگيتهه بچيه): هوه وينه بكرر مگلبنيي

-جوري بتأثر : هجران شبيچ تبچين؟؟ اسفه والله مو قصدي اضوجچ

-هجران: لا جوريه انتي معليچ بَـس اني مخنوگه

-اسم الله عليچ يروحي

-جوري بكر ليش ميحاچيني؟؟ شبيه؟ معقوله شافني وكشت روحه؟

-جوري بعصبيه: وشكووو تكش روحه لا والله حاصله جوهرة مثللچ

-يا جوهرة انتي تحچين صدُك دشوفينييي شلووني

-شبييچ ولچ تخبلين هوه بَـس هذا كافي (اشرت ؏ گلبهه)

-بَـس هوه ميشوف گلبي هوه يشوف شكلي

-راح يشوفه وگولي جوريه ماگالت، ويله امشي خلينه نطلع تأخرنه

-هجران: ماشي

طلعنه والطريق كله الدمعه بعيني گوة حابستهه، واني اشوف جوري فرحانه وطايره طيور لان اتصلت بفيصل قبل لا نطلع ومطر عليهه غزل وكلمات تدوخ اكبر وحدة

كملت كلشي وسلمت ؏ مدرساتي وباركنلي ماعندي صديقات لهيچ بسرعه كملت، توجهنه لمدرسه جوري ركضت تسلم ؏ صديقاتهه التي لا يعدن ولا يحصى يمكن مصادقه المدرسة كلهه وگعدن يباركنلهه ويتغزلن بشكلهه، حتى صور المهر راوتهن، اجتني وحده منهن

-هدى: شلونچ هجران؟

-هجران: هلوو گلبي

-هدى: سمعنه بيچ انتي هم انخطبتي؟

-اي

تورشعني صديقات جوري ولحن عليه اراويهن صورة "بكر" فتحت صورته وحده صاحت

-يمممممه كل هالكيييك الچ

-وحده ثانيه: يا الله دشوف الفرق بينكم نشااااز

يباوعنلي ويبسبسن ماتحملت الموقف دموعي گامت تنزل من وحدهه شكد حاولت اللزم نفسي وما ابچي بس ماكدرت، سكتت كالعادة وماجاوبت أي وحده

-جوري بصياح: شبيييچن تخبلتتتتن متستحن شنو هالاسلوب

-هدى: لا حبي جوري منقصد شي تتهنين هجران نيالچ

-وحدة ثانيه: اي والله نيالچ دباعي الطول والجسم

-جوري: ايييع همجيااات حطيتن عينچن عليه اشوو خطبهه وميت عليهه يحبهه وميباوع لغيرهه وع عنادچن

-هجران(سحبتني جوري واني دموعي عشرة عشرة، گوة سكتتني

-جوري: شبييچ تبچين ولچ خيولن ذني الحسودات

-هجران: اني مابچي من وراهن اني ابچي لان گلتي يحبني وكاتل روحه عليه وهوه اصلاً ممگلبني

-جوري: حبي عذري شبيچ انتي يجوز مشغول لو عنده ظرف محد يدري بي

-هجران: رح نرجع نعيد نفس الحچي صارلكم شهر تگولون هيچ وتبرروله، يله يله خلينه نرجع للبيت

طلعنه من المدرسه والناس تروش كل مكان، نتلفت بلكي بابا لو واحد من اخواني جايين حارة كُلش والشمس تصگع ؏ روسنه

-هجران: افف حرمات بابا ماجاي علينه

ظليت امشي ومغطيه راسي بالجنطه، حسيت جوري ماكو بصفي درت وجهي اباوعلهه، شفتهه جامدة بمكانهه ووجهها صاير اصفر رغم كميه المكياج الحاطتهه، خفت عليهه رحتلهه اشوف شبيهه

-هجران: جوريه شبيچ يله امشي

-جوري: هجران تعبانه

-شبيچ ولچ؟

-ااه لعبانه روحي رح اذب

-يااا صدُك جذب هاي شجاچ

ابتعدت عني وظلت تتقيأ بسله الزباله، راح بالي لشغله واني اشوفهه تعبانه وذبلانه هيچ، تقربت عليهه وهمست بخوف

-جورية انتي حامل؟

رفعت عيونهه تباوعلي بأستغراب، صفنت بوجهي ثواني وگالت

-جوري: شمعرفچ؟

-هجران: صخااااام الصخم وجههههچ شلوووون حامل ولچ عزززا العزاچ جوووري

-جوري: هاي شبيچ؟

-ولچ بعدچ مخطوبه عززا يبووو لو امچ تدري تعلگچ بالبنكه يبووو انفضحنه

-صووتچ ولچ هاي شكو شنو هالدراما الزايده دا اتشاقه

-شنوو؟؟

-اشاقه

-يعني مو حامل؟

-لا طبعاً وشلون احمل يبختي وانتو لازگيلي لزگه حتى متخلوني اختلي ويه فيصل وحدي

-ووجععععع گبررر متت خووف تدرين لو حامل شتسوي امي

-ماكو داعي تكملين ادري بيهه صبوحه تموت من هالسوالف اذا هيه ميعجبهه اگول لفيصل"حبيبي" تگول بعد وكت عود من تزوجون احجو بالرومانسيات

-هههههه حقهه مالومهه ترا فيصل مو ادمي

-ولللچ ليش تحجين عليه

-ههههههه يله امشي نرجع بَـس وگعتي گلبي

رجعنه للبيت استلمتنه امي تنضيف وغسل هدوم وكنس واللخخ.. ظليت اللوب دتجيني افكار ان اتصل بـ بكر واسأل عنه گبر لگلبي العاوي ليييش افكر بي لهدرررجة شنو هالانسان الستحوذ عليه بهالسرعه، اووف حتى عطره من يوم العقد لسه بخشمي

-جورية برأيج يصير ادگ ؏ بكر؟

-جوري: اي وشكو دگي عليه ياهو كاظچ

-ههههه صايره تحچين مثلهم

-هههه اي فيصل يوميه يعلمني كلمه جديده

-اممم

-جوري: المهم نرجع ؏ بكوري مالتج اي اتصلي بي ليش لا

-مو اخاف يضوج؟

-عشتووو وشكو يضوج داده

-هااا مادري اخاف يگول ذابه نفسهه عليه وميته

-ليش انتي مو ميته عليه ههههه

-جوووري شبيييچ

-ههههه هجران انتي غريبه شلون حبيتي انسان وانتي اصلاً مملتقيه بي غير مره وحده ومحاچيته مكالمه تلث مرات

-اففف مادري والله مادري هسه شأسوي گولي؟

اجاني صوت ندى من وره تهز رگبه وتضحك

-ندى: دگي خيه دگي خلينه نسمع صوت النسيييب

-جوري: امممم صوت النسيييب لو صوت ابن عم النسيب

-ندى: اوووف يمه حمووت ولچن ماشفتن عميد الدين شگد مثقف حتى من يحچي يممماي يخبووول

-جوري: اها گامت تعوج بحلگهه احجي مثل العالم لا اللطچ ؏ حلچچ ؏ گوله بيبي عطيه

-ندى: هههههه حتى بيبيته تعرفين شلون تحچي

-جوري: يااا شوف هاي ليش فيصل يگدر شي يوم يتصل بيه براحة لااازم تكون الحجية حاظره واسمع اسطوانتهه ورزايلهه ؏ السلبوحات هههه

-هجران: عززا منو ذني السلبوحات هههه

-جوري: غزل وبت واخت عميد الدين

-ندى وهجران(بصدمه): بنتتت عميد الديييين؟؟؟؟

-جوري: ياا فلققق شبيچن خرعتني

-ندى: صخااام الصخم وجهج ندى طلع الحب متزوج ومخلف واني انوح عليه

-هجران: جوريه صدُك تحجين؟؟ عميد الدين متزوج؟

-جوري: هسه ذني شبيهن تصوفرن وبگگن عيونهن ومنو كال عنه متزوج

-ندى: انتييي گلتي عنده بنيييييه!!!

-جوري: اي خو عنده بنيه بَـس زوجته متوفيه

-هجران: يااا الله يرحمهه

-ندى(تنفست براحة): اااه يممه وگع كلبي الف الحمد لله

-هجران: شلون ماتت زوجته؟

-جوري: شمدرينيي هوه بَـس سألت فيصل منو رهوفه اليحچون بيهه گال بنت عميد

-هجران: هااا

مشت ايامنه طبيييعي خاليه من أي احداث حتى بكر مافكر يتصل عليه ولا گال اشوف شبيهه مابيهه اصلاً اني ليش مستغربه مبين گوه متحملني بَـس ليييش خطبني اذا ميحبني وميريدني، اما غزل فَـہ علاقتي قويه وياهه دائماً نتصل ونتواصل وحتى جواهر دائماً تتصل بيه وتسأل واوقات نظل نتراسل للصبح حچتلي عن حياتهه گالت هيه طالبه صيدله مرحله ثانيه وتداوم بجامعه ذي قار تظل ببيت خالتهه (بيت غزاله) لان ابوهه ميقبل يرحن قسم داخلي لان شهد هم بجامعه ذي قار بَـس شهد هندسه نفط

ماشالله عليهن حيييل شاطرات جواهر تگول بالمرحله الاولى ثنينهن طلعن الاوائل ؏ الدفعه،، احب جواهر هوااي لانهه كُلش لطيفه ومتواضعه واحسهه هم تحبني وتهتملي

گعدت الصبح مصحصحة، سويت شغلي المعتاد واجتني ندى تگمز

-ندى: هجرانه هجرااانه

-هاا؟

-ندى: دريتي شصاار

-خير شصار؟

-ندى: بيت عيالچ عزمونه ببيتهم

-قصدچ بيتهم بالناصريه؟؟؟

-ايي لعد همه وين عايشيين

-انتي صدُك تحچين؟؟ وشوكت هاي؟؟

-هسة سمعت بابا يحاچي امي ويگولهه اتصل سيد خليل عليه وگاله مسوين عزيمه ؏ روح سيد عباس

-سيد عباس ابو عميد الدين؟؟

-ندى: ايي هوه السنويه مالته وگالو يسوون كل سنه وهالسنه يردونه نشاركهم

-وبابا قبل؟

-مادري بَـس ليش ميقبل يعني؟

-لا اني ادري بي مراح يقبل

-ندى: لاا يارب يااارب يقبل يااارب

-هجران: وانتي شبيچ هيچ متحمسة ؏ الروحه؟

-ندى: هااا

-هجران: هااا ست ندى شعندچ؟؟

-هاا لا ولشي بَـس.. بَـس.. مشتاقه لغزل

-هجران(صفنت بيهه وجهها صاير احمر، ادري شنو البراسهه): شوفي نداوي تعاي نسولف

-؏ شنو؟

-هجران: ندى اني اعرف شنو براسچ وشتردين تسوين!

-ءء شريد احم شريد اسوي؟

-ندى عميد الدين عمره 35 سنه!!

جحظت عيونهه عبالك متعجبه، ادري بيهه متعرف شگد عمره وتوقعته صغير لان هوه بالاساس شكله صغير ومو مال هيچ عمر

-ندى: هجران بشرفچ تحچين صدُددددك؟؟؟

-اي والله

-خرببب حظييي يعني بيناتنه عشرين سنه معقوووله؟!!!!

-اي

-خرببب بالحظظظظ شنو هالخبر الزباااله

-هجران: ندى تحچين صدُك گعد تبچين؟؟؟

-ندى بقهر: عبالي شاب صغير والله

-ترا هوه هم شاب بَـس چبير عليچ

-ندى: هفففف هفففففف

-كااافي ولچ من كل عقلهه گاعده تعوي ؏ الرجال

-لا ولچ مابچي عليه بَـس شمدريني انصدمت

-ههههههه انصدمتي تگومين تبچين؟!!!

-ههه اي شمدريني

-هجران: ههههه خبله

عفتهه ورحت اشوف امي واشوف رأي ابويه، تفاجأت من ماما گالت

-صباح: هجرانه حظروا رواحكم باچر من الغبشه نطلع للناصريه

-شنووو؟؟؟

-صباح: نروح للناصريه شبيچ؟!

-يعني بابا قبل نرووح؟؟؟

-اي لعد شلون گلت حَ نروح باچر

-شعجب؟؟؟

-صباح: وين العجب هجران شبيچ بنتي شو صايره ثوله وين رايحين قابل غير لبيت عيالچ

-اييي بَـس مادري توقعت بابا مراح يقبل

-وشكوو ميقبل، ديلا بسرعه حظروا نفسكم منريد نتأخر

-هجران: تمام

رحت ركض حظرت لبستي مال باچر جوري اختارتلي شنو اللبس بما ان هيه ذوقهه فد شي ودائماً لبسهه يخبل، دگ موبايلي "جواهر"

-هلووو جوهره شلونچ

-جواهر: هـلا روحي انتي شلونج ولچ شو ماكو هالكم يوم لو ماخذچ الحب عني

-ههههههه لا والله بَـس شو مابيه حيل لشي

-جواهر: اممم اممم ححاول اصدگ مو بكوري ماخذ گلبچ وعقلچ

-لچ اااه اااه غير ساحلني بكر

-جواهر: ههههههه خرب يومچ متتت ههههههههه

-هههههه ولچ شبيچ تضحكين

-جواهر: لانچ غريبه شلون...

-قاطعتهه: شلون تحبين وتتعلقين بأنسان مشايفته غير مره وحده

-ههههه عليييچ نوور بالضبطط، المهم عوفچ منه باچر تجون للعزيمه؟

-ايييي

-يااااي صدُك تحچين يعني حَ شوفچ

-هجران: ايي ان شالله والله كُلش متحمسه

-جواهر: اني هم بَـس تعاااي هجران مو تذبين روحچ ؏ بكررر ذبي ثگل من البدايه انتو بعدكم هستوكم حتى يعرف انتي شنو

-ولچ شنو اني شنو ترا اني ثووله واگوم اللوص

-جواهر: ههههه لا متلوصين انتي بَـس سمعي كلامي ومعليچ

-خوش يله يمعوده ترا عيوني رح تنطبگ من النعاس

-جواهر: خرببب عود ردت اسولف ويااچ

-هااا تسولفين يله احچي اسمعچ

-جواهر: لا لا خلص انسي روحي نامي اني هم تعبانه نسولف باچر عود

-هجران: ماشي باي

سديت الخط ورحت گبل ؏ فراشي، نمت بليلتهه واني متحمسه كُلش اخيييراً رح اشوف بكر، بلكي نگدر نسولف وناخذ راحتنه بَـس احاول اثگل عليه مثل مگالت جواهر ومابينله اشتياقي ولهفتي

گعدت الصبح الكل مخبوص امي تركض مناا ومنا عبالك مسافرين لغير دوله، وجوريه كل شويه مغيره لبسه وندى كذلك

كملنه كلشي ورحنه للسياره، الطريق چان ممل ويجزززع ست ساعات ضبط ووصلنه چانت الساعه بالـ 11:30 الظهر، دخلنه لفرعهم استغربت من بابا يندل يتهم من دون حتى ماحتاج يتصل بيهم، واستغربت اكثر من عرفت جاييلهم كم مره لبيتهم وحتى من توفه سيد عباس الله يرحمه راح للفاتحه

فرعهم چان عباره عن زلم منظوم نظممم كلهم معگلين ودشاديش وعمايم ساده كووومه لان بحساب همه ساده مثلنه، ركن بابا السياره شويه بعيد عن البيت لان ماكو مكان ابد ناصبين چادر والدنيا مگلوبه

نزلنه من السياره وامي گالت تغشن فشله، وفعلاً تغشيت بسرعه بَـس جوري ماقبلت اله بعدما امي رزلتهه جايه لابخه روحهه وطالعه تمووت تجيب التايه، هوه اني هم لابخه روحي بَـس خفيف هههههه

عيوني تتطاير اريد اللمح بكر بَـس ما اله وجود، اجالنه فيصل الكشره من الاذن للاذن فك حلگه ؏ جوري ونظراتهم كالعاده مال افلام هنديه.. متت ضحك شلون حاوطهه ويخزر بفلان وعلان اذا صارت عينهم عليهه فدووه حلوين

مشيت واني اتعثر بعباتي خرب حظي اني كلما جاييلي اگصر (اقصر) وعباتي تطول شلووون مادري رجاءاً لحد يسأل، وذوله اهلي الله يسلمهم عافوني ويمشون گدامي عود كل شويه بابا يلتفت يباوعلي بَـس اللتهى وانخبص يسلم ؏ الزلم كل شويه سلام عليكم ابو فاضل وشلونك ابو فاضل

عثرت مرتين وتفشلت يباااوو بعدني مادخلت لبيتهم وگمت اللوصهه ؏ روحي، اجتني امي تهف

-صباح: ولچ هجرااان وينچ ندور عليچ ابوچ عصب عباله ضعتي

-ماما شضيع واني تلوخت بالطيانه

-صباح: شوف بختي ولچ شبييچ فاهيه انتي

-ماما شبيچ تعيطين عليه

حصرتني الدمعه واني امشي مثل اللعابه گايدتني امي من ايدي وتمشيني، والله لو فاضل لو حيدر جايين ولا يعوفوني وحدي صدُك الاخوان هيبه البنيه بَـس الحظ ثنينهم مجايين لان عدهم شغل

مبين چانت ماطره الدنيا لان الگاع مطينه والأمه مليوصه، اخر عثره صارت كاارثه طمست بطيانه سووده صخام شبيه اني غبره، انوب اريد اطلع رجلي متطلع شبيهه عصت.. امي تصيح بكتمه واني دموعي گامت تنزل شلالات انفتحن من عيوني وخشمي الزلم كلهه گامت تباوع يعني بأختصار "تخزينه"

تنحرت بمكاني من الفشله واشوف عيون الكل عليه واحسهم يضحكون ويأشرون مع العلم همه كلشي مدا يسوون بَـس هذا الاحساس مال الفشله عماني وطمني، لهناك وسمعت صوته المميز الخشن

-بهيده بهيده علويه (؏ كيفچ ؏ كيفچ علويه)

درت وجهي واذا اشوفلكم عميد الدين، الضحكه ترست وجهي عبالك شو منو شفت بَـس حسيت اكو احد اعرفه وراح اطلع من هالفشله، بادلني الابتسامه، گلت بلهفه

-شيخ عميد الدين!!!

-عميد الدين: السلام عليكم شلونكم علويات

-صباح بحياء: عليكم السلام يا هـلا بيك شيخ

-عميد الدين: يله بويه ندش بالبيت

-هجران بقهر: شلوون واني رجلي طامسه بالطين

راحت نظراته ؏ رجلي، عفس ارنبه خشمه

-عميد: هاي شنهو السيان يواشچ بويه لا تتكدرين (؏ كيفچ بويه لا تضوجين) هسَّ طبي بالدار (بالبيت) ونظفي روحچ

هزيتله براسي "اي" واجت امي تساعدني اطلع من الحفره، اشوف عيونه تتطاير منا ومنا يجوز يخاف واحد يباوعلنه، امي گالت بأحراج

-صباح: اعذرنه شيخ اكيد فشلناك والدنيا گامت تباوعلك

-عميد: لا علويه لا تگولين هيچ افگس عيون التعاينلكم

ابتسمنه ؏ طريقه كلامه، اخيراً گدرت اشوفه عدل تمايزت شكله شنو من هيبه وقلافه عميد كُلش طويل وجسمه من النوع معضل، لابس اسود من فوگ ليجوه وشماغ ما عدى العبايه المطرزه وسبحته الزمرديه (اخضر غامق) التطگطگ بيده، مشينه وياه واني منزله راسي كل شويه ارفعه اباوعله اخاف معصب لو ضايج من عدنه بَـس چان العكس تماااماً مبتسم مثل عادته والناس كل شويه مسلمه عليه وهوه يردلهم السلام

وصلنه لمكان علساس قريب بيتهم واذا نشوفلكم الامه العربيه متجمهرة شكوو الزلم سادين الفرع ومحد يگدر يتعده، وبس اصوات كُلش عاليه والترابه ليوين واصله، امي گالت وعيونهه تلمع

-صباح: هااي شنوو جاي يدبچوون؟؟

-عميد بأبتسامه: اي

صفنت عليهم واشوف الزلم تتطافر مناا ومنا هاي اول مره اشوفهم يدبچون بالحقيقه، وصوتهم ليوين واصل، سمعت هوسه چنهه لـ عميد الدين لان گالو شيخ وذكروا اسمه هوه بَـس ابتسم وحط ايده ؏ راسه.. وصلنه قريب عليهم واحنه حايرين شلون نفوت، فجأة ومنسمعلكم الا واحد عاط

-سوو طريچ (طريق) سوو طريچ لحريم الشيخ

شو ذوله كلهه وخرت من عدنه اباوع لوجه عميد صاير احممممر ماعرف شبي معصب لو خجلان، ضحكت من تذكرت هذا گال سوو طريق لحرميم الشيخ ليش احنه منيلنه نسوانه، سألت امي بهمس

-ماما احنه يمته نسوانه حتى يگولون هيچ وحتى لو چنه شمعرفهم؟

-صباح: اششش صوتچ هجران لتفضحينه

عميد الدين ضحك چنه سمعني شنو گلت خرب حظي، گال وهوه يمشي ووجهه بعده مستقيم

-عميد الدين: حرمات الشيخ يعني نسوان تابعات ليه مو شرط حريمي

-هجران: هاااا

صرت طماطه خرب اله افشل روحي، نمشييي وماملحگين وين صار بيتهم شو اختفى وبابا وجوري وندى وييين شو عافونه بَـس اكيد بابا شاف عميد الدين ويانه لهيچ تطمن، الي خلاني ارتاح شويه الزلم ابد مباوعولنه حبيت احترامهم ومبينين غيورين، ردت اسأل عميد ؏ بكر بَـس استحيت..

شفت ولد جاي يركض يهف بأتجاهنه، اجه لـ عميد الدين يلهث، همس بغضب مكتوم

-مرتضى: مروان وخلفته جايين

عميد وجهه انگلب دمممم فوگما چان احمر، عروگ وجهه نطت من كثر العصبيه مدري الحر، منو هذا مروان وشبيهم هيچ انخبصوا وضايجين، اشر للولد يدخلنه للبيت افتهمت هذا اخو لان سلم ؏ امي، طبينه للحديقه بيتهم چبير وضخم بنائه حديث

اخيراً دخلنه جوه واذا اشوفلكم منظر غريب عجيب صفني، نسوان تتصايح وناس تبچي واكو مره گاعده بالنص تدگ وتلطم وتصيح "وليدي رجعولي وليدي"، هاااي شصاااير؟؟؟ عيوني تدور كل مكان اريد اللمح جوريه لو أي وحده اعرفهه، شفت غزاله گاعده بالگاع مكرفصه ؏ روحهه والوجه اصفررر ودموعهه عشره عشره، امهه حاظنتهه وتبچي وياهه

من الخوف ماعرف شأسوي انوب امي لزمتني حيل وگالت

-صباح: هجران طبي لوحده من الغرف بسسسسرعه ولتطلعين

-ماما وين اروح وشلون اروح وحدي؟؟

-عاطت بيه: البنات جوه روححيي بسرررعه

اخذتني الجمده من اسلوبهه والخوف الي بعيونهه بَـس تداركت روحي ورحت ادور ؏ غرفه ادخل بيهه، طبيت لوحده من الغرف چانت چبيره بَـس شفت منظر خلاني ارعش من فوگ ليجوه البنات گاعدات والوجوه مگلبه وناس تبچي وناس تلوب، اجتني جوريه وجهها مخطوف

-جوري: هجرااان مادريتي شصاااااار!!!!

يتبع☘️...

♛ ♛ ♛ ♛ ♛ ♛ ♛ ♛ ♛ ♛
لا تنسون التعليق بين الفقرات والتصويت🌻.