شفاه مخملية الفصل الثاني وثلاثون 32 - بقلم 𝐙 𝐇 𝐑 𝐀

♛ ♛ ♛ ♛ ♛ ♛ ♛ ♛ ♛ ♛

بارت طويل لخاطر عيونكم الحلوة♥️♥️.

"شفاه مخملية" 💋

بقلم: زهراء السلامي.

#لا أُريدكِ أن تَنخدعي بإلواني تلك
أنا رَمادي تمامًا
أتلون فقط عِندَما تنظرين بعيّنْيّكِ ليّ.
_أنور رَمضان.

♛ ♛ ♛ ♛ ♛ ♛ ♛ ♛ ♛ ♛

-عميد الدين: علوية اگدر احاچيچ بموضوع واتمنى ماتفهميني غلط

-هجران: تفضل سيد

جر نفس وهمس بصوت انصى...

-عميد: انه ماريد اخوفچ بَـس اريدچ تتجنبين غيث ابد لا تحتكون بي لا انتي ولا علوية جوري، انه ردت احاچيهه بَـس بساع صعدت وشفتچ انتي هنا وگلت اسولفلچ

-هجران: سيد خوفتني عود ليش نبتعد عنه هيچ؟

فرك وجهه وحسيته احتار بالجواب، بلل شفته بلسانه وعگد حاجبه...

-عميد: انه گتلچ لا تفهميني غلط بَـس غيث ما يتعاشر ولا ينطي وجه، انه محذر باقي البنيات وهنه اخذن حذرهن وهذا واجب عليّ مادامكم گاعدين ببيتي وتحت رعايتي، أي شي يصير لا سمح الله تصير بوجهي وانه ماريد اتفشل جداكم واطلع بالوجه الاسود

-لا محشوم، بَـس سيد غيث ابد ميجي يعني كُلش قليل نشوفه

-ادري وهوه ابن عمي وانه ماريد احچي عليه بالموزين بَـس ابوه مايهتم وخوانه نفس الشي عدى عثمان ينصحه ويرشده بَـس غيث من النوع الهمجي بطبعه وبأسلوبه وتحركاته، ما يدرس الچلمة گبل لا تطلع من لسانه وانه خايف يأذيكم لو يجرحكم بشي ويجي هنا من دون علمي فَـہ يا علويه انه مجرد تحذير وانتي عليچ الباقي وتنصحين اختچ

-هذا هوه سيد رحم الله والديك فهمت.

هز راسه ورجع ؏ القوري يسوي چاي، فكرت بكلامه وتذكرت من غيث گلي بكر ميستاهلچ ومن تحارش بيه وگال شفايفچ حلوة، ما عدى نظراته اليه ولجورية نظرات مو مريحة ومزعجة..

طلع عميد بالحديقه يدخن علما ينتظر الچاي يتهدر واني كملت غسل المواعين وبالي شارد وافكر، شلت وصله وبديت امسح بالميز چنت مادة ايدي امسح طرفه وشبه الي نمت عليه تعاجزت اروح بنهاية الميز فَـہ اختصرتهه، والحظ العاثر دخل عثمان للمطبخ صحتني گحته القويه چانت اشبه بغصه..

والحظ الاتعس بنص غصة عثمان دخل عميد للمطبخ وثنينهم شافوني هيچ، نهضت روحي بسرعه وذبيت الوصله وشردت من المطبخ، يبووو ؏ حظچ هجران اهمداچ يالعوبة من يمته وجاي امسح الميز هيچي بَـس العجز والكسل شيسوي فشلت روحي گدام شلون ثنين..

رحت اركض دگيت باب غرفه جواهر اريد اضيع الفشله واظم روحي خاف يشوفوني، اصواتهن چانت عاليه اشبه بالعراك، فتحت الباب ودخلت جواهر چانت حامية كُلش ووجهها مطرگع احمر من العصبيه وتعيط...

-جواهر: انتي شدخلچ تنبهي اني اغار عليه واهتمله!!!

-شهد: لچ فوگما دا اسوي شي بي خير وياچ اريدچ ترتاحين

-جواهر: شهدددد لتموتينييي تعرفين انتي شلون حرجتيني گدامه يبوووو شيگول عني هسة متگوليلييي

-شهد: هذا اليسوي خير وياچ تعيطين عليه وتكرهي بفعلته

-جواهر: اكررهچ شهدد اكرررهچ عميد شلون چانت ردة فعله من سمعچ؟؟ مچانت الي عين واباوعله!

تدخلت لان الوضع حامي بيناتهن وجواهر عيونهه دم صايرات واضح چانت تبچي او مقهورة...

-هجران: جواهر حُبي شبيچ ترا الرجال كلشي ماسوه

-جواهر: منو يگوول؟؟

-هجران: اني اگول والله عيني چانت عليه وحتى جوز ماسمع شهد

-جواهر: لا صوتهه چان عالي اكيد سمعهه

-هجران: زين واذا سمعهه احسن خلي يعرف انتي تحبي

-جواهر: هجراان انتي تحچين صدُك كذب مستحيل اوضحله اني ضد البنيه تعترف للرجال لو تلمحله

-شهد بصيحة: وليش ضد هااا مو اني گلت لسلمان احبككك

-جواهر: لان چنتي متأكده هوه يبادلچ وعيونه تركض وراچ يعني واضحة هوه هم يريدچ

-هجران: جوهرة حبيبتي ؏ كيفچ ليش تصيحين حتى صوتچ انبح متخافين يسمعوچ

-جواهر: خلي يسمعنيي حتى يعرف اني مراضيه ؏ تصرف اختي

-شهد: هففف خلص عاد جوجو ترا وترتي الجو وزيدتي السالفه وانطيتيهه اكبر من حجمهه

-جواهر: شهددد طلعي بررره

-شهد: والله ولا اطلع هاي غرفتي واريد انام

-جواهر: ولا اني اطللع وديلااا

گعدن كل وحده ؏ چربايتهه ومطنگرات وع اثر صوتهن دخلت جورية تتسائل، حچتلهه شهد مختصر العركة وجوري غمت جواهر وگالت...

-جوري: اهمداااچ يغبرره خلي يطير من ايدچ وامه رجعت تدورله بنيه

-جواهر: خلي يدوروله ميخصني

-جوري: لانچ عوبة جواهرررر عجيييب لو اني بمكانچ والله اطيح حظه لفيصل

-جواهر: يعني شتردوني اسووي لخاطر الله

-هجران بحماس: اعترفيلله اي اي لتباوعيلي هيچ گوليله عميد اني معجبه بيك وتمضيگي وتماوعي نفس عادتچ والله يسيح عليچ

-جواهر: عزا العزاني مستحيييل ماگدر لاا مستحييل

-جوري: لعد ظلي هيچ تموتين من القهر وتشوفين مرته الجديده تجي

-شهد: يعني لگوله مو؟ لو بعدهم يتناقشون؟

-جوري: عمتي تگول يردون يخطبوله بت شيخ فهد تخبللل ايه من الجمال وديتدانشون ويقنعون بي وچنه بده يلين للسالفه

-جواهر: بالعافيه عليه

-جوري: دنچبيييي بالعافيه عليه ودموعهه عشره عشره، ترا هااا عميد يدلل واذا چانت مرته حلوة ومرتبه والله ميطلعون من الغرفه يلطش بيهه لطشه تعلميني بالزلم من يشوفون وحده حلوة والله ياكلوهه حتى لو كان ميحبهه

-جواهر: جووري انتي جايه هنا تحرگين دمي لو شنوو؟؟

-جوري: اني جايه هنا اصحيچ ؏ زمانچ، لچ ليييش يروح لوحده منعرف اصلهه من فصلهه ويعوف كيكة نفسچ

-شهد: بَـس اذا هوه ميحبهه تلگيهه اصلاً مو بباله

گعدت جوري ؏ چربايه شهد وتربعت..

-جوري: ولچن عوبات ثولات مطيات زمالات..

-شهد: رحم الله والديچ كملي علويه

-جوري: غصباً ؏ راسچ اكمل، المهمممم تعالن يمي وفتحن عقلچن الي چنه جوزة، عميييد من ينتبه جواهر تحبه رح يفكر بيهه وتخش براسه ويمخمخهه مناا ويجيبهه مناااك والله ويوگع چفي ؏ وجهه خياات

-هجران بضحك: انتي بَـس گوليله عميدديييي وجري الحچاية مثل عادتچ والله يتسرسح هوه احنه بنات ونصخن ؏ دلالچ وتنعوصچ

-جواهر: مو بنات خايفه يفشلني

-جوري: اهمداااه اذا يفشلچ ولچ لتخليني اغلط عليه خوش رجال بَـس يا غبييي يفوتچ بَـس فهميني ديلا فهميني

-شهد: وجوز يرفضچ لسبب واحد انچ مو متحجبه

-جواهر: بَـس احنه نريد نتحجب وصارلنه فتره نفكر بالموضوع مو شهد؟ وحتى فاتحنه ماما وگلنالهه وفردوس خربت واهسهه وگلتلهه شكو مربطات روحهن وگلبت ماما علينه مو صحح؟؟

-شهد: يي صح بَـس ختولي ذيچ الگحـ***

طگينه من الضحك وجواهر نشنشت شويه وصفنت مبين دتفكر، جوري حچت تحسم الموضوع...

-جوري: سمعي روحي هسه حاچي ماطوله متغدي وراسه بارد والبيت فارغ خاف تصير لقطات رومانسيه منااا مناااك

-هجران: عزا بعينچ ولچ شكوو شيصير قابل ههههههه

-شهد: والله كلشي يصير لعد مو اني سلمان تخبل عليه من گتله تخيلن شالني وظل يفتر بيه مثل الافلام الهندية

-جوري: عااا شگد حلووو منو هذا سلمان ولچ اول مرة اسمع بي

-شهد بضحك: ما ماا ماحچي هسه تحسدوني

-جوري: وجععع يا خبر اليوم بفلوس باچر ببلاش

-جواهر: عوووفن سلمان رجعن عليه هسة مادري شسوي حيرتني

-كُلنه گلنه: اعترفيييله

-جواهر: واذا ضربني بووري

-جوري: لا حبي الزلم ميضربون بواري هاي السالفه النه احنه أُسطة بيهه

-جواهر: احم مو خاف شسمه...

-شهد قاطعتهه: شووو دنچبي وگعدي انتي شكول اعتراف اهمده حظي

-هجران: والله جواهر اني ماشوف بيهه شي يعني بالبدايه ابدي وياه انته خوش رجال واني احترمك وهواي وگفت ويايه وساعدتني وساندتني وووووو... دگيله اليتيمه وبعدين گولي اني معجبه بيك ومن هالحبشكلات

-جواهر: والله ويطلع منچن ولچن

-هجران: اي لعد شعبالچ ويله يله بسرعه روحيي

گامت ؏ المراية متحمسه، عافت الكحلة نفسهه الچانت حاطتهه مال دوام وبس ضافت عليهه مسكارا ومرطب شفايف، رشت عطرهه شگد طيب واحبه وطلعت من الغرفه..

اني ضد سالفه البنيه تعترف للولد بَـس هالمرة شجعت وتمنيت من كل گلبي عميد يتقبلهه وصدُك يخطب جواهر هم هيه ترتاح وهم اني..

**

"جواهر"
طلعت من الغرفه ورجليه يتطابگن من الخوف المشكلة ماعرف شنو اگوله هاي اول مرة اعترف لواحد، هوه صح كومة معترفيلي بالجامعه بَـس چنت حتى ماسمعلهم لان مالي واهس وهسة متندمة ؏ الاقل لو سامعتهم چان عرفت بيمن ابدي...

رحت للهول ادور عليه چان عثمان گاعد وحاط كتبه ديقره..

-جواهر: عثمان عميد وين؟

رفع راسه عن الكتاب ونزع نظاراته الطبيه واشرلي بأتجاه الحديقه، هزيتله براسي وطلعت.. بلعت ريگي من شفته گاعد ؏ الكروبته الي بالحديقه ومبين سرحان، الجگارة بيده اليسره وكوب الچاي باليمنه، تحمحمت وتقدمت عليه...

-احم عميد؟

اللتفت عليه بسرعه ورجع انطاني ظهره، حچة بصوت متحشرج...

-نعم

-جواهر: اگدر اگعُد بصفك؟

حرك راسه بالموافقه وگعدت بيناتنه مسافة نفر، جريت نفس وبديت الحديث..

-عميديي

دار بَـس عيونه وضحك، حرك براسه يعني "شنو" ابتسمت وحچيت...

-جواهر: اريد احاچيك بموضوع و.. احم اخاف شسمه، شوف هوه شسمه...

-قاطعني: يا بويه ردينه لسالفه الشسمه، بنفسي بيوم تحچين وياي وتعوفيهه

-لا مو شوف الموضوع يحتاج الـ... الشسمه

طلعت اخر كلمه مني لا ارادياً وهوه ضحك وحرك راسه بيأس وحچة...

-عميد: احچي ام شسمة اسمعچ

-بَـس مو تضحك وتستهزأ بيه ماشي؟؟

-لااا شني اكو فد يوم ضحكت بي عليچ انه؟؟

-لا لا سوده عليه ابدد اصلاً شنو انته وينك وين الاستهزاء والمداهر

ضحك ونزل راسه، حچة بهدوء..

-عميد: يله اسمع

جريت نفس عميق وبديت..

-جواهر: عميد انته هواي علمتني ؏ اشياءآت و...

-قاطعني: من چلمة اشياءآت غسلت ايدي عود هاي انتي دكتوره

-اهووو عوف اشياءآت معليك بيهه اسمع الباقي

-عميد: خوش

-اي فَـہ علمتني ووجهتني ؏ امور اني اجهلهه واولهن الصلاة، چنت دائماً اگول لماما شوكت نصلي تگول بكيفچ تردين تصلين لو لا فَـہ اني كل بالي ان هيه شي اختياري وحتى ام الاسلاميه بالمدرسة من تحچي چنت ماهتم اگول ماطول ماما گالت بكيفچ يعني هاهيه، الى ان انت گتلي وشرحتلي شلون تصير وشنو جزاء المصلي وشنو جزات الي يتركهه وحتى اتذكر گتلي هذا المثل مال عامود

ابتسم ومسح لحيته، اخيراً دار وجهه عليه بعدما چان منزل عيونه...

-عميد: الصلاة عامود الدين ان قُبلت قُبِلَ ما سواها وان رُدَت رُدَ ما سواها

-جواهر: اي عفيه بالضبط، المهم هسه اي فَـہ علمتني ؏ الصوم هم وع هواي شغلات بأختصار ماگدر اذكرهن كلهن هسة، وحچيتلنه اني وشهد ؏ الاربطعش معصوم وع فاطمة الزهراء والسيدة زينب وعفتهن وحيائهن واني ذني كلهن مادري بيهن والسبب اهلي مو متدينين وميهتمون لهلسوالف يعني بأختصار چانو يستهزأون وحتى ميهتمون بعاشور وهالسوالف..

هز راسه وبقى ساكت يستمعلي، اردفت..

-جواهر: واني ادري بيك من تريد تعلمنه ؏ شي بَـس مستحي تگوله گدامنه چنت تگول لخاله انتصار وهيه تجي تحاچينه مثل احم.. مثل ملابسنه قبل

-عميد: وانتن خوش بنات ومؤدبات وسمعتن الچلمة وغيرتن من انفسچن

-اي بَـس سالفه الحجاب شوية حسيتهه صعبة واتذكر گلتلنه من تلبسنه ميصير تنزعنه بعد لان هذا يسمو استخفاف واستهزاء بالحجاب بَـس هسة اني اريد اتحجب

لمعت عينه وابتسامة واسعه انرسمت ؏ ثغره وكأن فرح بكلامي، واني تشجعت واسترسلت بالكلام...

-اي اريد اتحجب ومثل متگول انته اريد اظم جمالي للي يستاهله

-عميد: كفوو

-جواهر: يعني مو عيب اذا بهيچ عمر نتحجب؟ ميضحكون علينه؟

-عميد: شني بويه؟ وشحده اليضحك عليچن بالعكس انتن اللتفتن لرب العالمين وهاي شكبرهه عد الله

-جواهر: هاا زين لعد، واحم اكو شي هم

جر نفس من جگارته وزفره واخذ كمعه من الچاي وحرك راسه وحچة..

-الي هو؟

-جواهر: احم اءء انته.. اني اريد بَـس.. لحظه انطيني مجال ودور وجهك لتباوعلي

ضحك خفيف وگال..

-عميد: صايرين دكتوره

دار وجهه ؏ الحديقه يباوع للزريعات والورود والبزازين مطلعيهن هم گعد يلعبن، واني گعدت افكر شنو احچي وشلون ابدي بالموضوع، گلبي يدگ بهمجية ما اشك لو هوه سمع صوت دگاته.. طولت فتره ماعرف شگد وهوه هسس ما گال بقه داير وجهه وميحچي شي بَـس يطلع بالجگاير ويحش بيهن من دون كلام..

جريت نفس وحچيت...

-جواهر: عميدديي

-ممم

-تعرف انته شگد غالي ؏ گلبي واني اثق بيك ثقة عمياء

بقى منطيني گفاه بَـس گال كلمة "ادري" كملت...

-جواهر: اي و.. اني اريد احچي وياك بخصوص موضوع مهم وهذا الموضوع صارله هواي يرگع بگلبي واتمنى تتفهمني واذا محبيت ماكو أي داعي تضغط ؏ روحك وصدگني وداعتك مازعل ولا...

-قاطعني: اختصري جوهرة

-ها اي، شوف....

من الخجل والتوتر حسيت روحي رح ابچي وانعگد لساني وضاعت الكلمات من بالي وعقلي صفر، مگدرت انطق بشي غير...

-جواهر: عميد ممكن تطلعني

اللتفت عليه بحركة سريعه وفاتح عيونه متعجب، حرك راسه عدة مرات ممصدگ، گال ببهته...

-هذا الموضوع؟؟؟

حركت راسي بـ "اي" ونصيته، ضحك بقوه وفرك وجهه وگال...

-يا بويه اشتعلو وانه اگول هاي شمالهه البت خاف مسوية سالفه وتريدني احلهه وهيچ خجلانه مني خليتي گلبي يطيح ببطني

-لاا اسم الله عليه بيش طالبني

-مو انتي ماتجيني بَـس بالمصايب ومن ترديني ادرسچ

فتحت عيوني وشهگت...

-جواهر: لهدرجةةةة مثقلة عليك عميد الدين!!

-عميد: خرب ولچ لااا جاي اگولن صارلنه هواي مانحچي ويه بعض غير بَـس بالدراسه ومن عندچ مشكله

-هذا هوه رحم الله والديك وضحت الفكرة

زفر بضيق وغمض عيونه، حچة بهدوء...

-عميد: بَـس فهميني شمالچ انتي؟؟ تاخذين التردين تسمعي وتعوفين الباقي

-ليش هوه انته شگلت غير تجيني بالمصايب والدراسه

-بويه يا چلمة ردي مچانچ

-جواهر: خلص شوكراً باي

-عميد: وجعاي تعالي مو ترديني اطلعچ

-لا ماريد بعد

-لا تصيرين جاهله جواهر وباجر اطلعكم اعتبري اعتذار

ضيقت عيوني وسألته...

-جواهر: يعني ماعندك شغل

-عميد: حتى لو عندي اتفرغلكم تدللون

جر نفسه وكمل بهمس "نعله علاا".. گلت بمكر..

-جواهر: خو اشعل بمروان احسن

-اي بالحسين من اشتعلو مروان وخلفته وجـ....

-هااا هااا تريد تگول وجواهر وياهم صحححح

ضحك وهز راسه بقلة حيله، گال بصوت تعبان...

-عميد: انه ادري انتي جايه حامية وتردين تتعاركين ماكو سالفه ثانيه

-لا والله عود ردت تطلعني

-عميد: بس اطلعچ؟!! وصارلنه فوگ النص الساعه واحد مگابل الثاني ومگظيتلياهه شسمه ما شسمه وتالي هذا التردي؟؟

-اي شبيك اني گتلك اذا متگدر عادي بَـس لان ضايجة والامتحانات هلكني گلت ننفه عن نفسنه شويه

-ديلا خوش باچر اخذكم حتى رهوفه هم اطلعهه جابت درجة زينه بالامتحان

-اي عفيه شجعهه

-شني بويه جاي تعلميني يعني هسة انتي؟؟

-گول انته تريد تتعارك واني اجيت بالوقت الصح

-عميد: هههههه ولچ لا تصيرين سلبوحة

-انوب سلبوحة خليني اروح احسنلي

گمت عنه وهوه يضحك واني هم اضحك بَـس متت قهر لان مگدرت اگوله، المشكله ماعندي جرأة واحچي وياه بهيچ موضوع..

رجعت للبنات ورزلني من عرفن ماگتله بَـس رجعن يگمزن وفرحانات من گلتلهن حصلنه طلعه وعيني شلون طلعه ويه عميد الدين واكيد عثمان يجي ويانه يعني الونسه فوووول..

**

"هجران"
عفت البنات يقرن وصعدت فوگ اشوف بكر شعجب لسه ماگعد، حاولت اگعده وميقبل يگول تعبان ويريد ينام گلت بعد احسن حتى اني هم انام وارتاح..

تمددت ؏ الچربايه بصفه وغفيت، حسيت ساعه بثمانيه بالليل ؏ صداع حاد لدرجة حتى عيوني توجعني، اللتفتت ؏ صفحة بكر چان مو بصفي، گمزت من الچربايه وركض لبست الشال ورحت اشوفه خاف جوة لو ديسولف ويه جواهر ولو استبعدهه بَـس گلبي يلعب ولسه خايفه..

مديت راسي من الدرج وصحت...

-بكررر بكررر وينك؟؟؟

اجاني صوت رجال گاعد بالصاله بَـس ماميزته منو، گال...

-طالع

تنفست بأرتياح ورجعت للغرفه، غيرت ملابسي وتوضيت وفرشت سجادتي ووگفت اصلي وكل شويه عقلي يسرح لمكان واگطعهه وارجع اعيد، كملت ولميت السجادة ولبست شالي وجبتي وطلعت اشوف جورية..

دگيت باب غرفتهه طلعتلي تفرك بعيونهه اثاري هم نايمة، گلتلهه ننزل نسوي عشه وگالت بَـس تصلي وتجي، نزلت لغرفة شهد وجواهر چانن بعدهن ديقرن عفيه قراية ميملن ولا يجزعن بَـس شيسون دراستهن صعبة كُلش، عفتهن وتوجهت للمطبخ اشوف شنو اسوي عشه واخذتلي صفنه ؏ الثلاجة..

طلعت لحم من الفريز وگلت اسوي كباب وبتيته وطلعت بيذنجان من الثلاجة وطماطة، وگفت ؏ المغسلة اگشر البتيته وانفتحت باب المطبخ بقوه نزيت بمكاني، عقچ حاجبه وابتسم بخجل من شافني عصبت، حچة بعفوية..

-اسف والله بَـس متعلم افتحو هيك

ابتسمت وهزيت راسي بيأس، اجه قريب يمي وسأل...

-عثمان: جواهر وين؟

درت وجهي اباوعله مستغربه، لثانيه اجه ببالي هوه هم يحبهه حتى تكمل هاي الچانت عايزه، صفن بوجهي وعيونه تتوزع ؏ كل ملامح وجهي، بادلته الصفنه متسائله هذا شبي ليش دائماً نظراته غريبه ومريبه؟ قطع نظراتنه بضحكة جانبية برزت جانب اسنانه الايسر وگال...

-انتي وياي؟؟

-هااا؟؟

-عثمان: سألتك واخذتيلك صفنه بوجهي

استحيت ونصيت راسي، گلت بگلبي عساس انته ماصفنت بوجهي، جاوبته واني مدنگة اگشر..

-دتقره جواهر

-عثمان: اها ماشي هذي شغلات وصتني عليهم

حط علاگه بيضه بيهه دفاتر وقرطاسيه ؏ الميز وعافني وراح للثلاجة فتحهه ويبحوش بيهه، طلع بيضتين واخذ طاسه من الكاونتر واجه بصفي ياخذ خاشوگة من المجر، سألته مستغربه...

-شنو رح تگلي بيضه؟

هز راسه بـ "اي" وكسرهه بالطاسه، اردفت...

-ليش دا اسوي عشه

-عثمان: عادي آكل مرتين

-ضحكت: صدُك والله؟

باوعلي بطرف عينه ورجع يخوط بالبيض، حچة بأبتسامه باهته...

-اي شهيتي كبيره

-ممم

مامبين عليه يآكل هواي لان جسمه حلو ورياضي ومبين مهتم لصحته واضح من بشرته الصافيه ان اكله صحي ويشرب هواي سوائل ومو عبالكم گصيته لا بَـس اول متباوعوله رح تنتبهون ان بشرته كُلش صافيه وخاليه من المسامات والرؤوس السوده الي نملكهه اغلبنه..

استحيت اگله اني اسويلك البيضه ماعرف ليش اخجل من عنده يمكن لان ماعرفه زين وهوه بطبعه هادئ وميحچي هواي وحتى من يحشش لو يشاقي البنات بهدوء..

بهالاثناء دخلت جورية المطبخ واجت تساعدني وكل شويه تختطف نظره لعثمان هههه اويلي من هالبنيه، اجت بصفي تهمس...

-جوري: اگولچ هواي يشبه بكر مو بله؟

-هجران: اي اني هم لاحظت

-جوري: بَـس هذا احلى بمليون مرة

-صوتچ جوري لتفضحينه

سكتنه ووگفنه وحده تگشر والثانيه تقطع، اما عثمان راح للطباخ وگله البيضه وصبله الچاي المسوي العصر وگعد ؏ ميز المطبخ يآكل، رجع گام طلع علبة الزعتر من الكاونتر وحطه فوگ البيضه، ابتسمت تذكرت بداية زواجي من عمه دلال سوتلي بيضه بالزعتر..

يآكُل بكل هدوء وهسس ماطلع، اللتفتنه عليه نباوع شديسوي شنو هذا مات شو كلشي ماكو لا صوت ولا حس، چانت عيونه ؏ الماعون انتبهت ؏ الطريقه الحاط بيهه الاكل، چان حاط الماعون گباله بالضبط وع صفحة اليمنه گلاص مي وع اليسرة الچاي والخبزة مسفطهه وحاطهه بصف الماعون.. هوه شي عادي بَـس ضحكني ترتيبه بتوزيع المواعين وشلون صافهن صف وانتبهت عليه بالغده سوه نفس الشي..

رفع راسه يباوعلنه واحنه انتبهنه ودرنه وجهنه، بقه ساكت وماحچة شي، جوري همستلي...

-اگولچ هذا شبي؟

-هجران: شبي؟

-جوري: شو احسه غريب اطوار

-شلون يعني؟

-مادري بَـس هادئ كُلش وميحچي هواي

-خو عميد الدين هم هادئ

-جوري: اي بَـس شو مادري حسيته هذا غريب وميشبه اخوته

سكتنه من گام ؏ المغسله وشال الماعين يريد يغسلهن، گلت..

-هجران: عوفهن اني اغسلهن

-عثمان: ماكو لزوم

-هجران: لا جديات اني....

قاطعني وحچة..

-عثمان: علويه انتي ليش غاوية تعب؟

سكتت وماجاوبته، گلت بگلبي اني البيت كله تقريباً شايلته بقت ؏ هاي.. غسل المواعين وگال بهدوء قبل لا يطلع من المطبخ...

-عثمان: يعطيكم العافيه

-جاوبناه: تسلم

طلع واني اللتهيت اسوي العشه وجوري راحت ترضع ابنهه، اتصلت ؏ بكر جاوب گال شويه ورح يجي، انتظرته بغرفتي اجه تعبان كُلش گال بَـس صبيلي لگمة واريد انام..

رجعت جوه ولگيت جواهر بالمطبخ دتصب العشه الهم واني هم سويت لفات وصعدتهن لبكر، اكلهن بسرعه ونام بمكانه يون من ظهره ورجليه..

قبل من يتأذه چنت افركله بَـس ماعرف شبيه احس لسه الضوجه بيه ومدا اگدر ارجع علاقتي وياه مثل قبل، احتاج وقت وهوه هم ماضغط عليه وطلب شي..

تمددت بصفه واول ماحطيت راسي ؏ المخده غفيت، گعدت الصبح وبكر هستوه چان گاعد ديلبس ملابسه..

-هجران: صباح الخير

-بكر: صباح النور

چان منطيني ظهره وديلبس الدشداشه مالته، گعدت ؏ حيلي اگوله ؏ طلعت اليوم لان كُلش تحمست ويعجبني اطلع ويه البنات بَـس لازمة گلبي خاف بكر يشوف جواهر ويرجع يحن عليهه فَـہ سكتت وگلت خليني اسلم ؏ روحي واگعد راحة، بَـس هوه چنه قره الي ببالي لان راح ؏ الميز يمشط شعره وگال...

-بكر: اليوم تطلعين ويه البنيات صح؟

-لا ماروح

اللتفت عليه عاگد حواجبه..

-ليش عود؟

-هجران: وانته هم تجي؟

-بكر: لا انه عندي شغل

-هجران: وين شغل؟

-بكر: بالمحل

-هااا زين اذا اطلع شلون اروح وحدي؟

-بكر: وليش وحيدچ چا عميدي وعثيمن وين راحو؟؟

-هااا يعني عادي اطلع وياهم؟؟

حچة مستغرب..

-بكر: چا شكو مو البنيات كلهن وياكم وحتى مرت ابوي يجوز تطلع وياكم وانتي اختصري الموضوع واشتري ملابس للدوام فرد نوب هاچ فلوس..

طلع فلوس من جيبه ومدهن الي، صفنت هذا نفسه بكر لو مبدلي؟ فكرت انتهز الفرصه وصدُك اطلع واغير جو واشتريلي ملابس احسن من گعدت البيت.. تشكرت منه واخذت الفلوس وهوه نزل، سألته اذا يريد ريوگ گال هناك يآكُل..

گظيت اليوم كله بغرفتي بَـس نزلت سلمت ؏ عيالي من اجو ورجعت، واكيييد ما اخلص من فتوح ونرجس ونكدهن لعبن نفسي، بَـس مبيه حيل اظل اسمعلهن واضوج روحي..

سبحت وطلعت ابدل بملابسي لان جواهر راسلتني وگالت ؏ الاربعه يطلعون هم ياله ابدل..

كملت كلشي وبـ 3:30 نزلت حتى متغديت ماشتهي، صارت بوجهي عمه دلال..

-دلال: هاا يرويحتي رديتي للدار وعلي ماينطب من دونچ

-هجران: فدوه لگلبچ الطيب عمه حبيبتي والله مشتاقتلچ كُلش

-دلال: بعد روحي روحچ

چانت واگفه واحسهه تلوب وكأن اكو حچايه بحلگهه ومتردده تگولهه لو لا، ابتسمت بخبث وحچيت...

-هجران: عمه محتاجة شي مني؟

ضحكت خفيف وغطت حلگهه، تقربت عليه وهمست..

-دلال: اريدن اخطب لوليدي زيود

-الللله اييي ؏ الخيير

-دلال: الخير يصيبچ يبعدي، خطايه يلوب يريد يتزوج والليل كله ما ينام ويفكر بيهه

-هجران: يا عينييي يعني يحب؟؟

ابتسمت ورجعت تهمس..

-دلال: عاشگ رهف ويلوب عليهه

-هجران: ياااا واني اگووول يوميه ينزللهه بالاغاني ويلتقون بالسر طلعو عشاق هههه

-دلال: ههه لا ديه وين عشاگ يگول البت مايدري بيهه تحبه لو بَـس هيچ لان تعرفين رهوفه صغيره وماتفتهم

-لا عمه رهف چبيره ترا واتوقع تفتهم بهالسوالف

-دلال: مادري بعد وانه هسّ حايره شلون افاتح ابوهه بالموضوع وهوه رافض واحد يخطبهه

-ليش عود؟

-دلال: مادري شماله اووووف شسوي زيد عايش بنار يگلي يوم گلبي يفز من يذكرون اسمهه لو من تخايلي وحتى بالطيف يشوفهه بَـس شوفي ليا درجة واصل

-اويلي عليه الله يجمعهم سوه بجاه كلمن عنده جاه

-دلال: الله يسمع منچ

-زين محتاجة مني شي؟ اگدر اساعدچ؟

-اي انتي مو جواهر صديقتچ وتحبن بعض؟

-اي

-چا كللش زين انه شوي استحي منهه اخاف تفشلني تعرفيني حُرمة ؏ گدي وهيه دكتوره وحلوة خاف تشوفني بالعين الصغيره وماتسمعلي

-يااا عمه صدُك تحچين؟!! جواهر جوهرة ومتأكدة اذا حاچيتيهه تسمعلچ واذا احتاجيتي منهه شي تساعدچ

-ميخالف حبوبه هسّ انتي حاچيهه بلچن تحاچي رهوفه لانهه گريبه عليهه وتسمع چلامهه ومن ابوهه يشوف بنيته هاويه الوليد يقتنع ويزوجهم

-ماشي حبيبتي اگوللهه عود

-دلال: اغديلچ فدوه هجرانه الحلوة

ابتسمتلهه وهيه جرتني تبوس بيه ملهوفة وفرحانه عبالك جبنالهه خبر موافقتهه، راحت واني رحت اگعد بالحديقه انتظرهم علما يكملون، شويه واجه عميد الدين لابس ينطرون كابوي طوخ وبدي نيلي ابو الرگبه وسترة سوده، ضحكت ماعرف ليش بَـس يمكن لان ماشوفهم يلبسون هيچ اغلب ملابسهم دشاديش لو اللبس العربي فَـہ من يلبسون كاجول احس بغرابه..

صفن عليه لان اباوعله واضحك، نفض راسه وگال بهدوء...

-عميد: ها بويه جهزتو؟

-اي سيد اني كملت بَـس بقن البنات وجورية اختي متجي ويانه لان راحت لبغداد ويه فيصل

ماعرف ليش گتله كل هالتفاصيل هاي شبيه انييي، هز راسه ودخل للبيت وره شويه طلع عثمان واخذتني الصفنه للمرة المادري شگد من اباوع عليه، ابتسمت بيني وبين نفسي بَـس خفيتهه خاف عباله اضحك عليه نفس عميد..

بيت الگصاب عدهم جاذبيه خاصه وكاريزما عاليه حتى عمو خليل رغم چبير بالعمر بَـس اليشوفه يگول شگد جذاب وحلو وولده وولد اخو كلهم عليه طالعين..

راح لشجرة البرتقال الموجودة بزاويه الحديقه بدون ميگول شي وطلع جگارة جوزية چبيرة من جيبه وشعلهه، يجر منهه نفس ويزفره بهدوء ورويه، كامش الجگارة بطريقه مُلفته للنظر او ممكن نگول محبسه الاسود يجبرنه نباوع لأيده.. فص اسود چبير محاط بفصوص اصغر باللون الماروني القاتم، شكله مُغري وانيق وكأنه من زمن العثمانيين..

چان لابس سترة سوده جلد وبنطرون كابوي اسود وكذلك بلوز ابو رگبه اسود ونظاراته الشمسيه السوده معلگة بياخة السترة.. من فوگ ليجوة سواد بسواد محياه يثير الرهبة ونغزات خفيفه بالقلب، ستايل يلائم شخصيته الانطوائية المعُقده مثل ميگول بكر، ورغم الشبه الكبير البيناتهم احسه هسة ميشبهله بـ أي شي وكأن اول مرة شفته چان غير انسان وهسة واحد ثاني..

اللتفت عليه يباوع بأتجاهي وعگد حواجبه، حرك راسه متسائل ورجع دار وجهه ؏ الشجرة، گال بصوت فحولي مصاحب بأبتسامه جانبيه ماكرة..

-عثمان: لو بَـس اعرف شَنو في وجهي يستاهل تخزرينو بهالطريقه

بلعت ريگي ونزلت راسي مستحية، مجاوبته وهوه هم سكت وماحچة شي.. طفه جگارته وطلع من البيت متت من الخزي هاي شبيه تسودنت انييي كل شويه اصفن ؏ واحد اله افشل روحي..

دخلت للبيت چانن البنات هستوهن ديطلعن، جواهر لزمت ايدي وگالت مستغربه...

-هجرانه شبي وجهچ اصفر؟

-هجران: اسكتي ولچ اني اله افشل روحي ويه عثمان

-شهد بحماس: ليش شكوو؟؟

-هجران: ماعرف شبيه كلما شفته واخذتني الصفنه چني ابو الرصاصي ؏ گوله بكر حتى الرجال ضاج مني

ضحكن بقوه واجن غزاله ورهف بأتجاهنه، غزاله سألت شكو وشهد حچتلهه..

-غزاله: هههههه لااا عادي ولچ اخوي عثمان روحه رياضيه وما يضوج

-شهد: وصراحة راحة عثمان صااااك ولبسه وعطره وحتى سوالفه مميزة وبيهن نوع من الغرابه

-جواهر: واني اشهد بَـس هوه لطيف ويه اللطيفين والي ميبلعهم لو مادري شيسووله مستحيل يتقبلهم وحتى حچيه وياهم من طرف خشمه يصير

-رهف: اي والله انتن ما شايفات شلون يحاچي عمه فتوح ههههههه

-هجران: عززا ههههه متت ايي ايي منتبهه وشلون يستهزأ بيهه بَـس بطريقه محترمه وهيه مكيفه عبالهه يمدح بيهه

-غزاله: هههه اي بنات بَـس ترا اخوي مو غريب يعني هوه بَـس شوي منطوي ؏ نفسه وماعنده صديق غير عميدي

-هجران: ليش عود؟

-غزاله: ما يثق بسهوله وعنده عُقده نفسيه من الاصدقاء من صغره

-جواهر: بنات يله بلا حچي زايد امشو نطلع بسرعه هسة تجي خاله سلمى وتچلب بينه تريد تجي ويانه

-غزاله: اي ولچ ايي يله بسااع

طلعنه واني أضحك عليهن وع سوالفهن، ركبنه كلنه بسيارة عميد لان چبيرة وبيهه سبع مقاعد، احنه البنات ليوره وعثمان بالصدر وعميد يسوق، سألت رهف بصوت عود عبالي ناصي...

-هجران: والله زين شيخ ومشغول ويطلعكم، هاي كل مرة هيچ؟

بدال ما رهف تجاوبني عميد حچة...

-عميد: وليش ماطلعهم؟ الشيخ يعني مايعيش حياته ويطلع ويه حبايبه؟

سكتت مجاوبته بَـس عيونه مركزة عليه من المراية منتظر جواب فَـہ اضطريت احچي...

-هجران: اسفه ماقصد

عگد حواجبه متسائل وعثمان دار وجهه يباوعلي هم عاگد حواجبه، ابتسم بسخرية وسأل...

-عثمان: ليش اعتذرتي؟

-هجران: لان تدخلت بشي ميخصني

بهت بوجهي وكأنه تفاجأ وعميد بسرعه حچة...

-عميد: لا علويه انه ماقصدت اخجلچ بَـس انتي سألتيني وانه جاوبتچ بسؤال بسيط

عثمان گال وهوه لسه يباوعلي...

-عثمان: واضح العلويه مافهمتو لسؤالك عميدي

-عميد: جداً واضح

سكتو واني هم نصيت راسي وماحچيت شي الطريق كله، ماعرف شبيه حصرتني بچيه واحس لازم ابچي بَـس گوة لزمت روحي انوب خاف اتخجل اكثر..

نزلنه بمول چبير وعميد اصرّ كلنه نكون سوه ومنتفرق ابد حتى خاف احد يضيع واذا واحد ضاع يتصل مو يظل يمشي وحده..

وگفنه بكم محل واني اشتريت ملابس واكثر شي اختار اللون النيلي لان لوني المفضل، جواهر اصرّت عليه اختار غير اللوان بَـس ماحب الفواتح واخذت بَـس نيلي وماروني واسود..

رحنه لمحل الاحذيه والجنط وهم اشتريت كم قطعه، بكر منطيني مبلغ محترم ويكفي كل احتياجاتي وجوز يزود هم، اغلب القطع جواهر اختارتلي لان اثق بذوقهه وحتى لو تأشر ؏ شي ومو كُلش يعجبني هم آخذه ماطول هيه وشهد گالن عليه حلو معناته صدُك حلو..

الزلم بَـس واگفين ويانه كلشي محچو ولا گالو يله ولا ثبرونه عايفينه ؏ راحتنه، متنه ضحك ؏ رهف يمكن اشترت السوگ كله وشنو تشتري جواهر تاخذ نفسهه بالضبط حتى نفس اللون وابوهه يدردم عليهه ويگول...

-بابا موحلو تاخذين هيچ لون بنياتي

-رهف: ماا ماا جواهر اخذت انه هم اريد بابا انته شمفهمتك بالستايل

-عثمان: احيييي طگووو ام ستايل

-عميد: شفت حظي متعلمه منهن

-رهف: ماعليكممم انه اريد

-عميد: اخذي بويه اخذي هوه ياهو يگدر عليچن

-رهف: اي عفيه باباتي

راحت تركض لجواهر وتسألهه ؏ كلشي فطسنه ضحك جواهر انثولت وخطيه كلشي مشترت ساعه تحير ويايه ساعه تحير برهف وغزاله كلنه نريد ذوقهه لانهه ذواقه بلبسهه واختيارهه لعطورهه ومكياجهه كله شغلات ثگيله وكشخه تختار..

كملنه كلشي والعلاليگ كربسناهه بروس عميد وعثمان وهمه خطيه كلشي ميحچون، علاليگي استحيت انطيهن بَـس عثمان ماقبل واخذهن مني رغم شايل هواي، گال رح يوديهن للسيارة حتى خاف نريد بعد نفتر ميعيقنه..

كُلش تونست وكُلش فرحانه هاي اول مرة بحياتي اطلع طلعه ومحد يثبرني واشتري هالگد شغلات وكله شغلات حلوة ومرتبه، حتى بجهاز زواجي مسويت هيچ لان اعتمدت ؏ ذوق ماما لان كلللشي ماعرف اني وذوقي يعيبون عليه يگولون موحلو فَـہ ما ردت اجازف واشتري ملابس الجامعه ؏ ذوقي..

رجع عثمان وعميد گال اذا نريد نگعد ناكل لو نشرب شي بكوفي، تعجبت حتى يقبلون يگعدون بكوفيات هااي شنوو معقوله؟ اني يوم بعد يوم دا انصدم ؏ انفتاحهم بَـس انفتاح بطريقه حلوة خاليه من التعقيد رغم بيت شيخ همه وتوقعتهم منطوين ؏ انفسهم وكلشي عيب وفشله بَـس طلع لا والله متونسين وعايشين حياتهم بَـس بحدود وغزاله گالت دائماً يطلعون هيچ طلعات بَـس يختارون اماكن خاصه حتى ميشوفون ناس عرف ويگعدون بزاوية حتى ميبينن البنات لان بطبعهم غيورين..

طبينه لكوفي شوب حلو وضوياته هادئه، الاجواء رومانسيه كُلش وريحة القهوة طاغيه بالمكان، اختارينه طاوله بالنهاية حتى منبين وچان الكوفي نوعاً ما فارغ لهيچ ما تقيدنه كُلش..

الظاهر الفرحة كُلش واضحة ؏ وجهي لان شهد گالت بضحكة...

-شهد: شوف هجران عبالك طالعه بمدينة اللعاب ههههه

ضحكو واني هم ضحكت بَـس كُلش مستحية، عميد گال...

-عميد: وهذا المطلوب ان نونسچن وتغيرن جو

همست بصوت ناصي...

-رحم الله والديك سيد ان شالله بميزان حسناتك

ابتسملي وهز راسه، طلبنه كيك وگهوة ورهف كل شويه هذا محبيته وهذا ماريده وهذا مو طيب وبابا بدلي هذا ماعجبني وابوهه كلمه ماگال بَـس صار وتدللين وتأمرين، اسلوبه ويه بنته ينحسد عليه وشلون مدللهه دلال وميزعلهه لو من حسهه ضاجت لان ماقبل تشتري نفسنه مكياج راح اشترالهه جنطه وگال هاي تعويض ومن تكبرين انه بنفسي اطلعچ اشتريلچ مكياج..

وعثمان هم هادئ حيل واسلوبه حلو ويه البنات وهنه يداهرنه خصوصاً غزاله تگوله...

-غزاله: عثمان عثمان شوف هذيچ البت شگد حلوة خلينه نخطبلكياهه

-عثمان: وععع لو ظال ؏ "هاديه" ولا هذي

-غزاله: لاا يبووو شني هاديه ما طيقهه

-عثمان: والحمزة تا أنَا (حتى اني)

-غزاله: عليك الله شوف يبووو شگد حلووة ياا يااا جاي تعاينلك والله شوف شووف

نتر بين سنونه..

-عثمان: غزل يولي فضحتينه لا تدحگي عليهه

-عميد بضحك: ولكم بسكم شني تعاينون ؏ بنات الوادم

-شهد: عميد انته بَـس باوعلهه والله تموع

-عميد: شني بويه شني اموع شهالخرط عيب يله لحد يعاين

رهف فضحتنه كل شويه تدير وجهها تباوع للبنيه، هيه صدُك كُلش حلوة وملامحهه تجذب.. كملنه وطلعنه من الكوفي سألونه وين بعد تردن تروحن غزاله گالت ميته من الجوع وتريد تتعشه..

-عثمان: ام طحش عجل شَنو كنه نسوي؟

-غزاله: يووه عثمان انه حوعانه واريدن عشه هذا مايصرفلي

ضحك خفيف وحك شعره..

-عثمان: رح اطلع كذاب اذا گلت أنَا مو جوعان ههه

-عميد: انته لو تاكلني هم ماتشبع يله امشينا لمطعم

-هجران: صدُك والله هم حنروح مطعمم؟؟؟

كلهم صفنو عليه لان گلتهه بحماس وعبالك ممصدگة، عثمان حرك راسه وگال...

-عثمان: اذا تحبين نرجعكم للبيت عادي

-هجران: لا لا مو هيچ بَـس والله طلعتكم حلووة وتونس صدقتي جواهر من گلتي يونسون بالطلعه

ابتسم بهدوء وگال بمكر...

-عثمان: ماشفتو شي لسه.

رحنه لمطعم وتعشينه وكملنه كلشي ورجعنه للبيت، بعدنه بالباب وطب عميد اول واحد ورهوفه هم راحت وراه وشهد حچت بحماس...

-شهد: هااا عثمان يلله يللله مو تغلسسس

-عثمان: اششش يولي اصبري دحگي عميدي نام لو بعدو؟

-هجران: يله تصبحون ؏ خير

ردت ادخل وجواهر صاحت...

-ولچ هجرااان متجين ويانه؟؟

-هجران: شنوو وين؟

-غزاله بحماس: نروح ناكل موطه

-هجران: انتو صدُك تحچووون؟؟ شوفوا ساعه بيش صارت ومو اكلنه العصر هوه كل ساع

-جواهر: والله تفوتچ وانتي بكيفچ بعد

-شهد: هجراان لتصيرين نفسيه امشي والله متتندمين

حمسني كُلش بَـس بالي ويه بكر اكيد اجه لان الوقت تأخر، دزيتله رساله وگتله بَـس نآكُل موطه ونرجع كتبلي "براحتچ انه هم راح اتأخر شوي" كيفت معناهه بعده ما اجه للبيت، رحت وياهم صعدنه بسياره عثمان الرياضيه وعيني شخطلكم شخطه وطلع گمت اصرخ وبسرعه وگف السياره واللتفت عليه..

-عثمان: هااا تخافين من السرعه؟؟

-هجران: لاا بَـس ليش شلعتهه هيچ قويه؟؟

ضحك وگال...

-عثمان: محركهه قوي لهيك قويه

-هاا ماشي يله نكمل

ابتسم وگال...

-عثمان: بَـس مو تخافيين؟؟

-هجران: هههه لا لا ماخاف يله

رجع يسوق والبنات علگن اغاني ويصفگن وغزاله مكيفه وتهوس وفتحنه الجام الهوه بارد يگص وانوب نمشي سريع صار يجنن، الاجواء ولا بالاحلام ومتنسي هالطلعه ظلت محفوره ببالي ؏ الونسه والفرحة الحسيت بيهه، حسيت ولأول مرة اني محبوبه وعندي صديقات ويسمعولي ومن احچي شي يركزون ويايه ويهتمون مو احد يقاطعني وكأني نكره مثل قبل بأيام المدرسة ومن چنت احاول انطي رأيي يسكتوني يخلوني اتندم ؏ الساعه الحچيت بيهه..

نزل عثمان حتى يشتريلنه موطه، اللتفت علينه وسألنه...

-ها بنوات يا نوع تردو؟

-غزاله: اريدن فراوله

-شهد: اني ككو

-جواهر: اكيييد ككو ميرادلهه يعني

ضحك واللتفت عليه يسألني، صفنت ماعرف شنو اطلب لان دائماً همه يجيبولي وحدهم بدون ما احد يسألني، گلت بصوت ناصي...

-بكيفك اختارلي

عگد حاجبه وگال بجمود...

-عثمان: ليش مو انتي تطلبي؟

-مو احم.. اني ماعرف وماهتم

-عثمان: ما ماكله موطه من قبل؟

-هجران: لاا لاا آكُل ودائماً بكر يجيبلي بَـس ماعرف هوه يختارلي ؏ ذوقه

صفن وعبالك ضاج من كلامي، نزل واجه جايبلي نفسه موطه بالفستق صح ماحبهه بَـس استحي احچي ومشكلتي الازليه هاي استحي انطي رأيي..

رجعنه نفتر ونضحك ؏ شهد وعثمان هواي يتناگرون ؏ الاغاني، رغم شگد تونست من رحنه للسوگ تونست اضعاف مضاعفه من طلعت ويه عثمان لان من صدُك يونس الواحد مع العلم ميحچي هواي بَـس مبتسم بَـس ابتسامته حلوه ومبينه نابعه من قلب نضيف..

رجعنه للبيت هلكانات من التعب ونضحك اليشوفنه يگول ذني سكرانات هههه، دخلنه جوة وشفنه عمه دلال بوجهنه وجهها اصفر وتبلع بريگهه وعمه سلمى گاعده ؏ الكرويته الي بالصاله وشعرهه منفوش وتبچي وبيبي عطيه متخربطة ورهف ترجف وحاظنه ابوهه وجوههم مخطوفة وصايره كركم من الصفار، عثمان صاح بخوف ولهفة...

-هاي شصاااير؟؟؟؟

يتبع☘️...

♛ ♛ ♛ ♛ ♛ ♛ ♛ ♛ ♛ ♛
شبابات هالبارت چان نوعاً ما خفيف ولطيف ردنه نغير مود الكآبة والحزن ومن هجران شرحت عن "عميد الدين" و "عثمان" وعن لبسهم لتفسروهه بغير قصد بَـس رادت تبينلكم شخصيتهم واسلوبهم من وجهه نظرهه❤️.