شفاه مخملية الفصل الثامن والعشرون 28 - بقلم 𝐙 𝐇 𝐑 𝐀

♛ ♛ ♛ ♛ ♛ ♛ ♛ ♛ ♛ ♛

بارت موفاجئ😉😁

حبايبي هذا البارت طويل لان مگدرت اقسمه♥️.

"شفاه مخملية"

بقلم: زهراء السلامي.

#شمالها عيونك نستني ؟
ويا مرآيه الغرتك هيچ
وعفتني
گمت أشوفك تهوى غيري
بيش غثنّك عيوني
وغربتني ؟

♛ ♛ ♛ ♛ ♛ ♛ ♛ ♛ ♛ ♛

"هجران"
صارت غصه ببلعومي ولزمت راسي حسيت رح اوگع من طولي، صعدت بالرسايل الفوگ وكله هوه يدز بَـس ماكو جواب منهه، وواضح مغيره الرقم صارلهه فتره لان كاتبلهه..

"عود عبالچ تغيرين الرقم وما اجيبه افني يومچ اذا حظرتيني بعد"

اقره بالرسايل واحس روحي جاي يسحبوهه مني، بَـس الي خلاني انهار من قريت اخر رساله مكتوب بيهه..

"جواهر احرگ الدنيا لو رضيتي بهالزلمة انتي ليه فهمتي!!! لا تلعبين بأعصابي لا اجي لبغداد احرگكم كلكم وعليي"

ذبيت الموبايل والنفس ماگدر اجره عدل، ركضت ؏ الشباك فتحته وظليت اخذ شهيق وزفير، دموعي متنزل من الصدمة، تمنيت ميته ولا شايفه هالرسائل.. طلع من الحمام لاف المنشفه ؏ خصره كالعاده، گال وهوه ينشف شعره بخاولي صغير..

-هجران طلعيلي تراكي الاسود

ماجاوبته ظليت واگفه ؏ الشباك ومنطيته ظهري، صاح

-لييش فاتحة الشباچ هيچييي تردين تفضحينه!!!

من شافني ماجاوبه اجه عليه، دارني عليه وعاگد حواجبه معصب، قبل لا يگول شي سألته السؤال الي ببالي من زمان بَـس اني اچذب روحي واضحك ؏ نفسي مثل الغبيه..

-هجران: انته وجواهر بعلاقه؟

شكله ما تفاجأ ولا رفله جفن، فر بأيده وگال بأنزعاج..

-شنو هالسخافة سدي البرده خليني انطمر

-ماجاوبتني!!

-نامي بويه انتي تعبانه نامي

-جاوبنيييي بكرررر

-ولچ حسسسسسچ لا اجي اطلع لوعة گلبي بيچ امشي ولي بره

-ليش تزوجتني؟

-هجراااان انطميييي وطلعي بررره

-ليش تزوجتني وانته تحبهه؟

-مايخصچ زيييين!!!

-لا يخصني ونص اني مرتك

-مرتييي مو معناتهه بكلشي حاطه روحچ

-شلون ماحط روحي وزوجي عنده علاقه ويه صديقتي!!!!

ظل يدردم ويصيح ولبس ملابسه وطلع بره، اما اني احس روحي بصحراء قاحله، ريگي نشف والحراره وصلت لعيوني وحتى صوتي من احچي ماسمعه، مسحوبه روحي مني جسد بلا روح.. مسحت مكياجي بكل بطئ ونزعت ملابسي لبست دشداشه طويله وشال وطلعت بره..

دورت عليه گاعد بالهول يدخن ويهز برجله سريع، وگفت گدامه وسألته واخيراً دموعي تحررن وگامن ينزلن..

-تحبهه؟

نتر بيه...

-بكر: هجران ولي عن چهرتي

-جاوبني

رفع عيونه يباوعلي ووجهه محتقن احمر، خفت يصيح وواحد يسمعه ويجون يلتمون، ولو لو تنگلب السما ؏ الگاع محد يهتم ولا عدهم فضول يعرفون شكو، گال بحدة..

-بكر: اذا احبهه لو لا شني الراح يتغير؟

-لا هواي يتغير

-روحي نامي

-ماااااريددد انااااااااام

طفر من مكانه وكمم حلگي بأيده، نتر قريب وجهي..

-حسسسسچ لا وحگ محمد اخفييي، واي احبهه وعاشگهه وبيوم من الايام چانت ليه وراحت مثل الطيره مني

يحچي واني ممصدگة، دموعي تنزل بقهر وحرگة.. دفعته عني وبدون وعي گمت اضرب ؏ وجهي واعيط.. حاول يلزمني وامنعه وادفعه عني، ؏ اثر صياحي اجن جواهر وشهد يركضن، جواهر عاطت..

-جواهر: عزززا يممه ولك شمسويلهه بكرررر

-بكر: ماسويت شي

-جواهر: هجران حبيبتي شبيچ؟

تقربت عليه تريد تهدأني ومن حلات روحي ماعرف شنو اسوي گمت اضرب بيهه واخرمش بوجهها، خانتني وطعنتني بظهري ومثلت عليه هيه تحبني وتريدلي الخير وهيه العكس تماماً.. گامت تعيط لان جرحت عينهه وصار يطلع منهه دم وبكر تخبل، جرني عنهه ودفعني بالگاع تأذه ظهري..

انجنيت من شفته راحلهه ولزم وجهها ويحاچيهه حتى تهدأ وينفخ ؏ عينهه، گمت اصرخ وابچي وادگ ؏ وجهي، ركضت عليهم اريد املخهم واحرگهم سوا، شهد چتفتني من ايدي حتى لا أأذي روحي، دخلت عمه انتصار مصدومة من منظرنه بَـس ماحچت شي لان الكل يعرف خبال بكر وميقبل احد يتدخل اذا تعاركنه..

دار وجهه يباوعلي وعاط بيه..

-بكر: وللللچ حقيييره تردين تشوهيييين وجهها!!!!

-هجران: حرااااام عليكممممم حراااام ولچ اني شسويتلچ وتخونيني ويه رجلي شسووويتتتت

مسحت دموعهه التنزل من عينهه اليمنه اثر فگستي الهه، گالت بحرگة..

-جواهر: والله ماعندي شي وياه هجران وغلات شهد ماعندي شي وياه

-هجران: ورساااائلكممم شتفسرييهه؟؟؟!

-جواهر: اني معليه والله العظيم اني ميخصني صدگينييي

بكر عاط...

-بكر: اشششش ثنينچن ويله كل وحده لحجرتهه، وجواهر داوي عينچ لا تلتهب

فلتت من ايدين شهد وگمزت ؏ جواهر خرمشتهه من رگبتهه، حسيت روحي فقدت وماتت البنيه البريئه البداخلي وتحولت لوحش مفترس اثر طعناتهم وخيانتهم الي.. اسمعهه تعيط وتصيح وبكر يجرني عنهه واني اهمش بيهه اريد اللوحهه واموتهه بيدي، صوتي انبح وماگام يطلع بعد ونار بگلبي اريد اطلعهه واحرگ بيهه جواهر ووجهها الحلو الي مخبل بكر..

دخل الكل للهول وعبالك يتفرجون ؏ فلم سينمائي، اجت عليه غزل ولزمتني من جهه وشهد من الجهة الثانيه ورهف واگفه بزاوية الهول وكارصه ترجف، ورغم شگد أذيت جواهر بَـس ما مدت ايدهه عليه ابد ولا أذتني وهذا الشي موتني من القهر..

بكر شالني شيل يريد يطلعني من الهول واني مچلبه بالقنفه اريد اطلع حرگتي بيهه واقتلهه بيدي خلاص، وگفني صوت قوي خشن، عاط..

-هاااي شصااااير؟؟؟؟!!

درت وجهي اباوعله وهوه فاتح عيونه متفاجأ، چان لابس اللبس العربي واضح چان بمكان او معزوم وهستوه دخل للبيت، جواهر ركضت عليه وختلت وراه، دار وجهه يباوعلهه..

-عميد: جواهر شمالچ؟

ماجاوبته وتبچي بالسكته، بكر راح عليهه يريد يجرهه من وره ظهر عميد بَـس هوه ماقبل وضمهه وراه، شويه واجه عثمان من بره..

-عثمان: يووول هاي شصايرلكممم؟؟؟

-بكر: شنيييي فلممممم وجايين تتفرجوووون يااالااا كلمن لحجرته لا ابتلي بيكممممم ياااالاااا

راح الكل بَـس عميد وعثمان وجواهر لسه واگفه بكل عين صلفه وره عميد وتباوعلي، عطت بيهه..

-روحيييي برررره حقيييييره اني بحيااااتي مشاييييفه بنيه وسخخخخخة مثلللللچ اكررررهچ اكررررررهچ الله ينتقم مننننچ عسى حوبة گلبيييي متتعداااااچ وتطلععع بييييچ وعسااالچ لا ارتاحيتييي بحيااااتچ بجااااه السيده زينببب

بكر راد يهجم عليه لان دعيت عليهه وعثمان حاوطه بأيده، ولأول مرة عميد يعيط بيه..

-عميد: شنييي هالدعاوووي علوووويه شسوت البتتتت؟؟؟

-هجران: هاي چذاااابه ترا حيييية وتضحك عليه ومتأكده دتضحك عليك هم

-عميد: شني تضحك عليّ ولللچ شني فريييخ جدااامچ!!!!

جواهر تبچي وتحچي..

-هجران ورب العزة ماحبه ولا اكو بيني وبينه علاقه بيمن احلفلچ وتصدگيني والله العلي العظيم ماعرف شنو اگول بعد بَـس اني ماحب بكررر ماااحبه والله

-هجران: اشششش ماريد اسمع صووووتچ تتقربين مني وصرتي صديقتي واني اگول شعجب بنيه مثلچ تصادق وحده مثلي بَـس گلت يجوووز حبتني وشافت طيبة گلبي ورادت نصير صديقااات اثااااري راسمه ؏ رجلي يااااا نذلللله

-جواهر: عميييد انته احچييي گوللهه اني ماحبه حباابين احچووو بكررررر انته احچيييي الله يااااخذكككك احچييييييي

فرك وجهه وظل ساكت، وعميد اللتفت ؏ بكر وعاط بي...

-عميد: ماتحچي شماالك؟؟؟

ساكت وميجاوب احد، بحركة سريعه عميد لزمة من ياخة السويتر وعاط بوجهه...

-ولكككك احچييييييي ليييييش تلوووع ثنين وياااااك

دفعه عنه وعاط...

-بكر: ماعليكمممم انتممممم محدددد يتدخللل اننه ومرتييي عسى مااا موتنه بعضضص انتو ماعليكمممم

-عثمان: يول شنو معليكم؟؟!! بكررر شبيييك انجنيتت؟؟؟

هجم ؏ عثمان وراد يتعارك وياه وعميد وگف بيناتهم وعاط بعلو صوته..

-بسكم شنييي مزعطططه انفضحنه بنصاص الليالي (اللتفت عليه وع جواهر) بسكم بويه لا تبچن مو زين عليچن

-هجران بقهر: سييييد رح امووووت انتو شنوووو متخافون الله وتلعبووون بمشاعرنه!!!

تنهد وعيونه تباوعلي ينقطن اهتمام وحنيه، فرك وجهه وظل ساكت ودنگ راسه وعثمان نفس الشي ماحچة بأي شي، هه شيحچون قابل وبيا عين يحچون!!

-صحت: ودييييني لبببيت اهلييي بكرررر

-بكر: ويييين اوديييچ بنص الليالللي والدنيا حظر تجواال

-هجران: معلييه اريد اروووح الله ينتقم منكم چذابين كلكم چذابين

گعدت بالگاع وحظنت روحي اريد اخفف عني، تمنيت جوري هنا وتساندني وتطبطب ؏ ظهري وتگول كلشي راح يكون زين، تمنيت اني بحلم واگعد من هالكابوس..

طعنتين كسرت ظهري بهاليوم، طعنت زوجي يخوني ويحب بنيه ثانيه وطعنة صديقتي الاولى والوحيده هيه حبيبة زوجي...

**

"جواهر"
گلبي گام يوجعني واني اشوف حالة هجران رغم شگد تأذيت وعيوني تنزف من وراهه بَـس ما اللومهه، الله يساعدهه اكتشفت شي رح يدمرهه ويجوز يهدم مستقبلهه.. اخذهه بكر بعدما لحت عليه تريد تروح لأهلهه وطلع وعيونه عليه..

كرهته زياده واتمنى اللزمه واخنگه بأيدي، رجليه ترجف وحيلي باد من الموقف، لسه بعدني واگفه وره عميد اخاف يصير شي وأحد يأذيني، قطع الصمت عثمان من مسح وجهه وگال..

-اوووف منه هالبكر ناوي يجلطنا ويجلط مرتو

-عميد: جواهر تعالي شمالچ خايفه

طلعت من وره ظهره العريض وثينيهم شهگو من شافوني، عثمان صاح..

-عثمان: يولي شصاير بوجهِك؟؟

احس بألم وعيني تحرگني، تلمست رقبتي صار دم بأيدي

-عميد: عثمان اغديلك فدوه اركض جيب الاسعافات بساااع

راح عثمان واني عيني اليمنه مستمرة تنزل منهه دموع، اشر عميد ؏ القنفة وگالي اگعد عليهه..

رجع عثمان وجاب العدة وطلع گال يروح ينام لان باچر رح يرجع للانبار من الصبح.. بقينه اني وعميد بالهول، گعد بصفي وطلع شاش من الصندوق وعلبه اوكسجين احمر وقطن، نگع القطنه بالاوكسجين ومدهه الي، گال بهدوء..

-هاچ عقمي جرحچ لا يلتهب

مجاوبته وظليت گاعده ماتحركت ساكن، حتى ماعندي مُهجة احچي شي.. كل بالي وتفكيري هجران شلون بيهه وهيه حامل وضعيفه خاف توگع لو يصيرلهه شي وهذا بكر ميهتم، عادلي الجمله "عقمي جرحچ لا يلتهب" وهم اللتزمت الصمت، جر حسره وفرك رگبته، همس بصوت ناصي..

-احم بَـس وخري شعرچ انه اسوي

-ماريد

-بويه مايصير، تتأذين

-گتلك ماريد

-لا تعاندين جواهر وسوي مثل ما اگلچ حطي الگطن ؏ الجرح

-عميد عوفني وحدي فدوه

-لا ما عيفچ هو مو بكيفچ ووخري شعرچ بساع تره مصخت

سحبت شعري لجهتي اليسره وهوه تقرب عليه لدرجة احس بأنفاسه تضرب وجهي بَـس عيونه ؏ رگبتي ويداويهه، رفع عيونه يباوعلي صارت عيني بعينه، توترت من اللتقت نظراتنه..

جفلت من نهض نفسه ونفخ ؏ عيني بدون ميلمسني، هاي اول مرة يتقرب مني لهدرجة، بطبعه دائماً يبتعد وميحاول يتقرب مني لو من بشهد، حرقتني عيني وكل شويه اسدهه بَـس هوه ميقبل يگولي فتحيهه..

راح شويه واني اخذتلي نفس بعدما چنت حابسته من التوتر والخجل، رجع ومنگع الشاش بالمي وگعد بصفي، حط الشاش ؏ عيني شهگت لان المي بارد.. ظل يباوعلي ويتمايز وجهي وكأن ديدرس ملامحي، همس..

-جاي تتوجعين؟

هزيت راسي بـ "أي" لم شفته وهز راسه، شال الشاش عن عيني وحط قطره بيهه گال هاي تطهرها ومتخليهه تلتهب الدكتور انطاهه لرهف من صار عدهه جنيجن، جاب الشاش وحطه ؏ جرح رگبتي شهگت بألم لان يحرگني، همس تحت انفاسه..

-اشتعل مروان عساه

باوعتله وردت اللطف الجو لان واضح ؏ وجهه ديتألم ويايه

-جواهر: عوف مروان خيولي

-عميد: هسّ انتي شون كيفچ؟

-زينه بشوفتك

ابتسملي وابتعد، رجع الغراض لمكانهن وراد يگوم، وجريت ردن دشداشته..

-عميدي اريد احاچيك

گعد بمكانه وتغيرت ملامحه للجديه بعدما چانن مليانات اهتمام وقهر، گال بصيغه فضوليه..

-خير صاير شي؟

-لا لا بَـس احس هجران وبكر رح ينفصلون

ميل شفته وحرك چتافه بـ "مادري"، سألته بتردد..

-انته بعدك مصرّ ؏ رأيك؟

باوعلي بنظره بعيونه المطفيه، وگال ببرود..

-عيب هالأسأله

-لا وين العيب يعني اني دا اگولك اذا بكر وهجران تطلگو ليش متقبل تتزوجهه؟

-وانه جاوبتچ گبل اكثر فترة ؏ هالسؤال

-اي بَـس مقتنعت

-خوش

-شنو خووش؟؟ جاوبني حباب!

حرك رگبته وگامت تصدر منهه اصوات طقطقه، باوعلي بنظره بيهه هواي تفاسير بَـس نهى تفكيري وتفسيري بسؤال...

-عميد: انتي ترديني اتزوجهه؟

حرت بالجواب وظليت ابلعم، عيونه گصتني گص واكثر شي يباوع لأيديه، حسيت خلص انفضحت واكتشف اني احبه وديجر لساني، بَـس لا مستحيل نحن لا نهزم لاازم اللوفهه عليه، گلت اتصنع اللا مبالاة

-عادي البنيه حبابه وتستاهل واحد زين

ضحك بقوه لدرجة غص، ضرب ؏ صدره عدة مرات واستمر بالضحك، توترت وظليت امتمت

-اءء يعني شوف هيه البنيه صح حبابه.. بَـس شسمه تحب بكر وگايلتلي اكثر من مره تموت عليه و....

-قاطعني وگال بجديه: اهاااا وهنا السبب، البت ونعم منهه ومن اهلهه بَـس انه ما اخذ وحده گلبهه مو ليه لان لو اصبهه ذهب هم ماتقتنع وتبقى تقارن

-بَـس متأكده رح تحبك اكثر من بكر

-وجوز تبقى تحب بكر!

هزيت راسي بـ "اي" وتچيت ظهري ؏ القنفه، تنهد بعمق ومسح وجهه، بقينه گاعدين بصف بعض ومحد يحچي شي لمدة لا تقل عن النص ساعه، هوه گاعد وصافن بالفضاء واني عيوني تتابعه وكلما يدير عيونه يباوعلي اسوي روحي ملتهيه اباوع لأظافيري، كسرت الهدوء الصار وگلت بصوت ناصي..

-عميد تعبانه

دار بَـس عيونه يباوعلي، جاوبني بهمس

-سلامتچ

-تعرف بشنو احس؟

هز راسه بـ "اي" ونزله، دموعي گامن ينزلن من وحدهن، الانسان الوحيد الاكدر ابچي براحتي وماخجل ولا اتقيد هوه وياه.. لان بطبعه ميباوع بالوجه ودائماً منزل راسه لو يسرح بالفضاء ويستمع للطرف الثاني، بَـس هالمرة احتاجيته يباوعلي ويطمني، يگولي جوهرة لتخافين كلشي رح يكون زين، مسحت دموعي بردن قميصي وحچيت بغصه

-عميدي باوعلي

بقه ؏ گعدته وعيونه بالگاع، گلبي گام يوجعني واني اشوفه شلون هاملني وميجاوبني ولا مهتم عكس قبل چان بَـس يسمع نبرة صوتي تتغير يحير شلون يسكتني وميخليني ابچي، دائماً يگول ماكو شي يكسر ظهري اكثر من شوفة بنية تبچي لان من تبچي تكون مهضومة وحتى لو بچت ؏ سبب تافه بنظرنه احنه الشباب بَـس هالسبب اكيد ناخر گلبهه ومتعبهه..

غمضت عيوني اتذكر حچاياته التشفي جروحي والي تدخل بجسمي مثل ابرة المخدر تخدر كل حاسه بيه..

فتحت عيوني وتفاجأت من شفته يباوعلي، من اللتقت نظراتنه ابتسم خفيف واشرلي براسه حتى احچي، بكلشي هادئ حتى بتحركاته وبكلامه واختياره لكلماته.. يختارهن بدقة يخليني اتأثر بيهن واتعمق واني افكر بيهن، تنهدت واني عيني بعينه..

-اني خايفه

هز راسه وسالني

-؏ هجران؟

-؏ هجران ؏ دراستي ؏ مستقبلي ؏ نفسي بالتحديد

-لا تفكرين الهه رب وتدبر كل مخاوفچ

-ونعم بالله بَـس اخاف يصيرلي شي، مو حقي من اخاف؟

-اكيد

تنهد بعمق وسألني...

-عميد: مازعلتي من هجران لان أذتچ؟

نزلت راسي وبرطمت شفايفي من تذكرت شلون چانت حالتهه، هزيت راسي بـ "لا مزعلانه" هوه ضحك، سألته...

-شبيك تضحك؟

-عميد: لان غريب ليش مازعلتي منهه؟

-ترا هجران حبابه واكيد سوت هيچ من حرگة گلبهه! يعني عرفت زوجهه يحب غيرهه والله اني بدالهه احرگني مو بَـس تهجم عليه

ضحك بقوه ومسح لحيته، بلل شفته بلسانه وگال بأبتسامه ماكرة..

-تحرگچ؟؟

-اي لعد اني اعرف حبيبي لو زوجي عينه ؏ وحده ثانيه ويحچي بيهه والله انتفهه تنتيف واحرگهه واحرگ شيب الخلفوهه!! احنه البنات كلشي ولا وحده تندگ برجالنه

-عميد: اهاااا

-جواهر: اييييي

-ماشي

-اي

-حلوو

-شنو شبيك؟

-ولا شي بَـس تضحكن

-نضحك لان نخاف ؏ النحبه؟

-لا لا مو هيچ اقصد، بَـس تفاجأت من ردة فعل هجران يعني ماتصورتهه من هالنوع

-جواهر: ليش يا نوع توقعتهه؟

-ماعرف محياها يدل ان هي راكزة وعاقله وهادئة وحبابه و...

-قاطعته: المهممممم يعني مو حقهه بشنو سوت؟ هذا قصدك؟

-اكيد حگهه ونص وانه بظهرهه بكل قرار تتخذه

-وليش بظهرهه؟؟

-بأختصار لانهه خوش بت.

ضجت او نگول غرت بَـس محد يگدر ينكر هجران خوش بنيه وحقه من يوگف وياهه واني بنفسي رح اوگف وياهه، فرك وجهه وضحك خفيف..

-شبيييك تضحكك

-والعباس تضحكن

-لا منضحك بَـس انتو عيونكم تزرزر مناا ومنااااك

حچيتهه بحرگه، دار وجهه يباوعلي مصدوم واني خزرته، فتح عيونه اكثر وگال...

-شكوو شكوو تعاينيلي هيچ

-فهمك كفايه

-دهرر شكو ولچ غير افتهم

-ماكو داعي حبيبي انته تعرف شنو اقصد

-ممممم

رجع دار وجهه ليگدام ويبرم بشواربه، هاي العادة كلهم يشتركون بيهه معناهه ديفكرون، ضيقت عيوني وسألت..

-لو بَـس اعرف بشنو تفكرون من تلعبون بشواربكم

-وانتي شني هالفضول؟

-گولي حباب شنو ببالك؟

-مو اخاف اگولن وتزعلين

-لا لا مازعل والله

-واذا زعلتي؟

-طبني مرض بوكتهه

-ههههه خووش

-ياااا هاي شبيييك

-ديلا شوف بعدني ماحچيت وگلبت الچهرة (الوجه)

-احچي يله سكتت

-مممم، جاي افكر بيچ

گلبي گام يدگ، بلعت ريگي وسألته بفهاوة...

-بيه؟

ضحك وهز راسه بـ "اي"

-جواهر: ليش تفكر بيه؟

-هاااا ليش؟ شوفي جاي اعاينلچ واگول جواهر صايره كللش مزعجة ولحوحة وتنگ هواي و...

-قاطعته: عميييييد شنو هاااي

ضحك لدرجة لزم بطنه وعيونه دمعت، گلبت وجهي عليه وطنگرت، مسح عيونه بتك ايد وبالايد الثانيه سبحته الزمرديه تطگطگ..

-عميد: گتلج راح تزعلين

-اكرهكك انته ليش هيچ تحچي عليه

-عميد: ولچ ماحچيتهه گلتهه بگلبي وانتي نگيتي احچي ما احچي

-مااا مااا المفروض متگولهه

-ديلا كافي اسحب چلامي

-بعد وكت وره ما فكرت بيهه

-اهوووو ولچ بويه انتي لشوكت تظلين زعطوطه

-عزززاا انوب زعطوطه بعد بعد شيخ عميد احچي شنو البگلبك

-لا ماگدر احچي البگلبي تاليهه صگد تزعلين

-وليش ازعل عيوني؟

-هيچ، وبسنه ضحك العالم مصخمين ومتعارمين وحنه گاعدين ونكركر شني ماكو احساس

-غير انته بَـس تضحك

-يللله يا چلمه ردي مچانچ

-عفيه

سكتنه وهوه كل شويه يضحك ويمسح حلگه، خرب تأملت ديفكر بيه تفكير بي خير.. انزعجت من شكله مبين مرتاااح كُلش وعبالك عركة بكر وهجران فرحته، گلت بقهر...

-يااارب ارزقني من راحة عميد الدين شويه

دار وجهه يباوعلي، رفع تك حاجب وگال..

-شمعرفچ انه مرتاح؟

-شوف وجهك شلون متفح

-الله واكبر ؏ هاي حاسدتني

-هفففف مو هيچ بَـس ضجت واحسك ماعندك هموم ومرتاح اتمنى اصير نفسك

قهقه بخفه وحرك راسه بيأس، جر حسره وغمض عيونه..

-ولچ آآآآه آآآآه خليهه بالگلب تجرح ولا تطلع بره وتفضح

-شنو هيه؟

-هيچ سلامتچ

-شنو متحچيلي لان متثق بيه؟

-بالعكس اثق بيچ لدرجة احس جاي احاچي روحي من اكون گاعد وياچ

ابتسمت ؏ وصفه وكولش فرحت، گال تصبحين ؏ خير وراح ينام واني رحت لغرفتي، رهف نايمه بصفي من يوم التزوجت غزاله لان بيبي عطيه ترزلهه اذا تنام بغرفة ابوهه تگول عنهه كبرت وهيه تبچي وتزعل واوقات تغافلهم وتروح تندحس بصفه..

تمايزت شكلهه وبستهه من راسهه وحظنتهه حيل، رأساً بادلتني الحظن لانهه متعلمه تنام هيچ.. سحبت موبايلي وفكرت ادز رساله لهجران اسأل عنهه بعدين تذكرت هيه معاركتتي وخاف انوب تحظرني وبعد حتى ماگدر اتواصل وياهه..

نزيت ؏ اشعار اجاني ؏ الموبايل، فتحته چان من "عميدي"، شفته كاتبلي..

-عميد💬"دگيت ؏ بكر وگال همه بالطريج والعلويه هدأت شوي، لا تخافين ان شالله كلشي يرد مثل گبل واحسن"

سديت موبايلي ومجاوبت، غمضت عيوني ورحت بسابع نومه

فزيت ؏ صوت رهف تبچي وتصرخ "لا اتركني لا تلمسني" تفاجأت لان عميد گال بعد متگعد بالليل وتبچي مثل قبل، اجه يركض ؏ صوتهه وخاله انتصار هم اجت لان استغربو من حالهه، ابوهه يهدأ بيهه ويحاول يگعدهه وهيه تصرخ بعلو صوتهه وتبچي بنص نومتهه

-عميد: رهففف بويه اگعديي رهوفه شمااالچ بابااا ولچ رهففف

مستمرة بالبچي والعويل وابوهه تخبل من گامت تهمش بأيدهه وتصيح بكلمات ممفهومة.. ركضت جبت مي وطشيت ؏ وجهها، صحت شويه بَـس لسه ترجف وتطگ سن بسن..

-عميد: شمالچ يرويحتيي رهفف بابا تسمعيني؟؟

تهز راسهه بـ "اي" وترجف، غاصت بحظن ابوهه وهمست بصوت ناصي محد گدر يسمعه غيري وغير عميد

-رهف: راد ياخذني بابا راح ياخذوني، أذوني هواي

بعدهه عنه وعلامات الدهشه مرسومة ؏ وجهه

-عميد: ياهو هذا بويه؟؟

فركت عيونهه وماجاوبت، رجعت تمددت ؏ الچربايه ورأساً غفت، خاله انتصار واگفه متفاجأة وشهد نفس الشي، وعميد صافن عليه يحاول يلگه تفسير لحاله بنته مني

-انتصار: عميدي يله يمة چانت نايمه وتحچي لا تخاف يله حبوبي

-عميد: لا اخذهه انيمهه عندي

-انتصار: لا يووم هيه هسّ وگوة تعلمت خليهه ويه البنيات وجواهر تگللنه اذا يصير شي لا سمح الله

هزيتلهم براسي وگتله أي شي يصير ادگ عليك تليفون، گوة امه جرته وطلعته من الغرفه عيونه معلگه برهوفته خايف عليهه ومتأكده بهالليله مراح ينام ولا يهداله بال لحدما يصبح عليهه ويسألهه شلونهه..

والغريب بالموضوع من گعدت الصبح متتذكر شي وتگول شبيكم تألفون عليه حچي شنو تخبلت حتى احچي هيچ، عميد اشرلنه براسه عوفوهه وصدُك محد فتح الموضوع وياهه بعد..

**

"هجران"
طول الطريق ثنينه ساكتين بَـس دموعي تصب، گلبي يوجعني واحسه ينزف دم وجراحة طعنوني بنص گلبي بسچينه خلته ينقسم نصين، نفسي تلعب وراسي دايخ اخاف اتقيأ هنا وازيد حالتي الضيم..

سندت راسي ؏ الجامه بلكت انام وفعلاً نفس كل مرة من اروح لأي مكان بالسيارة اگظي الطريق نوم، حسيت ؏ بكر يهزني حتى اگعد، عدلت گعدتي وباوعت للساعه چانت بـ 5:00 الصبح، نزلني بباب بيت اهلي وماكدرت اللزم روحي، دموعي گامت تنزل وشهگتي علت..

-بكر: بسچ هجران مو زين تبچين هواي

اللتفتتله واني ميته من القهر منه، ادري بي مو بحالي يخاف ؏ بنته تجي كئيبة لو حزينه، طلعت من السيارة وهوه ظل گاعد بيهه مانزل، ماهتميت ولا گتله تفضل..

دگيت باب بيت اهلي وره قريب الثلاث دقايق سمعت صوت حيدوري اخويه، مسحت دموعي بسرعه اخاف يشوفوني هيچ واهبطهم، فتحلي الباب وتفاجأ من شافني..

-حيدر: هجوور شنو هالمفاجأة الحلووة!!

ارتميت بأحظانه وجاهدت اللزم نفسي وما ابچي، گوة شلعني عنه ومن شاف عيوني مدمعه سأل بقلق..

-حيدر: شبيچ هجرانه ليش تبچين؟

-لا حبيبي ماكو شي بَـس مشتاقتلك ولك

ابتسم وحظني لصدره، اشرلي براسه ؏ بكر عود ليش واگف بره، غلست وماجاوبت عفته ودخلت جوة وبعد ماعرف شنو حچة وياه، تلگتني امي تفرك بعيونهه مبين هستوهه گعدت بَـس شافتني فتحت ايدهه وحظنتني بكل قوتهه وبوستني واني انفجرت بالبواچي، وع صوت بكائي گعد بابا..

-صباح: يمه بنيتي شبيچ هجور؟؟

-ماكو شي يروحي انتو بَـس مشتاقتلكم كومة

امي ماصدگت بَـس غلست حتى متشكك بابا، جرني بابا وبقه يبوس براسي ويگول "بنيتي المشتاقلهه، ملح بيتنه" ابتسمت وبست ايده وراسه، سأل ؏ بكر وحيدر گال رجع للناصريه لان عنده شغل

گلت لماما تعبانه واريد ارتاح

-صباح: اي امي روحي خواتچ نايمات بالغرفه

رحت لغرفتنه القديمه وچانت جوري نايمه وندى بصفهه اويللي شگد مشتاقتلهن، نزعت عباتي لان اجيت بيهه وركضت ادحس روحي بنصهن فزت جورية وتفاجأت من شافتني

سلمت عليهه وندى لسه نايمه هايه التنبل لو توگع صواريخ ؏ راسهه هم متگعد

-جوري: ولچ مشتاقتلچ

-اني اكثر والله، شلونه ابنچ؟

-جوري: زين الحمد لله بعده بالخدج وكل يوم اروح ارضعه وارجع

-هجران: يفدووه

-جوري: وانتي شلونه حملچ؟ بشري سويتي سونار

بلعت غصتي ودرت وجهي نمت ؏ جهة ندى

-اي البارحة وحامل ببنيه

-يارووحييييي همزززين بكر وانتي مو تحبون البنات؟

-اي

-لعد شبيچ ضايجة؟ شو ديري وجهچ باوعيلي

-تعبانه جوريه بعدبن نحچي

-ماشي براحتچ

جاهدت حتى انام بَـس افكاري ماخلتني، حسيت روحي اختنگت واني ابچي جوة البطانيه واتخيل بكر رجع علمود يشوف جواهر وميگدر ؏ فراگهه..

حسيت بـ ماما دخلت للغرفه وتصيح بأسمي بَـس سويت روحي نايمة مابيه احچي ويه احد، وفعلاً نمت وماحسيت اله ويه اذان الظهر ندى تبوس وتحظن بيه..

ضحكت من گامت تدغدغني حتى اگعد، ونامت ؏ بطني وتسولف ويه الطفله تگوللهه

-ندى: ولچ هاي امچ تنبللل وتحچي عليه، شوفي مو تصيرين مثلهه لاا صيري مثل خالتچ يمن رحت فدوه الچ يبعد خالتچ

گلت واني لسه بفراشي

-هجران: لا ماما معليچ بخالتچ الخبله صيري مثل امچ نادره

گمزت عليه ولزگت بيه فد لزگه، اليشوفهه يگول صارلنه عشر سنين مشايفين بعض

-ولچ كااافي اختنگتتت شدعووه!!

-ندى: يا عووبة مشتاقتلچ احس صارلنه دهر مشايفيچ ولا تگولين 3 اشهر

-اني هم مشتاقتلكم والله

-شگد رح تبقين؟ حباابه طولي يمنه حبااابه حباااابه

-مطوله حبيبتي لتخافين

كيفت وگامت تدگ وترگص، ضحكت ذكرتني بشهد وسوالفهه المخبله، گمت توضيت وصليت واني گاعده ؏ السجاده اجتني ماما تسأل ؏ سبب جيتي، چذبت عليهه وگتلهه بكر عنده شغل ومدا اشوفه وديكربون عليه وماتحمل اشتغل هواي..

حسيتهه ماصدگتني بَـس ما لحت ويايه هذا طبع امي متلح خصوصاً اذا حست صايره عركة بيني وبينه، تگول الازواج يتعاركون يحلون مشاكلهم ويه بعض حتى متكبر السالفه ويتدخل بيهه هواي اطراف..

صبو الغده چانت طابخة ماما تمن وفاصوليه (يابسه) اويلي متت عليهه تسويهه ثخينه وحبه الفاصوليا چبيره، گالت بخجل..

-صباح: عذرينه ماما بَـس ابوچ مامتسوگ وطبخت المرگة بدون لحم

-هجران: يااا ماما صدُك چذبب اصلاً مليت من اللحم استغفر الله غده وعشه عدهم حتى بالمقبلات يحطو

-ندى: خيييير يداده خيييير العنده ليش مياكُل ويمتع روحه

ضربتهه امي ؏ راسهه بخفه وبابا خزرهه ونتر بيهه..

-فارس: گولي الحمد لله باباا عيب تحطين عينچ ؏ العالم

-ندى: الحمممد لله بابا الللف الحمد لله

سكتنه وكملنه غدانه، همزين الله ماگلتلهه بهذيچ الفتره عميد الدين خطبهه غير تتخبل علينه لو تعرف، كملنه اكل واستفقدت فاضل گالت جوري قبل ليطلع للشغل سأل عني وگلوله نايمه

گعدنه بالغرفه وندى اجت تشكيلي، عقلي وگف مچنت اعرف بابا ديمر بضائقة ماليه صعبه لهدرجة!!

-نداوي انتي صدُك تحچين؟؟!

-ندى: اي والله يا هجران حتى عماتي گامن يحچن ويردن حصتهن من البيت

-هجران: عزززا وانتو وين ترحون؟؟؟

-ندى: مادري متشوفين بابا حاير، حتى من العتبه طلع بقى بَـس ؏ الچاي يشتغل

-ليش طلع؟؟

-تعب كُلش يگول 12 ساعه واگف ؏ رجليه ومدا يتحمل الضغط والراتب ميسوة اربعمية الف دينار

-سودة بوجهي عليكم غير تحچوون تگولوون شجاكم؟!!

-امي متقبل وحتى من حچيت لجورية رزلتني خصوصاً من جوري نزعت تراچيهه وحلفت ؏ ماما تبيعهن ويستفادون من فلوسهن ويتسوگون حتى ميتخجل بابا گدام فيصل من يجي هنا يشوفهه ويشوف ابنه

متت من القهر عليهم وحتى اني ماجبت ويايه فلوس طلعت بسرعه يادوب لميتلي كم قطعه ملابس ومستمسكاتي واجيت، سوده عليه بابا حبيبي نفسه كريمه وشايل عماتي بالصلوات شعجب هسه ياله يردن حصتهن من البيت؟؟

ظليت بهمي وحتى نسيت سالفه بكر وجواهر او نگول تناسيت السالفه واستفسرت من امي عن احاوالهم اكثر وصدمتني من كالت فاضل أجل هالسنه لان بابا ماعنده يدفع قسط، وديشتغل صانع عد واحد يبيع حلويات وحيدر سودة عليه يشتغل عماله، ماعدى الديون والقهر فوگ راس ابويه

اكتفيت من الهم والغم ورحت تمددت قريب المغربيه اجتني جوري ضايجة..

-شبيچ جوريه؟

-جوري: هجران اني كُلش متضايقه هنا

-ياا لييش؟؟

-جوري: دا اشوف بابا يتعب ويشتغل ومتخجل كُلش من يجي فيصل يحير شيجيب ويشتري فواكه ؏ اكل ؏ حلويات يگول ماريد نتفشل گدامه والقهر كله يشتري بالدين

-هجران: كافي جوري حمووت ندى حچتلي سودة بوجهي احنه عايشات بالخير والترافه، هبر هبر لحم يذبون بالزباله وللچلاب هناك ببيتنه وهنا ندى تتحسر ؏ اللگمه الزينه والهدمه

-جوري: اويلي عليهم وحتى من فيصل يجيب مسواگ للبيت بابا يزعل ويگوله عدنه خير من الله ومستوره ويانه

حطيت راسي بحظنهه وصرت ابچي هم ؏ حال ابويه وهم من ضيمي، تفاجأت من جوري هم گامت تبچي ويايه ومن سألتهه تگول ضايجة ؏ حالة ابنهه لان بي ابو صفار، ادري بيهه چذابه واكو سالفه وضامتهه عليه بَـس خليهه هسة بعدين يطلع المستخبي..

گظيت تلاث تيام ببيت اهلي وكلما احد يسألني عن سبب جيتي اچذبلي چذبه الى ان باليوم الرابع جوري لگفتني ابچي جوة البطانيه، جرت الغطه عني وشهگت من شافت حالتي

-جوري: وللللچ هاي شنووو ليش تبچيييين؟؟؟

مسحت خشمي ودموعي بالكلينكس البصفي وگلت بقهر

-هجران: مشتاقتله

-جوري: اي اتصلي بي

-ماگدر

تخوصرت ورفعت حاجبهه، گالت بحده

-متعاركين صحح؟؟

هزيت راسي بـ "اي" وبعد ماتحملت اسكت حچيتلهه كلشي وشكيتلهه، عيونهه صارت بگصتهه وعاطت بيه..

-وللللچ لشوووكت تبقين ثوله وعوووبه انتي هااااا؟؟!!!

-جوريه شأسوي

-وووجعه شنو شتسوووين مو صار نفس الموقف بفترة خطوبتكم لو اني غلطااانه!!!

-صار

-مو اتصلتي بجواهر وحلفت البنيه ماعدهه علاقه وياه لو لا!!!

-اي

-وجعيييي وان شالله مصدگة جواهر تحب رجلچ الغثيث!!

-اي غير تحبه

-يا الهيييي انقذني من غباء هالبنيه!!! لعد مو انتي تتصلين عليه كل يوم من جبت لسه واسألچ اخبارهم تگوليلي جواهر تحن وتون ؏ عميد الدين وتحبه وتموت عليه لو لاااا

-اي بَـس اخاف تچذب عليه

-خايبه دطيييري تعووف واحد مثل عميد الدين وتحط عينهه ؏ رجلچ الثلجاييية؟؟؟ انتي مقتنعه بكلامچ هجرران؟؟؟!

-مو يمكن جاي تضحك علينه

-مستحيييييل وااضح وضوح الشمس تحبه واگص اديه لوما هوه هم يعرف بيهه بَـس مغلس

-وبكررر

-عسى ماكو بكر گولي اميييين

-جووووري لتدعييين عليييه هذا ابو بنتي

-الله يطيح حظچ وحظ.... هفففف استغفر الله ماگدر احچي ماااااگدرررر

-هسه گوليلي شنو اسوي؟

-تتصلين بجواهر وتفتهمين كلشي منهه، الغبره هاجمة ؏ البنيه وملختهه يا ثووووله

-كافي تغلطين عليه ولچ

-انچبييي تستاهلللين بَـس هاي الفالحة بيهه تتهجمين ؏ بنيه حبابه مثل جواهر!! نسيتي شگد ساعدتچ وتحبچ وتدافعلچ لو لااا

-وانتي ليش محروگ گلبچ هيچ؟

-لأنچ غببببيه هجران ومتعرفين تتصرفين، بنيييه حيصير عمرچ عشرين سنه ولسه متعرفين تفرزنين الزين من الموزين!!!!

-كافي هزأتيني بما يكفي خلص البيه مكفيني

غمتني وگالت "اهمداچ" انقهرت من كلامهه بَـس حسيت عدهه وجهة نظر وصدُك لازم اتصل بجواهر وافتح الحظر عنهه لان حظرتهه اول يوم اجيت خفت تدز شي لو تتصل وتشمت بيه..

اخذت موبايلي ودگيت عليهه، دگتين وشالت الخط، جاوبتني..

-جواهر: هجران شلونچ؟

-زينه

-شخبارج؟؟ تدرين البيت مينطب من دونچ والله

تفاجأت من سؤالهه عليه يعني اني ملختهه تملخ قبل لا اطلع معقوله مو زعلانه؟ ماردت اطول بالحديث وياهه ورأساً دخلت بصلب الموضوع..

-جواهر شنو بينچ وبين بكر ورجاءاً اختصري

تنهدت وظلت ساكته، صحت

-الووو وياييي؟؟؟

-اي وياچ، شوفي رح احچيلچ بَـس اريدچ تهدأين وتسمعيني للأخير

-خوش

-ولا اگولچ اگدر اجي لبيتكم؟

-شنووو تجين لكربلا؟؟؟

-اي

-منو يجيبچ؟

-جواهر: اگول لعثمان لان أجل روحته للانبار

-وتجين وياه وحدكم؟!

-لا لا اگول لشهد واجيب رهف اذا قبل عميد

-مادري بكيفكم

-ماشي اني باچر ان شالله العصر يمچ

-هجران: ماشي

-جواهر: مع السلامه (سديت الخط من عدهه واني دموعي منشفت من يوم عركتهه ويه بكر لسه، والي زيد المي وعذابي ابويه من اتصلت بي وگتله...

-هلوو باباتي شلونك

-اسماعيل: هـلا بنيتي، ها خيرچ شو داگه؟

-جواهر: بابا اريد اطلب منك شي بَـس حبااب اسمعني عليك الله

-گولي بابا عيوني الچ

-تسلم عيونك، شوف اني ممرتاحة هنا ببيت شيخ عميد الدين فَـہ ياريت لو نطلع منه اني وشهودة

زفر بقوه واحتدت نبرة صوته..

-اسماعيل: جوااااهررر ممنوووع نعيد ونفتح هالموضوووع!!! اني گلتلكم ترحون بالجامعه التردوهه بشرط تگعدون ببيت عرف ومو تتهجولن بالسكن وهالسوالف!!

-اعرف بابا بَـس اني من اختاريت هالجامعه چنت جاهله ومحد نصحني وگلي ان البيت مليان زلم

-وشنو يعني بي زلم؟ شو كلهم متزوجين وكومه بنات عايشات وياچن

رجعت ابچي واحچي بحرگة..

-بَـس بوكتهه من سجلنه مچان اكو هوايه بنات، بابا حباااب انته مو تريد راحتنه!!

-اي

-عليك الله خلينه نطلع من البيت، حتى لو نلگه حل ونأجر بره حباب مدا اتحمل اني هنا

-اسماعيل (بشك): ليش اكو احد زعجچن؟؟

-لا ماكو اصلاً سيد عميد ممقصر هوه وخاله انتصار وحتى لو تصير سالفه يوگفون ويانه

-اسماعيل: وسلمى؟

-هه بابا انته متعرف خاله سلمى شنو متهتم لجهالهه حتى تهتملنه

-جواهر سدي الموضوع وطلعه متطلعون من بيتهم لحدما تتخرجن

-بَـس بابا...

-جوااااهرررر تاااالييي

-هذا هوه بابا انسى

-اياچ تعيدين السالفه ترا مللتوني كلشي ميعجبچن!! وين اوديچن بعد متگولنلييي؟؟

-بابا اني مو قصدي بَـس...

-اسماعيل: جواهر بنيتي انتي دتگولين الناس زينين واني اخاف عليچن بره افتهمتي عليه حبيبتي؟

-اي، يله مع السالمه

-الله وياچ وديري بالچ ؏ اختچ

سديته منه ورحعت اندب حظي هه ادري بأبويه لو اموت گدامه ميسوي شي ماطول فردوس منطيه رأيهه وگايله نبقى هنا.. محد يگدرلهه لدرجة بابا وماما يخافون من عدهه ويهابوهه..

والمشكله ماگدر اگوله بكر مضايقني لان رح توگع براس عميد الدين ويحچي عليه وهاي اذا ما شّهر بي، ابويه واعرفه كُلش زين ومن دزنه هنا چان يريد يخلص من الهم والمسؤولية، رجال ميهمه غير شغله ومنصبه ولا يفكر ويگول عندي بنات ولازم احافظ عليهن..

يوم بعد يوم دا اكره روحي واكره القرار الغبي الي اتخذته من اجيت لهلبيت، قرار يدل ؏ التهور وعدم النضوج والمشكله من سجلنه محد بي خير وينصحنه ويگول رح نعيش هيچ حياه.. امي وابويه مشو بكلام خاله سلمى ان البيت مابي احد والولد دائماً طالعين وفردوس شجعت اهلي وقبلو..

نمت بفراشي ورفعت رجليه ؏ الحايط افكر شنو اسوي وشلون احل هالسالفه واطلع منهه واخلص، رغم كلشي يصيرلي استاهل وبالجير اني صوچي مافكرت بعقلي واتبعت گلبي واهوائي..

ويا ترى من احچي لهجران سالفتي رح تصدگني وتعذرني لو عبالهه حچي مسفط..

لليل واني گاعده بالغرفه وحابسه روحي وسمعت صوت دگ باب غرفتنه بقوه..

-شهوده گومي فتحي القفل

گامت شهد وگالت بتقاجئ...

-عميد الدين خير؟

-عميد الدين: اطلعي شهد بلا امر عليچ محتاج اختچ بسالفه

طلعت شهد وهوه طب للغرفه، اول مرة يسويهه ويدخل وحده.. گعد ؏ السرير الگدامي وعيونه صايرات حمر وشرايين رگبته وگصته بارزه وصايرات زرگ مبين معصب فوول..

چان منزل راسه ويتنفس قوي، متجرأت اسأله شبي لان شكله اذا واحد گله هلوو ينفجر، سحب نفس قوي ومسح لحيته بأيده.. رفع عيونه عليه ونتر بيه...

-بحياتي ماتخيلتچ هيچ

-اني؟

-چااا انييييي

انفجر وكأنه قنبله موقوته، گام يرعد وصوته خشن وعالي ؏ اثره دخلت امه وبيبي وغزاله بَـس طلعهن وگال التوگف بالباب وتتسمع علينه يلعب بيهه طوبه، اني هنا ماحچيلكم شصار بحالي وجهي گام ينطي اللوان وجسمي يرجف والحرارة صعدت لراسي..

-عميد: راح اسألچ سؤال واحد وتجاوبيني بكل صراحة!

هزيتله براسي اي اجاوبك هوه استرسل...

-هم شي يوم انه محارشچ لو محارش اختچ؟

-انتته؟؟؟؟؟

هز راسه وعيونه مركزهن بعيوني، هزيت راسي بهزات متتاليه...

-جواهر: لا لا لا ابددد ابدد اصلاً انته وين اكو منك

-هه وين اكو مني صح؟

-اي اي طبعاً

وگف ؏ حيله ويروح ويرجع بالغرفه، عاقد حواجبه مغضب ويتنفس بكل قوه تخيلت بجره نفس وحدة يسحب الاوكسجين كله من الغرفه.. دار وجهها عليه وتقرب بخطوات ثابته ومتزنه، جرني من زندي حيل وگومني من السرير.. گال وعيونه بعيوني...

-انه انبح صوتي وضاع وكتي وانه اعلم بيچ وانبهچ ؏ الصح والغلط تالي هيچي تجازيني دكتورة؟؟

انبلع لساني والحچي تبخر من دماغي ويمكن حتى اسمي نسيته بهاللحظه واني اشوف عيونه الحفرت وجهي وخازرني بقوه واسنانه صاكهن ؏ بعض، بلعت ريگي وجاوبته...

-مفهمت

-مافهمتي؟ مافهمتي لو جاي تتغابين!؟

-عميد احچي بالخط العريض

-خوش حچي..

حررني من قبظة ايده القويه وراح قريب الكنتور، مدنج وسبحته بيده لو بَـس اعرف شنو براسه ارتاح، رفع عيونه يباوعلي وگال بنبرة صوت گطعت نياط گلبي من شده الحزن والانكسار البي..

-ولچ انه حطيتچ بعيوني وسديت عليچ، عاندت امي وگلتلهه اجيبهن لبيتي واحافظ ؏ هالبنيات وماخليهن يضيعن! اهلهن موش كفو وماراح يگدرون يحافظون عليچن وتضيعن مثلما اختچ ضاعت! انه عاديت اخوي وعضيدي وابن عمي بكر لخاطرچن وجبتچن بنص بيتي!! تالي هيچ تحچين عليّ جدام هلچ وتكسرين وجهي؟

-اني؟

-لا ابوي

حچاهه بصوت ضعيف ممزوج بالاستهزاء، واضح حيله باد ومابي يحچي، فر ايده ومسح وجهه وعيونه وضحك بأستهزاء...

-شكثر انه غبي

-شنو؟

-انننه غبييي لان وثقت بيچ!!!! وثقت بيچ لدرجة شاررركتچ سرييي السررر الي كسر ظهريييي وظهر بنيتي تالي ترحين تفضحيني وتحچيهه لهلچ يا بت الاصووول!!!!!

-اني شحچيت؟

-اويلي ؏ حظك عمييّد هيچ يصير بيك تاليتهه وسفه والله وسفه

-جواهر: عمييد فهمني اني شحچيت؟؟؟ انته شبيك هاجم عليه ونازل عليه واني اصلاً راح اطلع من بيتكم واخلص

رفع راسه متفاجئ، وسرعان ماغير نظراته للطبيعي، باوعلي بنظره اخيره تمنيت روحي ميته بوكتهه ولا شايفتهه بعيونه، راد يطلع من الغرفه وچلبت بردنه...

-بروح ابوك احچيلي شسويت اني؟؟

-عميد: راجعي نفسچ

-معليك اراجعهه بعدين بَـس گولي اني شمسويه والله العظيم ماجيب طاريك بَـس بالزين گدام اهلي والله

-اي واضح

-لا حباب احچي فدوه لا تكسرني واحچي

غورگت عيونه دموعي وبسرعه غطاهن، يتنفس سريع وانطاني ظهره وعله صوت نحيبه.. تخبلت هذا شبي؟؟؟ تقدمت عليه وصرت بوجهه وبحركه لا اراديه سحبت ايده ولزمت وجهه بثنين ايديه، همست...

-عميدي احچيلي

دفع ايدي عنه وراح بعيد عني حتى ماشوفه من يبچي، اللتفت عليه وره فتره لا تقل عن العشر دقايق وگال بصوت مبحوح واضحة بي الكسره والحسرة...

-عميد: انه اختچ النذلة تعيرني بمرتي جدام ابوچ وتگول ماعرفت تحافظ ؏ شرف مرتك وهسه تحچي بالشرف

شهگت ودگيت ؏ صدري..

-جواهر: صخااام الصخم وجهها الله يشيلهه شگالت؟؟؟

-هذا اليسوي زين وياكم جواهرر تدوسون عليه وتأذونه!!

-عميد بيمن احلفلك اني محچيت لأحد ؏ سالفه شيلاء والله اني معليه

عاط بعلو صوته گلت خلص انفضحنه...

-ساااالفه شيلاااء التحچين عنهه مو سالفه عاااار الحُرمة اغتصبووووهه مااااتت اثر اغتصاااب وهيه حاااامل 8 اشهر بأبنيييي اغتصبوهه ثلاث زللللم مايخافوووون ربهمممم من اشتعلللل مروااان واشتعلللل شرفه الله يطووول بعمري وابرد گلبي بيهم!!!! ولچ كتلت ولدييين من عنده وماشفه غليلي.. ولچ ولد ثنيييين مثل الورددده ذبحتهم بيديييي وماهوّد افادي، ماجااي انااام الليل وانه اشوفهه تجيني بالطيف (حلم) تلوووم بيه وتگول ليش ماحافظت عليه!!! عسااااني متت وتفحمت بهاليوم ولا شايف شكلهه والدمايه بكل مكان..

يحچي ويبچي، گلبي مو بَـس انفطر لا انكسر وتحطم الى اشلاء، من غير عيوني التصب دموع والزيد قهري من گال...

-ولچ الليل مانامه وعلي وانه ادري ببنيتي تعااني وتشوف الاذوهه بالطيف! گلت صار بيهه حادث وفقدت الذاكرة وفرحت ان خلص راح تنسه كلشي وتكمل حياتهه بَـس وين تكمل حياتهه وهمه خذوا شرفهه ويه بت الست سنين!! ولچ بنيتييي هااايه قطعه من افادي فوگاهه يلوموني لييش ماتزوجهه ولييش مو اجوهه شيوخ وعلماء واحسن النصيب وبنيتك تستحق زواج وانه بالع موس وساكتتت..

ماگدر احچي وافكن حلچي واگولن بنيتي باچر يعايروهه وانأخذ شرفهه بدون ماتدري اصلاً!! اووووف ناااار بگلبي من يوم موتتهه لسه!! حتى مالي عيييين اروحن لگبرهه وازورهه وانه اتذكر چلامهه بأذني من تگولي عميدي لا تتأخر عليّ انه صايره اشتاگلك وماشوفك! ياريتني انهمدت بيومهه وبقيت بالبيت وماطلعت شجااااني وطلعتتت شجاااااني

يعظ بأصابعه وگام يدگ ؏ راسه بكل قوه سطر نفسه سطر، ركضت عليه وحطنته امتص غضبه ووجعه.. حط راسه ؏ چتفي بدون ميبادلني الحظن ودموعه نگعت قميصي.. مسحت ؏ راسه واني اهمس...

-جواهر: ميخالف حبيبي هذا مو ذنبك، عميد ؏ كيفك ويه نفسك فدوه

بقينه ؏ هالحال ونواسي نفسنه بالدموع والنحيب، واني اعرف ليش يخاف عليه وع شهد والسبب مرته مرت بحاله أغتصاب وماتت اثر نزيفهه ماللحگ يوصلهه للمستشفى وللاسف من جيبوهه ابنه ماطول كم يوم ومات وره امه.. الله يلعنهم وحسبي الله ونعم الوكيل بيهم چانو ثلاث زلم ؏ شيلاء وواحد ؏ رهف وهيه كله عمرهه ست سنوات.. ولليوم شخصياتهم مجهوله وميعرف منو بَـس العرفه من جماعه مروان وحتى من قتل ثنين من اولاده مروان مافك حلگه ولا حچة وثبتت السالفه عليه..

الشرطه تدخلت بوقتهه ووقفو عميد الدين ومرتضى ومروان بكل عين جسره تنازل وگال ثار بيناتنه واخذو ثارهم بدون لا گعده ولا شي لان صعبة يگعد بسالفه اغتصاب مرته وبنته رح يصيرون ؏ كل لسان وهذا الشي موت عميد اكثر لان لليوم يعايره بنظرات عيونه ويذبله بسامير وكم مرة بمرة صارت حرب بيناتهم وانهدو ؏ بعض وتفاككهم عشاير..

گلبي مات وحيلي باد ماعرف منين يجينه القهر وشلون بينه باچر عگبه اذا مروان النگس مافك ياخة عن عميد الدين وما اذى بشي اكبر وشي يكسر ظهره فوگ كسرته من اغتصب مرته وبنته، وللاسف هذا الصار......!!!

يتبع☘️...

♛ ♛ ♛ ♛ ♛ ♛ ♛ ♛ ♛ ♛
يي عينيييي وگولو زازا متدللنه 😉 هم بارت طويل ومفاجئ وهم قفله بسيطه ديلاا خنشوف منو يحچي بعد😂🙂 المهم لتنسون التصويت والتعليق حبايبي😚💕.