شفاه مخملية الفصل الثالث وثلاثون 33 - بقلم 𝐙 𝐇 𝐑 𝐀

♛ ♛ ♛ ♛ ♛ ♛ ♛ ♛ ♛ ♛

"شفاه مخملية" 💋

بقلم: زهراء السلامي.

لهجران♥️...
#"أنتِ مُعتادة على ملامحك،
لا تعلمين كم تبدين جميلة لشخص غريب."

♛ ♛ ♛ ♛ ♛ ♛ ♛ ♛ ♛ ♛

"هجران"
رجعنه للبيت هلكانات من التعب ونضحك اليشوفنه يگول ذني سكرانات هههه، دخلنه جوة وشفنه عمه دلال بوجهنه وجهها اصفر وتبلع بريگهه وعمه سلمى گاعده ؏ الكرويته الي بالصاله وشعرهه منفوش وتبچي وبيبي عطيه متخربطة ورهف ترجف وحاظنه ابوهه وجوههم مخطوفة وصايره كركم من الصفار، عثمان صاح بخوف ولهفة...

-هاي شصاااير؟؟؟؟

عميد باوعلنه نظره وغمز بمعنى سكتو ولحد يحچي، ثواني وطلع عمو خليل من غرفته بيده شال وركض يغطي شعر عمه سلمى، عاط...

-خليل: ماااكو شي والعباس ماااكو شي شمالچ تخبلتي وخبلتينه وياچ

-سلمى: شفتهه والله چانت واگفه يم الشبااااك خليييييل جنية شفت والله

شهگنه وضربنه ؏ صدرنه ورهف صارت تصرخ وابوهه حظنهه يهدأ بيهه وغزاله صكت بمكانهه، اما اني احس روحي انسحبت مني ودارت الدنيا بيه، عثمان حچة متفاجئ...

-عثمان: شَنو مافهمتو شي فهمووني!!

سلمى تبچي وتحچي...

-سلمى: عثماان والله شفتهه والله وحتى چانت سوده وشعرهه ؏ وجهها وتغلط وتسب بيه وبأهل البيت

هيه هيچ گالت لو البنات تخبلن غزاله ركضت تختل وره عميد وتشد بسترته واني وشهد ثنينه ختلنه وره جواهر نتحامى بيهه وجواهر جمدت ومتتحرك، منعرف شنو نسوي وبيبي لسه متخربطة وعمو خليل واضح خايف وبايگ هوه بَـس يچذب ؏ عمه حتى يهدأهه، طلعت راسي الي دافنته بظهر جواهر وحچيت بصوت يرجف...

-هجران: عمه هاي شلون شفتي جنيه؟ يعني صدُك تحچين لو تشاقين؟

-سلمى: ولچ مضروووبة شنو اكذببب دا اگولچ چنت نايمة وحسيت اكو شي يباوعلي، فتحت عيوني وشفتهه بوجهييي فزيت مخروعه وخليل شااهد (اندارت ؏ عمو خليل تسأله) خليل مو شفتهه عليك الله مو شفت الجنيهه؟؟؟

-خليل: لا سلمى انه ماشفت شي بَـس خايلي شي اسود وخطف

-دلال: دهر الدهرني منين اجتنه هااي يا ستار يا ربي

-عميد: خلص يا جماعه بسكم عاد شني هالخرط منين تجينه واصلاً الجن ما ينشاف بالعين، عمه هاي يخايلچ

خزرهه وعظ ؏ شفته واشر ؏ رهف وغزاله، سكتت عمه بَـس مبحلقة عيونهه وصاكه ؏ اسنانهه، رجعت بيبي لوعيهه بَـس تتراجف وعمه دلال وانتصار وياهه حمدت ربي فتوح ماخذه نرجس ورايحات لبيت عيالهه اهل زوحهه المتوفي الله يرحمه، لو چانت هنا چان فعلاً انفضحنه وتخزينه..

تفرقنه كلمن بمكان واني ارجف رحت لغرفه البنات لان بكر لسه مارجع، گعدنه كلنه ؏ چربايه جواهر اني وشهد وغزاله لان مرتضى تأخر ويه بكر بالمحل وميدرون بالسالفه اله من غزل اتصلت بي...

-غزاله: مرتضىىى انته وييين؟؟؟ يااا متدري شصاار عزا العزاني وصخام الصخمني.. وكتهه هسه تروح لجماعتك.. تعال مو البيت مربوث.. ديلاا منتظرتك حباب تعاال خايفه

سدت الخط وكلنه ساكتات ونضرب صفنات حتى منتحرك نخاف من أي صوت، وره شويه اجاني اشعار ؏ موبايلي كلنه گمزنه...

-شهد: طاااح حظظظچ هجرااان وگف گلبي

-هجران: اسفه ولچن هذا بكر يگول وينچ

-غزاله: يعني ردوا؟ يمته هاي شو ماسمعت حس

-هجران: مادري يگول هوه بالغرفه هسة، امشي نصعد سوه اكيد مرتضى هم جاي

-غزاله: ماا مستحيييل اخاااف والله

-هجران: غزززل لعد شلوون نبقى هنا

-غزاله: ما مايهمني اتصلي بي هوه يجينه

گلت بنتره قويه...

-لووو اموووت حتى يشوف جوااهر ويتخبل عللليه موووو؟؟؟

سكتن من گلت هيچي وعبالك تفاجئن من ردة فعلي القويه، تندمت ؏ حچايتي بَـس نفسيتي تعبت وابد مو مال ابرر هسة..

غزل اتصلت بمرتضى ونزل وصعدنه وياه وغزاله مچلبه بقميصه، اختصرتله الصار واحنه نصعد الدرج وهوه بَـس فاتح عيونه ويگول...

-چذاابه معقوووله؟؟ ولچ غزاله صگد تحچون اكو جنيه بالبيت انه عبالي تشاقين وياي بالموبايل!!

-غزاله: مرتضىىى وقت شققه والله اكو جنيه

-مرتضى: خايبات خاف عمتي تچذب

-غزاله: انته صدگ تحچي!! حتى ابوي شافهه

-مرتضى: صواب شني شلون بينه

عفتهم يتجادلون وشردت لغرفتي، چان بكر متمدد ومغمض عيونه، ركضت عليه بَـس نزعت شالي وبقيت بملابسي ودحست روحي يمه، گلت بصوت ناصي...

-بكر خايفه

تنهد وگال بتعب...

-بكر: نامي هجران ماكو شي

-لا فدوه لتنام اخاف والله

-نعسان هجران اششش

انطاني ظهره واني حظنته من خصره ولازگة بي اخاف اتحرك وگمت اتخيل شغلات متت من الخوف، والزيد خوفي ثگل نفسه معناتهه غفة، هزيته ؏ كيفي ودموعي بدت تتجمع بعيوني، جاوبني...

-بكر: هممممم

-حبيبي اگعد خايفه

-بكر: تؤؤ

بَـس گال هالحرفين ورجع غفه، گمت ابچي بالسكته ويخايلي احد بالغرفه وحتى اصوات عبالك سمعت.. گمت اقره قرآن واذكر الله بَـس الخوفه مدا تروح مني وجسمي يختض من الرجفه، عله نحيبي وهزيته اقوه...

-هجران: بكر لخاطري اگعد فدووه

اندار عليه ونتر بعبوس...

-بكر: هجراان تعباان شمالچ وياااي

دموعي تنزل واحچي وياه...

-اخاف من الجنية

-ولچ يا صخمية منين هاي

-ليش متدري بيهه؟

-ادري سولفلي ابوي ولچ انتي صدگتي؟؟

-اي

-بابا ماكو هيچي شي نامي واذا گعدتيني صگد اتعارك لان ميت تعب

-حباب ابقه ويايه لخاطر زنوبة

-ولچ شني لخاطر زنوبة هيه وينهي

-ميخالف لعد مو ببطني واذا اخاف هيه هم تخاف ترا

-انعل ابووي هيه كلهه ملتمه عليّ اليوم

-ليش شكو؟

-العمال مخربطين بالبناء بالمحلات الجديده وتعال يبكر حلهه لان وگعت براسي

-اي عفيه حلهه واگعد حتى نخطط سوه يله جيب ورقة وقلم

-ولچ اگلهه دين ماظل براسي تگلي نخطط سوه

-حباب لتنام

-هجران وتااالي

-زين نزلني لغرفه البنات هنه يسهرن

رفع تك حاجب وحچة بخبث...

-مو ماترديني اشوف جواهر

-طبعااااً متشوفهه انته بَـس توصلني لباب غرفتهن وتروح

-چا ماكوو مانزل

رجع نام وانطاني ظهره واني عاندت واله افتح الضوه، اي عباله ينزل ويشوفهه والله لو يموووت..

**

"شهد"
الخوف سيطر ؏ البيت كله وأشك اذا احد گدر ينام بهالليله، رهف چلبت بأبوهه وتبچي متقبل تنام بغرفتنه فَـہ اضطر ياخذهه وياه وبقينه اني وجواهر وحدنه، هيه متمدده ؏ فراشهه واحسهه بدت تغفى واني اتراجف وحدي، صحت بخوف...

-جواهر فدوه اگعدي ترا اني ميته من الخوف

-جواهر: شهد تعباانه كافي

-شهد: حبابه خلينه نسولف

-ماريد ضايجة

-وشكو ضايجة؟

-جواهر: اني وعميد تناگرنه

-شهد: عزا العزاكم قبل شويه كلشي مبيكم شلحگتوو

-جواهر: اي الموضوع چان تافه واني كبرته

-وليش كبرتي؟

چانت منطتني ظهرهه ومتمددة وتحچي..

-جواهر: غرت عليه

-من منو؟؟

-جواهر: ثنين بنات چانن يباوعنله ويأشرن ووحده ادبسززز تباوعله بنظره وصخة وتعظ بشفتهه والله ردت اروح اطيح حظهه واملص شفايفهه النذذله

-زين وهوه شعلي الرجال؟ مستحيل يتطيهن مجال!!

-لا هوه منطاهن مجال واصلاً مباوعلهن بَـس اني احترگت وخلقت مشكله من العَدم

-الله يطيح حظچ شگد ثوله

-جواهر: اي ادري بروحي ثوله ويله اريد انام

أيست منهه لان مبينه الطنگورة واصله للسماء السابعه وخاف تنفجر عليه، تمددت بمكاني وگلت الهي روحي واتصل بالحُب بَـس مجاوبني اكيد عنده ندوة..

بديت اغفى وسمعت صوت همسات بباب غرفتنه وكأنه اكو خيال اسود مبين من فتحة الباب، گلبي گام يدگ وفتحت عيوني ؏ وسعهن، نهضت روحي اريد استوعب صدُك هالشي لو دا احلم..

تسنطت عدل وفعلاً صوت همسات غير مفهومة والخيال الاسود يتقرب ويبتعد گلبي راد يوگف من هول الموقف، ركضت ؏ چربايه جواهر وگمزت عليهه هيه فزت، حركتهه بقوه حتى تگعد وصحت...

-جواااهر الجنيييية اجتنه اجتنننه

تباوعلي مذهوله وثنينه صرخنه بأعلى صوت بلكي احد يسمعنه ويجي وجواهر بسرعه رجعت نامت شلون نامت بهالسرعه وبنص هاللوصه مادري، ثواني وهجران وبكر طبولنه مصدومين...

-هجران: هااي شصاير؟؟

-شهد: صخااام صاير صخااام ولكم الجنيه اجتي لغرفتنه

؏ اثر عياطنه اجو الكل عدى مرتضى وغزاله لان غرفتهم فوگ ومينسمع وهجران تخبلت وگمزت ؏ چربايه..

-حجية عطيه: ولچن سلبوحات شني شصار من دهر دهرچن

-عميد: شصااار؟؟؟

هجران متيبسه وجواهر لسه نايمة تگولون ميته، اشرت ؏ الباب وگوة حچيت...

-شهد: شفتهه هنااك شفتهه الجنيه هنااك

-عثمان: استغفر الله غير شغله هاي يبا ماكو جنيه مااكوو

-شهد ببكاء: والله شفناهه والله

اجو خاله سلمى وعمو خليل مخطوف لونهم وخاله تتراجف، صاحت...

-سلمى: مووو گتلكممم اكو جنيييه بله شلونهه سوده موو؟؟

-شهد: مشفت شكلهه بَـس خيالهه جوه الباب وسمعنه همسات عبالك تشاور احد

-رهف(تبچي وترجف): بابا خاف جاي يخططون علينه هيه واهلهه

-عميد الدين: بابه شني يخططون علينه ولچن بسچن ليش تتراجفن مو رح يوگف گلبچن من الخوف

بكر گال بأستهزاء موجه كلامه الي...

-بكر: ان شالله قصدچ گبل شوي من اجينه انه وهجران

-شهد: هاااا مادري بَـس چانو يسولفون

اللتفتت عليه هجران خزرتني وعاطت بيه...

-هجران: وللللچ هاي اني وبكررر صار ساعه اتوسل بي حتى ينزلني ووصلني للباب وگتله رووح لتجي للغرفه

-شهد: اي واحنه شمدرينه سمعنه همسات وخيال جوة الباب عبالنه الجنيه وزوجهه

-هجران: خرب حظيي ايي هاي اني وبكر الجنيه

-انتصار: من فلك طرچن طيحتن چبودنه بسچن چنچن فريخات وخايفات من العتوي

-حجية عطيه: لااا بعلي انه ما يبرد افادي اله اكتلهن ذني المايعات

رفعت عوچيتهه تريد تجي علينه تضربنه وعميد لزم العوچيه..

-عميد: حبوبه اندارلچ فدوه انتي تشوفيهن ميتات من الخوف انوب تزيديهه وتكتليهن!!

-عثمان: هفففف استغفر الله يولن عدنه دوامات يله يبا كلمن يروح لغرفتو

-دلال: ديلا تصبحون ؏ خير امشي يام

كلمن رجع لمكانه وبكر لسه واگف يباوعلنه ماعرف شبي، هجران صاحت...

-هجران: هااا هااا بكر محتاج شيي؟؟؟

-بكر: هاي شمالهه لسه نايمه؟

اللتفتنه نباوع لجواهر صدُك هاي شبيهه نايمه عبالك فاقده، هجران گالت...

-معليك بيهه يمكن تعبانه وماحست

-بكر: لا ولچ جواهر نومهه خفيف

ضيگت عيونهه وتخصرت..

-هجران: وانته شمعرفك حبيبي نومهه خفييف؟؟؟

-بكر: اهوووو هيه تگووول

-هجران: متأكددد بكررر

تباوعله بشك وهوه فرك وجهه واستغفر وطلع من الغرفه، اندارينه عليهه ثنينه وهجران سألت...

-اگولچ هاي شنو معقوله لسه نايمه؟

-شهد: شمدريني

هزيناهه خفيف وهيه ماكو لا ايد ولا رجل، گلبي يدگ وانفاسي حسيتهه انقطعت خوفاً ؏ اختي..

-شهد: هجرااان هاي فاقده الوعيي خاف من وره الخووف

-هجران: مادري شنسوي؟؟

-شهد: ابقي يمهه اروح اجيب مي واذبه بوجهها

ركضت للمطبخ اجيب دولكة مي نسيت اصلاً عدنه حمام بغرفتنه وعدنه مغسله، واول ما دخلت للمطبخ صار بوجهي عثمان عطت...

-هاااي شبيييييك

-عثمان: يولي صرگعاانه شكووو

-شهد: ااخخخ گلبييي ولكم شبيكم ويايه

-عثمان: هسه انتي شبيكي هيك خايفه غير نفهم

-هففف معليكممم وانته شعندك بالمطبخ هرّ المطاابخ

رفع اكتافه وگال باللامبالاه..

-عثمان: جوعان واجيت اكل شي

-هم الك نفس تآكُل ويه هاللهوسة؟!!

-عثمان: عادي مايهمني

-خرررب شگد تااآكُل وياريت لو يبين بييك

-عثمان: ومن شر حاسد اذا حسسد

-شهد: هه وخرر ماحسد اني

رحت ؏ المغسله وعبيت گلاص مي من البوري وهوه يتابعني، حچة مستغرب...

-عثمان: ليش تشربي من اللوله؟

-شهد: هاي اريد اذبه ؏ جواهر فاقده الوعي

-شَنوو؟؟؟

-اي والله ماعرف شبيهه

حچيتهه واني امشي متوجهه للغرفه، اجه ورايه ووگف بباب غرفتنه شفنه جواهر صاحيه، رحت عليهه ملهوفة اسألهه تگول محست بشي ولا سمعت شصار..

-عثمان: شبيكي جواهر نروح للمستشفى؟

-جواهر: لا عثمان تسلم صرت زينه

-عثمان: ماشي تصبحون ؏ خير

-كلنه گلنه: وانته بخير

-هجران: جوهرة والله خفت لو تشوفين شنو صار

-جواهر: ولچن عززا مادري محسيت بشي اخر شي سمعته شهد تصيح الجنيه اجتنه وغبت عن الوعي

-هجران(خربنه من الضحك عليهه وحچينالهه الموقف كامل وهيه تضحك، نمنه بليلتهه ؏ چربايتهه صرنه وحده فوگ الثانيه، گعدت الصبح ؏ الم ببطني ماعرف شبيه والبنات مو بصفي اكيد بالدوام...

طلعت من غرفتهن ورحت للمطبخ چانت بيبي عطيه وخاله انتصار بالمطبخ يسولفن وعمه دلال تعحن، تريگت وكُلشي مشتغلت اليوم غزاله مقبلت من عرفت عندي الم اسفل بطني تگول لتعبين نفسچ وروحي ارتاحي..

اجن فتوح ونرحس عفتهن وصعدت لغرفتي نسيت سالفه الجنيه فَـہ عادي، سبحت وغيرت ملابسي وتمددت ؏ الچربايه بلكي هالوجع يروح ورجعت غفيت ماحسيت اله للظهر تندگ باب غرفتي..

گمت افتحهه چانت غزاله خطيه مصعدتلي الغده عبالهه بعدني متوجعه، گالت بأبتسامه حلوة...

-غزاله: شلون صرتي حُبي الكل يسأل عليچ جوة

-هجران: الحمد لله احسن ومنو الي سأل؟

-غزاله: الولد كلهم وحبوبتي وعمه انتصار ودلال والكل يعني ههههه

فرحت من عرفت مستفقديني..

-هجران: حياتي فدوة لگلبكم لا صرت زينه، ليش متعبه نفسچ وجايبه الاكل لهنا اني انزل

-لا يمعوده ارتاحي شوي مو زين عليچ واذا ؏ بكر ترا ما اجه ؏ الغده اللتهه بالمحل

-هجران: اي ادري مخبوصين كُلش، يله لعد آكُل هنا بَـس بشرط انتي ويايه

-غزاله: چا غير تدللين

حطينه الصينيه ؏ الميز الي بغرفتي وغزاله رتبت الاكل واني رحت للحمام توضيت وصليت الظهر وهيه گاعده منتظرتني، كملت وگعدنه ؏ الكراسي نآكُل بهدوء بَـس غزل وجهها مو طبيعي وعبالك ضايجة..

-غزاله شبيچ حبيبتي؟

-غزل: ماكو شي بَـس خايفه شوي

-من شنو؟

بلعت ريگهه وتنقش بالماعون، رفعت راسهه ومبين الحيره بعيونهه، همست...

-غزاله: شاكة بروحي حامل

-صدُك والله!!؟ ؏ الخير حبيبتييي

هزت راسهه وابتسمت ببرود، رديت سألتهه..

-هجران: شو مفرحانه؟ يعني شنو متردون طفل هسه؟

-غزاله: لا مو هيچ بالعكس مرتضى كاتل روحه بَـس احس حياتنه مامستقره ومامتفقين

-ليش حُبي؟

-غزاله: نختلف هواي هوه بطبعه عنيف وهمجي وانه جاي اعاني وياه

-يعني عنيف بشنو بالضبط؟

نزلت راسهه مستحية، افتهمت عليهه وهزيت راسي..

-هجران: عادي حبي هاي لان بعدكم بالبدايه

-انه مو هنا مشكلتي انه ميته لان يكتلني واوقات توصل بي بالحزام يدمرني ما عدى سهراته ويه اصدقاءه ماعرف منين ما منين ويفشر هواي ويكفر ؏ اقل شي ويعاركني ؏ اتفه الاسباب شلون الضايج وعنده لعابة يطلع حرگة گلبه بيهه ومن غير غيرته من اخو بشكل فضيع

-يغار من عميد الدين؟؟؟

سألتهه متعجبه، هزت راسهه وحچت...

-غزاله: كلللش رغم يحبه وروحه معلگه بي بَـس الغيره ناخرة گلبه

-اگولچ خاف لان عميد يگولچ حبيبتي ورويحتي وباباتي لهيچ يغار؟

-لاا لاا مو هيچ هوه يدري بعميد يحبني مثل رهف وحتى سألته خاف يغار من هالشي يگلي لا عادي ماهتم لان اعرف نظرته نظيفه وياچ بَـس خيه من يگعدون بالديوان ويمدحون بعميد والشيوخ تزامط بي بدل ما يفرح يضوج وينعفس

-هففف تصدگين بكر نفس الشي ويه اخو

هزت راسهه وابتسمت..

-غزاله: تقصدين غيرته من عثمان؟

-بالضبط

-اي كلنه ندري بيهم عداوة من الصغر

-زين لييش؟ يعني همه اخوان من بطن وحده!! غير يكونون گلب ؏ گلب ذوله شبيهم واحد حاقد ؏ اللاخ

-غزاله: بيني وبينچ الغلط كله من ابوي، هوه همل عثمان بعمر صغير واهتم بَـس ببكر ويحبه حب جنوني عنده بكر رقم واحد بالدنيا لو يطلب عيونه هم ينطي وعثمان سوده عليه تهجول بين اهل امه يوميه ببيت ومن حبوبه عطيه تگول لأبوي جيبه يمنه يگول ماتحمل اشوفه وماحبه

-هجران: عزززاا ميحب ابنه؟!!!

-اي للاسف وهاي السالفه سوت لعثمان عقدة نفسيه، انعزل عنه ومايجينه اله بالمناسبات وبس من حبوبه تتصل بي وتبچي مشتاگتله ياله يجي

-هجران: بَـس هسه صارله فتره هنا شعجب مارجع؟

-عميد ما يرضى لان طبع خواله كثر ما يحبو بَـس يكربون عليه تخيلي لا اكو وحده بيهه خير تعزله غده لا عشه حتى ملابسه سوده بوجهي كله هوه يغسلهن وكأنما عايش ببيت وحده ولا تگولين بيت مليان بنسوان خواله

-يا يممة واني اگول ذاك اليوم من ردت اغسل ماعونه ماقبل

-اي متعود كلشي يسوي لروحه، وشكو واحد مابي حيل لو يريد يسافر من خواله ومن ولدهم وتعال يعثمان اشتغل نيابة عنه، خوب فلوسه مفلفسات منا ومناك يوميه واحد جاي دايني وانطيني لان هوه الله يزيده متمكن لان يشتغل هواي وعنده املاك

-هجران: خطيه والله قهرتيني وهذا الشي اكيد اثر بشخصيته وضعفهه مو؟

-بالعكسسس عثمان اقوى وارقى شخصية من اخواني لهيچ عدهم غيره منه وماينضحك عليه بسهوله يوهمچ هوه مصدگ ويسايرچ بَـس هوه من جوا حاسب الف حساب للشغله

-يعني عنده ذكاء

-اي بالضبط

-وهوه وعميد كُلش اصدقاء مبين

-غزاله: اي صح لان عمي عباس الله يرحمه تكفل بكلشي يخص عثمان چان حتى راتب يدزله لهناك ودوماً يروح للانبار يشوفه ويروح وياه عميد الدين وهيچ قوت صداقتهم وصارو اكثر من اخوان

-الله يحفظهم مبينه علاقتهم حلوة

-اي كللش

غيرنه الموضوع وحچينه بسوالف ثانيه ولحيت عليهه تسوي اختبار حمل عندي واحد منزلي انطيتهيا وطبت للحمام ترجف ودموعهه بعيونهه، طلعت من الحمام ووجهها مخطوف، گالت بصوت مبحوح بي رجفه...

-غزاله: مو حامل

-يله شو تبچين؟ مو متردين انتي؟

-اي بَـس مصدومة توقعت حامل لان صارلهه هواي گاطعتني

-عادي تصير وهم روحي للدكتوره تأكدي

هزت راسهه واخذت المواعين وطلعت من غرفتي، واني فتحت الشبابيك وعطرت الغرفه من ريحة الاكل وگعدت ؏ الچربايه اتابع مسلسله..

ماريد انزل واسمع شغلات تضوج وغزاله گالت هيه تسوي المواعين وتغسل الارضيه من يجون الزلم، صح رح اتعبهه هواي لان شغلهه مو قليل بَـس شسوي اخاف اشتغل زايد ويصير شي بالطفله خصوصاً بطني توجعني ونازله..

صارت العصرية واني من مسلسله لمسلسله وطاسه الموطه بيدي آكُل وماملحگة وساعه اجيت ككو وساعه چيبس يعني خطتهه وخربطتهه، كفخت بخشمي ريحة كيكة بيت اويلي غير متت عليهه، حسيت رجعت فترة نساتي كلهه هسة ماعرف شبيه..

مشت الايام والبيت مخبوص الكل يحچي بالجنيه وعميد جاب شيخ للبيت وگال فعلاً اكو شي مو طبيعي وعلمنه ؏ اشياء نقراهه كل يوم بكل ركن من اركان البيت المعوذتين وايه الكرسي والثنعش معصوم گال هاي حصانه للبيت ولأهل البيت حتى لو چان بيتكم مابي شي هذا يفيدكم للامان وللسلامة..

وگالو نرش ملح خشن بزوايا الغرف لتطرد الطاقه السلبيه وبعد هواااي شغلات علمونه عليهن واحنه نطبق بالحرف الواحد..

گعدت الصبح واليوم اول يوم الي اداوم جامعه مرحلة اولى، الحماس الي اني بي والطاقه والنشاط شي مو طبيعي.. لبست ملابسي الي جواهر رهمتلياهن البارحة بالليل چان عبارة عن..

كوت ماروني توصل لركباتي وبنطرون رسمي اسود وشال ابيض وبوت اسود وجنطه سوده وبيهه ابيض، ضحكت وباوعت لروحي بالمرايه شگد انيقه طالعه وحتى بطني اختفت بالستره، ابتسمت لنفسي برضا وكملت لبستي بأكسسوارات ذهبيه ومكياج هادئ كُلش مكون من كحلة ومسكارا وبرزته بحمرتي المخملية الي اجت فيت توالم ملابسي..

نزلت الدرج ويه بكر ملازمين ايدين بعض من شافتنه عمه دلال گامت تصفگ وتهلهل ضحكتني تگول چنكم عرسان..

ودعتهم وما اكلت شي لان ماشتهي الصبح وطلعنه للجامعه، دخت وحرت وين قسمي بَـس خطيه جواهر ابد معافتني وحتى ضربت محاضراتهه وظلت ويايه تعلمني وين اروح ووين اجي ودلتني ؏ نادي التربيه خاف اشتهي آكُل شي، تفاجأت من شفت عثمان گاعد ؏ المسطبه بالحديقه لابس نظاره طبيه وديقره بكتاب..

ردت اسأل جواهر عليه بَـس چانت تحچي ويه ابوهه بالموبايل ومن خلصت نسيت السالفه، گظيت اليوم عادي وحظرت محاضرتين صح مستحية وماحچي ويه احد ومنعزله وحدي بَـس احس براحة، والفرحني من جواهر عرضت عليه تحظر محاضره ويايه لخاطري خاف استحي بَـس گلتلهه ميحتاج..

كملت محاضرات ولگيتهه گاعده ؏ المسطبة وولد واگف گدامهه ديحچي وياهه وهيه مدنگة راسهه وتضيع نظراتهه مناا ومنا، من شافتني مبين ترخصت منه واجتي بأتجاهي...

-جواهر: ها هجران كملتي محاضرات؟

-اي وانتي؟

-هههه مادري لان ضربتهن خفت تطلعين ومتلگيني

ابتسمت وحاوطتهه من زندهه ومشينه، عزمتني بالنادي واكلنه وشربنه عصاير، عرفتني ؏ صديقاتهه ورحبن بيه بحرارة خصوصاً من گلتلهن...

-جواهر: هاي هجران اعز صديقه ؏ گلبي

دمعت عيوني ؏ كلامهه هاي اول مرة يصير عندي صديقه وشلون صديقه مثل جواهر، اشوف العيون تتطاير عليهه والولد ياكلوهه بنظراتهم حتى حسيت روحي نشاز وياهه بَـس هيه رجعتلي ثقتي بروحي من گالت گدام صديقاتهه...

-جواهر: هجران اليوم طالعه قنبله عجيييب ولچ وين ضامة كل هالجمال

ابتسمت بحياء وحچيت بصوت ناصي..

-هجران: والله عيونچ الحلوة لهيچ تشوف الكل حلو

وحدة من صديقاتهه حچت بأعجاب..

-ستايلچ كُلش حلو عاش ذوقچ

-هجران بأبتسامه: تسلمين

گمنه عنهن وافترينه بالحديقه شويه وبعدين اتصلت ببكر يجي عليه لان جواهر گالت رح يجي السايق عليهه علمود بعدين يرحون للمصنع ويجيبون شهد لان هالسنه تطبيق ومتداوم جامعه هواي..

وگفتله بباب الجامعه انتظره وهيه ودعتني وركبت السيارة ويه سايقهه، وصل بكر ورجعني للبيت بَـس قبلهه گتله مشتهيه موطة..

نزل يشتريلي بدون ميسألني يا نوع تردين كالعادة، جابلي ككو وفانيلا اكلتهن بالسيارة وسألني عن سبب فرحتي...

-بكر: اشوفچ فرحانه ومتونسه حبيتي الجامعه؟

-اييي كُلش لو تشوف البنات شگد حبابات ولطيفات فدوه لالله

-بكر: كونتي صداقات لو بعدچ؟

-لا بعدني لان اغلب الوقت گظيته ويه جواهر وصديقاتهه

هز راسه وسكت، وصلنه للبيت وگبل صعدت فوگ ماتغديت لان بحساب اكلت بالدوام،، نمت من التعب وماگعدت اله المغربيه اجن جورية وغزاله ورهف وسولفتلهن شنو سويت اليوم گامن يلوبن ويردن يداومن نفسي..

-جوري: اهمدااني لو داخله علمي لو ادبي چان رحت جامعه

-هجران: موو گتلللچ وانتي معانده اله تجارة

گلبت وجهها ضايجة وعلاوي يلوب بين ايديهه، ترخصن مني وكلمن راحت لمكان واني طلعت ملازمي وصافنه عليهن، هواي فاتتني مواد لان بحساب اجيت متأخرة ويه جماعه الدور الثالث..

قريت شويه المحاضره الي شرحهها الدكتور اليوم عسى افتهم شي وحسيت شويه عقلي انفتح وگمت استوعب، كملت ولميت ملازمي وظميتهن ونزلت جوه اسوي عشه..

هم ماشتغلت هواي خطيه جوري اغلب شغلي هيه اخذته حتى متعبني تگول ما انسى وگفتچ ويايه بفتره حملي، فَـہ بهاي الفتره احس رجعتلي عافيتي وحتى سمنت شويه لان حركتي قلت واكلي زاد وخدودي تفحت بأختصار چانت احلى فتره بحياتي..

مارست بقيه ايامي هيچ، كله بكر ياخذني ويرجعني وميقبل اروح ويه سايق جواهر وشهد اله بيده يوصلني،، ماهتميت هواي بالعكس افرح من ياخذني للجامعه وادخل ايدي بأيده ويوصيني ؏ نفسي وان ماحچي ويه ولد واذا واحد راد يحچي ويايه ؏ انفراد ماقبل واگوله اذا عندك شي احچي گدام صديقاتي..

افرح واني اسمع نصائحه احسه يغار عليه ويخاف، دخلت للجامعه چان الجو مغيم وشته بارده بشهر الـ 12 نزلت من السيارة وودعته ورحت گبل للقسم..

دخلت وهم شفت عثمان گاعد يحچي ويه استاذ وبيده كتاب وكأنما ديشرحله ؏ شي ويتناقش وياه، فكرت بالموضوع معقوله عثمان استاذ ويدرس هنا؟

مشيت طريقي للقاعه وكملت المحاضره وطلعت للنادي انتظر جواهر كالعاده، گعدت ويه صديقاتهه وسولفنه وضحكنه هواي ترخصت منهن وكملت محاضراتي واتصلت ببكر يجي عليه..

ركبت السيارة ويه بكر بَـس انتبهت لعثمان هستوه ديطلع من باب الجامعه اللتفتت لبكر وسألته...

-حبيبي اخوك عثمان دكتور جامعي؟

-بكر: لا

-لعد ليش دائماً اشوفه يجي للجامعه واشوفه بكليتي؟

-چا غير طالب ويدرس هنا

-لا شلون طالب وهوه متخرج؟

-بكر: طالب ماجستير هوه

-صدُك والله؟؟؟ واني عبالي استاذ لو انته موصي عليه حتى يراقبني

-شني؟؟ وشكو يراقبچ؟؟ لا بويه هوه قسمه تاريخ ووياكم بنفس الكليه

-هااا واني اگول دائماً اشوفه

-مممم

وصلنه للبيت ونزلت اسوي كيكة لان اشتهيتهه، اليوم عيد ميلاد عميد الدين وصار عمره 36 سنة اثاري بأول لقاء النه من گلي عمره 35 طلع بعده مداخل بيهه بَـس همه يمشون ؏ المواليد ويكبرون بنفسهم..

جواهر خططت نسويله كيكة بيت لان ميحب الجاهز ونحظرله شي حلو وبسيط نفرحه بي وغزاله ورهف حظرن الميز ووصينه عثمان يطلع وياه وميرجع اله لمن نتصل بي، كملت جواهر الترتيبات كلهه خطيه كله هيه اشتغلتهن واشترت بالونات فضي (رصاصي) ونيلي وعلگت زينه اللوانهه كله فضي واشترت نشرات اللوانهن ابيض وذهبي مقبلت تحط اللوان ثانيه تگول يبين cheep ؏ گولتهه ههههه..

خاله انتصار كل شويه تجيب ذني النشرات الورقيه اليلمعن اللوانهن احمر واصفر واخضر وجواهر تردهه بَـس بأحترام، عجبني اسلوبهه وياهه من گلتلهه بكل هدوء...

-جواهر: خاله حبيبتي ذني النشرات كُلش حلوات بَـس ميرهمن ويه الالوان الحاطتهن اني وخاف يطلعن نشاز وميعجبن عميدي فَـہ شنو رأيچ هالسنه نبقى ؏ اللواني والسنه الحايه بأذن الله نسوي الي يعجبچ لان ماعدنه وقت نغير بعد

-انتصار: اي حبوبه هذا هوه مثل ما تردن انتن چا انه شمفهمني انتن امهات الستايل ههههه

-جواهر: ههههه فديتج خاله

طفينه الاضوية وانتظرنه جيتهم وجواهر كل شويه تگول لحد يحچي ولحد يفتح حلگه حتى نفاجئه، شهد واگفه بصف الضوه وغزاله ورهف لازمات من هاي الاسطوانه الي من نفتحهه تنفجر بأشرطه ملونه..

كلنه واگفين منتظرين جيته وصدُك دخل هوه وعثمان وبكر وفيصل مستغربين ما عدى عثمان لان يعرف بالترتيبات وجواهر گايلتله ؏ كلشي..

-عميد: يا اهل البيييت

-بكر: شني طافيه الكهرباء؟ فيصل افتح موبايلك ضويلنه

-فيصل: لا شلون طافيه والحديقه منوره

بهالاثناء شهد فتحت الاضويه وطلعنه نصفگ ونصيح مفاجأة، بهتت ملامح وجههم مستغربين، خاله انتصار راحت تبوس عميد وهوه لسه متفاجئ بَـس مبتسم والفرحة مبينه بعيونه، كلنه باركناله واني رحت لـ بكر وجريته حتى نگعد ؏ القنفات وحتى ميظل يباوع لجواهر رغم صارلهم اشهر مشايفين بعض وحتى لو يشوفون بعض يتصرفون كأنما غربه وبكر ابد محاول يضوجهه لو يندگ بيهه..

جواهر راحت ؏ عميد وگالت بصوت ناصي وهيه مدنگة راسهه...

-كل عام وانته بخير عمييديي

ابتسملهه وجاوبهه وباركلهه ؏ الحجاب لان تحجبن بالجديد هيه وشهد، صح حجابهن كلاوات وشعرهن يطلع ميهتمن ويوم يلبسن ويوم ميلبسن خصوصاً جواهر گدام عميد الدين تزوغل بي ومو كُلش تهتم..

دار بيناتهم حديث بدون منسمعه لان يحچون بصوت ناصي بَـس واضح حديث حلو لان جواهر مبتسمه وساعه تباوعله وساعه تنزل راسهه مستحية، قاطعتهم رهف اجت ؏ ابوهه جرته حتى يقطع الكيكة..

قطع الكيكة والابتسامه مفارقت وجهه البشوش وانقهرت من گال هاي اول مرة واحد يسويله عيدميلاد، جواهر گالت وهيه مضيگة عيونهه...

-جواهر: لان مو كل سنه اني هنا حتى اسويلك

قهقه بخفه ومسح لحيته، همست لـ بكر حتى يگوم يبوسه ويباركله وهوه سوه هيچ واخوانه شافوه وسووا نفس الشي وبيبي عطيه راحتله وجرته وتبوس وتشمشم بي وماملحگة، خربنه ضحك من گامت تبچي بسنفونيتهه المعتادة...

-حجية عطيه: اهئ اهؤ اهئ اهؤ صاير چنك عباس يبعد حبوبك اهئ

عميد راد يلطف الجو، باس ايدهه وگال بغمزة..

-چا حجية مو انتي تگولين انه شبل سيد عباس

حجية عطيه: اي بعلي ونعم منك ومن ابوك الله يرحمه

ترحمنه عليه وقريناله الفاتحة ؏ الواگف لان ذكروا وبيبي نزلت تحچي ؏ وسامته وطيبته وكرمه وسخائه وگالت عميد الدين نسخة مصغرة منه وكل عيالي شهدو ؏ هالشي..

تشكر عميد من عدنه وحسيته خجلان يتشكر من جواهر فَـہ غلس عن الموضوع بَـس دار وجهه علينه البنات كلنه وگال "رحم الله والديچن" توقعت جواهر رح تضوج بَـس گالت تدري بي يستحي يوجهلها الشكر..

راحت تجيب باقي الشغلات وعلگت اغاني نفس اغنية عميد الدين المفضله، من سمعهه ضحك وگال...

-عميد: اويلي منچ حتى الاغنيه الاحبهه

ضحكت بدلال وگالت...

-جواهر: لعد شعبالك

صدفة راحت عيني ؏ بكر صاير احمممر من العصبيه وعينه ؏ عميد مبين ميت قهر منه ماعرف شنو السبب، تفاجأت من تصرفه وضجت حيل بَـس مبينت ضوجتي حتى ما اخرب الاجواء..

خلص العيدميلاد وكلنه تفرقنه لغرفنه وبكر راح ؏ الچربايه مدد جسمه وثاني وحده من رجليه والثانيه منزلهه ويهز بيهه شويه وينفجر، نزيت من ضرب ؏ رجله قوي وصاح...

-اااخخخخخ يالقهررررر

-هجران: شبيك؟

-سكتي هجران لا اروح اذبح عميد بنومه

شهگت وضربت صدري..

-انته شدتحچييي شنو تذبحه شنوو سكتيي بكرر شبيييك

-بكر: اشششش حسچ ماهيسه يله نامييي

محچيت شي وطبيت للحمام افكر هذا شبي وشنو سبب هالحقد ؏ عميد بآخر فترة حتى صاير ميجيب طاري گدامي ابدد واذا اجيب سيرته يعيط عليه ويگول اگص لسانچ اذا نطقتي بأسمه..

تعبت من التفكير ورجعت للفراش چان بعده گاعد ويبرم بشواربه، انطيته ظهري وبعد ما حسيت غفيت.. فتحت عيوني مرة ثانيه ؏ صوت عالي جاي من الصاله، انداريت ؏ صفحة بكر شفته ماكو، باوعت للساعه چانت بـ 2:30 بالليل..

اصوات عاليه وصرخات متتاليه واكثر صوت مميز هوه صوت مرتضى وبيبي وعمه دلال تصيح وتبچي، گلبي حسيته طلع من قفصي الصدري من الرهبة وكل بالي وتفكيري شصاير وشنو سبب هالخبصة والصراخ الغريب الصادر من زلم ونسوان خبط..

لبست شالي سريع وجبه فوگ ملابس النوم وطلعت گبل انزل جوه اشوف شصاير، نزلت اول كم درجة واذا رجليه تجمد بمكانهه چانت رهف گاعده ؏ عتبه الدرج تبچي فحطانه ووجها احمر، شفت منظر خله شعر راسي يوگف وصابتني قشعريرة قويه واني اباوع لوجوههم وحالتهم...

يتبع☘️...

♛ ♛ ♛ ♛ ♛ ♛ ♛ ♛ ♛ ♛
توقعاتكمم👀 + لتنسون التصويت حبايبي♥️♥️
احبكم واايد واايد♥️💋.