شفاه مخملية الفصل السابع والعشرون 27 - بقلم 𝐙 𝐇 𝐑 𝐀

♛ ♛ ♛ ♛ ♛ ♛ ♛ ♛ ♛ ♛

نبدي ببارت طويل لعيونكم😉♥️.

"شفاه مخملية"

بقلم: زهراء السلامي.

#غَزلٌ زين بهِ الحُب جدرانه
واحساسٌ غريب قالو عنه
انهُ هـوو ... نعم هـوو
اجمل ما في الحُب امانهُ
واروع ما في المُحب قربهُ و وفائهُ
عشقتهُ عشقاً گبيراً في احدى فترات الحياة
لكنهُ لم يكن متبادل من الطرفين
انهمرت الدموع عليه حتى تحجرت العينين
و نبض القلب بأسمهُ حتى سكن وجعاً
و تلهفت الروح لـ رؤيته حتى ذبلت
كيف انتزع هذا الحُب واسكن الم الروح ؟
ماذا استطيع فعلهُ لنسيان هذا الشخص الذي لم يبادلني العشق ؟
كيف يمكنني ان انتزعهُ من قلبي بعد ان اعتبرني ابنتهُ ؟
و بعد كُل هذهِ المعاناة التي مَررتُ بهـا
أَصبحتُ مُلكاً لاخيه ....

من ابداع جميلتي Shahad_alhsnawe

♛ ♛ ♛ ♛ ♛ ♛ ♛ ♛ ♛ ♛

دخلت للفندق ودموعي ماگدر اوگفهه، امي كاظتني من ايدي وتهدي بيه، يعني خلص؟ انتهى كلشي؟ صرت لأخو حبيبي؟ بعد ماگدر احظنه لو اضحك وياه واتداهر واسولف براحتي؟ صار حمايه اخو رجلي؟ اوووف يالقهرر نار تسعر بگلبي ومجاي تخمد..

ودعتني امي وسلمت عليه ووصتني ؏ چم سالفه بَـس ماسمعت شي لان احس روحي راحت وياه، ويه اخر ابتسامه البرزت سنونه الليلو ومن لوحلي بأيده ودعالي بالسعادة ويه اخو!!..

طب عليَّ مرتضى والضحكة تارسه وجهه عبالك فاز بجائزة چبيرة وچان يحارب حتى يحصل عليهه، گعد بحدي (بصفي) ؏ القريوله (السرير) وگال بنبرة صوت هادئه مليانه رغبه..

-مرتضى: صرتي ليه غزالتي

هزيت راسي ودموعي تجري، سحب حنچي وصار وجهي بوجهه، ابتسم ومسح دموعي، حچة بنفس النبرة الهادئة..

-ماريد اشوفن هالدموع، اوعدچ اخليچ اسعد انسانه بهالدنيا وماخذلچ ابد وتگومين تعشگيني عشگ مسودن مثل ما انه اعشگچ

تنهد بعمق واردف بكلامه

-تدرين غزاله اعشگچ وعيوني عليچ من اول ما شبيت، وعميد اخوي حس بيه اكثر من مرة اجي واراقبچ واراقب كل تحركاتچ، من تمرضين أحسنّ روحي تروح ومن تضحكين گلبي يضحك وينتعش، چنت احسد عميد الدين لان تنامين بصفه بصغرچ، واله تگعدين بحظنه وتحببين (تبوسين) بي، اله انه چنتي بعيده عني كل البعد، اتحسر وانقهر واوقات توصل بيه اكره اخوي واسوي شغلات تقهره مني لان تحبي اكثر مني بَـس عميدي فهمني ان تحبي حب أبَوي وموش شي ثاني

انفكت عگده لساني وسألت سؤال يرگع بداخلي

-غزاله: وانته لسه عبالك انه احبن عميدي؟

ضحك وحرك راسه بالنفي، گال بنبرة صوته الماكرة..

-لا ادري بيچ تحبي مثل ابوچ حالچ من حال رهف، ويله خاتون شني راح نبقى نسولف يله يله بدلي وتعاي نتعشه متت جوع وعلي

هزيت راسي ورحت للحمام، ماحتاجيت مساعدته بنزع البدله رغم عانيت بَـس ماگدرت اطلب منه يساعدني لان ما اضمن شني يسوي وراهه

نزلت تسريحتي وخففت مكياجي ولبست دشداشه گصيره توصل لنص الفخذ امي جايبتهه وهددتني اذا مالبستهه تعاقبني وانه اخاف من عقوباتهه، استحيت اطلع بيهه هيچ وهيه مشلتحه وصايره كيمونه خيط، دورت ؏ روب اللبسه بلكت ماما جايبتلي بَـس الحظ ماكو..

طلعت من الحمام واحس ببطني صاير فراشات تخبط وتطير بنصهه، چان ملتهي يحظر بالاكل واكو خيارة بأيده جاي ياكلهه، گال وهوه داير وجهه..

-يلا حبيبتي جهز العشه....

دار وجهه وصفن عليَّ، بلعت ريگي بصعوبه وانه اشوف عيونه گامت تلمع وگصني گص من فوگ ليجوة، تقدم عليّ وحاوطني من خصري وسفطني ؏ الحايط، همس بصوت راخي..

-خالي انعل ابو اليتعشه ويعوف هالگيمر

اخذ شفايفي ببوسه عميقه ونزل ؏ رگبتي جسمي رجف وانفاسي نگطعت من راد ينزعني الدشداشه وووو......

**

فتحت عيوني والدنيا لسه تدور بيه، رجعت غمضتهن لان صرت اشوف مغوش واضويه هواي تأذيت، اريد اتذكر شنو صار، نهضت روحي ؏ كيف وبقيت گاعده ؏ الگاع، تذكرت الجبة مفتوحة عزا خاف مبين شي مني..

باوعت لنفسي الجبه مسدوده ومحنطتني تحنط وحجابي هم ضابي حيل، شنو منو هذا الچان بالمطبخ؟ وين راح الحرامي وشنو سوه بيه؟؟ رفعت راسي بعدما چنت منزلته اريد اتوازن وتفاجأت من شفته بوجهي ساند جسمه ؏ الحايط ومچتف ايده ونظراته عليه..

گمزت من مكاني واحس بطني انشلعت من الالم ومن سرعة حركتي بَـس ماهتميت، صحت بخوف..

-انته.. انته.. انته منووو وشتريييد؟؟ وين عياللي؟؟ ترا احم ترا عدنه هواي زلم هنااا والله يأذوك والله هسة هم شسمه هسه يجي زوجي يموتك والله

صافن عليه وابتسامة مكر مرسومه ؏ ثغره، حرك ايده ثنينهن بحركة كأنما ديرجف وگال بأستهزاء..

-بووويه گمتو اتراعد يعني هسة فد نعال رجليك؟

تفاجأت من حچايته، وحرت شأسوي اعوفه لو ابقى واگفه؟ مو خاف اذا اروح ويجي يركض ورايه ويسويلي فدشي، دعيت من الله يجي احد هسة وينقذني، بَـس رجع هالحرامي وفاجأني من گال..

-جوعان شنو ماعدكم اكل؟

عزا بعينه شگد ميستحي وهذا شو مامتقيد ولا خايف عافني وراح للمطبخ ورجع يدور بالثلاجة، شكيت بالموضوع ان هذا مو حرامي وكأنه يندل البيت لان ديتحرك براحته، رحت وراه للمطبخ ومديت راسي من الباب، سألت اسخف سؤال ممكن ينسأل بالوقت الحالي..

-انته مو حرامي؟

طلع راسه من بعدما چان غايص بنص الثلاجة، رفع حاجبه الطويل وبرم شواربه السود الي من الاساس بيهن برمة بسيطه من الاطراف، گال بصوت متلاعب..

-والله ماعرف انتي شنو تگولين؟ شايفه حرامي يلبس شروال (سروال) وفانيله؟

سكتت وماجاوبته، اردف بأبتسامه برزت اسنانه الناصعة البياض صايرات ابيض من حياتي..

-انا عثمان وهذا بيت ابنو لعمي عميدي

-هجران: انته عثماان؟؟!!

سألت بتعجب، بادلني السؤال..

-اي وشبيكي متفاجأة؟

-هااا لا لا بَـس احم شسمه مو ابد ماملتقين من قبل

گال ببرود وعيونه طافيه مبين تعبان او نعسان..

-عثمان: اهااا يله مو مشكله هسة اللتقينه وانتي شنو اسمِك؟

-اني هجران واصير زوجة اخوك بكر

گلب عيونه وگال بهمس..

-احيييييي

ماتفاجأت من ردة فعله لان وااضح وضوح الشمس ثنينهم واحد ميبلع الثاني وبكر يحچي ؏ عثمان كله بالموزين، ترخصت منه وگلت ارجع للغرفه لان احس وگفتي هنا وياه غلط، رجع سألني..

-لحظه هجران اسمك گلتيلي صح؟

-اي

-احم ولو أزحمكي بَـس اريد شي آكلو وماعرف وين الاكل محطوط؟

-ليش ماتعشيت ويه الزلم؟

-لا من التعب ماگدرت آكُل شي بَـس هسة عصافير بطني گعد يزقزقو من الجوع

ابتسمت، گالهه بطريقه غريبه وتضحك

-هجران: ماشي شوف الگدوره مال الاكل مو يمنه صايرات بمطبخ البراني فَـہ اخاف اطلع واجيبلك مناك ويطلع اكو زلم

-لا لا تطلعي ماكو لزوم خلص انام جوعان تسلمي

-لا ليش تنام جوعان خو انته روح صبلك مناك

-يبا أَنا عجوزي كثير ومو مال اروح وارد فَـہ انام هيك ؏ الخفيف احسن

هزيتله براسي وگتله بكيفك، صعدت لغرفتي وتمدتت ؏ الچربايه شو ذوله تأخرو شنو سالفتهم، غمضت عيوني اريحهن وبعد ماحسيت اله ثاني يوم الصبح وبكر نايم بصفي، ماگعدته خلي يرتاح..

لبست حجابي والجبة ونزلت جوة وشلون وجه يفتح النفس شفت گدامي..

-صباح الخير عمه

-فتوح: هااا يمسعده شني شو مغبشه اليوم شعندچ؟

-لا عمه اني دائماً اگعد من وكت هيچ بَـس انتي تكونين نايمه

شهگت ولطمت صدرهه

-فتوح: دهر صابچ وچسر صوابچ شني گصدچ ولچ انه بايده مثلچ؟؟؟

-لا عمه بَـس.... (قاطعني صوت بي بحة خشنه..

-هجران اتركيها ماتاخذي حق ولا باطل منهه

ابتسمت وصبحت عليه، بادلني بأبتسامه وهز راسه بمعنى "اهلاً وسهلاً او صباح النور" فتوح فكت حلگهه وبدت بلواگتهه..

-فتوح: اويليي بويييه المزيوون ولك عثيمننن وينك يابعد عمتك مشتاگه ليك انه

-عثمان بأستهزاء: فوديتُكي عمة ادري بيكي تحبيني وتموتين عليه

-فتوح: اي يبعد امك اخخخخ امك اخخخخخ شون حُرمة چانت

وبدت تبچي بالچذب، عثمان هز راسه وطبطب ؏ ظهرها بَـس الحركات الجاي يسويهه بوجهه موتتني من الضحك وبروده قاااتل، يبوو هذا شگد يستهزأ وشكله مغرور

-عثمان: عمه بسك من الدراما وينهه جديتي؟

-فتوح: شنهي؟؟ دارنا شني عمه؟

-عثمان: عممه جدة عطيات وينهي؟

-فتوح: بالحجرة يابعد عمتك.. يممه من فدوة لهلطول والجسم والهيبه افيييش يريحة هلييي نسخة بچر بَـس انته احلى يابعد هالروح والريه.. يباااوو دخيلك يا علي موش زلمة حلغووم احوووو

گوة كاتمة ضحكتي عليهه هاي شبيهه تخبلت؟؟! وعثمان موتني اكثر من ابتسملهه بالچذب وحچة...

-عثمان: ماراح اتزوج نرجوسه بنتك لا تنفخي فيني

-فتوح: هااااا لاا لاا يمه حبيبي انته، شني نرجس تاخذهه وععع چنهه جريذي معفن لا اصلاً انته لازم تتزوج احلى بنيات العشيره

-عثمان: وينهن بنوات (بنات) العشيره؟؟ شو كلهن صرگعانات (مصايب)

عافهه وراح لغرفة بيبي، واني فلتت للمطبخ انفجرت بالضحك هناك يا يمممة هذا شنووو جسر وميخجل من احد..

انشغلت اسوي الريوگ وارتب المطبخ وسمعت صوت طلقات قويه جايه من بره وتتقرب بأتجاه بيتنه، يا ستار هاي شكوو؟؟ طلعت بره واذا اشوف غزل ومرتضى بوجهي وبصفهم احمد (اخو بكر) يضرب طلقات بالهوا

سلمت ؏ غزاله فدوه للترافه شگد لايگتلهه صباحية العرس، توقعتهه اول شي تسأل ؏ امهه بَـس فاجأتني من گالت بلهفة..

-عميدي وين؟

-هجران: هااا مادري يجوز بعده نايم لان ماشفته لسه

هزت براسهه ودخلت جوه وراح وراهه مرتضى، گعدن جواهر وشهد وعاونني بالريوگ بَـس جواهر مو طبيعية ومن سألتهه شبيچ گالت والدمعه بعينهه..

-عميد لسه مارجع من البارحة

-يااا صدُك تحچين؟؟

-جواهر: والله العظيم

-هجران: وينه؟ وين راح؟ بَـس شو الكل عادي عدهم ومحد متوتر لو خايف

-جواهر: ميدرون بي لسه مارجع، خايفه اني هجراان

-لا حبي ان شالله ماكو شي، هسه اسأل بكر عنه

-اي فدووه

رحت للصاله چان الكل هنا وعمه دلال وفتوح يهوسن لغزل ومرتضى وعيون غزل تطاير منا ومنا، ماگدرت اسأل بكر عن عميد الدين فوراً لان اللتهى ينطي غزل هديتهه وبقية اخوانهه همات انطوهه..

بكر طلع زنجيل طويل وثگيل ومداليه بأسمهه، وفيصل وغيث واحد انطاهه حجل والثاني سوار، واحمد انطاهه تراچي طوال وثگال، اما هدية عثمان چانت احلى وحده وكلنه البنات تخبلنه عليهه

طلع سوار صاير ؏ شكل زنجيل حلقات وينزل منه حرف الـ "غ" مدندل منه، كُلش حلوو ونااازك، باركنالهه مرة ثانيه ورحت اسأل بكر ؏ عميد گال عنده طلابه بالسماوة وطلع من الصبح ورايح عمو خليل وياه..

طمنت جواهر بَـس چنهه ضاجت كُلش لان حتى غده ماقبلت تاكل ويانه، كملت شغلي وگلنه نگعد نونس غزاله ونحتفل بيهه، حظرت حبشكلات وسوالف وصعدنه لغرفتهه، شهد گالت بمكر

-شهد: احممم احمممممم خو ماكو شي مناااا منااااك ترا رح ندخلللل

-غزاله: ههههههه ولچن تعالن شمالچن

-شهد: اي مو شمعرفني گلت خاف يطلع مرتضاوي ديسوي شسمه احم شسمه يعني

ضربتهه غزل بخفه ؏ زندهه وضحكت بحياء، گالت مرتضى جوه ويه عثمان، وشهد گعدت واستلمتهه خلت غزاله تحچيلهه كلشي فضحتنه..

-هجران: ولچ شهيداااان عزززا العزااااچ خليتي البنيه تحچي كلشي

-شهد: اي داده غير نتعلم شسوي

-جواهر: اييع شگد مقرفة انتي شعليچ مرة ورجال وشغلات تخصهم انتي شكو جايبه روحچ ومنبصه

-شهد: مراح اتجادل وياچ ادري بيچ مطنگره من وره الحوووب

ماعلقت ؏ كلامهه وحتى مانطت أي ردة فعل، اتصلنه بجوري وفتحنه مكبرة صوت وهوسنه لغزاله ورگصناهه ورهف تگمز بيناتنه، رغم الوناسه والروح الحلوة الموجود بالغرفه بَـس غزل عيونهه تعبانه وواضح بيهن حُزن مجهول..

ترخصنه منهه لان مرتضى گال يريد يدخل يمهه، طلعت جواهر اول وحدهة، رحت وراهه وگلت احاچيهه بَـس گالت مصدعه ومتتحمل سوالف فَـہ عفتهه براحتهه..

گضه اليوم طبيعي حاله حال أي يوم بين شغل وسوالف ويه البنات، رحت لغرفتي وبكر چان متمدد ؏ الچربايه، نمت بصفه ومددت اطرافي بتعب وسندت ظهري، صحت بألم مكتوم..

-آآآه

اللتفت عليه يباوعلي، گال بهدوء

-سلامتچ

-افف تصدگ حبيبي شگد تعبانه والله صارلي اسبوع انهلكت هلاك

-بكر: الله يساعدچ كله واله اجره

-اي والله صح، احم انته گولي شسويت بهالاسبوع؟

گلب نفسه صار مقابيلي وسند راسه بأيده، تلمس شفايفي وگال بصوت متلاعب..

-اريدن بوسة

ضحكت بدلال وبسته خفيف، جرني لحظنه واصابيعه تلعب بشعري، حچة بتعب

-عميد الدين مادري شماله وياي؟

رفعت راسي اباوعله، سألته بأستغراب

-شبي؟

-تنهد بعمق: كل شغل الديوان ؏ راسي بعلي حتى الشغل ماجاي اگدر اطلع

-اي صح حتى مدا تجي للبيت هواي، زين ليش هيچ؟

-مادري يعني والعباس حتى اشتاگيت

-ابتسمت بمكر: المن اشتاقيت؟

باوع بعيوني وماجاوب، رجع جرني عليه ويلعب بخصلات شعري الفحمي، فاجأني من گال..

-هجران ليش ما تصبغين شعرچ اصفر؟

نهضت روحي عنه وعيوني صارت بعيونه، چان واضح ديحجي جد مو شقه، ضحكت وسألته..

-هجران: ليش عود؟

-بكر: مادري انه احبن الشعر الاشگر

-بَـس اني سمرة وميلوگلي هيچي لون

-حاولي

-مو يا گلبي ميصير يعني سماري من النوع الشويه طوخ وميرهم هيچ لون عليه

رجعت ملامحه للوجوم وحچة ناهي الحديث..

-خلص انسي

دار وجهه عني وانطاني ظهره، شنو هسه زعل؟؟ زعل لان ميرهملي اللون الاصفر؟؟ بليلتهه مانمت ضجت حيل وطار من عيوني النوم..

گعدت الصبح ومشه اسبوع نفسسس الروتين والخطار رايحين رادين وكل شويه مسوين عرس جديد لغزاله ولازم تنزل كاشخة ولابسه البدلات والفساتين والمكياج، اني شخصياً انقهرت عليهه شگد ما تعبت..

صار الليل وعمه دلال چانت دتريد تسوي عشه بَـس گوة واگفه، رحت عليهه وگلت اعاونهه وسوده عليه حتى تلهث من تمشي، صارلهه فتره تصيح رجليهه توجعهه وگلبهه تحسه تعبان، عاد گلتلهه تروح ترتاح واني اكمل..

وگفت ؏ الطباخ اگلي كبة، صايرات الخوانم ميسون شغل ومحد يحچي وياهن بَـس من اني اتعب لو ماسوي شغلي اشكال مسبات ورزايل احصل من عمه سلمى وفتوح..

شلت الطاوة المتروسه زيت يفور اريد احطهه ؏ العين الچبيره، وانفتحت باب المطبخ بطريقه همجية خلتني اطفر والزيت قسم منه وگع ؏ ايدي

شاغت روحي وگمت اگمز بمكاني من الالم ماعرف وين انطي وجهي، گمت اصيح "ولچ يمااا لحگيلي" ثواني واشوف عثمان ؏ راسي ضرب گصته قوي وصاح

-لا يا بسطال الحمزة شوو تأذيتي؟؟؟

من شوطت گلبي والوجع صحت بي

-لاااا ماتأذييت بَـس عجبني اگمززز واهلهل من الفررح فرحااانه لاختك غزااله

صفن بوجهي وكأنه تفاجأ من ردة فعلي، همس

-اسف مو قصدي ادخل للمطبخ بهالطريقة

سكتت وگوة كتمت ضحكتي من شفت شكله ياخي هالرجال ليش يضحكني، ملامحه حاده تدل ؏ قوة الشخصيه فَـہ ابد ميلوگله من يصير بريء ويعتذر، ماجاوبته ورحت للمي اريد اغسلهه وصاح بيه...

-عثمان: لاااع دحگي (شوفي) راح اجيب مرهم وتدهنينو حتى يخف الوجع

هزيت راسي بالموافقه وراح، الصاله هوسة ومحد يسمعني لو اصيح منا لعگب باچر وحتى لو سمعوني اشك اذا احد اهتم لو متت مو انوب احترگت ايدي، رجع عثمان شايل عصارتين بيده انطاني وحده وگال بتحذير

-راح تحرقكِ شوي بَـس لا تمسحينو لان هذا راح يطيب الحرق ومايظل اثرو

سويت مثل ماگلي ورغم الوجع بَـس تحملت، گعدت ؏ الكرسي واجت فتوح تباوعلي بنظرات كلهه شك وملامز، حچت بصوتهه المزعج

-فتوح: شمااالچ يالخنفسانه شني ايه (اجه) الدور ؏ عثماااان (وغمزت بخبث)

مچانت عندي الطاقه احچي لو اجادلهه بَـس فاجأني رد عثمان الهه

-عثمان: عمه تعدي (تفضلي) لمكانِك بلا امر عليكي

فتحت عيونهه بصدمه وراحت وهيه تدردم عليه وتغلط ماعرف شبيهه ويايه وليش هيچي تكرهني، رجع دار وجهه عليه بَـس عيونه ؏ ايدي الضعيفه السمره، گال وهوه مكشول وجهه

-عثمان: هااا لسه توجعِك؟

استحيت من نظراته وتوقعته لعبت نفسه مني، گمت بسرعه بدون ماحچي شي بَـس وگفني صوته..

-عثمان: وين رايحة؟

-گلت واني منزله راسي: اروح اغسل الدهن

-عثمان: يولي لااااا شني أَنا احكي هندي؟!!!

-هااا ليش؟

-جاي اگلكِ مايصير تغسلينو يبا مايصير مو زين

-مو يحرگني

-ميخالف تحملي شوي، حدري هينه

اشر ؏ الكرسي واني مثل المكوكيهه گعدت عليه، ظلت عينه ؏ ايدي واني اظمظم بيهه كُلش مستحيه وهوه يعيط حتى اشيل ردن العبايه عنهه

-عثمان: تردين برداغ (گلاص) مي؟

رفعت راسي متسائله..

-العفو؟ ماسمعت؟

-عثمان: مي مي تردين؟

-لا تسلم..

دار عيونه ليگدام واني منصية راسي مستحية، اجن جواهر وشهد استلمني مفزوعات من منظر ايدي.. رغم الحرق مو چبير وما شوهها هوايه بَـس اكيد اخترعن من سمارهه وبشاعتهه، شهد حچت...

-شهد: عثمان شجاك غير تنتبه شوهت ايدين البنيه

زفر بقوه وعقچ حاجبه، گال بضيق...

-عثمان: مو متعمد بالغلط صارت

-هجران: لا خلص سيد عثمان شنو السالفه اصلاً كُلش عادي متعوده ؏ الچويات وشلعان الگلب اني

جواهر لمعت عيونهه بدموع من حچيت هيچ وشهد ضاجت وطلعت من المطبخ، اما هوه چان ساكت وماحچة شي، ترخص مني وتحمدلي ؏ السلامة وگمت اني اكمل العشه وروحي تسعر من وجع ايدي وجواهر تتوسل بيه اروح وهيه تشتغل نيابة عني بَـس ماگدر لان متعرف تگلي وخاف تحرگ الاكل، كملت الگلي وكلشي وفرشو السفرة وگعدنه نآكُل حتى محد كلف ؏ نفسه وسألني ليش لافة ايدچ..

كملت اكلي وگمت اريد اروح للغرفه وعمه سلمى عاطت..

-سلمى: ويييين رايحة؟؟؟ والمواعييين منو يغسلهن؟؟

-عمه اسفه بَـس ايدي كُلش توجعني

ضحكت بأستهزاء وفرت ايدهه

-سلمى: من گعدتي تتعشين مگلتي ايدي توجعني بَـس من اجت السالفه للمواعين صحتي ايدي

نزلت راسي وماجاوبتهه، چانت گاعده بيبي عطيه وعثمان واحمد يشربون چاي، بيبي عاطت بيهه..

-حجية عطيه: ولچ سليمة عوفي البت گولي لجواهر لو شهد يغسلن!!

-سلمى: ميگدرن عدهن امتحان صعب مشفتي من الصبح لسه مطلعن من الغرفه گاعدات يقرن

عفست وجهها بيبي وفرت بيدهه، وجهتلي السؤال..

-حجية عطيه: شمالچ ولچ سلبووحة؟

-هجران: بيبي طفر الدهن عليه واحترگت ايدي

-حجية عطيه: اويلي ؏ البيادة ولچ حبوبه شني شو انتي فاهيه بَـس هب ريح؟

ابتسمت شلون رهمتهن ثنينهن سوا مادري، سلمى حچت ضايجة...

-سلمى: منيلهه هب ريح اوذن ياله تگوم تشتغل

تدخل عثمان وگال بنبرة صوت منزعج كُلش...

-عثمان: أَنا صارلي اسبوع هينه وماشفتهه تگعد كلو تشتغل

-سلمى: وانتتته ليش تدافعلهه؟؟؟!

-عثمان: وشبيكِ تصرخي كل ما بالموضوع هذي انسانه مو خدامه الِك ولأهل هالبيت الفاشل!!

-سلمى: بكييييفي اسوي الارييييده مو اختهه صارلهه عشرين يوم مصنگره يم اهلهه ومتقبل اشوف حفيدي واهااا اله اطلع حرگتي بأختهه

-حجية عطيه: ولچ سلييييمه انچعمي لا اگوملچ بهااذ (شالت عوچيتهه) روحي حبوبه ارتاحي ولا تشتغلين منا لچم يوم حتى لا تلتهب

ابتسمت وهزيتلهه براسي وسمعت عمه سلمى تدردم وتگول مدللتهن ومطلعة عيونهن وبيبي ردتهه..

-حجية عطيه: وعلي لو عمييّد يدري بيچن هيچ تعاملنهه يحوس بأفادچن

انخمش گلبي من سمعت هيچ ماعرف ليش ضجت كُلش من عرفت بي يدافعلي ويخاف عليه مع العلم عثمان هم دافعلي بَـس ماضجت بالعكس فرحت وحسيت احد گدر ؏ سلمى وردهه بما ان بكر مو هنا...

عله صوت سلمى وتعيط عياطهه العايق ونزلت غزاله واحمد هم حچة بَـس بسرعه طلع لان ميتحمل هوسة وتلعب نفسه، الريحني شويه من عثمان گال..

-عثمان: يبا مايصير حرااام هذي بنت امانه برقبتكم وعميدي يخاف ربو لهيك مايرضى عليهه

رجعت لغرفتي وبعد ماسمعت تكمله الحديث، تمددت ؏ الچربايه وماچانت عندي طاقة انتظر بكر لان من رجعت من بغداد لليوم مدا اشوفه هواي كل وقته يگعد بالديوان لان عميد الدين لسه بالسماوه حيصيرله اكثر من اسبوع..

صبحت ثاني يوم ومارست روتيني، اليوم اروح للدكتوره تفحصني واشوف جنس الطفل شنو.. بدلت ملابسي وگعدت انتظر بكر يرجع بَـس فاجأني من گال مراح يگدر يوديني وراح يجي عليه احمد ياخذني للدكتوره..

نقهرت كُلش وتناگرت وياه بَـس گال مو بيده وعنده شغل فوگ راسه مدا يشوف دربه، استسلمت ونزلت جوة اسحل بروحي.. انتظرت احمد يجي وگلت خليني اعرض ؏ جواهر تجي ويايه حتى هم تغير جو

رحتلهه للغرفه چانت ممدده نص جسمهه ؏ الچربايه ومعلگه رجليهه ؏ الحايط، تموتني من الضحك من تسوي هيچ ومن اسألهه ليش تنامين بهالطريقه تگول معناهه دا افكر..

-جوهرتي تجين ويايه للدكتوره؟

-جواهر: مابيه حيل اروح لمكان

-اووف جواهر شبيچ ليش هيچي زعلانه ترا الرجال بالسماوة وعنده شغل مو رايح يلعب

-جواهر: هجران اني مجرد اريده يجاوب ؏ اتصالاتي!! ليش هيچ ديهملني ويشرد مني ماعرف!!!

گلتلهه شي خلاهه تصفن، بحلقت عيونهه بالفضاء وبلعت ريگهه بخوف، حچت بهمس..

-جواهر: معقوله؟

-هجران: اي يجوز يدري بيچ تحبي وميريد يكسر گلبچ

-لا شلون درى؟

-ماعرف بعد اني دا اگول يجوز، وعميد واضح ذكي وفطن وأتوقع افتهم بيچ

غطت وجهها وگالت بصوت مبحوح

-جواهر: هجرانه من رخصتچ اريد اگعُد وحدي

-هجران: انچبيي مراح تگعُدين وحدچ رح تبچيين ادري بيچ!! ولچ كاافي خلصت دموعچ صارلچ اسبوع تونين عليه

-لا مابچي عليه اصلاً منو گال معبرته اني اكرهه ولا احبه وطلع من گلبي

-هه هه هه هاي احچيهه للدبه حبيبي عيونچ تحچي غير شي، زين تعالي دگي عليه هسه وخنشوف بلكت يجاوب

-ميجاااوب والله ادگ صارلييي اسبوووع حتى رح يگوم يحچي عليه ويگول عني لزگة بَـس والله خايفه عليه اخاف صايرله شي

-لا ولچ اسم الله لو صايرله شي اكيد نفتهم!

-من وين نفتهم اذا هيه أمه متتصل بي وتگول ماطول مارد عليه مره معناهه ميريد احد يزعجه!! عليچ الله هجران دتشوفين البرود العايشين بي لو مدا تشوفين!!!

-هجران: اي والله اني منتبهه عليهم، خو عمو خليل لو الدنيا تنگلب ميهتم ولا يسأل ابد

-جواهر: اويلي ؏ حظييي

-جواااهر اجتني فكره حلووة

-شنو؟

-بَـس بشرط تجين ويايه للطبيبه حباابه ماريد اروح وحدي ويه احمد استحييي

-هاااا احمد رح ياخذچ يعني مو بكر؟

-اي بكر عنده شغل

-لعد تمام اجي، بَـس اول گوليلي شنو الفكرة؟

-نتصل من عثمان اكيد يحاچي ويجاوب عليه

لمعت عيونهه بطريقه حلوة وارتسمت ابتسامه ؏ وجهها، ركضت گدامي واني وراهه، دورنه ؏ عثمان بالبيت ودعيت من الله ماطالع وصدُك شفنا گاعد بالحديقه يدخن، جواهر ركضته وگالت بحماس

-عثماااان شلووونك؟؟؟

باوعلهه بتك عين وفر بأيده، ماجاوبهه، استغربت من تصرفه وليش هيچ بارد وياهه بَـس هيه ضحكت وگالت بصوتهه المدلول..

-جواهر: عثمانوو اسفه والله اسفه ديلااا سامحنيييي كافي لتصير مزعج وغثيث

-عثمان: هسه صرت مزعج، ولِك صرگعانه صارلي اكثر من اسبوع هينه حتى ماكلفتي ؏ نفسِك وگلتيلي الحمد لله ؏ السلامه

-جواهر: مو شسمه شوف چنت احم.. اني هايه...

-عثمان: اسس اسس لا تدوخيني روحي غاد

-ولك وين اروح احتاج مساعدة منك

جر نفس من جگارته وحبسه بصدره ثواني وزفره من خشمه، طلع دخان كثيف صفنت هذا كله چان بصدره شلون تحمل وما گح؟؟ هوه صح بكر هم يدخن بَـس ممسوي هالحركة من قبل..

-عثمان: شتريدين؟

-جواهر: اووي عرفت مراح تضوجني وترجعني زعلانه

-عثمان: اختصري يبا

-اهووو لسه ضااايج

-عثمان: اي يله بساع اريد اروح

-جواهر (گمت امتمت): اءء شسمه شوف اني شسمه اريد شسمه تتصل...

-عثمان: يولي شني شسمه ما شسمه شتريدين؟؟؟ هجران هذي صديقتكِ مزعجة كثير ديري بالِك منها

ضحكت ؏ كيف وهوه هم ضحك وجواهر طنگرت وگلتله ماريد منك شي، صاح بيهه حتى تحچي وهيه مبوزه..

-عثمان: ديلااا احكي يولي لا تزعلي

-جواهر: ماريد منك شي الله لا يعوزني الك

ضحك بقوه وضرب راسه وگال..

-الله يساعدك يعميدان شلون تتحمل عنادهه

-جواهر: هااااا تضحك وتصنف عليه انته وعميد صحح اني الكم والله مزاعله عميد ولا احچي وياه بعد

-عثمان بضحك: لا لا حبابه حاكي الزلمة حيموت عليكي

شفت الدموع تلمع بعيونهه كُلش انقهرت عليهه، وعثمان سكت من شافهه هيچ، گال بهدوء

-عثمان: يولي ليش تبكين ترا جاي امزح وياكِ

-جواهر: ماااابچييي منو گال دا ابچيييي وگول لصديقككك اني اكرهه وماريد اشوف وجهه بعددد ولا اسمع صوته وراح ارجع لبغداد وما اطلب مساعده منه ابددد افتهمتتتت

انصدمت من تصرف جواهر حسيتهه رجعت طفله، بَـس هاي التحب ترجع جاهله من يجيبون طاري حبيبهه.. عثمان ابتسم وهز راسه، طلع موبايله وگال

-عثمان: صايرين دكتوره جواهر

بهتت ملامح وجهنه ووحده گامت تباوع للثانيه من اتصل بعميد وگال..

-عثمان: شلونك يول عميدي، مشتاقين.. اي شوف هاي جواهر تگول هيه تكرهك وماتريد تشوف چهرتك بعد ولا تسمع حسـ....

جواهر عاطت

-كذااااب والله كذااااب مگلت هييييچ عميد تسمعنيييي مگلت هيييچ والله

سحبت من عثمان الموبايل وراحت بنهاية الحديقه تحچي وياه، وهوه يضحك عليهه ويفر بأيده، دار وجهه يباوعلي وگال بضحكة خفيفه..

-عثمان: هاذي خبله وماعدهه عقل

-هجران: لا سيد ترا جواهر حبابه وفقيرة

-ضحك بقوه وگال: ادري جاي اشاقيهه احب من تعصب

ابتسمتله وهوه يباوعلهه، رجع گال

-دحگي دحگي (شوفي) كيف تبرم بخصلات شعراتهه وتحاكي يويلي متتت شنو هالبنت

ركزت نظري بيهه وصرت اضحك وياه، صدُك حركاتهه تخرفن وشلون تگلب بعيونهه وتبرطم شفايفهه الممتلئه تصفن وتاخذ العقل، ومن كملت مكالمتهه اجت علينه مبوزة، عثمان گال..

-هااا شبعتييي

-جواهر: هففففف اكرهكك

-عثمان بضحك: وأَنا احبِك للاسف

-جواهر: اننننن يله هجور امشي نروح

دخلنه جوه وجواهر بدلت ملابسهه وطلعنه للطبيبه، فحصتني وگالت كلشي تمام الحمد لله وصار وقت تاخذلي سونار، گلبي يدگ وانفاسي اضطربت تمنيت من كل گلبي اكون حامل ببنيه والدكتوره اكدتلي هالشي من گالت...

-مبروك حامل ببنيه

الفرحة الغمرت قلبي بوكتهه طيرتني فووگ فوگ بالسما، جواهر باركتلي واول ماطلعت من الدكتوره اتصلت ببكر وبشرته، گام يعيط من الفرح مامصدگ يممة حبيبي شگد ما اني فرحانه فرحت اكثر من سمعت ردة فعله

بالطريق جواهر گالت لأحمد تريد تنزل بسوبر ماركت تشتري كم شغله، نزلنه وهوه گال يگعد بالسيارة ينتظرنه لحدما نخلص، گرصتهه من زندهه وگلت..

-هاااا شصار ويه الحب؟!

هزت راسهه بضوجة وگالت وهيه تختار نوع ككو حتى تشتري

-جواهر: گال تعبان وميجاوب أي احد من راح لسه

-من شنو تعبان؟

-اووف هجران مادري والله هالرجال ياخذ هم الدنيا بَـس مينطي لأحد طاقة سلبيه وميشكي يعوفهه بگلبه ويسكت

-خطيه والله اني انقهر عليه

هزت راسهه بأسى وطلعنه من المحل، طول الطريق هيه سرحانه اما اني الفرح مسيطر عليه ومدا اگدر اخفي ابتسامتي، مممم يعني رح تجيني زنوبه حبية ابوهه وامهه.. وصلنه للبيت وبوجهي رحت اسوي عشه لان عمه سلمى گامت تدردم..

بشرت بيبي عطيه والباقين وكلهم فرحولي وباركولي ودعولي تكون من الصالحات، كملت العشه وصعدت فوگ ارتاح، ردت اتمكيج وابدل بَـس ظهري مقسوم نصين وگوة نايمة عليه..

غمضت عيوني ارتاح وغفيت، حسيت الصبح بكر مو بصفي يبوووو يعني غفيت وماسهرت وياه البارحة، شگد ضجت وزعلت لان احس جاي اهمله وماهتمله..

طبيت سبحت وبدلت ملابسي ونزلت جوة واستقبلني نرجس وفتوح وحدة تصد والثانيه ترد واحسهن متخبلات من عرفن اني حامل ببنيه، شو ذوله عكس العالم يتمنون البنيه ويحبوهه وعميد يدلل البنات كُلش..

وع طاري عميد الدين اول ماطلعت اغسل الطارمة صار بوجهي، سلم عليه واني منزله راسي وطب بسرعه مستعجل للبيت.. تمنيت جواهر تشوفه حتى ترتاح بَـس چنهه مالحگت لان مثل ما دخل طلع..

سمعته يودع امه وگال عنده خطار مهمين.. مشه الوقت واللتهيت منا ومناك وماشفت أي وحده من البنات عدا حلا اجت تزورنه وغزاله گاعدات بالصاله، سولفت وياهن واشوف حلا شلون حليانه من بعد الزواج بَـس لسه ماحملت وتگول رجلهه يگول بعد وكت وخليهم يتونسون سوا..

استغربت من تفكيره، طبعاً من اجيت لهنا لسه يوميه انصدم بفد شي او عادة تخص اهل الجنوب، چنت ماخذه نظره موحلوة عنهم ومتندمه ؏ هالنظره، توقعتهم ناس مع احترامي جاهلين ومتعجرفين يكرهون البنات ويردون المرة بَـس تحمل وتجيب وميحترموهه والشيوخ شايفين رواحهم وميتحچون بَـس طلع العكسسس تماماً..

تركت البنات يسولفن ورحت اكمل شغلي لان اذا ماكمل اليوم اني معزاية جوه ايد سلمى وفتوح، اجت عمه دلال تسحل بروحهه وگوة تمشي، سألتهه...

-سودة عليه عمه لسه بعدچ تعبانه؟

-دلال: آآه اي عمة رجليناتي گوة امشي عليهه

-سودة بوجهي شنو بيدي عليچ؟ شسوي حتى ترتاحين؟ افركلچ؟

ابتسمت واجت تطبطب ؏ ظهري، تفاجأت من جرتني تبوسني وحظنتني لصدرهه وتردد كلمه "ذهب والله ذهب" دخلو عثمان وغيث وصفنو علينه، غيث حچة بأستهزاء وهوه يفر بأيده...

-غيث: شنيي شو گابة الرومانسيه عدكم؟

-دلال: اشش امشي ولك غاد لا تكدرني

-عثمان: عمه عوفِك من غيث، جايين خطار، رتبو الديوان وبخروهه

-دلال: اي بعيني هسّ ادزن نرجس

-عثمان: احييي مالگيتو غير نرجس الخوثة، عمه بشرفِك انتي رتبيهه فشله يجوون الوادم وهيه مرعبله

-دلال: هاهيه انه ارتبهه يله روحو انتو

ترخصو منه وطلعو، مبينين مخبوصين ومن سألت عمه دلال تگول ذوله كل سنه يجون يزورون عميد الدين من العمارة شيوخ وزلم..

راحت ؏ المنظفات واخذتهن وطلعت للديوانيه، رحت وياهه اساعدهه لان كُلش تعبانه خطيه متگدر.. لملمنه المكان وجفلت من طب الگهوچي علينه وعمه صاحت بي...

-دلال: ولك عبد الله وييين طاب هين!!

طلع بسرعه وظل يعتذر من عدنه، يممة شگد خجلت لان نازعة الجبة وباقية بالدشداشه والشال.. كملنه كلشي وطلعنه، رحت ارتاح وجواهر گالت بحماس...

-هجرانه شنو رأيچ امكيجچ وتبدلين؟

-مابيه حيل والله

-جواهر: لچ ليييش؟؟؟ خلي بكر دائماً يشوفچ حلوة ومرتبه!!

-هجران: جوااهر ولچ يا حلوة ومرتبه واني طايح حظي بالشغل

-ميخالف حبي بَـس الرجال ميعذر ويحچي عليچ يگول مرعبله وعينه ترا تروح مناا ومناك.

-هااا هيچ رأيچ؟

-اكيييد، لتخلين تجي وحدة وتاخذه منچ لتصيرين عوبه

-عزااا لا لا اسم الله گومي مكيجيني يله

صعدنه وحطتلي مكياج اسود واختارتلي دشداشه نوم اللبسهه وسوتلي شعري كيرلي، ختمت مكياجي بحمرتي المفضله، صاحت بأنبهار

-يباااووو الله يساعدك بكررر ؏ هالحاته!!!

ضحكت ورحت اتمايز روحي بالمرايه، متغير شكلي والمكياج بارز ملامحي واحس شويه صايره احلى.. جواهر شمرتلي بوسة بالهوى ونزلت گالت اكيد بكر ؏ وصول متريد تقاطع رومانسيتنه وغمزت..

تعطرت ورتبت الغرفه سريع وانتظرته يجي، عبرت الساعه بالـ 11 بالليل وهوه لسه ماكو بَـس دزلي رساله وگال هسة جاي، اول مافتح الباب ظل صافن عليه ابتسم وگال..

-شني هاي اليوم طالعه غير شكل

تقربت عليه وحاوطت رگبته بأيدي، گلت بصوت ناصي

-اي حبيبي هذا كله الك ابو زنوبة

ضحك وطبع قُبلة ؏ شفايفي، گعدني ؏ الچربايه ونزل گعد ؏ ركبه وحط اذنه وايده ؏ بطني، باس بطني والفرحة مبينه بعيونه

جريته من ايده وگعدنه واحد بصف الثاني، لزم شعري بأيده وگال..

-اي هجران حلو هذا الشعر بعد كله هيچ سوي زين؟

-تدلل يعيونيي كله بعد هيچ شعري

ابتسملي وهز راسه، راح للحمام يسبح واني حظرت حبشكلات وفواكه وعصاير وگعدت انتظره يطلع.. رحت ؏ المراية ارتب الكيرليات خاف تخربطن واجتله رساله ؏ موبايله چان محطوط ؏ الميز مافتحته بَـس شفت الرساله من واحد اسمه "منذر" ادري بي هذا يشتغل وياهم بالمحل..

ماعرف منو صاح براسي بليلتهه وهاي اول مرة افتح موبايل بكر واگلب بي، اعرف الرمز لان كم مرة فتحه گدامي بَـس ميدري بيه اعرفه.. گلبت بالفيس مالته شويه ورحت ؏ الرسائل، گلبي گام يدگ وحرارة صعدت لعيوني من شفت واحد من الارقام مسمي "نَفَسي" دخلت عليه وشفت اخر رساله دازهه اليوم مكتوب بيهه...

"والعباس ابو فاضل مابيه بعد تعبت عليچ الحسين اريد اشوفچ اليوم بالليل اعاينلچ من بعيد وما احاچيچ بشي والله، ليش صايره تتختلين مني وماترضين اشوفچ؟؟!"

يتبع☘️...

♛ ♛ ♛ ♛ ♛ ♛ ♛ ♛ ♛ ♛
حبايب ئلبي شلونكم مشتاقين😍 لتضوجون اذا تشوفون البارت مابي احداث هوايه ان شالله تبدي السوالف بالبارتات التجي.
+
وبالنسبه للهجة "عثمان" كُلش عانيت بيهه واستعانيت بأكثر من صديقه لحتى وصلنه قريب لهجته لان كلامه ميشبه كلام اهل الانبار "الرمادي".. فَـہ لتحكمون وتگولون ميحچون هيچ، الانبار چبيره وبيهه اكثر من منطقه وكلامهم يختلف عن بعض😄.

احبكم واااايد واااايد، بوســـــــاتي💋.